<<в҃ ѡ҆б.: 4>>

И҆збра́нїе ст҃ы́хъ седми́десѧти а҆пⷭ҇тѡлъ, дѡроѳе́а є҆пⷭ҇кпа тѵ́рска, мꙋ́жа дре́внѧ и҆ бг҃оно́сна, и҆ мꙋ́ченика бы́вша во вре́мѧ лїкїні́а и҆ кѡнстанті́на царе́й.

Се́й предрече́нный и҆ соверше́нный мꙋ́жъ писа̑нїѧ разли́чна ѡ҆ста́ви на́мъ, гре́ческа же и҆ ри́мска: зане́же ѻ҆бѣ́ма ѧ҆зы́кома и҆звы́клъ бѣ̀, и҆ соверше́нъ въ ра́зꙋмѣ. По ᲂу҆ме́ртвїи же дїоклитїа́на и҆ лїкїні́а, до́йде своегѡ̀ жили́ща, и҆ бѣ̀ прави́тель тѵ́рскїѧ це́ркве до і҆ꙋлїа́на мꙋчи́телѧ: зане́же не ꙗ҆́вѣ, но та́й свои́ми кнѧ́зи і҆ꙋлїа́нъ ᲂу҆бива́ше хрⷭ҇тїа́ны. Па́ки дѡроѳе́й до́йде ᲂу҆́дска гра́да, въ не́мже и҆ ꙗ҆́тъ бы́въ і҆ꙋлїа́новыми кнѧ́зи, и҆ мно́ги ра̑ны прїе́мъ въ вели́цѣй ста́рости, хрⷭ҇то́ва ра́ди и҆сповѣ́данїѧ, мꙋче́нїемъ сконча́сѧ, сы́й лѣ́тъ ста̀ седмѝ. Се́й ст҃ы́й дѡроѳе́й ѡ҆ седми́десѧтихъ а҆пⷭ҇лѣхъ и҆ ᲂу҆чн҃цѣ́хъ хрⷭ҇то́выхъ глаго́летъ: ѿ ни́хже мно́жайшїи є҆пⷭ҇кпи въ разли́чныхъ ꙗ҆зы́цѣхъ бы́ша: и҆ні́и же въ слꙋ́жбахъ сло́ва, и҆̀хже бж҃е́ственный па́ѵелъ въ посла́нїихъ цѣлꙋ́ѧ помина́етъ: по воскресе́нїи бо и҆з̾ ме́ртвыхъ гдⷭ҇а бг҃а и҆ сп҃са на́шегѡ і҆и҃са хрⷭ҇та̀, по мно́зѣхъ лѣ́тѣхъ всѣ́хъ и҆̀хъ ѡ҆брѣ́тъ и҆ написа̀, и҆́хже и҆мена̀ сꙋ́ть сїѧ̀: <<г҃: 5>>

[а҃] І҆а́кѡвъ бра́тъ гдⷭ҇нь, пе́рвый є҆пⷭ҇кпъ і҆ерꙋсали́мꙋ, и҆́же самѣ́мъ гдⷭ҇емъ поста́вленъ, дре́вомъ бѣли́льнымъ главꙋ̀ є҆мꙋ̀ сокрꙋши́ша, и҆ сконча́сѧ.

[в҃] Клео́па, и҆́же и҆ сѷмеѡ́нъ бра́тъ гдⷭ҇нь, бы́въ вторы́й є҆пі́скопъ і҆ерꙋсали́мꙋ: и҆́же ви́дѣ гдⷭ҇а по воскрⷭ҇нїи, дометїа́номъ царе́мъ ра́спѧтъ сконча́сѧ.

[г҃] Ѳадде́й, и҆́же донесѐ є҆пїсто́лїю а҆́ѵгарю во є҆де́съ: се́й и҆сцѣлѝ є҆мꙋ̀ недꙋ́гъ.

[д҃] А҆на́нїа, и҆́же крести́вый ст҃а́го а҆пⷭ҇ла па́ѵла, въ дама́сцѣ бы́сть є҆пі́скопъ.

[є҃] Стефа́нъ первомꙋ́ченикъ, ѿ і҆ꙋдє́й ка́менїемъ побїе́нъ, сконча́сѧ.

[ѕ҃] Фїлі́ппъ, є҆ди́нъ ѿ седмѝ, и҆́же крⷭ҇ти́вый сі́мѡна волхва̀, и҆ ка́женика кандакі́ина, въ тралі́и а҆сі́йстѣй бы́сть є҆пⷭ҇кпъ.

[з҃] Про́хѡръ, и҆ то́й є҆ди́нъ ѿ седми́ же, въ нїкомиді́и вїѳѷні́й ст҃ѣ́й бы́сть є҆пі́скопъ.

[и҃] Нїкано́ръ, є҆ди́нъ ѿ седмѝ, въ то́йже де́нь ᲂу҆́мре, во́ньже и҆ ст҃ы́й стефа́нъ, съ двѣма̀ ты́сѧщама вѣ́ровавшими во хрⷭ҇та̀.

[ѳ҃] Ті́мѡнъ, є҆ди́нъ ѿ седмѝ, во ѻ҆́стровѣ а҆ра́встѣ бы́сть є҆пі́скопъ, сожже́нъ є҆́ллины сконча́сѧ.

[і҃] Парме́на, и҆ то́й є҆ди́нъ ѿ седмѝ, и҆́же пред̾ ѻ҆чи́ма а҆пⷭ҇лъ ᲂу҆́мре во свое́й слꙋ́жбѣ.

[а҃і] Нїкола́й, и҆ то́й є҆ди́нъ ѿ седмѝ, въ самарі́и бы́сть є҆пⷭ҇кпъ: но ѿ вѣ́ры ᲂу҆клони́сѧ съ сі́мѡномъ.

[в҃і] Варна́ва, и҆́же съ па́ѵломъ послꙋжѝ сло́вꙋ, и҆ въ мі́рѣ хрⷭ҇та̀ проповѣ́да, въ медїола́нѣ бы́сть є҆пі́скопъ.

[г҃і] Ма́рко є҆ѵⷢ҇лі́стъ, петро́мъ а҆по́столомъ во а҆леѯандрі́и поста́вленъ бы́сть є҆пі́скопъ.

[д҃і] Сі́ла, и҆́же съ па́ѵломъ сло́во проповѣ́давъ, въ корі́нѳѣ бы́сть є҆пі́скопъ.

[є҃і] Лꙋка̀, и҆́же съ па́ѵломъ по вселе́ннѣй сло́во проповѣ́да, въ солꙋ́нѣ бы́сть є҆пі́скопъ. Лꙋка̀ ᲂу҆́бѡ є҆ѵⷢ҇лі́стъ бѧ́ше ро́домъ ѿ а҆нтїохі́и сѵ́рскїѧ, ше́дъ въ ѳи́вꙋ македо́нскꙋю при <<г҃ ѡ҆б.: 6>> траїа́нѣ царѣ̀, врачꙋ́ѧй: написа́ же пе́рвѣе ст҃о́е є҆ѵⷢ҇лїе къ ѳео́фїлꙋ нѣ́коемꙋ и҆ге́мѡнꙋ, вѣ́ровавшꙋ во хрⷭ҇та̀. и҆ па́ки по лѣ́тѣхъ мно́зѣхъ страсте́й гдⷭ҇нихъ, повелѣ́вшꙋ ст҃о́мꙋ а҆пⷭ҇лꙋ петрꙋ̀, и҆зложи́ти є҆мꙋ̀ дѣѧ̑нїѧ ст҃ы́хъ а҆пⷭ҇лъ, и҆ посе́мъ и҆зложѝ ст҃ы́й лꙋка̀ дѣѧ̑нїѧ ст҃ы́хъ а҆по́стѡлъ, къ семꙋ́же ѳео́фїлꙋ. и҆ сїѧ̑ соверши́въ, съ ми́ромъ дꙋ́шꙋ свою̀ гдⷭ҇ви ѿдадѐ: и҆ та́кѡ почѝ въ ѳи́вѣ. ст҃ы́ѧ же мо́щи є҆гѡ̀ ѿ ѳи́вы пренесены̀ бы́ша въ це́рковь ст҃ы́хъ а҆по́стѡлъ, и҆ под̾ ст҃о́ю трапе́зою положе́ни.

[ѕ҃і] Сїлꙋа́нъ, и҆́же съ па́ѵломъ сло́во проповѣ́да, въ солꙋ́нѣ бы́сть є҆пі́скопъ.

[з҃і] Крі́спъ, є҆го́же а҆по́столъ помина́етъ въ тїмоѳе́евѣ второ́мъ посла́нїи, въ халкидо́нѣ галїле́йстѣмъ бы́сть є҆пі́скопъ.

[и҃і] Є҆пене́тъ, є҆го́же а҆пⷭ҇лъ въ ри́мстѣй є҆пїсто́лїи помина́етъ, въ карѳаге́нѣ бы́сть є҆пі́скопъ.

[ѳ҃і]А҆ндроні́къ, є҆го́же а҆пⷭ҇лъ въ ри́мстѣй є҆пїсто́лїи помина́етъ, въ пано́нѣ бы́сть є҆пі́скопъ.

[к҃] А҆мплі́й, є҆го́же а҆по́столъ въ ри́мстѣй є҆пїсто́лїи помина́етъ, на ᲂу҆́дсѣ бы́сть є҆пі́скопъ.

[к҃а] Оу҆рва́нъ, є҆го́же а҆пⷭ҇лъ въ ри́мстѣй є҆пїсто́лїи помина́етъ, въ македо́нїи бы́сть є҆пі́скопъ.

[к҃в] Стахѵ́й, є҆го́же а҆по́столъ въ ри́мстѣй є҆пїсто́лїи помина́етъ, а҆ндре́й а҆по́столъ по́нтское мо́ре препла́ваѧ, и҆ доше́дъ а҆грїкопо́лѧ, є҆пі́скопа є҆го̀ въ вѷзанті́и ᲂу҆стро́и.

[к҃г] А҆пе́ллїй, є҆го́же а҆по́столъ въ ри́мстѣй є҆пїсто́лїи помина́етъ, во и҆раклі́и бы́сть є҆пі́скопъ.

[к҃д] Фѷге́ллъ, во є҆фе́сѣ бы́сть є҆пі́скопъ: послѣди́ же сі́мѡново ᲂу҆че́нїе прїѧ́тъ.

[к҃є] Є҆рмоге́нъ, въ мега́рѣ ѳра́честѣй бы́сть є҆пі́скопъ.

[к҃ѕ] Дима́съ, є҆го́же а҆по́столъ въ тїмоѳе́евѣ є҆пїсто́лїи второ́й помина́етъ, ꙗ҆́кѡ фѷге́ллъ и҆ є҆рмоге́нъ проти́вистасѧ ᲂу҆че́нїю бж҃їю: а҆ дима́съ возлюбѝ ны́нѣшнїй вѣ́къ, <<д҃: 7>> въ солꙋ́нѣ і҆ере́й бы́сть і҆́дѡлѡмъ, ѡ҆ ни́хже а҆по́столъ і҆ѡа́ннъ пи́шетъ: ѿ на́съ и҆зыдо́ша, но не бы́ша ѿ на́съ.

[к҃з] А҆поллѡ́съ, є҆го́же а҆по́столъ помина́етъ, въ смѵ́рнѣ бы́сть є҆пі́скопъ, пре́жде ст҃а́гѡ полѷка́рпа.

[к҃и] А҆рїстовꙋ́лъ, є҆го́же а҆пⷭ҇лъ въ ри́мстѣй є҆пїсто́лїи помина́етъ, во врита́нїи бы́сть є҆пі́скопъ.

[к҃ѳ] Наркі́ссъ, є҆го́же а҆пⷭ҇лъ въ ри́мстѣй є҆пїсто́лїи помина́етъ, во а҆ѳи́нѣ бы́сть є҆пі́скопъ.

[л҃] И҆родїѡ́нъ, є҆го́же а҆пⷭ҇лъ въ ри́мстѣй є҆пїсто́лїи помина́етъ, въ па́трѣ бы́сть є҆пі́скопъ.

[л҃а] А҆га́въ, є҆го́же дѣѧ̑нїѧ а҆по́стѡльскаѧ помина́ютъ, и҆́же и҆ да́ръ проро́ческїй прїѧ́тъ.

[л҃в] Рꙋ́ѳъ, є҆го́же а҆по́столъ въ ри́мстѣй є҆пїсто́лїи помина́етъ, въ ѳи́вѣ бы́сть є҆пі́скопъ.

[л҃г] А҆сѷгкрі́тъ, є҆го́же а҆пⷭ҇лъ въ ри́мстѣй є҆пїсто́лїи помина́етъ, во а҆рка́нѣ бы́сть є҆пі́скопъ.

[л҃д] Фле́гонтъ, є҆го́же а҆по́столъ къ колосса́ємъ въ є҆пїсто́лїи помина́етъ, въ марато́нѣ бы́сть є҆пі́скопъ.

[л҃є] Є҆рмі́нъ, є҆го́же а҆по́столъ въ ри́мстѣй є҆пїсто́лїи помина́етъ, въ далма́тїи бы́сть є҆пі́скопъ.

[л҃ѕ] Патро́въ, є҆го́же а҆пⷭ҇лъ въ ри́мстѣй є҆пїсто́лїи помина́етъ, въ потїо́лѣ бы́сть є҆пі́скопъ.

[л҃з] Є҆́рма, є҆го́же а҆по́столъ въ ри́мстѣй є҆пїсто́лїи помина́етъ, въ фїлїппопо́ли бы́сть є҆пі́скопъ.

[л҃и] Лі́нъ, є҆го́же а҆по́столъ въ ри́мстѣй є҆пїсто́лїи помина́етъ, по ст҃о́мъ петрѣ̀ а҆по́столѣ, въ ри́мѣ бы́сть є҆пі́скопъ.

[л҃ѳ] Га́їй, є҆го́же а҆по́столъ помина́етъ въ ри́мстѣй є҆пїсто́лїи, по тїмоѳе́и а҆по́столѣ во є҆фе́сѣ бы́сть є҆пі́скопъ.

[м҃] Фїлоло́гъ, є҆го́же а҆по́столъ помина́етъ, а҆ндре́емъ а҆по́столомъ въ сїнопі́и поста́вленъ бы́сть є҆пі́скопъ.

[м҃а] Родїѡ́нъ, є҆го́же а҆пⷭ҇лъ помина́етъ, се́й въ ри́мѣ со ст҃ы́мъ а҆по́столомъ петро́мъ, нерѡ́номъ ᲂу҆сѣкновє́на бы́ста. <<д҃ ѡ҆б.: 8>>

[м҃в] Лꙋкі́й, є҆го́же а҆по́столъ помина́етъ въ ри́мстѣй є҆пїсто́лїи, въ лаодїкі́и сѵ́рстѣй бы́сть є҆пі́скопъ.

[м҃г] І҆а́сѡнъ, є҆го́же а҆пⷭ҇лъ въ ри́мстѣй є҆пїсто́лїи помина́етъ, въ та́рсѣ бы́сть є҆пі́скопъ.

[м҃д] Сѡсїпа́тръ, є҆го́же а҆пⷭ҇лъ помина́етъ въ ри́мстѣй є҆пїсто́лїи, во і҆коні́и бы́сть є҆пі́скопъ.

[м҃є] Те́ртїй, написа́вый къ ри́млѧнѡмъ посла́нїе, вторы́й є҆пⷭ҇кпъ бы́сть во і҆коні́и.

[м҃ѕ] Є҆ра́стъ, є҆го́же а҆по́столъ помина́етъ, і҆коно́мъ бы́сть і҆ерꙋсали́мскїѧ це́ркве: пото́мъ панеа́дꙋ бы́сть є҆пі́скопъ.

[м҃з] А҆пполлѡ́съ, є҆го́же а҆по́столъ къ корі́нѳѧнѡмъ помина́етъ, въ кесарі́и бы́сть є҆пі́скопъ.

[м҃и] Ки́фа, во і҆коні́и бы́сть є҆пі́скопъ.

[м҃ѳ] Соѳе́нъ, є҆го́же а҆по́столъ помина́етъ, въ колофѡ́нѣ бы́сть є҆пі́скопъ.

[н҃] Тѷхі́къ, є҆го́же а҆по́столъ помина́етъ, и҆ то́й въ колофѡ́нѣ бы́сть є҆пі́скопъ.

[н҃а] Є҆пафроді́тъ, є҆го́же а҆по́столъ помина́етъ, во а҆ндрїакі́и бы́сть є҆пі́скопъ.

[н҃в] Ке́сарь, є҆го́же а҆по́столъ помина́етъ, въ драчі́и бы́сть є҆пі́скопъ.

[н҃г] Ма́рко, сыно́вецъ варна́вль, є҆го́же а҆по́столъ помина́етъ, въ а҆полонїа́дѣ бы́сть є҆пі́скопъ.

[н҃д] І҆исꙋ́съ, реко́мый і҆ꙋ́стъ, є҆го́же а҆по́столъ помина́етъ въ дѣѧ́нїихъ, въ є҆леѵѳеропо́ли бы́сть є҆пі́скопъ.

[н҃є] А҆рѳе́ма, є҆го́же а҆пⷭ҇лъ помина́етъ, въ лѵ́стрѣ бы́сть є҆пі́скопъ.

[н҃ѕ] Кли́ментъ, є҆го́же а҆по́столъ помина́ѧ, глаго́летъ: и҆ съ кли́ментомъ, и҆ съ про́чими поспѣ́шники мои́ми, въ средцѣ̀ бы́сть є҆пі́скопъ.

[н҃з] Ѻ҆нисі́форъ, є҆го́же а҆по́столъ помина́етъ, въ кѷрині́и бы́сть є҆пі́скопъ.

[н҃и] Тѷхі́къ, є҆го́же а҆по́столъ помина́етъ, въ халкидо́нѣ вїѳѷні́и пе́рвый бы́сть є҆пі́скопъ. <<є҃: 9>>

[н҃ѳ] Кꙋа́ртъ, є҆го́же а҆по́столъ помина́етъ, въ виѳꙋ́тѣ бы́сть є҆пі́скопъ.

[ѯ҃] Ка́рпъ, є҆го́же а҆по́столъ помина́етъ, въ бе́рѣ ѳра́честѣмъ бы́сть є҆пі́скопъ.

[ѯ҃а] Є҆ѵо́дъ, и҆́же по ст҃ѣ́мъ петрѣ̀, во а҆нтїохі́и бы́сть є҆пі́скопъ.

[ѯ҃в] А҆рїста́рхъ, є҆го́же а҆по́столъ помина́етъ, во а҆масі́и сѵ́рстѣй бы́сть є҆пі́скопъ.

[ѯ҃г] Ма́рко, нарица́емый і҆ѡа́ннъ, є҆го́же лꙋка̀ въ дѣѧ́нїихъ помина́етъ, въ би́блѣ бы́сть є҆пі́скопъ.

[ѯ҃д] Зѵ́на зако́нникъ, є҆го́же а҆по́столъ помина́етъ, въ дїоспо́лѣ бы́сть є҆пі́скопъ.

[ѯ҃є] Фїлимо́нъ, къ немꙋ́же а҆по́столъ па́ѵелъ написа̀ є҆пїсто́лїю, въ га́зѣ бы́сть є҆пі́скопъ.

[ѯ҃ѕ] А҆рїста́рхъ дрꙋгі́й,

[ѯ҃з] Пꙋ́дъ,

[ѯ҃и] Трофі́мъ: сі́и трїѐ во всѣ́хъ гоне́нїихъ, со а҆по́столомъ па́ѵломъ спострада́ша: на коне́цъ въ ри́мѣ ѿ нерѡ́на царѧ̀ ᲂу҆сѣкнове́ни бы́ша.

[ѯ҃ѳ] Ѻ҆ни́сїмъ, сконча́сѧ въ потїо́лѣ, тертѵ́ломъ є҆па́рхомъ ри́мскимъ.

[ѻ҃] Фꙋртꙋна́тъ.

Сі́и всѝ бы́ша є҆пі́скопи во ꙗ҆зы́цѣхъ: ѡ҆ ни́хже се́й ст҃ы́й и҆ треблаже́нный є҆пі́скопъ дѡроѳе́й тѵ́рскїѧ це́ркве бы́вый написа̀, и҆ предадѐ це́ркви, въ па́мѧть ст҃ы́хъ а҆по́стѡлъ. ѡ҆ ни́хже и҆ па́ѵелъ писа́ше, глаго́лѧ: и҆̀же пре́жде на́съ бы́ша ѡ҆ гдⷭ҇ѣ. семꙋ́же никто́же не невѣ́рꙋй: сꙋ́щее ᲂу҆́бѡ сѐ бы́сть.