І҆РМОСЫ̀

въ предпра́зднство ст҃ы́хъ бг҃оѧвле́нїй.

Мцⷭ҇а і҆аннꙋа́рїа въ г҃-й де́нь, на повече́рїи трипѣ́снецъ, гла́съ ѕ҃.

Пѣ́снь є҃. і҆рмо́съ: Къ тебѣ̀ ᲂу҆́тренюю, бл҃гоꙋтро́бїѧ ра́ди себѐ и҆стощи́вшемꙋ непрело́жнѡ, и҆ раба̀ рꙋко́ю крести́тисѧ восхотѣ́вшемꙋ, сло́ве бж҃їй, ми́ръ пода́ждь мѝ па́дшемꙋ чл҃вѣколю́бче.

Пѣ́снь и҃: Столпꙋ̀ ѕло́бы лю́тагѡ и҆́рѡда всѝ порꙋга́вшесѧ, на і҆ѻрда́нъ прїиди́те, и҆́демъ вѣ́рнїи, да ᲂу҆́зримъ хрⷭ҇та̀ и҆зба́вителѧ, ѿ прⷣте́чи кр҃ща́емаго пло́тїю во стрꙋѧ́хъ: є҆го́же всѧ̀ тва́рь бл҃гослови́тъ, сла́вѧщи во вѣ́ки.

Пѣ́снь ѳ҃: Чⷭ҇тнѣ́йшꙋю херꙋві̑мъ:

Въ д҃-й де́нь, на повече́рїи канѡ́нъ, гла́съ ѕ҃.

Пѣ́снь а҃. І҆рмо́съ: Сѣ́ченное сѣче́тсѧ:

Пѣ́снь г҃: Гдⷭ҇ь сы́й всѣ́хъ, и҆ зижди́тель бг҃ъ, созда́нное безстра́стный ѡ҆бнища́въ, себѣ̀ соедини́лъ є҆сѝ, и҆ стрꙋѧ́ми и҆́миже хотѣ́лъ є҆сѝ прїитѝ, са́мъ сы́й лю́демъ провозглаша́лъ є҆сѝ: во́дꙋ жи́зни почерпи́те, и҆ вѣ́рою ᲂу҆тверди́тесѧ.

Пѣ́снь д҃: Прови́дѧ прⷪ҇ро́къ та́йны твоеѧ̀ неизрече́нное хрⷭ҇тѐ, провозгласѝ: положи́лъ є҆сѝ крѣ́пкꙋю кр҃ще́нїѧ бл҃года́ть, вѣ́рою сїѐ прїе́млющымъ всѣ̑мъ, во и҆збавле́нїе грѣхѡ́въ.

Пѣ́снь є҃: Сою́зомъ боѧ́зни содержи́мь ны́нѣ прⷣте́ча, ѿрица́етсѧ крести́ти, бл҃гоговѣ́йнѡ хрⷭ҇та̀ ви́дѣвъ на́га стоѧ́ща на водѣ̀, водо́ю покрыва́юща превы́спрєннѧѧ.

Пѣ́снь ѕ҃: Бе́здна послѣ́днѧѧ:

Пѣ́снь з҃: Ѻ҆́троцы въ вавѷлѡ́нѣ:

Пѣ́снь и҃: За зако́ны ѻ҆те́чєскїѧ:

Пѣ́снь ѳ҃: Стра́нствїѧ влⷣчнѧ, и҆ безсме́ртныѧ трапе́зы, во ᲂу҆бо́зѣмъ верте́пѣ пре́жде наслади́вшесѧ, ны́нѣ на і҆ѻрда́нъ теце́мъ, та́йнꙋ зрѧ́ще стра́ннꙋ, го́рнїѧ свѣ́тлости хода́тайственнꙋ.

Въ є҃-й де́нь, на повече́рїи канѡ́нъ, гла́съ ѕ҃.

Пѣ́снь а҃: Волно́ю морско́ю покры́вшаго дре́вле гони́телѧ мꙋчи́телѧ, і҆ѻрда̑нскїѧ стрꙋи̑ спрѧ́товаютъ и҆ кры́ютъ, моѐ ны́нѣ ѡ҆чища́ѧ человѣ́ческимъ ѡ҆чище́нїемъ, сла́внѡ бо просла́висѧ.

Пѣ́снь г҃: Тебѐ на вода́хъ ѡ҆снова́вшаго въ зе́млю неѡдержи́мѡ, тва́рь ви́дѣвши пло́тїю кры́емаго въ вода́хъ, ᲂу҆́жасомъ мно́гимъ содержа́шесѧ, нѣ́сть ст҃ъ па́че тебѐ, гдⷭ҇и, взыва́ющи.

Пѣ́снь д҃: Є҆́же ко креще́нїю твоѐ прише́ствїе, прови́дѧ а҆ввакꙋ́мъ ᲂу҆жа́ссѧ вопїѧ́ше: на мо́ре ко́ни твоѧ̑, во́ды мнѡ́ги наве́лъ є҆сѝ сп҃се, смꙋща́ющыѧ.

Пѣ́снь є҃: Бг҃оѧвле́нїѧ твоегѡ̀ хрⷭ҇тѐ, къ на́мъ млⷭ҇тивнѡ бы́вшагѡ, и҆са́їа свѣ́тъ ви́дѣвъ невече́рнїй, и҆з̾ но́щи ᲂу҆́треневавъ взыва́ше: просвѣще́ннїи прїиди́те, ѡ҆мы́йтесѧ водо́ю бж҃е́ственною, и҆ дх҃омъ ꙗ҆́вѣ и҆ дꙋ́шꙋ и҆ тѣ́ло ѡ҆чи́стите.

Пѣ́снь ѕ҃: Ꙗ҆́тъ бы́сть, но не ᲂу҆держа́нъ стра́хомъ бж҃е́ственный крⷭ҇ти́тель. а҆́ще бо и҆ спрѧ́товаетсѧ прибли́житисѧ ѻ҆гню̀ сѣ́но, но слы́шавъ, ѡ҆ста́ви ны́нѣ, течѐ повелѣ́нїе и҆сполнѧ́ѧ ꙗ҆́кѡ ра́бъ: бж҃е́ственномꙋ же свы́ше свидѣ́тельствꙋющемꙋ гла́сꙋ, ᲂу҆слы́ша сн҃а превѣ́чнаго.

Пѣ́снь з҃: Неизрече́нное чꙋ́до, въ пещѝ и҆зба́вивый прпⷣбныѧ ѻ҆́троки и҆з̾ пла́мене, преклонѧ́етъ ве́рхъ, и҆ про́ситъ кр҃ще́нїѧ ѿ раба̀, ѡ҆чища́ѧ вопїю́щыѧ: и҆зба́вителю бж҃е, бл҃гослове́нъ є҆сѝ.

Пѣ́снь и҃: Оу҆жасни́сѧ боѧ́йсѧ нб҃о, и҆ да подви́жатсѧ ѡ҆снова̑нїѧ землѝ: се́ бо водо́ю ѡ҆блачи́тсѧ, ѡ҆пали́вый водо́ю пре́жде првⷣнагѡ же́ртвꙋ пресла́внѡ: є҆го́же ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.

Пѣ́снь ѳ҃: Не рыда́йте всꙋ́е, ѿча́ѧнїе тенета́ми ᲂу҆давлѧ́еми человѣ́цы, пови́ннїи ѕлы́хъ: но во ᲂу҆миле́нїи дꙋшѝ пристꙋ́пимъ ѡ҆чища́ющемꙋ всѧ̑, ꙗ҆́кѡ є҆ди́номꙋ чи́стомꙋ и҆ даю́щемꙋ проще́нїе кр҃ще́нїемъ.