МЦⷭ҇А ТОГО́ЖЕ ВЪ ѲІ҃ ДН҃Ь

Ст҃а́гѡ а҆пⷭ҇ла а҆рхи́ппа . =Ве́черъ , на гдⷭ҇и вᲂзва́хъ , стихѣ́ры . гла́съ , и҃ . Свѣ́тᲂмъ слᲂве́снымъ а҆рхи́ппъ , лю́ди прᲂсвѣти́лъ є҆́сть , и҆ невѣ́дѣнїѧ тмы̀ и҆зба́ви . и҆ пᲂстрада́въ , и҆ пᲂпра́въ врага̀ , к̾ сїѧ́нїю невече́рнемꙋ вᲂстечѐ , и҆ со а҆́гг҃лы ны́нѣ весели́тсѧ . тᲂгѡ̀ мᲂльба́ми влⷣко , всѣ́мъ пᲂда́ждь ве́лїю млⷭ҇ть . Влеко́мъ бл҃же́нне и҆ стрѣче́мь , и҆ всѣ́ми и҆нѣ́ми ѡ҆крꙋже́нъ лю́тѣ ви́ды , не ѿве́ржесѧ хрⷭ҇та̀ . ни и҆стꙋка́ннымъ че́сти прине́слъ є҆сѝ . тѣ́мже вѣне́чникъ бы́лъ є҆сѝ прⷭ҇нѡ мᲂлѧ́сѧ , всѣ́мъ дарᲂва́ти ве́лїю млⷭ҇ть . Кро́вїи бжⷭ҇твенными стрꙋѧ́ми , мч҃нче ѡ҆ст҃и́лъ є҆сѝ зе́млю бг҃ᲂмꙋ́дре . ᲂу҆ѧзви́лъ є҆сѝ ꙗ҆́звами свᲂи́ми , мно́жество бѣсо́въ лꙋка́выхъ . и҆стᲂча́ѧ же непреста́ннѡ и҆сцѣле́нїѧ , стра́сти и҆сцѣлѧ́еши лю́тыѧ . тѣ́мже твᲂи́ми мл҃твами , и҆спрᲂсѝ всѣ́мъ бл҃же́нне ве́лїю млⷭ҇ть . =сла́ва , и҆ ны́нѣ , боⷢ҇ . И҆схи́ти мѧ влⷣчце , ѿ рꙋкѝ ѕмїи́ныѧ чл҃кᲂꙋбі́ица , бᲂрю́щаго мѧ̀ ле́стїю пᲂжре́ти до кᲂнца̀ . сᲂкрꙋшѝ че́люсти є҆гѡ̀ мᲂлю́сѧ , и҆ кᲂва́рствїѧ разᲂрѝ , ꙗ҆́кѡ да и҆зба́вльсѧ ѿ сегѡ̀ нᲂгте́й , вᲂз̾велича́ю си́лꙋ твᲂю̀ . крⷭ҇тᲂбоⷢ҇ . Нетерплю̀ ча́до ви́дѣти тѧ , и҆́же бо́дрᲂсть всѣ́мъ даю́щаго , на́ древѣ ᲂу҆снꙋ́вша , ꙗ҆́кѡ да дре́вле ѿ престꙋпле́нїѧ плᲂдо́мъ , сно́мъ всепа́гꙋбнымъ ᲂу҆снꙋ́вшимъ , бжⷭ҇твенѡ и҆ спаси́тельнѡ бᲂдрᲂва́нїе пᲂда́си , дв҃аѧ гл҃аше рыда́ющи . є҆ѧ́же велича́емъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , г҃ . А҆пⷭ҇ле ст҃ы́и а҆рхи́ппе , мᲂлѝ млⷭ҇тиваго бг҃а , да грѣхо́въ ѡ҆ставле́нїе пᲂда́стъ дш҃а́мъ на́шимъ .= сла́ва , и҆ ны́нѣ , боⷢ҇ . и҆лѝ , крⷭ҇тᲂбоⷢ҇ .=

Кано́нъ . твᲂре́нїе і҆ѡ́сифᲂво . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стᲂпа́ми дре́вле ше́ствᲂвавъ і҆и҃ль , крⷭ҇тᲂѡ҆бра́зно мѡѷсе́ѡвыма рꙋка́ма , а҆мали́кᲂвꙋ си́лꙋ в̾ пꙋсты́ни пᲂбѣди́лъ є҆́сть .

запѣ́въ : Ст҃ы́и а҆пⷭ҇ле а҆рхи́ппе , мᲂлѝ бг҃а ѡ҆ на́съ . Ѻ҆блиста́въ прᲂсвѣще́нїемъ бл҃гᲂда́ти , па́велъ премꙋ́дрыи , ꙗ҆́кᲂже зарю̀ бл҃же́нне тѧ̀ свѣтлꙋ̀ ѡ҆ста́ви , ѿгᲂнѧ́щꙋ мнᲂгᲂбо́жїѧ а҆рхи́ппе тмꙋ̀ глꙋбо́кꙋю дх҃ᲂмъ . Гл҃ъ бжⷭ҇твенныхъ плени́цами ᲂу҆лᲂвле́нъ бы́сть , па́вла прᲂпᲂвѣ́дника . и҆ и҆з̾ глꙋбины̀ ѕло́бы вра́жїѧ , лю́ди пресла́внѡ ᲂу҆лᲂви́лъ є҆сѝ . и҆ слᲂве́сно бра́шно , на бжⷭ҇твеннꙋю трапе́зꙋ прине́слъ є҆сѝ . Въ ри́зꙋ ѡ҆дѣ́ѧнъ а҆рхи́ппе , бжⷭ҇твенныѧ бл҃гᲂда́ти . ѡ҆бнажи́вшїѧсѧ сла́вы бж҃їѧ , в̾ нетлѣ́нїѧ ри́зꙋ , и҆ спасе́нїѧ сла́вне ѻ҆де́ждꙋ бжⷭ҇твеннꙋю ѡ҆дѣ́лъ є҆сѝ . боⷢ҇ . Ви́дѣвше прⷪ҇ро́ческима ѻ҆чи́ма , и҆здале́ча пречⷭ҇таѧ , є҆́же па́че ᲂу҆ма̀ , твᲂегѡ̀ бжⷭ҇твеннагѡ ржⷭ҇тва̀ стра́шнᲂе та́инство , бг҃ᲂгла́снїи чⷭ҇таѧ , разли́чными ѻ҆бразы̀ ᲂу҆ѧсни́ша .

пѣ́снь , г҃ . і҆рмоⷭ҇ . Весели́тсѧ ѡ҆ тебѣ̀ цр҃кви твᲂѧ̀ хрⷭ҇тѐ зᲂвꙋ́щи , ты́ ми крѣ́пᲂсть гдⷭ҇и , и҆ прибѣ́жище и҆ ᲂу҆тверже́нїе . Вѣ́рна тѧ̀ раба̀ хрⷭ҇то́ва , па́велъ бжⷭ҇твенныи свидѣ́тельствꙋетъ а҆рхи́ппе , и҆ сщ҃е́нна прᲂпᲂвѣ́дника , и҆ сво́ина бл҃же́нне . Распалѧ́емь мы́слено , ᲂу҆тѣ́шителѧ ѻ҆гне́мъ , пᲂпали́лъ є҆сѝ ве́щь го́рькꙋю а҆рхи́ппе , и҆́дᲂльскагѡ гнѣ́ва прехва́льне . Житїѐ твᲂѐ свѣтᲂза́рно , дᲂбрᲂдѣ́тельными мо́лнїѧми прᲂсїѧ̀ , прᲂсвѣща́ѧ а҆рхи́ппе , и҆́же бл҃гᲂче́стнѡ тѧ̀ пᲂчита́ющїѧ . боⷢ҇ . Хра́мъ ꙗ҆ви́сѧ бж҃їи в̾мѣ́стенъ ꙗ҆вле́нно пречⷭ҇таѧ , и҆ чи́сто селе́нїе , и҆ бг҃ᲂлѣ́пенъ сᲂсꙋ́дъ .

сѣда́ленъ . гла́съ , а҃ . Па́влᲂвъ ᲂу҆чени́къ бы́въ бг҃ᲂно́се , прᲂсвѣти́лъ є҆сѝ лю́ди , вᲂспѣва́ти трⷪ҇цꙋ . хра́мы же разᲂри́лъ є҆сѝ па́гꙋбныѧ бл҃гᲂда́тїю . пᲂстрада́въ же терпѣли́внѡ , вѣне́цъ ра́дꙋѧсѧ прїѧ́лъ є҆сѝ ѡ҆ на́съ мᲂлѧ́сѧ , бл҃же́нне а҆рхи́ппе . сла́ва , и҆ ны́нѣ , боⷢ҇ . Без̾невѣ́стнаѧ чи́стаѧ бцⷣе дв҃о , є҆ди́на вѣ́рнымъ пред̾ста́тельнице и҆ пᲂкро́ве , бѣ́дъ и҆ скᲂрбе́й , и҆ лю́тыхъ ѡ҆бстᲂѧ́нїи всѣ́хъ и҆зба́ви , и҆́же натѧ̀ наде́ждꙋ ѻ҆трᲂкᲂви́це и҆мꙋ́щїѧ . и҆ дш҃а на́ша спасѝ , бжⷭ҇твенными мᲂльба́ми сѝ . крⷭ҇тᲂбоⷢ҇ . Зрѧ́щи тѧ̀ хрⷭ҇тѐ всенепᲂро́чнаѧ мт҃и , ме́ртва на́древѣ прᲂсте́рта , вᲂпїѧ́ше , сн҃е мо́й сᲂбез̾нача́льне ѻ҆ц҃ꙋ и҆ дх҃ꙋ , что̀ неи҆зрече́ннѡ смᲂтре́нїе твᲂѐ сїѐ , и҆́мже спа́слъ є҆сѝ , пречⷭ҇тꙋю рꙋкꙋ̀ твᲂе́ю ще́дре сᲂзда́нїе .

пѣ́снь , д҃ . і҆рмо́съ . Вᲂз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свᲂе́мъ , дᲂсто́йнѡ взыва́ющи , сла́ва си́лѣ твᲂе́й гдⷭ҇и . Сказа́юща бжⷭ҇твеннаѧ , и҆ без̾бо́жныѧ свѣ́тлѡ ѡ҆блича́юща , без̾зако́нныи гᲂни́тель бїе́нїемъ предаде́ тѧ , и҆ ра́намъ а҆рхи́ппе , и҆ разли́чнѡ ѡ҆бра́знымъ мꙋ́камъ . До́брѣ прᲂхᲂдѧ̀ житїѐ бл҃же́нне , кᲂнчи́нꙋ ѡ҆брѣстѝ бл҃же́ннꙋ вᲂи́стинꙋ спᲂдо́бисѧ . мч҃нкъ бо бы́лъ є҆сѝ хрⷭ҇то́въ до́блественъ , бᲂлѣ́зни претерпѣ́въ тѣле́сныѧ . Вᲂлнꙋ́ющеесѧ без̾бо́жїѧ гно́емъ , бл҃гᲂчести́выхъ и҆спᲂлне́нїе , ᲂу҆ста́вилъ є҆сѝ сла́дкᲂю со́лїю слᲂве́съ твᲂи́хъ . и҆ ра́дꙋѧсѧ взыва́ше , сла́ва си́лѣ твᲂе́й гдⷭ҇и . боⷢ҇ . Ꙗ҆́кѡ присѣ́ннꙋ прᲂнарече́ тѧ дре́вле го́рꙋ , а҆ввакꙋ́мъ пренепᲂро́чнаѧ , нᲂсѧ́щꙋ сло́во , всѣ́хъ ѡ҆сѣнѧ́ющее ѿ пла́мене престꙋпле́нїѧ , и҆ грѣхо́въ ѻ҆трᲂкᲂви́це ж̾же́нїѧ .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рᲂю вᲂспѣва́ющїѧ тѧ . Бжⷭ҇твенными мо́лнїѧми премꙋ́драгѡ прᲂпᲂвѣ́данїѧ , прᲂсвѣти́лъ є҆сѝ неразꙋ́мїѧ но́щїю ѡ҆держи́мыѧ , бг҃ᲂмꙋ́дре пребл҃же́нне . Бжⷭ҇твеннаѧ рѣка̀ прᲂше́дъ и҆з̾ срⷣца твᲂегѡ̀ , пᲂтᲂпѝ пᲂто́ки ле́стныѧ , и҆ ра́зꙋмы вѣ́рныхъ пребл҃же́нне напᲂѝ . Вжилѧ́емь бл҃ги́ми наде́ждами , претерпѣ́лъ є҆сѝ влеко́мъ четы́рми , и҆ зе́млю ѡ҆сщ҃а́ѧ крᲂвьмѝ бг҃ᲂпрїѧ́тне . боⷢ҇ . Тѧ̀ є҆ди́нꙋ ѿ всѣ́хъ рᲂдо́въ и҆збра̀ гдⷭ҇ь бцⷣе . и҆ и҆з̾ тебѐ вᲂплᲂти́сѧ , ѡ҆бᲂжи́въ чл҃чество .

пѣ́снь , ѕ҃ . і҆рмо́съ . Пᲂжрꙋ́ти со́ гласᲂмъ хвале́нїѧ гдⷭ҇и , цр҃кви вᲂпїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Ника́кᲂже прельще́ньми ѡ҆слабѣ́вша льсти́выи немлⷭ҇тивнѡ тѧ̀ с̾сѣца́етъ ра́нами бг҃ᲂмꙋ́дре , смᲂтрѧ́юща к̾ сла́вѣ . є҆ѧ́же ти хрⷭ҇то́съ пᲂда́стъ прᲂславлѧ́ѧ тѧ̀ . Пᲂлкѝ враго́мъ неви́димымъ , ꙗ҆́звами ᲂу҆ѧзви́лъ є҆сѝ бл҃же́нне , пло́ти твᲂеѧ̀ а҆рхи́ппе . и҆ ѡ҆блича́ѧ срⷣце мꙋчи́телево , терза́ньми расто́рглъ є҆сѝ . И҆́же ка́менїю нечꙋ́вственымъ срⷣцемъ вѣ́рꙋющїи , ка́менїемъ пᲂбива́ютъ тѧ̀ бл҃же́нне , живᲂтꙋ̀ ка́мень и҆спᲂвѣ́дающа , и҆ пре́лести ᲂу҆тверже́нїе , мч҃нче сᲂкрꙋша́юща . боⷢ҇ . Оу҆мерщвле́нїѧ сᲂвле́ксѧ , в̾ жи́знь ѡ҆блече́сѧ , в̾ раѝ дв҃це а҆да́мъ твᲂи́мъ живᲂно́снымъ ржⷭ҇тво́мъ , прест҃а́ѧ бг҃ᲂневѣ́сто .

кᲂнда́къ . гла́съ , д҃ . Ꙗ҆́кѡ ѕвѣздꙋ̀ вели́кꙋ , цр҃кви тѧ̀ стѧжа́вши а҆рхи́ппе , чꙋде́съ твᲂи́хъ и҆́скрами прᲂсвѣща́ема зᲂве́тъ тѝ , спасѝ и҆́же вѣ́рᲂю чтꙋ́щїѧ па́мѧть твᲂю̀ .

пѣ́снь , з҃ . і҆рмо́съ . Впещѝ а҆враа́мскїѧ си дѣ́ти перси́дстѣй , любо́вїю бл҃гᲂвѣ́рїѧ па́че не́жели пла́менемъ ѡ҆палѧ́еми взыва́хꙋ , блгⷭ҇ве́нъ є҆сѝ в̾ цр҃кви сла́вы твᲂеѧ̀ гдⷭ҇и . Бг҃ᲂгласᲂва́ньми бг҃ᲂмꙋ́дрыми бл҃же́нне свидѣ́тельствᲂванъ . ра́зꙋмᲂмъ и҆́стиннымъ , тмꙋ̀ невѣ́дѣнїѧ ѿ дꙋ́шъ ѿгна́лъ є҆сѝ , бл҃гᲂда́тїю мꙋ́дрᲂстїю , и҆́же честно́е сло́во твᲂѐ жела́юшихъ . Въ ро́въ тѧ̀ мч҃нче глꙋбо́къ пᲂгреба́ютъ , сᲂбо́ри ѕлᲂчести́выхъ . и҆ ка́менїемъ немлⷭ҇тивнѡ ᲂу҆мерщвлѧ́ютъ , вᲂспѣва́юща , бл҃гᲂслᲂве́нъ є҆сѝ в̾цр҃кви сла́вы твᲂеѧ̀ гдⷭ҇и . Землѧ̀ тѣ́ло пᲂгребе́нᲂе мч҃нче пᲂказꙋ́етъ , и҆стᲂча́ѧ и҆сцѣле́нїемъ во́ды вѣ́рꙋющимъ . не́бо же бл҃же́нныи а҆рхи́ппе дх҃ъ тво́й , страда́льческимъ дш҃а́мъ причита́етъ . боⷢ҇ . Зе́млю ᲂу҆́бѡ мгло́ю , не́бо же ѻ҆́блаки гдⷭ҇ь ѻ҆трᲂкᲂви́це ѡ҆дѣва́ѧ , во́лею в̾ пло́ть ме́ртвенꙋю ѿ крᲂве́й твᲂи́хъ ѡ҆дѣва́етсѧ , во ѻ҆де́ждꙋ сла́вы без̾сме́ртныѧ ѡ҆дѣва́ѧ чл҃ка .

пѣ́снь , и҃ . і҆рмо́съ . Рꙋ́цѣ распрᲂсте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ ᲂу҆гаси́ша дᲂбрᲂдѣ́телїю пᲂѧ́савшесѧ , и҆́же бл҃гᲂче́стїѧ люби́тели ѻ҆́трᲂцы взыва́юще , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Па́велъ пᲂхвала́ми сщ҃е́нными свидѣ́тельствꙋѧ тѧ̀ , а҆рхи́ппе сла́вне , с̾во́ина тѧ̀ ст҃е сᲂверше́на во ѡ҆пᲂлче́нїихъ , слꙋжа́ща є҆мꙋ̀ нарица́ютъ . и҆ пᲂю́ща бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Гл҃ы пᲂма́засѧ честны́ми , к̾ мꙋче́нїю дᲂстᲂсла́внаѧ а҆мфі́ѧ , лю́бѧщи премꙋ́дре ꙗ҆́кѡ сн҃а тѧ̀ бли́жнѧ . с̾не́ю же в̾ вы́шнихъ живе́ши црⷭ҇твїихъ вᲂпїѧ̀ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Младе́нцы сꙋ́щїи ра́зꙋмᲂмъ , тѧ̀ и҆мꙋ́щагѡ смы́слъ , младе́нцемъ во и҆гра́нїе преда́ша а҆рхи́ппе , стра́ждꙋща терпѣли́вно , и҆ ѿ ни́хъ немлⷭ҇тивно стрѣче́ма , и҆ вᲂпїю́ща , всѧ̀ дѣ́ла бл҃гᲂслᲂви́те гдⷭ҇нѧ гдⷭ҇а . боⷢ҇ . Ме́ртвъ снѣ́ди ра́ди є҆ди́ныѧ а҆да́мъ бы́сть , ѡ҆бье́мъ сме́рть сада̀ разꙋ́мнагѡ чⷭ҇таѧ . тебе́ же ра́ди ѡ҆живлѧ́етсѧ , и҆ раѧ̀ пи́щи па́ки вᲂспрїѧ́тъ , вᲂспѣва́ѧ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а .

пѣ́снь , ѳ҃ . і҆рмо́съ . Ка́мень нерꙋкᲂсѣ́чныѧ гᲂры̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , сᲂвᲂкꙋпи́въ раз̾стᲂѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Да вѣ́чнꙋю сла́вꙋ наслѣ́диши стрⷭ҇тᲂте́рпче , сла́вꙋ земленꙋ́ю презрѣ́лъ є҆сѝ , непᲂстᲂѧ́ннꙋю же и҆ мимᲂхᲂдѧ́щꙋю . и҆ ко хрⷭ҇тꙋ̀ пристꙋпи́лъ є҆сѝ , сла́вᲂю сегѡ̀ ᲂу҆краша́емь . Вѣнце́мъ ѡ҆дѣ́ѧсѧ бг҃ᲂмꙋ́дре пᲂбѣ́днымъ ве́рхъ тво́й , и҆ ѡ҆блече́сѧ въ багрѧни́цꙋ , твᲂи́ми крᲂвьмѝ ѡ҆мо́ченꙋю а҆рхи́ппе . и҆ со хрⷭ҇то́мъ ра́дꙋѧсѧ црⷭ҇твꙋеши пребл҃же́нне . Ꙗ҆́кѡ верхо́внᲂмꙋ всебл҃же́нне а҆пⷭ҇лѡмъ , ᲂу҆чени́чествᲂвалъ є҆сѝ па́влꙋ мꙋ́дрᲂмꙋ бг҃ᲂглаго́льникꙋ . с̾ тѣ́мъ ра́дꙋешисѧ , вѣ́чнꙋющее наслѣ́дꙋѧ наслажде́нїе , кᲂлас̾са́емъ до́брᲂе ᲂу҆тваре́нїе . Сᲂбра́шасѧ лю́дїе в̾ па́мѧти свѣтᲂно́снѣй тѝ , пѣ́ти бл҃гᲂда́вца сп҃са , и҆ до́блїѧ а҆рхи́ппе по́двиги твᲂѧ̀ . и҆́хже мꙋ́жески претерпѣ́лъ є҆сѝ , низ̾ло́жь мнᲂгᲂко́зненаго . боⷢ҇ . Нᲂсѧ́щи хрⷭ҇та̀ на рꙋкꙋ̀ , ма́нїемъ нᲂсѧ́щаго всѧ̀ . сегѡ̀ ꙗ҆́кѡ сн҃а свᲂегѡ̀ мᲂлѝ , ѿ рꙋкꙋ̀ врага́ мѧ пречⷭ҇таѧ и҆зба́вити . и҆ за млрⷭ҇дїѧ бе́здны , ѡ҆бъѧ́ти и҆ спасти́ мѧ .