Неделя свв. Отец

НЕДѢ́ЛѦ ПРЕД̾ РЖⷭ҇ТВО́М̾ ХРⷭ҇ТО́ВЫМ̾

ст҃ы́хъ ѻ҆ц҃ъ . Пᲂдᲂба́етъ вѣ́дати , а҆́ще слꙋчи́тсѧ внѣ̀ , к҃ гѡ числа̀ , декабрѧ̀ мцⷭ҇а , си́рѣчь , во и҃і , и҆лѝ в̾ ѳ҃і , де́нь . пᲂе́тсѧ вᲂскрⷭ҇на слꙋ́жба , и҆ ст҃ы́мъ ѻ҆ц҃е́мъ . а҆ пред̾пра́зднествꙋ , ничто́же пᲂе́тсѧ :

Въ сꙋбо́тꙋ ве́черъ , на ма́лѣй вече́рни пᲂе́мъ по ѻ҆бы́чаю . =На вели́цѣй вече́рни , по ѻ҆бы́чнᲂй каѳи́смѣ , на гдⷭ҇и вᲂзва́хъ , стихѣ́ры , вᲂскрⷭ҇ны , г҃ . и҆ вᲂсто́чны , г҃ . и҆ ст҃ы́мъ ѻ҆ц҃е́мъ , на д҃ . гла́съ , ѕ҃ . пᲂдо́бен̾ . всѐ ᲂу҆пᲂва́нїе . Ꙗ҆ви́сѧ ми́ра кᲂнце́мъ пра́ѻ҆ц҃ъ па́мѧть ,꙳ свѣ́та вᲂи́стинꙋ и҆спо́лнь ,꙳ и҆ зарѧ́ми бл҃гᲂда́ти сїѧ́ющи .꙳ хрⷭ҇то́съ бо сл҃нце свѣ́тло ,꙳ свы́ше прᲂсїѧ́въ и҆здале́ча ,꙳ ѕвѣзда́мъ сᲂбо́ръ веде́тъ ,꙳ с̾ ни́мъ вᲂсїѧ́вшїи .꙳ и҆ ржⷭ҇тво̀ бг҃ᲂчл҃ческᲂе ,꙳ ꙗ҆влѧ́етсѧ внꙋ́трь виѳлїе́ма бы́ти .꙳ всѝ ᲂу҆́бѡ вѣ́рᲂю сегѡ̀ рᲂжество̀ ,꙳ бл҃гᲂче́стнѡ пле́щꙋще ликꙋ́емъ ,꙳ хвалꙋ̀ пред̾пра́зднественꙋю . =два́жды . Сла́вᲂю ᲂу҆краша́ютсѧ ,꙳ бжⷭ҇твенымъ сꙋщество́мъ .꙳ а҆да́мъ ра́дꙋетсѧ дне́сь ,꙳ ꙗ҆́кѡ ѻ҆снᲂва́нїе и҆ ᲂу҆тверже́нїе пра́ѻ҆ц҃емъ мꙋ́дрымъ .꙳ сᲂвзыграва́етжесѧ а҆́вель ,꙳ и҆ є҆нѡ́хъ весели́тсѧ .꙳ и҆ ликꙋ́етъ си́ѳъ , и҆ нѡ́е в̾кꙋ́пѣ .꙳ съ патрїа́рхи же пᲂе́тъ а҆враа́мъ всехва́льныи ,꙳ и҆ рᲂжде́нїе без̾ ѻ҆ц҃а ны́нѣ мелхиседе́къ ви́дитъ свы́ше .꙳ тѣ́мже бжⷭ҇твенꙋю па́мѧть хрⷭ҇то́вѣмъ пра́ѻ҆ц҃емъ ,꙳ и҆ мы̀ сверша́юще мо́лимъ ,꙳ спасти́сѧ дш҃а́мъ на́шимъ . Ѡ҆блиста̀ ве́селѡ ,꙳ и҆́же въ пещѝ дѣте́й бг҃ᲂмꙋ́дрыхъ сᲂбо́ръ ,꙳ и҆ хрⷭ҇то́во ржⷭ҇тво̀ прᲂпᲂвѣ́дꙋетъ на землѝ .꙳ ꙗ҆́кᲂже бо честна́ѧ рᲂса̀ сше́дъ гдⷭ҇ь ,꙳ ро́ждьшꙋю спаса́етъ неѡ҆па́льнѡ ,꙳ сᲂблюда́етъ непᲂро́чнꙋ ,꙳ и҆ ѡ҆бᲂгаща́етъ бжⷭ҇твеными дарᲂва́нїи .꙳ тѣ́мже и҆ бг҃ᲂпрїѧ́тныи ,꙳ ра́дꙋетсѧ данїи́лъ веселѧ́сѧ ,꙳ ка́мень бо и҆з̾ гᲂры̀ несѣ́ченъ прᲂви́дѣ ꙗ҆́вѣ .꙳ со дерзнᲂве́нїемъ мо́литсѧ ,꙳ ны́нѣ ѡ҆ дш҃а́хъ на́шихъ . сла́ва , ѻ҆ц҃е́мъ . гла́съ , ѕ҃ . Данїи́лъ мꙋ́жь жела́нїи , ка́мень без̾ рꙋкꙋ̀ ѿсѣче́нъ ви́дѣвъ тѧ̀ гдⷭ҇и , млⷣнца без̾ сѣ́мене рᲂжде́на , прᲂвᲂзгласи́ тѧ , и҆́же ѿ дв҃ы вᲂплᲂще́нна сло́ва . непремѣ́нна бг҃а , и҆ сп҃са дш҃а́мъ на́шимъ .

=и҆ ны́нѣ , боⷢ҇ , пе́рвыи , настᲂѧ́щаго гла́са . =

Ѿ= бытїѧ̀ , чте́нїе . =

Слы́шавъ а҆враа́мъ , ꙗ҆́кѡ плѣне́нъ бы́сть ло́тъ сн҃ъ бра́та є҆гѡ̀ . и҆ и҆зᲂчтѐ дᲂмᲂча́децъ свᲂи́хъ , три́ста и҆ ѻ҆смьна́десѧть , и҆ пᲂгна̀ вᲂслѣ́дъ и҆́хъ до да́на . и҆ нападѐ на нѧ̀ но́щїю са́мъ и҆ ѻ҆́трᲂцы є҆гѡ̀ с̾ ни́мъ , и҆ пᲂразѝ и҆́хъ . и҆ гᲂнѝ и҆́хъ до хᲂва́ла , є҆́же є҆́сть ѡ҆шꙋ́ю дама́ска , и҆ вᲂзвратѝ всѧ̀ кᲂнѝ сᲂдо́мскїѧ , и҆ лѡ́та сн҃а бра́та свᲂегѡ̀ вᲂз̾вратѝ , и҆ всѧ̀ и҆мѣ́нїѧ є҆гѡ̀ , и҆ жены̀ , и҆ лю́ди . и҆зы́де же ца́рь сᲂдо́мскїи в̾ срѣ́тенїе є҆мꙋ̀ , по вᲂз̾враще́нїи є҆гѡ̀ ѿ сѣ́ча хᲂдᲂлᲂгᲂмо́рскагѡ , и҆ ца́рїе и҆́же с̾ ни́мъ , во ю҆до́ль са́винꙋ , се́же бѧ́ше по́ле цр҃е́во . и҆ мелхиседе́къ цр҃ь сали́мскїи и҆знесѐ хлѣ́бы и҆ вино̀ , бѣ́ бо сщ҃е́нникъ бг҃а вы́шнѧгѡ . и҆ бл҃гᲂслᲂвѝ а҆враа́ма , и҆ речѐ , бл҃гᲂслᲂве́нъ а҆враа́мъ бг҃ᲂмъ вы́шнимъ , и҆́же сᲂзда̀ нб҃о и҆ зе́млю . и҆ бл҃гᲂслᲂве́нъ бг҃ъ вы́шнїи , и҆́же предадѐ врагѝ твᲂѧ̀ пᲂд̾рꙋ́чники тебѣ̀ .

Ѿ= втᲂра́гѡ зако́на , чте́нїе . =

Во́ дни ѻ҆ны̀ , речѐ мѡѷсе́й къ сн҃ᲂвѡ́мъ і҆и҃левᲂмъ , ви́дите , сѐ преда́хъ пред̾ лице́мъ ва́шимъ зе́млю , вше́дше наслѣ́дите зе́млю , ю҆́же клѧ́тсѧ гдⷭ҇ь ѻ҆ц҃е́мъ на́шимъ а҆враа́мꙋ и҆ и҆саа́кꙋ и҆ і҆а́кѡвꙋ да́ти и҆́мъ , и҆ сѣ́мени и҆́хъ по ни́хъ . и҆ реко́хъ ва́мъ во́ времѧ ѻ҆́но гл҃ѧ , невᲂз̾мᲂгꙋ̀ є҆ди́нъ вᲂди́ти ва́съ , гдⷭ҇ь бг҃ъ на́шъ ᲂу҆мно́жилъ вы̀ є҆́сть . и҆ сѐ є҆стѐ дне́сь ꙗ҆́кѡ ѕвѣ́зды нбⷭ҇ныѧ мно́жествᲂмъ . гдⷭ҇ь бг҃ъ ѻ҆ц҃ъ на́шихъ да прилᲂжи́тъ ва́мъ , ꙗ҆́кѡ да бꙋ́дете ты́сѧщами сꙋгꙋ́бѡ , и҆ да бл҃гᲂслᲂви́тъ ва́съ , ꙗ҆́кᲂже гл҃а ва́мъ . и҆ прїѧ́хъ ѿ ва́съ мꙋ́жы мꙋ́дры . и҆ хꙋдо́ги , и҆ разꙋми́чны , и҆ пᲂста́вихъ и҆́хъ ѡ҆блада́ти над̾ ва́ми , тысѧщенача́льники , и҆ стᲂнача́льники , и҆ пѧтьдесѧтᲂнача́льники , и҆ десѧтᲂнача́льники , и҆ кни́гчїѧ сꙋдїѧ́мъ ва́шимъ . и҆ запᲂвѣ́дахъ сꙋдїѧ́мъ ва́шимъ во́ времѧ ѻ҆́но гл҃ѧ , раз̾сꙋжда́йте пᲂсредѣ̀ бра́тїи ва́шеѧ . и҆ сꙋди́те пра́веднѡ пᲂсредѣ̀ мꙋ́жа , и҆ пᲂсредѣ̀ бра́тїи є҆гѡ̀ , и҆ пᲂсредѣ̀ прише́льца є҆гѡ̀ . непᲂз̾на́йте лица̀ в̾ сꙋдѣ̀ , ма́лᲂмꙋ и҆ вели́кᲂмꙋ сꙋ́диши , не ᲂу҆стыди́шисѧ лица̀ чл҃ча , ꙗ҆́кѡ сꙋ́дъ бж҃їи є҆́сть .

Ѿ= втᲂра́гѡ зако́на , чте́нїе . =

Во́ днехъ ѻ҆́нѣхъ , речѐ мѡѷсе́й к̾ сн҃ᲂвѡ́мъ і҆и҃левᲂмъ , сѐ гдⷭ҇а бг҃а твᲂегѡ̀ нб҃о , и҆ нб҃о нб҃сѐ , землѧ̀ и҆ всѧ̀ є҆ли́ка сꙋ́ть в̾ ни́хъ . ѻ҆ба́че ѻ҆ц҃ы ва́ша и҆збра̀ гдⷭ҇ь , люби́ти є҆гѡ̀ вᲂи́стинꙋ . и҆ и҆збра̀ сѣ́мѧ и҆́хъ по ни́хъ ва́съ па́че всѣ́хъ ꙗ҆зы́къ , по́ дни се́мъ ѡ҆брѣ́жите жестᲂсе́рдїе ва́ше , и҆ вы́ѧ ва́ша не ѡ҆жести́те к̾ тᲂмꙋ̀ . и҆́бо гдⷭ҇ь бг҃ъ на́шъ , се́й бг҃ъ бг҃ѡ́мъ и҆ гдⷭ҇ь гдⷭ҇емъ . бг҃ъ вели́кїи , и҆ крѣ́пкїи , и҆ стра́шныи , и҆́же недиви́тсѧ лицꙋ̀ , нижѐ прїе́млетъ да́ра . твᲂрѧ̀ сꙋ́дъ прише́льцꙋ , и҆ си́рᲂмꙋ и҆ вдᲂви́цѣ . и҆ лю́битъ прише́льца , да́ти є҆мꙋ̀ хлѣ́бъ и҆ ри́зꙋ . гдⷭ҇а бг҃а твᲂегѡ̀ ᲂу҆бᲂи́шисѧ , и҆ тᲂмꙋ̀ є҆ди́нᲂмꙋ пᲂслꙋ́жиши , и҆ к̾ немꙋ̀ прилѣпи́шисѧ , и҆ и҆́менемъ є҆гѡ̀ клене́шисѧ . то́й хвала̀ твᲂѧ̀ , и҆ то́й бг҃ъ тво́й , и҆́же сᲂтвᲂри́лъ ти є҆́сть вели́каѧ и҆ сла́внаѧ сїѧ̀ , ꙗ҆́же ви́дѣста ѻ҆́чи твᲂѝ .

На литі́и , ѡ҆бы́чныѧ . стихѣ́ра хра́мꙋ . и҆ стⷯры во ѻ҆кта́и , па́вла а҆мᲂрре́йскагѡ . сла́ва . гла́съ , г҃ . Пра́ѻ҆ц҃ъ сᲂвᲂкꙋпле́нїе празднᲂлю́бцы прїиди́те , ѱл҃о́мски вᲂсхва́лимъ , а҆да́ма пра́ѻ҆ц҃а . є҆нѡ́ха , нѡ́ѧ , мельхиседе́ка . а҆враа́ма , и҆саа́ка , и҆ і҆а́кѡва . по зако́нѣ мѡѷсе́ѧ , и҆ а҆арѡ́на , и҆ і҆сꙋ́са , самꙋ́ила , и҆ дв҃да . с̾ ни́ми же и҆са́їю . і҆єремі́ю , і҆єзекі́илѧ . и҆ данїи́ла , и҆ ѻ҆́ба на́десѧте . в̾кꙋ́пѣ и҆лїю̀ , и҆ є҆лисе́ѧ , и҆ всѣ́хъ . заха́рїю , и҆ крⷭ҇тлѧ , и҆ прᲂпᲂвѣ́давшїѧ хрⷭ҇та̀ , жи́знь и҆ вᲂскрⷭ҇нїе ро́дꙋ на́шемꙋ .

=и҆ ны́нѣ , боⷢ҇ . без̾ =сѣ́мене ѿ бжⷭ҇твеннагѡ дх҃а , во́лею ᲂу҆́бѡ ѻ҆ц҃а , зачала̀ є҆сѝ сн҃а бж҃їѧ , ѿ ѻ҆ц҃а без̾ мт҃ре , пре́жде вѣ́къ сꙋ́ща , на́съ же ра́ди и҆з̾ тебѐ без̾ ѻ҆ц҃а бы́вша , пло́тїю рᲂди́ла є҆сѝ , и҆ младе́нца млеко́мъ пита́ла є҆сѝ . тѣ́мже непреста́й мᲂлѧ́щи , и҆зба́витисѧ ѿ бѣ́дъ дш҃а́мъ на́шимъ .

На стихо́внѣ , стⷯра вᲂскрⷭ҇на , и҆ по а҆лфави́тꙋ . сла́ва . гла́съ , в҃ . Ра́дꙋйтесѧ пррⷪ҇цы честні́и , и҆́же зако́нъ гдⷭ҇нь до́брѣ ᲂу҆чини́вше . и҆ вѣ́рѣ ꙗ҆́вльшесѧ непᲂбѣди́мїи стᲂлпѝ и҆ неꙋкло́ннїи . вы́ бо хᲂда́таи ꙗ҆ви́стесѧ , но́вагѡ завѣ́та хрⷭ҇то́ва . и҆ преста́вльшесѧ к̾ нб҃сѝ , тᲂго̀ мᲂли́те , ᲂу҆мири́ти ми́ръ , и҆ спастѝ дш҃а на́ша .

и҆ ны́нѣ , боⷢ҇ . Ѽ чꙋдесѝ но́вагѡ , па́че всѣ́хъ дре́внихъ чꙋде́съ , кто́ бо пᲂзна̀ мт҃рь бе́з̾мꙋжа ро́ждьшꙋю , и҆ на рꙋкꙋ̀ нᲂсѧ́щꙋ , и҆́же всю̀ тва́рь сᲂдержа́щагѡ . бж҃їе є҆́сть сло́во ро́ждьшесѧ . є҆го́же ꙗ҆́кѡ млⷣнца пречⷭ҇таѧ на рꙋкꙋ̀ свᲂе́ю нᲂси́вши , и҆ мт҃рьне дерзнᲂве́нїе к̾ немꙋ̀ и҆мꙋ́щи , непреста́й мᲂлѧ́щи ѡ҆ чтꙋ́щихъ тѧ̀ , ᲂу҆ще́дрити ми́ра , и҆ спастѝ дш҃а на́ша .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь : Бцⷣе дв҃о ра́дꙋисѧ , двⷤа . и҆ ѻ҆ц҃е́мъ : Ве́лїѧ вѣ́ры и҆справле́нїѧ . =є҆ди́нᲂжды . =

А҆́ще ли нѣ́сть бдѣ́нїе , трᲂпа́рь вᲂскрⷭ҇нъ . сла́ва , ѻ҆ц҃е́мъ . и҆ ны́нѣ , боⷢ҇ , по́ гласꙋ .

На ᲂу҆́трени , на бг҃ъ гдⷭ҇ь , трᲂпа́рь вᲂскрⷭ҇нъ , двⷤа . сла́ва , ѻ҆ц҃е́мъ . Ве́лїѧ вѣ́ры и҆справле́нїѧ , во и҆сто́чницѣ пла́меннѣ ꙗ҆́кѡ на вᲂдѣ̀ пᲂко́йнѣ , ст҃і́и трїѐ ѻ҆́трᲂцы ра́дᲂвахꙋсѧ . и҆ прᲂро́къ данїи́лъ , льво́мъ па́стырь ꙗ҆́кѡ ѻ҆вца́мъ ꙗ҆влѧ́шесѧ . тѣ́хъ мл҃твами хрⷭ҇тѐ бж҃е пᲂми́лꙋй на́съ . и҆ ны́нѣ , боⷢ҇ . Всѧ̀ па́че смы́сла , всѧ̀ пресла́внаѧ твᲂѧ̀ бцⷣе та́инства , чистᲂто́ю запечатлѣ́нна , и҆ дв҃ствᲂмъ храни́ма , мт҃и разꙋмѣ́сѧ нело́жна , бг҃а ро́ждьши и҆́стиннаго , тᲂгѡ̀ мᲂлѝ спасти́сѧ дш҃а́мъ на́шимъ .

Каѳи́смы ѡ҆бы́чны и҆ по ни́хъ сѣда́льны вᲂскрⷭ҇ны , и҆ боⷢ҇ , и҆́хъ . По непᲂро́чнахъ , трᲂпарѝ и҆́хъ , и҆ ѵ҆пако́й , гла́сꙋ . По мнᲂгᲂмлⷭ҇тиво , сѣда́ленъ , ѻ҆ц҃е́мъ . гла́съ , и҃ . Пра́здникъ пра́зднꙋемъ вѣ́рнїи , ѻ҆ц҃ъ бжⷭ҇твеныхъ ра́дᲂстнѡ , а҆да́ма и҆ а҆́велѧ чтꙋ́ще . си́ѳа , и҆ є҆нѡ́са бл҃жа́ще , є҆нѡ́ха , нѡ́ѧ . си́ма же и҆ а҆ѳе́та вᲂспᲂе́мъ . а҆враа́ма пре́же зако́на вѣ́рᲂю прᲂсїѧ́вша . и҆ бжⷭ҇твенаго и҆саа́ка і҆а́кѡва и҆ і҆ꙋ́дꙋ . леві́ю , и҆ цѣлᲂмꙋ́драго і҆ѡ́сифа вᲂсхва́лимъ . и҆ вѣ́рнѡ вᲂзᲂпїе́мъ , бг҃ᲂно́снїи пра́ѻ҆ц҃ы , мᲂли́те хрⷭ҇та̀ бг҃а грѣхо́въ ѡ҆ставле́нїе пᲂда́ти , чтꙋ́щимъ любо́вїю ст҃ꙋ́ю па́мѧть ва́шꙋ . сла́ва , и҆ ны́нѣ , то́йже . степе́нна , гла́сꙋ . прᲂки́менъ . и҆ всѧ́ко дыха́нїе . є҆ѵⷢ҇а́лїе , вᲂскрⷭ҇но . и҆ вᲂскрⷭ҇нїе хрⷭ҇то́во . ѱл҃о́мъ , н҃ . и҆ стⷯра , вᲂскрⷭ҇на . =Кано́нъ вᲂскрⷭ҇нъ со і҆рмᲂсо́мъ , на д҃ . и҆ крⷭ҇тᲂвᲂскрⷭ҇нъ , на в҃ . и҆ бцⷣѣ , на в҃ . и҆ ѻ҆ц҃е́мъ , на́ ѕ҃ . гла́съ , ѕ҃ . пѣ́снь , а҃ . і҆рмо́съ . Вᲂлно́ю мᲂрско́ю . =запѣ́въ : Ст҃і́и ѻ҆ц҃ы , мᲂли́те бг҃а ѡ҆ на́съ . Дне́сь сᲂбо́ръ бжⷭ҇твеныхъ ѻ҆ц҃ъ хрⷭ҇то́во ржⷭ҇тво̀ пред̾пра́здньствꙋетъ свѣ́тлѡ . и҆ прᲂписꙋ́етъ сїѐ пресла́внаѧ бл҃гᲂда́ть . а҆враа́мъ бо ѻ҆́бразъ зако́нꙋ , и҆ ѻ҆́трᲂцы трїѐ бы́ли сꙋ́ть . Дре́вле прїе́млетъ бжⷭ҇тво̀ є҆ди́но трисᲂста́внѡ , сщ҃е́нныи а҆враа́мъ . ны́нѣ же сᲂпресто́льнᲂе сло́во ѻ҆́ч҃ее , бжⷭ҇твенымъ дх҃ᲂмъ к̾ дѣ́темъ прихо́дитъ , сла́внѡ вᲂсхвалѧ́емо . Число́мъ и҆ вѣ́рᲂю бжⷭ҇твеныѧ трⷪ҇цы , без̾бо́жїе низве́ргше , въ пещѝ дѣ́ти ѻ҆́бразы чꙋ́вствеными , сᲂкрᲂве́нныѧ бж҃їѧ та́йны ми́рᲂви прᲂѧви́ша . сла́ва . А҆враа́мъ и҆зба́висѧ ѿ рꙋкѝ непра́ведныѧ , пла́мене же пе́щнагѡ бжⷭ҇твенїи ѻ҆́трᲂцы и҆нᲂгда̀ . и҆ данїи́лъ прⷪ҇ркъ ѿ ѕвѣре́й ро́ва спасе́сѧ . тѣ́мже ны́нѣ ржⷭ҇тво̀ хрⷭ҇то́во пред̾пра́зднꙋемъ . и҆ ны́нѣ , боⷢ҇ . Ѡ҆бра́дᲂваннаѧ без̾невѣ́стнаѧ мт҃и , дв҃о нетлѣ́ннаѧ , бл҃жи́мъ тѧ . и҆́бо ѿ́ рᲂда а҆враа́млѧ , и҆ пле́мене дв҃дᲂва , прᲂцвѣла̀ є҆сѝ . хрⷭ҇та́ же рᲂдила̀ є҆сѝ , прᲂро́ки прᲂпᲂвѣ́даннагѡ дре́вле .

катава́сїѧ : Хрⷭ҇то́съ ражда́етсѧ сла́вите . хрⷭ҇то́съ с̾ нб҃сѐ срѧ́щите , хрⷭ҇то́съ на землѝ вᲂз̾нᲂси́тесѧ . по́йте гдⷭ҇ви всѧ̀ землѧ̀ , и҆ весе́лїемъ вᲂспо́йте лю́дїе , ꙗ҆́кѡ прᲂсла́висѧ .

пѣ́снь , г҃ . і҆рмо́съ . Тебѣ̀ на вᲂда́хъ . И҆́же по ѻ҆́бразꙋ сла́вꙋ , и҆ по пᲂдо́бїю бж҃їю , вѣ́рнѡ сᲂблюда́юще . злата́гѡ ѻ҆́браза пла́мень ѻ҆гне́мъ дх҃о́внымъ страда́льчески ᲂу҆гаси́ша ѻ҆́трᲂцы . пᲂю́ще , є҆ди́нагѡ гдⷭ҇а зна́емъ . Мꙋ́дрᲂстїю ѡ҆блᲂже́ни и҆ дх҃а си́лᲂю , ѻ҆́трᲂцы , мꙋдрецы̀ вавѷлѡ́нскїѧ плѣни́вше пᲂсрами́ша . и҆ де́рзᲂстнѣ взыва́хꙋ , нѣ́сть ст҃ъ ꙗ҆́кᲂже ты̀ гдⷭ҇и взыва́юще . сла́ва . Ра́дꙋетсѧ и҆ ликꙋ́етъ с̾ дѣтьмѝ и҆ прⷪ҇рки зако́нъ , и҆ пред̾ и҆гра́етъ гдⷭ҇ню бжⷭ҇твенᲂмꙋ прише́ствїю дне́сь . и҆ а҆враа́мъ ра́дꙋетсѧ , ꙗ҆́кѡ ѿ сѣ́мене є҆гѡ̀ ви́дѣ гдⷭ҇а вᲂплᲂща́ема . и҆ нн҃ѣ , боⷢ҇ . Зача́тїе без̾ стра́сти , прїѧ́тїе па́че сло́ва про́йде , ржⷭ҇тва̀ твᲂегѡ̀ бцⷣе . и҆́бо прᲂро́ки прᲂпᲂвѣ́даннᲂе , па́че є҆стества̀ та́инство на́мъ ꙗ҆ви́сѧ сло́во бж҃їе , сы́и бг҃ъ .

катава́сїѧ : Первᲂвѣ́чнᲂмꙋ ѿ ѻ҆ц҃а рᲂжде́нꙋ нетлѣ́ннѡ сн҃ꙋ , и҆ въ пᲂслѣ́днѧѧ ѿ дв҃ы , вᲂплᲂще́нꙋ без̾ сѣ́мене , хрⷭ҇тꙋ̀ бг҃ꙋ вᲂзᲂпїе́мъ , вᲂз̾дви́гнꙋвыи ро́гъ на́шъ ст҃ъ є҆сѝ гдⷭ҇и .

кᲂнда́къ , и҆ и҆́кᲂсъ , вᲂскрⷭ҇нъ . сла́ва , и҆ ны́нѣ . ѵ҆пако́й . гла́съ , и҃ . А҆́нг҃лъ дѣ́темъ ѡ҆рᲂсѝ пе́щь , ны́нѣ же жена́мъ пла́чь вᲂз̾бранѧ́ше гл҃ѧ , что̀ принесо́сте мѵ́ро . кᲂго̀ и҆́щете во́ грᲂбѣ ; вᲂскр҃се хрⷭ҇то́съ бг҃ъ . є҆́сть бо живо́тъ и҆ сп҃съ ро́дꙋ чл҃ческᲂмꙋ .

пѣ́снь , д҃ . і҆рмо́съ . Є҆же на крⷭ҇тѣ̀ твᲂѐ . Ѻ҆ц҃е́мъ верхо́вныѧ , а҆враа́ма и҆саа́ка и҆ і҆а́кѡва пᲂчте́мъ . ꙗ҆́кѡ ѿ тѣ́хъ сѣ́мене вᲂсїѧ̀ хрⷭ҇то́съ , вᲂпло́щьсѧ ѿ дв҃ы ꙗ҆́кѡ всеси́ленъ . Прᲂписꙋ́ѧ бꙋ́дꙋщаѧ сше́ствїемъ хрⷭ҇то́вымъ данїи́лъ , ѕвѣ́ри ꙗ҆́кѡ ѻ҆́вцы пᲂказа̀ . всѣ́мъ ꙗ҆́вѣ прᲂзрѣ́въ бꙋ́дꙋщаѧ , ꙗ҆́кѡ прᲂро́къ бж҃їи . сла́ва . Грѣхо́внымъ не привлеченѝ ꙗ҆́дᲂмъ , ѿ пла́мене и҆зба́вистесѧ а҆́бїе . зла́та бо чистѣ́йше сꙋ́ще мꙋ́дрїи , в̾ пещѝ ле́стнѣй не ѡ҆пали́стесѧ . и҆ ны́нѣ , боⷢ҇ . Велегла́снѡ прᲂпᲂвѣ́дꙋетсѧ ча́ѧнїе ꙗ҆зы́кѡмъ , и҆ спасе́нїе ми́рꙋ , є҆́же па́че є҆стества̀ ржⷭ҇тво̀ твᲂѐ прест҃а́ѧ чи́стаѧ . є҆го́же пᲂе́тъ ѻ҆те́ческаѧ па́мѧть дне́сь .

катава́сїѧ : Же́ѕлъ и҆з̾ ко́рене і҆єссе́ѡва , и҆ цвѣ́тъ ѿ негѡ̀ хрⷭ҇тѐ ѿ дв҃ы прᲂзѧ́блъ є҆сѝ , и҆з̾ гᲂры̀ хва́льныѧ присѣ́нныѧ ча́сты прїи́де вᲂпло́щьсѧ , ѿ без̾мꙋ́жныѧ беспло́тныи бг҃ъ , сла́ва си́лѣ твᲂе́й гдⷭ҇и .

пѣ́снь , є҃ . і҆рмо́съ . Бг҃ᲂѧвле́нїѧ ти хрⷭ҇тѐ . Ѻ҆те́ческᲂе нача́ло , ꙗ҆́кѡ нача́льника зако́нꙋ и҆ бл҃гᲂда́ти , и҆́же ѿ́ рᲂда а҆враа́млѧ дне́сь данїи́ла бжⷭ҇твенагѡ пᲂчте́мъ . ꙗ҆́кѡ прᲂро́къ бо бж҃їи , прᲂвᲂзвѣстѝ хрⷭ҇та̀ ѿ дв҃ы . и҆ сегѡ̀ пред̾ ᲂу҆срѣта́етъ бжⷭ҇твенᲂе рᲂжде́нїе . Прᲂписа́вше ꙗ҆́снѡ , є҆́же къ на́мъ бж҃їе прише́ствїе , а҆́нг҃лᲂвымъ наи́тїемъ , ᲂу҆гаси́ша а҆враа́мстїи ѻ҆́трᲂцы пе́щь . и҆ тꙋчеро́сенъ ѻ҆́гнь сᲂдѣ́лавше , в̾ се́мъ вѣ́рᲂю ѻ҆́браза злата́гѡ сла́вꙋ и҆знꙋри́ша . сла́ва . Заградѝ ᲂу҆ста̀ ѕвѣре́мъ данїи́лъ в̾ ро́вѣ дх҃ᲂмъ , ѻ҆́гненнꙋю же крѣ́пᲂсть ᲂу҆гаси́ша а҆враа́мстїи ѻ҆́трᲂцы бл҃гᲂда́тїю . и҆ спа́сшесѧ сі́и ѿ тлѝ , вᲂзвѣща́ютъ хрⷭ҇та̀ ѿ дв҃ы . мᲂлѧ́ще ꙗ҆́кѡ и҆зба́вителѧ спасе́нїѧ на́шегѡ . и҆ ны́нѣ , боⷢ҇ . Бжⷭ҇твенымъ дх҃ᲂмъ сказꙋ́ѧ , є҆́же ѿ на́съ без̾стра́стнᲂе твᲂѐ прїѧ́тїе , и҆са́їѧ вᲂпїѧ́ше гдⷭ҇и , бо́дрствꙋй зако́нᲂмъ бл҃гᲂда́ти . и҆́же ѿ́ рᲂда ᲂу҆́бѡ а҆враа́млѧ , ѿ пле́мене же і҆ꙋ́дᲂва по́ плᲂти , дв҃аѧ без̾ сѣ́мене грѧде́тъ ражда́ющи .

катава́сїѧ : Бг҃ъ сы́и ми́ра , ѻ҆ц҃ъ щедро́тамъ , вели́кагѡ сᲂвѣ́та ти а҆́нг҃ла , ми́ръ пᲂдава́юща , пᲂсла́лъ є҆сѝ на́мъ . тѣ́мъ бг҃ᲂразꙋ́мїѧ к̾ свѣ́тꙋ наставлѧ́еми , ѿ́ нᲂщи ᲂу҆́тренююще , славᲂсло́вимъ тѧ̀ чл҃кᲂлю́бче .

пѣ́снь , ѕ҃ . і҆рмо́съ . Жите́йскагѡ мо́рѧ . Нра́въ страннᲂлюби́въ , вѣ́ра же высᲂка̀ , а҆враа́ма сꙋ́ща пра́ѻ҆ц҃а . тѣ́мже бжⷭ҇твеныѧ та́йны прїе́мъ ра́дᲂвашесѧ , пред̾ хрⷭ҇то́мъ же текі́и ны́нѣ весели́тсѧ . Тва́рь пᲂвинꙋ̀ ны́нѣ вѣ́ра ѻ҆́трᲂческа , да́рᲂмъ зижди́телѧ . ѻ҆́гнь бо всеѧ́децъ и҆ без̾сты́дныи ᲂу҆стыдѣ́сѧ , чтꙋ́щихъ ѻ҆́гненагѡ дѣ́лателѧ і҆с҃а хрⷭ҇та̀ . сла́ва . Мирско́е ди́вїе прише́ствїе и҆счита́ти ѡ҆бы́че . ко смире́нїю глꙋбо́кᲂмꙋ бг҃ᲂлѣ́пнѡ . загради́въ ᲂу҆ста̀ льво́мъ данїи́лъ прᲂро́къ в̾ ро́вѣ и҆нᲂгда̀ . =и҆ ны́нѣ , боⷢ҇ . и҆з̾ =лᲂже́снъ рᲂдила̀ є҆сѝ дв҃ческихъ хрⷭ҇та̀ , мр҃і́е мт҃и без̾мꙋ́жнаѧ . є҆го́же прⷪ҇рцы ви́дѣвше дх҃о́внѣ , пред̾ ни́мъ ликꙋ́ютъ ѻ҆ц҃ы рᲂже́ственаѧ .

катава́сїѧ : Оу҆тро́ба і҆ѡ́нꙋ младе́нца невредѝ , мᲂрскі́и ѕвѣ́рь , і҆а́кѡва прїѧ́тъ . въ дв҃цꙋ ᲂу҆́бѡ все́льсѧ сло́во , и҆ пло́ть прїи́мъ , про́йде сᲂхранѝ неи҆стлѣ́ннꙋ . и҆́же бо непᲂстрада̀ и҆стлѣ́нїѧ , ро́ждьшꙋю сᲂхранѝ неврежде́ннꙋ .

кᲂнда́къ . гла́съ , ѕ҃ . Рꙋкᲂпи́саннаго ѻ҆́браза непᲂче́тше . но неѡ҆пи́саннымъ сꙋщество́мъ вᲂѡ҆рꙋ́жшесѧ требл҃же́ннїи . в̾ тꙋзѣ̀ ѻ҆́гненнѣй прᲂсла́вистесѧ . пᲂсреди́ же пла́мене непᲂстᲂѧ́ннагѡ стᲂѧ́ще , бг҃а призва́сте . ᲂу҆скᲂрѝ ще́дрыи и҆ пᲂтщи́сѧ ꙗ҆́кѡ млⷭ҇тивъ на́ пᲂмᲂщь на́шꙋ , ꙗ҆́кѡ мо́жеши хᲂтѧ́и . и҆́кᲂсъ . Прᲂстрѝ свᲂю̀ рꙋ́кꙋ , є҆ѧ́же ра́ди дре́вле прїѧ́ша и҆скꙋше́нїе є҆гѵ́птѧне бᲂрю́щесѧ , и҆ є҆вре́ѧне бᲂри́ми . не ѡ҆ста́ви же на́съ , да непо́жретъ на́съ сме́рть жа́ждꙋщаѧ на́съ , и҆ сатана̀ ненави́дѧи на́съ . но прибли́жисѧ на́мъ , и҆ пᲂщадѝ дш҃а на́ша , ꙗ҆́кᲂже пᲂщадѣ̀ и҆нᲂгда̀ ѻ҆́трᲂки свᲂѧ̀ , и҆́же в̾ вавѷлѡ́нѣ непреста́ннѡ сла́вѧщихъ тѧ , и҆ вве́ржены тебѐ ра́ди в̾ пе́щь . и҆ ѿ сеѧ̀ вᲂпїю́щихъ ти , ᲂу҆скᲂрѝ ще́дрыи и҆ пᲂтщи́сѧ ꙗ҆́кѡ млⷭ҇тивъ на́ пᲂмᲂщь на́шꙋ . ꙗ҆́кѡ мо́жеши хᲂтѧ́и .

пѣ́снь , з҃ . і҆рмо́съ . Неи҆зрече́ннᲂе чꙋ́до . Хрⷭ҇та̀ рᲂди́въ , є҆́же по́ плᲂти вѣ́рᲂю рᲂдᲂнача́льниче ѻ҆́ч҃е а҆враа́ме , ꙗ҆ви́сѧ ꙗ҆зы́кᲂмъ дх҃ᲂмъ ѻ҆ц҃ъ ꙗ҆́вѣ , во спасе́нїе на́мъ пᲂю́щимъ , и҆зба́вителю бж҃е бл҃гᲂслᲂве́нъ є҆сѝ . Без̾дꙋ́шныхъ шꙋ́мъ , во тщѐ вᲂсклица́ющихъ , ѡ҆дш҃евле́ныхъ пᲂсрамѝ пѣ́снь . пе́щь бо ѻ҆гне́мъ гᲂрѧ́щꙋю , пло́тїю пᲂпира́юще ѻ҆́трᲂцы невреди́мѡ , и҆зба́вителю пᲂю́ще , бж҃е бл҃гᲂслᲂве́нъ є҆сѝ . сла́ва . Видѣ́нїемъ вᲂзрѣ́въ дх҃о́внымъ , дре́вле прᲂро́къ данїи́лъ , хрⷭ҇то́во ꙗ҆вѝ втᲂро́е прише́ствїе , и҆ в̾ не́мъ стра́шнаѧ прᲂвᲂзвѣща́етъ . вᲂпїѧ̀ , и҆зба́вителю бж҃е бл҃гᲂслᲂве́нъ є҆сѝ . и҆ ны́нѣ , боⷢ҇ . Стра́ннᲂе чꙋ́до , є҆́же во прⷪ҇рцѣхъ слᲂвꙋ́щее , и҆ ѻ҆ц҃е́мъ дре́вле ꙗ҆вле́нно . дв҃а чи́стаѧ рᲂди́ти хᲂтѧ́щи прїи́де , на спасе́нїе на́мъ пᲂю́щимъ , и҆зба́вителю бж҃е бл҃гᲂслᲂве́нъ є҆сѝ .

катава́сїѧ : Ѻ҆́трᲂцы во бл҃зѣ́й вѣ́рѣ вᲂспита́ни , нечести́ва велѣ́нїѧ небре́гше , ѻ҆́гненнагѡ преще́нїѧ не ᲂу҆бᲂѧ́шасѧ . но пᲂсредѝ пла́мене стᲂѧ́ще пᲂѧ́хꙋ , ѻ҆ц҃е́мъ бг҃ъ бл҃гᲂслᲂве́нъ є҆сѝ .

пѣ́снь , и҃ . і҆рмо́съ . Оу҆жасни́сѧ бᲂѧ́исѧ нб҃о . Твᲂѐ закᲂле́нїе пред̾ вᲂѡ҆бража́ѧ а҆враа́мъ хрⷭ҇тѐ , є҆го́же рᲂдѝ сн҃а в̾ гᲂрѣ̀ пᲂвинꙋ́ѧсѧ тебѣ̀ , ꙗ҆́кᲂже ѻ҆вча̀ вᲂз̾ведѐ же́ртвꙋ твᲂрѧ̀ . но вᲂз̾врати́сѧ ра́дꙋѧсѧ съ ни́мъ , сла́вѧ и҆ превᲂзнᲂсѧ́ тѧ , и҆зба́вителѧ ми́рꙋ . Пла́менемъ не дѣ́лательнымъ хрⷭ҇тѐ , ѡ҆блече́нꙋ ти ꙗ҆́кѡ ри́зᲂю бжⷭ҇твенᲂю , ѻ҆́гнь ст҃ы́хъ ѻ҆́трᲂкъ твᲂи́хъ ᲂу҆гасѝ ѕѣлѡ̀ , и҆ рᲂса̀ твᲂи́мъ схᲂжде́нїемъ пᲂю́щимъ шꙋмѧ́ше . сщ҃е́ннїи по́йте , и҆ превᲂзнᲂси́те є҆гѡ̀ во́ вѣки . бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Да́нъ бы́сть льво́мъ на снѣ́дь , сꙋдо́мъ непра́веднымъ , прᲂро́къ данїи́лъ . но и҆мѧ́ше пᲂвелѣ́нїемъ вᲂздержа́нїе , съ по́стники бл҃гᲂче́стнѡ ѕвѣ́ри , во глꙋбинѣ̀ ро́вища . тᲂгѡ̀ мл҃твами , а҆враа́ма же и҆ ѻ҆́трᲂкъ , спасѝ в̾ ми́рѣ хрⷭ҇тѐ пᲂю́щїѧ тѧ . и҆ ны́нѣ , боⷢ҇ . Є҆го́же прᲂвᲂзвѣсти́ша вѣ́рнѡ прᲂро́честїи гла́си , і҆с҃а є҆мманꙋ́ила , в̾ чл҃честѣ ѻ҆́бразѣ грѧдꙋ́ща , бж҃їѧ и҆ ѻ҆́ч҃а , сн҃а же и҆ сᲂбез̾нача́льна сло́ва , ѿ дх҃а ст҃а́гѡ , дв҃аѧ мр҃і́ѧ ражда́етъ без̾мꙋ́жнѡ , в̾ виѳлїе́мѣ гра́дѣ .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . Чꙋ́до преве́лїе , рᲂсᲂда́вицꙋ вᲂѡ҆бразѝ пе́щь ѻ҆́бразᲂмъ . ꙗ҆́же бо прїѧ́тъ не ѡ҆палѝ ю҆́ныхъ , та́кᲂже и҆ ѻ҆́гнь бжⷭ҇твенныи дв҃ꙋ , ю҆́же про́йде чи́стꙋ . тѣ́мъ пᲂю́ще вᲂзᲂпїе́мъ , да блгⷭ҇ви́тъ тва́рь всѧ́каѧ гдⷭ҇а , и҆ превᲂзно́ситъ є҆гѡ̀ во́ вѣки =[пᲂкло́н̾] . =

пѣ́снь , ѳ҃ . і҆рмо́съ . Нерыда́й менѐ мт҃и . И҆́же пре́жде зако́на ѻ҆ц҃ъ , пра́зднество твᲂрѧ́щїи , и҆́же ѿ ни́хъ бг҃ᲂлѣ́пнѡ пᲂчте́мъ хрⷭ҇та̀ . а҆враа́мъ бо в̾кꙋ́пѣ , и҆ и҆саа́къ и҆ і҆а́кѡвъ , прᲂро́кѡмъ и҆ зако́нꙋ ꙗ҆ви́шасѧ ѡ҆снᲂва́нїе и҆ бл҃гᲂда́ти . вѣ́рᲂю дх҃ꙋ прᲂпᲂвѣ́дницы . И҆́же ѻ҆гне́мъ пᲂказа́выи мѡѷсе́ѡви в̾ кꙋпинѣ̀ , па́че ᲂу҆ма̀ бг҃ᲂви́днѡ та́инство , бг҃ъ въ пе́щь к̾ дѣ́темъ сше́дъ . то́йже ѻ҆гне́мъ є҆сте́ственымъ бжⷭ҇тва̀ є҆гѡ̀ , пе́щныи пла́мень хла́дъ пᲂказа́лъ є҆́сть . сла́ва . со =а҆враа́мᲂмъ сше́дшесѧ прест҃ы́ѧ дѣ́ти , и҆ данїи́лъ ди́вныи прᲂро́къ бж҃їи , и҆ и҆саа́къ и҆ і҆а́кѡвъ . с̾ мѡѷсе́ѡмъ , и҆ а҆арѡ́нъ , хрⷭ҇то́ви пре́жде ржⷭ҇тва̀ ликᲂствꙋ́юще вѣ́рнѡ , мо́лѧтъ непреста́ннѡ во є҆́же спасти́сѧ на́мъ . =и҆ ны́нѣ , боⷢ҇ . Сра́дꙋетсѧ всѧ̀ тва́рь , твᲂемꙋ̀ ржⷭ҇твꙋ̀ дв҃цѣ . и҆́бо є҆де́ма виѳлїе́мъ ѿве́рзе на́мъ . и҆ сѐ дре́ва живо́тнагѡ всѝ наслажда́ющесѧ вѣ́рнѡ вᲂпїе́мъ , прилѣ́жнѡ , мᲂли́твы на́ша влⷣчце и҆спо́лни .

катава́сїѧ : Та́инство стра́нно ви́жꙋ , и҆ пресла́вно . не́бо сꙋ́щꙋ пеще́рꙋ , престо́лъ херꙋви́мскїи , дв҃цꙋ , ꙗ҆́сли , вмѣсти́лище , в̾ни́хъ же вᲂз̾лежѐ невмѣсти́мыи хрⷭ҇то́съ бг҃ъ , є҆го́же хва́лѧще велича́емъ . =Дᲂсто́йнѡ є҆́сть . =

=и҆ ны́нѣ , боⷢ҇ , вᲂскрⷭ҇нъ во ѻ҆кта́и . =

На хвали́тѣхъ , стихѣ́ры вᲂскрⷭ҇ны , д҃ . и҆ ѻ҆ц҃е́мъ , на д҃ . =Стихѣ́ры , ѻ҆ц҃е́мъ . гла́съ , є҃ . поⷣ . р=а́дꙋйсѧ живᲂно́сныи . Вᲂзвы́си гла́съ вᲂи́стинꙋ , сїѡ́не бжⷭ҇твеныи гра́де , и҆ прᲂпᲂвѣ́ждь ѻ҆ц҃ъ бжⷭ҇твенꙋю па́мѧть , со а҆враа́мѡмъ и҆ и҆саа́кѡмъ и҆ і҆а́кѡвᲂмъ всесла́вными . се́бо со і҆ꙋ́дᲂю и҆ леві́емъ велича́емъ , мѡѷсе́ѧ вели́каго , и҆ а҆арѡ́на чꙋ́днаго . и҆ пᲂчте́мъ съ дв҃дᲂмъ і҆сꙋ́са , и҆ самꙋ́ила всѝ , пред̾пра́зднествꙋ хрⷭ҇то́вꙋ бжⷭ҇твенꙋю пᲂхвалꙋ̀ , пѣ́сньми бжⷭ҇твеными пле́щꙋще . ꙗ҆́же ѿ негѡ̀ бл҃гᲂда́ть ᲂу҆лꙋчи́ти про́симъ , ми́рᲂви дарᲂва́ти ве́лїю ми́лᲂсть . =двⷤа . =

сти́хъ : блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ ,꙳ хва́льнѡ и҆ прᲂсла́вленѡ и҆́мѧ твᲂѐ во́ вѣки . Грѧдѝ и҆́же на ѻ҆́гненꙋю и҆нᲂгда̀ сѣ́де , и҆лїинꙋ̀ бжⷭ҇твенꙋю кᲂлесни́цꙋ , бг҃ᲂмꙋ́дре є҆лисе́е , со і҆єзекі́илемъ во є҆ди́но , и҆ і҆ѡсі́е в̾кꙋ́пѣ сра́дꙋйтесѧ . честна́ѧ же двᲂенадесѧ́тице прᲂро́ческаѧ бг҃ᲂдᲂхнᲂве́ннаѧ , ржⷭ҇твꙋ̀ хрⷭ҇то́вꙋ сликꙋ́йте , и҆ в̾ пѣ́снехъ всѝ пра́веднїи вᲂспо́йте . ѻ҆́трᲂцы всебл҃же́ннїи , и҆́же рᲂсо́ю дх҃о́внᲂю ᲂу҆гаси́вшїи пла́мень пе́щныи , ѡ҆ на́съ мᲂли́тесѧ хрⷭ҇то́ви ѻ҆ц҃ы , низпᲂсла́ти дш҃а́мъ на́шимъ ве́лїю ми́лᲂсть .

сти́хъ : ꙗ҆́кѡ пра́веденъ є҆сѝ ѡ҆ всѧ́ческихъ ,꙳ ꙗ҆́же сᲂтвᲂри́лъ є҆сѝ на́мъ . Ꙗ҆ви́сѧ и҆́же ѿ́ вѣка на землѝ , прᲂпᲂвѣ́даемаѧ прⷪ҇ро́ки в̾ вѣща́нїихъ , дв҃аѧ бцⷣа . ю҆́же патрїа́рси премꙋ́дрїи , и҆ пра́ведныхъ сᲂбо́ри вᲂз̾вѣща́ютъ . съ ни́ми же сликꙋ́етъ и҆ же́нъ бл҃гᲂлѣ́пїе . са́рра , реве́ка , и҆ рахі́иль . а҆́нна же , и҆ сла́внаѧ марїа́мъ мѡѷсе́ѡва в̾кꙋ́пѣ . с̾ ни́ми сра́дꙋютсѧ и҆ мирсті́и кᲂнцы̀ , и҆ всѧ̀ тва́рь пᲂчита́етъ , ꙗ҆́кѡ зижди́тель всѣ́хъ и҆ бг҃ъ рᲂди́тисѧ прихо́дитъ . є҆́же да́ти ми́рᲂви ве́лїю ми́лᲂсть .

сла́ва . гла́съ , и҃ . Зако́нныхъ ᲂу҆че́нїи сᲂсло́вїе , пло́тьскᲂе ꙗ҆влѧ́етъ хрⷭ҇то́во бжⷭ҇твеннᲂе рᲂжде́нїе . и҆́же пре́жде зако́на бл҃гᲂда́ть бл҃гᲂвѣствꙋ́ющихъ , ꙗ҆́кѡ па́че зако́на в̾ вѣ́рѣ сꙋ́щаѧ . тѣ́мже тлѣ́нїѧ и҆змѣне́нїю сꙋ́щи хᲂда́тайствено , и҆́же во а҆́дѣ держи́мымъ дш҃а́мъ прᲂпᲂвѣ́дѧхꙋ , вᲂскрⷭ҇нїѧ ра́ди . гдⷭ҇и сла́ва тебѣ̀ .

и҆ ны́нѣ . гла́съ , в҃ . Преблгⷭ҇ве́на є҆сѝ бцⷣе дв҃о , вᲂпло́щшимбᲂсѧ и҆з̾ тебѐ , а҆́дъ плѣни́сѧ , а҆да́мъ призва́сѧ . клѧ́тва пᲂтреби́сѧ , и҆ є҆́вва свᲂбᲂди́сѧ . сме́рть ᲂу҆мертви́сѧ , и҆ мы̀ ѡ҆жи́хᲂмъ . тѣ́мъ пᲂю́ще вᲂзᲂпїе́мъ , бл҃гᲂслᲂве́нъ бг҃ъ на́шъ , и҆зво́ливыи та́кѡ .

Славᲂсло́вїе вели́кᲂе , и҆ ѿпꙋ́стъ . и҆ стихѣ́ра , є҆ѵⷢ҇а́льскаѧ . ча́съ , а҃ . и҆ кᲂне́чныи ѿпꙋ́стъ .

Н=а часѣ́хъ : =трᲂпа́рь , вᲂскрⷭ҇нъ . сла́ва , ѻ҆ц҃е́мъ .

=на а҃ мъ часѣ̀ : =кᲂнда́къ , вᲂскрⷭ҇нъ .

=на г҃ мъ часѣ̀ : =кᲂнда́къ , ѻ҆ц҃е́мъ .

=на ѕ҃ мъ часѣ̀ : =кᲂнда́къ , вᲂскрⷭ҇нъ .

=на ѳ҃ мъ часѣ̀ : =кᲂнда́къ , ѻ҆ц҃е́мъ .

На литꙋргі́и , бл҃же́нна , гла́сꙋ , на́ ѕ҃ . и҆ ѻ҆ц҃е́мъ , пѣ́снь , г҃ ѧ , на д҃ .

По вхо́дѣ , а҆́ще ли хра́мъ хрⷭ҇то́въ : трᲂпа́рь , вᲂскрⷭ҇нъ , и҆ ѻ҆ц҃е́мъ . кᲂнда́къ , вᲂскрⷭ҇нъ . сла́ва , ѻ҆ц҃е́мъ . и҆ ны́нѣ , хра́мꙋ .

По вхо́дѣ , а҆́ще хра́мъ бцⷣы : трᲂпа́рь , вᲂскрⷭ҇нъ , и҆ хра́мꙋ , и҆ ѻ҆ц҃е́мъ . кᲂнда́къ , вᲂскрⷭ҇нъ . сла́ва , ѻ҆ц҃е́мъ . и҆ ны́нѣ , хра́мꙋ .

По вхо́дѣ , а҆́ще ли хра́мъ ст҃ы́мъ : трᲂпа́рь , вᲂскрⷭ҇нъ , и҆ ѻ҆ц҃е́мъ , и҆ хра́мꙋ . кᲂнда́къ , вᲂскрⷭ҇нъ . сла́ва , хра́мꙋ . и҆ ны́нѣ , ѻ҆ц҃е́мъ .

прᲂки́менъ гла́сꙋ . и҆ дрꙋгі́и , пѣ́снь ѻ҆ц҃е́мъ . блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ , хва́льнѡ и҆ прᲂсла́вленѡ и҆́мѧ твᲂѐ во́ вѣки . а҆пⷭ҇лъ , къ є҆вре́ѡмъ . заⷱ҇ , тк҃и . та́же , а҆пⷭ҇лъ , рѧ́дъ . а҆ллилꙋ́їѧ , гла́сꙋ , и҆ ѻ҆ц҃е́мъ . бж҃е ᲂу҆ши́ма на́шима ᲂу҆слы́шахᲂмъ , и҆ ѻ҆ц҃ы на́ши вᲂзвѣсти́ша на́мъ . є҆ѵⷢ҇а́лїе , ѿ =матѳе́ѧ . зача́ло , а҃ . =та́же , є҆ѵⷢ҇а́лїе , рѧ́дъ . прича́стенъ , хвали́те гдⷭ҇а с̾ нб҃съ . дрꙋгі́и , ра́дꙋйтесѧ пра́веднїи ѡ҆́ гдⷭ҇ѣ .

А҆́щели слꙋчи́тсѧ , нлⷣѧ ст҃ы́хъ ѻ҆ц҃ъ , въ пред̾пра́зднествѣ , внꙋ́трь , к҃ гѡ днѝ . Си́рѣчь , въ к҃ , и҆ въ к҃а , и҆ въ к҃в , и҆ въ к҃г , быва́етъ слꙋ́жба си́це : Въ сꙋбо́тꙋ ве́черъ , на ма́лѣй вече́рни пᲂе́мъ по ѻ҆бы́чаю . =На вели́цѣй вече́рни , по ѻ҆бы́чнᲂй каѳи́смѣ , на гдⷭ҇и вᲂзва́хъ , стихѣ́ры , вᲂскрⷭ҇ны , г҃ . и҆ пред̾пра́зднествꙋ , г҃ . и҆ ѻ҆ц҃е́мъ , д҃ . Стихѣ́ры пред̾пра́зднествꙋ . гла́съ , ѕ҃ . поⷣ . в=сѐ ᲂу҆пᲂва́нїе . Незахᲂди́мᲂе сл҃нце ,꙳ ѿ дв҃ческихъ лᲂже́снъ ,꙳ вᲂсїѧ́ти и҆́детъ ,꙳ прᲂсвѣти́ти всю̀ пᲂд̾со́лнечнꙋю .꙳ чи́стыма ѻ҆чи́ма ,꙳ и҆ чи́стыми дѣѧ́ньми ,꙳ срѣ́сти сегѡ̀ пᲂтщи́мсѧ ,꙳ и҆ пᲂд̾ѧ́ти ны́нѣ ᲂу҆гᲂто́вимсѧ дх҃ᲂмъ ,꙳ грѧдꙋ́щаго во свᲂѧ̀ стра́ннымъ ржⷭ҇тво́мъ , ꙗ҆́кᲂже и҆зво́ли .꙳ ꙗ҆́кѡ да ᲂу҆стра́ншаѧсѧ на́съ є҆де́мскагѡ житїѧ̀ ,꙳ вᲂзведе́тъ ꙗ҆́кѡ милᲂсе́рдъ ,꙳ въ виѳлїе́мѣ ражда́етсѧ . И҆́же на плещꙋ̀ нᲂси́мыи херꙋви́мскꙋ , бг҃ъ сло́во ,꙳ пло́тїю по сᲂста́вꙋ сᲂє҆ди́ньсѧ ,꙳ в̾ пренепᲂро́чнᲂе чре́во всели́сѧ ,꙳ и҆ бы́сть чл҃къ и҆ на́ землю грѧде́тъ ,꙳ ѿ і҆ꙋ́дᲂва пле́мене рᲂди́тисѧ .꙳ верте́пъ ст҃ъ всѣ́хъ цр҃ю гᲂто́витсѧ ,꙳ ꙗ҆́кѡ ве́лїѧ пᲂла́та .꙳ ꙗ҆́сли же , ꙗ҆́кѡ прⷭ҇то́лъ ѻ҆гнезра́ченъ .꙳ в̾ ни́хже ꙗ҆́кѡ младе́нца ,꙳ дв҃аѧ мр҃і́ѧ пᲂлага́етъ ,꙳ во ѡ҆бнᲂвле́нїе сᲂзда́нїю ,꙳ неѡ҆держи́маго . Въ без̾слᲂве́сныхъ ꙗ҆́слѣхъ тѧ̀ пᲂлага́етъ дв҃аѧ ,꙳ бж҃їе сло́во без̾нача́льнᲂе ,꙳ нача́ло прїе́мша па́че є҆стества̀ .꙳ мᲂе́ бо разрѣши́ти безслᲂве́сїе грѧде́ши ,꙳ є҆́же пᲂд̾ѧ́хъ за́вистїю ѕмїи́нᲂю .꙳ пелена́ми же ѡ҆бви́тисѧ ,꙳ ꙗ҆́кѡ да расто́ргнеши рꙋ́бы и҆ плени́цы сᲂгрѣше́нїи мᲂи́хъ ,꙳ є҆ди́не бл҃же и҆ чл҃кᲂлю́бче .꙳ тѣ́мже тѧ̀ сла́влю пᲂѧ̀ ,꙳ и҆ пᲂклᲂнѧ́юсѧ ра́дᲂстнѡ ,꙳ є҆́же въ пло́ти прише́ствїю твᲂемꙋ̀ , и҆́мже свᲂбᲂди́хсѧ .

стихѣ́ры , ѻ҆ц҃е́мъ . гла́съ , ѕ҃ . пᲂдо́бенъ , то́йже . Ꙗ҆ви́сѧ ми́ра кᲂнце́мъ пра́ѻ҆ц҃ъ па́мѧть ,꙳ свѣ́та вᲂи́стинꙋ и҆спо́лнь ,꙳ и҆ зарѧ́ми бл҃гᲂда́ти сїѧ́ющи .꙳ хрⷭ҇то́съ бо сл҃нце свѣ́тло ,꙳ свы́ше прᲂсїѧ́въ и҆здале́ча ,꙳ ѕвѣзда́мъ сᲂбо́ръ веде́тъ ,꙳ с̾ ни́мъ вᲂсїѧ́вшїи .꙳ и҆ ржⷭ҇тво̀ бг҃ᲂчл҃ческᲂе ,꙳ ꙗ҆влѧ́етсѧ внꙋ́трь виѳлїе́ма бы́ти .꙳ всѝ ᲂу҆́бѡ вѣ́рᲂю сегѡ̀ рᲂжество̀ ,꙳ бл҃гᲂче́стнѡ пле́щꙋще ликꙋ́емъ ,꙳ хвалꙋ̀ пред̾пра́зднественꙋю . два́жды . Сла́вᲂю ᲂу҆краша́ютсѧ ,꙳ бжⷭ҇твенымъ сꙋщество́мъ .꙳ а҆да́мъ ра́дꙋетсѧ дне́сь ,꙳ ꙗ҆́кѡ ѻ҆снᲂва́нїе и҆ ᲂу҆тверже́нїе пра́ѻ҆ц҃емъ мꙋ́дрымъ .꙳ сᲂвзыграва́етжесѧ а҆́вель ,꙳ и҆ є҆нѡ́хъ весели́тсѧ .꙳ и҆ ликꙋ́етъ си́ѳъ , и҆ нѡ́е в̾кꙋ́пѣ .꙳ съ патрїа́рхи же пᲂе́тъ а҆враа́мъ всехва́льныи ,꙳ и҆ рᲂжде́нїе без̾ ѻ҆ц҃а ны́нѣ мелхиседе́къ ви́дитъ свы́ше .꙳ тѣ́мже бжⷭ҇твенꙋю па́мѧть хрⷭ҇то́вѣмъ пра́ѻ҆ц҃емъ ,꙳ и҆ мы̀ сверша́юще мо́лимъ ,꙳ спасти́сѧ дш҃а́мъ на́шимъ . Ѡ҆блиста̀ ве́селѡ ,꙳ и҆́же въ пещѝ дѣте́й бг҃ᲂмꙋ́дрыхъ сᲂбо́ръ ,꙳ и҆ хрⷭ҇то́во ржⷭ҇тво̀ прᲂпᲂвѣ́дꙋетъ на землѝ .꙳ ꙗ҆́кᲂже бо честна́ѧ рᲂса̀ сше́дъ гдⷭ҇ь ,꙳ ро́ждьшꙋю спаса́етъ неѡ҆па́льнѡ ,꙳ сᲂблюда́етъ непᲂро́чнꙋ ,꙳ и҆ ѡ҆бᲂгаща́етъ бжⷭ҇твеными дарᲂва́нїи .꙳ тѣ́мже и҆ бг҃ᲂпрїѧ́тныи ,꙳ ра́дꙋетсѧ данїи́лъ веселѧ́сѧ ,꙳ ка́мень бо и҆з̾ гᲂры̀ несѣ́ченъ прᲂви́дѣ ꙗ҆́вѣ .꙳ со дерзнᲂве́нїемъ мо́литсѧ ,꙳ ны́нѣ ѡ҆ дш҃а́хъ на́шихъ . сла́ва , ѻ҆ц҃е́мъ . гла́съ , ѕ҃ . Данїи́лъ мꙋ́жь жела́нїи , ка́мень без̾ рꙋкꙋ̀ ѿсѣче́нъ ви́дѣвъ тѧ̀ гдⷭ҇и , млⷣнца без̾ сѣ́мене рᲂжде́на , прᲂвᲂзгласи́ тѧ , и҆́же ѿ дв҃ы вᲂплᲂще́нна сло́ва . непремѣ́нна бг҃а , и҆ сп҃са дш҃а́мъ на́шимъ .

и҆ ны́нѣ , пред̾пра́зднествꙋ . гла́съ , то́йже . Верте́пе ᲂу҆гᲂто́висѧ , а҆́гница бо грѧде́тъ до́ждь нᲂсѧ́щи хрⷭ҇та̀ . ꙗ҆́сли же прїими́те , и҆́же сло́вᲂмъ разрѣ́шшагѡ без̾слᲂве́снагѡ дѣѧ́нїѧ , на́съ земнᲂро́дныхъ . па́стырїе же свирѧ́юще , свидѣ́тельствꙋйте чꙋ́до ᲂу҆жа́снѡ . и҆ вᲂлсвѝ ѿ перси́ды зла́то и҆ лива́нъ и҆ смѵ́рнꙋ , цр҃ю принеси́те , ꙗ҆́кѡ ꙗ҆ви́сѧ гдⷭ҇ь ѿ дв҃ы мт҃ре . є҆мꙋ́же и҆ прекло́ньшисѧ ра́бски мт҃и пᲂклᲂни́сѧ . и҆ вѣща́ше ко и҆́же на рꙋкꙋ̀ є҆ѧ̀ , ка́кѡ всѣ́ѧмисѧ , и҆лѝ ка́кᲂмисѧ рᲂдѝ , и҆зба́вителю мо́й бж҃е .

=вы́хᲂдъ , прᲂки́менъ , дню̀ . чте́нїѧ , трѝ . =

Ѿ= бытїѧ̀ , чте́нїе . =

Ѿ= втᲂра́гѡ зако́на , чте́нїе . =

На литі́и стихѣ́ры , пред̾пра́зднествꙋ , что̀ пи́саны на гдⷭ҇и вᲂзва́хъ , и҆ на стихо́внѣ . и҆ ᲂу҆́тренїи хвали́тныѧ , и҆ стихо́венныѧ , со сла́вниками и҆́хъ . сла́ва . гла́съ , г҃ . Пра́ѻ҆ц҃ъ сᲂвᲂкꙋпле́нїе празднᲂлю́бцы прїиди́те , ѱл҃о́мски вᲂсхва́лимъ , а҆да́ма пра́ѻ҆ц҃а . є҆нѡ́ха , нѡ́ѧ , мельхиседе́ка . а҆враа́ма , и҆саа́ка , и҆ і҆а́кѡва . по зако́нѣ мѡѷсе́ѧ , и҆ а҆арѡ́на , и҆ і҆сꙋ́са , самꙋ́ила , и҆ дв҃да . с̾ ни́ми же и҆са́їю . і҆єремі́ю , і҆єзекі́илѧ . и҆ данїи́ла , и҆ ѻ҆́ба на́десѧте . в̾кꙋ́пѣ и҆лїю̀ , и҆ є҆лисе́ѧ , и҆ всѣ́хъ . заха́рїю , и҆ крⷭ҇тлѧ , и҆ прᲂпᲂвѣ́давшїѧ хрⷭ҇та̀ , жи́знь и҆ вᲂскрⷭ҇нїе ро́дꙋ на́шемꙋ .

и҆ ны́нѣ , пред̾пра́зднествꙋ . гла́съ , то́йже . Красꙋ́йсѧ виѳлїе́мѣ , ѿве́рзебᲂсѧ є҆де́мъ . гᲂто́висѧ є҆вфра́ѳо , ѡ҆бнᲂвлѧ́етбᲂсѧ а҆да́мъ , и҆ є҆́вва с̾ ни́мъ . клѧ́тва бо разᲂри́сѧ , спасе́нїе ми́рᲂви прᲂцвѣтѐ . и҆ дш҃а пра́ведныхъ ᲂу҆краша́ютсѧ , ꙗ҆́кѡ да́ръ дарᲂно́сїѧ , вмѣ́стѡ мѵ́ра пѣ́нїе принᲂсѧ́ще , спасе́нїе дш҃е́внᲂе , и҆ нетлѣ́нїе прїе́млюще . се́бо во ꙗ҆́слѣхъ вᲂз̾лежи́тъ , пред̾пᲂвелѣва́ѧ пѣ́нїе дх҃о́внᲂе сᲂверши́ти , вᲂпїю́щимъ непреста́нно , гдⷭ҇и сла́ва тебѣ̀ .

На стихо́внѣ , стⷯры , вᲂскрⷭ҇ны . сла́ва . гла́съ , в҃ . Ра́дꙋйтесѧ пррⷪ҇цы честні́и , и҆́же зако́нъ гдⷭ҇нь до́брѣ ᲂу҆чини́вше . и҆ вѣ́рѣ ꙗ҆́вльшесѧ непᲂбѣди́мїи стᲂлпѝ и҆ неꙋкло́ннїи . вы́ бо хᲂда́таи ꙗ҆ви́стесѧ , но́вагѡ завѣ́та хрⷭ҇то́ва . и҆ преста́вльшесѧ к̾ нб҃сѝ , тᲂго̀ мᲂли́те , ᲂу҆мири́ти ми́ръ , и҆ спастѝ дш҃а на́ша .

и҆ ны́нѣ , пред̾пра́зднествꙋ . гла́съ , то́йже . Сѐ вре́мѧ прибли́жисѧ спасе́нїѧ на́шегѡ , гᲂто́висѧ верте́пе , дв҃аѧ приближа́етсѧ рᲂди́ти . виѳлїе́мѣ землѐ і҆ꙋ́дᲂва красꙋ́йсѧ и҆ весели́сѧ , ꙗ҆́кѡ и҆з̾ тебѐ вᲂсїѧ̀ гдⷭ҇ь на́шъ . ᲂу҆слы́шите го́ры и҆ хо́лми , и҆ ѡ҆́крⷭ҇тныѧ ве́си і҆ꙋде́йскїѧ . ꙗ҆́кѡ грѧде́тъ хрⷭ҇то́съ , да спасе́тъ є҆го́же сᲂзда̀ чл҃ка , ꙗ҆́кѡ чл҃кᲂлю́бецъ .

А҆́ще ли нѣ́сть бдѣ́нїе , трᲂпа́рь вᲂскрⷭ҇нъ . сла́ва , ѻ҆ц҃е́мъ . и҆ ны́нѣ , пред̾пра́зднествꙋ .

На ᲂу҆́трени , на бг҃ъ гдⷭ҇ь , трᲂпа́рь вᲂскрⷭ҇нъ , двⷤа . сла́ва . ѻ҆ц҃е́мъ , гла́съ , в҃ . Ве́лїѧ вѣ́ры и҆справле́нїѧ , во и҆сто́чницѣ пла́меннѣ ꙗ҆́кѡ на вᲂдѣ̀ пᲂко́йнѣ , ст҃і́и трїѐ ѻ҆́трᲂцы ра́дᲂвахꙋсѧ . и҆ прᲂро́къ данїи́лъ , льво́мъ па́стырь ꙗ҆́кѡ ѻ҆вца́мъ ꙗ҆влѧ́шесѧ . тѣ́хъ мл҃твами хрⷭ҇тѐ бж҃е пᲂми́лꙋй на́съ . и҆ ны́нѣ . пред̾пра́зднествꙋ , гла́съ , д҃ . Гᲂто́висѧ виѳлїе́ме , ѿве́рзисѧ всѣ́мъ є҆де́ме , красꙋ́йсѧ є҆вфра́ѳо , ꙗ҆́кѡ дре́во живо́тнᲂе в̾ верте́пѣ прᲂцвѣтѐ ѿ дв҃ы . и҆́бо тᲂѧ̀ чре́во ꙗ҆ви́сѧ мы́сленый ра́й , в̾ не́мже бжⷭ҇твеныи са́дъ . ѿ него́же ꙗ҆́дше жи́ви бꙋ́демъ , а҆ не ꙗ҆́кѡ а҆да́мъ ᲂу҆́мремъ . хрⷭ҇то́съ ражда́етсѧ , пре́жде па́дшїй хᲂтѧ̀ вᲂскреси́ти ѻ҆́бразъ .

Каѳи́смы ѡ҆бы́чны и҆ по ни́хъ сѣда́льны вᲂскрⷭ҇ны , и҆ боⷢ҇ , и҆́хъ . По непᲂро́чнахъ , трᲂпарѝ и҆́хъ , и҆ ѵ҆пако́й , гла́сꙋ . степе́нна , гла́сꙋ . прᲂки́менъ . и҆ всѧ́ко дыха́нїе . є҆ѵⷢ҇а́лїе , вᲂскрⷭ҇но . и҆ вᲂскрⷭ҇нїе хрⷭ҇то́во . ѱл҃о́мъ , н҃ . и҆ стⷯра , вᲂскрⷭ҇на . =Кано́на два̀ . ѻ҆ц҃е́мъ , на́ и҃ , і҆рмᲂсы̀ ро́зники , по два́жды . трᲂпарѝ , на́ ѕ҃ . в̾ ни́хже пред̾варѧ́ета , вᲂскрⷭ҇на трᲂпарѧ̀ два̀ . є҆ю́же ра́ди во ѻ҆кта́и не пᲂе́тсѧ . и҆ пред̾пра́зднествꙋ , на́ ѕ҃ . =

Кано́нъ , ѻ҆ц҃е́мъ . гла́съ , ѕ҃ . пѣ́снь , а҃ . і҆рмо́съ . Вᲂлно́ю мᲂрско́ю скры́вшаго дре́вле , гᲂни́телѧ мꙋчи́телѧ , во ꙗ҆́слѣхъ кры́ющасѧ , ᲂу҆би́ти взыска́етъ и҆́рᲂдъ . но мы̀ с̾ вᲂлхвы̀ вᲂспᲂе́мъ , гдⷭ҇ви пᲂе́мъ , сла́внѡ бо прᲂсла́висѧ .

запѣ́в̾ : Сла́ва гдⷭ҇и вᲂскрⷭ҇нїю твᲂемꙋ̀ . Стра́хᲂмъ ти сме́ртныѧ ѿверза́ютсѧ врата̀ , и҆ сᲂкрꙋша́ютсѧ вереѝ вѣ́чныѧ . и҆́бо честны́мъ твᲂи́мъ схᲂжде́нїемъ хрⷭ҇тѐ , вᲂскресо́ша дре́внїи мертвецы̀ , с̾ весе́лїемъ пᲂю́ще вᲂскрⷭ҇нїе твᲂѐ . Сꙋди́щꙋ пила́тᲂвꙋ пред̾стᲂи́тъ во́лею . без̾зако́ннᲂмꙋ сꙋдꙋ̀ , ꙗ҆́кѡ ѡ҆сꙋ́жденикъ сꙋдїѧ̀ . и҆ ѿ рꙋкѝ непра́ведныѧ в̾ лицѐ ᲂу҆дарѧ́етсѧ бг҃ъ , є҆го́же трепе́щꙋтъ землена́ѧ и҆ нбⷭ҇наѧ .

запѣ́в̾ : Ст҃і́и ѻ҆ц҃ы , мᲂли́те бг҃а ѡ҆ на́съ . Дне́сь сᲂбо́ръ бжⷭ҇твеныхъ ѻ҆ц҃ъ хрⷭ҇то́во ржⷭ҇тво̀ пред̾пра́здньствꙋетъ свѣ́тлѡ . и҆ прᲂписꙋ́етъ сїѐ пресла́внаѧ бл҃гᲂда́ть . а҆враа́мъ бо ѻ҆́бразъ зако́нꙋ , и҆ ѻ҆́трᲂцы трїѐ бы́ли сꙋ́ть . Дре́вле прїе́млетъ бжⷭ҇тво̀ є҆ди́но трисᲂста́внѡ , сщ҃е́нныи а҆враа́мъ . ны́нѣ же сᲂпресто́льнᲂе сло́во ѻ҆́ч҃ее , бжⷭ҇твенымъ дх҃ᲂмъ к̾ дѣ́темъ прихо́дитъ , сла́внѡ вᲂсхвалѧ́емо . Число́мъ и҆ вѣ́рᲂю бжⷭ҇твеныѧ трⷪ҇цы , без̾бо́жїе низве́ргше , въ пещѝ дѣ́ти ѻ҆́бразы чꙋ́вствеными , сᲂкрᲂве́нныѧ бж҃їѧ та́йны ми́рᲂви прᲂѧви́ша . А҆враа́мъ и҆зба́висѧ ѿ рꙋкѝ непра́ведныѧ , пла́мене же пе́щнагѡ бжⷭ҇твенїи ѻ҆́трᲂцы и҆нᲂгда̀ . и҆ данїи́лъ прⷪ҇ркъ ѿ ѕвѣре́й ро́ва спасе́сѧ . тѣ́мже ны́нѣ ржⷭ҇тво̀ хрⷭ҇то́во пред̾пра́зднꙋемъ . боⷢ҇ . Ѡ҆бра́дᲂваннаѧ без̾невѣ́стнаѧ мт҃и , дв҃о нетлѣ́ннаѧ , бл҃жи́мъ тѧ . и҆́бо ѿ́ рᲂда а҆враа́млѧ , и҆ пле́мене дв҃дᲂва , прᲂцвѣла̀ є҆сѝ . хрⷭ҇та́ же рᲂдила̀ є҆сѝ , прᲂро́ки прᲂпᲂвѣ́даннагѡ дре́вле .

Кано́нъ , пред̾пра́зднествꙋ . гла́съ , а҃ . пѣ́снь , а҃ . і҆рмо́съ . Хрⷭ҇то́съ ражда́етсѧ . запѣ́в̾ : Сла́ва тебѣ̀ бж҃е на́шъ сла́ва тебѣ̀ . Хрⷭ҇та̀ пло́тїю младе́нствᲂвавша , хрⷭ҇та̀ во́лею ѡ҆бнища́вша , хрⷭ҇та̀ ви́дима бы́вша . грѧде́тъ дв҃аѧ в̾ виѳлїе́мѣ ны́нѣ пᲂрᲂди́ти . нб҃о же и҆ землѧ̀ да ра́дꙋетсѧ . Го́ры и҆ хо́лми взыгра́йте . прᲂро́цы бг҃ᲂгла́снїи ликꙋ́йте , лю́дїе и҆ ꙗ҆зы́цы вᲂсплещи́те . всѣ́хъ спасе́нїе и҆ прᲂсвѣще́нїе бли́зꙋ наста̀ , во́ градѣ виѳлїе́мстѣ ражда́емо . боⷢ҇ . Ни́щь бᲂга́тыи быва́етъ , ѡ҆бᲂгаща́ѧ и҆́же ѕло́бᲂю ѡ҆бнища́вшїѧ . зе́мленъ бг҃ъ пᲂзнава́етсѧ ѿ дв҃ы неи҆скꙋсᲂбра́чныѧ , крᲂмѣ̀ прелᲂже́нїѧ . всѝ хвала́ми вᲂспᲂе́мъ є҆гѡ̀ , ꙗ҆́кѡ прᲂсла́висѧ .

пѣ́снь , г҃ . і҆рмо́съ . Тебѐ на вᲂда́хъ пᲂвѣ́сившаго всю̀ зе́млю не ѡ҆держи́мѡ , тва́рь ви́дѣвши в̾ верте́пѣ ражда́ющасѧ , ᲂу҆́жасᲂмъ ѡ҆держи́ма бѣ̀ , нѣ́сть ст҃ъ па́че тебѐ гдⷭ҇и взыва́юща .

Во́ грᲂбѣ тридне́внᲂвавъ , вᲂскреси́лъ є҆сѝ живᲂтво́рнымъ вᲂста́нїемъ ᲂу҆ме́ршїѧ ѿ́ вѣка . и҆ ѡ҆сꙋжде́нїѧ разрѣ́шшесѧ , ве́селѡ ра́дᲂвахꙋсѧ , сѐ и҆збавле́нїе прише́лъ є҆сѝ гдⷭ҇и , зᲂвꙋ́ще . Сла́ва твᲂемꙋ̀ вᲂста́нїю сп҃се на́шъ , ꙗ҆́кѡ на́съ ѿ а҆́да тлѝ и҆ сме́рти и҆зба́вилъ є҆сѝ ꙗ҆́кѡ всеси́ленъ . и҆ вᲂспѣва́юще гл҃емъ , нѣ́сть ст҃ъ ꙗ҆́кᲂже ты̀ гдⷭ҇и .

ѻ҆ц҃е́мъ . И҆́же по ѻ҆́бразꙋ сла́вꙋ , и҆ по пᲂдо́бїю бж҃їю , вѣ́рнѡ сᲂблюда́юще . злата́гѡ ѻ҆́браза пла́мень ѻ҆гне́мъ дх҃о́внымъ страда́льчески ᲂу҆гаси́ша ѻ҆́трᲂцы . пᲂю́ще , є҆ди́нагѡ гдⷭ҇а зна́емъ . Мꙋ́дрᲂстїю ѡ҆блᲂже́ни и҆ дх҃а си́лᲂю , ѻ҆́трᲂцы , мꙋдрецы̀ вавѷлѡ́нскїѧ плѣни́вше пᲂсрами́ша . и҆ де́рзᲂстнѣ взыва́хꙋ , нѣ́сть ст҃ъ ꙗ҆́кᲂже ты̀ гдⷭ҇и взыва́юще . Ра́дꙋетсѧ и҆ ликꙋ́етъ с̾ дѣтьмѝ и҆ прⷪ҇рки зако́нъ , и҆ пред̾ и҆гра́етъ гдⷭ҇ню бжⷭ҇твенᲂмꙋ прише́ствїю дне́сь . и҆ а҆враа́мъ ра́дꙋетсѧ , ꙗ҆́кѡ ѿ сѣ́мене є҆гѡ̀ ви́дѣ гдⷭ҇а вᲂплᲂща́ема . боⷢ҇ . Зача́тїе без̾ стра́сти , прїѧ́тїе па́че сло́ва про́йде , ржⷭ҇тва̀ твᲂегѡ̀ бцⷣе . и҆́бо прᲂро́ки прᲂпᲂвѣ́даннᲂе , па́че є҆стества̀ та́инство на́мъ ꙗ҆ви́сѧ сло́во бж҃їе , сы́и бг҃ъ .

и҆́нъ , і҆рмо́съ . Первᲂвѣ́чнᲂмꙋ ѿ ѻ҆ц҃а . И҆́же пре́жде вѣ́къ ѿ ѻ҆ц҃а , ро́ждьсѧ па́че смы́сла , ѿ дв҃ы на пᲂслѣ́дᲂкъ вᲂплᲂти́сѧ , ꙗ҆́кᲂже вѣ́сть са́мъ . хᲂтѧ̀ чл҃чество ѡ҆бнᲂви́ти , и҆стлѣ́вшее лꙋка́вагѡ ѕмі́ѧ сᲂвѣ́тᲂмъ . И҆́же в̾ вы́шнихъ вᲂдвᲂрѧ́ѧсѧ со ѻ҆ц҃е́мъ и҆ дх҃ᲂмъ , смири́вшеесѧ є҆стество̀ чл҃ческᲂе ви́дѣвъ , сн҃ъ бж҃їи без̾нача́льныи зача́ло прїе́млетъ . и҆ хо́щетъ пло́тїю рᲂди́тисѧ ꙗ҆́кѡ чл҃къ . боⷢ҇ . Ст҃ѣ́йши а҆́нг҃лъ , и҆ всѧ́кїѧ тва́ри , сᲂвѣ́та вели́кагѡ нн҃ѣ а҆́нг҃ла , без̾ сѣ́мене ражда́етъ пло́тїю . на вᲂзва́нїе всѣ́мъ пᲂю́щимъ непреста́ннѡ є҆мꙋ̀ , ст҃ъ є҆сѝ гдⷭ҇и .

кᲂнда́къ , и҆ и҆́кᲂсъ , вᲂскрⷭ҇нъ гла́сꙋ . кᲂнда́къ , пред̾пра́зднествꙋ . гла́съ , г҃ . Дв҃аѧ дне́сь превѣ́чнᲂе сло́во , в̾ верте́пѣ грѧде́тъ рᲂди́ти неи҆зрече́ннѡ . ликꙋ́й вселе́ннаѧ слы́шавши , прᲂсла́ви со а҆́нг҃лы и҆ па́стыри , хᲂтѧ́ща ꙗ҆ви́тисѧ ѻ҆трᲂча̀ мла́да превѣ́чнагѡ бг҃а . и҆́кᲂсъ . Ѽ =ᲂу҆жа́снагѡ вᲂи́стинꙋ , и҆ па́че сло́ва чꙋдесѐ . є҆́же бы́ти даѧ̀ всѣ́мъ бл҃гᲂстїю , во́ чрево ст҃ы́ѧ дв҃ы вни́де , и҆ в̾ верте́пѣ рᲂди́тисѧ грѧде́тъ , и҆ в̾ ꙗ҆́слѣхъ пᲂлᲂжи́тисѧ . ѕвѣзда́ же сегѡ̀ прᲂпᲂвѣ́дꙋетъ свы́ше вᲂлхво́мъ , и҆дꙋ́щимъ на пᲂклᲂне́нїе є҆гѡ̀ с̾ да́ры , и҆з̾ дале́ча привлача̀ со тща́нїемъ пᲂслѣ́дꙋющїѧ валаа́мᲂвꙋ прᲂрече́нїю , ре́кшагѡ , ѕвѣзда̀ хо́щетъ прᲂвᲂз̾вѣсти́ти ѻ҆трᲂча̀ мла́да превѣ́чнагѡ бг҃а . =сла́ва , и҆ нн҃ѣ . ѵ҆пако́й . гла́съ , и҃ . А҆́нг҃лъ дѣ́темъ ѡ҆рᲂсѝ пе́щь , ны́нѣ же жена́мъ пла́чь вᲂз̾бранѧ́ше гл҃ѧ , что̀ принесо́сте мѵ́ро . кᲂго̀ и҆́щете во́ грᲂбѣ ; вᲂскр҃се хрⷭ҇то́съ бг҃ъ . є҆́сть бо живо́тъ и҆ сп҃съ ро́дꙋ чл҃ческᲂмꙋ .

пѣ́снь , д҃ . і҆рмо́съ . И҆́же ѿ дв҃ы бжⷭ҇твеннᲂе прише́ствїе твᲂѐ , пред̾ви́дѣвъ а҆вва́кꙋмъ , ᲂу҆жа́снѡ вᲂпїѧ́ше , ты̀ ѿ ю҆́га вᲂплᲂща́ѧсѧ прїи́деши и҆зба́вителю . вᲂзвᲂдѧ̀ а҆да́ма ѿринᲂве́ннагѡ .

Є҆же во а҆́дъ бжⷭ҇твенᲂе сше́ствїе твᲂѐ хрⷭ҇тѐ бж҃е , ме́ртвымъ живо́тъ ꙗ҆ви́сѧ . ты́ бо врагꙋ̀ свѧза́лъ є҆сѝ держа́вꙋ до́лѣ бл҃гі́и . и҆ небе́снꙋю стезю̀ чл҃кѡмъ ѿве́рзлъ є҆сѝ . Не и҆стлѣ̀ во́ грᲂбѣ пречⷭ҇тᲂе тѣ́ло и҆зба́вителѧ лежа́що . но ꙗ҆́кѡ си́ленъ сᲂкрꙋшѝ а҆́дᲂвы вереѝ , и҆ вᲂскр҃се во сла́вѣ хрⷭ҇тѐ , тридне́внѡ .

ѻ҆ц҃е́мъ . Ѻ҆ц҃е́мъ верхо́вныѧ , а҆враа́ма и҆саа́ка и҆ і҆а́кѡва пᲂчте́мъ . ꙗ҆́кѡ ѿ тѣ́хъ сѣ́мене вᲂсїѧ̀ хрⷭ҇то́съ , вᲂпло́щьсѧ ѿ дв҃ы ꙗ҆́кѡ всеси́ленъ . Прᲂписꙋ́ѧ бꙋ́дꙋщаѧ сше́ствїемъ хрⷭ҇то́вымъ данїи́лъ , ѕвѣ́ри ꙗ҆́кѡ ѻ҆́вцы пᲂказа̀ . всѣ́мъ ꙗ҆́вѣ прᲂзрѣ́въ бꙋ́дꙋщаѧ , ꙗ҆́кѡ прᲂро́къ бж҃їи . Грѣхо́внымъ не привлеченѝ ꙗ҆́дᲂмъ , ѿ пла́мене и҆зба́вистесѧ а҆́бїе . зла́та бо чистѣ́йше сꙋ́ще мꙋ́дрїи , в̾ пещѝ ле́стнѣй не ѡ҆пали́стесѧ . боⷢ҇ . Велегла́снѡ прᲂпᲂвѣ́дꙋетсѧ ча́ѧнїе ꙗ҆зы́кѡмъ , и҆ спасе́нїе ми́рꙋ , є҆́же па́че є҆стества̀ ржⷭ҇тво̀ твᲂѐ прест҃а́ѧ чи́стаѧ . є҆го́же пᲂе́тъ ѻ҆те́ческаѧ па́мѧть дне́сь .

и҆́нъ , і҆рмо́съ . Же́ѕлъ и҆з̾ ко́рене . Же́ѕлъ и҆з̾ ко́рене і҆єссе́ѡва дв҃о прᲂзѧбла̀ є҆сѝ , цвѣ́тъ вᲂзрасти́вши неꙋвѧда́емыи , всѣ́хъ сᲂдѣ́телѧ . и҆́же зе́млю всю̀ цвѣты̀ ꙗ҆́кѡ бг҃а ᲂу҆краша́юща . вᲂпїю́щꙋ є҆мꙋ̀ , сла́ва си́лѣ твᲂе́й гдⷭ҇и . Снѣ́дїю мѧ ѡ҆кра́дена ѕло́ю , и҆ нра́вᲂмъ пᲂпо́лзшасѧ , и҆ ᲂу҆пᲂдо́бльшасѧ без̾слᲂве́снымъ , сло́ве бж҃їи прише́лъ є҆сѝ назида́ѧ . младе́нецъ бы́въ въ ꙗ҆́слѣхъ без̾слᲂве́сныхъ вᲂзле́гъ . сла́ва си́лѣ твᲂе́й гдⷭ҇и . =боⷢ҇ . и҆з̾ =гᲂры̀ присѣ́нныѧ і҆с҃е дв҃ыѧ , тѧ̀ вᲂплᲂще́нна , а҆вва́кꙋмъ прᲂви́дѣ , го́ры ѕлы́ѧ и҆ хо́лмы сᲂкрꙋша́юща , и҆ пᲂтребле́нїю даю́ща вᲂзнᲂше́нїе лꙋка́вагѡ , и҆ бѣсо́вскаѧ вᲂзвыше́нїѧ .

пѣ́снь , є҃ . і҆рмо́съ . Бг҃ᲂѧвле́нїѧ ти хрⷭ҇тѐ , є҆́же к̾ на́мъ млⷭ҇тивнѡ бы́вшаго , и҆са́їѧ ви́дѧ свѣ́тъ невече́рнїи , и҆з̾ нᲂщѝ ᲂу҆́треннюѧ вᲂпїѧ́ше , сѐ дв҃аѧ во́ чревѣ прїи́метъ , и҆҆ рᲂди́тъ вᲂплᲂща́емо сло́во . и҆҆ всѝ и҆́же на землѝ вᲂз̾ра́дꙋютсѧ .

Блиста́ѧисѧ , ра́дᲂсть вᲂѡ҆бража́ѧ ꙗ҆́вственѣ а҆́нг҃лъ , во́ грᲂбѣ свѣтлᲂно́сецъ пᲂказꙋ́етсѧ , жена́мъ прᲂпᲂвѣ́даѧ вᲂста́нїе . и҆ ѡ҆ста́вльше пла́чь ра́дᲂвахꙋсѧ , хрⷭ҇то́ви вᲂскр҃сшꙋ . ѿ него́же и҆ непреста́ннꙋ ра́дᲂсть прїѧ́ша . За млрⷭ҇дїе бл҃гі́и , и҆́же по на́съ прїе́мъ зра́къ , во́лею на крⷭ҇тѣ̀ пригвᲂзди́сѧ менѐ ра́ди . и҆́же пе́рвѣе ѿве́ргша ст҃ꙋ́ю твᲂю̀ за́пᲂвѣдь , снѣ́ди ра́ди в̾ раѝ . и҆ ᲂу҆мира́еши земнᲂлѣ́пнѡ , живо́тъ пᲂдаѧ́и ми .

ѻ҆ц҃е́мъ . Ѻ҆те́ческᲂе нача́ло , ꙗ҆́кѡ нача́льника зако́нꙋ и҆ бл҃гᲂда́ти , и҆́же ѿ́ рᲂда а҆враа́млѧ дне́сь данїи́ла бжⷭ҇твенагѡ пᲂчте́мъ . ꙗ҆́кѡ прᲂро́къ бо бж҃їи , прᲂвᲂзвѣстѝ хрⷭ҇та̀ ѿ дв҃ы . и҆ сегѡ̀ пред̾ ᲂу҆срѣта́етъ бжⷭ҇твенᲂе рᲂжде́нїе . Прᲂписа́вше ꙗ҆́снѡ , є҆́же къ на́мъ бж҃їе прише́ствїе , а҆́нг҃лᲂвымъ наи́тїемъ , ᲂу҆гаси́ша а҆враа́мстїи ѻ҆́трᲂцы пе́щь . и҆ тꙋчеро́сенъ ѻ҆́гнь сᲂдѣ́лавше , в̾ се́мъ вѣ́рᲂю ѻ҆́браза злата́гѡ сла́вꙋ и҆знꙋри́ша . Заградѝ ᲂу҆ста̀ ѕвѣре́мъ данїи́лъ в̾ ро́вѣ дх҃ᲂмъ , ѻ҆́гненнꙋю же крѣ́пᲂсть ᲂу҆гаси́ша а҆враа́мстїи ѻ҆́трᲂцы бл҃гᲂда́тїю . и҆ спа́сшесѧ сі́и ѿ тлѝ , вᲂзвѣща́ютъ хрⷭ҇та̀ ѿ дв҃ы . мᲂлѧ́ще ꙗ҆́кѡ и҆зба́вителѧ спасе́нїѧ на́шегѡ . боⷢ҇ . Бжⷭ҇твенымъ дх҃ᲂмъ сказꙋ́ѧ , є҆́же ѿ на́съ без̾стра́стнᲂе твᲂѐ прїѧ́тїе , и҆са́їѧ вᲂпїѧ́ше гдⷭ҇и , бо́дрствꙋй зако́нᲂмъ бл҃гᲂда́ти . и҆́же ѿ́ рᲂда ᲂу҆́бѡ а҆враа́млѧ , ѿ пле́мене же і҆ꙋ́дᲂва по́ плᲂти , дв҃аѧ без̾ сѣ́мене грѧде́тъ ражда́ющи .

и҆́нъ , і҆рмо́съ . Бг҃ъ сы́и ми́ра . И҆́же є҆стество́мъ влⷣка , в̾ рабѣ́хъ кᲂне́чныхъ , сн҃ъ бж҃їи всесᲂверше́нныи , бл҃гᲂи҆зво́ливъ за милᲂсе́рдїе зва́тисѧ , и҆ сн҃ъ чл҃ческїи , всеще́дрыи . тѣ́мже в̾ верте́пѣ , во́лею ѡ҆бнища́въ , грѧде́ши рᲂди́тисѧ пребл҃гі́и . Невмѣсти́мыи є҆стество́мъ хрⷭ҇тѐ цр҃ю , ка́кѡ ма́лыи тѧ̀ прїи́метъ верте́пъ ; ка́кѡ ꙗ҆́сли мо́гꙋтъ тѧ вмѣсти́ти ; на́съ ра́ди ѿ мт҃ре неи҆скꙋсᲂмꙋ́жныѧ , пло́тїю прихᲂдѧ́ща во свᲂѧ̀ , ꙗ҆́кѡ да ᲂу҆стра́ншеесѧ спасе́ши гдⷭ҇и . боⷢ҇ . А҆́гница па́стырѧ прїи́де рᲂди́ти , гᲂто́висѧ ст҃ы́и верте́пе . па́стырїе спѣши́те , па́стырѧ и҆ а҆́гньца ро́ждьшасѧ ви́дѣти . вᲂлсвѝ съ да́ры ᲂу҆гᲂто́витесѧ , семꙋ̀ ꙗ҆́кѡ цр҃ю пᲂклᲂни́тисѧ пло́тїю .

пѣ́снь , ѕ҃ . і҆рмо́съ . Ꙗ҆́тъ бы́сть но неꙋде́ржанъ в̾ пе́рсѣхъ ки́тᲂвѣхъ і҆ѡ́на . тво́й бо ѻ҆́бразъ нᲂсѧ̀ ро́ждьшагᲂсѧ в̾ верте́пѣ сп҃са , ꙗ҆́кѡ ѿ черто́га ѿ ѕвѣ́рѧ и҆з̾ше́дъ . приглаша́ше сꙋ́щимъ в̾ ми́рѣ , хранѧ́щїи сꙋ́етнаѧ во лжꙋ̀ , ми́лᲂсти ва́шеѧ ѡ҆ста́вили є҆стѐ .

Сме́рти ᲂу҆мерщве́нїе , и҆ а҆́да бл҃же сᲂдѣ́ла пᲂтребле́нїе , тридне́внᲂе пᲂгребе́нїе твᲂѐ . жи́знь же и҆стᲂчи́лъ є҆сѝ сꙋ́щимъ в̾ ми́рѣ , бг҃ᲂлѣ́пнѡ вᲂскр҃съ , і҆с҃е бл҃гі́и . =двⷤа . =

ѻ҆ц҃е́мъ . Нра́въ страннᲂлюби́въ , вѣ́ра же высᲂка̀ , а҆враа́ма сꙋ́ща пра́ѻ҆ц҃а . тѣ́мже бжⷭ҇твеныѧ та́йны прїе́мъ ра́дᲂвашесѧ , пред̾ хрⷭ҇то́мъ же текі́и ны́нѣ весели́тсѧ . Тва́рь пᲂвинꙋ̀ ны́нѣ вѣ́ра ѻ҆́трᲂческа , да́рᲂмъ зижди́телѧ . ѻ҆́гнь бо всеѧ́децъ и҆ без̾сты́дныи ᲂу҆стыдѣ́сѧ , чтꙋ́щихъ ѻ҆́гненагѡ дѣ́лателѧ і҆с҃а хрⷭ҇та̀ . Мирско́е ди́вїе прише́ствїе и҆счита́ти ѡ҆бы́че . ко смире́нїю глꙋбо́кᲂмꙋ бг҃ᲂлѣ́пнѡ . загради́въ ᲂу҆ста̀ льво́мъ данїи́лъ прᲂро́къ в̾ ро́вѣ и҆нᲂгда̀ . =боⷢ҇ . и҆з̾ =лᲂже́снъ рᲂдила̀ є҆сѝ дв҃ческихъ хрⷭ҇та̀ , мр҃і́е мт҃и без̾мꙋ́жнаѧ . є҆го́же прⷪ҇рцы ви́дѣвше дх҃о́внѣ , пред̾ ни́мъ ликꙋ́ютъ ѻ҆ц҃ы рᲂже́ственаѧ .

и҆́нъ , і҆рмо́съ . Оу҆тро́ба і҆ѡ́нꙋ . Но́во нб҃о сꙋ́ще влⷣчце , и҆з̾ ᲂу҆тро́бы свᲂеѧ̀ ꙗ҆́кѡ и҆з̾ ѻ҆́блака , хрⷭ҇та̀ сла́вѣ сл҃нце вᲂсїѧ́ти грѧде́ши в̾ верте́пѣ пло́тїю . ꙗ҆́кѡ хᲂтѧ́ща сїѧ́ньми свᲂи́ми и҆з̾ дале́ча , всѧ̀ земна́ѧ и҆спᲂлне́нїѧ ѡ҆зари́ти , за милᲂсе́рдїе без̾мѣ́рнᲂе . Ви́дѣлъ є҆сѝ на́шꙋ бᲂлѣ́знь и҆ ѡ҆ѕлᲂбле́нїе , ще́дрыи хрⷭ҇тѐ , и҆ непре́зрилъ є҆сѝ на́съ , но и҆злїѧ́лъ є҆сѝ себѐ , не ѿстꙋ́пль рᲂди́телѧ , и҆ всели́лсѧ є҆сѝ во ᲂу҆тро́бꙋ неи҆скꙋсᲂбра́чнꙋ . ꙗ҆́же небᲂлѣ́зненѡ ражда́ти тѧ пло́тїю в̾ верте́пѣ пред̾грѧде́тъ . боⷢ҇ . Го́ры и҆ хо́лми , пᲂлѧ̀ и҆ де́бри , лю́дїе кᲂлѣ́на и҆ ꙗ҆зы́цы , и҆ всѧ́ко дыха́нїе вᲂскли́кните , весе́лїѧ бжⷭ҇твенагѡ и҆спᲂлнѧ́еми . прїи́де и҆ приспѣ̀ всѣ́хъ и҆збавле́нїе , сло́во бж҃їе без̾лѣ́тнᲂе , пᲂд̾ лѣ́тᲂмъ за милᲂсе́рдїе бы́вшее .

пѣ́снь , з҃ . і҆рмо́съ . Неи҆зрече́ннᲂе чꙋ́до , и҆́же в̾ пещѝ спасы́и прпⷣбныѧ ѻ҆́трᲂки и҆з̾ пла́мени , во ꙗ҆́слѣхъ ᲂу҆бо́зѣхъ ꙗ҆́кѡ млⷣнцъ вᲂз̾лежи́тъ , на спасе́нїе на́мъ пᲂю́щимъ , и҆зба́вителю бж҃е блгⷭ҇ве́нъ є҆сѝ .

Ѽ стра́ннагѡ чꙋ́до , и҆́же в̾ вы́шнихъ сѣдѧ́и на престо́лѣ гдⷭ҇ь , то́йже прїѧ́тїемъ пло́ти сме́рть претерпѣ̀ . но вᲂскр҃се бжⷭ҇твенᲂю крѣ́пᲂстїю , сᲂвᲂскреси́въ всѧ̀ ме́ртвыѧ ѿ́ вѣка . Ты̀ сме́ртнᲂе крѣ́пкᲂе пᲂтрѧсѐ , и҆ вᲂскр҃се , вᲂста́нїе даѧ̀ и҆́же тебѐ вᲂи́стинꙋ гдⷭ҇а сла́вѧщимъ . и҆ правᲂсла́внᲂю вѣ́рᲂю тебѣ̀ вᲂпїю́щимъ , и҆зба́вителю бж҃е бл҃гᲂслᲂве́нъ є҆сѝ .

ѻ҆ц҃е́мъ . Хрⷭ҇та̀ рᲂди́въ , є҆́же по́ плᲂти вѣ́рᲂю рᲂдᲂнача́льниче ѻ҆́ч҃е а҆враа́ме , ꙗ҆ви́сѧ ꙗ҆зы́кᲂмъ дх҃ᲂмъ ѻ҆ц҃ъ ꙗ҆́вѣ , во спасе́нїе на́мъ пᲂю́щимъ , и҆зба́вителю бж҃е бл҃гᲂслᲂве́нъ є҆сѝ . Без̾дꙋ́шныхъ шꙋ́мъ , во тщѐ вᲂсклица́ющихъ , ѡ҆дш҃евле́ныхъ пᲂсрамѝ пѣ́снь . пе́щь бо ѻ҆гне́мъ гᲂрѧ́щꙋю , пло́тїю пᲂпира́юще ѻ҆́трᲂцы невреди́мѡ , и҆зба́вителю пᲂю́ще , бж҃е бл҃гᲂслᲂве́нъ є҆сѝ . Видѣ́нїемъ вᲂзрѣ́въ дх҃о́внымъ , дре́вле прᲂро́къ данїи́лъ , хрⷭ҇то́во ꙗ҆вѝ втᲂро́е прише́ствїе , и҆ в̾ не́мъ стра́шнаѧ прᲂвᲂзвѣща́етъ . вᲂпїѧ̀ , и҆зба́вителю бж҃е бл҃гᲂслᲂве́нъ є҆сѝ . боⷢ҇ . Стра́ннᲂе чꙋ́до , є҆́же во прⷪ҇рцѣхъ слᲂвꙋ́щее , и҆ ѻ҆ц҃е́мъ дре́вле ꙗ҆вле́нно . дв҃а чи́стаѧ рᲂди́ти хᲂтѧ́щи прїи́де , на спасе́нїе на́мъ пᲂю́щимъ , и҆зба́вителю бж҃е бл҃гᲂслᲂве́нъ є҆сѝ .

и҆́нъ , і҆рмо́съ . Ѻ҆́трᲂцы во бл҃зѣ́й . Винᲂгра́дъ бжⷭ҇твеныи , нетлѣ́нныи гро́здъ ᲂу҆зрѣ́ливши , приближа́етсѧ и҆ прихо́дитъ рᲂди́ти , весе́лїѧ вино̀ тᲂча́ща , и҆ напᲂѧ́ющагѡ на́съ , є҆мꙋ̀ вᲂпїю́щихъ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Бжⷭ҇твенаѧ мѷрѡпᲂло́жница , бл҃гᲂво́ннᲂе мѵ́ро внꙋ́трь нᲂсѧ́щи . в̾ верте́пѣ виѳлїе́мли и҆з̾лїѧ́ти сѐ грѧде́тъ , бл҃гᲂꙋха́нїѧ та́йнаго и҆спᲂлнѧ́ющаго пᲂю́щихъ . ѻ҆ц҃е́мъ бж҃е бл҃гᲂслᲂве́нъ є҆сѝ . боⷢ҇ . Клеща̀ , ю҆́же и҆са́їѧ прᲂро́къ дре́вле ви́дѣ , бжⷭ҇твенагѡ ᲂу҆́глѧ хрⷭ҇та̀ во́ чревѣ прихо́дитъ и҆мꙋ́щи . всѧ́кꙋ ве́щь грѣхо́внꙋю пᲂпалѧ́ющаго . вѣ́рныхъ же дш҃а прᲂсвѣща́юща .

пѣ́снь , и҃ . і҆рмо́съ . Оу҆жасни́сѧ бᲂѧ́исѧ нб҃о , и҆ да пᲂд̾ви́жатсѧ ѻ҆снᲂва́нїѧ землѝ . се́бо пелена́ми пᲂвива́етсѧ , и҆́же всѧ́ческаѧ сᲂдержа́и дла́нїю , во ꙗ҆́слѣхъ ма́лѣхъ ѡ҆битᲂва́етъ , є҆го́же дѣ́ти бл҃гᲂслᲂви́те , сщ҃е́ннїи по́йте , и҆ превᲂзнᲂси́те є҆гѡ̀ во́ вѣки .

Ѽ неи҆зрече́ннагѡ твᲂегѡ̀ хрⷭ҇тѐ схᲂжде́нїѧ , на́съ ра́ди смире́нныхъ . се́бо сме́рти вкꙋ́шъ , бг҃ъ без̾сме́ртенъ сы́и , во́ грᲂбѣ ꙗ҆́кѡ чл҃къ пᲂлᲂже́нъ бы́сть . но вᲂскре́слъ є҆сѝ сло́ве , сᲂвᲂскре́шъ до́льнѧѧ , тебѐ превᲂзнᲂсѧ́щїѧ во́ вѣки всѧ̀ . Оу҆жасе́сѧ всѧ́къ слꙋ́хъ , ка́кѡ вы́шнїи во́лею прїи́де на́ землю , а҆́дᲂвꙋ крѣ́пᲂсть разᲂри́ти крⷭ҇то́мъ и҆ пᲂгребе́нїемъ . и҆ всѧ̀ сᲂвᲂзста́ви взыва́ти . дѣ́ти бл҃гᲂслᲂви́те , сщ҃е́ннїи по́йте , и҆ превᲂзнᲂси́те є҆гѡ̀ во́ вѣки .

ѻ҆ц҃е́мъ . Твᲂѐ закᲂле́нїе пред̾ вᲂѡ҆бража́ѧ а҆враа́мъ хрⷭ҇тѐ , є҆го́же рᲂдѝ сн҃а в̾ гᲂрѣ̀ пᲂвинꙋ́ѧсѧ тебѣ̀ , ꙗ҆́кᲂже ѻ҆вча̀ вᲂз̾ведѐ же́ртвꙋ твᲂрѧ̀ . но вᲂз̾врати́сѧ ра́дꙋѧсѧ съ ни́мъ , сла́вѧ и҆ превᲂзнᲂсѧ́ тѧ , и҆зба́вителѧ ми́рꙋ . Пла́менемъ не дѣ́лательнымъ хрⷭ҇тѐ , ѡ҆блече́нꙋ ти ꙗ҆́кѡ ри́зᲂю бжⷭ҇твенᲂю , ѻ҆́гнь ст҃ы́хъ ѻ҆́трᲂкъ твᲂи́хъ ᲂу҆гасѝ ѕѣлѡ̀ , и҆ рᲂса̀ твᲂи́мъ схᲂжде́нїемъ пᲂю́щимъ шꙋмѧ́ше . сщ҃е́ннїи по́йте , и҆ превᲂзнᲂси́те є҆гѡ̀ во́ вѣки . Да́нъ бы́сть льво́мъ на снѣ́дь , сꙋдо́мъ непра́веднымъ , прᲂро́къ данїи́лъ . но и҆мѧ́ше пᲂвелѣ́нїемъ вᲂздержа́нїе , съ по́стники бл҃гᲂче́стнѡ ѕвѣ́ри , во глꙋбинѣ̀ ро́вища . тᲂгѡ̀ мл҃твами , а҆враа́ма же и҆ ѻ҆́трᲂкъ , спасѝ в̾ ми́рѣ хрⷭ҇тѐ пᲂю́щїѧ тѧ . боⷢ҇ . Є҆го́же прᲂвᲂзвѣсти́ша вѣ́рнѡ прᲂро́честїи гла́си , і҆с҃а є҆мманꙋ́ила , в̾ чл҃честѣ ѻ҆́бразѣ грѧдꙋ́ща , бж҃їѧ и҆ ѻ҆́ч҃а , сн҃а же и҆ сᲂбез̾нача́льна сло́ва , ѿ дх҃а ст҃а́гѡ , дв҃аѧ мр҃і́ѧ ражда́етъ без̾мꙋ́жнѡ , в̾ виѳлїе́мѣ гра́дѣ .

и҆́нъ , і҆рмо́съ . Чꙋ́до преве́лїе . Сла́ва в̾ вы́шнихъ со а҆́нг҃лы вᲂзᲂпїе́мъ съ весе́лїемъ . сп҃съ ражда́етсѧ , влⷣка прихо́дитъ . є҆го́же ѕвѣзда̀ пᲂказꙋ́етъ вᲂлхво́мъ , тща́тсѧ є҆гѡ̀ в̾ ꙗ҆́слѣхъ ви́дѣти . да бл҃гᲂслᲂви́тъ тва́рь всѧ̀ гдⷭ҇а , и҆ превᲂзно́ситъ є҆гѡ̀ во́ вѣки . Съ рабы̀ влⷣко написа́сѧ во́лею , кесаре́вꙋ пᲂвинꙋ́ѧсѧ зако́нꙋ , ꙗ҆́кѡ да чл҃чество ѿ рабо́ты лꙋка́вагѡ ꙗ҆́кѡ бг҃ъ свᲂбᲂди́ши , мнᲂгᲂмлⷭ҇тиве . тѣ́мже ра́дꙋющесѧ вᲂспѣва́емъ , да бл҃гᲂслᲂви́тъ тва́рь всѧ̀ гдⷭ҇а , и҆ превᲂзно́ситъ є҆гѡ̀ во́ вѣки . боⷢ҇ . Младе́нца нᲂшꙋ́ тѧ без̾нача́льне сло́ве , и҆скꙋ́са мꙋ́жеска ѿ ню́дъ неразꙋмѣ́хъ , дв҃аѧ гл҃аше , недᲂвѣ́дѧщи . кᲂго̀ на землѝ и҆менꙋ́ю ти ѻ҆ц҃а , невѣ́мъ . тѣ́мже со всѣ́ми вᲂспѣва́ю , да бл҃гᲂслᲂви́тъ тва́рь всѧ̀ гдⷭ҇а , и҆ превᲂзно́ситъ є҆гѡ̀ во́ вѣки .

пѣ́снь , ѳ҃ . і҆рмо́съ . Не сꙋмни́сѧ ѡ҆ мнѣ̀ мт҃и , ви́дѧщи ꙗ҆́кѡ млⷣнца , є҆го́же и҆́з̾ чрева пре́жде денни́цы рᲂдѝ ѻ҆ц҃ъ . вᲂста́вити бо и҆ прᲂсла́вити чл҃ческᲂе па́дшее є҆стество̀ прїидо́хъ ꙗ҆́вственнѡ , вѣ́рᲂю и҆ любо́вїю тѧ̀ велича́ющее .

Что̀ рыда́еши тва́ре , на крⷭ҇тѣ̀ ви́дѧщи и҆ во́ грᲂбѣ , жи́зни да́телѧ ꙗ҆́кѡ зе́млена ; вᲂста́нетъ бо ѡ҆бнᲂвлѧ́и тѧ̀ свѣ́тлѡ , тридне́внымъ вᲂскрⷭ҇нїемъ . а҆́дъ низло́жъ , и҆ ме́ртвыѧ сᲂвᲂздви́гъ , вᲂсхвалѧ́ющїѧ є҆гѡ̀ . А҆́ще и҆ во́ грᲂбъ сни́де ꙗ҆́кѡ ме́ртвъ живᲂда́вче . но а҆́дᲂвꙋ крѣ́пᲂсть разᲂри́лъ є҆сѝ хрⷭ҇тѐ . сᲂвᲂздви́гъ ме́ртвыѧ , и҆́хже пре́жде пᲂжрѐ . и҆ вᲂскрⷭ҇нїе всѣ́мъ пᲂдадѐ ꙗ҆́кѡ бг҃ъ , и҆́же вѣ́рᲂю и҆ любо́вїю тѧ̀ велича́ющимъ .

ѻ҆ц҃е́мъ . И҆́же пре́жде зако́на ѻ҆ц҃ъ , пра́зднество твᲂрѧ́щїи , и҆́же ѿ ни́хъ бг҃ᲂлѣ́пнѡ пᲂчте́мъ хрⷭ҇та̀ . а҆враа́мъ бо в̾кꙋ́пѣ , и҆ и҆саа́къ и҆ і҆а́кѡвъ , прᲂро́кѡмъ и҆ зако́нꙋ ꙗ҆ви́шасѧ ѡ҆снᲂва́нїе и҆ бл҃гᲂда́ти . вѣ́рᲂю дх҃ꙋ прᲂпᲂвѣ́дницы . И҆́же ѻ҆гне́мъ пᲂказа́выи мѡѷсе́ѡви в̾ кꙋпинѣ̀ , па́че ᲂу҆ма̀ бг҃ᲂви́днѡ та́инство , бг҃ъ въ пе́щь к̾ дѣ́темъ сше́дъ . то́йже ѻ҆гне́мъ є҆сте́ственымъ бжⷭ҇тва̀ є҆гѡ̀ , пе́щныи пла́мень хла́дъ пᲂказа́лъ є҆́сть . со а҆враа́мᲂмъ сше́дшесѧ прест҃ы́ѧ дѣ́ти , и҆ данїи́лъ ди́вныи прᲂро́къ бж҃їи , и҆ и҆саа́къ и҆ і҆а́кѡвъ . с̾ мѡѷсе́ѡмъ , и҆ а҆арѡ́нъ , хрⷭ҇то́ви пре́жде ржⷭ҇тва̀ ликᲂствꙋ́юще вѣ́рнѡ , мо́лѧтъ непреста́ннѡ во є҆́же спасти́сѧ на́мъ . боⷢ҇ . Сра́дꙋетсѧ всѧ̀ тва́рь , твᲂемꙋ̀ ржⷭ҇твꙋ̀ дв҃цѣ . и҆́бо є҆де́ма виѳлїе́мъ ѿве́рзе на́мъ . и҆ сѐ дре́ва живо́тнагѡ всѝ наслажда́ющесѧ вѣ́рнѡ вᲂпїе́мъ , прилѣ́жнѡ , мᲂли́твы на́ша влⷣчце и҆спо́лни .

и҆́нъ , і҆рмо́съ . Та́инство стра́нно . Та́инства стра́ннаѧ , ди́внаѧ и҆ пресла́внаѧ , и҆́же сла́вы гдⷭ҇ь , прїи́де на́ землю , и҆ в̾ верте́пъ ѡ҆бнища́въ вни́де пло́тїю , а҆да́ма вᲂзва́ти и҆ща̀ , и҆ є҆́ввꙋ бᲂлѣ́зней и҆зба́вити . Пелена́ми твᲂи́ми , рѣши́ши плени́цы грѣхᲂпаде́нїи . мно́гᲂю же нището́ю , всѧ̀ ѡ҆бᲂгаща́еши ще́дре . безслᲂве́сныѧ ѕло́бы , пᲂло́жьсѧ в̾ безслᲂве́сныхъ ꙗ҆́слѣхъ , чл҃ки и҆з̾мѣнѧ́еши , бж҃їи сло́ве пребезнача́льне . боⷢ҇ . Про́пᲂвѣди прⷪ҇ро́ческїѧ кᲂне́цъ прїѧ́ша . є҆го́же бо прᲂреко́ша прїитѝ , въ скᲂнча́нїе лѣ́тᲂмъ , прїи́де и҆ ꙗ҆ви́сѧ , ѿ чⷭ҇тыѧ дв҃ы вᲂплᲂща́емь . тᲂгѡ̀ мы́слїю чи́стᲂю прїи́мемъ .

свѣти́ленъ , вᲂскрⷭ҇нъ . сла́ва , ѻ҆ц҃е́мъ . Ѿ сѣ́мене в̾во́дитсѧ а҆враа́млѧ , и҆ бжⷭ҇твенагѡ дв҃да бг҃ᲂѻ҆ц҃а , пребезнача́льнᲂе сло́во . и҆́же ѻ҆́трᲂки равнᲂчи́сленыѧ пе́рвїе трⷪ҇цѣ , чꙋ́днѡ а҆́нг҃ла сше́ствїемъ , и҆з̾ пла́мене спасы́и . и҆ рыда́нїе в̾ ра́дᲂсть прелᲂжи́выи жена́мъ . и҆ ны́нѣ , пред̾пра́зднествꙋ . А҆́гница нескве́рнаѧ , а҆́гньца ро́ждьшаѧ , сло́ва пребез̾нача́льнаго , в̾ пᲂслѣ́днѧѧ времена̀ . бѧ́ше сїѐ чꙋ́днѡ , а҆да́мᲂва внꙋ́ка и҆ дв҃дᲂва по дᲂстᲂѧ́нїю . є҆ѧ́же несказа́ннᲂе ржⷭ҇тво̀ , ѻ҆те́ческᲂе мно́жество пред̾пра́здньствꙋетъ дᲂсто́йнѡ .

Славᲂсло́вїе вели́кᲂе , и҆ ѿпꙋ́стъ . и҆ стихѣ́ра , є҆ѵⷢ҇а́льскаѧ . ча́съ , а҃ .

на а҃ мъ часѣ̀ : =трᲂпа́рь , вᲂскрⷭ҇нъ . сла́ва , ѻ҆ц҃е́мъ . кᲂнда́къ , вᲂскрⷭ҇нъ . =и҆ кᲂне́чныи ѿпꙋ́стъ .

=на г҃ мъ часѣ̀ : =трᲂпа́рь , вᲂскрⷭ҇нъ . сла́ва , пред̾пра́зднествꙋ . кᲂнда́къ , пред̾пра́зднествꙋ .

=на ѕ҃ мъ часѣ̀ : =трᲂпа́рь , вᲂскрⷭ҇нъ . сла́ва , ѻ҆ц҃е́мъ . кᲂнда́къ , ѻ҆ц҃е́мъ .

=на ѳ҃ мъ часѣ̀ : =трᲂпа́рь , вᲂскрⷭ҇нъ . сла́ва , пред̾пра́зднествꙋ . кᲂнда́къ , вᲂскрⷭ҇нъ .

На литꙋргі́и , бл҃же́нна , гла́сꙋ , на д҃ . и҆ ѻ҆ц҃е́мъ , пѣ́снь , г҃ ѧ , на д҃ . и҆ пред̾пра́зднествꙋ , пѣ́снь , ѕ҃ ѧ , на д҃ .

По вхо́дѣ , а҆́ще ли хра́мъ хрⷭ҇то́въ : трᲂпа́рь , вᲂскрⷭ҇нъ , и҆ пред̾пра́зднествꙋ , и҆ ѻ҆ц҃е́мъ . кᲂнда́къ , вᲂскрⷭ҇нъ . сла́ва , ѻ҆ц҃е́мъ . и҆ ны́нѣ , пред̾пра́зднествꙋ .

По вхо́дѣ , а҆́ще хра́мъ бцⷣы : трᲂпа́рь , вᲂскрⷭ҇нъ , и҆ пред̾пра́зднествꙋ , и҆ хра́мꙋ , и҆ ѻ҆ц҃е́мъ . кᲂнда́къ , вᲂскрⷭ҇нъ , и҆ пред̾пра́зднествꙋ . сла́ва , ѻ҆ц҃е́мъ . и҆ ны́нѣ , хра́мꙋ .

По вхо́дѣ , а҆́ще ли хра́мъ ст҃ы́мъ : трᲂпа́рь , вᲂскрⷭ҇нъ , и҆ пред̾пра́зднествꙋ , и҆ ѻ҆ц҃е́мъ , и҆ хра́мꙋ . кᲂнда́къ , вᲂскрⷭ҇нъ , и҆ ѻ҆ц҃е́мъ . сла́ва , хра́мꙋ . и҆ ны́нѣ , пред̾пра́зднествꙋ .

прᲂки́менъ гла́сꙋ . и҆ дрꙋгі́и , пѣ́снь ѻ҆ц҃е́мъ . блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ , хва́льнѡ и҆ прᲂсла́вленѡ и҆́мѧ твᲂѐ во́ вѣки . сти́хъ . ꙗ҆́кѡ пра́веденъ є҆сѝ ѡ҆ всѣ́хъ , и҆́хже сᲂтвᲂри́лъ є҆сѝ на́мъ . а҆пⷭ҇лъ , къ є҆вре́ѡмъ . зача́ло , тк҃и . та́же , а҆пⷭ҇лъ , рѧ́дъ . а҆ллилꙋ́їѧ , гла́сꙋ , и҆ ѻ҆ц҃е́мъ . сти́хъ . бж҃е ᲂу҆ши́ма на́шима ᲂу҆слы́шахᲂмъ , и҆ ѻ҆ц҃ы на́ши вᲂз̾вѣсти́ша на́мъ . є҆ѵⷢ҇а́лїе , ѿ =матѳе́ѧ . заⷱ҇ , а҃ . =та́же , є҆ѵⷢ҇а́лїе , рѧ́дъ . прича́стен̾ , хвали́те гдⷭ҇а с̾ нб҃съ . дрꙋгі́и , ра́дꙋйтесѧ пра́веднїи ѡ҆́ гдⷭ҇ѣ .

А҆́ще ли слꙋчи́тсѧ , нлⷣѧ ст҃ы́хъ ѻ҆ц҃ъ , мцⷭ҇а декабрѧ̀ в̾ к҃д де́нь . Пᲂдᲂба́етъ вѣ́дати , ꙗ҆́кѡ в̾ сїю̀ нлⷣю , непᲂе́тсѧ ничто́же . то́чїю , в̾ сꙋбо́тꙋ ве́черъ , на ма́лѣй вече́рни , стихѣ́ры , вᲂскрⷭ҇ны , на д҃ . сла́ва , и҆ ны́нѣ , пред̾пра́зднествꙋ . гла́съ , ѕ҃ . верте́пе ᲂу҆гᲂто́висѧ . на стихо́внѣ , во ѻ҆кта́и , стихѣ́ра вᲂскрⷭ҇на , и҆ стихѣ́ры бцⷣы , по ѻ҆бы́чаю . ны́нѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , =вᲂскрⷭ҇нъ . сла́ва , и҆ ны́нѣ , пред̾пра́зднь ствꙋ . =та́же , є҆ктенїѧ̀ ма́лаѧ . и҆ ѿпꙋ́стъ .

На вели́цѣй вече́рни , по ѻ҆бы́чнᲂй каѳи́смѣ , на гдⷭ҇и вᲂзва́хъ , стихѣ́ры , ѻ҆ц҃е́мъ , г҃ , стихѝ , на́ ѕ҃ . и҆ пред̾пра́зднествꙋ , г҃ , стихѝ , на д҃ .

Стихѣ́ры , ѻ҆ц҃е́мъ . гла́съ , ѕ҃ . поⷣ . всѐ ᲂу҆пᲂва́нїе . Ꙗ҆ви́сѧ ми́ра кᲂнце́мъ пра́ѻ҆ц҃ъ па́мѧть ,꙳ свѣ́та вᲂи́стинꙋ и҆спо́лнь ,꙳ и҆ зарѧ́ми бл҃гᲂда́ти сїѧ́ющи .꙳ хрⷭ҇то́съ бо сл҃нце свѣ́тло ,꙳ свы́ше прᲂсїѧ́въ и҆здале́ча ,꙳ ѕвѣзда́мъ сᲂбо́ръ веде́тъ ,꙳ с̾ ни́мъ вᲂсїѧ́вшїи .꙳ и҆ рᲂжество̀ бг҃ᲂчл҃ческᲂе ,꙳ ꙗ҆влѧ́етсѧ внꙋ́трь виѳлїе́ма бы́ти .꙳ всѝ ᲂу҆́бѡ вѣ́рᲂю сегѡ̀ рᲂжество̀ ,꙳ бл҃гᲂче́стнѡ пле́щꙋще ликꙋ́емъ ,꙳ хвалꙋ̀ пред̾пра́зднественꙋю . вⷤ . Сла́вᲂю ᲂу҆краша́ютсѧ ,꙳ бжⷭ҇твенымъ сꙋщество́мъ .꙳ а҆да́мъ ра́дꙋетсѧ дне́сь ,꙳ ꙗ҆́кѡ ѻ҆снᲂва́нїе и҆ ᲂу҆тверже́нїе пра́ѻ҆ц҃емъ мꙋ́дрымъ .꙳ сᲂвзыграва́етжесѧ а҆́вель ,꙳ и҆ є҆нѡ́хъ весели́тсѧ .꙳ и҆ ликꙋ́етъ си́ѳъ , и҆ нѡ́е в̾кꙋ́пѣ .꙳ съ патрїа́рхи же пᲂе́тъ а҆враа́мъ всехва́льныи ,꙳ и҆ рᲂжде́нїе без̾ ѻ҆ц҃а ны́нѣ мелхиседе́къ ви́дитъ свы́ше .꙳ тѣ́мже бжⷭ҇твенꙋю па́мѧть хрⷭ҇то́вѣмъ пра́ѻ҆ц҃емъ ,꙳ и҆ мы̀ сверша́юще мо́лимъ ,꙳ спасти́сѧ дш҃а́мъ на́шимъ . двⷤа . Ѡ҆блиста̀ ве́селѡ ,꙳ и҆́же въ пещѝ дѣте́й бг҃ᲂмꙋ́дрыхъ сᲂбо́ръ ,꙳ и҆ хрⷭ҇то́во ржⷭ҇тво̀ прᲂпᲂвѣ́дꙋетъ на землѝ .꙳ ꙗ҆́кᲂже бо честна́ѧ рᲂса̀ сше́дъ гдⷭ҇ь ,꙳ ро́ждьшꙋю спаса́етъ неѡ҆па́льнѡ ,꙳ сᲂблюда́етъ непᲂро́чнꙋ ,꙳ и҆ ѡ҆бᲂгаща́етъ бжⷭ҇твеными дарᲂва́нїи .꙳ тѣ́мже и҆ бг҃ᲂпрїѧ́тныи ,꙳ ра́дꙋетсѧ данїи́лъ веселѧ́сѧ ,꙳ ка́мень бо и҆з̾ гᲂры̀ несѣ́ченъ прᲂви́дѣ ꙗ҆́вѣ .꙳ со дерзнᲂве́нїемъ мо́литсѧ ,꙳ ны́нѣ ѡ҆ дш҃а́хъ на́шихъ . =двⷤа . =

Стихѣ́ры пред̾пра́зднествꙋ . гла́съ , ѕ҃ . поⷣ , то́йже . Незахᲂди́мᲂе сл҃нце ,꙳ ѿ дв҃ческихъ лᲂже́снъ ,꙳ вᲂсїѧ́ти и҆́детъ ,꙳ прᲂсвѣти́ти всю̀ пᲂд̾со́лнечнꙋю .꙳ чи́стыма ѻ҆чи́ма ,꙳ и҆ чи́стыми дѣѧ́ньми ,꙳ срѣ́сти сегѡ̀ пᲂтщи́мсѧ ,꙳ и҆ пᲂд̾ѧ́ти ны́нѣ ᲂу҆гᲂто́вимсѧ дх҃ᲂмъ ,꙳ грѧдꙋ́щаго во свᲂѧ̀ стра́ннымъ ржⷭ҇тво́мъ , ꙗ҆́кᲂже и҆зво́ли .꙳ ꙗ҆́кѡ да ᲂу҆стра́ншаѧсѧ на́съ є҆де́мскагѡ житїѧ̀ ,꙳ вᲂзведе́тъ ꙗ҆́кѡ милᲂсе́рдъ ,꙳ въ виѳлїе́мѣ ражда́етсѧ . двⷤа . И҆́же на плещꙋ̀ нᲂси́мыи херꙋви́мскꙋ , бг҃ъ сло́во ,꙳ пло́тїю по сᲂста́вꙋ сᲂє҆ди́ньсѧ ,꙳ в̾ пренепᲂро́чнᲂе чре́во всели́сѧ ,꙳ и҆ бы́сть чл҃къ и҆ на́ землю грѧде́тъ ,꙳ ѿ і҆ꙋ́дᲂва пле́мене рᲂди́тисѧ .꙳ верте́пъ ст҃ъ всѣ́хъ цр҃ю гᲂто́витсѧ ,꙳ ꙗ҆́кѡ ве́лїѧ пᲂла́та .꙳ ꙗ҆́сли же , ꙗ҆́кѡ прⷭ҇то́лъ ѻ҆гнезра́ченъ .꙳ в̾ ни́хже ꙗ҆́кѡ младе́нца ,꙳ дв҃аѧ мр҃і́ѧ пᲂлага́етъ ,꙳ во ѡ҆бнᲂвле́нїе сᲂзда́нїю ,꙳ неѡ҆держи́маго . Въ без̾слᲂве́сныхъ ꙗ҆́слѣхъ тѧ̀ пᲂлага́етъ дв҃аѧ ,꙳ бж҃їе сло́во без̾нача́льнᲂе ,꙳ нача́ло прїе́мша па́че є҆стества̀ .꙳ мᲂе́ бо разрѣши́ти безслᲂве́сїе грѧде́ши ,꙳ є҆́же пᲂд̾ѧ́хъ за́вистїю ѕмїи́нᲂю .꙳ пелена́ми же ѡ҆бви́тисѧ ,꙳ ꙗ҆́кѡ да расто́ргнеши рꙋ́бы и҆ плени́цы сᲂгрѣше́нїи мᲂи́хъ ,꙳ є҆ди́не бл҃же и҆ чл҃кᲂлю́бче .꙳ тѣ́мже тѧ̀ сла́влю пᲂѧ̀ ,꙳ и҆ пᲂклᲂнѧ́юсѧ ра́дᲂстнѡ ,꙳ є҆́же въ пло́ти прише́ствїю твᲂемꙋ̀ , и҆́мже свᲂбᲂди́хсѧ .

сла́ва , ѻ҆ц҃е́мъ . гла́съ , ѕ҃ . Данїи́лъ мꙋ́жь жела́нїи , ка́мень без̾ рꙋкꙋ̀ ѿсѣче́нъ ви́дѣвъ тѧ̀ гдⷭ҇и , млⷣнца без̾ сѣ́мене рᲂжде́на , прᲂвᲂзгласи́ тѧ , и҆́же ѿ дв҃ы вᲂплᲂще́нна сло́ва . непремѣ́нна бг҃а , и҆ сп҃са дш҃а́мъ на́шимъ .

=вы́хᲂдъ , прᲂки́менъ , дню̀ . чте́нїѧ , трѝ . =

Ѿ= бытїѧ̀ , чте́нїе . =

Ѿ= втᲂра́гѡ зако́на , чте́нїе . =

На литі́и , стⷯры пред̾пра́зднествꙋ , и҆́же пи́саны на рѧдꙋ̀ , в̾ к҃д дн҃ь . на гдⷭ҇и вᲂзва́хъ , и҆ на ᲂу҆́трени на хвали́тѣхъ , и҆ на стихо́внѣ , со сла́вными и҆́хъ . сла́ва . гла́съ , г҃ . Пра́ѻ҆ц҃ъ сᲂвᲂкꙋпле́нїе празднᲂлю́бцы прїиди́те , ѱл҃о́мски вᲂсхва́лимъ , а҆да́ма пра́ѻ҆ц҃а . є҆нѡ́ха , нѡ́ѧ , мельхиседе́ка . а҆враа́ма , и҆саа́ка , и҆ і҆а́кѡва . по зако́нѣ мѡѷсе́ѧ , и҆ а҆арѡ́на , и҆ і҆сꙋ́са , самꙋ́ила , и҆ дв҃да . с̾ ни́ми же и҆са́їю . і҆єремі́ю , і҆єзекі́илѧ . и҆ данїи́ла , и҆ ѻ҆́ба на́десѧте . в̾кꙋ́пѣ и҆лїю̀ , и҆ є҆лисе́ѧ , и҆ всѣ́хъ . заха́рїю , и҆ крⷭ҇тлѧ , и҆ прᲂпᲂвѣ́давшїѧ хрⷭ҇та̀ , жи́знь и҆ вᲂскрⷭ҇нїе ро́дꙋ на́шемꙋ .

На стихо́внѣ , стихѣ́ры , пред̾пра́зднествꙋ . самᲂгла́сны . гла́съ , в҃ . До́ме є҆вфра́ѳᲂвъ , гра́де ст҃ы́и , прᲂро́кѡмъ сла́во , ᲂу҆красѝ до́мъ , в̾ не́мже бжⷭ҇твеныи ражда́етсѧ .

сти́хъ : бг҃ъ ѿ ю҆́га прїи́детъ ,꙳ и҆ ст҃ы́и и҆з̾ гᲂры̀ присѣ́нныѧ ча́сты . Виѳлїе́ме землѐ і҆ꙋ́дᲂва , є҆́же по́ плᲂти житїѐ , свѣ́тлѡ ᲂу҆гᲂто́ви бжⷭ҇твеныи верте́пъ . въ не́мже бг҃ъ пло́тїю ражда́етсѧ , ѿ неи҆скꙋсᲂмꙋ́жныѧ ст҃ы́ѧ дв҃ы , на спасе́нїе ро́дꙋ на́шемꙋ .

сти́хъ : гдⷭ҇и ᲂу҆слы́шахъ слꙋ́хъ тво́й и҆ ᲂу҆бᲂѧ́хсѧ ,꙳ гдⷭ҇и разꙋмѣ́хъ дѣ́ла твᲂѧ̀ и҆ диви́хсѧ . Прїиди́те всѝ , хрⷭ҇то́во ржⷭ҇тво̀ вѣ́рнѡ пред̾пра́зднꙋемъ . и҆ мы́слено пѣ́нїе ꙗ҆́кѡ ѕвѣздꙋ̀ пред̾лага́юще , вᲂлше́бными славᲂслᲂвле́нїи , съ па́стыри вᲂзᲂпїе́мъ , прїи́де спасе́нїе земны́мъ . и҆з̾ дв҃ческихъ лᲂже́снъ , вѣ́рныѧ призыва́ѧ .

сла́ва . гла́съ , в҃ . Ра́дꙋйтесѧ пррⷪ҇цы честні́и , и҆́же зако́нъ гдⷭ҇нь до́брѣ ᲂу҆чини́вше . и҆ вѣ́рѣ ꙗ҆́вльшесѧ непᲂбѣди́мїи стᲂлпѝ и҆ неꙋкло́ннїи . вы́ бо хᲂда́таи ꙗ҆ви́стесѧ , но́вагѡ завѣ́та хрⷭ҇то́ва . и҆ преста́вльшесѧ к̾ нб҃сѝ , тᲂго̀ мᲂли́те , ᲂу҆мири́ти ми́ръ , и҆ спастѝ дш҃а на́ша .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , ѻ҆ц҃е́мъ : Ве́лїѧ вѣ́ры и҆справле́нїѧ . двⷤа . и҆ пред̾пра́зднествꙋ : Написа́шесѧ и҆нᲂгда̀ . =аⷤ . =

А҆́ще ли нѣ́сть бдѣ́нїе , трᲂпа́рь вᲂскрⷭ҇нъ . сла́ва , ѻ҆ц҃е́мъ . и҆ ны́нѣ , пред̾пра́зднествꙋ .

На ᲂу҆́трени , на бг҃ъ гдⷭ҇ь , трᲂпа́рь вᲂскрⷭ҇нъ , двⷤа . сла́ва . ѻ҆ц҃е́мъ , гла́съ , в҃ . Ве́лїѧ вѣ́ры и҆справле́нїѧ , во и҆сто́чницѣ пла́меннѣ ꙗ҆́кѡ на вᲂдѣ̀ пᲂко́йнѣ , ст҃і́и трїѐ ѻ҆́трᲂцы ра́дᲂвахꙋсѧ . и҆ прᲂро́къ данїи́лъ , льво́мъ па́стырь ꙗ҆́кѡ ѻ҆вца́мъ ꙗ҆влѧ́шесѧ . тѣ́хъ мл҃твами хрⷭ҇тѐ бж҃е пᲂми́лꙋй на́съ . и҆ ны́нѣ . пред̾пра́зднествꙋ , гла́съ , д҃ . Написа́шесѧ и҆нᲂгда̀ со ста́рцемъ і҆ѡ́сифᲂмъ , ꙗ҆́кѡ ѿ сѣ́мене дв҃дᲂва , въ виѳлїе́мѣ марїа́мъ , во́ чревѣ нᲂсѧ́щи без̾сѣ́меннᲂе ржⷭ҇тво̀ . наста́ же вре́мѧ рᲂжде́нїѧ , и҆ мѣ́ста небѣ̀ во ѡ҆бита́нїе , но ꙗ҆́кѡ красна̀ пᲂла́та , верте́пъ цр҃цѣ пᲂказа́сѧ . хрⷭ҇то́съ ражда́етсѧ , пре́жде па́дшїй хᲂтѧ̀ вᲂскреси́ти ѻ҆́бразъ .

По а҃ , стихᲂло́гїи , сѣда́ленъ ѻ҆ц҃е́мъ . гла́съ , д҃ . Ѻ҆те́ческїи бж҃е , пред̾вᲂзгласи́лъ є҆сѝ та́йнѡ , хᲂтѧ́щее бы́ти на землѝ бг҃ᲂѧвле́нїе та́йнᲂе , превѣ́чнагѡ сн҃а твᲂегѡ̀ , є҆́же ѿ дв҃ы , а҆враа́мѡмъ , и҆ и҆саа́кѡмъ , и҆ і҆а́кѡвᲂмъ . ѿ і҆ꙋ́ды , и҆ і҆єссе́ѧ , и҆ дв҃да , и҆ прᲂро́къ всѣ́хъ . дх҃ᲂмъ прᲂвᲂзвѣща́ѧ , и҆́же в̾ виѳлїе́мѣ хрⷭ҇та̀ ꙗ҆́вльшасѧ , сꙋ́щимъ в̾ ми́рѣ , всѣ́хъ призыва́юща . =сла́ва , и҆ ны́нѣ , то́йже . =

По в҃ , стихᲂло́гїи , сѣда́ленъ ѻ҆ц҃е́мъ . гла́съ , а҃ . Весели́сѧ виѳлїе́мѣ , є҆вфра́ѳо гᲂто́висѧ , се́бо а҆́гница , па́стырѧ вели́кагѡ во́ чревѣ нᲂсѧ́щи рᲂди́ти грѧде́тъ . ю҆́же ви́дѧще бг҃ᲂно́снїи ѻ҆ц҃ы ра́дꙋютсѧ , съ па́стыри пᲂю́ще , дв҃ꙋ дᲂѧ́щꙋю . =сла́ва , и҆ ны́нѣ , то́йже . =

По непᲂро́чнахъ , трᲂпарѝ и҆́хъ . и҆ є҆ктенїѧ̀ . та́же , сѣда́ленъ ѻ҆ц҃е́мъ . гла́съ , и҃ . Пра́здникъ пра́зднꙋемъ вѣ́рнїи , ѻ҆ц҃ъ бжⷭ҇твеныхъ ра́дᲂстнѡ , а҆да́ма и҆ а҆́велѧ чтꙋ́ще . си́ѳа , и҆ є҆нѡ́са бл҃жа́ще , є҆нѡ́ха , нѡ́ѧ . си́ма же и҆ а҆ѳе́та вᲂспᲂе́мъ . а҆враа́ма пре́же зако́на вѣ́рᲂю прᲂсїѧ́вша . и҆ бжⷭ҇твенаго и҆саа́ка і҆а́кѡва и҆ і҆ꙋ́дꙋ . леві́ю , и҆ цѣлᲂмꙋ́драго і҆ѡ́сифа вᲂсхва́лимъ . и҆ вѣ́рнѡ вᲂзᲂпїе́мъ , бг҃ᲂно́снїи пра́ѻ҆ц҃ы , мᲂли́те хрⷭ҇та̀ бг҃а грѣхо́въ ѡ҆ставле́нїе пᲂда́ти , чтꙋ́щимъ любо́вїю ст҃ꙋ́ю па́мѧть ва́шꙋ . =двⷤа . сла́ва , и҆ ны́нѣ . и҆з̾ =нѣ́дръ ѻ҆те́ческихъ сᲂше́лъ є҆сѝ , и҆ несказа́ннымъ и҆злїѧ́нїемъ ю҆́же по на́съ нищетꙋ̀ прїѧ́лъ є҆сѝ , па́че є҆стества̀ чл҃кᲂлю́бче . в̾ верте́пъ всели́тисѧ бл҃гᲂвᲂли́лъ є҆сѝ гдⷭ҇и , и҆ ꙗ҆́кѡ младе́нецъ ссе́ши зижди́тель и҆ гдⷭ҇ь . тѣ́мже ѕвѣздо́ю наставлѧ́еми вᲂлсвѝ , да́ры тебѣ̀ прино́сѧтъ ꙗ҆́кѡ влⷣцѣ тва́ри . па́стырїе и҆ а҆́нг҃ли дивлѧ́хꙋсѧ зᲂвꙋ́ще , сла́ва в̾ вы́шнихъ бг҃ꙋ , и҆ на землѝ ми́ръ , в̾ челᲂвѣ́цѣхъ бл҃гᲂвᲂле́нїе .

степе́нна , гла́сꙋ . прᲂки́менъ . и҆ всѧ́ко дыха́нїе . є҆ѵⷢ҇а́лїе , вᲂскрⷭ҇но . и҆ вᲂскрⷭ҇нїе хрⷭ҇то́во . ѱл҃о́мъ , н҃ . и҆ стⷯра , вᲂскрⷭ҇на . =Кано́на два̀ . ѻ҆ц҃е́мъ , на́ и҃ , і҆рмᲂсы̀ ро́зники , по два́жды . трᲂпарѝ , на́ ѕ҃ . в̾ ни́хже пред̾варѧ́ета , вᲂскрⷭ҇на трᲂпарѧ̀ два̀ . є҆ю́же ра́ди во ѻ҆кта́и непᲂе́тсѧ . и҆ пред̾пра́зднествꙋ , на́ ѕ҃ . =

кᲂнда́къ , пред̾пра́зднествꙋ . гла́съ , г҃ . Дв҃аѧ дне́сь превѣ́чнᲂе сло́во , в̾ верте́пѣ грѧде́тъ рᲂди́ти неи҆зрече́ннѡ . ликꙋ́й вселе́ннаѧ слы́шавши , прᲂсла́ви со а҆́нг҃лы и҆ па́стыри , хᲂтѧ́ща ꙗ҆ви́тисѧ ѻ҆трᲂча̀ мла́да превѣ́чнагѡ бг҃а . и҆́кᲂсъ . Ѽ =ᲂу҆жа́снагѡ вᲂи́стинꙋ , и҆ па́че сло́ва чꙋдесѐ . є҆́же бы́ти даѧ̀ всѣ́мъ бл҃гᲂстїю , во́ чрево ст҃ы́ѧ дв҃ы вни́де , и҆ в̾ верте́пѣ рᲂди́тисѧ грѧде́тъ , и҆ в̾ ꙗ҆́слѣхъ пᲂлᲂжи́тисѧ . ѕвѣзда́ же сегѡ̀ прᲂпᲂвѣ́дꙋетъ свы́ше вᲂлхво́мъ , и҆дꙋ́щимъ на пᲂклᲂне́нїе є҆гѡ̀ с̾ да́ры , и҆з̾ дале́ча привлача̀ со тща́нїемъ пᲂслѣ́дꙋющїѧ валаа́мᲂвꙋ прᲂрече́нїю , ре́кшагѡ , ѕвѣзда̀ хо́щетъ прᲂвᲂз̾вѣсти́ти ѻ҆трᲂча̀ мла́да превѣ́чнагѡ бг҃а . =сла́ва , и҆ нн҃ѣ . ѵ҆пако́й . гла́съ , и҃ . А҆́нг҃лъ дѣ́темъ ѡ҆рᲂсѝ пе́щь , ны́нѣ же жена́мъ пла́чь вᲂз̾бранѧ́ше гл҃ѧ , что̀ принесо́сте мѵ́ро . кᲂго̀ и҆́щете во́ грᲂбѣ ; вᲂскр҃се хрⷭ҇то́съ бг҃ъ . є҆́сть бо живо́тъ и҆ сп҃съ ро́дꙋ чл҃ческᲂмꙋ .

и҆́нъ , і҆рмо́съ . Же́ѕлъ и҆з̾ ко́рене і҆єссе́ѡва . Же́ѕлъ и҆з̾ ко́рене і҆єссе́ѡва дв҃о прᲂзѧбла̀ є҆сѝ , цвѣ́тъ вᲂзрасти́вши неꙋвѧда́емыи , всѣ́хъ сᲂдѣ́телѧ . и҆́же зе́млю всю̀ цвѣты̀ ꙗ҆́кѡ бг҃а ᲂу҆краша́юща . вᲂпїю́щꙋ є҆мꙋ̀ , сла́ва си́лѣ твᲂе́й гдⷭ҇и . Снѣ́дїю мѧ ѡ҆кра́дена ѕло́ю , и҆ нра́вᲂмъ пᲂпо́лзшасѧ , и҆ ᲂу҆пᲂдо́бльшасѧ без̾слᲂве́снымъ , сло́ве бж҃їи прише́лъ є҆сѝ назида́ѧ . младе́нецъ бы́въ въ ꙗ҆́слѣхъ без̾слᲂве́сныхъ вᲂзле́гъ . сла́ва си́лѣ твᲂе́й гдⷭ҇и . =боⷢ҇ . и҆з̾ =гᲂры̀ присѣ́нныѧ і҆с҃е дв҃ыѧ , тѧ̀ вᲂплᲂще́нна , а҆вва́кꙋмъ прᲂви́дѣ , го́ры ѕлы́ѧ и҆ хо́лмы сᲂкрꙋша́юща , и҆ пᲂтребле́нїю даю́ща вᲂзнᲂше́нїе лꙋка́вагѡ , и҆ бѣсо́вскаѧ вᲂзвыше́нїѧ .

На хвали́тѣхъ , стихѣ́ры , на́ ѕ҃ . ѻ҆ц҃е́мъ , г҃ . и҆ пред̾пра́зднествꙋ , г҃ . =Стихѣ́ры , ѻ҆ц҃е́мъ . гла́съ , є҃ . поⷣ . р=а́дꙋйсѧ живᲂно́сныи . Вᲂзвы́си гла́съ вᲂи́стинꙋ , сїѡ́не бжⷭ҇твеныи гра́де , и҆ прᲂпᲂвѣ́ждь ѻ҆ц҃ъ бжⷭ҇твенꙋю па́мѧть , со а҆враа́мѡмъ и҆ и҆саа́кѡмъ и҆ і҆а́кѡвᲂмъ всесла́вными . се́бо со і҆ꙋ́дᲂю и҆ леві́емъ велича́емъ , мѡѷсе́ѧ вели́каго , и҆ а҆арѡ́на чꙋ́днаго . и҆ пᲂчте́мъ съ дв҃дᲂмъ і҆сꙋ́са , и҆ самꙋ́ила всѝ , пред̾пра́зднествꙋ хрⷭ҇то́вꙋ бжⷭ҇твенꙋю пᲂхвалꙋ̀ , пѣ́сньми бжⷭ҇твеными пле́щꙋще . ꙗ҆́же ѿ негѡ̀ бл҃гᲂда́ть ᲂу҆лꙋчи́ти про́симъ , ми́рᲂви дарᲂва́ти ве́лїю млⷭ҇ть . Грѧдѝ и҆́же на ѻ҆́гненꙋю и҆нᲂгда̀ сѣ́де , и҆лїинꙋ̀ бжⷭ҇твенꙋю кᲂлесни́цꙋ , бг҃ᲂмꙋ́дре є҆лисе́е , со і҆єзекі́илемъ во є҆ди́но , и҆ і҆ѡсі́е в̾кꙋ́пѣ сра́дꙋйтесѧ . честна́ѧ же двᲂенадесѧ́тице прᲂро́ческаѧ бг҃ᲂдᲂхнᲂве́ннаѧ , ржⷭ҇твꙋ̀ хрⷭ҇то́вꙋ сликꙋ́йте , и҆ в̾ пѣ́снехъ всѝ пра́веднїи вᲂспо́йте . ѻ҆́трᲂцы всебл҃же́ннїи , и҆́же рᲂсо́ю дх҃о́внᲂю ᲂу҆гаси́вшїи пла́мень пе́щныи , ѡ҆ на́съ мᲂли́тесѧ хрⷭ҇то́ви ѻ҆ц҃ы , низпᲂсла́ти дш҃а́мъ на́шимъ ве́лїю млⷭ҇ть . Ꙗ҆ви́сѧ и҆́же ѿ́ вѣка на землѝ , прᲂпᲂвѣ́даемаѧ прᲂро́ки в̾ вѣща́нїихъ , дв҃аѧ бцⷣа . ю҆́же патрїа́рси премꙋ́дрїи , и҆ пра́ведныхъ сᲂбо́ри вᲂз̾вѣща́ютъ . с̾ ни́ми же сликꙋ́етъ и҆ же́нъ бл҃гᲂлѣ́пїе . са́рра , реве́ка , и҆ рахі́иль . а҆́нна же , и҆ сла́внаѧ марїа́мъ мѡѷсе́ѡва в̾кꙋ́пѣ . с̾ ни́ми сра́дꙋютсѧ и҆ мирсті́и кᲂнцы̀ , и҆ всѧ̀ тва́рь пᲂчита́етъ , ꙗ҆́кѡ зижди́тель всѣ́хъ и҆ бг҃ъ рᲂди́тисѧ прихо́дитъ . є҆́же да́ти ми́рᲂви ве́лїю ми́лᲂсть .

Стихѣ́ры , пред̾пра́зднествꙋ . гла́съ , д҃ . поⷣ . и҆́же зва́нныи свы́ше . И҆са́їинъ гла́съ сверша́етсѧ .꙳ се́бо дв҃аѧ неѡ҆бъе́млемаго ,꙳ ѡ҆писꙋ́емаго пло́тїю ,꙳ во ᲂу҆тро́бѣ но́ситъ ,꙳ и҆ пресла́внѡ рᲂди́ти прихо́дитъ .꙳ бг҃ᲂро́дныи верте́пе ᲂу҆краси́сѧ ,꙳ виѳлїе́ме ᲂу҆гᲂто́висѧ ,꙳ цр҃ь бо тебѐ и҆зво́ли во ѻ҆би́телище .꙳ прїими́те ꙗ҆́сли ,꙳ пᲂвива́ема млⷣнца хрⷭ҇та̀ ,꙳ хᲂтѧ́ща рѣши́ти ,꙳ плени́цы сᲂгрѣше́нїи чл҃кѡмъ бл҃гᲂстїю . Написа́сѧ съ рабы̀ влⷣка ,꙳ сᲂгрѣше́нїи рꙋкᲂписа́нїе раздра́ти хᲂтѧ̀ .꙳ и҆ написа́ти всѧ̀ в̾ кни́гахъ живо́тныхъ ,꙳ ᲂу҆мерщве́ныхъ ѡ҆краде́нїемъ ѕмі́ѧ .꙳ дв҃аѧ же но́ситъ тѧ̀ , всѧ̀ нᲂсѧ́щаго ,꙳ пло́тїю ме́ртвенᲂю ѡ҆блᲂже́на ,꙳ и҆ всели́тисѧ в̾ ма́лыи верте́пъ ,꙳ бл҃гᲂи҆зво́лившаго .꙳ є҆го́же ро́ждьшасѧ ,꙳ чи́нᲂве го́рнїи а҆́нг҃льстїи вᲂсхвали́ша ,꙳ съ бжⷭ҇твеными па́стыри ,꙳ дивѧ́щесѧ держа́вѣ твᲂе́й . Свѣ́тлыи же и҆ ѡ҆дш҃евле́ныи ѻ҆́блакъ ,꙳ тꙋ́чꙋ нᲂсѧ́щь нбⷭ҇нꙋю .꙳ сїю̀ на́ землю ны́нѣ грѧде́тъ прᲂлїѧ́ти ,꙳ ꙗ҆́кѡ да напᲂи́тъ землѝ лицѐ .꙳ весна̀ бл҃гᲂда́тнаѧ ,꙳ мы́сленаѧ лѣ́ствица .꙳ внꙋ́трь во ᲂу҆тро́бѣ держа́щи ,꙳ неи҆з̾глаго́ланнымъ сло́вᲂмъ ражда́етъ ,꙳ зи́мꙋ без̾бо́жнꙋю разᲂрѧ́ѧ .꙳ пᲂла́тꙋ чи́стꙋ , и҆ нескве́рнꙋ цр҃е́ви ,꙳ верте́пъ привнᲂша́етъ вᲂплᲂща́емꙋ .

Славᲂсло́вїе вели́кᲂе , и҆ ѿпꙋ́стъ . и҆ стихѣ́ра , є҆ѵⷢ҇а́льскаѧ . ча́съ , а҃ .

на а҃ мъ часѣ̀ : =трᲂпа́рь , вᲂскрⷭ҇нъ . сла́ва , ѻ҆ц҃е́мъ . кᲂнда́къ , вᲂскрⷭ҇нъ . =и҆ кᲂне́чныи ѿпꙋ́стъ .

=на г҃ мъ часѣ̀ : =трᲂпа́рь , вᲂскрⷭ҇нъ . сла́ва , пред̾ пра́зднествꙋ . кᲂнда́къ , пред̾пра́зднествꙋ .

=на ѕ҃ мъ часѣ̀ : =трᲂпа́рь , вᲂскрⷭ҇нъ . сла́ва , ѻ҆ц҃е́мъ . кᲂнда́къ , ѻ҆ц҃е́мъ .

=на ѳ҃ мъ часѣ̀ : =трᲂпа́рь , вᲂскрⷭ҇нъ . сла́ва , пред̾ пра́зднествꙋ . кᲂнда́къ , вᲂскрⷭ҇нъ .

На литꙋргі́и , бл҃же́нна , ѿ кано́на ѻ҆ц҃е́мъ , пѣ́снь , г҃ ѧ , на д҃ . и҆ пред̾пра́зднествꙋ , пѣ́снь , ѕ҃ ѧ , на д҃ .

По вхо́дѣ : трᲂпа́рь , вᲂскрⷭ҇нъ , и҆ пред̾пра́здне ствꙋ , и҆ ѻ҆ц҃е́мъ . кᲂнда́къ , вᲂскрⷭ҇нъ . сла́ва , ѻ҆ц҃е́мъ . и҆ ны́нѣ , пред̾пра́зднествꙋ .

прᲂки́менъ , пѣ́снь ѻ҆ц҃е́мъ . бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ , хва́льнѡ и҆ прᲂсла́вленѡ и҆́мѧ твᲂѐ во́ вѣки . сти́хъ . ꙗ҆́кѡ пра́веденъ є҆сѝ ѡ҆ всѣ́хъ , и҆́хже сᲂтвᲂри́лъ є҆сѝ на́мъ . а҆пⷭ҇лъ , къ є҆вре́ѡм̾ . заⷱ҇ , тк҃и . та́же , а҆пⷭ҇лъ , рѧ́дъ . а҆ллилꙋ́їѧ . бж҃е ᲂу҆ши́ма на́шима ᲂу҆слы́шахᲂмъ , и҆ ѻ҆ц҃ы на́ши вᲂзвѣсти́ша на́мъ . сти́хъ . спа́слъ є҆сѝ на́съ ѿ стꙋжа́ющихъ на́мъ . є҆ѵⷢ҇а́лїе , ѿ =матѳе́ѧ . заⷱ҇ , а҃ . =та́же , є҆ѵⷢ҇а́лїе , рѧ́дъ . прича́стен̾ , хвали́те гдⷭ҇а с̾ нб҃съ . дрꙋгі́и , ра́дꙋйтесѧ пра́веднїи ѡ҆́ гдⷭ҇ѣ . А҆́щели же бꙋ́детъ , ѿстꙋ́пка недѣ́лѧмъ , то̀ рѧ́дꙋ недѣ́ли , а҆пⷭ҇ла и҆ є҆ѵⷢ҇а́лїѧ нечте́мъ .

<< Previous

Contents

Next >>