10 февраля: св. мч. Харалампия

МЦⷭ҇А ТОГО́ЖЕ ВЪ І҃ ДН҃Ь

Ст҃а́гѡ мꙋ́ченика харла́мпїѧ . =Ве́черъ , на гдⷭ҇и вᲂзва́хъ , стихѣ́ры . гла́съ , ѕ҃ . поⷣ . всѐ ᲂу҆пᲂва́нїе . Ве́сь ѿ ю҆́нᲂсти вᲂз̾ло́жьсѧ влⷣцѣ ,꙳ сегѡ̀ в̾желѣ́лъ є҆сѝ ,꙳ и҆ тᲂгѡ̀ стᲂпа́мъ пᲂслѣ́дᲂвалъ є҆сѝ .꙳ ѡ҆чи́щьжесѧ всѧ́кїѧ стрⷭ҇ти и҆ скве́рны ,꙳ бжⷭ҇твеннᲂю бл҃гᲂда́тїю ѡ҆бᲂга́тилсѧ є҆сѝ ,꙳ твᲂри́ти и҆сцѣле́нїѧ ,꙳ и҆ чꙋдᲂдѣ́йствᲂвати пресла́внаѧ .꙳ и҆ мч҃нкъ бы́лъ є҆сѝ ,꙳ всѣ́ми прило́ги мꙋче́нїи непреклᲂни́мь пребы́въ ,꙳ си́лᲂю пᲂже́ршагᲂсѧ на крⷭ҇тѣ̀ .꙳ є҆го́же прилѣ́жнѡ мᲂлѝ ,꙳ ѡ҆ дш҃а́хъ на́шихъ . Гвᲂз̾дьмѝ пригвᲂжде́но ,꙳ твᲂѐ бл҃же́ннᲂе тѣ́ло терпѣли́внᲂе ,꙳ страда́льче харла́мпїе ,꙳ и҆ непᲂбѣди́мᲂе .꙳ дш҃ꙋ непрело́жнꙋ и҆ ᲂу҆́мъ некра́дᲂмъ ,꙳ сᲂблюда́ше сᲂкрꙋша́емь .꙳ бжⷭ҇твеннᲂе бо жела́нїе тѧ̀ сла́вне бᲂга́тнѡ распалѧ́ше ,꙳ и҆ терпѣ́ти мꙋ́камъ всѧ́къ ви́дъ пᲂнꙋжда́ше ,꙳ мч҃нче стрⷭ҇тᲂте́рпче ,꙳ хрⷭ҇то́вымъ страда́нїемъ ѻ҆́бщниче .꙳ є҆го́же со дерзнᲂве́нїемъ мᲂлѝ ꙳ ѡ҆ дш҃а́хъ на́шихъ . Ра́дᲂсть пресвѣ́тлꙋю ,꙳ и҆ пречестнꙋ́ю сла́вꙋ ,꙳ пᲂстрада́въ наслѣ́дᲂвалъ є҆сѝ ,꙳ и҆ вѣ́чнꙋющее ра́дᲂванїе .꙳ сщ҃е́нниче прпⷣбне , страда́льче честны́и ,꙳ во́ине до́блественыи .꙳ и҆́же во́инства и҆ ѡ҆пᲂлче́нїѧ ѕмїи́на ,꙳ крᲂве́й твᲂи́хъ тече́ньми , ꙗ҆́вѣ пᲂтᲂпи́лъ є҆сѝ бл҃гᲂда́тїю .꙳ и҆ бжⷭ҇твеннᲂю мᲂли́твᲂю ,꙳ мертвеца̀ вᲂз̾дви́глъ є҆сѝ вᲂи́стинꙋ .꙳ и҆ со дерзнᲂве́нїемъ мᲂлѧ́сѧ ,꙳ ѡ҆ дш҃а́хъ на́шихъ . =сла́ва , и҆ ны́нѣ , боⷢ҇ . Оу҆ѧ́звенаго мѧ ꙳ разбо́йми бѣсо́вьскими и҆ нахᲂжде́ньми ,꙳ и҆ лежа́ща всего̀ недѣ́йствена ,꙳ пренепᲂро́чнаѧ ,꙳ на пꙋтѝ всегда̀ нестᲂѧ́тельнагѡ житїѧ̀ ,꙳ и҆ млⷭ҇ти надѣ́ющасѧ ,꙳ в̾ско́рѣ пᲂсѣтѝ ,꙳ вино̀ вᲂз̾лїѧ́вши и҆ ма́слѡ ,꙳ на неи҆сцѣ́льныѧ ра́ны ,꙳ и҆ ко бл҃гᲂздра́вїю вᲂз̾ведѝ .꙳ ꙗ҆́кѡ да тѧ̀ сла́влю ,꙳ и҆ любо́вїю по́ дᲂлгꙋ вᲂспᲂю̀ вели́чїѧ тѝ ,꙳ чⷭ҇таѧ мт҃и прⷭ҇нѡ дв҃о . крⷭ҇тᲂбоⷢ҇ . Ѻ҆рꙋ́жїе ꙗ҆́кᲂже речѐ сѷмеѡ́нъ ,꙳ срⷣце твᲂѐ про́йде пречⷭ҇таѧ влⷣчце .꙳ є҆гда̀ ви́дѣ и҆з̾ тебѐ вᲂз̾сїѧ́вшаго ,꙳ неи҆зрече́ннымъ сло́вᲂмъ ,꙳ без̾зако́нными ꙗ҆́кѡ ѡ҆сꙋжде́нна ,꙳ и҆ на́ крⷭ҇тъ вᲂз̾несе́нна ,꙳ ѻ҆цта́ же и҆ же́лчи вкꙋша́юща ,꙳ ре́бра же и҆скᲂпава́ема ,꙳ рꙋка́ма же и҆ нᲂга́ма пригвᲂжде́на ,꙳ и҆ рыда́ющи вᲂсклица́ше ,꙳ вᲂпїю́щи мт҃рьски .꙳ что́ се ча́до сла́дкᲂе , но́вᲂе та́инство .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , д҃ . Мч҃нкъ тво́й гдⷭ҇и харла́мпїи , во страда́нїи свᲂе́мъ вѣне́цъ прїѧ́тъ нетлѣ́нныи , ѿ тебѐ бг҃а на́шегѡ . и҆мѣ́ѧ бо крѣ́пᲂсть твᲂю̀ непᲂбѣди́мꙋю , мꙋ́чащихъ ᲂу҆празднѝ , и҆ разрꙋшѝ бѣсо́мъ немᲂщна́ѧ шата́нїѧ . тᲂгѡ̀ мл҃твами хрⷭ҇тѐ бж҃е , спасѝ дш҃а на́ша .= сла́ва , и҆ ны́нѣ , боⷢ҇ . и҆лѝ , крⷭ҇тᲂбоⷢ҇ .=

Кано́нъ . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ хᲂди́въ і҆и҃ль , по бе́зднѣ стᲂпа́ми , гᲂни́телѧ фараѡ́на , ви́дѧ пᲂтᲂплѧ́ема , бг҃ꙋ пᲂбѣ́днꙋю пѣ́снь пᲂе́мъ вᲂпїѧ́ше .

запѣ́въ : Ст҃ы́и мч҃нче харла́мпїе , мᲂлѝ бг҃а ѡ҆ на́съ . Съ ли́ки ше́ствꙋѧ ве́селѡ , в̾ мы́сленыхъ нбⷭ҇ныхъ се́лехъ , и҆ сїѧ́ѧ свѣ́тᲂмъ невече́рнимъ , и҆зба́ви мѧ ѿ страсте́й , мᲂли́твами сѝ мꙋ́дре , ꙗ҆́кѡ да пᲂю́ тѧ . Свѣтᲂно́снаѧ твᲂѧ̀ па́мѧть , сл҃нчна ѡ҆блиста́етъ дарᲂва́нїѧ , и҆ прᲂсвѣща́етъ и҆́же вѣ́рнѡ в̾не́й чтꙋ́щїѧ тѧ̀ . ра́дᲂсти пресвѣ́тлѣй , вᲂи́стинꙋ мч҃нче тезᲂи҆мени́те . Крᲂве́й твᲂи́хъ ка́плѧми , сла́нᲂе невѣ́рїѧ мо́ре пᲂто́пль . рѣка̀ бл҃гᲂче́стїѧ бы́лъ є҆сѝ , хрⷭ҇то́вꙋ напᲂѧ́ѧ вᲂи́стинꙋ цр҃квь прⷭ҇нѡ . боⷢ҇ . Грѣхо́внаѧ бꙋ́рѧ , и҆ пᲂмышле́нїи сᲂпрᲂти́вныхъ вᲂлны̀ , и҆ страсте́й наведе́нїѧ по мнѣ̀ преидо́ша . твᲂе́ю бцⷣе дв҃о , держа́внᲂю мл҃твᲂю спаси́ мѧ .

пѣ́снь , г҃ . і҆рмо́съ . Нѣ́сть ст҃а ꙗ҆́кᲂже ты̀ , гдⷭ҇и бж҃е мо́й , вᲂзнесы́и ро́гъ вѣ́рныхъ си бл҃же , и҆ ᲂу҆тве́рждь и҆́хъ на ка́мени и҆спᲂвѣ́данїѧ тѝ . Нѣ́сть ѿню́дъ и҆зрещѝ чꙋде́съ мно́жества , и҆́хже сᲂтвᲂри́лъ є҆сѝ є҆щѐ в̾ жи́зни хᲂдѧ̀ , и҆ к̾ бг҃ꙋ преста́вльсѧ , стрⷭ҇тᲂте́рпче мч҃нче дᲂстᲂчꙋ́дне . Си́лᲂю бжⷭ҇твеннᲂю ᲂу҆крѣ́пльсѧ , некрѣ́пкꙋю на́глᲂсть , без̾зако́ннымъ низ̾лᲂжи́лъ є҆сѝ . ꙗ҆́кᲂже во́инъ крѣ́пᲂкъ , харла́мпїе страда́льче . ꙗ҆́кѡ ѻ҆рꙋ́жникъ бжⷭ҇твеннагѡ пᲂлка̀ . Крᲂве́мъ и҆сте́кшемъ ка́плѧ твᲂегѡ̀ тѣлесѐ , ве́сь нече́стїѧ пла́мень , и҆ лю́тᲂе запале́нїе ᲂу҆гаси́ша . пи́щи же пᲂто́ка тебѣ̀ и҆схᲂда́таиша . боⷢ҇ . Ст҃ы́хъ ст҃а́гѡ бг҃а рᲂдила̀ є҆сѝ прест҃а́ѧ , ст҃ᲂсти хра́мъ ꙗ҆́вльшисѧ чи́стъ . и҆ две́рь , є҆ю́же є҆ди́нъ хрⷭ҇то́съ про́йде , спаса́ѧ чл҃чество .

сѣда́ленъ . гла́съ , г҃ . Сто́лпъ непᲂкᲂлѣби́мъ цр҃кви , свѣ́щникъ негаси́мъ вселе́ннѣй , стрⷭ҇тᲂте́рпче ꙗ҆ви́лсѧ є҆сѝ харла́мпїе . и҆ прᲂсїѧ́въ сл҃нца свѣ́тлѣе , и҆́дᲂльскꙋю ѿгᲂнѧ́еши тмꙋ̀ . мч҃нче сла́вне хрⷭ҇та̀ бг҃а мᲂлѝ , дарᲂва́ти на́мъ ве́лїю млⷭ҇ть . сла́ва , и҆ ны́нѣ , боⷢ҇ . Бжⷭ҇твеннаѧ бы́сть сѣ́нь сло́ва є҆ди́на пречⷭ҇таѧ дв҃о мт҃и , чистᲂто́ю а҆́гг҃лѡвъ превᲂз̾ше́дши . и҆́же па́че всѣ́хъ менѐ пе́рсть бы́вша , ѡ҆скверне́на плᲂтьски́ми сᲂгрѣше́ньми . ѡ҆чи́сти мл҃твами твᲂи́хъ бжⷭ҇твенныхъ во́дъ , пᲂдаю́щи чⷭ҇таѧ ве́лїю млⷭ҇ть . крⷭ҇тᲂбоⷢ҇ . Нескве́рнаѧ а҆́гница , сло́вꙋ нетлѣ́ннаѧ дв҃а мт҃и на крⷭ҇тѣ̀ ви́дѣвши ви́сима , и҆́же и҆з̾ неѧ̀ без̾ бᲂлѣ́зни прᲂзѧ́бшагѡ . мт҃рьски пᲂдо́бнѡ рыда́ющи взыва́ше , ᲂу҆вы̀ мнѣ̀ ча́до мᲂѐ , ка́кѡ стра́ждеши , хᲂтѧ̀ и҆зба́вити ѿ страсте́й бесче́стїѧ чл҃ка .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃ᲂлѣ́пнѡ зᲂве́тъ вᲂпїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи . Красе́нъ бы́лъ є҆сѝ пᲂма́завсѧ кро́вїю , чⷭ҇тна́гѡ мꙋче́нїѧ . и҆ дᲂбро́тами сегѡ̀ ᲂу҆краси́всѧ , харла́мпїе страда́льцемъ ᲂу҆краше́нїе и҆ ᲂу҆тверже́нїе . Бѣсо́мъ и҆стꙋка́ны , твᲂи́мъ сᲂкрꙋши́лъ є҆сѝ стрⷭ҇тᲂте́рпче мꙋ́жествᲂмъ . хра́мъ себѐ ст҃о́мꙋ дх҃ꙋ , и҆ терпѣ́нїемъ нело́жнымъ , сто́лпъ пᲂказа́лъ є҆сѝ и҆ ѻ҆́бразъ . На высᲂтꙋ̀ в̾зе́мше рꙋ́цѣ сла́вне , тмѣ̀ пред̾ста́теле , твᲂѧ̀ ре́бра стрᲂга́хꙋ нᲂгᲂтьмѝ , вѣ́чнᲂе вᲂи́стинꙋ и҆схᲂда́таивше наслажде́нїе . боⷢ҇ . Крѣ́пᲂсть мᲂѧ̀ и҆ пѣ́нїе мᲂѐ хрⷭ҇то́съ бг҃ъ , и҆́же и҆з̾ тебѐ вᲂсїѧ́выи , премно́жествᲂмъ чⷭ҇таѧ бл҃гᲂсти , и҆зба́ви на́съ пе́рваго престꙋпле́нїѧ .

пѣ́снь , є҃ . і҆рмо́съ . Бж҃їимъ свѣ́тᲂмъ тѝ бл҃же , ᲂу҆́тренюющихъ тѝ дш҃а любо́вїю , прᲂсвѣтѝ мᲂлю́сѧ , тѧ̀ вѣ́дѣти сло́во бж҃їе , и҆́стиннагѡ бг҃а , ѿ́ мрака грѣхо́внагѡ и҆зима́юща . Бжⷭ҇твеннѣй стра́сти , и҆́же на́съ ра́ди претерпѣ́вшагѡ , тве́рдѡ мч҃нче хрⷭ҇то́въ пᲂдо́бникъ бы́въ . терпи́ши по всемꙋ̀ тѣлесѝ сла́вне , гвᲂз̾де́й пригвᲂжде́нїе до́блественѣ . Без̾слᲂве́сїе гᲂни́телей , сло́во сᲂбезнача́льнᲂе ѻ҆ц҃ꙋ , и҆справлѧ́ѧ премꙋ́дре , сло́во без̾слᲂве́снᲂмꙋ ꙗ҆́вѣ влага́етъ , разрѣши́ти ѿ ю҆́зъ тѧ̀ пᲂвелѣва́юще . Стрѣла́ми сᲂстрѣ́лѧнъ бы́въ , ᲂу҆ѧзви́лъ є҆сѝ срⷣце лю́тагѡ землены́хъ бᲂри́телѧ . кᲂпїе́мъ мꙋ́жества , и҆ терпѣ́нїѧ твᲂегѡ̀ , бг҃ᲂмꙋ́дре страстᲂте́рпче дᲂстᲂчꙋ́дне . боⷢ҇ . Бжⷭ҇твеннымъ сїѧ́нїемъ сѝ бл҃га́ѧ , ѡ҆мраче́нꙋю мѝ дш҃ꙋ сластьмѝ , прᲂсвѣтѝ , и҆ ко спасе́нїю стезѧ́мъ наста́ви . ꙗ҆́же є҆ди́на сп҃са хрⷭ҇та̀ ро́ждьшаѧ .

пѣ́снь , ѕ҃ . і҆рмо́съ . Жите́йскагѡ мо́рѧ вᲂз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вᲂпїю́ ти , вᲂз̾ведѝ ѿ тлѝ живо́тъ мо́й мнᲂгᲂмлⷭ҇тиве . Свѣти́льникъ бы́лъ є҆сѝ , страда́нїи твᲂи́хъ свѣ́тᲂмъ прᲂсвѣща́ѧ кᲂнцы̀ . и҆спᲂвѣ́даѧ и҆́мѧ хрⷭ҇то́во пред̾ мꙋчи́тели , страстᲂте́рпче хрⷭ҇то́въ пресла́вне . Бжⷭ҇твенныѧ распалѧ́емь ѻ҆гне́мъ любвѐ , рᲂсо́ю вѣ́ры , нече́ствꙋющихъ ᲂу҆гаси́лъ є҆сѝ запале́нїе . хрⷭ҇то́ва чꙋдеса̀ невѣ́рнымъ пᲂказꙋ́ѧ дᲂстᲂчꙋ́дне . Жи́знь жела́ѧ без̾сме́ртнꙋю , плᲂтьска́ѧ харла́мпїе ᲂу҆мертви́лъ є҆сѝ страстна́ѧ движе́нїѧ . и҆ мл҃твᲂю мертвеца̀ вᲂз̾ста́вилъ є҆сѝ . вᲂспѣва́ѧ , и҆́же во все́мъ тѧ̀ прᲂсла́вльшаго . боⷢ҇ . Стрⷭ҇тьми́ мѧ преклᲂне́на сᲂпрᲂти́вныхъ прило́гъ , мт҃и бж҃їѧ ᲂу҆твердѝ , ꙗ҆́кѡ без̾стра́стїѧ ро́ждьши и҆сто́чникъ . к̾ тебѣ́ бо прибѣго́хъ , чл҃кѡмъ вели́кᲂмꙋ прибѣ́жищꙋ .

кᲂнда́къ . гла́съ , и҃ . Пᲂдо́бствᲂвавъ бл҃гᲂда́тїю сщ҃е́нства сла́вне , цр҃квь свѣ́тлѡ ᲂу҆краси́лъ є҆сѝ . бжⷭ҇твенными тѝ страда́нїи , ꙗ҆́же по хрⷭ҇тѣ̀ прїѧ́тъ до́блественѣ . и҆ претерпѣ́лъ є҆сѝ ра́дꙋѧсѧ харла́мпїе честны́и , свѣти́льниче всеми́рныи , ѡ҆сїѧва́еши земны́ѧ кᲂнцы̀ , ꙗ҆́кѡ непᲂбѣди́мъ . и҆́кᲂсъ . Па́стырѧ хрⷭ҇та̀ бг҃а на́шегѡ , ꙗ҆́кѡ а҆́гньца на́ землю бл҃гᲂвᲂли́вшагѡ прїитѝ , грѣхѝ взе́млющагѡ , и҆ недꙋ́ги всѣ́хъ пᲂне́сшагѡ , равнᲂѻ҆бразᲂва́въ мч҃нче ст҃е . дш҃ꙋ за́ ѻ҆вцы пᲂлᲂжи́лъ є҆сѝ , вᲂз̾вѣща́ѧ є҆гѡ̀ стрⷭ҇ти . тѣ́мъ дне́сь всѝ пᲂе́мъ тѧ̀ пѣ́сньми , ꙗ҆́кѡ непᲂбѣди́ма .

пѣ́снь , з҃ . і҆рмо́съ . Ѻ҆́трᲂцы в̾вавѷлѡ́нѣ , пе́щи пла́менны не ᲂу҆бᲂѧ́шасѧ . но пᲂсредѝ ѻ҆гнѧ̀ в̾ве́ржени , прᲂхлажда́еми взыва́хꙋ , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . Приближа́ѧсѧ мꙋ́камъ , и҆ ѻ҆гне́мъ ѡ҆палѧ́емь , стрⷭ҇тᲂте́рпче хрⷭ҇то́въ , ꙗ҆́кѡ зла́то чи́сто бы́сть . и҆ сщ҃е́нно вᲂз̾лᲂже́нїе хрⷭ҇то́во бы́лъ є҆сѝ . Мл҃твъ твᲂи́хъ рᲂсо́ю , без̾зако́ннꙋющихъ пе́щь ᲂу҆гасѐ мꙋ́дре . и҆ и҆зба́вленъ бы́сть пᲂѧ̀ твᲂрцꙋ̀ , бл҃гᲂслᲂве́нъ бг҃ъ ѻ҆ц҃ъ на́шихъ . Ѡ҆пᲂлче́нїемъ страда́нїи , дре́во ꙗ҆ви́лсѧ є҆сѝ высᲂкᲂра́слено , ѡ҆сѣнѧ́юще вѣ́рныхъ , ѿ пла́мене грѣхо́внагѡ , зᲂвꙋ́щїѧ , бл҃гᲂслᲂве́нъ бг҃ъ ѻ҆ц҃ъ на́шихъ . боⷢ҇ . И҆́же ра́дᲂсть прїе́м̾шаѧ , въ пречⷭ҇тѣмъ чре́вѣ свᲂе́мъ бцⷣе чⷭ҇таѧ , весе́лїѧ срⷣце мᲂѐ и҆спо́лни , печа́ль ѿгᲂнѧ́щи страсте́мъ , прⷭ҇нѡ дв҃о .

пѣ́снь , и҃ . і҆рмо́съ . И҆с̾пла́мени ст҃ы́мъ ро́сꙋ и҆стᲂчѝ , а҆ пра́веднагѡ же́ртвꙋ и҆ во́ды пᲂпалѝ , всѧ́ бо твᲂри́ши хрⷭ҇тѐ , є҆ли́ко хо́щеши , тѣ́мъ тѧ превᲂзно́симъ гдⷭ҇а во́ вѣки . Тече́нїи крᲂвны́ми и҆скаплѧ̀ , ра́нами дᲂбро́тᲂю ᲂу҆кра́шенъ . пᲂбѣ́днымъ бл҃гᲂлѣ́пнѡ вѣнце́мъ , ꙗ҆́кѡ ᲂу҆краше́нъ , бг҃ᲂви пред̾ста́лъ є҆сѝ мч҃нче . Мꙋ́камъ ѻ҆́блацы непᲂкры́ша , мꙋ́жество твᲂѐ мч҃нче и҆ до́блесть . гᲂни́телей не ѡ҆мрачѝ сᲂпрᲂтивле́нїе , твᲂѐ пресвѣ́тлᲂе бг҃ᲂмꙋ́дре терпѣ́нїе . Сщ҃е́нникъ же и҆ мч҃нкъ пᲂдви́женъ , во́инъ до́бль , и҆ сто́лпъ непᲂкᲂлѣби́мъ , ᲂу҆тверже́нїе вѣ́рнымъ , бл҃гᲂче́стїѧ пᲂбо́рникъ , вᲂи́стинꙋ ꙗ҆ви́лсѧ є҆сѝ , бг҃ᲂмꙋ́дре стрⷭ҇тᲂте́рпче . боⷢ҇ . И҆́же всѧ́ческаѧ сᲂтво́рь бжⷭ҇твеннымъ хᲂтѣ́нїемъ , вᲂсхᲂтѣ́въ во ᲂу҆тро́бꙋ твᲂю̀ всели́сѧ чⷭ҇таѧ , и҆стлѣ́вшїѧ на́съ ѡ҆бнᲂви́ти хᲂтѧ̀ . є҆го́же превᲂз̾но́симъ во́ вѣки .

пѣ́снь , ѳ҃ . і҆рмо́съ . Бг҃а чл҃кѡмъ неꙋдо́бь ви́дѣти , на́нь же несмѣ́ютъ чи́ни а҆́гг҃льстїи зрѣ́ти . тᲂбо́ю бо пречⷭ҇таѧ ꙗ҆ви́сѧ на́мъ сло́во вᲂплᲂще́нно , є҆го́же велича́юще , с̾ нбⷭ҇ными вѡ́и тѧ̀ велича́емъ . Ни ѻ҆́гнь ни ме́чь , но нижѐ сме́рть , ни гᲂне́нїе , ни ско́рбь ни гла́дъ , ни бѣда̀ , ни мꙋ́къ всѧ́кихъ ᲂу҆мышле́нїе , вᲂз̾мо́же ѿ любвѐ бж҃їѧ вᲂи́стинꙋ ѿлꙋчи́ти тѧ̀ твᲂрца̀ , страда́льче дᲂстᲂчꙋ́дне . Стрᲂга́ньми нᲂгте́й , ᲂу҆мер̾щвле́нїѧ сᲂвле́къ ри́зы , ѻ҆де́ждами и҆́же ѿ крᲂве́й , себѐ стрⷭ҇тᲂте́рпче ᲂу҆краси́лъ є҆сѝ . тѣ́мже съ дерзнᲂве́нїемъ мч҃нче непᲂбѣди́ме , всѣ́хъ влⷣцѣ и҆ бг҃ꙋ ра́дꙋѧсѧ пред̾стᲂи́ши . Ра́дᲂсти и҆спо́лнь , и҆ бжⷭ҇твенныѧ свѣ́тлᲂсти харла́мпїе , па́мѧть твᲂѧ̀ ми́рᲂви вᲂсїѧ̀ . страсте́мъ зи́мꙋ ѿгᲂнѧ́щи , всѧ̀ прᲂсвѣща́ющи . ю҆́же пра́зднꙋющи , ѡ҆брѣта́емъ сᲂгрѣше́нїемъ ѡ҆чище́нїе мл҃твами тѝ . боⷢ҇ . Страсте́й бꙋ́рѧ смꙋща́етъ мѧ̀ , и҆ сласте́й пᲂгрꙋжа́етъ тревᲂлне́нїе всенепᲂро́чнаѧ . ко́рмчїѧ хрⷭ҇та̀ ро́ждьшаѧ , рꙋ́кꙋ ми по́мᲂщи прᲂстрѝ и҆ спаси́ мѧ , є҆ди́на спасе́нїе вѣ́рнѡ блажа́щимъ тѧ̀ .

<< Previous

Contents

Next >>