МЦⷭ҇А ѲЕВРАЛѦ̀ ВЪ А҃ ДН҃Ь

Пред̾пра́зднество срѣ́тенїѧ гдⷭ҇а на́шегѡ і҆с҃а хрⷭ҇та̀ . =Ст҃а́го мч҃нка три́фᲂна . Ве́черъ , на гдⷭ҇и вᲂзва́х̾ , стⷯры . пред̾пра́зднествꙋ , г҃ . ст҃о́мꙋ , г҃ . стⷯры , пред̾ пра́зднествꙋ . гла́съ , д҃ . поⷣ . ꙗ҆́кѡ до́блѧ . Ч=тⷭ҇на́ѧ гᲂто́витсѧ цр҃кви ,꙳ прїѧ́ти въ себѣ̀ гдⷭ҇а ,꙳ ꙗ҆́кѡ чл҃кᲂлю́бца прихᲂдѧ́ща .꙳ и҆ бл҃гᲂда́тїю мы́слено ᲂу҆ѧснѧ́ющи ,꙳ вѣ́рныи сво́й бг҃ᲂлюбе́зныи сᲂбо́ръ .꙳ сего̀ ра́ди вᲂпїе́тъ ,꙳ ты̀ є҆сѝ сла́ва и҆ пᲂхвала̀ ,꙳ и҆ ᲂу҆краше́нїе и҆спᲂлне́нїѧ мᲂегѡ̀ сло́ве ,꙳ младе́ньствᲂвавыи пло́тїю менѐ ра́ди . Черто́гъ мнᲂгᲂсвѣ́тлыи ,꙳ и҆ сѣ́нь пречⷭ҇тна́ѧ ,꙳ и҆ хра́мъ ст҃ы́и и҆ прᲂстра́нныи ,꙳ в̾нꙋ́трь черто́гъ в̾вᲂдѧ́щїи цр҃кве гдⷭ҇а ,꙳ пред̾ѡ҆брꙋча́етъ себѐ честнѣ́й цр҃кви є҆гѡ̀ .꙳ и҆ мо́литсѧ при́снѡ ,꙳ ѿ тлѝ и҆ сме́рти и҆зба́витисѧ ,꙳ и҆́же вᲂи́стинꙋ бцⷣꙋ ,꙳ сїю̀ непреста́ннѡ сла́вѧщимъ . Пред̾пра́зднествїѧ хвалꙋ̀ ,꙳ хрⷭ҇то́ви ны́нѣ принесе́мъ ,꙳ тᲂгѡ̀ сла́вѧще с̾ше́ствїе .꙳ ꙗ҆́кѡ дв҃ческима рꙋка́ма ,꙳ ꙗ҆́кѡ младе́нецъ принᲂси́мь ,꙳ на рꙋкꙋ̀ сѷмеѡ́ню вᲂз̾лещѝ грѧде́тъ ,꙳ вᲂз̾ва́нїе сᲂдѣва́ѧ всѣ́мъ чл҃кѡмъ .꙳ и҆ ѡ҆бᲂжи́ти сꙋщество̀ ,꙳ ꙗ҆́кѡ бл҃гᲂдѣ́тель и҆ гдⷭ҇ь .

и҆́ны , стⷯры , ст҃о́мꙋ . гла́съ , а҃ . поⷣ . прехва́льнїи мч҃нцы .= Напитѣ́всѧ пребᲂга́те ,꙳ пи́щи нетлѣ́ннѣй ,꙳ прича́стникъ на́ нб҃сѣхъ бы́лъ є҆сѝ свѣ́тлѡ .꙳ до́блествеными по́двиги пᲂстрада́въ сла́вне ,꙳ и҆ свидѣ́тель и҆́стинѣ бы́въ .꙳ хрⷭ҇то́ви мᲂли́сѧ ,꙳ дарᲂва́ти дш҃а́мъ на́шимъ ,꙳ ве́лїю млⷭ҇ть . Насыща́ѧсѧ пресла́вне ,꙳ свѣ́та приснᲂсꙋ́щнагѡ сїѧ́ньми ,꙳ свѣтᲂви́денъ ве́сь бы́лъ є҆сѝ .꙳ разо́рь те́мнꙋю пре́лесть ,꙳ и҆ мирᲂде́ржца тмы̀ низ̾ло́жь ,꙳ бжⷭ҇твеннᲂю бл҃гᲂда́тїю .꙳ тѣ́мже мᲂли́сѧ ,꙳ дарᲂва́ти дш҃а́мъ на́шимъ ꙳ ве́лїю млⷭ҇ть . Три́фᲂне бл҃же́нне ,꙳ ра́дᲂсти и҆ весе́лїю а҆́гг҃льскᲂмꙋ спᲂдо́билсѧ є҆сѝ .꙳ ѿве́рг̾сѧ кра́сныхъ житїѧ̀ ,꙳ и҆ дш҃е́внᲂю крѣ́пᲂстїю ꙳ всѧ̀ ни вᲂчто́же вмѣни́въ .꙳ и҆ терпѣли́вно прᲂше́лъ є҆сѝ мꙋче́нїе ,꙳ мᲂлѧ́сѧ ѡ҆ дш҃а́хъ на́шихъ . =сла́ва . гла́съ , в҃ . Преѡ҆би́дѣлъ є҆сѝ сꙋ́щихъ и҆́же на землѝ , пребл҃же́нне три́фᲂне честны́и , ко трꙋдо́мъ мꙋ́жески пᲂтща́сѧ . и҆ бᲂре́нїѧ кро́вїю , ты̀ хꙋдо́жнѣ мч҃нче го́рдагѡ низ̾ло́жь , прїѧ́тъ пᲂбѣ́ды вѣне́цъ . хрⷭ҇та̀ бг҃а на́шегѡ мᲂлѧ̀ на́съ ра́ди , не ѡ҆скꙋдѣ́й страстᲂте́рпче , спасти́сѧ дш҃а́мъ на́шимъ .

и҆ ны́нѣ . гла́съ , то́йже . Дне́сь сѷмеѡ́нъ на́ рꙋкꙋ , гдⷭ҇а сла́вы прїе́млетъ . є҆го́же пᲂд̾ мра́кᲂмъ пе́рвѣе мѡѷсе́й ви́дѣ , в̾ гᲂрѣ̀ сина́йстѣй скрижа́ли даю́ща є҆мꙋ̀ . се́й є҆́сть и҆́же во прⷪ҇рцѣхъ гл҃ѧи , и҆ зако́нꙋ твᲂре́цъ . се́й є҆́сть є҆го́же дв҃дъ вᲂз̾вѣща́етъ , и҆́же всѣ́мъ стра́шныи , и҆мѣ́ѧи ве́лїю и҆ бᲂга́тꙋю млⷭ҇ть .

На стихо́внѣ , во ѻ҆кта́и . сла́ва , и҆ ны́нѣ . гла́съ , в҃ . Сщ҃е́ннагѡ сщ҃е́ннаѧ дв҃аѧ , принесѐ во ст҃и́лище ст҃лю . прᲂсте́ръ же рꙋ́цѣ сѷмеѡ́нъ , прїѧ́тъ сегѡ̀ ра́дꙋѧсѧ . и҆ вᲂзᲂпѝ , ны́нѣ ѿпꙋща́еши раба̀ свᲂегѡ̀ влⷣко , по гл҃ꙋ твᲂемꙋ̀ с̾ ми́рᲂмъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , д҃ . Мч҃нкъ тво́й гдⷭ҇и три́фᲂнъ , во страда́нїи свᲂе́мъ вѣне́цъ прїѧ́тъ нетлѣ́нныи , ѿ тебѣ̀ бг҃а на́шегѡ . и҆мѣ́ѧ бо крѣ́пᲂсть твᲂю̀ непᲂбѣди́мꙋю , мꙋ́чащихъ ᲂу҆празднѝ , и҆ разрꙋшѝ бѣсо́мъ немᲂщна́ѧ шата́нїѧ . тᲂгѡ̀ мл҃твами хрⷭ҇тѐ бж҃е спасѝ дш҃а на́ша . сла́ва , и҆ ны́нѣ . трᲂпа́рь , пред̾пра́зднествꙋ . гла́съ , а҃ . Нбⷭ҇ныи ли́къ нбⷭ҇ныхъ а҆́гг҃лъ , прини́къ на́ землю , прише́дша ви́дитъ ꙗ҆́кѡ младе́нца нᲂси́ма в̾ цр҃кви , первенца̀ всеѧ̀ тва́ри , мт҃рїю неи҆скꙋсᲂмꙋ́жнᲂю . пред̾пра́зднественꙋю ны́нѣ с̾ на́ми пᲂю́тъ пѣ́снь ра́дꙋющесѧ .

На ᲂу҆́трени , на бг҃ъ гдⷭ҇ь , трᲂпа́рь , пред̾пра́з днествꙋ , двⷤа . сла́ва , ст҃о́мꙋ . и҆ ны́нѣ , пред̾пра́з днествꙋ . =Кано́на , два̀ . пред̾пра́зднествꙋ , на и҃ . и҆ мч҃нкꙋ , на д҃ . кано́нъ , пред̾пра́зднествꙋ . гла́съ , д҃ . пѣ́снь , а҃ . і҆рмо́съ . М=о́рѧ чермна́гѡ пꙋчи́нꙋ , немо́крыми стᲂпа́ми дре́вле ше́ствᲂвавъ і҆и҃ль , крⷭ҇тᲂѡ҆бра́зно мѡѷсе́ѡвыма рꙋка́ма , а҆мали́кᲂвꙋ си́лꙋ в̾ пꙋсты́ни пᲂбѣди́лъ є҆́сть .

запѣ́въ : Сла́ва тебѣ̀ бж҃е на́шъ , сла́ва тебѣ̀ .= Сердца̀ ꙗ҆́кᲂже рꙋ́цѣ всѝ пред̾ᲂу҆гᲂто́вльше , прихᲂдѧ́ща дне́сь хрⷭ҇та̀ чи́стѣ прїи́мемъ . и҆ тᲂгѡ̀ дх҃ᲂмъ бжⷭ҇твенныхъ дарᲂва́нїи наслади́мсѧ . Две́ри пред̾ ѿве́рзъ дне́сь , и҆́же в̾ зако́нѣ цр҃кви . закᲂнᲂда́вцꙋ и҆ сᲂдѣ́телю , ᲂу҆стрᲂѧ́етъ вхо́ды свѣ́тлы . и҆ гᲂто́витъ честны́ѧ да́ры є҆мꙋ̀ , бжⷭ҇твеннᲂе хвале́нїе . =боⷢ҇ . Разꙋмѣ́въ ве́тхїи пречⷭ҇таѧ хра́мъ тѧ̀ влⷣчце , влⷣцѣ всѣ́хъ и҆ бг҃ꙋ жили́ще чи́сто . ли́къ прᲂпᲂвѣ́даше велича́ѧ сла́вꙋ твᲂю̀ .

и҆́нъ , кано́нъ ст҃о́мꙋ . гла́съ , и҃ . пѣ́снь , а҃ . і҆рмо́съ . Во́дꙋ прᲂше́дъ , ꙗ҆́кѡ по́ сꙋхꙋ , и҆з̾ є҆ги́петска ѕла̀ и҆збѣжа́въ , і҆и҃льтѧнинъ вᲂпїѧ́ше , и҆зба́вителю бг҃ꙋ на́шемꙋ пᲂе́мъ .

запѣ́въ : Ст҃ы́и великᲂмч҃нче три́фᲂне , мᲂлѝ бг҃а ѡ҆ на́съ . Вᲂи́стинꙋ бжⷭ҇твенныѧ на́ нб҃сѣхъ пи́ща наслажда́ѧсѧ , ꙗ҆́кѡ непᲂбѣди́мъ страда́лецъ . твᲂи́ми мᲂли́твами , дш҃ꙋ мᲂю̀ и҆зба́ви ѿ страсте́й смꙋще́нїѧ . Глаго́лы бжⷭ҇твенными ѡ҆гласи́всѧ , сᲂверши́лъ є҆сѝ сїѧ̀ пресла́вне дѣ́тельнѡ . ст҃ы́ню вᲂз̾лю́бль , и҆ цѣлᲂмꙋ́дрїе ѡ҆блᲂбыза́ѧ . Бы́лъ є҆сѝ вᲂи́стинꙋ па́стырь , пасы́и дш҃ꙋ свᲂю̀ в̾ мꙋ́дрᲂсти пᲂмышле́нїѧ . дш҃а ѡ҆браща́ѧ ѿ заблꙋжде́нїѧ , и҆ бг҃ᲂви привᲂдѧ̀ сла́вне . боⷢ҇ . Прᲂсвѣща́еши мѧ сїѧ́нїемъ сла́вы мы́сленымъ , сїѧ́нїе сла́вы ро́ждьшаѧ ѻ҆́ч҃ее , всенепᲂро́чнаѧ ѻ҆трᲂкᲂви́це , и҆ мра́къ грѣхо́вныи разᲂрѝ .

катава́сїѧ : Сꙋ́шꙋ глꙋбᲂрᲂди́тельнꙋю .

пѣ́снь , г҃ . і҆рмо́съ . Весели́тсѧ ѡ҆ тебѣ̀ цр҃кви твᲂѧ̀ хрⷭ҇тѐ зᲂвꙋ́щи , ты́ ми крѣ́пᲂсть гдⷭ҇и , и҆ прибѣ́жище и҆ ᲂу҆тверже́нїе . Взыгра́шасѧ мы́сленѡ , и҆́же в̾ дᲂмꙋ̀ бж҃їи ше́ствїѧ , цр҃ѧ хрⷭ҇та̀ хᲂтѧ́ща пло́тїю прїѧ́ти . Ꙗ҆́кѡ честны́ѧ , хрⷭ҇то́ви пред̾ᲂу҆гᲂто́вльше дне́сь , вѣ́рнїи да́ры прїѧ́тны хвалѣ̀ . сего̀ с̾ ра́дᲂстїю ᲂу҆срѧ́щемъ . боⷢ҇ . Преста̀ є҆́же въ сѣ́нихъ , и҆ ѡ҆бра́зныхъ начерта́нїихъ вѣща́нїе . и҆́стинѣ бо чⷭ҇таѧ тебѐ ра́ди ꙗ҆́вльшисѧ кᲂнце́мъ .

и҆́нъ , і҆рмо́съ . Ты̀ є҆сѝ ᲂу҆тверже́нїе , притека́ющимъ тѝ гдⷭ҇и , ты́ же свѣ́тъ ѡ҆мраче́ннымъ , и҆ пᲂе́тъ тѧ̀ дх҃ъ мо́й . Низ̾лᲂжи́лъ є҆сѝ си́лꙋ го́рдᲂстнꙋю , сла́вныи мч҃нче хрⷭ҇то́въ , и҆́же с̾вы́ше ѡ҆дѣ́ѧвсѧ си́лᲂю . Пло́тїю ѡ҆блᲂже́нъ , шата́нїѧ беспло́тнагѡ ᲂу҆гаси́лъ є҆сѝ врага̀ . и҆ вᲂплᲂще́нагѡ бг҃а сло́ва прᲂпᲂвѣ́далъ є҆сѝ . Є҆ди́нѣмъ то́кмѡ прише́ствїемъ тѝ , дꙋ́хи лꙋка́вствїѧ ѿгᲂнѧ́ютсѧ , дх҃а ст҃а́гѡ ѿгᲂни́ми бл҃гᲂда́тїю . боⷢ҇ . И҆мѣ́ѧ тѧ̀ по́мᲂщь непᲂстыжꙋ́сѧ , пречи́стаѧ мт҃и бж҃їѧ . и҆мѣ́ѧ тѧ пред̾ста́тельницꙋ жи́зни мᲂе́й , спаса́юсѧ . катава́сїѧ : Оу҆тверже́нїе на тѧ̀ .

кᲂнда́къ , пред̾пра́зднествꙋ . гла́съ , ѕ҃ . И҆́же со ѻ҆ц҃е́мъ сло́во сы́и неви́димо , ны́нѣ ᲂу҆́бѡ ви́димъ є҆́сть пло́тїю , неи҆зрече́ннѡ ѿ дв҃ы рᲂди́сѧ , и҆ на́ рꙋкꙋ ста́рчꙋ дае́тсѧ ст҃лю . пᲂклᲂни́мсѧ тᲂмꙋ̀ и҆́стиннᲂмꙋ бг҃ꙋ и҆ сп҃сꙋ на́шемꙋ .

сѣда́лен̾ , ст҃о́мꙋ . гла́съ , д҃ . Бᲂлѣ́зньми бл҃же́нне наслажда́ѧсѧ плᲂтьски́ми , бжⷭ҇твеннꙋю и҆ небᲂлѣ́зненꙋю пи́щꙋ дᲂсто́йнѡ вᲂспрїѧ́лъ є҆сѝ , вѣне́цъ без̾сме́ртїѧ ѿ бг҃а прїе́мъ . тѣ́мже и҆ и҆сцѣле́нїемъ рѣ́ки и҆стᲂча́еши , и҆́же любо́вїю прибѣга́ющимъ мч҃нче в̾ кро́въ тво́й . сла́ва , и҆ ны́нѣ , пред̾пра́зднествꙋ . гла́съ , а҃ . Сᲂкро́вище вѣко́мъ , и҆ жи́зни всѧ́ческимъ , менѐ ра́ди пᲂд̾ зако́нᲂмъ младе́ньствᲂвавыи . и҆́же дре́вле начерта́выи на скрижа́лѣхъ зако́нъ на гᲂрѣ̀ сина́йстѣй , да всѧ̀ и҆змѣни́ши ѿ зако́нныѧ па́ки рабо́ты . сла́ва млрⷭ҇дїю твᲂемꙋ̀ сп҃се , сла́ва сᲂше́ствїю твᲂемꙋ̀ . сла́ва смᲂтре́нїю твᲂемꙋ̀ , є҆ди́не чл҃кᲂлю́бче .

пѣ́снь , д҃ . і҆рмо́съ . Вᲂз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свᲂе́мъ , дᲂсто́йнѡ взыва́ющи , сла́ва си́лѣ твᲂе́й гдⷭ҇и . На ѻ҆́блацѣ нᲂси́мъ свѣтᲂно́снѣ пло́тьски , ꙗ҆́кѡ сл҃нце пра́вдѣ , бжⷭ҇твенныѧ зарѧ̀ свᲂѧ̀ пред̾лага́етъ дне́сь , и҆ пред̾ѡ҆зарѧ́етъ хра́мъ сво́й . Пред̾пра́зднественꙋю хвалꙋ̀ влⷣцѣ цр҃кви дне́сь привнᲂша́етъ . и҆ сего̀ ꙗ҆́кѡ жениха̀ прїѧ́ти свѣ́тлѡ гᲂто́витсѧ , и҆ с̾ сѷмеѡ́нᲂмъ ра́дꙋетсѧ . боⷢ҇ . Ꙗ҆́кѡ сѣ́нь тѧ̀ пресла́внаѧ бцⷣе , хᲂтѧ́щи прїѧ́ти зако́ннаѧ сѣ́нь , зако́нꙋ гдⷭ҇а на рꙋкꙋ̀ нᲂсѧ́щꙋ , твᲂе́ю ѡ҆сїѧ́шесѧ бл҃гᲂда́тїю .

и҆́нъ , і҆рмо́съ . Оу҆слы́шахъ гдⷭ҇и смᲂтре́нїѧ твᲂегѡ̀ та́инство , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . Зрѧ́щїѧ ᲂу҆диви́лъ є҆сѝ , терпѣ́нїѧ бл҃же́нне тве́рдᲂстїю . мꙋ́ки бо претерпѣ́лъ є҆сѝ , ꙗ҆́кѡ в̾ чꙋжде́мъ стражда̀ тѣлесѝ . Пита́шесѧ бл҃же́нне , ра́нами бᲂлѣ́зней кꙋпе́сѧ . ны́нѣ же питѣ́ешисѧ чи́стѣе , приснᲂсꙋ́щныѧ сла́вы насыща́ѧсѧ . Стрꙋ́жемꙋ тѣлесѝ , желѣ́зныхъ нᲂгте́й ѻ҆́стрᲂстїю . в̾жилѧ́шесѧ чꙋ́дне , твᲂеѧ̀ дш҃и крѣ́пᲂсть , бжⷭ҇твеннᲂю бл҃гᲂда́тїю . боⷢ҇ . Натѧ̀ ᲂу҆пᲂва́нїе мᲂѐ всѐ вᲂз̾лага́ю мт҃и дв҃о , дш҃ꙋ мᲂю̀ сᲂхранѝ , ꙗ҆́же бг҃а ро́ждьшаѧ сп҃са мᲂегѡ̀ .

катава́сїѧ : Пᲂкры́ла є҆́сть нб҃са̀ .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рᲂю вᲂспѣва́ющїѧ тѧ . Тѧ̀ гдⷭ҇и пло́тїю цр҃кви хᲂтѧ́щи прїѧ́ти , бжⷭ҇твеннᲂю тѝ и҆ неи҆зрече́ннᲂю бжⷭ҇тва̀ заре́ю , сла́внѡ прᲂсвѣща́шесѧ . Тѧ̀ гдⷭ҇и рꙋка́ми дш҃е́вными спᲂдо́би прїѧ́ти , хва́лѧщїѧ твᲂѐ смᲂтре́нїе , и҆ на́съ вѣ́рᲂю пᲂю́щихъ ꙗ҆́кѡ чл҃кᲂлю́бецъ . Тѧ̀ гдⷭ҇и ра́дᲂстнᲂю дш҃е́ю прїе́млющїѧ , пло́тїю на́съ ра́ди хᲂтѧ́ща прїитѝ , спᲂдо́би съ сѷмеѡ́нᲂмъ бл҃гᲂдари́ти тѧ . боⷢ҇ . И҆зба́вльшесѧ тебѐ ра́ди , сѣне́вныѧ слꙋ́жбы чⷭ҇таѧ . ра́зꙋмᲂмъ и҆́стинным̾ , и҆ вѣ́рᲂю тве́рдᲂю , дᲂсто́йнѡ тѧ̀ сла́вимъ .

и҆́нъ , і҆рмо́съ . Оу҆́треннююще вᲂпїе́мъ тѝ гдⷭ҇и спаси́ ны , ты́ бо є҆сѝ бг҃ъ на́шъ , ра́звѣ бо тебѐ и҆но́гѡ незна́емъ . Тре́бища пре́лестнаѧ , ᲂу҆праздни́лъ є҆сѝ страстᲂте́рпче . ѻ҆́бразꙋ бо бж҃їю слꙋжи́ти є҆ди́нᲂмꙋ вᲂз̾люби́лъ є҆сѝ . Разꙋмѣ́въ пресвѣ́тлꙋю сла́вне страстᲂте́рпче , бл҃гᲂда́ть бг҃а на́шегѡ . є҆ѧ́же ра́ди пᲂстрада́лъ є҆сѝ . Бжⷭ҇твеннᲂю ѡ҆зари́всѧ бл҃гᲂда́тїю , ᲂу҆се́рднѡ страда́льче , хрⷭ҇та̀ ра́ди пᲂстрада́лъ є҆сѝ . боⷢ҇ . Несказа́нно ржⷭ҇тво̀ бы́сть , и҆ неи҆зрече́нно твᲂѐ зача́тїе пребы́сть всечи́стаѧ .

катава́сїѧ : Ꙗ҆́кѡ ви́дѣ и҆са́їѧ .

пѣ́снь , ѕ҃ . і҆рмо́съ . Пᲂжрꙋ́ти со́ гласᲂмъ хвале́нїѧ гдⷭ҇и , цр҃кви вᲂпїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Пѣ́сни ꙗ҆́кᲂже цвѣ́ты и҆спле́тше дне́сь , пред̾ᲂу҆гᲂто́вимъ вѣ́рᲂю бл҃гᲂдаре́нїѧ вѣне́цъ бжⷭ҇твенъ , влⷣцѣ мы́сленѡ прїитѝ хᲂтѧ́щемꙋ . Рꙋ́ки дш҃е́вныѧ бг҃ᲂви ᲂу҆гᲂто́вимъ , ꙗ҆́кᲂже сѷмеѡ́нъ ста́рецъ , и҆ в̾ хра́мѣ бжⷭ҇твенныѧ сла́вы є҆гѡ̀ прихᲂдѧ́ща , тᲂгѡ̀ с̾ весе́лїемъ вᲂспрїи́мем̾ . боⷢ҇ . Пи́шꙋще бг҃ᲂви́днѡ тро́стїю дх҃о́внᲂю , тѧ̀ прⷪ҇рцы дв҃о хра́мъ и҆ сѣ́нь , и҆ бжⷭ҇твенныи до́мъ влⷣцѣ всѣ́хъ , ѡ҆ тебѣ̀ ᲂу҆краша́хꙋсѧ .

и҆́нъ , і҆рмо́съ . Ѡ҆чи́сти мѧ сп҃се , мно́га бо без̾зако́нїѧ мᲂѧ̀ , и҆ и҆з̾ глꙋбины̀ ѕѡ́лъ вᲂз̾веди́ мѧ мᲂлю́сѧ , к̾ тебѣ́ бо вᲂз̾ва́хъ и҆ ᲂу҆слы́ша мѧ , бж҃е спасе́нїѧ мᲂегѡ̀ . И҆з̾сꙋши́въ ме́рз̾скїѧ же́ртвы , и҆ принᲂше́нїѧ скве́рнаѧ , и҆ гнѣ́вы и҆́дᲂльскїѧ . свᲂи́ми крᲂвьмѝ сла́вне напᲂи́лъ є҆сѝ , всѧ̀ цр҃ко́внаѧ бл҃гᲂро́днаѧ три́фᲂне прᲂзѧбе́нїѧ . Ли́цы мч҃нчестїи , ꙗ҆́кѡ мѵ́рѡ бл҃гᲂꙋха́ютъ . кро́вь страда́лецъ , и҆стᲂча́етъ и҆сцѣле́нїѧ . пе́рсть тѣле́снаѧ , дш҃а ѡ҆сщ҃а́етъ , вѣ́рᲂю слꙋжа́щихъ и҆́мъ . боⷢ҇ . Ꙗ҆́кѡ ѡ҆дш҃е́вленъ кᲂвче́гъ , прїѧ́ла є҆сѝ сло́во без̾нача́льнᲂе . ꙗ҆́кѡ ст҃о ст҃и́лище , зижди́телѧ в̾мѣсти́ла є҆сѝ . ꙗ҆́кѡ прⷭ҇то́лъ ѻ҆гнезра́ченъ но́сиши влⷣкꙋ , бг҃ᲂмт҃и всеѧ̀ тва́ри . катава́сїѧ : Вᲂзᲂпѝ к̾ тебѣ̀ .

кᲂнда́к̾ , ст҃о́мꙋ . гла́съ , и҃ . Трⷪ҇ческᲂю тве́рдᲂстїю , мнᲂгᲂбо́жїе разᲂри́лъ є҆сѝ ѿ кᲂне́цъ пресла́вне , че́стенъ ѡ҆ хрⷭ҇тѣ̀ бы́въ . и҆ пᲂбѣди́въ мꙋчи́телѧ , ѡ҆́ бз҃ѣ сп҃се , вѣне́цъ прїѧ́лъ є҆сѝ мꙋче́нїѧ свᲂегѡ̀ . и҆ дарᲂва́ньми и҆сцѣле́нїѧ ѡ҆бᲂгати́лсѧ є҆сѝ , ꙗ҆́кѡ непᲂбѣди́мъ . и҆́кᲂсъ . Сщ҃е́ннаѧ трапе́за пред̾лага́етсѧ , праз̾днᲂлю́бныхъ сᲂбо́ре дне́сь . пред̾пра́зднественаѧ нᲂсѧ́щи зна́менїѧ , гдⷭ҇ню четыредесѧ́тницꙋ , є҆́же ѿ дв҃ы стра́шнᲂе рᲂжде́нїе . и҆ ста́рцꙋ че́стнꙋ ра́дᲂванїе , и҆ честна̀ страда́льца па́мѧть . сегѡ̀ ра́ди скᲂнчава́етсѧ пᲂбѣди́тель , ꙗ҆́кѡ непᲂбѣди́мъ .

пѣ́снь , з҃ . і҆рмо́съ . Впещѝ а҆враа́мскїѧ си дѣ́ти перси́дстѣй , любо́вїю бл҃гᲂвѣ́рїѧ па́че не́жели пла́менемъ ѡ҆палѧ́еми взыва́хꙋ , бл҃гᲂслᲂве́нъ є҆сѝ в̾ цр҃кви сла́вы твᲂеѧ̀ гдⷭ҇и . Цр҃кви пред̾ ᲂу҆кра́шшисѧ заре́ю мы́сленᲂю , любо́вїю влⷣки всѣ́хъ и҆ твᲂрца̀ , вᲂспрїѧ́ти є҆гѡ̀ гᲂто́витсѧ . и҆ ра́дᲂстнаѧ семꙋ̀ плете́тъ вᲂсхᲂжде́нїѧ . И҆́же в̾ нѣ́дрѣхъ неѡ҆пи́саннѡ сꙋ́ща ѻ҆те́ческихъ сло́во , сн҃а свᲂегѡ̀ є҆динᲂро́днагѡ , мт҃рьнїи рꙋ́цѣ нᲂсѧ́щїи в̾ цр҃кᲂвь пло́тїю , по зако́нꙋ ꙗ҆́кѡ младе́нца в̾но́сѧтъ . боⷢ҇ . Ви́дѣша сла́вꙋ твᲂю̀ ꙗ҆зы́цы всѝ , є҆ди́на чⷭ҇таѧ . тѣ́мже тваре́мъ всѣ́мъ тѧ̀ , бл҃гᲂче́стнѡ цр҃цꙋ ᲂу҆бл҃жа́ютъ . и҆ бг҃ᲂмт҃рь па́че є҆стества̀ , непреста́ннѡ сла́вѧтъ .

и҆́нъ , і҆рмо́съ . И҆́же ѿ і҆ꙋде́и , дᲂше́дше ѻ҆́трᲂцы в̾ вавѷлѡ́нъ дре́вле , вѣ́рᲂю ᲂу҆тверже́нїи , пла́мень пе́щныи пᲂпра́вше гл҃юще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Вѣнцено́снѡ ликꙋ́еши , с̾ ли́ки мч҃нкъ веселѧ́сѧ , пре́лесть бо пᲂбѣди́въ сло́вᲂмъ и҆́стиннымъ . вᲂспѣва́еши ра́дꙋѧсѧ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Влⷣка всѧ́ческихъ , свᲂи́хъ сᲂстрада́нїи вѣнча́етъ мч҃нка . и҆ сего̀ вᲂдвᲂрѧ́етъ в̾ се́лѣхъ нбⷭ҇ныхъ , зᲂвꙋ́ща и҆ гл҃юща , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . боⷢ҇ . Но́во нᲂсѧ́щи мла́дѧ , и҆́же пре́жде всѣ́хъ вѣ́къ бг҃а пренепᲂро́чнаѧ , и҆з̾ тебѐ вᲂплᲂще́нна . непреста́й мᲂлѧ́щи , спастѝ пᲂю́щїѧ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ .

катава́сїѧ : Тебѐ в̾ пещѝ ѡ҆рᲂси́вшаго .

пѣ́снь , и҃ . і҆рмо́съ . Рꙋ́цѣ распрᲂсте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ ᲂу҆гаси́ша дᲂбрᲂдѣ́телїю пᲂѧ́савшесѧ , и҆́же бл҃гᲂче́стїѧ люби́тели ѻ҆́трᲂцы взыва́юще , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Рꙋ́цѣ распрᲂсте́ръ сѷмеѡ́нъ , и҆ пред̾ѡ҆чи́щь дш҃ꙋ бжⷭ҇твенными дѣѧ́ньми , младе́нствᲂвавша гдⷭ҇а , то́кмѡ за бл҃гᲂсть , прїѧ́тъ вᲂпїѧ̀ с̾ весе́лїемъ є҆мꙋ̀ , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Свѣ́тъ бл҃гᲂда́ти хрⷭ҇то́вы прᲂсїѧ̀ на́мъ , хᲂтѧ̀ в̾вестѝ въ цр҃квь свᲂю̀ . всесѣно́внаѧ начерта́нїѧ претвᲂрѧ́ѧ , ꙗ҆́кѡ ѡ҆бнᲂви́тель , вᲂи́стинꙋ вᲂпїю́щимъ , блгⷭ҇ви́те всѧ̀ дѣ́ла гдⷭ҇нѧ гдⷭ҇а . боⷢ҇ . И҆́же за бл҃гᲂсты́ню мно́гꙋю вᲂчл҃чьсѧ хрⷭ҇то́съ , и҆з̾ тебѐ пречⷭ҇таѧ на́съ ра́ди , прїѧ́тна дне́сь ѻ҆ц҃ꙋ принᲂша́етъ ѡ҆чище́нїѧ . є҆ди́нъ сы́и пречи́стъ и҆ пренепᲂро́ченъ , и҆ тѧ̀ є҆ди́нꙋ чистѣ́йшꙋю , сᲂблюда́ѧ прⷭ҇тꙋ́ю .

и҆́нъ , і҆рмо́с̾ . Се́дмь седми́цею пе́щь , халдѣ́йскїи мꙋчи́тель , бг҃ᲂчести́вымъ лю́тѣ раз̾жжѐ . си́лᲂю же лꙋ́чшею спасе́ныхъ ви́дѣвъ , твᲂрцꙋ̀ и҆ и҆зба́вителю вᲂпїѧ́ше , дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . Да́же до ᲂу҆сѣкнᲂве́нїѧ и҆ ѡ҆пале́нїѧ , да́же до крᲂвᲂпрᲂли́тїѧ , да́же и҆ до сме́ртныѧ кᲂнчи́ны пᲂстрада́лъ є҆сѝ , сᲂпрᲂтивлѧ́ѧсѧ прᲂти́вꙋ грѣхꙋ̀ , мч҃нче хрⷭ҇то́въ . нн҃ѣ же жи́знь и҆́же ѡ҆ хрⷭ҇тѣ̀ сᲂкрᲂве́нꙋю прїе́мъ взыва́еши , сщ҃е́ннїи бл҃гᲂслᲂви́те , лю́дїе превᲂзнᲂси́те є҆гѡ̀ во́ вѣки . На землѝ пᲂдвиза́сѧ , с̾ нечести́выми бᲂрѧ́сѧ , прᲂти́вꙋ ле́стнѣй и҆ бг҃ᲂбо́рнѣй льстѝ , го́рцѣ нꙋ́дѧщимъ . на́ нб҃сѣхъ же три́фᲂне , наслажда́ешисѧ вѣнцено́сецъ . и҆ со а҆́гг҃лы ликꙋ́еши пᲂѧ̀ , дѣ́ти бл҃гᲂслᲂви́те , сщ҃е́ннїи вᲂспо́йте , лю́дїе превᲂзнᲂси́те гдⷭ҇а во́ вѣки . Мꙋчи́тельскᲂе и҆з̾ѡ҆бличи́лъ є҆сѝ без̾бо́жїе премꙋ́дре и҆ бѣсо́вскᲂе бᲂгᲂбо́рїе ᲂу҆гаси́лъ є҆сѝ , стрꙋѧ́ми крᲂве́й твᲂи́хъ . и҆́же в̾ трⷪ҇цѣ є҆ди́нагѡ бг҃а , дᲂстᲂлѣ́пно и҆ чи́сто вᲂз̾вѣща́ѧ . и҆ чты́и в̾зыва́ѧ , сщ҃е́ннїи по́йте , лю́дїе превᲂзнᲂси́те є҆гѡ̀ во́ вѣки . боⷢ҇ . Гл҃ѡмъ твᲂи́мъ пᲂслѣ́дꙋюще , ᲂу҆бл҃жа́емъ пречⷭ҇таѧ тѧ̀ бл҃же́нꙋю . ꙗ҆́же пло́тїю ро́ждьшꙋю , вᲂи́стинꙋ бл҃же́ннагѡ , свѣ́та незахᲂди́магѡ , и҆ свѣтᲂнаста́вника , и҆ свѣтᲂда́вца влⷣкꙋ . є҆го́же дѣ́ти бл҃гᲂслᲂви́те , сщ҃е́ннїи вᲂспо́йте , лю́дїе превᲂзнᲂси́те во́ вѣки . катава́сїѧ : Хва́лимъ бл҃гᲂслᲂви́мъ . Въ непᲂстᲂѧ́ннѣмъ ѻ҆гнѝ [пᲂкло́н̾] .

пѣ́снь , ѳ҃ . і҆рмо́съ . Ка́мень нерꙋкᲂсѣ́чныѧ гᲂры̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , сᲂвᲂкꙋпи́въ раз̾стᲂѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Дш҃е́вными тѧ̀ рꙋка́ма спᲂдо́би мѧ бл҃гᲂда́телю вᲂспрїѧ́ти , ꙗ҆́кᲂже дре́вле сѷмеѡ́нъ , и҆ наслади́тисѧ твᲂеѧ̀ бл҃гᲂсти . ты́ бо є҆сѝ є҆ди́нъ жела́нїе и҆ сла́дᲂсть превᲂз̾желѣ́нныи . Мы́сленѡ в̾же́гше всѝ дᲂбрᲂдѣ́телей свѣщѝ , любо́вїю с̾ сѷмеѡ́нᲂмъ и҆ а҆́ннᲂю , свѣщено́сцы пред̾ᲂу҆срѧ́щемъ , хрⷭ҇то́ви хᲂтѧ́щꙋ прїитѝ , ѡ҆ст҃и́ти пᲂю́щїѧ є҆гѡ̀ . боⷢ҇ . Па́че сꙋ́щихъ вᲂспрїѧ́тъ и҆з̾ тебѐ пло́ть , сло́во вы́шнѧгѡ . чи́стъ сы́и , принᲂша́етъ сᲂбез̾нача́льнᲂмꙋ ѻ҆ц҃ꙋ ѡ҆чище́нїе . и҆ ѡ҆чища́етъ . любо́вїю тѧ̀ бж҃їю мт҃рь велича́ющїѧ .

и҆́нъ , і҆рмо́съ . Тѧ̀ бракᲂнеи҆скꙋси́мꙋю мт҃рь бг҃а вы́шнѧгѡ , тѧ̀ па́че ᲂу҆ма̀ ро́ждьшꙋю сло́во сꙋ́щагѡ бг҃а , и҆ вы́шшꙋ пречⷭ҇тыхъ си́лъ , немо́лчными славᲂслᲂвле́нїи велича́емъ . Па́че ви́димыхъ мч҃нкѡмъ ча́ѧнїе , и҆спо́лнь без̾сме́ртна наслажде́нїѧ . ви́дитсѧ си́хъ наде́жда и҆спо́лнь бл҃гᲂꙋха́нїѧ , и҆ ра́дᲂсти и҆ свѣ́тлᲂсти неи҆зрече́нныѧ . тѣ́мже дᲂсто́йнѡ ᲂу҆блажа́ютсѧ . Свѣ́тъ бы́лъ є҆сѝ втᲂры́и , к̾ свѣ́тꙋ пе́рвᲂмꙋ прибли́жьсѧ . заре́ю є҆гѡ̀ прᲂсвѣща́емь и҆ вᲂѡ҆бража́емь три́фᲂне мꙋ́дре , и҆ тᲂгѡ̀ пᲂда́тельными свѣтлᲂстьмѝ сїѧ́ѧ . тѣ́мъ тѧ̀ всѝ ᲂу҆блажа́емъ . Ꙗ҆ви́лсѧ є҆сѝ стра́шенъ , въ по́двизѣхъ страстᲂте́рпче . ꙗ҆ви́лсѧ є҆сѝ вᲂи́стинꙋ , тезᲂи҆мени́тъ бжⷭ҇твеннᲂмꙋ наслажде́нїю . є҆го́же нн҃ѣ вᲂспрїе́млѧ , и҆ ꙗ҆́снѡ наслажда́ѧсѧ , спасе́нїе чтꙋ́щимъ тѧ̀ и҆спрᲂсѝ . боⷢ҇ . Оу҆мертвѝ мꙋдрᲂва́нїе бг҃ᲂрᲂди́тельнице пло́ти мᲂеѧ̀ , и҆ ѡ҆живѝ дш҃е́внᲂе ᲂу҆мерщвле́нїе дѣ́йствᲂмъ и҆́стинныѧ жи́зни , и҆́же и҆з̾ тебѐ ро́ждьшїѧсѧ пло́тїю , за неи҆зрече́ннᲂе млрⷭ҇дїе , и҆ спасе́нїе пᲂю́щихъ тѧ̀ .

катава́сїѧ : Въ зако́ннѣмъ сѣннᲂписа́нїи .

свѣти́ленъ . Пи́щи наслажда́ѧсѧ пресла́вныѧ и҆ бжⷭ҇твенныѧ , а҆́гг҃лѡмъ є҆динᲂжи́тель бы́лъ є҆сѝ бл҃же́нне . пти́цы пасы́и в̾лꙋзѣ́хъ . ѿ́ бг҃а прїѧ́лъ є҆сѝ бл҃гᲂда́ть и҆сцѣле́нїемъ , три́фᲂне великᲂмч҃нче , и҆сцѣли́ти чл҃кѡмъ не́мᲂщи и҆ недꙋ́ги . сла́ва , и҆ ны́нѣ , боⷢ҇ . Ѻ҆трᲂча̀ прине́сши всенепᲂро́чнаѧ ѻ҆трᲂкᲂви́ца въ ст҃и́лище , сᲂверши́ти ꙗ҆́же по зако́нꙋ . и҆ сїѐ на рꙋкꙋ̀ ꙗ҆́кѡ прїѧ́тъ сѷмеѡ́нъ пра́ведныи , прᲂти́вꙋ и҆з̾речѐ дв҃цы . се́й лежи́тъ на паде́нїе и҆ на вᲂста́нїе мно́гимъ , и҆ въ зна́менїе в̾ ми́рѣ .

На стихо́внѣ , во ѻ҆кта́и . сла́ва , и҆ ны́нѣ . гла́съ , в҃ . Зижди́тель нб҃ꙋ и҆ землѝ , на рꙋкꙋ̀ нᲂша́шесѧ , ст҃ы́мъ сѷмеѡ́нᲂмъ ста́рцемъ дне́сь . то́й бо дх҃ᲂмъ ст҃ы́мъ гл҃аше , ны́нѣ свᲂбᲂди́хсѧ , ви́дѣхъ бо сп҃са мᲂегѡ̀ .

На литꙋргі́и , бл҃же́нна . ѿ кано́на , пред̾пра́з днествꙋ , пѣ́снь , г҃ ѧ , на д҃ . и҆ ст҃о́мꙋ , пѣ́снь , ѕ҃ ѧ , на д҃ . прᲂки́мен̾ , ѱл҃о́мъ дв҃дᲂвъ . вᲂз̾весели́тсѧ пра́ведникъ ѡ҆́ гдⷭ҇ѣ , и҆ ᲂу҆пᲂва́етъ на́нь . сти́хъ . ᲂу҆слы́ши бж҃е мл҃твꙋ мᲂю̀ , внегда̀ мᲂли́тимисѧ къ тебѣ̀ . а҆пⷭ҇лъ , къ ри́млѧнѡмъ . зача́ло , ч҃ѳ .= а҆ллилꙋ́їѧ . пра́ведникъ ꙗ҆́кѡ фи́никъ прᲂцвѣте́тъ , и҆ ꙗ҆́кѡ ке́дръ и҆́же в̾ лива́нѣ ᲂу҆мно́житсѧ . =є҆ѵⷢ҇а́лїе , ѿ =лꙋкѝ . зача́ло , н҃а . прича́стенъ . в=ъ па́мѧть вѣ́чнꙋю бꙋ́детъ пра́ведникъ .