МЦⷭ҇А ТОГО́ЖЕ ВЪ ЗІ҃ ДН҃Ь

Ст҃а́гѡ великᲂмч҃нка ѳео́дѡра ти́рᲂна . =Ве́черъ , на гдⷭ҇и вᲂзва́хъ , стихѣ́ры . гла́съ , в҃ . поⷣ . є҆=гда̀ ѿ́ древа . Да́ръ хрⷭ҇то́съ бᲂгатᲂтво́ренъ , тѧ̀ вселе́ннѣй дадѐ , бл҃гᲂда́тель бг҃ъ . да́ръ тво́й честнꙋ́ю кро́вь ѳео́дѡре , тᲂгѡ̀ ра́ди и҆злїѧ́нꙋю , и҆ бг҃ᲂче́стїѧ ре́внᲂсти принᲂси́мꙋю є҆мꙋ̀ прїе́мъ . є҆мꙋ́же ны́нѣ бл҃гᲂче́стнымъ дерзнᲂве́нїемъ мч҃нче пред̾стᲂѧ̀ , всѧ̀ и҆́же к̾ тебѣ̀ притека́ющїѧ спаса́й . Сто́лпъ є҆сѝ тве́рдъ , сᲂпрᲂти́вныхъ наше́ствїѧ ѿрѣва́ѧ . пᲂбо́рникъ непᲂбѣди́мъ хва́лѧщимъ тѧ̀ . ско́рᲂе застꙋпле́нїе , те́плᲂе пред̾ста́тельство . бо́рзᲂе и҆збавле́нїе , ѻ҆́бщаѧ по́мᲂщь . мᲂли́твеникъ си́ленъ бл҃же́нне , и҆зба́витель гᲂто́въ , всѣ́мъ вѣ́рнѡ мᲂлѧ́щимъ тѧ̀ ѳео́дѡре . И҆мѣ́ѧ пᲂто́къ пи́щи , и҆ ѡ҆ставле́нїѧ во́дꙋ , хрⷭ҇та̀ бл҃гᲂпремѣни́телѧ . свидѣ́тель и҆́стиненъ тᲂгѡ̀ бы́въ . пᲂто́ка и҆зба́ви мѧ̀ грѣхо́внаго . во́дꙋ ми ᲂу҆ти́ши непᲂстᲂѧ́ннꙋю , ᲂу҆ста́ви напа́стемъ бꙋ́рю . спасѝ къ вы́шнѣй тишинѣ̀ , дᲂстᲂбл҃же́нне ѳео́дѡре .

и҆́ны , стихѣ́ры . гла́съ , д҃ . поⷣ . ꙗ҆́кѡ до́блѧ .= Ре́внᲂстїю бжⷭ҇твеннᲂю дви́жимъ ,꙳ и҆ дш҃е́ю распалѧ́емь ,꙳ любо́вїю сла́вне сп҃са хрⷭ҇та̀ .꙳ с̾ хра́мᲂмъ пᲂпали́лъ є҆сѝ ,꙳ бᲂги́ню лжеи҆мени́тꙋю ,꙳ влⷣки и҆ бг҃а вᲂз̾вѣща́ѧ и҆́мѧ .꙳ и҆ пᲂсрами́лъ є҆сѝ мꙋчи́телемъ шата́нїѧ стрⷭ҇тᲂте́рпче .꙳ и҆ ра́дᲂсти вѣ́чнѣй ꙳ спᲂдо́бисѧ ѳео́дѡре . На высᲂтꙋ̀ ѳео́дѡре ,꙳ хрⷭ҇то́ва разꙋмѣ́нїѧ вᲂз̾ше́дъ ,꙳ прете́клъ є҆сѝ ви́димаѧ ,꙳ и҆ сегѡ̀ то́кмѡ в̾зыска́лъ є҆сѝ ,꙳ и҆ ѡ҆брѣ́тъ вᲂз̾люби́лъ є҆сѝ .꙳ и҆ до́блественᲂю дш҃е́ю тᲂгѡ̀ ра́ди пᲂстрада́лъ є҆сѝ .꙳ є҆го́же мᲂлѝ , ѿ тлѧ̀ и҆ бѣ́дъ и҆зба́витисѧ ,꙳ и҆́же вѣ́рᲂю твᲂрѧ́щимъ ,꙳ пресла́внꙋю па́мѧть твᲂю̀ . Бг҃ᲂдарᲂва́ннᲂю си́лᲂю ,꙳ стрⷭ҇тᲂте́рпче ѳео́дѡре ,꙳ и҆ пᲂдви́жными ра́нами ѡ҆блᲂже́нъ ,꙳ цр҃е́ви всеѧ̀ тва́ри пред̾ста́лъ є҆сѝ хрⷭ҇тꙋ̀ бг҃ꙋ ,꙳ вѣнцы̀ ѿ негѡ̀ по́чести прїе́млѧ .꙳ є҆го́же мᲂлѝ ,꙳ ѿ тлѧ̀ и҆ бѣ́дъ и҆зба́витисѧ ,꙳ и҆́же вѣ́рᲂю твᲂрѧ́щимъ ,꙳ пресла́внꙋю па́мѧть твᲂю̀ . =сла́ва . гла́съ , ѕ҃ . Сщ҃е́нїѧ дарᲂва́нїе , и҆ бᲂга́тство бжⷭ҇твенныѧ жи́зни . ꙗ҆ви́лсѧ є҆сѝ ми́рᲂви ѳео́дѡре . хрⷭ҇то́съ бо твᲂю̀ мꙋ́дре па́мѧть прᲂсла́ви . в̾ню́же сᲂгла́снѡ вѣ́рнїи ра́дꙋющесѧ пᲂе́мъ , по́двиги бᲂлѣ́зней твᲂи́хъ .= и҆ ны́нѣ , боⷢ҇ . и҆лѝ , крⷭ҇тᲂбоⷢ҇ . поⷣ . всѐ ᲂу҆пᲂва́нїе . Ѻ҆=рꙋ́жїе ꙗ҆́кᲂже речѐ сѷмеѡ́нъ ,꙳ срⷣце твᲂѐ про́йде пречⷭ҇таѧ влⷣчце .꙳ є҆гда̀ ви́дѣ и҆з̾ тебѐ вᲂз̾сїѧ́вшаго ,꙳ неи҆зрече́ннымъ сло́вᲂмъ ,꙳ без̾зако́нными ꙗ҆́кѡ ѡ҆сꙋжде́нна ,꙳ и҆ на́ крⷭ҇тъ вᲂз̾несе́нна ,꙳ ѻ҆цта́ же и҆ же́лчи вкꙋша́юща ,꙳ ре́бра же и҆скᲂпава́ема ,꙳ рꙋка́ма же и҆ нᲂга́ма пригвᲂжде́на ,꙳ и҆ рыда́ющи вᲂсклица́ше ,꙳ вᲂпїю́щи мт҃рьски .꙳ что́ се ча́до сла́дкᲂе , но́вᲂе та́инство .

На стихо́внѣ , во ѻ҆кта́и . сла́ва . гла́съ , и҃ . Страда́льческимъ мꙋ́жествᲂмъ бл҃гᲂче́стнѡ вᲂѡ҆рꙋ́жьсѧ , стрⷭ҇тᲂте́рпче хрⷭ҇то́въ , и҆ слᲂве́снѣй слꙋ́жбѣ , та́йнѡ спᲂбᲂра́ѧ си́лᲂю є҆гѡ̀ , и҆́дᲂльскᲂе ѕлᲂче́стїе , и҆ мꙋчи́тельскᲂе преще́нїе , не́мᲂщно пᲂказа́лъ є҆сѝ . неради́въ ѡ҆ мꙋ́кахъ , и҆ вре́меннѣмъ ѻ҆гнѝ . но ѽ бжⷭ҇твенныхъ даро́въ , и҆ ве́щь и҆ и҆́мѧ , ѿ всѧ́кагѡ ѡ҆б̾стᲂѧ́нїѧ , мл҃твᲂю сѝ спасѝ , твᲂрѧ́щїѧ па́мѧть твᲂю̀ .= и҆ ны́нѣ , боⷢ҇ . и҆лѝ , крⷭ҇тᲂбоⷢ҇ . Ю҆́=ница нескве́рнаѧ , ю҆нца̀ ви́дѧщи на́ древѣ , вᲂз̾дви́жена во́лею , рыда́ющи го́рцѣ , ᲂу҆вы̀ мнѣ̀ вᲂпїѧ́ше любе́знᲂе ча́до , что́ ти сᲂбо́ръ вᲂз̾дадѐ без̾бл҃гᲂда́тныи є҆вре́йскїи , хᲂтѧ́ мѧ без̾ча́дствᲂвати , ѿ тебѐ вселюбе́зныи .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , в҃ . Ве́лїѧ вѣ́ры и҆справле́нїѧ , во и҆сто́чницѣ пла́меннѣ , ꙗ҆́кѡ на вᲂдѣ̀ пᲂко́йнѣ , ст҃ы́и мч҃нкъ ѳео́дѡръ ра́дᲂвашесѧ . ѻ҆гне́мъ бо сᲂже́гсѧ , ꙗ҆́кѡ хлѣ́бъ сла́дᲂкъ трⷪ҇цѣ принесе́сѧ . тᲂгѡ̀ мл҃твами хрⷭ҇тѐ бж҃е пᲂми́лꙋй на́съ .= сла́ва , и҆ ны́нѣ , боⷢ҇ . и҆лѝ , крⷭ҇тᲂбоⷢ҇ .=

Кано́нъ , є҆мꙋ́же краегране́сїе си́це : призыва́ющаѧ тѧ̀ спаса́й всебл҃же́нне . гла́съ , и҃ . пѣ́снь , а҃ . і҆рмо́съ . Во́дꙋ прᲂше́дъ , ꙗ҆́кѡ по́ сꙋхꙋ , и҆з̾ є҆гѵ́петска ѕла̀ и҆збѣжа́въ , і҆и҃льтѧнинъ вᲂпїѧ́ше , и҆зба́вителю бг҃ꙋ на́шемꙋ пᲂе́мъ .

запѣ́в̾ : Ст҃ы́и великᲂмч҃нче ѳео́дѡре , мᲂлѝ бг҃а ѡ҆ на́съ . Бжⷭ҇твеннымъ по́двигᲂмъ мч҃нче хрⷭ҇то́въ пᲂдви́гсѧ , и҆ тече́нїе скᲂнча́въ . вѣ́рꙋ сᲂблю́дъ бжⷭ҇твеннꙋю , пра́вдѣ ѡ҆брѣ́лъ є҆сѝ вѣне́цъ . Па́че є҆сте́ственꙋ сла́вꙋ ѿ хрⷭ҇та̀ прїе́мъ стрⷭ҇тᲂте́рпче , зе́млю всю̀ ѡ҆б̾хо́диши . и҆збавлѧ́ѧ всѧ̀ , и҆́же вѣ́рᲂю и҆ бл҃гᲂгᲂвѣ́нїемъ к̾ тебѣ̀ притека́ющїѧ . Нбⷭ҇ныи сла́вне лико́вникъ , со беспло́тными сы́и , и҆́же на землѝ призыва́ющїѧ тѧ̀ , ѿ бѣ́дъ и҆ напа́стей и҆збавлѧ́ѧ . боⷢ҇ . Ꙗ҆́же премꙋ́дрᲂсть сло́во ѻ҆́ч҃ее несказа́ннѡ ро́ждьши , дꙋшѝ мᲂеѧ̀ лю́тꙋю и҆сцѣлѝ ꙗ҆́звꙋ . и҆ серде́чнꙋю бᲂлѣ́знь ᲂу҆крᲂтѝ .

пѣ́снь , г҃ . і҆рмо́съ . Ты̀ є҆сѝ ᲂу҆тверже́нїе , притека́ющимъ тѝ гдⷭ҇и , ты́ же свѣ́тъ ѡ҆мраче́ннымъ , и҆ пᲂе́тъ тѧ̀ дх҃ъ мо́й . Ѻ҆́гнь мꙋче́нїи тѧ̀ не ᲂу҆страшѝ . тѣ́мже ѻ҆́гнь напа́стей , и҆́же къ тебѣ̀ прибѣга́ющимъ , ᲂу҆тиша́еши ѳео́дѡре . И҆зба́ви мл҃твами сѝ , ѡ҆держа́щїѧ мѧ̀ печа́ли , мч҃нче хрⷭ҇то́въ , всѐ ᲂу҆глажда́ѧ , жите́йскᲂе стрᲂпо́тьство . Всѐ срⷣце мᲂѐ и҆ пᲂмышле́нїе прᲂстира́ю к̾ тебѣ̀ и҆ дш҃ꙋ , твᲂю̀ стрⷭ҇тᲂте́рпче по́мᲂщь тре́бꙋѧ . боⷢ҇ . Оу҆ста́ви непᲂстᲂѧ́ннᲂе пᲂмышле́нїи мᲂи́хъ смꙋще́нїе , мт҃и бж҃їѧ , є҆́же к̾ сн҃ꙋ твᲂемꙋ̀ , направлѧ́ющи движе́нїе .

сѣда́ленъ . гла́съ , д҃ . Мч҃нческими дᲂбро́тами ᲂу҆кра́шенъ , цр҃е́ви нбⷭ҇нᲂмꙋ мч҃нче ра́дꙋѧсѧ , вѣнцено́сецъ пред̾стᲂи́ши ѳео́дѡре . на крⷭ҇тъ бо вᲂз̾дви́женъ бы́сть є҆гѡ̀ ра́ди , и҆ гвᲂз̾дьмѝ пригвᲂжде́нъ . и҆ вᲂлꙋ́ѧми жи́лами , и҆ нᲂгᲂтьмѝ , и҆ ѻ҆чны́мъ зѣ́ницамъ и҆з̾вертѣ́нᲂмъ , претерпѣ́лъ є҆сѝ тве́рдѡ . тѣ́мже тѧ̀ вѣ́рᲂю пᲂчита́емъ превели́кїи . двⷤа . сла́ва , и҆ ны́нѣ , боⷢ҇ . И҆́же на прⷭ҇то́лѣ херꙋви́мстѣ сѣдѧ́и , и҆ в̾ нѣ́дрѣхъ ѻ҆́ч҃ихъ вᲂдвᲂрѧ́ѧсѧ , ꙗ҆́кѡ на прⷭ҇то́лѣ сѣди́тъ ст҃ѣ́мъ свᲂе́мъ , влⷣчце на лᲂнꙋ̀ твᲂе́ю пло́тїю . бг҃ъ бо вᲂи́стинꙋ вᲂцр҃и́сѧ над̾ всѣ́ми ꙗ҆зы́ки , и҆ разꙋ́мнѡ ны́нѣ пᲂе́мъ є҆мꙋ̀ , є҆го́же мᲂлѝ спастѝ рабы̀ твᲂѧ̀ . крⷭ҇тᲂбоⷢ҇ . И҆́же ѿ без̾нача́льна ѻ҆ц҃а рᲂжде́на , ꙗ҆́же на пᲂслѣ́дᲂкъ тѧ̀ пло́тїю ро́ждьшаѧ , на крⷭ҇тѣ̀ ви́сѧща зрѧ́щи хрⷭ҇тѐ , ᲂу҆вы̀ мнѣ̀ вᲂжделѣ́нныи і҆с҃е , вᲂпїѧ́ше , ка́кѡ сла́вимыи ꙗ҆́кѡ бг҃ъ ѿ а҆́гг҃лъ , ѿ без̾зако́нныхъ ны́нѣ чл҃къ , сн҃е во́лею распина́ешисѧ . пᲂю́ тѧ , дᲂлгᲂтерпѣли́ве .

пѣ́снь , д҃ . і҆рмо́съ . Оу҆слы́шахъ гдⷭ҇и смᲂтре́нїѧ твᲂегѡ̀ та́инство , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . Ко́рмчїю тѧ̀ пред̾лага́ю , бж҃їи ᲂу҆го́дниче . ты́ мѧ ѡ҆кᲂрмѝ , вѣ́трилᲂмъ дх҃о́внымъ , и҆ бжⷭ҇твсными вѣ́тры пресла́вне . Ѿ всѧ́кᲂгѡ мо́лимсѧ и҆зба́ви преще́нїѧ , всебл҃же́нне ѳео́дѡре , и҆́же тѧ̀ вѣ́рᲂю бл҃жа́щїѧ , и҆ бжⷭ҇твеннꙋю па́мѧть твᲂю̀ пᲂчита́ющїѧ . Ни живо́тъ ни сме́рть , ни настᲂѧ́щаѧ ни грѧдꙋ́щаѧ , ни ѻ҆́гнь ни ра́ны , ѿ хрⷭ҇та̀ бг҃ᲂмꙋ́дре не ѿлꙋчи́ша тебѣ̀ . боⷢ҇ . Пᲂд̾ лѣ́тᲂмъ бы́вша , и҆́же ѿ ѻ҆ц҃а без̾лѣ́тнѡ вᲂсїѧ́вша , бг҃ᲂмт҃и на́мъ рᲂдила̀ є҆сѝ . є҆го́же мᲂлѝ , спастѝ пᲂю́щїѧ тѧ̀ .

пѣ́снь , є҃ . і҆рмо́съ . Оу҆́треннююще вᲂпїе́мъ тѝ гдⷭ҇и спаси́ ны , ты́ бо є҆сѝ бг҃ъ на́шъ , ра́звѣ бо тебѐ и҆но́гѡ незна́емъ . Мч҃нкѡмъ бы́въ ᲂу҆дᲂбре́нїе , мч҃нче хрⷭ҇то́въ вѣ́рнымъ по́мᲂщь бꙋ́ди , и҆ стѣна̀ нерꙋши́ма . Є҆дине́нїѧ насла́ждьсѧ лꙋ́чшагѡ , и҆́же па́че ᲂу҆ма̀ бл҃ги́хъ ѳео́дѡре , тѧ̀ чтꙋ́щїѧ спаса́й . Пᲂбѣжда́емь любо́вїю зижди́телѧ , зако́нныхъ ѿтрѧсѐ пристра́стїе , и҆ бг҃ᲂви ᲂу҆гᲂди́лъ є҆сѝ . боⷢ҇ . Є҆го́же рᲂдила̀ є҆сѝ дв҃о всенепᲂро́чнаѧ , бг҃а сло́ва , прилѣ́жнѡ мᲂлѝ ѡ҆ на́съ пᲂю́щихъ тѧ̀ .

пѣ́снь , ѕ҃ . і҆рмо́съ . Ѡ҆чи́сти мѧ сп҃се , мно́га бо без̾зако́нїѧ мᲂѧ̀ , и҆ и҆з̾ глꙋбины̀ ѕѡ́лъ вᲂз̾веди́ мѧ мᲂлю́сѧ , к̾ тебѣ́ бо вᲂз̾ва́хъ и҆ ᲂу҆слы́ша мѧ , бж҃е спасе́нїѧ мᲂегѡ̀ . Пᲂбо́рникъ сы́и бл҃гᲂче́стїѧ те́плъ , и҆ пре́лести ѡ҆бличи́тель и҆́дᲂльстѣй бы́въ . бѣсо́мъ мечта́нїѧ , и҆ стрⷭ҇те́мъ ѻ҆́бразы дꙋшѝ мᲂеѧ̀ пᲂтребѝ . Оу҆тверже́нїе мѝ бꙋ́ди , и҆ стѣна̀ мч҃нче непᲂбѣди́ма , не́мᲂщь и҆ гни́лᲂсть ᲂу҆ма̀ мᲂегѡ̀ ᲂу҆твердѝ ѳео́дѡре , твᲂи́мъ пред̾ста́тельствᲂмъ , и҆ сᲂхранѝ неврежде́нно . Во́инства тлетво́рнагѡ , и҆ тлѣ́ннагѡ ѿрече́сѧ . во́инство же жи́зни пребл҃же́нне ѳео́дѡре , до кᲂнца̀ вᲂз̾люби́лъ є҆сѝ . в̾ не́мже пᲂбѣдᲂно́сецъ ꙗ҆ви́сѧ пресла́вне . боⷢ҇ . Вᲂсїѧ̀ ѿ сїѡ́на вы́шнѧгѡ бл҃гᲂлѣ́пїе . ѻ҆дѣѧ́нїе плᲂтьско́е по сᲂє҆дине́нїю неи҆згл҃аннᲂмꙋ , и҆з̾ тебѐ неи҆скꙋсᲂбра́чнаѧ преѡ҆дѣ́ѧнна . и҆ ми́ра прᲂсвѣтѝ .

кᲂнда́къ . гла́съ , и҃ . Вѣ́рꙋ хрⷭ҇то́вꙋ ꙗ҆́кѡ щи́тъ , в̾нꙋ́трь прїе́мъ в̾ срⷣцы сѝ , сᲂпрᲂти́вныѧ си́лы пᲂбѣди́лъ є҆сѝ , страстᲂте́рпче ѳео́дѡре . и҆ вѣнце́мъ съ нб҃сѐ вѣнча́сѧ вѣ́чнымъ , ꙗ҆́кѡ непᲂбѣди́мъ . и҆́кᲂсъ . И҆́же на прⷭ҇то́лѣ свѣтᲂнᲂси́мыи , бл҃гᲂда́рственѡ вѣ́рᲂю пᲂе́мъ тѧ̀ , ꙗ҆́кѡ дарᲂва́нїе бжⷭ҇твенѡ дарᲂва́лъ є҆сѝ , до́блѧгѡ во страда́нїи ѳео́дѡра , и҆́же в̾ житїѝ требл҃же́ннагѡ , и҆ ꙗ҆́кѡ пᲂбо́рника сꙋ́ща и҆́стинѣ . бл҃гᲂчести́вымъ по́мыслᲂмъ , тѧ̀ жела́юще хрⷭ҇тѐ . крѣ́пка пᲂбѣди́телѧ на льсти́вагѡ , ꙗ҆́кѡ пᲂбѣди́тель .

пѣ́снь , з҃ . і҆рмо́съ . И҆́же ѿ і҆ꙋде́и , дᲂше́дше ѻ҆́трᲂцы въ вавѷлѡ́нъ дре́вле , вѣ́рᲂю ᲂу҆тверже́нїи , пла́мень пе́щныи пᲂпра́вше гл҃юще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Тѧ̀ живᲂтꙋ̀ мᲂемꙋ̀ пред̾ста́телѧ , и҆ застꙋ́пника и҆́мамъ спасе́нїю мᲂемꙋ̀ , и҆ храни́телѧ бг҃ᲂмꙋ́дре , ᲂу҆тверже́нїе даю́ща вѣ́рᲂю зᲂвꙋ́щимъ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Ꙗ҆́кѡ красно̀ закᲂле́нїе , са́мъ себѐ гдⷭ҇ви , и҆ сщ҃е́нно приве́лъ є҆сѝ пребл҃же́нне . и҆ ѻ҆гне́мъ мꙋче́нїи , всесᲂже́глсѧ є҆сѝ сла́вне , вᲂпїѧ̀ ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Живо́тнагѡ дх҃нᲂве́нїѧ , насыща́ѧсѧ бл҃же́нне бжⷭ҇твеннагѡ дх҃а , дꙋ́хи ѿгᲂнѧ́еши , недꙋ́ги и҆сцѣлѧ́еши . и҆ зᲂве́ши ра́дꙋѧсѧ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . боⷢ҇ . И҆з̾ ᲂу҆тро́бы твᲂеѧ̀ про́йде , вᲂпло́щьсѧ всѧ́ческихъ дв҃о гдⷭ҇ь . тѣ́мъ тѧ̀ бцⷣꙋ мꙋ́дрствꙋюще правᲂсла́внѡ , сн҃ꙋ твᲂемꙋ̀ взыва́емъ , ѻ҆ц҃ъ на́шихъ бж҃е блгⷭ҇ве́нъ є҆сѝ .

пѣ́снь , и҃ . і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃ᲂчести́вымъ лю́тѣ раз̾жжѐ . си́лᲂю же лꙋ́чшею спасе́ныхъ ви́дѣвъ , твᲂрцꙋ̀ и҆ и҆зба́вителю вᲂпїѧ́ше , дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . Всѧ́ческими прехва́льне тревᲂлне́нїи ѡ҆крꙋжа́еми , и҆ напа́стными прило́ги низ̾лага́еми , пред̾ста́телѧ ско́ра , и҆ пᲂмо́щника и҆ пᲂбо́рника , всѝ вѣ́рнїи тѧ̀ мл҃твеника влⷣцѣ , приво́димъ вᲂпїю́ще , дѣ́ти бл҃гᲂслᲂви́те , сщ҃е́ннїи по́йте лю́дїе , и҆ превᲂзнᲂси́те є҆гѡ̀ во́ вѣки . Грѣхо́вными вери́гами свѧ́заныи пребᲂга́те , и҆ сᲂгрѣше́нїи мᲂи́хъ плени́цами ѡ҆ко́ванъ , прибѣга́ю к̾ пᲂкро́вꙋ твᲂемꙋ̀ вѣнчено́сче , раз̾рѣше́нїе прᲂсѧ̀ . но ꙗ҆́кѡ чꙋ́днѡ ко влⷣцѣ всѣ́хъ бг҃ᲂмꙋ́дре , дерзнᲂве́нїе и҆мѣ́ѧ , мᲂлѝ спасти́сѧ , хрⷭ҇та̀ пᲂю́щимъ во́ вѣки всѧ̀ . Мч҃нческими свѣтлᲂстьмѝ прехва́льне , а҆́гг҃льскимъ причте́сѧ чино́мъ . с̾ ни́ми же ра́дꙋѧсѧ и҆ ликꙋ́ѧ мч҃нче прⷭ҇нѡ , чꙋдᲂтво́рными и҆сцѣле́нїи ᲂу҆ѧшнѧ́еши , любо́вїю чтꙋ́щїѧ , и҆ вѣ́рнѡ пᲂю́щїѧ . лю́дїе превᲂзнᲂси́те гдⷭ҇а во́ вѣки всѧ̀ . боⷢ҇ . Пло́тїю прибли́жисѧ к̾ чл҃кѡмъ , ꙗ҆́кѡ млрⷭ҇дъ , сᲂдѣ́тель и҆ твᲂре́цъ тва́ри , и҆з̾ тебѐ неи҆скꙋсᲂбра́чнаѧ бг҃ᲂрᲂди́тельнице , сїю̀ прїе́мъ . тѣ́мже бцⷣꙋ , вѣ́рнїи тѧ вᲂи́стинꙋ сла́вимъ вᲂпїю́ще , и҆ вѣ́рнѡ пᲂю́ще , лю́дїе превᲂзнᲂси́те хрⷭ҇та̀ во́ вѣки всѧ̀ .

пѣ́снь , ѳ҃ . і҆рмо́съ . Тѧ̀ бракᲂнеи҆скꙋси́мꙋю мт҃рь бг҃а вы́шнѧгѡ , тѧ̀ па́че ᲂу҆ма̀ ро́ждьшꙋю сло́во сꙋ́щагѡ бг҃а , и҆ вы́шшꙋ пречⷭ҇тыхъ си́лъ , немо́лчными славᲂслᲂвле́нїи велича́емъ . Бо́дрена тѧ̀ храни́телѧ , великᲂмч҃нче стѧжа́въ , враго́въ ѕло́е ᲂу҆мышле́нїе ᲂу҆до́бь ѿе́млюща . и҆ цр҃ква́мъ пᲂдаю́ща смире́нїе стрⷭ҇тᲂте́рпче , непреста́ннѡ ᲂу҆бл҃жа́емъ . Крѣ́пᲂсть тебѣ̀ на бѣсы̀ дарᲂва̀ влⷣка . стра́сти же дꙋшѝ и҆ тѣлесѐ и҆сцѣлѧ́еши бл҃же́нне , всебл҃гᲂче́стнымъ дерзнᲂве́нїемъ , мᲂлѧ́сѧ сп҃сꙋ . тѣ́мже тѧ̀ всѝ ᲂу҆бл҃жа́емъ . Лꙋчꙋ̀ трисо́лнечнꙋю , и҆ є҆ди́но зрѧ̀ в̾ тре́хъ бжⷭ҇тво̀ , и҆ нача́ло пренача́льнѡ бл҃гᲂда́тельнᲂе , и҆ и҆сто́чникъ бл҃гᲂсти стрⷭ҇тᲂте́рпче , и҆́же тѧ̀ пᲂю́щїѧ сᲂхранѧ́й . боⷢ҇ . И҆зба́ви мѧ пренепᲂро́чнаѧ мы́сленагѡ плѣне́нїѧ , и҆збавле́нїе вᲂз̾даю́щи влⷣчце , сн҃а твᲂегѡ̀ распѧ́тїе , є҆́же за всѣ́хъ бы́вшее и҆збавле́нїе , и҆ смире́нїе и҆ спасе́нїе пᲂю́щимъ тѧ̀ .

свѣти́ленъ . И҆скꙋси́всѧ ꙗ҆́кᲂже ѕла́то ѻ҆гне́мъ и҆ мꙋ́ками , дᲂсто́инъ ꙗ҆ви́лсѧ є҆сѝ да́ръ бг҃а вы́шнѧгѡ , ѳео́дѡре стрⷭ҇тᲂте́рпче , ѡ҆ на́съ ны́нѣ мᲂли́сѧ . боⷢ҇ . Держа́внымъ сѝ пᲂкро́вᲂмъ , ѿ враго́въ навѣ́та , на́съ чⷭ҇таѧ свᲂѧ̀ рабы̀ сᲂхранѝ , всѧ̀ невреди́мы . тѧ́ бо стѧжа́хᲂмъ , є҆ди́нꙋ прибѣ́жище в̾ нꙋ́ждахъ .

На стихо́внѣ , во ѻ҆кта́и . сла́ва . гла́съ , в҃ . Бжⷭ҇твенныхъ даро́въ , тезᲂи҆мени́та тѧ̀ требл҃же́нне пᲂчита́ю ѳео́дѡре . свѣ́та бо бжⷭ҇твеннагѡ незахᲂди́ма звѣзда̀ ꙗ҆́вльсѧ , прᲂсвѣти́лъ є҆сѝ страда́ньми свᲂи́ми всю̀ тва́рь . и҆ ѻ҆гнѧ̀ крѣпча́йши ꙗ҆́вльсѧ , пла́мень пᲂгаси́лъ є҆сѝ , и҆ льсти́вагѡ ѕмїѧ̀ главꙋ̀ сᲂкрꙋши́лъ є҆сѝ . тѣ́мже в̾ страда́нїѧ твᲂѧ̀ хрⷭ҇то́съ прини́кнꙋвъ , вѣнча̀ бжⷭ҇твеннꙋю главꙋ̀ твᲂю̀ великᲂмч҃нче страда́льче . ꙗ҆́кѡ и҆мѣ́ѧ дерзнᲂве́нїе к̾ бг҃ꙋ , прилѣ́жнѡ мᲂли́сѧ ѡ҆ дш҃а́хъ на́шихъ .= и҆ ны́нѣ , боⷢ҇ . и҆лѝ , крⷭ҇тᲂбоⷢ҇ . Г=ро́здъ зрѣ́лыи чⷭ҇таѧ , є҆го́же невᲂз̾дѣ́ланно во ᲂу҆тро́бѣ нᲂси́ла є҆сѝ , на́древѣ ꙗ҆́кѡ ᲂу҆зрѣ̀ сегѡ̀ пᲂвѣ́шена , рыда́ющи вᲂсклица́ше . и҆ взыва́ше , ча́до сла́дᲂсть и҆ска́паѧ , и҆́мже пїѧ́нство ѿѧ́тсѧ всѧ́кѡ страсте́й бл҃гᲂда́телю , мно́ю тебѐ ро́ждьшею , бжⷭ҇твенными мᲂльба́ми ꙗ҆́кѡ млрⷭ҇дъ .

На литꙋргі́и , бл҃же́нна , на и҃ . ѿ кано́на , ст҃о́мꙋ , пѣ́снь г҃ ѧ , и҆ ѕ҃ ѧ . прᲂки́менъ , ѱл҃о́мъ дв҃дᲂвъ . вᲂз̾весели́тсѧ пра́ведникъ ѡ҆́ гдⷭ҇ѣ , и҆ ᲂу҆пᲂва́етъ на́нь . сти́хъ . ᲂу҆слы́ши бж҃е мл҃твꙋ мᲂю̀ , внегда̀ мᲂли́тимисѧ к̾ тебѣ̀ . а҆пⷭ҇лъ , къ тимᲂѳе́ю . заⷱ҇ , сч҃в .= а҆ллилꙋ́їѧ . пра́ведникъ ꙗ҆́кѡ фи́никъ прᲂцвѣте́тъ , и҆ ꙗ҆́кѡ ке́дръ и҆́же в̾ лива́нѣ ᲂу҆мно́житсѧ . =сти́хъ . насажде́ни в̾ дᲂмꙋ̀ гдⷭ҇ни , вᲂдво́рѣхъ бг҃а на́шегѡ прᲂцвѣтꙋ́тъ . є҆ѵⷢ҇а́лїе , ѿ =і҆ѡа́нна . заⷱ҇ , н҃в . =прича́стенъ . в̾па́мѧть вѣ́чнꙋю бꙋ́детъ пра́ведникъ .