МЦⷭ҇А ТОГО́ЖЕ ВЪ ИІ҃ ДН҃Ь

И҆́же во ст҃ы́хъ ѻ҆ц҃а на́шегѡ леѡ́нтїѧ , па́пы ри́мскагѡ . =Ве́черъ , на гдⷭ҇и вᲂзва́хъ , стихѣ́ры . гла́съ , и҃ . поⷣ . что́ тѧ и҆менꙋ́емъ . Что́ тѧ и҆менꙋ́ю бг҃ᲂдᲂхнᲂве́нне ;꙳ главꙋ̀ правᲂсла́вныѧ цр҃кве хрⷭ҇то́вы .꙳ ѻ҆́ко бл҃гᲂче́стїѧ зри́тельно ꙗ҆́вѣ .꙳ срⷣце разꙋмѣ́нїемъ дх҃а ,꙳ всѣ́мъ и҆стᲂча́юща кᲂнце́мъ сло́во жи́зни .꙳ бг҃ᲂначерта́нныи сви́тᲂкъ ,꙳ правᲂсла́вїѧ и҆спо́лненъ .꙳ мᲂлѝ спасти́сѧ дш҃а́мъ на́шимъ . Что́ тѧ ны́нѣ прᲂнарекꙋ̀ чꙋ́дне ;꙳ прᲂпᲂвѣ́дника и҆́стинѣ ,꙳ и҆ ѡ҆снᲂва́нїе тве́рдо .꙳ старѣ́йшинꙋ верхо́вна сᲂбо́рꙋ честно́мꙋ .꙳ пра́вило ᲂу҆че́нїемъ и҆звѣ́стно ,꙳ и҆ мѣ́рило и҆мꙋ́ще и҆справле́нїе , нестѡ́рїево раз̾дѣле́нїе ,꙳ и҆ є҆втихі́ево слїѧ́нїе ѿсѣка́юща ,꙳ бг҃ᲂплете́нными ꙗ҆вле́ньми . Что́ тѧ ны́нѣ нарекꙋ̀ ди́вныи ;꙳ нача́льника и҆ цр҃ѧ тѣле́снымъ страсте́мъ ,꙳ дш҃е́внᲂе влⷣчество направлѧ́юща свѣ́тлѡ .꙳ бжⷭ҇твеннагѡ ми́лᲂванїѧ сᲂсꙋ́дъ ,꙳ любвѐ сᲂверше́ныѧ жили́ще ,꙳ чл҃кᲂлюбе́зна сᲂгрѣша́ющимъ ,꙳ ѡ҆браще́нїѧ ѡ҆жида́юща .꙳ мᲂлѝ спасти́сѧ дш҃а́мъ на́шимъ . =сла́ва , и҆ ны́нѣ , боⷢ҇ . Кᲂмꙋ̀ ᲂу҆пᲂдо́бисѧ ѻ҆каѧ́ннаѧ ,꙳ к̾ пᲂкаѧ́нїю ника́кᲂже вᲂзни́чꙋщи дш҃е .꙳ и҆ ѻ҆гнѧ̀ не ᲂу҆жаса́ющисѧ , ѕлы́хъ ѡ҆жида́ющагѡ .꙳ вᲂста́ни , и҆ є҆ди́нꙋ к̾ застꙋпле́нїю ꙳ ско́рꙋю призᲂвѝ . и҆ вᲂзᲂпі́и ,꙳ дв҃о мт҃и мᲂлѝ ꙳ свᲂегѡ̀ сн҃а и҆ бг҃а на́шегѡ ,꙳ и҆зба́вити мѧ̀ ѿ сѣ́тей льсти́вагѡ . крⷭ҇тᲂбоⷢ҇ . А҆́гньца а҆́гница ꙗ҆́кѡ ᲂу҆зрѣ̀ ,꙳ на́ древѣ прᲂсте́рта во́лею распина́тельнѣ .꙳ вᲂпїѧ́ше мт҃рьски , и҆ бᲂлѧ́щи с̾ пла́чемъ .꙳ сн҃е мо́й , что̀ стра́ннᲂе сѐ видѣ́нїе .꙳ и҆́же всѣ́мъ живо́тъ даѧ́и ꙗ҆́кѡ бг҃ъ .꙳ ка́кѡ ᲂу҆мира́еши дᲂлгᲂтерпѣли́ве ,꙳ чл҃кѡмъ пᲂдаѧ́и вᲂскрⷭ҇нїе .꙳ сла́влю твᲂѐ мно́гᲂе бж҃е мо́й смᲂтре́нїе .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , и҃ . Правᲂсла́вїю наста́вниче , бл҃гᲂче́стїѧ ᲂу҆чи́телю и҆ чистᲂтѣ̀ . вселе́ннѣй свѣти́льниче , а҆рхїєре́ѡмъ бг҃ᲂдх҃нᲂве́ннᲂе ᲂу҆дᲂбре́нїе , леѡ́нтїе премꙋ́дре . ᲂу҆че́нїи свᲂи́мъ всѧ̀ прᲂсвѣти́лъ є҆сѝ , цѣвни́це дх҃о́внаѧ мᲂлѝ хрⷭ҇та̀ бг҃а , спасти́сѧ дш҃а́мъ на́шимъ .= сла́ва , и҆ ны́нѣ , боⷢ҇ . и҆лѝ , крⷭ҇тᲂбоⷢ҇ .=

Кано́нъ . твᲂре́нїе ѳеѡ́фанᲂво . гла́съ , и҃ . пѣ́снь , а҃ . і҆рмо́съ . Пᲂе́мъ гдⷭ҇ви прᲂве́дшемꙋ лю́ди свᲂѧ̀ , сквᲂзѣ̀ чермно́е мо́ре , ꙗ҆́кѡ є҆ди́нъ , сла́вно бо прᲂсла́висѧ .

запѣ́въ : Ст҃лю хрⷭ҇то́въ леѡ́нтїе , мᲂлѝ бг҃а ѡ҆ на́съ . Сщ҃е́нїѧ пᲂма́занїемъ , пребл҃же́нне ᲂу҆дᲂбре́нъ . ᲂу҆краси́лъ є҆сѝ сїѐ , дᲂбрᲂдѣ́тельными ви́ды пребᲂга́те . Ꙗ҆́кᲂже зрѣ́лъ гро́здъ ѻ҆́ч҃е , и҆згне́тъ пᲂмышле́нїе . весе́лїѧ крати́рꙋ требл҃же́нне , премꙋ́дрᲂсти твᲂеѧ̀ всѣ́мъ пред̾лᲂжи́лъ є҆сѝ . Петра̀ верхо́внагѡ сᲂпрⷭ҇то́льникъ бы́лъ є҆сѝ . тᲂгѡ̀ и҆мѣ́ѧ нра́въ и҆ ре́внᲂсть бг҃ᲂмꙋ́дре , є҆́же ѡ҆ вѣ́рѣ . боⷢ҇ . Зако́на престꙋпле́нїемъ ѡ҆сꙋжде́на первᲂзда́ннаго , сп҃са ро́ждьши бг҃ᲂмт҃и чⷭ҇таѧ , свᲂбᲂди́ла є҆сѝ .

пѣ́снь , г҃ . і҆рмо́съ . Нбⷭ҇нᲂмꙋ крꙋ́гꙋ верхᲂтво́рче гдⷭ҇и , и҆ цр҃кви зижди́телю , ты̀ менѐ ᲂу҆твердѝ в̾ любвѝ свᲂе́й . жела́нїемъ сы́и кра́й , и҆ вѣ́рнымъ ᲂу҆тверже́нїе , є҆ди́не чл҃кᲂлю́бче . Сто́лпъ правᲂсла́вїѧ хрⷭ҇то́вѣ цр҃кви , премꙋ́дре львѐ , ᲂу҆се́рднѡ ра́дꙋѧсѧ вᲂз̾дви́глъ є҆сѝ . є҆го́же держа́щи , є҆ретико́мъ без̾бо́жныѧ разрꙋша́етъ пᲂлкѝ и҆ сᲂбо́рища . Нбⷭ҇ныѧ и҆ бжⷭ҇твенныѧ насы́щьсѧ бл҃гᲂда́ти , цр҃ко́внаѧ ᲂу҆че́нїѧ ѻ҆́ч҃е пред̾лᲂжи́лъ є҆сѝ . всѧ̀ ненави́дѣ є҆ретикѡ́мъ ꙗ҆зыкᲂбо́лїѧ , бл҃гᲂче́стїѧ пᲂбо́рниче , львѐ пребᲂга́те . Свѣ́тᲂмъ пресвѣ́тлымъ ѡ҆зари́всѧ прпⷣбне , неи҆з̾гл҃аннагѡ и҆ бжⷭ҇твеннагѡ вᲂчл҃ченїѧ сло́во ᲂу҆ѧсни́лъ є҆сѝ . сꙋгꙋ́бо ре́къ сꙋщество̀ , и҆ сꙋгꙋ́бо дѣ́йство , вᲂпло́щьшагᲂсѧ бг҃а . боⷢ҇ . Оу҆краси́сѧ ꙗ҆́кѡ невѣ́ста , дв҃ьствеными дᲂбро́тами , ѡ҆бра́дᲂваннаѧ дв҃о , є҆ди́на всепѣ́тнаѧ . всѧ́кїѧ бо тва́ри , ты̀ ѡ҆благᲂдѣ́тисѧ мно́жае , ꙗ҆́кѡ вино́внᲂе сло́во ро́ждьшаѧ .

сѣда́ленъ . гла́с̾ , г҃ . Оу҆ста́вилъ є҆сѝ дерзнᲂве́нїѧ , дѣ́лы ᲂу҆вѣ́рилъ є҆сѝ правᲂсла́вїѧ , ꙗ҆́кѡ ᲂу҆пᲂва̀ , ꙗ҆́кѡ ле́въ пра́ведныи . и҆́стинѣ прᲂпᲂвѣ́даеши ᲂу҆че́нїѧ , и҆ ѡ҆блича́еши пре́лести сᲂкрᲂве́нїѧ ѻ҆́ч҃е прпⷣбне . хрⷭ҇та̀ бг҃а мᲂлѝ , дарᲂва́ти на́мъ ве́лїю млⷭ҇ть . сла́ва , и҆ нн҃ѣ , боⷢ҇ . Бжⷭ҇твеннаго є҆стества̀ не ѿлꙋ́чьсѧ , пло́ть бы́въ во ᲂу҆тро́бѣ твᲂе́й . но бг҃ъ в̾чл҃чьсѧ пребы́сть . и҆́же по ржⷭ҇твѣ̀ дв҃ꙋ мт҃рь тѧ̀ , ꙗ҆́кѡ пре́жде ржⷭ҇тва̀ сᲂхра́нь всенепᲂро́чнꙋ є҆ди́нꙋ гдⷭ҇ь . тᲂгѡ̀ прилѣ́жнѡ мᲂлѝ , дарᲂва́ти на́мъ ве́лїю млⷭ҇ть . крⷭ҇тᲂбоⷢ҇ . Нескве́рнаѧ а҆́гница , сло́вꙋ нетлѣ́ннаѧ дв҃а мт҃и на крⷭ҇тѣ̀ ви́дѣвши ви́сима , и҆́же и҆з̾неѧ̀ без̾бᲂлѣ́зни прᲂзѧ́бшаго . мт҃рьски пᲂдо́бнѡ рыда́ющи взыва́ше , ᲂу҆вы̀ мнѣ̀ ча́до мᲂѐ , ка́кѡ стра́ждеши , хᲂтѧ̀ и҆зба́вити ѿ стрⷭ҇те́й бесче́стїѧ чл҃ка .

пѣ́снь , д҃ . і҆рмо́съ . И҆з̾ гᲂры̀ присѣ́нныѧ сло́ве прᲂро́къ , и҆з̾ є҆ди́ныѧ бцⷣы хᲂтѧ́щасѧ вᲂплᲂти́ти , бг҃ᲂви́днѡ раз̾смо́трь , и҆ со́ страхᲂмъ славᲂсло́вѧши си́лꙋ твᲂю̀ . Ле́въ ты̀ ꙗ҆́кѡ вᲂи́стинꙋ пребл҃же́нне ꙗ҆ви́сѧ , смѣше́нїе лисо́мъ ѿгᲂнѧ̀ . цр҃ьскимъ рыка́нїемъ ᲂу҆жаса́ѧ , нече́ствꙋющихъ ᲂу҆мышле́нїѧ . Скры́лъ є҆сѝ и҆злᲂже́нїемъ твᲂи́хъ ᲂу҆че́нїй , бᲂгᲂме́рз̾скихъ є҆ресе́й стᲂпы̀ . сᲂкрᲂве́ннꙋю и҆́стинꙋ и҆з̾слѣ́дᲂвавъ , сщ҃еннᲂтаи́нниче всече́стне . Оу҆́тро ѿ за́пада вᲂсїѧ́лъ є҆сѝ требл҃же́нне . сви́тᲂкъ бл҃гᲂчести́выхъ ᲂу҆че́нїи , ꙗ҆́кѡ зарю̀ цр҃кви бг҃ᲂмꙋ́дре и҆спꙋща́ѧ , и҆ ѡ҆зарѧ́ѧ дш҃а на́ша . боⷢ҇ . Оу҆мертвѝ стремле́нїѧ дв҃о страсте́й мᲂи́хъ . ᲂу҆ста́ви блага́ѧ мᲂлвꙋ̀ сᲂгрѣше́нїи . грѣхо́внꙋю бꙋ́рю , твᲂе́ю тишино́ю , бг҃ᲂрᲂди́тельнице пᲂтреблѧ́ющи .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твᲂегѡ̀ свѣ́те незахᲂдѧ́и , пᲂкры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ запᲂвѣде́й ти пꙋтѝ мᲂѧ̀ напра́ви мᲂлю́тисѧ . Сꙋгꙋ́бымъ дѣ́йствᲂмъ прᲂпᲂвѣ́дникъ бы́лъ є҆сѝ сп҃са хрⷭ҇та̀ . дѣ́йствᲂвати бо речѐ в̾ ко́емждо є҆стествѣ̀ ꙗ҆́кᲂже и҆мѧ́ше , со ѡ҆бᲂи́мъ слежа́щимъ ѡ҆бще́нїемъ , ст҃лю бг҃ᲂмꙋ́дре бл҃же́нне . два́жды . Є҆дмнᲂси́льна сꙋ́ща ро́ждьшемꙋ , сло́ва пᲂзна́лъ є҆сѝ . ꙗ҆́кᲂже бо пло́ть сего̀ бы́вша , требл҃же́нне вѣ́рᲂвалъ є҆сѝ . пᲂдо́бнѡ речѐ , плᲂтьска́ѧ сво́йства дѣ́ѧти , несмѣ́снѡ и҆ непрело́жнѡ во ѡ҆бᲂи́хъ . боⷢ҇ . И҆́же пре́жде всѣ́хъ вѣ́къ , є҆ди́нᲂмꙋ вѣ́дᲂмо бг҃ꙋ та́инство , чл҃ка бы́ти всѧ́ческимъ влⷣкꙋ и҆ гдⷭ҇а , и҆ с̾ пло́тїю смѣси́тисѧ крᲂмѣ̀ прелᲂже́нїѧ , и҆з̾ тебѐ дв҃о ꙗ҆ви́сѧ , прехᲂжде́нїе прїе́мъ .

пѣ́снь , ѕ҃ . і҆рмо́съ . Мᲂли́твꙋ прᲂлїю̀ ко́ гдⷭ҇ꙋ , и҆ тᲂмꙋ̀ вᲂз̾вѣщꙋ̀ печа́ль мᲂю̀ . ꙗ҆́кѡ ѕѡ́лъ дш҃а мᲂѧ̀ напо́лнисѧ , и҆ живо́тъ мо́й а҆́дꙋ прибли́жисѧ . и҆ мᲂлю́сѧ ꙗ҆́кѡ і҆ѡ́на , ѿ тлѝ бж҃е мо́й вᲂз̾веди́ мѧ . И҆́же петрꙋ̀ честно́мꙋ сᲂпресто́льникъ , и҆ сегѡ̀ нача́льствᲂмъ ѡ҆бᲂгати́всѧ , и҆ теплꙋ̀ стѧжа́въ ре́внᲂсть , бг҃ᲂдви́жимыи сви́тᲂкъ написа́лъ є҆сѝ є҆рети́ческᲂе велѣ́нїе ѿмета́ѧ смꙋще́нᲂе раствᲂре́нїе несмѣ́снѡ сᲂє҆динѧ́ѧ . Сн҃а є҆ди́нᲂго и҆ хрⷭ҇та̀ и҆ гдⷭ҇а , пре́жде вѣ́къ ѿ ѻ҆ц҃а рᲂжде́на , и҆ на́съ ра́ди ѿ дв҃ы ро́ждьшагᲂсѧ , и҆ ꙗ҆́вльшасѧ на́мъ є҆динᲂсꙋ́щна прᲂпᲂвѣ́далъ є҆сѝ , па́че є҆стества̀ , слꙋже́бниче неи҆з̾гл҃аннымъ бг҃ᲂпрїѧ́тне . боⷢ҇ . Тѧ̀ пречⷭ҇таѧ спасе́нїю хᲂда́таицꙋ , вѣ́рнїи и҆спᲂвѣ́дающе вᲂпїе́мъ , ра́дꙋисѧ чⷭ҇таѧ . ра́дꙋисѧ невѣ́сто дв҃о . ра́дꙋисѧ гᲂро̀ бж҃їѧ присѣ́ннаѧ . ми́рᲂви бо ты̀ ра́дᲂсть приснᲂсꙋ́щнꙋю и҆стᲂчи́ла є҆сѝ .

кᲂнда́къ . гла́съ , г҃ . На прⷭ҇то́лѣ сла́вне сщ҃е́нїѧ сѣ́лъ є҆сѝ , и҆ львѡ́мъ слᲂве́снымъ ᲂу҆ста̀ загради́лъ є҆сѝ , ᲂу҆че́нїи бг҃ᲂдх҃нᲂве́нными честны́ѧ трⷪ҇цы . ѡ҆зари́лъ є҆сѝ свᲂемꙋ̀ ста́дꙋ свѣ́тъ бг҃ᲂразꙋ́мїѧ . сего̀ ра́ди прᲂсла́висѧ , ꙗ҆́кѡ бжⷭ҇твенъ ᲂу҆чени́къ бж҃їѧ бл҃гᲂда́ти . и҆́кᲂсъ . Ѻ҆ц҃а и҆ сн҃а и҆ дх҃а ст҃а́гѡ , трисо́лнечныи свѣ́тъ , трист҃ꙋ́ю си́лꙋ , бжⷭ҇тво̀ є҆ди́но , и҆ є҆ди́но сꙋщество̀ . сїю̀ прᲂпᲂвѣ́давъ , ᲂу҆ста̀ загради́лъ є҆сѝ , и҆ ᲂу҆стны̀ льсти́выѧ є҆рети́чествꙋющихъ , львѐ бг҃ᲂмꙋ́дре . тѣ́мже чⷭ҇тꙋю бг҃ᲂрᲂди́тельницꙋ , ꙗ҆́кѡ бцⷣꙋ и҆спᲂвѣ́давъ , нестѡ́рїево безꙋ́мїе и҆ блѧдᲂсло́вїе низ̾ло́жь . сегѡ̀ ра́ди пᲂзна́сѧ в̾ ми́рѣ и҆ в̾ ри́мѣ , ꙗ҆́кѡ бжⷭ҇твенъ ᲂу҆чени́къ бж҃їѧ бл҃гᲂда́ти .

пѣ́снь , з҃ . і҆рмо́съ . Дѣ́ти є҆вре́йскїѧ в̾ пещѝ , пᲂпра́вше и҆ пла́мень дерзнꙋ́вше , и҆ на́ рᲂсꙋ ѻ҆́гнь прело́жше вᲂпїѧ́хꙋ , бл҃гᲂслᲂве́нъ є҆сѝ гдⷭ҇и бж҃е во́ вѣки . Сна̀ не́далъ є҆сѝ вѣ́ждема , до́ндеже и҆з̾ко́рене и҆сто́рглъ є҆сѝ ле́сть є҆втихі́евꙋ , ѡ҆безꙋ́мившагᲂсѧ . зᲂвы́и , бл҃гᲂслᲂве́нъ бг҃ъ ѻ҆ц҃ъ на́шихъ . двⷤа . Є҆ди́нъ сᲂста́въ во двᲂю̀ сꙋществꙋ̀ , хрⷭ҇та̀ и҆спᲂвѣ́давъ , дѣ́йствꙋюща сꙋгꙋ́бѡ и҆ хᲂтѧ́ща ны́нѣ пᲂе́ши , бл҃гᲂслᲂве́нъ бг҃ъ ѻ҆ц҃ъ на́шихъ . боⷢ҇ . Ны́нѣ к̾ тебѣ̀ прибѣга́ю бг҃ᲂмт҃и , сᲂгрѣше́нїи плени́цами стѧ́гнꙋтъ . за млрⷭ҇дїе млⷭ҇ти , и҆зба́ви мѧ вᲂпїю́ща , бл҃гᲂслᲂве́нъ пречⷭ҇таѧ пло́дъ твᲂегѡ̀ чре́ва .

пѣ́снь , и҃ . і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃ᲂчести́вымъ лю́тѣ раз̾жжѐ . си́лᲂю же лꙋ́чшею спасе́ныхъ ви́дѣвъ , твᲂрцꙋ̀ и҆ и҆зба́вителю вᲂпїѧ́ше , дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . Ве́сь свѣ́телъ ꙗ҆́кѡ сл҃нце , ѿ за́пада вᲂсїѧ́лъ є҆сѝ , чꙋ́до бг҃ᲂгл҃иве ꙗ҆́вѣ пресла́вно . смѣше́нїе и҆ смꙋще́нїе є҆втихі́ево и҆зсꙋша́ѧ ꙗ҆́вѣ , и҆ нестѡ́рїево раздѣле́нїе пресѣка́ѧ , ᲂу҆ча̀ є҆ди́нᲂгѡ честѝ хрⷭ҇та̀ , во двᲂю̀ сꙋществꙋ̀ нераз̾дѣ́льнѡ , непрело́жнѡ несмꙋ́тнѡ . Бг҃ᲂмъ дви́жимь , бл҃гᲂче́стїю ᲂу҆че́нїѧ , ꙗ҆́кᲂже на бг҃ᲂчерта́нныхъ скрижа́лѣхъ вᲂѡ҆брази́лъ є҆сѝ . ꙗ҆́кᲂже мѡѷсе́й втᲂры́и ꙗ҆́вльсѧ бжⷭ҇твеннымъ лю́демъ , и҆ сᲂбо́рꙋ честны́хъ ᲂу҆чи́телей . зᲂвы́и , дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . Вᲂплᲂще́на прпⷣбне , и҆́же пре́жде беспло́тнаго пᲂзна́лъ є҆сѝ , сло́во ѻ҆́ч҃ее є҆динᲂро́днᲂе и҆ сᲂбезнача́льнᲂе , в̾ лѣ́то без̾лѣ́тнаго , ѡ҆писа́на ᲂу҆́бѡ пло́тїю , ꙗ҆́кѡ твᲂрца́ же ѡ҆писа́нїѧ невѣ́дꙋща , ᲂу҆чи́ши взыва́ти , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . боⷢ҇ . Ѻ҆де́ждею тѣле́снᲂю ѡ҆дѣ́ѧсѧ пречⷭ҇таѧ , ѿ твᲂи́хъ крᲂве́й . и҆́же прᲂсвѣща́ѧ дᲂбро́тами , сл҃нцемъ и҆ лꙋно́ю не́бо прᲂсвѣ́щь бг҃ъ , ѡ҆дш҃евле́но тѧ̀ дрꙋго́е не́бо пᲂказа́въ . є҆го́же дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки .

пѣ́снь , ѳ҃ . і҆рмо́с̾ . Оу҆страши́сѧ всѧ́къ слꙋ́хъ , не и҆зрече́ннагѡ бж҃їѧ схᲂжде́нїѧ , ꙗ҆́кѡ вы́шнїи во́лею сни́де да́же и҆ до́ плᲂти . ѿ дв҃ческагѡ бо чре́ва бы́въ ᲂу҆́бѡ чл҃къ . тѣ́мже тѧ̀ пречи́стꙋю бцⷣꙋ , вѣ́рнїи велича́емъ . Сїѧ́еши ны́нѣ таи́нниче хрⷭ҇то́въ , бл҃гᲂлѣ́пїѧ вѣнце́мъ ᲂу҆кра́шенъ . и҆ ꙗ҆́кѡ вѣ́ренъ ст҃ль , пра́вдᲂю вᲂи́стинꙋ ѡ҆дѣ́ѧсѧ . и҆ в̾ ра́йстѣй пи́щи ликꙋ́ѧ чꙋ́дне , ѡ҆ ста́дѣ свᲂе́мъ влⷣкꙋ прилѣ́жнѡ ᲂу҆мᲂлѝ . И҆дѣ́же ны́нѣ патрїа́рхъ , нача́ла же и҆ прⷭ҇то́ли и҆ чи́нᲂве , львѐ пребᲂга́те , ты̀ по дᲂстᲂѧ́нїю ѻ҆́ч҃е всели́сѧ . ꙗ҆́кѡ патрїа́рхъ вᲂи́стинꙋ , и҆ вѣ́рᲂю и҆ бл҃гᲂда́тїю ѡ҆сїѧ́емь . тѣ́мже вси́ тѧ , при́снѡ ᲂу҆блажа́емъ . Ѿ бꙋ́ри жите́йскїѧ преста́вльсѧ ты̀ , ко хрⷭ҇тꙋ̀ прише́лъ є҆сѝ , львѐ всеи҆зрѧ́дне . на мѣ́стѣ ѕла́чнѣ пᲂчива́ѧ , и҆дѣ́же пᲂто́къ пи́щи , и҆ свѣ́тъ невече́рнїи , и҆ несказа́ннᲂе весе́лїе , и҆ ра́дᲂсть пребыва́ющаѧ . боⷢ҇ . Зрѣ́лꙋ пᲂжина́ѧ жи́знь , невреди́мъ дре́вᲂмъ ра́зꙋма . ты́ бо всенепᲂро́чнаѧ , жи́зни дре́во хрⷭ҇та̀ прᲂцвѣла̀ є҆сѝ , и҆́же вхо́ды жи́зни всѣ́мъ сказа́вша . тѣ́мъ тѧ̀ всѝ чⷭ҇таѧ , бцⷣꙋ вѣ́рнїи вᲂз̾вѣща́емъ .

свѣти́ленъ . Ст҃лемъ сла́ва , и҆ вѣ́рнымъ защи́тникъ , ты̀ ꙗ҆ви́сѧ бг҃ᲂмꙋ́дре ѻ҆́ч҃е , и҆ сто́лпъ дᲂбрᲂдѣ́телемъ . тѣ́мже пᲂмина́й всегда̀ , вᲂспѣва́ющїѧ тѧ̀ любо́вїю . боⷢ҇ . Тѧ̀ пред̾ста́тельницꙋ всѝ и҆мꙋ́ще грѣ́шнїи , ѽ прест҃а́ѧ дв҃о . ты̀ бл҃гᲂпремѣни́телѧ на́мъ сᲂтвᲂрѝ сн҃а свᲂегѡ̀ , мт҃рьними сѝ мл҃твами .