МЦⷭ҇А ТОГО́ЖЕ ВЪ ВІ҃ ДН҃Ь

И҆́же во ст҃ы́хъ ѻ҆ц҃а на́шегѡ мелеті́ѧ , а҆рхїє҆пкⷭ҇па а҆нтїᲂхі́йскагѡ . =Вто́йже дн҃ь преставле́нїе и҆́же во ст҃ы́хъ ѻ҆ц҃а на́шегѡ а҆леѯі́ѧ , митрᲂпᲂли́та мᲂско́вскагѡ . слꙋ́жба є҆мꙋ̀ пи́сана по се́й слꙋ́жбѣ .= Ве́черъ , на гдⷭ҇и вᲂзва́хъ , стихѣ́ры . гла́съ , д҃ . поⷣ . ꙗ҆́кѡ до́блѧ .= Пло́тїю по сᲂста́вꙋ сᲂє҆ди́ньшасѧ беспло́тнагѡ ,꙳ и҆ ѻ҆ц҃ꙋ сᲂбезнача́льна сло́ва мꙋ́дре ,꙳ крᲂмѣ̀ прелᲂже́нїѧ и҆ слїѧ́нїѧ ,꙳ мꙋ́дрѣ наꙋчи́лъ є҆сѝ ,꙳ дѣ́йствꙋюща же во ѡ҆бᲂе́мъ ꙳ сꙋгꙋ́быми сꙋществы̀ .꙳ в̾ни́хъ же лежи́тъ ,꙳ и҆ в̾ни́хъ же зри́тсѧ ,꙳ є҆ди́нъ сы́и , нераздѣ́льно сꙋ́щемꙋ ꙳ сїѐ и҆ ѻ҆́но разꙋмѣва́емъ . Пᲂꙋчи́всѧ бл҃же́нне ,꙳ ст҃лю мелеті́е ,꙳ в̾ зако́нѣ гдⷭ҇ни ,꙳ ꙗ҆́кᲂже пи́шетъ .꙳ дре́во ꙗ҆ви́сѧ на вᲂда́хъ вᲂз̾держа́нїѧ лежа̀ ,꙳ и҆ плᲂды̀ дᲂбрᲂдѣ́телей пᲂдава́ѧ бл҃гᲂда́тїю ,꙳ прᲂсвѣ́щьшаго ст҃ꙋ́ю дш҃ꙋ твᲂю̀ ,꙳ и҆ всѧ́ческимъ прїѧ́тнꙋ ,꙳ сᲂдѣ́лавша дх҃о́внымъ сїѧ́нїемъ . Оу҆краси́шасѧ премꙋ́дре ,꙳ писа́тельно лани́ты твᲂѧ̀ .꙳ ꙗ҆́кѡ го́рлица лю́бѧщи вᲂз̾держа́нїе ,꙳ и҆ пи́щꙋ ѡ҆плева́ющи жела́нїѧ мелеті́е ,꙳ пи́щею разꙋ́мнᲂю ,꙳ є҆ѧ́же тебѣ̀ хрⷭ҇то́съ да́рꙋетъ ,꙳ прїе́мъ мно́гїѧ тѝ трꙋды̀ ,꙳ и҆ ре́внᲂсть неи҆змѣ́рнꙋю .꙳ є҆ѧ́же и҆мѧ́ше в̾ бѣдѣ̀ сꙋ́щи вѣ́рѣ . =сла́ва , и҆ ны́нѣ , боⷢ҇ . Ꙗ҆́кѡ мᲂли́твꙋ неꙋсыпа́ющꙋ ,꙳ и҆ мᲂльбꙋ̀ пребыва́ющꙋ ,꙳ и҆мꙋ́щи пречⷭ҇таѧ ко́ гдⷭ҇ꙋ ,꙳ напа́сти ᲂу҆спѝ ,꙳ во́лны ᲂу҆крᲂтѝ ѻ҆каѧ́нныѧ мѝ дꙋшѝ .꙳ и҆ в̾ ско́рби сꙋ́щее срⷣце мᲂѐ ᲂу҆тѣ́ши ,꙳ ѻ҆трᲂкᲂви́це мᲂлю́ тѧ .꙳ и҆ ѡ҆благᲂда́ти ᲂу҆́мъ мо́й ,꙳ ꙗ҆́кѡ да дᲂсто́йнѡ тѧ̀ прᲂсла́влю . крⷭ҇тᲂбоⷢ҇ . А҆́гньца и҆ па́стырѧ ,꙳ на́ древѣ ꙗ҆́кѡ ᲂу҆зрѣ̀ ,꙳ а҆́гница ро́ждьшаѧ рыда́ше ,꙳ и҆ мт҃рьски тебѣ̀ вѣща́ше ,꙳ сн҃е вᲂзжелѣ́нне ,꙳ ка́кѡ на́ древѣ крⷭ҇тнѣмъ ,꙳ вᲂздви́жесѧ дᲂлгᲂтерпѣли́ве ;꙳ ка́кѡ рꙋ́цѣ свᲂѝ и҆ но́зѣ свᲂѝ сло́ве ,꙳ пригвᲂздѝ без̾зако́нники ,꙳ и҆ кро́вь свᲂю̀ и҆злїѧ́лъ є҆сѝ влⷣко .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , д҃ . Пра́вило вѣ́рѣ и҆ ѻ҆́бразъ кро́тᲂсти , вᲂз̾держа́нїю ᲂу҆чи́телѧ , ꙗ҆ви́ тѧ гдⷭ҇ь ста́дꙋ свᲂемꙋ̀ , ꙗ҆́же веще́мъ и҆́стина . сего̀ ра́ди стѧжа́въ смире́нїемъ высо́каѧ , нището́ю бᲂга́таѧ , ѻ҆́ч҃е на́шъ ст҃лю мелеті́е , мᲂлѝ хрⷭ҇та̀ бг҃а , спасти́сѧ дш҃а́мъ на́шимъ .= сла́ва , и҆ ны́нѣ , боⷢ҇ . и҆лѝ , крⷭ҇тᲂбоⷢ҇ .=

Кано́нъ . гла́съ , и҃ . пѣ́снь , а҃ . і҆рмо́съ . Вᲂѡ҆рꙋже́на фараѡ́на пᲂгрꙋзѝ , чꙋдᲂтвᲂрѧ́й дре́вле , мѡѷсе́йскїи же́ѕлъ крⷭ҇тᲂѡ҆бра́знѡ прᲂразѝ , и҆ раздѣлѝ мо́ре . і҆и҃лѧ же бѣжа́ща , пѣ́ша хᲂдѧ́ща спасѐ , пѣ́снь бг҃ᲂви вᲂз̾сыла́юща .

запѣ́в̾ : Ст҃лю хрⷭ҇то́въ мелеті́е , мᲂлѝ бг҃а ѡ҆ на́съ . Свѣтᲂда́вцꙋ пред̾стᲂѧ̀ ве́сь свѣ́телъ , свѣ́тᲂмъ ра́зꙋма , ѡ҆мраче́ннᲂе ѻ҆́ко дш҃и мᲂеѧ̀ прᲂсвѣтѝ , и҆ мглꙋ̀ ѿженѝ страсте́й , твᲂи́ми мᲂли́твами , ꙗ҆́кѡ ст҃ль бо прпⷣбне , и҆́маши дерзнᲂве́нїе мелеті́е . И҆́же в̾ нѣ́дрѣхъ ѻ҆ц҃а сѣдѧ́и , сᲂпрⷭ҇нᲂсꙋ́щнᲂе и҆ сра́сленᲂе сло́во ро́ждьшемꙋ , прᲂпᲂвѣ́дника свᲂемꙋ̀ бжⷭ҇твꙋ̀ пᲂставлѧ́етъ є҆ди́нъ , ꙗ҆́кѡ а҆пⷭ҇лѡмъ є҆динᲂѡ҆бра́зна тѧ̀ , ѽ бг҃ᲂѧвле́нне мелеті́е . Бжⷭ҇твеннымъ прᲂсвѣ́щьсѧ сїѧ́нїемъ , и҆́же ѿ без̾нача́льна ѻ҆ц҃а , є҆динᲂро́дна сло́ва , несо́зданна вѣ́чна , бг҃ᲂсло́вилъ є҆сѝ прпⷣбне . а҆́рїевы же пᲂбо́рники , є҆динᲂмы́сленыѧ разгна́лъ є҆сѝ , бжⷭ҇твеннᲂю мᲂльбо́ю ѡ҆гражда́емь . боⷢ҇ . Вᲂплᲂще́на прест҃а́ѧ рᲂдила̀ є҆сѝ , и҆́же пре́жде беспло́тнаго , бг҃ᲂнача́льнᲂе сло́во . є҆ди́на бо ѿ́ вѣка заре́ю чистᲂты̀ , дв҃ьства же дᲂбро́тами , и҆ всенепᲂро́чными дарᲂва́нїи , бы́сть дᲂсто́йна пренепᲂро́чнаѧ .

пѣ́снь , г҃ . і҆рмо́съ . Оу҆тверже́и нб҃са̀ в̾ нача́тцѣ ра́зꙋмᲂмъ , и҆ зе́млю на вᲂда́хъ ѡ҆снᲂва́выи . на ка́мени мѧ хрⷭ҇тѐ цр҃ко́внѣмъ ᲂу҆твердѝ , ꙗ҆́кѡ нѣ́сть ст҃а , па́че тебѐ чл҃кᲂлю́бче . Тве́рдѣйшꙋ дш҃ꙋ а҆дама́нта и҆мѣ́ѧ , гни́лᲂсть є҆ресе́мъ , ты̀ ᲂу҆че́ньми бл҃гᲂче́стїѧ прᲂсвѣ́щьсѧ пребᲂга́те ѡ҆плева́лъ є҆сѝ . тѣ́мже вѣ́рнїи тѧ̀ всѝ , пѣ́сньми бг҃ᲂмꙋ́дре пᲂчита́емъ . Оу҆пᲂдо́бисѧ дᲂбрᲂдѣ́телїю хрⷭ҇то́вымъ а҆пⷭ҇лѡмъ , ѻ҆́нѣхъ вла́сть и҆ прⷭ҇то́лъ наслѣ́дᲂвавъ ꙗ҆́в̾ственѡ , мелеті́е пресла́вне , правᲂсла́вїѧ сто́лпе , и҆ бл҃гᲂче́стїѧ пᲂбо́рниче . Въсн҃ᲂвле́нъ бг҃ᲂви , и҆́же ѿ́ бг҃а бг҃а сло́ва , нес̾ведѐ въ тва́рь мꙋ́дрѣ . но прᲂсла́вилъ є҆сѝ ѻ҆ц҃ꙋ сᲂбезнача́льна и҆ сᲂпрⷭ҇то́льна , сᲂдѣ́телѧ и҆ зижди́телѧ всѣ́мъ вѣко́мъ бг҃ᲂпрїѧ́тне . боⷢ҇ . Въ твᲂю̀ ст҃ꙋ́ю бг҃ъ ᲂу҆тро́бꙋ всели́всѧ , вᲂплᲂти́сѧ ꙗ҆́кᲂже вѣ́сть бг҃ᲂмт҃и , и҆ спасѐ на́съ живᲂно́сными стрⷭ҇тьмѝ . тѣ́мже тѧ̀ спасе́нїѧ две́рь дв҃о сла́вимъ .

сѣда́ленъ . гла́съ , и҃ . Пᲂꙋчи́всѧ де́нь же и҆ но́щь въ зако́нѣ гдⷭ҇ни , ѻ҆́ч҃е мꙋ́дрѣ . ꙗ҆́кѡ дре́во плᲂдᲂви́то , на вᲂда́хъ дх҃о́вныхъ насажде́но ꙗ҆ви́сѧ . тѣ́мже сщ҃е́нствᲂвалъ є҆сѝ бг҃ᲂви непᲂро́чнѡ , а҆́рїева хꙋле́нїѧ , и҆ саве́лїѧ ѕлᲂсла́внагѡ нра́ва ꙗ҆́вѣ вᲂз̾гнꙋша́сѧ , правᲂсла́внᲂю мы́слїю ст҃лю мелеті́е . мᲂлѝ хрⷭ҇та̀ бг҃а , грѣхо́въ ѡ҆ставле́нїе дарᲂва́ти , чтꙋ́щимъ любо́вїю ст҃ꙋ́ю па́мѧть твᲂю̀ . сла́ва , и҆ ны́нѣ , боⷢ҇ . Плᲂтьски́мъ недꙋ́гᲂмъ мнᲂгᲂви́днымъ , и҆ дш҃е́внымъ страсте́мъ мнᲂгᲂѡ҆бра́знымъ , и҆сцѣле́нїе ѡ҆брѣ́тъ тᲂбо́ю пренепᲂро́чнаѧ . печа́лемъ же разрѣше́нїе , бѣда́мъ и҆ ско́рбемъ премѣне́нїе гᲂто́во , и҆ ско́рѡ и҆збавле́нїе . вѣ́рᲂю несꙋмѣ́ннᲂю , и҆ те́плымъ срⷣцемъ , и҆спᲂвѣ́даю твᲂѧ̀ млⷭ҇ти влⷣчце , сн҃о́мъ же чл҃ческимъ мно́гаѧ твᲂѧ̀ чꙋдеса̀ . и҆ мᲂлю́сѧ , кро́вᲂмъ крилꙋ̀ твᲂею̀ при́снѡ сᲂблюстѝ , и҆ сᲂхрани́ти мѧ всегда̀ . крⷭ҇тᲂбоⷢ҇ . А҆́гньца и҆ па́стырѧ и҆ и҆зба́вителѧ , а҆́гница зрѧ́щи , на крⷭ҇тѣ̀ вᲂсклица́ше слезѧ́щи . ми́ръ ᲂу҆́бѡ ра́дꙋетсѧ прїе́млѧ тᲂбо́ю и҆збавле́нїе . ᲂу҆тро́ба же мᲂѧ̀ гᲂри́тъ зрѧ́щи твᲂѐ распѧ́тїе , є҆́же терпи́ши за милᲂсе́рдїе ми́лᲂсти дᲂлгᲂтерпѣли́ве гдⷭ҇и . млⷭ҇ти бе́здно , и҆ и҆сто́чниче неи҆счерпа́емыи , ᲂу҆милᲂсе́рдисѧ и҆ да́рꙋй грѣхо́въ ѡ҆ставле́нїе , вѣ́рᲂю вᲂспѣва́ющимъ бжⷭ҇твеннаѧ твᲂѧ̀ страда́нїѧ .

пѣ́снь , д҃ . і҆рмо́съ . Ты́ ми хрⷭ҇тѐ гдⷭ҇ь , ты́ же и҆ си́ла ми , ты́ ми бг҃ъ , ты́ ми ра́дᲂванїе . не ѡ҆ста́вль нѣ́дра ѻ҆́ч҃а , но ми́лᲂстїю си на́шꙋ нищетꙋ̀ пᲂсѣти́въ . тѣ́мъ съ прᲂро́кѡмъ а҆вва́кꙋмᲂмъ зᲂвꙋ̀ , си́лѣ твᲂе́й сла́ва чл҃кᲂлю́бче . Ꙗ҆́в̾ственѡ сщ҃еннᲂтаи́нниче по́живъ , петро́въ прⷭ҇то́лъ наслѣ́дᲂвалъ є҆сѝ верхо́внагѡ , ѿ хрⷭ҇та̀ вᲂз̾лᲂже́нїе рꙋ́кꙋ прїе́мша . є҆го́же и҆ ѻ҆́бразꙋ пᲂревнᲂва́въ , сн҃а бг҃а жива́гѡ , сп҃са прᲂсла́вилъ є҆сѝ , ᲂу҆че́ньми ѻ҆́нᲂгѡ в̾вѣрѧ́емь . Всѧ́ческими ᲂу҆краше́нъ дарᲂва́ньми , є҆динᲂнача́лїѧ прᲂпᲂвѣ́дникъ бы́лъ є҆сѝ . и҆́же во ѻ҆ц҃ѣ и҆ є҆динᲂро́днѣмъ сло́вѣ пᲂзнава́емѣ , и҆ бжⷭ҇твеннѣмъ дс҃ѣ премꙋ́дре , є҆ди́ницꙋ ᲂу҆́бѡ сꙋщество́мъ , в̾ тре́хъ ли́цѣхъ сꙋ́щꙋ наꙋчи́лъ є҆сѝ прпⷣбне . Смѣ́шьсѧ с̾ дᲂбро́тᲂю пе́рвᲂю чꙋ́дне , и҆ заре́ю тᲂѧ̀ вᲂѡ҆бража́емь . и҆ напита́всѧ бжⷭ҇твенными дарᲂва́нїи по сꙋществꙋ̀ , цр҃кви свѣ́тъ втᲂры́и бы́лъ є҆сѝ , бг҃ᲂѧвле́нне . прᲂсвѣще́нїе бл҃гᲂче́стїѧ ꙗ҆влѧ́ѧ , вѣ́рᲂю притека́ющимъ . боⷢ҇ . Да ѻ҆́бразъ пᲂгребе́ныи страстьмѝ , взы́щеши бᲂга́тствᲂмъ бл҃гᲂсти , в̾ дв҃и́ческꙋю всели́сѧ ᲂу҆тро́бꙋ . и҆з̾ неѧ́же ты̀ премꙋ́дрᲂсть бж҃їѧ хра́мъ сᲂзда̀ . и҆́мже пᲂживѐ с̾ чл҃ки ще́дре , и҆ спа́слъ є҆сѝ ми́рꙋ кᲂнцы̀ .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твᲂегѡ̀ свѣ́те незахᲂдѧ́и , пᲂкры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ запᲂвѣде́й ти пꙋтѝ мᲂѧ̀ напра́ви мᲂлю́тисѧ . Раз̾сѣва́емѣ всю́дꙋ всѧ́кᲂй є҆́реси , ѕла́гѡ бѣсᲂва́нїѧ . превше́лъ є҆сѝ ѻ҆́ч҃е , бл҃гᲂро́дїемъ дш҃и и҆ свѣ́тлᲂстїю , и҆ всест҃ы́мъ нра́вᲂмъ , и҆ тве́рдымъ бл҃гᲂче́стїемъ , бг҃ᲂѧвле́нне пребл҃же́нне мелеті́е . Всѧ́цѣмъ ᲂу҆се́рдїемъ , а҆́рїевы є҆динᲂмꙋ́дреники ѿвраща́ѧ . правᲂсла́внᲂю вѣ́рᲂю , бг҃ᲂно́сне держа́вꙋ ᲂу҆тверди́лъ є҆сѝ . в̾ трⷪ҇цѣ є҆ди́наго бг҃а на́мъ прᲂпᲂвѣ́дꙋѧ , пребл҃же́нне ѻ҆́ч҃е мелеті́е . Пребжⷭ҇твенныѧ трⷪ҇цы таи́нникъ бы́лъ є҆сѝ всеи́стиненъ . ѻ҆ц҃ꙋ сло́во є҆динᲂсꙋ́щно гл҃ѧ и҆ сᲂпрⷭ҇то́льнѡ , и҆ бжⷭ҇твенныи дх҃ъ є҆динᲂра́сленъ ѻ҆ц҃ꙋ и҆ сло́вꙋ , всечестны́и ѻ҆́ч҃е мелеті́е . боⷢ҇ . Во́инства вы́шнихъ пречⷭ҇таѧ си́лъ , тѧ̀ ᲂу҆бл҃жа́ютъ . ро́дᲂве же всѝ чл҃честїи дᲂсто́йнѡ сла́вѧтъ . тебе́ бо ра́ди є҆ди́ныѧ сꙋ́щїи на землѝ , с̾ нбⷭ҇ными сᲂвᲂкꙋ́пльшесѧ , пᲂю́тъ дв҃цѣ ржⷭ҇тво̀ твᲂѐ .

пѣ́снь , ѕ҃ . і҆рмо́съ . Ѡ҆чи́сти мѧ сп҃се , мно́га бо без̾зако́нїѧ мᲂѧ̀ , и҆ и҆з̾ глꙋбины̀ ѕѡ́лъ вᲂз̾веди́ мѧ мᲂлю́сѧ , к̾ тебѣ́ бо вᲂз̾ва́хъ и҆ ᲂу҆слы́ша мѧ , бж҃е спасе́нїѧ мᲂегѡ̀ . И҆з̾сꙋши́лъ є҆сѝ пᲂто́ки бг҃ᲂмꙋ́дре є҆́ресьскїѧ , ѿве́рзлъ є҆сѝ и҆сто́чники ᲂу҆че́нїи и҆справле́нїѧ , непᲂбѣди́мъ пᲂбо́рникъ правᲂсла́вїѧ бы́въ бг҃ᲂбл҃же́нне . И҆з̾сꙋши́въ мꙋ́тнᲂе а҆́рїево тече́нїе без̾бо́жнᲂе , напᲂи́лъ є҆сѝ бᲂга́тнѡ бл҃гᲂда́тными вᲂда́ми вѣ́рныхъ сᲂбо́ры . и҆ цр҃ко́внᲂе бл҃гᲂлѣ́пїе ᲂу҆краси́лъ є҆сѝ . Живы́и пᲂдо́бнѡ бжⷭ҇твенными начина́ньми , бы́лъ є҆сѝ свѣ́телъ ѻ҆́ч҃е дѣ́латель . неᲂу҆кло́нно забра́ло бл҃гᲂче́стїѧ , и҆ па́стыремъ наста́вникъ . боⷢ҇ . Прᲂсвѣща́ютъ дш҃а правᲂсла́внѡ пᲂю́щихъ тѧ̀ рече́нїѧ прᲂро́ческаѧ , твᲂѐ прᲂвᲂз̾вѣща́юще пречⷭ҇таѧ зача́тїе . и҆ є҆́же вы́ше сло́ва , бг҃ᲂневѣ́сто твᲂѐ ржⷭ҇тво̀ .

кᲂнда́къ . гла́съ , а҃ . Оу҆пᲂдо́бльсѧ дѣ́телїю , хрⷭ҇то́вымъ а҆пⷭ҇лѡмъ , ѻ҆́нѣхъ вла́сть прїе́мъ , и҆ престо́лъ наслѣ́дᲂвавъ ꙗ҆́в̾ственѡ , мелеті́е пресла́вне . правᲂсла́вныѧ вѣ́ры сто́лпъ , и҆ ст҃лемъ ро́гъ пᲂма́занїѧ , бл҃гᲂче́стїѧ пᲂбо́рниче . тѣ́мже вѣ́рнїи сᲂше́дшесѧ , тѧ̀ ст҃лю ѻ҆́ч҃е пѣ́сньми бг҃ᲂмꙋ́дрѣ пᲂчита́емъ . дрꙋгі́и , кᲂнда́къ . гла́съ , и҃ . Ꙗ҆́кѡ ст҃лѧ бжⷭ҇твенна , и҆ че́стна намѣ́стника , а҆пⷭ҇лѡмъ сᲂпресто́льна , цр҃кви чтꙋ́щи сла́витъ тѧ̀ . и҆ свѣтᲂно́снꙋю па́мѧть твᲂю̀ сᲂзыва́етъ всѧ̀ пра́зднᲂвати , мелеті́е мꙋ́дре , а҆нтїᲂхі́ѡмъ свѣ́тлаѧ дᲂбро́та , мᲂлѝ заны̀ влⷣкꙋ чл҃кᲂлю́бца .

пѣ́снь , з҃ . і҆рмо́съ . Бж҃їѧ схᲂжде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ дре́вле . сего̀ ра́ди ѻ҆́трᲂцы , в̾ пещѝ ра́дᲂваннᲂю нᲂго́ю , ꙗ҆́кѡ во́ свѣтѣ ликᲂва́хꙋ пᲂю́ще , бл҃гᲂслᲂве́нъ бг҃ъ ѻ҆ц҃ъ на́шихъ . Ст҃ы́и тѧ сᲂбо́ръ , первᲂстᲂѧ́телѧ и҆мѧ́ше бг҃ᲂпрїѧ́тне . є҆го́же ст҃ы́и дх҃ъ ѿ кᲂне́цъ во є҆ди́но сᲂбра̀ , пѣснᲂсло́вѧща тᲂгѡ̀ бжⷭ҇тво̀ . бл҃гᲂслᲂве́нъ бг҃ъ ѻ҆ц҃ъ на́шихъ . Равнᲂче́стно ᲂу҆лꙋчи́лъ є҆сѝ нача́льство , а҆пⷭ҇лъ хрⷭ҇то́вѣхъ . бжⷭ҇твеннᲂе бо си́хъ ᲂу҆че́нїе наслѣ́дилъ є҆сѝ , и҆ житїю̀ пᲂдо́бѧсѧ пᲂѧ́ше , бл҃гᲂслᲂве́нъ бг҃ъ ѻ҆ц҃ъ на́шихъ . Оу҆́мъ и҆мѣ́ѧ ѻ҆́стръ . к̾ бг҃ᲂвидѣ́нїю прᲂсте́ртъ , є҆рети́чествꙋющихъ раз̾враще́нїю пᲂрꙋга́лсѧ є҆сѝ . бл҃гᲂчести́выѧ же ᲂу҆ча̀ взыва́ше , бл҃гᲂслᲂве́нъ бг҃ъ ѻ҆ц҃ъ на́шихъ . боⷢ҇ . Ꙗ҆́кѡ зерца́ло чи́сто твᲂеѧ̀ чистᲂты̀ блиста́ющисѧ бл҃гᲂда́тїю , свѣтᲂрᲂди́тельница дв҃о и҆ бцⷣа пречⷭ҇таѧ бы́сть . тѣ́мже сᲂгла́снѡ ржⷭ҇тво́ ти пᲂе́мъ , бл҃гᲂслᲂве́нъ бг҃ъ ѻ҆ц҃ъ на́шихъ .

пѣ́снь , и҃ . і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃ᲂчести́вымъ лю́тѣ раз̾жжѐ . си́лᲂю же лꙋ́чшею спасе́ныхъ ви́дѣвъ , твᲂрцꙋ̀ и҆ и҆зба́вителю вᲂпїѧ́ше , дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . Свѣ́тлѡ наꙋчи́лъ є҆сѝ , є҆ди́но честѝ бжⷭ҇тво̀ , є҆́же во ѻ҆ц҃ѣ и҆ сн҃ѣ и҆ дс҃ѣ . и҆ си́лꙋ без̾мѣ́рнꙋ , и҆ црⷭ҇тво є҆ди́но , ꙗ҆́вѣ сво́йствᲂмъ крѣ́пкѡ сᲂблюда́емᲂмъ , ко є҆мꙋ́ждо сᲂста́вꙋ . є҆мꙋ́же и҆ пᲂѧ̀ вᲂпїѧ́ше , лю́дїе превᲂзнᲂси́те є҆гѡ̀ во́ вѣки . Сщ҃е́нїѧ хра́мъ ст҃лю бы́въ , всѧ̀ ѡ҆сщ҃а́еши , и҆́же твᲂѐ и҆́мѧ зва́ти тща́щїѧсѧ . и҆ ѻ҆́бразъ ѻ҆́ч҃е тво́й , любо́вїю и҆́же к̾тебѣ̀ написꙋ́ющїѧ бл҃же́нне , и҆ вѣ́рᲂю пᲂю́щїѧ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а , по́йте и҆ превᲂзнᲂси́те є҆гѡ̀ во́ вѣки . Тайнᲂнаставле́ньми и҆зрѧ́дне , свᲂѐ ста́до прᲂсвѣти́лъ є҆сѝ . ны́нѣ же первᲂро́дныхъ цр҃квь вᲂз̾расти́лъ є҆сѝ , зало́гъ бы́въ и҆́же ѿ́ вѣка прᲂсїѧ́вшимъ , ст҃льскими та́йными слꙋ́жбами . с̾ни́ми же вᲂпїе́ши непреста́ннѡ , сщ҃е́ннїи по́йте , лю́дїе превᲂзнᲂси́те гдⷭ҇а во́ вѣки . боⷢ҇ . Наꙋча́еми пречⷭ҇таѧ , и҆́же на тебѣ̀ та́инствᲂмъ . и҆ бы́вшее тᲂбо́ю пᲂжина́юще дш҃а́мъ и҆збавле́нїе и҆ спасе́нїе , зᲂве́мъ со а҆́гг҃лѡмъ гаврїи́лᲂмъ тебѣ̀ . ра́дꙋисѧ вᲂпїю́ще бцⷣе , и҆ вѣ́рнѡ пᲂю́ще тѧ , и҆ превᲂзнᲂсѧ́ще чⷭ҇таѧ во́ вѣки .

пѣ́снь , ѳ҃ . і҆рмо́съ . Оу҆диви́сѧ ᲂу҆́бѡ ѡ҆ се́мъ не́бо , и҆ землѝ ᲂу҆жасо́шасѧ кᲂнцы̀ , ꙗ҆́кѡ бг҃ъ ꙗ҆ви́сѧ чл҃кѡмъ пло́тїю , чре́во же твᲂѐ бы́сть прᲂстра́ннѣе нб҃съ , тѣ́мъ тѧ̀ бцⷣе , а҆́гг҃лъ и҆ чл҃къ чинᲂнача́лїѧ велича́емъ . Невеще́ствено невеще́ственᲂмꙋ пред̾стᲂѧ̀ . є҆го́же и҆ зижди́телѧ всѣ́хъ и҆ гдⷭ҇а , и҆ ѻ҆́ч҃ее сло́во и҆ мꙋ́дрᲂсть , сꙋ́щественѣ и҆ сра́сленѣ сꙋ́ща , ты̀ бг҃ᲂсло́вилъ є҆сѝ свѣ́тлѡ , мᲂлѧ̀ непреста́й спастѝ , и҆́же вѣ́рᲂю тѧ̀ бг҃ᲂгла́се хва́лѧщїѧ . Трꙋды̀ пᲂтѧ́щасѧ дх҃о́вными , и҆ ᲂу҆се́рднѡ на лѣ́та бᲂрѧ́щасѧ є҆гѡ̀ ра́ди с̾ дꙋхᲂбо́рцы , зрѧ̀ бл҃гі́и ст҃ы́и дх҃ъ вѣнча̀ , ꙗ҆́кѡ пᲂбѣди́телѧ , прїѧ́тъ дᲂсто́йнѡ , и҆ с̾ вы́шними пребл҃же́нне ликᲂстᲂѧ́нїи причте́тѧ . По́двиги пᲂдъѧ́лъ є҆сѝ бл҃гі́и , и҆ тече́нїе скᲂнча́въ до́брᲂе , и҆ пра́вѣй вѣ́рѣ наꙋчи́въ бл҃гᲂче́стнѡ , пра́ведныи вѣне́цъ ѿ всѣ́хъ сᲂдѣ́телѧ прїѧ́лъ є҆сѝ бг҃ᲂно́сне . сᲂбо́ра ᲂу҆чи́тельми , пѣ́ньми к̾ пѣ́нїю ѿсыла́емь . боⷢ҇ . Оу҆до́бнѡ бцⷣе , прейтѝ житїѧ̀ пᲂда́ждь мѝ бꙋ́рю напа́стей . настᲂѧ́нїѧ страсте́й , ꙗ҆́кѡ бл҃га ᲂу҆крᲂтѧ́щи , и҆ наставлѧ́ющи къ дᲂбрᲂдѣ́тели . и҆ стезѝ пра́вᲂсти . да ꙗ҆́кѡ бл҃гᲂда́тельницꙋ непреста́ннѡ велича́ю тѧ̀ .

Въ то́йже дн҃ь преставле́нїе и҆́же во ст҃ы́хъ ѻ҆ц҃а на́шегѡ а҆леѯі́ѧ , митрᲂпᲂли́та мᲂско́вскагѡ и҆ всеѧ̀ рꙋсі́и чꙋдᲂтво́рца . =На ма́лѣй вече́рни , на гдⷭ҇и вᲂзва́хъ , стихѣ́ры . гла́с̾ , и҃ . Бл҃же́нне ст҃лю а҆леѯі́е , ты̀ слᲂвесѐ гла́съ а҆́бїе вᲂспрїи́мᲂвавъ , ѡ҆ тѣле́сныхъ небре́глъ є҆сѝ , ᲂу҆го́дїѧхъ сво́йства . ѡ҆ста́вивъ бо житїѧ̀ мѧте́жь , и҆ мы́сленᲂе преше́дъ мо́ре . и҆ бл҃гᲂче́стїѧ ᲂу҆че́нїи , и҆ гремѣ́нїи преми́рными , хрⷭ҇тꙋ̀ пᲂслꙋжи́лъ є҆сѝ , бг҃ᲂбл҃же́нне . =вⷤ . Ѽ пречⷭ҇тны́и ѻ҆́ч҃е чꙋдᲂно́сче а҆леѯі́е премꙋ́дре , ты̀ и҆́нᲂческимъ житїе́мъ бг҃ꙋ ᲂу҆гᲂди́лъ є҆сѝ . тѧ́ бо бг҃ъ пре́жде и҆збра̀ ѿ ю҆́нᲂсти ѻ҆́ч҃е , па́стырѧ ѻ҆вца́мъ слᲂве́снымъ , и҆ ᲂу҆чи́телѧ вели́ка . ты̀ сщ҃е́нникѡмъ наказа́тель ꙗ҆ви́сѧ , и҆ все́й странѣ̀ рꙋ́с̾стѣй ѕвѣзда̀ пресвѣ́тлаѧ , ѡ҆сїѧва́ющи чꙋдесы̀ всѣ́хъ , вѣ́рᲂю припа́дающихъ к̾ ра́цѣ мᲂще́й твᲂи́хъ . тѣ́мъ первᲂст҃ль ли́къ тѧ вᲂспрїѧ́тъ . с̾ни́ми же мᲂли́сѧ , прᲂсѧ̀ ста́дꙋ свᲂемꙋ̀ грѣхо́мъ ѡ҆ставле́нїѧ . Пребл҃же́нне ѻ҆́ч҃е ст҃лю а҆леѯі́е , цѣли́телю бᲂлѧ́щимъ , в̾ ско́рбѣхъ сꙋ́щимъ ᲂу҆тѣше́нїе . ты́ бо непрезрѣ́лъ є҆сѝ сле́зъ ѡ҆би́димагѡ , к̾ ра́цѣ твᲂе́й припа́дающа . ты̀ со́ннымъ ꙗ҆вле́нїемъ раз̾сла́блена сᲂтвᲂри́лъ є҆сѝ , рꙋ́цѣ и҆ но́зѣ ᲂу҆терпи́лъ є҆сѝ ѡ҆би́дѧщемꙋ , гл҃ѧ а҆́ще в̾ско́рѣ не ѿда́си сᲂкро́вища и҆́скреннѧгѡ , не и҆́маши здра́въ вᲂста́ти со ѻ҆дра̀ . ѻ҆́нᲂмꙋ же в̾ско́рѣ с̾ пᲂкаѧ́нїемъ и҆ со слеза́ми , к̾честнѣ́й тѝ ра́цѣ припа́дшꙋ и҆сцѣле́нїе пᲂлꙋчѝ . и҆ всѣ́мъ и҆́же с̾вѣ́рᲂю пᲂчита́ющимъ па́мѧть твᲂю̀ , прᲂше́нїе пᲂдае́ши незави́стно . чꙋдᲂтво́рецъ же и҆менꙋ́ешисѧ , нарече́нїе ѿ дѣ́лъ прїе́мъ . сла́ва . гла́съ , то́йже . Прїиди́те рꙋ́с̾стїи сᲂбо́ри , весели́сѧ и҆ ра́дꙋисѧ пресла́вныи гра́де мᲂсква̀ . красꙋ́исѧ и҆ ра́дꙋисѧ цр҃кви бж҃їѧ , и҆ ди́вна в̾ пра́вдꙋ , в̾не́й же лежи́тъ ст҃а́ѧ ти ра́ка , ꙗ҆́же и҆́мать в̾ себѣ̀ да́ръ и҆сцѣле́нїѧ бл҃гᲂда́ти , честно́е тѣ́ло твᲂѐ , вели́кїи ст҃лю а҆леѯі́е чꙋдᲂтво́рче . тебѐ хрⷭ҇то́съ свѣти́ло вели́кᲂе пᲂказа̀ в̾ рꙋсѝ . ты̀ пᲂхвала̀ землѝ рꙋ́с̾стѣй . ты̀ защище́нїе . ты̀ сᲂкро́вище неи҆згᲂто́ваемо дарᲂва́нїи дх҃о́вныхъ , и҆ и҆сто́чникъ и҆сцѣле́нїи неи҆счерпа́емыхъ . тѣ́мъ и҆ мы̀ дне́сь с̾теце́мсѧ , и҆ сᲂста́вимъ ли́ки и҆ вᲂспᲂе́мъ гл҃юще , ра́дꙋисѧ сто́лпе и҆ ᲂу҆тверже́нїе цр҃кви . ра́дꙋисѧ с̾ первᲂст҃ли пред̾стᲂѧ̀ прⷭ҇то́лꙋ хрⷭ҇то́вꙋ . ра́дꙋисѧ свѣти́льниче всесвѣ́тлыи , и҆́же вѣ́рныѧ ѡ҆сїѧва́ѧ чꙋдесы̀ . но ᲂу҆́бѡ честны́и на́шъ ᲂу҆чи́телю , мᲂли́сѧ прилѣ́жнѡ хрⷭ҇тꙋ̀ бг҃ꙋ на́шемꙋ , є҆́же спасти́сѧ гра́дꙋ твᲂемꙋ̀ не навѣ́тꙋемꙋ . и҆ ны́нѣ , боⷢ҇ .

На стихо́внѣ , стихѣ́ры . гла́съ , в҃ . поⷣ . до́ме є҆в̾фра́фᲂвъ . Ст҃лю бг҃ᲂно́се ,꙳ ты̀ ꙗ҆ви́сѧ ꙳ ѿ млады́хъ нᲂгте́й ,꙳ сᲂсꙋ́дъ ѡ҆сщ҃е́нъ а҆леѯі́е ,꙳ и҆ жили́ще прест҃а́гѡ дх҃а .

сти́х̾ : сщ҃е́нницы твᲂѝ ѡ҆блекꙋ́тсѧ в̾ пра́вдꙋ ,꙳ и҆ прпⷣбнїи твᲂѝ вᲂз̾ра́дꙋютсѧ . Ст҃лемъ пᲂхвала̀ ,꙳ и҆ сщ҃е́нникѡмъ сла́ва ,꙳ пра́вило и҆́нᲂкꙋющимъ ,꙳ а҆леѯі́е бл҃же́нне ,꙳ ра́дꙋисѧ цр҃кви ᲂу҆тверже́нїе .

сти́хъ : бл҃же́нъ мꙋ́жь бᲂѧ́исѧ гдⷭ҇а ,꙳ въ за́пᲂвѣдехъ є҆гѡ̀ вᲂсхо́щетъ ѕѣлѡ̀ . Оу҆слы́ши мᲂле́нїе ча́дъ свᲂи́хъ ,꙳ ѻ҆́ч҃е ст҃лю а҆леѯі́е ,꙳ и҆ сле́зъ непремᲂлчѝ .꙳ и҆ серде́чнаѧ прᲂше́нїѧ ꙳ пᲂдава́й лю́бѧщимъ тѧ̀ . сла́ва , и҆ ны́нѣ , боⷢ҇ . Ѡ҆бра́дᲂваннаѧ ра́дꙋисѧ ,꙳ ꙗ҆́же ра́дᲂсть ми́рꙋ ро́ждьши ,꙳ хрⷭ҇та̀ жизнᲂда́вца .꙳ и҆ прамт҃рьнюю дв҃о ꙳ печа́ль ѿє́мшаѧ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , и҃ . Ꙗ҆́кѡ а҆пⷭ҇лѡмъ сᲂпрⷭ҇то́льна , и҆ врача̀ предᲂбра̀ , и҆ слꙋжи́телѧ бл҃гᲂпрїѧ́тна , к̾ ра́цѣ твᲂе́й честнѣ́й притека́ющїи , ст҃лю а҆леѯі́е бг҃ᲂмꙋ́дре чꙋдᲂно́сче , сᲂше́дшесѧ любо́вїю в̾ па́мѧть твᲂю̀ свѣ́тлѡ пра́зднꙋемъ , в̾ пѣ́снехъ и҆ пѣ́нїихъ ра́дꙋющесѧ . и҆ хрⷭ҇та̀ сла́вѧще , такᲂвꙋ́ю бл҃гᲂда́ть тебѣ̀ дарᲂва́вшагѡ и҆сцѣле́нїемъ . и҆ гра́дꙋ твᲂемꙋ̀ мᲂсквѣ̀ , вели́кᲂе ᲂу҆тверже́нїе . сла́ва , и҆ ны́нѣ , боⷢ҇ . И҆́же на́съ ра́ди рᲂжде́исѧ .= та́же , є҆=ктенїѧ̀ ма́лаѧ . ѿпꙋ́стъ .

На вели́цѣй вече́рни , блаже́нъ мꙋ́жь , а҃ , а҆нти фо́нъ . =На гдⷭ҇и вᲂзва́хъ , стихѣ́ры , на и҃ . гла́с̾ , є҃ . поⷣ . ра́дꙋйсѧ живᲂно́сныи . Р=а́дꙋисѧ пречⷭ҇тны́и а҆рхїєре́ю вели́кїи , а҆леѯі́е пребл҃же́нне . цр҃ко́вныи краси́телю , ст҃лемъ честно́е ᲂу҆дᲂбре́нїе . правᲂсла́внымъ мᲂли́твᲂю пᲂмᲂга́ѧ , землѝ рꙋ́с̾скїѧ вели́кᲂе ᲂу҆тверже́нїе , честны́и ᲂу҆чи́телю на́шъ . без̾по́мᲂщнымъ по́мᲂще , печа́льнымъ ᲂу҆тѣше́нїе ра́дᲂстнᲂе . мᲂле́бниче те́плыи всѣ́мъ скᲂрбѧ́щимъ , тмꙋ̀ неразꙋ́мїѧ ѿгᲂнѧ́ѧ . и҆ ко хрⷭ҇тꙋ̀ в̾ приста́нища ти́хаѧ прите́клъ є҆сѝ . в̾ ли́цѣ беспло́тныхъ пред̾стᲂѧ̀ , и҆ кра́сныѧ дᲂбро́ты влⷣчни наслажда́ешисѧ , и҆ срⷣца̀ бл҃гᲂчести́выхъ на пѣ́нїе вᲂз̾дви́глъ є҆сѝ . хрⷭ҇тꙋ̀ пᲂмᲂли́сѧ , дарᲂва́ти дш҃а́мъ на́шимъ ми́ръ и҆ ве́лїю млⷭ҇ть . Ра́дꙋисѧ свѣти́ло , всеѧ̀ рꙋ́с̾скїѧ митрᲂпо́лїи . ты́ бо дᲂбрᲂдѣ́телїю свѣ́тлѡ прᲂцвѣ́лъ є҆сѝ , ꙗ҆́кѡ ма́слина плᲂдᲂви́та в̾ дᲂмꙋ̀ бж҃їи , и҆ разли́чныѧ плᲂды̀ и҆знᲂсѧ̀ , бᲂга́тнѡ раздава́еши ста́дꙋ твᲂемꙋ̀ слᲂве́снᲂмꙋ . и҆ на па́житѣхъ дх҃о́вныхъ , тꙋ́чами твᲂи́хъ мл҃твъ напаѧ́еши . и҆сцѣле́нїѧ незави́стнѡ и҆стᲂча́еши , вѣ́рᲂю притека́ющимъ к̾ ра́цѣ мᲂще́й твᲂи́хъ , ст҃лю а҆леѯі́е . свѣщꙋ̀ свѣтлꙋ̀ себѐ ᲂу҆гᲂто́валъ є҆сѝ , и҆ во ѻ҆би́телехъ нбⷭ҇ныхъ всели́сѧ . и҆ трꙋ́дъ твᲂи́хъ вᲂз̾даѧ́нїѧ , вѣнцы̀ прїѧ́лъ є҆сѝ . не́далъ бо є҆сѝ сна̀ ѻ҆чи́ма свᲂи́ма , и҆ вѣ́кᲂма дрема́нїѧ , до́ндеже сно́мъ ѻ҆́бщимъ ᲂу҆снꙋ́лъ є҆сѝ прпⷣбне ст҃лю . хрⷭ҇тꙋ̀ пᲂмᲂли́сѧ , дарᲂва́ти дш҃а́мъ на́шимъ ми́ръ и҆ ве́лїю млⷭ҇ть . Ра́дꙋисѧ и҆ весели́сѧ а҆леѯі́е пресщ҃е́нныи , бл҃гᲂда́тныи прᲂпᲂвѣ́дниче , тве́рдыи ᲂу҆́ме . винᲂгра́да живо́тнагѡ ст҃ᲂпрᲂзѧ́бшїи гро́здъ , вино̀ и҆ска́пающїи , вѣ́рныхъ срⷣца̀ веселѧ́щее , ᲂу҆че́нїи медᲂто́чными . ст҃ᲂпᲂма́заннаѧ главо̀ , чⷭ҇тны́и на́шъ ᲂу҆чи́телю . прїидѝ пᲂсѣтѝ на́съ , ѡ҆ѕло́бленыхъ грѣхо́вными страстьмѝ . пᲂга́ныхъ де́рзᲂсть низ̾лᲂжѝ , прᲂти́вныхъ прᲂженѝ , ᲂу҆со́бныѧ бра́ни ᲂу҆крᲂтѝ , и҆ бᲂлѣ́зни и҆ недꙋ́ги всѧ́кїѧ ѡ҆блегчѝ . хрⷭ҇тꙋ̀ мᲂлѧ́сѧ , дарᲂва́ти дш҃а́мъ на́шимъ ми́ръ и҆ ве́лїю млⷭ҇ть . Ра́дꙋисѧ пресла́вныи гра́де мᲂсква̀ , красꙋ́исѧ и҆ весели́сѧ , си́цеваго и҆мѣ́ѧ бл҃гᲂда́ти и҆сто́чника неи҆счерпа́емаго , пребл҃же́ннаго и҆ чꙋдᲂнᲂси́ваго а҆леѯі́ѧ ст҃лѧ вели́кагѡ . и҆́же мꙋ́дрᲂстїю ст҃а́гѡ дх҃а ᲂу҆кра́шьшасѧ . и҆ ѿ ю҆́нᲂсти дᲂбрᲂдѣ́тельнагѡ ра́ди є҆гѡ̀ житїѧ̀ , сᲂсꙋ́дъ ст҃о́мꙋ дх҃ꙋ бы́въ пᲂще́нїи и҆ мл҃твами . сщ҃е́нства ма́стїю пᲂма́засѧ , и҆сцѣле́нїѧ да́ръ прїѧ́тᲂва ѿ всѣ́хъ цр҃ѧ хрⷭ҇та̀ бг҃а . и҆ по ст҃ѣ́мъ є҆гѡ̀ преставле́нїи , ѻ҆́трᲂка є҆́ле жи́ва сꙋ́ща , мт҃рїю принесе́на к̾ чⷭ҇тнѣ́й є҆гѡ̀ ра́цѣ , здра́ва сᲂтвᲂрѝ . и҆ до ны́нѣ и҆стᲂча́етъ и҆сцѣле́нїе неѡ҆скꙋ́днѡ , с̾ вѣ́рᲂю прихᲂдѧ́щимъ . и҆ хрⷭ҇тꙋ̀ мо́литсѧ , дарᲂва́ти дш҃а́мъ на́шимъ ми́ръ и҆ ве́лїю млⷭ҇ть .

и҆́ны , стихѣ́ры . гла́съ , в҃ . Кі́ими пѣ́снеными дᲂбро́тами , вᲂспᲂе́мъ ст҃лѧ ; хрⷭ҇то́ва ᲂу҆ста̀ ти́хаѧ , и҆ є҆ѵⷢ҇а́лїю є҆гѡ̀ прᲂпᲂвѣ́дника свѣ́тла . цр҃ко́внагѡ храни́телѧ , и҆ застꙋ́пника землѝ рꙋ́с̾стѣй , правᲂсла́внымъ пᲂбо́рника . є҆го́же мл҃твами , шата́нїѧ враго́мъ хрⷭ҇то́съ низ̾лᲂжѝ , и҆мѣ́ѧи ве́лїю млⷭ҇ть . двⷤа . Кі́ими бо́дреными ᲂу҆стна́ми , пᲂхва́лимъ ст҃лѧ ; хрⷭ҇то́вѣ цр҃кви краси́телѧ . петрꙋ̀ верхо́внᲂмꙋ ревни́телѧ , и҆ па́влꙋ наслѣ́дника . нра́вы пᲂдо́бѧщасѧ крⷭ҇тлю . петра̀ чꙋдᲂтво́рца рꙋ́с̾скагѡ сᲂпресто́льника . и҆ лꙋча̀ чꙋде́съ и҆спꙋща́юща ѡ҆би́льнѡ . и҆сцѣле́нїѧ пᲂдава́юща незави́стнѡ , всѣ́мъ прихᲂдѧ́щимъ с̾ вѣ́рᲂю , и҆ па́мѧть є҆гѡ̀ свѣ́тлѡ пра́зднꙋющимъ . вели́кагѡ застꙋ́пника землѝ рꙋ́с̾стѣй , и҆ ᲂу҆чи́телѧ а҆леѯі́ѧ ди́внагѡ чꙋдᲂтво́рца . и҆ правᲂсла́внымъ те́плаго пᲂсо́бника . є҆го́же ра́ди врагѝ хрⷭ҇то́съ низ̾лᲂжѝ , и҆мѣ́ѧи ве́лїю млⷭ҇ть . Кі́ими ᲂу҆краше́ными глаго́лы вᲂспᲂе́мъ ст҃лѧ , ди́внагѡ в̾ чꙋдесѣ́хъ а҆леѯі́ѧ , беспло́тнымъ сᲂжи́телѧ . ѡ҆сщ҃е́ннагѡ ѿ пеле́нъ . стᲂлпа̀ цр҃кви непᲂдви́жима . весе́лїе землѝ рꙋ́с̾стѣй . пра́вдѣ пра́вило , ѡ҆би́димымъ застꙋ́пника . немᲂщны́мъ врача̀ без̾ме́здна . є҆го́же ра́ди дарᲂва̀ хрⷭ҇то́съ , цр҃ква́мъ сᲂедине́нїе , и҆мѣ́ѧи ве́лїю млⷭ҇ть . сла́ва . гла́съ , ѕ҃ . Ст҃лемъ ᲂу҆дᲂбре́нїе , и҆ ѻ҆ц҃е́въ красᲂтꙋ̀ , и҆сто́чника чꙋдесе́мъ , землѝ рꙋ́с̾стѣй застꙋ́пника вели́ка , сᲂше́дшесѧ ѽ празднᲂлю́бцы , пѣ́снеными пᲂхвала́ми вᲂспᲂе́мъ гл҃юще . ра́дꙋисѧ а҆леѯі́е тве́рдыи ᲂу҆́ме , бл҃гᲂда́тїю и҆́стиннᲂю ѡ҆крᲂпле́нъ . ѿ ню́дꙋ же и҆ прїѧ́телище бы́сть прест҃а́гѡ дх҃а , чꙋдесе́мъ да́ръ вᲂспрїѧ́лъ є҆сѝ . и҆ ны́нѣ с̾ первᲂст҃ли пред̾стᲂѧ̀ прⷭ҇то́лꙋ хрⷭ҇то́вꙋ , мᲂли́сѧ ѡ҆ рабѣ́хъ свᲂи́хъ . и҆ ны́нѣ , боⷢ҇ . Кто̀ тебѐ небл҃жи́тъ . та́же , вы́хᲂдъ . прᲂки́менъ , дню̀ . =Ѿ =при́тчей , чте́нїе .

Па́мѧть пра́веднагѡ с̾ пᲂхвала́ми , и҆ блгⷭ҇ве́нїе гдⷭ҇не на главѣ̀ є҆гѡ̀ . бл҃же́нъ чл҃къ , и҆́же ѡ҆брѣ́те мꙋ́дрᲂсть , и҆ сме́ртенъ и҆́же ᲂу҆вѣ́дѣ ра́зꙋмъ . лꙋ́чше бо сїю̀ кꙋпᲂва́ти , не́жели зла́та и҆ сребра̀ сᲂкро́вища . честнѣ́йши бо є҆́сть ка́менїѧ мнᲂгᲂцѣ́нна , все́же чⷭ҇тно́е , недᲂсто́йнѡ є҆́сть є҆́й . дᲂлгᲂта́ бо дні́й , и҆ лѣ́та живᲂта̀ , в̾ десни́цѣ є҆ѧ̀ , и҆ в̾ шꙋ́ицѣ є҆ѧ̀ бᲂга́тство и҆ сла́ва . ѿ ᲂу҆́стъ бо є҆ѧ̀ и҆схо́дитъ пра́вда , зако́нъ же и҆ млⷭ҇ть , на ꙗ҆зы́цѣ но́ситъ . пᲂслꙋ́шайте ᲂу҆́бѡ менѐ , ѽ ча́да , честна́ѧ бо рекꙋ̀ , и҆ бл҃же́нъ чл҃къ , и҆́же пꙋтѝ мᲂѧ̀ храни́тъ . и҆схо́ди бо мᲂѝ , и҆схо́ди живᲂта̀ , и҆ ᲂу҆гᲂто́ваетсѧ хᲂтѣ́нїе ѿ́ гдⷭ҇а . сегѡ̀ ра́ди мᲂлю̀ ва́съ , и҆ пред̾лага́ю мо́й гла́съ сн҃ᲂво́мъ чл҃ческимъ . ꙗ҆́кѡ а҆́зъ премꙋ́дрᲂсть всели́хъ , сᲂвѣ́тъ и҆ ра́зꙋмъ , и҆ смы́слъ а҆́зъ призва́хъ . мо́й сᲂвѣ́тъ и҆ ᲂу҆тверже́нїе , мо́й ра́зꙋмъ , мᲂѧ́ же крѣ́пᲂсть . а҆́зъ менѐ лю́бѧщїѧ люблю̀ , и҆ взыска́ющїи менѐ ѡ҆брѧ́щꙋтъ бл҃гᲂда́ть . разꙋмѣ́йте ᲂу҆́бѡ неѕло́бивїи кᲂва́рство , ненака́занїи же прилага́йте срⷣца̀ . пᲂслꙋ́шайте менѐ и҆ па́ки , честна́ѧ бо рекꙋ̀ , и҆ ѿве́рзꙋ ѿ ᲂу҆сте́нъ мᲂи́хъ пра́вдꙋ . ꙗ҆́кѡ и҆́стинѣ пᲂꙋча́етсѧ гᲂрта́нь мо́й , ме́рзски же предо мно́ю ᲂу҆стны̀ лжи́выхъ . с̾ пра́вдᲂю всѝ гл҃ы ᲂу҆́стъ мᲂи́хъ , ни что́же в̾ ни́хъ стро́пᲂтно ни развращено̀ . всѧ̀ пра́ва сꙋ́ть разꙋмѣва́ющимъ и҆́стинꙋ , и҆ здра́ва ѡ҆брѣта́ющимъ ра́зꙋмъ . наꙋчꙋ́ бо ва́съ и҆́стинѣ , да бꙋ́детъ ѡ҆́ гдⷭ҇ѣ наде́жда ва́ша , и҆ и҆спо́лнитесѧ дх҃а .

Ѿ= при́тчей , чте́нїе .=

=Ѿ =ᲂу҆́стъ пра́веднагѡ ка́плетъ премꙋ́дрᲂсть , ꙗ҆зы́къ же непра́веднагѡ пᲂтреби́тсѧ . ᲂу҆сты̀ мꙋже́й пра́ведныхъ свѣ́дѧтъ бл҃гᲂда́ть , ᲂу҆ста́ же нечести́выхъ разᲂрѧ́тсѧ . мѣ́рила ле́стна ме́рзᲂсть пре́д̾ гдⷭ҇емъ , мѣ́рило же пра́ведно прїѧ́тнѡ є҆мꙋ̀ є҆́сть . и҆дѣ́же а҆́ще вни́детъ дᲂсажде́нїе , тꙋ̀ и҆ бесче́стїе . ᲂу҆ста̀ смире́ныхъ пᲂꙋча́тсѧ премꙋ́дрᲂсти , кᲂнчи́на же пра́ведныхъ наста́витъ и҆́хъ . и҆ пᲂпᲂлзнᲂве́нїе закᲂнᲂпрестꙋ́пникъ плѣни́тъ ѧ҆̀ . непо́льзꙋетъ и҆мѣ́нїе в̾ дн҃ь ꙗ҆́рᲂсти , пра́вда же и҆збавлѧ́етъ ѿ сме́рти . ᲂу҆мира́ѧ пра́ведныи , ѡ҆ставлѧ́етъ пᲂпече́нїе . ме́рзᲂстна же быва́етъ и҆ на́гла нечести́выхъ пᲂги́бель . пра́вда непᲂро́чнагѡ и҆справлѧ́етъ пꙋтѝ , нече́стїемъ же свᲂи́мъ па́даетъ без̾зако́нныи . пра́вда мꙋже́й пра́ведныхъ и҆збавлѧ́етъ и҆́хъ , без̾сᲂвѣ́тїемъ же ᲂу҆лᲂвлѧ́ютсѧ закᲂнᲂпрестꙋ́пнїи . скᲂнча́вшꙋсѧ мꙋ́жꙋ пра́веднꙋ , не ѡ҆скꙋдѣ́етъ наде́жда , хвала́ же нечести́выхъ пᲂтреби́тсѧ . пра́ведникъ ѿ лᲂви́твы и҆збѣ́гнетъ , вмѣ́сто же є҆гѡ̀ предае́тсѧ нечести́выи . во ᲂу҆стѣ́хъ закᲂнᲂпрестꙋ́пныхъ сѣ́ть гражда́нѡмъ , чꙋ́вство же пра́ведныхъ бл҃гᲂспѣ́шнѡ . во бл҃гᲂсти пра́ведныхъ и҆спра́витсѧ гра́дъ , и҆ въ пᲂги́бели нечести́выхъ ра́дᲂванїе . во бл҃гᲂслᲂве́нїи пра́ведныхъ вᲂзвы́ситсѧ гра́дъ , ᲂу҆сты́ же нечести́выхъ раскᲂпа́етсѧ . рꙋга́етсѧ гражда́нѡмъ лише́ныи ра́зꙋма . мꙋ́жь же мꙋ́дръ без̾мо́лвїе во́дитъ .

Ѿ премꙋ́дрᲂсти сᲂло́мᲂни , чте́нїе .

Пра́ведникъ а҆́ще пᲂсти́гнетъ скᲂнча́тисѧ , в̾ пᲂко́й бꙋ́детъ . ста́рᲂсть бо честна̀ не мнᲂгᲂлѣ́тна ни в̾ числѣ̀ лѣ́тъ и҆счита́етсѧ . сѣди́ны же сꙋ́ть , мꙋ́дрᲂсть чл҃кѡмъ . и҆ во́зрастъ ста́рᲂсти , житїѐ нескве́рно . бл҃гᲂꙋго́денъ бг҃ᲂви бы́въ , вᲂз̾лю́бленъ бы́сть . и҆ живы́и пᲂсредѣ̀ грѣ́шникъ , преста́вленъ бы́сть . вᲂсхище́нъ бы́сть , да не ѕло́ба и҆змѣни́тъ ра́зꙋма є҆гѡ̀ , и҆лѝ ле́сть прельсти́тъ дш҃ꙋ є҆гѡ̀ . раче́нїе бо ѕло́е , гꙋби́тъ до́браѧ , и҆ паре́нїе по́хᲂти , премѣнѧ́етъ ᲂу҆́мъ неѕло́бивъ . скᲂнча́всѧ в̾ ма́лѣ , и҆спо́лни лѣ́та мно́га , ᲂу҆го́дна бо бѣ̀ гдⷭ҇ви дш҃а є҆гѡ̀ . сего̀ ра́ди пᲂтща́сѧ ѿ среды̀ ѕло́бы . лю́дїе же ви́дѣвше и҆ неразꙋмѣ́вше , ни пᲂлᲂжи́ша в̾ пᲂмышле́нїи такᲂва́гѡ , ꙗ҆́кѡ бл҃гᲂда́ть и҆ млⷭ҇ть в̾ прпⷣбныхъ є҆гѡ̀ , и҆ пᲂсѣще́нїе во и҆збра́нныхъ є҆гѡ̀ .

На литі́и , стихѣ́ры . гла́съ , и҃ . Прпⷣбне ѻ҆́ч҃е ст҃лю а҆леѯі́е , а҆́ще каѧ̀ страна̀ , и҆лѝ кі́и гра́дъ мᲂлчи́тъ ; но всѝ и҆́же тᲂбо́ю прᲂсвѣще́нїи , чꙋде́съ твᲂи́хъ мно́жество слы́шаще и҆ ви́дѧще , и҆ мы̀ с̾ ни́ми пᲂхва́льными пѣ́сньми вᲂпїе́мъ и҆ глаго́лемъ , бл҃гᲂда́тїю прест҃а́гѡ дх҃а , хрⷭ҇то́вымъ а҆пⷭ҇лѡмъ пᲂдо́бникъ бы́лъ є҆сѝ , и҆ вселе́ннꙋю всю̀ прᲂсвѣща́еши . тѣ́мже и҆ до царѧ̀ дᲂи҆до́ша слᲂвеса̀ чꙋде́съ твᲂи́хъ ꙗ҆́кѡ лꙋча̀ , и҆ да́льнимъ ꙗ҆́кѡ бли́зъ сїѧ́юща . и҆ на́съ ѿ бѣ́дъ и҆ нахᲂдѧ́щихъ лю́тъ свᲂбᲂдѝ , твᲂи́ми мл҃твами . Кто̀ дᲂво́ленъ є҆́сть до́блестей твᲂи́хъ и҆счестѝ прпⷣбне ѻ҆́ч҃е трꙋды̀ ; кто́ бо слы́ша без̾мѣ́рнᲂе твᲂѐ смире́нїе , и҆ терпѣ́нїе и҆ чадᲂлю́бїе не ᲂу҆диви́тсѧ ; ка́кѡ ᲂу҆́бѡ не ᲂу҆сꙋмнѣ́всѧ ни ма́лѡ , є҆гда̀ слы́ша прᲂше́нїе царѧ̀ без̾зако́нна . да мѝ по́слеши речѐ ѻ҆́нᲂго , бᲂльны́мъ здра́вїе пᲂдава́ющагѡ , и҆ слѣпы́мъ прᲂзрѣ́нїе , и҆ хрᲂмы́мъ тече́нїе , и҆ бѣсᲂво́мъ прᲂгᲂни́телѧ . да мѝ сегѡ̀ по́слеши , да ᲂу҆мо́литъ свᲂегѡ̀ бг҃а , и҆ и҆сцѣли́тъ мᲂю̀ цари́цꙋ , ѿжене́тъ бѣ́са , и҆ ѻ҆́чи прᲂсвѣти́тъ . ѽле прᲂше́нїѧ , превᲂсхᲂдѧ́ща чл҃ческїѧ ра́зꙋмы . ѽ ди́вство бра́тїе , кто̀ не ᲂу҆диви́тсѧ ; и҆лѝ кто̀ непᲂхва́литъ , крѣ́пкагѡ сегѡ̀ хра́бреника ; не то́кмо бо не ᲂу҆сꙋмнѣ́сѧ , но и҆ сꙋ́щихъ с̾ни́мъ пᲂд̾крѣплѧ́ѧ гл҃аше , пᲂжди́те нескᲂрби́те , но ᲂу҆пᲂва́нїе вᲂз̾лᲂжи́те на́ бг҃а , и҆ на пречⷭ҇тꙋю є҆гѡ̀ мт҃рь , и҆ ᲂу҆́зрите сла́вꙋ бж҃їю . Бл҃га́гѡ ᲂу҆чи́телѧ хрⷭ҇та̀ , бл҃гі́и ᲂу҆чени́къ ст҃лю хрⷭ҇то́въ а҆леѯі́е . до́брᲂмꙋ па́стырю хрⷭ҇тꙋ̀ пᲂревнᲂва́лъ є҆сѝ , дш҃ꙋ свᲂю̀ пᲂлага́ѧ за ѻ҆вца̀ . и҆ царе́во свирѣ́пство , ꙗ҆́кѡ льво́во ѕїѧ́нїе во ѻ҆́вчꙋю кро́тᲂсть премѣни́лъ є҆сѝ . и҆ цари́цꙋ и҆сцѣли́лъ є҆сѝ . и҆ ста́дꙋ свᲂемꙋ̀ ско́рбь на ра́дᲂсть прелᲂжи́лъ є҆сѝ . и҆ цр҃кви ми́ръ ᲂу҆стро́илъ є҆сѝ . вели́каго же кн҃зѧ вᲂз̾весели́лъ є҆сѝ . тѣ́мъ мо́лимтисѧ , мᲂлѝ ѡ҆ на́съ чл҃кᲂлю́бца влⷣкꙋ хрⷭ҇та̀ , да спасе́тъ дш҃а на́ша . сла́ва . гла́съ , ѕ҃ . Є҆гда̀ прїи́де ѿ царѧ̀ , ми́ръ цр҃ко́вныи ѻ҆́ч҃е нᲂша́ше , тᲂгда̀ ст҃лїе , и҆ цр҃ко́внїи сᲂбо́ри и҆ наро́ди , ра́дᲂстнѡ срѣта́хꙋ тѧ̀ , свᲂбᲂди́телѧ бл҃гᲂда́рнѡ нарица́хꙋ , ѻ҆́вїи же ꙗ҆́кѡ пᲂбѣди́телю да́ры нᲂсѧ́ще , ра́дᲂстїю пᲂкланѧ́хꙋсѧ . кн҃зь же вели́кїи дими́трїи , со слеза́ми вᲂпїѧ́ше тѝ . ѽ влⷣко что́ ти вᲂз̾да́мы прᲂти́вꙋ трꙋдꙋ̀ твᲂемꙋ̀ , и҆́мже на́мъ ми́ръ дарᲂва́лъ є҆сѝ . но ᲂу҆́бѡ ст҃лю а҆леѯі́е , мᲂли́сѧ прилѣ́жнѡ , хрⷭ҇тꙋ̀ бг҃ꙋ на́шемꙋ , ꙗ҆́кѡ спасти́сѧ гра́дꙋ твᲂемꙋ̀ невᲂева́нꙋ . и҆ ны́нѣ , боⷢ҇ . По́сланъ бы́сть с̾ нб҃сѐ а҆рха́гг҃лъ гаврїи́лъ , бл҃гᲂвѣсти́ти дв҃ѣй зача́тїе . и҆ прише́дъ в̾ назаре́тъ , пᲂмышлѧ́ше в̾ себѣ̀ , чꙋдесѝ ᲂу҆дивлѧ́ѧсѧ . ѽ ка́кѡ и҆́же в̾ вы́шнихъ непᲂсти́жимъ сы́и ѿ дв҃ы ражда́етсѧ . и҆мѣ́ѧи прⷭ҇то́лъ нб҃о , и҆ пᲂд̾но́жїе зе́млю , во ᲂу҆тро́бꙋ дв҃чꙋ вмѣща́етсѧ . на́ньже шестᲂкрила́тїи , и҆ мнᲂгᲂѡ҆чи́тїи зрѣ́ти немо́гꙋтъ , сло́вᲂмъ є҆ди́нѣмъ ѿ сеѧ̀ вᲂплᲂти́тисѧ бл҃гᲂи҆зво́ли . бж҃їе є҆́сть сло́во настᲂѧ́щее . что̀ ᲂу҆́бѡ стᲂю̀ , и҆ не гл҃ю дв҃цѣ ; ра́дꙋисѧ ѡ҆бра́дᲂваннаѧ гдⷭ҇ь с̾ тᲂбо́ю . ра́дꙋисѧ чⷭ҇таѧ дв҃о . ра́дꙋисѧ невѣ́сто неневѣ́стнаѧ . ра́дꙋисѧ мт҃и живᲂтꙋ̀ , бл҃гᲂслᲂве́нъ пло́дъ чре́ва твᲂегѡ̀ .

На стихо́внѣ , стихѣ́ры . гла́съ , в҃ . поⷣ . до́ме є҆в̾фра́фᲂвъ . До́мъ ст҃а́гѡ дх҃а ,꙳ и҆ вселе́нїе бл҃гᲂда́ти ,꙳ а҆леѯі́и ꙗ҆ви́сѧ .꙳ и҆ ны́нѣ в̾ па́мѧть є҆гѡ̀ сᲂше́дшесѧ ,꙳ тᲂгѡ̀ вᲂспᲂе́мъ .

сти́хъ : вᲂсхва́лѧтсѧ прпⷣбнїи во сла́вѣ ,꙳ и҆ вᲂз̾ ра́дꙋютсѧ на ло́жахъ свᲂи́хъ . Ты̀ є҆сѝ ст҃лемъ пᲂхвала̀ ,꙳ сщ҃е́нникѡмъ ᲂу҆дᲂбре́нїе ,꙳ и҆́нᲂкѡмъ пра́вило .꙳ и҆ мы́ ти вᲂпїе́мъ ст҃лю а҆леѯі́е ,꙳ ра́дꙋисѧ цр҃кви ᲂу҆тверже́нїе .

сти́х̾ : сщ҃е́нницы твᲂѝ ѡ҆блекꙋ́тсѧ в̾ пра́вдꙋ ,꙳ и҆ прпⷣбнїи твᲂѝ вᲂз̾ра́дꙋютсѧ . Прїимѝ ны́нѣ пѣ́нїе ,꙳ ча́дъ твᲂи́хъ ѻ҆́ч҃е ,꙳ вѣ́рᲂю пра́зднꙋющихъ .꙳ и҆ лю́бѧщимъ тѧ̀ пᲂдава́й ,꙳ ꙗ҆́же напо́льзꙋ прᲂше́нїѧ . сла́ва . гла́с̾ , ѕ҃ . Бл҃гі́и ра́бе до́брыи и҆ вѣ́рныи , дѣ́лателю винᲂгра́да хрⷭ҇то́ва , ты̀ тѧгᲂтꙋ̀ дневнꙋ́ю пᲂне́слъ є҆сѝ , и҆ да́нныи тѝ тала́нтъ вᲂз̾расти́лъ є҆сѝ , и҆ по тебѣ̀ прише́дшимъ незави́дѣлъ є҆сѝ . тѣ́мже врата̀ нбⷭ҇наѧ ѿверзо́шатисѧ , в̾ни́ди в̾ ра́дᲂсть гдⷭ҇а свᲂегѡ̀ , и҆ мᲂлѝ ѡ҆ на́съ ст҃лю а҆леѯі́е . и҆ ны́нѣ , боⷢ҇ . Твᲂре́цъ и҆ и҆зба́витель .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , ст҃лю , двⷤа . и҆ бцⷣе дв҃о ра́дꙋисѧ ,= аⷤ .=

На ᲂу҆́трени , на бг҃ъ гдⷭ҇ь , трᲂпа́рь , ст҃лю , двⷤа . сла́ва , и҆ ны́нѣ , боⷢ҇ , вᲂскрⷭ҇нъ . =По а҃ , стихᲂло́гїи , сѣда́ленъ . гла́съ , и҃ . Наста̀ свѣтᲂно́сныи дн҃ь , чꙋдᲂтво́рца а҆рхїєпⷭ҇кпа а҆леѯі́ѧ па́мѧть . прїиди́те сᲂше́дшесѧ пра́зднꙋемъ свѣ́тлѡ , и҆ сᲂста́вимъ ли́ки , пᲂхвала́ми пᲂчте́мъ є҆гѡ̀ , и҆ рце́мъ є҆мꙋ̀ . ра́дꙋисѧ честны́и свѣти́льниче рꙋ́с̾скїѧ землѝ . и҆стᲂча́еши бо чꙋдеса̀ , и҆ и҆злива́еши и҆сцѣле́нїѧ , и҆ мо́лишисѧ ѡ҆ дш҃а́хъ на́шихъ . =двⷤа . сла́ва , и҆ ны́нѣ , боⷢ҇ . Да сво́й па́ки сᲂзи́ждеши ѻ҆́бразъ , и҆стлѣ́вшїи страстьмѝ сп҃се , нбⷭ҇ныхъ ᲂу҆таи́всѧ сꙋ́ществъ , вᲂплᲂти́сѧ ѿ дв҃ы . є҆́й же сᲂгла́снѡ вᲂзᲂпїе́м̾ , ра́дꙋисѧ ѡ҆бра́дᲂваннаѧ гдⷭ҇ь с̾тᲂбо́ю .

По в҃ , стихᲂло́гїи , сѣда́ленъ . гла́съ , д҃ . Прїиди́те тᲂржествꙋ́емъ свѣ́тлѡ , пра́зднꙋющїи па́мѧть ст҃лѧ а҆леѯі́ѧ чꙋдᲂтво́рца . преста́вибᲂсѧ ѿ землѝ , къ невеще́ственымъ ѻ҆би́телемъ , и҆дѣ́же зри́тъ дᲂбро́тꙋ неи҆зрече́ннꙋю , а҆́гг҃льскимъ во́инствᲂмъ сᲂбесѣ́дникъ ꙗ҆́вльсѧ . тѣ́мже со а҆пⷭ҇лы и҆ мч҃нки ликꙋ́ѧ , ѻ҆́ч҃е на́шъ а҆леѯі́е прпⷣбне , прилѣ́жнѡ мᲂли́сѧ влⷣцѣ хрⷭ҇тꙋ̀ , ѡ҆ чтꙋ́щихъ вѣ́рᲂю па́мѧть твᲂю̀ . двⷤа . сла́ва , и҆ ны́нѣ , боⷢ҇ . Стѣна̀ непᲂбѣди́маѧ на́мъ хрⷭ҇тїѧ́нѡмъ є҆сѝ , бцⷣе дв҃о . к̾ тебѣ́ бо прибѣга́юще , невреди́ми пребыва́емъ . и҆ па́ки сᲂгрѣша́юще , и҆́мамы тѧ̀ мᲂли́твеницꙋ . тѣ́мъ бл҃гᲂдарѧ́ще вᲂпїе́мъ ти , ра́дꙋисѧ ѡ҆бра́дᲂваннаѧ гдⷭ҇ь с̾ тᲂбо́ю .

По пᲂлїєлеѡ́сѣ , сѣда́ленъ . гла́съ , и҃ . Прᲂпᲂвѣ́дꙋетъ ѻ҆́ч҃е твᲂѧ̀ чꙋдеса̀ ны́нѣ рꙋ́с̾скаѧ митрᲂпо́лїѧ , и҆ всѧ̀ ѻ҆те́чествїѧ и҆ страны̀ чꙋдᲂдѣ́йствїѧ . и҆́миже всѧ̀ ѿ бᲂлѣ́зней ско́рбныхъ и҆зба́ви , бг҃ᲂбл҃же́нне а҆леѯі́е . пита́телю в̾дᲂви́цамъ , и҆ си́рымъ ѻ҆ц҃ъ . пᲂмо́щникъ в̾ ско́рби всеи҆зрѧ́денъ , пла́чꙋщимъ ᲂу҆тѣше́нїе . па́стырь и҆ наста́вникъ всѣ́мъ блꙋдѧ́щимъ , а҆леѯі́е прпⷣбне . и҆ на́съ твᲂи́ми мл҃твами ѿ бѣ́дъ и҆зба́ви . и҆ мᲂли́сѧ хрⷭ҇тꙋ̀ бг҃ꙋ , да грѣхо́мъ ѡ҆ставле́нїе пᲂда́стъ , вѣ́рᲂю и҆ любо́вїю чтꙋ́щимъ ст҃ꙋ́ю па́мѧть твᲂю̀ . двⷤа . сла́ва , и҆ ны́нѣ , боⷢ҇ . Ра́дꙋисѧ ꙗ҆́же ѿ а҆́гг҃ла ра́дᲂсть прїе́мшаѧ . ра́дꙋисѧ ро́ждьшаѧ твᲂрца̀ тва́ри . ра́дꙋисѧ спᲂдо́бльшаѧсѧ бы́ти мт҃и хрⷭ҇тꙋ̀ бг҃ꙋ .

степе́нна , д҃ го гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . честна̀ пре́д̾ гдⷭ҇емъ , сме́рть прпⷣбныхъ є҆гѡ̀ . сти́хъ . что̀ вᲂз̾да́мъ гдⷭ҇ви ѡ҆ всѣ́хъ , и҆́хже вᲂз̾да́стъ ми . всѧ́ко дыха́нїе . є҆ѵⷢ҇а́лїе , ѿ =і҆ѡа́нна . заⷱ҇ , л҃ѕ . ѱ=ало́мъ , н҃ .

сла́ва . мᲂли́твъ ра́ди ст҃лѧ . и҆ ны́нѣ . мᲂли́твъ ра́ди бцⷣы . пᲂми́лꙋй мѧ бж҃е . стихѣ́ра . гла́съ , ѕ҃ . Є҆гда̀ прїи́де ѿ царѧ̀ , ми́ръ цр҃ко́вныи ѻ҆́ч҃е нᲂша́ше , тᲂгда̀ ст҃лїе , и҆ цр҃ко́внїи сᲂбо́ри и҆ наро́ди , ра́дᲂстнѡ срѣта́хꙋ тѧ̀ , свᲂбᲂди́телѧ бл҃гᲂда́рнѡ нарица́хꙋ , ѻ҆́вїи же ꙗ҆́кѡ пᲂбѣди́телю да́ры нᲂсѧ́ще , ра́дᲂстїю пᲂкланѧ́хꙋсѧ . кн҃зь же вели́кїи дими́трїи , со слеза́ми вᲂпїѧ́ше тѝ . ѽ влⷣко что́ ти вᲂз̾да́мы прᲂти́вꙋ трꙋдꙋ̀ твᲂемꙋ̀ , и҆́мже на́мъ ми́ръ дарᲂва́лъ є҆сѝ . но ᲂу҆́бѡ ст҃лю а҆леѯі́е , мᲂли́сѧ прилѣ́жнѡ , хрⷭ҇тꙋ̀ бг҃ꙋ на́шемꙋ , ꙗ҆́кѡ спасти́сѧ гра́дꙋ твᲂемꙋ̀ невᲂева́нꙋ .

Кано́нъ , бцⷣѣ . со і҆рмᲂсо́мъ , на́ ѕ҃ . и҆ ст҃о́мꙋ на и҃ . кано́нъ , и҃ . пѣ́снь , а҃ . і҆рмо́съ . Вᲂѡ҆рꙋже́на фараѡ́на пᲂгрꙋзѝ , чꙋдᲂтвᲂрѧ́й дре́вле , мѡѷсе́йскїи же́ѕлъ крⷭ҇тᲂѡ҆бра́знѡ прᲂразѝ , и҆ раздѣлѝ мо́ре . і҆и҃лѧ же бѣжа́ща , пѣ́ша хᲂдѧ́ща спасѐ , пѣ́снь бг҃ᲂви вᲂз̾сыла́юща .

запѣ́в̾ : Ст҃лю хрⷭ҇то́въ а҆леѯі́е , мᲂлѝ бг҃а ѡ҆ на́съ . Вᲂѡ҆рꙋжѝ на́ша пᲂмышле́нїѧ бл҃гᲂда́телю гдⷭ҇и , ѡ҆бꙋрева́емыхъ печа́льными наведе́нїи напа́стныхъ ѻ҆́блакъ . да бл҃гᲂда́тїю твᲂе́ю наставлѧ́еми , вᲂзмо́жемъ ᲂу҆мᲂли́ти твᲂегѡ̀ ᲂу҆го́дника ст҃лѧ а҆леѯі́ѧ , хᲂда́таѧ те́пла и҆ мᲂли́твеника ѿ нахᲂдѧ́щихъ на ны̀ . Ѻ҆тѧгче́ныхъ на́съ мно́гими грѣхѝ , ѡ҆блегчѝ бл҃гᲂда́тїю хрⷭ҇то́вᲂю ст҃лю а҆леѯі́е . ѡ҆чи́сти ꙗ҆зы́къ же и҆ срⷣце твᲂи́хъ пѣве́цъ , ꙗ҆́кѡ да вᲂзмо́жемъ дᲂсто́йнѡ , пѣ́снь принестѝ тебѣ̀ .= сла́ва . Вᲂѡ҆рꙋжи́всѧ дх҃ᲂмъ , ст҃лю хрⷭ҇то́въ чꙋдᲂтво́рче а҆леѯі́е . ᲂу҆слы́ши гла́сы на́ша , и҆ ᲂу҆мᲂлѝ чл҃кᲂлю́бца гдⷭ҇а , пᲂбѣ́дꙋ на врагѝ на́мъ дарᲂва́ти , и҆ грѣхо́въ ѿпꙋще́нїе , и҆ житїю̀ и҆справле́нїе . твᲂе́ бо є҆смы̀ ста́до . и҆ ны́нѣ , боⷢ҇ . В=ᲂѡ҆рꙋжи́всѧ дх҃ᲂмъ чⷭ҇таѧ , вᲂспѣ́тъ тѧ̀ и҆нᲂгда̀ дв҃дъ тво́й пра́ѻ҆ц҃ъ , пᲂслꙋ́шай дщѝ ра́дᲂванна гла́са ѿ а҆́гг҃ла . ра́дᲂсть бо вᲂзвѣща́етъ тѝ неи҆з̾гл҃аннꙋю .

катава́сїѧ : Ѿве́рзꙋ ᲂу҆ста̀ мᲂѧ̀ .

пѣ́снь , г҃ . і҆рмо́съ . Нбⷭ҇нᲂмꙋ крꙋ́гꙋ верхᲂтво́рче гдⷭ҇и , и҆ цр҃кви зижди́телю , ты̀ менѐ ᲂу҆твердѝ в̾ любвѝ свᲂе́й . жела́нїемъ сы́и кра́й , и҆ вѣ́рнымъ ᲂу҆тверже́нїе , є҆ди́не чл҃кᲂлю́бче . Нбⷭ҇нᲂмꙋ крꙋ́гꙋ и҆ все́й тва́ри гдⷭ҇ь , всевѣ́дыи бг҃ъ , пре́жде зача́тїѧ во ᲂу҆тро́бѣ ѡ҆сщ҃а́етъ тѧ̀ , цр҃кви свᲂе́й прави́телѧ , и҆ дш҃а́мъ па́стырѧ и҆зрѧ́дна . и҆ в̾вѣрѧ́етъ тебѣ̀ свᲂѐ ста́до , ꙗ҆́кᲂже и҆ петро́ви , а҆леѯі́е ст҃лю хрⷭ҇то́въ . Нбⷭ҇нᲂмꙋ крꙋ́гꙋ пᲂзна́въ твᲂрца̀ , жеѕло́мъ вᲂз̾держа́нїѧ страсте́й мо́ре и҆з̾сꙋши́лъ є҆сѝ бл҃же́нне . и҆ на без̾стра́стїѧ го́рꙋ вᲂстечѐ , разꙋ́мныѧ скрижа́ли прїѧ́лъ є҆сѝ . и҆ зако́нꙋ дх҃о́внᲂмꙋ цр҃квь хрⷭ҇то́вꙋ наꙋчи́лъ є҆сѝ . сла́ва . Къ нбⷭ҇нᲂмꙋ крꙋ́гꙋ вᲂз̾летѣ́лъ є҆сѝ , крило́ма бг҃ᲂразꙋ́мїѧ . и҆ ѿ тꙋ́дꙋ ᲂу҆вѣ́дѣлъ є҆сѝ , в̾ трⷪ҇цѣ є҆ди́нагѡ бг҃а . и҆ пᲂсредѝ цр҃кве вᲂспѣ́лъ є҆сѝ , трⷪ҇цꙋ ли́цы , є҆ди́ницꙋ же сꙋщество́мъ . тѣ́мъ прїѧ́лъ є҆сѝ чꙋде́съ да́ръ ѿ́ бг҃а , прпⷣбне ст҃лю а҆леѯі́е . и҆ ны́нѣ , боⷢ҇ . Съ нбⷭ҇ныхъ крꙋ́гъ слетѣ́въ гаврїи́лъ а҆рха́гг҃елъ , речѐ пречⷭ҇тѣй , бжⷭ҇твенныи сᲂвѣ́тъ пᲂвѣ́дати тѝ по́сланъ є҆́смь . что́ сѧ менѐ бᲂи́ши пренепᲂро́чнаѧ , па́че тебѐ бᲂѧ́щагᲂсѧ ; что́ ми гᲂвѣ́еши влⷣчце , гᲂвѣ́ющемꙋ тебѣ̀ че́стнѡ .

катава́сїѧ : Твᲂѧ̀ пѣвцы̀ .

сѣда́ленъ . гла́съ , и҃ . Пᲂче́рплъ є҆сѝ ѿ сᲂсꙋ́да и҆з̾бра́ннагѡ , неи҆зрече́ннаѧ прпⷣбне . цр҃квь хрⷭ҇то́вꙋ сᲂблю́лъ є҆сѝ , ѿ всѧ́кїѧ є҆́реси не пᲂкᲂлѣби́мꙋ , и҆ ѻ҆́блаки є҆́рес̾скїѧ раз̾гна́лъ є҆сѝ . тѣ́мъ в̾вы́шнихъ ра́дꙋѧсѧ наслажда́ешисѧ ѻ҆́ч҃е прпⷣбне пребл҃же́нне , ст҃лю хрⷭ҇то́въ а҆леѯі́е . мᲂлѝ хрⷭ҇та̀ бг҃а , грѣхо́въ ѡ҆ставле́нїе дарᲂва́ти , пра́зднꙋющимъ любо́вїю ст҃ꙋ́ю па́мѧть твᲂю̀ . вⷤ . сла́ва , и҆ ны́нѣ , боⷢ҇ . Пᲂвелѣ́ннᲂе та́инство прїи́мъ в̾ ра́зꙋмѣ , в̾ кро́вѣ і҆ѡ́сифᲂвѣ ско́рѡ пред̾ста̀ беспло́тныи , гл҃ѧ неи҆скꙋ́снѣй бра́кꙋ . преклᲂне́и с̾хᲂжде́нїемъ нб҃са̀ , в̾мѣща́етсѧ неи҆з̾мѣ́ннѡ ве́сь в̾ тѧ̀ . є҆го́же и҆ ви́дѧ в̾ лᲂжесна́хъ твᲂи́хъ прїи́мша ра́бїи зра́къ , ᲂу҆жаса́юсѧ зва́ти ти , ра́дꙋисѧ невѣ́сто неневѣ́стнаѧ .

пѣ́снь , д҃ . і҆рмо́съ . Ты́ ми хрⷭ҇тѐ гдⷭ҇ь , ты́ же и҆ си́ла ми , ты́ ми бг҃ъ , ты́ ми ра́дᲂванїе . не ѡ҆ста́вль нѣ́дра ѻ҆́ч҃а , но ми́лᲂстїю си на́шꙋ нищетꙋ̀ пᲂсѣти́въ . тѣ́мъ съ прᲂро́кѡмъ а҆вва́кꙋмᲂмъ зᲂвꙋ̀ , си́лѣ твᲂе́й сла́ва чл҃кᲂлю́бче . Ты́ ми хрⷭ҇тѐ гдⷭ҇ь , ты́ же ми и҆ си́ла , вᲂпїѧ̀ сы́и и҆спо́лнь бж҃їѧ дх҃а , а҆леѯі́е сщ҃е́нныи ѻ҆́ч҃е . лꙋка́выѧ дꙋ́хи ѿгна́лъ є҆сѝ , ѿ прихᲂдѧ́щихъ с̾ вѣ́рᲂю чⷭ҇тнѣ́й ра́цѣ твᲂе́й . хрᲂмы́мъ тече́нїе , и҆ слѣпы́мъ прᲂзрѣ́нїе , и҆ бᲂльны́мъ и҆сцѣле́нїе дарᲂва́лъ є҆сѝ . Ты̀ є҆сѝ свѣти́ло рꙋ́с̾стѣй землѝ , и҆ прибѣ́жище всѣ́мъ скᲂрбѧ́щимъ , и҆ гра́дꙋ твᲂемꙋ̀ мᲂсквѣ̀ стѣна̀ непᲂбᲂри́ма . приста́нище и҆ пᲂкро́въ держа́венъ , и҆ ѻ҆рꙋ́жїе спасе́нїѧ . правᲂсла́внымъ во бранѣ́хъ пᲂсо́бникъ , и҆ на врагѝ пᲂбѣ́да . сла́ва . Ты̀ є҆ди́ницꙋ несо́зданнꙋю бг҃ᲂсло́вилъ є҆сѝ , тремѝ ли́цы раз̾дѣлѧ́емꙋ , непресѣко́мꙋ и҆ неразмѣ́снꙋ . прᲂсвѣща́ѧ бл҃гᲂчести́выхъ сᲂвᲂкꙋпле́нїѧ , сщ҃е́нныи на́шъ ᲂу҆чи́телю , ст҃лю а҆леѯі́е прпⷣбне . ю҆́же непреста́й мᲂѧ̀ ѡ҆ на́съ . и҆ ны́нѣ , боⷢ҇ . Ты̀ со́страхᲂмъ бжⷭ҇твеннᲂмꙋ прⷭ҇то́лꙋ пред̾стᲂѧ̀ гаврїи́ле а҆рха́гг҃ле , дв҃ѣй гл҃аше с̾бᲂѧ́знїю , смᲂтри́ти стыжꙋ́сѧ тебѐ . ꙗ҆́кѡ бо до́ждь на рꙋно̀ сни́детъ на тѧ̀ сло́во ѻ҆́ч҃ее , ꙗ҆́кᲂже и҆зво́ли . катава́сїѧ : Сѣдѧ́и во сла́вѣ .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твᲂегѡ̀ свѣ́те незахᲂдѧ́и , пᲂкры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ запᲂвѣде́й ти пꙋтѝ мᲂѧ̀ напра́ви мᲂлю́тисѧ . Вскꙋ́ю ѿрѣва́еши сле́зы ра́бъ свᲂи́хъ ѻ҆́ч҃е ст҃лю а҆леѯі́е . а҆га́рины ᲂу҆́бѡ в̾нꙋ́цы , стрѣ́лы и҆ мечѝ ᲂу҆гᲂто́ваша пᲂгꙋби́ти ны̀ . тѣ́мъ мо́лим̾тисѧ , прᲂти́вныхъ де́рзᲂсть низ̾лᲂжѝ , и҆ цр҃квь свᲂю̀ ᲂу҆твердѝ . Вскꙋ́ю ѻ҆́ч҃е ст҃лю а҆леѯі́е , забыва́еши нищетꙋ̀ и҆ печа́ль на́шꙋ , напа́стнїи бо ѻ҆́блацы пᲂкры́ша ны̀ . тѣле́сныѧ бᲂлѣ́зни ᲂу҆мно́жишасѧ . к̾ тебѣ̀ прибѣга́емъ , и҆ тебѐ призыва́емъ , пᲂтщи́сѧ на́ пᲂмᲂщь , и҆ ᲂу҆скᲂрѝ на мл҃твꙋ , ѿ ско́рби и҆зѧ́ти на́съ , и҆ ѿ ѕѡ́лъ нахᲂдѧ́щихъ на ны̀ . сла́ва . Вскꙋ́ю ᲂу҆ныва́юще мо́лимсѧ , прїиди́те притеце́мъ к̾ ра́цѣ мᲂще́й вели́кагѡ хрⷭ҇то́ва ст҃лѧ а҆леѯі́ѧ , гл҃юще ᲂу҆слы́ши на́съ бѣ́днꙋющихъ , честны́и на́шъ ᲂу҆чи́телю . и҆ и҆зба́ви на́съ ѿ бѣ́дъ и҆ скᲂрбе́й , и҆ ѿ вра́гъ ви́димыхъ и҆ неви́димыхъ , и҆ напа́стей жите́йскихъ . и҆ ны́нѣ , боⷢ҇ . Вскꙋ́ю мѝ невѣ́рꙋеши речѐ беспло́тныи , неи҆скꙋ́снѣй бра́кꙋ . дв҃дꙋ бо твᲂемꙋ̀ пра́ѻ҆ц҃ꙋ ѡ҆бѣща́сѧ бг҃ъ , ѿ плᲂда̀ чре́ва твᲂегѡ̀ , пᲂсади́ ти на прⷭ҇то́лѣ црⷭ҇твїѧ є҆гѡ̀ . і҆а́кѡвлю тѧ̀ дᲂбро́тꙋ , є҆ди́нꙋ и҆збра̀ слᲂве́снᲂе селе́нїе . катава́сїѧ : Оу҆диви́шасѧ всѧ́ческаѧ .

пѣ́снь , ѕ҃ . і҆рмо́съ . Ѡ҆чи́сти мѧ сп҃се , мно́га бо без̾зако́нїѧ мᲂѧ̀ , и҆ и҆з̾ глꙋбины̀ ѕѡ́лъ вᲂз̾веди́ мѧ мᲂлю́сѧ , к̾ тебѣ́ бо вᲂз̾ва́хъ и҆ ᲂу҆слы́ша мѧ , бж҃е спасе́нїѧ мᲂегѡ̀ . Ѡ҆чи́сти ны̀ сп҃се , ѿ мно́гихъ сᲂгрѣше́нїи на́шихъ , и҆ бᲂлѣ́зней и҆ скᲂрбе́й , и҆ сꙋпрᲂти́вныхъ де́рзᲂсть низ̾лᲂжѝ , мл҃твами твᲂегѡ̀ ᲂу҆го́дника ст҃лѧ а҆леѯі́ѧ . и҆ в̾ско́рѣ ми́ръ тво́й пᲂда́ждь , и҆ цр҃квамъ сᲂє҆дине́нїе . Ѡ҆чи́сти на́ша срⷣца̀ и҆ пᲂмышле́нїѧ , и҆ ꙗ҆зы́къ ᲂу҆милѝ смире́но гл҃ати . и҆ прїимѝ ꙗ҆́же ѿ на́съ принᲂси́мыѧ тѝ мл҃твы , а҆леѯі́е премꙋ́дре , и҆ пᲂда́ждь на по́льзꙋ прᲂше́нїѧ . сла́ва . Ѡ҆чи́стившесѧ срⷣце твᲂѐ дх҃ᲂмъ , и҆ ꙗ҆зы́къ тво́й тро́сть скᲂрᲂпи́сца и҆з̾ѡ҆щре́нъ разꙋ́мнѡ . написа̀ въ срⷣца̀ бл҃гᲂчести́выхъ сло́во бл҃гᲂда́тнᲂе , всесщ҃е́нне ѻ҆́ч҃е а҆леѯі́е , бж҃їимъ манᲂве́нїемъ . и҆ ны́нѣ , боⷢ҇ . Ѡ҆чи́стивъ свᲂѐ срⷣце , а҆враа́мъ пра́ѻ҆ц҃ъ тво́й . и҆ прїѧ́тъ ѡ҆бѣща́нїе ѿ бг҃а , блгⷭ҇ви́тисѧ ѿ сѣ́мене є҆гѡ̀ ꙗ҆зы́кѡмъ чи́стаѧ . тᲂбо́ю же и҆спᲂлне́нїе ѡ҆бѣ́та прїе́млетъ дне́сь . катава́сїѧ : Бжⷭ҇твеннᲂе сѐ и҆ всечестно́е .

кᲂнда́къ . гла́съ , и҃ . Бжⷭ҇твеннагѡ и҆ пречⷭ҇тна́гѡ ст҃лѧ хрⷭ҇то́ва , преди́внагѡ чꙋдᲂтво́рца а҆леѯі́ѧ вѣ́рнѡ всѝ пᲂю́ще лю́дїе , любо́вїю да ᲂу҆бл҃жи́мъ , ꙗ҆́кѡ па́стырѧ вели́ка , слꙋжи́телѧ и҆ ᲂу҆чи́телѧ премꙋ́дра землѝ рꙋ́с̾стѣй . дне́сь в̾ па́мѧть є҆гѡ̀ притеце́мъ , ра́дᲂстнѡ плетꙋ́ще пѣ́снь . бг҃ᲂно́се , но ꙗ҆́кѡ и҆мы́и дерзнᲂве́нїе к̾ бг҃ꙋ , мнᲂгᲂѡ҆бра́зныхъ на́съ и҆зба́ви ѡ҆бстᲂѧ́нїи , да зᲂве́мъ тѝ , ра́дꙋисѧ ᲂу҆тверже́нїе гра́дꙋ на́шемꙋ . и҆́кᲂсъ . Ди́внагѡ и҆ пречестна́гѡ чꙋдᲂтво́рца ви́дѧще чꙋдеса̀ , и҆сцѣле́нїѧ пᲂдава́юща всѣ́мъ ѿ дꙋшѝ с̾ вѣ́рᲂю притека́ющимъ , и҆ хрⷭ҇то́вы лю́ди неви́димѡ пᲂсѣща́юща , и҆ зе́млю рꙋ́с̾скꙋю прᲂсвѣща́юща , ра́дᲂстнѡ ѿ дꙋшѝ всѝ в̾кꙋ́пѣ сᲂше́дшесѧ к̾ ра́цѣ мᲂще́й є҆гѡ̀ . слы́шаще же и҆ ви́дѧще чꙋде́съ мно́жество . и҆ и҆сто́чникъ и҆сцѣле́нїемъ неи҆счерпа́емь , чи́стыми срⷣцы̀ и҆ прᲂсвѣще́ными ра́зꙋмы , ꙗ҆́кѡ бл҃гᲂꙋха́нно кади́ло , плᲂды̀ дᲂбрᲂдѣ́тельны ѿ дꙋшѝ принᲂсѧ́ще . и҆ ра́дꙋющесѧ възᲂве́мъ є҆мꙋ̀ гл҃юще , ра́дꙋисѧ ѻ҆́ч҃е честны́и на́шъ ᲂу҆чи́телю , ꙗ҆́кѡ прїѧ́лъ є҆сѝ трꙋдо́въ свᲂи́хъ вᲂз̾даѧ́нїе . и҆ в̾вы́шнихъ вᲂдвᲂрѧ́ешисѧ , ѡ҆ на́съ мᲂлѧ̀ чл҃кᲂлю́бца бг҃а . чꙋде́съ да́ръ прїѧ́лъ є҆сѝ . землѝ рꙋ́с̾стѣй ѻ҆ц҃ъ и҆ ᲂу҆чи́тель . и҆ ст҃лемъ и҆зрѧ́днаѧ пᲂхвала̀ . и҆ правᲂславнымъ во бранѣ́хъ пᲂсо́бникъ крѣ́пᲂкъ . ра́дꙋисѧ ст҃лю а҆леѯі́е , гра́дꙋ на́шемꙋ ᲂу҆тверже́нїе .

пѣ́снь , з҃ . і҆рмо́съ . И҆́же ѿ і҆ꙋде́и , дᲂше́дше ѻ҆́трᲂцы в̾ вавѷлѡ́нъ дре́вле , вѣ́рᲂю ᲂу҆тверже́нїи , пла́мень пе́щныи пᲂпра́вше гл҃юще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . И҆́же ѿ і҆ꙋде́и дѣ́ти в̾ вавѷлѡ́нѣ распалѧ́еми вѣ́рᲂю , на ѻ҆́гнь дерзнꙋ́ша . мы́ же ны́нѣ ви́дѧще чꙋде́съ твᲂи́хъ дѣ́тель , ра́дᲂстїю распала́ющесѧ , вѣ́рᲂю зᲂве́мъ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . И҆́же ѿ і҆ꙋде́и ѻ҆трᲂко́мъ пᲂревнᲂва́лъ є҆сѝ , дх҃ᲂмъ раз̾жига́емь , ѻ҆гнепа́льныѧ стра́сти ᲂу҆мертви́лъ є҆сѝ . и҆ смире́нїемъ свᲂи́мъ , го́рдагѡ ѕмі́ѧ смири́лъ є҆сѝ бл҃же́нне , пᲂѧ̀ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . сла́ва . И҆́же ѿ і҆ꙋде́и ѻ҆́трᲂцы в̾ пещѝ прᲂхлажда́еми пᲂѧ́хꙋ . ты́ же ѻ҆́ч҃е живꙋ́щꙋ и҆мѣ́лъ є҆сѝ бл҃гᲂда́ть в̾ себѣ̀ , и҆ ѿ тᲂѧ̀ прᲂсвѣ́щьсѧ , трⷪ҇цꙋ несᲂзда́ннꙋю бг҃ᲂсло́вилъ є҆сѝ , пᲂѧ̀ ѻ҆ц҃ъ на́шихъ бж҃е бл҃гᲂслᲂве́нъ є҆сѝ . и҆ нн҃ѣ , боⷢ҇ . И҆́же ѿ і҆ꙋде́и ѻ҆́трᲂки , твᲂѐ прᲂѡ҆брази́ша ржⷭ҇тво̀ чⷭ҇таѧ . и҆́бо ѻ҆́гнь бжⷭ҇твенныи лᲂже́снъ твᲂи́хъ неѡ҆палѝ . тѣ́мъ ти пᲂе́мъ , бл҃гᲂслᲂве́нъ пречи́стаѧ пло́дъ твᲂегѡ̀ чре́ва .

катава́сїѧ : Непᲂслꙋжи́ша тва́ри .

пѣ́снь , и҃ . і҆рмо́съ . Цр҃ѧ нбⷭ҇нагѡ , є҆го́же пᲂю́тъ вѡ́и а҆́гг҃льстїи . хвали́те и҆ превᲂзнᲂси́те є҆гѡ̀ во́ вѣки . Цр҃ѧ нбⷭ҇нагѡ ᲂу҆мᲂли́лъ є҆сѝ , вели́кїи ст҃лю а҆леѯі́е . и҆ наꙋчи́лъ є҆сѝ ча́да свᲂѧ̀ вᲂспѣва́ти , хвали́те по́йте и҆ превᲂзнᲂси́те є҆гѡ̀ во́ вѣки . Цр҃ю нбⷭ҇нᲂмꙋ пред̾стᲂѧ̀ , мл҃твᲂю твᲂе́ю цр҃квь твᲂю̀ неврежде́нꙋ сᲂблюда́й . и҆ наꙋчѝ пѣ́ти , хвали́те по́йте и҆ превᲂзнᲂси́те є҆гѡ̀ во́ вѣки . бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Цр҃ю нбⷭ҇нᲂмꙋ пред̾стᲂѧ̀ неви́димѡ на́съ пᲂсѣща́й , бо́дреными сѝ мл҃твами . да ра́дꙋющесѧ пᲂе́мъ , хвали́те по́йте и҆ превᲂзнᲂси́те є҆гѡ̀ во́ вѣки . и҆ ны́нѣ , боⷢ҇ . Цр҃ѧ нбⷭ҇нагѡ рᲂдила̀ є҆сѝ вᲂплᲂще́нна , па́че сло́ва и҆ смы́сла . тѣ́мже ра́дꙋѧсѧ вᲂпїю̀ , хвали́те по́йте и҆ превᲂзнᲂси́те є҆гѡ̀ во́ вѣки . катава́сїѧ : Хва́лимъ бл҃гᲂслᲂви́мъ . Ѻ҆́трᲂки бл҃гᲂчести́выѧ [пᲂкло́н̾] .

пѣ́снь , ѳ҃ . і҆рмо́съ . Вᲂи́стинꙋ бцⷣꙋ тѧ̀ и҆спᲂвѣ́дающе , спасе́ннїи тᲂбо́ю дв҃це чⷭ҇таѧ , съ нбⷭ҇ными вѡ́и тѧ̀ велича́емъ . Вᲂи́стинꙋ бг҃ᲂи҆збра́нныи ст҃ль , ты̀ цр҃квь бг҃ᲂмъ пᲂрꙋче́нꙋю тѝ сᲂблю́дъ непᲂро́чнꙋ , и҆ чꙋдеса̀ сᲂтвᲂрѝ мно́га . и҆сцѣле́нїѧ без̾чи́сленаѧ пᲂдава́еши притека́ющимъ тѝ . Вᲂи́стинꙋ и҆збра̀ тебѐ хрⷭ҇то́съ , цр҃кви свᲂе́й ѡ҆снᲂва́нїе . стѣ́нꙋ и҆ забра́ло крѣ́пко , и҆ непᲂдви́жимо во́ вѣки . Вᲂи́стинꙋ пᲂста́ви тебѐ хрⷭ҇то́съ , па́стырѧ и҆ ᲂу҆чи́телѧ свᲂемꙋ̀ ста́дꙋ . и҆ свѣ́тъ ми́рꙋ и҆ со́ль землѝ , ѻ҆́ч҃е ст҃лю а҆леѯі́е . сла́ва . И҆́стиннаго ст҃лѧ и҆ вели́кагѡ чꙋдᲂтво́рца а҆леѯі́ѧ , прїиди́те всѝ ст҃лїе , и҆ всѝ лю́дїе , па́мѧть є҆гѡ̀ свѣ́тлѡ пра́зднꙋемъ .= и҆ ны́нѣ , боⷢ҇ . В=ᲂи́стинꙋ данїи́лъ тѧ̀ го́рꙋ наречѐ мы́сленꙋю . бж҃їю рᲂди́тельницꙋ и҆са́їѧ . ви́дитъ же ꙗ҆́кѡ рꙋно̀ гедеѡ́нъ . дв҃дъ же сщ҃е́нїѧ сѣ́нь . и҆́нъ же тѧ̀ две́рь . гаврїи́лъ же тѝ гл҃етъ , ра́дꙋисѧ ѡ҆бра́дᲂваннаѧ гдⷭ҇ь с̾ тᲂбо́ю .

катава́сїѧ : Всѧ́къ зе́менъ .= Дᲂсто́йнѡ є҆́сть . свѣти́лен̾ . Бл҃гᲂда́ть ст҃а́го дх҃а в̾се́льшаѧсѧ в̾тѧ̀ , ст҃лѧ тѧ̀ пᲂказа̀ . хрⷭ҇то́съ же тѝ в̾рꙋчѝ ста́до свᲂѐ , па́ствити на па́житѣхъ дх҃о́вныхъ . є҆го́же ра́ди пᲂтща́лсѧ є҆сѝ наставлѧ́ти лю́ди . и҆ ны́нѣ на́ нб҃сѣхъ ра́дꙋѧсѧ живе́ши . =двⷤа . сла́ва , и҆ ны́нѣ , боⷢ҇ . По́ бз҃ѣ ᲂу҆пᲂва́нїе и҆мꙋ́ще на тѧ̀ , пречⷭ҇таѧ бцⷣе , мо́лим̾тисѧ , ко и҆́же и҆з̾ тебѐ ро́ждьшемꙋсѧ мᲂльба́ми , невреди́мы на́съ до кᲂнца̀ сᲂхранѝ .

На хвали́тѣхъ , стⷯры , на д҃ . гла́съ , и҃ . поⷣ . что́ тѧ и҆менꙋ́емъ .= Что́ тѧ нарече́мъ ст҃лю а҆леѯі́е ;꙳ ѕвѣздꙋ̀ ѡ҆зарѧ́ющꙋ пᲂд̾нбⷭ҇наѧ ,꙳ ми́рꙋ красᲂва́нїе всечестно́е .꙳ сегѡ̀ лꙋча́ми ѡ҆зарѧ́юща , велѣ́нїи бл҃гᲂвѣ́рїѧ ,꙳ и҆ є҆́реси тмꙋ̀ ѿгᲂнѧ́юща ,꙳ мᲂлѝ прпⷣбне ,꙳ ѿ тлѧ̀ и҆ бѣ́дъ и҆зба́витисѧ ,꙳ вѣ́рᲂю твᲂрѧ́щимъ па́мѧть твᲂю̀ . =двⷤа . Что́ тѧ нарече́мъ прпⷣбне ст҃лю а҆леѯі́е ;꙳ рѣкꙋ̀ , и҆злива́ющꙋ и҆сцѣле́нїѧ ꙳ незави́стнѡ , всѣ́мъ вѣ́рᲂю прихᲂдѧ́щимъ .꙳ и҆сто́чникъ , и҆стᲂча́ющь ᲂу҆че́нїи медᲂто́чныхъ ,꙳ во всѧ̀ кᲂнцы̀ прᲂстира́юща ,꙳ и҆ вѣ́рныхъ прᲂсвѣща́юща .꙳ мᲂли́сѧ прпⷣбне ,꙳ спасти́сѧ дш҃а́мъ на́шимъ . Что́ тѧ ны́нѣ нарече́мъ ,꙳ ст҃лю а҆леѯі́е ,꙳ преди́вныи чꙋдᲂтво́рче ;꙳ врача̀ разꙋ́мна и҆ без̾ме́здна ,꙳ и҆сцѣлева́юща всѧ́кꙋ ꙗ҆́зю дш҃е́внꙋю и҆ тѣле́снꙋю .꙳ беспло́тнымъ равнᲂче́стна .꙳ мᲂли́сѧ прпⷣбне ,꙳ спасти́сѧ дш҃а́мъ на́шимъ . сла́ва . гла́съ , ѕ҃ . Чл҃че бж҃їи , вѣ́рныи ра́бе , слꙋго̀ гдⷭ҇нь , мꙋ́жꙋ жела́нїю , сᲂсꙋ́де и҆з̾бра́нныи , сто́лпе и҆ ᲂу҆тверже́нїе цр҃кви , црⷭ҇твїю наслѣ́дниче , непреста́й мᲂлѧ́сѧ ѡ҆ на́съ ко́ гдⷭ҇ꙋ . и҆ ны́нѣ , боⷢ҇ . Бцⷣе ты̀ є҆сѝ лᲂза̀ и҆́стиннаѧ , вᲂзрасти́вшаѧ на́мъ пло́дъ живо́тныи , тебѣ̀ мо́лимсѧ , мᲂли́сѧ влⷣчце со ст҃лемъ , пᲂми́лᲂватисѧ дш҃а́мъ на́шимъ .

Славᲂсло́вїе вели́кᲂе , и҆ ѿпꙋ́стъ .

На литꙋргі́и , бл҃же́нна , ст҃лю , на́ и҃ . пѣ́снь г҃ и҆ ѕ҃ . прᲂки́менъ , ѱл҃о́мъ дв҃дᲂвъ . ᲂу҆ста̀ мᲂѧ̀ вᲂз̾ гл҃ютъ премꙋ́дрᲂсть , и҆ пᲂꙋче́нїе срⷣца мᲂегѡ̀ ра́зꙋмъ . сти́хъ . ᲂу҆слы́шите сїѧ̀ всѝ ꙗ҆зы́цы , внꙋши́те всѝ живꙋ́щїи по вселе́ннѣй . а҆пⷭ҇лъ , к̾ є҆вре́ѡмъ . заⷱ҇ , тл҃є .= а҆ллилꙋ́їѧ . ᲂу҆ста̀ пра́веднаго пᲂꙋча́тсѧ премꙋ́дрᲂсти , и҆ ꙗ҆зы́къ є҆гѡ̀ вᲂз̾гл҃етъ сꙋ́дъ . =сти́хъ . зако́нъ бг҃а є҆гѡ̀ в̾ срⷣцы є҆гѡ̀ , и҆ неза́пнꙋтсѧ стᲂпы̀ є҆гѡ̀ . є҆ѵⷢ҇а́лїе , ѿ =лꙋкѝ . заⷱ҇ , к҃д . =прича́стенъ . въ па́мѧть вѣ́чнꙋю бꙋ́детъ пра́ведникъ .