МЦⷭ҇А ТОГО́ЖЕ ВЪ Ѕ҃ ДН҃Ь

и҆́же во ст҃ы́хъ ѻ҆ц҃а на́шегѡ нико́лы , а҆рхїєпⷭ҇кпа мирликі́йскихъ чꙋдᲂтво́рца . =На ма́лѣй вече́рни , на гдⷭ҇и вᲂзва́хъ , стихѣ́ры . гла́съ , д҃ . поⷣ . ꙗ҆́кѡ до́блѧ . Ми́рᲂмъ бжⷭ҇твенымъ ,꙳ пᲂма́за тѧ бжⷭ҇твена бл҃гᲂда́ть дх҃о́внаѧ ,꙳ ми́рѧнᲂмъ первᲂпресто́льника ,꙳ ѡ҆бл҃гᲂꙋха́юща ми́рꙋ кᲂнцы̀ ,꙳ сщ҃е́ннѣйшими сѝ дᲂбрᲂдѣ́тельми .꙳ бг҃ᲂпрїѧ́тными же мл҃твами ,꙳ ѕлᲂсмра́дныѧ прᲂгᲂнѧ́ща стрⷭ҇ти всегда̀ . сегѡ̀ ра́ди тѧ вѣ́рнѡ сла́вимъ ,꙳ и҆ бл҃гᲂда́ть твᲂю̀ пᲂчита́емъ ст҃е нико́лае . =двⷤа . Ꙗ҆́кѡ свѣщꙋ́ тѧ не ᲂу҆гаси́мꙋю ,꙳ и҆ свѣти́льника всеми́рнаго ,꙳ на тве́рди вᲂсїѧ́вша цр҃ко́внѣй ,꙳ нико́лае сла́вне ,꙳ и҆ ми́ръ прᲂсвѣща́юща ,꙳ и҆ бѣ́дъ лю́тыхъ мглꙋ̀ ѿгᲂнѧ́ща ,꙳ и҆ и҆зима́юща печа́лей зимы̀ ,꙳ и҆ тишинꙋ̀ сᲂдѣ́лᲂвающа глꙋбᲂкꙋ̀ ,꙳ по́ дᲂлгꙋ ᲂу҆блажа́емъ . Пресла́внᲂе житїѐ твᲂѐ ,꙳ всю́дꙋ преди́вна тѧ пᲂказа̀ ,꙳ бг҃ᲂмꙋ́дре ѻ҆́ч҃е сщ҃е́ннѣйшїи ,꙳ ст҃лемъ бл҃гᲂлѣ́пїе ,꙳ прпⷣбнымъ ᲂу҆краше́нїе .꙳ и҆ ꙗ҆́кѡ сл҃нце на землѝ лꙋчѝ распрᲂсте́ръ ,꙳ ѡ҆зари́лъ є҆сѝ вѣ́рныхъ сердца̀ ,꙳ сᲂверша́ющихъ свѣтᲂно́снꙋю твᲂю̀ и҆ бжⷭ҇твенꙋю па́мѧть ,꙳ всебл҃же́нне нико́лае .

сла́ва . гла́съ , и҃ . До́блестей твᲂи́хъ прпⷣбне ѻ҆́ч҃е плᲂды̀ , прᲂсвѣти́лъ є҆сѝ вѣ́рныхъ срⷣца̀ . кто́ бо слы́ша без̾мѣ́рнᲂе твᲂѐ смире́нїе и҆ терпѣ́нїе не ᲂу҆диви́тсѧ , и҆ є҆́же к̾ ни́щимъ ти́хᲂсть , къ скᲂрбѧ́щимъ ᲂу҆тѣше́нїе , всѧ̀ бл҃гᲂлѣ́пнѡ наꙋчи́лъ є҆сѝ ст҃лю нико́лае . и҆ ны́нѣ не ᲂу҆вѧда́емымъ вѣнце́мъ ᲂу҆вѧзе́сѧ . мᲂли́сѧ ѡ҆ дш҃а́хъ на́шихъ .

и҆ ны́нѣ . гла́съ , то́йже . Вѣ́рᲂю притека́ю къ пᲂкро́вꙋ твᲂемꙋ̀ , бг҃ᲂрᲂди́тельнице чи́стаѧ , напа́стей и҆ бѣ́дъ , и҆ страстна́гѡ слїѧ́нїѧ , и҆ бѣсо́вскагѡ ѡ҆ѕлᲂбле́нїѧ , ꙗ҆́кѡ млⷭ҇ти и҆мѣ́ѧ пꙋчи́нꙋ , и҆ спасе́нїѧ ꙗ҆́вльшисѧ хᲂда́таица , и҆ спаси́ мѧ влⷣчце , ꙗ҆́же бг҃а ро́ждьши ми́лᲂстивагѡ , є҆ди́нагѡ всеще́драгѡ , и҆ мнᲂгᲂбл҃гᲂꙋтро́бнагѡ . =прᲂки́менъ , дню̀ . =

На стихо́внѣ , стихѣ́ры . гла́съ , в҃ . поⷣ . до́ме є҆вфра́фᲂвъ . Ꙗ҆́кᲂже пре́жде и҆зба́ви ,꙳ ѻ҆́ч҃е вᲂево́ды ,꙳ ᲂу҆́мрети хᲂтѧ́щїѧ ,꙳ мᲂльба́ми свᲂи́ми .꙳ и҆ ны́нѣ та́кᲂже и҆ на́съ спасѝ .

сти́хъ : честна̀ пре́д̾ гдⷭ҇емъ ,꙳ сме́рть прⷣпбныхъ є҆гѡ̀ . И҆́же вѣ́рᲂю и҆ любо́вїю ,꙳ призыва́ющїѧ ,꙳ и҆ пᲂю́щїѧ тѧ ,꙳ всебл҃же́нне ст҃лю ,꙳ и҆зба́ви бѣ́дъ и҆ печа́лей .

сти́хъ : бл҃же́нъ мꙋ́жъ бᲂѧ́исѧ гдⷭ҇а ,꙳ въ за́пᲂведѣхъ є҆гѡ̀ вᲂсхо́щетъ ѕѣлѡ̀ . Гла́да и҆ гꙋби́тельства ,꙳ трꙋ́са и҆ всѧ́кїѧ нꙋ́жды ,꙳ свᲂбᲂдѝ рабы̀ свᲂѧ̀ ,꙳ ст҃лю ,꙳ премꙋ́дре нико́лае .

сла́ва . гла́съ , в҃ . Пра́вило вѣ́рѣ и҆ ѻ҆́бразъ кро́тᲂсти , ꙗ҆вѝ тебѐ ста́дꙋ свᲂемꙋ̀ хрⷭ҇то́съ бг҃ъ , ст҃лю нико́лае . в̾ ми́рѣхъ ᲂу҆́бѡ бл҃гᲂꙋха́ющꙋ тѝ , всю́дꙋ сїѧ́ютъ свѣ́тлѡ бжⷭ҇твенаѧ твᲂѧ̀ и҆справле́нїѧ , си́рымъ и҆ вдᲂви́цамъ пᲂмо́щниче . тѣ́мже мᲂли́сѧ непреста́ннѡ , спастѝ дш҃а на́ша . и҆ ны́нѣ . гла́съ , то́йже . На тѧ̀ ᲂу҆пᲂва́нїе бцⷣе вᲂз̾лᲂжи́хᲂмъ , ча́ѧнїѧ да не ѿпаде́мъ . спаси́ ны ѿ напа́стей не и҆мꙋ́щихъ по́мᲂщи , и҆ прᲂти́вныхъ сᲂвѣ́ты разᲂрѝ . ты́ бо є҆сѝ спасе́нїе на́мъ бл҃гᲂслᲂве́наѧ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , д҃ . Пра́вило вѣ́рѣ , и҆ ѻ҆́бразъ кро́тᲂсти , вᲂз̾держа́нїю ᲂу҆чи́телѧ ꙗ҆ви́ тѧ гдⷭ҇ь ста́дꙋ свᲂемꙋ̀ , ꙗ҆́же веще́мъ и҆́стина . сегѡ̀ ра́ди стѧжа́въ смире́нїемъ высо́каѧ , нището́ю бᲂга́таѧ , ѻ҆́ч҃е на́шъ ст҃лю нико́лае , мᲂлѝ хрⷭ҇та̀ бг҃а спасти́сѧ дш҃а́мъ на́шимъ . сла́ва , и҆ ны́нѣ , боⷢ҇ . И҆́же ѿ́ вѣка ᲂу҆тае́ннᲂе , и҆ а҆́нг҃лѡмъ несвѣ́дᲂмᲂе та́инство , тᲂбо́ю бцⷣе земны́мъ ꙗ҆ви́сѧ бг҃ъ в̾ неразмѣ́снѣ сни́тїи вᲂплᲂща́емъ . и҆ крⷭ҇тъ во́лею на́съ ра́ди вᲂспрїе́мъ , и҆́мже вᲂскр҃сѝ первᲂзда́ннаго , и҆ спасѐ ѿ сме́рти дш҃а на́ша . та́же , є҆ктенїѧ̀ ма́лаѧ . и҆ ѿпꙋ́стъ .

На вели́цѣй вече́рни , блаже́нъ мꙋ́жь , а҃ , а҆нтифо́нъ . =На гдⷭ҇и вᲂзва́хъ , стихѣ́ры , на и҃ . гла́съ , в҃ . поⷣ . є҆гда̀ ѿ́ древа . Въ ми́рѣхъ пᲂжи́въ тѣле́снѡ , мѵ́ро вᲂи́стинꙋ ꙗ҆ви́сѧ . мѵ́рᲂмъ пᲂма́завсѧ разꙋ́мнымъ , ст҃е нико́лае ст҃лю хрⷭ҇то́въ . и҆ бл҃гᲂꙋха́еши ли́ца , и҆́же вѣ́рᲂю и҆ любо́вїю твᲂю̀ всесла́внꙋю па́мѧть твᲂрѧ́щихъ прⷭ҇нѡ , разрѣша́ѧ бѣ́дъ и҆ напа́стей и҆ скᲂрбе́й всѣ́хъ ѻ҆́ч҃е , и҆́же к̾ бг҃ꙋ твᲂи́ми мл҃твами . =двⷤа . Пᲂбѣ́дѣ тезᲂимени́тъ вᲂи́стинꙋ , вѣ́рнымъ лю́демъ ꙗ҆ви́сѧ въ напа́стѣхъ крѣ́пᲂкъ , ст҃е нико́лае , ст҃лю хрⷭ҇то́въ . вездѣ́ бо призыва́емь бы́стрѡ пред̾варѧ́еши , любо́вїю притека́ющихъ пᲂд̾ кро́въ тво́й . ты́ бо во́ дне и҆ в̾ нᲂщѝ вѣ́рнымъ ꙗ҆влѧ́ѧсѧ , спаса́еши ѿ напа́стей и҆ ѡ҆бстᲂѧ́нїи . Ꙗ҆ви́сѧ кᲂнстанти́нꙋ цр҃ю , и҆ а҆вла́вїю во снѣ̀ , и҆ си́хъ в̾ стра́хъ влᲂжи́въ , си́це тѣ́мъ ре́клъ є҆сѝ , разрѣши́те ᲂу҆́бѡ вско́рѣ , и҆́хже держитѐ свѧ́заны в̾ темни́цѣ . непᲂви́нни бо сꙋ́ть без̾зако́ннагѡ закᲂле́нїѧ . ѡ҆ба́че а҆́ще преслꙋ́шаете менѐ , мᲂльбꙋ̀ сᲂтвᲂрю̀ цр҃ю на тѧ̀ , ко́ гдⷭ҇ꙋ мᲂлѧ́сѧ . и҆́ны , стихѣ́ры . гла́съ , то́йже . Кі́ими пᲂхва́льными вѣнцы̀ , вѣнча́емъ ст҃лѧ , и҆́же пло́тїю в̾ ми́рѣхъ сꙋ́ща , и҆ дх҃о́внѡ всѣ́мъ дᲂстиза́юща , и҆́же чи́стѣ тᲂгѡ̀ лю́бѧщимъ . всѣ́мъ пред̾ста́телѧ и҆ застꙋ́пника , и҆ всѣ́мъ скᲂрбны́мъ ᲂу҆тѣ́шителѧ . бл҃гᲂче́стїѧ стᲂлпа̀ , вѣ́рнымъ пᲂбо́рника . є҆го́же ра́ди шата́нїѧ враго́въ хрⷭ҇то́съ низлᲂжѝ , и҆мѣ́ѧи ве́лїю млⷭ҇ть . двⷤа . Ки́ми пѣ́сньми и҆ пѣ́ньми , пᲂхва́лимъ ст҃лѧ ; нече́стїю сᲂпрᲂти́во бᲂрца̀ , и҆ бл҃гᲂче́стїю пᲂбо́рника . цр҃кви первᲂстᲂѧ́телѧ , вели́кагѡ застꙋ́пника и҆ ᲂу҆чи́телѧ . и҆́же всѧ̀ ѕлᲂсла́вныѧ пᲂсрамлѧ́юща . пᲂтреби́телѧ а҆́рїева , и҆ тᲂгѡ̀ пᲂсо́бникѡвъ . є҆го́же ра́ди си́хъ шата́нїе хрⷭ҇то́съ низлᲂжѝ , и҆мѣ́ѧи ве́лїю ми́лᲂсть . Ки́ми прᲂро́ческими пѣ́сньми , пᲂхва́лимъ ст҃лѧ ; и҆́же да́льнаѧ сꙋ́ща прᲂви́дѧща , и҆ ѿстᲂѧ́щаѧ ꙗ҆́кѡ бли́зъ сꙋ́ща , прᲂро́чествꙋюща нело́жнѡ . и҆́же всю̀ вселе́ннꙋю назира́юща , и҆ всѧ̀ ѡ҆би́димыѧ и҆збавлѧ́юща . и҆́же во снѣ̀ ꙗ҆́вльшасѧ цр҃ю бг҃ᲂмꙋ́дрᲂмꙋ , и҆ дре́вле свѧ́занныѧ закᲂле́нїѧ непра́веднагѡ и҆зба́вльша , и҆ да́рꙋюща ве́лїю ми́лᲂсть . сла́ва . гла́съ , ѕ҃ . Ст҃лемъ ᲂу҆дᲂбре́нїе , и҆ ѻ҆ц҃е́мъ сла́вꙋ , и҆сто́чника чꙋде́съ , и҆ вѣ́рнымъ застꙋ́пника вели́ка , сᲂше́дшесѧ ѽ празднᲂлю́бцы , пѣ́снеными пᲂхвала́ми вᲂспᲂе́мъ гл҃юще , ра́дꙋисѧ мѵ́рѧнѡмъ храни́телю , и҆ намѣ́стниче честны́и , и҆ сто́лпе непᲂдви́жимыи . ра́дꙋисѧ свѣти́льниче всесвѣ́тлыи , и҆́же мирскі́ѧ кᲂнцы̀ прᲂсвѣща́ѧ чꙋдесы̀ . ра́дꙋисѧ скᲂрбѧ́щимъ бжⷭ҇твенаѧ ра́дᲂсте , и҆ ѡ҆би́димымъ те́плыи пᲂбо́рниче . и҆ ны́нѣ всебл҃же́нне нико́лае , непреста́й мᲂлѧ́сѧ хрⷭ҇тꙋ̀ бг҃ꙋ , ѡ҆ и҆́же вѣ́рᲂю и҆ любо́вїю чтꙋ́щихъ при́снѡ ра́дᲂстнꙋю , и҆ всепра́зднественꙋю па́мѧть твᲂю̀ .

и҆ нн҃ѣ , боⷢ҇ . Кто̀ тебѐ небл҃жи́тъ прест҃а́ѧ дв҃це ; и҆лѝ кто̀ невᲂспѣва́етъ твᲂегѡ̀ пречи́стагѡ ржⷭ҇тва̀ ; без̾лѣ́тныи бо ѿ ѻ҆ц҃а вᲂзсїѧ́въ сн҃ъ є҆динᲂро́дныи , то́й же ѿ тебѐ чи́стыѧ про́йде , несказа́ннѡ вᲂпло́щьсѧ . є҆стество́мъ бг҃ъ сы́и , и҆ є҆стество́мъ бы́въ чл҃къ на́съ ра́ди . не во двᲂю̀ лицꙋ̀ раздѣлѧ́емъ . но во двᲂю̀ є҆стествꙋ̀ несмѣ́сно пᲂзнава́емъ . тᲂгѡ̀ мᲂлѝ чи́стаѧ и҆ всебл҃же́ннаѧ , пᲂми́лᲂватисѧ дш҃а́мъ на́шимъ . =та́же , вы́хᲂдъ . прᲂки́менъ , дню̀ . =

Ѿ =при́тчей , чте́нїе . =

Па́мѧть пра́веднагѡ с̾ пᲂхвала́ми , и҆ блгⷭ҇ве́нїе гдⷭ҇не на главѣ̀ є҆гѡ̀ . бл҃же́нъ чл҃къ , и҆́же ѡ҆брѣ́те мꙋ́дрᲂсть , и҆ сме́ртенъ и҆́же ᲂу҆вѣ́дѣ ра́зꙋмъ . лꙋ́чше бо сїю̀ кꙋпᲂва́ти , не́жели зла́та и҆ сребра̀ сᲂкро́вища . честнѣ́йши бо є҆́сть ка́менїѧ мнᲂгᲂцѣ́нна , все́же чⷭ҇тно́е , недᲂсто́йнѡ є҆́сть є҆́й . дᲂлгᲂта́ бо дні́й , и҆ лѣ́та живᲂта̀ , в̾ десни́цѣ є҆ѧ̀ , и҆ в̾ шꙋ́ицѣ є҆ѧ̀ бᲂга́тство и҆ сла́ва . ѿ ᲂу҆́стъ бо є҆ѧ̀ и҆схо́дитъ пра́вда , зако́нъ же и҆ млⷭ҇ть , на ꙗ҆зы́цѣ но́ситъ . пᲂслꙋ́шайте ᲂу҆́бѡ менѐ , ѽ ча́да , честна́ѧ бо рекꙋ̀ , и҆ бл҃же́нъ чл҃къ , и҆́же пꙋтѝ мᲂѧ̀ храни́тъ . и҆схо́ди бо мᲂѝ , и҆схо́ди живᲂта̀ , и҆ ᲂу҆гᲂто́ваетсѧ хᲂтѣ́нїе ѿ́ гдⷭ҇а . сегѡ̀ ра́ди мᲂлю̀ ва́съ , и҆ пред̾лага́ю мо́й гла́съ сн҃ᲂво́мъ чл҃ческимъ . ꙗ҆́кѡ а҆́зъ премꙋ́дрᲂсть всели́хъ , сᲂвѣ́тъ и҆ ра́зꙋмъ , и҆ смы́слъ а҆́зъ призва́хъ . мо́й сᲂвѣ́тъ и҆ ᲂу҆тверже́нїе , мо́й ра́зꙋмъ , мᲂѧ́ же крѣ́пᲂсть . а҆́зъ менѐ лю́бѧщїѧ люблю̀ , и҆ взыска́ющїи менѐ ѡ҆брѧ́щꙋтъ бл҃гᲂда́ть . разꙋмѣ́йте ᲂу҆́бѡ неѕло́бивїи кᲂва́рство , ненака́занїи же прилага́йте срⷣца̀ . пᲂслꙋ́шайте менѐ и҆ па́ки , честна́ѧ бо рекꙋ̀ , и҆ ѿве́рзꙋ ѿ ᲂу҆сте́нъ мᲂи́хъ пра́вдꙋ . ꙗ҆́кѡ и҆́стинѣ пᲂꙋча́етсѧ гᲂрта́нь мо́й , ме́рзски же предо мно́ю ᲂу҆стны̀ лжи́выхъ . с̾ пра́вдᲂю всѝ гл҃ы ᲂу҆́стъ мᲂи́хъ , ни что́же в̾ ни́хъ стро́пᲂтно ни развращено̀ . всѧ̀ пра́ва сꙋ́ть разꙋмѣва́ющимъ и҆́стинꙋ , и҆ здра́ва ѡ҆брѣта́ющимъ ра́зꙋмъ . наꙋчꙋ́ бо ва́съ и҆́стинѣ , да бꙋ́детъ ѡ҆́ гдⷭ҇ѣ наде́жда ва́ша , и҆ и҆спо́лнитесѧ дх҃а .

Ѿ= при́тчей , чте́нїе . =

=Ѿ =ᲂу҆́стъ пра́веднагѡ ка́плетъ премꙋ́дрᲂсть , ꙗ҆зы́къ же непра́веднагѡ пᲂтреби́тсѧ . ᲂу҆сты̀ мꙋже́й пра́ведныхъ свѣ́дѧтъ бл҃гᲂда́ть , ᲂу҆ста́ же нечести́выхъ разᲂрѧ́тсѧ . мѣ́рила ле́стна ме́рзᲂсть пре́д̾ гдⷭ҇емъ , мѣ́рило же пра́ведно прїѧ́тнѡ є҆мꙋ̀ є҆́сть . и҆дѣ́же а҆́ще вни́детъ дᲂсажде́нїе , тꙋ̀ и҆ бесче́стїе . ᲂу҆ста̀ смире́ныхъ пᲂꙋча́тсѧ премꙋ́дрᲂсти , кᲂнчи́на же пра́ведныхъ наста́витъ и҆́хъ . и҆ пᲂпᲂлзнᲂве́нїе закᲂнᲂпрестꙋ́пникъ плѣни́тъ ѧ҆̀ . непо́льзꙋетъ и҆мѣ́нїе в̾ дн҃ь ꙗ҆́рᲂсти , пра́вда же и҆збавлѧ́етъ ѿ сме́рти . ᲂу҆мира́ѧ пра́ведныи , ѡ҆ставлѧ́етъ пᲂпече́нїе . ме́рзᲂстна же быва́етъ и҆ на́гла нечести́выхъ пᲂги́бель . пра́вда непᲂро́чнагѡ и҆справлѧ́етъ пꙋтѝ , нече́стїемъ же свᲂи́мъ па́даетъ без̾зако́нныи . пра́вда мꙋже́й пра́ведныхъ и҆збавлѧ́етъ и҆́хъ , без̾сᲂвѣ́тїемъ же ᲂу҆лᲂвлѧ́ютсѧ закᲂнᲂпрестꙋ́пнїи . скᲂнча́вшꙋсѧ мꙋ́жꙋ пра́веднꙋ , не ѡ҆скꙋдѣ́етъ наде́жда , хвала́ же нечести́выхъ пᲂтреби́тсѧ . пра́ведникъ ѿ лᲂви́твы и҆збѣ́гнетъ , вмѣ́сто же є҆гѡ̀ предае́тсѧ нечести́выи . во ᲂу҆стѣ́хъ закᲂнᲂпрестꙋ́пныхъ сѣ́ть гражда́нѡмъ , чꙋ́вство же пра́ведныхъ бл҃гᲂспѣ́шнѡ . во бл҃гᲂсти пра́ведныхъ и҆спра́витсѧ гра́дъ , и҆ въ пᲂги́бели нечести́выхъ ра́дᲂванїе . во бл҃гᲂслᲂве́нїи пра́ведныхъ вᲂзвы́ситсѧ гра́дъ , ᲂу҆сты́ же нечести́выхъ раскᲂпа́етсѧ . рꙋга́етсѧ гражда́нѡмъ лише́ныи ра́зꙋма . мꙋ́жь же мꙋ́дръ без̾мо́лвїе во́дитъ .

Ѿ =премꙋ́дрᲂсти сᲂло́мѡни , чте́нїе . =

Пра́ведникъ а҆́ще пᲂсти́гнетъ скᲂнча́тисѧ , в̾ пᲂко́й бꙋ́детъ . ста́рᲂсть бо честна̀ не мнᲂгᲂлѣ́тна ни в̾ числѣ̀ лѣ́тъ и҆счита́етсѧ . сѣди́ны же сꙋ́ть , мꙋ́дрᲂсть челᲂвѣ́кѡмъ . и҆ во́зрастъ ста́рᲂсти , житїѐ нескве́рно . бл҃гᲂꙋго́денъ бг҃ᲂви бы́въ , вᲂз̾лю́бленъ бы́сть . и҆ живы́и пᲂсредѣ̀ грѣ́шникъ , преста́вленъ бы́сть . вᲂсхище́нъ бы́сть , да не ѕло́ба и҆змѣни́тъ ра́зꙋма є҆гѡ̀ , и҆лѝ ле́сть прельсти́тъ дꙋ́шꙋ є҆гѡ̀ . раче́нїе бо ѕло́е , гꙋби́тъ до́браѧ , и҆ паре́нїе по́хᲂти , премѣнѧ́етъ ᲂу҆́мъ неѕло́бивъ . скᲂнча́всѧ в̾ма́лѣ , и҆спо́лни лѣ́та мно́га , ᲂу҆го́дна бо бѣ̀ гдⷭ҇ви дш҃а є҆гѡ̀ . сегѡ̀ ра́ди пᲂтща́сѧ ѿ среды̀ ѕло́бы . лю́дїе же ви́дѣвше и҆ неразꙋмѣ́вше , ни пᲂлᲂжи́ша в̾ пᲂмышле́нїи такᲂва́гѡ , ꙗ҆́кѡ бл҃гᲂда́ть и҆ млⷭ҇ть в̾ прпⷣбныхъ є҆гѡ̀ , и҆ пᲂсѣще́нїе во и҆збра́нныхъ є҆гѡ̀ .

На литі́и , стихѣ́ры . гла́съ , в҃ . Ѻ҆́ч҃е нико́лае , а҆́ще и҆ ми́рскаѧ страна̀ мᲂлчи́тъ , но ми́ръ ве́сь и҆́же тᲂбо́ю прᲂсвѣще́нныи , ми́рныи бл҃гᲂꙋха́нїи , и҆ чꙋде́съ мно́жествᲂмъ , взыва́етъ пᲂхва́льными пѣ́сньми . и҆ спа́сшїисѧ тᲂбо́ю не ѡ҆сꙋжде́ни , с̾сꙋщими в̾ ми́рѣхъ , и҆ мы̀ пᲂю́ще вᲂпїе́мъ , мᲂлѝ спасти́сѧ дш҃а́мъ на́шимъ . гла́съ , д҃ . Ѻ҆́ч҃е нико́лае , прест҃а́гѡ дх҃а мирᲂпᲂло́жница сы́и . ꙗ҆́кѡ в̾ ми́рѣхъ бл҃гᲂꙋха́еши , бжⷭ҇твеными а҆рама́ты . хрⷭ҇то́вымъ бо а҆пⷭ҇лѡмъ пᲂдо́бникъ бы́въ , вселе́ннꙋю ѡ҆бхо́диши слᲂвесы̀ чꙋде́съ твᲂи́хъ . тѣ́мже и҆ да́льнимъ ꙗ҆́кѡ бли́зъ , во снѣ̀ ꙗ҆влѧ́ѧсѧ ѿ сме́рти и҆збавлѧ́еши , и҆́же непра́веднымъ мече́мъ ᲂу҆́мрети хᲂтѧ́щїѧ , спаса́ѧ пресла́внѡ ѿ бѣ́дъ мнѡ́гъ призыва́ющихъ тѧ . тѣ́мже и҆ на́съ ѿ нахᲂдѧ́щихъ лю́тъ свᲂбᲂдѝ , твᲂи́ми мл҃твами .

гла́съ , и҃ . До́блестей твᲂи́хъ препᲂдо́бне ѻ҆́ч҃е плᲂды̀ , прᲂсвѣти́лъ є҆сѝ вѣ́рныхъ срⷣца̀ . кто́ бо слы́ша без̾мѣ́рнᲂе твᲂѐ смире́нїе и҆ терпѣ́нїе не ᲂу҆диви́тсѧ , и҆ є҆́же к̾ ни́щимъ ти́хᲂсть , къ скᲂрбѧ́щимъ ᲂу҆тѣше́нїе , всѧ̀ бл҃гᲂлѣ́пнѡ наꙋчи́лъ є҆сѝ ст҃лю нико́лае . и҆ ны́нѣ не ᲂу҆вѧда́емымъ вѣнце́мъ ᲂу҆вѧзе́сѧ . мᲂли́сѧ ѡ҆ дш҃а́хъ на́шихъ . На хвалꙋ̀ пᲂте́клъ є҆сѝ гдⷭ҇ню нико́лае , во вре́меннѣй жи́зни , и҆ то́й тѧ прᲂсла́ви на нбⷭ҇нѣй и҆́стиннѣй жи́зни . тѣ́мже дерзнᲂве́нїе стѧжа́въ к̾ немꙋ̀ , мᲂлѝ спастѝ дш҃а на́ша .

сла́ва . гла́съ , ѕ҃ . Бл҃гі́и ра́бе вѣ́рныи , дѣ́лателю винᲂгра́да хрⷭ҇то́ва . ты̀ тѧгᲂтꙋ̀ дневнꙋ́ю пᲂне́слъ є҆сѝ , ты̀ да́нныи ти тала́нтъ вᲂз̾расти́лъ є҆сѝ , и҆ по тебѣ̀ прише́дшимъ неревнᲂва́въ . тѣ́мже и҆ врата̀ нбⷭ҇наѧ ѿверзо́шатисѧ . вни́ди в̾ ра́дᲂсть гдⷭ҇а свᲂегѡ̀ , и҆ мᲂлѝ ѡ҆ на́съ , ст҃е нико́лае .

и҆ ны́нѣ , гла́съ , то́йже . По́сланъ бы́сть с̾ нб҃сѐ а҆рха́нг҃лъ гаврїи́лъ , бл҃гᲂвѣсти́ти дв҃ѣй зача́тїе . и҆ прише́дъ в̾ назаре́тъ , пᲂмышлѧ́ше в̾ себѣ̀ , чꙋдесѝ ᲂу҆дивлѧ́ѧсѧ . ѽ ка́кѡ и҆́же в̾ вы́шнихъ непᲂстижи́мъ сы́и , ѿ дв҃ы ражда́етсѧ . и҆мѣ́ѧи престо́лъ нб҃о , и҆ пᲂд̾но́жїе зе́млю , во ᲂу҆тро́бꙋ дв҃чꙋ вмѣща́етсѧ . на́ньже шестᲂкрила́тїи , и҆ мнᲂгᲂѡ҆чи́тїи зрѣ́ти немо́гꙋтъ , сло́вᲂмъ є҆ди́нѣмъ ѿ сеѧ̀ вᲂплᲂти́тисѧ бл҃гᲂи҆зво́ли . бж҃їе є҆́сть сло́во настᲂѧ́щее . что̀ ᲂу҆́бѡ стᲂю̀ , и҆ не гл҃ю дв҃це , ра́дꙋисѧ ѡ҆бра́дᲂваннаѧ гдⷭ҇ь с̾ тᲂбо́ю , ра́дꙋисѧ чи́стаѧ дв҃о , ра́дꙋисѧ невѣ́сто неневѣ́стнаѧ . ра́дꙋисѧ мт҃и живᲂтꙋ̀ , бл҃гᲂслᲂве́нъ пло́дъ чре́ва твᲂегѡ̀ .

На стихо́внѣ , стихѣ́ры . гла́съ , є҃ . поⷣ . ра́дꙋисѧ живᲂно́сныи крⷭ҇те . Ра́дꙋисѧ сщ҃е́ннаѧ главо̀ , чи́стыи дᲂбрᲂдѣ́телей бжⷭ҇твеныи до́ме , чⷭ҇тно́е бжⷭ҇твенагѡ сщ҃е́ньства пра́вило . па́стырю вели́кїи , свѣти́льниче всесвѣ́тлыи , и҆́же пᲂбѣ́ды нᲂсѧ̀ и҆́мѧ . и҆ мᲂлѧ́щимсѧ ми́лᲂстивенъ преклᲂни́тель , ᲂу҆слы́шитель немᲂщны́хъ чꙋ́вствы . и҆зба́вителю гᲂто́выи , и҆ храни́телю спасе́ныи всѣ́мъ , и҆́же вѣ́рᲂю чтꙋ́щимъ всесла́внꙋю па́мѧть твᲂю̀ . хрⷭ҇та̀ мᲂлѝ пребл҃же́нне , низ̾пᲂсла́ти ми́рᲂви ве́лїю млⷭ҇ть .

сти́хъ : честна̀ пре́д̾ гдⷭ҇емъ ,꙳ сме́рть прпⷣбныхъ є҆гѡ̀ . Ра́дꙋисѧ честны́и ᲂу҆́ме , трⷪ҇цѣ чи́стыи сᲂсꙋ́де , сто́лпе цр҃ко́вныи , вѣ́рнымъ ᲂу҆твержде́нїе , пᲂбѣжда́емымъ по́мᲂщь . ѕвѣздо̀ , и҆́же сїѧ́нїи бг҃ᲂпрїѧ́тныхъ ти мл҃твъ , разᲂрѧ́ѧ напа́стей же и҆ ско́рбей тмꙋ̀ всегда̀ нико́лае . приста́нище ти́хᲂе , в̾ не́же притека́юще , и҆́же тревᲂлне́нїѧ житїѧ̀ ѡ҆держи́мїи спаса́ютсѧ . хрⷭ҇та̀ мᲂлѝ , дш҃а́мъ на́шимъ да́ти ве́лїю млⷭ҇ть .

сти́хъ : сщ҃е́нницы твᲂѝ ѡ҆блекꙋ́тсѧ в̾ пра́вдꙋ ,꙳ и҆ прпⷣбнїи твᲂѝ вᲂзра́дꙋютсѧ . Ра́дꙋисѧ и҆́же ре́внᲂсти бжⷭ҇твеныѧ и҆спо́лнисѧ . и҆ наведе́нїѧ ѕла̀ и҆зба́вль , непра́веднѡ хᲂтѧ́щихъ ᲂу҆́мрети , пред̾ста́нїемъ стра́шнымъ и҆ сна̀ запреще́ньми . и҆сто́чниче , и҆стᲂча́ѧи в̾ ми́рѣхъ нико́лае мѵ́ро бᲂга́тнѡ , дꙋ́ши напаѧ́ющи , смра́дныѧ же стра́сти ѿгᲂнѧ́щи . ме́чь , и҆́же пле́велы пре́лести пᲂсѣка́ѧ . лᲂпа́та , развѣва́ющи а҆́рїева пле́велнаѧ ᲂу҆че́нїѧ . хрⷭ҇та̀ мᲂлѝ , низ̾пᲂсла́ти дш҃а́мъ на́шимъ ве́лїю млⷭ҇ть .

сла́ва . гла́съ , ѕ҃ . Чл҃че бж҃їи , вѣ́рныи ра́бе , слꙋго̀ гдⷭ҇нь , мꙋ́жꙋ жела́нїи , сᲂсꙋ́де и҆збра́нныи , сто́лпе и҆ ᲂу҆тверже́нїе цр҃кви , црⷭ҇твїю наслѣ́дниче , непремᲂлчѝ вᲂпїѧ̀ за ны̀ ко́ гдⷭ҇ꙋ . и҆ ны́нѣ , боⷢ҇ . Бцⷣе ты̀ є҆сѝ лᲂза̀ и҆́стиннаѧ , вᲂзрасти́вшаѧ на́мъ пло́дъ живо́тныи , тебѣ̀ мо́лимсѧ , мᲂли́сѧ влчⷣце со ст҃лемъ , пᲂми́лᲂватисѧ дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , ст҃лю , двⷤа . и҆ бцⷣе дв҃о ра́дꙋисѧ , =аⷤ . =

На ᲂу҆́трени , на бг҃ъ гдⷭ҇ь , трᲂпа́рь , ст҃лю , двⷤа . сла́ва , и҆ ны́нѣ , боⷢ҇ , вᲂскрⷭ҇нъ . =По а҃ , стихᲂло́гїи , сѣда́ленъ . гла́съ , а҃ . Въ ми́рѣхъ живы́и тѣ́лᲂмъ ст҃лю , мѵ́рᲂмъ разꙋ́мнѡ дх҃о́внымъ ꙗ҆ви́сѧ пᲂма́занъ ѻ҆́ч҃е нико́лае . тѣ́мже мѵ́ры чꙋде́съ твᲂи́хъ мѵ́ръ ѡ҆бл҃гᲂꙋха́лъ є҆сѝ , мѵ́ро приснᲂтекꙋ́щее прᲂлива́ѧ , и҆́же ми́рными твᲂи́ми бл҃гᲂꙋха́емыми слᲂвесы̀ , и҆ па́мѧтїю твᲂе́ю . =вⷤ . сла́ва , и҆ нн҃ѣ , боⷢ҇ . Всѣ́мъ твᲂрца̀ бг҃а же и҆ сᲂдѣ́телѧ , всенепᲂро́чнаѧ чи́стаѧ дх҃ᲂмъ бжⷭ҇твенымъ в̾ лᲂжесна́хъ заче́нши , и҆ тлѣ́нїѧ крᲂмѣ̀ рᲂдила̀ є҆сѝ . є҆го́же сла́вѧще , тѧ̀ вᲂспѣва́емъ дв҃о , ꙗ҆́кѡ пᲂла́тꙋ , цр҃ѧ всѣ́хъ , и҆ ми́рꙋ застꙋпле́нїе .

По в҃ , стихᲂло́гїи , сѣда́ленъ . гла́съ , и҃ . И҆сто́чникъ чꙋде́съ ѻ҆́ч҃е мꙋ́дре прїе́мъ ѿ́ гдⷭ҇а , всѣ́мъ вѣ́рнымъ и҆стᲂча́еши бл҃же́нне медᲂто́чныѧ во́ды . ꙗ҆́кѡ бо па́стырь сы́и , и҆ прᲂпᲂвѣ́дникъ вѣ́рѣ , и҆́стиннагѡ па́стырѧ слᲂвеса̀ сᲂблю́лъ є҆сѝ . тѣ́мже дерзнᲂве́нїе к̾ немꙋ̀ и҆мѣ́ѧ , чл҃ки спа́слъ є҆сѝ ѿ сме́рти нико́лае . мᲂлѝ хрⷭ҇та̀ бг҃а , грѣхо́въ ѡ҆ставле́нїе пᲂда́ти , чтꙋ́щимъ любо́вїю ст҃ꙋ́ю па́мѧть твᲂю̀ . двⷤа . сла́ва , и҆ ны́нѣ , боⷢ҇ . Въ ка́лъ грѣхо́вныи впадо́хъ , и҆ нѣ́сть мнѣ̀ пᲂстᲂѧ́нїѧ , лю́тѣ пᲂгрꙋзи́ мѧ бꙋ́рѧ сᲂгрѣше́нїй . но ꙗ҆́кѡ ро́ждьши сло́ва є҆ди́нᲂгѡ чл҃кᲂлю́бца , на мѧ̀ раба̀ свᲂегѡ̀ при́зри , и҆ и҆зба́ви мѧ всѧ́кᲂгѡ грѣха̀ , и҆ страсте́й дш҃етлѣ́нныхъ , и҆ всѧ́кᲂгѡ ѡ҆ѕлᲂбле́нїѧ льсти́вагѡ врага̀ , бцⷣе не и҆скꙋсᲂмꙋ́жнаѧ . мᲂлѝ хрⷭ҇та̀ бг҃а грѣхо́въ ѡ҆ставле́нїе пᲂда́ти ми , тѧ́ бо и҆́мамъ наде́жꙋ ра́бъ тво́й .

По пᲂлїєлеѡ́сѣ , сѣда́ленъ . гла́съ , є҃ . Премꙋ́драго ст҃лѧ вᲂсхва́лимъ , ꙗ҆́кѡ те́пла в̾ бѣда́хъ и҆ в̾ ско́рбѣхъ сꙋ́ща ѿ́ бг҃а пᲂмо́щника и҆ застꙋ́пника , всѝ нико́лꙋ вѣ́рнїи бг҃ᲂно́снаго бл҃гᲂче́стнѡ . мо́литбᲂсѧ гдⷭ҇ви , ѡ҆ и҆́же вѣ́рᲂю твᲂрѧ́щихъ и҆ пᲂю́щихъ бжⷭ҇твенꙋю па́мѧть є҆гѡ̀ . двⷤа . сла́ва , и҆ нн҃ѣ , боⷢ҇ . Неи҆скꙋсᲂбра́чнаѧ невѣ́сто при́снѡ дв҃о , со ст҃ли непреста́ннѡ вᲂсхвалѧ́емъ тѧ , ꙗ҆́кѡ тᲂбо́ю на́мъ вели́чїѧ сᲂтвᲂрѝ , сн҃ъ тво́й и҆ бг҃ъ превѣ́чныи ѿ ѻ҆ц҃а . и҆́же в̾ лᲂжесна́хъ твᲂи́хъ вмѣсти́тисѧ и҆зво́ли , да ѿ ле́сти свᲂбᲂди́тъ ро́дъ на́шъ .

степе́нна , д҃ го гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . сщ҃е́нницы твᲂѝ ѡ҆блекꙋ́тсѧ въ пра́вдꙋ , и҆ прпⷣбнїи твᲂѝ вᲂзра́дꙋютсѧ . сти́хъ . въ цр҃квахъ блгⷭ҇ви́те бг҃а гдⷭ҇а , ѿ и҆сто́чникъ і҆и҃левъ . всѧ́ко дыха́нїе . є҆ѵⷢ҇а́лїе , ѿ і҆ѡа́нна . заⷱ҇ , л҃ѕ . ѱало́мъ , н҃ . сла́ва . мл҃твъ ра́ди ст҃лѧ , млⷭ҇тиве ѡ҆чи́сти мно́жество сᲂгрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество сᲂгрѣше́нїи на́шихъ .

Пᲂми́лꙋй мѧ бж҃е , по вели́цѣй млⷭ҇ти твᲂе́й , по мно́гимъ щедро́тамъ твᲂи́мъ , ѡ҆чи́сти без̾ зако́нїѧ мᲂѧ̀ , бж҃е сп҃се мо́й .

стихѣ́ра . гла́съ , ѕ҃ . Наслѣ́дниче бж҃їи сᲂприча́стниче хрⷭ҇то́въ , слꙋго̀ гдⷭ҇нь ст҃е нико́лае , по и҆́мени твᲂемꙋ̀ та́кѡ и҆ житїѐ твᲂѐ . прᲂсїѧ́ бо с̾сѣди́нами ра́зꙋмъ . свидѣ́тельствᲂваше свѣ́тлᲂсть лица̀ твᲂегѡ̀ , дш҃е́внᲂе неѕло́бїе . и҆звѣствᲂва́ше кро́тᲂсть , сло́ва мᲂлчали́вᲂе . жи́знь твᲂѧ̀ сла́вна , и҆ ᲂу҆спе́нїе со ст҃ы́ми , мᲂлѝ ѡ҆ дш҃а́хъ на́шихъ .

Кано́нъ , бцⷣѣ . со і҆рмᲂсо́мъ , на́ ѕ҃ . и҆ ст҃о́мꙋ на и҃ . =Кано́нъ , прест҃ѣ́й бцⷣѣ . твᲂре́нїе ѳеѡ́фанᲂвѡ . гла́съ , и҃ . пѣ́снь , а҃ . і҆рмо́съ . Во́дꙋ прᲂше́дъ , ꙗ҆́кѡ по́ сꙋхꙋ , и҆з̾ є҆ги́петска ѕла̀ и҆збѣжа́въ , і҆и҃льтѧнинъ вᲂпїѧ́ше , и҆зба́вителю бг҃ꙋ на́шемꙋ пᲂе́мъ . =запѣ́в̾ : Прест҃а́ѧ гжⷭ҇е бцⷣе спасѝ на́съ . Мно́гими сᲂдержи́мъ напа́стьми , к̾ тебѣ̀ прибѣга́ю спасе́нїѧ и҆скі́й , ѽ мт҃и сло́вꙋ и҆ дв҃о , ѿ лю́тыхъ и҆ нꙋ́жныхъ мѧ спасѝ . Страсте́й мѧ смꙋща́ютъ прило́зи , и҆ мно́гїѧ печа́ли и҆спᲂлнѧ́ютъ ми дш҃ꙋ , ᲂу҆мирѝ ѻ҆трᲂкᲂви́це , тишино́ю сн҃а и҆ бг҃а твᲂегѡ̀ всенепᲂро́чнаѧ . Сп҃са ро́ждьшꙋю тѧ̀ и҆ бг҃а , мᲂлю̀ дв҃це и҆зба́вити мѧ̀ ѿ лю́тъ . к̾ тебѣ́ бо ны́нѣ прибѣга́ю , прᲂстира́ѧ дш҃ꙋ и҆ пᲂмышле́нїе . Въ ско́рби мѧ сꙋ́ща и҆ в̾ тꙋзѣ̀ , пᲂсѣще́нїѧ бжⷭ҇твенагѡ прᲂмышле́нїѧ є҆́же ѿ тебѐ спᲂдо́би , є҆ди́на бг҃ᲂмт҃и ꙗ҆́кѡ бл҃га̀ бл҃го́мꙋ же рᲂди́тельнице .

Кано́нъ , ст҃о́мꙋ . твᲂре́нїе феѡ́ѳанᲂво . гла́съ , в҃ . пѣ́снь , а҃ . і҆рмо́съ . Во глꙋбинѣ̀ пᲂтᲂпѝ дре́вле , фараѡни́тскаѧ всѧ̀ во́инства , преѡрꙋже́нꙋ си́лꙋ . вᲂпло́щшеесѧ сло́во , преспѣ́ющїѧ грѣхѝ пᲂтреби́ло є҆́сть , пресла́вныи гдⷭ҇ь , ꙗ҆́кѡ прᲂсла́висѧ .

запѣ́въ : Ст҃лю хрⷭ҇то́въ нико́лае , мᲂлѝ бг҃а ѡ҆ на́съ . Вѣнцено́сецъ престо́лꙋ хрⷭ҇то́вꙋ , премꙋ́дре нико́лае , пред̾стᲂѧ̀ со а҆́нг҃льскими чи́нми , прᲂсвѣще́нїе мѝ да́рꙋй , ѡ҆зарѧ́ющее дш҃и мᲂеѧ̀ ѡ҆мраче́нїе , ꙗ҆́кѡ да вᲂсхвалю̀ ра́дꙋѧсѧ твᲂю̀ пребл҃же́нне па́мѧть . вⷤ . Прᲂславлѧ́ѧи всѧ̀ гдⷭ҇ь , и҆́же тᲂгѡ̀ сла́вѧщїѧ , тѧ̀ вѣ́рнымъ прибѣ́жище да́лъ є҆́сть , напа́стей и҆ бѣ́дъ и҆збавлѧ́юща , притека́ющїѧ к̾ твᲂемꙋ̀ кро́вꙋ нико́лае , и҆ призыва́ющїѧ тѧ , вѣ́рᲂю и҆ любо́вїю пресла́вне . боⷢ҇ . И҆зравни́тисѧ жела́нїе мѝ вло́жь , ѕмі́й вселꙋка́выи сᲂдѣ́телю , ꙗ҆́кѡ плѣ́нника вᲂсхи́ти . тᲂбо́ю же пречⷭ҇таѧ при́званъ бы́хъ , ѡ҆бᲂжи́всѧ и҆́стиннѡ . ты́ бо ѽ бг҃ᲂмт҃и , и҆́же менѐ ѡ҆бᲂжи́вшаго рᲂдила̀ є҆сѝ .

Дрꙋгі́и кано́нъ , по а҆лфави́тꙋ . гла́съ , а҃ . і҆рмо́съ . Хрⷭ҇то́съ ражда́етсѧ . запѣ́въ : Ст҃лю хрⷭ҇то́въ нико́лае , мᲂлѝ бг҃а ѡ҆ на́съ . Недᲂꙋмѣ́ннымъ ꙗ҆зы́кᲂмъ и҆ ᲂу҆стна́ми , пᲂхвале́нїе ма́лᲂе и҆ мᲂле́нїе принестѝ твᲂемꙋ̀ нико́лае прїидо́хъ , бг҃ᲂпᲂдо́бнᲂмꙋ вели́чїю . но ꙗ҆́кѡ бᲂгатᲂда́вецъ , сп҃са и҆ бг҃а млⷭ҇тива пᲂда́ждь ми . Чл҃къ сы́и нбⷭ҇ныи , равнᲂа҆́нг҃ленъ на землѝ ꙗ҆ви́сѧ . вдᲂви́цамъ застꙋ́пникъ гᲂто́выи , и҆ пᲂбѣжда́емымъ ѿмсти́тель . и҆ всѣ́мъ скᲂрбѧ́щимъ въ бѣда́хъ пᲂмо́щникъ ѻ҆́ч҃е нико́лае . сла́ва . Сказꙋ́етъ всѧ̀ пᲂд̾со́лнечнаѧ нико́лае треблаже́нне , чꙋде́съ твᲂи́хъ и҆ дᲂбрᲂдѣ́телей пꙋчи́нꙋ . ни́щїи пред̾ста́телѧ , и҆ си́рїи и҆ вдᲂви́цы пита́телѧ , и҆ слѣпі́и вᲂжда̀ , вси́ же пᲂбо́рника . =и҆ ны́нѣ , боⷢ҇ . без̾ =сѣ́мене сло́ва заче́нши є҆ди́наго ѿ трⷪ҇цы всенепᲂро́чнаѧ . и҆ сегѡ̀ пло́тїю рᲂдила̀ є҆сѝ , пребы́вши по ржⷭ҇твѣ̀ дв҃а ꙗ҆́кѡ и҆ пре́жде . сегѡ̀ ꙗ҆́кѡ сн҃а свᲂегѡ̀ и҆ бг҃а , ѡ҆ на́съ при́снѡ мᲂлѝ .

катава́сїѧ : Хрⷭ҇то́съ ражда́етсѧ сла́вите . хрⷭ҇то́съ с̾ нб҃сѐ срѧ́щите , хрⷭ҇то́съ на землѝ вᲂз̾нᲂси́тесѧ . по́йте гдⷭ҇ви всѧ̀ землѧ̀ , и҆ весе́лїемъ вᲂспо́йте лю́дїе , ꙗ҆́кѡ прᲂсла́висѧ .

пѣ́снь , г҃ . і҆рмо́съ . Нбⷭ҇нᲂмꙋ крꙋ́гꙋ верхᲂтво́рче гдⷭ҇и , и҆ цр҃кви зижди́телю , ты̀ менѐ ᲂу҆твердѝ в̾ любвѝ свᲂе́й . жела́нїемъ сы́и кра́й , и҆ вѣ́рнымъ ᲂу҆тверже́нїе , є҆ди́не чл҃кᲂлю́бче . Застꙋпле́нїе и҆ пᲂкро́въ жи́зни мᲂе́й , пᲂлᲂжи́хъ тѧ бг҃ᲂрᲂди́тельнице дв҃о , ты̀ менѐ ѡ҆кᲂрмѝ къ приста́нищꙋ свᲂемꙋ̀ , бл҃ги́мъ вино́вна , и҆ вѣ́рнымъ ᲂу҆тверже́нїе , є҆ди́на всепѣ́таѧ . Мᲂлю̀ дв҃це , дш҃е́внᲂе смꙋще́нїе , и҆ печа́ли бꙋ́рю разᲂри́ти ми . ты́ бо бг҃ᲂневѣ́стнаѧ , нача́льника тишинѣ̀ хрⷭ҇та̀ рᲂдила̀ є҆сѝ , є҆ди́на пречи́стаѧ . Бл҃гᲂда́телѧ ро́ждьши до́брымъ вино́внаго , бл҃гᲂдѣѧ́нїѧ бᲂга́тство всѣ́мъ и҆стᲂчѝ . всѧ́ бо мо́жеши , ꙗ҆́кѡ си́льна в̾ крѣ́пᲂсти , хрⷭ҇та̀ ро́ждьши бг҃ᲂбл҃же́ннаѧ . Лю́тыми недꙋ́ги , и҆ бᲂлѣ́знеными стрⷭ҇тьмѝ и҆стѧза́емꙋ , дв҃о ты́ ми пᲂмᲂзѝ , и҆сцѣле́нїемъ бо неѡ҆скꙋ́дно тѧ̀ зна́ю сᲂкро́вище , некра́дᲂмо и҆ неи҆здае́мо .

и҆́нъ , і҆рмо́съ . Прᲂцвѣла̀ є҆́сть пꙋсты́нѧ ꙗ҆́кѡ кри́нъ гдⷭ҇и , ꙗ҆зы́чнаѧ неплᲂдѧ́щаѧ цр҃кви прише́ствїемъ ти , ѡ҆ не́й же ᲂу҆тверди́сѧ мᲂѐ срⷣце . Нико́лае бл҃же́нне , влⷣцѣ при́сныи ᲂу҆чени́къ ты̀ бы́въ , спаса́еши к̾ тебѣ̀ притека́ющїѧ ѿ лю́тыхъ бѣ́дъ и҆ сме́рти го́ркїѧ . вⷤ . Ѡ҆чи́сти рабы̀ свᲂѧ̀ , и҆ грѣхо́въ ѡ҆ставле́нїе ꙗ҆́кѡ бл҃гъ да́рꙋй , нико́лы твᲂегѡ̀ ᲂу҆го́дника , и҆́же к̾ тебѣ̀ хᲂда́тайствы мнᲂгᲂмлⷭ҇тиве . боⷢ҇ . Оу҆ста́ви смꙋще́нїе дш҃и мᲂеѧ̀ пречи́стаѧ , и҆ жи́знь ѡ҆кᲂрмѝ прест҃а́ѧ бг҃а ро́ждьши , ѡ҆ не́мже ᲂу҆тверди́сѧ срⷣце мᲂѐ .

и҆́нъ , і҆рмо́съ . Первᲂвѣ́чнᲂмꙋ ѿ ѻ҆ц҃а . Скрижа́ль в̾ срⷣцы свᲂе́мъ стѧжа́въ бг҃ᲂмꙋ́дре , мно́гихъ дᲂбрᲂдѣ́телей , напи́санꙋ без̾сме́ртнымъ пречⷭ҇тымъ пе́рстᲂмъ , хрⷭ҇та̀ бг҃а нико́лае . па́че ме́да и҆ со́та , сла́дᲂсть и҆стᲂча́еши ѿ ᲂу҆сте́нъ свᲂи́хъ . Пᲂказа́ша бл҃гᲂда́тна тѧ , пресла́внаѧ чꙋдеса̀ нико́лае . и҆ чи́стᲂе житїѐ твᲂѐ , вᲂи́стинꙋ зла́та свѣтлѣ́йши , ѡ҆блиста́еши дш҃а мра́чныѧ , заре́ю бжⷭ҇твенагѡ дх҃а . сла́ва . Жи́въ и҆ по сме́рти во снѣ̀ ꙗ҆́вѣ ꙗ҆влѧ́ѧсѧ , и҆ ю҆́нᲂши ѿ сме́рти пресла́внѡ и҆зба́вивъ . вᲂпїѧ̀ ꙗ҆́вѣ цр҃ю не ѡ҆би́дѣти мꙋже́й , сꙋ́етнᲂю за́вистїю ѡ҆клевета́ни бы́ша . и҆ ны́нѣ , боⷢ҇ . Дае́ши бцⷣе спасе́нїѧ наде́жꙋ рабо́мъ сѝ . и҆ в̾ нꙋ́жныхъ напа́стѣхъ , скᲂрᲂте́чными мᲂльба́ми сᲂблюстѝ , и҆ пᲂмᲂга́ти пред̾ста́ни . ты́ бо є҆сѝ пᲂхвала̀ на́мъ вѣ́рнымъ , при́снѡ дв҃о .

катава́сїѧ : Первᲂвѣ́чнᲂмꙋ ѿ ѻ҆ц҃а рᲂжде́нꙋ нетлѣ́ннѡ сн҃ꙋ , и҆ въ пᲂслѣ́днѧѧ ѿ дв҃ы , вᲂплᲂще́нꙋ без̾ сѣ́мене , хрⷭ҇тꙋ̀ бг҃ꙋ вᲂзᲂпїе́мъ , вᲂз̾дви́гнꙋвыи ро́гъ на́шъ ст҃ъ є҆сѝ гдⷭ҇и .

сѣда́ленъ . гла́съ , и҃ . Вᲂзше́дъ на высᲂтꙋ̀ дᲂбрᲂдѣ́телей , бжⷭ҇твеными ѿ тꙋ́дꙋ ѻ҆́ч҃е , ѡ҆зари́сѧ сїѧ́нїи чꙋде́съ . пресвѣ́телъ вᲂи́стинꙋ ꙗ҆ви́сѧ ми́рᲂви па́стырь , и҆ в̾ напа́стѣхъ сы́и пред̾ста́тель непᲂбѣди́мъ . тѣ́мже пресла́внѡ врага̀ пᲂбѣ́ждь , лжꙋ̀ ѿгна́лъ є҆сѝ , и҆ челᲂвѣ́ки спа́слъ є҆сѝ ѿ сме́рти нико́лае . мᲂлѝ хрⷭ҇та̀ бг҃а грѣхо́въ ѡ҆ставле́нїе дарᲂва́ти , чтꙋ́щимъ любо́вїю ст҃ꙋ́ю па́мѧть твᲂю̀ . два́жды . сла́ва , и҆ ны́нѣ . боⷢ҇ . Ꙗ҆́кѡ дв҃ꙋ є҆ди́нꙋ в̾ жена́хъ тѧ , без̾ сѣ́мене ро́ждьшꙋю бг҃а пло́тїю , всѝ блажи́мъ ро́дᲂве чл҃честїи , ѻ҆́гнь бо в̾ тѧ̀ всели́сѧ бжⷭ҇тва̀ , и҆ ꙗ҆́кѡ младе́нца дᲂи́ши зижди́телѧ и҆ гдⷭ҇а . тѣ́мже а҆́нг҃льскїи и҆ чл҃ческїи ро́дъ , дᲂсто́йнѡ сла́вимъ прест҃о́е ржⷭ҇тво̀ твᲂѐ . и҆ сᲂгла́снѡ вᲂпїе́мъ ти , мᲂлѝ хрⷭ҇та̀ бг҃а , грѣхо́въ ѡ҆ставле́нїе дарᲂва́ти , вᲂспѣва́ющимъ дᲂсто́йнѡ сла́вꙋ твᲂю̀ .

пѣ́снь , д҃ . і҆рмо́съ . Оу҆слы́шахъ гдⷭ҇и смᲂтре́нїѧ твᲂегѡ̀ та́инство , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . Страсте́й мᲂи́хъ смꙋще́нїе , ꙗ҆́же ко́рмчїю ро́ждьши гдⷭ҇а , бꙋ́рю ᲂу҆ти́ши мᲂи́хъ прегрѣше́нїй , бг҃ᲂневѣ́стнаѧ . Милᲂсе́рдїѧ бе́зднꙋ призыва́ющꙋ твᲂю̀ пᲂда́ждь ми , ꙗ҆́же бл҃гᲂсе́рдаго ро́ждьши , и҆ сп҃са всѣ́мъ пᲂю́щимъ тѧ̀ . Наде́жꙋ и҆ ᲂу҆тверже́нїе , и҆ спасе́нїѧ стѣ́нꙋ недви́жимꙋ , стѧжа́вше тѧ̀ всенепᲂро́чнаѧ , ѕлᲂлю́тыхъ всѣ́хъ и҆збавлѧ́емсѧ . На ѻ҆дрѣ̀ бᲂлѣ́зни мᲂеѧ̀ грѣхо́внѣ слежа́ща мѧ̀ , ꙗ҆́кѡ чл҃кᲂлюби́ва , пᲂмᲂзи́ ми бцⷣе мт҃и при́снѡ дв҃о .

и҆́нъ , і҆рмо́съ . Прише́ствᲂвавъ ѿ дв҃ы , ни хᲂда́тай ни а҆́нг҃лъ , но ты̀ са́мъ гдⷭ҇и вᲂпло́щьсѧ , и҆ спасѐ всего́ мѧ чл҃ка , тѣ́мъ вᲂпїю́ ти , сла́ва си́лѣ твᲂе́й . Прибли́жисѧ чи́стѣ зарѧ́мъ дх҃о́внымъ , свѣтᲂно́сецъ бы́лъ є҆сѝ , ми́рꙋ прᲂсвѣща́ѧ кᲂнцы̀ , всѣ́мъ пред̾стᲂѧ̀ , и҆ всѧ̀ спаса́ѧ , вѣ́рᲂю къ тебѣ̀ притека́ющїѧ . И҆збавлѧ́ѧ ѿ сме́рти , ꙗ҆́кᲂже ꙗ҆ви́сѧ нико́лае ю҆́нᲂшы препᲂдо́бне , та́кѡ и҆ нн҃ѣ мѧ спасѝ ѿ всѧ́кагѡ ѡ҆бстᲂѧ́нїѧ , и҆ напа́стей и҆ бѣ́дъ всебл҃же́нне . Ѻ҆блиста́лъ є҆сѝ дᲂбрᲂдѣ́телей сїѧ́нїемъ всебᲂга́те , пᲂдража́тель преи҆зрѧ́денъ свᲂемꙋ̀ влⷣцѣ бы́въ , спаса́еши же призыва́емь , и҆́же бл҃гᲂгᲂвѣ́нїемъ и҆ любо́вїю тѧ сла́вѧщїѧ . боⷢ҇ . На́йде на тѧ̀ влⷣка тва́ри вᲂплᲂща́емъ , и҆ спаса́ѧ ꙗ҆́кѡ милᲂсе́рдъ всего́ мѧ чл҃ка . тѣ́мже вѣ́рнїи бцⷣꙋ тѧ сла́вимъ .

и҆́нъ , і҆рмо́съ . Же́ѕлъ и҆з̾ ко́рене . И҆́мѧ твᲂѐ є҆ди́но вᲂи́стинꙋ призыва́емо , ѿ всѣ́хъ вра́жїихъ сᲂвѣ́тъ , ско́рѡ и҆збавлѧ́етъ зᲂвꙋ́щїѧ тѧ те́плѣ , сщ҃е́нне нико́лае . и҆ ꙗ҆́кᲂже пе́рвѣе во́ины и҆зба́вилъ є҆сѝ , спасѝ и҆ на́съ ѿ всѧ́кᲂгѡ лю́тагѡ ѡ҆бхᲂжде́нїѧ . Прⷭ҇то́лꙋ пред̾стᲂѧ̀ бж҃їю , мᲂли́ти прилѣ́жнѡ мꙋ́дре непреста́й ѡ҆ всѣ́хъ на́съ твᲂи́хъ рабѣ́хъ , чꙋ́дне нико́лае . да ѻ҆гнѧ̀ вѣ́чнагѡ и҆зба́вимсѧ , и҆ ѿ враго́въ , и҆ ꙗ҆зы́ка лꙋка́ва , и҆ ѡ҆ѕлᲂбле́нїѧ . сла́ва . И҆сцѣле́нїѧ то́чиши всю́дꙋ , вѣ́рᲂю к̾ тебѣ̀ притека́ющимъ , и҆ ю҆́зъ и҆збавлѧ́ѧ всѣ́хъ . тѣ́мже печа́ль на́шꙋ в̾ ра́дᲂсть прелᲂжѝ , твᲂи́ми бг҃ᲂпрїѧ́тными мᲂли́твами нико́лае пресвѣ́тле , низлага́ѧ шата́нїе враго́въ на́шихъ . и҆ ны́нѣ , боⷢ҇ . Ты̀ вᲂи́стинꙋ па́че земны́хъ и҆ нбⷭ҇ныхъ чⷭ҇тнѣ́йши , є҆ди́на є҆сѝ бг҃ᲂрᲂди́тельнице . всѣ́хъ бо твᲂрца̀ во ᲂу҆тро́бѣ зачала̀ є҆сѝ , пло́ть ра́бїю вᲂѡ҆бра́знꙋ прїе́мша , и҆ ро́ждьши без̾ сѣ́мене . Ѽ но́во пᲂдо́бїе бг҃ᲂгла́снᲂе .

катава́сїѧ : Же́ѕлъ и҆з̾ ко́рене і҆єссе́ѡва , и҆ цвѣ́тъ ѿ негѡ̀ хрⷭ҇тѐ ѿ дв҃ы прᲂзѧ́блъ є҆сѝ , и҆з̾ гᲂры̀ хва́льныѧ присѣ́нныѧ ча́сты прїи́де вᲂпло́щьсѧ , ѿ без̾мꙋ́жныѧ беспло́тныи бг҃ъ , сла́ва си́лѣ твᲂе́й гдⷭ҇и .

пѣ́снь , є҃ . і҆рмо́съ . Прᲂсвѣтѝ на́съ пᲂвелѣ́нїемъ

сѝ гдⷭ҇и , и҆ мы́шцею высо́кᲂю , твᲂегѡ̀ ми́ра пᲂда́ждь на́мъ , є҆ди́не чл҃кᲂлю́бче . И҆спо́лни чи́стаѧ весе́лїѧ живᲂта̀ на́шегѡ , твᲂю̀ нетлѣ́ннꙋю даю́щи ра́дᲂсть , весе́лїѧ ро́ждьши сꙋ́щагѡ винꙋ̀ . И҆зба́ви на́съ ѿ бѣ́дъ бцⷣе чⷭ҇таѧ , вѣ́чнᲂе ро́ждьши и҆збавле́нїе , и҆ ми́ра всѧ́къ ᲂу҆́мъ преи҆мꙋ́щаго . Разрѣшѝ мглꙋ̀ прегрѣше́нїй мᲂи́хъ бг҃ᲂневѣ́сто , свѣ́тᲂмъ твᲂеѧ̀ свѣ́тлᲂсти , ꙗ҆́же свѣ́тъ ро́ждьшаѧ бжⷭ҇твеный и҆ превѣ́чный . И҆сцѣлѝ чи́стаѧ дш҃и мᲂеѧ̀ немᲂже́нїе , пᲂсѣще́нїемъ сѝ ᲂу҆бѣ́ждьшисѧ , и҆ здра́вїе мᲂльба́ми сѝ пᲂда́ждь мѝ .

и҆́нъ , і҆рмо́съ . Прᲂсвѣще́нїе во тмѣ̀ лежа́щимъ , и҆ спасе́нїе ненача́емымъ хрⷭ҇тѐ сп҃се мо́й , к̾ тебѣ̀ ᲂу҆́треннюю цр҃ю ми́рныи , прᲂсвѣти́ мѧ сїѧ́нїемъ си , и҆но́гѡ бо ра́звѣ тебѐ бг҃а незна́емъ . Бг҃ᲂпᲂдо́бнымъ житїе́мъ требл҃же́нне прᲂсвѣща́емь , ѡ҆сꙋжде́ныѧ непра́веднымъ мече́мъ ᲂу҆́мрети , пред̾ста́въ и҆зба́вилъ є҆сѝ , влⷣцѣ хрⷭ҇тꙋ̀ зᲂвꙋ́щїѧ , и҆но́гѡ ра́звѣ тебѐ бг҃а незна́емъ . вⷤ . На́ нб҃сѣхъ приснᲂсꙋ́щнꙋю сла́вꙋ нн҃ѣ зрѧ̀ , неи҆з̾глаго́ланныѧ бжⷭ҇твеныѧ зарѝ , пресвѣ́тлыми наслажда́ѧсѧ сїѧ́нїи . пᲂкры́й мѧ пред̾ста́нїемъ си препᲂдо́бне , ᲂу҆го́дниче хрⷭ҇то́въ всече́стне . боⷢ҇ . Да сво́й взы́щеши ѻ҆́бразъ пᲂгребе́нныи стрⷭ҇тьмѝ сп҃се , нбⷭ҇ныхъ ᲂу҆таи́всѧ сꙋ́ществъ , вᲂпло́щьсѧ ѿ дв҃ы , ꙗ҆ви́лсѧ є҆сѝ тебѐ зᲂвꙋ́щимъ , и҆но́гѡ ра́звѣ тебѐ бг҃а незна́емъ .

и҆́нъ , і҆рмо́съ . Бг҃ъ сы́и ми́ра . Прᲂпᲂвѣ́дꙋетъ твᲂѧ̀ ѻ҆́ч҃е чꙋдеса̀ , ны́нѣ ми́ръ вели́каѧ митрᲂпо́лїѧ , и҆ ликі́йскаѧ страна̀ , и҆ всѧ̀ ѻ҆те́чествїѧ твᲂѧ̀ чꙋдᲂдѣ́йства . и҆́миже всѧ̀ , ѿ бᲂлѣ́зней и҆ скᲂрбе́й и҆збавлѧ́еши , бг҃ᲂбл҃же́нне нико́лае . Пита́тель вдᲂви́цамъ и҆ ѻ҆ц҃ъ си́рымъ . пᲂмо́щникъ въ скᲂрбе́хъ всеи҆зрѧ́дныи , пла́чꙋщимъ ᲂу҆тѣше́нїе , па́стырь и҆ наста́вникъ всѣ́мъ блꙋдѧ́щимъ нико́лае сы́и , и҆ на́съ твᲂи́ми мᲂли́твами ѿ бѣ́дъ и҆зба́ви . сла́ва . Преста́висѧ ѿ землѝ къ невеще́ственымъ ѻ҆би́телемъ , и҆дѣ́же зри́ши дᲂбро́тꙋ неи҆зрече́ннꙋю , и҆ а҆́нг҃льскимъ во́инствᲂмъ сᲂбесѣ́дникъ ꙗ҆́вльсѧ . тѣ́мже со а҆пⷭ҇лы и҆ съ мꙋ́ченики ликꙋ́ѧ , прилѣ́жнѡ влⷣцѣ всѣ́хъ ѻ҆́ч҃е нико́лае ѡ҆ на́съ мᲂли́сѧ . и҆ нн҃ѣ , боⷢ҇ . Чл҃кѡмъ спасе́нїе всѣ́мъ и҆ ᲂу҆пᲂва́нїе , ꙗ҆́же пред̾варѧ́ющи є҆ди́на и҆ спаса́ющи . пᲂмᲂзѝ ны́нѣ на́мъ вᲂпїю́щимъ чⷭ҇таѧ , и҆ призыва́ющимъ тѧ̀ прⷭ҇нѡ во ѡ҆бстᲂѧ́нїи лю́тыхъ . пред̾ста́тельницы бо и҆ны́ѧ ра́звѣ тебѐ с̾ бг҃ᲂмъ не и҆́мамы .

катава́сїѧ : Бг҃ъ сы́и ми́ра , ѻ҆ц҃ъ щедро́тамъ , вели́кагѡ сᲂвѣ́та ти а҆́нг҃ла , ми́ръ пᲂдава́юща , пᲂсла́лъ є҆сѝ на́мъ . тѣ́мъ бг҃ᲂразꙋ́мїѧ к̾ свѣ́тꙋ наставлѧ́еми , ѿ́ нᲂщи ᲂу҆́тренююще , славᲂсло́вимъ тѧ̀ чл҃кᲂлю́бче .

пѣ́снь , ѕ҃ . і҆рмоⷭ҇ . Мл҃твꙋ прᲂлїю̀ ко́ гдⷭ҇ꙋ , и҆ тᲂмꙋ̀ вᲂз̾вѣщꙋ̀ печа́ль мᲂю̀ . ꙗ҆́кѡ ѕѡ́лъ дш҃а мᲂѧ̀ напо́лнисѧ , и҆ живо́тъ мо́й а҆́дꙋ прибли́жисѧ . и҆ мᲂлю́сѧ ꙗ҆́кѡ і҆ѡ́на , ѿ тлѝ бж҃е мо́й вᲂз̾веди́ мѧ . Сме́рти и҆ тлѝ ꙗ҆́кѡ спа́слъ є҆́сть , са́мъсѧ и҆з̾да́въ на сме́рть , тлѣ́нїемъ и҆ сме́ртїю мᲂѐ є҆стество̀ ꙗ҆́то бы́вшее . дв҃о мᲂлѝ гдⷭ҇а и҆ сн҃а свᲂегѡ̀ , врагѡ́въ ѕлᲂдѣ́йствїѧ мѧ̀ и҆зба́вити . Застꙋ́пницꙋ тѧ̀ живᲂтꙋ̀ свѣ́мъ , и҆ храни́тельницꙋ тве́рдꙋ дв҃це , напа́стей рѣша́щꙋ мᲂлвы̀ , и҆ нало́ги бѣсо́мъ ѿгᲂнѧ́щꙋ . и҆ мᲂлю́сѧ всегда̀ , страсте́й мѧ и҆зба́вити всенепᲂро́чнаѧ . Ꙗ҆́кѡ стѣ́нꙋ и҆ прибѣ́жище стѧжа́хᲂмъ , и҆ дш҃а́мъ тѧ̀ сᲂверше́нᲂе спасе́нїе , и҆ прᲂстра́нство в̾ ско́рбѣхъ ѻ҆трᲂкᲂви́це . и҆ свѣ́тᲂмъ тѝ прⷭ҇нѡ ра́дꙋемсѧ , ѽ влⷣчце , ны́нѣ на́съ ѿ стрⷭ҇те́й и҆ бѣ́дъ спасѝ . На ѻ҆дрѣ̀ нн҃ѣ не́мᲂщїю низ̾лежꙋ̀ , и҆ нѣ́сть и҆сцѣле́нїѧ пло́ти мᲂе́й . но ꙗ҆́же бг҃а и҆ сп҃са ми́рꙋ , и҆ и҆зба́вителѧ недꙋ́гᲂмъ ро́ждьшаѧ , тебѣ̀ мᲂлю́сѧ бл҃го́й , ѿ и҆стлѣ́нїѧ бᲂлѣ́зней вᲂста́ви мѧ .

и҆́нъ , і҆рмо́съ . Въ бе́зднѣ грѣхо́внѣй ѡ҆держи́мъ , не и҆з̾слѣ́днꙋю млрⷭ҇дїѧ твᲂегѡ̀ призыва́ю бе́зднꙋ , ѿ тлѝ бж҃е мѧ вᲂз̾ведѝ . И҆́же пᲂбѣ́ды нико́лае вѣне́цъ , на твᲂе́мъ версѣ̀ дᲂсто́йнѡ пᲂлᲂжи́сѧ , ꙗ҆́кѡ пᲂбѣди́тель ᲂу҆́бѡ и҆зрѧ́денъ , тѧ̀ призыва́ющїѧ спасѝ . двⷤа . Оу҆мерщве́на мѧ бл҃же́нне сᲂгрѣше́нїи , и҆ страстны́ми тревᲂлне́нїи пᲂгрꙋжа́ема , ꙗ҆́вльсѧ спасѝ , направлѧ́ѧ к̾ приста́нищꙋ бжⷭ҇твеныѧ во́ли . боⷢ҇ . На тѧ̀ ᲂу҆пᲂва́нїе вᲂзлᲂжи́хъ , мт҃и при́снѡ дв҃о , спасе́нїѧ мᲂегѡ̀ , и҆ тѧ̀ пред̾ста́тельницꙋ пᲂлᲂжи́хъ живᲂтꙋ̀ тве́рдꙋ и҆ непᲂкᲂлѣби́мꙋ .

и҆́нъ , і҆рмо́съ . Оу҆тро́ба і҆ѡнꙋ . Но́выи ꙗ҆ви́сѧ а҆враа́мъ нико́лае , ꙗ҆́кѡ є҆динᲂро́дна бо ны́нѣ приве́лъ є҆сѝ сн҃а влⷣцѣ свᲂемꙋ̀ , без̾кро́вныѧ же́ртвы принᲂсѧ̀ при́снѡ . ѿ ню́дꙋ же бл҃гᲂслᲂви́сѧ ꙗ҆́кѡ страннᲂлю́бецъ ѻ҆́ч҃е , и҆ трⷪ҇цѣ бы́сть ѻ҆би́тель бжⷭ҇твена и҆ непᲂро́чна . Стра́нна и҆ ᲂу҆жа́сна сᲂдѣва́еши чꙋдеса̀ нико́лае по все́й землѝ . и҆ въ мо́ри далечѐ пᲂтᲂплѧ́емымъ , скᲂрᲂте́чными мᲂли́твами пред̾стᲂѧ̀ . немᲂщны́мъ вра́чь . ни́щимъ пита́тель . пᲂбѣ́ды на врагѝ нᲂсѧ̀ , лю́демъ вѣ́рнымъ ꙗ҆влѧ́ѧсѧ . сла́ва . Ѻ҆́кᲂмъ ᲂу҆́мнымъ прᲂви́дѧ бꙋ́дꙋщаѧ , ᲂу҆че́нїи напᲂлнѧ́еши всѧ̀ кᲂнцы̀ . є҆динᲂсꙋ́щна ѻ҆ц҃ꙋ сн҃а вᲂзвѣсти́въ на́мъ . и҆ а҆́рїевъ гнѣ́въ пᲂтреби́лъ є҆сѝ . сто́лпъ правᲂсла́вныѧ вѣ́ры , честна́ѧ свᲂѧ̀ пᲂлᲂжѝ и҆справле́нїѧ . и҆ нн҃ѣ , боⷢ҇ . Ве́сь вᲂпло́щьсѧ во ᲂу҆тро́бѣ твᲂе́й пречⷭ҇таѧ хрⷭ҇то́съ бг҃ъ , без̾ сѣ́мене рᲂди́сѧ . не стерпѣ́ бо свᲂе́ю рꙋ́кꙋ сᲂзда́нїѧ зрѣ́ти ѿ льсти́вагѡ мꙋ́чима . прїи́де рабᲂзра́чнымъ ѻ҆́бразᲂмъ , чл҃ческїи ро́дъ и҆зба́вити .

катава́сїѧ : Оу҆тро́ба і҆ѡ́нꙋ младе́нца невредѝ , мᲂрскі́и ѕвѣ́рь , і҆а́кѡва прїѧ́тъ . въ дв҃цꙋ ᲂу҆́бѡ все́льсѧ сло́во , и҆ пло́ть прїи́мъ , про́йде сᲂхранѝ неи҆стлѣ́ннꙋ . и҆́же бо непᲂстрада̀ и҆стлѣ́нїѧ , ро́ждьшꙋю сᲂхранѝ неврежде́ннꙋ .

кᲂнда́къ . гла́съ , г҃ . Въ ми́рѣхъ ст҃е нико́лае ст҃ль бы́въ . хрⷭ҇то́во бо препᲂдо́бне є҆ѵⷢ҇а́лїе и҆спо́лни , пᲂлᲂжи́лъ є҆сѝ дш҃ꙋ свᲂю̀ за́ люди свᲂѧ̀ , и҆ спа́слъ є҆сѝ непᲂви́нныѧ ѿ сме́рти . сегѡ̀ ра́ди ѡ҆ст҃и́сѧ , и҆ ꙗ҆ви́сѧ ве́лїи таи́нникъ бж҃їѧ бл҃гᲂда́ти . и҆́кᲂсъ . Вᲂспᲂе́мъ ны́нѣ ст҃лѧ пѣ́сньми , ми́рскимъ лю́демъ па́стырѧ и҆ ᲂу҆чи́телѧ , да мᲂли́твами є҆гѡ̀ прᲂсвѣти́мсѧ . се́й бо ꙗ҆ви́сѧ чи́стъ ве́сь , нетлѣ́ненъ дх҃ᲂмъ , хрⷭ҇то́ви принᲂсѧ̀ же́ртвꙋ непᲂро́чнꙋ , чи́стꙋ и҆ бл҃гᲂпрїѧ́тнꙋ . ꙗ҆́кѡ ст҃ль ѡ҆чище́нъ дш҃е́ю и҆ тѣ́лᲂмъ , и҆ и҆́стиненъ цр҃кви пред̾ста́тель и҆ пᲂбо́рникъ , и҆ ве́лїи таи́нникъ бж҃їѧ бл҃гᲂда́ти .

пѣ́снь , з҃ . і҆рмо́съ . И҆́же ѿ і҆ꙋде́и , дᲂше́дше ѻ҆́трᲂцы в̾ вавѷлѡ́нъ дре́вле , вѣ́рᲂю ᲂу҆тверже́нїи , пла́мень пе́щныи пᲂпра́вше гл҃юще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . На́ше спасе́нїе ꙗ҆́кᲂже вᲂсхᲂтѣ̀ сп҃се , ᲂу҆стро́ити во́ чрево дв҃ыѧ всели́сѧ . ю҆́же ми́рꙋ застꙋ́пницꙋ пᲂказа̀ . ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Вᲂли́телѧ млⷭ҇ти , є҆го́же рᲂдѝ мт҃и ны́нѣ ᲂу҆мᲂлѝ , и҆зба́вити мѧ ѿ прегрѣше́нїй и҆ дш҃е́вныѧ скве́рны , сн҃ꙋ твᲂемꙋ̀ зᲂвꙋ́ща , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Сᲂкро́вище спасе́нїѧ , и҆ и҆сто́чникъ нетлѣ́нїѧ , тебѐ ро́ждьшꙋю , сто́лпъ ᲂу҆тверже́нїѧ , и҆ две́рь пᲂкаѧ́нїѧ , вᲂпїю́щимъ пᲂказа̀ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Тѣле́сныѧ недꙋ́ги , и҆ дш҃е́вныѧ грѣхѝ , бг҃ᲂрᲂди́тельнице , любо́вїю пристꙋпа́ющимъ к̾ кро́вꙋ твᲂемꙋ̀ дв҃це , и҆сцѣли́ти спᲂдо́би , ꙗ҆́же сп҃са хрⷭ҇та̀ на́мъ ро́ждьшаѧ .

и҆́нъ , і҆рмо́съ . Ѡ҆ тѣ́лѣ зла́тѣ на́ пᲂли деи́рѣ слꙋжи́мѣмъ , трїѐ ѻ҆́трᲂцы неради́ша ѡ҆ без̾бо́жнѣмъ велѣ́нїи , но пᲂсредѣ̀ пла́мени в̾ве́ржени , прᲂхлажда́еми пᲂѧ́хꙋ , бл҃гᲂслᲂве́нъ бг҃ъ ѻ҆ц҃ъ на́шихъ . Ѻ҆́стрымъ и҆скꙋше́нїемъ пресѣка́емь є҆́смь , и҆ лю́тѣ пᲂстрѣка́емь , и҆ ко врато́мъ а҆́да прибли́жихсѧ , неча́ѧнїемъ пᲂража́емь , спаси́ мѧ мл҃твами си бл҃же́нне , и҆ вᲂздви́гни пѣ́ти , бл҃гᲂслᲂве́нъ бг҃ъ ѻ҆ц҃ъ на́шихъ . двⷤа . Незахᲂди́магѡ свѣ́та , невеще́ствеными лꙋча́ми ѡ҆блиста́емь , сꙋ́щїѧ во тмѣ̀ скᲂрбе́й и҆ ѡ҆ѕлᲂбле́нїи и҆схитѝ , и҆ к̾ пᲂсѣще́нїю весе́лїѧ наста́ви пᲂю́щїѧ , блгⷭ҇ве́нъ бг҃ъ ѻ҆ц҃ъ на́шихъ . боⷢ҇ . Мᲂлѝ свᲂегѡ̀ сн҃а и҆ гдⷭ҇а дв҃о чⷭ҇таѧ , про́данныѧ лю́тыми сᲂгрѣше́ньми и҆ лестьмѝ ѕмїи́ными , кро́вїю є҆гѡ̀ честно́ю и҆зба́вити пᲂю́щїѧ , блгⷭ҇ве́нъ бг҃ъ ѻ҆ц҃ъ на́шихъ .

и҆́нъ , і҆рмо́съ . Ѻ҆́трᲂцы во блазѣ́й . Всѧ́кихъ лю́тыхъ недꙋ́гъ , вра́чь всеи҆зрѧ́денъ ѻ҆́ч҃е нико́лае ꙗ҆́вльсѧ . дꙋшѝ мᲂеѧ̀ не́мᲂщь и҆сцѣли́въ , пᲂда́ждь ми здра́вїе вᲂпи́ти , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . И҆зба́вль дре́вле во́ины , ѿ сме́рти ст҃е , и҆ си́хъ вᲂз̾дви́глъ є҆сѝ пѣ́ти и҆ сла́вити , сп҃са хрⷭ҇та̀ вѣ́рᲂю те́плᲂю . и҆́же и҆ взыва́хꙋ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . сла́ва . Премꙋ́дрᲂсти ча́ши прибли́живсѧ та́йнѡ , ᲂу҆стна́ма свᲂи́ма ѻ҆́ч҃е нико́лае , ка́пли ѻ҆дᲂжде́нїѧ пᲂче́рплъ є҆сѝ , па́че ме́да и҆ со́та . всѣ́мъ пᲂвелѣва́ѧ вᲂпи́ти , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . и҆ ны́нѣ , боⷢ҇ . Ꙗ҆́кѡ всѣ́хъ тва́рей вы́шши є҆сѝ бцⷣе , мᲂли́сѧ свᲂемꙋ̀ сн҃ꙋ и҆ бг҃ꙋ , и҆зба́вити мꙋ́ки чтꙋ́щихъ тѧ вᲂи́стиннꙋ , и҆ пᲂю́щихъ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ .

катава́сїѧ : Ѻ҆́трᲂцы во бл҃зѣ́й вѣ́рѣ вᲂспита́ни , нечести́ва велѣ́нїѧ небре́гше , ѻ҆́гненнагѡ преще́нїѧ не ᲂу҆бᲂѧ́шасѧ . но пᲂсредѝ пла́мене стᲂѧ́ще пᲂѧ́хꙋ , ѻ҆ц҃е́мъ бг҃ъ бл҃гᲂслᲂве́нъ є҆сѝ .

пѣ́снь , и҃ . і҆рмо́съ . Цр҃ѧ нбⷭ҇нагѡ , є҆го́же пᲂю́тъ вѡ́и а҆́нг҃льстїи . хвали́те и҆ превᲂзнᲂси́те є҆гѡ̀ во́ вѣки . По́мᲂщи ꙗ҆́же ѿ тебѐ тре́бꙋющїѧ , непре́зри дв҃о пᲂю́щїѧ , и҆ превᲂзнᲂсѧ́щїѧ хрⷭ҇та̀ во́ вѣки . Немᲂже́нїе дш҃и мᲂеѧ̀ и҆сцѣлѧ́еши и҆ тѣле́сныѧ бᲂлѣ́зни дв҃о , ꙗ҆́кѡ да тѧ̀ пᲂе́мъ , и҆ превᲂзно́симъ чи́стꙋю во́ вѣки . И҆сцѣле́нїемъ бᲂга́тство и҆злива́еши , вѣ́рнѡ пᲂю́щимъ тѧ̀ дв҃це , и҆ превᲂзнᲂсѧ́щимъ хрⷭ҇та̀ во́ вѣки . Напа́стныѧ ты̀ прило́ги ѿгᲂнѧ́еши , и҆ страстны́ѧ нахо́ды дв҃о , ꙗ҆́кѡ да тѧ̀ пᲂе́мъ и҆ превᲂзно́симъ чи́стꙋю во́ вѣки .

и҆́нъ , і҆рмо́съ . Въ пе́щь ѻ҆́гненнꙋю , к̾ дѣ́темъ є҆вре́йскимъ сᲂше́дшагѡ , и҆ пла́мень на хла́дъ прело́жшагѡ бг҃а , по́йте всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Ꙗ҆́кѡ бл҃гъ и҆ милᲂсе́рдъ , и҆́же во глꙋбинѣ̀ напа́стей лю́тѣ сᲂдержи́ми вᲂпїе́мъ , свᲂбᲂдѝ бл҃же́нне нико́лае , разрѣше́нїе пᲂдаѧ̀ мл҃твами си , и҆́же ко сп҃сꙋ хрⷭ҇тꙋ̀ сщ҃еннᲂтаи́нниче . двⷤа . Таи́нникъ и҆́же па́че ᲂу҆ма̀ ст҃ы́мъ , и҆ слꙋжи́тель нбⷭ҇нымъ сы́и бг҃ᲂмꙋ́дре , а҆рхїєре́й же вѣ́ренъ , сᲂгрѣше́нїи ѡ҆ставле́нїѧ прᲂсѝ ѿ сп҃са на́шегѡ , сщ҃еннѡ ꙗ҆вле́нне . боⷢ҇ . И҆знемᲂга́етъ ми ны́нѣ ᲂу҆́мъ , во глꙋбинꙋ̀ впа́дшꙋ нече́стїѧ , ꙗ҆́кѡ ѿ всю́дꙋ разли́чными ѡ҆бьѧ́тъ є҆́смь ѕлы́ми . но ты̀ дв҃о и҆сцѣлѝ , без̾стра́стїѧ свѣ́тᲂмъ ѡ҆дѣва́ющи .

и҆́нъ , і҆рмо́съ . Чꙋ́до преве́лїе . Чи́ни патрїа́рхъ и҆ а҆пⷭ҇лъ , и҆ сщ҃еннᲂмч҃нкъ сᲂбо́ръ , и҆ прᲂро́къ сᲂсло́вїе , и҆ всѝ ли́цы по́стничестїи , блажа́тъ бжⷭ҇твенᲂе житїѐ твᲂѐ . тѣ́мже и҆ мы̀ с̾ ни́ми вᲂпїе́мъ , да бл҃гᲂслᲂви́тъ тва́рь всѧ̀ гдⷭ҇а , и҆ превᲂзно́ситъ є҆гѡ̀ во́ вѣки . Вы́шнїи всецр҃ю великᲂдержа́вне , мᲂли́твами препᲂдо́бнагѡ па́стырѧ жи́знь ᲂу҆мирѝ всѣ́мъ сло́ве хрⷭ҇тїа́нѡмъ , пᲂсо́бствꙋѧ на врагѝ держа́ве на́шей . да тебѣ̀ хрⷭ҇тѐ зᲂве́мъ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а , и҆ превᲂзнᲂси́те є҆гѡ̀ во́ вѣки . бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Свѣ́тᲂмъ прᲂсвѣ́щьсѧ непристꙋ́пнымъ ѻ҆́ч҃е , дꙋ́ши сꙋ́щихъ въ печа́лѣхъ ѡ҆зарѧ́еши , разᲂрѧ́ѧ всемра́чнꙋю тмꙋ̀ напа́стей . ѡ҆блиста́ѧ же зарѧ̀ весе́лїѧ при́снѡ . и҆́миже и҆з̾ дале́ча прᲂсвѣща́еми пᲂю́ще вᲂпїе́мъ , да бл҃гᲂслᲂви́тъ тва́рь всѧ̀ гдⷭ҇а , и҆ превᲂзно́ситъ є҆гѡ̀ во́ вѣки . и҆ ны́нѣ , боⷢ҇ . Чꙋ́до страннᲂлѣ́пнѡ кꙋпина̀ ѻ҆́бразъ прᲂѡ҆бразѝ чи́стаѧ ѻ҆трᲂкᲂви́це , гᲂрѧ́щи не ѡ҆па́льнѡ дре́вле на гᲂрѣ̀ сина́йстѣй , та́йнꙋ ржⷭ҇тва̀ твᲂегѡ̀ прᲂписꙋ́ющи . ѻ҆́гнь бо в̾ тѧ̀ бжⷭ҇тва̀ всели́выисѧ невреди́мꙋ тѧ̀ сᲂблюдѐ . є҆го́же вᲂспѣва́емъ во́ вѣки .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . Чꙋ́до преве́лїе , рᲂсᲂда́вицꙋ вᲂѡ҆бразѝ пе́щь ѻ҆́бразᲂмъ . ꙗ҆́же бо прїѧ́тъ не ѡ҆палѝ ю҆́ныхъ , та́кᲂже и҆ ѻ҆́гнь бжⷭ҇твенныи дв҃ꙋ , ю҆́же про́йде чи́стꙋ . тѣ́мъ пᲂю́ще вᲂзᲂпїе́мъ , да блгⷭ҇ви́тъ тва́рь всѧ́каѧ гдⷭ҇а , и҆ превᲂзно́ситъ є҆гѡ̀ во́ вѣки =[пᲂкло́н̾] . =

пѣ́снь , ѳ҃ . і҆рмо́съ . Вᲂи́стинꙋ бцⷣꙋ тѧ̀ и҆спᲂвѣ́дающе , спасе́ннїи тᲂбо́ю дв҃це чⷭ҇таѧ , с̾ нбⷭ҇ными вѡ́и тѧ̀ велича́емъ . То́ка сле́зъ мᲂи́хъ не ѿврати́сѧ , ꙗ҆́же ѿ всѧ́кагѡ лица̀ всѧ̀ сле́зы ѿє҆́мшагѡ , дв҃це хрⷭ҇та̀ ро́ждьшаѧ . Ра́дᲂсти мᲂѐ се́рдце и҆спо́лни дв҃о , ꙗ҆́же ра́дᲂсти прїе́мши и҆спᲂлне́нїе грѣхо́внꙋю печа́ль пᲂтреблѧ́ющи . Свѣ́та твᲂегѡ̀ зарѧ́ми прᲂсвѣтѝ дв҃о , мра́къ невѣ́денїѧ ѿгᲂнѧ́щи , бл҃гᲂвѣ́рнѡ бцⷣꙋ тѧ̀ и҆спᲂвѣ́дающихъ . Въ мѣ́стѡ ѡ҆ѕлᲂбле́нїѧ , не́мᲂщи низ̾лежа́щагѡ , дв҃о и҆сцѣлѝ , и҆з̾ не здра́вїѧ во здра́вїе претвᲂрѧ́ющи .

и҆́нъ , і҆рмо́съ . Без̾нача́льна рᲂди́телѧ сн҃ъ бг҃ъ и҆ гдⷭ҇ь , вᲂпло́щьсѧ ѿ дв҃цы на́мъ ꙗ҆ви́сѧ , ѡ҆мраче́нныѧ прᲂсвѣти́ти , и҆ сᲂбра́ти растᲂче́нныѧ . тѣ́мъ всехва́льнꙋю бцⷣꙋ велича́емъ . Свѣще́ю бл҃гᲂда́ти бг҃ᲂмꙋ́дре прᲂсвѣща́емь , и҆ свѣти́льникъ бл҃гᲂче́стїѧ ꙗ҆́вѣ бы́въ , сꙋ́щїѧ в̾ напа́стѣхъ спаса́еши , и҆ и҆́же во глꙋбинѣ̀ мᲂрстѣ́й и҆збавлѧ́еши , и҆ пита́еши а҆́лчꙋщїѧ пресла́внѡ всебл҃же́нне . вⷤ . И҆́же в̾ раѝ пи́щи ны́нѣ вᲂдвᲂрѧ́ѧсѧ , неи҆зрече́ннꙋю сла́вꙋ ꙗ҆́снѡ зрѧ̀ , ѿ нбⷭ҇ныхъ крꙋ́гъ пѣвцы̀ свᲂѧ̀ назира́еши , ѿ страсте́й и҆збавлѧ́ѧ , бг҃ᲂно́се пресла́вне . боⷢ҇ . Премꙋ́дрᲂсть и҆ си́ла и҆ сло́во сᲂста́внᲂе ѻ҆ц҃ꙋ , дв҃о чⷭ҇таѧ . є҆го́же зачала̀ є҆сѝ , ѿ свᲂи́хъ пречⷭ҇тыхъ крᲂве́й бг҃ᲂмт҃и живы́и хра́мъ прїе́мъ , и҆ се́й по сᲂвᲂкꙋпле́нїю себѣ̀ сᲂедини́въ нераздѣ́льнѡ .

и҆́нъ , і҆рмо́съ . Та́инство стра́нно . Ликᲂствꙋ́емъ дх҃о́внѡ всѝ праз̾днᲂлю́бцы , и҆ нб҃са̀ да веселѧ́тсѧ . го́ры же и҆ хо́лми и҆ дв҃и́честїи ли́цы , и҆ по́стникъ свѣ́тлᲂсть , въ па́мѧть требл҃же́ннагѡ ѻ҆ц҃а на́шегѡ , сп҃са хрⷭ҇та̀ велича́юще . Да пᲂю́тъ пѣ́сньми непреста́ннѡ всѝ , земні́и кᲂнцы̀ , ве́рхъ нико́лы пᲂхва́льными вѣнцы̀ хрⷭ҇то́ва ᲂу҆го́дника ᲂу҆краша́юще . є҆го́же мᲂли́твами ѿ бѣ́дъ и҆збавлѧ́емсѧ . сла́ва . Ꙗ҆́кѡ дᲂсто́йнѡ прїимѝ пѣ́нїе нико́лае ма́лᲂе сїѐ ѿ бᲂлѣ́зненыѧ ми дꙋшѝ , ꙗ҆́кᲂже хрⷭ҇то́съ прїѧ́тъ вдᲂви́цы двѣ̀ ца́тѣ . невᲂзгнꙋша́йсѧ начина́нїѧ любле́нїемъ . неи҆скꙋша́ѧ бо требл҃же́нне дерзнꙋ́хъ . и҆ нн҃ѣ , боⷢ҇ . Пᲂтреби́сѧ всѧ́ка печа́ль ржⷭ҇тво́мъ твᲂи́мъ . и҆ ѿѧ́тъ гдⷭ҇ь , рыда́нїе и҆ пла́чь , и҆ всѧ̀ сле́зы ѿ лица̀ земнᲂро́дныхъ , пречⷭ҇таѧ бцⷣе неи҆скꙋсᲂбра́чнаѧ . ѡ҆ тебѣ̀ и҆ мы̀ до́лги и҆спᲂлнѧ́емъ .

катава́сїѧ : Та́инство стра́нно ви́жꙋ , и҆ пресла́вно . не́бо сꙋ́щꙋ пеще́рꙋ , престо́лъ херꙋви́мскїи , дв҃цꙋ , ꙗ҆́сли , вмѣсти́лище , в̾ни́хъ же вᲂз̾лежѐ невмѣсти́мыи хрⷭ҇то́съ бг҃ъ , є҆го́же хва́лѧще велича́емъ . =Дᲂсто́йнѡ є҆́сть . =

свѣти́ленъ . Вели́кагѡ па́стыремъ нача́льника и҆ ст҃лѧ и҆ наста́вника мѵ́рѧнѡмъ нико́лꙋ всѝ вᲂсхва́лимъ . мно́ги бо мꙋ́жы спасѐ , непра́веднѡ хᲂтѧ́щїѧ ᲂу҆́мрети . и҆ цр҃е́ви ꙗ҆́вльсѧ и҆ а҆вла́вїю во снѣ̀ , рѣша̀ непра́ведныи сꙋ́дъ . два́жды . сла́ва , и҆ ны́нѣ , боⷢ҇ . Мꙋ́дрᲂсть сᲂста́внꙋю сло́во пресꙋ́щнᲂе врача̀ всѣ́мъ хрⷭ҇та̀ ро́ждьши дв҃о пречи́стаѧ , гнᲂе́нїѧ и҆ ꙗ҆́звы дꙋшѝ мᲂеѧ̀ и҆сцѣлѝ лю́тыѧ и҆ мнᲂгᲂвре́менныѧ . и҆ срⷣца мᲂегѡ̀ страстна́ѧ пᲂмышле́нїѧ ᲂу҆мертвѝ .

На хвали́тѣхъ , стихѣ́ры , на д҃ . гла́съ , а҃ . Вᲂз̾зрѣ́въ не ᲂу҆кло́ннѡ на высᲂтꙋ̀ ра́зꙋма , и҆ ᲂу҆зрѣ́въ не ꙗ҆вле́нныѧ премꙋ́дрᲂсти глꙋбинꙋ̀ , и҆ ᲂу҆че́нїи ми́ръ ѡ҆бᲂга́тилъ є҆сѝ ѻ҆́ч҃е . ѡ҆ на́съ при́снѡ мᲂли́сѧ хрⷭ҇то́ви , ст҃лю нико́лае . Чл҃че бж҃їи вѣ́рныи ᲂу҆го́дниче , стрᲂи́телю тᲂгѡ̀ та́йнамъ , мꙋ́жꙋ жела́нїи дх҃о́вныхъ , сто́лпе ѡ҆дш҃евле́ныи , и҆ бг҃ᲂдх҃нᲂве́нныи ѻ҆рга́не . ꙗ҆́кѡ бжⷭ҇твено сᲂкро́вище ми́рскаѧ цр҃кви ѡ҆брѣ́тши тѧ стѧжа̀ , и҆ мᲂли́твеника ѡ҆ дш҃а́хъ на́шихъ . гла́съ , в҃ . Пра́вило вѣ́рѣ и҆ ѻ҆́бразъ кро́тᲂсти , пᲂказа́ тѧ ста́дꙋ свᲂемꙋ̀ хрⷭ҇то́съ бг҃ъ ст҃лю нико́лае . в̾ ми́рѣхъ ᲂу҆́бѡ бл҃гᲂꙋха́ющꙋ ти , всю́дꙋ сїѧ́ютъ свѣ́тлѡ бжⷭ҇твенаѧ твᲂѧ̀ и҆справле́нїѧ . си́рымъ и҆ вдᲂви́цамъ пред̾ста́телю . тѣ́мже мᲂлѧ̀ непреста́й , спастѝ дш҃а на́ша . Ѻ҆́ч҃е нико́лае , мѵрѡпᲂло́жница мᲂще́й твᲂи́хъ ми́ры ѡ҆бᲂгаща́етъ . и҆дѣ́же и҆ свѧ́заныѧ непра́веднѡ ѡ҆сꙋжде́ныѧ , во снѣ̀ цр҃е́ви ꙗ҆́вльсѧ , и҆ свᲂи́мъ ꙗ҆вле́нїемъ свᲂбᲂди́лъ є҆сѝ ѿ сме́рти и҆ ю҆́зъ и҆ темни́цы . но и҆ ны́нѣ ꙗ҆́кᲂже тᲂгда̀ и҆ при́снѡ , дерзнᲂве́нїе и҆мѣ́ѧ ко́ гдⷭ҇ꙋ , непреста́й мᲂлѧ̀ ѡ҆ дш҃а́хъ на́шихъ .

сла́ва . гла́съ , є҃ . Вᲂстрꙋ́бимъ трꙋбо́ю пѣ́сней , и҆ взыгра́емъ пра́зднственаѧ , и҆ ликᲂствꙋ́емъ ра́дꙋющесѧ , в̾ мᲂле́бно тᲂржество̀ бг҃ᲂно́снагѡ ѻ҆ц҃а . цр҃и и҆ кнѧ́зи да стекꙋ́тсѧ , и҆́же сᲂнны́мъ стра́шнымъ ꙗ҆вле́нїемъ цр҃ѧ препира́юща , непᲂви́ннѡ держи́мыѧ трѝ ѿпꙋсти́ти во́ины . да вᲂсхва́лѧтъ па́стырѧ и҆ ᲂу҆чи́телѧ , и҆́же до́браго па́стырѧ , па́стыремъ є҆динᲂревни́телѧ , сᲂше́дшесѧ вᲂсхва́лимъ . и҆́же в̾ недꙋ́зѣхъ врача̀ , и҆ в̾ бѣда́хъ и҆зба́вителѧ . грѣ́шнїи застꙋ́пника . ни́щїи сᲂкро́вище , и҆ и҆́же в̾ скᲂрбѣ́хъ ᲂу҆тѣ́шителѧ . спꙋ́тника пꙋ́ть ше́ствꙋющїи , на́ мᲂри сꙋ́щїи прави́телѧ . и҆ всѝ вездѣ̀ те́плѣ пред̾варѧ́юща , вели́кагѡ ст҃лѧ вᲂсхвалѧ́юще си́це рце́мъ , прест҃ы́и нико́лае пред̾варѝ , и҆ и҆зба́ви на́съ ѿ настᲂѧ́щїѧ бѣды̀ , и҆ спасѝ ста́до свᲂѐ мᲂли́твами си .

и҆ ны́нѣ , боⷢ҇ . Вᲂстрꙋ́бимъ трꙋбо́ю пѣ́сней . прекло́ньшибᲂсѧ свы́ше всѣ́хъ цр҃ца мт҃и и҆ дв҃а , бл҃гᲂслᲂве́ньми вѣньчава́етъ вᲂспѣва́ющихъ ю҆̀ . цр҃и и҆ кнѧ́зи да стекꙋ́тсѧ , и҆ цр҃цѣ да вᲂспле́щꙋтъ в̾ пѣ́снехъ , цр҃ѧ ро́ждьшей , и҆́же сме́ртїю ѡ҆держи́мыѧ пе́рвѣе , раз̾рѣши́ти чл҃кᲂлю́бнѡ бл҃гᲂи҆зво́лившаго . па́стыри и҆ ᲂу҆чи́тели , до́блѧго па́стырѧ пречⷭ҇тꙋю мт҃рь , сᲂше́дшесѧ вᲂсхва́лимъ , свѣ́щникъ златᲂза́рныи , и҆ свѣтᲂно́сныи ѻ҆́блакъ , нб҃съ прᲂстра́ннѣйшꙋ . ѡ҆дш҃е́вленыи же кᲂвче́гъ , ѻ҆гнезра́чныи влады́чень престо́лъ . маннᲂпрїе́мнꙋю златꙋ́ю рꙋ́чкꙋ . затвᲂре́ннꙋю сло́ва две́рь . и҆ всѣ́мъ хрⷭ҇тїа́нѡмъ прибѣ́жище . пѣ́сньми бг҃ᲂгла́сными пᲂхвалѧ́юще си́це рце́мъ , пᲂла́то сло́ва , спᲂдо́би смире́нныхъ на́съ нбⷭ҇нагѡ црⷭ҇твїѧ . всѧ́ бо вᲂз̾мо́жна сꙋ́ть хᲂда́тайствꙋ твᲂемꙋ̀ .

С=лавᲂсло́вїе вели́кᲂе , и҆ ѿпꙋ́стъ . =

На литꙋргі́и , бл҃же́нна , на и҃ . ѿ а҃ гѡ кано́на ст҃лю , пѣ́снь , г҃ ѧ . и҆ ѿ в҃ гѡ , пѣ́снь , ѕ҃ ѧ .

По вхо́дѣ , а҆́ще ли хра́мъ хрⷭ҇то́въ , и҆лѝ бцⷣы : трᲂпа́рь хра́мꙋ , и҆ ст҃лю . сла́ва , кᲂнда́къ ст҃лю . и҆ ны́нѣ , хра́мꙋ .

По вхо́дѣ , а҆́ще хра́мъ ст҃ы́мъ : трᲂпа́рь хра́мꙋ , и҆ ст҃лю . кᲂнда́къ хра́мꙋ . сла́ва , ст҃лю . и҆ ны́нѣ , кᲂнда́къ : застꙋ́пнице хрⷭ҇тїа́нѡмъ .

прᲂки́менъ , ѱало́мъ давы́дᲂвъ . вᲂзвесели́тсѧ пра́ведникъ ѡ҆́ гдⷭ҇ѣ , и҆ ᲂу҆пᲂва́етъ на́нь . сти́хъ . ᲂу҆слы́ши бж҃е мл҃твꙋ мᲂю̀ , внегда̀ мᲂли́тимисѧ к̾ тебѣ̀ . а҆пⷭ҇лъ , къ є҆вре́ѡмъ . заⷱ҇ , тл҃є . а҆ллилꙋ́їѧ . сщ҃е́нницы твᲂѝ ѡ҆блекꙋ́тсѧ в̾ пра́вдꙋ , и҆ прпⷣбнїи твᲂѝ вᲂз̾ра́дꙋютсѧ . є҆ѵⷢ҇а́лїе , ѿ лꙋкѝ . заⷱ҇ , к҃д . прича́стенъ , въ па́мѧть вѣ́чнꙋю бꙋ́детъ пра́ведникъ .