Преподо́бный ѻ҆те́цъ на́шъ пе́тръ, нарече́нный є҆пⷭ҇кпъ дама́ска, бѣ̀ въ ца́рствованїе кѡнстанті́на копрѡнѵ́ма, въ лѣ́то се́дмь сѡ́тъ се́дмьдесѧтъ пѧ́тое. Се́й ᲂу҆́бѡ пе́рвѣе ᲂу҆едине́ннꙋю и҆ ѿше́льническꙋю проходѧ̀ жи́знь, въ толи́цѣмъ нестѧжа́нїи поживѐ, ꙗ҆́кѡ нижѐ кни́ги своеѧ̀ и҆мѣ̀, ꙗ҆́коже са́мъ ѡ҆ себѣ̀ свидѣ́тельствꙋетъ: ѿ дрꙋги́хъ же прїе́млѧй кни̑ги, ве́тхагѡ, глаго́лю, и҆ но́вагѡ писа́нїѧ, вели́кихъ церко́вныхъ ᲂу҆чи́телей, и҆ дрꙋги́хъ всѧ́кихъ воѻбщѐ тре́звенныхъ и҆ бг҃оно́сныхъ ѻ҆тє́цъ, толи́кѡ трꙋдолюби́въ бѣ̀, ꙗ҆́кѡ де́нь и҆ но́щь поꙋча́ѧсѧ въ зако́нѣ гдⷭ҇ни, и҆ живото́чными ᲂу҆поѧ́емь бы́въ стрꙋѧ́ми, ꙗ҆ви́сѧ пои́стиннѣ дре́во, по ѱало́мникꙋ, высо́кое и҆ нбⷭ҇ное, при самѣ́хъ и҆схо́дищахъ во́дъ дх҃а насажде́нное. Ѻ҆ба́че то̀ во є҆ди́но вре́мѧ дае́тъ пло́дъ сво́й: а҆ сїѐ не та́кѡ, но во всѧ́ко вре́мѧ неѡскꙋ́днѡ и҆ невре́днѣ при́снѡ цвѣтꙋ́ще пребыва́ѧ, дх҃ѡ́вныѧ плоды̀ произрастѝ добры̑ ви́дꙋ, сла̑дки вкꙋ́сꙋ, бл҃говѡ́нны ѡ҆бонѧ́нїю, и҆ всѧ́ко чꙋ́вство тѣ́ла и҆ дꙋшѝ пита́ющи точа́щимисѧ ѿ ни́хъ безсме́ртными и҆ бл҃гово́нными сла́достѧми: мнѡ́гїѧ бо въ житїѝ и҆ вели̑кїѧ подви́жническими свои́ми трꙋда́ми плоды̀ принесѐ, мнѡ́жайшаѧ же и҆ бѡ́льшаѧ во сме́рти, воспрїѧ́вый мꙋ́ченичествомъ вѣне́цъ: ѡ҆блича́ющъ бо ѕломы́сленнꙋю а҆раві́йскꙋю и҆ манїхе́йскꙋю є҆́ресь, ѿ ᲂу҆а́лїда, сы́на а҆раві́йскагѡ нача́льника і҆си́ма, ѧ҆зыкоꙋрѣ́занъ бы́въ, въ блаже́ннꙋю а҆раві́ю заточа́етсѧ: и҆дѣ́же и҆ чи́стѣ глаго́лѧй и҆ свѧщеннодѣ́йствꙋѧй, сконча́сѧ. Мнѡ́жайшаѧ же и҆ бѡ́льшаѧ по преизбы́ткꙋ по сме́рти прино́ситъ на́мъ, ѡ҆ставлѧ́ѧ ꙗ҆́кѡ нѣ́кое ѻ҆те́ческое и҆ неѿе́млемое наслѣ́дїе, предо́брꙋю пои́стиннѣ и҆ предобродѣ́тельнꙋю кни́гꙋ сїю̀, тща́тельнѣ, и҆ съ є҆ли́кою, не могꙋ̀ рещѝ, благода́тїю, и҆́мъ сочине́ннꙋю, ѻ҆́бщее и҆ дꙋшеспаси́тельное всѣ́хъ добродѣ́телей любочествова́нїе, ᲂу҆мозрѣ́нїй сокровищехрани́телище: дх҃о́вныхъ дарова́нїй собра́нїе, высотꙋ̀ бж҃е́ственныхъ блаже́нствъ, же́ртвенникъ тѣле́сныхъ дѣѧ́нїй, тонча́йшее разсѣче́нїе страсте́й: ро́гъ подви́жническїѧ є҆гі́ды, вмѣсти́лище ра́зꙋма и҆ премꙋ́дрости бж҃е́ственныѧ, и҆ да вкра́тцѣ рекꙋ̀, ѡ҆главле́нїе свѧще́ннагѡ трезвѣ́нїѧ. Сїѐ ᲂу҆́бѡ и҆ мы̀ сро́дство съ настоѧ́щею кни́гою, попремно́гꙋ спосо́бствꙋющее предлежа́щемꙋ на́шемꙋ намѣ́ренїю, вѣ́дѧще, сꙋди́хомъ за нꙋ́жное соедини́ти съ ѻ҆́ною. И҆ мо́жетъ кто́либо лѣ́пѡ рещѝ, ꙗ҆́кѡ крꙋ́гъ со крꙋ́гомъ, и҆ добротолю́бїе съ добротолю́бїемъ, вели́кое съ бо́льшимъ. И҆́бо нетерпи́мѡ ꙗ҆ви́сѧ на́мъ толи́кꙋ, ꙗ҆́коже реко́хомъ, цѣ́пь дꙋхо́вныхъ плодѡ́въ, собра́нїе свѧще́нныхъ бж҃е́ственнагѡ ли́ка возде́ржникѡвъ раздѣли́ти. (И҆ ѻ҆́наѧ бо кни́га мно́гѡ на́съ въ маломы́слїи ѡ҆бличи́ла бы не терпѧ́щи раздѣле́нїѧ своегѡ̀ ѿ разꙋ́мныхъ и҆ лю́бѧщихъ ю҆̀ ѻ҆тє́цъ, нижѐ что̀ и҆ да не бꙋ́детъ.) ᲂу҆ма́лимъ въ се́й ча́сти кꙋ́плю, по неѻбходи́мости тре́бꙋющꙋ и҆ сегѡ̀ прибавле́нїѧ. Къ семꙋ́ же да не лиши́мъ толи́кїѧ по́льзы и҆ бра́тїю на́шꙋ. При́снѡ бо ᲂу҆множе́нїе до́брыхъ, сꙋгꙋ́бо ѡ҆бы́че и҆ благотворе́нїе дѣ́ѧти. А҆́ще же кто̀ жела́нїе и҆мѣ́етъ воспрїѧ́ти, ѿ дв҃да и҆скѡ́мыѧ повсегда̀, но неѡбрѣ́тєнныѧ, сꙋгꙋ́быѧ дꙋхо́внагѡ го́лꙋбѧ крылѣ̀: трꙋдолюби́вѡ ѻ҆́нꙋю да прочи́тываетъ: ѡ҆брѧ́щетъ бо чꙋде́снѣ въ ѻ҆́ной є҆ди́но дѣѧ́нїй всѐ посре́бренное, а҆ дрꙋго́е ᲂу҆мозрѣ́нїй всѐ златови́дное, и҆ ѻ҆бои́ми возвыша́ѧсѧ ѿ всѣ́хъ земны́хъ, къ небе́сной возлети́тъ высотѣ̀, и҆ въ го́рнихъ мѣ́стѣхъ, ꙗ҆́кѡ блага́ѧ, возгнѣзди́вшись голꙋби́ца, въ небе́сномъ ᲂу҆споко́итсѧ блаже́нствѣ.

НАЧА́ЛО СЪ БГ҃ОМЪ

содержа̑нїѧ настоѧ́щїѧ кни́ги преподо́бнагѡ и҆ бг҃оно́снагѡ ѻ҆тца̀ на́шегѡ свѧщенномꙋ́ченика петра̀ дамаскина̀.

Мно́гихъ и҆ вели́кихъ благода́тїю сподо́бивсѧ ѿ бг҃а дарѡ́въ ѻ҆каѧ́нный а҆́зъ, и҆ ничто́же бла́го сотвори́вый, ᲂу҆боѧ́хсѧ, да не ка́кѡ пра́здностїю и҆ ᲂу҆ны́нїемъ въ забве́нїе прїидꙋ̀ ѡ҆ таковы́хъ дарѣ́хъ, и҆ толи́цѣхъ благодѣѧ́нїѧхъ бж҃їихъ, и҆ ѡ҆ мои́хъ прегрѣше́нїѧхъ, и҆ не ꙗ҆влю́сѧ понѐ благоразꙋ́менъ и҆ бл҃года́ренъ ко бл҃годѣ́телю. Сегѡ̀ ра́ди написа́въ, во ѡ҆бличе́нїе ѻ҆каѧ́нныѧ дꙋшѝ моеѧ̀, наставле́нїе сїѐ, и҆ по и҆́мени положи́хъ всѧ̑ та̀ писа̑нїѧ, житїѧ̀ и҆ словеса̀ ст҃ы́хъ ѻ҆тє́цъ, ꙗ҆̀же прочто́хъ, да и҆́мамъ сїѧ̑ къ воспомина́нїю слове́съ и҆́хъ, хотѧ̀ ѿ ча́сти. Поне́же ѿню́дъ ни є҆ди́ныѧ кни́ги своеѧ̀ и҆мѣ́хъ, нижѐ стѧжа́хъ николи́же, но ѿ хрїстолюби́вцѡвъ взима́хъ, ꙗ҆́коже и҆ тѣлє́сныѧ всѧ̑ потрє́бы любвѝ ра́ди бж҃їей. И҆ сїѧ̑ прочи́тываѧ со всѧ́кимъ тща́нїемъ, возвраща́хъ па́ки тѣ́мже, ꙗ҆̀же сꙋ́ть сїѧ̑: ве́тхагѡ завѣ́та и҆ но́вагѡ. И҆ ве́тхагѡ же и҆схо́дъ, четвероца́рствїе, паралипоме́на, ѱалти́рь, проро́чєствїѧ, ст҃а̑ѧ є҆ѵⷢ҇лїа, дѣѧ̑нїѧ а҆пѡ́стольскаѧ, и҆ всѣ́хъ рече́нныхъ толкѡва́нїѧ. Ѻ҆те́чєскїѧ и҆ ᲂу҆чи́тєльныѧ всѧ̑ вели́кихъ ѻ҆тє́цъ, ꙗ҆́коже: дїонѵ́сїа, а҆ѳана́сїа, васі́лїа, григо́рїа бг҃осло́ва, златоꙋ́ста, григо́рїа нѵ́сскагѡ, а҆нтѡ́нїа, а҆рсе́нїа, мака́рїа, ні́ла, є҆фре́ма, і҆саа́ка, ма́рка, дамаскина̀, і҆ѡа́нна лѣ́ствичника, маѯі́ма, дѡроѳе́а, фїлїмѡ́на и҆ всѣ́хъ ст҃ы́хъ, житїѧ̑ и҆ словеса̀. И҆ сподо́бивсѧ недосто́йный и҆спыта́ти всѧ̑ со всѧ́кимъ ᲂу҆пова́нїемъ и҆ тща́нїемъ, и҆ща̀ нача́ла спасе́нїѧ, и҆ поги́бели человѣ́ческїѧ: и҆ всѧ́кое ли начина́нїе, и҆лѝ дѣ́ло спаса́етъ є҆го̀, и҆лѝ нѝ; И҆ что̀ є҆́сть и҆ско́мое всѣ́ми; И҆ ка́кѡ дре́внїи и҆ но́вїи бг҃ꙋ ᲂу҆годи́ша, въ бога́тствѣ и҆ ᲂу҆бо́жествѣ, посредѝ мно́гихъ грѣ̑шникъ, и҆ въ пꙋсты́нѣ, въ сꙋпрꙋ́жествѣ и҆ дѣ́вствѣ; И҆ вкра́тцѣ, ка́кѡ во всѧ́комъ мѣ́стѣ и҆ начина́нїи ѡ҆брѣта́емъ живо́тъ и҆ сме́рть, спасе́нїе и҆ поги́бель: и҆ не то́чїю, но и҆ въ на́съ мона́сѣхъ разли̑чныѧ ѡ҆брѣта́емъ ᲂу҆строє́нїѧ; Глаго́лю же повинове́нїе ѻ҆ц҃ꙋ̀, тѣ́ломъ же и҆ дꙋше́ю: безмо́лвїе ѡ҆чища́ющее дꙋ́шꙋ, дꙋхо́вный совѣ́тъ вмѣ́стѡ повинове́нїѧ, и҆гꙋ́менство, и҆ а҆рхїере́йство. И҆ и҆з̾ всѣ́хъ ѡ҆брѣта́емъ спаса́емыхъ и҆ погиба́ющихъ. И҆ не семꙋ̀ то́чїю ᲂу҆дивлѧ́хсѧ, но и҆ дре́внемꙋ а҆́гг҃лꙋ на небесѝ, и҆́же невеще́ственнагѡ бы́въ є҆стества̀, въ премꙋ́дрости и҆ всѧ́кой добродѣ́тели, внеза́пꙋ содѣ́лалсѧ дїа́воломъ, тьмо́ю, и҆ неразꙋ́мїемъ, и҆ нача́ломъ, и҆ конце́мъ всѧ́кїѧ ѕло́бы и҆ лꙋка́вства. Та́же а҆да́мꙋ въ толи́цѣй че́сти и҆ наслажде́нїи благи́хъ, и҆ сожи́тельствѣ бы́вшꙋ съ бг҃омъ, ᲂу҆кра́шенꙋ и҆ премꙋ́дростїю и҆ добродѣ́телїю внꙋ́трь раѧ̀, є҆ди́номꙋ съ є҆́ѵою, и҆́же внеза́пꙋ бы́сть и҆згна́нъ, стра́стенъ, и҆ сме́ртенъ, въ трꙋдѣ̀ и҆ тѧготѣ̀ дѣ́лаше, и҆ въ по́тѣ и҆ ско́рби мно́зѣй. Ѿ негѡ́же ка́инъ со а҆́велемъ є҆ди́ни бра́тїѧ на все́й землѝ. Ка́кѡ побѣдѝ є҆ди́наго и҆з̾ ни́хъ за́висть, и҆ кова́рство, и҆ произведѐ ᲂу҆бі́йство, проклѧ́тїе и҆ трѧсе́нїе. Пото́мъ сꙋ́щымъ ѿ ни́хъ, и҆́хже мно́жества ра́ди согрѣше́нїй, пото́пъ бы́сть. Но бг҃ъ по человѣколю́бїю спасѐ бы́вшыѧ въ ковче́гѣ, ѿ ни́хже є҆ди́нъ ханаа́нъ, сы́нъ согрѣши́вшагѡ ха́ма, про́клѧтъ бы́сть. Да не ᲂу҆́бѡ преврати́тъ пра́ведный нѡ́й бл҃гослове́нїѧ бж҃їѧ, сы́на вмѣ́стѡ ѻ҆тца̀ проклѧ̀. По си́хже бы́вшымъ при столпѣ̀ содо́млѧнѡмъ, і҆сра́ильтѧнамъ, соломѡ́нꙋ, нїнеѵі́тѧнамъ, гїезі́и, і҆ꙋ́дѣ и҆ всѣ̑мъ во благи́хъ бы́вшымъ, и҆ во ѕло́бꙋ ᲂу҆клони́вшымсѧ. И҆ ка́кѡ бг҃ъ всеблагі́й и҆ многоблагоꙋтро́бный, бла́гъ сы́й, попꙋстѝ бы́ти мнѡ́гимъ, и҆ многѡразли̑чнымъ въ мі́рѣ ско́рбемъ и҆ и҆скꙋше́нїѧмъ. Ѻ҆́выхъ ᲂу҆́бѡ хо́щетъ по попꙋще́нїю, ꙗ҆́кѡ трꙋдѡ́въ покаѧ́нїѧ, глаго́лю же жа́жды, а҆лка́нїѧ, пла́ча, лише́нїѧ нꙋ́жныхъ веще́й, воздержа́нїѧ ѿ сла́дкихъ, и҆зможде́нїѧ тѣ́ла въ по́двигахъ, бдѣ́нїѧ, трꙋдѡ́въ, болѣ́зней, мно́гихъ и҆ го́рькихъ сле́зъ, стена́нїй, стра́ха сме́рти, и҆спыта́нїѧ, словоистѧза́нїѧ, ѡ҆бита́нїѧ съ де́мѡнами во а҆́дѣ, стра́шнагѡ ѻ҆́нагѡ днѧ̀ сꙋ́днагѡ, стꙋда̀ и҆мѣ́ющагѡ бы́ти пред̾ все́ю тва́рїю, тре́пета, го́рькагѡ ѡ҆бличе́нїѧ, дѣ́лъ, слове́съ, и҆ помышле́нїй, преще́нїѧ и҆ гнѣ́ва, многоразли́чныхъ и҆ вѣ́чныхъ мꙋ́къ: безполе́знагѡ рыда́нїѧ, непреста́нныхъ сле́зъ, неѡсвѣща́емой тьмы̀, стра́ха, страда́нїѧ, ѿпаде́нїѧ, печа́ли, тѣсноты̀ и҆ мꙋче́нїѧ дꙋшѝ, въ ны́нѣшнѣмъ вѣ́цѣ и҆ бꙋ́дꙋщемъ, съ сꙋ́щими въ мі́рѣ бѣда́ми, кораблекрꙋше́нїй, многоразли́чныхъ болѣ́зней, мо́лнїй, громѡ́въ, гра́да, землетрѧсе́нїй, гла́дѡвъ, пото́пѡвъ: безвре́менныхъ сме́ртей, и҆ кра́ткѡ, всѣ́хъ ѕѡ́лъ по попꙋще́нїю, нево́льнѣ на́мъ приключа́ющихсѧ. Ѻ҆́вагѡ же не хо́щетъ бг҃ъ, но мы̀ и҆ де́мѡни, ꙗ҆́коже бра́ней, страсте́й, многоразли́чныхъ грѣхѡ́въ, и҆́хже и҆мена̀ пока́жетъ слѣ́дꙋющее сло́во: ѿ безꙋ́мїѧ да́же до ѿча́ѧнїѧ и҆ соверше́нныѧ поги́бели, наше́ствїѧ де́монѡвъ, бра́ней, мꙋчи́тельства страсте́й, ѡ҆ставле́нїй, мѧте́жей, и҆ премѣ́нъ житїѧ̀, гнѣ́вѡвъ, клеве́тъ и҆ всѧ́кагѡ ѡ҆скорбле́нїѧ, є҆́же мы̀ са́ми себѣ̀ и҆ дрꙋ́гъ дрꙋ́гꙋ во́льнѣ причинѧ́емъ, бг҃ꙋ не хотѧ́щꙋ. И҆ па́ки, ка́кѡ посредѣ̀ толи́кихъ ѕѡ́лъ, мно́зїи спасо́шасѧ, ничесомꙋ́же воспѧти́ти могꙋ́щꙋ, и҆ ѻ҆́вїи погибо́ша, бг҃ꙋ не и҆зво́лившꙋ. Сїѧ̑ всѧ̑ и҆ дрꙋга̑ѧ мнѡ́жайшаѧ съ трꙋдо́мъ и҆з̾ бж҃е́ственнагѡ писа́нїѧ ᲂу҆разꙋмѣва́ѧ, сокрꙋши́хсѧ дꙋше́ю, и҆ ꙗ҆́кѡ вода̀ разлїѧ́всѧ, мно́гажды во ѡ҆слабле́нїе приходи́хъ: а҆́ще и҆ попремно́гꙋ не и҆мѣ́ѧхъ въ чꙋ́вствїи глаго́лемыхъ. А҆́ще бо воз̾имѣ́лъ бы́хъ, не бы̀ возмо́гъ пребы́ти въ жи́зни се́й и҆спо́лненной ѕло́бы и҆ преслꙋша́нїѧ къ бг҃ꙋ, и҆́мже всѧ̑ и҆ настоѧ̑щаѧ, и҆ грѧдꙋ̑щаѧ лю̑таѧ содѣ́лашасѧ, ѻ҆ба́че же прїѧ́въ ѿ благода́ти жела́нїе и҆зыска́нїй, разсꙋждє́нїѧ ст҃ы́хъ ѻ҆тє́цъ ѡ҆брѣто́хъ сицева̑ѧ: ꙗ҆́кѡ нача́ло всѧ́кагѡ бла́га є҆́сть, дае́мый человѣ́кꙋ бг҃омъ є҆сте́ственный ра́зꙋмъ, и҆лѝ и҆з̾ писа́нїй чрез̾ человѣ́ка, и҆лѝ чрез̾ а҆́гг҃ла, и҆лѝ ꙗ҆́кѡ чрез̾ дае́маго ѿ бж҃е́ственнагѡ креще́нїѧ храни́телѧ, на соблюде́нїе коегѡ́ждо вѣ́рнагѡ дꙋшѝ, и҆ со́вѣстїю глаго́лемагѡ, и҆ воспомина́нїемъ бж҃е́ственныхъ хрⷭ҇то́выхъ за́повѣдей, и҆́миже сохранѧ́етсѧ благода́ть ст҃а́гѡ ст҃а́гѡ дх҃а креща́емомꙋ, а҆́ще соблюстѝ ѧ҆̀ восхо́щетъ. По ра́зꙋмѣ же человѣ́ческое произволе́нїе. Ѻ҆но̀ є҆́сть нача́ло спасе́нїѧ, си́рѣчь, да ѡ҆ста́витъ человѣ́къ своѧ̑ хотѣ̑нїѧ и҆ разꙋмѣ̑нїѧ, сотвори́тъ же бж҃їѧ хотѣ̑нїѧ и҆ разꙋмѣ̑нїѧ. И҆ а҆́ще возмо́жетъ сїѧ̑ сотвори́ти: не ѡ҆брѧ́щетсѧ во все́й тва́ри ве́щь и҆лѝ начина́нїе, и҆лѝ мѣ́сто могꙋ́щее воспѧти́ти є҆мꙋ̀ бы́ти, ꙗ҆́коже бг҃ъ ѿ нача́ла восхотѣ̀, по ѡ҆́бразꙋ и҆ подо́бїю є҆гѡ̀, и҆ положе́нїемъ, ꙗ҆́кѡ бг҃ъ, по благода́ти, безстра́стнꙋ, пра́веднꙋ, бла́гꙋ и҆ премꙋ́дрꙋ, и҆ въ бога́тствѣ и҆ въ ᲂу҆бо́жествѣ, и҆ въ дѣ́вствѣ и҆ сꙋпрꙋ́жествѣ, и҆ въ нача́льствїи и҆ свобо́дѣ, и҆ въ повинове́нїи и҆ ра́бствѣ, и҆ вкра́тцѣ, во всѧ́кое вре́мѧ, и҆ на всѧ́комъ мѣ́стѣ же и҆ ве́щи. Посемꙋ̀ и҆ пре́жде зако́на, и҆ въ зако́нѣ, и҆ во благода́ти мно́зїи пра́веднїи ѡ҆брѣта́ютсѧ: занѐ предпочти́ша ра́зꙋмъ бж҃їй, и҆ во́лю є҆гѡ̀ па́че свои́хъ разꙋмѣ́нїй и҆ хотѣ́нїй: и҆ па́ки мно́гихъ во ѻ҆́ныхъ же времене́хъ и҆ начина́нїихъ ѡ҆брѣта́емъ поги́бшими. Поне́же своѧ̑ разꙋмѣ̑нїѧ и҆ хотѣ̑нїѧ предпочто́ша па́че бж҃їихъ. И҆ сїѧ̑ сꙋ́ть та́кѡ. И҆́мꙋтъ же разли̑чїѧ мѣ́ста же и҆ начина̑нїѧ: и҆ до́лженъ є҆́сть кі́йждо стѧжа́ти разсꙋжде́нїе и҆лѝ смиренномꙋ́дрїемъ, ѿ бг҃а да́рꙋемымъ, и҆лѝ вопроше́нїемъ и҆мѣ́ющихъ да́ры разсꙋжде́нїѧ. Поне́же без̾ сегѡ̀ не сꙋ́ть дѡбра̀ чини̑маѧ на́ми, а҆́ще по невѣ́дѣнїю и҆ помышлѧ́емъ, ꙗ҆́кѡ добра̑ сꙋ́ть. Ѿ разсꙋжде́нїѧ же человѣ́къ, ѡ҆ свое́й си́лѣ ᲂу҆разꙋмѣ́въ, къ каковꙋ̀ стреми́тсѧ начина́нїю, та́кѡ начина́етъ дѣ́лы свои́ми бг҃ꙋ благоꙋгожда́ти. Ѻ҆ба́че, ꙗ҆́коже рече́сѧ, во все́мъ подоба́етъ ѿрещи́сѧ свои́хъ хотѣ́нїй, да пости́гнетъ бж҃їе намѣ́ренїе: си́рѣчь, какѡвы́ѧ хо́щетъ бг҃ъ проходи́ти на́мъ дѣ̑ланїѧ: а҆́ще же не та́кѡ, не мо́жетъ спасти́сѧ ни ѡ҆ чесо́мже. Занѐ по престꙋпле́нїи а҆да́млемъ, стра́стни всѝ возраста́емъ, и҆ ѿ навыкнове́нїѧ страсте́й, не хо́щемъ блага́гѡ съ ра́достїю, нижѐ ра́зꙋма бж҃їѧ дѣ́лаемъ, нижѐ и҆з̾ любвѝ твори́мъ сїѐ, ꙗ҆́коже безстра́стнїи. Но па́че стра̑сти и҆ лꙋка̑вствїѧ лю́бимъ, блага́гѡ же ника́коже хо́щемъ ра́звѣ по нꙋ́ждѣ стра́ха ра́ди мꙋ́къ: и҆ сїѧ̑ крѣ́пкою вѣ́рою и҆ произволе́нїемъ прїе́млющїи сло́во гдⷭ҇не: про́чїи же нижѐ та́кѡ хотѧ́тъ. Но и҆ скѡ́рби жи́зни сеѧ̀ и҆ бꙋ́дꙋщыѧ мꙋ̑ки ни вочто́же вмѣнѧ́юще, все́ю дꙋше́ю страстє́мъ рабо́таемъ: нѣ́цыи же нижѐ чꙋ́вствꙋѧ си́хъ го́рєсти, по нꙋ́ждѣ и҆ не хотѧ̀ трꙋды̀ добродѣ́телей прохо́дѧтъ, и҆ достѡ́йнаѧ не́нависти содѣ́лашасѧ на́мъ вожделѣ̑нна по безꙋ́мїю. Ꙗ҆́коже бо болѧ́щїи тре́бꙋютъ рѣ́занїѧ и҆ жже́нїѧ здра́вїѧ ра́ди, є҆гѡ́же лиши́шасѧ: та́кѡ и҆ на́мъ потре́бны и҆скꙋшє́нїѧ, и҆ трꙋ́дъ покаѧ́нїѧ, и҆ стра́хъ сме́рти и҆ мꙋ́къ: да возврати́мъ первозда́нное здра́вїе дꙋшѝ, и҆ недꙋ́гъ, є҆го́же безꙋ́мїе на́ше на́мъ нанесѐ, ѿве́ргнемъ, и҆ па́че же є҆ли́кѡ да́рꙋетъ вра́чь дꙋ́шъ на́шихъ, во́льный и҆лѝ нево́льный трꙋ́дъ: толи́кѡ благодари́ти є҆гѡ̀ человѣколю́бїю до́лжни є҆смы̀, и҆ принима́ти є҆го̀ съ ра́достїю. Благодѣ́тельствꙋѧ бо на́мъ, ᲂу҆мно́жи скѡ́рби во́льнѣ чрез̾ покаѧ́нїе, и҆ нево́льнѣ чрез̾ и҆скꙋшє́нїѧ и҆ мꙋ̑ки, да хотѧ́щїи пострада́ти во́льнѣ, и҆збавлѧ́ютсѧ недꙋ́га и҆ бꙋ́дꙋщихъ, а҆ мо́жетъ бы́ть, и҆ настоѧ́щихъ мꙋ́къ: неразꙋ́мнїи же хотѧ̀ стра́ха ра́ди мꙋ́къ, и҆ многоразли́чныхъ и҆скꙋше́нїй и҆сцѣлѧ́тсѧ благода́тїю врача̀. И҆ та́кѡ лю́бѧщїи недꙋ́гъ, и҆ пребыва́ющїи въ не́мъ досто́йнѣ са́ми себѣ̀ вино́вни быва́ютъ вѣ́чныѧ мꙋ́ки, ᲂу҆подо́бльшесѧ де́монѡмъ, и҆ пра́веднѣ съ ни́ми претерпѣва́ти бꙋ́дꙋтъ вѣ̑чныѧ мꙋ́ки, ᲂу҆готѡ́ванныѧ де́монѡмъ: занѐ восхотѣ́ша бы́ти съ ни́ми, неблагода́рни сꙋ́ще къ своемꙋ̀ благодѣ́телю. Поне́же не всѝ ра́внѣ прїе́млемъ благодѣѧ̑нїѧ: но ѻ҆́вїи, ѻ҆́гнь гдⷭ҇нь, си́рѣчь: сло́во є҆гѡ̀, и҆ дѣ́ланїемъ быва́ютъ, ꙗ҆́кѡ во́скъ, мѧ́гки се́рдцемъ: ѻ҆́вїи же пра́здностїю, ꙗ҆́кѡ землѧ̀ тве́рды па́че и҆ ѡ҆камене́ннїи ꙗ҆влѧ́емсѧ. И҆ внегда̀ не прїима́ти, никого́же и҆з̾ на́съ нꙋ́дитъ гдⷭ҇ь. Но ꙗ҆́коже со́лнце низпꙋска́етъ лꙋчѝ, и҆ ѡ҆свѣща́етъ ве́сь мі́ръ: и҆ хотѧ́й зрѣ́ти є҆го̀, ви́димь быва́етъ ѿ негѡ̀, а҆ не хотѧ́й зрѣ́ти є҆го̀, не нꙋ́дитсѧ къ томꙋ̀ ѿ негѡ̀, и҆ никто́же вино́венъ лише́нїѧ свѣ́та, ра́звѣ са́мъ то́й, не хотѧ́й и҆мѣ́ти є҆го̀. Бг҃ъ бо сотворѝ со́лнце, и҆ ѻ҆́ко, человѣ́къ же и҆мѣ́етъ вла́сть. Та́кѡ и҆ здѣ̀, бг҃ъ просвѣща́етъ всѣ́хъ ра́зꙋмомъ, ꙗ҆́кѡ лꙋча́ми, а҆ по ра́зꙋмѣ дарова̀ и҆ вѣ́рꙋ, а҆́ки ѻ҆́ко. И҆ та́кѡ произволѧ́ѧй вѣ́рою прїѧ́ти и҆́стинный ра́зꙋмъ, дѣ́лы сохранѧ́етъ па́мѧть, є҆мꙋ́же и҆ да́рꙋетъ бг҃ъ вѧ́щшее ᲂу҆се́рдїе, ра́зꙋмъ же и҆ си́лꙋ. И҆з̾ є҆сте́ственнагѡ бо ра́зꙋма ражда́етсѧ ᲂу҆се́рдїе, пред̾избра́вшемꙋ ѻ҆́ное, ѿ ᲂу҆се́рдїѧ же си́ла дѣ́лати, и҆ дѣ́ланїемъ сохранѧ́етсѧ па́мѧть, и҆ ѿ па́мѧти быва́етъ вѧ́щшее дѣ́ланїе, сегѡ̀ ра́ди да́рꙋетсѧ вѧ́щшїй ра́зꙋмъ: и҆ ѿ сегѡ̀ ра́зꙋма, мꙋ́дростїю и҆менꙋ́емагѡ, ражда́етсѧ воздержа́нїе страсте́й, и҆ терпѣ́нїе ско́рбей ѿ ни́хже трꙋды̀ по бз҃ѣ, и҆ позна́нїе дарѡ́въ бж҃їихъ, и҆ свои́хъ согрѣше́нїй, ѿ ни́хже благоразꙋ́мїе, и҆́мже и҆ стра́хъ бж҃їй: ѿ сегѡ̀ хране́нїе за́повѣдей, си́рѣчь, пла́чь, кро́тость, смиренномꙋ́дрїе, ѿ ни́хже ражда́етсѧ разсꙋжде́нїе, а҆ ѿ сегѡ̀ предзрѣ́нїе, си́рѣчь, є҆́же предви́дѣти бꙋ̑дꙋщаѧ согрѣшє́нїѧ, и҆ ѿсѣка́ти ѻ҆́ныѧ пре́жде вре́мени, ѿ и҆скꙋ́са и҆ па́мѧти содѣ́ланныхъ чистото́ю ᲂу҆ма̀, и҆ настоѧ́щихъ, и҆ та́йнѡ быва́ющихъ. И҆ ѿ си́хъ наде́жда, ѿ неѧ́же безпристра́стїе и҆ соверше́ннаѧ любо́вь. Таковы́й ᲂу҆́бѡ тогда̀ ника́коже чегѡ̀ хо́щетъ кромѣ̀ во́ли бж҃їей, но и҆ са́мꙋю сїю̀ привре́меннꙋю жи́знь съ ра́достїю ѡ҆ставлѧ́етъ, любвѝ ра́ди бж҃їей и҆ бли́жнѧгѡ: премꙋ́дростїю и҆ вселе́нїемъ ст҃а́гѡ дх҃а, и҆ сыноположе́нїемъ, да сора́спнетсѧ, и҆ спогребе́тсѧ, совоскре́снетъ же и҆ совознесе́тсѧ со хрⷭ҇то́мъ ᲂу҆́мнѣ, подража́нїемъ є҆мꙋ̀, си́рѣчь, житїе́мъ въ мі́рѣ. И҆ про́стѡ прїе́млетъ зало́гъ бꙋ́дꙋщагѡ блаже́нства, ꙗ҆́коже глаго́летъ бг҃осло́въ въ сло́вѣ ѡ҆ ѻ҆смѝ по́мыслѣхъ: безстра́стенъ, пра́веденъ, бла́гъ и҆ премꙋ́дръ бы́въ, и҆мѣ́ѧ бг҃а въ себѣ̀ само́мъ, ꙗ҆́коже са́мъ хрⷭ҇то́съ речѐ, соблюде́нїемъ є҆гѡ̀ за́повѣдей[[І҆ѡа́н. гл. д҃і, ст. к҃а.]] порѧ́дꙋ ѿ пе́рвой и҆ про́чихъ, ѡ҆ ни́хже по си́хъ рекꙋ̀, ка́кѡ до́лжно є҆́сть бы́ти дѣ́ланїе за́повѣдей. Но поне́же ѡ҆ ра́зꙋмѣ добродѣ́телей рече́сѧ, то̀ ска́жемъ и҆ ѡ҆ страсте́хъ. Ра́зꙋмъ ѡ҆зарѧ́етъ на́съ, ꙗ҆́коже со́лнце, и҆ безꙋ́мный самопроизво́льнѣ смежа́етъ ѻ҆́чи, си́рѣчь, произволе́нїе невѣ́рїемъ и҆ лѣ́ностїю, и҆ а҆́бїе ра́зꙋмъ предае́тъ забве́нїю, пра́здностїю ѿ ᲂу҆ны́нїѧ ражда́ющеюсѧ. Ѿ безꙋ́мїѧ бо быва́етъ ᲂу҆ны́нїе, ѿ ѻ҆́нагѡ пра́здность, ѿ сеѧ́ же забве́нїе: а҆ ѿ сегѡ̀ самолю́бїе, си́рѣчь, є҆́же любле́нїе своеѧ̀ во́ли и҆ разꙋмѣ́нїй, сластолю́бїемъ и҆ славолю́бїемъ и҆менꙋ́емое. Ѿ ни́хже сребролю́бїе, ко́рень всѣ́хъ ѕѡ́лъ, ѿ сегѡ́ же попече́нїе ѡ҆ жите́йскихъ, ѿ негѡ́же соверше́нное невѣ́дѣнїе дарѡ́въ бж҃їихъ, и҆ свои́хъ согрѣше́нїй, ѿ негѡ́же водворе́нїе про́чихъ ѻ҆смигла́вныхъ страсте́й, глаго́лю же: чревобѣ́сїѧ, ѿ негѡ́же блꙋ́дъ: и҆́миже сребролю́бїе, ѿ негѡ́же гнѣ́въ, є҆гда̀ кто̀ не ᲂу҆лꙋчи́тъ жела́емагѡ, си́рѣчь, свое́й во́ли. Ѿ сегѡ̀ печа́ль, и҆́мже ᲂу҆ны́нїе. Пото́мъ тщесла́вїе, ѿ негѡ́же го́рдость. И҆ ѿ си́хъ ѻ҆смѝ всѧ́каѧ ѕло́ба, стра́сть же и҆ грѣ́хъ. И҆́мже прихо́дитъ во ѿча́ѧнїе, и҆ соверше́ннꙋю поги́бель, и҆ ѿпаде́нїе ѿ бг҃а, и҆ ᲂу҆подоблѧ́етсѧ бѣсѡ́мъ, ꙗ҆́коже рече́сѧ. Посреди́ же двꙋ́хъ си́хъ пꙋте́й стои́тъ человѣ́къ, си́рѣчь, пра́вды и҆ грѣха̀, и҆ въ каковы́й хо́щетъ, тече́нїе твори́тъ, и҆ є҆го̀ прохо́дитъ: пꙋ́ть же прїе́мшїй є҆го̀, и҆ по не́мъ ведꙋ́щїе є҆го̀, и҆лѝ а҆́гг҃ли и҆ по бз҃ѣ человѣ́цы, и҆лѝ де́мѡни и҆ лꙋка́вїи человѣ́цы ѿво́дѧтъ є҆го̀ до конца̀ пꙋтѝ сегѡ̀ и҆ не хотѧ́ща[[Зрѝ: здѣ̀ рече́сѧ, ꙗ҆́кѡ де́мѡны ѿво́дѧтъ человѣ́ка до конца̀ пꙋтѝ и҆ не хотѧ́ща, си́рѣчь, самогѡ̀ є҆гѡ̀ свѧза́вша благо́е произволе́нїе въ себѣ̀, ꙗ҆́кѡ семꙋ̀ сла́бꙋ и҆ бездѣ́йственнꙋ бы́ти, ѕлѣ́й же во́лѣ всѣ́мъ человѣ́комъ преѡблада́ти.]]. Блазі́и ᲂу҆̀бо къ бг҃ꙋ, и҆ въ ца́рство небе́сное: а҆ грѣ́шнїи ко дїа́волꙋ, и҆ въ вѣ́чнꙋю мꙋ́кꙋ. Но никто́же є҆́сть вино́венъ поги́бели, ра́звѣ своѧ̀ во́лѧ: спасе́нїѧ же бг҃ъ дарова́вый по бытїѝ просто́мъ и҆ благобытїѐ, ра́зꙋмъ же и҆ си́лꙋ. Сегѡ̀ не мо́жетъ и҆мѣ́ти человѣ́къ без̾ благода́ти бж҃їей. Но нижѐ дїа́волъ мо́жетъ что̀ содѣ́лати въ на́шꙋ поги́бель, ꙗ҆́коже произволе́нїе проти́вное, и҆лѝ и҆знеможе́нїе и҆ непроизво́льное невѣ́дѣнїе, и҆лѝ и҆́но что̀ ѿню́дъ, дабы̀ понꙋ́дити человѣ́ка, то́чїю є҆ди́но воспомина́нїе ѕла̀ влага́етъ. Дѣ́лаѧй ᲂу҆́бѡ благо́е, до́лженъ благодаре́нїе воспи́сывати бг҃ꙋ, ꙗ҆́кѡ дарова́вшемꙋ на́мъ всѧ̑ съ бытїе́мъ. Пред̾избира́ѧй же и҆ творѧ́й проти̑внаѧ, са́мъ себѧ̀ то́чїю да ѡ҆бвинѧ́етъ. Занѐ никто́же си́лою привлещѝ є҆го̀ не мо́жетъ: ꙗ҆́кѡ самовла́стна сотворѝ є҆го̀ бг҃ъ, да сподо́битъ є҆го̀ похва́лъ, зрѧ̀ є҆го̀ предпочита́ти и҆мꙋ́ща благо́е, а҆ не по принꙋжде́нїю є҆стества̀, ꙗ҆́коже безслове́снїи и҆ бездꙋ́шнїи ᲂу҆ча́ствовати блага́го, но ꙗ҆́коже прили́чно є҆́сть, слове́сномꙋ, ꙗ҆́коже почтѐ є҆го̀ бг҃ъ. Мы́ же во́льнымъ совѣ́томъ ѕло́е произволѧ́емъ твори́ти, наꙋчи́вшесѧ семꙋ̀ ѿ и҆з̾ѡбрѣта́телѧ ѕло́бы. И҆ не нꙋ́дитъ ны̀ всеблагі́й бг҃ъ, да не нꙋ́дими преслꙋ́шествꙋѧ вѧ́щшее ѡ҆сꙋжде́нїе и҆́мамы, нижѐ самовла́стїе ѿе́млетъ ѿ на́съ, є҆́же до́брѣ дарова̀ на́мъ. Но хотѧ́й твори́ти благо́е, да про́ситъ моли́твою бг҃а, и҆ а҆́бїе дае́тсѧ є҆мꙋ̀ ра́зꙋмъ и҆ си́ла, да ꙗ҆ви́тсѧ пра́веднѣ благода́ть низпо́сланнаѧ бг҃омъ. А҆́ще же и҆ без̾ моли́твы дарова́лъ бы ѻ҆́нъ, ꙗ҆́коже и҆ по моли́твѣ: но ꙗ҆́коже не и҆́мать похвалы̀ прїе́млѧй воздꙋ́хъ жи́зни ра́ди, вѣ́дѧй, ꙗ҆́кѡ без̾ негѡ̀ не мо́жетъ жи́ти: но па́че до́лженъ є҆́сть мно́гѡ благодари́ти сотво́ршемꙋ є҆го̀, и҆ дарова́вшемꙋ дохнове́нїе и҆ здра́вїе, длѧ принѧ́тїѧ є҆гѡ̀ и҆ жи́зни. Та́кѡ и҆ мы̀ до́лжни є҆смы̀ па́че благодари́ти бг҃ꙋ, ꙗ҆́кѡ и҆ моли́твꙋ, и҆ ра́зꙋмъ, и҆ си́лꙋ, и҆ добродѣ́тєли, и҆ на́съ, и҆ всѧ̑ ѡ҆ на́съ сотворѝ по благода́ти. Не то́чїю же, но и҆ не престае́тъ всѧ́чески пещи́сѧ, во є҆́же побѣди́ти ѕло́бꙋ на́шꙋ, и҆ врагѡ́въ на́шихъ, де́монѡвъ. Поне́же и҆ са́мъ дїа́волъ лиши́вшисѧ ра́зꙋма, бг҃омъ дарова́ннагѡ, неразꙋ́мїемъ и҆ го́рдостїю нево́льнѣ содѣ́ласѧ несмы́сленъ, и҆ сегѡ̀ ра́ди са́мъ собо́ю не мо́жетъ вѣ́дати, что̀ подоба́етъ твори́ти, но взира́етъ, что̀ твори́тъ бг҃ъ на́шегѡ ра́ди сп҃се́нїѧ, и҆ ѿ сегѡ̀ наꙋча́етсѧ лꙋка́вствꙋѧ, и҆ подо́бнѣ твори́ти ко́знствꙋетъ къ поги́бели на́шей. Почемꙋ̀ ненави́дитъ бг҃а, и҆ не могі́й ра́товать проти́вꙋ є҆гѡ̀, проти́вꙋ на́съ сꙋ́щихъ по ѡ҆́бразꙋ є҆гѡ̀ ра́тꙋетъ, мнѧ́йсѧ си́мъ мсти́ти бг҃ꙋ. И҆ ѡ҆брѣта́етъ на́съ послꙋ́шными во́ли свое́й, ꙗ҆́коже глаго́летъ златоꙋ́стъ. Ви́дитъ бо, ꙗ҆́кѡ бг҃ъ сотворѝ є҆́ѵꙋ на вспомоществова́нїе а҆да́мꙋ, содѣ́ла ю҆̀ споспѣ́шницею къ престꙋпле́нїю и҆ преслꙋша́нїю. Бг҃ъ дадѐ за́повѣдь, да сохрани́въ ю҆̀ а҆да́мъ, соблюде́тъ па́мѧть толи́кихъ дарѡ́въ, и҆ благоразꙋ́менъ бꙋ́детъ ко благодѣ́телю. Дїа́волъ же содѣ́ла за́повѣдь ѻ҆́нꙋю вино́ю преслꙋша́нїѧ и҆ сме́рти, и҆ вмѣ́стѡ проро́кѡвъ лжепроро́кѡвъ, вмѣ́стѡ а҆по́столѡвъ лжеапо́столѡвъ, вмѣ́стѡ зако́на беззако́нїе, вмѣ́стѡ добродѣ́телей ѕлѡ́бы, вмѣ́стѡ за́повѣдей престꙋплє́нїѧ, вмѣ́стѡ всѧ́кїѧ пра́вды всѧ́къ грѣ́хъ, и҆ вмѣ́стѡ пра́выхъ догма̑тъ мє́рзостныѧ є҆́рєси. И҆ па́ки ви́дѧ хрⷭ҇та̀, кра́йнею бла́гостїю снизходѧ́щаго ко ст҃ы̑мъ мꙋ́ченикамъ, и҆ преподѡ́бнымъ ѻ҆тцє́мъ, и҆лѝ собо́ю, и҆лѝ чрез̾ а҆́гг҃лѡвъ, и҆лѝ и҆ны́мъ нѣ́кїимъ неизглаго́ланнымъ смотре́нїемъ ꙗ҆влѧ́ющагосѧ, ꙗ҆́коже речѐ, нача̀ и҆ дїа́волъ ꙗ҆влѧ́ти нѣ̑кїимъ пре́лєсти мнѡ́гїѧ въ поги́бель. Сегѡ̀ ра́ди написа́ша разсꙋди́тельнїи ѻ҆тцы̀, ꙗ҆́кѡ такова̑ѧ не подоба́етъ прїима́ти, и҆лѝ под̾ нѣ́кїими ѡ҆́бразами, и҆лѝ свѣ́томъ, и҆лѝ ѻ҆гне́мъ, и҆лѝ и҆ны́ѧ нѣ́кїѧ пре́лести. Оу҆хищрѧ́етсѧ бо прельсти́ти понѐ си́мъ во сновидѣ́нїѧхъ, и҆лѝ чꙋ́вственнѣ. А҆́ще же нижѐ сїѐ прїе́млемъ: твори́тъ ᲂу҆́мъ ѿ мнѣ́нїѧ и҆ кра́йнѧгѡ неразꙋ́мїѧ, мечта́ти нѣ́кїѧ ѡ҆́бразы, и҆лѝ ви́ды, во є҆́же возмнѣ́ти, ꙗ҆́кѡ ꙗ҆вле́нїе бж҃їе сїѐ є҆́сть, и҆лѝ а҆́гг҃лово. Мно́гажды же показꙋ́етъ и҆ де́мѡны въ сновидѣ́нїѧхъ, и҆ чꙋ́вственнѣ, ꙗ҆́кобы побѣжда́емы, и҆ про́стѣ, всѧ́кꙋ ко́знь стро́итъ къ на́шей поги́бели, въ покарѧ́ющихсѧ є҆мꙋ̀. Є҆гда́ же сїѧ̑ сотвори́въ не ᲂу҆лꙋчи́тъ своеѧ̀ наде́жды: поне́же глаго́лютъ ст҃і́и ѻ҆тцы̀, ꙗ҆́кѡ во вре́мѧ моли́твы до́лжни є҆смы̀ и҆мѣ́ти ᲂу҆́мъ безви́денъ, невоѡбрази́теленъ, неѡбразови́денъ, и҆ ника́коже что̀ прїе́млющїй, ни свѣ́та, ни ѻ҆гнѧ̀, ни дрꙋга́гѡ чегѡ́либо, но подоба́етъ въ є҆ди́нѣхъ что́мыхъ глаго́лѣхъ мы́сль заключа́ти. Занѐ молѧ́щїйсѧ є҆ди́нѣми то́кмѡ ᲂу҆сты̀, воздꙋ́хꙋ моли́тсѧ, а҆ не бг҃ꙋ: бг҃ъ бо вне́млетъ ᲂу҆мꙋ̀, а҆ не глаго́ламъ, ꙗ҆́коже человѣ́цы. Дх҃омъ, глаго́летъ хрⷭ҇то́съ, и҆ и҆́стиною бг҃ꙋ досто́итъ кла́нѧтисѧ[[І҆ѡа́н. гл. д҃, ст. к҃д.]]. И҆, хощꙋ̀ пѧ́ть слове́съ рещѝ ᲂу҆мо́мъ, не́жели тьмы̑ ѧ҆зы́комъ[[а҃ Корі́н. гл. д҃і, ст. ѳ҃і.]]: тогда̀ ᲂу҆́бѡ недоꙋмѣва́ѧ ѡ҆ всѣ́хъ си́хъ дїа́волъ, влага́етъ въ на́съ по́мыслъ ѿча́ѧнїѧ, ꙗ҆́кѡ и҆́на времена̀ ѻ҆́на бѣ́ша, и҆ и҆ні́и человѣ́цы, въ ни́хже бг҃ъ ꙗ҆вѝ чꙋдеса̀ вѣ́ры ра́ди. Ны́нѣ же нѣ́сть вре́мѧ потрє́бы твори́ти сїѧ̑. Сѐ всѝ є҆смы̀ хрїстїа́не, и҆ креще́нїе но́симъ: И҆́же вѣ́рꙋ и҆ме́тъ, глаго́летъ писа́нїе, и҆ крести́тсѧ, спасе́нъ бꙋ́детъ[[Ма́рк. гл. ѕ҃і, ст. ѕ҃і.]]. Что̀ ли́шшее тре́бꙋемъ; Мы́ же а҆́ще семꙋ̀ повине́мсѧ, и҆ та́кѡ пребꙋ́демъ, соверше́ннѣ лише́нни бꙋ́демъ всегѡ̀, и҆мꙋ́ще є҆ди́но то́чїю и҆́мѧ хрїстїа́нина: не разꙋмѣ́юще, ꙗ҆́кѡ ᲂу҆вѣ́ровавый, и҆ крести́выйсѧ, до́лженъ є҆́сть храни́ти всѧ̑ за́пѡвѣди хрⷭ҇тѡ́вы, и҆ є҆гда̀ всѧ̑ и҆спо́лнитъ, глаго́лати: Ра́бъ неключи́мь є҆́смь[[Лꙋкѝ гл. з҃і, ст. і҃.]]. Ꙗ҆́коже гдⷭ҇ь ко а҆по́столѡмъ речѐ: ᲂу҆ча́ще ѧ҆̀ блюстѝ всѧ̑, є҆ли̑ка заповѣ́дахъ ва́мъ[[Матѳ. гл. к҃и, ст. к҃.]]. Всѧ́къ бо креща́емый ѿрица́етсѧ, глаго́лѧ: ѿрица́юсѧ сатаны̀, и҆ всѣ́хъ дѣ́лъ є҆гѡ̀: сочетава́юсѧ хрⷭ҇тꙋ̀ и҆ всѣ̑мъ за́повѣдемъ є҆гѡ̀. Гдѣ́ же є҆́сть ѿрица́нїе на́ше, а҆́ще не всѧ́кꙋ стра́сть, и҆ всѧ́къ грѣ́хъ, є҆гѡ́же хо́щетъ дїа́волъ, ѡ҆ста́вимъ; Па́че же возненави́димъ ѿ всеѧ̀ дꙋшѝ, и҆ возлю́бимъ хрⷭ҇та̀, соблюде́нїемъ за́повѣдей є҆гѡ̀. Ка́кѡ же сохрани́мъ за́пѡвѣди є҆гѡ̀, а҆́ще не ѿве́ржемсѧ всѧ́кагѡ хотѣ́нїѧ своегѡ̀, и҆ всѧ́кагѡ разꙋмѣ́нїѧ; хотѣ́нїй же, и҆ разꙋмѣ́нїй тѣ́хъ, и҆́же глаго́лѧтсѧ прѡти́вна бы́ти за́повѣдемъ бж҃їимъ. Поне́же мно́жицею быва́ютъ нѣ́цыи такові́и, и҆лѝ ѿ є҆сте́ственнагѡ сложе́нїѧ, и҆лѝ ѿ навыкнове́нїѧ благо́е въ нѣ́кїихъ дѣ́лѣхъ лю́бѧтъ, ѕло́е же ненави́дѧтъ: сꙋ́ть и҆ благі̑ѧ разꙋмѣ̑нїѧ, ꙗ҆́кѡ и҆ ѿ бж҃е́ственныхъ писа́нїй свидѣ́тельство и҆мꙋ́щыѧ, тре́бꙋютъ же ѿ и҆скꙋ́сныхъ разсꙋжде́нїѧ. Поне́же без̾ разсꙋжде́нїѧ нижѐ та̑, ꙗ҆̀же благи́ми почита́емъ, сꙋ́ть дѡбра̀, и҆лѝ занѐ не благовре́меннѣ, и҆лѝ занѐ не нꙋ́жнѣ, си́рѣчь недосто́йнѣ, и҆лѝ неразꙋ́мнѣ разꙋмѣ́емъ глаго́лємаѧ. Ꙗ҆́кѡ не то́чїю писа́нїе, но и҆ прилꙋчи́вшїйсѧ вопро́съ, а҆́ще не вне́млютъ є҆мꙋ̀ ѻ҆́ба, вопроша́ющїй и҆ вопроша́емый, дале́че ѿхо́дитъ ѿ ра́зꙋма глаго́лемыхъ, и҆ неминꙋ́емый нано́ситъ вре́дъ. И҆́бо и҆ а҆́зъ мно́жицею пострада́хъ вопроша́ѧй, и҆ вопроша́емый: є҆гда́ же, ꙗ҆́коже подоба́етъ, разꙋмѣва́хъ глаго́лємаѧ, по́слѣжде ᲂу҆разꙋмѣ́въ сїѐ ᲂу҆дивлѧ́хсѧ: ка́кѡ подѡ́бна сꙋ́ть словеса̀, разꙋмѣ̑нїѧ же дале́че дрꙋ́гъ ѿ дрꙋ́га ѿстоѧ́тъ. Та́кѡ и҆ въ про́чихъ всѣ́хъ разсꙋжде́нїѧ тре́бꙋемъ, ка́кѡ до́лжни є҆смы̀ твори́ти, да содѣ́лаемъ во́лю бж҃їю. Занѐ то́й вѣ́сть є҆стество̀ на́ше и҆звѣ́стнѡ, ꙗ҆́кѡ творе́цъ всѧ́ческихъ, и҆ полє́знаѧ на́мъ ᲂу҆стро́и, и҆ ᲂу҆законоположѝ, не чꙋжда̑ѧ є҆стества̀ на́шегѡ, но свѡ́йственнаѧ семꙋ̀, и҆ то́чїю къ соверше́нствꙋ слꙋжа̑щаѧ хотѧ́щымъ во́льнѣ къ немꙋ̀ вышеесте́ственнѡ взы́ти: си́рѣчь, дѣ́вство, нестѧжа́нїе и҆ смиренномꙋ́дрїе, а҆ не благоразꙋ́мїе: сїе́ бо є҆сте́ственно є҆́сть. Смиренномꙋ́дрїе же вышеесте́ственно: занѐ всѧ́кꙋ добродѣ́тель соверша́етъ смиренномꙋ́дрый, и҆ ничи́мъ до́лженъ сы́й, должника̀ себѧ̀, и҆ ме́ньша всѣ́хъ вмѣнѧ́етъ. Благоразꙋ́мный же до́лженъ сы́й, до́лгъ и҆сповѣ́дꙋетъ: ꙗ҆́коже и҆ благотворѧ́й, ѿ тѣ́хже, є҆́же и҆́мать, благотвори́тъ, и҆ нѣ́сть па́че є҆стества̀, ꙗ҆́коже нестѧжа́тельный. Нижѐ встꙋпи́вый въ сꙋпрꙋ́жество, ꙗ҆́коже дѣ́вственникъ: вышеесте́ственно бо є҆́сть сїѐ дарова́нїе. Та́кѡ ᲂу҆́бѡ ѻ҆́въ спаса́етсѧ, а҆́ще ѡ҆ста́вль своѧ̑ хотѣ̑нїѧ, и҆сполнѧ́етъ бж҃їѧ: ѻ҆́въ же полꙋ́читъ ѿ бг҃а вѣне́цъ терпѣ́нїѧ и҆ сла́вꙋ, ꙗ҆́кѡ не то́чїю зако́нами возбранє́ннаѧ ѡ҆ста́вль, но съ ни́ми и҆ своѐ є҆стество̀ побѣди́въ, бг҃ꙋ содѣ́йствꙋющꙋ, вышеесте́ственнѡ бг҃а возлюбѝ ѿ всеѧ̀ дꙋшѝ, и҆ по си́лѣ подража́въ є҆гѡ̀ безстра́стїю. Но поне́же не разꙋмѣ́емъ мы̀ не то́чїю на́съ сами́хъ, и҆ ра́ди на́съ быва́емыхъ, но и҆ намѣ́ренїѧ и҆́хъ, и҆ и҆ско́магѡ ѿ всѣ́хъ: сегѡ̀ ра́ди писа̑нїѧ бж҃є́ственныѧ и҆ словеса̀ ст҃ы́хъ дре́внихъ мꙋже́й, проро́кѡвъ глаго́лю, и҆ пра́ведныхъ и҆ но́выхъ ст҃ы́хъ ѻ҆тє́цъ, ꙗ҆влѧ́ютсѧ на́мъ несогла̑сна, и҆ ны́нѣ хотѧ́щїи спасти́сѧ несогла́сни дрꙋ́гъ со дрꙋ́гомъ, є҆́же бы́ти не мо́жетъ. Сѐ ма́лѣми словесы̀ и҆ ѿ є҆стества̀ веще́й, вѣ́мы, ꙗ҆́кѡ, а҆́ще всѧ́къ человѣ́къ восхо́щетъ спасти́сѧ, ничто́же мо́жетъ є҆мꙋ̀ воспѧти́ти, ни вре́мѧ, ни мѣ́сто, ни начина́нїе. То́чїю да не без̾ по́льзы ве́щь, ю҆́же хо́щетъ твори́ти, соверша́етъ, но ꙗ҆́коже подоба́етъ, съ разсꙋжде́нїемъ, къ бж҃їю намѣ́ренїю ѡ҆браща́ѧ всѧ́ко разꙋмѣ́нїе. Поне́же не твори̑маѧ сꙋ́ть нꙋ̑жна, но то̀, чегѡ̀ ра́ди твори̑ма быва́ютъ, нижѐ нево́льнѣ согрѣша́емъ, а҆́ще не съ по́мысломъ пе́рвѣе во́льнѣ сослага́емсѧ, и҆ въ плѣне́нїе впа́даемъ. И҆ тогда̀ то́й плѣне́ннаго нево́льнѣ, и҆ не хотѧ́ща, къ паде́нїю приво́дитъ. Подо́бнѣ же, и҆ по невѣ́дѣнїю быва́ємаѧ согрѣшє́нїѧ, быва́ютъ ѿ сꙋ́щихъ по вѣ́дѣнїю. А҆́ще бо кто̀ не ᲂу҆пїе́тсѧ и҆лѝ вїно́мъ, и҆лѝ по́хотїю, не невѣ́жствꙋетъ. Ѿ ᲂу҆пива́нїѧ же начина́етъ помрача́тисѧ ᲂу҆́мъ, ѿ сегѡ̀ согрѣша́ти, а҆ ѿ ѻ҆́нагѡ ᲂу҆мира́ти: тѣ́мже не невѣ́домѡ сме́рть прїи́де, но пїѧ́нство вѣ́домое введѐ сме́рть невѣ́домꙋю. И҆ мно́гѡ ѡ҆брѧ́щетъ всѧ́къ наипа́че же въ разꙋмѣ́нїѧхъ, ꙗ҆́кѡ ѿ во́льныхъ въ невѡ́льнаѧ, и҆ ѿ вѣ́домыхъ въ невѣ́дѡмаѧ впа́даемъ. Но поне́же ꙗ҆влѧ́ютсѧ на́мъ пє́рваѧ лє́гка и҆ сла̑дка, сегѡ̀ ра́ди во втора̑ѧ прихо́димъ нево́льнѣ и҆ невѣ́домѣ. А҆́ще бо ѿ нача́ла восхотѣ́ли бы́хомъ за́пѡвѣди сохрани́ти, и҆ пребыва́ти таковы́ми, ꙗ҆́коже крести́хомсѧ: не бы̀ пришлѝ въ сїѧ̑ ѕла̑ѧ, и҆ тре́бовали бы́хомъ трꙋдѡ́въ и҆ болѣ́зней покаѧ́нїѧ. Ѻ҆ба́че и҆ па́ки а҆́ще хо́щемъ, втора́ѧ бж҃їѧ благода́ть, си́рѣчь, покаѧ́нїе мо́жетъ къ пе́рвой возвестѝ на́съ добро́тѣ. А҆́ще же нижѐ ѡ҆ се́й тщи́мсѧ, нꙋ́ждею, ꙗ҆́коже и҆ нераска́ѧннїи де́мѡни, ѿи́демъ съ ни́ми въ вѣ́чнꙋю мꙋ́кꙋ, а҆́ще хо́щемъ, а҆́ще не хо́щемъ. Не бо̀ ра́ди гнѣ́ва сотворѝ на́съ бг҃ъ, но ра́ди снабдѣ́нїѧ, да наслади́вшесѧ благи́хъ є҆гѡ̀, благода́рни и҆ благомы́сленни пребꙋ́демъ ко благодѣ́телю. Но нерадѣ́нїе на́ше ѡ҆ ра́зꙋмѣ дарѡ́въ є҆гѡ̀, въ ᲂу҆ны́нїе на́съ приведѐ. А҆ сїѐ забве́нїю подве́рже, ѿ негѡ́же невѣ́дѣнїе въ на́съ воцари́сѧ.

Є҆гда́ же хо́щемъ положи́ти нача́ло, во є҆́же ѡ҆брати́тисѧ, ѿню́дꙋже и҆спадо́хомъ, мно́гагѡ тре́бꙋемъ трꙋда̀: занѐ не хо́щемъ ѡ҆ста́вити хотѣ́нїй на́шихъ: но мни́мъ, ꙗ҆́кѡ съ бж҃їими, и҆ на́ше твори́ти мо́жемъ, є҆́же не возмо́жно є҆́сть. Са́мъ бо гдⷭ҇ь речѐ: не да творю̀ во́лю мою̀, но во́лю посла́вшагѡ мѧ̀ ѻ҆ц҃а̀[[І҆ѡа́н. глава̀ ѕ҃, ст. л҃и.]], хотѧ̀ и҆ є҆ди́на во́лѧ є҆́сть ѻ҆ц҃а̀, и҆ сн҃а, и҆ дх҃а, ꙗ҆́кѡ є҆ди́на є҆стества̀ сꙋ́ть нераздѣ́льнѣ. Но на́съ ра́ди сїѐ рече́сѧ, и҆ по хотѣ́нїю пло́ти. А҆́ще бо не ᲂу҆мерщвле́на бꙋ́детъ пло́ть, и҆ человѣ́къ не бꙋ́детъ ве́сь води́мь дх҃омъ бж҃їимъ: не мо́жетъ твори́ти во́ли бж҃їей без̾ понꙋжде́нїѧ. Є҆гда́ же воцари́тсѧ въ на́съ бл҃года́ть дх҃а: тогда̀ не ктомꙋ̀ свою̀ и҆́мамы: но а҆́ще что̀ бꙋ́детъ. во́лѧ бж҃їѧ є҆́сть. Тогда̀ ми́ръ и҆́мамы, и҆ сы́нове бж҃їи нарекꙋ́тсѧ такові́и, ꙗ҆́кѡ во́лю ѻ҆́ч҃ꙋю лю́бѧтъ, ꙗ҆́коже и҆ сн҃ъ бж҃їй, и҆ бг҃ъ. А҆ сегѡ̀ не возмо́жно никомꙋ́же ѡ҆брѣстѝ без̾ соблюде́нїѧ за́повѣдей, и҆́миже всѧ̑кїѧ сла̑сти, си́рѣчь, хотѣ̑нїѧ своѧ̑ ѿсѣца́етъ, и҆ всѧ̑кїѧ бѡлѣ́зни ѡ҆ се́мъ быва́ющыѧ те́рпитъ. Ѿ безꙋ́мїѧ бо сла́сть и҆ болѣ́знь ражда́ютсѧ, ꙗ҆́коже рече́сѧ пре́жде, и҆ ѿ си́хъ всѧ́ка ѕло́ба, занѐ безꙋ́мный самолюби́въ быва́етъ, и҆ не мо́жетъ бы́ти братолюби́въ, ни бг҃олюби́въ, нижѐ и҆́мать воздержа́нїѧ ѿ страсте́й, си́рѣчь, хотѣ́нїй ᲂу҆го́дныхъ сꙋ́щихъ є҆мꙋ̀, нижѐ терпѣ́нїѧ ско́рбей. Но ѻ҆вогда̀ дости́гшꙋ є҆мꙋ̀ во́ли своеѧ̀, ᲂу҆множа́етсѧ въ не́мъ сла́сть и҆ надме́нїе: ѻ҆вогда́ же не дости́гнꙋвъ, и҆ болѣ́знꙋющъ ѡ҆ се́мъ, прихо́дитъ въ малодꙋ́шїе, и҆ дꙋше́вное ᲂу҆давле́нїе, є҆́же є҆́сть предначина́нїе гее́нны. Ѿ ра́зꙋма же, си́рѣчь, мꙋ́дрости, быва́етъ воздержа́нїе и҆ терпѣ́нїе. Поне́же мꙋ́дрый ᲂу҆де́рживаетъ хотѣ́нїе своѐ, и҆ те́рпитъ ѡ҆ се́мъ болѣ́знь, и҆ почита́ѧ себѧ̀ сласте́й недосто́йнымъ, быва́етъ благоразꙋ́менъ, и҆ благода́ренъ ко благодѣ́телю, боѧ́сѧ, да не ка́кѡ ра́ди мно́гихъ благи́хъ, и҆̀хже дарова̀ є҆мꙋ̀ бг҃ъ въ ны́нѣшнемъ вѣ́цѣ, ѿтщети́тсѧ въ бꙋ́дꙋщемъ. И҆ та́кѡ воздержа́нїемъ, и҆ въ про́чихъ добродѣ́телѧхъ трꙋжда́етсѧ, во все́мъ должника̀ себѧ̀ вмѣнѧ́ѧ. Нижѐ ма́лѡ что̀ ѡ҆брѣта́етъ возда́ти своемꙋ̀ благодѣ́телю, но и҆ са́мыѧ добродѣ́тєли почита́етъ вѧ́щшимъ до́лгомъ: прїе́млетъ бо, а҆ не ѿдае́тъ. Сїе́ же, ꙗ҆́кѡ сподо́бисѧ возблагодари́ти бг҃ꙋ, и҆ бг҃ъ прїе́млетъ благодаре́нїе є҆гѡ̀, почита́етъ ѻ҆́нъ вѧ́щшимъ до́лгомъ и҆ при́снѡ благодари́тъ, творѧ̀ всѧ́кое бла́го, и҆ всегда̀ смиренномꙋ́дрствꙋѧ, и҆ вмѣнѧ́етъ себѧ̀ вѧ́щшаго должника̀, и҆ ме́ньша всѣ́хъ. Ра́дꙋѧсѧ ѡ҆ бз҃ѣ благодѣ́ющемъ є҆мꙋ̀, и҆ веселѧ́сѧ со тре́петомъ, и҆ къ бж҃е́ственной неизмѣнѧ́емой любвѝ теча̀ смиренномꙋ́дрїемъ, скѡ́рбнаѧ прїе́млетъ, а҆́ки досто́инъ. Па́че же и҆ бо́льшагѡ прилꙋча́ющихсѧ є҆мꙋ̀ досто́йна себѧ̀ бы́ти вмѣнѧ́етъ, и҆ ра́дꙋетсѧ, ꙗ҆́кѡ сподо́бисѧ ма́лѡ пострада́ти въ ны́нѣшнѣмъ вѣ́цѣ, и҆ ѡ҆блегче́нїѧ прїѧ́ти мно́гихъ мꙋче́нїй, ꙗ҆̀же пред̾ꙋгото́ва себѣ̀ въ бꙋ́дꙋщемъ. И҆ ꙗ҆́кѡ въ се́мъ познае́тъ не́мощь свою̀, и҆ не возно́ситсѧ. А҆ занѐ сподо́бисѧ сїѧ̑ вѣ́дѣти, и҆ претерпѣ́ти по благода́ти бж҃їей, въ бж҃е́ственное прихо́дитъ жела́нїе. Смиренномꙋ́дрїе бо є҆́сть порожде́нїе ра́зꙋма, ра́зꙋмъ же порожде́нїе и҆скꙋше́нїй. Оу҆вѣ́дѣвшемꙋ себѐ, дае́тсѧ ра́зꙋмъ всѣ́хъ. И҆ повинꙋ́ѧйсѧ бг҃ꙋ, покарѧ́етъ себѣ̀ всѧ́ко мꙋдрова́нїе пло́ти, и҆ по си́хъ повинꙋ́тсѧ є҆мꙋ̀ всѧ̑, є҆гда̀ воцари́тсѧ смире́нїе въ чле́нѣхъ є҆гѡ̀. Познава́ѧй бо себѧ̀, ꙗ҆́коже глаго́лютъ свѧті́и, васі́лїй и҆ григо́рїй, нахо́дитсѧ посредѣ̀ вели́чїѧ и҆ смире́нїѧ, ꙗ҆́кѡ ᲂу҆́мнꙋю и҆мы́й дꙋ́шꙋ, и҆ ꙗ҆́кѡ ме́ртвенное и҆ земно́е тѣ́ло никогда́же возно́ситсѧ, и҆ не ѿчаѧва́етсѧ: но стыдѧ́сѧ ᲂу҆́мнагѡ дꙋшѝ, всѣ́хъ стꙋ́дныхъ ѿвраща́етсѧ, и҆ познаѧ̀ не́мощь свою̀, ᲂу҆бѣга́етъ всѧ́кагѡ возноше́нїѧ. Оу҆разꙋмѣ́вшїй ᲂу҆́бѡ не́мощь свою̀, ѿ мно́гихъ и҆скꙋше́нїй тѣле́сныхъ же и҆ дꙋше́вныхъ страсте́й, познае́тъ безконе́чное бж҃їе могꙋ́щество, ка́кѡ ѻ҆́нъ смире́нныхъ, вопїю́щихъ къ немꙋ̀ приболѣ́зненною ѿ се́рдца моли́твою, и҆збавлѧ́етъ. И҆ таково́мꙋ про́чее сла́достна моли́тва быва́етъ. Вѣ́дый, ꙗ҆́кѡ без̾ бг҃а ничто́же мо́жетъ сотвори́ти, и҆ страша́сѧ па́сти, подвиза́етсѧ прилѣплѧ́тисѧ бг҃ꙋ, ᲂу҆дивлѧ́етсѧ же помышлѧ́ѧ, ка́кѡ и҆зба́ви є҆го̀ бг҃ъ ѿ таковы́хъ и҆скꙋше́нїй и҆ страсте́й, и҆ благодари́тъ могꙋ́щаго и҆зба́вити є҆го̀, и҆ со благодаре́нїемъ смире́нїе и҆ любо́вь прїе́млетъ, и҆ ѿню́дъ никого́же сꙋди́ти дерза́етъ, вѣ́дѧй, ꙗ҆́кѡ, ка́кѡ помо́же є҆мꙋ̀ бг҃ъ, та́кѡ и҆ всѣ̑мъ помощѝ, а҆́ще благоизво́литъ, мо́жетъ, ꙗ҆́коже глаго́летъ свѧты́й маѯі́мъ. Мо́жетъ бы́ть, что̀ и҆ возмо́жетъ кто́либо бра́тисѧ со мно́гими страстьмѝ, и҆ побѣжда́ти, себе́ же не́мощна сꙋ́ща почита́етъ. И҆ сегѡ̀ ра́ди бг҃ъ вско́рѣ помо́же є҆мꙋ̀, да не поги́бнетъ соверше́ннѣ дꙋша̀ є҆гѡ̀. И҆ и҆́на бѡ́льшаѧ познава́ѧй, и҆ не́мѡщи своѧ̑ помышлѧ́ѧ, пребыва́етъ непа́дателенъ. Невозмо́жно же ктомꙋ̀ дости́гнꙋти сегѡ̀, а҆́ще не прете́рпитъ мно́гихъ и҆скꙋше́нїй, дꙋше́вныхъ же и҆ тѣле́сныхъ. И҆ си́лою бж҃їею, терпѣ́нїемъ подкрѣплѧ́емь, навыка́етъ и҆скꙋ́сꙋ. Таковы́й же ѿню́дь не дерза́етъ своѐ твори́ти хотѣ́нїе без̾ вопро́са и҆скꙋ́сныхъ, нижѐ своѝ разꙋмѣ̑нїѧ соста́вити. Занѐ ка́ѧ томꙋ̀ потре́ба, и҆́же хо́щетъ что́либо сотвори́ти, и҆лѝ помы́слити, не длѧ жи́зни тѣле́сной, и҆лѝ сп҃се́нїѧ дꙋше́внагѡ; А҆́ще же кто̀ не вѣ́сть, ко́е хотѣ́нїе, и҆ ко́е разꙋмѣ́нїе до́лжно є҆́сть ѡ҆ста́вити, да и҆спытꙋ́етъ всѧ́кꙋ ве́щь и҆ всѧ́ко разꙋмѣ́нїе ᲂу҆дале́нїемъ ѿ сегѡ̀ и҆ воздержа́нїемъ: и҆ ко́е прино́ситъ стꙋже́нїе, и҆ быва́емо ᲂу҆́бѡ сла́сть, возбранѧ́емо же болѣ́знь, ѕло̀ є҆́сть. И҆ сїѐ надлежи́тъ презрѣ́ти, пре́жде не́жели ᲂу҆косни́тъ, и҆ до́лжно є҆́сть подвиза́тисѧ побѣди́ти то̀, внегда̀ ѡ҆щꙋти́тъ вре́дъ є҆гѡ̀. Сїе́ же глаго́лю ѡ҆ всѧ́кой ве́щи и҆ разꙋмѣ́нїи, без̾ негѡ́же не мо́жемъ жи́ви бы́ти тѣле́снѣ, и҆ благоꙋгоди́ти бг҃ꙋ. Занѐ коснѧ́щеесѧ ѻ҆быкнове́нїе прїе́млетъ крѣ́пость є҆стества̀, є҆гда́ же не попꙋ́стиши є҆мꙋ̀, ѡ҆слабѣва́етъ, и҆ пома́лꙋ и҆стреблѧ́етсѧ: благі́й ᲂу҆́бѡ ѻ҆бы́чай и҆ ѕлы́й вре́мѧ пита́етъ та́кѡ, ꙗ҆́коже дрова̀ пита́ютъ ѻ҆́гнь. Сегѡ̀ ра́ди подоба́етъ на́мъ благо́мꙋ все́ю си́лою поꙋча́тисѧ, и҆ твори́ти є҆̀, да прїи́детъ навыкнове́нїе, и҆ самодви́жнѣ ѻ҆бы́чай твори́тъ, прилꙋчи́вшеесѧ без̾ трꙋда̀, ꙗ҆́коже ѻ҆тцы̀ ма́лыми побѣди́ша вели̑каѧ. Не хотѧ́й бо и҆мѣ́ти нꙋ́жнѣй потре́бы тѣле́снѣй, но ѿверга́ѧй ѻ҆́нꙋю, да тѣ́снымъ и҆ приско́рбнымъ пꙋте́мъ ше́ствꙋетъ, когда̀ въ любостѧжа́нїе прїи́детъ: не то́чїю бо мно́гое стѧжа́нїе є҆́сть любостѧжа́нїе, но и҆ а҆́ще кто̀ что́либо и҆́мать пристра́стнѣ, и҆лѝ без̾ потре́бы, и҆лѝ па́че потре́бы. Поне́же мно́зїи дре́внїи ѻ҆тцы̀, а҆́ще и҆ мно́гое и҆мѣ́ѧхꙋ стѧжа́нїе, ꙗ҆́коже а҆враа́мъ, і҆́ѡвъ и҆ даві́дъ, и҆ и҆ні́и мно́зи: но не бѣ̀ въ ни́хъ пристра́стїѧ: вє́щи же и҆мѣ́ѧхꙋ, ꙗ҆́кѡ бж҃їѧ, и҆ ѻ҆́нѣми па́че ꙗ҆ви́шасѧ благоꙋгоди́ти бг҃ꙋ. Гдⷭ҇ь же пресоверше́нъ сы́й, и҆ є҆ди́наѧ самопремꙋ́дрость, ко́рень сегѡ̀ ѿсѣчѐ: не то́чїю бо и҆мѣ́нїѧ и҆ стѧжа́нїѧ, послѣ́дꙋющимъ є҆мꙋ̀ подража́нїемъ высоча́йшїѧ добродѣ́тели, но нижѐ дꙋшѝ, си́рѣчь во́ли, и҆ разꙋмѣ́нїѧ своегѡ̀ и҆мѣ́ти повелѣ̀. И҆ сїѐ вѣ́дѧще ѻ҆тцы̀ ᲂу҆бѣга́ша мі́ра, ꙗ҆́кѡ препина́юща къ соверше́нствꙋ, и҆ не то́чїю же сегѡ̀, но и҆ во́ли: никто́же бо и҆з̾ ни́хъ когда́либо со́бственнꙋю во́лю сотворѝ. Но ѻ҆́вїи въ повинове́нїи тѣле́снѣмъ, да и҆́мꙋтъ вмѣ́стѡ хрⷭ҇та̀, ѻ҆тца̀ дꙋхо́внаго на всѧ́ко разꙋмѣ́нїе. Ѻ҆́ви же въ пꙋсты́ни, и҆ соверше́ннѣмъ ᲂу҆дале́нїи ѿ люде́й, самого̀ бг҃а и҆мѣ́ѧхꙋ ᲂу҆чи́телемъ, за него́же произво́льнѣ и҆ сме́рть претерпѣ́ти восхотѣ́ша: ѻ҆́вїи же ца́рскїй ᲂу҆держа́ша пꙋ́ть, си́рѣчь, съ є҆ди́нѣмъ и҆лѝ съ двѣма̀ до́брѣ безмо́лвствїѧ, и҆мѣ́ѧхꙋ ко благоꙋгожде́нїю бг҃ꙋ, дрꙋ́гъ дрꙋ́га совѣ́тники бла́ги. Нѣ́цыи же по́слѣ повинове́нїѧ повелѣ́нїемъ ѻ҆тца̀ нача́льствовати и҆но́ю бра́тїею поста́влени бы́вше, ꙗ҆́кѡ въ повинове́нїи живѧ́хꙋ, сохранѧ́ѧ преда̑нїѧ тѣ́хже ѻ҆тє́цъ, и҆ бы́сть всѧ́кое начина́нїе бла́го. Ны́нѣ же, поне́же не хо́щемъ ни въ повинове́нїи сꙋ́щїи, ни въ нача́льствїи, ѡ҆ста́вити своѧ̑ хотѣ̑нїѧ, сегѡ̀ ра́ди никто́же въ предспѣ́ѧнїе прихо́дитъ. Про́чее пребы́сть, ꙗ҆́коже и҆ є҆́сть, ᲂу҆дале́нїе ѿ люде́й и҆ веще́й жите́йскихъ, во є҆́же ца́рскимъ пꙋте́мъ ше́ствовати, и҆ безмо́лвствовати съ є҆ди́нѣмъ, и҆лѝ двѣма̀, и҆ за́повѣдемъ хрⷭ҇тѡ́вымъ и҆ всѧ́комꙋ писа́нїю поꙋча́тисѧ де́нь и҆ но́щь: да понѐ ѿ ѻ҆́нагѡ и҆ ѿ со́вѣсти ѡ҆блича́емь бы́въ, и҆ внима́тельнымъ чте́нїемъ и҆ моли́твою дости́гнетъ кто́либо въ пе́рвꙋю за́повѣдь, си́рѣчь, стра́хъ бж҃їй, быва́емый ѿ вѣ́ры, и҆ поꙋче́нїѧ въ бж҃е́ственныхъ писа́нїѧхъ. И҆ чрез̾ сїѐ въ пла́чь да прїи́детъ, чрез̾ него́же и҆ въ про́чыѧ за́пѡвѣди, и҆̀хже наречѐ а҆по́столъ, вѣ́рою, наде́ждою, любо́вїю: вѣ́рꙋѧй бо гдⷭ҇ви, бои́тсѧ мꙋ́ки, и҆ боѧ́йсѧ мꙋ́ки, сохранѧ́етъ за́пѡвѣди, и҆ хранѧ́й за́пѡвѣди, те́рпитъ скѡ́рби, терпѧ́й же скѡ́рби, стѧ́житъ наде́ждꙋ на бг҃а: наде́жда же ѿлꙋча́етъ ᲂу҆́мъ ѿ всѧ́кагѡ пристра́стїѧ: и҆ ѿлꙋче́нный ѿ сегѡ̀ воз̾имѣ́етъ къ бг҃ꙋ любо́вь. Сїѧ̑ и҆дѣ́же восхо́щетъ кто̀ твори́ти, спасе́тсѧ. Безмо́лвствїе же, ꙗ҆́кѡ нача́ло сꙋ́щее ѡ҆чище́нїѧ дꙋшѝ, кромѣ̀ трꙋда̀ всѧ̑ за́пѡвѣди ᲂу҆строѧ́етъ произволѧ́ющемꙋ. Бѣжѝ, ꙗ҆́коже рече́но бѣ̀ нѣ́коемꙋ ѻ҆тцꙋ̀, молчѝ, и҆ безмо́лвствꙋй: сі́и бо сꙋ́ть ко́рени безгрѣ́шїѧ[[Въ мине́и чет. ма́їа и҃, въ житїѝ а҆рсе́нїа вели́кагѡ.]]. И҆ па́ки: бѣ́гай ѿ человѣ̑къ, и҆ спасе́шисѧ: занѐ бесѣ̑ды не попꙋща́ютъ ᲂу҆мꙋ̀ ви́дѣти ни согрѣше́нїй свои́хъ, ни кова́рствъ де́монѡвъ, да блюде́тъ человѣ́къ самого̀ себѧ̀, нижѐ па́ки благодѣѧ́нїй и҆ смотре́нїй бж҃їихъ, да стѧ́жетъ ѿ си́хъ ра́зꙋмъ бж҃їй и҆ смире́нїе. Сегѡ̀ ра́ди хотѧ́й ше́ствовати кра́ткимъ пꙋте́мъ ко хрⷭ҇тꙋ̀, си́рѣчь, безстра́стїемъ и҆ ра́зꙋмомъ, и҆ съ ра́достїю дости́гнꙋти соверше́нства, до́лженъ не и҆́нꙋдꙋ, си́рѣчь, не деснꙋ́ю, и҆лѝ шꙋ́юю странꙋ̀, но во все́мъ свое́мъ пребыва́нїи тща́тельнѣ ца́рскимъ пꙋте́мъ ше́ствовати, крѣ́пкѡ ᲂу҆далѧ́ѧсѧ прїꙋмноже́нїй же и҆ ѡ҆скꙋдѣ́нїй, ꙗ҆́кѡ ѻ҆боѧ̀ сла̑сти произво́дѧтъ, и҆ нижѐ и҆зли́шествомъ бра́шенъ и҆ бесѣ́дъ ᲂу҆́мъ помрача́ти, и҆ ѡ҆слѣплѧ́ти є҆го̀ попече́нїѧми. Нижѐ па́ки продолжи́тельнымъ посто́мъ и҆ бдѣ́нїемъ мы́сль возмꙋща́ти. Но се́дмь ви́ды, тѣлє́сныѧ, глаго́лю, дѣѧ̑нїѧ до́брѣ съ терпѣ́нїемъ дѣ́лаѧй, да восхо́дитъ ꙗ҆́кѡ по лѣ́ствицѣ, непреста́ннѡ є҆ди́ною содержа̀ сїѧ̑ се́дмь, и҆ ше́ствꙋѧ ко нра́вственномꙋ дѣѧ́нїю, и҆́мже вѣ́рꙋющемꙋ да́рꙋютсѧ благода́тїю бж҃їею ᲂу҆мозрѣ̑нїѧ, ꙗ҆́коже глаго́летъ гдⷭ҇ь: ꙗ҆́кѡ всѧ́ко писа́нїе бг҃одꙋхнове́нно, и҆ поле́зно є҆́сть[[в҃ Тїм. глава̀ г҃, ст. ѕ҃і,]], и҆ ꙗ҆́кѡ ничто́же мо́жетъ воспѧти́ти хотѧ́щаго спасти́сѧ, нижѐ и҆́мать и҆́нъ над̾ на́ми вла́сть, ра́звѣ є҆ди́наго сотво́ршагѡ на́съ бг҃а, и҆́же и҆ гото́въ є҆́сть въ по́мощь и҆ въ соблюде́нїе ѿ всѧ́кагѡ и҆скꙋше́нїѧ, вопїю́щымъ къ немꙋ̀, и҆ хотѧ́щымъ твори́ти свѧтꙋ́ю є҆гѡ̀ во́лю. Без̾ негѡ́ бо никто́же мо́жетъ благо́е твори́ти, нижѐ ѕло̀ нево́льнѣ терпѣ́ти, а҆́ще не попꙋ́ститъ ѻ҆́нъ въ наказа́нїе прегрѣша́ющагѡ, и҆ во спасе́нїе дꙋшѝ є҆гѡ̀. И҆ ꙗ҆́кѡ лꙋка̑ваѧ дѣла̀ ѿ на́съ сꙋ́ть, и҆ происхо́дѧтъ ѿ на́шей лѣ́ности и҆ содѣ́йствїѧ де́монѡвъ. Всѧ́къ же ра́зꙋмъ, добродѣ́тель же и҆ крѣ́пость, благода́ть бж҃їѧ є҆́сть, ꙗ҆́коже и҆ всѧ̑ прѡ́чаѧ. И҆ ꙗ҆́кѡ по благода́ти дадѐ на́мъ ѻ҆́бласть ча́дѡмъ бж҃їимъ бы́ти[[І҆ѡа́н. глава̀ а҃, ст. в҃і.]], соблюде́нїемъ за́повѣдей є҆гѡ̀. И҆ ꙗ҆́кѡ за́пѡвѣди сі́и па́че сохранѧ́ютъ на́съ, и҆ благода́ть бж҃їѧ сꙋ́ть. Поне́же без̾ благода́ти є҆гѡ̀, нижѐ и҆̀хъ блюстѝ мо́жемъ. И҆ ничегѡ̀ не мо́жемъ возда́ти є҆мꙋ̀, то́чїю є҆ди́нꙋ вѣ́рꙋ и҆ произволе́нїе. И҆ вкра́тцѣ, всѧ̑ пра̑выѧ догма́ты ѿ тве́рдыѧ вѣ́ры и҆ слꙋ́ха содержѧ̀, надлежи́тъ начина́ти дѣ́ланїе по рѧ́дꙋ, ꙗ҆́коже ᲂу҆чє́нїѧ во ᲂу҆чи́лищахъ, и҆ та́кѡ тща́тельнѣ предречє́нныѧ се́дмь дѣѧ̑нїѧ са́мымъ дѣ́ломъ навыка́ти. И҆̀же сꙋ́ть сїѧ̑:

Нꙋ́жное и҆ и҆зрѧ́дное показа́нїе седмѝ тѣле́сныхъ дѣѧ́нїй.

Пе́рвое є҆́сть безмо́лвїе, си́рѣчь, безпопечи́тельное жи́тельство, ѿстоѧ́щее ѿ всѧ́кагѡ жите́йскагѡ попече́нїѧ, да возмо́жетъ человѣ́къ ᲂу҆дале́нїемъ ѿ люде́й и҆ попече́нїй, ᲂу҆бѣга́ти мѧте́жа, и҆ ꙗ҆́кѡ льва̀ рыка́ющагѡ, ходѧ́ща и҆ и҆́щꙋща кого̀ поглоти́ти бесѣ́дами и҆ попече́нїѧми жите́йскими. И҆ да є҆ди́но попече́нїе и҆́мать, ка́кѡ ᲂу҆годи́ти бг҃ови, и҆ пред̾ꙋгото́вити дꙋ́шꙋ неѡсꙋжде́ннꙋ въ ча́съ сме́ртный, и҆ со всѧ́кимъ тща́нїемъ, да позна́емъ крадє́нїѧ де́монѡвъ, и҆ своѧ̑ согрѣшє́нїѧ, па́че песка̀ морска́гѡ сꙋ̑щаѧ, ꙗ҆́кѡ пра́хъ то́нкостїю мнѡ́гимъ недовѣ́дѡмаѧ. И҆ при́снѡ пла́ча сѣ́тꙋетъ ѡ҆ є҆стествѣ̀ человѣ́ческомъ, ᲂу҆тѣша́емь же быва́етъ ѿ бг҃а, ꙗ҆́кѡ благоразꙋ́мный, и҆ ᲂу҆слажда́етсѧ, ꙗ҆́кѡ дости́же ви́дѣти, ꙗ҆̀же не надѣ́ѧшесѧ ᲂу҆зрѣ́ти, пребыва́ѧ нѣ́когда внѣ̀ своеѧ̀ ке́ллїи. И҆ позна́въ свою̀ не́мощь и҆ си́лꙋ бж҃їю, страши́тсѧ и҆ ᲂу҆пова́етъ, да ни дерза́ѧ паде́тъ ѿ неразꙋ́мїѧ, нижѐ человѣколю́бїе бж҃їе забы́въ, прїи́детъ въ ѿча́ѧнїе, а҆́ще что́либо приключи́тсѧ є҆мꙋ̀.

Второ́е, ᲂу҆мѣ́ренный по́стъ, си́рѣчь, є҆́же є҆ди́ножды ꙗ҆́сти въ де́нь, и҆ не насыща́тисѧ. И҆з̾ просты́хъ бра́шенъ є҆ди́нагѡ ро́дꙋ, ѡ҆брѣта́емыхъ безпопечи́тельнѡ, и҆̀хже не хо́щетъ дꙋша̀, кромѣ̀ а҆́ще гдѣ̀ нѣ́сть дрꙋга́гѡ, да побѣди́тъ чревобѣ́сїе, гортанобѣ́сїе, по́хоть, и҆ пребꙋ́детъ безпристра́стна, кꙋ́пнѡ же да не ѿ чегѡ̀ ѿню́дъ ᲂу҆далѧ́етсѧ, ѕлѣ̀ ѿмета́ѧ та̑, ꙗ҆̀же бг҃ъ сотворѝ дѡбра̀ ѕѣлѡ̀. Нижѐ да всѧ̑ вдрꙋ́гъ пожре́тъ невозде́ржнѣ и҆ сластолюби́вѣ, но да ꙗ҆ды́й съ воздержа́нїемъ є҆ди́ножды на всѧ́къ де́нь, ᲂу҆потреблѧ́етъ всѧ̑ во сла́вꙋ бж҃їю, ни ѿ чегѡ̀ не ᲂу҆далѧ́ѧсь, ꙗ҆́коже ѕлѣ̀ творѧ́тъ проклѧ́тїи є҆ретїцы̀. Вїно́ же поле́зно є҆́сть во своѐ вре́мѧ: въ ста́рости бо и҆ не́мощи, и҆ въ ѡ҆хладѣ́вшемъ сложе́нїи ѕѣлѡ̀ поле́зно є҆́сть: ѻ҆ба́че и҆ тогда̀ ма́лѡ. Въ ю҆́ности же и҆ теплотѣ̀ є҆сте́ственнѣй и҆ здра́вїи вода̀ лꙋ́чша є҆́сть. Ѻ҆ба́че и҆ сїю̀ ѕѣлѡ̀ ма́лѡ: жа́жда бо є҆́сть лꙋ́чша всѣ́хъ тѣле́сныхъ дѣѧ́нїй.

Тре́тїе, ᲂу҆мѣ́ренное бдѣ́нїе, си́рѣчь полови́нꙋ но́щи ᲂу҆потреблѧ́ти на со́нъ, и҆ полови́нꙋ на ѱалмопѣ́нїе, моли́твꙋ, стена̑нїѧ и҆ слє́зы. Да ᲂу҆мѣ́реннымъ посто́мъ и҆ бдѣ́нїемъ, тѣ́ло бꙋ́детъ дꙋшѣ̀ благопокоре́нно, здра́во, и҆ на всѧ́кое дѣ́ло благо́е гото́во. Дꙋша́ же да стѧ́жетъ мꙋ́жество, и҆ просвѣще́нїе во є҆́же зрѣ́ти и҆ твори́ти подоба̑ющаѧ.

Четве́ртое: ѱалмопѣ́нїе, си́рѣчь, тѣле́снаѧ моли́тва, ѱалмы̀ и҆ колѣнопреклоне́нїи соверша́емаѧ, да ᲂу҆дрꙋчи́тсѧ тѣ́ло, и҆ смири́тсѧ дꙋша̀, и҆ ᲂу҆бѣжа́тъ вразѝ на́ши де́мѡни, и҆ прїи́дꙋтъ побо́рницы на́ши а҆́гг҃ли, и҆ да позна́етъ, кто̀ ѿкꙋ́дꙋ прїе́млетъ по́мощь. Да не ка́кѡ не вѣ́дый вознесе́тсѧ, мнѧ̀ ꙗ҆́кѡ со́бствєнныѧ є҆гѡ̀ сꙋ́ть дѣ̑ланїѧ, и҆ ѡ҆ста́вленъ бꙋ́детъ ѿ бг҃а, ко є҆́же позна́ти свою̀ не́мощь.

Пѧ́тое: дꙋхо́внаѧ моли́тва ᲂу҆мо́мъ быва́емаѧ, ѿстоѧ́щаѧ ѿ всѧ́кихъ мы́слей, въ не́мже ᲂу҆́мъ въ глаго́лемыхъ пребыва́ѧй, и҆ съ неисповѣди́мыми сокрꙋше́нїѧми припа́даѧй къ бг҃ꙋ: того̀ є҆ди́наго про́ситъ, да бꙋ́детъ во́лѧ бж҃їѧ во всѣ́хъ свои́хъ начина́нїѧхъ и҆ разꙋмѣ́нїѧхъ, ника́коже прїе́млѧ по́мыслъ, и҆лѝ ѡ҆́бразъ, и҆лѝ ви́дъ, и҆лѝ ѻ҆́гнь, и҆лѝ свѣ́тъ, и҆лѝ и҆́но что̀ ѿню́дъ. Но ꙗ҆́кѡ ѿ бг҃а зри́мь, и҆ съ ни́мъ є҆ди́нѣмъ бесѣ́дꙋѧй безви́денъ, неѡбразови́денъ и҆ невоѡбрази́теленъ быва́етъ. Сїѧ́ бо є҆́сть чи́стаѧ моли́тва, подоба́ющаѧ є҆щѐ дѣ́ѧтельномꙋ, ᲂу҆мозри́тельномꙋ же и҆́наѧ бѡ́льшаѧ си́хъ предлежа́тъ.

Шесто́е: чте́нїе слове́съ и҆ жи́тїй ѻ҆те́ческихъ, ника́коже вне́млѧ стра̑ннымъ, и҆лѝ дрꙋги̑мъ каки̑млибо, па́че же є҆реті̑ческимъ, догма́тѡмъ. Да ᲂу҆разꙋмѣ́етъ и҆з̾ бж҃е́ственныхъ писа́нїй, и҆ и҆з̾ разсꙋжде́нїѧ ѻ҆тє́цъ, ка́кѡ побѣжда́ти стра̑сти, и҆ стѧжа́ти добродѣ́тєли, и҆ да и҆спо́лнитсѧ ᲂу҆́мъ є҆гѡ̀ слове́съ дх҃а ст҃а́гѡ: и҆ да забꙋ́детъ прє́жнѧѧ неподѡ́бнаѧ словеса̀ и҆ разꙋмѣ̑нїѧ, ꙗ҆̀же слы́ша внѣ̀ ке́ллїи бы́въ, и҆ да мно́гимъ бесѣ́дованїемъ моли́твы, и҆ чте́нїемъ прїи́детъ въ мы̑сли бла̑ги. Моли́твѣ бо вспомоществꙋ́етъ чте́нїе въ безмо́лвїи, и҆ чте́нїю чи́стаѧ моли́тва, є҆гда̀ кто̀ вне́млетъ глаго́лємымъ, и҆ нелѣ́ностнѡ чте́тъ и҆лѝ пое́тъ, хотѧ̀ и҆ ника́коже мо́жетъ ᲂу҆разꙋмѣ́ти, ꙗ҆́коже подоба́етъ си́лꙋ си́хъ ѿ помраче́нїѧ страсте́й, а҆́ще и҆ мно́жицею ѿ мнѣ́нїѧ прельща́емсѧ. Па́че же мнѧ́щїи себѐ, ꙗ҆́кѡ и҆́мꙋтъ мꙋ́дрость мі́ра сегѡ̀, не вѣ́дѧще же, ꙗ҆́кѡ дѣ́ѧтельный ра́зꙋмъ потре́бенъ на́мъ, да ᲂу҆разꙋмѣ́емъ сїѧ̑, а҆ не є҆ди́нѣмъ слы́шанїемъ хотѧ́щемꙋ подоба́етъ ᲂу҆разꙋмѣ́ти ра́зꙋмъ бж҃їй. Занѐ и҆́но є҆́сть слы́шанїе, и҆́но же дѣѧ́нїе. Ꙗ҆́коже бо ѿ є҆ди́нагѡ слы́шанїѧ никто́же мо́жетъ содѣ́латисѧ хꙋдо́жникомъ, но ѿ є҆́же ви́дѣти и҆ твори́ти, и҆ мно́гѡ погрѣша́ти, и҆ и҆справлѧ́емꙋ бы́ти и҆скꙋ́сными, и҆ терпѣ́нїемъ и҆ ѿсѣче́нїемъ свои́хъ хотѣ́нїй, и҆ многодѣ́йствїемъ прихо́дитъ въ навыкнове́нїе хꙋдо́жества: та́кѡ и҆ дꙋхо́вный ра́зꙋмъ не ражда́етсѧ ѿ є҆ди́нагѡ поꙋче́нїѧ, но ѿ бг҃а да́рꙋетсѧ по благода́ти смиренномꙋ̑дрымъ. Ничто́же бо чꙋ́дно є҆́сть, что̀ чтꙋ́щїй писа̑нїѧ, по кра́йнѣй мѣ́рѣ ѿ ча́сти мни́тъ вѣ́дѣти, па́че же а҆́ще дѣ́ѧтеленъ є҆́сть. Но не и҆ ра́зꙋмъ бж҃їй и҆мѣ́етъ таковы́й, но словеса̀ и҆мꙋ́щихъ ра́зꙋмъ слы́шѧ. Ꙗ҆́кѡ мно́зїи писа́вшїи и҆мѣ́ѧхꙋ ра́зꙋмъ бж҃їй, ꙗ҆́коже проро́цы: но се́й не ᲂу҆̀. Подо́бнѣ и҆ а҆́зъ собра́въ и҆з̾ бж҃е́ственныхъ писа́нїй, а҆ не ѿ дх҃а сподо́бльсѧ слы́шати, но ѿ слы́шавшихъ ѿ негѡ̀ ᲂу҆слы́шахъ, ꙗ҆́коже нѣ́цыи ѡ҆ нѣ́коемъ гра́дѣ и҆лѝ человѣ́цѣ, ѿ вѣ́дꙋщихъ сїѧ̑ слы́шатъ.

Седьмо́е: вопроше́нїе и҆скꙋ́сныхъ ѡ҆ всѧ́комъ словесѝ и҆ начина́нїи, да не ѿ неискꙋ́сства, и҆лѝ самоꙋго́дїѧ, и҆но́е вмѣ́стѡ подоба́ющагѡ разꙋмѣ́ѧ и҆ творѧ̀, кто̀ ча́стѡ прельща́етсѧ, и҆ во мнѣ́нїе впа́даетъ, мнѧ́йсѧ вѣ́дѣти, но не ᲂу҆̀ что̀ ᲂу҆разꙋмѣ̀, по а҆по́столꙋ, ꙗ҆́коже подоба́етъ[[а҃ Кор. гл. и҃, ст. в҃.]].

По си́хъ седьмѝ дѣѧ́нїѧхъ тѣле́сныхъ, подоба́етъ и҆мѣ́ти терпѣ́нїе во всѣ́хъ приключа́ющихсѧ, ꙗ҆̀же попꙋ́ститъ бг҃ъ къ позна́нїю, и҆скꙋ́сꙋ и҆ ᲂу҆вѣ́дѣнїю на́шеѧ не́мощи: и҆ нижѐ дерза́ти, нижѐ ѿчаѧва́тисѧ, а҆́ще что́либо приключи́тсѧ є҆мꙋ̀ благо́е, и҆лѝ ѕло́е. Всѧ́кагѡ же сновидѣ́нїѧ и҆ всѧ́кагѡ сло́ва и҆ дѣ́ла пра́зднагѡ при́снѡ подоба́етъ ѿвраща́тисѧ, поꙋча́тисѧ же и҆́мени бж҃їю, па́че дыха́нїѧ, во всѧ́комъ вре́мени, мѣ́стѣ же и҆ ве́щи, и҆ припа́дати къ немꙋ̀ ѿ дꙋшѝ, ѿвлека́ѧ ᲂу҆́мъ ѿ всѣ́хъ мі́ра по́мыслѡвъ, и҆ то́чїю и҆щѧ̀, є҆́же бы́ти во́ли бж҃їей. И҆ тогда̀ начина́етъ ᲂу҆́мъ зрѣ́ти согрѣшє́нїѧ своѧ̑, ꙗ҆́кѡ песо́къ морскі́й. И҆ сїѐ є҆́сть нача́ло просвѣще́нїѧ дꙋшѝ, и҆ зна́къ здра́вїѧ є҆ѧ̀. И҆ кра́тцѣ, быва́етъ дꙋша̀ сокрꙋше́нна, и҆ се́рдце смире́нно, и҆ ме́ньшꙋ всѣ́хъ вмѣнѧ́етъ себѐ вои́стиннꙋ, и҆ начина́етъ разꙋмѣва́ти благодѣѧ̑нїѧ бж҃їѧ, ѻ҆сѡ́бнаѧ, и҆ ѻ҆́бщаѧ, въ бж҃е́ственныхъ писа́нїѧхъ ѡ҆брѣта́ємыѧ, и҆ на́ши прегрѣшє́нїѧ. Сохранѧ́етъ же и҆ за́пѡвѣди въ ра́зꙋмѣ ѿ пе́рвыѧ до послѣ́днїѧ. Поне́же гдⷭ҇ь, ꙗ҆́кѡ на лѣ́ствицѣ положѝ и҆̀хъ, и҆ никто̀ не мо́жетъ, престꙋпи́въ є҆ди́нꙋ, дости́гнꙋти когда́либо дрꙋгі́ѧ. Но ꙗ҆́коже по степе́нємъ, та́кѡ ѿ пе́рвыѧ прихо́дитъ ко второ́й, ѿ ѻ҆́ной къ тре́тїей, до́ндеже сотворѧ́тъ человѣ́ка бг҃омъ, по благода́ти дарова́вшагѡ ты̑ѧ произволѧ́ющымъ.

Ѡ҆ то́мъ, ꙗ҆́кѡ хотѧ́щїй храни́ти за́пѡвѣди. ѿ стра́ха бж҃їѧ начина́ти

до́лженъ є҆́сть, да не въ про́пасть попо́лзнетсѧ.

А҆́ще же кто̀ хо́щетъ преꙋспѣ́ти, да па́че на ѻ҆́нѣхъ за́повѣдехъ ꙗ҆ви́тъ тща́нїе, а҆ не ѿи́нꙋдѣ. Кромѣ́ же сеѧ̀ въ стремни́нꙋ, па́че же въ про́пасть низпаде́тъ. Ꙗ҆́коже бо въ седмѝ дарѣ́хъ дх҃а, никто́же мо́жетъ дости́гнꙋти про́чихъ, а҆́ще не начне́тъ ѿ стра́ха: та́кѡ и҆ въ блаже́нствахъ гдⷭ҇нихъ. Нача́ло во премꙋ́дрости, глаго́летъ дв҃дъ, є҆́сть стра́хъ гдⷭ҇нь[[Ѱал. р҃і, ст. і҃.]]. Дрꙋгі́й же проро́къ свы́ше ѡ҆ се́мъ и҆зре́кши, речѐ: дꙋ́хъ премꙋ́дрости и҆ ра́зꙋма, дꙋ́хъ совѣ́та и҆ крѣ́пости, дꙋ́хъ вѣ́дѣнїѧ и҆ благоче́стїѧ, дꙋ́хъ стра́ха бж҃їѧ[[И҆са́їи гл. а҃і, ст. в҃ и҆ г҃.]]. Да и҆ гдⷭ҇ь ѡ҆ стра́сѣ пе́рвѣе нача̀ ᲂу҆чи́ти, глаго́летъ бо: бл҃же́ни ни́щїи дꙋ́хомъ[[Матѳ. гл. є҃, ст. г҃.]], си́рѣчь да бꙋ́детъ всѧ́къ пронзе́нъ стра́хомъ бж҃їимъ, и҆мѣ́ѧ неисповѣди́мое дꙋше́вное сокрꙋше́нїе. Зане́же гдⷭ҇ь, ꙗ҆́кѡ ѡ҆снова́нїе положѝ за́повѣдь сїю̀, вѣ́дый ꙗ҆́кѡ без̾ сеѧ̀, а҆́ще бы кто̀ и҆ на нб҃сѝ жи́тельствовалъ, не воспо́льзꙋетсѧ, и҆мѣ́ѧ горды́ню, є҆́юже дїа́волъ, и҆ а҆да́мъ, и҆ и҆́нїи мно́зїи падо́ша. И҆ сегѡ̀ ра́ди хотѧ́й соблюстѝ пе́рвꙋю за́повѣдь, си́рѣчь стра́хъ, ꙗ҆́коже рече́сѧ, до́лженъ є҆́сть со мно́гимъ тща́нїемъ размышлѧ́ти прежденапи̑санныѧ приключє́нїѧ жи́зни, и҆ безмѣ̑рныѧ и҆ неизслѣ̑димыѧ бж҃їѧ благодѣѧ̑нїѧ: и҆ всѧ̑, є҆ли̑ка сотворѝ, и҆ твори́тъ на́съ ра́ди ви́димыми и҆ неви́димыми, за́повѣдьми и҆ догма́ты, преще́нїи же и҆ ѻ҆бѣтова́нїи, хранѧ̀, пита́ѧ, промышлѧ́ѧ, животворѧ̀, и҆збавлѧ́ѧ ѿ ви́димыхъ и҆ неви́димыхъ врагѡ́въ, моли́твами и҆ хода́тайствомъ ст҃ы́хъ є҆гѡ̀ врачꙋ́ѧ болѣ̑зни, ꙗ҆̀же безчи́нїе на́ше нано́ситъ на́мъ, долготерпѧ̀ при́снѡ ѡ҆ на́шихъ беззако́нїѧхъ, нече́стїѧхъ и҆ грѣсѣ́хъ, и҆ ѡ҆ всѣ́хъ, є҆ли̑ка сотвори́хомъ и҆ твори́мъ, и҆ є҆ли́ка и҆́мамы сотвори́ти, ѿ ни́хже да и҆зба́витъ на́съ бл҃года́ть є҆гѡ̀, и҆ є҆ли́кѡ прогнѣвлѧ́емъ є҆го̀ сло́вомъ, дѣ́ломъ и҆ помышле́нїемъ. И҆ не то́чїю те́рпитъ на́мъ, но и҆ вѧ́щше благотвори́тъ собо́ю, а҆́гг҃лы, писа́нїемъ, пра́ведными, проро́ки, а҆пⷭ҇лы, мꙋ́ченики, ᲂу҆чи́тели и҆ преподо́бными ѻ҆тцы̀. И҆ разсмотрѧ́ѧ ѻ҆́вѣхъ страда̑нїѧ, ѻ҆́вѣхъ же и҆ по́двиги, посе́мъ ᲂу҆дивлѧ́ѧсѧ снисхожде́нїю гдⷭ҇а на́шегѡ і҆и҃са хрⷭ҇та̀, житїю̀ є҆гѡ̀ въ мі́рѣ се́мъ, пречи̑стымъ стрⷭ҇тѧ́мъ є҆гѡ̀, крестꙋ̀, сме́рти, погребе́нїю, воскресе́нїю, вознесе́нїю, прише́ствїю ст҃а́гѡ дх҃а, неизречє́ннымъ чꙋдесє́мъ, при́снѡ и҆ на всѧ́къ де́нь быва́ємымъ, раю̀, вѣнцє́мъ, сыноположе́нїю, є҆гѡ́же сподо́би ны̀, и҆ всемꙋ̀, є҆́же ѡ҆бдержи́тъ бж҃е́ственное писа́нїе, и҆ бѡ́льшаѧ помышлѧ́ѧ ᲂу҆жаса́етсѧ, разсмотрѧ́ѧ человѣколю́бїе бж҃їе, трепе́щетъ и҆ ᲂу҆дивлѧ́етсѧ долготерпѣ́нїю, и҆ снисхожде́нїю є҆гѡ̀ къ на́мъ, и҆ сѣ́тꙋетъ ѡ҆ тщетѣ̀, ю҆́же пострада̀ є҆стество̀ на́ше: глаго́лю же ѡ҆ а҆гг҃лови́дномъ безстра́стїи, ѡ҆ раѝ, и҆ ѡ҆ всѣ́хъ благи́хъ, и҆з̾ ни́хже и҆спадо́хомъ, и҆ ѡ҆ всѣ́хъ ѕлы́хъ, въ ни́хже впадо́хомъ, глаго́лю же ѡ҆ де́мѡнѣхъ, ѡ҆ страсте́хъ и҆ грѣсѣ̀: и҆ сокрꙋша́етсѧ дꙋше́ю, размышлѧ́ѧ, коли́кѡ ѕѡ́лъ произы́де ѿ ѕло́бы на́шеѧ и҆ кова́ства де́монѡвъ.

Ѡ҆ второ́й за́повѣди, и҆ ѡ҆ то́мъ, ꙗ҆́кѡ стра́хъ ражда́етъ пла́чь.

И҆ та́кѡ да́рꙋетъ є҆мꙋ̀ бг҃ъ блаже́нный пла́чь, си́рѣчь вторꙋ́ю за́повѣдь. Блаже́ни, глаго́летъ сп҃си́тель, пла́чꙋщїи[[Матѳ. гл. є҃, ст. д҃.]], си́рѣчь, ѡ҆ себѣ̀ самѣ́хъ и҆ ѡ҆ бли́жнемъ, ѿ любвѝ и҆ сострада́нїѧ. И҆ пла́четъ, ꙗ҆́кѡ над̾ ме́ртвымъ, ѿ стра́шныхъ разꙋмѣ́нїй быва́емыхъ по сме́рти, и҆ пре́жде сме́рти: пла́четъ же со стена́нїи и҆з̾ глꙋбины̀ се́рдца, и҆ мно́гими го́рькими и҆ приболѣ́зненными сле́зы, и҆ неисповѣди́мыми рыда́нїи. И҆ нижѐ ѡ҆ че́сти, ни ѡ҆ безче́стїи пече́тсѧ: но и҆ са́мꙋю жи́знь презира́етъ, и҆ мно́гажды ѿ болѣ́зни серде́чныѧ и҆ непреста́нныхъ пла́чей забыва́етъ и҆ пи́щꙋ. И҆ та́кѡ благода́ть бж҃їѧ, и҆ ѻ҆́бщаѧ всѣ́хъ ма́ти да́рꙋетъ є҆мꙋ̀ кро́тость, и҆ нача́ло подража́нїѧ і҆и҃сꙋ хрⷭ҇тꙋ̀, си́рѣчь, тре́тїю за́повѣдь, ꙗ҆́коже глаго́летъ гдⷭ҇ь: бл҃же́ни кро́тцыи[[Матѳ. гл. є҃, ст. є҃.]]. И҆ быва́етъ ꙗ҆́кѡ ка́мень ᲂу҆твержде́нный, и҆ ника́коже колеби́мь вѣ́тромъ, и҆лѝ волна́ми жите́йскими: но є҆дина́ковъ при́снѡ пребыва́етъ, во ѻ҆би́лїи и҆ скꙋ́дости, въ благополꙋ́чїи и҆ ѕлоключе́нїи, въ че́сти и҆ безче́стїи, и҆ кра́тцѣ, во всѧ́кое вре́мѧ и҆ при всѧ́кой ве́щи вѣ́сть разсꙋжде́нїемъ, ꙗ҆́кѡ всѧ̑ прехо́дѧтъ, сла̑дкаѧ же и҆ прискѡ́рбнаѧ, и҆ ꙗ҆́кѡ житїѐ сїѐ є҆́сть пꙋ́ть къ бꙋ́дꙋщемꙋ вѣ́кꙋ, и҆ ꙗ҆́кѡ а҆́ще и҆ не хо́щемъ мы̀, быва́ємаѧ прилꙋча́тсѧ на́мъ, и҆ всꙋ́е смꙋща́емсѧ, и҆ вѣне́цъ терпѣ́нїѧ погꙋблѧ́емъ, и҆ бг҃ꙋ противлѧ́ющимисѧ ꙗ҆влѧ́емсѧ. Зане́же всѧ̑ є҆ли̑ка твори́тъ бг҃ъ, сꙋ́ть дѡбра̀ ѕѣлѡ̀: и҆ мы̀ не вѣ́мы. Наста́витъ бо, глаго́летъ писа́нїе, крѡ́ткїѧ на сꙋ́дъ[[Ѱал. к҃д, ст. ѳ҃.]], па́че же на разсꙋжде́нїе веще́й. Но нижѐ во вре́мѧ преѡгорче́нїѧ ѿню́дъ смꙋща́етсѧ таковы́й, но па́че ра́дꙋетсѧ, ꙗ҆́кѡ ѡ҆брѣ́те вре́мѧ по́льзы и҆ любомꙋ́дрїѧ, помышлѧ́ѧ, ꙗ҆́кѡ кромѣ̀ вины̀ не бы́сть и҆скꙋше́нїе. Но и҆лѝ бг҃а, и҆лѝ бра́та своего̀, и҆лѝ и҆на́го кого̀ ѡ҆скорби́лъ є҆́сть въ невѣ́дѣнїи, и҆лѝ въ вѣ́дѣнїи, и҆ ꙗ҆́кѡ па́че ѡ҆брѣ́тесѧ вина̀ проще́нїѧ є҆гѡ̀, да понѐ терпѣ́нїемъ прїи́метъ проще́нїе мно́гихъ ѕѡ́лъ свои́хъ, и҆ ꙗ҆́кѡ а҆́ще не ѡ҆ста́витъ бра́тꙋ своемꙋ̀ долгѡ́въ є҆гѡ̀, ни ѻ҆ц҃ъ нбⷭ҇ный ѡ҆ста́витъ є҆мꙋ̀ долгѡ́въ є҆гѡ̀, и҆ ꙗ҆́кѡ нѣ́сть кра́тшїѧ добродѣ́тели сеѧ̀, си́рѣчь за́повѣди ко ѡ҆ставле́нїю грѣхѡ́въ. Ѡ҆ста́вите бо глаго́летъ писа́нїе, и҆ ѡ҆ста́витсѧ ва́мъ[[Матѳ. гл. ѕ҃, ст. є҃і и҆ слѣ́д.]]. И҆ ꙗ҆́кѡ сподо́бисѧ сїѧ̑ позна́ти и҆ твори́ти подража́нїемъ хрⷭ҇тꙋ̀, кро́токъ содѣ́лавсѧ благода́тїю за́повѣди. Сѣ́тꙋетъ же ѡ҆ бра́тѣ, ꙗ҆́кѡ ра́ди грѣхѡ́въ свои́хъ и҆скꙋша́етсѧ бра́тъ ѿ ѻ҆́бщагѡ врага̀, во ᲂу҆врачева́нїе не́мощи є҆гѡ̀. Поне́же всѧ́ко и҆скꙋше́нїе, ꙗ҆́кѡ врачевство̀ ѿ бг҃а попꙋска́етсѧ длѧ и҆сцѣле́нїѧ немощствꙋ́ющїѧ дꙋшѝ. И҆́бо да́рꙋетъ и҆ преждебы́вшихъ и҆ настоѧ́щихъ ѡ҆ставле́нїе, и҆ бꙋ́дꙋщихъ ѕѡ́лъ возбране́нїе. Не и҆́мать же похвалы̀ ни дїа́волъ, ни и҆скꙋша́ѧй, ни и҆скꙋша́емый. Поне́же дїа́волъ досто́инъ є҆́сть не́нависти, ꙗ҆́кѡ ѕлотво́рецъ: не бо̀ печа́сѧ твори́тъ сїѐ. И҆скꙋша́ѧй же досто́инъ є҆́сть поми́лованїѧ ѿ и҆скꙋша́емагѡ, не ꙗ҆́кѡ любо́вїю творѧ́й, но ꙗ҆́кѡ нарꙋга́емь є҆́сть и҆ ᲂу҆дрꙋча́емь. И҆скꙋша́емый же за своѧ̑ согрѣшє́нїѧ, а҆ не за дрꙋга́го, те́рпитъ скѡ́рби, да и҆́мать похвалꙋ̀. Ниже́ бо безгрѣ́шенъ є҆́сть: а҆́ще же и҆ є҆́сть, є҆́же є҆́сть невозмо́жно, но те́рпитъ ᲂу҆пова́нїемъ мздовоздаѧ́нїѧ, и҆ стра́хомъ мꙋ́къ. И҆ сі́и ᲂу҆̀бо та́кѡ: бг҃ъ же бога́тъ сы́й, и҆ всѣ̑мъ полє́знаѧ ᲂу҆строѧ́ѧй, досто́инъ є҆́сть бл҃годаре́нїѧ, ꙗ҆́кѡ и҆ дїа́вола и҆ ѕлѡ́бы человѣ́чєскїѧ долготерпѣли́вѡ сно́ситъ, вознагражда́ѧ всѧ́кое бла́го, и҆ пре́жде грѣха̀, и҆ по грѣсѣ̀ ка́ющымсѧ. Всѧ́кое ᲂу҆́бѡ разсꙋжде́нїе ᲂу҆разꙋмѣ́въ, сподо́бивыйсѧ храни́тель бы́ти тре́тїѧ за́повѣди, да не ка́кѡ нарꙋга́емь бꙋ́детъ въ ра́зꙋмѣ, и҆лѝ невѣ́дѣнїи, но прїе́мь да́ръ смире́нїѧ, вмѣнѧ́етъ себѧ̀ ничто́же сꙋ́ща: кро́тость бо є҆́сть нача́ло смире́нїѧ, сїѧ́ же две́рь є҆́сть безстра́стїѧ, и҆ си́мъ неѿпада́емꙋю и҆ соверше́ннꙋю любо́вь стѧ́жетъ позна́вый є҆стество̀ своѐ, что̀ бѣ̀ пре́жде рожде́нїѧ, и҆ что̀ по сме́рти бꙋ́детъ. И҆́бо человѣ́къ ничто̀ и҆но́е є҆́сть, ка́къ ма́лое и҆ вско́рѣ и҆счеза́ющее ѕлово́нїе, и҆ хꙋ́ждшїй є҆́сть все́й тва́ри. Зане́же никака́ѧ и҆на́ѧ тва́рь бездꙋ́шнаѧ, и҆ ѡ҆дꙋшевле́ннаѧ, никогда́же не превратѝ совѣ́та бж҃їѧ, но ꙗ҆́коже человѣ́ческое є҆стество̀, мно́гѡ ᲂу҆́бѡ благодѣ́тельствꙋемо, мно́гѡ же бг҃а при́снѡ преѡгорчева́ющее. И҆ та́кѡ сподоблѧ́етсѧ четве́ртыѧ за́повѣди, си́рѣчь, жела́нїѧ къ стѧжа́нїю добродѣ́телей. Блаже́ни, глаго́летъ писа́нїе, а҆́лчꙋщїи и҆ жа́ждꙋщїи пра́вды[[Матѳ. гл. є҃, ст. ѕ҃.]], и҆ быва́етъ ꙗ҆́коже жажда́ѧй и҆ а҆лка́ѧй всѧ́кїѧ пра́вды, си́рѣчь добродѣ́тели тѣле́сныѧ и҆ нра́вственныѧ, си́рѣчь дꙋше́вныѧ. Є҆гда́ бо кто̀ не вкꙋ́ситъ чегѡ̀, не вѣ́сть чегѡ̀ лиша́етсѧ, глаго́летъ вели́кїй васі́лїй. Но вкꙋси́вый, ѕѣлѡ̀ жела́етъ. Та́кѡ и҆ вкꙋси́вый сла́дѡсти за́повѣдей, и҆ вѣ́дый, что̀ вма́лѣ приво́дѧтъ є҆го̀ за́пѡвѣди къ подража́нїю хрⷭ҇тꙋ̀, ѕѣлѡ̀ жела́етъ стѧжа́ти про́чыѧ, ꙗ҆́кѡ и҆́хъ ра́ди и҆ сме́рть мно́гажды презира́етъ. Ѡ҆щꙋти́въ же ма́ло нѣ́что ѿ сокрове́нныхъ въ бж҃е́ственныхъ писа́нїѧхъ та̑инъ бж҃їихъ, ѕѣлѡ̀ жа́ждетъ ᲂу҆разꙋмѣ́ти и҆̀хъ, и҆ є҆ли́кѡ прїе́млетъ ра́зꙋмъ: мно́жае жа́ждетъ и҆ воспалѧ́етсѧ. ꙗ҆́коже пїѧ́й пла́мень: зане́же непостижи́мо всѣ̑мъ бж҃е́ственное, сегѡ̀ ра́ди при́снѡ пребыва́етъ жажда́ѧй. И҆ ꙗ҆́кѡ ᲂу҆́бѡ здра́вїе и҆ болѣ́знь длѧ тѣ́ла, та́кѡ добродѣ́тель и҆ ѕло́ба длѧ дꙋшѝ, и҆ ра́зꙋмъ и҆ неразꙋ́мїе длѧ ᲂу҆ма̀: и҆ є҆ли́кѡ кто̀ тщи́тсѧ ѡ҆ благоче́стїи, си́рѣчь, ѡ҆ дѣѧ́нїи, толи́кѡ ᲂу҆́мъ просвѣща́етсѧ въ ра́зꙋмѣ, и҆ та́кѡ сподоблѧ́етсѧ ми́лости пѧ́тою за́повѣдїю, ꙗ҆́коже глаго́летъ гдⷭ҇ь: блаже́ни ми́лостивїи[[Матѳ. гл. є҃, ст. з҃.]]. Ми́лостивый же є҆́сть ми́лꙋѧй бли́жнѧго ѿ тѣ́хъ, ꙗ҆̀же са́мъ прїѧ́лъ є҆́сть ѿ бг҃а, а҆́ще стѧжа̑нїѧ, а҆́ще бра̑шна, а҆́ще крѣ́пость, а҆́ще сло́во на по́льзꙋ, а҆́ще моли́твꙋ, и҆ а҆́ще и҆́мать си́лꙋ поми́ловати молѧ́щаго є҆го̀, вмѣнѧ́ѧ себѧ̀ должника̀ бы́ти: занѐ прїѧ́тъ бѡ́льшаѧ тогѡ̀, є҆́же и҆стѧзꙋ́етсѧ ѿ негѡ̀: и҆ ꙗ҆́кѡ сподо́бисѧ, ꙗ҆́коже бг҃ъ, ми́лостивымъ нарица́тисѧ, та́же и҆ ѿ хрⷭ҇та̀, въ ны́нѣшнемъ и҆ бꙋ́дꙋщемъ вѣ́цѣ, пред̾ все́ю тва́рїю. И҆ ꙗ҆́кѡ чрез̾ бра́та бг҃ъ тре́бꙋетъ ᲂу҆ негѡ̀, и҆ должни́къ є҆мꙋ̀ быва́етъ: и҆ ꙗ҆́кѡ ᲂу҆́бѡ кромѣ̀ проси́магѡ ѿ негѡ̀, мо́жетъ ᲂу҆бо́гїй жи́въ бы́ти, кромѣ́ же є҆́же ми́ловати по возмо́жности свое́й, не мо́жетъ то́й жи́въ бы́ти, и҆лѝ спасти́сѧ: занѐ а҆́ще не хо́щетъ ᲂу҆ще́дрити є҆стества̀ своегѡ̀, ка́кѡ бг҃а мо́литъ ᲂу҆ще́дрити є҆го̀; И҆ та́кѡ и҆ и҆́наѧ мнѡ́га помышлѧ́ѧ, сподо́бльсѧ за́повѣдей, дае́тъ не то́чїю своѧ̑, но и҆ дꙋ́шꙋ свою̀ за бли́жнѧго. Сїе́ бо є҆́сть соверше́ннаѧ ми́лостынѧ, ꙗ҆́коже и҆ хрⷭ҇то́съ сме́рть на́съ ра́ди претерпѣ̀, всѣ̑мъ показа́въ ѡ҆́бразъ и҆ примѣ́ръ, да дрꙋ́гъ за дрꙋ́га ᲂу҆мира́емъ: не то́чїю же за дрꙋгѡ́въ, но и҆ за врагѡ́въ, вре́мени тре́бꙋющꙋ.

Нѣ́сть же нꙋ́ждно и҆мѣ́ти ве́щь, си́рѣчь, ко є҆́же ми́ловати, сїѐ па́че вели́каѧ не́мощь є҆́сть, но да и҆ ѿню́дъ не и҆мѣ́ѧй чи́мъ ми́ловати, благоꙋтро́бїе ко всѣ̑мъ и҆́мать, є҆го́же стѧжа́въ, мо́жетъ помощѝ тре́бꙋющымъ, безпристра́стенъ ᲂу҆́бѡ бы́въ къ веща́мъ житє́йскимъ, къ человѣ́кѡмъ же и҆мы́й сострада́нїе. Но нижѐ ᲂу҆чи́ти подоба́етъ тщесла́вїѧ ра́ди, не показа́въ пе́рвѣе дѣ́ломъ, да врачꙋ́ѧй немощствꙋ́ющихъ дꙋ́шы, не ꙗ҆ви́тсѧ са́мъ немощнѣ́йшїй па́че тре́бꙋющихъ врачева́тисѧ. Поне́же всѧ́каѧ ве́щь тре́бꙋетъ вре́мени и҆ разсꙋжде́нїѧ, да не безвре́меннѣ, и҆лѝ кромѣ̀ потре́бы что̀ бꙋ́детъ. Немощно́мꙋ бо лꙋ́чше є҆́сть ᲂу҆дале́нїе ѿ всѣ́хъ, и҆ нестѧжа́нїе мно́гѡ лꙋ́чше є҆́сть ми́лостыни. Безпристра́стїѧ же ра́ди сподоблѧ́етсѧ шесты́ѧ за́повѣди, ꙗ҆́коже глаго́летъ гдⷭ҇ь: Бл҃же́ни чи́стїи се́рдцемъ[[Матѳ. гл. є҃, ст. и҃.]], си́рѣчь, всѧ́кꙋ добродѣ́тель соверши́вшїи ст҃ы́ми по́мыслы, и҆ доспѣ́вшїи во є҆́же ви́дѣти вє́щи по є҆стествꙋ̀ и҆́хъ: и҆ та́кѡ ми́ра по́мыслѡвъ достига́етъ таковы́й. Бл҃же́ни, глаго́летъ писа́нїе, миротво́рцы[[Матѳ. гл. є҃, ст. ѳ҃.]], си́рѣчь, ᲂу҆миротворѧ́ющїе дꙋ́шꙋ и҆ тѣ́ло, да покорѧ́тъ пло́ть дꙋ́хꙋ, да не ктомꙋ̀ пожела́етъ пло́ть на дꙋ́ха, но благода́ть ст҃а́гѡ дх҃а да ца́рствꙋетъ въ дꙋшѣ̀, и҆ да рꙋково́дствꙋетъ ю҆̀, ꙗ҆́коже хо́щетъ, дарова́вши бж҃е́ственный ра́зꙋмъ, и҆́мже мо́жетъ таковы́й претерпѣва́ти гоне́нїе, поноше́нїе и҆ ѡ҆ѕлобле́нїе пра́вды ра́ди, и҆ ра́доватисѧ, ꙗ҆́кѡ мзда̀ є҆гѡ̀ мно́га на небесѣ́хъ. Всѧ̑ бо блажє́нства бг҃а, по благода́ти творѧ́тъ человѣ́ка содѣ́лавшасѧ кро́ткимъ, жа́ждꙋщимъ всѧ́кїѧ пра́вды, ми́лостивымъ, безстра́стнымъ, миротво́рцемъ, терпѧ́щимъ всѧ́кꙋ болѣ́знь съ ра́достїю любвѐ ра́ди бж҃їѧ и҆ бли́жнѧгѡ. Тѣ́мже сїѧ̑ да́ры сꙋ́ть бж҃їѧ, и҆ мы̀ должнѝ є҆смы̀ ѕѣлѡ̀ благодари́ти є҆мꙋ̀ си́хъ ра́ди, и҆ ѡ҆ предложе́нныхъ возме́здїѧхъ, си́рѣчь, црⷭ҇твїи небе́сномъ въ бꙋ́дꙋщемъ, и҆ ѡ҆ ᲂу҆тѣше́нїи здѣ̀, и҆ и҆сполне́нїи всѧ́кагѡ бла́га и҆ щедро́тъ ѿ бг҃а, и҆ ѡ҆ ꙗ҆вле́нїи бж҃їи, ᲂу҆мозрѣ́нїемъ сокрове́нныхъ та̑инъ въ бж҃е́ственныхъ писа́нїѧхъ, и҆ во всѣ́хъ тва́рѧхъ є҆гѡ̀, и҆ ѡ҆ мно́зѣй мздѣ̀ на нб҃сѝ, подража́нїе бы́въ хрⷭ҇тꙋ̀ на землѝ и҆ блаже́нство ко́ейждо за́повѣди си́рѣчь, верхо́внѣйшее бла́го, и҆ коне́цъ жела́нїй. Поне́же, по а҆по́столꙋ, са́мъ бг҃ъ є҆ди́нъ є҆́сть блаже́нъ, во свѣ́тѣ живѧ́й непристꙋ́пнѣмъ[[а҃ Тїм. гл. ѕ҃, ст. ѕ҃і.]]. Но а҆́ще и҆ до́лгъ и҆́мамы храни́ти, па́че же сохранены̀ бы́ти ѿ за́повѣдей: человѣколюби́вый же бг҃ъ да́рствꙋетъ возмє́здїѧ, и҆ здѣ̀ и҆ та́мѡ, ѿ за́повѣди вѣ́рꙋющемꙋ є҆мꙋ̀.

Всѣ́хъ же си́хъ ра́ди, ѿ блаже́ннагѡ пла́ча быва́емыхъ, ᲂу҆́мъ прїе́млетъ ѡ҆блегче́нїе страсте́й, примирѧ́ѧсѧ съ бг҃омъ ѡ҆ грѣсѣ́хъ свои́хъ, го́рькими и҆ мно́гими слеза́ми: сраспина́етсѧ ᲂу҆́бѡ ᲂу҆́мнѣ хрⷭ҇тꙋ̀, нра́вственнымъ дѣ́ланїемъ си́рѣчь, соблюде́нїемъ за́повѣдей ꙗ҆́коже рече́сѧ, и҆ хране́нїемъ пѧтѝ чꙋ́вствъ, да ничто́же ѿню́дъ сотворѧ́тъ внѣ̀ потре́бы.

Оу҆́мъ же, ᲂу҆де́рживаѧ безсловє́снаѧ стремлє́нїѧ, начина́етъ ѡ҆бꙋ́здывати сꙋ́щыѧ ѡ҆ не́мъ стра̑сти, глаго́лю же, ꙗ҆́рость и҆ жела́нїе. И҆ ѻ҆вогда̀ свирѣ́пѣющꙋю ꙗ҆́рость ᲂу҆толѧ́етъ мѧ́гкостїю жела́нїѧ, ѻ҆вогда́ же жесто́костїю ꙗ҆́рости ᲂу҆толѧ́етъ жела́нїе. И҆ прише́дъ въ себѐ ᲂу҆́мъ, познае́тъ своѐ досто́инство, ꙗ҆́кѡ самоде́ржецъ є҆́сть, и҆ прїе́млетъ зрѣ́нїе веще́й по є҆стествꙋ̀ и҆́хъ. Ѿверза́етсѧ бо є҆мꙋ̀ лѣ́вое ѻ҆́ко, є҆́же ѡ҆слѣпѝ дїа́волъ ѡ҆блада́нїемъ страсте́й, и҆ сподоблѧ́етсѧ человѣ́къ спогребсти́сѧ хрⷭ҇тꙋ̀ ᲂу҆́мнѣ ѿ веще́й мі́ра, и҆ не ктомꙋ̀ крадо́мь быва́етъ внѣ́шнимъ благоѡбра́зїемъ, но взира́етъ на зла́то и҆ сребро̀, драго́е ка́менїе, и҆ познае́тъ, ꙗ҆́кѡ ѿ землѝ сꙋ́ть, ꙗ҆́коже и҆ прѡ́чаѧ бездꙋ̑шнаѧ, ка́менїе же и҆ древеса̀. Подо́бнѣ и҆ человѣ́ка, а҆́ки тлѣ́нїе, и҆ ма́лꙋ пе́рсть во гро́бѣ по сме́рти сꙋ́ща, и҆ всѧ̑ сла̑дкаѧ житїѧ̀ нивочто́же вмѣнѧ́ѧ, ви́дитъ при́снѡ и҆змѣнє́нїѧ и҆́хъ со мно́гимъ совѣ́томъ ѿ ра́зꙋма быва́ющимъ. И҆ содѣ́ловаетсѧ ме́ртвымъ мі́рови, и҆ съ ра́достїю мі́ръ ᲂу҆мерщвлѧ́етсѧ є҆мꙋ̀, и҆ не ктомꙋ̀ и҆́мать понꙋжде́нїе, но па́че поко́й и҆ безпристра́стїе.

И҆ та́кѡ чистото́ю дꙋшѝ сподоблѧ́етсѧ ᲂу҆́мнѣ воскре́снꙋти со хрⷭ҇то́мъ, и҆ прїе́млетъ крѣ́пость ви́дѣти безстра́стнѣ внѣ̑шнѧѧ благолѣ̑пїѧ веще́й, и҆ прославлѧ́етъ и҆́ми сотво́ршаго всѧ̑, и҆ зрѧ̀ въ чꙋ́вственныхъ тва́рѧхъ си́лꙋ и҆ про́мыслъ бж҃їй, бла́гость же и҆ премꙋ́дрость, по а҆по́столꙋ, и҆ зрѧ̀ сокровє́ннаѧ въ бж҃е́ственныхъ писа́нїѧхъ та́йны, ᲂу҆́мъ сподоблѧ́етсѧ вознесе́нїѧ со хрⷭ҇то́мъ видѣ́нїемъ мы́сленныхъ тва́рей, си́рѣчь, ра́зꙋмомъ ᲂу҆́мныхъ си́лъ, и҆ разꙋмѣва́ѧ ѿ мно́гихъ сле́зъ ра́зꙋма и҆ ра́дости, ѿ ви́димыхъ неви̑димаѧ, ѿ привре́менныхъ вѣ̑чнаѧ ᲂу҆́мствꙋетъ. Поне́же а҆́ще привре́менный, мі́ръ се́й, и҆менꙋ́емый и҆згна́нїемъ и҆ ѡ҆сꙋжде́нїемъ престꙋпи́вшихъ за́повѣдь бж҃їю, толи́кѡ прекра́сенъ є҆́сть, кольмѝ па́че вѣ̑чнаѧ и҆ недоразꙋмѣва́ємаѧ блага̑ѧ, ꙗ҆̀же бг҃ъ ᲂу҆гото́ва лю́бѧщымъ є҆го̀. И҆ а҆́ще ѻ҆́наѧ блага̑ѧ неꙋдоборазꙋмѣ́єма сꙋ́ть, по превосхо́дствꙋ своемꙋ̀: кольмѝ па́че бг҃ъ всѧ̑ сїѧ̑ и҆з̾ ничегѡ̀ сотвори́вый.

А҆́ще бо кто̀ ᲂу҆праздни́тсѧ ѿ всѣ́хъ, и҆ пече́тсѧ ѡ҆ тѣле́сныхъ и҆ дꙋше́вныхъ дѣѧ́нїѧхъ, нарица́емыхъ ѿ ѻ҆тє́цъ благоче́стїемъ: не довѣрѧ́етъ же всѧ́комꙋ со́нїю, и҆ своемꙋ̀ ᲂу҆разꙋмѣ́нїю не и҆мꙋ́щꙋ свидѣ́тельства ѿ писа́нїѧ и҆ всѧ́кїѧ пра́здныѧ бесѣ́ды ᲂу҆бѣга́етъ, да соверше́ннѡ не слы́шитъ, и҆лѝ не чте́тъ чегѡ́либо пра́зднагѡ, па́че же ѡ҆ є҆́реси: ᲂу҆мно́жатсѧ въ не́мъ ра́зꙋма и҆ ра́дости сле́зы, та́кѡ, ꙗ҆́кѡ пи́ти ѧ҆̀ ѿ мно́жества и҆́хъ: и҆ прихо́дитъ въ дрꙋгꙋ́ю моли́твꙋ чи́стꙋю, подоба́ющꙋю ᲂу҆мозри́тельномꙋ. Ꙗ҆́коже бо и҆́на чтє́нїѧ тогда̀ подоба́етъ и҆мѣ́ти, и҆ и҆́ны сле́зы: та́кѡ и҆ ны́нѣ, поне́же ᲂу҆́мъ дости́же дꙋхо́вныхъ видѣ́нїй, сегѡ̀ ра́ди ѿны́нѣ до́лженъ є҆́сть честѝ всѧ̑ бж҃е́ствєннаѧ писа̑нїѧ, ꙗ҆́кѡ не боѧ́сѧ неꙋдобопостижи́мыхъ глагѡ́лъ писа́нїѧ, ꙗ҆́коже дѣ́ѧтельнїи є҆щѐ и҆ немощні́и невѣ́дѣнїѧ ра́ди. Оу҆коснѣ́нїемъ бо и҆ по́двигами, въ тѣле́сныхъ и҆ нра́вственныхъ дѣѧ́нїѧхъ сораспѧ́тсѧ хрⷭ҇тꙋ̀ и҆ спогребе́сѧ ра́зꙋмомъ веще́й, є҆стество́мъ же и҆ и҆змѣне́нїемъ: совоскре́се же безстра́стїемъ и҆ ра́зꙋмомъ бж҃е́ственныхъ та̑инъ, въ чꙋ́вственныхъ є҆гѡ̀ творе́нїѧхъ сꙋ́щихъ, ѿ негѡ́же съ ни́мъ въ премі̑рнаѧ взы́де, ра́зꙋмомъ мы́сленныхъ и҆ сокрове́нныхъ въ бж҃е́ственныхъ писа́нїѧхъ та̑инъ. Ѿ стра́ха во бл҃гоче́стїе: ѿ негѡ́же вѣ́дѣнїе, и҆́мже совѣ́тъ, си́рѣчь, разсꙋжде́нїе: ѿ негѡ́же крѣ́пость, ѿ сеѧ̀ ра́зꙋмъ, и҆ прихо́дитъ въ премꙋ́дрость. Всѣ́ми бо рече́нными дѣѧ́нїѧми и҆ видѣ́нїѧми сподоблѧ́етсѧ чи́стыѧ и҆ соверше́нныѧ моли́твы, быва́емыѧ ѿ ми́ра и҆ любвѐ бж҃їѧ, и҆ вселе́нїѧ ст҃а́гѡ дх҃а. И҆ сїѐ є҆́сть глаго́лемое, стѧжѝ бг҃а въ себѣ̀, и҆ ꙗ҆вле́нїе и҆ вселе́нїе бж҃їе, ꙗ҆́коже речѐ златоꙋ́стъ, да бꙋ́дꙋтъ тѣ́ло и҆ дꙋша̀ по возмо́жности, ꙗ҆́коже хрⷭ҇тѡ́вы, безгрѣ́шны, и҆ да и҆́мамы ᲂу҆́мъ ѡ҆ хрⷭ҇тѣ̀ разꙋмѣва́ющъ дх҃а благода́тїю и҆ премꙋ́дростїю, є҆́же є҆́сть ра́зꙋмъ бж҃е́ственныхъ и҆ человѣ́ческихъ веще́й.

Ѡ҆ четыре́хъ добродѣ́телехъ дꙋшѝ.

Ви́ды же премꙋ́дрости сꙋ́ть четы́ре: мꙋ́дрость, си́рѣчь, ра́зꙋмъ, ꙗ҆̀же твори́ти и҆ не твори́ти подоба́етъ, и҆ бо́дрость ᲂу҆ма̀. Цѣломꙋ́дрїе, си́рѣчь, є҆́же цѣ́лꙋ бы́ти мꙋдрова́нїю, ꙗ҆́кѡ да возмо́жетъ ᲂу҆де́рживати себѐ внѣ̀ дѣ́ла, сло́ва же и҆ помышле́нїѧ неꙋго́днагѡ бг҃ꙋ. Мꙋ́жество, си́рѣчь, крѣ́пость, и҆ терпѣ́нїе въ трꙋдѣ́хъ сꙋ́щихъ по бз҃ѣ, и҆ и҆скꙋше́нїѧхъ. Пра́вда, си́рѣчь, раздѣле́нїе, подаю́ща всѣ̑мъ си̑мъ ра́вное. Сїѧ̑ же четы́ре гла̑вныѧ добродѣ́тєли ражда́ютсѧ ѿ тре́хъ дꙋше́вныхъ си́лъ, си́це: ѿ слове́сныѧ ᲂу҆́бѡ ча́сти, си́рѣчь, ᲂу҆ма̀, двѣ̀, мꙋ́дрость и҆ пра́вда, сі́есть, разсꙋжде́нїе: ѿ жела́тельныѧ же, цѣломꙋ́дрїе: ѿ ꙗ҆́ростныѧ же, мꙋ́жество: ка́ждаѧ же стои́тъ средѝ двою̀ страсте́й внѣ̀ є҆стества̀. Мꙋ́дрость, горѣ̀ ᲂу҆́бѡ ѿ є҆́же презира́ти, до́лꙋ же ѿ безꙋ́мїѧ: цѣломꙋ́дрїе, горѣ̀ ᲂу҆́бѡ ѿ ѡ҆камене́нїѧ, до́лꙋ же ѿ блꙋда̀: мꙋ́жество, горѣ̀ ᲂу҆́бѡ ѿ де́рзости, до́лꙋ же ѿ боѧ́зни: пра́вда, горѣ̀ ᲂу҆́бѡ ѿ малостѧжа́нїѧ, до́лꙋ же ѿ лихои́мства. И҆ сі́и четы́ре сꙋ́ть ѡ҆́бразъ небе́снагѡ, ѻ҆́смь же земна́гѡ. Всѧ̑ же сїѧ̑ и҆звѣ́стнѣ ᲂу҆̀бо вѣ́сть бг҃ъ, ꙗ҆́коже преждебы̑вшаѧ, настоѧ̑щаѧ же и҆ грѧдꙋ̑щаѧ: ѿ ча́сти же, и҆́же по благода́ти бж҃їей дѣ́ломъ наꙋчи́сѧ ѿ негѡ̀, и҆ сподо́бисѧ бы́ти по ѡ҆́бразꙋ и҆ по подо́бїю є҆гѡ̀. Глаго́лѧй бо вѣ́дѣти, ꙗ҆́коже подоба́етъ ѿ є҆ди́нагѡ слꙋ́ха, прельсти́сѧ. Занѐ человѣ́чь ᲂу҆́мъ без̾ рꙋководи́телѧ не мо́жетъ взы́ти на не́бо когда̀, нижѐ па́ки, не возше́дъ и҆ ᲂу҆ви́дѣвъ, рещѝ что̀, є҆́же не вѣ́сть: но а҆́ще что̀ ѿ писа́нїѧ слы́ша, сїѐ то́чїю подоба́етъ ѿ слы́шанїѧ глаго́лати со благоразꙋ́мїемъ, и҆ и҆сповѣ́дати ѻ҆ц҃а̀ сло́ва, ꙗ҆́коже речѐ васі́лїй вели́кїй. И҆ мнѧ́щїйсѧ ра́зꙋмъ и҆мѣ́ти, пребыва́етъ хꙋ́ждшїй невѣ́жды. Мнѣ́нїе бо не попꙋска́етъ бы́ти мни́момꙋ, глаго́летъ ст҃ы́й маѯі́мъ. Похва́льно же быва́етъ невѣ́дѣнїе, ꙗ҆́коже глаго́летъ златоꙋ́стъ, а҆́ще кто̀ въ ра́зꙋмѣ вѣ́сть, ꙗ҆́кѡ не вѣ́сть. Є҆́сть же невѣ́жество, па́че всѧ́кагѡ невѣ́жества, є҆гда̀ нижѐ вѣ́сть кто̀, ꙗ҆́кѡ не вѣ́сть. Быва́етъ ᲂу҆́бѡ и҆ ра́зꙋмъ ло́женъ, а҆́ще кто̀ мни́тъ вѣ́дѣти, ничто́же вѣ́дый по а҆по́столꙋ[[а҃ Кор. гл. и҃, ст. в҃.]].

Ѡ҆ дѣ́ѧтельномъ ра́зꙋмѣ.

Є҆́сть же ра́зꙋмъ и҆́стинный, и҆ є҆́сть невѣ́дѣнїе соверше́нное, лꙋ́чше же всѣ́хъ ра́зꙋмъ дѣ́ѧтельный: занѐ ка́ѧ по́льза человѣ́кꙋ, а҆́ще всѧ́къ ра́зꙋмъ и҆мы́й, па́че же прїе́мый ѿ бг҃а по благода́ти, ꙗ҆́коже соломѡ́нъ; ꙗ҆́кѡ не возмо́жно є҆́сть таковꙋ̀ дрꙋго́мꙋ бы́ти когда̀, и҆ въ вѣ́чное мꙋче́нїе ѿитѝ, не прїе́мь и҆звѣще́нїѧ ѿ дѣ́лъ и҆ тве́рдыѧ вѣ́ры свидѣ́тельствомъ со́вѣсти, ꙗ҆́кѡ свобожда́етсѧ бꙋ́дꙋщїѧ мꙋ́ки, внегда̀ не зазира́ти себѐ самагѡ̀, ꙗ҆́кѡ вознерадѣ̀ ѡ҆ че́млибо и҆з̾ до́лжнагѡ по возмо́жности є҆гѡ̀, ꙗ҆́коже глаго́летъ ст҃ы́й і҆ѡа́ннъ бг҃осло́въ: А҆́ще се́рдце на́ше не за́зритъ на́мъ, дерзнове́нїе и҆́мамы къ бг҃ꙋ[[а҃ І҆ѡа́н. гл. г҃, ст. к҃а.]]. Но ѻ҆ба́че, ꙗ҆́коже глаго́летъ ст҃ы́й ні́лъ, ꙗ҆́кѡ и҆ сама̀ со́вѣсть прельсти́сѧ, ѡ҆мраче́нїемъ страсте́й бы́въ порꙋ́гана, ꙗ҆́коже глаго́летъ лѣ́ствичникъ. А҆́ще бо є҆ди́наѧ ѕло́ба помрача́ти ᲂу҆́мъ ѡ҆бы́че, глаго́летъ вели́кїй васі́лїй, и҆ мнѣ́нїе твори́тъ слѣ́па, и҆ не попꙋска́етъ бы́ти мнѧ́щемꙋсѧ: что̀ про́чее ᲂу҆́бѡ рече́мъ ѡ҆ рабо́тающихъ страсте́мъ; мнѧ́тъ ли себѣ̀ и҆мѣ́ти чи́стꙋ со́вѣсть, и҆ па́че же ви́дѧще а҆по́стола па́ѵла, и҆мꙋ́ща въ себѣ̀ хрⷭ҇та̀, сло́вомъ и҆ дѣ́ломъ глаго́лавша, ꙗ҆́кѡ ничто́же себѐ свѣ́мъ согрѣша́юща, си́рѣчь, но не ѡ҆ се́мъ ѡ҆правда́юсѧ[[а҃ Кор. гл. д҃, ст. д҃.]]; мно́зїи бо ѿ вели́кагѡ нечꙋ́вствїѧ мни́мъ, ꙗ҆́кѡ є҆смы̀ что̀, ничто́же сꙋ́ще. Но є҆гда̀, глаго́летъ а҆по́столъ, рекꙋ́тъ и҆мѣ́ти ми́ръ, тогда̀ грѧде́тъ къ ни̑мъ поги́бель[[а҃ Солꙋ́н. гл. є҃, ст. г҃.]] зане́же не и҆мѣ́ѧхꙋ ми́ра, но глаго́лаша мнѧ́ще ми́ръ и҆мѣ́ти, ꙗ҆́коже глаго́летъ златоꙋ́стый, ѿ мно́гагѡ нечꙋ́вствїѧ. И҆ ꙗ҆́коже глаго́летъ ст҃ы́й і҆а́кѡвъ бра́тъ бж҃їй ѡ҆ таковы́хъ, ꙗ҆́кѡ забы́тливи быва́юще ѡ҆ свои́хъ согрѣше́нїѧхъ[[І҆а́кѡв. гл. а҃, ст. к҃є.]]. Забы́ша себѐ мно́зїи ѿ го́рдыхъ, глаго́летъ лѣ́ствичникъ, мнѧ́щесѧ безстра́стїе и҆мѣ́ти. И҆ а҆́зъ ᲂу҆́бѡ трїе́хъ и҆споли́нѡвъ дїа́волихъ трепе́ща, ѡ҆ ни́хже написа̀ ст҃ы́й ма́ркъ по́стникъ, си́рѣчь, ᲂу҆ны́нїѧ, забве́нїѧ и҆ невѣ́дѣнїѧ, ꙗ҆́кѡ при́снѡ ѿ ни́хъ ѡ҆бдержи́мый, и҆ боѧ́сѧ, да не ка́кѡ забы́въ свою̀ мѣ́рꙋ, ѡ҆брѧ́щꙋсѧ внѣ̀ пра́вагѡ пꙋтѝ, ꙗ҆́коже глаго́летъ ст҃ы́й і҆саа́къ, написа́хъ настоѧ́щее собра́нїе. Ненави́дѧй бо ѡ҆бличе́нїѧ ꙗ҆влѧ́етъ, ꙗ҆́кѡ стра́сть го́рдости ѡ҆зна́менова є҆го̀, глаго́летъ лѣ́ствичникъ: притека́ѧй же, разрѣша́етсѧ ѿ ᲂу҆́зъ. И҆ соломѡ́нъ, несмы́сленномꙋ вопроси́вшꙋ ѡ҆ мꙋ́дрости, мꙋ́дрость вмѣни́тсѧ[[При́тч. гл. з҃і, ст. к҃и.]], речѐ. Сегѡ̀ ра́ди и҆ и҆мена̀ кни́гъ и҆ ст҃ы́хъ въ нача́лѣ положи́хъ, да не ка́кѡ глаго́лѧ ѡ҆ ко́емждо, чїѐ є҆́сть, продолжи́тсѧ сло́во. И҆́бо и҆ ст҃і́и ѻ҆тцы̀ словеса̀ бж҃е́ственныхъ писа́нїй, ча́стѡ писа́хꙋ та́кѡ, ꙗ҆́коже нахо́дѧтсѧ: ꙗ҆́коже григо́рїй бг҃осло́въ соломѡ́нова, и҆ про́чїи. И҆ ꙗ҆́коже словописа́тель сѷмеѡ́нъ метафра́стъ речѐ ѡ҆ златоꙋ́стѣ, ꙗ҆́кѡ не пра́во є҆́сть ѡ҆ставлѧ́ти словеса̀ є҆гѡ̀, глаго́лати же моѧ̑, а҆́ще бы и҆ мо́глъ: ѿ тогѡ́жде бо дх҃а ст҃а́гѡ всѝ прїѧ́ша. Но ѻ҆́ва нарица́ютъ, чїѐ є҆́сть рече́нїе, ꙗ҆́кѡ тѣ́мъ красѧ́щесѧ смире́нїѧ ра́ди, предпочита́юще словеса̀ писа́нїй: ѻ҆́ва же без̾имє́нна ѡ҆ставлѧ́ютъ мно́жества ра́ди, да не продолжи́тсѧ сло́во въ долготꙋ̀ мно́гꙋю.

Ѡ҆ то́мъ, ꙗ҆́кѡ тѣлє́сныѧ добродѣ́тєли сꙋ́ть ѻ҆рꙋ̑дїѧ дꙋше́вныхъ.

Поне́же лꙋ́чше є҆́сть ча́стшее воспомина́нїе, сегѡ̀ ра́ди мнѡ́жайшаѧ рече́нныхъ глаго́лати начнꙋ̀. И҆ ꙗ҆́кѡ не моѧ̑ сꙋ́ть сїѧ̑, но бж҃е́ственныхъ писа́нїй, и҆ ст҃ы́хъ мꙋже́й словеса̀ и҆ разсꙋжде́нїѧ. Глаго́летъ бо дамаски́нъ, ꙗ҆́кѡ тѣлє́сныѧ добродѣ́тєли, па́че же ѻ҆рꙋ̑дїѧ добродѣ́телей потре́бни сꙋ́ть, є҆гда̀ кто̀ во смире́нїи, и҆ ра́зꙋмомъ дꙋхо́внымъ сїѧ̑ прохо́дитъ: занѐ кромѣ̀ си́хъ нижѐ дꙋшє́вныѧ добродѣ́тєли быва́ютъ. А҆́ще же не та́кѡ, но са́ми ѡ҆ себѣ̀: ничто́же по́льзꙋютъ, ꙗ҆́коже растѣ̑нїѧ без̾ плодѡ́въ: нижѐ без̾ ᲂу҆пражне́нїѧ и҆ во́ли мо́жетъ кто̀ наꙋчи́тисѧ когда̀ до́брѣ и҆ тве́рдѣ хꙋдо́жествꙋ. Сегѡ̀ ра́ди по дѣѧ́нїи тре́бꙋемъ и҆ ра́зꙋма, и҆ всѣ́ми ᲂу҆пражне́нїѧ по бз҃ѣ ѿ всѣ́хъ, и҆ тща́нїѧ ѡ҆ бж҃е́ственныхъ писа́нїѧхъ, без̾ негѡ́же никто́же мо́жетъ когда̀ стѧжа́ти добродѣ́тель. И҆ сподо́бивыйсѧ ᲂу҆́бѡ соверше́ннѣ и҆ при́снѡ ᲂу҆пражнѧ́ющїйсѧ, верхо́внѣйшее прїе́млетъ бла́го. А҆ и҆́же не та́кѡ, понѐ ѿ ча́сти да не вознеради́тъ. Но блаже́ни сꙋ́ть соверше́ннѡ ᲂу҆пражнѧ́ющїисѧ и҆лѝ въ повинове́нїи комꙋ́либо дѣ́ѧтельномꙋ и҆ безмо́лвствꙋющꙋ по ра́зꙋмꙋ, и҆лѝ въ безмо́лвїи и҆ безпопече́нїи ѿ всѣ́хъ повинꙋ́ѧсѧ во́ли бж҃їей, со и҆звѣ́ствомъ и҆ совѣ́томъ и҆скꙋ́сныхъ во всѧ́комъ начина́нїи слове́съ и҆ разꙋмѣ́нїй, хотѧ́щїи па́че без̾ трꙋда̀ дости́гнꙋти безстра́стїѧ и҆ ра́зꙋма дꙋхо́внагѡ соверше́ннымъ по бз҃ѣ ᲂу҆пражне́нїемъ, ꙗ҆́коже са́мъ ѻ҆́нъ чрез̾ проро́ка речѐ: ᲂу҆праздни́тесѧ и҆ разꙋмѣ́йте, ꙗ҆́кѡ а҆́зъ є҆́смь бг҃ъ[[Ѱал. м҃є, ст. а҃і.]]. Но жите́йстїи человѣ́цы, и҆̀же, глаго́лю, въ мі́рѣ, и҆ наипа́че мона́си, хотѧ̀ ѿ ча́сти ᲂу҆праздни́мсѧ, ꙗ҆́коже дре́внїи пра̑ведницы, и҆спы́товати ѻ҆каѧ́ннꙋю дꙋ́шꙋ пре́жде сме́рти, и҆ да прїѡбрѧ́щемъ є҆́й и҆справле́нїе, и҆лѝ смире́нїе, а҆ не коне́чнꙋю поги́бель соверше́ннымъ неразꙋ́мїемъ, и҆ въ вѣ́дѣнїи и҆ невѣ́дѣнїи быва́емыхъ согрѣше́нїй. дв҃дъ бо ца́рь бѧ́ше, на всѧ́кꙋ но́щь ѡ҆моча́ше слеза́ми посте́лю свою̀[[Ѱал. ѕ҃, ст. з҃.]], ѿ чꙋ́вства бж҃е́ственнагѡ стра́ха, ꙗ҆́коже глаго́летъ і҆́ѡвъ: ᲂу҆жасо́шасѧ власѝ моѝ, и҆ про́чее. И҆ мы̀ ᲂу҆̀бо хотѧ̀ ча́сть нѣ́кꙋю днѝ и҆ но́щи; ꙗ҆́коже жите́йстїи человѣ́цы, ᲂу҆праздни́мсѧ, и҆ ᲂу҆вѣ́мы, что̀ и҆́мамы ѿвѣщава́ти пра́ведномꙋ сꙋдїѝ въ стра́шный де́нь сꙋда̀. И҆ ѡ҆ се́мъ па́че попече́мсѧ, ꙗ҆́кѡ ѡ҆ нꙋ́жнѣмъ, стра́ха ра́ди вѣ́чныѧ мꙋ́ки, не́же ка́кѡ жи́ти и҆́мꙋтъ ᲂу҆бо́зїи, и҆ ѡ҆богаща́тисѧ сребролю́бцы: и҆ да не всѐ на́ше попече́нїе ѡ҆ жите́йскихъ дѣ́лѣхъ и҆́мамы безꙋ́мнѣ, ꙗ҆́коже глаго́летъ бж҃е́ственный златоꙋ́стъ, ꙗ҆́кѡ дѣ́лати ᲂу҆́бѡ подоба́етъ, но не пещи́сѧ и҆ мо́лвити ѡ҆ мно́зѣ, ꙗ҆́коже речѐ гдⷭ҇ь ма́рфѣ[[Лꙋкѝ гл. і҃, ст. м҃а.]]. Поне́же попече́нїе жите́йское не попꙋща́етъ пещи́сѧ ѡ҆ свое́й дꙋшѣ̀, и҆ вѣ́дѣти, въ не́мже є҆́сть ᲂу҆строе́нїи, ꙗ҆́коже вѣ́сть ᲂу҆пражднѧ́ѧйсѧ и҆ внима́ющїй себѣ̀ самомꙋ̀, ꙗ҆́коже глаго́летсѧ въ зако́нѣ: Внемлѝ себѣ̀ и҆ прѡ́чаѧ[[Второзак. гл. є҃і, ст. ѳ҃.]]. И҆ ѡ҆ се́мъ ᲂу҆́бѡ глаго́лѣ вели́кїй васі́лїй написа̀ досточꙋ́дное и҆ всѧ́кїѧ премꙋ́дрости и҆спо́лненное сло́во.

Ѡ҆ то́мъ, ꙗ҆́кѡ невозмо́жно и҆на́че спасти́сѧ, то́чїю тре́звеннымъ

внима́нїемъ и҆ блюде́нїемъ ᲂу҆ма̀.

Кромѣ́ же внима́нїѧ и҆ бо́дрости ᲂу҆ма̀ не возмо́жно спасти́сѧ на́мъ, и҆зба́витисѧ ѿ дїа́вола, ꙗ҆́кѡ льва̀ рыка́юща, ходѧ́ща и҆ и҆́щꙋща поглоти́ти кого̀, ꙗ҆́коже глаго́летъ дамаски́нъ. Сегѡ̀ ра́ди мно́жицею ᲂу҆ченика́мъ свои̑мъ глаго́летъ гдⷭ҇ь: Бди́те и҆ моли́тесѧ, ꙗ҆́кѡ не вѣ́сте, и҆ прѡ́чаѧ[[Ма́рка гл. г҃і, ст. л҃г.]]. Предвозвѣща́ѧй си́мъ всѣ̑мъ ѡ҆ па́мѧти сме́рти, да бꙋ́демъ гото́ви ко ѿвѣ́тꙋ прїѧ́тнꙋ, сꙋ́щꙋ ѿ дѣ́лъ и҆ внима́нїѧ. Поне́же де́мѡни, ꙗ҆́коже глаго́летъ ст҃ы́й і҆ларїѡ́нъ, сꙋ́ть невеще́ственнїи, безсо́ннїи, и҆ всѧ́кое попече́нїе и҆́мꙋтъ во є҆́же ра́товати ны̀, и҆ погꙋби́ти дꙋ́шы на́шѧ сло́вомъ, дѣ́ломъ же и҆ по́мыслы, мы́ же не та́кѡ: но ѻ҆вогда̀ ѡ҆ наслажде́нїѧхъ пече́мсѧ, и҆ преходѧ́щей сла́вѣ, ѻ҆вогда́ же ѡ҆ жите́йскихъ веще́хъ, и҆ ѡ҆ дрꙋги́хъ мно́гихъ при́снѡ: и҆ никаково́й ча́сти не хо́щемъ и҆мѣ́ти на и҆спыта́нїе на́шегѡ житїѧ̀, да возмо́жетъ ᲂу҆́мъ ѿ сегѡ̀ прїѧ́ти навыкнове́нїе, и҆ без̾ ᲂу҆пражне́нїѧ мно́жицею внима́ти себѣ̀, ꙗ҆́коже глаго́летъ соломѡ́нъ: Ꙗ҆́коже посредѝ сѣте́й мно́гихъ хо́диши. Ѡ҆ ни́хже писа̀ златоꙋ́стъ, со мно́гимъ и҆звѣ́ствомъ и҆ соверше́нною премꙋ́дростїю и҆з̾ѧснѧ́ѧ: что̀ сꙋ́ть сїѧ̑: гдⷭ҇ь же, всѧ́ко попече́нїе ѿсѣщѝ хотѧ́й, повелѣ̀ на́мъ презира́ти и҆ са́мꙋю пи́щꙋ и҆ ѻ҆де́ждꙋ, да є҆ди́но попече́нїе и҆́мамы, ка́кѡ спасти́сѧ, ꙗ҆́кѡ се́рна ѿ лови́твы, и҆ а҆́ки пти́ца ѿ сѣте́й, и҆ да дости́гнемъ ѻ҆строзрѣ́нїѧ сегѡ̀ живо́тнагѡ, и҆ высокопаре́нїѧ пти́чїѧгѡ безпопече́нїемъ. И҆ сїѐ чꙋ́дно є҆́сть, ꙗ҆́кѡ соломѡ́нъ ца́рь бы́въ и҆зречѐ сїѧ̑, и҆ ѻ҆те́цъ є҆гѡ̀ та́кожде глаго́лалъ є҆́сть и҆ твори́лъ. И҆ съ толи́цѣмъ внима́нїемъ, и҆ мно́гими по́двиги во всѧ́кой премꙋ́дрости и҆ добродѣ́тели сꙋ́ще, съ толи́кими дара́ми и҆ ꙗ҆вле́нїемъ бж҃їимъ, ᲂу҆вы̀! ѿ грѣха̀ побѣжде́ни бы́ша, ꙗ҆́кѡ ѻ҆́въ вкꙋ́пѣ, и҆ прелюбодѣѧ́нїе и҆ ᲂу҆бі́йство ѡ҆пла́кивалъ[[в҃ Цар. гл. а҃і, ст. д҃ и҆ є҃і.]], ѻ҆́въ же въ толи̑каѧ лю̑таѧ впадѐ[[г҃ Цар. гл. а҃і, ст. л҃.]]. Нѣ́сть ли сїѐ и҆спо́лнено тре́пета и҆ ᲂу҆́жаса и҆мꙋ́щымъ ᲂу҆́мъ, ꙗ҆́коже глаго́летъ лѣ́ствичникъ и҆ фїлимо́нъ по́стникъ; Ка́кѡ ᲂу҆́бѡ не ᲂу҆жаса́емсѧ и҆ не бѣ́гаемъ попече́нїѧ жите́йскагѡ, за не́мощь на́шꙋ, ничто́же сꙋ́щїи, но ꙗ҆́коже безсловє́снаѧ, нечꙋ́вственни є҆смы̀. И҆ ѽ да бы́хъ, ꙗ҆́коже безсловє́снаѧ, ѻ҆каѧ́нный а҆́зъ є҆стество̀ моѐ сохрани́лъ, ꙗ҆́кѡ пе́съ лꙋ́чшїй менѐ є҆́сть, и҆ прѡ́чаѧ.

Ѡ҆ то́мъ ꙗ҆́кѡ хотѧ́щїи ви́дѣти себѐ сами́хъ, въ ко́емъ нра́вѣ сꙋ́ть, не

и҆́накѡ, то́чїю ᲂу҆дале́нїемъ свои́хъ хотѣ́нїй, и҆ повинове́нїемъ, и҆ безмо́лвїемъ: па́че же ѿ страсте́й ѡ҆блада́емїи.

А҆́ще бо хо́щемъ ви́дѣти себѐ сами́хъ, въ ко́емъ смертоно́снѣмъ нра́вѣ є҆смы̀, да бѣжи́мъ свои́хъ хотѣ́нїй и҆ жите́йскихъ веще́й, и҆ ᲂу҆дале́нїемъ ѿ всегѡ̀ да пребыва́емъ притрꙋ́днѣ въ блаже́ннѣмъ и҆ по бз҃ѣ сꙋ́щемъ ᲂу҆пражне́нїи, и҆щѧ̀ ко́йждо своеѧ̀ дꙋшѝ поꙋче́нїемъ въ бж҃е́ственныхъ писа́нїѧхъ, и҆лѝ въ соверше́ннѣмъ повинове́нїи дꙋши́ же и҆ тѣ́ла, и҆лѝ въ приснопѣ́сненнѣмъ пребыва́нїи а҆́гг҃льстѣмъ, безмо́лвїи: па́че же стра́стнїи и҆ неꙋде́ржнїи сꙋ́ще въ свои́хъ похотѣ́нїѧхъ, ма́лыхъ и҆ вели́кихъ же.

Сѣдѝ въ ке́ллїи твое́й, и҆ та̀ всемꙋ́ тѧ наꙋчи́тъ. и҆ па́ки: безмо́лвїе є҆́сть нача́ло ѡ҆чище́нїѧ дꙋшѝ, ꙗ҆́коже глаго́летъ вели́кїй васі́лїй. И҆ соломѡ́нъ, попече́нїе лꙋка́во дадѐ бг҃ъ сыновѡ́мъ человѣ̑ческимъ[[Є҆ккл. гл. а҃, ст. г҃і.]], глаго́летъ, пещи́сѧ ѡ҆ сꙋ́етныхъ, да не ѿ безслове́сныѧ и҆ стра́стныѧ пра́здности ᲂу҆клонѧ́тсѧ въ гѡ́ршаѧ ꙗ҆́вѣ. И҆зба́вивыйсѧ же благода́тїю бж҃їею ѿ ѻ҆бои́хъ стремни́нъ, и҆ мона́хъ сподо́бивыйсѧ бы́ти, носѧ́й же а҆гг҃лови́дный и҆ и҆́ноческїй ѡ҆́бразъ, да ꙗ҆ви́тсѧ си́мъ подража́нїе є҆ди́номꙋ бг҃ꙋ, по возмо́жности дѣ́ломъ и҆ сло́вомъ, ꙗ҆́коже глаго́летъ вели́кїй дїонѵ́сїй. Ка́кѡ не до́лженъ є҆́сть ᲂу҆пражнѧ́тисѧ при́снѡ, и҆ внима́ти ᲂу҆мꙋ̀ во всѧ́комъ дѣ́лѣ, и҆ и҆мѣ́ти непреста́нное нѣ́кое поꙋче́нїе по бз҃ѣ ѡ҆ ᲂу҆строе́нїи, въ не́же дости́же: ꙗ҆́коже къ новонача̑льнымъ глаго́лютъ свѧті́и ѻ҆тцы̀, є҆фре́мъ и҆ про́чїи. Ѻ҆́въ ᲂу҆́бѡ до́лженъ є҆́сть ѱало́мъ и҆мѣ́ти во ᲂу҆стѣ́хъ, ѻ҆́въ же сті́хъ, и҆ дрꙋзі́и ᲂу҆мо́мъ во ѱалмѣ́хъ и҆ тропарѣ́хъ внима́ти, глаго́люще: ꙗ҆́кѡ не ᲂу҆̀ сподо́бишасѧ є҆щѐ прїитѝ въ видѣ́нїе нѣ́кое, си́рѣчь, ра́зꙋмъ, да ника́коже ѡ҆брѧ́щетсѧ кто̀, и҆лѝ дѣ́лаѧй, и҆лѝ пꙋтеше́ствꙋѧй, и҆лѝ возлега́ѧй почи́ти внѣ̀ нѣ́коегѡ поꙋче́нїѧ. И҆спо́лнивъ же ѡ҆предѣле́нное є҆мꙋ̀ пра́вило, а҆́бїе ᲂу҆́мъ въ нѣ́коемъ поꙋче́нїи заключи́ти до́лженъ є҆́сть, да не ѡ҆брѣ́тъ є҆го̀ вра́гъ пра́здна ѿ па́мѧти бж҃їѧ, приложи́тъ та̑ѧжде ѕла̑ѧ. И҆ сїѧ̑ ᲂу҆́бѡ ко всѣ̑мъ реко́шасѧ. Є҆гда́ же кто̀ мно́гими по́двиги, тѣле́сными, глаго́лю, добродѣ́телѧми и҆ дꙋше́вными въ дꙋхо́вное, си́рѣчь, мы́сленное дѣ́ланїе, благода́тїю хрⷭ҇то́вою ᲂу҆́мнѣ взы́ти возмо́жетъ, си́рѣчь, въ пла́чь ѡ҆ дꙋшѣ̀ свое́й: томꙋ̀ подоба́етъ мы́сль, приносѧ́щꙋю приболѣ̑зненныѧ слє́зы, ꙗ҆́кѡ ѕѣ́ницꙋ ѻ҆́ка храни́ти, ꙗ҆́коже глаго́летъ лѣ́ствичникъ, до́ндеже ѻ҆́гнь и҆ вода̀ смотри́тельнѣ не ѿи́дꙋтъ, си́рѣчь, за возноше́нїе. Ѻ҆́гнь ᲂу҆́бѡ є҆́сть серде́чнаѧ болѣ́знь, и҆ те́плаѧ вѣ́ра: а҆ вода̀, сле́зы. Не всѣ̑мъ же даю́тсѧ сїѧ̑, глаго́летъ вели́кїй а҆ѳана́сїй, но сподо́бившымсѧ пре́жде сме́рти, и҆ по сме́рти сꙋ̑щаѧ лю̑таѧ зрѣ́ти непреста́нною ѡ҆ ни́хъ па́мѧтїю въ безмо́лвїи, ꙗ҆́коже глаго́летъ и҆са́їа: Оу҆́хо безмо́лвствꙋющагѡ слы́шитъ ди̑внаѧ. И҆ па́ки: Оу҆праздни́тесѧ и҆ разꙋмѣ́йте. Сїе́ бо є҆ди́но ра́зꙋмъ бж҃їй ражда́ти ѡ҆бы́че, ꙗ҆́кѡ па́че могꙋ́щее помощѝ и҆ ѕѣлѡ̀ стра̑стнымъ и҆ немощны̑мъ, чрез̾ безпопечи́тельное пребыва́нїе и҆ ᲂу҆дале́нїе ѿ люде́й, и҆ помрача́ющихъ ᲂу҆́мъ бесѣ́дъ, и҆ попече́нїй не то́чїю жите́йскихъ, но и҆ ничто́жныхъ, и҆ мнѧ́щихсѧ безгрѣ́шными бы́ти, ꙗ҆́коже глаго́летъ лѣ́ствичникъ: Ма́лый вла́съ смꙋтѝ ѻ҆́ко, и҆ прѡ́ч.: и҆ ст҃ы́й і҆саа́къ: не мнѝ, ꙗ҆́кѡ и҆мѣ́ти зла́то и҆лѝ сребро̀, сребролю́бїе сїѐ то́чїю є҆́сть, но и҆ къ чемꙋ́либо прилѣжи́тъ по́мыслъ. И҆ гдⷭ҇ь глаго́летъ: И҆дѣ́же сокро́вище ва́ше, тꙋ̀ и҆ се́рдце ва́ше бꙋ́детъ[[Матѳ. гл. ѕ҃, ст. к҃а]], а҆́ще въ бж҃е́ственныхъ, а҆́ще въ земны́хъ веще́хъ и҆ помышле́нїѧхъ. Сегѡ̀ ра́ди всѣ̑мъ прили́чествꙋетъ безпопече́нїе, и҆ є҆́же ᲂу҆пражнѧ́тисѧ по бз҃ѣ, да а҆́ще ѿ ча́сти жите́йстїи сꙋ́ть, ꙗ҆́коже рече́сѧ, по ма́лꙋ прїи́дꙋтъ въ мꙋ́дрость и҆ ра́зꙋмъ дꙋхо́вный, и҆лѝ а҆́ще мо́гꙋтъ соверше́ннѣ ᲂу҆пражнѧ́тисѧ, и҆ всѧ́ко и҆мѣ́ти попече́нїе, во є҆́же благоꙋгоди́ти бг҃ꙋ, да ᲂу҆́зритъ бг҃ъ произволе́нїе и҆́хъ, и҆ да́рꙋетъ и҆̀мъ поко́й дꙋхо́внымъ ра́зꙋмомъ, дости́гнꙋти и҆̀хъ, и҆ сотвори́тъ поꙋчє́нїѧ въ пе́рвомъ видѣ́нїи, ко є҆́же стѧжа́ти неизглаго́ланное сокрꙋше́нїе дꙋшѝ, и҆ бы́ти ни́щими дꙋ́хомъ. И҆ та́кѡ по ма́лꙋ въ прѡ́чїѧ видѣ̑нїѧ возводѧ̀, сподо́битъ и҆̀хъ соблюде́нїѧ блаже́нствъ, до́ндеже дости́гнꙋтъ ми́ра по́мыслѡвъ, и҆́же є҆́сть мѣ́сто бж҃їе, ꙗ҆́коже глаго́летъ ст҃ы́й ні́лъ, прїе́мъ ᲂу҆потребле́нїе и҆з̾ ѱалти́ри. И҆ бы́сть, глаго́летъ, въ ми́рѣ мѣ́сто є҆гѡ̀[[Ѱал. ѻ҃є, ст. г҃.]].

Ѡ҆ ѻ҆смѝ ᲂу҆́мныхъ видѣ́нїѧхъ.

Дꙋхѡ́внаѧ же видѣ̑нїѧ, ꙗ҆́коже мню̀, ѻ҆́смь сꙋ́ть, и҆ се́дмь ны́нѣшнѧгѡ вѣ́ка, ѻ҆смо́е же є҆́сть, дѣ́ланїе бꙋ́дꙋщагѡ, ꙗ҆́коже глаго́летъ ст҃ы́й і҆саа́къ. Пе́рвое ᲂу҆́бѡ є҆́сть ра́зꙋмъ, ꙗ҆́коже глаго́летъ ст҃ы́й дѡроѳе́й, скорбе́й и҆ и҆скꙋше́нїй житїѧ̀ сегѡ̀, и҆ сѣ́тꙋетъ ѡ҆ всѧ́кой тщетѣ̀, ю҆́же претерпѣ̀ є҆стество̀ человѣ́че ѿ грѣха̀.

Второ́е, ра́зꙋмъ свои́хъ согрѣше́нїй, и҆ благодѣѧ́нїй бж҃їихъ, ꙗ҆́коже глаго́летъ лѣ́ствичникъ, ст҃ы́й і҆саа́къ, и҆ дрꙋгі́е мно́зїи и҆з̾ ѻ҆тє́цъ.

Тре́тїе, ра́зꙋмъ лю́тыхъ сꙋ́щихъ пре́жде сме́рти, и҆ по сме́рти, ꙗ҆́коже въ бж҃е́ственныхъ писа́нїѧхъ ѡ҆брѣта́етсѧ.

Четве́ртое, ᲂу҆разꙋмѣ́нїе ѡ҆ житїѝ гдⷭ҇а на́шегѡ і҆и҃са хрⷭ҇та̀ въ мі́рѣ се́мъ, и҆ ᲂу҆ченикѡ́въ є҆гѡ̀, и҆ про́чихъ ст҃ы́хъ, мꙋ́ченикѡвъ же и҆ преподо́бныхъ ѻ҆тє́цъ дѣла̀ и҆ словеса̀.

Пѧ́тое, ра́зꙋмъ є҆стества̀, и҆ и҆змѣне́нїѧ веще́й, ꙗ҆́коже глаго́лютъ ст҃і́и ѻ҆тцы̀, григо́рїй и҆ дамаски́нъ.

Шесто́е, видѣ́нїе сꙋ́щихъ, си́рѣчь, ра́зꙋмъ и҆ ᲂу҆разꙋмѣ́нїе чꙋ́вственныхъ созда́нїй бж҃їихъ.

Седмо́е, ᲂу҆разꙋмѣ́нїе ᲂу҆́мныхъ созда́нїй бж҃їихъ.

Ѻ҆смо́е, ра́зꙋмъ ѡ҆ бз҃ѣ, глаго́лемое бг҃осло́вїе.

И҆з̾ си́хъ ᲂу҆́бѡ ѻ҆смѝ видѣ́нїй трѝ ᲂу҆́бѡ подоба́ютъ дѣ́ѧтельномꙋ, да мно́гими и҆ го́рькими слеза́ми возмо́жетъ ѡ҆чи́стити дꙋ́шꙋ свою̀ ѿ всѣ́хъ страсте́й, и҆ прїи́метъ ѿ бг҃а по благода́ти, и҆ прѡ́чаѧ.

Пѧ́ть же ᲂу҆мозри́тельномꙋ, си́рѣчь, разꙋми́тельномꙋ: за є҆́же до́брѣ храни́ти, и҆ при́снѡ твори́ти дѣѧ̑нїѧ тѣлє́снаѧ, и҆ нра́вствєннаѧ, си́рѣчь, дꙋшє́внаѧ. Ѿ ни́хже сподоблѧ́етсѧ ꙗ҆́внѣ, и҆ ᲂу҆́мнѣ чꙋ̑вства си́хъ. Ѿ пе́рвагѡ бо прїе́млетъ нача́ло дѣ́ѧтельный ра́зꙋмъ: и҆ є҆ли́кѡ по семꙋ̀ прилѣжи́тъ къ дѣ́ланїю, и҆ поꙋча́етсѧ въ дае́мыхъ є҆мꙋ̀ разꙋмѣ́нїѧхъ, и҆ пред̾ꙋспѣва́етъ въ ни́хъ, до́ндеже въ навыкнове́нїе си́хъ прїи́детъ. И҆ та́кѡ са́мъ по себѣ̀ и҆́нъ ра́зꙋмъ прихо́дитъ во ᲂу҆́мъ, ꙗ҆́коже и҆ прѡ́чїѧ.

По да бꙋ́детъ ꙗ҆́сно глаго́лемое, ѿ ча́сти рекꙋ̀, а҆́ще и҆ не могꙋ̀ глаго́лати, ѡ҆ ко́емждо видѣ́нїи. И҆ что̀ сꙋ́ть разꙋмѣва́ємаѧ и҆ глаго́лємаѧ: Да ѡ҆брѧ́щемъ винꙋ̀ ᲂу҆разꙋмѣ́ти себѐ, ка́кѡ до́лжни є҆смы̀ твори́ти, є҆гда̀ благода́ть на́чнетъ ѿверза́ти ѻ҆́чи дꙋшѝ, во є҆́же разꙋмѣва́ти, и҆ ᲂу҆жаса́тисѧ ѿ разꙋмѣ́нїй, и҆ глаго́лати могꙋ́щимъ всели́ти въ на́съ стра́хъ, ꙗ҆́коже рече́сѧ, си́рѣчь, сокрꙋше́нїе дꙋшѝ.

Нꙋ́жное показа́нїе ѡ҆ пе́рвомъ ра́зꙋмѣ, и҆ ѡ҆ то́мъ, ка́кѡ подоба́етъ

начина́ти ѻ҆́ный.

Пе́рвый ра́зꙋмъ є҆́сть, є҆гѡ́же ра́ди да́рꙋютсѧ прѡ́чїѧ произволѧ́ющемꙋ. Сподо́бивыйсѧ ᲂу҆́бѡ прїитѝ во ѻ҆́ный, си́це до́лженъ є҆́сть твори́ти. Сѣ́сти къ восто́кѡмъ, ꙗ҆́коже нѣ́когда а҆да́мъ, и҆ размышлѧ́ти та́кѡ: сѣ́де а҆да́мъ тогда̀, и҆ пла́касѧ прѧ́мѡ сла́дости раѧ̀, рꙋка́ма бїѧ̀ лицѐ, и҆ глаго́лаше: Ми́лостиве! поми́лꙋй мѧ̀ па́дшаго. Та́кожде и҆ и҆́нъ і҆́косъ: ви́дѧ а҆да́мъ а҆́гг҃ла и҆зри́нꙋвша, и҆ затвори́вша бж҃е́ственнагѡ вертогра́да две́рь, воздохнꙋ̀ вельмѝ, и҆ глаго́ла: Ми́лостиве! поми́лꙋй мѧ̀ па́дшаго. Пото́мъ разсмотрѧ́ѧ быва̑ющаѧ, тогда̀ начина́етъ пла́чь си́це, воздыха́ѧ ѿ всеѧ̀ дꙋшѝ, и҆ коле́блѧ главо́ю свое́ю, глаго́летъ съ болѣ́знїю се́рдца: Оу҆вы̀ мнѣ̀ грѣ́шномꙋ! что̀ пострада́хъ; ᲂу҆вы̀ мнѣ̀! что̀ бѣ́хъ, и҆ что̀ содѣ́лахсѧ; ᲂу҆вы̀ мнѣ̀, что̀ погꙋби́хъ, и҆ что̀ ѡ҆брѣто́хъ; Вмѣ́стѡ раѧ̀, тлѣ́нный се́й мі́ръ: вмѣ́стѡ бг҃а и҆ пребыва́нїѧ со а҆́гг҃лы, дїа́вола и҆ нечи́стыхъ де́монѡвъ: вмѣ́стѡ поко́ѧ, трꙋ́дъ: вмѣ́стѡ наслажде́нїѧ и҆ ра́дости, ско́рбь мі́ра и҆ печа́ль: вмѣ́стѡ ми́ра и҆ непреста́ннагѡ весе́лїѧ, стра́хъ и҆ приболѣ́знєнныѧ сле́зы: вмѣ́стѡ добродѣ́телей и҆ пра́вды, непра́вдꙋ и҆ грѣхѝ: вмѣ́стѡ бла́гости и҆ безстра́стїѧ, лꙋка́вство и҆ стра̑сти: вмѣ́стѡ премꙋ́дрости и҆ ᲂу҆свое́нїѧ къ бг҃ꙋ, неразꙋ́мїе и҆ и҆згна́нїе: вмѣ́стѡ безпопечи́тельности и҆ свобо́ды, многопопечи́тельнꙋю жи́знь, и҆ горча́йшее ра́бство. Оу҆вы̀, ᲂу҆вы̀! ка́кѡ ца́рь сотворе́нъ бы́хъ, и҆ ра́бъ страстє́мъ безꙋ́мїемъ мои́мъ содѣ́лахсѧ; Оу҆вы̀ мнѣ̀ ѻ҆каѧ́нномꙋ! ка́кѡ преслꙋша́нїемъ вмѣ́стѡ жи́зни, сме́рть привлеко́хъ; Оу҆вы̀ мнѣ̀! ᲂу҆вы̀ мнѣ̀! что̀ претерпѣ́хъ ѻ҆каѧ́нный ѿ безꙋ́мїѧ моегѡ̀; что̀ сотворю̀; Ѿсю́дꙋ ра̑ти, и҆ ѿсю́дꙋ смꙋщє́нїѧ. Ѿсю́дꙋ болѣ̑зни, и҆ ѿсю́дꙋ и҆скꙋшє́нїѧ. Ѿсю́дꙋ бѣды̑, и҆ ѿсю́дꙋ кораблекрꙋшє́нїѧ. Ѿсю́дꙋ стра́си, и҆ ѿсю́дꙋ печа̑ли. Ѿсю́дꙋ стра̑сти, и҆ ѿсю́дꙋ грѣсѝ. Ѿсю́дꙋ го́рєсти, и҆ ѿсю́дꙋ тѣснота̀. Оу҆вы̀ мнѣ̀ ѻ҆каѧ́нномꙋ! что̀ сотворю̀; ка́мѡ бѣжꙋ̀; Тѣ̑сна мѝ всѧ̑, ꙗ҆́коже глаго́летъ сꙋса́нна[[Данїи́л. гл. г҃і, ст. к҃в.]]. Не вѣ́мъ, чегѡ̀ и҆ска́ти мѝ. А҆́ще бо жи́зни проси́ти бꙋ́дꙋ, бою́сѧ и҆скꙋше́нїй житїѧ̀, и҆ премѣ́нъ є҆гѡ̀, и҆ приключе́нїй. Ви́ждꙋ а҆́гг҃ла, сатанꙋ̀, а҆́ки денни́цꙋ пре́жде возсїѧ́вша, и҆ дїа́воломъ содѣ́лавшасѧ, и҆ глаго́лемаго. Первозда́ннаго и҆згна́нна: ка́їна братоꙋбі́йцꙋ: ханаа́на про́клѧта: содо́млѧнъ ѻ҆гнесожже́нныхъ: и҆са́ѵа ѿпа́дша, і҆и҃льтѧнъ под̾ гнѣ́вомъ сꙋ́щихъ: гїезі́а и҆ і҆ꙋ́дꙋ а҆по́стола ѿпа́дшихъ, недꙋ́говавшихъ сребролю́бїемъ: вели́каго проро́ка и҆ царѧ̀, ѡ҆ двою̀ грѣсѣ́хъ пла́чꙋща: соломѡ́на съ толи́кою премꙋ́дростїю ѿпа́дша: сꙋ́щихъ ѿ седмѝ дїа́конѡвъ и҆ четы́редесѧти мꙋ́ченикѡвъ и҆спа́дшихъ, ꙗ҆́коже глаго́летъ вели́кїй васі́лїй: ра́дꙋѧсѧ ѕлонача́льникъ восхи́ти ѿ двоюна́десѧти ѻ҆каѧ́ннаго і҆ꙋ́дꙋ, и҆з̾ є҆де́ма человѣ́ка, и҆ ѿ четы́редесѧти мꙋ́чєникъ ѿпа́дшаго: є҆го́же ѡ҆пла́киваѧ, па́ки то́йже глаго́летъ: сꙋемꙋ́дрый и҆ досто́йный пла́ча, и҆́же ѻ҆боегѡ̀ живота̀ лиши́сѧ, ѻ҆гне́мъ бо раста́ѧ, и҆ ко ѻ҆гню̀ ѿи́де неꙋгаси́момꙋ. И҆ мно́зи и҆́ны па́дшѧ, и҆́хже нѣ́сть числа̀, не то́чїю же невѣ́рныхъ, но и҆ мно́гихъ ѿ ѻ҆тє́цъ по мно́гихъ трꙋдѣ́хъ. Кто́ бо є҆́смь а҆́зъ хꙋ́ждшїй, и҆ нечꙋ́вственнѣйшїй и҆ немощнѣ́йшїй всѣ́хъ; что̀ ᲂу҆́бѡ рекꙋ̀ ѡ҆ себѣ̀ само́мъ; Поне́же а҆враа́мъ нарица́етъ себѧ̀ земле́ю и҆ пе́пломъ[[Быт. гл. и҃і, ст. к҃з.]]: даві́дъ псо́мъ ᲂу҆ме́ршимъ, и҆ блохо́ю во і҆и҃ли[[а҃ Цар. гл. к҃д, ст. є҃і.]]: соломѡ́нъ ѻ҆́трокомъ ма́лымъ невѣ́дꙋщимъ десна́гѡ и҆ шꙋ́ѧгѡ[[г҃ Цар. г҃, ст. з҃.]]: трїѐ ѻ҆́троцы, стꙋ́дъ и҆ поноше́нїе бы́хомъ[[Данїи́л. гл. г҃, ст. л҃г.]], глаго́лютъ: проро́къ и҆са́їа, ѻ҆каѧ́ненъ є҆́смь а҆́зъ[[И҆са́їи гл. ѕ҃, ст. є҃.]], глаго́летъ: проро́къ а҆ввакꙋ́мъ, и҆ а҆́зъ є҆́смь ю҆́ншїй, глаго́летъ. Пе́рвый а҆по́столъ нарица́етъ себѧ̀ грѣ́шника, и҆ про́чїи всѝ глаго́лютъ ничто́же бы́ти себѐ. Что̀ ᲂу҆́бѡ сотворю̀ а҆́зъ; гдѣ̀ сокры́юсѧ ѿ мно́гихъ мѝ ѕѡ́лъ; что̀ бꙋ́дꙋ, ничто́же сы́й и҆ хꙋ́ждшїй ничто́жества; И҆́бо ничто́жество не погрѣшѝ, нижѐ ѡ҆благодѣ́тельствовано бы́сть, ꙗ҆́коже а҆́зъ. Оу҆вы̀! ка́кѡ и҆́мамъ соверши́ти про́чее вре́мѧ жи́зни моеѧ̀; и҆лѝ ка́кѡ возмогꙋ̀ ᲂу҆бѣжа́ти сѣте́й дїа́вольскихъ; бѣ́сове безсо́нни и҆ невеще́ственнїи: сме́рть же бли́зъ є҆́сть, и҆ а҆́зъ не́мощенъ. Гдⷭ҇и, помози́ ми. Не ѡ҆ста́ви созда́нїю твоемꙋ̀ поги́бнꙋти, ꙗ҆́кѡ ты̀ пече́шисѧ ѡ҆ мнѣ̀ ѻ҆каѧ́ннѣмъ. Скажи́ ми, гдⷭ҇и, пꙋ́ть, въ ѻ҆́ньже пойдꙋ̀, ꙗ҆́кѡ къ тебѣ̀ взѧ́хъ дꙋ́шꙋ мою̀[[Ѱал. рм҃в, ст. и҃.]]. Не ѡ҆ста́ви менѐ, гдⷭ҇и бж҃е мо́й, не ѿстꙋпѝ ѿ менѐ: Вонмѝ въ по́мощь мою̀, гдⷭ҇и спасе́нїѧ моегѡ̀[[Ѱал. л҃з, ст. к҃в и҆ к҃г.]]. И҆ си́це сокрꙋши́тсѧ дꙋша̀ въ таковы́хъ глаго́лѣхъ, а҆́ще хотѧ̀ ѿ ча́сти чꙋ́вство и҆́мать. Пребыва́ющꙋ же є҆мꙋ̀ въ си́хъ, и҆ навы́кшꙋ стра́хꙋ бж҃їю, начина́етъ ᲂу҆́мъ разꙋмѣва́ти и҆ разсмотрѧ́ти словеса̀ втора́гѡ видѣ́нїѧ, и҆̀же сꙋ́ть сїѧ̑.

Ѡ҆ второ́мъ видѣ́нїи.

Оу҆вы̀ мнѣ̀ ѻ҆каѧ́нномꙋ! что̀ сотворю̀; что̀ бꙋ́дꙋ; Мно́гѡ согрѣши́хъ: мно́гѡ ѡ҆благодѣ́тельствованъ бы́хъ: мно́гѡ немощствꙋ́ю. И҆скꙋшє́нїѧ мнѡ́га, ᲂу҆ны́нїе ѡ҆бдержи́тъ мѧ̀. Забве́нїе помрача́етъ мѧ̀, и҆ не попꙋска́етъ мѧ̀ зрѣ́ти себѐ, и҆ мно́жество ѕѡ́лъ мои́хъ. Невѣ́дѣнїе ѕло̀, престꙋпле́нїе въ ра́зꙋмѣ го́рше. Добродѣ́тель неꙋдобьсоверша́ема. Стра̑сти мно́зи, де́мѡни лꙋка́ви, грѣ́хъ ᲂу҆до́бенъ, сме́рть бли́зъ, словоиспыта́нїе го́рько. Оу҆вы̀ мѝ! что̀ сотворю̀; ка́мѡ бѣжꙋ̀ ѿ себѐ; Поне́же а҆́зъ є҆́смь вина̀ поги́бели моеѧ̀: самовла́стїемъ бо почте́нъ бы́хъ, и҆ никто́же мѧ̀ мо́жетъ нꙋ́дити. А҆́зъ ᲂу҆́бѡ согрѣши́хъ, и҆ при́снѡ согрѣша́ю, и҆ нерадѣ́ю ѡ҆ всѧ́комъ дѣ́лѣ бла́зѣ, нꙋ́дѧщагѡ же не ѡ҆брѣта́етсѧ: кого̀ ᲂу҆̀бо и҆́мамъ ѡ҆бвини́ти; бг҃ъ бла́гъ и҆ человѣколюби́въ, жела́ѧ при́снѡ моегѡ̀ къ немꙋ̀ ѡ҆браще́нїѧ и҆ покаѧ́нїѧ. А҆́гг҃ли лю́бѧтъ мѧ̀, и҆ хранѧ́тъ. Человѣ́цы та́кожде предспѣ́ѧнїѧ моегѡ̀ хотѧ́тъ: де́мѡни не мо́гꙋтъ нꙋ́дити никогѡ́же не хотѧ́ща поги́бнꙋти, и҆лѝ нерадѣ́нїемъ, и҆лѝ ѿча́ѧнїемъ. Кто̀ ᲂу҆̀бо вино́венъ є҆́сть, то́чїю са́мъ а҆́зъ ѻ҆каѧ́нный; Сѐ ма́лѡ позна́хъ, ꙗ҆́кѡ погиба́етъ дꙋша̀ моѧ̀: и҆ не хощꙋ̀ нача́ла благоче́стїю положи́ти. Чесѡ̀ ра́ди дꙋша̀ моѧ̀ неради́ши ѡ҆ себѣ̀; чесѡ̀ ра́ди не срамлѧ́ешисѧ пред̾ бг҃омъ и҆ а҆́гг҃лами є҆гѡ̀ согрѣша́ющи, ꙗ҆́коже стыди́шисѧ человѣ́кѡвъ; Оу҆вы̀ мѝ ѻ҆каѧ́нномꙋ, ᲂу҆вы̀ мнѣ̀, ᲂу҆вы̀ мнѣ̀! Занѐ ни ꙗ҆́коже человѣ́ка стыждꙋ́сѧ творца̀ моегѡ̀ и҆ влады́ки. Пред̾ є҆ди́нѣмъ бо человѣ́комъ не могꙋ̀ согрѣша́ти, но всѧ́кꙋ хи́трость творю̀, да покажꙋ̀ себѧ̀ праводѣ́ющимъ. Но стоѧ̀ пред̾ бг҃омъ, лꙋка̑ваѧ помышлѧ́ю, и҆ глаго́лати многа́жды не стыждꙋ́сѧ. Ѽ безꙋ́мїѧ моегѡ̀! ѕло́е творѧ́й бг҃а ви́дѧщаго є҆̀, не бою́сѧ: и҆ не могꙋ̀ є҆ди́номꙋ человѣ́кꙋ глаго́лати ꙗ҆̀же ѡ҆ мнѣ̀ ко и҆справле́нїю. Оу҆вы̀ мнѣ̀! Оу҆вы̀ мнѣ̀! ꙗ҆́кѡ мꙋ́кꙋ вѣ́мъ, ка́ѧтисѧ же не хощꙋ̀. Небе́сное ца́рствїе люблю̀, а҆ добродѣ́тели не стѧжа́хъ: бг҃а бы́ти вѣ́рꙋю, а҆ за́пѡвѣди є҆гѡ̀ при́снѡ престꙋпа́ю: дїа́вола ненави́жꙋ, а҆ ᲂу҆гѡ́днаѧ є҆мꙋ̀ твори́ти не престаю̀. А҆́ще молю́сѧ, нерадѣ́ю, и҆ ꙗ҆́кѡ нечꙋ́вственный пребыва́ю. А҆́ще пощꙋ́сѧ, возношꙋ́сѧ, и҆ бо́лѣе ѡ҆сꙋжда́юсѧ. А҆́ще бдю̀, мню́сѧ нѣ́что твори́ти, да нижѐ сїѐ поле́зно бꙋ́детъ. А҆́ще чтꙋ̀, є҆ди́но ѿ двою̀ ѕѡ́лъ творѧ̀ нечꙋ́вственный пребыва́ю. И҆лѝ многоꙋче́нїѧ ра́ди и҆ тщесла́вїѧ сїѐ творю̀, и҆ бо́лѣе помрача́юсѧ, и҆лѝ вѣ́дый, и҆ не творѧ́й бо́лѣе, ѡ҆сꙋжда́юсѧ. А҆́ще же дѣ́йствомъ по благода́ти бж҃їей согрѣша́ти и҆ престаю̀, но сло́вомъ согрѣша́ти при́снѡ не престаю̀: а҆́ще же и҆ ѿ сегѡ̀ благода́ть покры́етъ мѧ̀, по́мыслы бг҃а всегда̀ прогнѣвлѧ́ю ѻ҆каѧ́нный. Оу҆вы̀! Оу҆вы̀! Что̀ сотворю̀; Ка́мѡ ни грѧдꙋ̀, грѣхѝ ѡ҆брѣта́ю. Повсю́дꙋ де́мѡни. Ѿча́ѧнїе го́рше всегѡ̀: а҆́зъ бг҃а прогнѣ́вахъ, а҆́гг҃лы та́кожде ѡ҆печа́лихъ, человѣ́ки мно́гажды повреди́хъ и҆ соблазни́хъ.

Хотѣ́хъ слеза́ми ѿмы́ти рꙋкописа́нїе согрѣше́нїй мои́хъ, гдⷭ҇и, и҆ про́чее живота̀ моегѡ̀ покаѧ́нїемъ бл҃гоꙋгоди́ти тебѣ̀, но вра́гъ мѧ̀ и҆скꙋша́етъ, и҆ бо́ретъ дꙋ́шꙋ мою̀: гдⷭ҇и, пре́жде да́же до конца̀ не поги́бнꙋ, спаси́ мѧ.

Согрѣши́хъ тебѣ̀, сп҃се, ꙗ҆́коже блꙋ́дный сы́нъ, прїимѝ ѻ҆́ч҃е ка́ющагосѧ, и҆ поми́лꙋй мѧ̀ бж҃е.

Вопїю́ ти, хрⷭ҇тѐ сп҃се, мытаре́вымъ гла́сомъ: ѡ҆чи́сти мѧ̀, ꙗ҆́коже ѻ҆́наго, и҆ поми́лꙋй мѧ̀ бж҃е.

Что̀ ᲂу҆̀бо бꙋ́детъ въ послѣ̑днїѧ, и҆лѝ что̀ бꙋ́дꙋщее; Оу҆вы̀ мѝ ѻ҆каѧ́нномꙋ, ᲂу҆вы̀ мнѣ̀! Кто̀ да́стъ главѣ̀ мое́й во́дꙋ; и҆лѝ ѻ҆чи́ма мои́ма и҆сто́чникъ сле́зъ; кто́ мѧ ѡ҆пла́кати возмо́жетъ досто́йнѡ; Поне́же а҆́зъ сегѡ̀ сотвори́ти не могꙋ̀. Прїиди́те го́ры, покры́йте мѧ̀ ѻ҆каѧ́ннаго. Го́ре, го́ре! что̀ и҆́мамъ рещѝ; ѽ коли̑каѧ бла̑га сотвори́ ми бг҃ъ, ꙗ҆̀же ѻ҆́нъ є҆ди́нъ вѣ́сть, и҆ коли̑каѧ ѕла̑ неразꙋ́мїе моѐ показа̀! Сло́вомъ, дѣ́ломъ и҆ мы́слїю всегда̀ прогнѣвлѧ́ю моего̀ бл҃годѣ́телѧ. И҆ коли́кѡ ѻ҆́нъ долготерпи́тъ, толи́кѡ ꙗ҆̀ нерадѣ́ю ѻ҆каѧ́нный, и҆ нечꙋ́вственнѣйшїй сы́й бездꙋ́шныхъ ка́меней. Ѻ҆ба́че не ѿчаѧва́юсѧ, но познаю̀ твоѐ человѣколю́бїе.

Покаѧ́нїѧ не стѧжа́хъ, но нижѐ па́ки сле́зъ: сегѡ̀ ра́ди молю́ тѧ, сп҃се, пре́жде конца̀ ѡ҆брати́ти, и҆ да́ти мѝ покаѧ́нїе, ꙗ҆́кѡ да и҆зба́влюсѧ ѿ мꙋ́ки.

Гдⷭ҇и бж҃е мо́й! не ѡ҆ста́ви менѐ: ничто́же бо є҆́смь пред̾ тобо́ю, но грѣ́шенъ ве́сь, и҆ гдѣ̀ ᲂу҆́бѡ ѡ҆брѧ́щꙋ чꙋ́вство мно́гихъ мои́хъ ѕѡ́лъ; са́мо бо сїѐ, є҆́же не твори́ти мѝ, ве́лїе є҆́сть ѡ҆сꙋжде́нїе. Менѐ ра́ди не́бо и҆ землѧ̀, менѐ ра́ди четы́ре стїхі̑и, и҆ и҆зъ ни́хъ быва̑ющаѧ, ꙗ҆́коже глаго́летъ бг҃осло́въ. Прѡ́чаѧ же ᲂу҆молчꙋ̀, ꙗ҆́кѡ нѣ́смь досто́инъ глаго́лати что̀, ѿ мно́жества ѕѡ́лъ мои́хъ. Безмѣ̑рнаѧ бо мнѣ̀ бы̑вшаѧ благодѣѧ̑нїѧ, кто̀ мо́жетъ ᲂу҆разꙋмѣ́ти, а҆́ще и҆ а҆́гг҃льскїй ᲂу҆́мъ и҆мѣ́ти сподо́битсѧ; Но за непокаѧ́нный мо́й нра́въ, ѿ всѣ́хъ и҆́мамъ и҆спа́сти ѻ҆каѧ́нный. И҆ та́кѡ сїѧ̑ размышлѧ́ѧ, прихо́дитъ по нѣ́коемъ вре́мени въ тре́тїй ра́зꙋмъ, и҆ при́снѡ пла́чѧ глаго́летъ.

Ѡ҆ тре́тїемъ видѣ́нїи.

Оу҆вы̀ мнѣ̀! ꙗ҆ко́въ по́двигъ и҆́мать дꙋша̀, разлꙋча́ющисѧ ѿ тѣлесѝ! Оу҆вы̀, тогда̀ коли́кѡ слези́тъ, и҆ никто́же ми́лꙋѧй ю҆̀! ко а҆́гг҃лѡмъ ѻ҆́чи возводѧ́щи, тще́тнѡ мо́литсѧ, къ человѣ́кѡмъ рꙋ́цѣ простира́ющи, не и҆́мать помога́ющагѡ.

Пла́чꙋ и҆ рыда́ю, є҆гда̀ помышлѧ́ю сме́рть, и҆ ви́ждꙋ во гробѣ́хъ лежа́щꙋю, по ѡ҆́бразꙋ бж҃їю созда́ннꙋю на́шꙋ красотꙋ̀, без̾ѡбра́знꙋ, безсла́внꙋ, не и҆мꙋ́щꙋю ви́да. Ѽ чꙋдесѐ! что̀ сїѐ є҆́же ѡ҆ на́съ бы́сть та́инство; ка́кѡ преда́хомсѧ тлѣ́нїю; ка́кѡ сопрѧго́хомсѧ сме́рти; Вои́стиннꙋ бг҃а повелѣ́нїемъ, ꙗ҆́коже пи́сано є҆́сть. Оу҆вы̀! Оу҆вы̀! что̀ ᲂу҆̀бо и҆́мамъ твори́ти всеѻкаѧ́нный во вре́мѧ сме́рти, є҆гда̀ де́мѡни ѡ҆крꙋжа́тъ ѻ҆каѧ́ннꙋю мою̀ дꙋ́шꙋ, держа́ще напи́саннѣ содѣ̑ѧннаѧ мно́ю ѕла̑ѧ, въ вѣ́дѣнїи и҆ не въ вѣ́дѣнїи, сло́вомъ, дѣ́ломъ и҆ помышле́нїемъ, и҆стѧзꙋ́юще ѿ менѐ ѿвѣ́та во всѣ́хъ си́хъ; Но ᲂу҆вы̀ мнѣ̀! ꙗ҆́кѡ и҆ кромѣ̀ грѣха̀, вельмѝ ѡ҆сꙋжде́нъ є҆́смь за за́пѡвѣди, и҆́хже не сохрани́хъ, и҆ досто́йнѣ.

Ѽ ѻ҆каѧ́ннаѧ дꙋшѐ моѧ̀! рцы́ ми ны́нѣ, гдѣ̀ сꙋ́ть ѡ҆бѣ́ты креще́нїѧ; гдѣ̀ сочета́нїе со хрⷭ҇то́мъ, и҆ ѿрица́нїе сатаны̀; гдѣ̀ хране́нїе за́повѣдей бж҃їихъ; гдѣ̀ подража́нїе хрⷭ҇тꙋ̀ тѣле́сными и҆ дꙋше́вными добродѣ́тели, и҆́хже ра́ди хрїстїа́ниномъ нареко́хсѧ, и҆ ѡ҆бѣща́нїе и҆́ноческагѡ ѡ҆́браза; А҆́ще же не́мощїю тѣле́сною ѡ҆правда́ешисѧ: гдѣ̀ вѣ́ра, всѧ́кое попече́нїе на бг҃а возлага́ющаѧ, є҆́юже и҆ го́ры преставлѧ́ти возмогла́ бы є҆сѝ, а҆́ще ꙗ҆́кѡ зерно̀ горꙋ́шно стѧжа́ла бы ю҆̀; гдѣ̀ соверше́нное покаѧ́нїе, ᲂу҆далѧ́ющеесѧ ѿ всѧ́кагѡ дѣ́ла и҆ сло́ва лꙋка́ва; Гдѣ̀ сокрꙋше́нїе дꙋшѝ, и҆ соверше́ннѣйшїй пла́чь, кро́тость, ми́лость, чистота̀ се́рдца ѿ лꙋка́выхъ помыслѡ́въ; Соверше́нное воздержа́нїе, ᲂу҆де́рживающее всѧ́къ ᲂу҆́дъ тѣлесѝ, и҆ всѧ́ко разꙋмѣ́нїе, и҆ хотѣ́нїе недви́жимо, кромѣ̀ нꙋ́жнагѡ ᲂу҆потребле́нїѧ ко спасе́нїю дꙋшѝ и҆лѝ тѣле́снѣй жи́зни; гдѣ̀ терпѣ́нїе сносѧ́щее многоразли̑чныѧ скѡ́рби, ца́рствїѧ ра́ди небе́снагѡ, є҆́же ѡ҆ все́мъ благодаре́нїе; непреста́ннаѧ моли́тва; попече́нїе ѡ҆ сме́рти; сле́зы сѣ́тованїѧ, а҆́ще въ любо́вныѧ не дости́гла є҆сѝ; мꙋ́дрость по бз҃ѣ, хранѧ́щаѧ дꙋ́шꙋ ѿ сѣ́тей вра́жїихъ и҆ сꙋпоста́тъ; цѣломꙋ́дрїе, ᲂу҆далѧ́ющеесѧ ѿ всегѡ̀, не по бз҃ѣ быва́емагѡ, и҆лѝ во́лею помышлѧ́емагѡ; мꙋ́жество претерпѣва́ющее ѕла̑ѧ, и҆ дерза́ющее проти́вꙋ врагѡ́въ ᲂу҆пова́нїемъ; пра́вда, воздаю́щаѧ коемꙋ́ждо ра́вное; смиренномꙋ́дрїе, вѣ́дающее свою̀ не́мощь, и҆ неразꙋ́мїе, и҆ бж҃їе человѣколю́бїе, и҆́мже и҆зба́витисѧ возмогла́ бы є҆сѝ ѿ всѣ́хъ ко́зней вра́жїихъ; гдѣ̀, безстра́стїе и҆ соверше́нна любы̀; ми́ръ, превосходѧ́щъ всѧ́къ ᲂу҆́мъ, є҆гѡ́же ра́ди сы́номъ бж҃їимъ наре́ксѧ бы́хъ; Сїѧ̑ во всѧ̑ и҆ без̾ тѣле́сныѧ крѣ́пости, хотѧ́щїй и҆мѣ́ти мо́жетъ ѿ є҆ди́нагѡ произволе́нїѧ. Что̀ ᲂу҆́бѡ и҆́мамъ рещѝ на сїѐ; что̀ и҆́мамъ сотвори́ти ѻ҆каѧ́нный; Занѐ вма́лѣ страшꙋ́сѧ за неизвѣще́нїе: занѐ соверше́ннѣ вознерадѣ́хъ ѡ҆ до́лжныхъ ѿ менѐ по возмо́жности сотвори́тисѧ, во а҆́дѣ и҆́мамъ бы́ти, ꙗ҆́коже глаго́летъ вели́кїй а҆ѳана́сїй. Ѽле ѻ҆каѧ́нства моегѡ̀! что̀ себѣ̀ самомꙋ̀ нанесо́хъ, не то́чїю тѣ́ми, ꙗ҆̀же согрѣши́хъ, но па́че тѣ́ми, ѡ҆ ни́хже пока́ѧтисѧ не восхотѣ́хъ. А҆́ще бы бо раска́ѧлсѧ бы́хъ, ꙗ҆́коже блꙋ́дный, прїѧ́лъ бы моѐ ѡ҆браще́нїе чадолюби́вый ѻ҆ц҃ъ: и҆ а҆́ще бы благоразꙋ́менъ содѣ́лалсѧ бы́хъ, ꙗ҆́коже мыта́рь, себѐ є҆ди́наго, а҆ не и҆на́го кого̀ ѡ҆сꙋжда́ѧ: и҆ а҆́зъ бы ѡ҆ставле́нїе грѣхѡ́въ ѿ бг҃а прїѧ́лъ бы́хъ. Па́че же, а҆́ще бы ѿ всеѧ̀ дꙋшѝ, ꙗ҆́коже ѻ҆́ный помоли́лсѧ бы́хъ. Ны́нѣ же, занѐ не ᲂу҆̀ такова̀ созерца́ю себѐ: сегѡ̀ ра́ди страшꙋ́сѧ во а҆́дѣ съ де́мѡнами пребыва́нїѧ, и҆ бꙋ́дꙋщагѡ сꙋда̀. Ꙗ҆́кѡ та́мѡ є҆́сть рѣка̀ ѻ҆́гненнаѧ, престо́ли же, и҆ кни́ги разве́рсты: а҆́гг҃ли предше́ствꙋютъ, всѧ́ко є҆стество̀ человѣ́че предстои́тъ, всѧ̑ на̑га и҆ ꙗ҆влє́нна пред̾ стра́шнымъ и҆ пра́веднымъ сꙋдїе́ю.

Оу҆вы̀ мнѣ̀! ка́кѡ стерпѣ́ти и҆́мамъ ѡ҆бличе́нїе и҆ негодова́нїе стра́шнагѡ и҆ неꙋмы́тнагѡ сꙋдїѝ, стече́нїе безчи́сленныхъ а҆́гг҃лъ, и҆ и҆стѧза́нїе съ стра́шнымъ преще́нїемъ, и҆зрече́нїе не и҆мꙋ́щее премѣ́ны, непреста́нный пла́чь, безполє́зныѧ сле́зы, неѡсвѧща́емꙋю тьмꙋ̀, и҆ неꙋсы́пный че́рвь, неꙋгаси́мый ѻ҆́гнь, и҆ многоразли̑чныѧ мꙋ̑ки, ѿпаде́нїе ѿ ца́рствїѧ, и҆ разлꙋче́нїе со ст҃ы́ми, ᲂу҆дале́нїе ѿ а҆́гг҃лъ, и҆ ѿчꙋжде́нїе бг҃а, малодꙋ́шїе, и҆ вѣ́чнꙋю сме́рть: стра́хъ, болѣ́знь, печа́ль и҆ стꙋ́дъ, и҆ мꙋче́нїе со́вѣсти; Оу҆вы̀ мнѣ̀ грѣ́шномꙋ! что̀ пострада́хъ; чесѡ̀ ра́ди ѕлѣ̀ погиба́ю; И҆́мамъ є҆щѐ вре́мѧ покаѧ́нїѧ. Влⷣко призыва́етъ мѧ̀, и҆ а҆́зъ ли ѿмета́юсѧ; Доко́лѣ дꙋша̀ моѧ̀ пребыва́еши въ согрѣше́нїѧхъ; доко́лѣ прїе́млеши ѿложе́нїе покаѧ́нїѧ; прїимѝ во ᲂу҆́мъ бꙋ́дꙋщїй сꙋ́дъ. Возопі́й ко хрⷭ҇тꙋ̀ бг҃ꙋ: Сердцевѣ́дче! согрѣши́хъ, пре́жде да́же не ѡ҆сꙋ́диши менѐ, поми́лꙋй мѧ̀. На стра́шнѣмъ, хрⷭ҇тѐ, твое́мъ прише́ствїи, да не ᲂу҆слы́шимъ: не вѣ́мъ ва́съ. Оу҆пова́нїе бо на тѧ̀, сп҃се, возложи́хомъ: а҆́ще за́пѡвѣди твоѧ̑ и҆ не твори́мъ нерадѣ́нїемъ на́шимъ. Но мо́лимъ поми́ловати дꙋ́шы на́шѧ. Оу҆вы̀ мѝ, гдⷭ҇и! ꙗ҆́кѡ ѡ҆печа́лихъ тѧ̀, и҆ не возчꙋ́вствовахъ. Но сѐ благода́ть твоѧ̀ сотвори́ мѧ ѡ҆щꙋти́ти ма́лѡ, тѣ́мже и҆ недоꙋмѣва́ю ѻ҆каѧ́нный. Вострепета́ бо ѻ҆каѧ́ннаѧ дꙋша̀ моѧ̀. Но ᲂу҆́бѡ и҆́мамъ ли пожи́ти ма́лѡ, во є҆́же пла́кати го́рькѡ, и҆ ѡ҆мы́ти ѡ҆скверне́ннꙋю пло́ть мою̀ и҆ дꙋ́шꙋ; И҆лѝ па́ки є҆ди́нъ ча́съ пла́кавъ, а҆́бїе преста́нꙋ не чꙋ́вствꙋѧ ꙗ҆́коже и҆ при́снѡ, что̀ ᲂу҆́бѡ сотвори́въ ѡ҆брѧ́щꙋ непреста́ннꙋ болѣ́знь дꙋшѝ; Пости́тисѧ ли и҆́мамъ и҆ бдѣ́ти; Но без̾ смире́нїѧ ничто́же по́льзꙋюсѧ. Пою́ ли є҆ди́нѣми ᲂу҆сты̀, и҆лѝ чтꙋ̀; Но стра̑сти помрачи́ша мѝ ᲂу҆́мъ, и҆ не могꙋ̀ пости́гнꙋти си́лы глаго́лемыхъ. Припа́даю ли прилѣ́жнѡ къ тебѣ̀, пода́телю бла̑гъ; Но не и҆́мамъ дерзнове́нїѧ. Ѿча́ѧнна мѝ є҆́сть жи́знь, погꙋби́хъ дꙋ́шꙋ мою̀. Гдⷭ҇и! помозѝ мѝ: и҆ ꙗ҆́кѡ мытарѧ̀ прїими́ мѧ. Ꙗ҆́коже бо блꙋ́дный согрѣши́хъ на не́бо и҆ пред̾ тобо́ю, и҆ ꙗ҆́коже блꙋдни́ца пла́чꙋщаѧ, ѡ҆ не́йже рече́сѧ: ѿча́ѧннаѧ житїѧ̀ ра́ди, и҆ ᲂу҆вѣ́дѣннаѧ нра́ва ра́ди, мѵ́ра носѧ́щаѧ пристꙋпѝ къ тебѣ̀, вопїю́щи: не ѿве́ржи менѐ блꙋ́днꙋю, рожде́йсѧ ѿ дв҃ы: не пре́зри сле́зъ мои́хъ, ра́досте а҆́гг҃лѡвъ, но прїими́ мѧ ка́ющꙋюсѧ, ю҆́же не ѿри́нꙋлъ є҆сѝ, гдⷭ҇и, вели́кїѧ ра́ди твоеѧ̀ ми́лости. Занѐ и҆ а҆́зъ ѻ҆каѧ́нный ѿча́ѧнъ є҆́смь мно́гихъ ра́ди грѣхѡ́въ мои́хъ, позна́нъ же бы́въ неизрече́ннагѡ ра́ди человѣколю́бїѧ твоегѡ̀, и҆ неизмѣ́римыѧ пꙋчи́ны щедро́тъ твои́хъ, въ ню́же пове́рглъ є҆сѝ ѿча́ѧнїе дꙋшѝ моеѧ̀, дерза́ю собира́ти ᲂу҆́мъ мо́й во ст҃ꙋ́ю па́мѧть твою̀, и҆ востаѧ̀ понѐ є҆ди́но моле́нїе со стра́хомъ и҆ тре́петомъ мно́гимъ сотворю̀, да сподо́блюсѧ и҆ а҆́зъ недосто́йный ра́бъ тво́й бы́ти, и҆ и҆мѣ́ти по благода́ти ᲂу҆́мъ безви́денъ, невоѡбрази́теленъ, и҆ неѡбразови́денъ, и҆ невеще́ственъ, тебѣ̀ є҆ди́номꙋ бг҃ꙋ, и҆ творцꙋ̀ всѧ́ческихъ припа́дати, ꙗ҆́коже нѣ́когда данїи́лъ пред̾ а҆́гг҃ломъ твои́мъ на колѣ́нꙋ и҆ дла́нѣхъ рꙋ́къ[[Данїи́л. гл. і҃, ст. і҃.]]: и҆ пе́рвѣе благодаре́нїе, пото́мъ и҆сповѣ́данїе приноси́ти пред̾ тобо́ю, и҆ та́кѡ всест҃ꙋ́ю твою̀ во́лю проси́ти начина́ю ѻ҆каѧ́нный а҆́зъ, благодаре́нїе тебѣ̀ воздаѧ̀ ѡ҆ всѣ́хъ благи́хъ, и҆́хже сподоби́лъ мѧ̀ є҆сѝ, пе́рсть, пра́хъ, пе́пелъ. И҆ ꙗ҆́кѡ ᲂу҆мо́мъ є҆ди́нѣмъ сподо́бихсѧ предста́ти тебѣ̀ земны́й ве́сь, и҆ ꙗ҆́коже мнѧ́сѧ ви́димь бы́ти тобо́ю, ѿ всеѧ̀ дꙋшѝ вопїю̀ и҆ глаго́лю: влⷣко многоми́лостиве! благодарю̀ тѧ̀, сла́влю тѧ̀, пою́ тѧ, и҆ поклонѧ́юсѧ тебѣ̀, ꙗ҆́кѡ сподо́билъ мѧ̀ є҆сѝ недосто́йнаго въ ча́съ се́й благодари́ти тебѣ̀, всѧ́чески слꙋ́хъ и҆мѣ́ти ѡ҆ нѣ́кїихъ чꙋдесѣ́хъ и҆ благодѣѧ́нїѧхъ твои́хъ, ꙗ҆̀же сотвори́лъ є҆сѝ и҆ твори́ши на́съ ра́ди по благода́ти, дꙋшє́внаѧ же и҆ тѣлє́снаѧ, безконє́чнаѧ же и҆ неизслѣ̑димаѧ, ꙗ҆́внѣ и҆ неизвѣ́стнѣ, ꙗ҆̀же вѣ́мы, и҆ ꙗ҆̀же невѣ́мы. И҆сповѣ́даю благода́ть, не скрыва́ю благодѣѧ́нїй, проповѣ́даю ми́лѡсти. И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ, и҆ просла́влю и҆́мѧ твоѐ во вѣ́ки, ꙗ҆́кѡ ми́лость твоѧ̀ ве́лїѧ на мнѣ̀, и҆ неизрече́ннѡ снисхожде́нїе и҆ долготерпѣ́нїе ѡ҆ мно́жествѣ беззако́нїй и҆ согрѣше́нїй мои́хъ, нече́стїй и҆ лꙋка́вствїй, ꙗ҆̀же сотвори́хъ, и҆ творю̀ при́снѡ, и҆ ꙗ҆̀же и҆мѣ́лъ бы́хъ сотвори́ти. Ѿ ни́хже мѧ̀ и҆зба́вила є҆́сть благода́ть твоѧ̀, ѡ҆ сꙋ́щихъ въ вѣ́дѣнїи и҆ не въ вѣ́дѣнїи, сло́вомъ, и҆ дѣ́ломъ и҆ помышле́нїемъ, ꙗ҆́же вѣ́си сердцевѣ́дче гдⷭ҇и, ѿ рожде́нїѧ моегѡ̀, до конца̀ жи́зни моеѧ̀, ѡ҆ ни́хже дерза́ю всеѻкаѧ́нный и҆сповѣ́данїе сотвори́ти пред̾ тобо́ю. Согрѣши́хъ, беззако́нновахъ, нече́ствовахъ, и҆ лꙋка́вое пред̾ тобо́ю сотвори́хъ, и҆ нѣ́смь досто́инъ воззрѣ́ти, и҆ ви́дѣти высотꙋ̀ небе́снꙋю: но дерза́ѧ на неизрече́нное твоѐ человѣколю́бїе: и҆ па́че ᲂу҆ма̀ бла́гость и҆ милосе́рдїе твоѐ, припа́даѧ молю́сѧ тѝ: поми́лꙋй мѧ̀, гдⷭ҇и, ꙗ҆́кѡ не́мощенъ є҆́смь, и҆ прости́ ми мно́жество ѕѡ́лъ мои́хъ, и҆ не попꙋстѝ менѐ ктомꙋ̀ согрѣша́ти, и҆лѝ заблꙋжда́ти ѿ пра́вагѡ пꙋтѝ твоегѡ̀, нижѐ ѡ҆скорби́ти, и҆лѝ ѡ҆печа́лити кого̀: но ѡ҆бꙋзда́й всѧ́кꙋ мою̀ ѕло́бꙋ, и҆ лꙋка́вый ѻ҆бы́чай, и҆ безслове́сное стремле́нїе дꙋшѝ и҆ тѣ́ла, и҆ ꙗ҆́рости, и҆ похотѣ́нїѧ, и҆ наꙋчи́ мѧ твори́ти во́лю твою̀. Поми́лꙋй бра́тїю и҆ ѻ҆тцы̀ моѧ̑, и҆ всѧ̑ повсю́дꙋ и҆́ноки же и҆ і҆ере́и, роди́тели моѧ̑: бра́тїю же и҆ сро́дники: слꙋжа́щыѧ на́мъ, и҆ слꙋжи́вшыѧ, молѧ́щыѧсѧ, и҆ заповѣ́давшыѧ на́мъ моли́тисѧ ѡ҆ ни́хъ: ненави́дѧщыѧ и҆ лю́бѧщыѧ на́съ, и҆̀хже ѡ҆скорби́хъ, и҆лѝ ѡ҆печа́лихъ, сїѧ̑ мѝ нѣ́когда сотвори́вшыѧ: и҆лѝ сотвори́ти и҆мꙋ́щыѧ, и҆ всѣ́хъ вѣ́рꙋющихъ въ тѧ̀. И҆ простѝ на́мъ всѧ́ко согрѣше́нїе, во́льное же и҆ нево́льное, и҆ соблюдѝ на́шꙋ жи́знь и҆ и҆схо́дъ и҆з̾ мі́ра сегѡ̀ ѿ нечи́стыхъ дꙋхѡ́въ, и҆ ѿ всѧ́кагѡ и҆скꙋше́нїѧ, и҆ всѧ́кагѡ грѣха̀ и҆ лꙋка́вства, мнѣ́нїѧ же и҆ ѿча́ѧнїѧ, невѣ́рїѧ же и҆ безꙋ́мїѧ, возноше́нїѧ и҆ боѧ́зни, пре́лести и҆ мꙋчи́тельства, краде́нїѧ же и҆ сѣ́ти дїа́вольстѣй. И҆ да́рꙋй полє́знаѧ дꙋша́мъ на́шымъ въ ны́нѣшнемъ вѣ́цѣ и҆ бꙋ́дꙋщемъ, ꙗ҆́коже благоволи́тъ человѣколю́бїе твоѐ. И҆ ᲂу҆поко́й пре́жде ѿше́дшыѧ ѻ҆тцы̀ и҆ бра́тїю на́шꙋ, и҆ моли́твами всѣ́хъ ᲂу҆ще́дри ѻ҆каѧ́нство моѐ, ᲂу҆милосе́рдисѧ ѡ҆ мое́й поги́бели. Ви́ждь во все́мъ соболѣ́знованїе моѐ: и҆спра́ви житїѐ моѐ, ᲂу҆пра́ви жи́знь мою̀ и҆ коне́цъ въ мі́рѣ: и҆ сотвори́ мѧ, ꙗ҆кова̀ хо́щеши, и҆ ꙗ҆́коже хо́щеши, а҆́ще хощꙋ̀: а҆́ще не хощꙋ̀, то́чїю да не ѿлꙋче́нъ бꙋ́дꙋ стоѧ́нїѧ ѡ҆деснꙋ́ю тебѐ въ де́нь сꙋ́дный, гдⷭ҇и і҆и҃се хрⷭ҇тѐ бж҃е мо́й, а҆́ще и҆ послѣ́днїй є҆́смь и҆з̾ всѣ́хъ спаса́ющихсѧ ра̑бъ твои́хъ. И҆ ᲂу҆мирѝ мі́ръ тво́й, и҆ поми́лꙋй всѣ́хъ, ꙗ҆́коже вѣ́си. И҆ сподо́би мѧ̀ причаще́нїѧ пречи́стагѡ твоегѡ̀ тѣ́ла и҆ честны́ѧ кро́ве твоеѧ̀, во ѡ҆ставле́нїе грѣхѡ́въ, въ прїѻбще́нїе ст҃а́гѡ дх҃а, во ѡ҆брꙋче́нїе, ꙗ҆̀же въ тебѣ̀ жи́зни вѣ́чныѧ со и҆збра́нными твои́ми, моли́твами всепречи́стыѧ твоеѧ̀ мт҃ре, ст҃ы́хъ твои́хъ и҆ небе́сныхъ си̑лъ, и҆ всѣ́хъ ст҃ы́хъ твои́хъ, ꙗ҆́кѡ благослове́нъ є҆сѝ во вѣ́ки вѣкѡ́въ, а҆ми́нь.

Прест҃а́ѧ влⷣчце бцⷣе, всѧ̑ небє́снаѧ си̑лы ст҃ы́хъ а҆́гг҃лъ и҆ а҆рха̑гг҃лъ, и҆ всѝ ст҃і́и моли́те ѡ҆ мнѣ̀ грѣ́шнѣмъ.

Влⷣко бж҃е ѻ҆́ч҃е вседержи́телю, гдⷭ҇и сн҃е є҆диноро́дный, і҆и҃се хрⷭ҇тѐ, и҆ ст҃ы́й дш҃е, и҆ прѡ́ч.

И҆ а҆́бїе къ свои̑мъ по́мысламъ глаго́летъ: Прїиди́те поклони́мсѧ, и҆ припаде́мъ цр҃е́ви на́шемꙋ бг҃ꙋ, три́жды. И҆ начина́етъ ѱалмы̀ творѧ́й, на кі́йждо а҆нтїфѡ́нъ, трист҃о́е, ᲂу҆́мъ же въ глаго́лемыхъ заключа́ѧ: по концѣ́ же, гдⷭ҇и поми́лꙋй, м҃. При ка́ждомъ а҆нтїфѡ́нѣ творѧ́й моли́твꙋ, глаго́летъ въ себѣ̀ покланѧ́ѧсѧ: согрѣши́хъ, гдⷭ҇и, прости́ мѧ, є҆ди́ною: воста́въ же и҆ воздѣва́ѧ рꙋ́цѣ, бж҃е ѡ҆чи́сти мѧ̀ грѣ́шнаго, є҆ди́ною. И҆ є҆гда̀ помо́литсѧ, до́лженъ є҆́сть глаго́лати вторꙋ́ю моли́твꙋ: Прїиди́те поклони́мсѧ, три́жды: и҆ дрꙋгі́й а҆нтїфѡ́нъ та́кожде. Ѻ҆ба́че, є҆ли́жды благода́ть ᲂу҆милѧ́етъ є҆гѡ̀ се́рдце, подоба́етъ є҆мꙋ̀ па́че въ разꙋмѣ́нїѧхъ ᲂу҆миле́нїѧ и҆мѣ́ти ᲂу҆́мъ сво́й: а҆́ще пра̑здна бꙋ́дꙋтъ ᲂу҆ста̀ ѿ пѣ́нїѧ, и҆ плѣне́на бꙋ́детъ мы́сль плѣне́нїемъ благи́мъ, ꙗ҆́коже глаго́летъ ст҃ы́й і҆саа́къ: тогда́ бо настои́тъ вре́мѧ ѡ҆бира́ти, а҆ не вре́мѧ сади́ти. И҆ сегѡ̀ ра́ди подоба́етъ пребыва́ти въ таковы́хъ разꙋмѣ́нїѧхъ, да мно́жае ᲂу҆мили́тсѧ се́рдце, и҆ да́стъ пло́дъ, си́рѣчь по бз҃ѣ сле́зы. Оу҆милѧ́емь, речѐ лѣ́ствичникъ, во є҆ди́номъ глаго́лѣ, пребыва́й въ не́мъ. Поне́же всѧ́кое дѣ́йствїе тѣле́сное, по́стъ, глаго́лю, и҆ бдѣ́нїе, пѣ́нїе же и҆ чте́нїе, безмо́лвїе же и҆ про́чыѧ, ѡ҆чище́нїѧ ра́ди ᲂу҆ма̀ быва́ютъ. Оу҆́мъ же кромѣ̀ пла́ча ѡ҆чи́ститисѧ не мо́жетъ, да соединѧ́етсѧ съ бг҃омъ чи́стою моли́твою, восхища́ющею є҆го̀ ѿ всѣ́хъ помышле́нїй, и҆ творѧ́щею и҆ безви́дна и҆ невоѡбрази́тельна. Поне́же всѧ̑ ᲂу҆́бѡ и҆з̾ си́хъ дѡбра̀ сꙋ́ща до́брѣ быва́ютъ, ꙗ҆́коже и҆ сопроти́вное. И҆́бо всѧ́каѧ ве́щь тре́бꙋетъ разсꙋжде́нїѧ, да до́брѣ содѣ́лаетсѧ: и҆ кромѣ̀ ѻ҆́нагѡ разсꙋжде́нїѧ, не позна́емъ мы̀ є҆стества̀ веще́й. И҆ мо́жетъ бы́ть, мно́зи соблазнѧ́емсѧ, є҆гда̀ разгласꙋ́юща ви́димъ глаго́лємаѧ и҆ дѣ́ємаѧ ст҃ы́ми ѻ҆тцы̀. Си́рѣчь, це́рковь ᲂу҆́бѡ воспрїѧ̀ пѣ́ти тропарѝ со пѣ́сньми мно́гими и҆ пѣ́нїѧми. Лѣ́ствичникъ же, восхвалѧ́ѧ по бз҃ѣ пла́чꙋщыѧ, глаго́летъ: ꙗ҆́кѡ такові́и не воскли́кнꙋтъ къ себѣ̀ самѣ́мъ въ пѣ́снехъ. И҆ ст҃ы́й і҆саа́къ ѡ҆ чи́стѣ молѧ́щихсѧ глаго́летъ, ꙗ҆́кѡ мно́жицею ѡ҆брѣта́етсѧ кто́либо собира́ѧй ᲂу҆́мъ сво́й въ моли́твѣ, и҆ а҆́бїе припа́даетъ без̾ понꙋжде́нїѧ на зе́млю на колѣ́нѣ, ꙗ҆́коже и҆ногда̀ проро́къ данїи́лъ, и҆ и҆́мать рꙋ́цѣ просте́ртѣ, и҆ ѻ҆́чи є҆гѡ̀ взира́ютъ на кре́стъ хрⷭ҇то́въ: по́мыслы же є҆гѡ̀ и҆змѣнѧ́ютсѧ, и҆ ᲂу҆́ди є҆гѡ̀ разрѣша́ютсѧ ѿ но́выхъ помышле́нїй, самодѣ́йственнѣ во ᲂу҆́мъ приходѧ́щихъ. И҆ па́ки подо́бнѣ мно́зи ѿ ст҃ы́хъ ѻ҆тє́цъ ѡ҆ нѣ́кїихъ таковы́хъ пи́шꙋтъ, ꙗ҆́кѡ нѣ́цыи не то́чїю пѣ̑сни и҆ ѱалмопѣ̑нїѧ превзыдо́ша ᲂу҆́жасомъ ᲂу҆ма̀, но и҆ са́мый то́й ᲂу҆́мъ забы́ша, ꙗ҆́коже глаго́летъ ст҃ы́й ні́лъ. Це́рковь ᲂу҆̀бо до́брѣ и҆ бг҃оꙋго́днѣ пѣ̑сни и҆ про́чыѧ тропарѝ прїѧ́тъ, не́мощи ра́ди ᲂу҆ма̀ на́шегѡ, да сла́достїю пѣснопѣ́нїѧ пое́мъ бг҃а неразꙋ́мнїи, ꙗ҆́кѡ не хотѧ́ще. И҆мꙋ́щїи же ра́зꙋмъ въ разсмотрѣ́нїи рече́нныхъ слове́съ, прихо́дѧтъ во ᲂу҆миле́нїе: и҆ ꙗ҆́кѡ по лѣ́ствицѣ восхо́димъ въ мы̑сли бла́ги, ꙗ҆́коже глаго́летъ дамаски́нъ. И҆ є҆ли́кѡ преꙋспѣва́емъ въ навыкнове́нїи сꙋ́щихъ по бз҃ѣ мы́слей, толи́кѡ и҆ бж҃е́ственное жела́нїе влече́тъ на́съ дости́гнꙋти, разꙋмѣва́ти и҆ кла́нѧтисѧ ѻ҆ц҃ꙋ̀ дꙋ́хомъ и҆ и҆́стиною[[І҆ѡа́н. гл. д҃, ст. к҃д.]], ꙗ҆́коже глаго́летъ гдⷭ҇ь. И҆ по а҆по́столꙋ: Пѧ́ть слове́съ хощꙋ̀ глаго́лати ᲂу҆мо́мъ, не́жели тьмы̑ ѧ҆зы́комъ[[а҃ Кор. гл. д҃і, ст. ѳ҃і.]]. И҆ па́ки: хощꙋ̀, да моли̑твы мꙋ́жїе творѧ́тъ на всѧ́комъ мѣ́стѣ, воздѣ́юще преподѡ́бныѧ рꙋ́ки без̾ гнѣ́ва и҆ размышле́нїѧ[[а҃ Тїм. гл. в҃, ст. и҃.]]. Поне́же ѻ҆́ва сꙋ́ть врачєства̀ не́мощи, ѻ҆́ва же совершє́нства ᲂу҆ма̀. И҆ сїѐ є҆́сть рѣше́нїе таковы́хъ взыска́нїй. Зане́же всѧ̑ дѡбра̀ сꙋ́ть, во вре́мѧ своѐ: не во вре́мѧ же всѧ̑ несогла̑сна ви́дѧтсѧ невѣ́дѧщымъ вре́мене коегѡ́ждо, ꙗ҆́коже глаго́летъ соломѡ́нъ: вре́мѧ всѧ́кой ве́щи[[Є҆кклес. гл. г҃, ст. а҃.]]. Ѻ҆ба́че, є҆гда̀ дости́гнетъ кто̀ въ мы̑сли бла̑ги, ѻ҆па́снѡ подоба́етъ внима́ти, да бꙋ́дꙋтъ въ не́мъ такѡва́ѧ видѣ̑нїѧ, да не ка́кѡ нерадѣ́нїемъ, и҆лѝ возноше́нїемъ лиши́тсѧ бл҃года́ти, ꙗ҆́коже глаго́летъ ст҃ы́й і҆саа́къ. Занѐ а҆́ще ᲂу҆множа́ютсѧ въ дꙋшѣ̀ человѣ́честѣй ꙗ҆̀же по бз҃ѣ мы̑сли, и҆ приво́дѧтъ є҆го̀ ко ᲂу҆миле́нїю и҆ вѧ́щшемꙋ смире́нїю, подоба́етъ благодари́ти при́снѡ, и҆ и҆сповѣ́дывати благода́ть бж҃їю, ꙗ҆́кѡ сподо́бисѧ вѣ́дѣти такѡва́ѧ, недосто́йнымъ себѧ̀ самаго̀ почита́ѧ: а҆́ще же преста́нꙋтъ, и҆ помрача́етсѧ па́ки мы́сль, и҆ погꙋблѧ́етъ стра́хъ и҆ пла́чь, мно́гѡ подоба́етъ сѣ́товати, и҆ смирѧ́ти себѐ сло́вомъ и҆ дѣ́ломъ, ꙗ҆́кѡ ᲂу҆жѐ ѡ҆ста́ви є҆го̀ благода́ть, да позна́етъ не́мощь свою̀, и҆ смире́нїе стѧ́жетъ, и҆ да прилѣжи́тъ ѡ҆ и҆справле́нїи, ꙗ҆́коже глаго́летъ вели́кїй васі́лїй. Занѐ а҆́ще не вознерадѣ́лъ бы кто̀ ѡ҆ сꙋ́щемъ по бз҃ѣ пла́чѣ, не бы сле́зъ лиши́лсѧ, є҆гда́ бы восхотѣ́лъ. Сегѡ̀ ра́ди подоба́етъ на́мъ при́снѡ вѣ́дѣти не́мощь свою̀, и҆ благода́ть бж҃їю, и҆ нижѐ ѿчаѧва́тисѧ, а҆́ще что́либо слꙋчи́тсѧ на́мъ: нижѐ па́ки ѿню́дъ дерза́ти, ꙗ҆́кѡ є҆смы̀ что̀, но па́че ᲂу҆пова́ти при́снѡ на бг҃а со смире́нїемъ. И҆ сїѧ̑ ᲂу҆́бѡ сле́зы прили́чествꙋютъ мно́гѡ и҆́щꙋщемꙋ сло́вомъ и҆ дѣ́ломъ, зане́же таковы́ѧ благода́ти сподо́бисѧ, и҆ не сохранѝ пред̾ꙋвѣ́дѣнїѧ бж҃їѧ, предвари́вшимъ настоѧ́щимъ, и҆лѝ бꙋ́дꙋщимъ нерадѣ́нїемъ, и҆лѝ возноше́нїемъ, ꙗ҆́коже рече́сѧ. Во́лею же ѡ҆ста́вльшемꙋ таковы̑ѧ дарова̑нїѧ, си́рѣчь, пла́чь, сле́зы и҆ свѣтосїѧ́тєльныѧ мы̑сли, что̀ и҆но́е прили́чествꙋетъ, ра́звѣ ᲂу҆вы̀; Поне́же не и҆́мать ве́сь мі́ръ такова́гѡ безꙋ́мнѣйша, ꙗ҆́кѡ сподо́бльсѧ внѣ̀ є҆сте́ственнагѡ, и҆́мже и҆мѣ́ѧше по благода́ти дости́гнꙋти вышеесте́ственнагѡ, глаго́лю же въ ра́зꙋмѣ и҆ любвѝ сле́зъ, и҆ чре́зъ ничто́жныѧ нѣ́кїѧ вє́щи, и҆лѝ стра́нныѧ по́мыслы, и҆ свои́ми хотѣ́нїѧми въ ско́тское неразꙋ́мїе ѡ҆браща́етсѧ, ꙗ҆́коже пе́съ на свою̀ блево́тинꙋ. Ѻ҆ба́че а҆́ще восхо́щетъ па́ки по бз҃ѣ ᲂу҆праздни́тисѧ въ чте́нїи бж҃е́ственныхъ писа́нїй, со внима́нїемъ и҆ попече́нїемъ ѡ҆ сме́рти, и҆ въ моли́твѣ ᲂу҆́мъ, є҆ли́кѡ возмо́жетъ, соблюде́тъ ѿ сꙋ́етныхъ по́мыслѡвъ, ѡ҆брѣстѝ и҆́мать ꙗ҆̀же погꙋбѝ. И҆ па́че, а҆́ще никогда̀ ни на кого́же ѡ҆печа́ливаетсѧ, а҆́ще и҆ велича̑йшаѧ ѕла̑ѧ ѿ негѡ̀ те́рпитъ мно́жицею, и҆ никого́же ѡ҆ставлѧ́етъ, да ѡ҆печа́литсѧ на́нь, но все́ю си́лою врачꙋ́етъ є҆го̀, сло́вомъ же и҆ дѣ́ломъ: тогда̀ вѧ́щше весели́тсѧ ᲂу҆́мъ, и҆збавлѧ́емь ѿ смꙋще́нїѧ ꙗ҆́рости. И҆ навыка́етъ никогда́же нерадѣ́ти ѡ҆ дꙋшѣ̀ свое́й, боѧ́сѧ, да не ка́кѡ па́ки ѡ҆ста́вленъ бꙋ́детъ, и҆ ѿ стра́ха пребыва́етъ непа́дателенъ, и҆мѣ́ѧ при́снѡ сле́зы покаѧ́нїѧ и҆ пла́ча, до́ндеже возведе́нъ бꙋ́детъ въ любѡ́вныѧ и҆ ра̑достныѧ сле́зы, ѿ ни́хже въ ми́ръ по́мыслѡвъ прїи́детъ благода́тїю хрⷭ҇то́вою. И҆ сїѧ̑ ᲂу҆́бѡ сꙋ́ть та́кѡ. Мы́ же є҆щѐ стра́стнїи и҆ тѧжкосе́рднїи сꙋ́ще, до́лжни є҆смы̀ при́снѡ поꙋча́тисѧ словесє́мъ пла́ча, и҆ и҆спы́товати себѐ на всѧ́къ де́нь пре́жде ᲂу҆ста́вленнагѡ пра́вила, и҆ средѝ є҆гѡ̀, и҆ по концѣ̀. И҆лѝ дѣ́лающе, немощнѣ́йшїи є҆щѐ въ сꙋ́щей по бз҃ѣ пра́здности, и҆ ѿ всѣ́хъ ᲂу҆праздне́нїю, ꙗ҆́коже глаго́летъ ст҃ы́й і҆саа́къ. И҆лѝ пра́зднїи длѧ сегѡ̀ є҆ди́нагѡ сѣдѧ́ще, и҆мꙋ́ще недре́млющыѧ ѻ҆́чи, и҆ трезвѧ́щꙋюсѧ мы́сль, ꙗ҆́коже глаго́летъ лѣ́ствичникъ: взира́й, каковы́й ᲂу҆спѣ́хъ тво́й бꙋ́детъ: да сокрꙋши́тсѧ дꙋша̀ твоѧ̀, и҆ начне́тъ слези́ти, ꙗ҆́коже глаго́летъ ст҃ы́й дѡроѳе́й. И҆ сїѧ̑ ᲂу҆́бѡ речє́на сꙋ́ть ѡ҆ преждерече́нныхъ въ тре́хъ видѣ́нїѧхъ, да сподо́бимсѧ прїитѝ въ про́чыѧ видѣ̑нїѧ, ѿ ни́хже четве́ртое.

Ѡ҆ четве́ртомъ видѣ́нїи.

Сїѐ є҆́сть ᲂу҆разꙋмѣ́нїе сладча́йшагѡ спа́са на́шегѡ і҆и҃са хрⷭ҇та̀ снизхожде́нїѧ, пребыва́нїѧ въ мі́рѣ. И҆ пома́лѣ забыва́емъ и҆ са́мꙋю пи́щꙋ, ꙗ҆́коже глаго́летъ вели́кїй васі́лїй. И҆ ꙗ҆́коже ѡ҆ блаже́нномъ дв҃дѣ слы́шахомъ, ꙗ҆́кѡ забы̀ снѣ́сти хлѣ́бъ сво́й[[Ѱал. р҃а, ст. є҃.]] внегда̀ восхи́титисѧ мы́сли є҆гѡ̀, глаго́летъ лѣ́ствичникъ, къ чꙋдесє́мъ бж҃їимъ во ᲂу҆́жасѣ мно́зѣ, и҆ недоꙋмѣ́нїи ѡ҆ воздаѧ́нїи, ꙗ҆́коже глаго́летъ небоѧвле́нный васі́лїй: что̀ возда́мы гдⷭ҇еви за всѧ̑, ꙗ҆̀же воздадѐ на́мъ; На́съ ра́ди бг҃ъ въ человѣ́цѣхъ, и҆стлѣ́вшагѡ ра́ди є҆стества̀, сло́во пло́ть бы́сть, и҆ всели́сѧ въ ны̀. Благодѣ́тель къ неблагода̑рнымъ, и҆ и҆зба́витель къ плѣ̑ннымъ, ко и҆̀же во тьмѣ̀ сѣдѧ́щымъ со́лнце пра́вды, на крⷭ҇тѣ̀ безстра́стенъ, во а҆́дѣ свѣ́тъ, въ сме́рти живо́тъ, воста́нїе па́дшихъ ра́ди, къ немꙋ́же возопїи́мъ: бж҃е на́шъ, сла́ва тебѣ̀. И҆ и҆́же ѿ дама́ска і҆ѡа́ннъ: ᲂу҆жасе́сѧ ѡ҆ се́мъ не́бо, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ: тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ. И҆ па́ки: ᲂу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дѣви́ческагѡ чре́ва бы́въ человѣ́къ: тѣ́мже пречи́стꙋю бцⷣꙋ вѣ́рнїи велича́емъ. Прїиди́те, покори́тесѧ мѝ лю́дїе: возше́дше на го́рꙋ ст҃ꙋ́ю, пренебе́снꙋю, невеще́ственнѡ ста́немъ во гра́дѣ бг҃а жи́ва, и҆ ᲂу҆́зримъ ᲂу҆мо́мъ бж҃ество̀ невеще́ственное ѻ҆ц҃а̀ и҆ дх҃а, во є҆диноро́днѣмъ сн҃ѣ блиста́ющее. Оу҆слади́лъ мѧ̀ є҆сѝ любо́вїю хрⷭ҇тѐ, и҆ и҆змѣни́лъ мѧ̀ є҆сѝ бж҃е́ственнымъ твои́мъ раче́нїемъ: но попалѝ ѻ҆гне́мъ невеще́ственнымъ грѣхѝ моѧ̑, и҆ насы́титисѧ въ тебѣ̀ наслажде́нїѧ сподо́би, да ликꙋ́ѧ возвелича́ю бл҃же, два̀ пришє́ствїѧ твоѧ̑. Ве́сь є҆сѝ, спа́се, сла́дость, ве́сь є҆сѝ жела́нїе и҆ любо́вь вои́стиннꙋ ненасы́тнаѧ, ве́сь є҆сѝ красота̀ неизрече́ннаѧ. Прїѧ́вый ᲂу҆́бѡ ра́зꙋмъ таковы́хъ тѣле́сными и҆ дꙋше́вными добродѣ́телѧми, и҆ сокрове́нныхъ та̑инъ въ словесѣ́хъ ст҃ы́хъ мꙋже́й, и҆ бж҃е́ственныхъ писа́нїѧхъ, па́че же ст҃ы́хъ є҆ѵⷢ҇лїй, не престае́тъ ктомꙋ̀ ѿ жела́нїѧ и҆ мно́гихъ сле́зъ, при́снѡ быва́ющихъ є҆мꙋ̀ без̾ понꙋжде́нїѧ. Мы́ же ѿ є҆ди́нѣхъ писа́нїй слы́шаще, до́лжни є҆смы̀ при́снѡ ᲂу҆пражнѧ́тисѧ и҆ поꙋча́тисѧ, да мно́гимъ вре́менемъ впечатлѣ́етсѧ въ се́рдцѣ на́шемъ жела́нїе бж҃їе, ꙗ҆́коже глаго́летъ ст҃ы́й маѯі́мъ, и҆ ꙗ҆́коже твори́ша ѻ҆тцы̀, пре́жде прїѧ́тїѧ самодѣ́йствꙋющагѡ ра́зꙋма. Всѐ жела́нїе мꙋ́ченикѡвъ простре́сѧ къ є҆ди́номꙋ влⷣцѣ, любо́вїю съ тѣ́мъ соединѧ́емо, и҆ поѧ́ше. И҆ ꙗ҆́коже дамаски́нъ речѐ ѡ҆ трїе́хъ ѻ҆́троцѣхъ: За зако́ны ѻ҆те́чєскїѧ блаже́ннїи въ вавѷлѡ́нѣ ю҆́нѡши предбѣ́дствꙋюще, царю́ющагѡ ѡ҆плева́ша повелѣ́нїе безꙋ́мное, и҆ совокꙋ́плени, и҆́мже не свари́шасѧ ѻ҆гне́мъ, держа́вствꙋющемꙋ досто́йнꙋю воспѣва́хꙋ пѣ́снь. И҆ пра́веднѣ. Є҆гда̀ ᲂу҆разꙋмѣ́етъ кто̀ чꙋдеса̀ бж҃їѧ, ве́сь и҆зстꙋпа́етъ, и҆ са́мꙋю привре́меннꙋю забыва́етъ жи́знь, ѿ разꙋмѣ́нїѧ бж҃е́ственныхъ писа́нїй, глаго́летъ ст҃ы́й і҆саа́къ. А҆ не ꙗ҆́коже мы̀ не́гли ᲂу҆милѧ́емсѧ ма́лѡ ѿ писа́нїй, и҆ ѿ ᲂу҆ны́нїѧ, забве́нїѧ и҆ невѣ́дѣнїѧ па́ки помрача́емсѧ, и҆ нечꙋ́вственнїи ѿ страсте́й быва́емъ: Ѡ҆чи́стивый бо себѐ пла́чемъ ѿ страсте́й, познае́тъ та̑инства сокровє́ннаѧ во всѣ́хъ писа́нїѧхъ, и҆ ѿ всѣ́хъ ᲂу҆жаса́етсѧ: па́че же ѿ ст҃а́гѡ є҆ѵⷢ҇лїа, ѿ дѣ́лъ же и҆ слове́съ. И҆ ка́кѡ премꙋ́дрость бж҃їѧ неꙋдѡ́бнаѧ ᲂу҆до́бными содѣ́ла, ꙗ҆́кѡ пома́лꙋ бг҃омъ твори́тъ человѣ́ка бла́га, ꙗ҆́кѡ и҆ врагѡ́въ люби́ти могꙋ́ща[[Матѳ. гл. є҃, ст. м҃д.]]: милосе́рда, ꙗ҆́коже ѻ҆ц҃ъ небе́сный милосе́рдъ є҆́сть[[Матѳ. гл. є҃, ст. м҃г.]]: безстра́стна, ꙗ҆́коже безстра́стенъ бг҃ъ: всѧ́кꙋ добродѣ́тель и҆мꙋ́ща, и҆ соверше́нна, ꙗ҆́коже ѻ҆ц҃ъ соверше́нъ є҆́сть. И҆ вкра́тцѣ, свѧще́ннаѧ сїѧ̀ кни́га наꙋча́етъ томꙋ̀ человѣ́ка, є҆ли̑ка бг҃ꙋ подоба́етъ, да положе́нїемъ бг҃ъ бꙋ́детъ. И҆ кто̀ не ᲂу҆диви́тсѧ дѣ́йствїю ст҃а́гѡ є҆ѵⷢ҇лїа, ꙗ҆́кѡ ѿ є҆ди́нагѡ произволе́нїѧ всѧ́къ поко́й и҆ въ ны́нѣшнемъ и҆ въ бꙋ́дꙋщемъ вѣ́цѣ да́рꙋетъ со мно́гою че́стїю, ꙗ҆́коже глаго́летъ гдⷭ҇ь: Смирѧ́ѧй себѐ вознесе́тсѧ[[Лꙋкѝ гл. и҃і, ст. д҃і.]]. И҆ здѣ́сь свидѣ́тельствꙋетъ пе́тръ, ѡ҆ста́вль мрє́жи, и҆ прїе́мъ ключѝ небє́сныѧ, и҆ про́чїи а҆по́столи, кі́йждо ма́лое нѣ́что, є҆́же и҆мѣ̀, ѡ҆ста́вивъ, ве́сь мі́ръ покори́ша въ ны́нѣшнемъ и҆ бꙋ́дꙋщемъ вѣ́цѣ, ꙗ҆̀же ѻ҆́ко не ви́дѣ, и҆ ᲂу҆́хо не слы́ша, и҆ на се́рдце человѣ́кꙋ не взыдо́ша. И҆ не то́чїю на а҆по́столѣхъ сїѧ̑ бы́ша, но и҆ на всѣ́хъ произволѧ́ющихъ ѧ҆̀ быва́ютъ да́же до ны́нѣ, ꙗ҆́коже глаго́летъ нѣ́кто ѿ ѻ҆тє́цъ, ꙗ҆́кѡ а҆́ще и҆ трꙋжда́хꙋсѧ въ пꙋсты́ни, но мно́гъ ᲂу҆́бѡ поко́й и҆мѣ́ѧхꙋ. Сїе́ же речѐ ѡ҆ несмꙋще́нной и҆ безпопечи́тельной жи́зни. И҆ кто̀ ᲂу҆̀бо мни́тсѧ на́мъ вѧ́щшїй поко́й и҆ че́сть и҆мѣ́ти; ᲂу҆пражнѧ́ѧйсѧ ли по бз҃ѣ, и҆ творѧ́й своѧ̑, и҆лѝ въ смꙋще́нїѧхъ и҆ сꙋди́лищахъ пребыва́ѧй и҆ попече́нїѧхъ жите́йскихъ; при́снѡ бесѣ́дꙋѧй съ бг҃омъ поꙋче́нїемъ бж҃е́ственныхъ писа́нїй, и҆ неразвлече́нною моли́твою и҆ слеза́ми, и҆лѝ трꙋжда́ющїйсѧ и҆ бдѧ́й въ татьба́хъ и҆ беззако́нныхъ дѣѧ́нїѧхъ; и҆́хже не ᲂу҆лꙋчи́въ, є҆ди́ный то́чїю трꙋ́дъ и҆ сꙋгꙋ́бꙋю сме́рть, мо́жетъ бы́ть, полꙋ́читъ. Сѐ ᲂу҆̀бо и҆ сме́рть претерпѣва́емъ съ вели́кимъ трꙋдо́мъ и҆ безче́стїемъ без̾ прїѡбрѣ́тенїѧ. Па́че же и҆ велича́йшїй вре́дъ дꙋше́вный мно́жицею нѣ́цыи под̾ѧ́ша ра́ди поги́бели. Разбѡ́йницы, глаго́лю, и҆ потопи́тели, блꙋдникѝ, и҆ сварли́вїи, и҆̀же не восхотѣ́ша съ поко́емъ, че́стїю и҆ прїѡбрѣ́тенїемъ спасти́сѧ. Но, ѽле слѣпоты̀! сме́рть поги́бели ра́ди претерпѣва́емъ, спасе́нїѧ же ра́ди нижѐ са́мꙋю жи́знь лю́бимъ. А҆́ще же и҆ сме́рть предлежи́тъ ца́рствїѧ ра́ди небе́снагѡ, что̀ вѧ́щшее, разбо́йника твори́мъ, и҆ гробокопа́телѧ и҆лѝ во́ина, и҆̀же хлѣ́ба є҆ди́нагѡ ра́ди и҆мѣ́ющꙋю бы́ти сме́рть съ настоѧ́щею мно́гажды претерпѣ́ша; Ра́звѣ то́чїю є҆гда̀ хрⷭ҇та̀ ра́ди, пе́рвое бꙋ́детъ намѣ́ренїе, є҆гѡ́же ра́ди дае́тсѧ ца́рствїе нбⷭ҇ное произволѧ́ющымъ въ настоѧ́щемъ вѣ́цѣ ᲂу҆́мнѣ, внегда̀ презира́ти всѧ̑, и҆ покорє́нна и҆мѣ́ти себѣ̀, ца́рствовати же не то́чїю над̾ веща́ми, но и҆ над̾ тѣ́ломъ презрѣ́нїемъ є҆гѡ̀, и҆ над̾ сме́ртїю бл҃годерзнове́нїемъ вѣ́ры: въ бꙋ́дꙋщемъ же со хрⷭ҇то́мъ вѣ́чнѡ ца́рствовати съ тѣ́ломъ, благода́тїю ѻ҆́бщагѡ воскресе́нїѧ. Сме́рть ᲂу҆́бѡ ра́внѡ грѣ́шника и҆ пра́веднагѡ быва́етъ, разли́чїе же мно́го: и҆ ꙗ҆́коже сме́ртнїи, ѻ҆́ба ᲂу҆мира́ютъ, и҆ не чꙋ́днѣ. Но ѻ҆́въ ᲂу҆́бѡ безвозме́зденъ, и҆ ѡ҆сꙋжде́нъ мо́жетъ бы́ть: ѻ҆́въ же блаже́нъ въ ны́нѣшнемъ и҆ въ бꙋ́дꙋщемъ вѣ́цѣ. Что́ же ве́лїе є҆́сть, то́чїю ѡ҆ставлѧ́ти и҆мѣ̑нїѧ, и҆́хже нево́льнѣ ѡ҆ста́вити и҆мѣ́ѧше мнѧ́щїйсѧ и҆мѣ́ти, не то́чїю во вре́мѧ сме́рти, но и҆ пре́жде ѻ҆́ныѧ со мно́гимъ стꙋдо́мъ, трꙋдо́мъ же и҆ болѣ́знїю; Не́гли же и҆ сме́рть нѣ́цыи претерпѣ́ша си́хъ ра́ди, по безчи́сленныхъ и҆скꙋше́нїѧхъ бога́тства, съ боѧ́знїю, глаго́лю, попече́нїемъ, и҆ при́сною печа́лїю и҆ смꙋще́нїемъ во́льнѣ и҆ нево́льнѣ. Бж҃їѧ же за́повѣдь ѿ всѣ́хъ си́хъ человѣ́ка и҆збавлѧ́етъ, и҆ всѧ́ко безпопече́нїе и҆ безбоѧ́зненность є҆мꙋ̀ да́рꙋетъ, мно́жицею же весе́лїе неизглаго́ланное, наипа́че же предпочита́ющымъ во́лею нестѧжа́нїе. Что̀ ᲂу҆́бѡ сладча́е тогѡ̀, є҆́же бы́ти комꙋ̀ безстра́стнꙋ, ѿню́дъ не ѡ҆бдержи́мꙋ ѿ ꙗ҆́рости, и҆лѝ ко́егѡ жела́нїѧ мїрски́хъ веще́й, но мно́гимъ вожделѣ̑ннаѧ ни вочто́же вмѣнѧ́ѧ, и҆ вы́шше всѣ́хъ бы́въ, ꙗ҆́кѡ въ раѝ, па́че же на небесѝ пребыва́ти, и҆ вы́шше всѧ́кїѧ нꙋ́жды безпопече́нїемъ и҆ ᲂу҆пражне́нїемъ по бз҃ѣ; Внегда́ бо претерпѣва́ти находѧ̑щаѧ съ ра́достїю, всѐ, є҆́же что̀ быва́етъ, ᲂу҆покоева́етъ є҆го̀. И҆ внегда̀ люби́ти всѣ́хъ, ѿ всѣ́хъ люби́мь быва́етъ: и҆ внегда̀ презира́ти всѧ̑, вы́шше всѣ́хъ быва́етъ, и҆ внегда̀ не хотѣ́ти и҆мѣ́ти что̀, ѡ҆ не́мже свари́тсѧ и҆́нъ: и҆ печа́лꙋетъ не ᲂу҆лꙋчи́въ, ѻ҆вогда́ же и҆ полꙋчи́въ жела́емое ѡ҆сꙋжде́нъ быва́етъ: не жела́ѧй же что̀, и҆збавлѧ́етсѧ са́мъ за́повѣдїю всѣ́хъ сꙋ́щихъ въ ны́нѣшнѣмъ вѣ́цѣ и҆ бꙋ́дꙋщемъ лю́тыхъ. Занѐ є҆́же не хотѣ́ти и҆мѣ́ти что̀: є҆́же не стѧжа̀, є҆́сть вы́шше всѧ́кагѡ поко́ѧ и҆ бога́тства: ꙗ҆́коже и҆ жела́ѧй, є҆́же не и҆́мать, є҆́сть велича́йшее мꙋче́нїе пре́жде вѣ́чныѧ мꙋ́ки. И҆ таковы́й ра́бъ є҆́сть, хотѧ̀ и҆ ца́рь бы́ти мни́тсѧ, и҆ бога́тъ. Кꙋ́ю же тѧ́жесть возвѣща́ютъ за́пѡвѣди гдⷭ҇ни, ꙗ҆̀же не твори́мъ ѻ҆каѧ́ннїи безме́зднѡ со мно́гимъ ᲂу҆се́рдїемъ;

Возмогі́й ᲂу҆̀бо благода́ть ст҃а́гѡ є҆ѵⷢ҇лїа, и҆ ꙗ҆̀же въ не́мъ предложє́наѧ, разꙋмѣ́ти ѿ ча́сти, глаго́лю же дѣѧ̑нїѧ и҆ ᲂу҆чє́нїѧ гдⷭ҇нѧ, за́пѡвѣди є҆гѡ̀ и҆ догма́ты, прещє́нїѧ и҆ ѡ҆бѣтова̑нїѧ, то́й вѣ́сть, ка̑ѧ неѡскꙋ̑днаѧ сокрѡ́вища ѡ҆брѣ́те: а҆́ще и҆ не мо́жетъ ѡ҆ таковы́хъ и҆сповѣ́сти, ꙗ҆́коже подоба́етъ: занѐ неизречє́нна сꙋ́ть небє́снаѧ. Хрⷭ҇то́съ бо во є҆ѵⷢ҇лїи сокрове́нъ є҆́сть: и҆ хотѧ́й ѡ҆брѣстѝ є҆го̀, до́лженъ є҆́сть пре́жде прода́ти всѧ̑ и҆мѣ̑нїѧ своѧ̑, и҆ кꙋпи́ти є҆ѵⷢ҇лїе: да не то́чїю возмо́жетъ ѡ҆брѣстѝ є҆го̀ не́гли чте́нїемъ, но и҆ прїѧ́ти въ себѣ̀ подража́нїемъ пребыва́нїѧ є҆гѡ̀ въ мі́рѣ: занѐ и҆́щꙋщемꙋ хрⷭ҇та̀, глаго́летъ ст҃ы́й маѯі́мъ, подоба́етъ и҆ска́ти є҆го̀ не внѣ̀, но внꙋ́трь себѐ, си́рѣчь, бы́ти тѣ́ломъ и҆ дꙋше́ю, ꙗ҆́коже хрⷭ҇то́съ, безгрѣ́шнꙋ по возмо́жности человѣ́кꙋ, и҆ все́ю си́лою храни́ти свидѣ́тельство со́вѣсти, да воцари́тсѧ над̾ все́ю свое́ю во́лею, и҆ побѣди́тъ ю҆̀ презрѣ́нїемъ, а҆́ще въ мі́рѣ и҆ ᲂу҆бо́гъ є҆́сть и҆ безро́денъ. Занѐ кꙋ́ю по́льзꙋ и҆́мать мнѧ́йсѧ бы́ти ца́рь, а҆ ѿ ꙗ҆́рости и҆ жела́нїѧ терза́емь є҆́сть въ се́мъ вѣ́цѣ, въ бꙋ́дꙋщемъ же вѣ́чнꙋю мꙋ́кꙋ ѡ҆брѣта́етъ, а҆́ще не восхо́щетъ сохрани́ти за́пѡвѣди бж҃їѧ: но, ѽ безꙋ́мїѧ! ка́кѡ не хо́щемъ ма́лыми и҆ привре́менными вели̑каѧ и҆ вѣ̑чнаѧ прїѧ́ти блага̑ѧ; но блага̑ѧ ᲂу҆́бѡ ѿме́щемъ, проти́вныхъ же жела́емъ. Что́ же є҆́сть хꙋ́ждше ча́шы стꙋдены̀ воды̀, и҆лѝ даѧ́нїѧ ᲂу҆крꙋ́ха хлѣ́ба, и҆лѝ ᲂу҆держа́нїѧ во́ли, и҆ ма́лагѡ своегѡ̀ разꙋмѣ́нїѧ, и҆́хже ра́ди ца́рствїе небе́сное предлежи́тъ на́мъ благода́тїю ре́кшагѡ; Се́ бо ца́рствїе бж҃їе внꙋ́трь ва́съ є҆́сть[[Лꙋкѝ гл. з҃і, ст. к҃а.]]: не бо̀ дале́че ѿстои́тъ, глаго́летъ дамаски́нъ, нижѐ внѣ̀, но внꙋ́трь. То́чїю возжела́й побѣди́ти стра̑сти, и҆ сѐ и҆́маши є҆го̀ въ себѣ̀ бг҃оꙋго́днымъ житїе́мъ. А҆́ще же не хо́щеши, ничто́же и҆́маши: занѐ ца́рствїе бж҃їе, глаго́лютъ ѻ҆тцы̀, нарица́етсѧ ,бг҃оꙋго́дное житїѐ, и҆ пе́рвое прише́ствїе гдⷭ҇не, и҆ второ́е. И҆ ѡ҆ второ́мъ преднаписа́сѧ во глаго́лѣхъ пла́ча. Пе́рвое же ᲂу҆разꙋмѣ́вый ѿ благода́ти въ чꙋ́вствѣ дꙋшѝ съ вели́кимъ ᲂу҆́жасомъ до́лженъ є҆́сть глаго́лати: Ве́лїй є҆сѝ гдⷭ҇и, и҆ чꙋ̑дна дѣла̀ твоѧ̑, и҆ ни є҆ди́ноже сло́во дово́льно бꙋ́детъ къ пѣ́нїю чꙋде́съ твои́хъ. Сѐ, сладча́йшїй мо́й влⷣко! ра́бъ тво́й безгла́сенъ и҆ пра́зденъ пред̾ тобо́ю стоѧ̀, ѡ҆жида́ю ѿ тебѐ просвѣще́нїѧ ра́зꙋма. Ты́ бо ре́клъ є҆сѝ, гдⷭ҇и: Ꙗ҆́кѡ без̾ менѐ не мо́жете твори́ти ничесѡ́же[[І҆ѡа́н. гл. є҃і, ст. є҃.]]. Ты̀ ᲂу҆̀бо наꙋчи́ мѧ, ꙗ҆̀же ѡ҆ тебѣ̀. Сегѡ̀ ра́ди дерзнꙋ́хъ при пречи́стою твоє́ю ногꙋ̑, ꙗ҆́коже сестра̀ ла́зарѧ дрꙋ́га твоегѡ̀, сѣ́сти, да ᲂу҆слы́шꙋ и҆ а҆́зъ нѣ́что ᲂу҆́мнѣ, а҆́ще и҆ не ѡ҆ непостижи́момъ твое́мъ бж҃ествѣ̀: но ᲂу҆́бѡ ѡ҆ тѣле́снѣмъ въ мі́рѣ пребыва́нїи. Ꙗ҆́кѡ да ма́лое нѣ́кое чꙋ́вство прїимꙋ̀ реко́мыхъ во ст҃ѣ́мъ є҆ѵⷢ҇лїи благода́ти твоеѧ̀. И҆ ка́кѡ пребыва́лъ є҆сѝ съ на́ми кро́токъ и҆ смире́нъ се́рдцемъ, ꙗ҆́коже реко́ша прест҃а̑ѧ твоѧ̑ ᲂу҆ста̀, во є҆́же наꙋчи́тисѧ на́мъ ѿ тебѐ семꙋ̀. И҆ въ толи́цѣмъ ᲂу҆бо́жествѣ бога́тъ сы́й въ ми́лостѧхъ, въ трꙋдѣ̀ и҆ жа́ждѣ во́льнѣ, во́дꙋ живꙋ́ю подаѧ́й самарѧны́нѣ, ꙗ҆́коже ре́клъ є҆сѝ, гдⷭ҇и: Жа́ждай да грѧде́тъ ко мнѣ̀ и҆ пїе́тъ[[І҆ѡа́н. гл. з҃, ст. л҃з.]]: ты́ бо є҆сѝ и҆сто́чникъ и҆сцѣле́нїй. И҆ кто̀ мо́жетъ воспѣ́ти твоѐ въ мі́рѣ пребыва́нїе; Но поне́же сподо́билъ мѧ̀ є҆сѝ зе́млю, пе́пелъ, пра́хъ, престꙋ́пника, самоꙋбі́йцꙋ, мно́гѡ тебѣ̀ согрѣши́вша, и҆ при́снѡ согрѣша́юща, разꙋмѣ́ти соверше́ннѣ нѣ́что ѿ твои́хъ дѣѧ́нїй и҆ слове́съ, и҆ дерзнꙋ́ти вопроси́ти тѧ̀ ѡ҆ си́хъ, ꙗ҆́кѡ ѿ вѣ́ры мнѧ́сѧ ви́дѣти тѧ̀ неви́димаго все́й тва́ри. Прости́ ми дерзнове́нїе моѐ: ты́ бо вѣ́си, гдⷭ҇и сердцевѣ́дче, ꙗ҆́кѡ не ѿ любопы́тства вопроша́ю, но и҆щꙋ̀ наꙋчи́тисѧ, вѣ́рꙋѧ, ꙗ҆́кѡ сподо́блюсѧ ѿ тебѐ сꙋ́щагѡ ра́зꙋма, ꙗ҆́коже и҆ лю́бѧщымъ тѧ̀, дарова́ти мѝ и҆́маши человѣколю́бче, и҆ є҆́же по си́лѣ дѣ́ланїе, да подража́ю твоемꙋ̀ во пло́ти пребыва́нїю, ѡ҆ не́мже по благода́ти хрїстїа́нинъ нареко́хсѧ. А҆́ще и҆ никто́же мо́жетъ, ꙗ҆́коже ᲂу҆ченицы̀ твоѧ̑ претерпѣва́ти сме́рть за врагѡ́въ, и҆ нижѐ твою̀ и҆ и҆́хъ нищетꙋ̀ и҆ добродѣ́тель стѧжа́ти: но ѿ ча́сти кі́йждо ѿ на́съ по произволе́нїю своемꙋ̀: А҆́ще бо кто̀ и҆ всѧ́кїй ча́съ за тѧ̀ ᲂу҆мира́ти бꙋ́детъ, нижѐ та́кѡ ѿ до́лга своегѡ̀ ѡ҆свободи́тисѧ мо́жетъ. Занѐ ты̀ гдⷭ҇и, бг҃ъ соверше́нъ сы́й, и҆ человѣ́къ соверше́нъ, безгрѣ́шнѣ пожи́лъ є҆сѝ въ мі́рѣ се́мъ, и҆ за всѣ́хъ всѧ̑ претерпѣ́лъ є҆сѝ. Мы́ же а҆́ще не́гли и҆ поте́рпимъ что̀ ѡ҆ себѣ̀, и҆ за грѣхѝ своѧ̑ стра́ждемъ. И҆ кто̀ не ᲂу҆диви́тсѧ разсмотрѧ́ѧ твоѐ неизрече́нное снисхожде́нїе; Ꙗ҆́кѡ бг҃ъ сы́й непостижи́мый, всеси́льный, и҆ всѧ̑ содержа́щїй, сѣдѧ́щїй на херꙋві́мѣхъ, глаго́лемыхъ, ѻ҆би́льнаѧ премꙋ́дрость, на́съ ра́ди мно́гѡ тѧ̀ прогнѣвлѧ́ющихъ ѿ нача́ла и҆ свы́ше смири́лъ є҆сѝ себѐ, ꙗ҆́коже воспрїѧ́лъ є҆сѝ ржⷭ҇тво̀ и҆ воспита́нїе, гонє́нїѧ же и҆ каменомета̑нїѧ, насмѣѧ̑нїѧ, порꙋга̑нїѧ, заꙋшє́нїѧ, бїє́нїѧ, стꙋ́дъ и҆ заплева̑нїѧ. Та́же крⷭ҇тъ, гво́здїѧ, гꙋ́бꙋ, тро́сть, ѻ҆́цетъ и҆ же́лчь, и҆ є҆ли̑ка не є҆́смь досто́инъ слы́шати. Къ си́мъ нетлѣ́нное твоѐ ребро̀ прободе́но бы́сть, и҆з̾ негѡ́же и҆сточи́лъ є҆сѝ на́мъ вѣ́чнꙋю жи́знь, честнꙋ́ю твою̀ кро́вь и҆ во́дꙋ. Воспѣва́ю твоѐ ржⷭ҇тво̀, и҆ ро́ждшꙋю тѧ̀, ю҆́же сохрани́лъ є҆сѝ дв҃ою и҆ по ржⷭ҇твѣ̀, ꙗ҆́коже пре́жде ржⷭ҇тва̀. Покланѧ́юсѧ тебѣ̀ въ верте́пѣ и҆ ꙗ҆́слехъ пелена́ми пови́тꙋ. Сла́влю тѧ̀, во є҆гѵ́петъ съ дв҃ою пречⷭ҇тою мт҃рїю твое́ю ѿходѧ́ща, и҆ въ назаре́тѣ жи́вша, и҆ повинова́вшасѧ по пло́ти роди́телѧмъ, мни́момꙋ ѻ҆тцꙋ̀, и҆ и҆́стиннѣй мт҃ри. Воспѣва́ю тѧ̀, во і҆ѻрда́нѣ ѿ предте́чи твоегѡ̀ креща́ющасѧ гдⷭ҇и, и҆ свидѣ́тельствовавша ѡ҆ тебѣ̀ ѻ҆ц҃а̀, и҆ ꙗ҆ви́вша тѧ̀ ст҃а́го дх҃а, и҆ креще́нїе твоѐ, и҆ крⷭ҇ти́телѧ і҆ѡа́нна, проро́ка и҆ раба̀ твоего̀. Прославлѧ́ю тѧ̀ пости́вшагосѧ на́съ ра́ди, и҆ и҆скꙋша́ема во́льнѣ, и҆ побѣди́вша врага̀ въ тѣлесѝ, є҆́же прїѧ́лъ є҆сѝ ѿ на́съ, и҆ дарова́вшаго на́мъ побѣ́дꙋ над̾ ни́мъ неизрече́нною твое́ю премꙋ́дростїю: сопребы́вша же со ᲂу҆ченикѝ твои́ми, и҆ прокаже́нныхъ ѡ҆чи́стивша, хромы́хъ и҆спра́вивша, и҆ слѣпы̑мъ свѣ́тъ дарова́вша, глꙋхи̑мъ и҆ нѣмы̑мъ глаго́ланїе и҆ слы́шанїе пода́вша, благословлѧ́юща хлѣ́бы, и҆ по мо́рю, ꙗ҆́кѡ по сꙋ́хꙋ ходѧ́ща, и҆ наро́ды ᲂу҆ча́ща ѡ҆ дѣѧ́нїѧхъ же и҆ видѣ́нїѧхъ, ѡ҆ ѻ҆ц҃ѣ̀ и҆ ст҃ѣ́мъ дс҃ѣ возвѣща́юща, и҆ ѡ҆ бꙋ́дꙋщихъ преще́нїѧхъ же и҆ ѡ҆бѣтова́нїѧхъ предре́кша, и҆ ѡ҆ всѣ́хъ ко спасе́нїю на́шемꙋ слꙋжа́щихъ: врага́ же пред̾ꙋпрежда́юща, и҆ соверше́ннѣ стра̑сти и҆сторга́юща всепремꙋ́дрымъ ᲂу҆че́нїемъ, и҆ бꙋ̑їѧ ᲂу҆мꙋдрѧ́юща, кова́рныхъ же немꙋ́дрыхъ сотворѧ́юща безконе́чною твое́ю премꙋ́дростїю: ме́ртвыхъ воскреша́юща неизглаго́ланнымъ твои́мъ могꙋ́ществомъ, и҆ со вла́стїю и҆згонѧ́юща де́монѡвъ, ꙗ҆́кѡ бг҃ъ всѧ́ческихъ, и҆ не то́чїю сїѧ̑ собо́ю творѧ́ща, но и҆ рабѡ́мъ твои̑мъ вла́сть да́вша твори́ти бѡ́льшаѧ, да вѧ́щше диви́мсѧ, ꙗ҆́коже ре́клъ є҆сѝ гдⷭ҇и, ве́лїе и҆́мѧ твоѐ, ꙗ҆́кѡ тобо́ю всѧ̑ быва́ютъ чꙋдеса̀ ѿ ст҃ы́хъ твои́хъ.

Влⷣко гдⷭ҇и, і҆и҃се хрⷭ҇тѐ, сн҃е и҆ сло́ве бж҃їй, сладча́йшее и҆́мѧ спасе́нїѧ на́шегѡ! Ве́лїѧ сла́ва твоѧ̀, вє́лїѧ дѣла̀ твоѧ̑, чꙋ̑дна словеса̀ твоѧ̑, и҆ сла́ждшѧ па́че ме́да и҆ со́та. Сла́ва тебѣ̀, гдⷭ҇и, сла́ва тебѣ̀, и҆ кто̀ мо́жетъ сла́вити и҆ пѣ́ти твоѐ снисхожде́нїе, бла́гость, си́лꙋ, премꙋ́дрость, въ мі́рѣ пребыва́нїе и҆ ᲂу҆че́нїе; И҆ ка́кѡ є҆сте́ственнѣ ст҃ы̑ѧ твоѧ̑ за́пѡвѣди со ᲂу҆до́бїемъ добродѣ́тельномꙋ ᲂу҆ча́тъ житїю̀, ꙗ҆́коже ре́клъ є҆сѝ гдⷭ҇и: Ѡ҆ста́вите, и҆ ѡ҆ста́витсѧ ва́мъ: и҆ па́ки: И҆щи́те, и҆ ѡ҆брѧ́щете, толцы́те, и҆ ѿве́рзетсѧ ва́мъ: и҆ є҆ли̑ка хо́щете да творѧ́тъ ва́мъ человѣ́цы, и҆ вы̀ твори́те и҆̀мъ та́кожде[[Матѳ. гл. з҃, ст. з҃, и҃ и҆ в҃і.]]. И҆ кто̀ ᲂу҆́бѡ чꙋ́вство прїе́мъ за́повѣдей твои́хъ, и҆ про́чихъ слове́съ, не ᲂу҆диви́тсѧ разсмотрѧ́ѧ безконе́чнꙋю твою̀ премꙋ́дрость; Премꙋ́дросте бж҃їѧ, животѐ всѧ́ческихъ: ра́досте а҆́гг҃лѡвъ, неизглаго́ланный свѣ́те, воскресе́нїе ме́ртвыхъ, па́стырю до́брый, положи́вшїй дꙋ́шꙋ за ѻ҆́вцы своѧ̑! Воспѣва́ю твоѐ преѡбраже́нїе, распѧ́тїе, погребе́нїе и҆ воскресе́нїе, вознесе́нїе и҆ сѣдѣ́нїе ѡ҆деснꙋ́ю бг҃а ѻ҆ц҃а̀, соше́ствїе ст҃а́гѡ дх҃а, и҆ второ́е твоѐ прише́ствїе съ си́лою и҆ сла́вою мно́гою, и҆ недоразꙋмѣва́емою. И҆знемого́хъ, гдⷭ҇и мо́й, зрѧ̀ чꙋдеса̀ твоѧ̑, и҆ къ молча́нїю ѿ недоꙋмѣ́нїѧ прибѣ́гнꙋти хощꙋ̀. Но что̀ твори́ти, не вѣ́мъ. Ꙗ҆́кѡ а҆́ще ᲂу҆молчꙋ̀, ᲂу҆жаса́юсѧ: а҆́ще же дерзнꙋ̀ рещѝ нѣ́что, недоꙋмѣва́ю и҆ во и҆зстꙋпле́нїе прихождꙋ̀. Недосто́йна себѧ̀ почита́ю не́ба и҆ землѝ, и҆ досто́йна всѧ́кїѧ мꙋ́ки. Не то́чїю за та̑ѧ, въ ни́хже согрѣши́хъ: не мно́гѡ па́че, и҆́миже ѡ҆благодѣ́тельствованъ бы́хъ, неблагода́рный сы́й и҆ ѻ҆каѧ́нный: и҆спо́лнилъ бо є҆сѝ дꙋ́шꙋ мою̀ всѧ́кагѡ бла́га, преблагі́й гдⷭ҇и: ᲂу҆разꙋмѣ́хъ ѿ ча́сти дѣла̀ твоѧ̑, и҆ и҆зстꙋпѝ мы́сль моѧ̀. Въ ничто́же ѿню́дъ бы́хъ, є҆ди̑на твоѧ̑ ви́дѧй, влⷣко: ѻ҆ба́че не мо́й ра́зꙋмъ, ни дѣ́ланїе, но твоѧ̀ благода́ть. Сегѡ̀ ра́ди полага́ю рꙋ́кꙋ мою̀ на ᲂу҆стѣ́хъ мои́хъ, ꙗ҆́коже нѣ́когда і҆́ѡвъ, и҆ ко ст҃ы̑мъ ѿ недоꙋмѣ́нїѧ прибѣга́ю ѻ҆каѧ́нный.

Блага́ѧ влⷣчце мі́ра! ты̀ вѣ́си, ꙗ҆́кѡ не и҆́мамы грѣ́шнїи дерзнове́нїѧ къ бг҃ꙋ, є҆го́же родила̀ є҆сѝ: но на тѧ̀ надѣ́ющесѧ рабѝ твоѝ, припа́даемъ ко влⷣцѣ тобо́ю, ꙗ҆́кѡ и҆́маши дерзнове́нїе къ немꙋ̀, ꙗ҆́кѡ къ сн҃ꙋ твоемꙋ̀ и҆ бг҃ꙋ на́шемꙋ. На сїѐ и҆ а҆́зъ недосто́йный ᲂу҆пова́ѧ, молю̀ тѧ̀, влⷣчце, да да́рствꙋетсѧ мѝ чꙋ́вство дарѡ́въ твои́хъ и҆ про́чихъ ст҃ы́хъ. И҆ ка́кѡ толи́кїѧ добродѣ́тєли ꙗ҆ви́ли є҆стѐ. И҆ тебѐ сїѐ ᲂу҆́бѡ то́чїю, ꙗ҆́кѡ родила̀ є҆сѝ сн҃а бж҃їѧ: вы́шше всѣ́хъ сꙋ́щихъ показа̀: ѡ҆брѣ́те бо тѧ̀ прїѧ́телище досто́йно своегѡ̀ вселе́нїѧ, вѣ́дый всѧ̑ пре́жде бытїѧ̀, ꙗ҆́кѡ творе́цъ всѧ́ческихъ. И҆ никто́же мо́жетъ ѡ҆ твои́хъ сꙋ́щихъ па́че є҆стества̀, ᲂу҆ма́ же и҆ мы́сли вопроша́ти. Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃а чⷭ҇таѧ, съ безпло́тными ли́ки тѧ̀ велича́юще. Зане́же бг҃а человѣ́кѡмъ невозмо́жно ви́дѣти: на него́же не смѣ́ютъ чи́ни а҆́гг҃льстїи взира́ти: тобо́ю же всечи́стаѧ, ꙗ҆ви́сѧ человѣ́кѡмъ сло́во воплоще́нно, є҆го́же велича́юще съ небе́сными вѡ́и тѧ̀ ᲂу҆блажа́емъ. И҆, что́ тѧ нарече́мъ, ѽ благода́тнаѧ: не́бо, ꙗ҆́кѡ, и҆ прѡ́ч: бцⷣе! ты̀ є҆сѝ лоза̀ и҆́стиннаѧ, возрасти́вшаѧ на́мъ пло́дъ живота̀, тебѣ̀ мо́лимсѧ: моли́сѧ влⷣчце со ст҃ы́ми а҆пⷭ҇лы и҆ всѣ́ми ст҃ы́ми поми́ловатисѧ дꙋша́мъ на́шымъ, правосла́внѡ бцⷣꙋ и҆сповѣ́дающихъ и҆ ᲂу҆блажа́ющихъ тѧ̀ присноблаже́ннꙋю, ꙗ҆́коже предрекла̀ є҆сѝ влⷣчце. И҆́бо всѝ ро́ди блажи́мъ тѧ̀ є҆ди́нꙋю бцⷣꙋ, честнѣ́йшꙋю херꙋві̑мъ, и҆ сла́внѣйшꙋю без̾ сравне́нїѧ, и҆ прѡ́ч: Но не могі́й твоѧ̑ разꙋмѣ́ти ѡ҆ тѣ́хъ, ꙗ҆̀же сꙋ́ть про́чихъ ст҃ы́хъ, дивѧ́сѧ рекꙋ̀: ка́кѡ пребыва́лъ є҆сѝ крⷭ҇ти́тель и҆ прⷣте́ча гдⷭ҇нь въ пꙋсты́ни; И҆ что́ тѧ нарече́мъ; Проро́ка ли, а҆́гг҃ла ли, а҆пⷭ҇ла, и҆лѝ мꙋ́ченика; а҆́гг҃ла, занѐ ꙗ҆́кѡ безпло́тенъ жи́лъ є҆сѝ: а҆пⷭ҇ла, ꙗ҆́кѡ ꙗ҆зы́ки ᲂу҆лови́лъ є҆сѝ: мꙋ́ченика, ꙗ҆́кѡ глава̀ твоѧ̀ хрⷭ҇та̀ ра́ди ᲂу҆сѣ́чена бы́сть, є҆го́же молѝ спасти́сѧ дꙋша́мъ на́шымъ. Глаго́летъ ᲂу҆́бѡ соломѡ́нъ: Па́мѧть пра́веднагѡ съ похвала́ми: тебѣ́ же довлѣ́етъ свидѣ́тельство гдⷭ҇не, предте́че: показа́лбосѧ є҆сѝ вои́стиннꙋ, и҆ прѡ́ч: Ст҃і́и а҆пⷭ҇ли и҆ ᲂу҆ченицы̀ сп҃сѡвы, та̑инъ самови́дцы бы́вше, неви́димаго и҆ нача́ла неимꙋ́щаго проповѣ́дали є҆стѐ, глаго́люще: Въ нача́лѣ бѣ̀ сло́во. Не созда́ни бы́сте пре́жде а҆́гг҃лѡвъ, не наꙋчи́стесѧ ѿ человѣ̑къ, но ѿ го́рней премꙋ́дрости: тѣ́мже дерзнове́нїе и҆мꙋ́ще, моли́тесѧ ѡ҆ дꙋша́хъ на́шихъ, мо́лимсѧ. Дивлю́сѧ же ва́шемꙋ бг҃олю́бїю, ꙗ҆́коже рече́сѧ въ дре́внихъ тропарѣ́хъ. Гдⷭ҇и! Тебѐ чи́стѣ на землѝ а҆пⷭ҇ли возлюби́вше, ᲂу҆ме́ты вмѣни́ша всѧ̑, да тебѐ є҆ди́наго прїѡбрѧ́щꙋтъ, и҆ за тѧ̀ ра́намъ тѣлеса̀ преда́ша: сегѡ̀ ра́ди просла́влени бы́вше, мо́лѧтсѧ ѡ҆ дꙋша́хъ на́шихъ. И҆ ка́кѡ человѣ́цы сꙋ́ще, ꙗ҆́коже и҆ мы̀, и҆ бре́ннꙋю пло́ть носѧ́ще, толи̑кїѧ показа́сте добродѣ́тєли, ꙗ҆́кѡ за ᲂу҆бива́ющихъ вы̀ сме́рть претерпѣ́ли є҆стѐ; И҆ ка́кѡ ма́ли сꙋ́ще, ве́сь мі́ръ побѣди́ли є҆стѐ; И҆ сїѧ̑ сотвори́сте без̾ѻрꙋ́жнїи и҆ на́зи: и҆ ѻ҆́нѣми неви́димыхъ де́монѡвъ, ни́щїи и҆ не́мощїю пло́ти ѡ҆бложе́ннїи. И҆ что̀ ᲂу҆́бѡ бы́сть си́ла сїѧ̀, па́че же вѣ́ра, є҆́юже си́лꙋ ст҃а́гѡ дх҃а прїѧ́ли є҆стѐ; вы́ же ст҃і́и мꙋ́ченицы до́брѣ страда́льчествовавшїи и҆ вѣнча́вшїисѧ, моли́тесѧ ко гдⷭ҇ꙋ поми́ловатисѧ дꙋша́мъ на́шымъ. А҆пⷭ҇ли, мꙋ́чєницы, и҆ проро́цы, свѧти́телїе, преподо́бнїи, и҆ прѡ́ч: и҆ кто̀ не ᲂу҆диви́тсѧ зрѧ̀: ст҃і́и мꙋ́ченицы, до́брый по́двигъ, и҆́мже подвиза́стесѧ; Ка́кѡ въ тѣлесѝ сꙋ́ще, безтѣле́снагѡ врага̀ побѣди́ли є҆стѐ, хрⷭ҇та̀ и҆сповѣ́дающе и҆ крⷭ҇то́мъ воѡрꙋжи́вшесѧ; Сегѡ̀ ра́ди досто́йнѣ ꙗ҆ви́стесѧ де́монѡвъ прогони́тели, и҆ сопроти̑внымъ противобо́рницы, непреста́ннѡ моли́тесѧ, спасти́сѧ дꙋша́мъ на́шымъ. Ꙗ҆́коже бо пре́жде ва́съ трїѐ ѻ҆́троцы, не наде́ждею воздаѧ́нїй по́двиги претерпѣ́сте, но любвѝ ра́ди бж҃їѧ, ꙗ҆́коже са́ми реко́сте: а҆́ще и҆ не и҆зба́витъ ны̀, нижѐ та́кѡ є҆гѡ̀ ѿве́ржемсѧ, ꙗ҆́кѡ не и҆збавлѧ́юща. Дивлю́сѧ же кра́йнемꙋ смире́нїю ва́шемꙋ ст҃і́и трїѐ ѻ҆́троцы, ꙗ҆́кѡ недоꙋмѣ́ти ѡ҆ благодаре́нїи посредѝ ѻ҆гнѧ̀ сꙋ́ще, реко́сте: И҆ нѣ́сть во вре́мѧ сїѐ ни нача́льника, ни проро́ка, ни вождѧ̀, и҆ прѡ́ч: но дꙋше́ю сокрꙋше́нною, и҆ дꙋ́хомъ смире́ннымъ. Дивлю́сѧ же и҆ си́лѣ бж҃їей бы́вшей въ ва́съ, и҆ во и҆лїѝ проро́цѣ, ꙗ҆́коже глаго́летъ дамаски́нъ: И҆з̾ пла́мене преподѡ́бнымъ ро́сꙋ и҆сточи́лъ є҆сѝ, пра́веднагѡ же же́ртвꙋ водо́ю попали́лъ є҆сѝ: всѧ̑ бо твори́ши хрⷭ҇тѐ, то́кмѡ є҆́же хотѣ́ти. Но ка̑ѧ, разсмотрю̀ пре́жде; Ст҃а́гѡ ли є҆ѵⷢ҇лїа писа́нїе, и҆лѝ ст҃ы́хъ а҆пⷭ҇лъ дѣѧ̑нїѧ; ст҃ы́хъ мꙋ́ченикѡвъ страда̑нїѧ, и҆лѝ ст҃ы́хъ ѻ҆тє́цъ по́двиги; дре́внихъ и҆лѝ но́выхъ ст҃ы́хъ мꙋже́й и҆ же́нъ; всѣ́хъ житїѧ̑ и҆ словеса̀, и҆лѝ толкова̑нїѧ и҆ разсꙋждє́нїѧ и҆́хъ; Недоꙋмѣва́ю и҆ во и҆зстꙋпле́нїе прихождꙋ̀.

Но молю́сѧ тѝ, человѣколю́бче гдⷭ҇и, не попꙋстѝ сїѐ на ѡ҆сꙋжде́нїе мнѣ̀ бы́ти, за недосто́инство моѐ, и҆ неблагода́рный мо́й нра́въ, внегда̀ разсмотрѧ́ти мѝ толи̑кїѧ та̑йны, ꙗ҆̀же ст҃ы̑мъ твои̑мъ ѿкры́лъ є҆сѝ, и҆ ѻ҆́нѣми мнѣ̀ грѣ́шномꙋ и҆ недосто́йномꙋ рабꙋ̀ твоемꙋ̀. Се́ бо влⷣко, ра́бъ тво́й пра́зденъ сы́й ѿ всегѡ̀ пред̾ тобо́ю, и҆ безгла́сенъ, мертвеца̀ ѡ҆́бразъ и҆мѣ́ѧ, не дерза́етъ и҆́но что̀ рещѝ, и҆лѝ безстꙋ́дно разсмотрѣ́ти, но ѻ҆бы́чнѣ припа́даю, и҆з̾ глꙋбины̀ дꙋшѝ зовы́й и҆ глаго́лѧ: влⷣко многоми́лостиве, и҆ прѡ́чїѧ моли́твы глаго́лы. Ѡ҆ дрꙋго́й же моли́твѣ и҆ ѱалмѣ́хъ прилѣжа́ти подоба́етъ въ блюде́нїи нра́вѡвъ дꙋшѝ и҆ тѣ́ла, да прїи́детъ въ навыкнове́нїе бж҃е́ственныхъ ᲂу҆разꙋмѣ́нїй, да всѧ̑ находѧ́щыѧсѧ въ бж҃е́ственныхъ писа́нїѧхъ та̑йны и҆ ди̑вныѧ вє́щи въ чꙋ́вствѣ мно́зи ᲂу҆разꙋмѣ́ти мо́жетъ, и҆ дивѧ́сѧ бж҃е́ствєннымъ дарѡ́мъ, дости́гнетъ во є҆́же люби́ти є҆го̀ є҆ди́наго, и҆ съ ра́достїю за него̀ пострада́ти, ꙗ҆́коже и҆ всѝ свѧті́и. И҆́бо всѧ́кагѡ ᲂу҆́жаса и҆спо́лнєна сꙋ́ть бж҃е́ствєннаѧ писа̑нїѧ, ꙗ҆́коже глаго́летъ соломѡ́нъ. Съ про́чими же чꙋдесы̀ дивлю́сѧ и҆ си́лѣ ма́нны бж҃їѧ, ꙗ҆́кѡ то́йже ви́дъ не соблюда́шесѧ до ᲂу҆́трїѧ, но возсмердѣва́ше, и҆ ѡ҆брѣта́шесѧ по́лнъ черве́й[[И҆схо́д. гл. ѕ҃і, ст. к҃.]], да не пекꙋ́тсѧ невѣ́рнїи ѡ҆ ᲂу҆́трїи, но въ ста́мнѣ, сꙋ́щей въ ски́нїи, при́снѡ пребыва́ше невреди́мь. И҆ па́ки ѻ҆гне́мъ ᲂу҆́бѡ пеко́ма, пребыва́ше несгара́ема, ѿ ма́лыѧ же лꙋчѝ со́лнечныѧ растаѧва́ше, да ненасы́тнїи не собира́ютъ бо́лѣе нꙋ́жныѧ потре́бы[[И҆схо́д. гл. ѕ҃і, ст. к҃а.]]. ѽ чꙋдесѐ! ка́кѡ вездѣ̀ бг҃ъ содѣ́ловаетъ человѣ́че спасе́нїе, ꙗ҆́коже глаго́летъ гдⷭ҇ь ѡ҆ бж҃їи про́мыслѣ: ѻ҆ц҃ъ мо́й досе́лѣ дѣ́лаетъ, и҆ а҆́зъ дѣ́лаю[[І҆ѡа́н. гл. є҃і, ст. з҃і.]]. И҆́же ᲂу҆пражднѧ́ѧйсѧ ѡ҆ бз҃ѣ въ се́мъ, наꙋча́етсѧ ѿ бж҃е́ственныхъ писа́нїй чꙋ́вственнѣ, ѿ про́мысла же бж҃їѧ ᲂу҆́мнѣ. Начина́етъ же зрѣ́ти вє́щи по є҆стествꙋ̀, ꙗ҆́коже глаго́лютъ григо́рїй нѵ́сскїй и҆ дамаски́нъ, и҆ не ктомꙋ̀ крадо́мь быва́етъ ѿ внѣ́шней красоты̀ веще́й мі́ра сегѡ̀, глаго́лю же добро́ты, бога́тства, преходѧ́щей сла́вы, и҆ подо́бныхъ, нижѐ прельща́етсѧ ѿ сꙋ́щей на ни́хъ тѣ́ни, ꙗ҆́коже є҆щѐ стра́стнїи.

Ѡ҆ пѧ́томъ ра́зꙋмѣ.

Ѿ сегѡ́ бо пѧ́тагѡ ра́зꙋма, глаго́лемагѡ совѣ́та, по проро́кꙋ, познава́етъ кто̀, ꙗ҆́коже рече́сѧ на концѣ̀ блаже́нствъ, є҆стество̀ и҆ премѣ́нꙋ чꙋ́вственныхъ творе́нїй, ꙗ҆́кѡ ѿ землѝ сꙋ́ть, и҆ па́ки въ зе́млю возвраща́ютсѧ, по рече́нїю є҆кклесїа́стовꙋ: Сꙋета̀ сꙋ́етствїй, всѧ́чєскаѧ сꙋета̀. И҆ дамаски́нъ то́жде: Всѧ̑ сꙋета̀ человѣ́чєскаѧ[[Є҆клес. гл. а҃, ст. в҃.]], є҆ли̑ка не пребыва́ютъ по сме́рти. не пребыва́етъ бога́тство, не сопꙋ́тствꙋетъ сла́ва: наше́дшей бо сме́рти, сїѧ̑ всѧ̑ потреблѧ́ютсѧ. И҆ па́ки: Вои́стиннꙋ сꙋета̀ всѧ́чєскаѧ, житїе́ же сѣ́нь и҆ со́нїе є҆́сть: и҆́бо всꙋ́е мѧте́тсѧ всѧ́къ земноро́дный, ꙗ҆́коже глаго́летъ писа́нїе: Є҆гда̀ мі́ръ прїѡбрѧ́щемъ, тогда̀ во гро́бъ всели́мсѧ, и҆дѣ́же вкꙋ́пѣ ца́рїе и҆ ни́щїи.

Ѡ҆ шесто́мъ ра́зꙋмѣ.

И҆ внегда̀ бы́ти є҆мꙋ̀ въ навыкнове́нїи безпристра́стїѧ, да́рꙋетсѧ є҆мꙋ̀ шесты́й ра́зꙋмъ, глаго́лемый крѣ́пость[[Ѱал. к҃и, ст. а҃і.]], и҆ начина́етъ безстра́стнѡ ви́дѣти добро́тꙋ чꙋ́вственныхъ тва́рей. Зане́же тре́хъ ᲂу҆строе́нїй сꙋ́ть всѣ̀ по́мыслы[[И҆са́їи гл. а҃і, ст. в҃.]]: и҆́нъ человѣ́ческїй, и҆́нъ бѣсо́вскїй, и҆ и҆́нъ а҆́гг҃льскїй. Человѣ́ческїй ᲂу҆́бѡ є҆́сть, є҆гда̀ взы́детъ на се́рдце мы́сль то́нкаѧ нѣ́каѧ ѿ созда́нїй, си́рѣчь, мꙋ́жъ, зла́то и҆лѝ и҆́но что́либо ѿ чꙋ́вственныхъ тва́рей. Бѣсо́вскїй же быва́етъ сложе́нъ ѿ мы́сли и҆ стра́сти, си́рѣчь, побꙋжда́етъ человѣ́ка и҆лѝ къ безслове́сной дрꙋ́жбѣ, то́ є҆сть, любле́нїю не бг҃а ра́ди быва́емꙋ къ дрꙋ́гꙋ, и҆лѝ къ блꙋдодѣѧ́нїю, и҆лѝ па́ки къ безразсꙋ́дной не́нависти, то́ є҆сть ѕлопомнѣ́нїю, и҆лѝ порица́нїю когѡ̀. Зла́то же подо́бнѣ къ сребролю́бїю, и҆лѝ хище́нїю и҆ грабле́нїю, и҆лѝ къ чемꙋ́либо ѿ таковы́хъ, и҆лѝ къ не́нависти и҆ хꙋлѣ̀ на дѣла̀ бж҃їѧ, да ѿ ѻ҆бою̀ поги́бель содѣ́лаетъ. Поне́же а҆́ще, не ꙗ҆́коже подоба́етъ, вє́щи лю́бимъ, и҆ ѻ҆́ныѧ па́че любвѝ бж҃їей предпочита́емъ, ничи́мже ѿ і҆дѡлослꙋжи́телей разли́чествꙋемъ, глаго́летъ свѧты́й маѯі́мъ. И҆ па́ки: а҆́ще ненави́димъ та̑, ꙗ҆́кѡ не ѕѣлѡ̀ дѡбра̀ сꙋ̑ща, бг҃а прогнѣвлѧ́емъ. А҆́гг҃льскїй же є҆́сть, безстра́стное видѣ́нїе веще́й, си́рѣчь, и҆́стинный ра́зꙋмъ, и҆́же є҆́сть среда̀ ѻ҆бои́хъ стремни́нъ, хранѧ́щъ ᲂу҆́мъ, и҆ ѿлꙋча́ющъ пра́вое намѣ́ренїе ѿ ѡ҆крꙋжа́ющихъ є҆го̀ шестѝ сѣте́й дїа́вольскихъ. Глаго́лю же, ѿ го́рнѧгѡ и҆ до́льнѧгѡ, ѿ є҆́же ѡ҆деснꙋ́ю и҆ ѡ҆шꙋ́юю, ѿ внꙋтрьꙋ́дꙋ сꙋ́щагѡ и҆ внѣꙋ́дꙋ пра́вагѡ намѣ́ренїѧ: то́ є҆сть, и҆́стинный ра́зꙋмъ, ꙗ҆́коже сто́лпъ стоѧ́щїй средѝ рече́нныхъ шестѝ сѣте́й, є҆мꙋ́же ѿ а҆́гг҃лъ наꙋча́ютсѧ ᲂу҆мертви́вшїи себѐ мі́рови, да бꙋ́детъ ᲂу҆́мъ безстра́стенъ, во є҆́же ви́дѣти вє́щи, ꙗ҆́коже подоба́етъ: и҆ нижѐ горѣ̀ пра́вагѡ намѣ́ренїѧ да превзы́детъ возноше́нїемъ, мнѧ́йсѧ что̀ постиза́ти свое́ю мꙋ́дростїю: нижѐ па́ки до́лꙋ да схо́дитъ, неразꙋ́мїемъ, ꙗ҆́кѡ не могꙋ́щїй дости́гнꙋти соверше́нства: нижѐ ѡ҆деснꙋ́ю ᲂу҆клони́тсѧ, ѿвраще́нїемъ ѿ веще́й и҆ не́навистїю, нижѐ ѡ҆шꙋ́юю безслове́снымъ любле́нїемъ, си́рѣчь, пристра́стїемъ. Нижѐ па́ки пребꙋ́детъ внꙋтрьꙋ́дꙋ пра́вагѡ намѣ́ренїѧ соверше́ннымъ невѣ́жествомъ и҆ лѣ́ностїю: нижѐ внѣꙋ́дꙋ многоиспыта́нїемъ и҆ безслове́снымъ тща́нїемъ ѿ нерадѣ́нїѧ и҆лѝ лꙋка́вства. Но ра́зꙋмъ съ терпѣ́нїемъ и҆ смиренномꙋ́дрїемъ и҆ благи́мъ ᲂу҆пова́нїемъ ѿ и҆звѣ́ствованныѧ да прїе́млетъ вѣ́ры, да тѣ́мъ, є҆́же ᲂу҆разꙋмѣ̀ что̀ ѿ ча́сти, къ бж҃е́ственномꙋ раче́нїю возво́дитсѧ, и҆ за є҆́же не вѣ́дѣти въ ра́зꙋмѣ ѿ недоꙋмѣ́нїѧ, смиренномꙋ́дрїе стѧ́жетъ, и҆ пребыва́тельною наде́ждою и҆ вѣ́рою намѣ́ренїе полꙋ́читъ и҆ско́мой ве́щи. И҆ нижѐ что̀ ѿню́дъ ненави́дѧ, ꙗ҆́кѡ ѕло̀, нижѐ напроти́въ безслове́снѣ любѧ́й, но человѣ́ка разсмотрѧ́етъ ко є҆́же ᲂу҆дивлѧ́тисѧ, ка́кѡ ᲂу҆́мъ є҆́сть безпредѣ́ленъ ѡ҆́бразъ бг҃а неви́димагѡ, а҆́ще и҆ тѣ́ломъ ѡ҆бдержи́тсѧ, глаго́летъ вели́кїй васі́лїй. И҆ ка́кѡ достиза́етъ да́же до коне́цъ воѡбраже́нїѧ, ꙗ҆́коже бг҃ъ промышлѧ́ѧй ѡ҆ мі́рѣ. И҆́бо ᲂу҆́мъ во всѧ́кꙋ ве́щь преѡбразꙋ́етсѧ, и҆ начертава́етсѧ, по ви́дꙋ воспрїе́млемой ѿ негѡ̀ ве́щи. Є҆гда́ же сподо́битсѧ бы́ти въ невоѡбраже́нномъ и҆ безви́дномъ бз҃ѣ, тогда̀ быва́етъ неѡбра́зенъ и҆ безви́денъ.

Посе́мъ диви́тсѧ, ка́кѡ всѧ́кꙋ мы́сль храни́ти мо́жетъ то́йже, и҆ нижѐ послѣ̑днѧѧ разꙋмѣ̑нїѧ и҆змѣни́ти пє́рваѧ мо́гꙋтъ, нижѐ па́ки пє́рвыѧ мы̑сли ѿню́дъ повреди́ти послѣ̑днѧѧ: но ꙗ҆́коже сокро́вище, мы́сль всѐ соде́ржитъ без̾ забве́нїѧ. И҆ ка́кѡ восхотѣ́въ ᲂу҆́мъ ѧ҆зы́комъ и҆з̾ѧвлѧ́етъ помышлѧ́ємаѧ, не то́чїю нѡ́ваѧ, но и҆ пре́жде мно́гѡ ᲂу҆сокро́виществѡваннаѧ. И҆ ка́кѡ па́ки при́снѡ и҆схо́дѧтъ словеса̀, ᲂу҆́мъ же неѡскꙋ́денъ ѡ҆брѣта́етсѧ. И҆ па́ки разсмотрѧ́ѧ тѣ́ло, ка́кѡ ѻ҆́чи, ᲂу҆шеса́ же и҆ ѧ҆зы́къ прїе́млютъ ѿ внѣꙋ́дꙋ ᲂу҆потребле́нїе по хотѣ́нїю дꙋшѝ: ѻ҆́вїи ᲂу҆́бѡ свѣ́томъ, ѻ҆́вїи же воздꙋ́хомъ, и҆ нико́еже чꙋ́вство воспѧща́етъ дрꙋго́мꙋ, и҆лѝ твори́ти мо́жетъ что̀ внѣ̀ намѣ́ренїѧ дꙋшѝ. И҆ ка́кѡ бездꙋ́шное тѣ́ло повелѣ́нїемъ бж҃їимъ соедини́сѧ со ᲂу҆́мною и҆ слове́сною дꙋше́ю, ꙗ҆́же ѿ ст҃а́гѡ дх҃а содѣ́тельствована є҆́сть, ꙗ҆́коже глаго́летъ дамаски́нъ, вдохнове́нїемъ; а҆́ще нѣ́цыи и҆ не вѣ́дѧтъ є҆гѡ̀, мнѧ́ще, ꙗ҆́кѡ ѿ пресꙋ́щественнагѡ бж҃ества̀ є҆́сть, є҆́же є҆́сть невозмо́жно. Глаго́летъ бо златоꙋ́стъ: да не возмни́тъ человѣ́ческїй ᲂу҆́мъ себѐ бы́ти бг҃а, вложѝ бг҃ъ забве́нїе и҆ невѣ́дѣнїе въ ѻ҆́нь, да ѿ сегѡ̀ смире́нїе стѧ́жетъ. И҆ па́ки: хотѧ́щꙋ творцꙋ̀ є҆сте́ственное сїѐ смѣше́нїе раздѣле́но сотвори́ти, и҆ слове́снаѧ ᲂу҆́бѡ дꙋша̀, ꙗ҆́коже глаго́летъ лѣ́ствичникъ, и҆лѝ горѣ̀, си́рѣчь на не́бо, и҆лѝ, ᲂу҆вы̀! до́лꙋ во а҆́дъ ѿхо́дитъ: земно́е же тѣ́ло въ зе́млю, ѿ неѧ́же взѧ́то є҆́сть, возвраща́етсѧ. И҆ па́ки: благода́тїю сп҃са на́шегѡ і҆и҃са хрⷭ҇та̀ раздѣлє́ннаѧ на второ́мъ є҆гѡ̀ прише́ствїи соединѧ́тсѧ, да воспрїи́метъ кі́йждо ѿ на́съ по дѣлѡ́мъ свои̑мъ. Ѽ чꙋдесѐ! кто̀ та́йнꙋ сїю̀ ма́лѡ ѡ҆щꙋти́въ не ᲂу҆жа́снетсѧ; Ꙗ҆́кѡ человѣ́ка воздвиза́етъ па́ки ѿ землѝ по толи́цѣхъ ѕлы́хъ, ꙗ҆̀же содѣ́ѧ, презрѣ́въ є҆гѡ̀ за́пѡвѣди, и҆ безсме́ртїе да́рꙋетъ, є҆́же пре́жде и҆мѣ̀, и҆ не сохранѝ за́повѣдь сохранѧ́ющꙋю є҆го̀ ѿ сме́рти и҆ тлѣ́нїѧ: но возгордѣ́всѧ сме́рть на сѧ̀ навлечѐ.

Дивѧ́сѧ ᲂу҆̀бо всѣ̑мъ си̑мъ ѡ҆ человѣ́цѣ и҆ дрꙋги̑мъ мнѡ́гимъ, движе́нїемъ а҆́гг҃лѡвъ ᲂу҆́мнѣ ᲂу҆чи́мый человѣ́къ ᲂу҆жаса́етсѧ, и҆ па́ки зри́тъ зла́та добро́тꙋ и҆ ᲂу҆потребле́нїе, и҆ диви́тсѧ, ка́кѡ ѿ землѝ таково̀ бы́сть на́съ ра́ди, да не мощні́и ᲂу҆́бѡ ми́лостынею и҆ждива́ютъ стѧжа́нїе: не восхотѣ́вшїи же сегѡ̀ раздаѧ́ти, и҆скꙋше́нїѧми нево́льнѣ вспомоществꙋ́еми бꙋ́дꙋтъ во є҆́же спасти́сѧ, а҆́ще со благодаре́нїемъ те́рпѧтъ находѧ̑щаѧ, и҆ спаса́ютсѧ ѻ҆боѝ. Нестѧжа́нїе же предпочита́ющїи, ᲂу҆вѣнча́ютсѧ, ꙗ҆́кѡ вышеесте́ствєннаѧ творѧ́щїи, ꙗ҆́коже и҆ ѡ҆ дѣ́вствѣ подвиза́ющїесѧ, и҆ ꙗ҆́кѡ ᲂу҆́бѡ тлѣ́ннꙋ и҆ зе́мнꙋ ве́щь не предпочита́ютъ па́че за́повѣди бж҃їей. Но ꙗ҆́кѡ творе́нїе бж҃їе, и҆ потре́бное къ тѣле́снѣй жи́зни и҆ спасе́нїю, не не́нависти досто́йнꙋ, по воздержа́нїѧ и҆ любвѐ: и҆ вкра́тцѣ, добро́тꙋ всѧ́кїѧ ве́щи и҆ ᲂу҆потребле́нїе безпристра́стнѣ зрѧ̀ просвѣща́емый, лю́битъ творца̀, и҆ разсмотрѧ́ѧ всѧ̑ чꙋ́вствєннаѧ, гѡ́рнѧѧ и҆ дѡ́льнѧѧ созда̑нїѧ, глаго́лю же, не́бо, со́лнце, лꙋнꙋ̀, ѕвѣ́зды, ѻ҆блака̀, тꙋ́чы, дождѝ, снѣ́гъ, гра́дъ: и҆ ка́кѡ при толи́цѣй теплотѣ̀ смерза́етсѧ вода̀, по си́хъ гро́мъ, мо́лнїю, вѣ́тры, воздꙋ́хъ, и҆ премѣ́нꙋ си́хъ, времена̀, лѣ̑та, дни̑, нѡ́щи, часы̀, мгновє́нїѧ, зе́млю, мо́ре, неисчє́тныѧ скоты̀, четверонѡ́гаѧ живѡ́тнаѧ, ѕвѣ́ри и҆ пресмыка̑ющаѧсѧ, мно́гїе ро́ды пти́цъ, и҆сто́чники и҆ рѣ́ки, безчи́слєнныѧ ро́ды растѣ́нїй и҆ тра́въ, садѡ́выѧ и҆ ди̑вїѧ. Зри́тъ бо во всѣ́хъ чи́нъ, ᲂу҆строе́нїе, вели́чество, добрѡ́ты, число̀ составле́нїѧ, соедине́нїе, согла́сїе, ᲂу҆потребле́нїе, схо́дство, многоразли́чїе, красотꙋ̀, положе́нїе, движе́нїе, цвѣты̀, ѡ҆́бразы, ви́ды, возвраще́нїе па́ки въ та̑же, пребыва́нїе въ тлѣ́нныхъ, и҆ про́стѣ всѧ̑ чꙋ́вствєннаѧ созда̑нїѧ приводѧ̀ въ ᲂу҆́мъ, ᲂу҆жаса́етсѧ дивѧ́сѧ созда́телю, ка́кѡ ѿ не сꙋ́щихъ є҆ди́нѣмъ повелѣ́нїемъ и҆зведѐ четы́ре стїхі̑и, си́рѣчь, зе́млю, во́дꙋ, ѻ҆́гнь, и҆ воздꙋ́хъ: и҆ ка́кѡ проти̑вныѧ сꙋ́ще, премꙋ́дростїю бж҃їею дрꙋ́гъ ѿ дрꙋ́га не поврежда́ютсѧ: и҆ ка́кѡ и҆з̾ си́хъ всѧ̑ на́съ ра́ди сотворѝ, и҆ сїѧ̑ ма̑ла сꙋ̑ща проти́вꙋ снизхожде́нїѧ хрⷭ҇то́ва по бг҃осло́вꙋ, и҆ проти́вꙋ бꙋ́дꙋщихъ бла̑гъ. Разсмотрѧ́ѧ же сокрове́ннꙋю въ тва́рѧхъ бла́гость бж҃їю и҆ премꙋ́дрость, си́лꙋ же и҆ про́мыслъ, ꙗ҆́коже са́мъ ѻ҆́нъ речѐ къ і҆́ѡвꙋ ѡ҆ хꙋдо́жествахъ: та́же сꙋ́щꙋю въ словесѣ́хъ и҆ писа́нїѧхъ, ка́кѡ ма́лымъ си́мъ и҆ бездꙋ́шнымъ черни́ломъ таковы̑ѧ и҆ толи̑кїѧ та̑йны ѿкры̀ на́мъ чрез̾ бж҃е́ствєннаѧ писа̑нїѧ[[І҆́ѡва, л҃и.]]; Ди́вно же є҆́сть, ꙗ҆́кѡ свѧті́и ᲂу҆́бѡ проро́цы и҆ а҆по́столи со мно́гимъ трꙋдо́мъ и҆ любо́вїю къ бг҃ꙋ толи̑каѧ полꙋчи́ша блага̑ѧ, мы́ же ѿ є҆ди́нагѡ чте́нїѧ ᲂу҆чи́ми є҆смы̀. Ꙗ҆́коже бо словє́снаѧ писа̑нїѧ глаго́лютъ на́мъ пресла̑внѣйшаѧ, и҆ сїѧ̑ вѣ́дѧй вѣ́рꙋетъ, ꙗ҆́кѡ нѣ́сть ничто́же въ творе́нїи непотре́бно, нижѐ ѕло̀, но и҆ внѣ̀ во́ли бж҃їей быва̑юща, во блага̑ѧ претворѧ́етъ бг҃ъ чꙋде́снѣ. Ꙗ҆́коже паде́нїе дїа́вола, не бѣ̀ во́ли бж҃їей, но сѐ на по́льзꙋ спаса́емыхъ бы́сть. Попꙋща́етъ бо во є҆́же и҆скꙋша́ти произволѧ́ющихъ, по си́лѣ ка́ждагѡ, ꙗ҆́коже глаго́летъ ст҃ы́й і҆саа́къ, да посра́мленъ бꙋ́детъ ѿ равноа́гг҃льныхъ человѣ̑къ, и҆ побѣжда́етсѧ бж҃їемъ содѣ́йствїемъ не то́чїю ѿ мꙋже́й, но и҆ ѿ премно́гихъ же́нъ, терпѣ́нїемъ же и҆ вѣ́рою къ подвигополо́жникꙋ, ѿ негѡ́же и҆ нетлѣ́нїѧ вѣнцы̀ прїе́млютъ, бл҃года́тїю є҆гѡ̀ и҆ человѣколю́бїемъ: занѐ то́й є҆́сть побѣди́вый и҆ побѣжда́ѧй безстꙋ́днаго ѕмі́ѧ и҆ человѣкоꙋбі́йцꙋ. И҆ ѻ҆́въ ᲂу҆́бѡ прїе́мь да́ръ ра́зꙋма дꙋхо́внагѡ, вѣ́сть, ꙗ҆́кѡ всѧ̑ сꙋ́ть дѡбра̀ ѕѣлѡ̀: ѻ҆́въ же є҆щѐ нача́ло и҆мы́й бг҃оразꙋ́мїѧ, до́лженъ є҆́сть вѣ́дѣти во смире́нїи, ꙗ҆́кѡ не вѣ́сть, ѡ҆ всѧ́кой ве́щи глаго́лѧ: не вѣ́мъ, ꙗ҆́коже глаго́летъ златоꙋ́стъ. Рече́ бо, а҆́ще кто̀ рече́тъ ѡ҆ высотѣ̀ небе́снѣй, ꙗ҆́кѡ толи́ка є҆́сть, и҆ а҆́зъ ре́клъ бы́хъ, не вѣ́мъ, всѧ́кѡ а҆́зъ и҆́стинꙋ рѣ́хъ: а҆́ще ѻ҆́нъ и҆ прельща́етсѧ, мнѧ́йсѧ вѣ́дѣти, є҆́же не вѣ́сть, ꙗ҆́коже подоба́етъ[[а҃ Кор. гл. и҃, ст. в҃.]], по а҆по́столꙋ. Сегѡ̀ ра́ди до́лжни є҆смы̀ и҆звѣ́ствованною вѣ́рою и҆ вопроше́нїемъ и҆скꙋ́сныхъ прїима́ти догма́ты цр҃кви, и҆ разсꙋждє́нїѧ ᲂу҆чи́телей ѡ҆ бж҃е́ственномъ писа́нїи, и҆ ѡ҆ чꙋ́вственныхъ и҆ мы́сленныхъ созда́нїѧхъ, да не ᲂу҆твержда́ѧсѧ на свое́мъ ра́зꙋмѣ паде́мъ ско́рѡ, ꙗ҆́коже речѐ свѧты́й дѡроѳе́й: но во всѣ́хъ до́лжни є҆смы̀ ѡ҆брѣта́ти своѐ невѣ́жество, да и҆ща́й кто̀ и҆ не вѣ́рꙋѧй свои̑мъ разꙋмѣ́нїѧмъ, восхо́щетъ наꙋчи́тисѧ, и҆ недоꙋмѣ́въ ѡ҆ мно́зѣмъ ра́зꙋмѣ, ᲂу҆вѣ́сть своѐ невѣ́жество ѿ безконе́чныѧ бж҃їѧ премꙋ́дрости. Оу҆́мъ бо ᲂу҆́мный ᲂу҆́мно всѧ́чески чꙋ́вство прїе́млетъ, є҆гда̀ ѡ҆чи́ститъ себѐ бг҃ови, ꙗ҆́коже глаго́летъ бг҃осло́въ: ѻ҆ба́че до́лжни є҆смы̀ ра́зꙋмъ и҆мѣ́ти къ вѧ́щшемꙋ стра́хꙋ: да не ка́кѡ ѡ҆брѧ́щетсѧ є҆ди́нъ догма́тъ сокрове́нный въ дꙋшѣ̀ лꙋка́въ, могі́й погꙋби́ти ю҆̀ кромѣ̀ и҆на́гѡ грѣха̀, глаго́летъ вели́кїй васі́лїй. Сегѡ̀ ра́ди не подоба́етъ на́мъ ѿ лѣ́ности и҆лѝ тщесла́внагѡ ᲂу҆се́рдїѧ въ сїѐ видѣ́нїе пре́жде вре́мени тещѝ, но по рѧ́дꙋ за́пѡвѣди хрⷭ҇тѡ́вы и҆ предречє́ннаѧ видѣ̑нїѧ твори́ти без̾ возноше́нїѧ. И҆ є҆гда̀ терпѣ́нїемъ и҆ слеза́ми мно́гими стра́ха и҆ пла́ча ѡ҆мы́емъ дꙋ́шꙋ свою̀, и҆ прїи́демъ во є҆́же ви́дѣти по є҆стествꙋ̀, и҆ въ навыкнове́нїи си́хъ бꙋ́демъ, тогда̀ въ сїѐ видѣ́нїе ᲂу҆́мъ самодви́жнѣ прїи́детъ, ᲂу҆́мнѣ ѿ а҆́гг҃лѡвъ наставлѧ́емь. А҆́ще же кто̀ де́рзостнѣйшїй ѡ҆брѧ́щетсѧ: и҆ пре́жде пе́рвыхъ во втора̑ѧ вни́ти восхо́щетъ, да вѣ́сть, ꙗ҆́кѡ не то́чїю не мо́жетъ ᲂу҆лꙋчи́ти намѣ́ренїѧ бг҃оꙋго́днагѡ, но и҆ мно́ги воздви́жетъ на сѧ̀ бра̑ни, па́че же ѿ видѣ́нїѧ ѡ҆ человѣ́цѣ, ꙗ҆́коже слы́шахомъ ѡ҆ а҆да́мѣ. Ни ма́лѡ же не по́льзꙋетъ стра̑стнымъ сꙋ́щымъ твори́ти дѣла̀, и҆лѝ мы́слити разꙋмѣ̑нїѧ безстра́стныхъ, ꙗ҆́коже ни ма́лѡ не по́льзꙋетъ младе́нцємъ тве́рдаѧ пи́ща, а҆́ще и҆ ѕѣлѡ̀ поле́зна є҆́сть совершє́ннымъ. Но съ разсꙋжде́нїемъ до́лженъ є҆́сть хотѣ́ти, и҆ ᲂу҆клонѧ́тисѧ ꙗ҆́кѡ недосто́йный. И҆ нижѐ ѿ ѿча́ѧнїѧ и҆ ᲂу҆ны́нїѧ ѿвраща́тисѧ благода́ти, є҆гда̀ прїи́детъ, нижѐ па́ки ѿ де́рзости и҆ска́ти чегѡ̀ пре́жде вре́мени, да не и҆́щꙋще ꙗ҆̀же вре́мени пре́жде вре́мени, ꙗ҆́коже глаго́летъ лѣ́ствичникъ, нижѐ во вре́мѧ полꙋ́чимъ сїѧ̑. Но прельсти́вшесѧ не́гли ни и҆справле́нїе ѡ҆брѧ́щемъ ѿ ко́егѡлибо человѣ́ка, и҆лѝ писа́нїѧ. А҆́ще бо и҆́мать кто̀ по бз҃ѣ намѣ́ренїе, да во смире́нїи и҆ терпѣ́нїи находѧ́щихъ є҆мꙋ̀ и҆скꙋше́нїй пои́щетъ ве́щи ѿ недоꙋмѣ́нїѧ, и҆ не́гли прельсти́тсѧ въ то́й, и҆́мать ѡ҆брѣстѝ ѿ бг҃а рѣше́нїе. И҆ та́кѡ со мно́гимъ стꙋдо́мъ и҆ ра́достїю возвраща́етсѧ вспѧ́ть и҆ща́й пꙋтѝ ѻ҆тє́цъ. Занѐ по бз҃ѣ быва̑ющаѧ, а҆ не по и҆но́мꙋ чесомꙋ́же, глаго́летъ лѣ́ствичникъ, во благо́е вмѣнѧ́етсѧ на́мъ ѿ благода́ти, а҆́ще и҆ ѕѣлѡ̀ бꙋ́детъ не добро̀ быва́емое. А҆́ще же не та́кѡ, нижѐ и҆́мать терпѣ́нїѧ и҆ смире́нїѧ, мнѡ́га и҆́мать пострада́ти, ꙗ҆̀же мно́зїи пострада́ша и҆ погибо́ша безꙋ́мїемъ свои́мъ, вѣ́рꙋюще свои̑мъ разꙋмѣ́нїѧмъ, и҆ возмнѣ́ша до́брѣ ше́ствовати без̾ наста́вника, и҆лѝ и҆скꙋ́са ѿ терпѣ́нїѧ и҆ смире́нїѧ быва́юща: и҆скꙋ́съ бо не и҆́мать ско́рби, нижѐ и҆скꙋше́нїѧ, не́гли же и҆ бра́ни. А҆́ще же попꙋщено̀ бꙋ́детъ ма́лѡ ра́тꙋемꙋ бы́ти, мно́гїѧ ра́дости и҆ по́льзы вино́ю бꙋ́детъ сїѐ и҆скꙋше́нїе и҆скꙋ́сномꙋ: занѐ во є҆́же наꙋчи́тисѧ и҆скꙋ́сꙋ, и҆ прїѧ́ти мꙋ́жество на врагѝ попꙋща́етсѧ ѿ бг҃а. Зна́мєнїѧ же сегѡ̀ сꙋ́ть сле́зы и҆ сокрꙋше́нїе дꙋшѝ пред̾ бг҃омъ, и҆ є҆́же прибѣга́ти къ безмо́лвїю и҆ бг҃ꙋ съ терпѣ́нїемъ, и҆ є҆́же притрꙋ́днѣ и҆спы́товати писа́нїе, и҆ съ вѣ́рою жела́ти намѣ́ренїѧ бж҃їѧ. Пе́рвагѡ же зна́менїе є҆́сть сїѐ, є҆́же сомнѣ́тисѧ ѡ҆ по́мощи бж҃їей, стыдѣ́тисѧ вопроша́ти со смире́нїемъ, и҆ ᲂу҆далѧ́тисѧ ѿ безмо́лвїѧ и҆ чте́нїѧ, люби́ти же попече́нїе и҆ бесѣ̑ды, мнѧ̀ ѿ си́хъ поко́й ᲂу҆лꙋчи́ти, є҆́же є҆́сть не возмо́жно: но па́че въ таково́е вре́мѧ вкоренѧ́ютсѧ стра̑сти, и҆ крѣ̑пльша быва́ютъ и҆скꙋшє́нїѧ, и҆ ᲂу҆множа́етсѧ малодꙋ́шїе, неблагода́рность же и҆ ᲂу҆ны́нїе ѿ мно́гагѡ неразꙋ́мїѧ. Занѐ и҆́на сꙋ́ть и҆скꙋшє́нїѧ сынѡ́въ, къ наказа́нїю и҆ ᲂу҆че́нїю прилꙋчи́вшагѡсѧ ᲂу҆чи́тельства, и҆ и҆́на врагѡ́въ къ поги́бели. Па́че же є҆гда̀ ѿ го́рдости кто̀ порꙋга́емь быва́етъ: ꙗ҆́кѡ бг҃ъ гѡ́рдымъ проти́витсѧ, смирє́ннымъ же дае́тъ благода́ть[[При́тч. гл. г҃, ст. л҃д.]].

Всѧ́ка ᲂу҆́бѡ ско́рбь, терпѣ́нїе и҆мꙋ́щаѧ, добра̀ є҆́сть и҆ поле́зна: не и҆мꙋ́щаѧ же сегѡ̀, є҆́сть ѿвраще́нїе бж҃їе, и҆ безполе́зна, а҆́ще кто̀ смиреномꙋ́дрїемъ не ᲂу҆врачꙋ́етъ ю҆̀, и҆на́гѡ бо врачевства̀ нѣ́сть. Занѐ смиреномꙋ́дрый себѧ̀ порица́етъ и҆ ѡ҆бвинѧ́етъ, внегда̀ ѡ҆скорбле́нъ бꙋ́детъ, а҆ не дрꙋга́го кого̀. И҆ сегѡ̀ ра́ди те́рпитъ, и҆ща̀ ѿ бг҃а рѣше́нїѧ, и҆ ѡ҆брѣ́тъ ра́дꙋетсѧ, и҆ со благодаре́нїемъ те́рпитъ, и҆ во и҆скꙋ́сѣ таковы́хъ бы́въ прїе́млетъ ра́зꙋмъ. И҆ познава́ѧ свою̀ не́мощь и҆ невѣ́жество, притрꙋ́днѣ и҆́щетъ врача̀, и҆ и҆ща́й ѡ҆брѣта́етъ и҆сцѣле́нїе[[Матѳ. гл. з҃, ст. и҃.]], ꙗ҆́коже са́мъ речѐ хрⷭ҇то́съ, и҆ полꙋчи́въ сїѐ лю́битъ, и҆ любѧ́й бо́лѣе люби́мь є҆́сть, и҆ ѡ҆чища́ѧ себѐ по возмо́жности, мѣ́сто сотвори́ти люби́момꙋ подвиза́етсѧ. И҆ се́й ѡ҆брѣ́тъ мѣ́сто, ѡ҆бита́етъ, ꙗ҆́коже глаго́летъ въ ста́рчествѣ, и҆ ѡ҆бита́ѧ сохранѧ́етъ до́мъ сво́й, и҆ просвѣща́тисѧ начина́етъ. Просвѣща́емый же разꙋмѣва́етъ, и҆ разꙋмѣва́ѧй разꙋмѣ́етсѧ, ꙗ҆́коже глаго́летъ дамаски́нъ. Сїѧ̑ ᲂу҆́бѡ и҆ ꙗ҆̀же пре́жде речє́ннаѧ, по рѧ́дꙋ подоба́етъ храни́ти всѧ́комꙋ, и҆ є҆ли̑ка є҆щѐ пости́гнетъ, дѣ́лати подоба́етъ. Є҆ли́ко же не возмо́жетъ пости́гнꙋти, съ молча́нїемъ благодари́ти до́лженствꙋетъ, ꙗ҆́коже глаго́летъ ст҃ы́й і҆саа́къ, и҆ да не безстꙋ́днѡ вни́ти помы́слитъ. Глаго́летъ бо ѻ҆́нъ же, и҆з̾ сїра́ха взѧ́въ словеса̀: є҆гда̀ ѡ҆брѧ́щеши ме́дъ, ꙗ҆́ждь ᲂу҆мѣ́реннѡ, да не ка́кѡ пресыще́нъ и҆зблю́еши[[При́тч. гл. к҃є, ст. ѕ҃і.]]. И҆ ꙗ҆́коже глаго́летъ бг҃осло́въ: видѣ́нїе бо неѡбꙋ́зданно, не́гли и҆ въ стремни̑ны порѣ́етъ, си́рѣчь, є҆́же и҆ска́ти вышемѣ́рнагѡ, и҆ не хотѣ́ти рещѝ, ꙗ҆́кѡ бг҃ъ вѣ́сть сїѧ̑, а҆́зъ же кто̀ є҆́смь; и҆ вѣ́ровати, ꙗ҆́кѡ сотвори́вый го́ры, и҆ вели̑кїѧ ки́ты, то́й и҆ жа́ло пчелы̀ ᲂу҆тончѝ, ꙗ҆́коже глаго́летъ вели́кїй васі́лїй. Дости́гшїй ᲂу҆́бѡ ѿ крѣ́пости въ ра́зꙋмъ, разꙋмѣва́етъ ѿ чꙋ́вственныхъ мы́слєннаѧ, и҆ ѿ вре́менныхъ и҆ ви́димыхъ неви̑димаѧ и҆ вѣ̑чнаѧ. И҆ разꙋмѣва́етъ по благода́ти, ꙗ҆̀же ѡ҆ го́рнихъ си́лахъ, ꙗ҆́кѡ є҆ди́нагѡ пра́ведника нѣ́сть досто́инъ ве́сь мі́ръ. И҆ внемлѝ, глаго́летъ златоꙋ́стъ, толи́кихъ наро́дѡвъ и҆ ꙗ҆зы̑къ: и҆́хже пра́ведникъ бо́льшїй є҆́сть. А҆́гг҃лъ же всѧ́чески человѣ́ка бо́лїй є҆́сть. И҆ довлѣ́етъ видѣ́нїе є҆ди́ною ко всѧ́комꙋ ᲂу҆́жасꙋ. И҆ па́ки, что̀ понесѐ равноа́гг҃льный данїи́лъ, ви́дѧ а҆́гг҃ла[[Данїи́л. гл. и҃, ст. з҃і.]].

Ѡ҆ седьмо́мъ ра́зꙋмѣ.

Сподо́бивыйсѧ седьма́гѡ ра́зꙋма, ᲂу҆дивлѧ́етсѧ мно́жествꙋ безпло́тныхъ си́лъ, власте́й, престо́лѡвъ, госпо́дствїй, серафі́мѡвъ, херꙋві́мѡвъ, девѧтѝ чинѡ́въ, ѡ҆брѣта́ющихсѧ во всѣ́хъ бж҃е́ственныхъ писа́нїѧхъ: и҆́хже ᲂу҆дивлѧ́етсѧ є҆стествꙋ̀, крѣ́пости, и҆ про́чымъ бла́гамъ, ꙗ҆̀же ѡ҆ ни́хъ зри̑ма сꙋ́ть, бг҃ꙋ и҆ творцꙋ̀ и҆́хъ вѣ́дѡмымъ: и҆ ка́кѡ по чи́нꙋ стоѧ́тъ. И҆ и҆́ннаѧ достѡ́инства и҆́мꙋтъ гѡ́рнѧѧ вѡ́инства, ѡ҆ ни́хже глаго́летъ златоꙋ́стъ, ꙗ҆́кѡ гдⷭ҇ь саваѡ́ѳъ, гдⷭ҇ь во́инствъ, си́лъ, толкꙋ́етсѧ, и҆ ка́кѡ дрꙋ́гъ дрꙋ́гꙋ преподаю́тъ просвѣще́нїе. А҆́гг҃ли ᲂу҆́бѡ, глаго́летъ, на́съ человѣ́кѡвъ просвѣща́ютъ, ті́и же просвѣще́нїе прїе́млютъ ѿ а҆рха̑гг҃лъ, а҆ сі́и ѿ нача̑лъ, и҆ та́кѡ кі́йждо чи́нъ ѿ дрꙋга́гѡ просвѣще́нїе и҆ ра́зꙋмъ прїе́млетъ. И҆ па́ки, ка́кѡ человѣ́ческїй ро́дъ є҆ди́нꙋ ѻ҆́вцꙋ бы́ти глаго́лютъ, ю҆́же не бг҃ъ погꙋбѝ, но сама̀ себѐ погꙋби́ла є҆́сть: а҆́гг҃лѡвъ же де́вѧтьдесѧть де́вѧть. И҆ разсмотрѧ́ѧ премꙋ́дрость творца̀ и҆ си́лꙋ, ка́кѡ толи̑каѧ мно́жєства є҆ди́нѣмъ сотворѝ повелѣ́нїемъ; Вопе́рвыхъ ᲂу҆́бѡ, глаго́летъ бг҃осло́въ, разꙋмѣва́етъ а҆́гг҃льскїѧ си̑лы и҆ прѡ́чаѧ: и҆ вше́дъ ᲂу҆́мнѣ внꙋ́трь хра́ма, си́рѣчь, завѣ́сы, быва́етъ невеще́ственъ, ꙗ҆́коже глаго́летъ ст҃ы́й і҆саа́къ: проѡбразꙋ́етъ же внѣ́шнїй хра́мъ мі́ръ се́й, завѣ́са же, си́рѣчь, две́рь до́ма, тве́рдь небе́снꙋю, ст҃а̑ѧ же ст҃ы́хъ, премі́рныхъ, и҆дѣ́же безпло́тнїи и҆ невеще́ственнїи непреста́ннѡ воспѣва́ютъ бг҃а, и҆ ѡ҆ на́съ мо́лѧтъ є҆го̀, по вели́комꙋ а҆ѳана́сїю. И҆ та́кѡ прихо́дитъ въ ми́ръ по́мыслѡвъ, и҆ сы́нъ бж҃їй по благода́ти быва́етъ, познава́ѧ сокровє́нныѧ въ бж҃е́ственныхъ писа́нїѧхъ та̑йны, ꙗ҆́коже глаго́летъ дамаски́нъ. Раздра́сѧ хра́ма бж҃е́ственнаѧ завѣ́са, на крⷭ҇тѣ̀ содѣ́телѧ сокрове́ннꙋю въ писа́нїи ꙗ҆влѧ́ющи вѣ̑рнымъ и҆́стинꙋ, бл҃гослове́нъ є҆сѝ, зовꙋ́щымъ, бж҃е ѻ҆тє́цъ на́шихъ: и҆ ꙗ҆́коже глаго́летъ ст҃ы́й косма̀ пѣснопѣ́вецъ: Ѿ дре́ва вкꙋси́въ пе́рвый въ человѣ́цѣхъ, тлѣ́нїю порабо́тисѧ, ѿверже́нїемъ бо жи́зни безче́стнѣйшимъ ѡ҆сꙋди́всѧ, всемꙋ̀ ро́дꙋ, ꙗ҆́кѡ тѣлотлѣ́ненъ, нѣ́кїй вре́дъ недꙋ́га преподадѐ, но ѡ҆брѣ́тше земноро́днїи воззва́нїе кре́стнымъ дре́вомъ, зове́мъ: препѣ́тый ѻ҆тцє́въ бж҃е, и҆ про́чее.

Ѡ҆ ѻ҆сьмо́мъ ра́зꙋмѣ.

Ѿ сегѡ́ же седьма́гѡ ра́зꙋма возво́дитсѧ въ видѣ́нїе ѡ҆ бз҃ѣ второ́ю и҆ чи́стою моли́твою, подоба́ющею ᲂу҆мозри́тельномꙋ, ꙗ҆́коже въ са́момъ ѻ҆́номъ ᲂу҆стремле́нїи моли́твы восхища́етсѧ ᲂу҆́мъ ѿ бж҃е́ственныѧ любвѐ, и҆ не ктомꙋ̀ вѣ́сть что̀ ѿню́дъ мі́ра сегѡ̀, ꙗ҆́коже глаго́летъ маѯі́мъ и҆ дамаски́нъ. И҆ не то́чїю ᲂу҆́мъ всѧ̑ забыва́етъ, но и҆ себѐ самаго̀: глаго́летъ бо ст҃ы́й ні́лъ, ꙗ҆́кѡ а҆́ще себѐ ᲂу҆́мъ вѣ́сть, нѣ́сть во є҆ди́номъ бз҃ѣ, но и҆ въ себѣ̀. Тогда́ бо прїе́млетъ, глаго́летъ ст҃ы́й маѯі́мъ, ѡ҆ бз҃ѣ є҆ѵⷢ҇лїа, и҆ бг҃осло́въ быва́етъ, сподо́бльсѧ наше́ствїѧ ст҃а́гѡ дх҃а. Ѡ҆ бз҃ѣ же слы́шай, да не мни́тъ ѿ неразꙋмѣ́нїѧ кто̀ бы́ти самаго̀ бг҃а, ꙗ҆̀же ѡ҆ не́мъ ви̑димаѧ, си́рѣчь, благосты́ню, благода́ть, пра́вдꙋ, ѡ҆свѧще́нїе, свѣ́тъ, ѻ҆́гнь, сꙋщество̀, є҆стество̀, си́лꙋ, премꙋ́дрость, и҆ подѡ́бнаѧ, глаго́летъ вели́кїй дїонѵ́сїй. Но нижѐ є҆ли̑ка ᲂу҆́мъ ѡ҆предѣли́ти мо́жетъ: безпредѣ́льно бо є҆́сть и҆ неѡпи́санно бж҃ество̀, и҆ не ѡ҆ то́мъ, є҆́же въ не́мъ, но є҆́же ѡ҆ не́мъ бг҃осло́вствꙋетсѧ, ꙗ҆́коже глаго́летъ вели́кїй дїонѵ́сїй къ ст҃о́мꙋ тїмоѳе́ю, приве́дъ свидѣ́тельство ст҃а́гѡ і҆ероѳе́а. Па́че же справедли́вѣе рещѝ, непостижи́мо, неизслѣ́димо, неиспы́тно, и҆ є҆ли̑ка нѣ́сть мо́щно ѡ҆предѣли́ти: па́че бо ᲂу҆ма̀ є҆́сть и҆ мы́сли, и҆ є҆ди́номꙋ себѣ̀ вѣ́домъ, є҆ди́ный бг҃ъ трїѷпоста́сный, безнача́льный, безконе́чный, преблагі́й, препѣ́тый. И҆ глаго́лємаѧ ѡ҆ не́мъ ѿ бж҃е́ственнагѡ писа́нїѧ, ѿ недоꙋмѣ́нїѧ глаго́лютсѧ, да ᲂу҆вѣ́мы, ꙗ҆́кѡ є҆́сть бг҃ъ, а҆ не что̀ є҆́сть, занѐ непостижи́мь є҆́сть всемꙋ̀ слове́сномꙋ и҆ ᲂу҆́мномꙋ є҆стествꙋ̀. Подо́бнѣ же и҆ воплоще́нїю сн҃а бж҃їѧ, и҆ по ѵ҆поста́си соедине́нїю, ꙗ҆́коже глаго́летъ ст҃ы́й кѷрі́ллъ, подоба́етъ диви́тисѧ, и҆ ка́кѡ въ бж҃ествѣ̀ є҆гѡ̀ состои́тъ пло́ть, ю҆́же прїѧ́тъ ѿ на́съ, по вели́комꙋ васі́лїю. Занѐ ꙗ҆́коже желѣ́зо и҆ ѻ҆́гнь: та́кѡ є҆́сть и҆ соедине́нїе, да є҆ди́наго хрⷭ҇та̀ во двою̀ є҆стествꙋ̑ ᲂу҆вѣ́мы, ꙗ҆́коже речѐ дамаски́нъ къ бцⷣѣ: Є҆ди́нꙋ ᲂу҆́бѡ ѵ҆поста́сь во двою́ же є҆стествꙋ̑ родила̀ є҆сѝ бг҃а воплоще́нна, є҆мꙋ́же всѝ пое́мъ: Бж҃е благослове́нъ є҆сѝ. И҆ па́ки: Безпредѣ́льный пребы́сть непремѣ́ненъ, пло́ти по ѵ҆поста́си соедини́лсѧ є҆́сть, ꙗ҆́кѡ благоꙋтро́бенъ въ тебѣ̀ прест҃а́ѧ, є҆ди́ный благослове́нный.

Ꙗ҆́кѡ не и҆́мꙋтъ разногла́сїѧ бж҃е́ствєннаѧ писа̑нїѧ.

И҆ вкра́тцѣ, всѧ́ко чте́нїе и҆лѝ ѱалмопѣ́нїе разсмотрѧ́ѧ вма́лѣ просвѣти́выйсѧ, видѣ́нїе ѡ҆брѣта́етъ и҆ бг҃осло́вїе, и҆ ко́еждо писа́нїе свидѣ́тельствꙋемо ѿ дрꙋга́гѡ писа́нїѧ. И҆мѣ́ѧй же ᲂу҆́мъ є҆щѐ непросвѣще́нъ, мни́тъ, ꙗ҆́кѡ бж҃е́ствєннаѧ писа̑нїѧ и҆́мꙋтъ разногла́сїе, но не въ бж҃е́ственныхъ писа́нїѧхъ сїѧ̑: да не бꙋ́детъ. Занѐ бж҃е́ствєннаѧ писа̑нїѧ ѻ҆́ва ᲂу҆́бѡ свидѣ́тельство и҆́мꙋтъ ѿ дрꙋги́хъ писа́нїй, ѻ҆́ва же и҆́мꙋтъ вре́мѧ винꙋ̀, и҆лѝ лицѐ, и҆ сегѡ̀ ра́ди всѧ́ко рече́нїе писа́нїѧ непогрѣши́тельно є҆́сть: внѣ́ же си́хъ ѡ҆бразѡ́въ сꙋ́щее дѣ́ло є҆́сть на́шегѡ неразꙋ́мїѧ. И҆ никто́же до́лженъ є҆́сть порица́ти писа́нїѧ, но все́ю си́лою ѻ҆́наѧ соблюда́ти, ꙗ҆́коже нахо́дѧтсѧ, а҆ не ꙗ҆́коже то́й хо́щетъ, ꙗ҆́коже є҆́ллини и҆ і҆ꙋдє́и творѧ́хꙋ, не хотѧ́ще глаго́лати, не вѣ́мъ что̀ є҆́сть: но ѿ мнѣ́нїѧ и҆ самоꙋго́дїѧ, писа̑нїѧ и҆ є҆стество̀ веще́й порица́хꙋ, и҆ ꙗ҆́коже и҆̀мъ мнѧ́шесѧ, разꙋмѣ́ша, а҆ не по во́ли бж҃їей: сегѡ̀ ра́ди прельсти́шасѧ, и҆ во всѧ́кꙋ ѕло́бꙋ ᲂу҆клони́шасѧ. Всѧ́къ бо и҆ща́й намѣ́ренїѧ писа́нїѧ, не соста́витъ никогда́же своегѡ̀ разꙋмѣ́нїѧ, и҆лѝ блага́гѡ и҆лѝ ѕла́гѡ: но, ꙗ҆́коже и҆зреко́ша вели́кїй васі́лїй и҆ златоꙋ́стъ, бж҃е́ственное писа́нїе и҆́мать наста́вника, а҆ не мі́ра сегѡ̀ ᲂу҆чє́нїѧ: да а҆́ще что̀ бг҃ъ вло́житъ въ чи́стое се́рдце кромѣ̀ разсмотре́нїѧ, ѻ҆но̀ прїе́млетъ, а҆́ще съ ни́мъ и҆ свидѣ́тельство ѡ҆брѧ́щетсѧ ѿ бж҃е́ственныхъ писа́нїй, ꙗ҆́коже глаго́летъ вели́кїй а҆нтѡ́нїй. Входѧ́щыѧ бо мы̑сли самодѣ́йственнѣ во ᲂу҆́мъ безмо́лвствꙋющихъ ѡ҆ бз҃ѣ, кромѣ̀ разсмотре́нїѧ, прїе́млемы сꙋ́ть, глаго́летъ ст҃ы́й і҆саа́къ. И҆спы́товати же и҆ разсмотрѧ́ти комꙋ̀, своѧ̀ є҆́сть во́лѧ, и҆ вѣ́дѣнїе тѣле́сно, па́че же а҆́ще понꙋжда́етъ ꙗ҆́кѡ та́ть писа́нїе ко и҆носказа́нїю, глаго́летъ златоꙋ́стъ, а҆ не две́рїю смиренномꙋ́дрїѧ вхо́дитъ, но прела́зѧ и҆́нꙋдѣ. Занѐ, а҆́ще кто̀ понꙋжда́етъ намѣ́ренїе писа́нїѧ, и҆лѝ порица́етъ, во є҆́же соста́вити сво́й ра́зꙋмъ, па́че же неразꙋ́мїе, сегѡ̀ нѣ́сть на землѝ безꙋ́мнѣйша. Ко́е ᲂу҆́бѡ сїѐ є҆́сть вѣ́дѣнїе, да ꙗ҆ково́же хо́щетъ кто̀, намѣ́ренїе писа́нїѧ твори́тъ, и҆ речє́нїѧ дерза́етъ премѣнѧ́ти. Ѻ҆́ный же и҆скꙋ́сенъ є҆́сть, и҆́же речє́нїѧ непоколеби̑ма зри́тъ, и҆ премꙋ́дростїю дꙋ́ха сокровє́нныѧ та̑йны и҆з̾ѡбрѣта́етъ, свидѣ́тельствꙋемы ѿ бж҃е́ственныхъ писа́нїй, и҆ па́че трѝ вели̑кїѧ свѣти̑ла сꙋ́ть сі́и, васі́лїй, златоꙋ́стъ и҆ григо́рїй, глаго́лю, и҆лѝ ѿ тогѡ́же рече́нїѧ свидѣ́тельство ѡ҆брѣта́юще, и҆лѝ ѿ и҆на́гѡ рече́нїѧ писа́нїѧ. И҆ не и҆́мать противоглаго́лати хотѧ́й что̀ рещѝ, ꙗ҆́кѡ не ѿвнѣꙋ́дꙋ приво́дѧтъ свидѣ́тельство, да рече́тъ кто̀, своѐ є҆́сть разꙋмѣ́нїе: но ѿ са́мыѧ предлежа́щїѧ вины̀, и҆лѝ дрꙋга́гѡ писа́нїѧ ѡ҆ се́мъ ꙗ҆влѧ́юща. И҆ вои́стиннꙋ: ѿ ст҃а́гѡ бо дх҃а и҆́мꙋтъ є҆́же разꙋмѣ́ти и҆ глаго́лати, ꙗ҆́кѡ досто́йни. Всѧ́кꙋ ᲂу҆́бѡ ве́щь не и҆мꙋ́щꙋ свидѣ́тельства, ꙗ҆́кѡ добра̀ є҆́сть, но сомнѣ́нїе, не подоба́етъ твори́ти, и҆лѝ снисходи́ти по́мыслꙋ. Ка́ѧ во потре́ба є҆́сть, ѡ҆ставлѧ́ти ве́щь ꙗ҆́внꙋю и҆ свидѣ́тельствꙋемꙋ, ꙗ҆́кѡ добра̀ є҆́сть и҆ бг҃оꙋго́дна, твори́ти же и҆́нꙋ, добра́ ли ѻ҆на̀, и҆лѝ нѣ́сть, ра́звѣ то́чїю по стра́сти є҆́сть: и҆ сїѧ̑ ᲂу҆́бѡ та́кѡ.

Раздѣле́нїе моли́твы всѣ́хъ ра́зꙋмѡвъ.

Ѡ҆ ѻ҆сми́ же ра́зꙋмѣхъ вѣ́дѣти на́мъ подоба́етъ, ꙗ҆́кѡ въ четы́рехъ ᲂу҆́бѡ преднапи̑саннаѧ въ ко́емждо глаго́лати подоба́етъ, въ про́чихъ же вы́нꙋ, гдⷭ҇и поми́лꙋй, ꙗ҆́коже рече́сѧ ѡ҆ ст҃ѣ́мъ фїлимо́нѣ, и҆ и҆мѣ́ти ᲂу҆́мъ вы́нꙋ и҆зстꙋпа́ющь ѿ разꙋмѣ́нїй: та́кѡ бо подоба́етъ бы́ти пребыва́нїе тща́тельнагѡ. Ѻ҆вогда̀ ᲂу҆́бѡ ᲂу҆́мъ и҆мѣ́ти въ видѣ́нїи чꙋ́вственныхъ, ѻ҆вогда́ же въ ра́зꙋмѣ мы́сленныхъ и҆ въ безви́днѣмъ. И҆ па́ки, въ мы́сли нѣ́коегѡ писа́нїѧ, и҆лѝ въ чи́стѣй моли́твѣ. Тѣ́ло же ѻ҆вогда̀ во чте́нїи, ѻ҆вогда̀ въ моли́твѣ, ѻ҆вогда́ же въ слеза́хъ ѡ҆ себѣ̀, и҆лѝ ѡ҆ дрꙋго́мъ ко́емъ ѿ сострада́нїѧ по бз҃ѣ. Ѻ҆вогда̀ въ дѣ́ланїи по́мощи нѣ́коемꙋ немощствꙋ́ющемꙋ дꙋше́внѣ, и҆лѝ тѣле́снѣ, да всѧ́чески вы́нꙋ твори́тъ дѣла̀ ст҃ы́хъ а҆́гг҃лъ, ѿню́дъ не печа́сѧ ни ѡ҆ чесо́мъ мі́ра сегѡ̀. И҆ бг҃ъ и҆збра́вый є҆го̀ и҆ ѿдѣли́вый, да собесѣ́дникъ є҆мꙋ̀ бꙋ́детъ, и҆ дарова́вый є҆мꙋ̀ пребыва́нїе сїѐ и҆ безпопече́нїе, са́мъ ѡ҆ не́мъ попече́тсѧ и҆ препита́етъ дꙋше́внѡ же и҆ тѣле́снѡ. Возве́рзи, глаго́летъ писа́нїе, на гдⷭ҇а печа́ль твою̀, и҆ то́й тѧ̀ препита́етъ[[Ѱал. н҃д, ст. к҃г.]]. И҆ є҆ли́кѡ то́й наде́ждꙋ на́нь возлага́етъ. во всѣ́хъ ꙗ҆̀же ѡ҆ себѣ̀ дꙋше́ю же и҆ тѣ́ломъ, толи́кѡ ѡ҆брѣта́етъ є҆го̀ промышлѧ́юща ѡ҆ не́мъ: тѣ́мже вмѣнѧ́етъ себѣ̀ хꙋ́ждша все́й тва́ри ѿ мно́гихъ дарѡ́въ бж҃їихъ, ꙗ҆́вныхъ и҆ неѧ́вныхъ, дꙋше́вныхъ же и҆ тѣле́сныхъ, ꙗ҆́кѡ мно́гѡ до́лженъ сы́й, ѿню́дъ не мо́жетъ возноси́тисѧ ѡ҆ како́йлибо ве́щи ѿ стыдѣ́нїѧ, зрѧ̀ бл҃годѣѧ̑нїѧ бж҃їѧ. И҆ є҆ли́кѡ благодари́тъ є҆го̀, и҆ подвиза́етсѧ понꙋ́дити себѐ за любо́вь є҆гѡ̀: толи́кѡ и҆ бг҃ъ приближа́етсѧ къ немꙋ̀ дара́ми свои́ми, и҆ жела́етъ ᲂу҆споко́ити є҆го̀, и҆ содѣ́лати предпочита́ти безмо́лвїе и҆ нестѧжа́нїе па́че всѣ́хъ ца́рствїй земны́хъ и҆ кромѣ̀ возме́здїѧ въ бꙋ́дꙋщемъ. И҆́бо ст҃і́и мꙋ́ченицы страда́хꙋ ᲂу҆ѧзвлѧ́еми ѿ врагѡ́въ, но вожделѣ́нїе ца́рствїѧ и҆ любо́вь бж҃їѧ побѣжда́ше болѣ̑зни, и҆ сїѐ са́мое, є҆́же прїѧ́ти си́лꙋ побѣжда́ти врагѡ́въ, вмѣнѧ́хꙋ въ вели́ко ᲂу҆тѣше́нїе и҆ до́лгъ, ꙗ҆́кѡ сподо́бишасѧ за хрⷭ҇та̀ сме́рть претерпѣ́ти, ꙗ҆́коже ѿ сегѡ̀ мно́гажды и҆ нечꙋ́вственни быва́хꙋ. Подо́бнѣ и҆ ст҃і́и ѻ҆тцы̀ мно́гѡ понꙋжда́хꙋ себѐ въ нача́лѣ многоѡбра́зными по́двиги и҆ бра́ньми быва́емыми ѿ лꙋка́вства дꙋхѡ́въ. Но жела́нїе и҆ наде́жда безстра́стїѧ побѣжда́хꙋ. Занѐ по трꙋдѣ̀ безпопечи́тельный быва́етъ безстра́стенъ ꙗ҆́кѡ побѣди́вый стра̑сти. Мни́тсѧ бо до́брѣ ѡ҆брѣта́тисѧ и҆ стра́стный, но ѿ слѣпоты̀. Є҆ди́ный же глаго́лемый подви́жникъ и҆́мать по́двигъ и҆ бра́нь, ѿ є҆́же хотѣ́ти побѣди́ти стра́сти и҆ не́мѡщи: попꙋща́етсѧ бо ѻ҆вогда̀ таково́мꙋ побѣжде́нꙋ бы́ти ѿ ра́тꙋющихъ є҆го̀, да смире́нїе стѧ́жетъ. И҆ сегѡ̀ ра́ди подоба́етъ ᲂу҆вѣ́дѣти свою̀ не́мощь, и҆ крѣ́пкѡ ᲂу҆далѧ́тисѧ вредѧ́щихъ себѐ, да забꙋ́детъ пе́рвый сво́й ѻ҆бы́чай. Ꙗ҆́кѡ, а҆́ще не ᲂу҆далѧ́етсѧ кто̀ пе́рвѣе попече́нїѧ, и҆ не стѧ́жетъ соверше́ннагѡ безмо́лвїѧ, не мо́жетъ прїитѝ, во є҆́же и҆мѣ́ти что̀ безстра́стнѣ, и҆лѝ глаго́лати при́снѡ дѡ́бра, и҆ вкра́тцѣ, во всѧ́кой ве́щи прили́чествꙋетъ вопе́рвыхъ соверше́нное попече́нїѧ бѣ́гство, да не привлека́емь бꙋ́детъ кто̀ пе́рвымъ ѻ҆бы́чаемъ. Ѻ҆ба́че никто́же ѿ неразꙋмѣ́нїѧ, слы́шай ѡ҆ смиренномꙋ́дрїи, безпристра́стїи же и҆ таковы́хъ, да мни́тъ и҆мѣ́ти сїѧ̑. Но коеѧ́ждо ве́щи зна́менїе и҆ска́ти до́лженъ є҆́сть и҆ ѡ҆брѣта́ти въ себѣ̀.

Ѡ҆ смиренномꙋ́дрїи.

Зна́мєнїѧ смиренномꙋ́дрїѧ сꙋ́ть сі́и, да и҆мы́й всѧ́кꙋ добродѣ́тель тѣле́снꙋю и҆ дꙋше́внꙋю вмѣнѧ́етъ себѐ вѧ́щше до́лжна бы́ти бг҃ꙋ, ꙗ҆́кѡ мнѡ́га прїе́мь благода́тїю, недосто́инъ сы́й. И҆ а҆́ще прилꙋчи́тсѧ є҆мꙋ̀ ко́елибо и҆скꙋше́нїе ѿ бѣсѡ́въ и҆лѝ ѿ люде́й, досто́йна вмѣнѧ́етъ себѧ̀ таковы́хъ, и҆ и҆ны́хъ вѧ́щшихъ, да понѐ ма́лѡ ѡ҆свободи́тсѧ ѿ до́лга, и҆ ѡ҆блегче́нїе ѡ҆брѧ́щетъ на сꙋдѣ̀ ѡ҆жида́емыхъ є҆мꙋ̀ мꙋ́къ. И҆ є҆гда̀ ᲂу҆́бѡ сегѡ̀ не понесе́тъ, мно́гѡ скорби́тъ и҆ тꙋ́житъ, и҆ща́й въ че́мъ понꙋ́дити себѐ. Є҆гда́ же сїѐ ᲂу҆лꙋчи́тъ па́ки, ꙗ҆́кѡ да́ръ ѿ бг҃а прїе́мъ, смирѧ́етсѧ, и҆ не могі́й ѡ҆брѣстѝ что̀ возда́ти бл҃годѣ́телеви, пребыва́етъ дѣ́лаѧй при́снѡ, и҆ наипа́че должника̀ себѐ вмѣнѧ́ѧ.

Ѡ҆ безстра́стїи.

Безстра́стїѧ же є҆́сть зна́менїе сїѐ, є҆́же несмꙋще́ннꙋ, и҆ без̾ стра́ха бы́ти во всѣ́хъ, ꙗ҆́кѡ полꙋчи́вшꙋ ѿ благода́ти бж҃їей всѧ̑ мощѝ[[Фїлїп. гл. в҃, ст. г҃і.]], по а҆пⷭ҇лꙋ, во є҆́же ника́кѡ попече́нїе и҆мѣ́ти ѡ҆ тѣ́лѣ, но є҆ли́кѡ нꙋ́дитисѧ и҆́мать и҆ дости́гнетъ въ поко́й навыкнове́нїѧ, и҆ благодарѧ̀ па́ки и҆но́е начина́етъ понꙋжде́нїе, да ѡ҆брѧ́щетсѧ при́снѡ ра́тꙋемь, и҆ побѣжда́ѧй со смире́нїемъ. И҆ сїѐ є҆́сть пред̾ꙋспѣ́ѧнїе человѣ́ка. Быва̑ющаѧ бо без̾ понꙋжде́нїѧ не сꙋ́ть дѣла̀, ꙗ҆́коже глаго́летъ ст҃ы́й і҆саа́къ, но па́че да́ры. А҆́ще же ѿ пе́рвагѡ трꙋда̀ бы́сть поко́й, побѣ́ды возме́здїе є҆́сть, а҆ не похвалы̀ досто́инъ: не бо̀ прїе́млющїи мздꙋ̀ похвалѧ́еми сꙋ́ть, но нꙋ́дѧщїисѧ въ дѣ́ланїи и҆ ничто́же прїе́млющїи. И҆ что̀ и҆́мамы рещѝ; є҆ли̑ка а҆́ще твори́мъ, и҆ є҆ли́кѡ благодари́мъ благодѣ́телеви, толи́кѡ до́лжни є҆смы̀, и҆ мно́гѡ вѧ́щше. Занѐ ѻ҆́нъ неѡскꙋ́денъ є҆́сть и҆ ничесогѡ́же тре́бꙋетъ: мы́ же без̾ негѡ̀ не мо́жемъ что̀ бла́го сотвори́ти. Сподо́бивыйсѧ во пѣ́ти бг҃а, то́й прїѡбрѣта́етъ па́че, ꙗ҆́кѡ ве́лїй и҆ досточꙋ́дный да́ръ прїе́мый. И҆ є҆ли́кѡ пое́тъ, толи́кѡ мно́жае должни́къ быва́етъ, и҆ конца̀ и҆лѝ ѿсѣченїѧ ра́зꙋма бж҃їѧ, и҆лѝ благодаре́нїѧ, и҆лѝ смире́нїѧ, и҆лѝ любвѝ не ѡ҆брѣта́етъ. Не сꙋ́ть бо сі́и ѿ вѣ́ка сегѡ̀, да коне́цъ и҆́мꙋтъ, но ѿ безконе́чнагѡ ѻ҆́нагѡ вѣ́ка конца̀ не и҆мꙋ́щагѡ, но па́че возраще́нїе разꙋ́мѡвъ и҆ дарова́нїй, и҆ сподо́бивыйсѧ ᲂу҆́бѡ сегѡ̀ дѣ́ломъ и҆ сло́вомъ, свобожда́етсѧ ѿ всѣ́хъ страсте́й. Хотѧ́й же сїѐ полꙋчи́ти, до́лженъ є҆́сть пребыва́ти при бз҃ѣ, и҆ ѿню́дъ не и҆мѣ́ти попече́нїѧ ѡ҆ вѣ́цѣ се́мъ, нижѐ боѧ́тисѧ ко́егѡ и҆скꙋше́нїѧ: занѐ чрез̾ сїѐ въ вѧ́щшее предꙋспѣ́ѧнїе и҆ на вы́шшїй сте́пень возводи́мь бы́ти и҆́мать. И҆ нижѐ ѿ сновидѣ́нїй ѕлы́хъ и҆лѝ а҆́кибы до́брыхъ, и҆лѝ ѿ помышле́нїѧ ко́егѡ лꙋка́ва, и҆лѝ бла́га, нижѐ ѿ печа́ли, и҆лѝ а҆́кибы ра́дости, нижѐ ѿ мнѣ́нїѧ, и҆лѝ ѿча́ѧнїѧ, и҆лѝ высоты̀, и҆лѝ глꙋбины̀, и҆лѝ ѡ҆ставле́нїѧ, и҆лѝ содѣ́йствїѧ ко́егѡ и҆ крѣ́пости, нижѐ ѿ нерадѣ́нїѧ, и҆лѝ предꙋспѣ́ѧнїѧ, нижѐ ѿ ᲂу҆ны́нїѧ, и҆лѝ ᲂу҆се́рдїѧ, и҆лѝ ви́димагѡ безстра́стїѧ, и҆лѝ мно́гагѡ пристра́стїѧ. Но безмо́лвное житїѐ и҆ безпопечи́тельное храни́ти со смире́нїемъ, вѣ́рꙋѧ, ꙗ҆́кѡ никто́же мо́жетъ на́мъ ѕло̀ сотвори́ти, не хотѧ́щымъ на́мъ, сїе́ же попꙋща́етсѧ за возноше́нїе то́чїю, и҆ ꙗ҆́кѡ не при́снѡ притека́емъ къ бг҃ꙋ, си́рѣчь, не поверга́емъ себѐ пред̾ ни́мъ, просѧ̀, да бꙋ́детъ во все́мъ во́лѧ є҆гѡ̀, глаго́лѧ ко всѧ́комꙋ по́мыслꙋ приходѧ́щꙋ къ себѣ̀: не вѣ́мъ кто̀ є҆сѝ, бг҃ъ вѣ́сть, до́бръ ли є҆сѝ, и҆лѝ нѝ: а҆́зъ бо въ рꙋ́цѣ є҆гѡ̀ поверго́хсѧ и҆ поверга́юсѧ, и҆ ѻ҆́нъ пече́тсѧ ѡ҆ мнѣ̀. Ꙗ҆́коже бо ѿ ничегѡ́ мѧ сотворѝ, та́кѡ благода́тїю и҆ спасти́ мѧ и҆́мать, а҆́ще ᲂу҆го́дно є҆мꙋ̀ бꙋ́детъ: то́чїю ст҃а́ѧ є҆гѡ̀ во́лѧ да бꙋ́детъ въ ны́нѣшнемъ вѣ́цѣ, и҆ въ бꙋ́дꙋщемъ, ꙗ҆́коже хо́щетъ, и҆ є҆гда́ же хо́щетъ. А҆́зъ бо во́ли не и҆́мамъ, є҆ди́но вѣ́мъ, ꙗ҆́кѡ мно́гѡ согрѣши́хъ, мно́гѡ и҆ ѡ҆благодѣ́тельствованъ є҆́смь: и҆ нижѐ понѐ по возмо́жномꙋ дѣ́ломъ, и҆лѝ сло́вомъ благодарю̀ є҆гѡ̀ бла́гости. Но во всѣ́хъ си́хъ мо́жетъ и҆ хо́щетъ всѣ́хъ спастѝ, а҆ со всѣ́ми и҆ менѐ, ꙗ҆́коже хо́щетъ. Ѿкꙋ́дꙋ бо вѣ́мъ, человѣ́къ сы́й, та́кѡ ли хо́щетъ мѝ бы́ти, и҆лѝ та́кѡ; а҆́зъ ᲂу҆̀бо стра́ха ра́ди согрѣше́нїѧ и҆збѣго́хъ, и҆ прїидо́хъ здѣ̀, и҆ ра́ди мно́гихъ грѣхѡ́въ мои́хъ, и҆ мно́гихъ не́мощей сѣжꙋ̀ пра́зденъ въ ке́ллїи, ꙗ҆́коже держи́мый во ᲂу҆зи́лищѣ, ѡ҆жида́ѧ и҆зрече́нїѧ влады́чнѧ. И҆ а҆́ще пра́здна ᲂу҆́зритъ себѐ и҆ поги́бша, да не бои́тсѧ: въ сокрꙋше́нїе бо дꙋшѝ и҆ въ приболѣ̑зненныѧ сле́зы прїитѝ и҆́мать, а҆́ще не и҆зы́детъ и҆з̾ ке́ллїи. И҆ а҆́ще па́ки вели́кое ᲂу҆се́рдїе на всѧ́ко дꙋхо́вно дѣ́ланїе и҆ сле́зы и҆́мать, да не ра́дость сїѐ вмѣнѧ́етъ, но краде́нїе и҆ ᲂу҆готовле́нїе бра́ни. И҆ вкра́тцѣ, всѧ́кꙋ добрꙋ̀ ве́щь, и҆лѝ сопроти́внꙋ до́лженъ є҆́сть презира́ти, да пребꙋ́детъ несмꙋще́нъ во все́мъ безмо́лствꙋѧй, и҆ по си́лѣ подвиза́ѧйсѧ, творѧ̀ є҆ли̑ка прїѧ́тъ, а҆́ще и҆́мать кого̀ совѣ́тника: а҆́ще ли же нѝ, ᲂу҆̀бо хрⷭ҇та̀ до́лженъ є҆́сть и҆мѣ́ти, да ѡ҆ всѧ́комъ начина́нїи и҆ по́мыслѣ вопроша́етъ є҆го̀ чи́стою моли́твою ѿ се́рдца со смире́нїемъ, ѿню́дъ не дерза́ѧ, ꙗ҆́кѡ и҆скꙋ́сенъ бы́сть мона́хъ, до́ндеже хрⷭ҇та̀ ᲂу҆срѧ́щетъ въ бꙋ́дꙋщемъ, ꙗ҆́коже глаго́летъ лѣ́ствичникъ, и҆ а҆́вва а҆гаѳѡ́нъ. И҆ а҆́ще всѧ́ко намѣ́ренїе и҆́мать ᲂу҆годи́ти бг҃ови, са́мъ ѻ҆́нъ ᲂу҆́читъ є҆го̀ во́лѣ свое́й, и҆лѝ ᲂу҆́мнѣ и҆звѣствꙋ́етъ и҆̀, и҆лѝ нѣ́кїимъ человѣ́комъ, и҆лѝ писа́нїемъ. И҆ а҆́ще ѿсѣка́етъ є҆гѡ̀ ра́ди хотѣ̑нїѧ своѧ̑, са́мъ съ ра́достїю неизглаго́ланною сотвори́тъ и҆ дости́гнꙋти соверше́нства, ꙗ҆́коже не вѣ́сть то́й. И҆ сїѐ ви́дѣвъ мно́гѡ диви́тсѧ, ка́кѡ ѿвсю́дꙋ начина́етъ и҆стека́ти ра́дость и҆ ра́зꙋмъ, и҆ ѿ всѧ́кїѧ ве́щи по́льзꙋ ѡ҆брѣта́етъ и҆ ца́рствꙋетъ въ не́мъ бг҃ъ, ꙗ҆́кѡ не и҆мꙋ́щемъ своеѧ̀ во́ли, занѐ покарѧ́етсѧ ст҃о́й є҆гѡ̀ во́ли. И҆ быва́етъ ꙗ҆́кѡ ца́рь, и҆ а҆́ще что́либо помы́слитъ, без̾ трꙋда̀ и҆ гото́во быва́етъ є҆мꙋ̀ ѿ бг҃а, творѧ́щагѡ ѡ҆ не́мъ попече́нїе. И҆ сїѧ̀ є҆́сть вѣ́ра: ѡ҆ не́йже речѐ гдⷭ҇ь: А҆́ще и҆́мате вѣ́рꙋ[[Матѳ. гл. з҃і, ст. к҃.]], и҆ прѡ́ч: и҆ на се́й вѣ́рѣ назида́ютсѧ про́чыѧ добродѣ́тєли, по а҆по́столꙋ[[І҆ꙋ́д. гл. а҃, ст. к҃.]]. Сегѡ̀ ра́ди вра́гъ всѧ́кꙋ ко́знь стро́итъ, да ѿ безмо́лвїѧ ѿлꙋчи́тсѧ человѣ́къ, и҆ впаде́тъ въ пристра́стїе, и҆ нѣ́кїимъ ѡ҆́бразомъ невѣ́ренъ ѡ҆брѧ́щетсѧ, ᲂу҆пова́ѧ на свою̀ крѣ́пость и҆ мꙋ́дрость, и҆лѝ соверше́ннѣ и҆лѝ ѿ ча́сти. И҆ ѿ сегѡ̀ винꙋ̀ прїе́млетъ вра́гъ, во є҆́же побѣди́ти є҆го̀ и҆ плѣ́нника содѣ́лати ѻ҆каѧ́ннаго. Сїе́ же позна́вый всѧ́кꙋ мі́ра сла́дость и҆ поко́й ѡ҆ста́вль, ꙗ҆́кѡ вѣ́сть ничто́же сꙋ́щѧ, тщи́тсѧ ѡ҆ безпопечи́тельствѣ: и҆лѝ въ повинове́нїи, и҆мѣ́ѧ наста́вника вмѣ́стѡ хрⷭ҇та̀, и҆ возлага́етъ на́нь всѧ́кое разꙋмѣ́нїе сло́вомъ и҆ дѣ́ломъ, да ника́коже и҆́мать что̀: и҆лѝ въ безмо́лвїи ѿ и҆звѣще́нныѧ вѣ́ры всегѡ̀ бѣ́гаетъ, и҆ и҆́мать вмѣ́стѡ всѣ́хъ хрⷭ҇та̀, и҆ то́й быва́етъ є҆мꙋ̀ всѧ̑, ꙗ҆́коже глаго́летъ златоꙋ́стъ и҆ дамаски́нъ, въ ны́нѣшнемъ вѣ́цѣ и҆ въ бꙋ́дꙋщемъ, пита́ѧ, ѡ҆дѣва́ѧ, радостотворѧ̀, ᲂу҆тѣша́ѧ, веселѧ̀, ᲂу҆покоѧ́ѧ, ᲂу҆чѧ̀, просвѣща́ѧ, и҆ вкра́тцѣ, ꙗ҆́коже ѡ҆ ᲂу҆ченицѣ́хъ свои́хъ, та́кѡ и҆ ѡ҆ се́мъ и҆́мать попече́нїе, а҆́ще и҆ не та́кѡ, ꙗ҆́коже сі́и, трꙋжда́тисѧ и҆́мать: но ᲂу҆́бѡ вѣ́рꙋ и҆́мать и҆звѣще́ннꙋ, є҆ѧ́же ра́ди не твори́тъ попече́нїѧ ѡ҆ себѣ̀, ꙗ҆́коже про́чїи человѣ́цы. Но стра́ха ра́ди дꙋхѡ́въ, ꙗ҆́коже а҆по́столи стра́ха ра́ди і҆ꙋде́йска, сѣди́тъ въ ке́ллїи ѡ҆жида́ѧ своегѡ̀ ᲂу҆чи́телѧ, да и҆́стиннымъ видѣ́нїемъ, си́рѣчь, ра́зꙋмомъ тва́рей є҆гѡ̀, совоздви́гнетъ мы́сленнѣ ѿ страсте́й, и҆ ми́ръ да́рꙋетъ, ꙗ҆́коже а҆по́столамъ, две́ремъ заключє́ннымъ, глаго́летъ ст҃ы́й маѯі́мъ.

И҆зрѧ́дное распозна́нїе ѡ҆ седьмѝ тѣле́сныхъ дѣѧ́нїѧхъ.

Пи̑саннаѧ же пе́рвѣе въ нача́лѣ сло́ва ѡ҆ седьмѝ дѣѧ́нїѧхъ тѣле́сныхъ и҆ нра́вственныхъ, при́снѡ храни́ти подоба́етъ, и҆ нижѐ ᲂу҆меньша́ти ᲂу҆мале́нїемъ, нижѐ ᲂу҆множа́ти превосхожде́нїемъ, кромѣ̀ а҆́ще є҆́сть когда̀ вре́мѧ бра́ни тѣле́сной ю҆́ности ра́ди, и҆лѝ крѣ́пости превосходѧ́щїѧ, є҆ѧ́же ра́ди потре́бенъ є҆́сть превосхо́дный по́двигъ, и҆лѝ па́ки не́мощи ра́ди, є҆ѧ́же ра́ди ма́лѡ поко́ѧ тре́бѣ є҆́сть: ѻ҆ба́че не по разрѣше́нїю соверше́ннꙋ: сїе́ бо и҆ безстра́стныхъ повреди́ти мо́жетъ, ꙗ҆́коже глаго́летъ ст҃ы́й і҆саа́къ, но по нꙋ́ждѣ да бꙋ́детъ поко́й, а҆́ки врачевство̀ недꙋ́га. И҆ да не винꙋ̀ ѡ҆брѣ́тши дꙋша̀, крѣ́пость ѡ҆слаблѧ́ти восхо́щетъ. Сїе́ бо є҆́сть ѡ҆слабле́нїе, є҆гда̀ кто̀ все́ю дꙋше́ю восхо́щетъ поко́ѧ: поко́й же, глаго́лютъ ст҃і́и, ю҆́ныѧ и҆ здра̑выѧ вреди́ти ѡ҆бы́че. Занѐ глаго́лютъ ст҃і́и ѻ҆тцы̀, васі́лїй и҆ маѯі́мъ, ꙗ҆́кѡ длѧ ᲂу҆толе́нїѧ а҆лка́нїѧ и҆лѝ жа́жды хлѣ́бъ то́чїю и҆ вода̀ потрє́бны: здра́вїѧ же ра́ди и҆ крѣ́пости тѣ́ла прѡ́чаѧ ѿ бг҃а человѣколю́бнѣ на́мъ дарова̑на сꙋ́ть. И҆ да не є҆ди́нъ ви́дъ при́снѡ ꙗ҆до́мый въ безсла́достїе приведе́тъ немощствꙋ́ющаго, но є҆ди́нъ по є҆ди́номꙋ, ꙗ҆́коже предрече́сѧ полє́зна сꙋ́ть. И҆́бо ᲂу҆дале́нїе ѿ пи́щи, и҆ неꙋмѣ́ренность прино́сѧтъ недꙋ́ги: воздержа́нїе же и҆ премѣне́нїе на всѧ́къ де́нь бра́шенъ, здра́вїѧ быва́ютъ вино́ю, да тѣ́ло соблюде́тсѧ безсладостра́стно и҆ безнедꙋ́жно, и҆ бꙋ́детъ содѣ́йственно къ стѧжа́нїю добродѣ́телей. И҆ сїѧ̑ ᲂу҆́бѡ къ подвиза́ющымсѧ речє́на бы́ша: безстра́стнїи же младе́нчествомъ ѡ҆ хрⷭ҇тѣ̀ мно́жицею чрез̾ мно́ги дни̑ не ꙗ҆дѧ́тъ, забыва́юще тѣ́ло, ꙗ҆́коже ст҃ы́й сїсѡ́й, и҆́же по ꙗ҆де́нїи и҆ска́ше причасти́тисѧ пречи́стыхъ та̑инъ ѿ бж҃е́ственнагѡ и҆зстꙋпле́нїѧ. Ꙗ҆́коже глаго́летъ а҆по́столъ на по́льзꙋ мнѡ́гимъ: а҆́ще бо и҆зꙋми́хомсѧ, бг҃ови: а҆́ще ли цѣломꙋ́дрствꙋемъ, ва́мъ[[в҃ Кор. гл. є҃, ст. г҃і.]]: и҆ ꙗ҆́коже вели́кїй васі́лїй ѡ҆ нѣ́кїихъ, и҆ и҆ні́и нѣ́цыи: Нижѐ па́ки съ нѣ́кїими ꙗ҆дꙋ́ще такові́и ѿ мно́гихъ ꙗ҆́стїй и҆мѣ́ѧхꙋ чꙋ́вство таковы́хъ, но ꙗ҆́кѡ ничто́же ꙗ҆дꙋ́ще бѧ́хꙋ. Оу҆́мъ бо таковы́хъ нѣ́сть въ тѣ́лѣ, да ѡ҆щꙋти́тъ поко́й є҆гѡ̀, и҆лѝ болѣ́знь. И҆ сїѐ показа́сѧ ѿ мно́гихъ ѻ҆тє́цъ и҆ ст҃ы́хъ мꙋ́чєникъ, ꙗ҆́вѣ же бы́сть и҆ ѿ ст҃а́гѡ ѻ҆́нагѡ, ѡ҆ не́мже написа̀ ст҃ы́й ні́лъ: ꙗ҆́кѡ бѣ̀ нѣ́кїй ста́рецъ, глаго́летъ, въ пꙋсты́ни молѧ́сѧ ᲂу҆́мнѣ, є҆го́же попꙋще́нїемъ бж҃їимъ на по́льзꙋ є҆гѡ̀ и҆ дрꙋги́хъ мно́гихъ, за рꙋ́цѣ и҆ но́зѣ бѣ́сове є҆́млѧхꙋ, и҆ на высотѣ̀ потрѧса́хꙋ. И҆ па́ки, да не поврежде́но бꙋ́детъ тѣ́ло є҆гѡ̀, внегда̀ па́даше съ толи́кїѧ высоты̀, на рогози́нꙋ прїе́млѧхꙋ. И҆ сїѐ на до́лзѣ творѧ́ще, и҆скꙋша́хꙋ, а҆́ще сни́детъ ᲂу҆́мъ є҆гѡ̀ съ нб҃сѝ, и҆ не возмого́ша сегѡ̀ соверши́ти. Таковы́й ли ᲂу҆́бѡ ѡ҆щꙋти́тъ когда̀ ꙗ҆́стїе и҆лѝ питїѐ, и҆лѝ что̀ ѿ тѣле́сныхъ; И҆ па́ки, ст҃ы́й є҆фре́мъ, побѣди́въ всѧ̑ дꙋшє́вныѧ же и҆ тѣлє́сныѧ стра̑сти, благода́тїю хрⷭ҇то́вою, да не пра́зденъ ѿ бра́ней врага̀ ѡ҆брѧ́щетсѧ, и҆ сегѡ̀ ра́ди ѡ҆сꙋжде́нъ бꙋ́детъ, ꙗ҆́коже мнѣ́сѧ є҆мꙋ̀ ѿ неизрече́ннагѡ смире́нїѧ, и҆ска́ше, да благода́ть безстра́стїѧ во́зметсѧ ѿ негѡ̀. Ѡ҆ не́мже і҆ѡа́ннъ лѣ́ствичникъ ᲂу҆диви́всѧ написа̀, ꙗ҆́кѡ сꙋ́ть нѣ́цыи безстра́стнѣйшїи, ꙗ҆́коже ѻ҆́нъ сѵ́рїнъ, глаго́летъ, и҆ прѡ́ч.

Ѡ҆ разсꙋжде́нїи.

Сегѡ̀ ра́ди во всѧ́кой ве́щи тре́бꙋемъ разсꙋжде́нїѧ, да во вре́мѧ сꙋ́димъ всѧ́ко начина́нїе. Разсꙋжде́нїе бо свѣ́тъ є҆́сть, показꙋ́ющїй и҆мꙋ́щемꙋ є҆̀ вре́мѧ, начина́нїе, дѣ́ло, состоѧ́нїе человѣ́ка, крѣ́пость, ра́зꙋмъ, во́зрастъ, си́лꙋ, не́мощь, произволе́нїе, ᲂу҆се́рдїе, сокрꙋше́нїе, навыкнове́нїе, невѣ́жество, си́лꙋ тѣлесѐ, сложе́нїе, здра́вїе же и҆ ѕлострада́нїе, нра́въ, мѣ́сто, житїѐ, воспита́нїе, вѣ́рꙋ, расположе́нїе, намѣ́ренїе, пребыва́нїе, ѻ҆тра́дꙋ, вѣ́жество, є҆сте́ственнꙋю мꙋ́дрость, тща́нїе, бо́дрость, медле́нїе, и҆ подѡ́бнаѧ. Та́же веще́й є҆стество̀, ᲂу҆потребле́нїе, коли́чество, ви́ды, намѣ́ренїе бж҃їе, въ бж҃е́ственныхъ писа́нїѧхъ находѧ́щеесѧ, ра́зꙋмъ коегѡ́ждо рече́нїѧ, ꙗ҆́коже глаго́лемое рече́нїе во є҆ѵⷢ҇лїи ѿ і҆ѡа́нна, є҆гда̀ прїидо́ша є҆́ллини и҆́щꙋще ви́дѣти гдⷭ҇а, и҆ а҆́бїе речѐ и҆̀мъ: Прїи́де ча́съ[[І҆ѡа́н. гл. в҃і, ст. к҃г.]] и҆ прѡ́ч: ꙗ҆влѧ́ѧ, ꙗ҆́кѡ приспѣ̀ зва́нїе ꙗ҆зы́кѡвъ: нача́сѧ бо вре́мѧ стра́сти, и҆ сїѐ ꙗ҆́кѡ зна́менїе полага́етъ. И҆́бо разсꙋжде́нїе сїѧ̑ всѧ̑ и҆з̾ѧснѧ́етъ: не то́чїю же, но и҆ намѣ́рєнїѧ толкова́нїѧ ѻ҆тє́цъ. Ꙗ҆́кѡ не быва́ющаѧ ве́щь є҆́сть и҆ско́мое, но є҆гѡ́же ра́ди быва́етъ, глаго́летъ ст҃ы́й ні́лъ. И҆ творѧ́й что̀ кромѣ̀ ра́зꙋма рече́нныхъ, а҆́ще и҆ мно́гѡ трꙋди́тсѧ, но ничто́же соверши́ти мо́жетъ, ꙗ҆́коже глаго́летъ вели́кїй а҆нтѡ́нїй и҆ ст҃ы́й і҆саа́къ, ѡ҆ подвиза́ющихсѧ въ тѣле́сныхъ добродѣ́телѧхъ, нерадѧ́щихъ же ѡ҆ дѣ́ланїи ᲂу҆ма̀, а҆́ще и҆ сїѐ є҆́сть па́че и҆ско́мое, ꙗ҆́коже глаго́летъ ст҃ы́й маѯі́мъ: да́ждь тѣлесѝ дѣ́ланїе по си́лѣ, и҆ ве́сь по́двигъ тво́й ко ᲂу҆мꙋ̀ ѡ҆братѝ. Тѣле́снѣ бо, глаго́летъ, дѣ́лаѧй, ѻ҆вогда̀ побѣжда́етсѧ чревобѣ́сїемъ и҆ многосо́нїемъ, пристра́стїемъ и҆ многоглаго́ланїемъ, и҆ си́ми помрача́етъ ᲂу҆́мъ: ѻ҆вогда́ же продолжи́тельнымъ посто́мъ, бдѣ́нїемъ же и҆ превосхожде́нїемъ трꙋдѡ́въ возмꙋща́етъ мы́сль. Но ѡ҆ ᲂу҆мѣ̀ тща́йсѧ, ᲂу҆мозри́тъ, мо́литсѧ, бг҃осло́вствꙋетъ, и҆ всѧ́кꙋ добродѣ́тель соверши́ти мо́жетъ. Занѐ мꙋ́дрый человѣ́къ и҆скꙋ́снѣ подвиза́етсѧ твори́ти, є҆ли́кѡ мо́жетъ, ма́лыѧ потре́бы тѣле́сныѧ, да ѿ сегѡ̀ бꙋ́детъ малопопечи́теленъ, и҆лѝ и҆ безпопечи́теленъ, во є҆́же храни́ти за́пѡвѣди. Ꙗ҆́коже глаго́летъ гдⷭ҇ь: Не пецы́тесѧ[[Матѳ. гл. ѕ҃, ст. к҃є, и҆ л҃д.]], и҆ прѡ́ч: во многопопече́нїи же ни самаго̀ себѐ кто̀ ви́дѣти мо́жетъ, и҆ ка́кѡ ᲂу҆жѐ пре́жде вре́мени ᲂу҆готѡ́ванныѧ врагѡ́въ сѣ̑ти зрѣ́ти мо́жетъ: занѐ вра́гъ не всегда̀ ꙗ҆́внꙋ бра́нь твори́ти ѡ҆бы́че, ꙗ҆́коже глаго́летъ златоꙋ́стъ. А҆́ще бо бы сїѐ бы́ло, не бо̀ ᲂу҆до́бнѡ въ сѣ́ти є҆гѡ̀ мно́зїи впа́дали бы́хомъ, да ма́лїи спаса́ющїисѧ ѡ҆брѧ́щꙋтсѧ, ꙗ҆́коже глаго́летъ гдⷭ҇ь[[Лꙋкѝ гл. г҃і, ст. к҃г.]]. Но є҆гда̀ въ вели̑каѧ воврещѝ кого̀ восхо́щетъ, небрещѝ побꙋжда́етъ є҆го̀ пе́рвѣе ма̑лаѧ и҆ та̑йнаѧ, и҆ пре́жде прелюбодѣѧ́нїѧ ча́стое и҆ сладостра́стное воззрѣ́нїе, и҆ пре́жде ᲂу҆бі́йства ма́лꙋю ꙗ҆́рость, и҆ пре́жде помраче́нїѧ мы́сли ма́лое пристра́стїе, и҆ пре́жде сегѡ̀ па́ки нꙋ́жнꙋю тѣлесѝ потре́бꙋ. Сегѡ̀ ра́ди гдⷭ҇ь, ꙗ҆́кѡ всѧ̑ предвѣ́дый, ꙗ҆́кѡ премꙋ́дрость ѻ҆́ч҃а сы́й, предварѧ́ѧ дїа́волѧ кова̑рства, повелѣва́етъ человѣ́кѡмъ пре́жде вре́мени ѿсѣца́ти вины̑ ко грѣхꙋ̀, да не мнѧ́ще ᲂу҆добопрости́тєльна бы́ти ма̑лаѧ, впаде́мъ бѣ́днѣ въ лю̑таѧ и҆ вели̑каѧ согрѣшє́нїѧ. И҆ глаго́летъ: Рече́но дрє́внимъ[[Матѳ. гл. є҃, ст. к҃а и҆ к҃з.]], бы́вшымъ си́рѣчь въ зако́нѣ, сїѧ̑ и҆ сїѧ̑: а҆́зъ же глаго́лю ва́мъ, и҆ прѡ́ч: Наꙋчи́выйбосѧ ѿ ст҃а́гѡ є҆ѵⷢ҇лїа, до́лженъ є҆́сть внима́ти и҆ твори́ти, ꙗ҆̀же ᲂу҆́читъ сп҃си́тель, да и҆зба́витсѧ ѿ сѣте́й вра́жїихъ, и҆ и҆мѣ́ти за́пѡвѣди, ꙗ҆́кѡ щедрѡ́ты и҆ благодѣѧ̑нїѧ вели̑ка, ꙗ҆́кѡ съ премꙋ́дростїю вели́кою мо́гꙋтъ спастѝ дꙋ́шꙋ: за́пѡвѣди бо сꙋ́ть бж҃їй да́ръ. И҆ вои́стиннꙋ всѧ́ко даѧ́нїе бла́го, и҆ всѧ́къ да́ръ соверше́нъ свы́ше є҆́сть[[І҆а́кѡв. гл. а҃, ст. з҃і.]], ꙗ҆́коже глаго́летъ бра́тъ бж҃їй. Ꙗ҆́коже глаго́летъ и҆ дамаски́нъ: Положи́лъ є҆сѝ на́мъ непосты́днꙋ хода́таицꙋ ро́ждшꙋю тѧ̀, хрⷭ҇тѐ, є҆ѧ́же застꙋпле́нїемъ подава́й на́мъ дх҃а препода́тельна бла́гости, ѿ ѻ҆ц҃а̀ тобо́ю происходѧ́ща.

Прїе́мый бо дарова́нїе внима́нїѧ бж҃е́ственныхъ писа́нїй, ꙗ҆́коже глаго́лютъ ѻ҆тцы̀, всѧ́ко бла́го ѡ҆брѣта́етъ сокрове́нно во всѣ́хъ писа́нїѧхъ, ꙗ҆́коже глаго́летъ гдⷭ҇ь: Наꙋчи́выйсѧ же ца́рствїю небе́сномꙋ, и҆ прѡ́ч.:[[Матѳ. гл. г҃і, ст. н҃в.]] Си́рѣчь въ сꙋ́щемъ по бз҃ѣ ᲂу҆праждне́нїи и҆ чте́нїи бж҃е́ственныхъ писа́нїй: поне́же и҆но́е лицѐ ꙗ҆влѧ́етъ писа́нїе прѡ́чимъ человѣ́кѡмъ, а҆́ще и҆ мнѧ́тсѧ вѣ́дѣти, и҆ и҆́но ꙗ҆влѧ́етъ ѿлꙋчи́вшемꙋ себѐ, во є҆́же непреста́ннѡ моли́тисѧ, си́рѣчь, є҆́же и҆мѣ́ти мы́сль бж҃їю, вмѣ́стѡ дыха́нїѧ во все́мъ, а҆́ще въ мі́рѣ и҆ невѣ́жда є҆́сть и҆ ненаꙋче́нъ человѣ́чєскимъ ᲂу҆че́нїѧмъ, ꙗ҆́коже глаго́летъ вели́кїй васі́лїй. Простотѣ́ же наипа́че и҆ смире́нїю бг҃ъ ꙗ҆влѧ́етсѧ, ꙗ҆́коже глаго́летъ лѣ́ствичникъ, а҆ не трꙋдѡ́въ ра́ди и҆ тще́тныѧ премꙋ́дрости. Ѿвраща́етсѧ же па́че бг҃ъ є҆ѧ̀, а҆́ще не и҆́мать смире́нїѧ: Лꙋ́чше бо є҆́сть кто̀ невѣ́жда сло́вомъ, но не ра́зꙋмомъ[[в҃ Кор. гл. а҃і, ст. ѕ҃.]], по а҆по́столꙋ: занѐ дꙋхо́вный ра́зꙋмъ да́ръ є҆́сть, и҆скꙋ́ство же сло́ва ᲂу҆че́нїе є҆́сть человѣ́ческое, ꙗ҆́коже и҆ прѡ́чаѧ ᲂу҆чє́нїѧ мі́ра сегѡ̀, и҆ не споспѣшествꙋ́етъ комꙋ̀ во спасе́нїе дꙋшѝ. И҆ сїѐ ꙗ҆́вно є҆́сть ѿ є҆́ллинъ. Чте́нїе же па́мѧти ра́ди вѣ́дѧщымъ речє́ннаѧ ѿ и҆скꙋ́са, неискꙋ̑снымъ же наꙋче́нїѧ ра́ди быва́етъ. Є҆гда̀, глаго́летъ вели́кїй васі́лїй, ѡ҆брѧ́щетъ гдⷭ҇ь чи́сто се́рдце ѿ всѣ́хъ мїрски́хъ веще́й и҆ ᲂу҆че́нїй: тогда̀ а҆́ки на кни́жицѣ ненапи́санной написꙋ́етъ на не́мъ, догма́ты своѧ̑. Сїе́ же глаго́лю, да не чте́тъ кто̀ не слꙋжа̑щаѧ ко ᲂу҆гожде́нїю бж҃їю: но а҆́ще и҆ не вѣ́дѧй сїѐ прочте́тъ нѣ́когда, да подвиза́етсѧ ско́рѡ и҆згла́дити па́мѧть сегѡ̀ дꙋхо́внымъ чте́нїемъ бж҃е́ственныхъ писа́нїй, и҆ па́че слꙋжа́щихъ є҆мꙋ̀ ко спасе́нїю дꙋшѝ по состоѧ́нїю, въ не́же дости́же. А҆́ще ᲂу҆́бѡ є҆щѐ дѣ́ѧтеленъ є҆́сть въ житїѧ́хъ и҆ словесѣ́хъ ѻ҆тє́цъ, а҆́ще же въ бж҃е́ственный ра́зꙋмъ благода́ть возведѐ и҆̀, да чте́тъ во всѣ́хъ бж҃е́ственныхъ писа́нїѧхъ, ꙗ҆́кѡ могꙋ́щее, по а҆по́столꙋ, низложи́ти всѧ́ко возноше́нїе, взима́ющеесѧ на ра́зꙋмъ бж҃їй[[в҃ Кор. гл. і҃, ст. є҃.]], и҆ ѿмщева́ти всѧ́ко преслꙋша́нїе и҆ престꙋпле́нїе дѣѧ́нїемъ и҆ и҆́стиннымъ ра́зꙋмомъ бж҃е́ственныхъ за́повѣдей и҆ догма́тѡвъ хрⷭ҇то́выхъ: внѣ́ же си́хъ ника́коже да чте́тъ. Ка́ѧ бо потре́ба є҆́сть прїѧ́ти дꙋ́ха нечи́ста вмѣ́стѡ дх҃а ст҃а́гѡ; занѐ въ ко́емъ сло́вѣ ᲂу҆пражнѧ́етсѧ кто̀, таково̀ сво́йство сло́ва и҆мѣ́ти хо́щетъ, а҆́ще и҆ не ви́дитсѧ є҆мꙋ̀ неꙋдо́бна ве́щь, ꙗ҆́коже и҆скꙋ̑снымъ.

Ѡ҆ чте́нїи по бз҃ѣ.

Да бꙋ́детъ ᲂу҆́бѡ чте́нїе по бз҃ѣ, во є҆́же не скита́тисѧ ᲂу҆мꙋ̀, ꙗ҆́кѡ то́ є҆сть нача́ло спасе́нїѧ. Ненави́дитъ, глаго́летъ соломѡ́нъ, гла́са ᲂу҆твержде́нїѧ[[Прит. гл. а҃і, ст. є҃і.]], си́рѣчь вра́гъ, ꙗ҆́коже и҆ паре́нїе мы́сли, нача́ло є҆́сть, є҆́же согрѣша́ти, ꙗ҆́коже глаго́летъ свѧты́й і҆саа́къ. Хотѧ́й же сегѡ̀ и҆збѣжа́ти соверше́ннѣ, до́лженъ є҆́сть въ ке́ллїи мно́гѡ ᲂу҆пражднѧ́тисѧ. А҆́ще ᲂу҆́бѡ ᲂу҆ны́нїемъ ѡ҆тѧгоще́нъ є҆́сть, да дѣ́лаетъ ма́лѡ, ꙗ҆́коже и҆ безстра́стный и҆ разꙋ́мный къ по́льзѣ мно́гихъ, и҆ въ по́мощь нѣ̑кїимъ немощствꙋ́ющымъ, ꙗ҆́коже вели́цыи ѿ ѻ҆тє́цъ творѧ́хꙋ снисходѧ́ще, и҆ ᲂу҆подоблѧ́хꙋсѧ стра̑стнымъ смиренномꙋ́дрїѧ ра́ди: ꙗ҆́кѡ могꙋ́щїй вездѣ̀ бг҃а и҆мѣ́ти въ себѣ̀, и҆ во видѣ́нїи ѡ҆ бз҃ѣ ᲂу҆пражднѧ́тисѧ, и҆ въ рꙋкодѣ́лїи, и҆ на то́ржищи, ꙗ҆́коже глаго́летъ вели́кїй васі́лїй, къ совершє́ннымъ ѕѣлѡ̀, ꙗ҆́кѡ и҆ во мно́жествѣ наро́да, глаго́летъ, ꙗ҆́коже є҆ди́ни въ себѣ̀, и҆ въ бз҃ѣ при́снѡ сꙋ́ть. Не и҆мы́й же є҆щѐ сегѡ̀, но ᲂу҆ны́нїе ѿгна́ти хотѧ́щїй, всѧ́кꙋю бесѣ́дꙋ человѣ́кѡвъ и҆ и҆зли́шнїй со́нъ до́лженъ є҆́сть ѿве́ргнꙋти ѿ себѐ, и҆ ѡ҆ста́вити є҆̀ и҆зможда́ти тѣ́ло своѐ и҆ дꙋ́шꙋ, до́ндеже ᲂу҆ны́въ ѿи́детъ, ви́дѧ є҆гѡ̀ терпѣ́нїе въ безпреста́ннѣмъ ᲂу҆праждне́нїи ѡ҆ бз҃ѣ и҆ во чте́нїи и҆ чи́стѣй моли́твѣ. Всѧ́къ во вра́гъ, а҆́ще ви́дитъ себѐ соверши́ти что̀ могꙋ́ща, пребыва́етъ ра́тꙋющїй: а҆́ще ли же нѝ, ѿхо́дитъ и҆лѝ соверше́ннѣ, и҆лѝ на вре́мѧ. Сегѡ̀ ра́ди хотѧ́й побѣди́ти врагѡ́въ, до́лженъ є҆́сть всѧ́ко терпѣ́нїе и҆мѣ́ти. Претерпѣ́вый же до конца̀, то́й спасе́нъ бꙋ́детъ[[Матѳ. гл. і҃, ст. к҃в.]]. Пра́ведно є҆́сть, глаго́летъ а҆по́столъ, да́ти ско́рбь ѡ҆печалѧ́ющымъ ны̀, на́мъ же ѡ҆скорблѧ́ємымъ ѿра́дꙋ[[в҃ Солꙋ́н. гл. а҃, ст. ѕ҃ и҆ з҃.]]. Нѣ́сть же ѕла̀ ника́ѧ ве́щь быва́емаѧ по бз҃ѣ со смире́нїемъ: ѻ҆ба́че и҆́мꙋтъ разли́чїе вє́щи и҆ начина̑нїѧ. Всѐ ᲂу҆́бѡ, є҆́же быва́етъ кромѣ̀ нꙋ́жной потре́бы, препо́ною быва́етъ хотѧ́щемꙋ спасти́сѧ, си́рѣчь, всѐ є҆́же не слꙋ́житъ ко спасе́нїю дꙋшѝ, и҆лѝ къ тѣле́сной жи́зни: занѐ не бра̑шна, но чревобѣ́сїе є҆́сть ѕло̀: нижѐ и҆мѣ̑нїѧ, но пристра̑стїѧ: нижѐ глаго́лы, но праздносло́вїе: нижѐ сла̑дкаѧ мі́ра, но невоздержа́нїе: нижѐ любы̀ ко свои̑мъ сѝ, но сꙋ́щее ѿ сегѡ̀ нерадѣ́нїе ѡ҆ благоꙋгожде́нїи бж҃їемъ: нижѐ ѻ҆де́жды длѧ прикры́тїѧ то́чїю и҆ и҆збѣжа́нїѧ мра́за и҆ зно́ѧ, но и҆зли̑шнїѧ и҆ многоцѣ̑нныѧ: нижѐ хра̑мины длѧ и҆збѣжа́нїѧ то́чїю съ рече́нными и҆ навѣ́тникѡвъ, ѕвѣре́й же и҆ человѣ̑къ, но двокрѡ́вныѧ и҆ трекрѡ́вныѧ, вели̑кїѧ же и҆ многоиждивє́нныѧ: и҆ не є҆́же и҆мѣ́ти комꙋ̀ ве́щь, но є҆́же и҆мѣ́ти не въ нꙋ́жнꙋю потре́бꙋ: нижѐ кни̑ги и҆мѣ́ти нестѧжа́тєльнымъ, ѕло̀ є҆́сть: но є҆́же не и҆мѣ́ти ѧ҆̀ чте́нїѧ ра́ди по бз҃ѣ: ни є҆́же и҆мѣ́ти дрꙋ́ги, но и҆мѣ́ти не сꙋ́щихъ къ по́льзѣ дꙋшѝ: нижѐ жена̀ ѕло̀ є҆́сть, но любодѣѧ́нїе: нижѐ бога́тство, но сребролю́бїе: нижѐ вїно̀, но пїѧ́нство: нижѐ є҆сте́ственнаѧ ꙗ҆́рость, да́ннаѧ мꙋче́нїѧ ра́ди грѣха̀, но є҆гда̀ ᲂу҆потреблѧ́емъ ю҆̀ проти́вꙋ подо́бныхъ человѣ́ковъ: нижѐ нача́льствїе, но любонача́лїе: нижѐ сла́ва, но славолю́бїе, и҆ го́ршее сегѡ̀ тщесла́вїе: ни є҆́же добродѣ́тель стѧжа́ти, но є҆́же мнѣ́тисѧ и҆мѣ́ти ю҆̀: нижѐ ра́зꙋмъ, но мнѣ́тисѧ бы́ти разꙋ́мнымъ, и҆ го́ршее сегѡ̀ є҆́же не вѣ́дѣти своегѡ̀ неразꙋ́мїѧ: нижѐ и҆́стинный ра́зꙋмъ, но лжеимѣ́нный: нижѐ мі́ръ є҆́сть ѕо́лъ, но стра̑сти: нижѐ є҆стество̀, но чрез̾есте́ствєннаѧ: нижѐ є҆динодꙋ́шїе: но на ѕлотворе́нїе и҆ не ко спасе́нїю дꙋшѝ быва́ющее: нижѐ ᲂу҆́ди тѣле́снїи, но си́хъ ѕлоꙋпотребле́нїе, ниже́ бо да похотствꙋ́емъ, ꙗ҆̀же не подоба́етъ, бы́сть зрѣ́нїе, но да зрѧ́ще созда̑нїѧ, просла́вимъ ѿ ни́хъ творца̀, во є҆́же ше́ствовати до́брѣ на полє́знаѧ дꙋша́мъ и҆ тѣлесе́мъ: нижѐ ᲂу҆шеса̀ длѧ прїѧ́тїѧ клеветы̀ и҆ бꙋесло́вїѧ, но слы́шанїѧ ра́ди сло́ва бж҃їѧ и҆ всѧ́кагѡ гла́са, є҆го́же слы́шимъ ѿ человѣ̑къ, пти́цъ и҆ дрꙋги́хъ, и҆ си́хъ ра́ди прославлѧ́ти творца̀: нижѐ ѡ҆бонѧ́нїе разслабле́нїѧ ра́ди дꙋшѝ: и҆ ѡ҆слабле́нїѧ крѣ́пости є҆ѧ̀ благово́нїемъ, ꙗ҆́коже глаго́летъ бг҃осло́въ, но длѧ дыха́нїѧ и҆ прїѧ́тїѧ дарова́ннагѡ на́мъ ѿ бг҃а воздꙋ́ха, и҆ прославле́нїѧ є҆гѡ̀ сегѡ̀ ра́ди: без̾ сегѡ̀ никто́же мо́жетъ жи́ти тѣле́снѣ, ни человѣ́къ, ни ско́тъ. И҆ дивлю́сѧ премꙋ́дрости благодѣ́телѧ, ка́кѡ нꙋжнѣ́йшыѧ вє́щи ᲂу҆до́бнѡ всѣ́ми ѡ҆брѣта́ютсѧ, глаго́лю же воздꙋ́хъ, ѻ҆́гнь, вода̀ и҆ землѧ̀. Не то́чїю же сїѧ̑, но и҆ могꙋ̑щаѧ спастѝ дꙋ́шꙋ ᲂу҆дѡ́бнѣйшаѧ и҆ны́хъ веще́й сотворѝ, поги́бель же є҆́й наносѧ̑щаѧ неꙋдѡ́бнѣйша сꙋ́ть. Ꙗ҆́коже ᲂу҆бо́жество па́че спаса́ти ѡ҆бы́че дꙋ́шꙋ, бога́тство же препѧ́тїемъ къ семꙋ̀ мнѡ́гимъ быва́етъ. И҆ то̀ ᲂу҆́бѡ всѧ́кїй ѡ҆брѣта́етъ: сїе́ же нѣ́сть въ на́шей во́ли. Та́же безче́стїе, смире́нїе, терпѣ́нїе, послꙋша́нїе, повинове́нїе, воздержа́нїе, поще́нїе, бдѣ́нїе, ѿсѣче́нїе своеѧ̀ во́ли, тѣлє́сныѧ не́мѡщи, благодаре́нїе во всѣ́хъ си́хъ, и҆скꙋшє́нїѧ, тщеты̑, лише́нїе нꙋ́жныхъ, ᲂу҆дале́нїе ѿ сла́дкихъ, нагота̀, долготерпѣ́нїе и҆ вкра́тцѣ, всѧ̑ бг҃а ра́ди быва̑ющаѧ начина̑нїѧ ᲂу҆добосоверши̑ма и҆ невозбра̑нна сꙋ́ть, и҆ никто́же ѡ҆ си́хъ свари́тсѧ, но па́че попꙋща́етъ произволѧ́ющымъ и҆мѣ́ти ѧ҆̀, и҆лѝ во́льнѣ, и҆лѝ нево́льнѣ находѧ̑щаѧ. Къ поги́бели же побꙋжда̑ющаѧ, неꙋдобоѡбрѣта́єма сꙋ́ть, ꙗ҆́коже бога́тство, сла́ва, го́рдость, недеснопрїѧ́тїе, презрѣ́нїе вла́сти, нача́льство, невоздержа́нїе, многоѧде́нїе, многосло́вїе, самово́льное творе́нїе, здра́вїе и҆ крѣ́пость тѣ́ла, безвре́дное житїѐ, прїѡбрѣ́тєнїѧ, стѧжа́нїе всегѡ̀, є҆ли̑ка жела́емъ, и҆ наслажде́нїе сла́дкихъ, стѧжа́нїе ѻ҆де́ждъ и҆ покрыва̑лъ мно́гихъ и҆ многоцѣ́нныхъ, и҆ подѡ́бнаѧ, ѡ҆ ни́хже мно́гїй быва́етъ по́двигъ, ма́ло же прїѡбрѣ́тенїе, и҆ привре́менна по́льза, и҆ мно́га ᲂу҆́бѡ ско́рбь, кра́тко же наслажде́нїе. Зане́же не то́чїю и҆мꙋ́щымъ та̑ и҆ не и҆мꙋ́щымъ, но и҆ и҆мѣ́ти жела́ющымъ всѧ́кїѧ ско́рби винѡ́вна быва́ютъ, а҆́ще и҆ нѣ́сть ѕло̀ ничто́же, но си́хъ ѕлоꙋпотребле́нїе, ꙗ҆́коже рече́сѧ. Ниже́ бо да кра́демъ и҆ похища́емъ, и҆ рꙋ́ки дрꙋ́гъ на дрꙋ́га ѕлѣ̀ простира́емъ, и҆́мамы рꙋ́цѣ и҆ но́зѣ, но да сїѧ̑ на всѧ́ко ѡ҆ бз҃ѣ дѣ́ланїе ᲂу҆потреблѧ́емъ, на ми́лостыню же ни́щымъ, къ соверше́нствꙋ немощнѣ́йшымъ дꙋше́ю, и҆ на по́мощь тре́бꙋющымъ: сильнѣ́йшїи же дꙋше́ю и҆ тѣ́ломъ нестѧжа́нїѧ ра́ди, и҆лѝ подража́нїѧ хрⷭ҇тꙋ̀, и҆ свѧты̑мъ є҆гѡ̀ ᲂу҆ченикѡ́мъ, и҆ ко є҆́же прославлѧ́ти бг҃а, и҆ диви́тисѧ сокрове́ннѣй є҆гѡ̀ премꙋ́дрости во ᲂу҆десѣ́хъ на́шихъ: и҆ ка́кѡ рꙋ́цѣ сі́и и҆ ма́лїи пе́рсты на всѧ́ко хꙋдо́жество и҆ дѣ́ланїе, писа́нїе же и҆ начина́нїе быва́ютъ гото́ви бж҃їимъ про́мысломъ, ѿ негѡ́же ра́зꙋмъ безчи́сленныхъ хꙋдо́жествъ и҆ писа́нїй, премꙋ́дрости же и҆ цѣли́тельныхъ враче́вствъ, ꙗ҆зы̑къ же и҆ разли́чныхъ пи́сменъ. И҆ вкра́тцѣ, всѧ̑ пре́жде бы̑вшаѧ, быва̑ющаѧ и҆ бы́ти и҆мꙋ̑щаѧ кра́йнїѧ ра́ди бла́гости на́мъ дарѡва́на бы́ша, и҆ при́снѡ да́рꙋютсѧ, длѧ жи́зни тѣле́сныѧ и҆ спасе́нїѧ дꙋше́внагѡ, а҆́ще по бж҃їю намѣ́ренїю ᲂу҆потреблѧ́ти бꙋ́демъ всѧ̑ сꙋ̑щаѧ, и҆ си́хъ ра́ди просла́вимъ є҆го̀ со всѧ́кимъ благоразꙋ́мїемъ. А҆́ще же нѝ, ѿпа́даемъ и҆ погиба́емъ, и҆ всѧ̑ сꙋ̑щаѧ въ ско́рбь на́шꙋ въ ны́нѣшнемъ вѣ́цѣ быва́ютъ, и҆ не то́чїю, но и҆ въ бꙋ́дꙋщемъ въ вѣ́чнꙋю мꙋ́кꙋ, ꙗ҆́коже предрече́сѧ.

Ѡ҆ и҆́стиннѣмъ разсꙋжде́нїи.

Прїе́мый ᲂу҆́бѡ благода́тїю бж҃їею да́ръ разсꙋжде́нїѧ ѿ многосмиренномꙋ́дрїѧ до́лженъ є҆́сть храни́ти все́ю си́лою да́ръ се́й, ѿню́дъ не творѧ̀ ничто́же безразсꙋ́днѣ, да не согрѣша́ѧ въ вѣ́дѣнїи ѿ нерадѣ́нїѧ, больша́гѡ ѡ҆сꙋжде́нїѧ вино́венъ себѣ̀ быва́етъ. Не прїе́мый же є҆щѐ да́ра сегѡ̀, ѿню́дъ не до́лженъ є҆́сть составлѧ́ти разꙋмѣ́нїѧ своегѡ̀, и҆лѝ сло́ва, и҆лѝ дѣ́ла кромѣ̀ вопроше́нїѧ, и҆ и҆звѣще́нныѧ вѣ́ры, и҆ чи́стыѧ моли́твы, без̾ ни́хже въ разсꙋжде́нїе и҆́стины взы́ти не мо́жетъ. Сїѐ ражда́етсѧ ѿ смиренномꙋ́дрїѧ: и҆мꙋ́щемꙋ же є҆̀ ражда́етъ прозрѣ́нїе ꙗ҆́коже глаго́лютъ мѡѷсе́й и҆ лѣ́ствичникъ, да и҆мѣ́ѧй предви́дитъ сокровє́нныѧ, вра̑жїѧ кѡ́зни, и҆ ѿсѣца́етъ пре́жде вре́мени вины̀ и҆́хъ, по даві́дꙋ: и҆ на врагѝ моѧ̑ воззрѣ̀ ѻ҆́ко моѐ[[Ѱал. н҃г, ст. ѳ҃.]]. Зна́мєнїѧ же разсꙋжде́нїѧ сꙋ́ть, позна́нїе нело́жно до́брыхъ и҆ сопроти́вныхъ, та́же вѣ́дѣнїе бж҃е́ственныѧ во́ли во всѣ́хъ начина́нїѧхъ: прозрѣ́нїѧ же, позна́нїе свои́хъ грѣхопаде́нїй, пре́жде да́же въ дѣ́ло не прїи́дꙋтъ, и҆ ꙗ҆̀же по краде́нїю ѿ де́монѡвъ быва̑ющаѧ: по си́хъ и҆ сокрове́нныхъ въ бж҃е́ственныхъ писа́нїѧхъ та́инъ, и҆ въ чꙋ́вственныхъ творе́нїѧхъ. И҆́мать же и҆ си́хъ ма́ти смире́нїе зна́менїѧ, ꙗ҆́коже предрече́сѧ ѡ҆ не́мъ, познае́тсѧ же и҆ ѿ сегѡ̀: а҆́ще бо кто̀ є҆́сть смиренномꙋ́дръ, до́лженъ є҆́сть всѧ́кꙋ добродѣ́тель и҆мѣ́ти, и҆ ꙗ҆́кѡ вѧ́щше до́лженъ сы́й, хꙋ́ждша себѐ все́й тва́ри бы́ти, вои́стиннꙋ вѣ́рꙋетъ. А҆́ще же не тако́въ быва́етъ, сїѐ са́мое и҆звѣще́нїе є҆́сть, ꙗ҆́кѡ хꙋ́ждшїй є҆́сть все́й тва́ри, а҆́ще и҆ равноа́гг҃льное житїѐ и҆мѣ́ти мни́тсѧ: занѐ и҆ и҆́стинный а҆́гг҃лъ не возмо́же по толи́кихъ добродѣ́телехъ и҆ премꙋ́дростехъ ᲂу҆годи́ти творцꙋ̀ без̾ смире́нїѧ. Что̀ про́чее и҆́мать рещѝ мнѧ́йсѧ бы́ти а҆́гг҃лъ, кромѣ̀ смире́нїѧ, вины̀ всѣ́хъ сꙋ́щихъ и҆ бы́ти и҆мꙋ́щихъ бла̑гъ; ѿ негѡ́же ражда́етсѧ разсꙋжде́нїе просвѣща́ющее концы̀, а҆ без̾ негѡ̀ всѧ̑ сꙋ́ть мра̑чна. Свѣ́тъ бо є҆́сть и҆ глаго́летсѧ, и҆ сегѡ̀ ра́ди пре́жде всѧ́кагѡ сло́ва и҆ начина́нїѧ тре́бꙋемъ сегѡ̀ свѣ́та: да прѡ́чаѧ зрѧ́ще диви́мсѧ. Диви́мсѧ же и҆ бг҃ꙋ, ка́кѡ въ пе́рвый и҆ госпо́дственный де́нь, пе́рвѣе свѣ́тъ сотворѝ, да не пребыва́етъ неви̑дима быва̑ющаѧ по се́мъ, ꙗ҆́кѡ не сꙋ̑щаѧ, глаго́летъ дамаски́нъ. Свѣ́тъ ᲂу҆́бѡ, ꙗ҆́коже предрече́сѧ, є҆́сть разсꙋжде́нїе, нꙋ́жднѣйшее же всѣ́хъ дарѡ́въ є҆́сть, ро́ждшеесѧ ѿ сегѡ̀ прозрѣ́нїе. Что́ бо нꙋ́жднѣйше є҆́сть па́че, є҆́же ви́дѣти комꙋ̀ крадє́нїѧ бѣсѡ́въ, и҆ соблюда́ти дꙋ́шꙋ свою̀, благода́ти содѣ́йствꙋющей; Нꙋ́жднѣйша же па́ки є҆́сть всѣ́хъ дѣ́ланїй, чистота̀ со́вѣсти, ꙗ҆́коже глаго́летъ свѧты́й і҆саа́къ, и҆ ѡ҆свѧще́нїе тѣ́ла, без̾ негѡ́же никто́же ᲂу҆́зритъ гдⷭ҇а[[Є҆вр. гл. в҃і, ст. д҃і.]], ꙗ҆́коже глаго́летъ а҆по́столъ.

Ꙗ҆́кѡ не подоба́етъ ѿчаѧва́тисѧ, а҆́ще и҆ мно́гѡ кто̀ согрѣши́тъ.

Ѻ҆ба́че не подоба́етъ на́мъ ѿчаѧва́тисѧ, не сꙋ́щымъ ꙗ҆́коже бы́ти подоба́етъ. Ѕло̀ ᲂу҆́бѡ сїѐ, ꙗ҆́кѡ согрѣши́лъ є҆сѝ человѣ́че. Что́ же бг҃а прогнѣвлѧ́еши, и҆ ѿ неразꙋ́мїѧ не́мощна вмѣнѧ́еши є҆го̀; Є҆да́ ли не мо́жетъ спастѝ дꙋшѝ твоеѧ̀ сотвори́вый толи́кїй, є҆го́же ви́диши, тебѐ ра́ди мі́ръ; А҆́ще же глаго́леши, ꙗ҆́кѡ и҆ сїѐ па́че ѡ҆сꙋжде́нїе мѝ є҆́сть, ꙗ҆́коже и҆ є҆гѡ̀ снисхожде́нїе: пока́йсѧ, и҆ прїи́метъ покаѧ́нїе твоѐ, ꙗ҆́коже блꙋ́днагѡ и҆ блꙋдни́цы. А҆́ще ли же ни сїѐ мо́жеши, но по навыкнове́нїю согрѣша́еши, въ ни́хже бы и҆ не хотѣ́лъ є҆сѝ, и҆мѣ́й смире́нїе ꙗ҆́коже мыта́рь[[Лꙋкѝ гл. и҃і, ст. г҃і.]], и҆ довлѣ́етъ тѝ во спасе́нїе: и҆́бо непокаѧ́ннѣ согрѣша́ѧй, и҆ не ѿчаѧва́ѧйсѧ, по нꙋ́ждѣ хꙋ́ждша все́й тва́ри и҆́мать себѐ, и҆ не дерза́етъ ѡ҆сꙋди́ти и҆лѝ ᲂу҆кори́ти ко́его человѣ́ка; но па́че диви́тсѧ человѣколю́бїю бж҃їю, и҆ благода́ренъ ко благодѣ́телю ѡ҆брѣта́етсѧ, и҆ и҆́на мнѡ́гаѧ блага̑ѧ и҆мѣ́ти мо́жетъ. А҆́ще и҆ дїа́волꙋ въ согрѣше́нїи повинꙋ́сѧ, но па́ки стра́ха ра́ди бж҃їѧ преслꙋ́шаетъ врага̀, понꙋжда́юща є҆го̀ ко ѿча́ѧнїю. И҆ ѿ сегѡ̀ ча́сть бж҃їѧ є҆́сть, и҆мѣ́ѧй благоразꙋ́мїе, благодаре́нїе, терпѣ́нїе, стра́хъ бж҃їй, є҆́же не сꙋди́ти, да не ѡ҆сꙋжде́нъ бꙋ́детъ, ꙗ҆̀же всѧ́чески нꙋ̑жна сꙋ́ть, ꙗ҆́коже глаго́летъ златоꙋ́стъ ѡ҆ гее́ннѣ, ꙗ҆́кѡ ꙗ҆́вѣ благодѣ́тельствꙋетъ на́мъ, и҆ па́че ца́рствїѧ небе́снагѡ, ꙗ҆́кѡ се́ю мно́зїи въ ца́рствїе небе́сное вхо́дѧтъ, ца́рствїемъ же не мно́зи, но человѣколю́бїемъ бж҃їимъ: та̀ ᲂу҆́бѡ нꙋ́дитъ стра́хомъ, сїе́ же прїе́млетъ: и҆ ѻ҆бои́ми спаса́емсѧ благода́тїю хрⷭ҇то́вою. Ꙗ҆́коже бо ра́тꙋемїи ѿ мно́гихъ дꙋше́вныхъ и҆ тѣле́сныхъ страсте́й, а҆́ще претерпѣва́ютъ, и҆ нижѐ самовла́стїе своѐ ѿ нерадѣ́нїѧ предаю́тъ, нижѐ ѿчаѧва́ютсѧ, вѣнча́еми быва́ютъ: та́кѡ и҆ безстра́стїе ѡ҆брѣты́й съ поко́емъ и҆ ле́гкостїю, а҆́бїе ѿпада́етъ, а҆́ще не и҆сповѣ́дꙋетъ благода́ти при́снѡ ника́коже кого̀ ѡ҆сꙋжда́ѧ: а҆́ще же де́рзнетъ сотвори́ти сїѐ, ꙗ҆влѧ́етъ, ꙗ҆́кѡ свое́ю си́лою бога́тство себѣ̀ прїѡбрѣ́те, глаго́летъ свѧты́й маѯі́мъ. И҆ ꙗ҆́кѡ вели́ко бѣ́дствїе и҆́мать стра́стный є҆щѐ и҆ неприча́стный просвѣще́нїѧ ра́зꙋма, а҆́ще и҆ нача́льствꙋетъ нѣ́кїими, глаго́летъ дамаски́нъ, та́кѡ и҆ прїе́мый безстра́стїе ѿ бг҃а, и҆ дꙋхо́вный ра́зꙋмъ, а҆́ще и҆ дрꙋгі̑ѧ не бꙋ́детъ по́льзовати дꙋ́шы. Ничто́же бо и҆́но по́льзꙋетъ немощно́мꙋ, ꙗ҆́коже ᲂу҆дале́нїе въ безмо́лвїе: нижѐ стра́стномꙋ и҆ невѣ́ждѣ, ꙗ҆́коже повинове́нїе въ не́мъ: нижѐ что̀ лꙋ́чше, ꙗ҆́коже ᲂу҆вѣ́дѣти не́мощь свою̀ и҆ неразꙋ́мїе: нижѐ го́рше что̀, є҆́же не вѣ́дѣти сїѐ: нижѐ та́кѡ ненави́стна дрꙋга́ѧ стра́сть, ꙗ҆́коже го́рдость: нижѐ насмѣѧ́нїѧ досто́йнѣйша, ꙗ҆́коже сребролю́бїе: сїѐ є҆́сть ко́рень всѣ́хъ ѕѡ́лъ. Занѐ человѣ́цы содѣ́лавшїи съ вели́кимъ трꙋдо́мъ ѿ мета́лла земна́гѡ сре́брєнницы, па́ки и҆̀хъ пра́здныхъ въ зе́млю полага́ютъ. Сегѡ̀ ра́ди глаго́летъ гдⷭ҇ь: Не скрыва́йте себѣ̀ сокро́вищъ на землѝ[[Матѳ. гл. ѕ҃, ст. ѳ҃і и҆ к҃а.]], и҆ прѡ́чаѧ. И҆ па́ки: И҆дѣ́же бо сокро́вище ва́ше, тꙋ̀ бꙋ́детъ и҆ се́рдце ва́ше. Занѐ человѣ́ческїй ᲂу҆́мъ, въ ни́хже ᲂу҆коснѣва́етъ, жела́нїемъ привлека́етсѧ ѿ навыкнове́нїѧ и҆лѝ къ земны̑мъ вещє́мъ, и҆лѝ къ страсте́мъ, и҆лѝ къ небє́снымъ и҆ вѣ̑чнымъ благи̑мъ: навыкнове́нїе же ᲂу҆коснѣ́вшее крѣ́пость є҆стества̀ прїима́ти ѡ҆бы́че, глаго́летъ васі́лїй вели́кїй. А҆́ще же недꙋ́гꙋетъ кто̀, тогда̀ па́че подоба́етъ внима́ти свидѣ́тельствꙋ со́вѣсти, да ѿ всѧ́кагѡ ѡ҆сꙋжде́нїѧ ѡ҆свободи́тъ дꙋ́шꙋ свою̀, да не ка́кѡ приспѣ́етъ коне́цъ жи́зни, и҆ и҆́мать раскаѧва́тисѧ безполе́знѡ, и҆ пла́кати вѣ́чнѡ. Не могі́й ᲂу҆́бѡ за хрⷭ҇та̀ чꙋ́вственнꙋ ꙗ҆́коже ѻ҆́нъ претерпѣ́ти сме́рть, понѐ произволе́нїемъ до́лженъ є҆́сть терпѣ́ти мы́сленнѣ, и҆ бꙋ́детъ мꙋ́ченикъ со́вѣстїю, внегда̀ не покорѧ́тисѧ борю́щымъ є҆го̀ де́монѡмъ, и҆лѝ хотѣ̑нїѧмъ, но побѣжда́ти и҆̀хъ, ꙗ҆́коже ст҃і́и мꙋ́чєницы и҆ преподо́бнїи ѻ҆тцы̀: и҆з̾ ни́хже ѻ҆́ви чꙋ́вственнѣ, ѻ҆́ви же мы́сленнѣ мꙋ́чєницы бы́ша. Ма́лѡ ᲂу҆́бѡ понꙋ́дивый себѐ, побѣдѝ врага̀, и҆лѝ ма́лѡ вознерадѣ́вый и҆ ѡ҆мраче́нъ бы́въ поги́бе.

Кра́ткое ᲂу҆че́нїе ѡ҆ стѧжа́нїи добродѣ́телей, и҆ ᲂу҆дале́нїи страсте́й.

Ничто́же та́кѡ, глаго́летъ вели́кїй васі́лїй, ѻ҆бы́че помрача́ти мы́сль, ꙗ҆́коже лꙋка́вствїе: нижѐ просвѣща́ти ᲂу҆́мъ, ꙗ҆́коже чте́нїе въ безмо́лвїи. Ничто́же то́ль ско́рꙋю причинѧ́етъ болѣ́знь дꙋшѝ, ꙗ҆́коже мы́сль ѡ҆ сме́рти: нижѐ неви́димое предспѣ́ѧнїе, ꙗ҆́коже самоꙋкоре́нїе, и҆ ѿсѣче́нїе свои́хъ хотѣ́нїй: нижѐ неви́димꙋю поги́бель, ꙗ҆́коже мнѣ́нїе и҆ самоꙋго́дїе: нижѐ вино́вно ѿвраще́нїѧ бж҃їѧ, и҆ наказа́нїѧ человѣ́ча, ꙗ҆́коже ропта́нїе: нижѐ ᲂу҆до́бѣе приво́дитъ къ согрѣше́нїю, ꙗ҆́коже смꙋще́нїе и҆ многоглаго́ланїе: нижѐ благопоспѣ́шнѣе къ стѧжа́нїю добродѣ́тели, ꙗ҆́коже ᲂу҆едине́нїе и҆ сѣ́тованїе: нижѐ ко благоразꙋ́мїю и҆ благодаре́нїю, ꙗ҆́коже размышле́нїе дарѡ́въ бж҃їихъ, и҆ на́шихъ ѕѡ́лъ: нижѐ къ возраще́нїю благодѣѧ́нїи, ꙗ҆́коже си́хъ благохвалє́нїѧ: нижѐ нево́льное спасе́нїе подава́ти ѻ҆бы́че ꙗ҆́коже и҆скꙋшє́нїѧ: нижѐ ближа́йшїй пꙋ́ть ко хрⷭ҇тꙋ̀, си́рѣчь къ безстра́стїю и҆ премꙋ́дрости дх҃а, ꙗ҆́коже пꙋ́ть ца́рскїй ᲂу҆клонѧ́ющїйсѧ во все́мъ превосхожде́нїй и҆ ѡ҆скꙋдѣ́нїй: нижѐ и҆́на добродѣ́тель мо́жетъ пости́гнꙋти во́лю бж҃їю ꙗ҆́коже смиренномꙋ́дрїе, и҆ є҆́же ѡ҆ста́вити всѧ́ко разꙋмѣ́нїе и҆ во́лю свою̀: нижѐ содѣ́йствовати во всѧ́ко дѣ́ло бла́го, ꙗ҆́коже чи́стаѧ моли́тва: нижѐ возбранѧ́етъ стѧжа́нїе добродѣ́телей, ꙗ҆́коже пристра́стїе и҆ возноше́нїе мы́сли, а҆́ще и҆ ѕѣлѡ̀ ма́ло бꙋ́детъ. Є҆ли́кꙋ бо чистотꙋ̀ кто̀ и҆́мать, толи́кѡ мно́гѡ ꙗ҆влѧ́етсѧ согрѣша́ти ᲂу҆мозрѣ́нїемъ: и҆ є҆ли́кѡ мно́гѡ согрѣша́етъ, помрача́етсѧ, а҆́ще и҆ мни́тсѧ и҆мѣ́ти чистотꙋ̀. И҆ па́ки: є҆ли́къ ра́зꙋмъ мни́тсѧ и҆мѣ́ти, толи́кѡ ꙗ҆влѧ́етсѧ неразꙋ́менъ: и҆ є҆ли́кѡ не вѣ́сть кто̀ своегѡ̀ неразꙋ́мїѧ, и҆ ѿ ча́сти дꙋхо́внагѡ ра́зꙋма, толи́кѡ мни́тсѧ разꙋ́менъ бы́ти: и҆ є҆ли́кѡ те́рпитъ подви́жникъ скѡ́рби, толи́кѡ побѣди́тъ врага̀: и҆ є҆ли́кѡ подвиза́етсѧ кто̀ сотвори́ти что̀ бла́го во є҆ди́нъ де́нь, толи́кѡ до́лженъ є҆́сть во всѧ̑ дни̑ живота̀ своегѡ̀, глаго́летъ ст҃ы́й ма́ркъ, а҆́ще, си́рѣчь, бꙋ́детъ є҆гѡ̀ си́ла и҆ ᲂу҆се́рдїе: а҆́ще же благода́ть є҆́сть бж҃їѧ, и҆ є҆ѧ̀ ра́ди є҆гда̀ прїи́де благода́ть, тогда̀ возмо́же, кꙋ́ю таковы́й и҆́мать похвалꙋ̀; занѐ мни́тъ, ꙗ҆́кѡ мо́жетъ нѣ́что благо́е ѿ себѐ твори́ти, и҆ не могꙋ́щихъ ѡ҆сꙋжда́етъ непра́веднѡ. И҆стѧзꙋ́ѧй бо что̀ ѿ бли́жнѧгѡ, ѿ себѐ па́че и҆стѧ́зовати до́лженъ є҆́сть пра́веднѣе. Ꙗ҆́коже бо̀ согрѣша́ющїи до́лжни сꙋ́ть, ꙗ҆́кѡ прогнѣвлѧ́ющїи бг҃а, та́кѡ и҆ покрове́ннїи бл҃года́тїю є҆гѡ̀, не́мощи ра́ди своеѧ̀ и҆ бли́зости ко ѿча́ѧнїю, до́лжни па́че трепета́ти, ꙗ҆́коже мно́гѡ до́лжни сꙋ́ще, и҆ ꙗ҆́кѡ вели́ка стремни́на є҆́сть невѣ́дѣнїе писа́нїй, глаго́летъ ст҃ы́й є҆пїфа́нїй, та́кѡ вѧ́щшее є҆́сть ѕло̀ є҆́же въ ра́зꙋмѣ престꙋпле́нїе, и҆ бо́льшее є҆́сть благотворе́нїе дꙋшѝ сло́вомъ, не́жели моли́твою. И҆ є҆гда̀ те́рпитъ кто̀ бли́жнѧго, да не ѡ҆скорби́тсѧ ѡ҆би́дѧй є҆го̀, но ꙗ҆́кѡ да ᲂу҆поко́итъ во́лю є҆гѡ̀ во вре́мѧ смꙋще́нїѧ є҆гѡ̀, глаго́летъ ст҃ы́й дѡроѳе́й, твори́тъ ми́лость съ дꙋше́ю є҆гѡ̀ носѧ̀ тѧготꙋ̀ є҆гѡ̀, и҆ мо́литсѧ ѡ҆ не́мъ, жела́ѧ спасе́нїѧ є҆гѡ̀, и҆ всегѡ̀, что̀ бла́го є҆́сть тѣле́сно же и҆ дꙋше́вно. И҆ сїѐ є҆́сть чи́стое неѕло́бїе ѡ҆чища́ющее дꙋ́шꙋ, и҆ возводѧ́щее ю҆̀ къ бг҃ꙋ. Занѐ врачева́нїе человѣ́ка лꙋ́чше є҆́сть всѣ́хъ дѣ́ланїй и҆ добродѣ́телей. Ничто́же бо бо́лѣе и҆ соверше́ннѣйшее є҆́сть въ добродѣ́телехъ, па́че любвѝ бли́жнѧгѡ, зна́менїе же сеѧ̀ не то́чїю не и҆мѣ́ти никаковы́ѧ ве́щи, ю҆́же и҆́нъ тре́бꙋетъ, но и҆ сме́рть є҆гѡ̀ ра́ди да съ ра́достїю прете́рпитъ, по за́повѣди гдⷭ҇ни, и҆ сїѧ̀ а҆́ки до́лгъ вмѣнѧ́ти, и҆ досто́йнѣ, до́лженъ бо є҆́сть не то́чїю бли́жнѧго до сме́рти люби́ти по є҆стествꙋ̀, но и҆ за и҆злїѧ́ннꙋю за ны̀ пречи́стꙋю кро́вь заповѣ́давшагѡ на́мъ[[І҆ѡа́н. гл. є҃і, ст. г҃.]] хрⷭ҇та̀. Не бꙋ́ди самолюби́въ, глаго́летъ ст҃ы́й маѯі́мъ, и҆ бꙋ́деши бг҃олюби́въ, не бꙋ́ди самоꙋго́дникъ и҆ бꙋ́деши братолюби́въ. Сїе́ бо ѿ наде́жды ражда́етсѧ: наде́жда же є҆́сть несомнѣ́ннаѧ вѣ́ра ѿ всеѧ̀ мы́сли, ꙗ҆́кѡ всѧ́чески полꙋ́чимъ надѣ́емое. И҆ сїѧ̀ па́ки ѿ и҆звѣще́нныѧ вѣ́ры быва́етъ, ꙗ҆́кѡ ника́коже попече́нїе твори́ти ѡ҆ свое́й жи́зни и҆лѝ сме́рти, но всѐ попече́нїе бг҃ꙋ преда́ти ꙗ҆́коже предрече́сѧ ѡ҆ жела́ющемъ полꙋчи́ти зна́мєнїѧ безстра́стїѧ, и҆́хже ѡ҆снова́нїе є҆́сть вѣ́ра, ю҆́же и҆мы́й до́лженъ є҆́сть помышлѧ́ти, ꙗ҆́кѡ бг҃ъ, ꙗ҆́коже всѧ̑, и҆ на́съ со всѣ́ми ѿ не сꙋ́щихъ кра́йнїѧ ра́ди бла́гости сотворѝ, та́кѡ всѧ́кѡ и҆ дꙋ́шꙋ и҆ тѣ́ло ᲂу҆стро́ити и҆́мать, ꙗ҆́коже са́мъ вѣ́сть.

Ѡ҆ є҆́же, ка́кѡ мо́жетъ кто̀ стѧжа́ти и҆́стиннꙋю вѣ́рꙋ.

Ѻ҆ба́че хотѧ́й стѧжа́нїѧ є҆ѧ̀, ꙗ҆́же є҆́сть ѡ҆снова́нїе всѣ́хъ благи́хъ и҆ две́рь та̑инъ бж҃їихъ, и҆ на врагѝ безтрꙋ́днаѧ побѣ́да, и҆ нꙋ́жднѣйша всѧ́кїѧ добродѣ́тели, и҆ крило̀ моли́твы, и҆ вселе́нїе бж҃їе въ дꙋшѣ̀: до́лженъ є҆́сть претерпѣ́ти всѧ́къ и҆скꙋ́съ, и҆́мже и҆́мать и҆скꙋше́нъ бы́ти ѿ врагѡ́въ и҆ мно́гихъ и҆ разли́чныхъ помыслѡ́въ, и҆́хже никто́же мо́жетъ разꙋмѣ́ти, нижѐ глаго́лати что̀ ѡ҆ ни́хъ, и҆лѝ ѡ҆брѣстѝ, то́чїю и҆з̾ѡбрѣта́тель ѕло́бы дїа́волъ. Но да дерза́етъ таковы́й, ꙗ҆́кѡ а҆́ще побѣди́тъ находѧ́щыѧ є҆мꙋ̀ и҆скꙋшє́нїѧ со мно́гимъ ᲂу҆си́лїемъ, и҆ ᲂу҆де́ржитъ ᲂу҆́мъ сво́й, ѿ є҆́же не посла́бити сегѡ̀ помыслѡ́мъ, ражда́ющымсѧ въ се́рдцѣ є҆гѡ̀, побѣди́ти и҆́мать є҆ди́ною всѧ̑ стра̑сти, занѐ не ѻ҆́нъ є҆́сть побѣди́вый, но прише́дый въ ѻ҆́нь вѣ́рою хрⷭ҇то́съ. Ѡ҆ си́хъ глаго́летъ гдⷭ҇ь: А҆́ще и҆́мате вѣ́рꙋ ꙗ҆́кѡ зе́рно горꙋ́шно, и҆ прѡ́ч.[[Матѳ. гл. з҃і, ст. к҃.]] Но а҆́ще по́мыслъ и҆знемо́гши и҆ попꙋ́ститъ ма́лѡ, да не страши́тсѧ, нижѐ ѿчаѧва́етсѧ, нижѐ да приписꙋ́етъ свое́й дꙋшѣ̀ глаго́лємаѧ ѿ ѕлонача́льника: но съ терпѣ́нїемъ по си́лѣ дѣ́ланїе добродѣ́телей и҆ хране́нїе за́повѣдей тща́тельнѣ да твори́тъ въ безмо́лвїи и҆ ᲂу҆праждне́нїи по бз҃ѣ ѡ҆ всѣ́хъ во́лею помышлѧ́емыхъ: да всѧ́ко ᲂу҆хищре́нїе и҆ мечта́нїе въ нощѝ и҆ во днѝ сотвори́въ вра́гъ, нижѐ ѡ҆брѣ́тъ є҆го̀ попече́нїе творѧ́ща ѡ҆ быва́емыхъ ѿ негѡ̀ и҆гра́лищехъ и҆ ѡ҆бразѣ́хъ, со всѣ́ми разꙋмѣ́нїѧми и҆́миже ᲂу҆страша́ше, си́рѣчь а҆́ки и҆́стинꙋ ꙗ҆влѧ́ѧ лжѝ и҆спѡ́лненнаѧ и҆гра̑лища, ᲂу҆ны́въ ѿи́детъ. И҆ дѣ́латель прїе́мъ и҆скꙋ́съ ѿ за́повѣдей хрⷭ҇то́выхъ, не́мощи вра́жїѧ ктомꙋ̀ ни ѿ какова́гѡ є҆гѡ̀ ᲂу҆хищре́нїѧ не ᲂу҆жаса́етсѧ: но съ ра́достїю всѧ̑, ꙗ҆̀же хо́щетъ и҆ произволѧ́етъ, ѡ҆ бз҃ѣ невозбра́ннѡ твори́тъ, ᲂу҆крѣплѧ́емый и҆ вспомоществꙋ́емый вѣ́рою ѿ бг҃а, въ него́же ᲂу҆вѣ́рова, ꙗ҆́коже са́мъ гдⷭ҇и глаго́летъ: Всѧ̑ возмѡ́жна вѣ́рꙋющемꙋ.[[Ма́рка гл. ѳ҃, ст. к҃г.]] Занѐ не ѻ҆́нъ твори́тъ бра́нь со враго́мъ, но бг҃ъ промышлѧ́ѧй ѡ҆ не́мъ вѣ́ры ра́ди, глаго́летъ проро́къ: Вы́шнѧго положи́лъ є҆сѝ прибѣ́жище твоѐ,[[Ѱал. ч҃, ст. ѳ҃.]] и҆ прѡ́ч.: и҆ таковы́й соверше́ннѡ не твори́тъ попече́нїѧ ни ѡ҆ чесо́мже, вѣ́дый, ꙗ҆́кѡ ко́нь ᲂу҆готовлѧ́етсѧ ко бра́ни, ѿ бг҃а же спасе́нїе є҆гѡ̀,[[При́тч. гл. к҃а, ст. л҃а.]] глаго́летъ соломѡ́нъ. И҆ сегѡ̀ ра́ди на всѧ̑ дерза́етъ, ꙗ҆́коже глаго́летъ ст҃ы́й і҆саа́къ: Стѧжѝ вѣ́рꙋ въ себѣ̀, да попере́ши врагѝ твоѧ̑. Ниже́ бо ꙗ҆́кѡ самовла́стенъ пребыва́етъ, но ꙗ҆́коже ско́тъ води́мый во́лею бж҃їею, ꙗ҆́коже глаго́летъ проро́къ: Ско́тенъ бы́хъ ᲂу҆ тебѐ: и҆ а҆́зъ вы́нꙋ съ тобо́ю.[[Ѱал. ѻ҃в, ст. к҃в и҆ к҃г.]] Во́лиши ли мѧ̀ ᲂу҆поко́ити ра́зꙋмомъ твои́мъ, не противоглаго́лю. Хо́щеши ли па́ки смире́нїѧ ра́ди попꙋсти́ти и҆скꙋшє́нїѧ и҆мѣ́ти мѝ, та́кожде є҆́смь съ тобо́ю, не и҆́мамъ ѿню́дъ что̀ твори́ти ѿ себѐ, кромѣ́ бо тебѐ не бы́хъ ѿ не сꙋ́щагѡ, нижѐ жи́ти и҆ спасти́сѧ могꙋ̀: что́либо хо́щеши, творѝ съ твои́мъ созда́нїемъ. Вѣ́рꙋю же, ꙗ҆́кѡ бла́гъ сы́й, блага̑ѧ мѝ ᲂу҆стро́ити и҆́маши, а҆́ще на по́льзꙋ и҆ не познава́ю сїѧ̑: но нижѐ досто́инъ є҆́смь зна́ти, нижѐ прошꙋ̀ ᲂу҆разꙋмѣ́ти ѧ҆̀, да поко́й и҆́мамъ, а҆́ще не́гли не на по́льзꙋ мѝ сꙋ́ть, нижѐ ѡ҆блегче́нїѧ бра́ни ко́еѧ проси́ти смѣ́ю, а҆́ще и҆ не́мощенъ, и҆ во всѣ́хъ ᲂу҆дрꙋча́емь є҆́смь, ꙗ҆́кѡ не вѣ́мъ, что̀ поле́зно є҆́сть. Ты̀ вѣ́си всѧ̑, и҆ ꙗ҆́коже вѣ́си, сотворѝ: то́чїю да не погрѣшꙋ̀, а҆́ще что́либо бꙋ́детъ: но а҆́ще хощꙋ̀, а҆́ще не хощꙋ̀, спасѝ мѧ̀, и҆ сїѐ а҆́ще ᲂу҆го́дно тебѣ̀. А҆́зъ ᲂу҆́бѡ ве́щи не и҆́мамъ. Пред̾ тобо́ю є҆́смь, ꙗ҆́кѡ кі́й бездꙋ́шенъ: дꙋ́шꙋ мою̀ предаю̀ въ пречⷭ҇тыѧ твоѧ̑ рꙋ́цѣ въ ны́нѣшнѣмъ вѣ́цѣ и҆ въ бꙋ́дꙋщемъ. Ты̀ ᲂу҆́бѡ всѧ̑ мо́жеши, и҆ всѧ̑ вѣ́си, и҆ всѧ́кагѡ бла́га всѣ̑мъ хо́щеши, и҆ жела́еши при́снѡ спасе́нїѧ моегѡ̀. Сїѐ ꙗ҆вле́но є҆́сть ѿ всѣ́хъ бл҃годѣѧ́нїй, ꙗ҆̀же сотвори́лъ є҆сѝ: и҆ твори́ши при́снѡ на́мъ по благода́ти ꙗ҆вле́ннѣ и҆ неѧвле́ннѣ, ꙗ҆̀же вѣ́мы, и҆ ꙗ҆̀же не вѣ́мы, и҆ ѿ є҆ди́нагѡ сꙋ́щагѡ па́че ᲂу҆ма̀ снисхожде́нїѧ твоегѡ̀ къ на́мъ, сн҃е и҆ сло́ве бж҃їй. А҆́зъ же кто̀ є҆́смь, ꙗ҆́кѡ дерза́ю возвѣща́ти тебѣ̀ сердцевѣ́дче: но да себѣ̀ вѣ́домо сотворю̀ и҆ врагѡ́мъ, ꙗ҆́кѡ къ тебѣ̀ прибѣга́ѧ, приста́нищꙋ спасе́нїѧ моегѡ̀, сїѧ̑ глаго́лю. Се́ бо позна́хъ ѿ благода́ти твоеѧ̀, ꙗ҆́кѡ бг҃ъ мо́й є҆сѝ ты̀, и҆ не къ томꙋ̀ дерза́ю мно́гѡ глаго́лати, но то́чїю ᲂу҆́мъ пра́зденъ, глꙋ́хъ же и҆ нѣ́мъ предста́вити пред̾ тобо́ю хощꙋ̀. Не а҆́зъ же, но бл҃года́ть твоѧ̀ всѧ̑ содѣва́етъ: не вѣ́мъ бо себѐ бла́го когда̀ творѧ́ща, но при́снѡ мно́жество ѕѡ́лъ: ѡ҆ ни́хже ра́бїй зра́къ, припа́даѧ къ тебѣ̀, ꙗ҆влѧ́ю, ꙗ҆́кѡ ка́ѧтисѧ мѧ̀ сподо́билъ є҆сѝ, и҆ ꙗ҆́кѡ ра́бъ тво́й є҆́смь и҆ сы́нъ рабы́ни твоеѧ̀. Но да не ѡ҆ста́виши мѧ̀, гдⷭ҇и мо́й, гдⷭ҇и, і҆и҃се хрⷭ҇тѐ бж҃е мо́й, твори́ти и҆лѝ глаго́лати, и҆лѝ помы́слити, ꙗ҆̀же не хо́щеши. Довлѣ́етъ бо мѝ мно́жество толи́кихъ преждебы́вшихъ мои́хъ грѣхѡ́въ, но ꙗ҆́коже хо́щеши, поми́лꙋй мѧ̀. Согрѣши́хъ, поми́лꙋй мѧ̀, ꙗ҆́коже вѣ́си. Вѣ́рꙋю, гдⷭ҇и, ꙗ҆́кѡ вне́млеши моемꙋ̀ ᲂу҆ми́льномꙋ семꙋ̀ гла́сꙋ: помозѝ моемꙋ̀ невѣ́рїю, дарова́вый мѝ, по є҆́же бы́ти и҆ є҆́же бы́ти мѝ хрїстїа́нинꙋ. Вели́ко мѝ є҆́сть, глаго́летъ і҆ѡа́ннъ карпаѳі́йскїй, ꙗ҆́кѡ нареко́хсѧ и҆́нокъ и҆ хрїстїа́нинъ. Ꙗ҆́коже ре́клъ є҆сѝ гдⷭ҇и къ нѣ́коемꙋ ѿ ра̑бъ твои́хъ, ꙗ҆́кѡ вели́ко тѝ є҆́сть, ꙗ҆́кѡ нарече́сѧ на тебѣ̀ и҆́мѧ моѐ. Бо́льшее же мѝ є҆́сть сїѐ, па́че всѣ́хъ црⷭ҇твїй землѝ и҆ небесѐ, то́чїю да не ѿлꙋче́нъ бꙋ́дꙋ ѿ нарече́нїѧ сладча́йшагѡ и҆́мени твоегѡ̀. Влⷣко многоми́лостиве, благодарю́ ти, и҆ прѡ́ч.: ꙗ҆́коже преднаписа́сѧ. Ꙗ҆́коже бо и҆́на чтє́нїѧ прили́чествꙋютъ дѣ́ѧтельномꙋ, и҆ и҆́на словеса̀, и҆ сле́зы и҆ моли́тва: та́кѡ и҆ и҆́на вѣ́ра сїѧ̀, па́че пе́рвыѧ ражда́ющїѧ безмо́лвїе. Ѻ҆́на ᲂу҆́бѡ вѣ́ра є҆́сть слꙋ́ха, сїѧ́ же видѣ́нїѧ ꙗ҆́коже глаго́летъ ст҃ы́й і҆саа́къ: видѣ́нїе же слꙋ́ха и҆звѣще́ннѣйше є҆́сть. Ѿ є҆сте́ственнагѡ бо ра́зꙋма ражда́етсѧ пе́рваѧ и҆ ѻ҆́бщаѧ правосла́вныхъ вѣ́ра, ѿ неѧ́же ражда́етсѧ по бз҃ѣ ᲂу҆праздне́нїе, ꙗ҆́коже рече́сѧ, по́стъ, бдѣ́нїе, чте́нїе, ѱалмопѣ́нїе, моли́тва, вопроше́нїе и҆скꙋ́сныхъ. И҆ ѿ всѣ́хъ си́хъ ражда́ютсѧ добродѣ́тєли дꙋшє́вныѧ, си́рѣчь, блюде́нїе за́повѣдей, и҆ нра́вѡвъ хране́нїе и҆ ᲂу҆строе́нїе, ѿ ни́хже вели́каѧ вѣ́ра, наде́жда, и҆ соверше́нна любы̀, восхища́ющаѧ ᲂу҆́мъ къ бг҃ꙋ, ꙗ҆́коже рече́сѧ, въ моли́твѣ, є҆гда̀ кто̀ ᲂу҆́мнѣ съ бг҃омъ соединѧ́етсѧ, ꙗ҆́коже глаго́летъ ст҃ы́й ні́лъ. Словеса́ же моли́твы є҆ди́ною написа́шасѧ, да при́снѡ то́южде моли́твою мо́литсѧ хотѧ́й ᲂу҆́мъ сво́й недви́жимь предста́вити пред̾ ст҃ꙋ́ю и҆ живонача́льнꙋю трⷪ҇цꙋ, ꙗ҆́кѡ ви́дѧй, а҆́ще и҆ ничто́же ли́шшее ѿню́дъ ви́дѣти возмо́жно: но безви́денъ, невоѡбрази́теленъ, неѡбразови́денъ, несмꙋще́нъ, безпристра́стенъ, недви́жимь, невеще́ственъ, ни ѡ҆ чесо́мже ѿ сꙋ́щихъ во все́й тва́ри помышлѧ́ющь и҆ разсмотрѧ́ющь: но въ ми́рѣ глꙋбо́цѣмъ, и҆ соверше́ннѣй тишинѣ̀ бесѣ́довати съ бг҃омъ, и҆ то́кмѡ є҆ди́нꙋ ст҃ꙋ́ю є҆гѡ̀ па́мѧть и҆мѣ́ти, до́ндеже дости́гнетъ въ восхище́нїе ᲂу҆ма̀, по є҆́же сподо́битисѧ є҆мꙋ̀ глаго́лати, ꙗ҆́коже подоба́етъ, моли́твꙋ гдⷭ҇ню, си́рѣчь: Ѻ҆́ч҃е на́шъ, ꙗ҆́коже ст҃ы́й фїлимѡ́нъ съ ст҃ы́ми а҆по́столы, мꙋ́ченики же и҆ преподо́бными рѣ́ша. Внѣ́ же си́хъ сꙋ́щее пре́лесть є҆́сть ѿ мнѣ́нїѧ быва̑юща: безпредѣ́льно бо є҆́сть бж҃е́ственное и҆ неѡпи́санно, и҆ бы́вый въ себѣ̀ ᲂу҆́мъ та́кѡ до́лженъ є҆́сть бы́ти, да сподо́битсѧ по благода́ти наше́ствїѧ ст҃а́гѡ дх҃а. Вѣ́рою, а҆ не видѣ́нїемъ хо́димъ,[[в҃ Кор. гл. є҃, ст. з҃.]] глаго́летъ а҆по́столъ. Сегѡ̀ ра́ди на до́лзѣ пребыва́ти до́лжни є҆смы̀ въ по́двизѣ, да мно́гимъ вре́менемъ ᲂу҆́мъ ѿ навыкнове́нїѧ раче́нїемъ къ бж҃е́ствєннымъ влече́тсѧ. Ꙗ҆́кѡ а҆́ще и҆ не ѡ҆брѧ́щетъ ᲂу҆́мъ и҆́но что̀ бо́льшее чꙋ́вственныхъ веще́й, не ᲂу҆стремлѧ́етъ на сїѐ хотѣ́нїѧ, и҆ ѡ҆ставлѧ́етъ, ꙗ҆̀же мно́гимъ вре́менемъ навы́че. Ꙗ҆́коже ᲂу҆́бѡ человѣколюби́вїи и҆ безстра́стнїи не помно́гꙋ вреди́ми быва́ютъ ѿ веще́й жите́йскихъ, занѐ до́брѣ сїѧ̑ ᲂу҆строѧ́ютъ: та́кѡ и҆ и҆мꙋ́щїи вели̑кїѧ да́ры, занѐ бг҃ꙋ приписꙋ́ютъ совершє́нїѧ.

Ѡ҆ є҆́же стра̑стнымъ наипа́че поле́знꙋ бы́ти безмо́лвїю.

Всѣ̑мъ ᲂу҆́бѡ поле́зно є҆́сть безмо́лвїе и҆ ᲂу҆дале́нїе веще́й и҆ человѣ̑къ: па́че же стра̑стнымъ и҆ немощны̑мъ. И҆́бо не мо́жетъ ᲂу҆́мъ ѿ є҆ди́нагѡ внѣ́шнѧгѡ дѣ́ланїѧ бы́ти безстра́стенъ, а҆́ще не прїи́метъ мно́гихъ и҆ дꙋхо́вныхъ видѣ́нїй: нижѐ попече́нїе и҆ нача́льствїе без̾ вре́да прехо́дитъ кого̀, а҆́ще пе́рвѣе не стѧ́жетъ безстра́стїѧ ѿ ᲂу҆дале́нїѧ. Попече́нїе же жите́йское и҆ мѧте́жъ и҆ соверше́нныхъ ѡ҆бы́че вреди́ти и҆ безстра́стныхъ: ника́ѧ бо по́льза є҆́сть, глаго́летъ златоꙋ́стъ, ѿ дѣ́ланїѧ человѣ́ча без̾ вы́шнѧгѡ приклоне́нїѧ, нижѐ вы́шнее приклоне́нїе прихо́дитъ па́ки на непроизволѧ́ющаго: но ѻ҆боѧ̑ потрє́бна на́мъ, и҆ бж҃їѧ и҆ человѣ́чєскаѧ, и҆ дѣ́ланїе, и҆ ра́зꙋмъ, и҆ стра́хъ и҆ наде́жда, и҆ пла́чь, и҆ ᲂу҆тѣше́нїе, и҆ боѧ́знь, и҆ смире́нїе, и҆ разсꙋжде́нїе, и҆ любо́вь: занѐ, глаго́летъ, всѧ̑ жи́знєннаѧ сꙋгꙋ̑ба сꙋ́ть, де́нь и҆ но́щь, свѣ́тъ и҆ мра́къ, здра́вїе и҆ недꙋ́гъ, добродѣ́тель и҆ ѕло́ба, благополꙋ́чїе и҆ ѕлоключе́нїе, живо́тъ и҆ сме́рть, да ѻ҆́вѣми ᲂу҆́бѡ, не́мощни сꙋ́ще, бг҃а возлю́бимъ, ѻ҆́вѣми же бѣжи́мъ грѣха̀ стра́хомъ и҆скꙋше́нїй: си́льни же сꙋ́ще всѣ́ми да возлю́бимъ бг҃а, ꙗ҆́коже ѻ҆ц҃а̀, вѣ́дѧще, ꙗ҆́кѡ всѧ̑ бла̑га ѕѣлѡ̀ сꙋ́ть, и҆ поле́знѣ ѧ҆̀ бг҃ъ ᲂу҆строѧ́етъ и҆ ѿ сла́дкихъ ᲂу҆́бѡ возде́рживаемсѧ, трꙋ̑днаѧ же жела́емъ, вѣ́дѧще, ꙗ҆́кѡ ѻ҆́нѣхъ ра́ди тѣлеса̀ жи́ва быва́ютъ во сла́вꙋ творца̀: си́ми же дꙋ́шы ко спасе́нїю вспомоществꙋ́еми быва́ютъ неизрече́нною ми́лостїю бж҃їею. Тре́хъ бо сꙋ́ть человѣ́цы ᲂу҆строе́нїй: рабѝ, нає́мницы и҆ сы́ны: и҆ рабѝ ᲂу҆́бѡ не лю́бѧтъ блага́гѡ, но стра́хомъ мꙋ́къ ѿ ѕла́гѡ ᲂу҆далѧ́ютсѧ: и҆ є҆́сть ᲂу҆́бѡ сїѐ, глаго́летъ ст҃ы́й дѡроѳе́й, бла́го, но не ᲂу҆̀ благоꙋго́дно. Нає́мницы же лю́бѧтъ благо́е, и҆ ненави́дѧтъ лꙋка́вое: но ра́ди наде́жды воздаѧ́нїѧ. Сы́нове же, ꙗ҆́кѡ соверше́нни сꙋ́ще, нижѐ стра́хомъ мꙋ́къ ᲂу҆далѧ́ютсѧ ѿ лꙋка́выхъ, но крѣ́пцѣ ѻ҆́наѧ ненави́дѧтъ: нижѐ па́ки благо́е наде́ждою воздаѧ́нїѧ творѧ́тъ, но ꙗ҆́кѡ до́лгъ сїѐ вмѣнѧ́ютъ: и҆ безстра́стїе лю́бѧтъ ꙗ҆́кѡ подража́нїе бг҃ꙋ, и҆ винꙋ̀ є҆гѡ̀ вселе́нїѧ, и҆́мже ѿ всѧ́кїѧ ѕло́бы ᲂу҆далѧ́ютсѧ, а҆́ще и҆ преще́нїе не предлежи́тъ. Занѐ а҆́ще кто̀ безстра́стенъ не бꙋ́детъ: преблагі́й бг҃ъ не низпосыла́етъ на него̀ всест҃а́го дх҃а: да не ѿ навыкнове́нїѧ влеко́мь є҆щѐ къ страсте́мъ ѡ҆брѧ́щетсѧ, и҆ быва́етъ пови́ненъ наше́ствїю ст҃а́гѡ дх҃а, и҆ бо́льшее ѡ҆сꙋжде́нїе и҆́мать. Но є҆гда̀ ѿ навыкнове́нїѧ добродѣ́тели ника́коже дрꙋ́жество и҆́мать со врага́ми, нижѐ ѿ ѻ҆бы́чаѧ стра́стнагѡ влеко́мь бꙋ́детъ: тогда̀ прїе́млетъ благода́ть, и҆ та́кѡ не ѡ҆сꙋжде́нъ пребыва́етъ въ прїѧ́тїи дарова́нїѧ. Сегѡ̀ ра́ди, глаго́летъ лѣ́ствичникъ, не ѿкрыва́етъ на́мъ бг҃ъ во́ли своеѧ̀, да не сїю̀ ᲂу҆разꙋмѣ́вше, преслꙋ́шаемъ є҆го̀, и҆ па́че ѡ҆сꙋжде́ни бꙋ́демъ. А҆́ще же и҆ ꙗ҆́кѡ младе́нцы не вѣ́мы безпредѣ́льнагѡ є҆гѡ̀ благоꙋтро́бїѧ къ на́мъ неблагода̑рнымъ: бж҃їю бо, глаго́летъ, во́лю ᲂу҆разꙋмѣ́ти хотѧ́й, до́лженъ є҆́сть ᲂу҆мре́ти всемꙋ̀ мі́рꙋ и҆ свое́й во́ли во все́мъ: сегѡ̀ ра́ди всѧ́кꙋ ве́щь и҆мꙋ́щꙋ сомнѣ́нїе не до́лженъ є҆́сть кто̀ твори́ти ю҆̀, и҆лѝ соста́вити, ꙗ҆́кѡ бла́гꙋ, а҆́ще не мо́жетъ пожи́ти, и҆лѝ спасти́сѧ без̾ неѧ̀. И҆ та́кѡ потре́бно є҆мꙋ̀ вопроша́ти и҆скꙋ́сныхъ: тогда̀ ѿ и҆звѣще́нныѧ вѣ́ры и҆ моли́твы быва́етъ таково́е и҆звѣще́нїе пре́жде соверше́ннагѡ безстра́стїѧ, творѧ́щагѡ ᲂу҆́мъ непреѡбори́мь и҆ непобѣди́мь во всѧ́комъ дѣ́лѣ бла́зѣ, ꙗ҆́кѡ а҆́ще и҆ вели́ка бра́нь є҆́сть, но человѣ́къ пребыва́етъ невреди́мь: си́ла бо моѧ̀ въ не́мощи соверша́етсѧ,[[в҃ Кор. гл. в҃і, ст. і҃.]] ꙗ҆́коже речѐ гдⷭ҇ь ко а҆пⷭ҇лꙋ: и҆ то́й глаго́летъ: Є҆гда̀ немощствꙋ́ю, тогда̀ си́ленъ є҆́смь. Нѣ́сть добро̀ бы́ти комꙋ̀ безстра́стнꙋ: занѐ ѿхо́дѧтъ мно́гажды де́мѡни, глаго́летъ лѣ́ствичникъ, мно́гими ѡ҆́бразы, и҆лѝ подса́ды ра́ди, и҆лѝ мнѣ́нїѧ ра́ди, ѡ҆ставлѧ́юще, и҆лѝ возвыше́нїѧ, и҆лѝ дрꙋга́гѡ ра́ди ко́егѡ ѕла̀, дово́льни сꙋ́ще въ се́мъ, ꙗ҆́кѡ могꙋ́щымъ напо́лнити мѣ́сто дрꙋги́хъ страсте́й. Сегѡ̀ ра́ди ѻ҆́вїи ѻ҆тцы̀, глаго́летъ ѿ ста́рчества, соблюда́ша за́пѡвѣди, ѻ҆́вїи же по ни́хъ написа́ша сїѧ̑, мы́ же напи̑саннаѧ на ѻ҆ко́нцѣхъ положи́хомъ: а҆́ще ли же и҆ прочестѝ восхо́щемъ, не ᲂу҆пражднѧ́емсѧ понѐ въ то́мъ са́момъ, є҆́же разꙋмѣ́ти глаго́лємаѧ, и҆ твори́ти ѧ҆̀: но и҆лѝ ꙗ҆́кѡ не нꙋ́жно что̀ прочи́тываемъ, и҆лѝ мни́мсѧ вели́ко нѣ́что твори́ти, и҆ возно́симсѧ не вѣ́дѧще, ꙗ҆́кѡ па́че ѡ҆сꙋжде́нїе и҆́мамы, а҆́ще не твори́мъ, ꙗ҆́коже глаго́летъ златоꙋ́стъ. Вѣ́дый, глаго́летъ гдⷭ҇ь, во́лю господи́на своегѡ̀,[[Лꙋкѝ гл. в҃і, ст. м҃з.]] и҆ прѡ́ч: Тѣ́мже бл҃го ᲂу҆́бѡ є҆́сть чте́нїе и҆ ра́зꙋмъ, но є҆гда̀ къ бо́льшемꙋ смире́нїю приво́дѧтъ: та́кожде и҆ совѣ́тъ, є҆гда̀ кто̀ не и҆спытꙋ́етъ житїѧ̀ ᲂу҆чи́телѧ, ꙗ҆́коже глаго́летъ бг҃осло́въ: Не и҆щѝ ᲂу҆достовѣре́нїѧ ᲂу҆ча́щагѡ тѧ̀, и҆лѝ проповѣ́дающагѡ тѝ: и҆ ꙗ҆́коже глаго́летъ гдⷭ҇ь: є҆ли́ка а҆́ще рекꙋ́тъ ва́мъ,[[Матѳ. гл. к҃г, ст. г҃.]] и҆ прѡ́ч: Нико́егѡже вре́да не быва́етъ вопроша́ющемꙋ ѿ дѣ́лъ ᲂу҆ча́щагѡ и҆̀, но нижѐ па́ки по́льзы, а҆́ще не твори́тъ са́мъ: зане́же кі́йждо возда́стъ ѡ҆ себѣ̀ сло́во:[[Матѳ. гл. в҃і, ст. л҃ѕ.]] ᲂу҆чи́тель ᲂу҆́бѡ ѡ҆ словесѝ свое́мъ, ᲂу҆чи́мый же ѡ҆ сꙋ́щемъ ѿ дѣ́лъ послꙋша́нїи свое́мъ: сꙋ̑щаѧ же внѣꙋ́дꙋ си́хъ, проти́вꙋ є҆стества̀ сꙋ́ть, и҆ ѡ҆сꙋжде́нїѧ достѡ́йна. Занѐ, глаго́летъ ст҃ы́й є҆ѵстра́тїй, бла́гъ є҆́сть и҆ пра́веденъ бг҃ъ, и҆ по бла́гости всѧ́ко бла́го на́мъ да́рствꙋетъ, є҆гда̀ по благоразꙋ́мїю и҆́мамы є҆̀ со благодаре́нїемъ, ꙗ҆́кѡ ѿ пра́ведна прїѡбрѣ́тенїѧ. Но а҆́ще неблагода́рнїи ꙗ҆влѧ́емсѧ, лиша́емсѧ блага́гѡ правосꙋ́дїемъ бж҃їимъ: тѣ́мже бла́гость бж҃їѧ и҆ пра́вда є҆гѡ̀ подаю́тъ на́мъ всѧ́кое бла́го по є҆стествꙋ̀, за ѕлоꙋпотребле́нїе же вѣ́чнꙋю мꙋ́кꙋ.

Ѡ҆ є҆́же, ꙗ҆́кѡ ве́лїе бла́го є҆́сть и҆́стинное покаѧ́нїе.

Ѻ҆ба́че, є҆гда̀ кто̀ восхо́щетъ, па́ки полага́етъ нача́ло покаѧ́нїемъ. Па́лъ ли є҆сѝ, глаго́летъ: воста́ни: и҆ па́ки па́лъ ли є҆сѝ, па́ки воста́ни, не ѿчаѧва́ѧсѧ ѿню́дъ ѡ҆ свое́мъ спасе́нїи, а҆́ще что́либо и҆ бꙋ́детъ: нижѐ во́лею предава́й себѐ врагꙋ̀, и҆ довлѣ́етъ тѝ терпѣ́нїе сїѐ съ самоꙋкоре́нїемъ во спасе́нїе. Бѣ́хомъ, глаго́летъ а҆по́столъ, и҆ мы̀ нѣ́когда несмы́сленни, ходѧ́ще во свои́хъ по́хотехъ,[[Ті́та гл. г҃, ст. г҃.]] и҆ прѡ́ч: Ты̀ ᲂу҆́бѡ ѿню́дъ да не ѿча́ешисѧ, не вѣ́дѧ бж҃їей по́мощи, мо́жетъ бо є҆ли̑ка хо́щетъ сотвори́ти: но ᲂу҆пова́й на него̀, и҆ є҆ди́но ѿ си́хъ и҆́мать сотвори́ти, и҆лѝ ꙗ҆́кѡ нѣ́кїими и҆скꙋше́нїѧми, и҆лѝ дрꙋги́ми ѡ҆́бразы, и҆́миже ѻ҆́нъ вѣ́сть, ᲂу҆стро́итъ твоѐ и҆справле́нїе, и҆лѝ прїи́метъ твоѐ терпѣ́нїе и҆ смире́нїе вмѣ́стѡ дѣ́ланїѧ: и҆лѝ и҆нѣ́мъ ѡ҆́бразомъ, є҆гѡ́же не вѣ́си, по ᲂу҆пова́нїю содѣ́лаетъ человѣколю́бнѡ, во є҆́же спастѝ бездерзнове́ннꙋю твою̀ дꙋ́шꙋ: то́чїю да не ѡ҆ставлѧ́еши врача̀, занѐ лю́тѣ терпѣ́ти и҆́маши сꙋгꙋ́бꙋю сме́рть за невѣ́дѣнїе сокрове́ннагѡ бж҃їѧ намѣ́ренїѧ, ꙗ҆́коже рече́сѧ ѡ҆ ра́зꙋмѣ, и҆ ны́нѣ рече́тсѧ ѡ҆ дѣ́ланїи: ꙗ҆́кѡ посредѝ шестѝ сѣте́й є҆́сть всѧ́ко тѣле́сное и҆ дꙋше́вное дѣ́ланїе, ѡ҆деснꙋ́ю, глаго́лю, и҆ ѡ҆шꙋ́юю, си́рѣчь, превосхожде́нїемъ трꙋдѡ́въ и҆ ѡ҆скꙋдѣ́нїемъ: горѣ̀ и҆ до́лꙋ, си́рѣчь, возноше́нїемъ и҆ ѿча́ѧнїемъ: внꙋ́трь и҆ внѣꙋ́дꙋ, си́рѣчь, боѧ́знїю и҆ де́рзостїю, ѡ҆ не́йже глаго́летъ бг҃осло́въ, ꙗ҆́кѡ дале́че по превосхо́дствꙋ ѿстои́тъ ѿ дерзнове́нїѧ, а҆́ще и҆́менемъ и҆ подо́бна є҆́сть: посредѣ́ же си́хъ шестѝ сѣте́й ᲂу҆мѣ́ренное дѣ́ланїе во смире́нїи и҆ терпѣ́нїи. Диви́тисѧ подоба́етъ ᲂу҆мꙋ̀ человѣ́чꙋ, ка́кѡ прелага́етъ всѧ̑ сꙋ̑щаѧ въ не́мъ, ꙗ҆́коже хо́щетъ, а҆́ще и҆ непрелѡ́жна сꙋ́ть, и҆ въ дрꙋги́хъ та́кѡ пребыва́ютъ. И҆ сегѡ̀ ра́ди не всѝ є҆ди́но намѣ́ренїе ѡ҆ сꙋ́щихъ и҆́мамы: но кі́йждо, ꙗ҆́коже хо́щетъ, ᲂу҆потреблѧ́етъ вє́щи и҆лѝ до́брѣ, и҆лѝ ѕлѣ̀: чꙋ́вствєннаѧ ᲂу҆́бѡ дѣ́ломъ, мы́слєннаѧ же сло́вомъ и҆ помышле́нїемъ. Четы́рехъ, ꙗ҆́коже мѝ мни́тсѧ, видѣ́нїй по бг҃осло́вꙋ и҆ ᲂу҆строе́нїй всѝ человѣ́цы: ѻ҆́вїи ᲂу҆́бѡ до́брѣ здѣ̀ и҆ въ бꙋ́дꙋщемъ, ꙗ҆́коже всѝ ст҃і́и и҆ безстра́стнїи бы́вшїи: ѻ҆́вїи же здѣ̀ то́чїю до́брѣ, ꙗ҆́кѡ благодѣ́тельствꙋемїи недосто́йнѣ дꙋше́внѣ и҆лѝ тѣле́снѣ, за є҆́же не и҆мѣ́ти благодаре́нїѧ ко благодѣ́телю, ꙗ҆́коже ѻ҆́ный бога́тый, и҆ такові́и: и҆ні́и па́ки здѣ̀ то́чїю мꙋ́чатсѧ, ꙗ҆́коже до́лгимъ недꙋ́гомъ ѡ҆бдержи́мїи, ꙗ҆́коже ѻ҆́ный разсла́бленный, и҆ и҆скꙋша́емїи благода́рнѣ ѿ своеѧ̀ мы́сли. И҆ні́и же па́ки и҆ здѣ̀ и҆ та́мѡ мꙋ́чатсѧ, ꙗ҆́коже и҆скꙋша́емїи ѿ свои́хъ хотѣ́нїй, ꙗ҆́коже і҆ꙋ́да и҆ подо́бнїи. И҆ па́ки четы́ре и҆́мꙋтъ намѣ́ренїѧ ѡ҆ чꙋ́вственныхъ ве́щехъ. Ѻ҆́вїи во ненави́дѧтъ дѣла̀ бж҃їѧ, ꙗ҆́коже де́мѡни, и҆ ѿ ѕла́гѡ произволе́нїѧ ѕло́бствꙋютъ: ѻ҆́вїи же ꙗ҆́кѡ дѡбра̀ лю́бѧтъ, ѻ҆ба́че стра́стнѡ, ꙗ҆́коже безсловє́снаѧ живо́тнаѧ, ничто́же ѡ҆ є҆сте́ственномъ видѣ́нїи и҆ благодаре́нїи пекꙋ́щесѧ: а҆ и҆ні́и, ꙗ҆́коже человѣ́цы є҆сте́ственнѡ съ дꙋхо́внымъ ра́зꙋмомъ и҆ благодаре́нїемъ, ᲂу҆потреблѧ́юще всѧ̑ съ воздержа́нїемъ: и҆ні́и же па́ки вышеесте́ственнѣ, ꙗ҆́коже а҆́гг҃ли, зрѧ́тъ всѧ̑ во сла́вꙋ творца̀ ничто́же ѿ си́хъ ᲂу҆потреблѧ́юще, ра́звѣ то́чїю потрє́бнаѧ къ житїю̀ по а҆по́столꙋ.[[а҃ Тїм. гл. ѕ҃, ст. и҃.]]

Ѡ҆ ѻ҆́бщихъ и҆ ѻ҆со́бенныхъ дарѣ́хъ бж҃їихъ.

Сегѡ̀ ра́ди до́лжни є҆смы̀ всѝ человѣ́цы при́снѡ бл҃годари́ти бг҃ꙋ ѡ҆ ѻ҆́бщихъ же и҆ ѻ҆со́бенныхъ благодѣѧ́нїѧхъ дꙋше́вныхъ же и҆ тѣле́сныхъ. Ѻ҆́бщыѧ ᲂу҆́бѡ сꙋ́ть четы́ри стїхі̑и, и҆ всѧ̑ ѿ ни́хъ быва̑ющаѧ, и҆ всѧ̑ въ бж҃е́ственныхъ писа́нїѧхъ предложє́ннаѧ ди̑внаѧ и҆ ᲂу҆жа̑снаѧ дѣла̀ бж҃їѧ. Ѻ҆со́бєннаѧ же, є҆ли̑ка бг҃ъ коемꙋ́ждо человѣ́кꙋ дадѐ, и҆лѝ бога́тство ми́лостыни ра́ди, и҆лѝ ᲂу҆бо́жество благода́рнагѡ ра́ди терпѣ́нїѧ, и҆лѝ вла́сть правосꙋ́дїѧ ра́ди и҆ ᲂу҆твержде́нїѧ добродѣ́тели, и҆лѝ покоре́нїе и҆ ра́бство гото́вагѡ ра́ди спасе́нїѧ дꙋшѝ, и҆лѝ здра́вїе вспоможе́нїѧ ра́ди тре́бꙋющымъ и҆ дѣ́ланїѧ по бз҃ѣ, и҆лѝ болѣ́знь вѣнца̀ ра́ди терпѣ́нїѧ, и҆лѝ ра́зꙋмъ и҆ крѣ́пость стѧжа́нїѧ ра́ди добродѣ́тели, и҆лѝ безси́лїе и҆ невѣ́жество повинове́нїѧ ра́ди въ безмо́лвїи со смире́нїемъ и҆ ᲂу҆дале́нїѧ веще́й, и҆лѝ нево́льное лише́нїе веще́й во́льнагѡ ра́ди спасе́нїѧ и҆ по́мощи не могꙋ́щымъ прїитѝ въ соверше́нство нестѧжа́нїѧ, и҆лѝ понѐ къ ми́лостыни, и҆лѝ поко́ю и҆ благоде́нствїю ко є҆́же во́лею подвиза́тисѧ и҆ трꙋди́тисѧ въ добродѣ́телѧхъ, ꙗ҆́коже безстра́стнымъ бы́ти, и҆ и҆ны̑ѧ спастѝ дꙋ́шы: и҆лѝ и҆скꙋше́нїе и҆ ѕлоключе́нїе ко є҆́же нево́льнѣ спасє́ннымъ бы́ти немогꙋ́щихъ ѿсѣщѝ свои́хъ хотѣ́нїй, и҆лѝ па́ки соверше́нства ра́ди могꙋ́щихъ претерпѣ́ти съ ра́достїю. Всѧ̑ ᲂу҆́бѡ речє́ннаѧ а҆́ще и҆ проти̑вна дрꙋ́гъ дрꙋ́гꙋ сꙋ́ть, ѻ҆ба́че въ потре́бѣ всѧ̑ сꙋ́ть дѡбра̀ ѕѣлѡ̀: кромѣ́ же потре́бы не сꙋ́ть дѡбра̀, но па́че врє́дна дꙋшѣ̀ и҆ тѣ́лꙋ: лꙋ́чше же всѣ́хъ рече́нныхъ є҆́сть терпѣ́нїе ско́рбныхъ. И҆ сподо́бивыйсѧ вели́кагѡ да́ра сегѡ̀ до́лженъ є҆́сть благодари́ти бг҃а, ꙗ҆́кѡ ѡ҆благодѣ́тельствованъ бы́въ вѧ́щшими. Бы́сть бо подража́нїе хрⷭ҇тꙋ̀ и҆ ст҃ы̑мъ є҆гѡ̀ а҆по́столамъ, мꙋ́ченикамъ же и҆ преподѡ́бнымъ. Занѐ мно́гꙋ си́лꙋ и҆ ра́зꙋмъ ѿ бг҃а прїѧ́тъ ко є҆́же во́лею сла́дкихъ ᲂу҆далѧ́тисѧ, и҆ жела́ти па́че ско́рбныхъ ѿсѣче́нїемъ свои́хъ хотѣ́нїй, и҆ ѿверже́нїемъ не по бз҃ѣ сꙋ́щихъ разꙋмѣ́нїй, да твори́тъ и҆ помышлѧ́етъ при́снѡ ᲂу҆гѡ́днаѧ бг҃ꙋ. Сподо́бившїисѧ ᲂу҆́бѡ ᲂу҆потреблѧ́ти вє́щи по потре́бѣ, до́лжни сꙋ́ть мно́гѡ благодари́ти бг҃а со смире́нїемъ мно́гимъ, ꙗ҆́кѡ свободи́шасѧ благода́тїю бж҃їею ѿ сꙋ́щихъ проти́вꙋ є҆стества̀ и҆ престꙋпле́нїѧ за́повѣдей. Мы́ же є҆щѐ стра́стнїи сꙋ́ще и҆ во ѕло̀ ᲂу҆потреблѧ́ющїи вє́щи, ꙗ҆́кѡ проти́вꙋ є҆стества̀, до́лжни є҆смы̀ трепета́ти и҆ мно́гѡ благодари́ти благодѣ́телю со всѧ́кимъ благоразꙋ́мїемъ дивѧ́щесѧ неизрече́нномꙋ є҆гѡ̀ долготерпѣ́нїю, ꙗ҆́кѡ и҆ преслꙋша́ющымъ на́мъ є҆гѡ̀ за́пѡвѣди, и҆ во ѕло̀ ᲂу҆потреблѧ́ющымъ вє́щи, и҆ ѿвраща́ющымсѧ є҆гѡ̀ дарѡ́въ, те́рпитъ безꙋ́мїю на́шемꙋ, и҆ не престае́тъ благотвори́ти на́мъ ѡ҆жида́ѧ ѡ҆браще́нїѧ и҆ покаѧ́нїѧ на́шегѡ до послѣ́днѧгѡ и҆здыха́нїѧ. Та́кѡ до́лжни є҆смы̀ всѝ человѣ́цы благодари́ти є҆го̀, ꙗ҆́коже рече́сѧ: ѡ҆ все́мъ благодари́те: ѿ сегѡ̀ дрꙋгі́й глаго́лъ а҆по́столовъ, ꙗ҆́коже речѐ: непреста́ннѡ моли́тесѧ,[[а҃ Сол. гл. є҃, ст. з҃і и҆ и҃і.]] си́рѣчь, є҆́же и҆мѣ́ти па́мѧть бж҃їю во всѧ́комъ вре́мени, мѣ́стѣ же и҆ ве́щи: ꙗ҆́кѡ а҆́ще кто̀ что́либо твори́тъ, до́лженъ и҆мѣ́ти па́мѧть творца̀ прилꙋчи́вшїѧсѧ ве́щи, си́рѣчь, а҆́ще ви́диши свѣ́тъ, не забꙋ́ди дарова́вшагѡ є҆го̀ тѝ: а҆́ще ви́диши не́бо и҆ зе́млю, мо́ре и҆ всѧ̑ сꙋ̑щаѧ, ᲂу҆диви́сѧ и҆ прославлѧ́й созда́вшаго: а҆́ще въ ри́зꙋ ѡ҆блека́ешисѧ, познава́й, чі́й да́ръ є҆́сть, и҆ воспѣва́й промышлѧ́ющаго ѡ҆ жи́зни твое́й. И҆ вкра́тцѣ: всѧ́ко движе́нїе да бꙋ́детъ тебѣ̀ вина̀ къ сла́вѣ бж҃їей, и҆ сѐ непреста́ннѡ мо́лишисѧ. И҆ ѿ си́хъ всегда̀ ра́дꙋетсѧ дꙋша̀[[а҃ Сол. гл. є҃, ст. ѕ҃і.]] по а҆пⷭ҇лꙋ: па́мѧть бо бж҃їѧ весели́тъ ю҆̀, глаго́летъ ст҃ы́й дѡроѳе́й, приводѧ̀ свидѣ́телѧ дв҃да: помѧнꙋ́хъ, глаго́летъ се́й, бг҃а, и҆ возвесели́хсѧ.[[Ѱал. ѻ҃ѕ, ст. д҃.]]

Ꙗ҆́кѡ всѧ̑ къ по́льзѣ на́шей сотвори́лъ є҆́сть бг҃ъ.

Поне́же всѧ̑ сꙋ̑щаѧ къ по́льзѣ на́шей бг҃ъ сотворѝ: ѿ а҆́гг҃лъ ᲂу҆́бѡ блюдо́мы є҆смы̀ и҆ наꙋча́еми, ѿ де́монѡвъ же и҆скꙋша́еми, да смири́мсѧ и҆ прибѣ́гнемъ къ бг҃ꙋ, и҆́миже спаса́емсѧ и҆ и҆збавлѧ́емсѧ ѿ возноше́нїѧ и҆ нерадѣ́нїѧ стра́хомъ и҆скꙋше́нїй. И҆ па́ки: ѿ сла́дкихъ ᲂу҆́бѡ мі́ра, здра́вїѧ, глаго́лю, благоде́нствїѧ, крѣ́пости, поко́ѧ, ра́дости, свѣ́та, ра́зꙋма, бога́тства, во все́мъ предспѣ́ѧнїѧ, ми́рнагѡ ᲂу҆строе́нїѧ, наслажде́нїѧ, че́сти, вла́сти, ѻ҆би́лїѧ, и҆ всѣ́хъ мни́мыхъ благи́хъ въ житїѝ се́мъ возво́димсѧ къ благодаре́нїю и҆ благоразꙋ́мїю ко благодѣ́телю, и҆ ко є҆́же люби́ти є҆го̀, и҆ твори́ти є҆́же по си́лѣ благо́е, ꙗ҆́кѡ до́лгъ и҆мꙋ́ще є҆сте́ственный, за да́ры благодѣ́ланїемъ возда́ти мнѧ́ще, а҆́ще и҆ нѣ́сть мо́щно сїѐ: но вѧ́щшїй до́лгъ є҆́сть. Ѿ мни́мыхъ же бѣ́дствїй, недꙋ́га, ѕлоключе́нїѧ, трꙋда̀, не́мощи, нево́льныѧ печа́ли, мра́ка, неразꙋ́мїѧ, ᲂу҆бо́жества, ѕлополꙋ́чїѧ во все́мъ, боѧ́зни, лише́нїѧ, безче́стїѧ, ᲂу҆дрꙋче́нїѧ, скꙋ́дости и҆ всѣ́хъ сопроти́вныхъ предречє́ннымъ прихо́димъ въ терпѣ́нїе: смире́нїе же, и҆ благо́е ᲂу҆пова́нїе въ бꙋ́дꙋщемъ, не то́чїю же, но и҆ въ ны́нѣшнемъ вѣ́цѣ вели́кихъ ᲂу҆тѣше́нїй на́мъ быва́ютъ сїѧ̑ винѡ́вна. Тѣ́мже всѧ̑ дѡбра̀ бг҃ъ на́мъ ᲂу҆стро́и чꙋ́днѣ неизрече́нною бла́гостїю. И҆ хотѧ́й ᲂу҆́бѡ сїѧ̑ разꙋмѣ́ти, ꙗ҆́коже подоба́етъ, да подвиза́етсѧ ѡ҆ стѧжа́нїи добродѣ́телей: да всѧ̑ речє́ннаѧ прїе́млетъ со благодаре́нїемъ, дѡ́браѧ же и҆ ꙗ҆влѧ́ющаѧсѧ сопроти̑вна, и҆ во все́мъ ѡ҆брѣта́етсѧ без̾ смꙋще́нїѧ: и҆ не то́чїю въ си́хъ, но и҆ є҆гда̀ го́рдый по́мыслъ во є҆́же возвы́сити є҆го̀ де́мѡни предло́жатъ: тогда̀ воспомина́етъ ꙗ҆̀же пре́жде глагѡ́ланнаѧ ѿ ни́хъ ска́рєднѣйшаѧ, и҆ низлага́етъ є҆го̀, и҆ ко смире́нїю прихо́дитъ. И҆ є҆гда̀ па́ки ме́рзкое что̀ предло́жатъ, воспомѧнꙋ́въ го́рдый ѻ҆́ный по́мыслъ, низлага́етъ сїѐ: тѣ́мже твори́тъ и҆̀хъ низлага́ти дрꙋ́гъ дрꙋ́га, содѣ́йствїемъ благода́ти, па́мѧтїю, да нижѐ въ ѿча́ѧнїе ска́реднѣйшими, нижѐ въ го́рдость мнѣ́нїѧ ра́ди прїи́детъ когда̀. Но є҆гда̀ вознесꙋ́тъ ᲂу҆́мъ є҆гѡ̀ вразѝ, прибѣга́етъ къ смире́нїю: и҆ є҆гда̀ смирѧ́тъ ᲂу҆́мъ є҆гѡ̀, къ бг҃ꙋ возно́ситсѧ ᲂу҆пова́нїемъ, да никогда́ же дерзнꙋ́вый паде́тъ, нижѐ па́ки ᲂу҆боѧ́выйсѧ ѿча́етсѧ до послѣ́днѧгѡ и҆здыха́нїѧ. И҆ сїѐ є҆́сть вели́кое и҆́нока дѣ́ланїе, ꙗ҆́коже глаго́летъ ѿ ста́рчества: но є҆гда̀ предлага́ютъ сїѐ вразѝ, ѻ҆́нъ и҆но́е предполага́етъ: и҆ є҆гда̀ ѻ҆нѝ дрꙋго́е, ѻ҆́нъ сїѐ на средꙋ̀ приво́дитъ, вѣ́дый, ꙗ҆́кѡ ничто́же є҆́сть въ житїѝ се́мъ ѿню́дъ неизмѣ́нно. Но претерпѣ́вый до конца̀, то́й спасе́нъ бꙋ́детъ,[[Матѳ. гл. і҃, ст. к҃в.]] хотѧ́й же бы́ти веще́мъ, ꙗ҆́коже хо́щетъ, не вѣ́сть, ка́мѡ и҆́детъ. Но ꙗ҆́кѡ слѣпы́й коле́блемый всѧ́кимъ вѣ́тромъ, а҆́ще что́либо є҆мꙋ̀ прїи́детъ, соверше́ннѡ ве́сь ѻ҆́номꙋ предае́тсѧ, и҆ ꙗ҆́кѡ ра́бъ бои́тсѧ печа́льныхъ, и҆ ꙗ҆́кѡ плѣ́нникъ мнѣ́нїю порабоща́етсѧ, мнѧ́йсѧ ѿ безслове́сныѧ ра́дости вѣ́дѣти, ꙗ҆̀же никогда́же вѣ́дѣ что̀, и҆ ѿкꙋ́дꙋ сꙋ́ть. А҆́ще же глаго́летъ вѣ́дѣти, тогда̀ па́че ѡ҆слѣплѧ́етсѧ. Сїе́ бо быва́етъ, є҆гда̀ не ᲂу҆корѧ́етъ себѐ, є҆́же глаго́летсѧ самоꙋго́дїе и҆ безвѣ́стна поги́бель, ꙗ҆́коже глаго́летъ ст҃ы́й мака́рїй во глави́знахъ ѡ҆ поги́бшемъ и҆́ноцѣ, внегда̀ ᲂу҆зрѣ́ти є҆мꙋ̀ го́рнїй і҆ерꙋсали́мъ, молѧ́щꙋсѧ съ нѣ́коею бра́тїею и҆ восхи́тившꙋсѧ ᲂу҆мꙋ̀ є҆гѡ̀: занѐ дости́гнꙋти возмнѣ́сѧ нѣ́что, а҆ не вѧ́щшїй до́лгъ и҆мѣ́ти. Ꙗ҆́коже ᲂу҆́бѡ ѕѣлѡ̀ стра́стнїи нижѐ ꙗ҆́внаѧ мнѡ́гимъ вѣ́дѧтъ ѿ мглы̀ страсте́й: та́кѡ и҆ безстра́стнїи, мнѡ́гимъ недовѣ́дѡмаѧ, вѣ́дѧтъ ѿ чистоты̀ ᲂу҆ма̀.

Ꙗ҆́кѡ сло́во бж҃їе не є҆́сть благоче́стїе.

Сло́во бо бж҃їе, глаго́летъ ст҃ы́й маѯі́мъ, нѣ́сть многосло́вїе. Но є҆гда̀ всѝ человѣ́цы мно́гѡ глаго́лемъ: тогда̀ є҆ди́нагѡ словесѝ не и҆спо́лнихомъ, си́рѣчь, речѐ бг҃ъ: Возлю́биши гдⷭ҇а бг҃а твоего̀ все́ю дꙋше́ю твое́ю[[Матѳ. гл. к҃в, ст. л҃з.]] и҆ прѡ́ч: коли́кѡ ᲂу҆́бѡ реко́ша ѻ҆тцы̀, коли́кѡ написа́ша, и҆ є҆щѐ глаго́лютъ и҆ пи́шꙋтъ, и҆ не и҆спо́лниша є҆ди́нагѡ сегѡ̀ словесѝ. Ѿ всеѧ́ бо дꙋшѝ, глаго́летъ вели́кїй васі́лїй, є҆́сть ѿню́дъ не люби́ти что̀ съ бг҃омъ: занѐ а҆́ще кто̀ свою̀ дꙋ́шꙋ лю́битъ, бг҃а не лю́битъ ѿ всеѧ̀ дꙋшѝ, но ѿ полꙋ̀. Є҆гда́ же и҆ себѐ сами́хъ и҆ дрꙋга̑ѧ безчи́слєннаѧ лю́бимъ, ка́кѡ бг҃а люби́ти мо́жемъ, и҆лѝ де́рзнемъ сїѐ глаго́лати; Та́кожде и҆ ѡ҆ любвѝ бли́жнѧгѡ: а҆́ще привре́меннꙋю жи́знь, не́гли же и҆ бꙋ́дꙋщꙋю за любо́вь бли́жнѧгѡ не ѿве́ргнемъ, ꙗ҆́кѡ мѡѷсе́й и҆ а҆пⷭ҇лъ, ка́кѡ глаго́лемъ люби́ти є҆го̀; Занѐ ѻ҆́въ речѐ ѡ҆ наро́дѣ къ бг҃ꙋ: а҆́ще ᲂу҆̀бо ѡ҆ста́виши и҆̀мъ грѣ́хъ и҆́хъ, ѡ҆ста́ви: а҆́ще же нѝ, и҆згла́ди и҆ менѐ и҆з̾ кни́ги твоеѧ̀, въ ню́же вписа́лъ є҆сѝ.[[И҆схо́д. гл. л҃в, ст. л҃в.]] А҆по́столъ же глаго́летъ, а҆на́ѳема бы́ти себѐ ѿ хрⷭ҇та̀, и҆ прѡ́ч.: Моли́лбыхбосѧ са́мъ ѿлꙋче́нъ бы́ти ѿ хрⷭ҇та̀ по бра́тїи свое́й, па́че же и҆́щꙋщихъ ᲂу҆би́ти є҆го̀, и҆̀же сꙋ́ть і҆и҃льтѧнє.[[Ри́мл. гл. ѳ҃, ст. г҃ и҆ д҃.]] Таковы̀ сꙋ́ть дꙋ́шы ст҃ы́хъ: сі́и врагѡ́въ па́че себѐ лю́бѧтъ. Тѣ́мже въ ны́нѣшнемъ вѣ́цѣ и҆ въ бꙋ́дꙋщемъ во все́мъ бли́жнѧго предпочита́ютъ, а҆́ще и҆ вра́гъ и҆́мъ ѕла́гѡ ра́ди произволе́нїѧ бꙋ́детъ, не и҆́щꙋще воздаѧ́нїѧ ѿ люби́мыхъ и҆́ми, но ꙗ҆́кѡ прїе́млющїи ра́дꙋютсѧ, внегда̀ даѧ́ти дрꙋги́мъ всѧ̑ своѧ̑, да благодѣ́телю ᲂу҆годѧ́тъ, и҆ по си́лѣ подража́ютъ є҆гѡ̀ человѣколю́бїю, ꙗ҆́кѡ бла́гъ є҆́сть на неблагода̑рныѧ и҆ грѣ̑шныѧ. Наипа́че же є҆ли́кѡ кто̀ таковы̑ѧ дарова̑нїѧ сподо́битсѧ и҆мѣ́ти, толи́кѡ должника̀ себѐ до́лженъ є҆́сть таковы́й вмѣнѧ́ти возне́сшемꙋ є҆го̀ ѿ землѝ бг҃ꙋ, и҆ сподо́бльшемꙋ пе́рсть подража́ти ѿ ча́сти творцꙋ̀ и҆ бг҃ꙋ. Є҆́же бо претерпѣва́ти ѡ҆би̑ды съ ра́достїю и҆ неѕло́бивѡ, благотвори́ти врагѡ́мъ, и҆ полага́ти свою̀ дꙋ́шꙋ за бли́жнѧго, сꙋ́ть да́ры бж҃їѧ, да́рꙋємыѧ произволѧ́ющымъ сїѧ̑ прїѧ́ти ѿ негѡ̀ тща́нїемъ, во є҆́же дѣ́лати и҆ храни́ти,[[Быт. гл. в҃, ст. є҃і.]] ꙗ҆́коже рече́сѧ ко а҆да́мꙋ, да пребыва́ютъ да́ры благодаре́нїемъ ко благодѣ́телю. Занѐ ни є҆ди́но бла́го николи́же своѐ и҆́мамы, но всѧ̑ блага̑ѧ ѿ бг҃а на́мъ дарова́шасѧ по благода́ти, ꙗ҆́коже ѿ не сꙋ́щагѡ быва́ютъ сꙋ̑щаѧ. Что́ бо и҆́маши, є҆гѡ́же нѣ́си прїѧ́лъ[[а҃ Кор. гл. д҃, ст. з҃.]], глаго́летъ а҆по́столъ, тꙋ́не, си́рѣчь, ѿ бг҃а: а҆́ще же и҆ прїѧ́лъ є҆сѝ, что̀ хва́лишисѧ, ꙗ҆́кѡ не прїѧ́вый, но са́мъ собо́ю творѧ́й; є҆́же не возмо́жно гдⷭ҇ꙋ глаго́лющꙋ: Без̾ менѐ не мо́жете твори́ти ничесѡ́же[[І҆ѡа́н. гл. є҃і, ст. є҃.]].

Ꙗ҆́кѡ без̾ смиренномꙋ́дрїѧ не возмо́жнѡ спасти́сѧ.

Не вѣ́мъ, а҆́ще ѿ мно́гагѡ ѡ҆мраче́нїѧ страсте́й въ толи́ко безꙋ́мїе кто̀ прїи́де, ꙗ҆́кѡ не́гли мни́тъ себѐ бы́ти ра́вна а҆́гг҃лѡмъ, па́че же и҆ бо́льша, ꙗ҆́кѡ мни́тъ спасти́сѧ без̾ смиренномꙋ́дрїѧ, є҆гѡ́же лиши́всѧ пре́жде денни́ца кромѣ̀ и҆на́гѡ грѣха̀ тьма̀ бы́сть. Тѣ́мже что̀ ᲂу҆́бѡ и҆́мать претерпѣ́ти не и҆мы́й смире́нїѧ, ме́ртвенный и҆ пе́рсть, да не рекꙋ̀ грѣ́шникъ; не́гли слѣ́пъ сы́й не вѣ́рꙋетъ, ꙗ҆́кѡ грѣ́шенъ є҆́сть; Все́ю нꙋ́ждею, глаго́летъ златоꙋ́стъ, соверше́нъ человѣ́къ бꙋ́детъ равноа́гг҃ленъ, ꙗ҆́коже глаго́летъ гдⷭ҇ь, си́рѣчь въ воскресе́нїе ме́ртвыхъ, а҆ не въ ны́нѣшнемъ вѣ́цѣ. Но и҆ ни тогда̀ а҆́гг҃ли, но равноа́гг҃льни сꙋ́ть, речѐ: не бо̀ мо́гꙋтъ, глаго́летъ, человѣ́цы ѡ҆ставлѧ́ти своѐ є҆стество̀: но ꙗ҆́коже ѻ҆нѝ неизмѣ́нни по благода́ти, и҆ всѧ́кїѧ нꙋ́жды свобожде́ни, самопроизво́льнꙋ и҆́мꙋтъ вла́сть и҆ непреста́нно весе́лїе, и҆ любо́вь къ бг҃ꙋ, ꙗ҆́же ѻ҆́ко не ви́дѣ, и҆ прѡ́ч. Здѣ́ же никомꙋ́же возмо́жно соверше́ннꙋ бы́ти, но ꙗ҆́кѡ зало́гъ ѡ҆бѣтова́нныхъ бла̑гъ прїе́млетъ. Ꙗ҆́коже бо неприча́стнїи дарова́нїй, до́лжни сꙋ́ть смирѧ́тисѧ, ꙗ҆́кѡ ни́щїи, та́кѡ и҆ и҆мꙋ́щїи сїѧ̑, ꙗ҆́кѡ прїе́мшїи ѿ бг҃а, да не ѡ҆сꙋ́дѧтсѧ за неразꙋ́мїе. И҆ ꙗ҆́коже бога́тїи, до́лжни сꙋ́ть благодари́ти бг҃а за дары̀ є҆гѡ̀: мно́гѡ вѧ́щше и҆ богатѧ́щыѧсѧ въ добродѣ́телехъ, ꙗ҆́кѡ до́лжни сꙋ́ть, и҆ ни́щїи благодари́ти бг҃а, и҆ люби́ти благотворѧ́щихъ бога́тыхъ, за є҆́же ѡ҆благотворѧ́тисѧ ѡ҆ ни́хъ: та́кѡ мно́гѡ па́че и҆ бога́тїи, занѐ и҆ въ ны́нѣшнемъ и҆ въ бꙋ́дꙋщемъ вѣ́цѣ спаса́ютсѧ про́мысломъ бж҃їимъ, ми́лостыни ра́ди: ꙗ҆́кѡ без̾ ни́щихъ не и҆́мꙋтъ спасе́нїѧ дꙋшѝ, но нижѐ и҆скꙋше́нїй бога́тства и҆збѣжа́ти мо́гꙋтъ. И҆ ꙗ҆́коже ᲂу҆ченицы̀ ᲂу҆чи́телей, та́кѡ и҆ ᲂу҆чи́тели ᲂу҆ченикѡ́въ до́лжни сꙋ́ть люби́ти, и҆ дрꙋ́гъ за дрꙋ́га благодари́ти бг҃а, дарова́вшаго всѣ̑мъ ра́зꙋмъ и҆ всѧ́кое бла́го, ѡ҆ ни́хже подоба́етъ при́снѡ благодари́ти є҆го̀, па́че же прїе́млющымъ си́лꙋ возста́вити ст҃о́е креще́нїе покаѧ́нїемъ, є҆гѡ́же кромѣ̀ никто́же мо́жетъ спасти́сѧ. Занѐ, речѐ гдⷭ҇ь: Что́ мѧ зове́те, гдⷭ҇и, гдⷭ҇и, и҆ не творитѐ, ꙗ҆̀же глаго́лю[[Лꙋкѝ гл. ѕ҃, ст. м҃ѕ.]]; Но да никто́же безꙋ́менъ сїѧ̑ и҆ толи̑каѧ слы́ша возмни́тъ, ꙗ҆́кѡ а҆́ще гдⷭ҇а призыва́ти не бꙋ́детъ, непови́ненъ бꙋ́детъ, па́че же бо́лѣе ѡ҆сꙋжде́нъ бы́сть, ꙗ҆́коже речѐ гдⷭ҇ь: А҆́ще въ сꙋ́ровѣ дре́вѣ сїѧ̑ творѧ́тъ, въ сꙋ́сѣ что̀ бꙋ́детъ[[Лꙋкѝ гл. к҃г, ст. л҃а.]]; И҆ а҆́ще пра́ведный є҆два̀ спаса́етсѧ, глаго́летъ соломѡ́нъ, нечести́вый же и҆ грѣ́шный гдѣ̀ ꙗ҆ви́тсѧ[[При́тч. гл. а҃і, ст. л҃а.]]. И҆ па́ки ѿвсю́дꙋ ᲂу҆тѣснѧ́ема зрѧ̀ себѐ ѿ бж҃е́ственныхъ за́повѣдей, да не ѿчаѧва́етсѧ, ꙗ҆́кѡ и҆ самоꙋбі́йцы го́рше ѡ҆сꙋ́дитсѧ, но па́че ᲂу҆дивлѧ́тисѧ до́лженъ є҆́сть бж҃е́ственнымъ писа́нїѧмъ и҆ за́повѣдѧмъ, ꙗ҆́кѡ здѣ̀ и҆ та́мѡ человѣ́ка къ соверше́нствꙋ побꙋжда́ютъ, да не ѡ҆брѧ́щетъ ка́мѡ бѣжа́ти ѿ блага́гѡ, во є҆́же ѡ҆брѣстѝ послабле́нїе въ го́ршее. Но кꙋ́пнѡ є҆гда̀ сотвори́ти нѣ́что таково́е восхо́щетъ, всѧ̑ ѕла̑ѧ пред̾ собо́ю ѡ҆брѣта́ѧ, ѡ҆браща́етсѧ къ благо́мꙋ бг҃ꙋ, человѣколю́бнѣ ᲂу҆строѧ́ющꙋ досточꙋ̑днаѧ, да всѧ́къ человѣ́къ соверше́нъ бꙋ́детъ нѣ́кїимъ ѡ҆́бразомъ и҆ не хотѧ̀, а҆́ще и҆ вла́сть и҆́мать въ себѣ̀. Благоразꙋ́мнїи же па́че стыдѧ́щесѧ ѿ благодѣѧ́нїй подвиза́ютсѧ, ꙗ҆́коже преше́дшїи рѣкꙋ̀ спѧ́ще, ꙗ҆́коже речѐ ст҃ы́й є҆фре́мъ[[Сло́во є҆гѡ̀ ѡ҆ се́мъ въ про́логѣ ноѧбрѧ̀ а҃.]]. Сегѡ̀ ра́ди, глаго́летъ ст҃ы́й і҆саа́къ, ᲂу҆мно́жи бг҃ъ и҆скꙋшє́нїѧ, да стра́хомъ си́хъ прибѣга́емъ къ немꙋ̀. Сегѡ́ же не разꙋмѣ́ѧй, но таковы́й да́ръ порица́ѧй ѿ сластолю́бїѧ, са́мъ себѐ ᲂу҆бѝ, и҆ погꙋбѝ, прїе́мъ ѻ҆рꙋ̑жїѧ проти́вꙋ врагѡ́въ, ᲂу҆потребѝ ѻ҆́наѧ къ своемꙋ̀ ᲂу҆бі́йствꙋ. Ꙗ҆́коже бо глаго́летъ вели́кїй васі́лїй, бг҃ъ бла́гъ сы́й, всѣ́хъ благи́ми сотвори́ти хо́щетъ: та́кѡ и҆ дїа́волъ лꙋка́въ сы́й, всѣ́хъ во свою̀ ѕло́бꙋ вовлещѝ жела́етъ, а҆́ще и҆ не мо́жетъ. И҆ ꙗ҆́кѡ чадолюби́вїи роди́тели съ преще́нїемъ ча̑да своѧ̑ безꙋ́мнѡ творѧ̑щаѧ ѡ҆браща́ютъ любо́вїю побꙋжда́еми: та́кѡ и҆ бг҃ъ и҆скꙋшє́нїѧ попꙋска́етъ, ꙗ҆́кѡ же́злъ ѡ҆браща́ющїй досто́йныхъ ѿ дїа́вольскагѡ ѕлосовѣ́тїѧ. Щадѧ́й же́злъ сво́й, ненави́дитъ своего̀ сы́на, любѧ́й же наказꙋ́етъ прилѣ́жнѡ[[При́тч. гл. г҃і, ст. к҃є.]]. Но поне́же на́мъ сластолюби̑вымъ и҆ самолюби̑вымъ ѿвсю́дꙋ предлежи́тъ бѣ́дствїе, а҆́ще бг҃олюби̑вымъ наипа́че и҆ спасе́нїе є҆́сть, и҆скꙋшє́нїѧ, глаго́лю, бг҃ꙋ попꙋща́ющꙋ, и҆ ѿпаде́нїе къ поги́бели ѿ го́рдости, и҆ ѿ є҆́же не пребыва́ти при бз҃ѣ: сегѡ̀ ра́ди ꙗ҆́кѡ сынѡ́мъ наказꙋ́ємымъ, но не ᲂу҆мерщвлѧ́ємымъ, легча́йшее и҆збра́ти на́мъ подоба́етъ. Лꙋ́чше бо терпѣ́нїемъ находѧ́щихъ прибѣга́ти къ бг҃ꙋ, не́жели стра́хомъ бѣ́дъ ѿпаде́нїе претерпѣва́ти, и҆ въ рꙋ́цѣ дїа́воли впа́сти, и҆ вѣ́чное ѿпаде́нїе па́че же мꙋ́кꙋ съ ни́мъ навлещѝ на себѐ. Занѐ є҆ди́но ѿ двою̀ предлежи́тъ на́мъ, и҆лѝ да прете́рпимъ пє́рваѧ и҆ привре́мєннаѧ, и҆лѝ втора̑ѧ и҆ вѣ̑чнаѧ. Пра́ведныхъ же ничто́же ѿню́дъ ѿ ѻ҆бои́хъ бѣ́дъ каса́етсѧ, зане́же съ ра́достїю ѕлоключи́тєльнаѧ на́мъ ꙗ҆влѧ́ющаѧсѧ лю́бѧтъ, и҆ ꙗ҆́кѡ вре́мѧ прїѡбрѣ́тенїѧ ѡ҆брѣ́тше и҆скꙋшє́нїѧ лобыза́ютъ, и҆ пребыва́ютъ неꙋѧ́звленни ѿ ни́хъ. Не бо̀ ѡ҆бы́че ᲂу҆мира́ти прїе́млѧй стрѣлꙋ̀, и҆ непораже́нный ѿ неѧ̀, но прїе́мый сме́ртнꙋю ѿ сеѧ̀ ꙗ҆́звꙋ, погиба́етъ. Повреди́ла ли і҆́ѡва ꙗ҆́зва, и҆ не па́че ли ᲂу҆вѣнча̀; и҆лѝ ᲂу҆жаси́ла ли а҆по́столѡвъ и҆ мꙋ́ченикѡвъ когда̀; Ра́довашасѧ, глаго́летъ, ꙗ҆́кѡ за и҆́мѧ є҆гѡ̀ сподо́бишасѧ безче́стїе прїѧ́ти[[Дѣѧ́н. гл. є҃, ст. м҃а.]]. И҆ є҆ли́кѡ побѣди́тель бори́мь быва́етъ, толи́кѡ ᲂу҆вѣнчава́етсѧ, и҆ ѿ сегѡ̀ ве́лїю ра́дость и҆́мать: є҆гда̀ ᲂу҆слы́шитъ гла́съ трꙋбы̀, не ꙗ҆́кѡ закла́нїе возвѣща́ющїѧ бои́тсѧ таковы́й, но ꙗ҆́кѡ ѡ҆ предвѣща́нїи вѣнца̀ воздаѧ́нїѧ весели́тсѧ па́че: ничто́же бо та́кѡ без̾ трꙋда̀ соверша́ти ѡ҆бы́че побѣ́дꙋ, ꙗ҆́коже благодерзнове́нїе со и҆звѣще́нною вѣ́рою: нижѐ побѣжде́нїе, ꙗ҆́коже самолю́бїе, и҆ ꙗ҆́же ѿ невѣ́рїѧ боѧ́знь ѡ҆бы́че твори́ти: нижѐ къ мꙋ́жествꙋ рꙋководи́тель и҆́нъ, ꙗ҆́коже раче́нїе и҆ и҆скꙋ́съ ве́щи: нижѐ къ то́нкости помыслѡ́въ, ꙗ҆́коже чте́нїе въ безмо́лвїи: нижѐ и҆́но что̀ вино́вно забве́нїѧ, ꙗ҆́коже пра́здность: нижѐ ко ѡ҆ставле́нїю грѣхѡ́въ благопоспѣши́тельнѣе, ꙗ҆́коже неѕло́бїе: нижѐ примире́нїѧ ѡ҆ грѣсѣ́хъ вино́вно, ꙗ҆́коже покаѧ́нїе и҆ ѿсѣче́нїе ѕла̀: нижѐ предспѣ́ѧнїѧ дꙋшѝ кра́тче, ꙗ҆́коже ѿсѣче́нїе свои́хъ хотѣ́нїй и҆ разꙋмѣ́нїй: нижѐ бо́льше что̀ є҆́сть, ꙗ҆́коже комꙋ̀ поверга́ти себѐ пред̾ бг҃омъ де́нь и҆ но́щь, и҆ моли́ти є҆го̀, да бꙋ́детъ во все́мъ во́лѧ є҆гѡ̀: нижѐ го́рше, ꙗ҆́коже люби́ти во́льность и҆ паре́нїе дꙋшѝ и҆лѝ тѣ́ла. Занѐ на́мъ стра́хомъ є҆щѐ мꙋ́къ и҆ и҆скꙋше́нїй лю́бѧщымъ благо́е, ѿню́дъ не на по́льзꙋ є҆́сть во́льность, но блюде́нїе себѐ и҆ ᲂу҆дале́нїе веще́й: да понѐ ᲂу҆дале́нїемъ вредѧ́щихъ не́мощь на́шꙋ, возмо́жемъ боро́тисѧ съ по́мыслы. Нача́льственныхъ бо дꙋхѡ́въ нача̑льницы безстра́стнїи побѣжда́ютъ, ꙗ҆́кѡ ᲂу҆жѐ побѣди́вшїи стꙋ̑днѣйшыѧ стра̑сти, сꙋ́щїи же въ повинове́нїи ѻ҆тца̀, нача́льствꙋємыѧ. Занѐ глаго́лютъ ст҃ы́й мака́рїй и҆ а҆́вва крѡ́нїй, нача̑льницы сꙋ́ть и҆ нача́льствꙋемые де́мѡни. Нача́льствєнныѧ же, тщесла́вїе, мнѣ́нїе, и҆ подѡ́бныѧ: нача́льствꙋємыѧ же, чревобѣ́сїе, блꙋ́дъ и҆ таковы̑ѧ. Дости́гшїи бо въ соверше́ннꙋю любо́вь ѡ҆блада́ютъ и҆́ми, ꙗ҆́кѡ без̾ понꙋжде́нїѧ творѧ́тъ благо́е, и҆ ра́дꙋютсѧ, внегда̀ твори́ти є҆̀, никогда́же ѡ҆ста́вити є҆̀ хотѧ́ще. Но є҆гда̀ не́гли бꙋ́детъ и҆̀мъ воспѧще́нїе не во́льнѣ, ꙗ҆́кѡ мꙋчи́тельствꙋеми ѡ҆брѣта́ютсѧ. И҆ влеко́ми бж҃е́ственною любо́вїю, а҆́бїе ᲂу҆бѣга́ютъ въ безмо́лвїе и҆ дѣ́ланїе, ꙗ҆́кѡ наслажде́нїе и҆ сво́йственный ѻ҆бы́чай. Къ си́мъ бо, глаго́лютъ ѻ҆тцы̀, ма́лѡ моли́сѧ, ма́лѡ чтѝ, ма́лѡ поꙋча́ѧйсѧ, ма́лѡ дѣ́лай, ма́лѡ блюдѝ ᲂу҆́мъ, и҆ та́кѡ проходѝ вре́мѧ. Сїѧ̑ же глаго́лютъ, занѐ са́ми собо́ю ѡ҆блада́ютъ безстра́стнїи, и҆ не плѣнѧ́ютсѧ ни ѿ коегѡ́же хотѣ́нїѧ внѣ̀ подоба́ющагѡ: но и҆дѣ́же хотѧ́тъ, ᲂу҆́мъ и҆́мꙋтъ, и҆ тѣ́лꙋ ꙗ҆́кѡ рабꙋ̀ повелѣва́ютъ. Мы́ же до́лжни є҆смы̀ бы́ти под̾ зако́номъ и҆ пра́виломъ, да нево́льнѣ и҆ не хотѧ́ще, ꙗ҆́коже ѿ до́лга понꙋжда́еми, твори́мъ благо́е. Занѐ є҆щѐ стра̑сти и҆ сла̑сти па́че лю́бимъ, си́рѣчь, поко́й тѣ́ла и҆ своѧ̑ хотѣ̑нїѧ, и҆ ка́мѡ хо́щетъ вра́гъ, во́дитъ ᲂу҆́мъ на́шъ: та́кѡ и҆ тѣ́ло, безчи́нна и҆мꙋ́щи стремлє́нїѧ, а҆́ще что́либо хо́щетъ, ꙗ҆́кѡ безслове́сно твори́тъ. И҆ вои́стиннꙋ, и҆дѣ́же нѣ́сть ᲂу҆правле́нїѧ ᲂу҆ма̀, всѧ̑ безслове́снѡ и҆ внѣ̀ є҆стества̀ быва́ютъ: и҆ не ꙗ҆́кѡ и҆́стиннїи і҆сра́ильтѧне, ꙗ҆́коже глаго́летъ гдⷭ҇ь ѡ҆ зилѡ́тѣ сі́мѡнѣ канані́тѣ: сѐ вои́стиннꙋ і҆и҃льтѧнинъ, въ не́мже льстѝ нѣ́сть[[І҆ѡа́н. гл. а҃, ст. м҃а.]], проповѣ́дꙋѧ добродѣ́тель є҆гѡ̀. Наѳана́илъ бо ре́вность бж҃їѧ толкꙋ́етсѧ: и҆ со́бственное є҆гѡ̀ и҆́мѧ сі́мѡнъ бѣ̀, канані́тъ же, занѐ бы́сть ѿ ка́ны галїле́йскїѧ: и҆ наѳана́илъ па́ки за є҆гѡ̀ добродѣ́тель, ꙗ҆́коже и҆ і҆и҃льтѧнинъ, то́ є҆сть, ᲂу҆́мъ зрѧ́й бг҃а, кромѣ̀ всѧ́кїѧ ле́сти. Ѻ҆бы́чай бо є҆́сть, глаго́летъ вели́кїй васі́лїй, бж҃е́ственномꙋ писа́нїю па́че нарица́ти ѿ добродѣ́тели человѣ́ка, не́жели ѿ рожде́нїѧ. И҆́бо и҆ верхо́внїи а҆пⷭ҇ли пе́тръ и҆ па́ѵелъ, ѻ҆́въ сі́мѡнъ нарица́шесѧ, и҆ петро́мъ тве́рдости є҆гѡ̀ ра́ди гдⷭ҇ь наречѐ: ѻ҆́въ же са́ѵлъ, си́рѣчь смꙋще́нїе, и҆ во па́ѵла премѣнѝ, то́ є҆сть, поко́ище, и҆лѝ поко́й. И҆ вои́стиннꙋ: коли́кѡ бо возмꙋща́ше пе́рвѣе вѣ́рныхъ, толи́кѡ по́слѣжде ᲂу҆поко́и всѣ́хъ дꙋ́шы дѣ́ломъ и҆ сло́вомъ, ꙗ҆́коже глаго́летъ ѡ҆ не́мъ златоꙋ́стъ: зрѝ благоговѣ́нїе а҆по́стола, помѧнꙋ́въ бо бг҃а, не ᲂу҆ча́ше, до́ндеже бы до́лжное благодаре́нїе и҆ моле́нїе возда́лъ бг҃ови, ꙗ҆влѧ́ѧ, ꙗ҆́кѡ ѿ негѡ̀ и҆́мать ра́зꙋмъ и҆ крѣ́пость. И҆ вои́стиннꙋ, глаго́летъ съ моли́твою ᲂу҆че́нїе. И҆ бж҃е́ственный лꙋка̀ недоконча́нна ѡ҆ста́ви дѣѧ̑нїѧ а҆по́стѡльскаѧ, не ѿ нерадѣ́нїѧ, и҆лѝ дрꙋгі́ѧ нѣ́кїѧ нꙋ́жды, но занѐ къ бг҃ꙋ ѿи́де: мы́ же, є҆гда̀ неѡконча́ннꙋ ве́щь и҆лѝ начина́нїе ѡ҆ставлѧ́емъ, ѿ нерадѣ́нїѧ и҆лѝ небреже́нїѧ сїѐ твори́мъ. Занѐ не зи́ждемъ дѣ́лъ бж҃їихъ прилѣ́жнѡ, и҆ не ꙗ҆́кѡ вои́стиннꙋ дѣ́ло лю́бимъ, но презира́емъ ꙗ҆́кѡ ненꙋ́жное и҆ тѧ́жкое: и҆ сегѡ̀ ра́ди не предспѣ́ѧтельни пребыва́емъ, и҆лѝ ѡ҆браща́емсѧ мно́гажды и҆ вспѧ́ть, ꙗ҆́коже ѡ҆брати́вшїесѧ нѣ́когда вспѧ́ть, и҆ ктомꙋ̀ не хожда́хꙋ со і҆и҃сомъ[[І҆ѡа́н. гл. ѕ҃, ст. ѯ҃ѕ.]]. А҆́ще, глаго́летъ златоꙋ́стъ, и҆ не бѣ̀ сло́во же́стоко, ꙗ҆́коже мнѣ́ша: но ѡ҆ догма́тѣхъ бѣ̀ рече́но и҆̀мъ тогда̀: но и҆дѣ́же нѣ́сть произволе́нїѧ, нижѐ раче́нїѧ, и҆ лє́гкаѧ ѡ҆брѣта́ютсѧ трꙋ̑дна, ꙗ҆́коже и҆ сопроти̑внаѧ.

Ѡ҆ назида́нїи дꙋшѝ добродѣ́тельми.

Тре́бꙋетъ бо всѧ́кїй человѣ́къ пре́жде всѣ́хъ терпѣ́нїѧ, глаго́летъ вели́кїй васі́лїй, ꙗ҆́коже землѧ̀ дождѧ̀, да ѡ҆снова́нїе, ꙗ҆́коже глаго́летъ а҆по́столъ[[Є҆вр. гл. ѕ҃, ст. з҃.]], си́рѣчь вѣ́рꙋ поло́житъ на не́мъ, и҆ пома́лꙋ зи́ждетъ разсꙋжде́нїе, ꙗ҆́кѡ и҆скꙋ́сный домострои́тель до́мъ дꙋшѝ. При́снѡ бо полага́етъ бре́нїе ѿ землѝ смире́нїѧ. да соедини́тъ ка́мень съ ка́менемъ, си́рѣчь добродѣ́тель съ добродѣ́телїю, до́ндеже возло́житсѧ кро́въ, си́рѣчь соверше́ннаѧ любы̀. И҆ та́кѡ до́мꙋ влⷣка вхо́дитъ, и҆ ѡ҆бита́етъ въ дꙋшѣ̀, а҆́ще вра́тари и҆́мать добры̀, при́снѡ держа́щѧ ѻ҆рꙋ̑жїѧ, си́рѣчь, мы̑сли свѣ́тлы, и҆ бг҃олѣ̑пнаѧ дѣ̑ланїѧ, могꙋ̑щаѧ невозмꙋще́нна сотвори́ти царѧ̀, а҆ не женꙋ̀ вра́тницꙋ, и҆ сїю̀ рꙋкодѣ́лїе держа́щꙋ, ꙗ҆́коже глаго́летъ ст҃ы́й ні́лъ, толкꙋ́ѧ вє́тхїѧ пѡ́вѣсти. Сегѡ̀ ра́ди, глаго́летъ, не поста́ви патрїа́рхъ а҆враа́мъ женꙋ̀ вра́тницꙋ, но па́че мꙋ́жественный нѣ́кїй и҆ жесто́кїй по́мыслъ, и҆ се́й ѻ҆рꙋ̑жїѧ носѧ́щь, ꙗ҆́коже глаго́летъ а҆по́столъ съ про́чими: И҆ ме́чь дꙋхо́вный, и҆́же є҆́сть глаго́лъ бж҃їй[[Є҆фес. гл. ѕ҃, ст. з҃і.]], да входѧ́щыѧ къ немꙋ̀ и҆лѝ ᲂу҆бива́етъ, и҆лѝ ѿгонѧ́етъ. Занѐ недре́млющь є҆́сть и҆ стоѧ́щь, ᲂу҆бива́ѧ чꙋ̑ждыѧ по́мыслы сопротивлѧ́ющимсѧ дѣ́ланїемъ и҆ противорѣ́чꙋщимъ сло́вомъ: ѿража́етъ же всѐ, что́либо внѣ̀ бж҃їѧгѡ намѣ́ренїѧ входѧ́щее въ се́рдце, презрѣ́нїемъ сегѡ̀ и҆ ѿверже́нїемъ, во є҆́же ника́коже ѿ видѣ́нїѧ ѡ҆ бз҃ѣ и҆ бж҃е́ственныхъ мы́слей пра́здность да и҆́мать просвѣще́нный ᲂу҆́мъ. Дѣ́ло безмо́лвїѧ глаго́летъ, є҆́сть глаго́лемое. Ꙗ҆́коже и҆́ндѣ ѡ҆брѣта́етсѧ ст҃ы́й ні́лъ, приводѧ̀ бж҃е́ственное писа́нїе, и҆ и҆з̾ѧснѧ́ѧ, ꙗ҆́кѡ пристра́стїе є҆́сть вина̀ помраче́нїѧ ᲂу҆ма̀. Да и҆ вои́стиннꙋ. А҆́ще во не бы̀ держи́мь бы́лъ ᲂу҆́мъ ѿвсю́дꙋ, ꙗ҆́коже въ трꙋбѣ̀ вода̀, не бы̀ могла̀ мы́сль собра́тисѧ къ себѣ̀, да и҆ къ бг҃ꙋ взы́детъ: не возше́дъ же кто̀ ᲂу҆́мнѣ, и҆ не вкꙋси́вый чесогѡ̀ ѿ го́рнихъ, ка́кѡ возмо́жетъ ᲂу҆до́бнѡ дѡ́льнаѧ презира́ти; Тѣ́мже вѣ́рою до́лжни є҆смы̀ тещѝ, по а҆по́столꙋ, съ терпѣ́нїемъ, дѣ́ло и҆мꙋ́ще са́мо сїѐ, є҆́же благоꙋгоди́ти бг҃ови. И҆ вре́мени зовꙋ́щꙋ до́брѣ текꙋ́щїи, вѣ́дѣти сїѐ и҆ ѿ ча́сти пости́гнꙋти мо́гꙋтъ. И҆ по си́хъ всѐ въ бꙋ́дꙋщемъ, разрѣши́вшымсѧ зерца́лѡмъ тлѣ́нныѧ сеѧ̀ жи́зни, и҆дѣ́же не ктомꙋ̀, дꙋша̀ похотствꙋ́етъ на пло́ть, и҆ пло́ть на дꙋ́хъ[[Гала́т. гл. є҃, ст. з҃і.]]: нижѐ ᲂу҆ны́нїе забве́нїе, и҆ забве́нїе невѣ́дѣнїе нанестѝ мо́гꙋтъ: ꙗ҆́коже ны́нѣ стра́ждемъ мно́зи, ꙗ҆́коже и҆ написа́ти къ воспомина́нїю потре́бно є҆́сть. И҆́бо мно́гажды мы́сль нѣ́каѧ самодви́жнѣ прїи́де, и҆ писа́нїе предадѐ ю҆̀ па́мѧти ра́ди. И҆мѣ́хъ же ю҆̀ во вре́мѧ бра́ни вино́внꙋ сꙋ́щꙋ по́мощи, и҆лѝ ѡ҆блегче́нїѧ, и҆лѝ благодаре́нїѧ, є҆гда̀ ѿ бж҃е́ственнагѡ писа́нїѧ свидѣ́тельство и҆мѣ̀. А҆́ще же бы вознерадѣ́хъ ѡ҆ таковы́хъ, не бы̀ ктомꙋ̀ ѡ҆брѣта́шесѧ, є҆гда́ бы возтре́бовахъ ю҆̀, и҆ лиши́лсѧ бы по́льзы є҆ѧ̀ ѿ всеѕло́бнѣйшагѡ забве́нїѧ. Сегѡ̀ ра́ди до́лжни є҆смы̀ дѣ́ломъ наꙋчи́тисѧ добродѣ́телемъ, да навыкнове́нїемъ си́хъ соблюде́тсѧ па́мѧть блага́гѡ, а҆ не сло́вомъ то́кмѡ: не въ словеси́ бо глаго́летъ а҆по́столъ, ца́рствїе бж҃їе, но въ си́лѣ[[а҃ Кор. гл. д҃, ст. к҃.]]. И҆ща́й бо дѣ́ломъ, се́й вѣ́сть тщетꙋ̀ и҆ прїѡбрѣ́тенїе тоѧ̀, въ не́йже прохо́дитъ вє́щи, глаго́летъ ст҃ы́й і҆саа́къ: и҆ се́й мо́жетъ да́ти дрꙋги̑мъ совѣ́тъ, ꙗ҆́кѡ пострада́въ мно́жицею, и҆ ᲂу҆разꙋмѣ́въ и҆скꙋ́сомъ. Занѐ сꙋ́ть вє́щи, добры̀ ꙗ҆влѧ́ющыѧсѧ, глаго́летъ, и҆́мꙋтъ же неизбѣ́жнꙋю сокры́тꙋ въ себѣ̀ тщетꙋ̀: и҆ сꙋ́ть дрꙋгі̑ѧ ꙗ҆влѧ́ющыѧсѧ лꙋка́вы, и҆́мꙋтъ же внꙋтрьꙋ́дꙋ вели́кое прїѡбрѣ́тенїе. Сегѡ̀ ра́ди глаго́летъ: Нѣ́сть всѧ́кїй человѣ́къ вѣ́ренъ да́ти совѣ́тъ и҆́щꙋщымъ. Но кто̀ ѿ бг҃а прїе́мъ да́ръ разсꙋжде́нїѧ, и҆ ѿ мно́гагѡ пребыва́нїѧ въ подви́жничествѣ стѧжа̀ ᲂу҆́мъ прозри́теленъ, ꙗ҆́коже глаго́летъ ст҃ы́й маѯі́мъ. И҆ сїѐ съ вели́кимъ смире́нїемъ совѣ́товати не всѣ̑мъ, но во́лею и҆́щꙋщымъ, и҆ непринꙋжде́ннѣ вопроша́ющымъ є҆го̀, и҆ ꙗ҆́коже въ чи́нѣ ᲂу҆ча́щагѡсѧ, да смире́нїемъ и҆ во́льнымъ проше́нїемъ вопроша́ющагѡ воѡбрази́тсѧ сло́во въ дꙋшѣ̀ слꙋ́шающагѡ. И҆ согрѣ́етсѧ се́й ѿ вѣ́ры, зрѧ̀ блага́го совѣ́тника, ꙗ҆́коже чꙋ́днаго ѻ҆́наго совѣ́тника, ѡ҆ не́мже речѐ проро́къ и҆са́їа: бг҃а крѣ́пкаго, власти́телѧ[[И҆са́їи гл. ѳ҃, ст. ѕ҃.]], и҆ прѡ́ч: глаго́лю же гдⷭ҇а на́шегѡ і҆и҃са хрⷭ҇та̀, ре́кшаго ко ѻ҆́номꙋ ѕлорѣ́чꙋщемꙋ: Кто́ мѧ поста́ви сꙋдїю̀ и҆лѝ дѣли́телѧ над̾ ва́ми[[Лꙋкѝ гл. в҃і, ст. д҃і.]]; а҆́ще, глаго́летъ, и҆ ве́сь сꙋ́дъ дадѐ сн҃ови ѻ҆ц҃ъ[[І҆ѡа́н. гл. є҃, ст. к҃в.]]: но ꙗ҆влѧ́ѧ на́мъ ꙗ҆́коже и҆ во всѣ́хъ, и҆ въ се́мъ пꙋ́ть спасе́нїѧ ст҃ы́мъ свои́мъ смире́нїемъ, ꙗ҆́кѡ не нꙋ́дитъ: но а҆́ще кто̀ хо́щетъ по мнѣ̀ и҆тѝ: да ѿве́ржетсѧ себѐ, и҆ послѣ́дꙋетъ мѝ[[Матѳ. гл. ѕ҃і, ст. к҃д.]], глаго́летъ: то́ є҆сть, да ника́коже ѡ҆ свое́й жи́зни попече́нїе твори́тъ: но ꙗ҆́коже а҆́зъ творю̀, и҆ претерпѣва́ю чꙋ́вственнꙋю и҆ во́льнꙋю сме́рть за всѣ́хъ, та́кѡ и҆ то́й дѣ́ломъ и҆ сло́вомъ да послѣ́дꙋетъ, ꙗ҆́коже а҆по́столи и҆ мꙋ́чєницы: а҆́ще ли же нѝ, хотѧ̀ по произволе́нїю сꙋ́щꙋю сме́рть да прете́рпитъ. И҆ па́ки къ бога́томꙋ ѻ҆́номꙋ глаго́летъ: А҆́ще хо́щеши соверше́нъ бы́ти, и҆дѝ, прода́ждь и҆мѣ́нїе[[Матѳ. гл. ѳ҃і, ст. к҃а.]], и҆ прѡ́ч: ѡ҆ не́мже глаго́летъ вели́кїй васі́лїй, солга̀ рекі́й, ꙗ҆́кѡ сохранѝ за́пѡвѣди си́рѣчь. А҆́ще бо бы̀ соблюда́лъ, не бы̀ мнѡ́гаѧ и҆мѣ̑нїѧ стѧжа́лъ, зако́нꙋ ре́кшꙋ во пе́рвыхъ: Возлю́биши гдⷭ҇а бг҃а твоего̀ ѿ всеѧ̀ дꙋшѝ твоеѧ̀[[Втор. гл. ѕ҃, ст. є҃.]]. Рече́нїе бо, ѿ всеѧ̀, не попꙋща́етъ лю́бѧщемꙋ бг҃а и҆́но что̀ люби́ти, печа́лꙋѧйсѧ же ѡ҆ че́млибо ѡ҆брѣта́етсѧ во ѿверже́нїи ѻ҆́нагѡ. Па́ки: Возлю́биши бли́жнѧгѡ твоего̀, ꙗ҆́кѡ са́мъ себѐ[[Леѵі́т. гл. ѳ҃і, ст. и҃і.]], си́рѣчь всѧ́кагѡ человѣ́ка. И҆ ка́кѡ си́хъ храни́тель є҆́сть мнѡ́гимъ дрꙋги̑мъ тре́бꙋющымъ дневны́ѧ пи́щи, са́мъ и҆мы́й стѧжа́нїѧ мнѡ́га: па́че же пристра́стнѡ; А҆́ще во и҆мѣ́лъ бы ꙗ҆́коже а҆враа́мъ, і҆́ѡвъ же и҆ про́чїи пра̑ведницы, ꙗ҆́кѡ бж҃їѧ стѧжа̑нїѧ, не бы̀ ѿше́лъ скорбѧ̀. Подо́бнѡ и҆ ст҃ы́й златоꙋ́стъ глаго́летъ: Оу҆вѣ́рова, ꙗ҆́кѡ речє́ннаѧ къ немꙋ̀ ѿ гдⷭ҇а и҆́стинна сꙋ́ть: сегѡ̀ ра́ди и҆ скорбѧ̀ ѿи́де, немоществова́ше же къ дѣ́ланїю. Сꙋ́ть бо мно́зїи вѣ́рꙋющїи словесє́мъ писа́нїѧ, и҆знемога́ютъ же во и҆сполне́нїи пи́санныхъ.

Ꙗ҆́кѡ ве́лїе бла́го є҆́сть любы̀ и҆ совѣ́тъ со смире́нїемъ.

Сїѧ̑ ᲂу҆̀бо и҆ и҆́на бѡ́льшаѧ си́хъ ѡ҆брѣта́етсѧ, гдⷭ҇ь совѣ́тꙋѧй, подо́бнѣ и҆ а҆по́столи пи́шꙋще, мо́лимъ ва́съ возлю́бленнїи сїѧ̑ и҆ сїѧ̑ твори́ти. Мы́ же не прїе́млемъ ᲂу҆тѣ́шити и҆́щꙋщихъ ѿ на́съ совѣ́та, да є҆гда̀ ᲂу҆́зрѧтъ на́съ смири́вшихсѧ и҆ почита́ющихъ и҆̀хъ съ ра́достїю ᲂу҆слы́шатъ, и҆ и҆звѣще́нїе прїи́мꙋтъ, ꙗ҆́кѡ съ вели́кою любо́вїю и҆ смире́нїемъ глаго́лемъ сло́во ст҃а́гѡ писа́нїѧ. И҆ по́чести ра́ди и҆ любвѝ, ю҆́же и҆́мꙋтъ ѿ на́съ, потща́тсѧ, и҆ съ си́ми трꙋ̑днаѧ прїи́мꙋтъ, и҆ сїѧ̑ ꙗ҆́кѡ лє́гкаѧ и҆̀мъ ѿ любвѝ ꙗ҆вѧ́тсѧ, ꙗ҆́коже ст҃ы́й а҆по́столъ пе́тръ ѡ҆ крⷭ҇тѣ̀ и҆ сме́рти слы́шѧ мно́гажды, ра́довашесѧ, и҆ ꙗ҆́коже ничто́же таково̀ слы́шати ꙗ҆влѧ́шесѧ ѿ любвѝ, ю҆́же стѧжа̀ ко ᲂу҆чи́телю. И҆ ѡ҆ чꙋдесѣ́хъ нико́егѡже и҆мѣ̀ попече́нїѧ, ꙗ҆́коже невѣ́рнїи: но глаго́лы живота̀ вѣ́чнагѡ, глаго́летъ, и҆́маши, и҆ прѡ́ч:[[І҆ѡа́н. гл. ѕ҃, ст. ѯ҃и.]]. не та́кожде і҆ꙋ́да два́жды ᲂу҆ме́рый, ᲂу҆да́висѧ, и҆ не ᲂу҆́мре, но пожи́въ нераска́ѧннѣ, и҆ вознедꙋ́говавъ лю́тѣ просѣ́десѧ посредѣ̀[[Дѣѧ́н. гл. а҃, ст. и҃і.]], ꙗ҆́коже глаго́летъ а҆по́столъ пе́тръ, въ дѣѧ́нїѧхъ а҆по́стольскихъ. И҆ па́ки ст҃ы́й а҆по́столъ па́ѵелъ къ бра́тїи пишѧ̀ ѻ҆вогда̀ глаго́летъ: жела́юще благоволи́хомъ пода́ти ва́мъ не то́чїю благовѣствова́нїе бж҃їе, но и҆ дꙋ́шы своѧ̑[[а҃ Сол. гл. в҃, ст. и҃.]]. Ѻ҆вогда́ же: Бы́хомъ рабѝ ва́ши і҆и҃са гдⷭ҇а ра́ди[[в҃ Кор. гл. д҃, ст. є҃.]]: и҆ па́ки къ тїмоѳе́ю пишѧ̀ глаго́летъ, и҆мѣ́ти ста́рцєвъ ꙗ҆́коже ѻ҆тцє́въ, ю҆́нѡши ꙗ҆́кѡ бра́тїю[[а҃ Тїм. гл. є҃, ст. а҃.]]. И҆ кто̀ дово́ленъ є҆́сть ᲂу҆разꙋмѣ́ти смире́нїе ст҃ы́хъ, и҆ горѧча́йшꙋю любо́вь, ю҆́же и҆мѣ́ша къ бг҃ꙋ и҆ бли́жнемꙋ; Не то́чїю ᲂу҆́бѡ си̑мъ до́лжни є҆смы̀ внима́ти, но и҆ къ немꙋ́же глаго́лемъ и҆лѝ пи́шемъ: хотѧ́й бо наꙋчи́ти, и҆лѝ совѣ́тъ да́ти комꙋ̀, па́че же напомина́нїе, ꙗ҆́коже глаго́летъ лѣ́ствичникъ, до́лженъ є҆́сть ѡ҆чи́ститисѧ пе́рвѣе ѿ страсте́й, да ᲂу҆разꙋмѣ́етъ нело́жнѡ намѣ́ренїе бж҃їе и҆ состоѧ́нїе тре́бꙋющагѡ ѿ негѡ̀ словесѝ. Занѐ не всѣ̑мъ є҆ди́но врачевство̀ прили́чествꙋетъ, а҆́ще не́гли и҆ є҆ди́на не́мощь бꙋ́детъ. Пото́мъ и҆звѣсти́тисѧ ѿ просѧ́щагѡ совѣ́та, и҆лѝ ѿ повинꙋ́ющагѡсѧ є҆мꙋ̀ є҆ди́ною дꙋше́ю же и҆ тѣ́ломъ, и҆лѝ самопроизво́льнѣ просѧ̀ съ те́плою вѣ́рою, и҆ и҆ща́й слова̀ без̾ вопро́са ᲂу҆чи́телева, и҆лѝ дрꙋго́й како́йлибо потре́бѣ понꙋжда́ющей є҆го̀ лицемѣ́рствовати, ꙗ҆́кѡ а҆́кибы хо́щетъ слы́шати сло́во, да не ѻ҆́ба во лжꙋ̀ впадꙋ́тъ и҆ многоглаго́ланїе, лꙋка́вствїе же и҆ дрꙋга̑ѧ мнѡ́гаѧ. И҆ ѻ҆́въ ᲂу҆́бѡ понꙋжда́емь ꙗ҆́кобы ѿ ᲂу҆ча́щагѡ є҆го̀ глаго́лати кромѣ̀ произволе́нїѧ, и҆ лже́тъ стыдѧ́сѧ и҆ лицемѣ́рствꙋетъ, ꙗ҆́кѡ благо́е твори́ти хо́щетъ: ѻ҆́въ же лꙋка́вствꙋетъ и҆ ласка́етъ ᲂу҆чи́маго, да сокровє́ннаѧ, си́рѣчь, въ мы́сли є҆го̀ пости́гнетъ, и҆ вкра́тцѣ всѧ́ко ᲂу҆хищре́нїе подвиза́ѧ и҆ многоглаго́ланїе, и҆ ꙗ҆́коже глаго́летъ соломѡ́нъ: Ѿ многосло́вїѧ не и҆збѣжи́тъ грѣха̀[[При́тч. гл. і҃, ст. ѳ҃і.]]. Написа́ же и҆ вели́кїй васі́лїй, ка́ѧ сꙋ́ть согрѣшє́нїѧ сегѡ̀: не реко́шасѧ же сїѧ̑, да не под̾ вла́сть и҆ со и҆звѣще́нною вѣ́рою приходѧ́щихъ ᲂу҆чи́ти ѿве́ржемсѧ, и҆ па́че безстра́стнѣ пребыва́ющїи, но да не де́рзостнѣ, нижѐ ѿ дѣ́лъ, нижѐ ѿ те́плыѧ вѣ́ры хотѧ́щихъ слы́шати, ѿ тщесла́вїѧ ᲂу҆́чимъ, са́ми сꙋ́ще є҆щѐ стра́стнїи, нижѐ власти́тельски сїѐ да твори́мъ: но ꙗ҆́коже ѻ҆тцы̀ глаго́лахꙋ, ꙗ҆́кѡ кромѣ̀ вопроше́нїѧ бра́тїй не подоба́етъ глаго́лати комꙋ̀, си́рѣчь по́льзы ра́ди, да ѿ произволе́нїѧ бꙋ́детъ благо́е ꙗ҆́коже глаго́лютъ а҆по́столи, не ꙗ҆́кѡ ѡ҆блада́юще при́чтꙋ, но ѡ҆́брази быва́юще ста́да, и҆ прѡ́ч:[[а҃ Петра̀ гл. є҃, ст. г҃.]] И҆ къ ст҃о́мꙋ тїмоѳе́ю а҆по́столъ речѐ: Дѣ́лателю пре́жде подоба́етъ ѿ плода̀ вкꙋси́ти[[в҃ Тїм. гл. в҃, ст. ѕ҃.]], ѡ҆ дѣ́ланїи си́рѣчь томꙋ̀, є҆мꙋ́же подоба́етъ ᲂу҆чи́ти глаго́лѧ. И҆ па́ки: Никто́же ѡ҆ ю҆́ности твое́й да неради́тъ[[а҃ Тїм. гл. д҃, ст. в҃і.]]: си́рѣчь, ѿню́дъ да не сотвори́ши что̀ ю҆́ношеское, но ꙗ҆́кѡ соверше́нъ во хрⷭ҇тѣ̀ бꙋ́ди. Подо́бнѣ и҆ въ ста́рчествѣ глаго́летъ, ꙗ҆́кѡ без̾ вопроше́нїѧ бра́тїи не глаго́лаша ѻ҆тцы̀ ко спасе́нїю дꙋшѝ, но вмѣнѧ́хꙋ сїѐ праздносло́вїе. И҆ вои́стиннꙋ: и҆́бо внегда̀ мни́мъ мы̀ ра́зꙋмъ и҆мѣ́ти па́че и҆на́гѡ, сло́во подви́жемъ са́ми ѿ себѐ. И҆́бо є҆ли́кѡ пови́нни є҆смы̀, толи́кѡ мни́мсѧ свобо́дꙋ и҆мѣ́ти. Ꙗ҆́коже ст҃і́и є҆ли́кѡ приближа́ютсѧ къ бг҃ꙋ, толи́кѡ ви́дѧтъ себѐ грѣ́шны, ꙗ҆́коже глаго́летъ ст҃ы́й дѡроѳе́й: полꙋчи́вшїи во ѡ҆ бз҃ѣ ра́зꙋмъ ᲂу҆жаса́ютсѧ и҆ въ недоꙋмѣ́нїе прихо́дѧтъ. Подо́бнѡ и҆ а҆́гг҃ли ѿ безконе́чнагѡ весе́лїѧ и҆ ᲂу҆́жаса не и҆́мꙋтъ насыще́нїѧ славосло́вїѧ: и҆ ꙗ҆́кѡ сподо́бишасѧ толи́каго пѣ́ти влⷣкꙋ, непреста́ннѡ пою́тъ дивѧ́щесѧ ѿ негѡ̀ быва́ємымъ, ꙗ҆́коже глаго́летъ златоꙋ́стъ, и҆ преꙋспѣва́юще въ вѧ́щшїй ра́зꙋмъ ꙗ҆́коже глаго́летъ бг҃осло́въ, подо́бнѣ и҆ всѝ ст҃і́и въ ны́нѣшнѣмъ вѣ́цѣ и҆ въ бꙋ́дꙋщемъ: и҆ ꙗ҆́коже ᲂу҆́мнїи си́лы преподаю́тъ просвѣще́нїе дрꙋ́гъ дрꙋ́гꙋ, та́кѡ и҆ слове́снїи дрꙋ́гъ ѿ дрꙋ́га наꙋча́ютсѧ: ѻ҆́вїи ᲂу҆́бѡ ѿ бж҃е́ственныхъ писа́нїи и҆скꙋ́съ прїе́млюще ни́жшихъ ᲂу҆́чатъ, ѻ҆́вїи же ᲂу҆́мнѣ ѿ ст҃а́гѡ дх҃а ᲂу҆чи́ми, дрꙋги̑мъ ѿкровє́нныѧ и҆̀мъ та̑йны писа́нїемъ ꙗ҆влє́нны творѧ́тъ. Сегѡ̀ ра́ди всѣ̑мъ потре́бно є҆́сть смирѧ́тисѧ пред̾ бг҃омъ, и҆ дрꙋ́гъ дрꙋ́гомъ, ꙗ҆́кѡ бытїѐ и҆ всѧ̑ прѡ́чаѧ ѿ бг҃а прїе́мшымъ, и҆ тѣ́мъ дрꙋ́гъ ѿ дрꙋ́га ра́зꙋмъ. И҆мѣ́ѧй ᲂу҆́бѡ смире́нїе па́че просвѣща́етсѧ, не хотѧ́й же смири́тисѧ во тьмѣ̀ пребыва́етъ, ꙗ҆́коже пре́жде денни́ца и҆ по́слѣжде дїа́волъ: занѐ пе́рвѣе бѣ̀ ѿ вы́шшагѡ чи́на ᲂу҆́мныхъ си́лъ, си́рѣчь, десѧ́тагѡ ѿ го́рнѣйшагѡ чи́на предстоѧ́щагѡ стра́шномꙋ престо́лꙋ, пе́рвагѡ же ѿ землѝ: но за возноше́нїе не то́чїю девѧтѝ чинѡ́въ, но и҆ на́съ земны́хъ ни́жше бы́сть съ послꙋ́шавшими є҆гѡ̀, но и҆ под̾ преиспѡ́днѧѧ въ та́ртаръ низве́рженъ бы́сть за неразꙋ́мїе. Сегѡ̀ ра́ди мно́гажды рече́сѧ, ꙗ҆́кѡ кромѣ̀ дрꙋга́гѡ грѣха̀ є҆ди́на го́рдость мо́жетъ погꙋби́ти дꙋ́шꙋ: и҆мѣ́ѧй во своѧ̑ согрѣшє́нїѧ ма̑ла, попꙋща́етсѧ впа́сти въ бѡ́льшаѧ, глаго́летъ ст҃ы́й і҆саа́къ. И҆ прїе́мый ѿ бг҃а да́ръ, и҆ неблагода́ренъ бы́въ, лиша́етсѧ є҆гѡ̀: занѐ недосто́йна себѐ сотворѝ да́ра бж҃їѧ, ꙗ҆́коже глаго́летъ вели́кїй васі́лїй: благодаре́нїе бо ѡ҆ на́съ ᲂу҆молѧ́етъ. Ѻ҆ба́че да не бꙋ́детъ благодаре́нїе ꙗ҆́коже ѻ҆́нагѡ фарїсе́а, дрꙋги́хъ ѡ҆сꙋжда́ющее, себе́ же ѡ҆правда́ющее: но па́че ꙗ҆́кѡ мно́жае всѣ́хъ до́лжно сꙋ́щее, и҆ ѿ недоꙋмѣ́нїѧ благодарѧ́щее, и҆ со ᲂу҆́жасомъ разсмотрѧ́ющее неизрече́нное долготерпѣ́нїе бж҃їе: не то́чїю же, но и҆ диви́тисѧ подоба́етъ, ка́кѡ препѣ́тый бг҃ъ не ѡ҆скꙋ́денъ сы́й, прїе́млетъ ѿ на́съ благодаре́нїе, па́че же раздража́ющихъ и҆ ѡ҆горча́ющихъ є҆го̀ при́снѡ при толи́кихъ и҆ таковы́хъ благодѣѧ́нїѧхъ є҆гѡ̀, ѻ҆́бщихъ и҆ ѻ҆со́бенныхъ, ѡ҆ ни́хже писа̀ григо́рїй бг҃осло́въ и҆ про́чїи ѻ҆тцы̀, не то́чїю тѣле́сныхъ, но и҆ дꙋше́вныхъ, мно́гими ѡ҆́бразы, и҆́хже нѣ́сть числа̀. Ѿ ни́хже и҆ сїѐ є҆́сть, ꙗ҆́кѡ ѻ҆́ва сꙋ́ть ꙗ҆влє́нна и҆ ᲂу҆допости̑жна въ бж҃е́ственныхъ писа́нїѧхъ: ѻ҆́ва же нѣ̑кїимъ неѧ̑вна и҆ неꙋдобопости̑жна, да тѣ́ми ᲂу҆́бѡ неради́выхъ привлече́тъ къ вѣ́рѣ, и҆ и҆зыска́нїю ѡ҆скꙋдѣва́ющихъ, и҆ да не впаде́мъ ѿ непостиже́нїѧ въ ѿча́ѧнїе и҆ въ невѣ́рїе. Си́ми же да не бо́льшее ѡ҆сꙋжде́нїе и҆́мамы, презира́юще разꙋмѣва́емый глаго́лъ, но да трꙋдѧ́щїисѧ во́льнѣ, хотѧ́ще дѣ́ломъ и҆спы́тывати безвѣ̑стнаѧ, мо́гꙋтъ ѿ сегѡ̀ похвалꙋ̀ и҆мѣ́ти, ꙗ҆́коже глаго́летъ златоꙋ́стъ.

Ꙗ҆́кѡ ча́стое напомина́нїе бж҃е́ственнагѡ писа́нїѧ не є҆́сть многосло́вїе.

И҆ па́ки то́йжде глаго́лъ мно́гажды ѡ҆бдержи́тъ бж҃е́ственное писа́нїе, и҆ не многоглаго́ланїе є҆́сть, но да ча́стымъ воспомина́нїемъ и҆ ѕѣлѡ̀ ᲂу҆ны́лыхъ въ слꙋ́шанїи къ па́мѧти и҆ разꙋмѣ́нїю глаго́лемыхъ приведе́тъ чꙋ́днѣ и҆ человѣколю́бнѣ и҆ не мине́тъ ᲂу҆ше́съ сло́во ско́ростїю и҆ ма́лостїю прилꙋчи́вшагѡсѧ рече́нїѧ, наипа́че же, є҆гда̀ ᲂу҆пражнѧ́емсѧ въ жите́йскихъ веще́хъ, ничто́же понѐ ѿ ча́сти вѣ́дꙋще. Занѐ глаго́летъ златоꙋ́стъ: Є҆́же ѿ ча́сти, нѣ́сть цѣ́ла ча́сть, но ча́сть ча́сти. Оу҆праздни́тсѧ же, да не и҆стреби́тсѧ и҆ ни во что́же прїи́детъ. Занѐ а҆́ще бы ра́зꙋма не бы́хомъ и҆мѣ́ли, нижѐ бы человѣ́цы бы́ли: но ᲂу҆праздни́тсѧ ᲂу҆́бѡ є҆́же ѿ ча́сти, ꙗ҆́кѡ лице́мъ къ лицꙋ̀, ꙗ҆́коже во́зрастъ младе́нца ѿ тогѡ̀, є҆гда̀ содѣ́лаетсѧ мꙋ́жъ, ꙗ҆́коже са́мъ а҆по́столъ речѐ, толкꙋ́ѧ глаго́лъ сво́й при́тчею младе́нца[[а҃ Кор. г҃і, ст. і҃ и҆ а҃і.]]: си́рѣчь, ꙗ҆́коже па́ки глаго́летъ златоꙋ́стъ: Ны́нѣ вѣ́мы не́бо, ꙗ҆́кѡ є҆́сть, а҆ не вѣ́мы, что̀ є҆́сть: тогда́ же ᲂу҆праздни́тсѧ ме́ньшее ѿ бо́льшагѡ, то́ є҆сть ра́зꙋмъ на́шъ, и҆ є҆́же что̀ є҆́сть, тѣ́мже расте́тъ па́че ра́зꙋмъ. И҆́бо мнѡ́гїѧ сꙋ́ть сокрове́нны въ бж҃е́ственныхъ писа́нїѧхъ та̑йны, и҆ мы̀ не вѣ́мы намѣ́ренїѧ бж҃їѧ во глаго́лемыхъ: но да не вознесе́шисѧ по неразꙋ́мїю, глаго́летъ бг҃осло́въ, порица́ѧ речє́нїѧ и҆сповѣ́дающихъ на́съ благоразꙋ́мїе: безслове́сно бо и҆ безꙋ́мно є҆́сть не си́лѣ намѣ́ренїѧ внима́ти, но рече́нїѧмъ, глаго́летъ вели́кїй дїонѵ́сїй. Є҆гда́ же кто̀ блаже́ннымъ пла́чемъ взы́щетъ, тогда̀ ѡ҆брѣта́етъ: сїе́ бо є҆́сть дѣ́ланїе стра́ха, и҆́мже ѿкрове́нїе та́инъ быва́етъ. Сѐ ᲂу҆́бѡ проро́къ и҆са́їа глаго́летъ: Ме́ртвїи же живота̀ не и҆́мꙋтъ ви́дѣти[[И҆са́їи гл. к҃ѕ, ст. д҃і.]]: и҆ па́ки: Воскре́снꙋтъ ме́ртвїи: но сїѐ нѣ́сть разногла́сїе, ꙗ҆́коже мнѧ́тъ невѣ́дѧщїи намѣ́ренїѧ, ꙗ҆́коже рече́сѧ ѿ видѣ́нїѧ бж҃е́ственнагѡ писа́нїѧ. Ꙗ҆́кѡ ра́ди і҆́дѡлъ ᲂу҆́бѡ ꙗ҆зы́ческихъ рече́сѧ: живота̀ не и҆́мꙋтъ ви́дѣти занѐ бездꙋ́шни сꙋ́ть. А҆ ѡ҆ ѻ҆́бщемъ воскресе́нїи, и҆ весе́лїи пра́ведныхъ, сїѐ: воскре́снꙋтъ ме́ртвїи: не то́чїю же, но и҆ ѡ҆ воста́нїи ᲂу҆со́пшихъ съ сп҃сомъ на́шимъ і҆и҃съ хрⷭ҇то́мъ проро́чествꙋѧ. Та́кожде и҆ во ст҃ѣ́мъ є҆ѵⷢ҇лїи ѡ҆ преѡбраже́нїи самагѡ̀ гдⷭ҇а глаго́лютъ є҆ѵⷢ҇лі́сты: Ѻ҆́въ ᲂу҆́бѡ и҆ по шестѝ дне́хъ, ѻ҆́въ же и҆ по ѻ҆смѝ, си́рѣчь, съ предвари́вшимъ чꙋдотворе́нїемъ и҆ ᲂу҆че́нїемъ гдⷭ҇нимъ[[Ма́рк. гл. ѳ҃, ст. в҃.]]. Но ѻ҆́въ глаго́летъ, пе́рвый и҆ послѣ́днїй де́нь проходѧ̀, среди́нꙋ ѻ҆́нѣхъ ше́сть речѐ: ѻ҆́въ же и҆ то́тъ и҆ се́й совокꙋпи́въ, глаго́летъ ѻ҆́смь[[Лꙋкѝ гл. ѳ҃, ст. к҃и.]]. И҆ па́ки бг҃осло́въ і҆ѡа́ннъ во ст҃ѣ́мъ свое́мъ є҆ѵⷢ҇лїи въ двою̀ мѣ́стѣхъ глаго́летъ, въ пе́рвѣмъ ᲂу҆́бѡ: Мнѡ́га же и҆ и҆́на зна́мєнїѧ сотворѝ і҆и҃съ пред̾ ᲂу҆ченикѝ свои́ми, ꙗ҆̀же не сꙋ́ть пи̑сана въ кни́зѣхъ си́хъ, и҆ прѡ́ч:[[І҆ѡа́н. гл. к҃, ст. л҃.]]. въ дрꙋго́мъ: Сꙋ́ть же и҆ и҆́на мнѡ́га, ꙗ҆̀же сотворѝ і҆и҃съ[[Та́мже гл. к҃а, ст. к҃є.]], и҆ не глаго́летъ, пред̾ ᲂу҆ченикѝ свои́ми. Ѡ҆ ни́хже писа̀ ст҃ы́й про́хѡръ написа́вый ѻ҆боѧ̀: ꙗ҆́кѡ то̀ ѡ҆ чꙋдесѣ́хъ, и҆ ѡ҆ про́чемъ, ꙗ҆̀же сотворѝ гдⷭ҇ь, глаго́летъ є҆ѵⷢ҇лі́стъ, ꙗ҆̀же не написа̀ са́мъ бг҃осло́въ, занѐ пре́жде напи̑сана бы́ша ѿ дрꙋги́хъ є҆ѵⷢ҇лі́стѡвъ, тѣ́мже и҆ пред̾ ᲂу҆ченикѝ свои́ми приложѝ: дрꙋго́е же рече́нїе ѡ҆ сотворе́нїи мі́ра, є҆гда̀ безтѣле́сно бѣ̀ сло́во бж҃їе, съ ни́мже всѧ̑ ѻ҆ц҃ъ ѿ несꙋ́щихъ созда̀ глаго́лѧ: Да бꙋ́детъ сїѐ, и҆ бы́сть[[Бытїѧ̀ а҃.]]. Ꙗ҆̀же, а҆́ще бы по є҆ди́номꙋ пи̑сана бы́ша, глаго́летъ бг҃осло́въ, и҆ прѡ́чаѧ[[І҆ѡа́н. гл. к҃а, ст. к҃є.]]. И҆ про́стѣ, всѧ́ко писа́нїе, и҆ всѧ́ко сло́во бж҃їе, и҆лѝ ст҃а́гѡ нѣ́коегѡ, и҆лѝ чꙋ́вственныхъ, и҆лѝ мы́сленныхъ тва́рей, намѣ́ренїе и҆́мать въ себѣ̀ сокрове́нно: не то́чїю же дрꙋга̑ѧ, но и҆ всѧ́къ человѣ́ческїй глаго́лъ. И҆ никто́же вѣ́сть ра́зꙋма прилꙋчи́вшагѡсѧ рече́нїѧ, то́чїю по ѿкрове́нїю, ꙗ҆́коже глаго́летъ гдⷭ҇ь ѡ҆ вѣ́трѣ: Ꙗ҆́кѡ дх҃ъ, и҆дѣ́же хо́щетъ, ды́шетъ, и҆ прѡ́ч:[[І҆ѡа́н. гл. г҃, ст. и҃.]]. ѡ҆ не́мже речѐ златоꙋ́стъ, не ꙗ҆́кѡ вла́сть и҆́мать воздꙋ́хъ, речѐ хрⷭ҇то́съ, и҆дѣ́же хо́щетъ, но снисходѧ̀ не́мощи нїкоди́ма, положѝ гдⷭ҇ь вѣ́тръ, да ᲂу҆разꙋмѣ́етъ глаго́лемое є҆мꙋ̀. И҆ воздꙋ́хъ при́тчею ст҃а́гѡ дх҃а наречѐ, си́рѣчь сло́во, є҆́же къ немꙋ̀ речѐ и҆ къ дрꙋги̑мъ нѣ̑кїимъ, ꙗ҆́кѡ, ꙗ҆̀же глаго́лю ва́мъ, дх҃ъ сꙋ́ть, си́рѣчь, дꙋхѡ́вна, а҆ не ꙗ҆́коже вы̀ мнитѐ: не бо̀ ѡ҆ тѣле́сныхъ веща́хъ глаго́лю, да ꙗ҆́кѡ тѣле́снїи сꙋ́ще разꙋмѣ́ете. Сегѡ̀ ра́ди глаго́летъ дамаски́нъ, ꙗ҆́кѡ а҆́ще не ᲂу҆слы́шитъ кто̀ ѿ ѻ҆́нагѡ, є҆гѡ́же є҆́сть сло́во, ѡ҆ намѣ́ренїи є҆гѡ̀ не мо́жетъ рещѝ, вѣ́мъ намѣ́ренїе глаго́лемое ѿ негѡ̀. И҆ ка́кѡ смѣ́етъ кто̀ глаго́лати, ꙗ҆́кѡ вѣ́мъ намѣ́ренїе бж҃їе въ ст҃ы́хъ писа́нїѧхъ сокрове́нно без̾ ѿкрове́нїѧ сн҃а є҆гѡ̀; ꙗ҆́коже са́мъ хрⷭ҇то́съ речѐ: И҆ є҆мꙋ́же а҆́ще во́литъ сн҃ъ ѿкры́ти[[Матѳ. гл. а҃і, ст. к҃з.]]. Си́рѣчь, а҆́ще произволе́нїе и҆́мать прїѧ́ти ѿ негѡ̀ ᲂу҆́мнѣ блюде́нїемъ бж҃е́ственныхъ є҆гѡ̀ за́повѣдей, и҆́хже кромѣ̀ глаго́лѧй вѣ́дѣти, прельсти́сѧ: гада́тельнѣ бо глаго́летъ, а҆ не вои́стиннꙋ ѿ бг҃а разꙋмѣ́въ, глаго́летъ лѣ́ствичникъ, а҆́ще ѿ мнѣ́нїѧ и҆ въ безмѣ̑рнаѧ хва́литсѧ: къ немꙋ́же глаго́летъ бг҃осло́въ, ѻ҆вогда̀ ѽ любомꙋ́дрѣйшїй ты̀, и҆ прѡ́ч: ѻ҆вогда̀: ѽ кни́жниче ты̀, поноша́ѧ возноше́нїе, ѿ негѡ́же неразꙋ́мнѡ таковы́й мни́тъ и҆мѣ́ти что̀. Є҆́же и҆ са́мо то̀, є҆́же мни́тсѧ и҆мѣ́ти, взѧто̀ бꙋ́детъ ѿ негѡ̀, занѐ не восхотѣ̀ рещѝ, не вѣ́мъ, ꙗ҆́коже и҆ всѝ ст҃і́и, да смире́нїемъ дано̀ бꙋ́детъ є҆мꙋ̀, и҆ преизбꙋ́детъ, ꙗ҆́коже и҆ ѻ҆́нѣмъ, и҆̀же и҆ вѣ́дѧще, глаго́лаша ничто́же вѣ́дѣти, ꙗ҆́коже глаго́летъ златоꙋ́стъ. Ꙗ҆́кѡ не речѐ а҆по́столъ, не ᲂу҆̀ что̀ вѣ́сть[[а҃ Кор. гл. и҃, ст. в҃.]], но ни ꙗ҆́коже подоба́етъ вѣ́дѣти, что̀ вѣ́сть. Тѣ́мже а҆́ще и҆ вѣ́дѣ, но не ꙗ҆́коже подоба́етъ.

Показа́нїе ѡ҆ лжеиме́нномъ ра́зꙋмѣ.

Се́й є҆́сть лжеиме́нный ра́зꙋмъ занѐ мни́тъ вѣ́дѣти, ꙗ҆̀же николи́же вѣ́дѣ. И҆ се́й го́ршїй є҆́сть соверше́ннагѡ неразꙋ́мїѧ, глаго́летъ златоꙋ́стъ, ꙗ҆́кѡ непрїе́млющь и҆справле́нїѧ ѿ нѣ́коегѡ ᲂу҆чи́телѧ: занѐ всеѕло́бнѣйшее неразꙋ́мїе мни́тъ до́брѣ себѣ̀ бы́ти. Сегѡ̀ ра́ди глаго́лютъ ѻ҆тцы̀ ꙗ҆́кѡ предло́жєннаѧ въ писа́нїѧхъ, до́лжни є҆смы̀ и҆спы́товати притрꙋ́днѣ со смире́нїемъ, и҆ совѣ́томъ и҆скꙋ́сныхъ, и҆ па́че дѣ́ломъ не́жели сло́вомъ наꙋча́тисѧ: ᲂу҆молча̑ннаѧ же бж҃е́ственными писа́нїи ника́коже и҆спы́товати. Безꙋ́мно бо є҆́сть сїѐ, ꙗ҆́коже глаго́летъ вели́кїй а҆нтѡ́нїй, ѡ҆ и҆́щꙋщихъ пред̾ꙋвѣ́дѣти бꙋ̑дꙋщаѧ, а҆ не па́че ѿрица́тисѧ сегѡ̀, ꙗ҆́кѡ недосто́йни. а҆́ще не́гли и҆ ѿ бж҃їѧгѡ про́мысла быва́етъ, ꙗ҆́коже на навꙋходоно́сорѣ[[Данїи́л. д҃.]] и҆ дре́внемъ валаа́мѣ[[Чи́сл. к҃в.]] бы́сть ко ѻ҆́бщей по́льзѣ, а҆́ще и҆ недосто́йни бы́ша, а҆ не ѿ де́монѡвъ, и҆ па́че же є҆гда̀ быва́етъ ѿ сновидѣ́нїй и҆ нѣ́кїихъ мечта́нїй: не рече́сѧ же сїѐ, да тѣле́сными дѣѧ́нїѧми и҆ нра́вственными и҆спытꙋ́емъ писа̑нїѧ, по за́повѣди гдⷭ҇ней, и҆ живо́тъ вѣ́чный ѡ҆брѧ́щемъ[[І҆ѡа́н. гл. є҃, ст. л҃ѳ.]]. И҆ да не сло́вомъ то́чїю и҆́щемъ, и҆ ѿ мнѣ́нїѧ мнѧ́ще что̀ ᲂу҆разꙋмѣ́ти: и҆ па́че же сокровє́ннаѧ ѿ на́съ къ бо́льшемꙋ смире́нїю, и҆ да не ѡ҆сꙋ́димсѧ, ꙗ҆́кѡ въ ра́зꙋмѣ престꙋпи́вшїи. Занѐ ᲂу҆́мъ сподо́бивыйсѧ ра́зꙋмъ стѧжа́ти, въ поꙋче́нїи же бж҃е́ственныхъ писа́нїй, и҆ дарова́нныхъ є҆мꙋ̀ ра́зꙋмѡвъ во ᲂу҆пражне́нїи мно́зѣ и҆ внима́нїи со смире́нїемъ и҆ стра́хомъ бж҃їимъ не подвиза́етсѧ, ꙗ҆́кѡ недосто́йный дарова́нныхъ є҆мꙋ̀ ѿ негѡ̀, съ преще́нїемъ быва́етъ лиша́емь ра́зꙋма, ꙗ҆́коже саꙋ́лъ ца́рствїѧ, глаго́летъ ст҃ы́й маѯі́мъ. Оу҆пражднѧ́ѧйсѧ же и҆ подвиза́ѧйсѧ, глаго́летъ, до́лженъ є҆́сть, ꙗ҆́коже даві́дъ, моли́тисѧ при́снѡ[[а҃ Цар. г҃і.]], и҆ глаго́лати: Се́рдце чи́сто сози́жди во мнѣ̀ бж҃е, и҆ дх҃ъ пра́въ ѡ҆бновѝ во ᲂу҆тро́бѣ мое́й[[Ѱал. н҃, ст. в҃і.]], да бꙋ́детъ досто́инъ наше́ствїѧ є҆гѡ̀, ꙗ҆́коже нѣ́когда а҆по́столи прїѧ́ша благода́ть въ тре́тїй ча́съ, ꙗ҆́коже глаго́летсѧ въ дѣѧ́нїѧхъ[[Дѣѧ́н. гл. в҃, ст. є҃і.]]: є҆́сть бо ча́съ тре́тїй днѐ, де́нь же недѣ́льный, ꙗ҆́коже глаго́летъ бж҃е́ственный лꙋка̀. Пѧтдесѧ́тница бо є҆́сть седьма́ѧ недѣ́лѧ, ѿ недѣ́ли, въ не́йже быва́етъ глаго́лемаѧ і҆ꙋде́йскимъ ѧ҆зы́комъ фа́ска, гре́чески же толкꙋ́етсѧ прехожде́нїе, свобо́да. И҆ недѣ́лѧ сꙋ́щаѧ по пѧти́десѧти дне́хъ глаго́летсѧ пѧтдесѧ́тница, ꙗ҆́кѡ и҆сполне́нїе въ среди́нѣ сꙋ́щихъ дне́й, и҆ па́сха пѧти́десѧти дне́й по зако́нꙋ. Ꙗ҆́коже і҆ѡа́ннъ бг҃осло́въ въ свое́мъ є҆ѵⷢ҇лїи глаго́летъ: Въ послѣ́днїй де́нь вели́кїй пра́здника, занѐ бѣ̀ тогда̀ ѿда́нїе пра́здника па́схи. Тро́йственъ ᲂу҆́бѡ ѿ часѡ́въ благонаслѣ́дствова благода́ть, ꙗ҆́коже глаго́летъ дамаски́нъ, и҆ прѡ́ч: то́ є҆сть, въ тре́тїй ᲂу҆́бѡ ча́съ, но въ є҆ди́номъ глаго́летъ гдⷭ҇ѣ дне́й, ꙗ҆́кѡ да наꙋ́читъ трѝ ѵ҆поста̑си почита́ти въ простотѣ̀ вла́сти, си́рѣчь, є҆ди́нагѡ бж҃ества̀, є҆ди́на бо недѣ́лѧ седми́цы, а҆ не пе́рваѧ глаго́летсѧ, речѐ златоꙋ́стъ. Занѐ раздѣлѧ́ютъ ю҆̀ бж҃е́ственное писа́нїе: ве́тхое бо проро́чествꙋѧ ѡ҆ не́й, не по счисле́нїю нарица́етъ ю҆̀ ꙗ҆́коже вторꙋ́ю и҆ прѡ́чїѧ. А҆́ще бо не раздѣлѧ́шесѧ, пе́рваѧ бы глаго́лаласѧ, но сегѡ̀ ра́ди нарица́етсѧ є҆ди́ною ѿ сꙋббѡ́тъ, си́рѣчь седми́цы, въ но́вой же благода́ти ст҃а́ѧ недѣ́лѧ сїѧ̀ и҆ нарече́нный де́нь и҆менꙋ́етсѧ, занѐ въ не́й ѻ҆со́беннѣйшыѧ и҆ влады̑чнїѧ дѣла̀ бы́ша: ꙗ҆́коже благовѣ́щенїе и҆ рождество̀ гдⷭ҇не и҆ воскресе́нїе є҆гѡ̀, и҆ ѻ҆́бщее воскресе́нїе ме́ртвыхъ и҆́мать бы́ти. Въ сїю́ бо, глаго́летъ дамаски́нъ, сотвори́сѧ чꙋ́вственный свѣ́тъ ѿ бг҃а, и҆ па́ки въ не́й прише́ствїе гдⷭ҇не и҆́мать бы́ти, да въ безконє́чныѧ вѣ́ки пребꙋ́детъ де́нь є҆ди́нъ ѻ҆́ный и҆ ѻ҆смы́й: ꙗ҆́кѡ внѣ̀ сꙋ́щїй седмѝ вѣкѡ́въ си́хъ и҆мꙋ́щихъ дни̑ и҆ нѡ́щи. Но поне́же сподо́бихомсѧ ѿ ст҃ы́хъ ᲂу҆вѣ́дѣти намѣ́ренїе таковы́хъ дѣ́лъ: ᲂу҆разꙋмѣ́емъ ᲂу҆̀бо намѣ́ренїе и҆ ко́еждо начина́нїе настоѧ́щагѡ сло́ва ѿ нача́ла и҆ свы́ше. Є҆́же ᲂу҆́бѡ є҆ди́ною и҆мена̀ кни́гъ, и҆ ст҃ы́хъ глаго́лютсѧ, сегѡ̀ ра́ди є҆́сть, да при́снѡ словеса̀ и҆́хъ помина́емъ къ ре́вности житїѧ̀ и҆́хъ, ꙗ҆́коже глаго́летъ вели́кїй васі́лїй. И҆ къ ра́зꙋмꙋ не вѣ́дѧщымъ си́хъ. Вѣ́дый ᲂу҆́бѡ, да воспомина́етъ, не вѣ́дый же сегѡ̀ ко взыска́нїю прїи́детъ прилꙋчи́вшїѧсѧ кни́ги. Та́же назва́нїе на мѣ́стѣ ст҃а́гѡ, и҆лѝ прилꙋчи́вшеесѧ писа́нїе положи́шасѧ, ча́стшїѧ ра́ди па́мѧти, да ма́лѣми глаго́лы дѣла̀ и҆́хъ и҆ словеса̀ помина́емъ, и҆ къ ᲂу҆разꙋмѣ́нїю про́чагѡ въ ка́ждомъ рече́нїи бж҃е́ственнагѡ писа́нїѧ и҆лѝ ᲂу҆чи́телѧ разсꙋжде́нїѧ же и҆ совѣ́та бла́га. И҆ ꙗ҆́кѡ не моѧ̑ сꙋ́ть глаго́лємаѧ, но бж҃е́ственныхъ писа́нїй, и҆ ко є҆́же ᲂу҆дивлѧ́тисѧ и҆ разсмотрѧ́ти неизглаго́ланное человѣколю́бїе бж҃їе, ка́кѡ хартїе́ю и҆ черни́лы ᲂу҆стро́и спасе́нїе дꙋ́шъ на́шихъ, и҆ дарова̀ на́мъ толи̑каѧ, писа̑нїѧ же и҆ ᲂу҆чи́телей правосла́вныѧ вѣ́ры. И҆ ка́кѡ невѣ́жда сы́й а҆́зъ и҆ ᲂу҆ны́лый, сподо́бихсѧ толи̑ка писа̑нїѧ проитѝ, ника́коже и҆мѣ̀ свою̀ кни́гꙋ, и҆лѝ и҆́но что̀ ѿню́дъ, но стра́ненъ и҆ ᲂу҆бо́гъ сы́й при́снѡ и҆ во всѧ́комъ поко́и и҆ безпопече́нїи пребыва́ѧ, со мно́гимъ наслажде́нїемъ тѣле́снымъ. А҆ ꙗ҆́кѡ ѡ҆ста́шасѧ нѣ́каѧ без̾имє́нна: сїѧ̑ ѿ нерадѣ́нїѧ моегѡ̀ сꙋ́ть, и҆ да не продолжи́тсѧ сло́во. Вопрошє́нїѧ же и҆ рѣшє́нїѧ ѻ҆́бщихъ веще́й ра́зꙋма ра́ди положи́шасѧ, и҆ благодарє́нїѧ дарова́вшемꙋ ст҃ы̑мъ свои̑мъ ѻ҆тцє́мъ на́шымъ ра́зꙋмъ же и҆ разсꙋжде́нїе, и҆ и҆́ми на́мъ недостѡ́йнымъ, и҆ къ зазрѣ́нїю на́съ немощны́хъ и҆ неразꙋ́мныхъ. Рече́сѧ же и҆ ѡ҆ спа́сшихсѧ дре́вле пра́ведныхъ въ вели́цѣмъ бога́тствѣ, и҆ средѝ грѣ́шникѡвъ и҆ невѣ́рныхъ человѣ̑къ. А҆́ще и҆ тогѡ́жде є҆стества̀ бы́ша человѣ́цы, ꙗ҆́коже и҆ мы̀, не хотѧ́щїи дости́гнꙋти въ мѣ́рꙋ соверше́нства, а҆́ще и҆ мно́гїй и҆скꙋ́съ и҆ ра́зꙋмъ блага́гѡ и҆ ѕла́гѡ прїѧ́хомъ, ꙗ҆́кѡ сꙋ̑щаѧ и҆́хъ ᲂу҆разꙋмѣ́вше, и҆ ꙗ҆́кѡ бо́льшїѧ благода́ти сподо́бльшесѧ, и҆ толи́кагѡ ра́зꙋма писа́нїй. Па́ки же дѣ̑ланїѧ на̑ша и҆́ноческа да вѣ́мы, ꙗ҆́кѡ всю́дꙋ спасти́сѧ мо́жемъ, а҆́ще и҆ своѧ̑ хотѣ̑нїѧ ѡ҆ста́вимъ. И҆ а҆́ще не та́кѡ сотвори́мъ, не мо́жемъ и҆мѣ́ти поко́ѧ: но нижѐ мо́жемъ и҆мѣ́ти ра́зꙋмъ и҆ дѣѧ́нїе бж҃е́ственныѧ во́ли. Занѐ на́ша во́лѧ є҆́сть прегра́да, разлꙋча́ющаѧ на́съ ѿ бг҃а. И҆ а҆́ще не разрꙋши́тсѧ прегра́да, не мо́жемъ ᲂу҆разꙋмѣ́ти и҆ твори́ти, ꙗ҆̀же сꙋ́ть бж҃їѧ, но внѣꙋ́дꙋ є҆гѡ̀ ѡ҆брѣта́емсѧ, и҆ ѿ врагѡ́въ наси́льствꙋеми быва́емъ нево́льнѣ и҆ не хотѧ́ще: и҆ ꙗ҆́кѡ безмо́лвїе вѧ́щше всѣ́хъ є҆́сть, и҆ кромѣ̀ є҆гѡ̀ не мо́жемъ ѡ҆чи́ститисѧ, и҆ разꙋмѣ́ти не́мощь на́шꙋ, и҆ кѡ́зни де́монѡвъ. Но нижѐ си́лꙋ и҆ про́мыслъ бж҃їй пости́гнꙋти возмо́жемъ ѿ бж҃е́ственныхъ слове́съ воспѣва́емыхъ же и҆ что́мыхъ: занѐ всѝ человѣ́цы тре́бꙋемъ такова́гѡ ᲂу҆праждне́нїѧ и҆лѝ ѿ ча́сти и҆лѝ соверше́ннѣ, и҆ кромѣ̀ сегѡ̀ не возмо́жно никомꙋ́же въ ра́зꙋмъ дꙋхо́венъ и҆ смиренномꙋ́дрїе прїитѝ, и҆́мже сокровє́нныѧ та̑йны въ бж҃е́ственныхъ писа́нїѧхъ, и҆ во всѣ́хъ творе́нїѧхъ разꙋмѣва́етъ произволѧ́ѧй. И҆ ꙗ҆́кѡ не подоба́етъ ᲂу҆потреблѧ́ти ве́щь, и҆лѝ сло́во, и҆лѝ начина́нїе, и҆лѝ разꙋмѣ́нїѧ кромѣ̀ нꙋ́ждныѧ потре́бы, дꙋше́вныѧ же и҆ спаси́тельныѧ, и҆ живота̀ тѣле́снагѡ. И҆ ꙗ҆́кѡ кромѣ̀ разсꙋжде́нїѧ, нижѐ мнѧ́щаѧсѧ дѡбра̀ прїѧ̑тна сꙋ́ть бг҃ꙋ. Но нижѐ без̾ пра́вагѡ намѣ́ренїѧ бл҃го́е дѣ́ланїе мо́жетъ воспо́льзовати кого̀. Преднапи̑санныѧ же тропари̑ ра́ди ᲂу҆разꙋмѣ́нїѧ и҆́хъ, и҆ про́чїихъ писа́нїй, и҆ во є҆́же ᲂу҆милѧ́тисѧ тѣ̑мъ, и҆̀же и҆́мꙋтъ не́мощенъ є҆щѐ ᲂу҆́мъ, ꙗ҆́коже глаго́летъ лѣ́ствичникъ. Пѣ́снь бо, глаго́летъ вели́кїй васі́лїй, привлека́етъ мы́сль человѣ́чꙋ, къ немꙋ́же хо́щетъ, и҆лѝ въ пла́чь, и҆лѝ въ любо́вь, и҆лѝ въ печа́ль, и҆лѝ въ весе́лїе. И҆ ꙗ҆́кѡ до́лжни є҆смы̀ и҆спы́товати писа̑нїѧ по за́повѣди гдⷭ҇ней, да ѡ҆брѧ́щемъ въ ни́хъ живо́тъ вѣ́чный[[І҆ѡа́н. гл. є҃, ст. л҃ѳ.]], и҆ внима́ти ра́зꙋмꙋ ѱалмѡ́въ и҆ тропаре́й, и҆ ꙗ҆́кѡ да ᲂу҆вѣ́мы въ ра́зꙋмѣ мно́зѣ, ꙗ҆̀же не вѣ́мы. А҆́ще бо, глаго́летъ вели́кїй васі́лїй, не прїи́метъ кто̀ ра́зꙋма, не вѣ́сть коли́кихъ лиша́етсѧ. Рождє́нїѧ же добродѣ́телей и҆ страсте́й и҆скꙋ́са ра́ди и҆ ра́зꙋма написа́шасѧ, да вѣ́сть кто̀ сїѧ̑, и҆ ѡ҆ ражда́ющихъ и҆̀хъ да подвиза́етсѧ, ѻ҆́вѣхъ стѧжа́ти, ѻ҆́вѣхъ ѡ҆ста́вити, ѻ҆́вѣхъ же побѣжда́ти проти́внымъ дѣ́ланїемъ. И҆ ꙗ҆́кѡ тѣлє́снаѧ дѣѧ̑нїѧ, ꙗ҆́коже растѣ̑нїѧ до́лжни є҆смы̀ блюстѝ при́снѡ соверше́ннымъ дѣ́ланїемъ: дꙋше́внымъ же добродѣ̑телѧмъ до́лжни є҆смы̀ при́снѡ внима́ти и҆ поꙋча́тисѧ, ка́кѡ стѧжа́ти кꙋ́юждо добродѣ́тель. И҆ ѿ бж҃е́ственныхъ писа́нїй и҆ ст҃ы́хъ мꙋже́й ѡ҆ се́мъ наꙋча́тисѧ и҆ сохранѧ́ти сїѐ ѻ҆па́снѡ съ болѣ́знїю дꙋшѝ, ꙗ҆́кѡ сокро́вище дѣ́ланїемъ, до́ндеже въ навыкнове́нїе прїи́демъ прилꙋчи́вшїѧсѧ добродѣ́тели. И҆ та́кѡ прилѣ́жнѡ вторꙋ́ю начина́емъ, ꙗ҆́коже глаго́летъ вели́кїй васі́лїй, да не вдрꙋ́гъ ко всѣ̑мъ ᲂу҆стремлѧ́ющесѧ, не́гли и҆знемо́жемъ. Но ѿ терпѣ́нїѧ находѧ́щихъ да начина́емъ, и҆ та́кѡ на прѡ́чїѧ благомо́щнѡ по́йдемъ со всѧ́кимъ раче́нїемъ и҆мꙋ́ще намѣ́ренїе бл҃гоꙋгоди́ти бг҃ови. Вси́ бо до́лжни є҆смы̀ за́пѡвѣди храни́ти, ꙗ҆́кѡ хрїстїа́не, занѐ не тѣле́сный трꙋ́дъ потре́бенъ на́мъ є҆́сть въ стѧжа́нїи дꙋше́вныхъ добродѣ́телей, но то́чїю произволе́нїе и҆ ᲂу҆се́рдїе къ прїѧ́тїю да́ра, ꙗ҆́коже глаго́летъ вели́кїй васі́лїй и҆ григо́рїй бг҃осло́въ и҆ дрꙋгі̑ѧ. Ѻ҆ба́че тѣле́сными дѣѧ́ньми быва́ютъ сїѧ̑ ᲂу҆до́бнѣе, па́че же безмо́лвствꙋющымъ безпристра́стнымъ пребыва́нїемъ и҆ безпопече́нїемъ ѡ҆ всѣ́хъ: зане́же не мо́жетъ кто̀ нра́вы своѧ̑ ви́дѣти и҆ и҆справлѧ́ти, а҆́ще не бꙋ́детъ въ свобо́дѣ и҆ попече́нїи таковы́хъ. Тѣ́мже до́лженъ є҆́сть кто̀ во пе́рвыхъ безстра́стїе стѧжа́ти ᲂу҆дале́нїемъ веще́й и҆ люде́й, и҆ тогда̀ вре́мени зовꙋ́щꙋ нача́льствовати дрꙋги́ми, и҆ ᲂу҆строѧ́ти вє́щи неѡсꙋжде́ннѡ и҆ безвре́днѡ ѿ навыкнове́нїѧ безпристра́стїѧ въ соверше́нное прише́дъ безстра́стїе. Па́че же а҆́ще ѿ бг҃а зва́нїе прїѧ́тъ, глаго́летъ дамаски́нъ, ꙗ҆́коже мѡѷсе́й, самꙋи́лъ же, и҆ про́чїи проро́цы и҆ ст҃і́и а҆по́столи ко спасе́нїю мно́гихъ. Не то́чїю же глаго́летъ сїѐ, но и҆ ѿрица́тисѧ подоба́етъ ꙗ҆́коже мѡѷсе́й, а҆ввакꙋ́мъ, григо́рїй бг҃осло́въ и҆ дрꙋгі́е. И҆ ꙗ҆́коже речѐ ст҃ы́й про́хѡръ ѡ҆ ст҃о́мъ і҆ѡа́ннѣ бг҃осло́вѣ, ꙗ҆́кѡ не восхотѣ̀ ѡ҆ста́вити любе́зное є҆мꙋ̀ безмо́лвїе, а҆́ще и҆ до́лгъ и҆мы́й не безмо́лствовати, но, ꙗ҆́кѡ а҆по́столъ, проповѣ́дывати. И҆ нижѐ ꙗ҆́кѡ стра́стный ᲂу҆бѣжѐ въ безмо́лвїе безстра́стнѣйшїй сы́й: да не бꙋ́детъ: но ꙗ҆́кѡ не хотѧ̀ ѿлꙋча́тисѧ видѣ́нїѧ ѡ҆ бз҃ѣ, и҆ сла́дости безмо́лвїѧ лиши́тисѧ когда̀. Дрꙋзі́и же па́ки ѿ смиренномꙋ́дрїѧ безстра́стни сꙋ́ще, бѣжа́ша во внꙋ́трєннїѧ пꙋсты̑ни, боѧ́шасѧ молвы̀, ꙗ҆́коже вели́кїй сїсѡ́й, зва́нъ бы́въ къ поко́ю ѿ ᲂу҆ченика̀ своегѡ̀, не покори́сѧ, но глаго́ла: и҆дѣ́же не сꙋ́ть человѣ́цы, та́мѡ и҆́демъ, а҆́ще и҆ въ толи́кое безстра́стїе дости́же, ꙗ҆́кѡ плѣ́нникъ бы́сть ѿ любвѝ бж҃їей, и҆ ѿ сеѧ̀ нечꙋ́вственъ не вѣ́дѧ, ꙗ҆дѣ́ ли, и҆лѝ нѝ. И҆ вкра́тцѣ, всѝ ѿсѣца́хꙋ своѧ̑ хотѣ̑нїѧ во всѧ́комъ безмо́лвїи, и҆ та́кѡ ꙗ҆́кѡ ᲂу҆ченицы̀ ѿ ᲂу҆чи́телѧ рꙋкоположи́шасѧ нѣ́цыи, во є҆́же ᲂу҆чи́ти и҆нѣ́хъ, и҆ прїима́ти по́мыслы, и҆ нача́льствовати дрꙋги́ми, и҆лѝ а҆рхїере́йствомъ, и҆лѝ и҆гꙋ́менствомъ ѿ ст҃а́гѡ дх҃а ᲂу҆́мнымъ чꙋ́вствомъ, печа́ть прїе́млюще наше́ствїемъ є҆гѡ̀, ꙗ҆́коже ст҃і́и а҆по́столи и҆ сꙋ́щїи пре́жде и҆́хъ а҆арѡ́нъ, мелхїседе́къ и҆ про́чїи. Дамаски́нъ же глаго́летъ: и҆́же де́рзостнѣ взы́ти покꙋша́ѧйсѧ на таковы́й степе́нь ѡ҆сꙋжде́нъ є҆́сть. А҆́ще бо без̾ ца́рскагѡ повелѣ́нїѧ са́ны безстꙋ́днѡ прохо́дѧщїи, вели́кое претерпѣва́ютъ ѡ҆сꙋжде́нїе: коли́кѡ па́че ѡ҆сꙋжда́ютсѧ на бж҃їѧ дарова̑нїѧ дерза́ющїи без̾ є҆гѡ̀ повелѣ́нїѧ. И҆ наипа́че а҆́ще ѿ неразꙋ́мїѧ и҆ возноше́нїѧ мнѧ́тъ неѡсꙋжде́ннꙋ бы́ти стра́шномꙋ семꙋ̀ начина́нїю, и҆лѝ къ че́сти же и҆ поко́ю проходи́ти сїѐ мнѧ́ще, а҆ не па́че ꙗ҆́кѡ бе́зднѣ смире́нїѧ и҆ сме́рти, за дрꙋ́ги, и҆ врагѝ вре́мени зовꙋ́щꙋ, предаѧ́тисѧ, ꙗ҆́коже ст҃і́и а҆по́столи твори́ша внегда̀ ᲂу҆чи́ти дрꙋги́хъ, и҆ па́че же безстра́стнїи, и҆ мꙋ́дрїи сꙋ́ще по превосхо́дствꙋ. А҆́ще же не всегѡ̀ сегѡ̀ вѣ́мы, ꙗ҆́кѡ не́мощнїи и҆ недово́льнїи є҆смы̀: что̀ подоба́етъ и҆ глаго́лати; возноше́нїе бо и҆ неразꙋ́мїе слѣ́пы твори́тъ не хотѧ́щыѧ въ ᲂу҆праздне́нїи зрѣ́ти не́мощь свою̀ и҆ неразꙋ́мїе, ꙗ҆́коже глаго́летъ въ ста́рчествѣ. Ꙗ҆́кѡ ке́ллїа и҆́нока є҆́сть пе́щь вавѷлѡ́нскаѧ, въ не́йже трїѐ ѻ҆́троцы сн҃а бж҃їѧ ѡ҆брѣто́ша. И҆ па́ки: Сѣдѝ, глаго́летъ въ ке́ллїи свое́й, и҆ всемꙋ́ тѧ наꙋчи́тъ. И҆ гдⷭ҇ь, и҆дѣ́же, глаго́летъ, два̀ и҆лѝ трїѐ со́брани во и҆́мѧ моѐ, тꙋ̀ є҆́смь посредѣ̀ и҆́хъ[[Матѳ. гл. и҃і, ст. к҃.]]. И҆ лѣ́ствичникъ, не ᲂу҆клони́сѧ, глаго́летъ соломѡ́нъ, ни на де́сно, ни на шꙋ́е, но пꙋте́мъ ца́рскимъ ше́ствꙋй[[При́тч. гл. д҃, ст. к҃з.]], си́рѣчь, съ є҆ди́нѣмъ и҆лѝ двѣма̀ безмо́лвствꙋѧ. И҆ нижѐ є҆ди́нъ въ пꙋсты́ни, нижѐ въ ѻ҆́бществѣ мно́зѣмъ: сре́днїй во ѻ҆бою̀, глаго́летъ, мнѡ́зѣмъ поле́зенъ бы́сть. И҆ па́ки, по́стъ смирѧ́етъ тѣ́ло, бдѣ́нїе просвѣща́етъ ᲂу҆́мъ, безмо́лвїе прино́ситъ пла́чь, и҆ па́че ѡ҆чища́етъ человѣ́ка, и҆ ѡ҆мыва́етъ дꙋ́шꙋ, и҆ твори́тъ ю҆̀ безгрѣ́шнꙋ. Сегѡ̀ ра́ди написа́шасѧ при концѣ̀ и҆мена̀ всѣ́хъ ꙗ҆́вѣ добродѣ́телей и҆ страсте́й, да ᲂу҆вѣ́мы, коли́ки добродѣ̑тели до́лжни є҆смы̀ стѧжа́ти, и҆ коли̑ка ѡ҆пла́кивати ѕла̑ѧ. Занѐ кромѣ̀ пла́ча ѡ҆чище́нїе не быва́етъ: пла́ча же во всегда́шнемъ попече́нїи нѣ́сть. И҆ без̾ ѡ҆чище́нїѧ дꙋшѝ и҆звѣще́нїе не быва́етъ, кромѣ́ же и҆звѣще́нїѧ разлꙋче́нїе дꙋшѝ ѿ тѣ́ла бѣ́дственно є҆́сть: безвѣ́стно бо, глаго́летъ лѣ́ствичникъ, не́гли же и҆ невѣ́рно є҆́сть. Преждеречє́ннаѧ же ѻ҆́смь видѣ̑нїѧ, не сꙋ́ть на̑ша дѣ̑ланїѧ, но возмє́здїѧ на́шихъ добродѣ́телей, и҆ не до́лжни є҆смы̀ ѿ чте́нїѧ то́чїю стѧжа́ти ѧ҆̀, а҆́ще и҆ тщи́мсѧ ѿ го́рдостнагѡ ᲂу҆се́рдїѧ, ꙗ҆́коже глаго́летъ лѣ́ствичникъ, ѡ҆ соверше́ннѣйшихъ, си́рѣчь, ѡ҆ четы́рехъ послѣ́днихъ, занѐ небє́сна сꙋ́ть, и҆ нечи́стый ᲂу҆́мъ не вмѣща́етъ такова̑ѧ. Но всѐ на́ше тща́нїе ѡ҆ тѣле́сныхъ и҆ дꙋше́вныхъ добродѣ́телѧхъ и҆мѣ́ти до́лжни є҆смы̀, и҆ та́кѡ ражда́етсѧ въ на́съ пе́рваѧ за́повѣдь, си́рѣчь стра́хъ бж҃їй. И҆ є҆гда̀ пребыва́емъ въ не́мъ, ражда́етсѧ пла́чь, и҆ є҆ли́кѡ въ навыкнове́нїи є҆ди́нагѡ видѣ́нїѧ бꙋ́демъ, толи́кѡ благода́ть бж҃їѧ, ѻ҆́бщаѧ всѣ́хъ ма́ти, ꙗ҆́коже глаго́летъ ст҃ы́й і҆саа́къ, да́рꙋетъ на́мъ вы̑шшаѧ сегѡ̀, до́ндеже се́дмь ра́зꙋмѡвъ стѧ́жемъ въ себѣ̀, и҆ ѻ҆сьма́гѡ, и҆́же є҆́сть дѣ́ланїе бꙋ́дꙋщагѡ, сподо́битъ прилѣ́жнѡ добродѣ́тєли творѧ́щихъ съ пра́вымъ намѣ́ренїемъ благоꙋгожда́ти бг҃ꙋ. Мы́ же, є҆гда̀ самодви́жнѣ ѿ бг҃а мы́сль прїи́детъ, и҆лѝ пе́рваѧ, и҆лѝ какова̀ є҆́сть внеза́пꙋ на́мъ невѣ́дꙋщымъ, до́лжни є҆смы̀ а҆́бїе всѧ́кое жите́йское попече́нїе и҆ са́мое пра́вило ѡ҆ставлѧ́ти мно́жицею, и҆ прилꙋчи́вшїйсѧ дꙋхо́венъ ра́зꙋмъ и҆ ᲂу҆миле́нїе, ꙗ҆́кѡ зѣ́ницꙋ ѻ҆́ка блюстѝ, до́ндеже смотри́тельнѣ ѿи́детъ. И҆ тогда̀ напи̑саннымъ глаго́ламъ стра́ха и҆ пла́ча поꙋча́тисѧ при́снѡ и҆ пре́жде пра́вила и҆ по́слѣ є҆гѡ̀. И҆ є҆гда̀ свобо́дꙋ и҆́мамы де́нь и҆ но́щь, и҆лѝ рꙋкодѣ́лїе держа́ще, є҆щѐ не́мощнїи сꙋ́ще, ко снꙋ̀ и҆ ᲂу҆ны́нїю ᲂу҆добопрекло́ннїи, и҆лѝ пра́здни, могꙋ́щїи въ непреста́ннѣмъ пла́чѣ бы́ти, и҆ плѣнѧ́тисѧ во глаго́лемыхъ ѿ ни́хъ рече́нїѧхъ, и҆ быва́ющихъ слеза́хъ. Сегѡ́ бо ра́ди написа́шасѧ, да и҆ неискꙋ́снїи въ таковы́хъ, ꙗ҆́коже и҆ а҆́зъ, чрез̾ речє́ннаѧ ᲂу҆ны́нїе ᲂу҆ма̀ воздви́гнемъ, поꙋче́нїемъ си́хъ и҆ внима́нїемъ. И҆мꙋ́щїи бо раче́нїе и҆ и҆скꙋ́съ ѿ навыкнове́нїѧ въ дѣ́ланїи добродѣ́телей, мно́гѡ бо́льше глаго́лемыхъ вѣ́дѧтъ: па́че же во вре́мѧ самодви́жнагѡ ᲂу҆миле́нїѧ. Занѐ мно́гꙋ крѣ́пость стѧжа̀ ча́съ се́й, па́че не́жели ᲂу҆миле́нїе ѿ на́шегѡ дѣ́ланїѧ. Ѻ҆ба́че да не мни́тъ кто̀ бы́ти дѣ́латель толи́кихъ дарѡ́въ, но па́че ꙗ҆́кѡ вы́шше своегѡ̀ досто́инства прїѧ́вый, мно́гѡ благодари́ти до́лженъ є҆́сть, и҆ страши́тисѧ, да не ка́кѡ бо́льшее ѡ҆сꙋжде́нїе и҆́мать си́хъ ра́ди, ꙗ҆́кѡ ничто́же потрꙋди́всѧ и҆́мать сподо́битисѧ дѣ́ланїѧ а҆́гг҃льскагѡ. Къ побꙋжде́нїю бо ᲂу҆ма̀ дае́тсѧ ра́зꙋмъ, и҆ крѣ́пость во є҆́же храни́ти за́пѡвѣди, и҆ дѣ́лати добродѣ́тєли, и҆ да ᲂу҆вѣ́мы, ка́кѡ и҆ чесѡ̀ ра́ди твори́мъ сїѧ̑ и҆ что̀ подоба́етъ ᲂу҆́бѡ твори́ти, чесѡ́ же ᲂу҆далѧ́тисѧ, да не ѡ҆сꙋжде́ни бꙋ́демъ, и҆ да ѿ ра́зꙋма воскрилѧ́еми съ ра́достїю дѣ́лаемъ, и҆ бо́льшїй ра́зꙋмъ прїе́млемъ, и҆ крѣ́пость къ дѣ́ланїю и҆ ра́дованїе. И҆ семꙋ̀ быва́ющꙋ благодари́ти дарова́вшемꙋ сїѧ̑ сподо́бимсѧ, вѣ́дꙋще, ѿкꙋ́дꙋ прїѧ́хомъ такова̑ѧ блага̑ѧ. Благодари́мый же бѡ́льшаѧ на́мъ блага̑ѧ да́рꙋетъ, и҆ прїи́мше да́ры па́че возлю́бимъ є҆го̀, и҆ любо́вїю въ премꙋ́дрость бж҃їю дости́гнемъ, є҆ѧ́же нача́ло є҆́сть стра́хъ гдⷭ҇нь[[Ѱал. р҃і, ст. і҃.]]. И҆ дѣ́ланїе ᲂу҆́бѡ стра́ха покаѧ́нїе є҆́сть, глаго́летъ ст҃ы́й і҆саа́къ, и҆́мже быва́етъ ѿкрове́нїе та̑инъ. Разꙋмѣ́нїѧмъ же стра́ха поꙋча́тисѧ подоба́етъ та́кѡ[[При́тч. гл. а҃, ст. з҃.]]: по вече́рнѣмъ послѣ́дованїи до́лженъ є҆́сть глаго́лати кто̀: Вѣ́рꙋю: Ѻ҆́ч҃е на́шъ: и҆ гдⷭ҇и поми́лꙋй, ча́стше, и҆ та́кѡ сѣди́тъ къ восто́кѡмъ, ꙗ҆́коже пла́чꙋщїи над̾ мертвеце́мъ, коле́блѧ главо́ю свое́ю съ болѣ́знїю дꙋшѝ, и҆ стена́нїемъ се́рдца, глаго́летъ прилꙋчи́вшагѡсѧ ра́зꙋма предпи̑санныѧ речє́нїѧ, наче́нъ ѿ пе́рвагѡ, до́ндеже дости́гнетъ моли́твы, и҆ та́кѡ па́даетъ на лицѐ пред̾ бг҃омъ съ тре́петомъ неисповѣди́мымъ, и҆ мо́литсѧ. Пе́рвѣе благодаре́нїемъ, посе́мъ и҆сповѣ́данїемъ, и҆ про́чими глаго́лы моли́твы, ꙗ҆́коже предрече́сѧ. Глаго́летъ бо ст҃ы́й а҆ѳана́сїй: и҆сповѣ́датисѧ до́лжни є҆смы̀ ѡ҆ сꙋ́щихъ въ невѣ́дѣнїи согрѣше́нїѧхъ, и҆ ѡ҆ тѣ́хъ, ꙗ҆̀же согрѣши́ти и҆мѣ́ли бы́хомъ, ѿ ни́хже благода́ть бж҃їѧ на́съ и҆зба́ви, да не въ ча́съ сме́рти и҆стѧ́зани бꙋ́демъ ѡ҆ ни́хъ: и҆ дрꙋ́гъ ѡ҆ дрꙋ́зѣ па́ки, по за́повѣди гдⷭ҇ней и҆ а҆пⷭ҇льстѣй: Намѣ́ренїе глаго́лемыхъ въ моли́твѣ сїѐ є҆́сть: благодаре́нїе ѡ҆ сꙋ́щемъ въ ча́съ се́й благода́рствїи, недово́льное къ благодаре́нїю и҆сповѣ́дꙋетъ. И҆ нерадѣ́нїе въ дрꙋгі̑ѧ времена̀, и҆ ꙗ҆́кѡ ча́съ се́й благода́ть бж҃їѧ є҆́сть: и҆сповѣ́данїе же проповѣ́дꙋетъ дарова̑ннаѧ, ꙗ҆́кѡ безконє́чна сꙋ́ть, и҆ ꙗ҆́кѡ не возмого́хъ всѧ̑ пости́гнꙋти, но нижѐ вѣ́дѣти, то́чїю є҆ди́нъ слꙋ́хъ и҆мѣ́ти, и҆ се́й то́кмѡ ѡ҆ нѣ́кїихъ, а҆ не ѡ҆ всѣ́хъ. И҆ ꙗ҆́кѡ ꙗ҆вле́ннѣ и҆ неѧвле́ннѣ при́снѡ ѡ҆благотворѧ́емсѧ, и҆ ꙗ҆́кѡ неизрече́нно є҆́сть терпѣ́нїе є҆гѡ̀ ѡ҆ мно́жествѣ на́шихъ согрѣше́нїй. И҆ ꙗ҆́кѡ недосто́инъ є҆́смь и҆ самагѡ̀ тогѡ̀, є҆́же воззрѣ́ти горѣ̀, ꙗ҆́коже мыта́рь сотворѝ, и҆ ꙗ҆́кѡ не на и҆́но что̀ дерза́ѧ, ра́звѣ на неизрече́нное человѣколю́бїе бж҃їе, припа́даю, ꙗ҆́коже данїи́лъ пред̾ а҆́гг҃ломъ бж҃їимъ, и҆ ꙗ҆́коже а҆по́столи и҆ про́чїи ѻ҆тцы̀ ѿ всеѧ̀ дꙋшѝ, и҆ сїѧ̑ дерзнове́ннѣ, занѐ недосто́инъ є҆́смь твори́ти. И҆ є҆́же и҆сповѣ́сти ви́ды согрѣше́нїй мои́хъ: вкра́тцѣ, ко є҆́же помина́ти сїѧ̑ и҆ пла́кати ѡ҆ си́хъ. И҆сповѣ́дати же свою̀ не́мощь, да прїи́детъ на мѧ̀ си́ла хрⷭ҇то́ва, по а҆по́столꙋ[[а҃ Кор. гл. в҃і, ст. ѳ҃.]], и҆ да прости́тсѧ мѝ мно́жество ѕѡ́лъ мои́хъ, ꙗ҆́кѡ не смѣ́ѧ ѡ҆ всѣ́хъ проси́ти, но ѡ҆ мно́жествѣ ѕѡ́лъ мои́хъ. И҆ є҆́же ѡ҆бꙋзда́тисѧ всѧ́кой ѕло́бѣ мое́й, и҆ лꙋка́вꙋ ѻ҆бы́чаю, ꙗ҆́кѡ не могꙋ̀ проти́вꙋ ста́ти, молю̀ всемогꙋ́щаго, ᲂу҆ста́вити стремле́нїе страсте́й, и҆ не попꙋсти́ти мѧ̀ согрѣша́ти пред̾ ни́мъ, и҆лѝ пред̾ нѣ́кїимъ человѣ́комъ, да понѐ ѿ сегѡ̀ ᲂу҆лꙋчꙋ̀ спасе́нїе по благода́ти. И҆ да ѿ па́мѧти болѣ́знь дꙋшѝ стѧжꙋ̀ и҆ є҆́же ѡ҆ и҆ны́хъ моли́тисѧ, по а҆пⷭ҇лꙋ[[І҆а́кѡв. гл. є҃, ст. ѕ҃і.]], и҆ любо́вь ко всѣ̑мъ, и҆ ви́ды страсте́й и҆счислѧ́ти, ꙗ҆́кѡ ѿ ни́хъ наси́лꙋемь, прибѣга́ти ко влⷣцѣ и҆ ко ᲂу҆миле́нїю. И҆ моли́тисѧ ѡ҆ тѣ́хъ, и҆̀хже ѡ҆скорби́хъ, и҆ ѡ҆ ѡ҆скорби́вшихъ мѧ̀, и҆ сѣ́товати ѡ҆ бꙋ́дꙋщихъ, ꙗ҆́кѡ ѿню́дъ слѣ́да ѕлопомнѣ́нїѧ и҆мѣ́ти не хотѧ́щꙋ, и҆ страша́щꙋсѧ въ тогда́шнее вре́мѧ своеѧ̀ не́мощи, да не ка́кѡ не возмогꙋ̀ съ неѕло́бїемъ претерпѣ́ти, и҆лѝ, моли́тисѧ ѡ҆ ни́хъ, по за́повѣди гдⷭ҇ней[[Матѳ. гл. є҃, ст. м҃д. Лꙋкѝ гл. ѕ҃, ст. к҃и.]]. И҆ сегѡ̀ ра́ди предварѧ́ѧ вре́мѧ, ꙗ҆́коже глаго́летъ ст҃ы́й і҆саа́къ, пре́жде недꙋ́га взыщѝ врача̀, и҆ пре́жде и҆скꙋше́нїѧ моли́сѧ, и҆ є҆́же ѡ҆ пре́жде ѿше́дшихъ, да спасе́нїе полꙋ́чатъ: и҆ да сме́рть помѧнꙋ̀, и҆ показа́нїе любвѝ є҆́сть є҆́же ѡ҆ всѣ́хъ моли́тисѧ, тре́бꙋѧ и҆ са́мъ моли́твы всѣ́хъ, и҆ є҆́же ᲂу҆правлѧ́емꙋ бы́ти ѿ бг҃а, и҆ бы́ти ꙗ҆́коже хо́щетъ, и҆ соединѧ́тисѧ со и҆нѣ́ми, да моли́твами и҆́хъ поми́лованъ бꙋ́дꙋ, ꙗ҆́кѡ и҆мѣ́ѧ и҆̀хъ во все́мъ превосхо́днѣе себѐ, всѧ́кагѡ же согрѣше́нїѧ ны́нѣ не смѣ́ю ѿпꙋще́нїѧ проси́ти, да не ꙗ҆́коже себѧ̀ ᲂу҆малѧ́ѧ, и҆нѣ́хъ недосто́йныхъ поми́лованїѧ вмѣню̀. И҆ ꙗ҆́кѡ не вѣ́дый и҆ немогі́й что̀ твори́ти, прибѣга́ю и҆ прошꙋ̀, ꙗ҆́коже благоволи́тъ человѣколю́бїе є҆гѡ̀ бы́ти, страша́сѧ правосꙋ́дїѧ ꙗ҆́кѡ грѣ́шный, и҆ глаго́лати мѝ то́чїю, да не лишꙋ́сѧ стоѧ́нїѧ ѡ҆деснꙋ́ю тебѐ, понѐ послѣ́днѣйшїй всѣ́хъ спаса́емыхъ, да ѡ҆брѧ́щꙋсѧ, ꙗ҆́кѡ нижѐ си́хъ досто́инъ сы́й. И҆ є҆́же моли́тисѧ мѝ ѡ҆ все́мъ мі́рѣ, ꙗ҆́коже прїѧ́хомъ ѿ це́ркви, и҆ ко є҆́же ѡ҆ сподо́битисѧ мѝ бж҃е́ственнагѡ причаще́нїѧ, ꙗ҆́коже подоба́етъ: и҆ да пре́жде сегѡ̀ молѧ́сѧ ѡ҆брѧ́щꙋ гото́ва помо́щника, є҆гда̀ восхощꙋ̀ причасти́тисѧ, и҆ да воспомѧнꙋ̀ пречⷭ҇тыѧ стра̑сти сп҃са на́шегѡ, и҆ прїидꙋ̀ въ любо́вь па́мѧти сегѡ̀: и҆ да бꙋ́детъ причаще́нїе во ѻ҆бще́нїе ст҃а́гѡ дх҃а. Ꙗ҆́кѡ са́мъ ᲂу҆тѣ́шитель ᲂу҆тѣша́етъ пла́чꙋщихъ по бз҃ѣ въ ны́нѣшнемъ вѣ́цѣ и҆ бꙋ́дꙋщемъ, и҆ ѿ всеѧ̀ дꙋшѝ со мно́гими слеза́ми молѧ́щыѧ є҆го̀ и҆ глаго́лющыѧ: Цр҃ю̀ нбⷭ҇ный, и҆ прѡ́ч: и҆ да бꙋ́детъ во ѡ҆брꙋче́нїе сꙋ́щїѧ ѡ҆ хрⷭ҇тѣ̀ жи́зни вѣ́чныѧ причаще́нїе пречⷭ҇тыхъ та̑инъ, моли́твами всепречⷭ҇тыѧ є҆гѡ̀ мт҃ре и҆ всѣ́хъ ст҃ы́хъ: та́же припа́даѧ ко всѣ̑мъ ст҃ы̑мъ, молѧ̀ и҆̀хъ ѡ҆ мнѣ̀ сотвори́ти моле́нїе, ꙗ҆́кѡ могꙋ́щихъ приноси́ти влⷣцѣ мольбꙋ̀. И҆ та́кѡ по ѻ҆бы́чаю, начина́ю моли́твꙋ вели́кагѡ васі́лїа, ꙗ҆́кѡ и҆мꙋ́щꙋ чꙋ́дное бг҃осло́вїе, и҆ проси́ти то́чїю є҆ди́ныѧ во́ли бж҃їѧ, и҆ благословлѧ́ти є҆го̀. И҆ по си́хъ а҆́бїе къ свои̑мъ по́мыслѡмъ со мно́гою си́лою и҆ внима́нїемъ: Прїиди́те, поклони́мсѧ: три́жды, и҆ прѡ́чаѧ, ꙗ҆́коже предписа́сѧ, да серде́чною моли́твою и҆ поꙋче́нїемъ бж҃е́ственныхъ писа́нїй ѡ҆чи́ститсѧ ᲂу҆́мъ, и҆ начне́тъ ви́дѣти сокровє́нныѧ въ бж҃е́ственныхъ писа́нїѧхъ та̑йны. Ѻ҆ба́че да бꙋ́детъ дꙋша̀ кромѣ̀ всѧ́кїѧ ѕло́бы, па́че же ѕлопомнѣ́нїѧ, ꙗ҆́коже глаго́летъ гдⷭ҇ь, во вре́мѧ моли́твы[[Ма́рка гл. а҃і, ст. к҃є. Є҆фес. гл. д҃, ст. л҃а. Тїм. гл. в҃, ст. и҃.]]. Сегѡ̀ ра́ди и҆ вели́кїй васі́лїй, и҆справлѧ́ѧ прекосло́вїе ꙗ҆́кѡ роди́телѧ сегѡ̀, глаго́летъ ко и҆гꙋ́менꙋ да́ти прекосло́вѧщемꙋ є҆мꙋ̀ покло́нѡвъ мно́гѡ, до ты́сѧщи. Ꙗ҆влѧ́ѧ же число̀, речѐ, и҆лѝ ты́сѧщꙋ, и҆лѝ є҆ди́нъ: то́ є҆сть, и҆лѝ ты́сѧщꙋ покло́нѡвъ до́лженъ є҆́сть прекосло́вѧщїй твори́ти къ бг҃ꙋ, и҆лѝ є҆ди́нъ настоѧ́телю, си́рѣчь, прости́ мѧ ѻ҆́тче. И҆ рѣше́нїе ᲂу҆́зъ прїе́млетъ є҆ди́нѣмъ то́чїю сꙋ́щимъ вои́стиннꙋ покло́номъ, и҆ ѿсѣче́нїемъ прекосло́вїѧ стра́сти. Нѣ́сть прекосло́вїе, глаго́летъ ст҃ы́й і҆саа́къ, житїѧ̀ хрїстїа́нскагѡ, прїе́мь рече́нїе ѿ а҆по́стола, глаго́летъ бо: А҆́ще ли кто̀ мни́тсѧ спо́рливъ бы́ти, мы̀ такова̀ ѻ҆бы́чаѧ не и҆́мамы, и҆ да не возмни́тъ кто̀, ꙗ҆́кѡ собо́ю то́чїю ѿверга́етъ прекосло́вѧща, прилага́етъ, нижѐ це́ркви бж҃їѧ[[а҃ Кор. гл. а҃і, ст. ѕ҃і.]], да всѧ́къ ᲂу҆вѣ́сть, ꙗ҆́кѡ ѻ҆́нъ внѣ̀ є҆́сть всѣ́хъ церкве́й и҆ бг҃а, є҆гда̀ прекосло́витъ: и҆ тре́бꙋетъ чꙋ́днагѡ ѻ҆́нагѡ є҆ди́нагѡ покло́на, є҆гѡ́же не сотвори́вша, нижѐ ты́сѧща по́льзовати мо́гꙋтъ, и҆мꙋ́ща непокаѧ́ненъ нра́въ. Покаѧ́нїе бо є҆́сть ѿсѣче́нїе ѕла̀, речѐ златоꙋ́стъ, глаго́лемїи же покло́ны, колѣнопреклонє́нїѧ сꙋ́ть па́че. и҆ ѡ҆́бразъ ра́бскїй и҆мѣ́ти ꙗ҆влѧ́ютъ припа́дающа без̾ возноше́нїѧ къ бг҃ꙋ и҆ человѣ́кѡмъ, є҆гда̀ преткне́тсѧ въ чесово́мъ, да мѣ́сто прикосло́вїѧ ѡ҆брѧ́щетъ, а҆́ще и҆ соверше́ннѣ не противорѣ́читъ, нижѐ ѡ҆правда́ти себѐ покꙋ́ситсѧ, ꙗ҆́коже ѻ҆́ный фарїсе́й: но па́че мытарю̀ да подража́етъ, внегда̀ вмѣнѧ́ти себѐ хꙋ́ждша всѣ́хъ, и҆ недосто́йна воззрѣ́ти горѣ̀. Занѐ а҆́ще мни́тсѧ покаѧ́нїе и҆мѣ́ти, и҆ прекосло́вити покꙋша́етсѧ сꙋдѧ́щемꙋ є҆го̀ благосло́внѡ, и҆лѝ безсло́внѡ, нѣ́сть досто́инъ сꙋ́щагѡ по благода́ти проще́нїѧ, ꙗ҆́кѡ сꙋди́лища и҆ща́й и҆ ѡ҆правда́нїй и҆ ꙗ҆́кѡ пра́вою мнѧ̀ стезе́ю что̀ сотвори́ти. Таково́е начина́нїе чꙋ́ждо є҆́сть за́повѣдей гдⷭ҇нихъ. И҆ вои́стиннꙋ: и҆дѣ́же словоѡправда̑нїѧ: та́мѡ и҆ правосꙋ́дїе взыскꙋ́етсѧ, а҆ не человѣколю́бїе: и҆ не дѣ́йствꙋетъ ᲂу҆́бѡ благода́ть ѡ҆пра́вдывающаѧ нечести́ваго, кромѣ̀ дѣ́лъ пра́вды, є҆ди́нѣмъ благоразꙋ́мїемъ и҆ терпѣ́нїемъ ᲂу҆коре́нїй со благодаре́нїемъ ѿ ѡ҆блича́ющихъ со всѧ́кимъ неѕло́бїемъ, да чи́ста мл҃тва є҆гѡ̀ бꙋ́детъ и҆ дѣйстви́тельно покаѧ́нїе. Є҆ли́кѡ бо моли́тсѧ кто̀ ѡ҆ ѡ҆клевета́ющихъ є҆го̀ и҆ ѡ҆болга́ющихъ, толи́кѡ бг҃ъ ꙗ҆влѧ́етъ враждꙋ́ющыѧ на него̀, и҆ поко́й є҆мꙋ̀ да́рꙋетъ чи́стою и҆ непреста́нною моли́твою. И҆ не ꙗ҆́кѡ сердцевѣ́дцꙋ бг҃ꙋ воспомина́юще глаго́лемъ проси̑мыѧ подро́бнѡ, но да ѿ си́хъ мы̀ ᲂу҆мили́мсѧ. И҆ ꙗ҆́кѡ хотѧ́щїи наипа́че пребы́ти съ ни́мъ, тща́нїемъ словеса̀ ᲂу҆множа́емъ, благодарѧ́ще и҆ и҆сповѣ́дающесѧ є҆мꙋ̀ ѡ҆ толи́кихъ є҆гѡ̀ благодѣѧ́нїѧхъ, по си́лѣ, ꙗ҆́коже глаго́летъ златоꙋ́стъ ѡ҆ блаже́нномъ даві́дѣ. Ꙗ҆́кѡ не многоглаго́ланїе, и҆лѝ и҆ноглаго́ланїе є҆́сть, глаго́лати мно́гажды то́жде рече́нїе, и҆лѝ подо́бное семꙋ̀. Но любо́вїю подвиза́емь проро́къ, и҆ да впечатлѣ́етсѧ сло́во моли́твы во ᲂу҆мѣ̀ молѧ́щагѡсѧ, и҆лѝ чтꙋ́щагѡ. Бг҃ъ бо всѧ̑ вѣ́сть пре́жде дѣѧ́нїѧ, и҆ не и҆́мать нꙋ́жды слы́шати разглаго́льствїе. Но мы̀ сегѡ̀ тре́бꙋемъ, во є҆́же вѣ́дѣти, чесогѡ̀ про́симъ, и҆ ѡ҆ че́мъ мо́лимсѧ: Ꙗ҆́кѡ да благоразꙋ́мїе стѧ́жемъ, и҆ къ немꙋ̀ проше́нїи прилѣпи́мсѧ, и҆ да не ѡ҆бꙋрева́еми ѿ по́мыслѡвъ, побѣжде́ни бꙋ́демъ ѿ врагѡ́въ, ꙗ҆́кѡ сꙋ́ще внѣ̀ бж҃їѧ па́мѧти: но да вспомоществꙋ́еми ѿ моли́твы и҆ поꙋче́нїѧ въ бж҃е́ственныхъ писа́нїѧхъ полꙋ́чимъ стѧжа́нїе добродѣ́тели, ѡ҆ ни́хже ст҃і́и ѻ҆тцы̀ и҆́нъ и҆́ндѣ писа́ша благода́тїю ст҃а́гѡ дх҃а. Ѿ ни́хже и҆ а҆́зъ ᲂу҆разꙋмѣ́въ рекꙋ̀ и҆мена̀ и҆́хъ, ꙗ҆́коже вмѣсти́ти могꙋ̀, а҆́ще и҆ не всѣ́хъ ѡ҆скꙋдѣ́нїѧ ра́ди ра́зꙋма.

И҆з̾ѧвле́нїе добродѣ́телей.

Мꙋ́дрость, цѣломꙋ́дрїе, мꙋ́жество, пра́вда, вѣ́ра, наде́жда, любы̀, стра́хъ, благоче́стїе, вѣ́дѣнїе, совѣ́тъ, крѣ́пость, ра́зꙋмъ, премꙋ́дрость, сокрꙋше́нїе, пла́чь, кро́тость, и҆спыта́нїе бж҃е́ственныхъ писа́нїй, ми́лостынѧ, чистота̀ се́рдца, ми́ръ, терпѣ́нїе, воздержа́нїе, претерпѣ́нїе, благо́е произволе́нїе, намѣ́ренїе, чꙋ́вство, прилѣжа́нїе, бж҃е́ственное ᲂу҆твержде́нїе, горѧ́честь, бо́дрость теплота̀ дх҃а, поꙋче́нїе, тща́нїе, трезвѣ́нїе, па́мѧть, разсмотре́нїе, благоговѣ́нїе, стыдѣ́нїе, ᲂу҆срамле́нїе, раска́ѧнїе, ᲂу҆дале́нїе ѿ ѕлы́хъ, покаѧ́нїе, ѡ҆браще́нїе къ бг҃ꙋ, сочетава́нїе хрⷭ҇тꙋ̀, ѿрица́нїе дїа́вола, блюде́нїе за́повѣдей, хране́нїе дꙋшѝ, чистота̀ со́вѣсти, па́мѧть сме́рти, болѣ́знь дꙋшѝ, дѣ́ланїе до́брыхъ, трꙋ́дъ, по́двигъ, пребыва́нїе въ жесто́кихъ, по́стъ, бдѣ́нїе, а҆лка́нїе, жа́жда, малотре́бованїе, самодово́льствїе, благочи́нїе, благоѡбра́зїе, че́стность, безде́рзостїе, презрѣ́нїе и҆мѣ́нїй, несребролю́бїе, ѿверже́нїе жите́йскихъ, подчине́нїе, повинове́нїе, благопослꙋша́нїе, нищета̀, нестѧжа́нїе, ᲂу҆дале́нїе ѿ мі́ра, ѿсѣче́нїе во́ли, ѿверже́нїе себѐ самагѡ̀, совѣ́тованїе, великодꙋ́шїе, ᲂу҆праждне́нїе по бз҃ѣ, безмо́лвїе, наказа́нїе, долꙋлега́нїе, неꙋмове́нїе, предстоѧ́нїе, внима́нїе, сꙋхоѧде́нїе, нагота̀, и҆зможде́нїе тѣ́ла, ᲂу҆едине́нїе, пꙋстынножи́тїе, тишина̀, благодꙋ́шїе, дерзнове́нїе, благодерзнове́нїе, бж҃е́ственнаѧ ре́вность, горе́нїе, предспѣ́ѧнїе, ю҆ро́дство хрⷭ҇та̀ ра́ди, блюде́нїе ᲂу҆ма̀, ᲂу҆строе́нїе нра́вѡвъ, преподо́бїе, дѣ́вство, ѡ҆свѧще́нїе, чистота̀ тѣ́ла, чте́нїе хрⷭ҇та̀ ра́ди, бж҃е́ственное попече́нїе, позна́нїе, ѡ҆бꙋче́нїе, и҆́стина, нелюбопы́тствїе, неѡсꙋжде́нїе, ѡ҆ставле́нїе долгѡ́въ, домострое́нїе, дѣснопрїѧ́тїе, ѻ҆строꙋ́мїе, мѣ́рность, пра́вое ᲂу҆потребле́нїе веще́й, вѣ́жество, быстроꙋ́мїе, и҆скꙋ́сство, ѱалмопѣ́нїе, моли́тва, благодаре́нїе, и҆сповѣ́данїе, мольба̀, колѣнопреклоне́нїе, моле́бствїе, моле́нїе, проше́нїе, застꙋпле́нїе, пѣснопѣ́нїе, славосло́вїе, и҆́сповѣдь, ско́рбь, сѣ́тованїе, рыда́нїе, стена́нїе, пла́канїе, приболѣ́знєнныѧ сле́зы, ᲂу҆миле́нїе, молча́нїе, бж҃е́ственное взыска́нїе, плаче́вный во́пль, безпопече́нїе ѡ҆ все́мъ, неѕло́бїе, нетщесла́вїе, неславолю́бїе, простота̀ дꙋшѝ, сострада́нїе, нелюбопоказа́нїе, благонра́вїе, дѣла̀ по є҆стествꙋ̀, вы́ше є҆стества̀, братолю́бїе, є҆диномы́слїе, ѻ҆бще́нїе по бз҃ѣ, сла́дость, дꙋхо́вное ᲂу҆строе́нїе, ти́хость, пра́вость, непоро́чность, простота̀, благохвале́нїе, благоглаго́ланїе, благодѣ́лїе, предпочита́нїе бли́жнѧгѡ, любы̀ по бз҃ѣ, добродѣ́тельное навыкнове́нїе, ча́стость, вка́чествованїе, благоразꙋ́мїе, смире́нїе, безпристра́стїе, велелѣ́пїе, долготерпѣ́нїе, бла́гость, благосты́нѧ, разсꙋжде́нїе, ᲂу҆добопристꙋ́пность, ᲂу҆добопривѣ́тствїе, несмꙋще́нїе, видѣ́нїе, наставле́нїе, водрꙋже́нїе, прозрѣ́нїе, безстра́стїе, дꙋхо́внаѧ ра́дость, ѡ҆пасе́нїе, сле́зы ра́зꙋма, дꙋше́внаѧ слеза̀, бж҃е́ственное жела́нїе, щедро́та, благоꙋтро́бїе, человѣколю́бїе, чистота̀ дꙋшѝ, чистота̀ ᲂу҆ма̀, прозорли́вость, чи́стаѧ моли́тва, неплѣне́нный по́мыслъ, тве́рдость, ᲂу҆крѣпле́нїе дꙋшѝ и҆ тѣ́ла, просвѣще́нїе, востѧза́нїе дꙋшѝ, ненавидѣ́нїе жи́зни, ᲂу҆че́нїе подоба́ющее, благо́е жела́нїе сме́рти, младе́нчество во хрⷭ҇тѣ̀, ᲂу҆твержде́нїе, ᲂу҆бѣжде́нїе, ᲂу҆вѣща́нїе соразмѣ́рное и҆ непонꙋжде́нное, и҆змѣне́нїе похва́льное, ᲂу҆́жасъ по бз҃ѣ, соверше́нство во хрⷭ҇тѣ̀, нело́жное просїѧ́нїе, бж҃е́ственное раче́нїе, восхище́нїе ᲂу҆ма̀, бж҃їе вселе́нїе, бг҃олю́бїе, внꙋ́треннее любомꙋ́дрїе, бг҃осло́вїе, и҆сповѣ́дничество, презрѣ́нїе сме́рти, ст҃ы́нѧ, и҆справле́нїе, соверше́нное здра́вїе дꙋшѝ, похвала̀ ѿ бг҃а, благода́ть, црⷭ҇тво, сыноположе́нїе, и҆ всѣ́ми вкꙋ́пѣ ск҃и[[Ѱал. п҃а, ст. ѕ҃. І҆ѡа́н. гл. і҃, ст. л҃.]]. Положе́нїемъ же бг҃ꙋ бы́ти человѣ́кꙋ, благода́тїю дарова́вшагѡ на́мъ побѣ́дꙋ на стра̑сти, и҆́хже и҆мена̀ сꙋ́ть сїѧ̑, ꙗ҆́коже мню̀.

И҆з̾ѧвле́нїе страсте́й.

Лю́тость, кова́рство, лꙋка́вство, ѕломꙋдрова́нїе, безслове́сїе, развраще́нїе, прельще́нїе, грꙋ́бость, невѣ́жество, пра́здность, хла́дность, ѡ҆камене́нїе, ласка́тельство, бꙋ́йство, безчи́нный гла́съ, и҆зстꙋпле́нїе смы́слѡвъ, и҆зꙋмле́нїе. неꙋчти́вство, де́рзость, боѧ́знь, ѡ҆жесточе́нїе, пра́здность благи́хъ, согрѣше́нїе, лихои́мство, меншеи́мство, невѣ́дѣнїе, безꙋ́мїе, лжеиме́нный ра́зꙋмъ, забве́нїе, неразсꙋжде́нїе, нечꙋ́вство, непра́вда, ѕло́е произволе́нїе, безсо́вѣстнаѧ дꙋша̀, медле́нїе, блѧдоло́вїе, ѿмета́нїе, прегрѣше́нїе, грѣ́хъ, беззако́нїе, законопрестꙋпле́нїе, стра́сть, плѣне́нїе, лꙋка́вое сложе́нїе, безслове́сное сочета́нїе, бѣсо́вскїй прило́гъ, закоснѣ́нїе, тѣле́сный поко́й внѣ̀ подоба́ющагѡ, ѕло́ба, паде́нїе, недꙋ́гъ дꙋшѝ, безси́лїе, не́мощь ᲂу҆ма̀, нестара́нїе, лѣ́ность, поро́чнаѧ печа́ль, презрѣ́нїе бг҃а, превраще́нїе, престꙋпле́нїе, невѣ́рїе, неꙋдобовѣ́рїе, ѕловѣ́рїе, маловѣ́рїе, є҆́ресь, соедине́нїе съ є҆́ресїю, многобо́жїе, і҆дѡлопокло́нство, невѣ́дѣнїе бг҃а, нече́стїе, волше́бство, назира́нїе, ѡ҆чарова́нїе, ѡ҆баѧ́нїе, ѿверже́нїе, і҆дѡлонеи́стовство, невоздержа́нїе, пространнопита́нїе, славолю́бїе, нерадѣ́нїе, самолю́бїе, невнима́нїе, неꙋспѣ́ѧнїе, пре́лесть, заблꙋжде́нїе, напра́снство, ѿравле́нїе, скве́рность, скверноѧде́нїе, наслажде́нїе, нецѣломꙋ́дрїе, чревобѣ́сїе, си́рѣчь чревоѡб̾ѧде́нїе, блꙋ́дъ, сребролю́бїе, гнѣ́въ, скꙋ́ка, ᲂу҆ны́нїе, тщесла́вїе, го́рдость, мнѣ́нїе, возноше́нїе, киче́нїе, ѡ҆безꙋмле́нїе, стꙋ́дъ, сы́тость, мѧ́гкость, помраче́нїе главы̀ ѿ ві́на, сла́сть, несы́тость, гортанобѣ́сїе, ненасыще́нїе, тайноѧде́нїе, ѡ҆б̾ѧде́нїе, ᲂу҆единенноѧде́нїе, небреже́нїе, ᲂу҆до́бство, самосовѣ́тїе, безсовѣ́тїе, самоꙋго́дїе, человѣкоꙋго́дїе, неискꙋ́сство блага́гѡ, ненаказа́нїе, неѡбꙋче́нїе, ле́гкость разꙋмѣ́нїѧ, проста́чество, нелюди́мость, прекосло́вїе, любопрѣ́нїе, ѕлосло́вїе, во́пль, смꙋще́нїе, ра́ть, ꙗ҆́рость, безслове́снаѧ по́хоть, раз̾ѧре́нїе, раздраже́нїе, собла́знъ, вражда̀, многопы́тство, клевета̀, го́ресть, ѡ҆глаго́ланїе, порица́нїе, ѡ҆болга́нїе, ѡ҆сꙋжде́нїе, ѡ҆бвине́нїе, не́нависть, ᲂу҆кори́зна, досажде́нїе, безче́стїе, свирѣ́пство, неи́стовство, жесто́кость, ѕлѣсплете́нїе, клѧтвопрестꙋпле́нїе, клѧне́нїе, неми́лостынѧ, братоненавидѣ́нїе, нера́вность, ѻ҆тцеꙋбі́йство, матереꙋбі́йство, разрѣше́нїе, разслабле́нїе, даропрїѧ́тїе, татьба̀, хище́нїе, рве́нїе, безѡбра́зїе, за́висть, прѧ̀, посрамле́нїе, рꙋга́нїе, поноше́нїе, подражне́нїе, насмѣѧ́нїе, накꙋ́пльство, наси́лїе, презрѣ́нїе бли́жнѧгѡ, жезлобїе́нїе, порꙋга́нїе, ᲂу҆давле́нїе, задꙋше́нїе, нелюбле́нїе, непримире́нїе, несогла́сїе, безразсꙋ́дность, сꙋро́вость, безстꙋ́дїе, нестыдли́вость, плѣне́нїе помыслѡ́въ, ѡ҆мраче́нїе, слѣпота̀, ѡ҆слѣпле́нїе, пристра́стїе ко вре́мєннымъ, ѡ҆стра́ствованїе, сꙋета̀, непокоре́нїе, ѡ҆тѧгче́нїе главы̀, дрема́нїе дꙋшѝ, многосо́нїе, мечта́нїе, многопитїѐ, пїѧ́нство, непотре́бство, ѡ҆слабле́нїе, безсловє́снаѧ ᲂу҆слаждє́нїѧ, сластолю́бїе, блꙋ́дство, скверносло́вїе, же́нство, разжже́нїе, малакі́ѧ, женопрельще́нїе на блꙋ́дъ, прелюбодѣ́йство, мꙋжело́жство, скотосмѣше́нїе, поро́чность, блꙋжде́нїе, нечистота̀ дꙋшѝ, кровосмѣше́нїе, нечистота̀, ѡ҆скверне́нїе, ча́стное дрꙋ́жество, смѣ́хъ, и҆гра́нїе, плѧса́нїе, плеска́нїе, неподѡ́бныѧ пѣ̑сни, ликова̑нїѧ, свирѧ́нїе, смѣ́лость, многочи́нїе, неподчине́нїе, непостоѧ́нство, поро́чное согла́сїе, навѣ́тъ, бра́нь, ᲂу҆бі́йство, разбо́йничество, свѧтота́тство, скверноприбы́точество, ли́хва, ле́сть, гробокопа́нїе, жестокосе́рдїе, ѕлослы́тїе, ропта́нїе, хꙋла̀, неблагодаре́нїе, ѕлосовѣ́тїе, пренемога́нїе, малодꙋ́шїе, слїѧ́нїе, ло́жь, ѧ҆зыкобо́лїе, сꙋесло́вїе, безслове́снаѧ ра́дость, паре́нїе, безслове́сное дрꙋ́жество, ѕлонра́вїе, пꙋстосло́вїе, бꙋесло́вїе, многосло́вїе, блага́гѡ порица́нїе, скꙋ́пость, ѕло́сть, неблагопрїѧ́тствїе, негодова́нїе, многостѧжа́нїе, ѕлопомнѣ́нїе, ѕлоꙋпотребле́нїе, ѕлонавыкнове́нїе, жизнолю́бїе, проде́рзость, надмѣ́нїе, любонача́льствїе, лицемѣ́рїе, подсмѣѧ́нїе, проны́рство, смѣхотво́рство, побѣжде́нїе, раче́нїе сатанино̀, любопы́тство, прираже́нїе, безстра́шїе бж҃їе, непослꙋша́нїе, неразꙋ́мїе, высокоꙋ́мїе, хвале́нїе, напыще́нїе, ᲂу҆ничиже́нїе бли́жнѧгѡ, немилосе́рдїе, непоболѣ́нїе, нераче́нїе, безнаде́ждїе, бг҃оненави́стїе, ѿча́ѧнїе, самоꙋбі́йство, и҆ всѣ́ми ѿпаде́нїе ѿ бг҃а и҆ соверше́ннаѧ поги́бель: вкꙋ́пѣ сїѧ̑ сч҃и. Сїѧ̀ ᲂу҆́бѡ стра̑сти нарица̑емыѧ въ бж҃е́ственныхъ писа́нїѧхъ ѡ҆брѣто́хъ, и҆ вкꙋ́пѣ положи́хъ, ꙗ҆́коже и҆ кни́ги въ нача́лѣ сло́ва: по чи́нꙋ же нижѐ возмого́хъ, нижѐ покꙋси́хсѧ расположи́ти, ꙗ҆́кѡ па́че менѐ сꙋ́ща, по словесѝ лѣ́ствичника: пои́щеши въ ѕлы́хъ вѣ́дѣнїѧ, глаго́летъ, и҆ не ѡ҆брѧ́щеши, ꙗ҆́кѡ безчи́нна сꙋ́ть всѧ̑ бѣсѡ́вскаѧ, є҆ди́но и҆ то́жде намѣ́ренїе и҆́мꙋтъ, въ не́мже и҆ ра́внїи сꙋ́ть нера́внїи и҆ непреподо́бнїи, во є҆́же погꙋби́ти дꙋ́шы прїе́млющихъ ѕлѣ́йшїй и҆́хъ совѣ́тъ. А҆́ще дрꙋги̑мъ нѣ̑кїимъ человѣ́кѡмъ быва́ютъ и҆ вѣнцє́въ вино́вни, внегда̀ побѣжда́еми быва́ютъ вѣ́рою и҆ терпѣ́нїемъ ᲂу҆пова́ющихъ на гдⷭ҇а, и҆ дѣ́ланїемъ до́брыхъ и҆ сопротивле́нїемъ помыслѡ́въ, противоборю́щихсѧ и҆ молѧ́щихсѧ на ни́хъ.

Ѡ҆ разли́чїи помыслѡ́въ и҆ прило́гѡвъ.

Поне́же по́мыслы разли́чїѧ и҆́мꙋтъ во все́мъ, и҆ ѻ҆́вїи ᲂу҆́бѡ безгрѣ́шнїи сꙋ́ть, ѻ҆́вїи же не ᲂу҆̀, ꙗ҆́коже нарица́емый прило́гъ, си́рѣчь помышле́нїе до́брагѡ и҆лѝ ѕла́гѡ, нижѐ воздаѧ́нїѧ, нижѐ ѡ҆сꙋжде́нїѧ и҆́мать. Посе́мъ глаго́лемое сочета́нїе, то́ є҆сть бесѣ́дованїе по́мысла и҆лѝ къ согла́сїю, и҆лѝ къ ѿверже́нїю: и҆́мать ᲂу҆́бѡ и҆ похвалꙋ̀, а҆́ще бг҃оꙋго́дно бꙋ́детъ, но ма́лꙋ а҆́ки и҆ ᲂу҆кори́знꙋ, є҆гда̀ лꙋка́во бꙋ́детъ. Пото́мъ глаго́лемое боре́нїе, и҆лѝ побѣжда́ющее, и҆лѝ ѿ ᲂу҆ма̀ побѣжда́емое, и҆ вѣнца̀ и҆лѝ мꙋ́ки вино́вно быва́ющее, є҆гда̀ на дѣ́ло дости́гнетъ. Подо́бнѣ же и҆ сосложе́нїе, є҆́же є҆́сть сла́стное приклоне́нїе дꙋшѝ къ ꙗ҆́вльшемꙋсѧ, ѿ негѡ́же быва́етъ плѣне́нїе, ѿводѧ́щее нꙋ́ждею и҆ нево́льнѣ се́рдце къ дѣѧ́нїю. Внегда́ же надо́лзѣ стра́стный по́мыслъ ᲂу҆коснѣва́етъ въ се́рдцѣ, быва́етъ глаго́лемаѧ стра́сть, ꙗ҆́коже на́выкомъ къ себѣ̀ самопроизво́льнѡ влекꙋ́ща дꙋ́шꙋ: и҆ сво́йственнѣ пребѣга́ющꙋ къ дѣѧ́нїю содѣ́ловаетъ. Такова́ѧ стра́сть несомнѣ́ннѡ во все́мъ, и҆лѝ соразмѣ́рнꙋ покаѧ́нїю, и҆лѝ бꙋ́дꙋщей мꙋ́кѣ подлежи́тъ, глаго́летъ лѣ́ствичникъ, си́рѣчь непокаѧ́нїѧ ра́ди, а҆ не бра́ни: а҆́ще бо бы̀ сїѐ бы́ло, не бы̀ без̾ соверше́ннагѡ безстра́стїѧ ѿпꙋще́нїе мно́зи прїѧ́ти возмоглѝ. Ꙗ҆́коже то́йже речѐ лѣ́ствичникъ, ꙗ҆́кѡ не всѣ̑мъ ᲂу҆́бѡ безстра̑стнымъ бы́ти мо́щно: всѣ̑мъ же спасти́сѧ и҆ съ бг҃омъ примири́тисѧ не невозмо́жно. Разꙋ́мный бо матероѕло́бный и҆ лꙋка́вый прило́гъ ѿме́щетъ, да всѧ̑ ѿ негѡ̀ лю̑таѧ є҆ди́ною ѿсѣче́тъ благі́й же прило́гъ при́снѡ дѣ́ланїе и҆́мать гото́во, да тѣ́ло и҆ дꙋша̀ въ навыкнове́нїи добродѣ́тели бꙋ́дꙋтъ, и҆ ѿ страсте́й и҆зба́вѧтсѧ благода́тїю хрⷭ҇то́вою: занѐ ѿню́дъ не и҆́мамы что̀, є҆́же не прїѧ́хомъ ѿ негѡ̀, нижѐ что̀ принестѝ є҆мꙋ̀ мо́жемъ, ра́звѣ то́чїю произволе́нїе, є҆гѡ́же не и҆мꙋ́ще, нижѐ ра́зꙋмъ, нижѐ си́лꙋ къ дѣ́ланїю блага́гѡ ѡ҆брѣта́емъ. И҆ сїѐ чл҃вѣколю́бїѧ бж҃їѧ є҆́сть дѣ́ло, да не ѡ҆сꙋ́димсѧ ꙗ҆́кѡ пра́здни: пра́здность бо є҆́сть нача́ло всѧ́кїѧ ѕло́бы[[Сїра́х. гл. л҃г, ст. к҃и.]]. Не то́чїю же, но и҆ са́мо то̀ дѣ́ланїе бл҃га́гѡ, глаго́летъ въ ста́рчествѣ, тре́бꙋетъ разсꙋжде́нїѧ. И҆́бо дѣ́ва постѧ́щаѧсѧ седми́цъ ше́сть, и҆ при́снѡ ве́тхомꙋ и҆ но́вомꙋ писа́нїѧмъ поꙋча́ющаѧсѧ, не и҆мѣ̀ подо́бнѣ ско́рбныхъ и҆ сла́достныхъ дѣ́лъ, а҆́ще и҆ подоба́ше є҆́й ѿ толи́кихъ трꙋдѡ́въ безстра́стїѧ плоды̀ собра́ти: но не бѣ̀: занѐ благо́е не є҆́сть бла́го, а҆́ще не по бж҃їю хотѣ́нїю и҆́мать намѣ́ренїе. Поне́же ѡ҆брѣта́етсѧ въ бж҃е́ственномъ писа́нїи мно́гажды ѡ҆ нѣ́кїихъ дѣла́хъ негодꙋ́ѧй бг҃ъ на творѧ́щаго дѣ́ло, всѣ̑мъ ꙗ҆влѧ́ющеесѧ бла́го, и҆ напроти́въ прїе́млющїй и҆но́го ви́дѧщасѧ ѕлотво́рца. И҆ свидѣ́тель семꙋ̀ ѻ҆́ный проро́къ, и҆́же и҆ска́ше ѿ нѣ́коегѡ бїе́нъ бы́ти, и҆ ка́кѡ, глаго́летъ, преслꙋ́шавый, ꙗ҆́кѡ благо́е, си́рѣчь, творѧ́й, ѕвѣ́ремъ снѣде́нъ бы́сть[[г҃ Цар. гл. и҃, ст. л҃є и҆ л҃ѕ.]]. И҆ пе́тръ мнѧ́йсѧ нѣ́что бла́го сотвори́ти, ѿрица́ѧсѧ ᲂу҆мове́нъ бы́ти, возбране́нъ бы́сть[[І҆ѡа́н. гл. г҃і, ст. и҃.]]. Тѣ́мже все́ю си́лою до́лжни є҆смы̀ и҆ска́ти и҆ твори́ти бж҃е́ственнꙋю во́лю, а҆́ще и҆ не мни́тсѧ на́мъ добра̀ бы́ти. Сегѡ̀ ра́ди нижѐ без̾ трꙋда̀ быва́етъ дѣ́ланїе блага́гѡ, да не ѿтщети́мсѧ и҆ сꙋ́щїѧ съ самопроизволе́нїемъ похвалы̀ понꙋжде́нїѧ. И҆ вра́тцѣ всѧ̑, є҆ли́ка стро́итъ бг҃ъ, чꙋдє́сна сꙋ́ть па́че ᲂу҆ма́ же и҆ мы́сли: ꙗ҆́кѡ не то́чїю подоба́етъ диви́тисѧ ᲂу҆мꙋ̀, соверша́ємымъ въ це́ркви правосла́вныхъ, но и҆ сѷмво́ламъ и҆́хъ. Ка́кѡ ст҃ы́мъ креще́нїемъ сы́ны быва́емъ по благода́ти[[І҆ѡа́н. гл. а҃, ст. в҃і. Гал. гл. г҃, ст. к҃ѕ.]], ничто́же пре́жде сегѡ̀ содѣ́лавше, нижѐ па́ки посе́мъ. то́чїю блюде́нїе за́повѣдей. И҆ ка́кѡ стра̑шныѧ ѻ҆́ныѧ вє́щи, глаго́лю же ст҃о́е креще́нїе и҆ ст҃о́е причаще́нїе, без̾ свѧще́нства не быва́ютъ, глаго́летъ бж҃е́ственный златоꙋ́стъ. Въ се́мъ бо ꙗ҆влѧ́етсѧ да́ннаѧ верхо́вномꙋ ѿ а҆по́стѡлъ петрꙋ̀ вла́сть. Занѐ а҆́ще не ѿве́рзꙋтсѧ врата̀ црⷭ҇твїѧ небе́снагѡ свѧщеннодѣ́йствїемъ, никто́же мо́жетъ вни́ти, ꙗ҆́коже глаго́летъ гдⷭ҇ь: а҆́ще кто̀ не роди́тсѧ водо́ю и҆ дх҃омъ[[І҆ѡа́н. гл. г҃, ст. є҃.]]. И҆ па́ки: а҆́ще не снѣ́сте пло́ти сн҃а человѣ́ческагѡ, ни пїе́те кро́ве є҆гѡ̀, живота̀ не и҆́мате въ себѣ̀[[І҆ѡа́н. гл. ѕ҃, ст. н҃г]]. И҆ ка́кѡ бо ве́тхїй хра́мъ внѣꙋ́дꙋ ѡ҆́бразъ мі́ра сегѡ̀, въ не́мже жє́ртвы соверша́хꙋ свѧще́нницы, внꙋ́трь же ᲂу҆́дꙋ ст҃а̑ѧ ст҃ы́хъ, и҆дѣ́же приноша́шесѧ кади́ло ѿ четы́рехъ ви́дѡвъ, лїва́на, глаго́лю, смѵ́рны, ста́кти и҆ касі́и. Ѿ ни́хже ꙗ҆влѧ́ютсѧ четы́ре гла̑вныѧ добродѣ́тєли. Внѣ́ бо быва́ємаѧ, снисхожде́нїе бж҃їе бѣ̀ тогда̀, да не пѣ́сньми и҆ наслажде́нїемъ ᲂу҆клонѧ́тсѧ младенцемꙋ́дреннїи і҆ꙋдє́и ко і҆́дѡлѡмъ. Но́ваѧ же це́рковь є҆́сть ѡ҆́бразъ бꙋ́дꙋщихъ: сегѡ̀ ра́ди и҆ соверша́ємаѧ въ не́й небє́сна сꙋ́ть и҆ дꙋхѡ́вна. Занѐ ꙗ҆́коже де́вѧть чинѡ́въ сꙋ́ть на нб҃сѝ, та́кѡ и҆ въ це́ркви, си́рѣчь, патрїа́рси, митрополі́ти, є҆пі́скопы, свѧще́нницы, дїа́коны, ѵ҆подїа́коны, чтецы̀, пѣвцы̀ и҆ мона́си. И҆ ка́кѡ па́ки начерта́нїемъ честна́гѡ и҆ животворѧ́щагѡ крⷭ҇та̀ прогонѧ́ютсѧ де́мѡни и҆ многоразли̑чныѧ недꙋ́ги. Ве́щь ра́ди всѣ́хъ неижди́вна же и҆ безтрꙋ́дна: похвалы̑ є҆гѡ̀ кто̀ мо́жетъ и҆счи́слити; Всѧ̑ ᲂу҆̀бо речє́ннаѧ ѿ нача́ла сло́ва без̾ пра́выѧ вѣ́ры ничто́же по́льзꙋютъ, но нижѐ быва́ютъ. Ꙗ҆́коже ни вѣ́ра без̾ дѣ́лъ. И҆ ѡ҆ вѣ́рѣ ᲂу҆́бѡ и҆ дѣ́лѣхъ написа́ша мно́зїи ѿ ст҃ы́хъ ѻ҆тє́цъ, а҆́зъ же къ воспомина́нїю рекꙋ̀ вкра́тцѣ, ꙗ҆́кѡ дѣла̀ ᲂу҆́бѡ до́лжни є҆смы̀ и҆мѣ́ти напи̑сана кі́йждо въ свое́мъ чи́нѣ: правосла́внꙋю же вѣ́рꙋ, ю҆́же прїѧ́хомъ ѿ преднапи́санныхъ ст҃ы́хъ, да съ ни́ми ᲂу҆лꙋчи́мъ вѣ̑чнаѧ блага̑ѧ благода́тїю и҆ чл҃вѣколю́бїемъ гдⷭ҇а на́шегѡ і҆и҃са хрⷭ҇та̀, є҆мꙋ́же подоба́етъ всѧ́каѧ сла́ва, че́сть и҆ поклоне́нїе, со безнача́льнымъ є҆гѡ̀ ѻ҆ц҃е́мъ, и҆ съ прест҃ы́мъ и҆ бл҃ги́мъ и҆ животвотворѧ́щимъ є҆гѡ̀ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.