МЦⷭ҇А ТОГО́ЖЕ ВЪ ЕІ҃ ДН҃Ь

Ст҃а́гѡ а҆пⷭ҇ла ѻ҆ни́сима . =Ве́черъ , на гдⷭ҇и вᲂзва́хъ , стихѣ́ры . гла́съ , а҃ . поⷣ . нбⷭ҇нымъ чино́мъ . Всынѧ́ема бл҃гᲂда́тїю вѣ́ры ра́ди бг҃ᲂви ,꙳ и҆ рᲂжде́на па́влᲂвᲂю вѣ́рᲂю ,꙳ бжⷭ҇твеннагѡ а҆пⷭ҇ла ѻ҆ни́сима ,꙳ бг҃ᲂмч҃нка дне́сь ꙳ сщ҃е́ннꙋю є҆гѡ̀ па́мѧть ,꙳ пѣ́сньми сᲂверша́юще вᲂсхвалѧ́емъ . Сᲂѡ҆бра́знѡ рабо́ты и҆збѣжа́въ мꙋ́дре пре́лестныѧ ,꙳ ча́до бг҃ᲂви бы́лъ є҆сѝ по бл҃гᲂда́ти ,꙳ дх҃ᲂмъ ст҃ы́мъ и҆ вѣ́рᲂю хрⷭ҇то́вᲂю .꙳ па́влᲂвѣмъ бжⷭ҇твеннымъ ꙳ и҆ прехва́льнымъ примѣ́шсѧ ᲂу҆ченико́мъ ,꙳ бл҃гᲂпᲂтре́бне ѻ҆ни́симе . Ꙗ҆́кѡ ᲂу҆чени́къ бы́въ сло́вꙋ ,꙳ прᲂпᲂвѣ́дникᲂмъ и҆ а҆пⷭ҇лѡмъ бжⷭ҇твеннымъ па́влᲂмъ всехва́льнымъ ,꙳ ѻ҆ни́симе требл҃же́нне .꙳ три́щи сꙋгꙋ́бь ѡ҆ хрⷭ҇тѣ̀ , и҆ вѣне́цъ прїе́млеши ꙗ҆́кѡ сщ҃е́нникъ .꙳ и҆ ꙗ҆́кѡ прᲂпᲂвѣ́дникъ ,꙳ и҆ ꙗ҆́кѡ страда́лецъ ᲂу҆краша́емь прехва́льне . =сла́ва , и҆ ны́нѣ , боⷢ҇ . Жезло́мъ твᲂегѡ̀ пред̾ста́тельства ,꙳ бг҃ᲂрᲂди́тельнице чⷭ҇таѧ ,꙳ ѕвѣри́ныѧ стра́сти ,꙳ ѻ҆каѧ́нныѧ мѝ дꙋшѝ ѿженѝ ᲂу҆́бѡ .꙳ ми́рнѡ к̾ жи́зни мѧ направлѧ́ющи ,꙳ и҆ ст҃о́мꙋ мѧ ста́дꙋ и҆збра́нныхъ твᲂи́хъ ѻ҆ве́цъ причтѝ . крⷭ҇тᲂбоⷢ҇ . Вᲂз̾дви́жена ꙗ҆́кѡ ви́дѣ на крⷭ҇тѣ̀ а҆́гньца ,꙳ непᲂро́чнаѧ дв҃а пла́чꙋщи вᲂпїѧ́ше ,꙳ сла́дкᲂе мᲂѐ ча́до ,꙳ что̀ но́вᲂе и҆ пресла́внᲂе видѣ́нїе ,꙳ ка́кѡ сᲂдержа́и всѧ́ческаѧ го́рстїю ,꙳ на́ древѣ пригвᲂжда́ешисѧ пло́тїю .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , г҃ . А҆пⷭ҇ле ст҃ы́и ѻ҆ни́симе , мᲂлѝ млⷭ҇тивагѡ бг҃а , да грѣхо́въ ѡ҆ставле́нїе пᲂда́стъ дш҃а́мъ на́шимъ .= сла́ва , и҆ ны́нѣ , боⷢ҇ . и҆лѝ , крⷭ҇тᲂбоⷢ҇ .=

Кано́нъ . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ хᲂди́въ і҆и҃ль , по бе́зднѣ стᲂпа́ми , гᲂни́телѧ фараѡ́на , ви́дѧ пᲂтᲂплѧ́ема , бг҃ꙋ пᲂбѣ́днꙋю пѣ́снь пᲂе́мъ вᲂпїѧ́ше .

запѣ́в̾ : Ст҃ы́и а҆пⷭ҇ле ѻ҆ни́симе , мᲂлѝ бг҃а ѡ҆ на́съ . Прᲂсвѣще́нꙋ бжⷭ҇твеннᲂю , и҆ свѣтᲂза́рнᲂю сп҃са бл҃гᲂда́тїю , ѡ҆мраче́ннꙋю дш҃ꙋ мᲂю̀ , мᲂлѝ ѻ҆ни́симе хрⷭ҇та̀ чл҃кᲂлю́бца бг҃а бл҃же́нне пᲂказа́ти . Свѣтᲂсїѧ́нными па́вла ѡ҆зари́всѧ лꙋча́ми сла́вне , неразꙋ́мїѧ мглы̀ ᲂу҆до́бь и҆збѣжѐ . хрⷭ҇то́ви ра́дᲂстїю пѣ́снь вᲂпїѧ̀ прехва́льне . Бжⷭ҇твенъ пᲂказа́сѧ пребл҃же́нне сщ҃еннᲂдѣ́йственикъ , и҆ бжⷭ҇твеннымъ дх҃ᲂмъ сїѧ́ѧ и҆з̾дале́ча . всю́дꙋ прᲂте́клъ є҆сѝ , хрⷭ҇та̀ вᲂз̾вѣща́ѧ бл҃гᲂче́стнѡ бг҃ᲂбл҃же́нне . боⷢ҇ . Оу҆крашена̀ дᲂбро́тᲂю дᲂбрᲂдѣ́телей бг҃ᲂмт҃и чⷭ҇таѧ , бг҃а и҆́стиннаго па́че ᲂу҆ма̀ зачала̀ є҆сѝ , и҆́же на́съ бжⷭ҇твенными дᲂбрᲂдѣ́тельми ᲂу҆ѧсни́вшагѡ .

пѣ́снь , г҃ . і҆рмо́съ . Нѣ́сть ст҃а ꙗ҆́кᲂже ты̀ , гдⷭ҇и бж҃е мо́й , вᲂзнесы́и ро́гъ вѣ́рныхъ си бл҃же , и҆ ᲂу҆тве́рждь и҆́хъ на ка́мени и҆спᲂвѣ́данїѧ тѝ . Вᲂда́мъ бжⷭ҇твеннымъ и҆сто́чникꙋ приклᲂни́лъ є҆сѝ ᲂу҆ста̀ , и҆ пи́щꙋ пᲂто́ка ѿ негѡ̀ прїе́мъ , лицѐ честны́ѧ цр҃кве сла́вне напᲂи́лъ є҆сѝ . Прича́стїемъ сїѧ́нїѧ мы́сленагѡ , свѣтлѣ́йши ꙗ҆ви́сѧ . бл҃гᲂче́стїѧ свѣща́ми , срⷣца̀ вѣ́рныхъ прᲂсвѣща́ѧ свѣ́тлѡ , и҆ свѣтᲂно́снᲂю заре́ю прᲂпᲂвѣ́данїѧ . Разрѣши́лсѧ є҆сѝ па́влими ᲂу҆́зами , ѿ рабо́тныѧ льстѝ , и҆ свᲂбо́дᲂю бл҃гᲂда́ти пᲂчте́сѧ , сн҃ъ бж҃їи бы́въ , и҆ наслѣ́дникъ бжⷭ҇твенъ пᲂказа́сѧ . боⷢ҇ . Ле́стнѡ ѕмі́й мѧ̀ пе́рвїе , ꙗ҆́кѡ плѣ́нника взѧ́тъ , ле́стїю плѣни́въ . тᲂбо́ю же рабо́ты и҆змѣ́ньсѧ , бг҃ᲂмт҃и пѣ́сньми ᲂу҆бл҃жа́ю тѧ̀ .

сѣда́ленъ . гла́съ , д҃ . Вре́менныѧ ѻ҆ни́симе ѿрѣ́шьсѧ вᲂи́стинꙋ рабо́ты , бы́лъ є҆сѝ ра́бъ хрⷭ҇та̀ бг҃а , и҆ сᲂсꙋ́дъ бл҃гᲂпᲂтре́бенъ . тѣ́мже пᲂрабᲂще́ныѧ враго́мъ свᲂбо́дны пᲂказа́лъ є҆сѝ , бжⷭ҇твеннымъ сло́вᲂмъ , и҆ нбⷭ҇ныѧ гра́жданы , с̾ни́ми же сщ҃е́ннꙋю тѝ па́мѧть вѣ́рно сла́вимъ . сла́ва , и҆ ны́нѣ , боⷢ҇ . Ѡ҆бнᲂви́ла є҆сѝ чⷭ҇таѧ бжⷭ҇твеннымъ ржⷭ҇тво́мъ сѝ , и҆стлѣ́вшее страстьмѝ , земленᲂро́дныхъ ме́ртвенᲂе сꙋщество̀ . и҆ вᲂз̾дви́гла є҆сѝ всѧ̀ ѿ сме́рти , к̾ жи́зни нетлѣ́нїѧ . тѣ́мже тѧ̀ по́дᲂлгꙋ ᲂу҆бл҃жа́емъ всѝ дв҃о препрᲂсла́вленаѧ ꙗ҆́кᲂже прᲂрекла̀ є҆сѝ . крⷭ҇тᲂбоⷢ҇ . На крⷭ҇тѣ́ тѧ вᲂз̾ви́жена , ꙗ҆́кѡ ᲂу҆зрѣ̀ чⷭ҇таѧ мт҃и твᲂѧ̀ сло́ве бж҃їи , мт҃рьски рыда́ющи вѣща́ше , что̀ но́вᲂе и҆ стра́ннᲂе сїѐ сн҃е мо́й чꙋ́до . ка́кѡ жи́знь сы́и всѧ́ческихъ прїе́млеши сме́рть , ѡ҆живи́ти ᲂу҆мерщвле́ныѧ хᲂтѧ̀ ꙗ҆́кѡ млрⷭ҇дъ .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃ᲂлѣ́пнѡ зᲂве́тъ вᲂпїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи . Хᲂтѧ́и всѣ́мъ спасти́сѧ гдⷭ҇ь , ѿ и҆́га тѧ̀ рабо́ты . сщ҃еннᲂдѣ́йственика бл҃же́нне пᲂставлѧ́етъ . сщ҃еннᲂдѣ́йствꙋюща , чⷭ҇тно́е бг҃ᲂѧвле́нне є҆ѵⷢ҇а́лїе . Сн҃ъ ты̀ бы́сть бж҃їи бл҃гᲂда́тїю . тᲂгѡ̀ вᲂз̾вѣща́ѧ є҆динᲂро́днаго сло́ва прⷭ҇нᲂсꙋ́щагѡ , пло́тїю сꙋ́щимъ на землѝ , пресла́внѡ прибли́жьшасѧ . Сло́вᲂмъ сꙋ́днымъ , и҆ бжⷭ҇твеннымъ пᲂма́занїемъ сщ҃е́нства . ꙗ҆́кѡ ст҃ль премꙋ́дре по́жилъ є҆сѝ . и҆ терпѣ́пїемъ лю́тыхъ , бжⷭ҇твенъ мч҃нкъ бы́лъ є҆сѝ . боⷢ҇ . И҆́же є҆стество́мъ без̾нача́льныи сн҃ъ и҆ без̾лѣ́тныи , вре́меннᲂе ѿ дв҃ы ѻ҆трᲂкᲂви́цы зача́ло во́лею прїе́млетъ . сꙋ́щїѧ пᲂд̾ лѣ́тᲂмъ , ѿ тлѧ̀ ѡ҆бнᲂви́ти прᲂмышлѧ́ѧ .

пѣ́снь , є҃ . і҆рмо́съ . Бж҃їимъ свѣ́тᲂмъ тѝ бл҃же , ᲂу҆́тренюющихъ тѝ дш҃а любо́вїю , прᲂсвѣтѝ мᲂлю́сѧ , тѧ̀ вѣ́дѣти сло́во бж҃їе , и҆́стиннагѡ бг҃а , ѿ́ мрака грѣхо́внагѡ и҆зима́юща . Оу҆ма̀ ѻ҆стрᲂто́ю , и҆ дш҃и бл҃же́нне чистᲂто́ю , вра́жїихъ прелетѣ́въ сѣ́тей , вᲂз̾вы́сисѧ к̾ нбⷭ҇нымъ селе́нїемъ , крилѣ̀ бг҃ᲂразꙋ́мїѧ прїе́мъ . Тво́й а҆пⷭ҇лъ бл҃же , плᲂтьско́е твᲂѐ к̾ чл҃кѡмъ прише́ствїе прᲂпᲂвѣ́да , заблꙋжде́ныѧ к̾ пᲂзна́нїю наставлѧ́ѧ , и҆ прᲂсвѣща́ѧ заре́ю вѣ́ры .

Хра́мъ ꙗ҆ви́лсѧ є҆сѝ всебл҃гᲂлѣ́пенъ , в̾нꙋ́трь и҆мѣ́ѧ ꙗ҆́кѡ свѣ́щникъ , сїѧ́нїѧ бжⷭ҇твенныѧ бл҃гᲂда́ти . зда́нїемъ бжⷭ҇твеннагѡ дх҃а , ѡ҆снᲂва́нъ бл҃же́нне ѻ҆ни́симе . боⷢ҇ . Грѣха̀ мᲂегѡ̀ плени́цы , твᲂи́мъ хᲂда́тайствᲂмъ и҆ застꙋпле́нїемъ дв҃о раздерѝ . ты́ бо ѿча́ѧннымъ є҆сѝ наде́жда , и҆́же вѣ́рᲂю притека́ющимъ , в̾ бжⷭ҇твенныи кро́въ тво́й .

пѣ́снь , ѕ҃ . і҆рмо́съ . Жите́йскагѡ мо́рѧ вᲂз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вᲂпїю́ ти , вᲂз̾ведѝ ѿ тлѝ живо́тъ мо́й мнᲂгᲂмлⷭ҇тиве . Ѡ҆блиста́въ ꙗ҆́кѡ сл҃нце , и҆́же с̾ нб҃сѐ зва́нныи , прᲂсвѣще́нїемъ бл҃гᲂда́ти ѡ҆ста́ви тебѐ зарю̀ , и҆з̾дале́ча бл҃гᲂмо́щно ѿгᲂнѧ́щꙋ , невѣ́дѣнїѧ мра́къ пребл҃же́нне . два́жды . Свѣ́тлѡ ѡ҆блиста́лъ є҆сѝ без̾зако́нныхъ гнила́ѧ и҆ ѕлᲂче́стнаѧ мꙋдрᲂва́нїѧ . бл҃гᲂче́стїѧ вѣща́ѧ вᲂи́стинꙋ бжⷭ҇твеннаѧ ᲂу҆че́нїѧ , ст҃лю гдⷭ҇нь всече́стне . боⷢ҇ . Сы́и пᲂви́ненъ грѣхо́мъ , и҆ лю́тѣ ᲂу҆ѧ́звленъ бы́въ ѻ҆каѧ́нныи , к̾ тебѣ̀ бг҃ᲂмт҃и млⷭ҇тивѣй прибѣга́ю мᲂлю́сѧ , навѣ́ты ѡ҆чи́стити сᲂгрѣше́нїемъ мᲂи́мъ .

кᲂнда́къ . гла́съ , д҃ . Ꙗ҆́кѡ лꙋча̀ ꙗ҆ви́сѧ вселе́ннѣй , и҆́скрами ѡ҆сїѧ́емъ сл҃нца бл҃же́нне всесвѣ́тлагѡ па́вла , и҆́же ми̑ра прᲂсвѣти́вшагѡ . тѣ́мъ тѧ̀ всѝ чте́мъ ѻ҆ни́симе .

пѣ́снь , з҃ . і҆рмо́съ . Хладᲂда́тельнꙋ ᲂу҆́бѡ пе́щь сᲂтвᲂрѝ а҆́гг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ ᲂу҆вѣща̀ вᲂпи́ти , бл҃гᲂслᲂве́нъ бг҃ъ ѻ҆ц҃ъ на́шихъ . Бл҃же́ннꙋю прїѧ́лъ є҆сѝ ѻ҆ни́симе кᲂнчи́нꙋ , и҆ неги́блемᲂе без̾сме́ртїе , наде́ждею бл҃же́нне чисто́ю . и҆ пᲂе́ши ра́дꙋѧсѧ хрⷭ҇то́ви , бл҃гᲂслᲂве́нъ бг҃ъ ѻ҆ц҃ъ на́шихъ . двⷤа . Тве́рдымъ ра́зꙋмᲂмъ свᲂи́мъ ѻ҆ни́симе , пре́лести кᲂва́рства пᲂпра́лъ є҆сѝ , бл҃гᲂче́стїѧ сїѧ̀ низ̾ло́жь сᲂсꙋ́ды , бг҃ᲂмꙋ́дре . вᲂпїѧ̀ , бл҃гᲂслᲂве́нъ бг҃ъ ѻ҆ц҃ъ на́шихъ . боⷢ҇ . Ꙗ҆́кѡ сꙋ́щи пренепᲂро́чнаѧ бг҃ᲂневѣ́сто , сло́во бж҃їе зачала̀ є҆сѝ , неразлꙋ́чно в̾ нѣ́дрѣхъ сꙋ́ща ѻ҆те́ческихъ . рꙋка́ма же держи́ма твᲂи́ма , бл҃гᲂслᲂве́наѧ бг҃ᲂмт҃и неи҆скꙋсᲂбра́чнаѧ .

пѣ́снь , и҃ . і҆рмо́съ . И҆с̾пла́мени ст҃ы́мъ ро́сꙋ и҆стᲂчѝ , а҆ пра́веднагѡ же́ртвꙋ и҆ во́ды пᲂпалѝ , всѧ́ бо твᲂри́ши хрⷭ҇тѐ , є҆ли́ко хо́щеши , тѣ́мъ тѧ превᲂзно́симъ гдⷭ҇а во́ вѣки . Со а҆́гг҃лы ликꙋ́еши бл҃же́нне ѻ҆ни́симе , мꙋче́нїѧ вѣнце́мъ ᲂу҆краше́нъ , прⷭ҇то́лꙋ же свѣ́тлѡ влⷣчню пред̾стᲂи́ши . є҆го́же превᲂзно́симъ во́ вѣки . А҆пⷭ҇лꙋ бжⷭ҇твеннᲂмꙋ слꙋжа̀ , неи҆зрече́ннымъ чꙋдесе́мъ и҆мѣ́лъ є҆сѝ дѣ́йство . прᲂпᲂвѣ́дникъ и҆́стиненъ хрⷭ҇то́въ бл҃же́нне бы́въ . є҆го́же превᲂзно́симъ во́ вѣки . И҆сцѣле́нїемъ бл҃гᲂда́тїю , ѿ незави́стна и҆сто́чника сп҃сᲂва ѡ҆бᲂга́щьсѧ , всѣ́мъ по́далъ є҆сѝ . сегѡ̀ пᲂвинꙋ́ѧсѧ бл҃же́нне , бжⷭ҇твеннымъ велѣ́нїемъ . боⷢ҇ . Наꙋ́чьшесѧ чꙋдесѝ твᲂегѡ̀ ржⷭ҇тва̀ вᲂспѣва́емъ , ꙗ҆́кѡ бжⷭ҇твено па́че смы́сла прест҃а́ѧ чⷭ҇таѧ , бг҃ᲂмт҃и пренепᲂро́чнаѧ та́инство . тѧ̀ превᲂзнᲂша́юще во всѧ̀ вѣ́ки .

пѣ́снь , ѳ҃ . і҆рмо́с̾ . Бг҃а чл҃кѡмъ неꙋдо́бь ви́дѣти , на́нь же несмѣ́ютъ чи́ни а҆́гг҃льстїи зрѣ́ти . тᲂбо́ю бо пречⷭ҇таѧ ꙗ҆ви́сѧ на́мъ сло́во вᲂплᲂще́нно , є҆го́же велича́юще , с̾ нбⷭ҇ными вѡ́и тѧ̀ велича́емъ . Свѣти́льникъ пресвѣ́телъ пᲂказа́сѧ , свѣ́тлыми зарѧ́ми сїѧ́ѧ дх҃о́вными . мир̾скі́ѧ кᲂнцы̀ ѡ҆свѣща́ѧ , свѣ́тᲂмъ бг҃ᲂразꙋ́мїѧ , бл҃же́нне ѻ҆ни́симе . тѣ́мже со а҆пⷭ҇льскими ли́ки , тѧ̀ велича́емъ . Плᲂды̀ дх҃о́вными ты̀ ᲂу҆кра́шенъ , на нб҃са̀ взѧ́тсѧ бг҃ᲂѧвле́нне ра́дꙋѧсѧ , хрⷭ҇то́въ а҆пⷭ҇лъ бы́въ , премꙋ́дръ ст҃ль . мч҃нкъ непᲂбѣди́мъ , прᲂпᲂвѣ́дникъ и҆́стиненъ , сꙋ́щимъ па́че ᲂу҆ма̀ бг҃ᲂбл҃же́нне . При́снѡ пред̾ста́ни пᲂю́щимъ тѧ̀ всегда̀ , и҆ твᲂѐ вᲂсхвалѧ́ющимъ тᲂржество̀ , влⷣцѣ пред̾стᲂѧ̀ ѻ҆ни́симе , ве́сь прᲂсвѣща́емъ , ве́сь пресвѣ́телъ . ве́сь ѿ нꙋ́дными блиста́ѧсѧ свѣтлᲂстьмѝ . боⷢ҇ . И҆зба́вленъ бы́въ ржⷭ҇тво́мъ тѝ , неи҆скꙋсᲂбра́чнаѧ мт҃и бж҃їѧ , дре́внѧгѡ ко́жнагѡ ᲂу҆мерщве́нїѧ и҆ клѧ́твы , и҆ тлѧ̀ и҆ сме́рти , и҆́же ѿ грѣха̀ ѿтрѧ́с̾сѧ , с̾ нбⷭ҇ными вѡ́и прⷭ҇нѡ сла́влю тѧ̀ .