<<н҃є: 109>>

Знамєна́нїѧ і҆а́кѡвлѧ посла́нїѧ.

[а҃] Ѡ҆ терпѣ́нїи и҆ вѣ́рѣ несꙋмнѣ́ннѣй, и҆ ѡ҆ смире́ннѣй мꙋ́дрости къ бога̑тымъ.

[а҃] Въ не́мже ѡ҆ раждеже́нїи сꙋ́щемъ въ на́съ, и҆ страсте́хъ ꙗ҆̀же ѿ негѡ̀, ꙗ҆́кѡ не ѿ бг҃а вина̀, но є҆́же во бла́го что̀ на́мъ ѿ негѡ̀.

[в҃] Ѡ҆ кро́тости и҆ чистотѣ̀ тѣ́ла, и҆ дѣѧ́нїи бла́зѣ пода́ннѣ на блаже́нство, и҆ ѡ҆ мꙋ́дрости, и҆ ми́рнѣ словесѝ.

[г҃] Ѡ҆ любвѝ сꙋ́щей комꙋ́ждо нелицемѣ́рнѣ по зако́нꙋ. ꙗ҆́кѡ не ѿ вѣ́ры то́кмѡ, ни ѿ дѣ́лъ є҆ди́ныхъ, но ѿ ѻ҆бою̀ кꙋ́пнѡ ѡ҆правда́етсѧ человѣ́къ.

[д҃] Ꙗ҆́кѡ де́рзъ и҆ безчи́ненъ ѧ҆зы́къ, ᲂу҆мерщвлѧ́етъ и҆мꙋ́щаго и҆̀: є҆го́же держа́ти потре́ба на похвалꙋ̀ и҆ сла́вꙋ бж҃їю.

[а҃] Въ не́мже ѡ҆ блазѣ́мъ житїѝ, и҆ несварли́вѣмъ въ себѣ̀ ѿ славохо́тїѧ, сꙋ́щагѡ ѿ премꙋ́дрости человѣ́ческїѧ.

[в҃] Ѡ҆ бж҃їей премꙋ́дрости, ꙗ҆́же свы́ше.

[г҃] Ꙗ҆́кѡ ѿ ᲂу҆ны́нїѧ и҆ сластолю́бїѧ, ра́ть и҆ нестрое́нїе, и҆ вражда̀ на бг҃а быва́етъ.

[д҃] Ѡ҆ покаѧ́нїи на спасе́нїе и҆ не ѡ҆сꙋжда́ти и҆́скреннѧгѡ.

[ѕ҃] Ꙗ҆́кѡ не ѡ҆ человѣ́цѣ, но ѡ҆ бз҃ѣ стꙋпа̑нїѧ мꙋ́жеви ᲂу҆правлѧ́ютсѧ.

[а҃] Въ не́мже ѡ҆ лихоима́нїи бога́тыхъ, и҆ ѡ҆ пи́щи и҆́хъ ꙗ҆́же въ мі́рѣ, и҆ ѡ҆ пра́веднѣмъ сꙋдѣ̀ бж҃їи.

[в҃] Въ долготерпѣ́нїи и҆ ѡ҆ претерпѣ́нїи страсте́й, и҆ ѡ҆ и҆́стинѣ.

[г҃] Поꙋче́нїе комꙋ́ждо подо́бно сꙋ́ще съ вѣ́рою.

[д҃] Ꙗ҆́кѡ слꙋжи́ти подоба́етъ спасе́нїю и҆́скреннѧгѡ. <<н҃є ѡ҆б.: 110>>

Сказа́нїе і҆а́кѡвлѧ собо́рнагѡ посла́нїѧ

(ндⷧ҇ѧ) Поне́же са́мъ і҆а́кѡвъ сїѐ пи́шетъ, сꙋ́щымъ ѿ ѻ҆боюна́десѧте колѣ̑нꙋ разсѣ́ѧвшымсѧ, и҆ вѣ́ровавшымъ въ гдⷭ҇а на́шего і҆и҃са хрⷭ҇та̀. Пи́шетъ же ᲂу҆чи́тельное посла́нїе, ᲂу҆чѧ̀ ѡ҆ разли́чныхъ и҆скꙋше́нїихъ: ко́е ᲂу҆́бѡ є҆́сть ѿ бг҃а, ко́е же ѿ своегѡ̀ се́рдца человѣ́кѡмъ: и҆ ꙗ҆́кѡ не сло́вомъ то́кмѡ, но и҆ дѣ́ломъ показа́ти вѣ́рꙋ подоба́етъ: ꙗ҆́кѡ не слы́шателїе зако́на, но творцы̀ ѡ҆правда́ютсѧ. Ѡ҆ бога́тыхъ же завѣщава́етъ, да не лꙋ́чше творѧ́тсѧ бога́тїи ни́щихъ въ це́рквахъ, но па́че и҆ ᲂу҆ѧзвлѧ́ютсѧ ꙗ҆́кѡ презо́риви. И҆ въ коне́цъ ᲂу҆тѣша́ѧ ѡ҆би̑димыѧ, и҆ предповелѣва́ѧ и҆̀мъ долготерпѣ́ти до прише́ствїѧ хрⷭ҇то́ва. И҆ наꙋчи́въ ѡ҆ терпѣ́нїи, ѿ і҆́ѡвлева блага́гѡ терпѣ́нїѧ, повелѣва́етъ призва́ти свѧще́нники къ болѧ́щымъ, и҆ тща́тисѧ ѡ҆браща́ти заблꙋ́ждшыѧ ко и҆́стинѣ: бы́ти бо ѡ҆ се́мъ возме́здїю ѿ гдⷭ҇а, ѡ҆ставле́нїѧ грѣхѡ́въ. И҆ си́це скончава́етъ посла́нїе. <<н҃ѕ: 111>>

СОБО́РНОЕ ПОСЛА́НІЕ

І҆А́КѠВЛЕ.

Глава̀ пе́рваѧ.

(заⷱ҇ н҃) [а҃] сⷯ а҃ І҆а́кѡвъ,[[Въ сре́дꙋ л҃а- ѧ недѣ́ли:]] бг҃ꙋ и҆ гдⷭ҇ꙋ і҆и҃сꙋ хрⷭ҇тꙋ̀ ра́бъ, ѻ҆бѣмана́десѧте колѣ́нома, и҆̀же въ разсѣ́ѧнїи, ра́доватисѧ. в҃ Всѧ́кꙋ ра́дость и҆мѣ́йте бра́тїе моѧ̀, є҆гда̀ во и҆скꙋшє́нїѧ впа́даете разли̑чна, г҃ Вѣ́дѧще, ꙗ҆́кѡ и҆скꙋше́нїе ва́шеѧ вѣ́ры содѣ́ловаетъ терпѣ́нїе: д҃ Терпѣ́нїе же дѣ́ло соверше́но да и҆́мать, ꙗ҆́кѡ да бꙋ́дете соверше́ни и҆ всецѣ́ли, ни въ че́мъ же лише́ни. є҃ А҆́ще же кто̀ ѿ ва́съ лише́нъ є҆́сть премꙋ́дрости, да про́ситъ ѿ даю́щагѡ бг҃а всѣ̑мъ вкꙋ́пѣ, и҆ не поноша́ющагѡ: и҆ да́стсѧ є҆мꙋ̀. з҃ Да про́ситъ же вѣ́рою, ничто́же сꙋмнѧ́сѧ: сꙋмнѧ́й бо сѧ ᲂу҆подо́бисѧ волне́нїю морско́мꙋ, вѣ́тры возмета́емꙋ и҆ развѣва́емꙋ. з҃ Да не мни́тъ человѣ́къ ѻ҆́нъ, ꙗ҆́кѡ прїи́метъ что̀ ѿ бг҃а. и҃ Мꙋ́жъ двоедꙋ́шенъ, неꙋстро́енъ во всѣ́хъ пꙋте́хъ свои́хъ. ѳ҃ Да хва́литсѧ же бра́тъ смире́нный въ <<н҃ѕ ѡ҆б.: 112>> высотѣ̀ свое́й. і҃ Бога́тый же во смире́нїи свое́мъ: занѐ ꙗ҆́коже цвѣ́тъ травны́й ми́мѡ и҆́детъ. а҃і Возсїѧ́ бо со́лнце со зно́емъ, и҆ и҆зсꙋшѝ травꙋ̀, и҆ цвѣ́тъ є҆ѧ̀ ѿпадѐ, и҆ благолѣ́пїе лица̀ є҆ѧ̀ поги́бе: си́це и҆ бога́тый въ хожде́нїи свое́мъ ᲂу҆вѧда́етъ. в҃і Блаже́нъ мꙋ́жъ, и҆́же претерпи́тъ и҆скꙋше́нїе, занѐ и҆скꙋ́сенъ бы́въ, прїи́метъ вѣне́цъ жи́зни, є҆го́же ѡ҆бѣща̀ бг҃ъ лю́бѧщымъ є҆го̀. [а҃] г҃і Никто́же и҆скꙋша́емь да глаго́летъ, ꙗ҆́кѡ ѿ бг҃а и҆скꙋша́емь є҆́смь: бг҃ъ бо нѣ́сть ꙾и҆скꙋси́тель ѕлы̑мъ꙾[[꙾и҆скꙋша́емь ѕлы́ми꙾]], не и҆скꙋша́етъ же то́й никого́же. д҃і Ко́ждо же и҆скꙋша́етсѧ, ѿ своеѧ̀ по́хоти влеко́мь и҆ прельща́емь. є҃і Та́же по́хоть заче́нши ражда́етъ грѣ́хъ: грѣ́хъ же содѣ́ѧнъ ражда́етъ сме́рть. ѕ҃і Не льсти́тесѧ бра́тїе моѧ̀ возлю́блєннаѧ: з҃і Всѧ́ко даѧ́нїе бла́го, и҆ всѧ́къ да́ръ соверше́нъ свы́ше є҆́сть, сходѧ́й ѿ ѻ҆ц҃а̀ свѣ́тѡвъ, ᲂу҆ негѡ́же нѣ́сть премѣне́нїѧ, и҆лѝ преложе́нїѧ стѣ́нь. и҃і Восхотѣ́въ бо породѝ на́съ сло́вомъ и҆́стины, во є҆́же бы́ти на́мъ нача́токъ нѣ́кїй созда́нїємъ є҆гѡ̀.

Коне́цъ средѣ̀.

(заⷱ҇ н҃а) [в҃] ѳ҃і Тѣ́мже бра́тїе моѧ̀ возлю́блєннаѧ,꙳[[Въ четверто́къ л҃а-ѧ недѣ́ли: Бра́тїе моѧ̀ возлю́блєннаѧ,꙳]] да бꙋ́детъ всѧ́къ человѣ́къ ско́ръ ᲂу҆слы́шати, и҆ ко́сенъ глаго́лати, ко́сенъ во гнѣ́въ. к҃ Гнѣ́въ бо мꙋ́жа, пра́вды бж҃їѧ не содѣ́ловаетъ. к҃а Сегѡ̀ ра́ди ѿло́жше всѧ́кꙋ скве́рнꙋ, и҆ и҆збы́токъ ѕло́бы, въ кро́тости прїими́те всажде́нное сло́во, могꙋ́щее спастѝ дꙋ́шы ва́шѧ. <<н҃з: 113>> к҃в Быва́йте же творцы̀ сло́ва, а҆ не то́чїю слы́шатели, прельща́юще себѐ самѣ́хъ. к҃г Занѐ а҆́ще кто̀ є҆́сть слы́шатель сло́ва, а҆ не творе́цъ, таковы́й ᲂу҆подо́бисѧ мꙋ́жꙋ смотрѧ́ющꙋ лицѐ бытїѧ̀ своегѡ̀ въ зерца́лѣ: к҃д Оу҆смотри́ бо себѐ, и҆ ѿи́де, и҆ а҆́бїе забы̀, како́въ бѣ̀. к҃є Прини́кїй же въ зако́нъ соверше́нъ свобо́ды, и҆ пребы́въ: се́й не слы́шатель забы́тливъ бы́въ, но творе́цъ дѣ́ла, се́й блаже́нъ въ дѣ́ланїи свое́мъ бꙋ́детъ. к҃ѕ А҆́ще кто̀ мни́тсѧ вѣ́ренъ бы́ти въ ва́съ, и҆ не ѡ҆бꙋздова́етъ ѧ҆зы́ка своегѡ̀, но льсти́тъ се́рдце своѐ, сегѡ̀ сꙋ́етна є҆́сть вѣ́ра. к҃з Вѣ́ра бо чиста̀ и҆ нескве́рна пред̾ бг҃омъ и҆ ѻ҆ц҃е́мъ сїѧ̀ є҆́сть, є҆́же посѣща́ти си́рыхъ и҆ вдови́цъ въ ско́рбехъ и҆́хъ, и҆ нескве́рна себѐ блюстѝ ѿ мі́ра.

Коне́цъ четверткꙋ̀.

Глава̀ втора́ѧ.

(заⷱ҇ н҃в) [г҃] сⷯ а҃ Бра́тїе моѧ̀, не на лица̀꙳[[Въ пѧто́къ л҃а-ѧ недѣ́ли: Бра́тїе, не на лица̀꙳]] зрѧ́ще и҆мѣ́йте вѣ́рꙋ гдⷭ҇а на́шегѡ і҆и҃са хрⷭ҇та̀ сла́вы. в҃ А҆́ще бо вни́детъ въ со́нмище ва́ше мꙋ́жъ, зла́тъ пе́рстень носѧ̀, въ ри́зѣ свѣ́тлѣ, вни́детъ же и҆ ни́щъ въ хꙋ́дѣ ѻ҆де́ждѣ: г҃ И҆ воззритѐ на носѧ́щаго ри́зꙋ свѣ́тлꙋ, и҆ рече́те є҆мꙋ̀, ты̀ сѧ́ди здѣ̀ до́брѣ: и҆ ни́щемꙋ рече́те, ты̀ ста́ни та́мѡ, и҆лѝ сѧ́ди здѣ̀ на подно́жїи мое́мъ: д҃ И҆ не разсмотри́сте въ себѣ̀, и҆ бы́сте сꙋдїи̑ помышле́нїй ѕлы́хъ. є҃ Слы́шите, бра́тїе моѧ̀<<н҃з ѡ҆б.: 114>> возлю́блєннаѧ, не бг҃ъ ли и҆збра̀ ни́щыѧ мі́ра сегѡ̀ бога́ты въ вѣ́рѣ, и҆ наслѣ́дники ца́рствїѧ, є҆́же ѡ҆бѣща̀ лю́бѧщымъ є҆го̀; ѕ҃ Вы́ же ᲂу҆кори́сте ни́щаго. не бога́тїи ли наси́лꙋютъ ва́мъ, и҆ ті́и влекꙋ́тъ вы̀ на сꙋди̑ща; з҃ Не ті́и ли хꙋ́лѧтъ до́брое и҆́мѧ нарече́нное на ва́съ; и҃ А҆́ще ᲂу҆́бѡ зако́нъ соверша́ете ца́рскїй, по писа́нїю: возлю́биши и҆́скреннѧго своего̀ ꙗ҆́коже себѐ сама́го: до́брѣ творитѐ. ѳ҃ А҆́ще ли на лица̀ зритѐ, то грѣ́хъ содѣва́ете, ѡ҆блича́еми ѿ зако́на ꙗ҆́коже престꙋ́пницы. і҃ И҆́же бо ве́сь зако́нъ соблюде́тъ, согрѣши́тъ же во є҆ди́номъ, бы́сть всѣ̑мъ пови́ненъ. а҃і Рекі́й бо, не прелюбы̀ сотвори́ши: ре́клъ є҆́сть, и҆ не ᲂу҆бїе́ши. а҆́ще ли не прелюбы̀ сотвори́ши, ᲂу҆бїе́ши же, бы́сть престꙋ́пникъ зако́на. в҃і Та́кѡ глаго́лите, и҆ та́кѡ твори́те, ꙗ҆́кѡ зако́номъ свобо́днымъ хотѧ́ще сꙋ́дъ прїѧ́ти. г҃і Сꙋ́дъ бо без̾ ми́лости не сотво́ршемꙋ ми́лости: и҆ хва́литсѧ ми́лость на сꙋдѣ̀.

Коне́цъ пѧткꙋ̀.

(заⷱ҇ н҃г) [д҃] д҃і Ка́ѧ по́льза бра́тїе моѧ̀,꙳[[Въ понедѣ́льникъ л҃в-ѧ недѣ́ли: Бра́тїе, ка́ѧ по́льза є҆́сть,꙳]] а҆́ще вѣ́рꙋ глаго́летъ кто̀ и҆мѣ́ти, дѣ́лъ же не и҆́мать; є҆да̀ мо́жетъ вѣ́ра спастѝ є҆го̀; є҃і А҆́ще же бра́тъ и҆лѝ сестра̀ на́га бꙋ́дета, и҆ лише́на бꙋ́дета дневны́ѧ пи́щи: ѕ҃і Рече́тъ же и҆́ма кто̀ ѿ ва́съ: и҆ди́та съ ми́ромъ, грѣ́йтасѧ и҆ насыща́йтасѧ, не да́стъ же и҆́ма тре́бованїѧ тѣле́снагѡ, ка́ѧ по́льза; з҃і Та́кожде и҆ вѣ́ра, а҆́ще дѣ́лъ не и҆́мать, мертва̀ є҆́сть ѡ҆ себѐ. и҃і Но рече́тъ кто̀: ты̀ <<н҃и: 115>> вѣ́рꙋ и҆́маши, а҆́зъ же дѣла̀ и҆́мамъ: покажи́ ми вѣ́рꙋ твою̀ ѿ дѣ́лъ твои́хъ, и҆ а҆́зъ тебѣ̀ покажꙋ̀ ѿ дѣ́лъ мои́хъ вѣ́рꙋ мою̀. ѳ҃і Ты̀ вѣ́рꙋеши, ꙗ҆́кѡ бг҃ъ є҆ди́нъ є҆́сть, до́брѣ твори́ши: и҆ бѣ́си вѣ́рꙋютъ, и҆ трепе́щꙋтъ. к҃ Хо́щеши же ли разꙋмѣ́ти, ѽ человѣ́че сꙋ́етне, ꙗ҆́кѡ вѣ́ра без̾ дѣ́лъ мертва̀ є҆́сть; к҃а А҆враа́мъ ѻ҆ц҃ъ на́шъ не ѿ дѣ́лъ ли ѡ҆правда́сѧ, возне́съ і҆саа́ка сы́на своего̀ на же́ртвенникъ; к҃в Ви́диши ли, ꙗ҆́кѡ вѣ́ра поспѣ́шествоваше дѣлѡ́мъ є҆гѡ̀, и҆ ѿ дѣ́лъ соверши́сѧ вѣ́ра; к҃г И҆ соверши́сѧ писа́нїе глаго́лющее: вѣ́рова же а҆враа́мъ бг҃ови, и҆ вмѣни́сѧ є҆мꙋ̀ въ пра́вдꙋ, и҆ дрꙋ́гъ бж҃їй нарече́сѧ. к҃д Зрите́ ли ᲂу҆̀бо, ꙗ҆́кѡ ѿ дѣ́лъ ѡ҆правда́етсѧ человѣ́къ, а҆ не ѿ вѣ́ры є҆ди́ныѧ; к҃є Та́кожде же и҆ раа́въ блꙋдни́ца не ѿ дѣ́лъ ли ѡ҆правда́сѧ, прїе́мши схо́дники, и҆ и҆ны́мъ пꙋте́мъ и҆зве́дши и҆̀хъ; к҃ѕ Ꙗ҆́коже бо тѣ́ло без̾ дꙋ́ха мертво̀ є҆́сть, та́кѡ и҆ вѣ́ра без̾ дѣ́лъ мертва̀ є҆́сть.

Коне́цъ понедѣ́льникꙋ.

Глава̀ тре́тїѧ.

(заⷱ҇ н҃д) [є҃] сⷯ а҃ Не мно́зи ᲂу҆чи́тели быва́йте, бра́тїе моѧ̀,꙳[[Во вто́рникъ л҃в-ѧ недѣ́ли: Бра́тїе, не мно́зи ᲂу҆чи́тели быва́йте,꙳]] вѣ́дѧще, ꙗ҆́кѡ бо́льшее ѡ҆сꙋжде́нїе прїи́мемъ: в҃ Мно́гѡ бо согрѣша́емъ всѝ. а҆́ще кто̀ въ сло́вѣ не согрѣша́етъ, се́й соверше́нъ мꙋ́жъ, си́ленъ ѡ҆бꙋзда́ти и҆ всѐ тѣ́ло. г҃ Се́ бо и҆ ко́нємъ ᲂу҆зды̑ во ᲂу҆ста̀ влага́емъ, да повинꙋ́ютсѧ на́мъ, и҆ всѐ тѣ́ло <<н҃и ѡ҆б.: 116>> и҆́хъ ѡ҆браща́емъ. д҃ Сѐ и҆ кораблѝ вели́цы сꙋ́ще, и҆ ѿ жесто́кихъ вѣ́трѡвъ заточа́еми, ѡ҆браща́ютсѧ ма́лымъ корми́льцемъ, а҆́може стремле́нїе пра́вѧщагѡ хо́щетъ. є҃ Та́кожде же и҆ ѧ҆зы́къ ма́лъ ᲂу҆́дъ є҆́сть, и҆ вельмѝ хва́литсѧ: сѐ ма́лъ ѻ҆́гнь, и҆ ко́ль вели́ки вє́щи сожига́етъ. ѕ҃ И҆ ѧ҆зы́къ ѻ҆́гнь, лѣ́пота непра́вды: си́це и҆ ѧ҆зы́къ водворѧ́етсѧ во ᲂу҆́дѣхъ на́шихъ, сквернѧ̀ всѐ тѣ́ло, и҆ палѧ̀ ко́ло рожде́нїѧ на́шегѡ, и҆ ѡ҆палѧ́ѧсѧ ѿ гее́нны. з҃ Всѧ́ко бо є҆стество̀ ѕвѣре́й же и҆ пти́цъ, га̑дъ же и҆ ры́бъ, ᲂу҆кроча́етсѧ, и҆ ᲂу҆кроти́тсѧ є҆стество́мъ человѣ́ческимъ: и҃ Ѧ҆зы́ка же никто́же мо́жетъ ѿ человѣ̑къ ᲂу҆кроти́ти, неꙋдержи́мо бо ѕло̀, и҆спо́лнь ꙗ҆́да смертоно́сна. ѳ҃ Тѣ́мъ благословлѧ́емъ бг҃а и҆ ѻ҆ц҃а̀, и҆ тѣ́мъ клене́мъ человѣ́ки, бы́вшыѧ по подо́бїю бж҃їю: і҃ Ѿ тѣ́хъ же ᲂу҆́стъ и҆схо́дитъ благослове́нїе и҆ клѧ́тва. не подоба́етъ бра́тїе моѧ̀ возлю́блєннаѧ, си̑мъ та́кѡ быва́ти.

Коне́цъ вто́рникꙋ.

(заⷱ҇ н҃є) а҃і Є҆да̀ ᲂу҆́бѡ и҆сто́чникъ꙳[[Въ сре́дꙋ л҃в-ѧ недѣ́ли: Бра́тїе, є҆да̀ и҆сто́чникъ꙳]] ѿ є҆ди́нагѡ ᲂу҆́стїѧ и҆сточа́етъ сла́дкое и҆ го́рькое; в҃і Є҆да̀ мо́жетъ, бра́тїе моѧ̀, смоко́вница ма̑слины твори́ти, и҆лѝ вїногра́днаѧ лоза̀ смѡ́квы; та́коже ни є҆ди́нъ и҆сто́чникъ сла́нꙋ и҆ сла́дкꙋ твори́тъ во́дꙋ. [а҃] г҃і Кто̀ премꙋ́дръ и҆ хꙋдо́гъ въ ва́съ, да пока́жетъ ѿ до́брагѡ житїѧ̀ дѣла̀ своѧ̀, въ кро́тости и҆ премꙋ́дрости. д҃і А҆́ще же за́висть го́рькꙋ и҆́мате и҆ рве́нїе въ сердца́хъ ва́шихъ, <<н҃ѳ: 117>> не хвали́тесѧ, ни лжи́те на и҆́стинꙋ. є҃і Нѣ́сть сїѧ̀ премꙋ́дрость свы́ше низходѧ́щи, но зе́мна, дꙋше́вна, бѣсо́вска. ѕ҃і И҆дѣ́же бо за́висть и҆ рве́нїе, тꙋ̀ нестрое́нїе и҆ всѧ́ка ѕла̀ ве́щь. [в҃] з҃і А҆ ꙗ҆́же свы́ше премꙋ́дрость, пе́рвѣе ᲂу҆́бѡ чиста̀ є҆́сть, пото́мъ же ми́рна, кротка̀, благопокорли́ва, и҆спо́лнь ми́лости и҆ плодѡ́въ благи́хъ, несꙋмнѣ́нна, и҆ нелицемѣ́рна. и҃і Пло́дъ же пра́вды въ ми́рѣ сѣ́етсѧ творѧ́щымъ ми́ръ.

Глава̀ четве́ртаѧ.

[г҃] сⷯ а҃ Ѿкꙋ́дꙋ бра̑ни и҆ сва̑ры въ ва́съ; не ѿсю́дꙋ ли, ѿ сласте́й ва́шихъ вою́ющихъ во ᲂу҆́дѣхъ ва́шихъ; в҃ Жела́ете, и҆ не и҆́мате: ᲂу҆бива́ете и҆ зави́дите, и҆ не мо́жете ᲂу҆лꙋчи́ти: сварѧ́етесѧ и҆ бо́рете, и҆ не и҆́мате, занѐ не про́сите. г҃ Про́сите, и҆ не прїе́млете, занѐ ѕлѣ̀ про́сите, да въ сласте́хъ ва́шихъ и҆ждиве́те. д҃ Прелюбодѣ́и и҆ прелюбодѣ́йцы, не вѣ́сте ли, ꙗ҆́кѡ любы̀ мі́ра сегѡ̀ вражда̀ бг҃ꙋ є҆́сть; и҆́же бо восхо́щетъ дрꙋ́гъ бы́ти мі́рꙋ, вра́гъ бж҃їй быва́етъ. (пнⷣе) є҃ И҆лѝ мнитѐ, ꙗ҆́кѡ всꙋ́е писа́нїе глаго́летъ: къ за́висти жела́етъ дꙋ́хъ, и҆́же всели́сѧ въ ны̀; ѕ҃ Бо́льшꙋю же дае́тъ благода́ть. тѣ́мже глаго́летъ: гдⷭ҇ь гѡ́рдымъ проти́витсѧ, смирє́ннымъ же дае́тъ благода́ть.

Коне́цъ средѣ̀.

(заⷱ҇ н҃ѕ) [д҃] з҃ Повини́тесѧ ᲂу҆̀бо꙳[[Въ четверто́къ л҃в-ѧ недѣ́ли: Возлю́бленнїи, повини́тесѧ꙳]] бг҃ꙋ, проти́витесѧ же дїа́волꙋ, и҆ бѣжи́тъ ѿ ва́съ. и҃ Прибли́житесѧ бг҃ꙋ, и҆ <<н҃ѳ ѡ҆б.: 118>> прибли́житсѧ ва́мъ: ѡ҆чи́стите рꙋ́цѣ грѣ́шницы, и҆спра́вите сердца̀ ва́ша двоедꙋ́шнїи. ѳ҃ Постражди́те, и҆ слези́те и҆ пла́читесѧ: смѣ́хъ ва́шъ въ пла́чь да ѡ҆брати́тсѧ, и҆ ра́дость въ сѣ́тованїе. і҃ Смири́тесѧ пред̾ гдⷭ҇емъ, и҆ вознесе́тъ вы̀. а҃і Не ѡ҆клевета́йте дрꙋгъдрꙋ́га бра́тїе: ѡ҆клевета́ѧй бо бра́та, и҆лѝ ѡ҆сꙋжда́ѧй бра́та своего̀, ѡ҆клевета́етъ зако́нъ, и҆ ѡ҆сꙋжда́етъ зако́нъ. а҆́ще ли зако́нъ ѡ҆сꙋжда́еши, нѣ́си творе́цъ зако́на, но сꙋдїѧ̀. в҃і Є҆ди́нъ є҆́сть законополо́жникъ и҆ сꙋдїѧ̀, могі́й спастѝ и҆ погꙋби́ти: ты́ же кто̀ є҆сѝ ѡ҆сꙋжда́ѧй дрꙋ́га; [ѕ҃] г҃і Слы́шите ны́нѣ глаго́лющїи: дне́сь и҆лѝ ᲂу҆́трѣ по́йдемъ во ѻ҆́нъ гра́дъ, и҆ сотвори́мъ тꙋ̀ лѣ́то є҆ди́но, и҆ кꙋ́плю дѣ́емъ, и҆ прїѡбрѣ́тенїе: д҃і И҆̀же не вѣ́сте, что̀ ᲂу҆́трѣ слꙋчи́тсѧ. ка́ѧ бо жи́знь ва́ша; па́ра бо є҆́сть, ꙗ҆́же вма́лѣ ꙗ҆влѧ́етсѧ, пото́мъ же и҆счеза́етъ. є҃і Вмѣ́стѡ є҆́же бы глаго́лати ва́мъ: а҆́ще гдⷭ҇ь восхо́щетъ, и҆ жи́ви бꙋ́демъ, и҆ сотвори́мъ сїѐ и҆лѝ ѻ҆́но. ѕ҃і Ны́нѣ же хва́литесѧ въ горды́нѧхъ ва́шихъ: всѧ́ка хвала̀ такова̀ ѕла̀ є҆́сть. з҃і Вѣ́дꙋщемꙋ ᲂу҆́бѡ добро̀ твори́ти, и҆ не творѧ́щемꙋ, грѣ́хъ є҆мꙋ̀ є҆́сть.

Глава̀ пѧ́таѧ.

[а҃] сⷯ а҃ Прїиди́те ны́нѣ бога́тїи, пла́читесѧ и҆ рыда́йте ѡ҆ лю́тыхъ ско́рбехъ ва́шихъ грѧдꙋ́щихъ на вы̀. в҃ Бога́тство ва́ше и҆згнѝ, и҆ ри̑зы ва́шѧ мо́лїе поѧдо́ша. г҃ Зла́то ва́ше и҆ сребро̀ и҆зоржа́вѣ, и҆ ржа̀ и҆́хъ въ послꙋшество̀ на ва́съ бꙋ́детъ, и҆ снѣ́сть плѡ́ти ва́шѧ а҆́ки ѻ҆́гнь, є҆го́же <<ѯ҃: 119>> сниска́сте въ послѣ́днїѧ днѝ. д҃ Сѐ мзда̀ дѣ́лателей дѣ́лавшихъ ни̑вы ва́шѧ, ᲂу҆держа́наѧ ѿ ва́съ, вопїе́тъ: и҆ вопїє́нїѧ жа́вшихъ во ᲂу҆́ши гдⷭ҇а саваѡ́ѳа внидо́ша. є҃ Возвесели́стесѧ на землѝ, и҆ наслади́стесѧ ᲂу҆пита́сте сердца̀ ва́ша а҆́ки въ де́нь заколе́нїѧ. ѕ҃ Ѡ҆сꙋди́сте, ᲂу҆би́сте пра́веднаго, не проти́витсѧ ва́мъ. з҃ Долготерпи́те ᲂу҆̀бо бра́тїе моѧ̀, до прише́ствїѧ гдⷭ҇нѧ: сѐ земледѣ́лецъ жде́тъ чⷭ҇тна́гѡ плода̀ ѿ землѝ, долготерпѧ̀ ѡ҆ не́мъ, до́ндеже прїи́метъ до́ждь ра́нъ и҆ по́зденъ. и҃ Долготерпи́те ᲂу҆̀бо и҆ вы̀, ᲂу҆тверди́те сердца̀ ва́ша, ꙗ҆́кѡ прише́ствїе гдⷭ҇не прибли́жисѧ. ѳ҃ Не воздыха́йте дрꙋ́гъ на дрꙋ́га бра́тїе, да не ѡ҆сꙋжде́ни бꙋ́дете: сѐ сꙋдїѧ̀ пред̾ две́рьми стои́тъ.

Коне́цъ четверткꙋ̀.

(заⷱ҇ н҃з) [в҃] і҃ Ѡ҆́бразъ прїими́те, бра́тїе моѧ̀,꙳[[І҆ꙋ́лїа к҃, проро́кꙋ и҆лїѝ: Бра́тїе, ѻ҆́бразъ прїими́те꙳ Сїе́ же и҆ над̾ болѧ́щимъ, и҆ ѡ҆ бездо́ждїи.]] ѕлострада́нїѧ и҆ долготерпѣ́нїѧ, проро́ки, и҆̀же глаго́лаша и҆́менемъ гдⷭ҇нимъ. а҃і Сѐ блажи́мъ терпѧ́щыѧ: терпѣ́нїе і҆́ѡвле слы́шасте, и҆ кончи́нꙋ гдⷭ҇ню ви́дѣсте, ꙗ҆́кѡ многомлⷭ҇тивъ є҆́сть гдⷭ҇ь, и҆ ще́дръ. в҃і Пре́жде же всѣ́хъ бра́тїе моѧ̀, не клени́тесѧ ни нб҃омъ, ни земле́ю: ни и҆но́ю ко́ею клѧ́твою: бꙋ́ди же ва́мъ, є҆́же є҆́й, є҆́й: и҆ є҆́же нѝ, нѝ: да не въ лицемѣ́рїе впаде́те. г҃і Ѕлостра́ждетъ ли кто̀ въ ва́съ: да моли́твꙋ дѣ́етъ. благодꙋ́шствꙋетъ ли кто̀: да пое́тъ. д҃і Боли́тъ ли кто̀ въ ва́съ: да призове́тъ пресвѵ́теры цр҃ко́вныѧ, <<ѯ҃ ѡ҆б.: 120>> и҆ да моли́твꙋ сотворѧ́тъ над̾ ни́мъ, пома́завше є҆го̀ є҆ле́емъ во и҆́мѧ гдⷭ҇не: є҃і И҆ моли́тва вѣ́ры спасе́тъ болѧ́щаго, и҆ воздви́гнетъ є҆го̀ гдⷭ҇ь: и҆ а҆́ще грѣхѝ бꙋ́детъ сотвори́лъ, ѿпꙋ́стѧтсѧ є҆мꙋ̀. [г҃] ѕ҃і И҆сповѣ́дайте ᲂу҆̀бо дрꙋ́гъ дрꙋ́гꙋ согрѣшє́нїѧ, и҆ моли́тесѧ дрꙋ́гъ за дрꙋ́га, ꙗ҆́кѡ да и҆сцѣлѣ́ете: мно́гѡ бо мо́жетъ мл҃тва пра́веднагѡ поспѣшествꙋ́ема.

Коне́цъ над̾ болѧ́щимъ.

Чтѝ проро́кꙋ, и҆ бездо́ждїю:

з҃і И҆лїа̀ человѣ́къ бѣ̀ подобостра́стенъ на́мъ, и҆ моли́твою помоли́сѧ, да не бꙋ́детъ до́ждь: и҆ не ѡ҆дождѝ по землѝ лѣ́та трѝ и҆ мѣ̑сѧцъ ше́сть. и҃і И҆ па́ки помоли́сѧ, и҆ нб҃о до́ждь дадѐ, и҆ землѧ̀ прозѧбѐ пло́дъ сво́й. [д҃] ѳ҃і Бра́тїе, а҆́ще кто̀ въ ва́съ заблꙋ́дитъ ѿ пꙋтѝ и҆́стины, и҆ ѡ҆брати́тъ кто̀ є҆го̀: к҃ Да вѣ́сть, ꙗ҆́кѡ ѡ҆брати́вый грѣ́шника ѿ заблꙋжде́нїѧ пꙋтѝ є҆гѡ̀, спасе́тъ дꙋ́шꙋ ѿ сме́рти, и҆ покры́етъ мно́жество грѣхѡ́въ.

Коне́цъ проро́кꙋ и҆лїѝ, и҆ бездо́ждїю.

Коне́цъ і҆а́кѡвлѧ собо́рнагѡ посла́нїѧ. и҆мꙋ́щагѡ въ себѣ̀ гла́въ є҃: зача́лъ цр҃ко́вныхъ и҃: стїхѡ́въ р҃и: знамена́нїй че́рныхъ ѕ҃: послѣ́дꙋющихъ же и҆̀мъ червле́ныхъ ѳ҃.