Бл҃гᲂвᲂле́нїемъ бг҃а ѻ҆ц҃а вседержи́телѧ , и҆ с̾пᲂспѣше́нїемъ , сᲂпрⷭ҇то́льнагѡ и҆ є҆динᲂро́днагѡ сн҃а є҆гѡ̀ , бг҃а и҆ гдⷭ҇а і҆с҃а хрⷭ҇та̀ . и҆ сᲂдѣ́йствїемъ прест҃а́гѡ и҆ живᲂтвᲂрѧ́щагѡ дх҃а . тᲂгѡ̀ є҆ди́нагѡ бжⷭ҇тва̀ и҆ є҆ди́нагѡ сꙋщества̀ , нераздѣли́мыѧ трⷪ҇цы по бл҃гᲂда́ти . ꙗ҆́кѡ ѡ҆ не́й сᲂздана̀ бы́ша всѧ́ческаѧ , ꙗ҆́же на́ нб҃си и҆ на землѝ . Сего́ же ра́ди вᲂсїѧ̀ лꙋча̀ свѣ́та всеми́рнагѡ прᲂсвѣще́нїѧ въ срⷣцы , и҆́же в̾ зако́нѣ бжⷭ҇твеннѣмъ ѿ ю҆́нᲂсти вᲂспитѣ́н̾нᲂмꙋ . зна́менати сїѧ̀ слᲂвеса̀ со внима́нїемъ . спаси́тельнагѡ ко́рене , браздᲂдержа́телю слᲂве́н̾скагѡ ꙗ҆зы́ка . и҆ ѡ҆ бл҃гᲂче́стїи и҆́стиннᲂмꙋ пᲂбо́рникꙋ . и҆ є҆гѡ̀ бжⷭ҇твеннᲂю десни́цею блюдо́мꙋ . бл҃гᲂчести́вᲂмꙋ гдⷭ҇рю на́шемꙋ , бг҃ᲂмꙋ́дрᲂмꙋ и҆ бг҃ᲂмъ и҆з̾бра́ннᲂмꙋ цр҃ю и҆ вели́кᲂмꙋ кн҃зю миха́илꙋ ѳеѡ́дᲂрᲂвичꙋ всеѧ̀ рꙋсі́и самᲂде́ржцꙋ . и҆́стиннᲂмꙋ рачи́телю бл҃гᲂче́стїю , и҆ бл҃гᲂше́ственыи ст҃а́гѡ пꙋтѝ бг҃ᲂꙋста́вленагѡ зако́на премꙋ́дрыи и҆схᲂда́тай , и҆ бл҃гᲂразꙋ́мныи пᲂспѣ́шникъ и҆́стинныи и҆зыска́тель ѻ҆те́ческᲂмꙋ преда́нїю . бл҃гᲂразꙋ́мнѣ во бл҃гᲂчести́вᲂй и҆ непᲂро́чнᲂй и҆́стиннᲂй хрⷭ҇тїѧ́нскᲂй вѣ́рѣ , во всѧ́кᲂмъ ᲂу҆правле́нїи . по бл҃гᲂвѣ́стїю хрⷭ҇то́вꙋ , и҆ по а҆пⷭ҇льскᲂмꙋ ᲂу҆че́нїю , и҆ по ст҃ы́хъ ѻ҆ц҃ъ преда́нїю , цвѣты́и сᲂверше́ннымъ бл҃гᲂче́стїемъ . ревнꙋ́ѧ дᲂбрᲂдѣ́телемъ дре́внихъ ст҃ы́хъ и҆́же во бл҃гᲂче́стїи прᲂсїѧ́вшихъ цр҃е́й , ст҃а́гѡ и҆ ра́внѡ а҆пⷭ҇лѡмъ вели́кагѡ цр҃ѧ кᲂн̾станти́на , и҆ мт҃ре є҆гѡ̀ бл҃же́нныѧ цр҃цы є҆ле́ны . па́че же и҆ пᲂслѣдѝ тѣ́хъ лѣ́ты , ра́вна же дᲂбрᲂдѣ́тельными и҆ дх҃о́вными дѣ́лы , ст҃а́гѡ и҆ вели́кагѡ бл҃гᲂвѣ́рнагѡ кн҃зѧ влади́мира , нарече́ннагѡ во ст҃о́мъ кр҃ще́нїи васи́лїѧ . тѣ́хъ ᲂу҆́бѡ бл҃гі́ѧ нра́вы в̾ срⷣцы стѧжа̀ , и҆ всѧ́кїѧ дх҃о́вныѧ дᲂбрᲂдѣ́тели ѻ҆́нѣхъ вы́нꙋ в̾ себѣ̀ сᲂдержа̀ . и҆ ꙗ҆́кѡ нѣ́кими степе́ньми де́нь ѿ́ дне на высᲂтꙋ̀ дᲂбрᲂдѣ́телей вᲂсхᲂдѧ̀ . жела́ѧ ѿ всѣ́хъ сᲂдѣ́телѧ и҆ прᲂмы́сленика , сла́вы ѻ҆́нѣхъ наслади́тисѧ . сегѡ̀ ра́ди и҆ по́двигъ не ма́лъ пᲂказꙋ́ѧ . мно́гїѧ ᲂу҆́бѡ бжⷭ҇венныѧ цр҃кви по всю́дꙋ пᲂставлѧ́ѧ , и҆ всѧ́кими пречꙋ́дными лѣ́пᲂтами велелѣ́пнѣ ᲂу҆страѧ́ѧ . и҆ преда́нїѧ ст҃ы́хъ ѻ҆ц҃ъ без̾ сꙋмнѣ́нїѧ крѣ́пкѡ предержа̀ . Нача́ло же все́й премꙋ́дрᲂсти , и҆мѣ́ти вы́нꙋ в̾ срⷣцы , є҆́же є҆́сть стра́хъ гдⷭ҇нь . скве́рнᲂе же тщегла́сїе ѿмета́ѧ , и҆ преспѣва́ѧ ᲂу҆се́рднѡ на пᲂчита́нїе бжⷭ҇твенныхъ писа́нїи . Ꙗ҆́кѡ сегѡ̀ ра́ди бг҃ъ пᲂма́за є҆гѡ̀ є҆ле́ѡмъ ра́дᲂсти , па́че прича́стникъ є҆гѡ̀ . зане́же ᲂу҆́бѡ вѣ́дыи ѻ҆́нъ гдⷭ҇рь , бесѣ́ды ѕлы̀ растлѣва́ютъ челᲂвѣ́кѡмъ ᲂу҆мы̀ , и҆ лиша́ютъ и҆́стины , и҆ ѿ ни́хже ча́стѡ слꙋча́ютъсѧ дш҃е́вныѧ бѣды̀ . Бжⷭ҇твеннᲂе же и҆ бг҃ᲂдᲂхнᲂве́ннᲂе писа́нїе пᲂле́зно є҆́сть ко ᲂу҆че́нїю и҆ ко и҆справле́нїю к̾ наказа́нїю є҆́же въ пра́вдꙋ , ѡ҆ и҆справле́нїи кни́жнᲂмъ , и҆ в̾ни́хъ ѡ҆ слᲂвесѝ и҆́стиннѣмъ , и҆звᲂже́нїемъ печа́тными пи́смены , ко спасе́нїю дш҃а́мъ хрⷭ҇тїѧ́нскагѡ наро́да мнᲂгᲂчи́сленагѡ , слᲂве́нскагѡ ꙗ҆зы́ка , свᲂеѧ̀ вели́кїѧ держа́вы . и҆ бжⷭ҇твенныѧ цр҃кви , ꙗ҆́кѡ нѣ́кꙋю црⷭ҇кꙋю ᲂу҆́тварь , пречꙋ́дными лѣ́пᲂтами , бжⷭ҇твенными зако́ны ᲂу҆краша́ѧ и҆ ᲂу҆крѣплѧ́ѧ . и҆ си́ми бг҃ᲂдᲂхнᲂве́нными сщ҃е́нными писа́нїи , па́че же и҆ мнᲂгᲂчꙋде́сными ст҃ы́ми и҆ко́нами , самᲂгѡ̀ сᲂдѣ́телѧ на́шегѡ бг҃а . и҆ тᲂгѡ̀ пренепᲂро́чныѧ мт҃ре , влⷣчцы на́шеѧ бцⷣы и҆ прⷭ҇нѡ дв҃ы мр҃і́и , и҆́стинныѧ и҆ непᲂсты́дныѧ хᲂда́таицы , к̾ сн҃ꙋ и҆ бг҃ꙋ . и҆ всѣ́хъ ст҃ы́хъ , и҆́же ѿ́вѣка ᲂу҆го́ждьшихъ , пресла́внѡ ꙗ҆́кѡ нб҃о ѕвѣзда́ми ᲂу҆краша́ѧ . и҆ всѧ́кїѧ бжⷭ҇твенныѧ ве́щи , чи́ны же и҆ ᲂу҆ста́вы , ꙗ҆́же в̾ пᲂхвалꙋ̀ и҆ че́сть бж҃їю быва́емаѧ . и҆ свᲂѐ црⷭ҇кᲂе без̾чи́сленᲂе сᲂкро́вище , во ᲂу҆стрᲂе́нїе всѧ́кїѧ ст҃ы́ни и҆зъ ѡ҆би́льнѡ прᲂстира́ѧ , во ѻ҆́бщꙋю дх҃о́внꙋю по́льзꙋ , бл҃гᲂчести́вᲂмꙋ црⷭ҇твїю є҆гѡ̀ . и҆ всемꙋ̀ хрⷭ҇тᲂи҆мени́тᲂмꙋ зако́ннᲂмꙋ и҆спᲂлне́нїю . И҆ сегѡ̀ ра́ди пᲂвелѣ́нїемъ , бг҃ᲂмъ и҆з̾бра́ннагѡ , и҆ ст҃ы́мъ є҆ле́ѡмъ пᲂма́заннагѡ , крѣ́пкагѡ храни́телѧ и҆ пᲂбо́рника , ст҃ы́ѧ свѣтлᲂсїѧ́тельныѧ , и҆́стинныѧ правᲂсла́вныѧ хрⷭ҇тїѧ́нскїѧ вѣ́ры . бл҃гᲂвѣ́рнагѡ и҆ бл҃гᲂро́днагѡ и҆ хрⷭ҇тᲂлюби́вагѡ , бг҃ᲂмъ вѣнча́ннагѡ , и҆ бг҃ᲂмъ пᲂчте́ннагѡ , и҆ бг҃ᲂмъ превᲂзнесе́ннагѡ , и҆ бл҃гᲂче́стїемъ всеѧ̀ вселе́нныѧ в̾ кᲂнцѣ́хъ вᲂсїѧ́вшагѡ , вели́кагѡ гдⷭ҇рѧ цр҃ѧ и҆ вели́кагѡ кн҃зѧ миха́ила ѳеѡ́дᲂрᲂвича всеѧ̀ рꙋсі́и самᲂде́ржца . И҆ на прⷭ҇то́лѣ вели́кихъ гдⷭ҇рей , дѣ́да свᲂегѡ̀ , цр҃ѧ и҆ вели́кагѡ кн҃зѧ і҆ѡа́нна васи́лїевича всеѧ̀ рꙋсі́и . И҆ дѧ́ди свᲂегѡ̀ , гдⷭ҇рѧ цр҃ѧ и҆ вели́кагѡ кн҃зѧ ѳеѡ́дᲂра і҆ѡа́ннᲂвича всеѧ̀ рꙋсі́и , ски́петры вели́кихъ гдⷭ҇рьствъ , на вᲂсто́цѣ и҆ на сѣ́верѣ сᲂдержа́щагѡ , и҆ и҆ны́хъ стра́нъ гдⷭ҇рѧ и҆ ѡ҆блада́телѧ , пᲂвелѣ́нїемъ . И҆ по бл҃гᲂслᲂве́нїю ѻ҆ц҃а є҆гѡ̀ и҆ бг҃ᲂмо́льца , кѵ́ръ і҆ѡ́сифа патрїа́рха мᲂско́в̾скагѡ и҆ всеѧ̀ рꙋсі́и . бы́сть печа́тати сїѧ̀ бг҃ᲂдᲂхнᲂве́ннаѧ кни́га , мцⷭ҇ъ февра́ль , въ црⷭ҇твꙋющемъ гра́дѣ мᲂсквѣ̀ , въ лѣ́то се́дмь ты́сѧщь , рн҃в . мцⷭ҇а декабрѧ̀ , въ ѕ҃ де́нь . Въ л҃а є лѣ́то , бл҃гᲂчести́выѧ держа́вы црⷭ҇тва є҆гѡ̀ гдⷭ҇рѧ цр҃ѧ и҆ вели́кагѡ кн҃зѧ миха́ила ѳеѡ́дᲂрᲂвича всеѧ̀ рꙋсі́и . И҆ при сы́нѣ є҆гѡ̀ гдⷭ҇рѣ на́шемъ бл҃гᲂвѣ́рнᲂмъ цр҃вичѣ кн҃зѣ а҆леѯѣ́е миха́илᲂвиче . Въ г҃ є лѣ́то , патрїа́ршества ѻ҆ц҃а и҆́хъ и҆ бг҃ᲂмо́льца кѵ́ръ і҆ѡ́сифа патрїа́рха мᲂско́в̾скагѡ и҆ всеѧ̀ рꙋсі́и . в̾ сла́вꙋ и҆ хвалꙋ̀ и҆́стиннᲂмꙋ бг҃ꙋ на́шемꙋ гдⷭ҇ꙋ і҆с҃ꙋ хрⷭ҇тꙋ̀ , и҆ пречи́стѣй бцⷣѣ , и҆ всѣ́мъ ст҃ы́мъ , а҆ми́нь .

Тѣ́мже всѝ є҆ли́кѡ ва́съ , свѣ́та ча́да , и҆ сы́нᲂве є҆ѵⷢ҇а́лїѧ , и҆ ст҃ы́ѧ цр҃кве бг҃ᲂсᲂбра́ннаѧ чета̀ , сщ҃еннᲂнача́льницы , и҆ сщ҃е́нно и҆́нᲂцы , и҆ сщ҃е́нницы , и҆ всѝ бл҃гᲂчести́вїи наро́ди , на́мъ же ѡ҆ хрⷭ҇тѣ̀ дх҃о́внїи ѻ҆ц҃ы и҆ бра́тїѧ , ꙗ҆́кѡ хᲂтѧ́щїи ст҃ꙋ́ю сїю̀ кни́гꙋ глаго́лати , и҆лѝ препи́сᲂвати , любе́знѡ мо́лимъ ва́съ , ми́лᲂстиви на́мъ бꙋ́дите , и҆ незазо́риви ᲂу҆ма̀ на́шегѡ грꙋ́бᲂсти и҆ неразꙋ́мїю , а҆́ще за не́мᲂщь прегрѣше́нїи на́шихъ и҆ недᲂꙋмѣ́нїемъ ᲂу҆крати́сѧ , и҆лѝ прелᲂжи́сѧ , и҆лѝ ѿмѣни́сѧ , са́ми и҆справлѧ́йте , бл҃гᲂвᲂле́нїемъ и҆ дѣ́йствᲂмъ прест҃а́гѡ дх҃а . пᲂне́же и҆ вы̀ тре́бꙋете же ми́лᲂсти ѿ́ бг҃а и҆ ѿ челᲂвѣ́къ , та́кᲂже прᲂще́нїю и҆ бл҃гᲂслᲂве́нїю и҆ на́съ спᲂдᲂблѧ́йте .

Во сла́вꙋ ст҃ы́ѧ , є҆динᲂсꙋ́щныѧ , живᲂтвᲂрѧ́щїѧ и҆ нераздѣли́мыѧ трⷪ҇цы , ѻ҆ц҃а , и҆ сн҃а , и҆ ст҃а́гѡ дх҃а : пᲂвелѣ́нїемъ бл҃гᲂчести́вѣйшагѡ , самᲂдержа́внѣйшагѡ , вели́кагѡ гдⷭ҇рѧ на́шегѡ і҆мпера́тᲂра никᲂла́ѧ па́ѵлᲂвича всеѧ̀ рᲂс̾сі́и : при сꙋпрꙋ́гѣ є҆гѡ̀ , бл҃гᲂчести́вѣйшей гдⷭ҇рнѣ , і҆мператри́цѣ а҆леѯа́ндрѣ ѳеѡ́дᲂрᲂвнѣ : при наслѣ́дникѣ є҆гѡ̀ , бл҃гᲂвѣ́рнᲂмъ гдⷭ҇рѣ , цесаре́вичѣ и҆ вели́кѡмъ кн҃зѣ а҆леѯа́ндрѣ никᲂла́евичѣ : и҆ бл҃гᲂвѣ́рныхъ гдⷭ҇рѣхъ и҆ вели́кихъ кн҃зѣ́хъ кᲂн̾станти́нѣ и҆ никᲂла́ѣ никᲂла́евичахъ : при бл҃гᲂвѣ́рнᲂмъ гдⷭ҇рѣ , и҆ вели́кᲂмъ кн҃зѣ михаи́лѣ па́ѵлᲂвичѣ , и҆ сꙋпрꙋ́гѣ є҆гѡ̀ , бл҃гᲂвѣ́рнᲂй гдⷭ҇рнѣ , и҆ вели́кᲂй кн҃ги́нѣ є҆ле́нѣ па́ѵлᲂвнѣ : при бл҃гᲂвѣ́рныхъ гдⷭ҇рнѧхъ , и҆ вели́кихъ кн҃жна́хъ марі́и , ѻ҆́льгѣ и҆ а҆леѯа́ндрѣ никᲂла́евнахъ : при бл҃гᲂвѣ́рныхъ гдⷭ҇рнѧхъ , и҆ вели́кихъ кн҃жна́хъ марі́и , є҆лисаве́тѣ , и҆ є҆катери́нѣ михаи́лᲂвнахъ : при бл҃гᲂвѣ́рнᲂй гдⷭ҇рнѣ и҆ вели́кᲂй кн҃ги́нѣ марі́и па́ѵлᲂвнѣ и҆ сꙋпрꙋ́гѣ є҆ѧ̀ , и҆ при бл҃гᲂвѣ́рнᲂй гдⷭ҇рнѣ и҆ вели́кᲂй кн҃ги́нѣ а҆́ннѣ па́ѵлᲂвнѣ и҆ сꙋпрꙋ́гѣ є҆ѧ̀ , бл҃гᲂслᲂве́нїемъ же ст҃ѣ́йшагѡ прави́тельствꙋющагѡ сѷно́да . Напеча́тасѧ сїѧ̀ бг҃ᲂдх҃нᲂве́ннаѧ кни́га минѣ́ѧ , мцⷭ҇ъ февра́ль , пе́рвымъ тиснѣ́нїемъ в̾ црⷭ҇твꙋющемъ вели́кᲂмъ гра́дѣ мᲂсквѣ̀ , в̾ тѷпᲂгра́фїи при цр҃кви є҆динᲂвѣ́рцевъ . въ лѣ́то ѿ сᲂтвᲂре́нїѧ мі́ра , ҂зт҃м , ѿ ржⷭ҇тва́ же по пло́ти бг҃а сло́ва , ҂аѿл҃в , и҆нди́кта є҃ , мцⷭ҇а ѻ҆ктѧбрѧ̀ . съ кни́ги напеча́таннᲂй въ то́мъ же црⷭ҇твꙋющемъ вели́кᲂмъ гра́дѣ мᲂсквѣ̀ , при ст҃ѣ́йшемъ патрїа́рхѣ і҆ѡ́сифѣ . въ лѣ́то , ҂зрн҃в є҃ , мцⷭ҇а декабрѧ̀ , въ ѕ҃ де́нь .