29 февраля: прп. Касиана Римлянина

МЦⷭ҇А ТОГО́ЖЕ ВЪ К҃Ѳ ДН҃Ь

Прпⷣбнагѡ ѻ҆ц҃а на́шегѡ касїа́на ри́млѧнина . є҆гда̀ и҆́мать феврꙋа́рїи дні́и к҃и , тᲂгда̀ пᲂе́тсѧ слꙋ́жба ст҃а́гѡ касїа́на на па́вечерницѣ . Ве́черъ , на гдⷭ҇и вᲂзва́хъ , стихѣ́ры . гла́съ , ѕ҃ . поⷣ . всѐ ᲂу҆пᲂва́нїе .= Мꙋ́дрѣ прᲂразꙋмѣ́лъ є҆сѝ текꙋ́щихъ пре́лесть ,꙳ ѻ҆́ч҃е пресла́вне .꙳ и҆ сїю̀ тре́бꙋющимъ вᲂз̾брани́лъ є҆сѝ ,꙳ ника́кᲂже пребыва́ющꙋю ,꙳ по и҆схᲂжде́нїи є҆́же ѿ сю́дꙋ ко́ гдⷭ҇ꙋ .꙳ мимᲂтекꙋ́щее сїѐ ,꙳ и҆ вре́меннᲂе житїѐ и҆ ᲂу҆стрᲂе́нїе .꙳ тѣ́мже и҆ к̾ лꙋ́чшимъ преста́вилсѧ є҆сѝ .꙳ к̾не́й же ꙗ҆́кѡ смᲂтри́тель и҆ мꙋ́дръ ,꙳ житїе́мъ и҆ дѣ́лᲂмъ касїа́не ,꙳ хрⷭ҇то́ви ᲂу҆гᲂди́лъ є҆сѝ . Крⷭ҇тъ ѿ младе́нства в̾зе́мъ ,꙳ и҆ стезе́ю ѻ҆́ч҃е же́стᲂкᲂю и҆ тѣ́снᲂю ше́ствᲂвалъ є҆сѝ спѣ́шнѡ ,꙳ и҆ честно́ю па́че .꙳ пᲂвинꙋ́ѧсѧ сла́вне ,꙳ велѣ́нїемъ призва́вшагѡ .꙳ тѣ́мже сꙋгꙋ́бѡ ѡ҆брѣ́те ꙳ трꙋдо́мъ вᲂз̾да́нїе ,꙳ и҆ дᲂсто́йнꙋ м̾здꙋ̀ , нбⷭ҇нᲂе црⷭ҇твїе хрⷭ҇то́во ,꙳ и҆ є҆́же со всѣ́ми ст҃ы́ми во́ свѣтѣ касїа́не .꙳ с̾ни́ми же непреста́ннѡ мᲂлѝ ꙳ ѡ҆ дш҃а́хъ на́шихъ . Чꙋдесѐ ве́щь ꙳ всѧ́каѧ є҆́сть бг҃ᲂмꙋ́дре ,꙳ с̾не́ю же и҆ в̾ пло́ти на землѝ пе́рвѣе ,꙳ смᲂтрѧ́ѧ мᲂлча̀ прпⷣбне ,꙳ и҆ глаго́ла по́слѣжде ꙳ и҆ слᲂвесы̀ и҆ вещьмѝ ,꙳ смире́нъ и҆ кро́тᲂкъ неѕло́бивъ .꙳ и҆ вельмѝ бл҃гᲂгла́сникъ прᲂро́ческїи .꙳ мно́жае же ны́нѣ па́че ,꙳ є҆гда̀ к̾ бг҃ꙋ вᲂсте́къ ᲂу҆диви́лсѧ є҆сѝ ,꙳ и҆ прїѧ́тъ бл҃гᲂда́ть и҆сцѣле́нїемъ . =сла́ва , и҆ ны́нѣ , боⷢ҇ . Нра́вᲂмъ ѕлы́мъ пᲂпо́лзсѧ ,꙳ и҆ прельще́нъ ле́стїю лꙋка́внᲂю бг҃ᲂневѣ́сто ,꙳ к̾ пречꙋ́днᲂмꙋ бл҃гᲂꙋтро́бїю твᲂемꙋ̀ ,꙳ и҆ те́плѣй мᲂли́твѣ прест҃а́ѧ ѻ҆трᲂкᲂви́це ,꙳ прибѣга́ю преѡ҆каѧ́нныи .꙳ сᲂꙋ́зъ мѧ̀ и҆зба́ви напа́стей и҆ печа́лей .꙳ и҆ спаси́ мѧ всенепᲂро́чнаѧ ,꙳ бѣсо́вскихъ прило́гъ ,꙳ да прᲂславлѧ́ю тѧ ,꙳ и҆ любо́вїю вᲂспᲂю̀ и҆ пᲂкланѧ́юсѧ ,꙳ и҆ велича́ю тѧ̀ влⷣчце прⷭ҇нᲂбл҃же́ннꙋю . крⷭ҇тᲂбоⷢ҇ . Ѻ҆рꙋ́жїе ꙗ҆́кᲂже речѐ сѷмеѡ́нъ , срⷣце твᲂѐ про́йде ꙳ прест҃а́ѧ влⷣчце , є҆гда̀ ви́дѣ и҆з̾ тебѐ вᲂсїѧ́вшаго ,꙳ неи҆зрече́ннымъ сло́вᲂмъ ,꙳ без̾зако́нными ꙗ҆́кѡ ѡ҆сꙋжде́на ,꙳ на́ крⷭ҇тъ вᲂз̾дви́жена ,꙳ ѻ҆цта̀ и҆ же́лчи в̾кꙋша́юща ,꙳ в̾ ре́бра же прᲂбᲂда́ема ,꙳ рꙋка́ма же и҆ нᲂга́ма пригвᲂжде́на .꙳ и҆ рыда́ющи вᲂсклица́ше мт҃рьски ,꙳ что̀ сїѐ ча́до сла́дкᲂе ,꙳ но́вᲂе та́инство .

Кано́нъ . гла́съ , в҃ . пѣ́снь , а҃ . і҆рмо́съ . Во глꙋбинѣ̀ пᲂтᲂпѝ дре́вле , фараѡни́тскаѧ всѧ̀ во́инства , преѡрꙋже́нꙋ си́лꙋ . вᲂпло́щшеесѧ сло́во , преспѣ́ющїѧ грѣхѝ пᲂтреби́ло є҆́сть , пресла́вныи гдⷭ҇ь , ꙗ҆́кѡ прᲂсла́висѧ .

запѣ́въ : Прпⷣбне ѻ҆́ч҃е касїа́не , мᲂлѝ бг҃а ѡ҆ на́съ . Вѣнча́въ бжⷭ҇твенными дᲂбрᲂдѣ́тельми , прпⷣбне житїѐ свᲂѐ касїа́не , к̾ бг҃ꙋ ѿше́лъ є҆сѝ . ѿ него́же на́мъ прᲂсѝ , и҆збавле́нїе сᲂгрѣше́нїемъ мо́лимсѧ , твᲂрѧ́щимъ ст҃о́е твᲂѐ преставле́нїе . Всеѻ҆бра́знымъ манᲂве́нїемъ к̾ бг҃ꙋ дᲂстᲂсла́вне , ѿ страстны́хъ пᲂмышле́нїи ᲂу҆клᲂни́лсѧ є҆сѝ . и҆ свѣ́тъ бы́лъ є҆сѝ , прича́стїи невѣще́ствеными ѡ҆бᲂжа́емь , препрᲂсла́вленаго гдⷭ҇а пᲂѧ̀ , тебѐ прᲂсла́вльшаго . Вра́чь бы́лъ є҆сѝ дш҃а́мъ , бжⷭ҇твенными свᲂи́ми ᲂу҆че́нїи касїа́не . ᲂу҆слажда́ѧ пᲂмышле́нїѧ и҆́нᲂкꙋющихъ бл҃гᲂда́тїю , и҆ к̾ жи́зни наста́вилъ є҆сѝ . сегѡ̀ ра́ди тѧ̀ всѝ любо́вїю пᲂчита́емъ . боⷢ҇ . Во́ чревѣ нᲂси́вшꙋю чⷭ҇таѧ всѝ свѣ́мы . бг҃а бо в̾ пло́ть ме́ртвенꙋю ѻ҆бле́кшасѧ па́че ᲂу҆ма̀ рᲂдила̀ є҆сѝ , прᲂсвѣти́вшаго прпⷣбныхъ сᲂсло́вїе , препрᲂсла́вленаго гдⷭ҇а . сла́вно бо прᲂсла́висѧ .

пѣ́снь , г҃ . і҆рмо́съ . Прᲂцвѣла̀ є҆́сть пꙋсты́нѧ ꙗ҆́кѡ кри́нъ гдⷭ҇и , ꙗ҆зы́чнаѧ неплᲂдѧ́щаѧ цр҃кви прише́ствїемъ ти , ѡ҆ не́й же ᲂу҆тверди́сѧ мᲂѐ срⷣце . Ѕвѣѕдꙋ́ тѧ на высᲂтѣ̀ цр҃ко́внѣй вᲂсїѧ́вшꙋю , прᲂсвѣще́нїе пᲂказа̀ сꙋ́щимъ во тмѣ̀ , хрⷭ҇то́съ , прехва́льне , по́стникѡмъ ᲂу҆краше́нїе прпⷣбне . Крⷭ҇тꙋ̀ прибли́жившемꙋсѧ , и҆ ми́ръ прᲂсвѣ́щшемꙋ касїа́не пᲂдо́бѧсѧ , распѧ́лсѧ є҆сѝ мир̾ски́мъ стрⷭ҇те́мъ , кᲂва́р̾ствїѧ бѣсо́мъ пᲂбѣ́ждь . Мꙋ́дрᲂсти и҆спо́лньсѧ твᲂѐ срⷣце премꙋ́дре , ᲂу҆че́нїѧ бе́зднꙋ ст҃ы́мъ и҆стᲂчѝ дх҃ᲂмъ . и҆́нѡкихъ стада̀ напаѧ́ющꙋ . боⷢ҇ . И҆сцѣлѝ пренепᲂро́чнаѧ дш҃ꙋ мᲂю̀ мᲂлю́сѧ , и҆знемо́гшꙋю страстьмѝ , и҆ всѧ́цѣми настᲂѧ́нїи бѣсо́в̾скими , бжⷭ҇твеннымъ хᲂда́тайствᲂмъ сѝ .

сѣда́ленъ . гла́съ , д҃ . Прпⷣбенъ бы́въ , бг҃ᲂви вᲂз̾лᲂжи́лсѧ є҆сѝ . и҆ прᲂсвѣ́щьсѧ до́брыми ви́ды касїа́не , ꙗ҆́кѡ сл҃нце ѡ҆блиста́лъ є҆сѝ , сїѧ́нїемъ бжⷭ҇твенныхъ твᲂи́хъ ᲂу҆че́нїи , срⷣца̀ всѣ́хъ чтꙋ́щихъ тѧ̀ всегда̀ прᲂсвѣща́ѧ . но прилѣ́жнѡ мᲂлѝ хрⷭ҇та̀ , ѡ҆ и҆́же любо́вїю те́плѣ вᲂсхвалѧ́ющихъ тѧ̀ . сла́ва , и҆ ны́нѣ , боⷢ҇ . Грѣхᲂлюби́въ сы́и мᲂлю́ тѧ , без̾грѣ́шнаго бг҃а ро́ждьшꙋю , грѣхѝ взе́млющаго ми́рᲂви чⷭ҇таѧ , мнᲂгᲂгрѣ́шнꙋю ᲂу҆ще́дрити дш҃ꙋ мᲂю̀ , и҆ грѣхѝ мᲂѧ̀ мно́гїѧ ѡ҆чи́стити . грѣ́шникѡмъ бо є҆сѝ ѡ҆чище́нїе , и҆ спасе́нїе вѣ́рнымъ и҆ застꙋпле́нїе . крⷭ҇тᲂбоⷢ҇ . И҆́же во́лею на́съ ра́ди распе́ншагᲂсѧ на́ древѣ , а҆́гница зрѧ́щи рыда́ющи глаго́лаше слезѧ́щи , что́ ти без̾бл҃гᲂда́тныи є҆вре́йскїи сᲂбо́ръ вᲂз̾дадѐ , и҆́же мно́гихъ и҆ вели́кихъ сн҃е мо́й даро́въ наслажде́исѧ . но вᲂспѣва́ю твᲂѐ бж҃е мо́й дᲂлгᲂтерпѣ́нїе .

пѣ́снь , д҃ . і҆рмо́съ . Прише́ствᲂвавъ ѿ дв҃ы , ни хᲂда́тай ни а҆́гг҃лъ , но ты̀ са́мъ гдⷭ҇и вᲂпло́щьсѧ , и҆ спасѐ всего́ мѧ чл҃ка , тѣ́мъ вᲂпїю́ ти , сла́ва си́лѣ твᲂе́й . По́двиги твᲂи́ми , плᲂтьска́ѧ пᲂкᲂри́лъ є҆сѝ в̾зыгра́нїѧ дх҃ᲂви прпⷣбне . сщ҃е́нными ᲂу҆че́нїи твᲂи́ми , всѧ̀ ѡ҆бнажи́лъ є҆сѝ кᲂва́рствїѧ льсти́вагѡ и҆ лᲂвле́нїѧ . Оу҆мерщвлѧ́емъ во́лею ѿ мир̾скі́ѧ ме́ртвᲂсти , жи́зни наслѣ́дїе прїѧ́лъ є҆сѝ , касїа́не пресла́вне . зако́ны же написа̀ , и҆́нᲂкѡмъ в̾наставле́нїе и҆ сᲂверше́нїе . Всели́сѧ в̾ дш҃ꙋ твᲂю̀ бл҃гᲂда́ть дх҃а , и҆ всѣ́хъ вы́ш̾ша пло́тьскихъ мꙋдрᲂва́нїи , тѧ̀ пᲂказа̀ пребᲂга́те , и҆ льсти́вагѡ сѣте́й ꙗ҆вле́ннѡ . боⷢ҇ . Без̾лѣ́тнаго в̾ лѣ́то бы́вша рᲂдила̀ є҆сѝ , неи҆з̾рече́ннѡ пренепᲂро́чнаѧ , и҆́же прпⷣбныѧ прᲂсвѣти́вшаго вѣ́рᲂю пᲂжи́вшїѧ , и҆ ѕлᲂнача́льнаго ѕмїѧ̀ смири́вша .

пѣ́снь , є҃ . і҆рмо́с̾ . Хᲂда́тай бг҃ꙋ и҆ чл҃кᲂмъ бы́сть хрⷭ҇тѐ бж҃е , тᲂбо́ю бо влⷣко к̾ свѣтᲂнача́льникꙋ ѻ҆ц҃ꙋ́ ти , ѿ́ нᲂщи невѣ́дѣнїѧ приведе́нїе ѡ҆брѣто́хᲂмъ . Вᲂсхи́тисѧ свᲂи́ми дᲂбрᲂдѣ́тельми бг҃ᲂпрїѧ́тне , нᲂси́мъ . и҆ ра́дꙋѧсѧ дᲂсти́глъ є҆сѝ к̾ нбⷭ҇нымъ селе́нїемъ . трꙋдо́мъ по́чести дᲂсто́йнѡ прїе́млѧ . Оу҆мо́мъ чи́стымъ , ты̀ в̾зира́ѧ дᲂбро́тꙋ хрⷭ҇то́вꙋ , стᲂѧ́ше непрекло́ненъ в̾ нᲂщѝ и҆ во́ дни пресла́вне , бжⷭ҇твеннаѧ ꙗ҆вле́нїѧ ѿ тꙋ́дꙋ прїе́млѧ . Сле́зными тече́нїи бг҃ᲂно́сне ѻ҆́ч҃е напᲂѧ́емь , ꙗ҆́кѡ дре́во высᲂко̀ . прине́слъ є҆сѝ плᲂды̀ и҆справле́нїѧ , веселѧ́щїѧ всѣ́мъ бжⷭ҇твенѡ пᲂмышле́нїѧ . боⷢ҇ . И҆з̾ тебѐ жи́знь па́че ᲂу҆ма̀ вᲂсїѧ́вши дв҃це , врага̀ ᲂу҆мᲂрѝ , всѣ́хъ на́съ ᲂу҆мᲂри́вшаго . и҆ ѡ҆живѝ ми́ръ непреста́ннѡ вᲂспѣва́ющїи тѧ̀ .

пѣ́снь , ѕ҃ . і҆рмо́съ . Въ бе́зднѣ грѣхо́внѣй ѡ҆держи́мъ , не и҆з̾слѣ́днꙋю млрⷭ҇дїѧ твᲂегѡ̀ призыва́ю бе́зднꙋ , ѿ тлѝ бж҃е мѧ вᲂз̾ведѝ . Пꙋте́мъ тѣ́снымъ ѻ҆́ч҃е ше́ствᲂвалъ є҆сѝ , всѣ́мъ же слᲂвесы̀ твᲂи́ми сегѡ̀ пᲂзна́лъ є҆сѝ . и҆́мже до́брѣ хᲂдѧ́щїи , в̾ ра́йскꙋю ширᲂтꙋ̀ в̾вᲂди́ми быва́ютъ . Жи́знь твᲂѧ̀ прпⷣбна бы́сть , и҆ кᲂнчи́на бл҃же́нна и҆ честна̀ , касїа́не ѻ҆́ч҃е на́шъ . ст҃ы́мъ а҆́гг҃лѡмъ сᲂбесѣ́дниче . Дрема́нїе ᲂу҆ны́нїѧ ѿве́рглъ є҆сѝ . и҆ бдѧ̀ в̾видѣ́нїихъ и҆ дѣѧ́нїихъ , а҆́гг҃льски по́жилъ є҆сѝ на землѝ , бг҃ᲂно́сне пребᲂга́те . боⷢ҇ . Ꙗ҆́кѡ дᲂбрꙋ̀ , ꙗ҆́кѡ краснꙋ̀ вᲂз̾люби́ тѧ , дᲂбро̀ твᲂрѧ́и і҆с҃ъ всенепᲂро́чнаѧ , и҆з̾ тебѐ пло́тїю ражда́етсѧ , и҆ ѡ҆бᲂжа́етъ мѧ̀ за млрⷭ҇дїе без̾мѣ́рнᲂе .

кᲂнда́къ . гла́съ , д҃ . Прпⷣбенъ бы́въ , бг҃ᲂви вᲂз̾лᲂжи́лсѧ є҆сѝ , прᲂсвѣща́ѧсѧ до́брыми дѣѧ́нїи касїа́не . и҆ ꙗ҆́кѡ сл҃нце ѡ҆блиста́лъ є҆сѝ сїѧ́нїемъ бжⷭ҇твенныхъ твᲂи́хъ ᲂу҆че́нїи , срⷣца̀ всѣ́хъ чтꙋ́щихъ тѧ̀ , всегда̀ прᲂсвѣща́ѧ . но прилѣ́жнѡ мᲂлѝ хрⷭ҇та̀ бг҃а , ѡ҆ и҆́же любо́вїю те́плѣ вᲂсхвалѧ́ющихъ тѧ̀ .

пѣ́снь , з҃ . і҆рмо́съ . Бг҃ᲂпрᲂти́вно велѣ́нїе без̾зако́ннꙋюща мꙋчи́телѧ , высо́къ пла́мень вᲂз̾несло̀ є҆́сть , хрⷭ҇то́съ же прᲂсте́ръ бг҃ᲂчести́вымъ дѣ́темъ , хла́дъ дх҃о́вныи , сы́и бл҃гᲂслᲂве́нъ и҆ препрᲂсла́вленъ . Всегда̀ вᲂз̾зрѣ́нми свѣ́тлыми бг҃ᲂмꙋ́дре ѡ҆бᲂжа́емь , свѣти́льникъ ꙗ҆ви́сѧ незахᲂди́мъ . ѿ ню́дꙋ же ѡ҆блиста́лъ є҆сѝ сло́во спаси́тельнᲂе , всѣ́хъ на́съ ра́зꙋмы прᲂсвѣща́ющее , вᲂсхвалѧ́ющихъ тѧ̀ . Ꙗ҆зы́къ тво́й дх҃ᲂмъ ѡ҆бᲂщре́нъ , ꙗ҆́вѣ начерта́вшїи зако́нъ спаси́теленъ , и҆ ѻ҆́бразъ пᲂлᲂжѝ . и҆́миже прᲂсвѣща́ютсѧ с̾вы́ше бг҃ᲂбл҃же́нне вᲂпїю́щїи , бл҃гᲂслᲂве́нъ бг҃ъ ѻ҆ц҃ъ на́шихъ . Ра́зꙋмы прпⷣбне спаси́тельныѧ и҆ гл҃ы , невѣ́дѣнїе срⷣчнᲂе ѿгᲂнѧ́ющїѧ , бᲂга́тнѡ и҆стᲂчи́лъ є҆сѝ ѻ҆́ч҃е бг҃ᲂмꙋ́дре . тѣ́мже тѧ̀ пᲂчита́емъ вѣ́рнѡ , всест҃ꙋ́ю твᲂрѧ́ще па́мѧть твᲂю̀ . боⷢ҇ . Черто́гъ бы́сть бжⷭ҇твенныѧ сла́вы , и҆ прⷭ҇то́лъ ѻ҆гнезра́ченъ , на не́мже пᲂчѝ сло́во вᲂплᲂще́ннᲂе за бл҃гᲂсты́ню . сегѡ̀ ᲂу҆́бѡ мᲂлѝ чⷭ҇таѧ , ᲂу҆ще́дрити и҆ пᲂми́лᲂвати на́съ .

пѣ́снь , и҃ . і҆рмо́съ . Пе́щь ѻ҆́гненна и҆нᲂгда̀ в̾ вавѷлѡ́нѣ , дѣ́йство раздѣлѧ́ше , бж҃їимъ велѣ́нїемъ халдѣ́и ѡ҆палѧ́ющи , вѣ́рныѧ же прᲂхлажда́ющи пᲂю́ща , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Сїѧ́ѧ ꙗ҆́кᲂже ѕвѣзда̀ , сло́вᲂмъ и҆ житїе́мъ касїа́не , прᲂсвѣща́еши всѧ̀ землены́ѧ кᲂнцы̀ . невѣ́дѣнїѧ и҆зима́ѧ м̾глы̀ , и҆ пѣ́ти пᲂвелѣва́ѧ всегда̀ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Заше́лъ є҆сѝ ᲂу҆́меръ ꙗ҆́кѡ сл҃нце пребл҃же́нне . ꙗ҆́кѡ зарю́ же ѡ҆ста́вилъ є҆сѝ , незахᲂди́ма слᲂвеса̀ твᲂѧ̀ . прᲂсвѣща́ѧ дш҃а на́ша , и҆́же вѣ́рᲂю ст҃ꙋ́ю твᲂю̀ прпⷣбне , сᲂверша́ющихъ па́мѧть . Дᲂбро́ты мы́сленыѧ , неи҆зрече́ннѡ наслажда́ешисѧ , ѡ҆ста́вль тлѣ́ннᲂе тѣ́ло , и҆ ви́дѣти спᲂдо́бисѧ , ꙗ҆́же ви́дѧтъ сла́вне а҆́гг҃льскаѧ во́инства пᲂю́ще , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . боⷢ҇ . Ꙗ҆ви́сѧ нб҃съ ши́рши дв҃це . є҆го́же бо та̀ нев̾мѣсти́ша , несказа́ннѡ в̾мѣсти́вши . и҆ ро́ждьши па́че смы́сла , сꙋгꙋ́ба сꙋ́ща є҆стество́мъ , є҆ди́нъ же и҆мꙋ́ща бг҃ᲂлѣ́пнѡ сᲂста́въ .

пѣ́снь , ѳ҃ . і҆рмо́съ . Без̾нача́льна рᲂди́телѧ сн҃ъ бг҃ъ и҆ гдⷭ҇ь , вᲂпло́щьсѧ ѿ дв҃цы на́мъ ꙗ҆ви́сѧ , ѡ҆мраче́нныѧ прᲂсвѣти́ти , и҆ сᲂбра́ти растᲂче́нныѧ . тѣ́мъ всехва́льнꙋю бцⷣꙋ велича́емъ . Крѣ́пᲂсть тебѣ̀ дарᲂва́сѧ ѿ бг҃а и҆ си́ла , нача́ла ѿгᲂни́ти мирᲂде́ржца . тѣ́мже до́блествᲂвавъ вельмѝ , ꙗ҆́кѡ вᲂи́стинꙋ ѻ҆́ч҃е бг҃ᲂмꙋ́дре , лико́мъ причте́сѧ прпⷣбныхъ ра́дꙋѧсѧ . Ꙗ҆́кѡ шипо́къ бл҃гᲂво́ненъ , на́съ бл҃гᲂꙋха́ютъ , бг҃ᲂдᲂхнᲂве́наѧ слᲂвеса̀ , бжⷭ҇твеннагѡ ꙗ҆зы́ка твᲂегѡ̀ . ты́ бо бл҃гᲂꙋха́нїе бы́лъ є҆сѝ , на́съ ра́ди и҆з̾лїѧ́вшагᲂсѧ за млрⷭ҇дїе , и҆ в̾ пло́ть ѡ҆бле́кшасѧ , бг҃ᲂно́сне всече́стне . Па́мѧть твᲂѧ̀ дне́сь прпⷣбнѡ вᲂсїѧ́вши , ѡ҆зарѧ́етъ срⷣца̀ вᲂсхвалѧ́ющихъ твᲂѐ а҆́гг҃льскᲂе житїѐ касїа́не . в̾не́й же мо́лимсѧ , сᲂгрѣше́нїемъ прᲂще́нїе дарᲂва́тисѧ всѣ́мъ пᲂмᲂли́сѧ . боⷢ҇ . Гла́съ тѝ прино́симъ гаврїи́лᲂвъ , в̾зыва́юще , ра́дꙋисѧ трапе́зо , бжⷭ҇твенныи хлѣ́бъ нᲂси́вшаѧ . ра́дꙋисѧ непрᲂхᲂди́маѧ две́ре . ра́дꙋисѧ ра́дᲂсте всѣ́мъ спаса́емымъ . прпⷣбнымъ пᲂхвало̀ , бцⷣе прⷭ҇нѡ дв҃о .

<< Previous

Contents

Next >>