<<є҃ ѡ҆б.: 10>>

Ѡ҆ чꙋдесѣ́хъ ст҃ы́хъ а҆пⷭ҇лъ, ꙗ҆̀же сꙋ́ть въ дѣѧ́нїихъ.

[а҃] Пе́тръ и҆ і҆ѡа́ннъ и҆сцѣли́ста и҆́менемъ гдⷭ҇нимъ рожде́ннаго хро́ма, сѣдѧ́щаго пред̾ кра́сными две́рьми.

[в҃] Пе́тръ а҆на́нїю и҆ сапфѵ́рꙋ женꙋ̀ є҆гѡ̀ ѡ҆бличѝ, ᲂу҆кра̑дша ѿ ѡ҆бѣтова́нїѧ бж҃їѧ, и҆ бы́ста а҆́бїе мє́ртва.

[г҃] Пе́тръ во і҆ѻппі́и ᲂу҆ме́ршꙋю таві́ѳꙋ воскресѝ моли́твою.

[д҃] Пе́тръ сходѧ́щъ сосꙋ́дъ съ нб҃сѐ всѧ́кагѡ живо́тна ви́дѣ.

[є҃] Петро́ва стѣ́нь приходѧ́щи на недꙋ́жныѧ, ᲂу҆врачева́ше и҆̀хъ.

[ѕ҃] Пе́тръ храни́мь свѧ́занъ въ темни́цѣ, и҆ а҆́гг҃ломъ и҆спꙋще́нъ бы́сть, стрегꙋ́щымъ во́инѡмъ. и҆ и҆́рѡдъ червьмѝ ꙗ҆до́мь и҆́здше.

[з҃] Стефа́нъ творѧ́ше чꙋдеса̀ и҆ зна́мєнїѧ ве́лїѧ.

[и҃] Фїлі́ппъ на́йде скопца̀ чтꙋ́ща и҆са́їю проро́ка, и҆ крестѝ є҆го̀.

[ѳ҃] То́йже фїлі́ппъ въ самарі́и мно́ги дꙋ́хи и҆згна̀, и҆ хро́мїи и҆ разсла́бленнїи и҆сцѣли́шасѧ ѿ негѡ̀.

[і҃] Па́ѵелъ, приближа́ѧсѧ къ дама́скꙋ, ви́дѣ видѣ́нїе, и҆ а҆́бїе бы́сть бл҃говѣ́стникъ.

[а҃і] Па́ѵелъ въ лѵ́стрѣхъ хро́ма рожде́на и҆сцѣлѝ во и҆́мѧ гдⷭ҇не.

[в҃і] Па́ѵелъ видѣ́нїемъ въ македо́нїю зва́нъ бы́сть.

[г҃і] Па́ѵелъ женꙋ̀, и҆мꙋ́щꙋю дꙋ́хъ ѕо́лъ, ѡ҆чи́сти въ фїлїпписі́ехъ.

[д҃і] Па́ѵлꙋ и҆ сі́лѣ вве́ржєнымъ въ темни́цꙋ, и҆ забїе́нома нога́ма є҆ю̀ въ кла́дѣ, въ полꙋ́нощи трꙋ́съ бы́сть, и҆ разрѣши́шасѧ ᲂу҆́зы и҆́хъ.

[є҃і] По́томъ па́ѵлимъ ѿ ᲂу҆брꙋ́сца недꙋ́жныѧ и҆ бѣсны̑ѧ и҆сцѣлева́хꙋсѧ.

[ѕ҃і] Па́ѵелъ є҆ѵтѵ́ха въ трѡа́дѣ, со ѻ҆ко́нца спа́дша и҆ ᲂу҆ме́рша воздви́же, глаго́лѧ: дꙋша̀ є҆гѡ̀ въ не́мъ є҆́сть. <<ѕ҃: 11>>

[з҃і] Въ кѵ́прѣ ѻ҆́стровѣ запретѝ па́ѵелъ волхвꙋ̀ є҆ллѵ́мѣ, и҆ бы́сть а҆́бїе слѣ́пъ.

[и҃і] Є҆гда̀ пловѧ́ше па́ѵелъ, въ ри́мъ грѧды́й, пострада́ же са́мъ и҆ сꙋ́щїи съ ни́мъ въ кораблѝ, дні́й и҆ но́щїй четырена́десѧть, всѣ́мъ ча́ющымъ ᲂу҆мре́ти. предста́въ же гдⷭ҇ь речѐ па́ѵлꙋ: ꙗ҆́кѡ тебѐ ра́ди даю̀ всѣ́мъ живо́тъ, и҆ спасе́ни бы́ша.

[ѳ҃і] И҆зше́дшꙋ па́ѵлꙋ ѿ кораблѧ̀, є҆хі́дна ᲂу҆грызнꙋ̀ и҆̀, и҆ всѝ мнѧ́хꙋ, ꙗ҆́кѡ ᲂу҆мре́ти є҆мꙋ̀: є҆гда́ же пребы́сть без̾ вреда̀, мнѧ́хꙋ є҆го̀ ꙗ҆́кѡ бг҃а сꙋ́ща.

[к҃] Ѻ҆тца̀ поплі́ева во ѻ҆то́цѣ, водны́мъ трꙋдо́мъ болѧ́ща и҆сцѣлѝ па́ѵелъ, и҆ и҆́ны мнѡ́ги недꙋ́жныѧ.