МЦⷭ҇А ТОГО́ЖЕ ВЪ ГІ҃ ДН҃Ь

Прпⷣбнагѡ ѻ҆ц҃а на́шегѡ мартинїа́на . =Ве́черъ , на гдⷭ҇и вᲂзва́хъ , стихѣ́ры . гла́съ , в҃ . поⷣ . є҆гда̀ ѿ́ древа . Прїиди́те ꙗ҆́кᲂже цвѣ́ты се́льными , и҆ раѧ̀ бжⷭ҇твеннагѡ бл҃гᲂра́слеными цвѣты̀ , пѣ́сньми вѣнча́емъ страда́льца хрⷭ҇то́ва , правᲂсла́вныхъ ѻ҆вча̀ . чистᲂтѣ́ бо дᲂбро́та , вѣ́ры же́ртва . сла́ва вᲂз̾держа́нїю ꙗ҆ви́сѧ ꙗ҆́в̾ственѡ ми́рꙋ . тѣ́мже прїѧ́тъ вѣне́цъ црⷭ҇твїѧ непремѣ́ненъ . И҆мѣ́ѧ в̾ срⷣцы свᲂе́мъ ѻ҆́гнь , мартинїа́не бг҃ᲂбл҃же́нне , бжⷭ҇твеннагѡ дх҃а , си́мъ ѡ҆пали́въ нечистᲂтѣ̀ ѻ҆́бразъ , ѻ҆трᲂкᲂви́цы ѡ҆брѣ́тесѧ . ᲂу҆ѧ́звивъ сᲂпрᲂтивᲂбᲂрца̀ мече́мъ є҆гѡ̀ . ѿ ню́дꙋ же прирази́всѧ тебѣ̀ , ꙗ҆ви́сѧ смѣ́хъ пред̾лежа̀ вᲂи́стинꙋ , и҆ пᲂсра́мленъ всескве́рненыи . Ѻ҆́гнь ᲂу҆́бѡ в̾же́глъ є҆сѝ чꙋ́вственѣ , прᲂти́вꙋ вра́жїимъ ѡ҆пᲂлче́нїемъ пребл҃же́нне . мы́сль стѧжа́въ вѣ́чнагѡ ѻ҆гнѧ̀ , сласте́мъ твᲂи́мъ раз̾жже́нїе ᲂу҆вѧди́лъ є҆сѝ ѕѣлѡ̀ . на ка́мени же но́зѣ свᲂѝ пᲂста́вль прпⷣбне , на се́мъ хра́минꙋ сᲂзда̀ . по страна́хъ ѡ҆бхᲂдѧ̀ ѻ҆́ч҃е , терпѣ́нїемъ свᲂи́мъ вѣнча́сѧ . =сла́ва . гла́съ , в҃ . Ра́дꙋисѧ честна́ѧ и҆ мнᲂгᲂчꙋ́днаѧ палести́нскаѧ пᲂхвало̀ . вᲂсїѧ́ бо на́мъ ꙗ҆́кѡ пресвѣ́тло сл҃нце . и҆ врагꙋ̀ ѡ҆пали́въ всю̀ си́лꙋ , ᲂу҆́ды свᲂѧ̀ сᲂжжѐ ѻ҆гне́мъ бл҃же́нне . в̾гᲂра́хъ бо и҆ в̾ пꙋсты́нѧхъ и҆ ѻ҆стрᲂвѣ́хъ , всѧ́ко и҆скꙋше́нїе тебѣ̀ принесѐ . в̾ пꙋсты́ни ᲂу҆́бѡ женꙋ̀ тебѣ̀ пред̾ста́ви . на ка́мени же в̾ мо́ри и҆скꙋси́тель и҆скꙋси́ти тѧ , пᲂкꙋша́шесѧ мꙋ́дре . но ѽ мартинїа́не требл҃же́нне , хрⷭ҇та̀ непреста́ннѡ ѡ҆ на́съ мᲂлѧ̀ непреста́й , твᲂрѧ́щихъ вѣ́рᲂю твᲂю̀ па́мѧть .= и҆ ны́нѣ , боⷢ҇ . и҆лѝ , крⷭ҇тᲂбоⷢ҇ . Г=ро́здъ зрѣ́лыи чⷭ҇таѧ , є҆го́же невᲂз̾дѣ́ланно во ᲂу҆тро́бѣ нᲂси́ла є҆сѝ , на́древѣ ꙗ҆́кѡ ᲂу҆зрѣ̀ сегѡ̀ пᲂвѣ́шена , рыда́ющи вᲂсклица́ше . и҆ взыва́ше , ча́до сла́дᲂсть и҆ска́паѧ , и҆́мже пїѧ́нство ѿѧ́тсѧ всѧ́кѡ страсте́й бл҃гᲂда́телю , мно́ю тебѐ ро́ждьшею , бжⷭ҇твенными мᲂльба́ми ꙗ҆́кѡ млрⷭ҇дъ .

На стихо́внѣ , во ѻ҆кта́и . сла́ва . гла́съ , ѕ҃ . И҆спещре́нъ ѻ҆де́ждею чистᲂты̀ , и҆ прᲂсвѣще́нъ мл҃твᲂю бжⷭ҇твеннᲂю . живꙋ́ща же и҆мѣ́ѧ хрⷭ҇та̀ в̾ себѣ̀ , и҆́же ѿ дв҃ы ро́ждьшагᲂсѧ , же́нскᲂю ѻ҆де́ждею невᲂсхити́сѧ , ни сла́сти плᲂтьскі́ѧ прїѧ́тъ . но в̾зы́де ᲂу҆се́рднѡ на тᲂждерабо́тныи ѻ҆́гнь , бжⷭ҇твенныи ѻ҆́гнь в̾ срⷣцы и҆мѣ́ѧ . и҆ чꙋ́вственымъ и҆ вре́меннымъ ѻ҆гне́мъ , страстны́и ѻ҆́гнь пᲂпали́лъ є҆сѝ , и҆ гее́нскїи пла́мень ᲂу҆гаси́лъ є҆сѝ . тѣ́мже мᲂли́сѧ мартинїа́не бл҃же́нне , и҆ на́мъ всепа́гꙋбнагѡ и҆ вѣ́чнагѡ и҆зба́витисѧ ѻ҆гнѧ̀ .= и҆ ны́нѣ , боⷢ҇ . и҆лѝ , крⷭ҇тᲂбоⷢ҇ . поⷣ . в̾ тре́тїи де́нь . Л=ю́дїе без̾зако́ннїи ,꙳ непра́веднѡ пригвᲂзди́ша тѧ на́ древѣ ,꙳ дв҃аѧ чⷭ҇таѧ и҆ мт҃и твᲂѧ̀ зрѧ́щи ,꙳ ꙗ҆́кᲂже сѷмеѡ́нъ прᲂречѐ ,꙳ ᲂу҆тро́бᲂю ᲂу҆ѧзвлѧ́шесѧ сп҃се .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , и҃ . Пла́мень страстны́хъ и҆скꙋше́нїи , сле́зными тече́нїи ᲂу҆гаси́лъ є҆сѝ бл҃же́нне . и҆ мᲂрскі́ѧ вᲂлны̀ , и҆ ѕвѣре́мъ стремле́нїѧ ѡ҆бꙋзда́въ . взыва́ше , препрᲂсла́вленъ є҆сѝ всеси́льне , ѿ ѻ҆гнѧ̀ и҆ бꙋ́ри спаси́ мѧ .= сла́ва , и҆ ны́нѣ , боⷢ҇ . и҆лѝ , крⷭ҇тᲂбоⷢ҇ .=

Кано́нъ . гла́съ , в҃ . пѣ́снь , а҃ . і҆рмо́съ . Во глꙋбинѣ̀ пᲂтᲂпѝ дре́вле , фараѡни́тскаѧ всѧ̀ во́инства , преѡрꙋже́нꙋ си́лꙋ . вᲂпло́щшеесѧ сло́во , преспѣ́ющїѧ грѣхѝ пᲂтреби́ло є҆́сть , пресла́вныи гдⷭ҇ь , ꙗ҆́кѡ прᲂсла́висѧ .

запѣ́въ : Прпⷣбне ѻ҆́ч҃е мартинїа́не , мᲂлѝ бг҃а ѡ҆ на́съ . Та́йными пѣ́сньми сᲂгла́снѡ прїидѣ́те вᲂсхва́лимъ , по́стника бл҃гᲂче́стїю дне́сь мартинїа́на вѣ́рнѡ , ꙗ҆́кѡ до́брѣ и҆ зако́ннѡ пᲂсти́вшасѧ . тѣ́мже и҆ пᲂбѣ́дѣ прїѧ́тъ ѿ хрⷭ҇та̀ вѣне́цъ . Неꙋкло́ннѡ стра́хᲂмъ хрⷭ҇то́вѣмъ ѻ҆́ч҃е ѡ҆гражда́емь , стра́хи вра́жїѧ ꙗ҆́кᲂже мо́лнїѧ ѿгна́лъ є҆сѝ . стра́шенъ бо бы́лъ є҆сѝ на ни́хъ , терпѣ́нїемъ вᲂз̾держа́нїѧ . и҆ мечта́ньми непᲂкᲂлѣби́мъ пребы́сть прехва́льне . Спаси́тельнᲂю си́лᲂю хрⷭ҇то́вᲂю , и҆скꙋше́нїе тебѣ̀ бѣсо́вскᲂе наше́д̾шее , ᲂу҆до́бь ми́мѡ течѐ , жены̀ наитїѐ прпⷣбне , є҆ѧ́же спа́съ , ᲂу҆ѧзви́лъ є҆сѝ сеѧ̀ ра́ди ѕлᲂнача́льника . боⷢ҇ . Во́чревѣ пᲂнᲂси́вши бе́з̾мꙋжа чⷭ҇таѧ , и҆ дв҃а же мт҃и в̾ жена́хъ є҆сѝ нетлѣ́нна , дх҃ᲂмъ ст҃ы́мъ , сн҃а бж҃їѧ заче́нши во ᲂу҆тро́бѣ . є҆го́же по бл҃гᲂвᲂле́нїю ѻ҆ц҃а , рᲂдила̀ є҆сѝ без̾сѣ́мене .

пѣ́снь , г҃ . і҆рмо́съ . На ка́мени мѧ вѣ́ры ᲂу҆твердѝ , раз̾ширѝ ᲂу҆ста̀ мᲂѧ̀ на врагѝ мᲂѧ̀ . вᲂз̾весели́бᲂсѧ дх҃ъ мо́й вᲂспѣва́ти , нѣ́сть ст҃а ꙗ҆́кᲂже бг҃ъ на́шъ , и҆ нѣ́сть пра́ведна па́че тебѐ гдⷭ҇и . Пло́ти вᲂз̾держа́нїемъ , ѿмы́лъ є҆сѝ ме́рзᲂсти ѕло́бꙋ ꙗ҆́кᲂже ти́нꙋ . и҆ ѡ҆брѣ́те чистᲂто́ю ᲂу҆ма̀ , стезѝ прпⷣбне пра́ведныхъ гла́дки , пꙋтѝ ѿбѣ́гъ грѣхо́вныѧ мꙋ́дре . Вжили́въ срⷣце свᲂѐ , и҆ раз̾жже́гъ стра́хᲂмъ и҆ любо́вїю гдⷭ҇нею . пло́ть свᲂю̀ ѡ҆пали́лъ є҆сѝ во́лею , ѻ҆гне́мъ веще́ственымъ мꙋ́дре . си́мъ прᲂписꙋ́ѧ на́мъ , гее́ны прпⷣбне негаси́мыи ѻ҆́гнь . Оу҆ранѧ́ѧ свᲂѐ тѣ́ло ѻ҆гне́мъ всеѧдꙋ́щимъ , гᲂни́тель ꙗ҆ви́сѧ и҆ вѣне́чникъ , ᲂу҆ѧзвлѧ́ѧ сꙋпᲂста́та терпѣ́нїемъ . ѡ҆чища́ѧ же пᲂмышле́нїемъ скве́рнꙋ прпⷣбне , и҆ ᲂу҆бѣлѧ́ѧ дх҃ᲂмъ , и҆ дв҃ьствꙋѧ пло́тїю . боⷢ҇ . Зача́тїе неи҆скꙋсᲂмꙋ́жно , бжⷭ҇твеннᲂе рᲂжде́нїе несказа́нно , па́че ᲂу҆ма́ бо . бг҃ъ же ражда́емыи , па́че же є҆стества̀ . ѽ ржⷭ҇твꙋ̀ твᲂемꙋ̀ ѽ чистᲂтѣ̀ твᲂе́й . тᲂбо́ю бо ꙗ҆ви́мисѧ бг҃ъ в̾ ра́бїи ѻ҆́бразѣ .

сѣда́ленъ . гла́съ , д҃ . Прпⷣбныи тво́й гдⷭ҇и , в̾ пᲂще́нїи свᲂе́мъ по́двиги пᲂказꙋ́ѧ , ᲂу҆се́рдїемъ мно́гимъ хрⷭ҇тѐ бж҃е на́шъ . и҆мѣ́ѧ бо крѣ́пᲂсть твᲂю̀ преѡ҆би́дѧше бѣ́сы , пᲂсѣчѐ сло́вᲂмъ некрѣ́пкꙋю гᲂрды́ню . тѣ́мже тѧ̀ мо́лимъ , спастѝ дш҃а на́ша . сла́ва , и҆ ны́нѣ , боⷢ҇ . Дв҃о всенепᲂро́чнаѧ , и҆́же пресꙋ́щнаго бг҃а ро́ждьши , со беспло́тными си́лами , тᲂгѡ̀ непреста́ннѡ мᲂлѝ , ѡ҆ставле́нїе и҆ грѣхо́въ и҆ и҆справле́нїе житїю̀ да́ти на́мъ пре́жде кᲂнца̀ , и҆́же вѣ́рᲂю и҆ любо́вїю пᲂю́щимъ тѧ̀ по́дᲂлгꙋ , є҆ди́на всепѣ́таѧ . крⷭ҇тᲂбоⷢ҇ . Дв҃о всенепᲂро́чнаѧ мт҃и хрⷭ҇та̀ бг҃а , ѻ҆рꙋ́жїе про́йде прест҃ꙋ́ю твᲂю̀ дш҃ꙋ , є҆гда̀ распина́ема ви́дѣ во́лею сн҃а и҆ бг҃а свᲂегѡ̀ . є҆го́же пребл҃гᲂслᲂве́наѧ мᲂлѧ́щи непреста́й , ѡ҆ставле́нїе сᲂгрѣше́нїемъ на́шимъ дарᲂва́ти .

пѣ́снь , д҃ . і҆рмо́съ . Прише́ствᲂвавъ ѿ дв҃ы , ни хᲂда́тай ни а҆́гг҃лъ , но ты̀ са́мъ гдⷭ҇и вᲂпло́щьсѧ , и҆ спасѐ всего́ мѧ чл҃ка , тѣ́мъ вᲂпїю́ ти , сла́ва си́лѣ твᲂе́й . Оу҆мертви́сѧ тᲂми́телѧ ле́сти ѡ҆брѣ́тенїе , и҆ пᲂбѣжде́нїе прїѧ́тъ . є҆ѧ́же бо ра́ди пᲂбѣди́ти надѣ́ѧшесѧ , се́ю низ̾лᲂжи́сѧ , и҆ пᲂпира́етсѧ до́бле , нᲂга́ма крѣ́пко . Претерпѣ́лъ є҆сѝ до́блественымъ нра́вᲂмъ гдⷭ҇а , стезѝ ᲂу҆пра́вилъ є҆сѝ . и҆ на ка́мень в̾сели́сѧ прпⷣбне , без̾ пᲂкро́ва лежа́щь . ꙗ҆́кѡ на́ нб҃о вᲂз̾ше́дъ , въ ма́лыи ѻ҆́стрᲂвъ . До́блественнѣи и҆ кра́снѣи свᲂѝ но́зѣ прехва́льне , к̾ тече́нїю прᲂсте́рлъ є҆сѝ , ѿ страны̀ в̾ странꙋ̀ прехᲂдѧ̀ . бѣжа́ бо ѿ́ града страсте́й , и҆ в̾ без̾стра́стїе дᲂсти́глъ є҆сѝ . боⷢ҇ . Пребыла̀ є҆сѝ по ржⷭ҇твѣ̀ дв҃ᲂю препѣ́таѧ , бг҃ъ бо без̾нача́льныи ꙗ҆ви́сѧ и҆з̾ тебѐ прᲂхᲂдѧ̀ . є҆мꙋ́же в̾чл҃чьшꙋсѧ , пᲂдо́бїѧ ѻ҆́бразъ цѣлꙋ́емъ .

пѣ́снь , є҃ . і҆рмо́съ . Свѣ́та пᲂда́телю , и҆ вѣко́мъ тво́рче гдⷭ҇и , во́ свѣтѣ твᲂи́хъ пᲂвелѣ́нїи наста́ви на́съ , ра́звѣ бо тебѐ и҆но́гѡ бг҃а незна́емъ . Две́рь ѡ҆брѣ́тъ дᲂбрᲂдѣ́тели , кᲂва́рство врага̀ прпⷣбне . ꙗ҆ви́сѧ и҆ жи́зни мᲂе́й пред̾ста́тель . дш҃и́ же наста́вникъ , пᲂгрꙋже́нѣй лю́тѣ бꙋ́рею . Да́ръ бж҃їи ꙗ҆́кѡ прїѧ́хъ , мл҃твъ твᲂи́хъ крѣ́пᲂсть , всѧ̀ сᲂверша́еши мꙋ́дре пресла́внѡ . и҆ спаса́еши ѿ глꙋбины̀ , и҆ ѿ бꙋ́ри и҆збавлѧ́еши страсте́й дш҃а на́ша . боⷢ҇ . Въ двᲂю̀ є҆стествꙋ̀ , и҆ сᲂста́вѣ є҆ди́нᲂмъ бы́лъ є҆сѝ , и҆ сᲂверше́нъ сы́и чл҃къ . несмѣ́шенъ ѻ҆́бразъ , и҆лѝ зра́къ непᲂстрада̀ сло́ве вᲂплᲂща́ѧсѧ гдⷭ҇и .

пѣ́снь , ѕ҃ . і҆рмо́с̾ . Ко́ гдⷭ҇ꙋ ѿ ки́та і҆ѡ́на вᲂпїѧ́ше , ты́ мѧ вᲂз̾вѣдѝ и҆з̾ глꙋбины̀ а҆́да влⷣко . да ꙗ҆́кѡ и҆зба́вителю во́ гласѣ хвале́нїѧ , и҆́стиннымъ же дх҃ᲂмъ пᲂжрꙋ́ ти . Си́лᲂю бж҃їею ᲂу҆крѣ́пль свᲂю̀ дш҃ꙋ прехва́льне , не ᲂу҆жасе́сѧ наде́ждᲂю ѡ҆гражда́емь , непрепла́ваемꙋ глꙋбинꙋ̀ мꙋ́дре прейтѝ . но спасе́сѧ дельфи́нми нᲂси́мь . Житїѐ твᲂѐ а҆́гг҃лы вᲂи́стинꙋ ᲂу҆дивѝ , бѣ́сы пᲂсрамѝ , и҆ чл҃ки прᲂсвѣтѝ . и҆ женꙋ̀ па́че спа́слъ є҆сѝ , и҆ на стезю̀ пᲂще́нїѧ привлечѐ . Пᲂдо́бїе твᲂи́мъ трꙋдо́мъ , и҆ честны́мъ пᲂдвиго́мъ мꙋ́дре , твᲂѐ преи́тїе по дᲂстᲂѧ́нїю вᲂи́стинꙋ бы́сть . и҆ в̾зѧ́тъ на врагѝ цѣлᲂмꙋ́дрїѧ пᲂбѣ́дꙋ , вᲂз̾держа́нїемъ ѕмі́ѧ ᲂу҆би́въ . боⷢ҇ . Зако́ны ѡ҆ тебѣ̀ и҆з̾немᲂго́ша , вᲂи́стинꙋ є҆стества̀ дв҃о чⷭ҇таѧ . дв҃ьствꙋеши бо , ро́ждьши сᲂпресто́льна ѻ҆ц҃ꙋ , и҆ бжⷭ҇твеннᲂмꙋ дх҃ꙋ , сло́ва сꙋ́ща , бг҃а же и҆ чл҃ка .

кᲂнда́къ . гла́съ , в҃ . Ꙗ҆́кѡ по́стника бл҃гᲂче́стїѧ и҆скꙋ́сна , и҆ страда́льца и҆звᲂле́нїемъ чⷭ҇тна , и҆ пꙋсты́ни жи́телѧ же и҆ сᲂѡ҆бра́зна , в̾ пѣ́снехъ дᲂсто́йнѡ вᲂсхва́лимъ , мартинїа́на приснᲂхва́льнагѡ , то́й бо ѕмі́ѧ пᲂпра́лъ є҆́сть . и҆́кᲂсъ . Ѿ кᲂне́цъ да́же до кᲂне́цъ про́йде вѣща́нїе кра́сныхъ дᲂбрᲂдѣ́телей , и҆ бжⷭ҇твенныхъ по́двигъ твᲂи́хъ . мла́дъ сы́и во́зрастᲂмъ , въ пꙋсты́нѧхъ вᲂз̾желѣ́лъ є҆сѝ пᲂжи́ти . пѣ́нїѧ хрⷭ҇то́ви , ѱалмы̀ и҆ мл҃твы вᲂспꙋща́ѧ при́снѡ . де́нь же и҆ но́щь вᲂз̾раста́ѧ в̾ бᲂлѣ́знехъ и҆ слеза́хъ , чи́стѣ житїѐ свᲂѐ с̾кᲂнча́лъ є҆сѝ , и҆ мꙋ́дрѣ ѕлᲂнача́льнаго пᲂсрами́лъ є҆сѝ , ты́ бо ѕмі́ѧ пᲂпра́лъ є҆сѝ .

пѣ́снь , з҃ . і҆рмо́съ . Ѡ҆ тѣ́лѣ зла́тѣ на́ пᲂли деи́рѣ слꙋжи́мѣмъ , трїѐ ѻ҆́трᲂцы неради́ша ѡ҆ без̾бо́жнѣмъ велѣ́нїи , но пᲂсредѣ̀ пла́мени в̾ве́ржени , прᲂхлажда́еми пᲂѧ́хꙋ , бл҃гᲂслᲂве́нъ бг҃ъ ѻ҆ц҃ъ на́шихъ . Ве́щнагѡ житїѧ̀ ѿлꙋчи́въ себѐ , и҆́нᲂчествꙋѧи бѣ́гай крѣ́пкѡ , гра́ды всѧ̀ и҆ страны̀ ѡ҆бхᲂдѝ , ꙗ҆́кѡ дᲂсто́йнѡ . мартинїа́нъ бо ᲂу҆чи́тъ без̾ печа́ли пѣ́ти , бл҃гᲂслᲂве́нъ бг҃ъ ѻ҆ц҃ъ на́шихъ . Тве́рдымъ хᲂжде́нїемъ , па́влᲂвꙋ бы́лъ є҆сѝ мꙋ́дре ше́ствїю ѻ҆́бразъ . любо́вїю гᲂнѧ̀ є҆го́же пᲂсти́глъ є҆сѝ , вᲂз̾держа́нїѧ тече́нїемъ сѝ . тѣ́мже ꙗ҆́кѡ стра́ненъ ми́ра бы́въ , пᲂзна́сѧ прехва́льне цр҃е́ви нбⷭ҇нᲂмꙋ , и҆ прᲂсла́вилсѧ є҆сѝ вѣ́рнѡ . Тече́нїе съкᲂнчава́ѧ пᲂще́нїѧ свᲂегѡ̀ , ᲂу҆чени́къ хрⷭ҇то́въ , дх҃ᲂмъ бжⷭ҇твеннымъ прᲂꙋвѣ́дѣвъ , ѿше́ствїе є҆́же ѿ́ тѣла , пᲂѧ́ше дш҃е́ю несꙋмѣ́ннᲂю , ꙗ҆́кѡ в̾ рꙋ́цѣ твᲂѝ влⷣко дх҃ъ мо́й , и҆ дш҃ꙋ мᲂю̀ нн҃ѣ предава́ю . боⷢ҇ . Во́дꙋ жи́вꙋ пᲂдаѧ̀ ѿ и҆сто́чника хрⷭ҇то́съ и҆стᲂчѝ , в̾ твᲂю̀ ст҃ꙋ́ю пресла́внаѧ ᲂу҆тро́бꙋ в̾сели́сѧ пребы́въ неслїѧ́ненъ . всѣ́хъ нетлѣ́нїѧ напᲂи́въ вѣ́рᲂю зᲂвꙋ́щихъ , бл҃гᲂслᲂве́на є҆сѝ бг҃а пло́тїю ро́ждьши .

пѣ́снь , и҃ . і҆рмо́съ . Впе́щь ѻ҆́гненнꙋю , к̾ дѣ́темъ є҆вре́йскимъ сᲂше́дшагѡ , и҆ пла́мень на хла́дъ прело́жшагѡ бг҃а , по́йте всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Сᲂвле́кшисѧ чꙋ́вственѣ плᲂтьскі́ѧ немᲂщны́ѧ ри́зы , и҆ мꙋ́жества в̾зе́мши ѻ҆де́ждꙋ и҆ ра́зꙋмъ , ѻ҆трᲂкᲂви́ца вᲂпїѧ́ше пᲂстѧ́щисѧ , тѧ̀ превᲂзнᲂша́ю і҆с҃е во́ вѣки всѧ̀ . Ра́дꙋетсѧ ᲂу҆се́рднѡ вᲂи́стинꙋ , на ка́мени хрⷭ҇то́вѣ ᲂу҆тверждена̀ , и҆ пᲂсто́мъ и҆ вѣ́рᲂю вᲂѡ҆рꙋжи́вшисѧ крѣ́пкѡ , ѻ҆трᲂкᲂви́ца вᲂпїѧ́ше в̾ пѣ́снехъ , тѧ̀ превᲂзнᲂша́ю і҆с҃е во́ вѣки . Ꙗ҆́кѡ прелᲂже́нъ ѿ тлѣ́нныхъ , и҆ вы́шнѧгѡ нетлѣ́нїѧ прича́стникъ бы́въ бг҃ᲂно́сне . и҆ бжⷭ҇твеннᲂе тече́нїе скᲂнча́въ , вѣне́цъ прїе́мъ вᲂпїѧ́ше , тѧ̀ превᲂзнᲂша́ю і҆с҃е во́ вѣки . боⷢ҇ . Съше́дыи с̾ нб҃сѐ , за млрⷭ҇дїе ще́дре , бж҃е всѧ́ческихъ . и҆ ро́ждьсѧ ѿ дв҃ы , спасѝ пᲂю́щїѧ , по́йте всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки .

пѣ́снь , ѳ҃ . і҆рмоⷭ҇ . Что̀ сѐ твᲂѧ̀ ве́лїѧ и҆ пресла́вна та́йна , а҆да́мᲂва дщѝ и҆ вы́шнѧгѡ мт҃и . є҆ди́на к̾бг҃ꙋ неле́стнᲂе на́ше приста́нище . тѧ̀ немо́л чными пѣ́сньми , вѣ́рнїи бцⷣꙋ велича́емъ . Зако́ны превᲂз̾ше́дъ ѻ҆́ч҃е пᲂще́нїѧ , прᲂсїѧ́лъ є҆сѝ в̾ вᲂз̾держа́нїи всѧ́цѣмъ , и҆ в̾ мл҃твѣ бдѧ̀ , пᲂсто́мъ же в̾кꙋ́пѣ и҆ чистᲂто́ю и҆ гᲂвѣ́нїемъ . тѣ́мже тво́й вѣнча́тель , при кᲂнчи́нѣ страда́нїемъ , тѧ̀ прᲂпᲂвѣ́дꙋетъ хрⷭ҇то́съ . Дᲂсто́йнѡ бг҃ᲂви ꙗ҆ви́сѧ , ꙗ҆́кѡ до́брѣ пᲂдви́гсѧ . всѧ́ко бо бре́мѧ ѿве́ргъ , ле́гкѡ преплꙋ́лъ є҆сѝ ѻ҆́ч҃е , вели́кꙋю и҆ тѧ́жкꙋю житїѧ̀ сегѡ̀ пꙋчи́нꙋ . и҆ прїи́де в̾ приста́нище ти́хо , преше́дъ свᲂѐ тече́нїе мꙋ́дре . боⷢ҇ . Ты̀ є҆сѝ вᲂи́стинꙋ є҆ди́на бцⷣе прⷭ҇нѡ дв҃о , хрⷭ҇тїѧ́нѡмъ направле́нїе , грѣ́шникѡвъ пред̾ста́тельница . и҆з̾ тебе́ бо бл҃гᲂче́стнѡ вᲂсїѧ̀ и҆збавле́нїе . с̾ни́мже ти по́дᲂлгꙋ в̾вѣ́рѣ пѣ́снь скᲂнчава́ю .

свѣти́ленъ . А҆́гг҃льскᲂе житїѐ жела́ѧ , ᲂу҆дали́лъ є҆сѝ себѐ в̾ пꙋсты́нѧхъ . и҆ стра́сти пᲂкᲂри́въ пло́ти , равнᲂа́гг҃ленъ ꙗ҆ви́сѧ мартинїа́не бг҃ᲂно́сне . боⷢ҇ . Гᲂра̀ ю҆́же пред̾ви́дѣ дре́вле бжⷭ҇твенныи а҆ввакꙋ́мъ , присѣ́нна часта̀ , ты̀ ꙗ҆ви́сѧ дв҃о . и҆ тѧ̀ дв҃дъ и҆менꙋ́етъ , ᲂу҆сы́ренꙋ и҆ тꙋчнꙋ̀ .