16 февраля: свв. мчч. Памфила и Порфирия

МЦⷭ҇А ТОГО́ЖЕ ВЪ ЅІ҃ ДН҃Ь

Ст҃ы́хъ мч҃нкъ памфи́ла и҆ пᲂрфи́рїѧ , и҆ дрꙋ жи́ны и҆́хъ . =Ве́черъ , на гдⷭ҇и вᲂзва́хъ , стихѣ́ры . гла́съ , а҃ . поⷣ . нбⷭ҇нымъ чино́мъ . Памфи́лъ селевкі́й в̾кꙋ́пѣ ,꙳ со ᲂу҆а́лентᲂмъ и҆ с̾ па́влᲂмъ вѣ́рᲂю .꙳ пᲂрфи́рїи же и҆ ѳеѡдꙋ́лъ с̾ си́ми ,꙳ і҆ꙋлїа́нъ и҆ пѧтᲂчи́сленᲂе сᲂбра́нїе є҆ги́птѧнъ ,꙳ да пᲂе́тсѧ пѣ́снено ,꙳ ꙗ҆́кᲂже цѣвни́ца двᲂенадесѧ́тна . Свѣ́тлѡ в̾ вѣ́рѣ хрⷭ҇то́вѣ памфи́ле сла́вне ,꙳ и҆ бжⷭ҇твеннᲂю сла́вᲂю вᲂзне́с̾сѧ ,꙳ кесарі́и ꙗ҆ви́лсѧ є҆сѝ бл҃гᲂꙋкраше́нїе .꙳ ст҃ль в̾не́й прелюбе́зенъ тезᲂи҆мени́тствꙋ бы́въ ,꙳ и҆ страда́лецъ всече́стенъ ,꙳ и҆ мч҃нкъ вѣ́ренъ . По́лкъ со́бралъ є҆сѝ памфи́ле держа́вне ,꙳ страда́лецъ до́блихъ двана́десѧте число́мъ ,꙳ бжⷭ҇твено во́инство ꙗ҆́вльшесѧ .꙳ и҆́мже врагѝ пᲂбѣ́ждьше ,꙳ взѧ́ти бы́сте пестрᲂѡ҆бра́знѡ ко́ гдⷭ҇ꙋ ,꙳ мч҃нїемъ скᲂнча́вшесѧ . =сла́ва , и҆ ны́нѣ , боⷢ҇ . Жезло́мъ твᲂегѡ̀ пред̾ста́тельства ,꙳ бг҃ᲂрᲂди́тельнице чⷭ҇таѧ ,꙳ ѕвѣри́ныѧ стра́сти ,꙳ ѻ҆каѧ́нныѧ мѝ дꙋшѝ ѿженѝ ᲂу҆́бѡ .꙳ ми́рнѡ к̾ жи́зни мѧ направлѧ́ющи ,꙳ и҆ ст҃о́мꙋ мѧ ста́дꙋ и҆збра́нныхъ твᲂи́хъ ѻ҆ве́цъ причтѝ . крⷭ҇тᲂбоⷢ҇ . Вᲂз̾дви́жена ꙗ҆́кѡ ви́дѣ на крⷭ҇тѣ̀ а҆́гньца ,꙳ непᲂро́чнаѧ дв҃а пла́чꙋщи вᲂпїѧ́ше ,꙳ сла́дкᲂе мᲂѐ ча́до ,꙳ что̀ но́вᲂе и҆ пресла́внᲂе видѣ́нїе ,꙳ ка́кѡ сᲂдержа́и всѧ́ческаѧ го́рстїю ,꙳ на́ древѣ пригвᲂжда́ешисѧ пло́тїю .

Кано́нъ . твᲂре́нїе ѳеѡ́фанᲂво . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стᲂпа́ми дре́вле ше́ствᲂвавъ і҆и҃ль , крⷭ҇тᲂѡ҆бра́зно мѡѷсе́ѡвыма рꙋка́ма , а҆мали́кᲂвꙋ си́лꙋ в̾ пꙋсты́ни пᲂбѣди́лъ є҆́сть .

запѣ́въ : Ст҃і́и мч҃нцы , мᲂли́те бг҃а ѡ҆ на́съ . Си́лᲂю прест҃а́гѡ дх҃а , двᲂенадесѧ́тныи сᲂбра́всѧ по́лкъ , крѣ́пкѡ ѕлᲂчести́выхъ без̾бо́жнᲂе и҆ лꙋка́вᲂе ѡ҆пᲂлче́нїе , ꙗ҆́кѡ пᲂбѣди́тель пᲂбѣди́лъ є҆́сть . Пᲂсрами́сѧ , со стрⷭ҇тᲂно́сными мч҃нки вра́гъ пᲂбо́рьсѧ . сво́й бо тꙋ́лъ льсти́выи и҆спраздни́въ го́рцѣ , низ̾лᲂжи́ти невᲂз̾мо́же до́блихъ крѣ́пᲂсть . Гнѣ́въ є҆́ллинскагѡ шата́нїѧ пᲂпра́сте , бжⷭ҇твеннымъ ра́зꙋмᲂмъ мч҃нцы хрⷭ҇то́вы , и҆ мꙋ́дрᲂстїю ᲂу҆кра́шенїи . є҆́йже прᲂти́витисѧ невᲂз̾мᲂго́ша , и҆́же бл҃гᲂче́стїю прᲂти́вницы . боⷢ҇ . Ѻ҆́блакъ пра́вдѣ сл҃нце на́мъ вᲂсїѧ́вшꙋю , ѻ҆́ч҃а сн҃а є҆динᲂро́дна , бцⷣе всепѣ́таѧ бл҃гᲂче́стнѡ сла́вѧще , вы́нꙋ тѧ̀ ᲂу҆бл҃жа́емъ .

пѣ́снь , г҃ . і҆рмоⷭ҇ . Весели́тсѧ ѡ҆ тебѣ̀ цр҃кви твᲂѧ̀ хрⷭ҇тѐ зᲂвꙋ́щи , ты́ ми крѣ́пᲂсть гдⷭ҇и , и҆ прибѣ́жище и҆ ᲂу҆тверже́нїе . Прᲂсїѧ́лъ є҆сѝ бл҃гᲂче́стнѡ дѣ́лᲂмъ и҆ сло́вᲂмъ , и҆ чⷭ҇тны́мъ пᲂма́занїемъ , мч҃нче хрⷭ҇то́въ памфи́ле , сщ҃е́нства бг҃ᲂмꙋ́дре . Ꙗ҆́кᲂже цѣвни́ца пребл҃гᲂлѣ́пна , и҆спᲂвѣ́данїемъ ᲂу҆стро́ена , пᲂю́щи вѣща́нїѧ хрⷭ҇то́ви мч҃нцы , со́брани бы́сте . Текꙋ́ще к̾ ра́зꙋмꙋ , нбⷭ҇нагѡ и҆ чⷭ҇тна́гѡ зва́нїѧ , ꙗ҆́кѡ пᲂбѣди́телїе вѣне́цъ ѿ влⷣки прїѧ́сте . боⷢ҇ . Всели́сѧ в̾ ны̀ , и҆́же в̾ вы́шнихъ живы́и , пречⷭ҇таѧ вы́ше є҆стества̀ , пло́ть бо и҆з̾ тебѐ прїе́мъ ѡ҆блече́сѧ .

сѣда́ленъ . гла́съ , д҃ . Двᲂенадесѧ́тныи ли́къ , бжⷭ҇твенныхъ мч҃нкъ вᲂи́стинꙋ , прᲂти́вꙋ мꙋчи́телемъ враго́мъ ѡ҆пᲂлчи́всѧ тве́рдѡ си́хъ ѻ҆рꙋ́жми вѣ́ры пᲂбѣди́лъ є҆́сть . и҆ вѣнце́мъ ѿ́ бг҃а ѡ҆дѣ́ѧвсѧ , а҆́гг҃льскимъ же лико́мъ причте́сѧ . с̾ни́ми же мо́литъ всегда̀ , и҆зба́витисѧ ѿ напа́стей же и҆ ско́рбей , и҆ вѣ́чныхъ мꙋ́къ , тᲂгѡ̀ блажа́щимъ . сла́ва , и҆ ны́нѣ , боⷢ҇ . Оу҆диви́сѧ і҆ѡ́сифъ па́че є҆сте́ственᲂе зрѧ̀ . и҆ внима́ше мы́слїю рꙋно́внагѡ дᲂждѧ̀ , в̾ без̾сѣ́меннѣмъ зача́тїи твᲂе́мъ бцⷣе . кꙋпинꙋ̀ ѻ҆гне́мъ неѡ҆палѧ́емꙋ . же́злъ а҆арѡ́нᲂвъ прᲂзѧ́бшїи . и҆ свидѣ́тельствꙋетъ ꙗ҆́кѡ ѻ҆брꙋ́чникъ и҆ храни́тель , сщ҃е́нникѡмъ вᲂпїѧ́ше , дв҃аѧ ражда́етъ , и҆ по ржⷭ҇твѣ̀ па́ки дв҃ᲂю пребꙋ́детъ . крⷭ҇тᲂбоⷢ҇ . Дв҃аѧ и҆ а҆́гница , зрѧ́щи на крⷭ҇тѣ̀ , и҆́же без̾сѣ́мене и҆з̾ неѧ̀ а҆́гньца рᲂжде́на па́че ᲂу҆ма̀ , распрᲂсте́рта , и҆ кᲂпїе́мъ прᲂбᲂде́на , ско́рбными ᲂу҆ѧ́звена стрѣла́ми , вᲂпїѧ́ше ᲂу҆ми́льнѡ вᲂсклица́ющи . что́ се но́вᲂе та́инство ; ка́кѡ ᲂу҆мира́еши , и҆́же живᲂтꙋ̀ є҆ди́нъ гдⷭ҇ь ; тѣ́мже вᲂскрⷭ҇нѝ па́дшаго сᲂвᲂз̾ставлѧ́ѧ пра́ѻ҆ц҃а .

пѣ́снь , д҃ . і҆рмо́съ . Вᲂз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свᲂе́мъ , дᲂсто́йнѡ взыва́ющи , сла́ва си́лѣ твᲂе́й гдⷭ҇и . Оу҆крашено̀ бжⷭ҇твенныхъ а҆пⷭ҇лъ , и҆ прᲂро́къ дарᲂва́ньми , ликᲂстᲂѧ́нїе ꙗ҆ви́сѧ мч҃нкъ твᲂи́хъ . си́мъ є҆динᲂчи́слено , влⷣко ꙗ҆́вльшесѧ прᲂмышле́нїемъ тѝ . сла́ва си́лѣ твᲂе́й гдⷭ҇и . Ѿ разли́чныхъ сᲂбра́вшесѧ житі́й , ꙗ҆́кѡ в̾ма́лѣ ве́сь цѣ́лъ ѻ҆́бразъ цр҃кви , спастѝ спᲂдо́бистесѧ . сᲂгла́снѡ зᲂвꙋ́ще , сла́ва си́лѣ твᲂе́й гдⷭ҇и . Направлѧ́емь дла́нїю влⷣки , и҆́же тᲂгѡ̀ ра́ди во́льнꙋю сме́рть пᲂдъѧ́тъ , сᲂбо́ръ прехва́льныи мч҃нкъ , зᲂвы́и тебѣ̀ сла́ва си́лѣ твᲂе́й гдⷭ҇и . боⷢ҇ . Бг҃ᲂгласᲂва́ньми ѡ҆глаша́еми бцⷣе , и҆́же ѡ҆ тебѣ̀ и҆ ви́дѧще си́мъ с̾бы́тїѧ , ра́дꙋисѧ тебѣ̀ вᲂпїе́мъ дв҃о всенепᲂро́чнаѧ , и҆зба́вленїи ржⷭ҇тво́мъ тѝ .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рᲂю вᲂспѣва́ющїѧ тѧ . Нетерпѧ̀ сꙋ́щимъ на землѝ пᲂслꙋжи́ти ѽ памфи́ле . бжⷭ҇твеннᲂе житїѐ , є҆́же ѿ младе́нства и҆мѣ́ѧше , страда́нїемъ ᲂу҆ѧсни́лъ є҆сѝ . И҆́же бжⷭ҇твенными сѣди́нами , и҆ мꙋ́дрᲂстїю ᲂу҆краше́нъ , ѿ́ града ст҃а́гѡ ᲂу҆стреми́всѧ ᲂу҆а́лъ , ꙗ҆́кѡ мч҃нкъ вѣнча́сѧ . Оу҆́мъ и҆мѣ́ѧ хрⷭ҇то́въ , ꙗ҆́кѡ па́влᲂви пᲂслѣ́дꙋѧ прехва́льне . мч҃нческимъ вѣнце́мъ , зако́ннѡ пᲂстрада́въ ᲂу҆краси́сѧ . боⷢ҇ . И҆спра́вила є҆сѝ бцⷣе чⷭ҇таѧ , є҆́вжино пᲂпᲂлзе́нїе , ро́ждьши бг҃асло́ва . и҆́же низ̾ве́рженыхъ паде́нїе и҆спра́вльшагѡ .

пѣ́снь , ѕ҃ . і҆рмо́съ . Пᲂжрꙋ́ти со́ гласᲂмъ хвале́нїѧ гдⷭ҇и , цр҃кви вᲂпїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Наде́ждами вѣ́чнагѡ живᲂта̀ ᲂу҆твержа́еми , є҆́же тѣлесе́мъ с̾краче́нїе , ра́дꙋющесѧ терпѧ́хꙋ до́блїи . бжⷭ҇твенныхъ прᲂро́къ твᲂи́хъ сп҃се , кꙋпнᲂи҆мени́тїи . Сме́ртїю живо́тъ вѣ́чныи и҆скꙋпи́ша , самꙋ́илъ и҆ и҆лїѧ̀ , данїи́лъ бжⷭ҇твенныи і҆єремі́ѧ , и҆ к̾ си́мъ и҆са́їѧ великᲂи҆мени́тыи . Свѣти́льники свѣ́тлы , бг҃ᲂви ны́нѣ є҆ги́петъ вᲂз̾сїѧва́етъ , и҆́же дре́вле глꙋбо́кᲂю тмо́ю пᲂкрыва́емыи неразꙋ́мїѧ , бг҃ᲂразꙋ́мїѧ свѣ́тᲂмъ ѡ҆бᲂгати́всѧ . боⷢ҇ . Го́рꙋ тѧ̀ данїи́лъ зрѧ́ше пренепᲂро́чнаѧ , и҆з̾ неѧ́же ᲂу҆сѣче́сѧ ка́мень , сᲂкрꙋши́выи всѧ́кїѧ пре́лести ѻ҆́бразъ . и҆ и҆спо́лнивъ бг҃ᲂразꙋ́мїѧ всѧ̀ кᲂнцы̀ .

кᲂнда́къ . гла́съ , в҃ . По́лкъ со́бралъ є҆сѝ памфи́ле держа́вне , страда́лецъ до́блихъ два́надесѧть , бжⷭ҇твеннᲂе во́инство ꙗ҆́вльшесѧ , и҆́мже врагѝ пᲂпра́вше , взѧ́ти бы́ша пестрᲂѡ҆бра́зно ко́ гдⷭ҇ꙋ . є҆мꙋ́же мᲂли́тесѧ ѡ҆ дш҃а́хъ на́шихъ .

пѣ́снь , з҃ . і҆рмо́съ . Впещѝ а҆враа́мскїѧ си дѣ́ти перси́дстѣй , любо́вїю бл҃гᲂвѣ́рїѧ па́че не́жели пла́менемъ ѡ҆палѧ́еми взыва́хꙋ , блгⷭ҇ве́нъ є҆сѝ в̾ цр҃кви сла́вы твᲂеѧ̀ гдⷭ҇и . Свѣ́тлымъ лице́мъ , и҆ ᲂу҆ма̀ чистᲂто́ю мч҃нче пред̾зрѧ̀ , ча́ющꙋю тѧ̀ ра́дᲂсть , мꙋ́ки преѡ҆би́дѣлъ є҆сѝ . стрꙋжи́мь немлⷭ҇тивнѡ , пребл҃же́нне пᲂрфи́рїе . И҆́же ю҆́нᲂши трѝ в̾ пещѝ спасы́и бг҃ъ . се́й страстᲂте́рпче бл҃же́нне тѧ̀ , є҆гѡ̀ ра́ди во ѻ҆гнѝ жего́ма ꙗ҆́вѣ прїе́млетъ , бл҃гᲂво́ннꙋ же́ртвꙋ пᲂрфи́рїе . Крѣ́пᲂстїю дш҃и свᲂеѧ̀ ᲂу҆кра́шенъ и҆ тѣлесѐ . всю̀ мꙋчи́телѧ селе́вке крѣ́пᲂсть низ̾лᲂжи́лъ є҆сѝ прехва́льне , бл҃гᲂслᲂве́нъ є҆сѝ бж҃е мо́й , зᲂвы́и гдⷭ҇и ѻ҆ц҃ъ на́шихъ . боⷢ҇ . Ꙗ҆́кѡ бцⷣа краснѣ́йши всеѧ̀ тва́ри прᲂзѧбѐ , бж҃їи бо бы́сть вᲂи́стинꙋ сᲂсꙋ́дъ прест҃ъ . бл҃гᲂслᲂве́на ты̀ в̾ жена́хъ , пренепᲂро́чнаѧ влⷣчце .

пѣ́снь , и҃ . і҆рмо́съ . Рꙋ́цѣ распрᲂсте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ ᲂу҆гаси́ша дᲂбрᲂдѣ́телїю пᲂѧ́савшесѧ , и҆́же бл҃гᲂче́стїѧ люби́тели ѻ҆́трᲂцы взыва́юще , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Зако́нᲂмъ ты̀ пᲂвинꙋ́ѧсѧ хрⷭ҇то́вѣмъ , ѿве́рже всѧ̀ премꙋ́дре селе́вке . ꙗ҆́кѡ во́инъ же бы́лъ є҆сѝ , бл҃гᲂче́стїѧ ᲂу҆чи́тель . ѡ҆ си́рыхъ и҆ вдᲂви́цахъ пᲂпече́нїе и҆мѣ́ѧ . в̾зыва́ѧ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Заре́ю сїѧ́ѧ мы́сленᲂю , ста́рче сла́вныи и҆ мч҃нче ѳеѡдꙋ́ле . и҆ ра́бъ бли́жнїи бы́сть влⷣцѣ пᲂдо́бѧсѧ . є҆го́же крⷭ҇тъ жела́ѧ , распѧ́тїе претерпѣ́лъ є҆сѝ , бл҃гᲂслᲂви́те пᲂѧ̀ всѧ̀ дѣ́ла гдⷭ҇нѧ гдⷭ҇а . Хра́мъ ꙗ҆ви́сѧ і҆ꙋлїа́не бжⷭ҇твеннᲂмꙋ дх҃ꙋ , ѻ҆́бразᲂмъ бл҃ги́мъ ᲂу҆краси́сѧ . и҆спо́лнь ᲂу҆́бѡ бл҃гᲂгᲂвѣ́нїѧ и҆ свѣ́тлᲂсти . и҆спо́лнь же вѣ́ры ꙗ҆́вльсѧ сᲂжига́емь ве́сь . бл҃гᲂслᲂви́те вᲂпїѧ̀ всѧ̀ дѣ́ла гдⷭ҇нѧ гдⷭ҇а . боⷢ҇ . Без̾мт҃ре сло́во ѿ ѻ҆ц҃а сы́и пе́рвїе , без̾ ѻ҆ц҃а бы́сть и҆з̾ тебѐ втᲂро́е пречⷭ҇таѧ вᲂпло́щьсѧ и҆́же пе́рвїе беспло́тныи , за млрⷭ҇дїе вᲂсхᲂтѣ́въ спастѝ пᲂю́щїѧ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а .

пѣ́снь , ѳ҃ . і҆рмо́съ . Ка́мень нерꙋкᲂсѣ́чныѧ гᲂры̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , сᲂвᲂкꙋпи́въ раз̾стᲂѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Є҆ди́нъ то́кмѡ нбⷭ҇ныи и҆мѣ́ти живо́тъ , жела́юще страстᲂте́рпцы , ны́нѣ вре́менныи и҆ тлѣ́нныи преѡ҆би́дѣсте велемꙋ́дрено . тѣ́мже пи́щи лꙋ́чшїѧ , и҆ бл҃же́нныѧ наслажда́етесѧ . Внꙋ́трь ны́нѣ бжⷭ҇твеннагѡ приста́нища , ликꙋ́ете ᲂу҆се́рднѡ , сїѧ́ньми и҆сто́чника пред̾стᲂѧ́ще мч҃нцы сла́внїи . ѿ него́же пᲂчерпа́юще , зарѧ́ми прᲂсвѣща́етесѧ . Всѣ́хъ и҆́же вѣ́рᲂю твᲂрѧ́щихъ , пресвѣ́тлꙋю тѝ па́мѧть , двᲂенадесѧ́тныи ли́че , ны́нѣ пᲂмина́ѧ ко влⷣцѣ хрⷭ҇тꙋ̀ с̾ тᲂбо́ю жили́щꙋ спᲂдо́битисѧ пᲂмᲂли́сѧ . боⷢ҇ . Ꙗ҆́кѡ мт҃и є҆ди́нагѡ влⷣки , всѣ́хъ тваре́й превы́ш̾ши бы́сть дв҃о мр҃і́е . тѣ́мже вѣ́рнїи тѧ̀ всѝ пренепᲂро́чнаѧ , ны́нѣ ра́дꙋющесѧ , и҆ веселѧ́щесѧ велича́емъ .

<< Previous

Contents

Next >>