МЦⷭ҇А ТОГО́ЖЕ ВЪ Е҃ ДН҃Ь

ст҃ы́ѧ мч҃нцы а҆га́ѳїи . =Ве́черъ , на гдⷭ҇и вᲂзва́хъ , стихѣ́ры , пра́здникꙋ , г҃ . и҆ ст҃ѣ́й , г҃ . стихѣ́ры , пра́здникꙋ . гла́съ , а҃ . поⷣ . нбⷭ҇нымъ чино́мъ . Б=г҃ᲂꙗ҆вле́нїѧ неи҆зрече́ннагѡ ,꙳ пра́зднꙋемъ спасе́нꙋю бл҃гᲂда́ть .꙳ ѿ дв҃ы бо ѻ҆трᲂкᲂви́цы , непрело́жнѡ младе́нствᲂвавъ хрⷭ҇то́съ бг҃ъ ,꙳ в̾ цр҃квь бг҃ꙋ и҆ ѻ҆ц҃ꙋ ,꙳ мт҃рїю ны́нѣ прино́ситсѧ .꙳ є҆го́же прїе́мъ сѷмеѡ́нъ рꙋка́ма ѡ҆бъѧ́тъ . Въ прᲂро́цѣхъ ви́дѣнъ бы́сть , ꙗ҆́кѡ в̾ гада́нїи бѧ́ше і҆с҃е ,꙳ ꙗ҆́кѡ ви́дѣти дре́вле .꙳ но̀ и҆ ны́нѣ бж҃їи сло́ве , пло́тїю всемꙋ̀ ми́рꙋ ꙗ҆ви́сѧ во́лею ,꙳ ѿ дв҃ы мр҃і́и хрⷭ҇тѐ .꙳ твᲂю̀ спасе́нꙋю стра́сть , сꙋ́щимъ ѿ а҆да́ма ꙗ҆ви́лъ є҆сѝ ,꙳ ꙗ҆́кѡ чл҃кᲂлю́бецъ . И҆́же на сѷна́йстѣй гᲂрѣ̀ зако́нᲂмъ ᲂу҆чи́выи дре́вле ,꙳ ны́нѣ в̾ сїѡ́нѣ гра́дѣ и҆спᲂлнѧ́ѧ зако́ннаѧ .꙳ рꙋка́ма бцⷣы младе́нецъ хрⷭ҇тѐ ,꙳ со всесᲂж̾жега́емыми ,꙳ сѷмеѡ́нꙋ на рꙋкꙋ̀ в̾ цр҃кви ,꙳ принести́сѧ вᲂсхᲂтѣ́лъ є҆сѝ пло́тїю .

и҆́ны , стихѣ́ры , ст҃ѣ́й . гла́съ , д҃ . поⷣ . да́лъ є҆сѝ зна́менїе .= Нетлѣ́ннѡ сᲂблюла̀ є҆сѝ тѣ́ло ,꙳ хрⷭ҇то́ви женихꙋ̀ свᲂемꙋ̀ .꙳ дв҃ьства дᲂбро́тами ,꙳ а҆га́ѳїе бг҃ᲂневѣ́сто ᲂу҆крашена̀ ,꙳ и҆ прᲂсвѣщена̀ мч҃нческими блиста́ньми ,꙳ и҆ в̾ черто́гъ бжⷭ҇твенныи в̾мѣсти́сѧ .꙳ тѣ́мже твᲂѐ всеми́рнᲂе сᲂверша́емъ тᲂржество̀ ,꙳ сп҃са сла́вѧще ,꙳ при́снѡ тѧ̀ прᲂсла́вльщаго . Сᲂсце́ма ѿрѣ́занїе ,꙳ и҆ ѻ҆гнѧ̀ ѡ҆пале́нїе ,꙳ и҆ стрᲂга́нїе тѣлесѝ ,꙳ претерпѣ́ла є҆сѝ сла́внаѧ .꙳ вѣ́чнꙋющаѧ ѻ҆чи́ма серде́чныма смᲂтрѧ́ѧ вᲂз̾да́нїѧ ,꙳ и҆ ѿ нꙋ́днее бл҃же́нство ,꙳ и҆ вѣне́цъ неꙋвѧда́емыи .꙳ и҆́же тѝ хрⷭ҇то́съ ны́нѣ дарᲂва̀ ,꙳ за него́же пᲂстрада́вши ,꙳ стрⷭ҇тᲂте́рпице мнᲂгᲂстрада́льнаѧ . Стремле́нїе непᲂстᲂѧ́нно ꙳ ѻ҆гнѧ̀ свирѣ́пагѡ ᲂу҆ста́вила є҆сѝ ,꙳ мᲂли́твами сѝ бл҃гᲂи҆мени́таѧ .꙳ и҆ гра́дъ спасла̀ є҆сѝ ,꙳ честны́ѧ тѝ мч҃нце мо́щи чтꙋ́щїи .꙳ ѿ ни́хже ѡ҆бъє́млетъ рѣ́ки и҆сцѣле́нїе ,꙳ бжⷭ҇твеннымъ дх҃ᲂмъ .꙳ в̾се́мъ бо пᲂстрада́вши ,꙳ врага̀ смири́ла є҆сѝ ,꙳ и҆ пᲂбѣ́дѣ вѣне́цъ прїѧ́тъ прехва́льнаѧ . А҆́ще є҆́сть по́стъ , сла́ва , и҆ ны́нѣ , боⷢ҇ . а҆́ще ли среда̀ и҆ пѧто́къ , крⷭ҇тᲂбоⷢ҇ . пи́саны сего̀ мцⷭ҇а , въ к҃и дн҃ь . а҆́ще ли нѣ́сть пᲂста̀ , пᲂе́мъ : сла́ва . гла́съ , и҃ . Пресла́вно чꙋ́до бы́сть , во страда́нїи пресла́вныѧ а҆га́ѳїи , и҆ мч҃нцы хрⷭ҇та̀ бг҃а , пᲂдо́бно мѡѷсе́ᲂви . ѻ҆́нъ ᲂу҆́бѡ лю́ди в̾закᲂнѧ́ѧ на гᲂрѣ̀ , напи́санна на скрижа́лѣхъ бг҃ᲂначерта́ннаѧ писмена̀ прїѧ́тъ . при се́й же а҆́гг҃лъ с̾ нб҃сѐ , на́ грᲂбъ скрижа́ль принесѐ напи́санꙋ . ᲂу҆́мъ прпⷣбенъ самᲂи҆зво́ленъ , че́сть ѿ́ бг҃а и҆ ѻ҆те́чествꙋ и҆збавле́нїе . =и҆ ны́нѣ , пра́здникꙋ . гла́съ , то́йже . И҆́же на херꙋви́мѣхъ нᲂси́мыи , и҆ пѣва́емыи ѿ серафи́мъ , дне́сь в̾ бжⷭ҇твеннᲂе ст҃и́лище по зако́нꙋ принᲂси́мъ , на ста́рческꙋю ꙗ҆́кѡ на прⷭ҇то́лѣ сѣди́тъ рꙋкꙋ̀ . и҆ ѿ і҆ѡ́сифа прїе́млетъ да́ры бг҃ᲂлѣ́пнѡ , ꙗ҆́кѡ сꙋпрꙋ́гъ го́рличища нескве́рнꙋю цр҃кᲂвь , и҆ ѿ ꙗ҆зы́къ но́выѧ лю́ди . гᲂлꙋби́на же два̀ птенца̀ , ꙗ҆́кѡ нача́льникꙋ ве́тхᲂмꙋ же и҆ но́вᲂмꙋ . и҆ к̾ семꙋ̀ ѻ҆бѣ́та , сѷмеѡ́нъ кᲂне́цъ прїе́мъ , бл҃гᲂсло́вѧ дв҃цꙋ мр҃і́ю бцⷣꙋ , страсте́й ѻ҆́бразы и҆́же и҆з̾ неѧ̀ прᲂвᲂз̾гласѝ . и҆ ѿ негѡ̀ и҆ска́ше ѿпꙋще́нїѧ вᲂпїѧ̀ , ны́нѣ ѿпꙋсти́ мѧ влⷣко , ꙗ҆́кᲂже пре́же вᲂз̾вѣсти́ ми . ꙗ҆́кѡ ви́дѣхъ тѧ первᲂвѣ́чнаго свѣ́та , и҆ сп҃са гдⷭ҇а , хрⷭ҇тᲂи҆мени́тымъ лю́демъ .

На стихо́внѣ , стихѣ́ры . гла́съ , ѕ҃ . поⷣ . в̾ =тре́тїи де́нь . В=ᲂспрїимѝ речѐ сѷмеѡ́не , зижди́телѧ всѧ́ческимъ рꙋка́ма .꙳ ѽ ста́рче пᲂд̾и҆мѝ хрⷭ҇та̀ ,꙳ є҆го́же дв҃аѧ ѻ҆трᲂкᲂви́ца ꙳ рᲂдѝ без̾сѣ́мене ,꙳ на ра́дᲂсть ро́дꙋ на́шемꙋ .

сти́хъ : ны́нѣ ѿпꙋща́еши раба̀ свᲂегѡ̀ влⷣко ,꙳ по гл҃ꙋ твᲂемꙋ̀ с̾ ми́рᲂмъ . Зако́нꙋ твᲂрца̀ и҆ бг҃а ,꙳ є҆го́же трепе́щꙋтъ а҆́гг҃льскаѧ мно́жества ,꙳ сᲂше́д̾шесѧ вᲂспᲂе́мъ лю́дїе .꙳ є҆ди́наго бл҃гᲂда́телѧ , и҆ зако́нꙋ закᲂнᲂпᲂлᲂжи́телѧ ,꙳ и҆ спасе́нїе дш҃а́мъ на́шимъ .

сти́хъ : свѣ́тъ во ѿкрᲂве́нїе ꙗ҆зы́кѡмъ ,꙳ и҆ сла́вꙋ люді́й твᲂи́хъ і҆и҃лѧ . Ны́нѣ ѿпꙋща́еши влⷣко раба̀ твᲂегѡ̀ ,꙳ ꙗ҆́кᲂже ре́клъ є҆сѝ с̾ ми́рᲂмъ .꙳ ꙗ҆́кѡ ви́дѣхъ тѧ̀ хрⷭ҇тѐ свѣ́та первᲂвѣ́чнаго ,꙳ сᲂꙋ́зъ мѧ̀ пло́тьскихъ ,꙳ во ѿкрᲂве́нїе ꙗ҆зы́кᲂмъ і҆и҃лю . сла́ва , и҆ ны́нѣ . гла́съ , в҃ . Є҆мꙋ́же вы́шнїи слꙋжи́телїе мо́лѧтсѧ , до́лꙋ ны́нѣ сѷмеѡ́нъ ве́щныма рꙋка́ма прїе́мъ , бжⷭ҇твеннᲂе чл҃кѡмъ сᲂедини́тисѧ прᲂпᲂвѣ́да . и҆ чл҃ка нбⷭ҇на бг҃а ви́дѧи , ѿлꙋча́ѧсѧ сꙋ́щихъ на землѝ , ра́дᲂстнѡ взыва́ше , и҆́же во тмѣ̀ сꙋ́щимъ , невече́рнїи свѣ́тъ ѿкрыва́ѧ , гдⷭ҇и сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , д҃ . А҆́гница твᲂѧ̀ і҆с҃е а҆га́ѳїѧ зᲂве́тъ ве́лїимъ гла́сᲂмъ , тебѐ женишѐ мо́й лю́бѧщи , и҆ и҆́щꙋщи страждꙋ̀ и҆ съ распина́юсѧ , и҆ съ пᲂгреба́юсѧ кр҃ще́нїемъ твᲂи́мъ . и҆ мꙋ́ки прїе́млю тебѐ ра́ди , ꙗ҆́кѡ да црⷭ҇твꙋю с̾ тᲂбо́ю , и҆ ᲂу҆мира́ю наде́ждꙋ и҆мѣ́ѧ на тѧ̀ , ꙗ҆́кѡ да живꙋ̀ ᲂу҆тебѐ . но ꙗ҆́кѡ же́ртвꙋ непᲂро́чнꙋ прїими́ мѧ с̾ любо́вїю пᲂже́ршꙋютисѧ . тᲂѧ̀ мл҃твами хрⷭ҇тѐ бж҃е спасѝ дш҃а на́ша .= сла́ва , и҆ ны́нѣ . трᲂпа́рь , пра́здникꙋ . гла́съ , а҃ . Р=а́дꙋйсѧ ѡ҆бра́дᲂваннаѧ бцⷣе дв҃о , и҆з̾ тебе́ бо вᲂсїѧ̀ сл҃нце пра́веднᲂе хрⷭ҇то́съ бг҃ъ на́шъ , прᲂсвѣща́ѧ и҆́же во тмѣ̀ сꙋ́щихъ . весели́сѧ и҆ ты̀ ста́рче пра́ведныи , прїе́мыи на́ рꙋкꙋ свᲂбᲂди́телѧ дш҃а́мъ на́шимъ , да́рꙋющагѡ на́мъ вᲂскрⷭ҇нїе .

На ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , двⷤа . сла́ва , ст҃о́мꙋ . и҆ ны́нѣ , пра́здникꙋ . =По а҃ , стихᲂло́гїи , сѣда́ленъ . гла́съ , а҃ . Ли́къ а҆́гг҃льскїи диви́тсѧ чꙋдесѝ . землені́и же гла́сы вᲂзᲂпїе́мъ пѣ́снь , зрѧ́ще неи҆зрече́ннᲂе бж҃їе сни́тїе . є҆го́же бо трепе́щꙋтъ нбⷭ҇ныѧ си́лы , нн҃ѣ ста́рческима ѡ҆бъє́млетсѧ рꙋка́ма , є҆ди́нъ чл҃кᲂлю́бецъ . сла́ва , и҆ ны́нѣ , то́йже .=

По в҃ , стихᲂло́гїи , сѣда́ленъ . гла́съ , и҃ . Рᲂди́сѧ на землѝ сᲂбез̾нача́льныи ѻ҆ц҃ꙋ , принесе́сѧ в̾ цр҃кᲂвь непᲂсти́жимыи . ра́дꙋѧжесѧ ста́рецъ , на рꙋкꙋ̀ пᲂдъѧ́тъ зᲂвы́и , нн҃ѣ ѿпꙋща́еши є҆го́же пᲂсѣти́лъ є҆сѝ по гл҃ꙋ твᲂемꙋ̀ , бл҃гᲂи҆зво́ливыи спастѝ , ꙗ҆́кѡ бг҃ъ ро́дъ чл҃ческїи . сла́ва , и҆ ны́нѣ , то́йже .

Кано́нъ , пра́здникꙋ , на и҃ . и҆ ст҃ѣ́й , на д҃ . кано́н̾ , пра́здникꙋ . гла́съ , г҃ . твᲂре́нїе кᲂзмы̀ мᲂна́ха . пѣ́снь , а҃ . і҆рмо́съ . Сꙋ́шꙋ глꙋбᲂрᲂди́ тельнꙋю зе́млю , сл҃нце наше́ствᲂва и҆нᲂгда̀ . ꙗ҆́кѡ стѣна́ бо ѡ҆гꙋстѣ̀ ѻ҆́ба по́лы вᲂда̀ , лю́демъ пѣ́шимъ глꙋбинꙋ̀ прᲂхᲂдѧ́щимъ , и҆ бг҃ᲂꙋго́днѡ пᲂю́щимъ , пᲂе́мъ гдⷭ҇ви , сла́вно бо прᲂсла́висѧ .

запѣ́въ : Сла́ва гдⷭ҇и срѣ́тенїю твᲂемꙋ̀ . Да ка́плютъ во́дꙋ ѻ҆́блацы , сл҃нце бо на ѻ҆́блацѣ ле́гцѣ нᲂси́мо наста́ло є҆́сть , на нетлѣ́ннꙋю рꙋкꙋ̀ , хрⷭ҇то́съ в̾ цр҃кви ꙗ҆́кѡ младе́нецъ . тѣ́мже вѣ́рнїи вᲂзᲂпїе́мъ , пᲂе́мъ гдⷭ҇ви , сла́вно бо прᲂсла́висѧ . Крѣпи́тѣсѧ рꙋ́цѣ сѷмеѡ́ни , ста́ро стїю ѡ҆сла́бленїи . лы́ста же претрꙋжде́на ста́рча пра́вѡ быстро̀ движи́тасѧ , хрⷭ҇тꙋ̀ на срѣ́тенїе , ли́къ с̾ беспло́тными сᲂста́вите , пᲂе́мъ гдⷭ҇ви , сла́вно бо прᲂсла́висѧ . Ра́зꙋмᲂмъ прᲂсте́ртаѧ нб҃са̀ весели́тесѧ , ра́дꙋйжесѧ землѐ . и҆з̾ пребжⷭ҇твенныхъ бо нѣ́дръ хитре́цъ прᲂше́дъ хрⷭ҇то́съ , мт҃рїю дв҃ᲂю бг҃ᲂви ѻ҆ц҃ꙋ прино́ситсѧ младе́нецъ , и҆́же пре́жде всѣ́хъ , сла́вно бо прᲂсла́висѧ .

дрꙋгі́и , кано́нъ , ст҃ѣ́й . гла́съ , в҃ . пѣ́снь , а҃ . і҆рмо́съ . Грѧди́те лю́дїе , пᲂе́мъ пѣ́снь хрⷭ҇тꙋ̀ бг҃ꙋ , раз̾дѣ́льшемꙋ мо́ре , и҆ прᲂве́дшꙋ лю́ди ꙗ҆́же и҆спꙋстѝ и҆з̾ рабо́ты є҆ги́петскїѧ , ꙗ҆́кѡ прᲂсла́висѧ .

запѣ́въ : Ст҃а́ѧ мч҃нце а҆га́ѳїе , мᲂлѝ бг҃а ѡ҆ на́съ . Бл҃ги́хъ пе́рвѣе винꙋ̀ вᲂз̾желѣ́вши , бл҃гᲂи҆мени́тагѡ зва́нїѧ , мч҃нце спᲂдо́бисѧ . несказа́ннагѡ прᲂмышле́нїѧ , нра́въ твᲂи́хъ прᲂразꙋмѣ́вша бл҃гᲂсты́ню . Взѧ́тсѧ чⷭ҇таѧ к̾ житїю̀ пресвѣ́тлᲂмꙋ , пло́тьскᲂе мꙋдрᲂва́нїе презрѣ́вши . и҆ к̾ жела́ннᲂмꙋ женихꙋ̀ свᲂемꙋ̀ , крѣ́пкѡ взира́ющи . Невѣ́ста хрⷭ҇то́ва , бжⷭ҇твеннᲂю бл҃гᲂстїю ᲂу҆краси́сѧ . и҆ дв҃ьства дᲂбро́тами , и҆ бжⷭ҇твенными крᲂвьмѝ чⷭ҇тна́гѡ мч҃нїѧ , сꙋгꙋ́быми вѣнцы̀ вѣнча́ема сла́внаѧ . боⷢ҇ . Бг҃ᲂлѣ́пнѡ селе́нїе чⷭ҇таѧ ты̀ бы́сть , нб҃съ прᲂстра́ннѣйшее , и҆ чи́стѣйше бцⷣе дв҃о . и҆ ны́нѣ ѡ҆ тебѣ̀ ра́дꙋетсѧ дв҃ческїи ли́къ .

пѣ́снь , г҃ . і҆рмо́съ . Оу҆тверже́нїе на тѧ̀ надѣ́ющимсѧ , ᲂу҆твердѝ гдⷭ҇и цр҃кᲂвь свᲂю̀ , ю҆́же стѧжа̀ чⷭ҇тно́ю сѝ кро́вїю . Первᲂрᲂжде́нъ и҆з̾ ѻ҆ц҃а пре́жде вѣ́къ , первᲂрᲂжде́нъ младе́нецъ и҆з̾ дв҃ы нетлѣ́нны . а҆да́мꙋ рꙋ́кꙋ прᲂстира́ѧ ꙗ҆ви́сѧ . Младᲂꙋ́мна бы́вша пре́лестїю первᲂз̾да́ннагѡ , па́ки и҆справлѧ́ѧ бг҃ъ сло́во , младе́нствᲂвавъ ꙗ҆ви́сѧ . Землѝ и҆сча́дїе , па́ки те́кши к̾ не́й , бжⷭ҇тва̀ сᲂѡ҆бра́знᲂе є҆стество̀ сᲂдѣ́тель ꙗ҆́кѡ непрело́жно , младе́нствᲂвавъ ꙗ҆вѝ .

и҆́нъ , і҆рмо́с̾ . Оу҆твердѝ на́съ сᲂбо́ю гдⷭ҇и , дре́вᲂмъ ᲂу҆мерщве́и прегрѣше́нїѧ . и҆ стра́хъ тво́й всадѝ в̾ срⷣца̀ на́ша , ꙗ҆́кѡ чл҃кᲂлю́бецъ . А҆га́ѳїе , ꙗ҆́снᲂе и҆ прекра́снᲂе , и҆ бжⷭ҇твеннᲂе мч҃нкъ прᲂзѧбе́нїе и҆ сла́во . дꙋшѝ мᲂеѧ̀ ѡ҆злᲂбле́нїе и҆сцѣли́вши мч҃нце ᲂу҆дᲂбрѝ . Зако́нными дᲂбрᲂдѣ́тельми , себѐ ᲂу҆ѧсни́ла є҆сѝ а҆га́ѳїе , и҆ мч҃нца прᲂнарече́сѧ . ѡ҆ вре́менныхъ небре́гши , и҆ бж҃їе црⷭ҇тво вᲂз̾люби́вши . Всѣ́хъ кра́сныхъ хрⷭ҇та̀ пред̾пᲂчла̀ є҆сѝ а҆га́ѳїе , привлечена̀ бжⷭ҇твеннымъ жела́нїемъ . и҆ мꙋчи́телемъ шата́нїѧ , бл҃гᲂде́рзᲂстнѡ и҆ мꙋ́жески пᲂпра́ла є҆сѝ . боⷢ҇ . Бг҃ᲂневѣ́сто чⷭ҇таѧ , бг҃а є҆го́же рᲂдила̀ є҆сѝ мᲂлѝ , и҆зба́вити тебѐ пᲂю́щїѧ , ѿ бѣ́дъ и҆ напа́стей , и҆ страсте́й настᲂѧ́нїи , пребл҃же́ннаѧ .

кᲂнда́къ , ст҃ѣ́й . гла́съ , в҃ . Дв҃ьство непᲂро́чно , и҆ мꙋче́нїе принесла̀ є҆сѝ , ꙗ҆́кᲂже вѣ́но всекра́сно , без̾сме́ртнᲂмꙋ женихꙋ̀ . и҆́мже причте́сѧ а҆́гг҃лъ ликᲂстᲂѧ́нїю , пᲂбѣди́вши дѣ́мᲂнъ ѕлᲂдѣ́йства . сегѡ̀ ра́ди тѧ̀ чте́мъ вѣ́рᲂю , мч҃нце а҆га́ѳїе всехва́льнаѧ . и҆́кᲂсъ . Сщ҃е́ннагѡ прᲂсвѣще́нїѧ , вы́нꙋ причаща́ющисѧ , ꙗ҆́кѡ свѣ́тᲂмъ ѻ҆ц҃ꙋ пред̾стᲂѧ́ще сла́внаѧ . ꙗ҆́же свѣтᲂно́снꙋю , и҆ бжⷭ҇твеннꙋю тѝ па́мѧть , сᲂверша́ющїѧ ᲂу҆ма̀ пра́вᲂстїю , ѡ҆ст҃ѝ и҆ прᲂсвѣтѝ . и҆ во ѿверзе́нїе ᲂу҆́стъ влᲂжѝ сло́во , вᲂспѣ́ти житїѐ твᲂѐ , терпѣ́нїе свидѣ́нїе ка́зни стрᲂга́нїе , и҆́миже ᲂу҆лꙋчѝ хрⷭ҇та̀ , и҆ пᲂбѣ́дными зако́ннѡ ᲂу҆вѧзе́сѧ вѣнцы̀ , а҆га́ѳїе всехва́льнаѧ .

сѣда́лен̾ , ст҃ѣ́й . гла́съ , г҃ . Оу҆краше́нїемъ вѣ́ры и҆ бл҃гᲂче́стїемъ , прпⷣбнымъ и҆ дв҃ьствᲂмъ , и҆ ᲂу҆се́рдїемъ ᲂу҆крашена̀ страда́нїѧ , нарекла́сѧ є҆сѝ ᲂу҆́мъ прпⷣбенъ , самᲂи҆зво́ленъ , вᲂи́стинꙋ че́сть к̾ бг҃ꙋ , ѻ҆те́чествꙋ и҆збавле́нїе . хрⷭ҇то́ви ꙗ҆́кѡ невѣ́ста мᲂлѧ́щисѧ , дарᲂва́ти на́мъ ве́лїю млⷭ҇ть . сла́ва , и҆ ны́нѣ , пра́здникꙋ . Ѿ дв҃ы тѧ̀ вᲂплᲂще́на хрⷭ҇тѐ , ны́нѣ вᲂспрїѧ́тъ сщ҃е́нныи сѷмеѡ́нъ , ѿ ны́нѣ ѿпꙋща́еши вᲂпїѧ̀ раба̀ твᲂегѡ̀ влⷣко . а҆́нна же непᲂро́чнаѧ прⷪ҇рчица и҆ сла́внаѧ , ны́нѣ и҆спᲂвѣ́данїе и҆ пѣ́нїе принᲂша́ше тѝ . мы́ же живᲂда́вче вᲂпїе́мъ , сла́ва та́кѡ и҆зво́льшемꙋ . А҆́ще є҆́сть по́стъ , сла́ва , и҆ ны́нѣ , боⷢ҇ . а҆́ще ли среда̀ и҆ пѧто́къ , крⷭ҇тᲂбоⷢ҇ . пи́саны сего̀ мцⷭ҇а , въ и҃і дн҃ь .

пѣ́снь , д҃ . і҆рмо́съ . Пᲂкры́ла є҆́сть нб҃са̀ дᲂбрᲂдѣ́тель твᲂѧ̀ хрⷭ҇тѐ , и҆з̾ кїѡ́та бо прᲂше́дъ , ст҃ы́ѧ твᲂеѧ̀ нетлѣ́нныѧ мт҃ре , в̾ цр҃кви сла́вы ти ꙗ҆ви́сѧ , ꙗ҆́кѡ младе́нецъ на рꙋкꙋ̀ нᲂси́мъ . и҆ и҆спо́лнишасѧ всѧ̀ твᲂегѡ̀ хвале́нїѧ . Ра́дꙋйсѧ сѷмеѡ́не неи҆зрече́ннымъ таи́нниче , бцⷣа вᲂпїѧ́ше , є҆го́же ѿ ст҃а́гѡ ѡ҆ дре́вле вᲂз̾вѣсти́тисѧ дх҃а , младе́нствᲂвавша сло́ва хрⷭ҇та̀ на рꙋкꙋ̀ прїимѝ . зᲂвы́и є҆мꙋ̀ , и҆спо́лнишасѧ всѧ̀ твᲂегѡ̀ хвале́нїѧ . На него́ же ᲂу҆пᲂва́лъ є҆сѝ сѷмеѡ́не , во́зрастъ дѣ́тищныи , ра́дꙋѧсѧ пᲂд̾и҆мѝ хрⷭ҇та̀ . і҆и҃лю бжⷭ҇твеннᲂе ᲂу҆тѣше́нїе . зако́нꙋ твᲂрца̀ и҆ влⷣкꙋ , и҆спᲂлнѧ́ющагѡ зако́нꙋ чи́нъ , зᲂвы́и є҆мꙋ̀ , и҆спо́лнишасѧ всѧ̀ твᲂегѡ̀ хвале́нїѧ . Ви́дѣ сѷмеѡ́нъ сло́во без̾нача́льнᲂе , с̾ пло́тїю ꙗ҆́кѡ на прⷭ҇то́лѣ херꙋви́мстѣ дв҃цею нᲂси́мо , вино́внаго бы́тїю всѧ́ческихъ . ꙗ҆́кѡ млⷣнцꙋ дивѧ́сѧ вᲂпїѧ́ше є҆мꙋ̀ , и҆спо́лнишасѧ всѧ̀ твᲂегѡ̀ хвале́нїѧ .

и҆́нъ , і҆рмо́съ . Пᲂю́ тѧ слꙋ́хᲂмъ бо гдⷭ҇и , ᲂу҆слы́шахъ и҆ ᲂу҆бᲂѧ́хсѧ . до мене́ бо прїи́де , менѐ и҆ща̀ заблꙋ́ждьшаго . тѣ́мже мно́гᲂе твᲂѐ сᲂше́ствїе є҆́же на мѧ̀ прᲂславлѧ́ю ѡ҆бнᲂвле́нїе . Пᲂсрами́сѧ льсти́вагѡ змїѧ̀ безꙋ́мїе , и҆ ѡ҆бличи́сѧ . дв҃ца бо сего̀ ны́нѣ шата́нїе пᲂпира́етъ . хрⷭ҇тꙋ̀ ѿ дв҃ы вᲂсїѧ́вшꙋ на землѝ , и҆ всѣ́хъ ѡ҆зари́вшꙋ . Зако́нно цѣлᲂмꙋ́дрїе нескве́рно , ᲂу҆держа́вши страстᲂте́рпице , дꙋ́хи ра́дꙋющисѧ низ̾лᲂжи́ла є҆сѝ лꙋка́вствїѧ , хрⷭ҇то́вᲂю вᲂѡ҆рꙋжи́вшесѧ бл҃гᲂда́тїю , и҆ крⷭ҇тъ сегѡ̀ на ра́мо взе́мши . Бꙋ́ди ми пред̾ста́тельница всемꙋ́драѧ , лю́тыхъ мѧ и҆зима́ющи , и҆ напа́стей бꙋ́ри , и҆ наси́лїѧ и҆зба́ви вра́жїѧ . ꙗ҆́кѡ да и҆зба́вльсѧ пᲂю́ тѧ ꙗ҆́кѡ бл҃гꙋ , застꙋпле́нїю тезᲂи҆мени́тꙋю . боⷢ҇ . Неи҆змѣ́рно а҆́гг҃льскїѧ пречⷭ҇таѧ свѣ́тлᲂсти преминꙋ́ла є҆сѝ , мы́сленаго сл҃нца ро́ждьши несказа́ннѡ хрⷭ҇та̀ , и҆́же зарѧ́ми бжⷭ҇тва̀ , вѣ́рныхъ мы́сли ѡ҆зарѧ́ющагѡ .

пѣ́снь , є҃ . і҆рмо́съ . Ꙗ҆́кѡ ви́дѣ и҆са́їѧ ѻ҆бра́знѡ на прⷭ҇то́лѣ превысо́цѣ бг҃а , ѿ а҆́гг҃лъ сла́вы да́ры прїе́млюща , ѽ ѻ҆каѧ́нныи вᲂпїѧ́ше а҆́зъ , прᲂви́дѣхъ вᲂплᲂща́ема бг҃а , свѣ́та невече́рнѧ , и҆ ми́рᲂмъ ѡ҆блада́юща . Разꙋмѣ́въ бжⷭ҇твенныи ста́рецъ , прᲂѧ́вленꙋю дре́вле прⷪ҇ркꙋ сла́вꙋ , пло́тїю сло́ва зрѧ̀ мт҃рїю держи́ма , ѽ ра́дꙋисѧ вᲂпїѧ́ше чⷭ҇таѧ , ꙗ҆́кѡ прⷭ҇то́лъ бо держи́ши бг҃а , свѣ́та невече́рнѧ , и҆ ми́рᲂмъ ѡ҆блада́юща . Пᲂкло́ньсѧ ста́рецъ , и҆ стᲂпа́мъ бжⷭ҇твенѡ прикᲂснꙋ́сѧ , неи҆скꙋсᲂбра́чныѧ и҆ бж҃їѧ мт҃ре , ѻ҆́гнь речѐ но́сиши чⷭ҇таѧ . млⷣнца бᲂю́сѧ ѡ҆бъѧ́ти бг҃а , свѣ́та невече́рнѧ , и҆ ми́рᲂмъ ѡ҆блада́юща . Ѡ҆чища́етсѧ и҆са́їѧ ѿ серафи́ма ᲂу҆́гль прїе́мъ . ста́рецъ вᲂпїѧ́ше бж҃їи мт҃ри , ты̀ ꙗ҆́кѡ клеща́ми , рꙋка́ма прᲂсвѣща́еши мѧ . пᲂда́вши ми є҆го́же но́сиши свѣ́та невече́рнѧ , и҆ ми́рᲂмъ ѡ҆блада́юща .

и҆́нъ , і҆рмо́съ . Свѣ́та пᲂда́телю , и҆ вѣко́мъ тво́рче гдⷭ҇и , во́ свѣтѣ твᲂи́хъ пᲂвелѣ́нїи наста́ви на́съ , ра́звѣ бо тебѐ и҆но́гѡ бг҃а незна́емъ . Бжⷭ҇твеннымъ велѣ́нїемъ пᲂвинꙋ́ющисѧ сла́внаѧ , ѡ҆бра́знѡ плᲂтьска́гѡ пристра́стїѧ , разрѣши́сѧ ю҆́зъ , а҆га́ѳїе ма́слина ꙗ҆́вльшисѧ плᲂдᲂви́та . Все́ю любо́вїю хрⷭ҇то́вᲂю свѣ́тлаѧ блиста́нїѧ зрѧ́щи , ꙗ҆́же на землѝ до́лꙋ влекꙋ́щїѧ презрѣ́ла є҆сѝ сла́сти , ѻ҆́нᲂгѡ то́кмѡ жела́ющи красᲂты̀ . Да неи҆зрече́ннѣй спᲂдо́бишисѧ жи́зни сла́внаѧ , и҆збра́нныхъ ви́дѣти . мꙋ́ки претерпѣ́ла є҆сѝ крѣ́пкѡ , ра́дꙋющисѧ а҆га́ѳїе прехва́льнаѧ . боⷢ҇ . Тебѣ̀ ро́ждьшей хрⷭ҇та̀ всѣ́хъ сᲂдѣ́телѧ зᲂве́мъ , ра́дꙋисѧ чⷭ҇таѧ . ра́дꙋисѧ ꙗ҆́же свѣ́тъ вᲂсїѧ́вшаѧ на́мъ . ра́дꙋисѧ в̾мѣсти́вшаѧ бг҃а невмѣсти́маго .

пѣ́снь , ѕ҃ . і҆рмо́съ . Вᲂзᲂпѝ к̾ тебѣ̀ ви́дѣвъ ста́рецъ ѻ҆чи́ма спасе́нїе , є҆́же лю́демъ прїи́де ѿ́ бг҃а хрⷭ҇тѐ , ты̀ бг҃ъ мо́й . Сїѡ́нꙋ ты̀ ка́мень вᲂз̾лᲂжи́сѧ , непᲂкᲂри́вымъ претыка́нїе , и҆ сᲂбла́знꙋ ка́мень . нерꙋши́мᲂе вѣ́рнымъ спасе́нїе . И҆звѣ́стно нᲂсѧ̀ начерта́нїе , и҆́же пре́жде вѣ́къ тѧ и҆з̾расти́вшаго . землены́хъ за млрⷭ҇дїе , ны́нѣ не́мᲂщїю ѡ҆блᲂжи́сѧ . Сн҃ꙋ вы́шнѧгѡ , сн҃ꙋ дв҃ыѧ , бг҃ꙋ ѻ҆трᲂча́ти бы́вшемꙋ , пᲂкло́ньшꙋмисѧ , ны́нѣ ѿпꙋстѝ с̾ ми́рᲂмъ .

и҆́нъ , і҆рмо́съ . Въ бе́зднѣ грѣхо́внѣй ѡ҆держи́мъ , не и҆з̾слѣ́днꙋю млрⷭ҇дїѧ твᲂегѡ̀ призыва́ю бе́зднꙋ , ѿ тлѝ бж҃е мѧ вᲂз̾ведѝ . Сꙋемꙋ́дренъ сы́и мꙋчи́тель , тѧ̀ до́брꙋю дв҃ꙋ ᲂу҆кра́сти надѣ́ѧсѧ . но пᲂсра́мленъ ѡ҆бличи́сѧ , прирази́всѧ тве́рдᲂмꙋ твᲂемꙋ̀ ра́зꙋмꙋ . И҆злїѧ́сѧ бл҃гᲂда́ть во ᲂу҆стнꙋ̀ твᲂею̀ , мч҃нце бг҃ᲂи҆мени́таѧ . ꙗ҆́сно бо ѡ҆бличи́ла є҆сѝ ꙗ҆́вѣ без̾стꙋ́днаго , бг҃ᲂнаꙋче́ннымъ сло́вᲂмъ ѡ҆бᲂга́тившисѧ . Ка́мень че́стенъ ꙗ҆ви́ласѧ є҆сѝ всехва́льнаѧ , ᲂу҆́мъ самᲂи҆зво́ленъ прпⷣбенъ и҆мꙋ́щи . и҆ ѻ҆те́чествꙋ и҆збавле́нїе , ᲂу҆тверже́нїе бы́вши а҆га́ѳїе честна́ѧ . боⷢ҇ . Ѱало́мски вᲂсхвалѧ́юще вᲂпїе́мъ ти , ра́дꙋисѧ тꙋ́чнаѧ гᲂро̀ хрⷭ҇та̀ бг҃а . в̾ню́же всели́тисѧ и҆зво́ли , за на́ше спасе́нїе бг҃ᲂневѣ́сто .

кᲂнда́к̾ , пра́здникꙋ . гла́съ , а҃ . И҆́же ᲂу҆тро́бꙋ дв҃чꙋ ѡ҆ст҃и́въ ржⷭ҇тво́мъ сѝ , и҆ рꙋ́цѣ сѷмеѡ́ни бл҃гᲂслᲂви́въ , ꙗ҆́кᲂже пᲂдᲂба́ше пред̾вари́въ . и҆ ны́нѣ спа́слъ є҆сѝ на́съ хрⷭ҇тѐ бж҃е . но ᲂу҆мирѝ во бранѣ́хъ житїѐ на́ше , и҆ ᲂу҆крѣпѝ люде́й , и҆́хже вᲂз̾люби́лъ є҆сѝ , є҆ди́не чл҃кᲂлю́бче . и҆́кᲂсъ . Къ бцⷣѣ притеце́мъ вѣ́рнїи , хᲂтѧ́щїи сн҃а є҆ѧ̀ ви́дѣти , к̾ сѷмеѡ́нꙋ и҆дꙋ́ща . є҆го́же с̾ нб҃сѐ беспло́тнїи ви́дѧще , дивлѧ́хꙋсѧ гл҃юще , чꙋ́днаѧ зри́мъ ны́нѣ и҆ пресла́внаѧ , непᲂстижи́маѧ и҆ несказа́ннаѧ . и҆́же бо а҆да́ма сᲂзда́выи , нᲂси́мь є҆́сть ꙗ҆́кѡ млⷣнцъ . невмѣсти́мыи вмѣща́етсѧ на рꙋкꙋ̀ сѷмеѡ́ню , и҆́же в̾ нѣ́дрѣхъ неѡ҆пи́санныи сы́и ѻ҆ц҃а свᲂегѡ̀ , во́лею ѡ҆писꙋ́етсѧ пло́тїю а҆ не бжⷭ҇тво́мъ , є҆ди́нъ чл҃кᲂлю́бецъ .

пѣ́снь , з҃ . і҆рмо́съ . Тебѐ в̾ пещѝ ѡ҆рᲂси́вшагѡ дѣ́ти бл҃гᲂслᲂви́ша , и҆ въ дв҃ꙋ нетлѣ́ннѡ все́ль шасѧ , бг҃а сло́ва пᲂе́мъ бл҃гᲂче́стнѡ хва́лѧще , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . А҆да́мꙋ пᲂказꙋ́ѧ и҆дꙋ̀ , во а҆́дѣ живꙋ́щꙋ , и҆ є҆́ввѣ принᲂсѧ̀ бл҃гᲂвѣ́стїе , сѷмеѡ́нъ вᲂпїѧ́ше , с̾ прⷪ҇рки ликꙋ́ѧ , бл҃гᲂслᲂве́нъ бг҃ъ ѻ҆ц҃ъ на́шихъ . Ро́да земле́мна и҆збавлѧ́ѧ бг҃ъ , да́же до а҆́да прїи́детъ . плѣ́ннымъ же пᲂда́стъ всѣ́мъ ѡ҆ставле́нїе , и҆ прᲂзрѣ́нїе слѣпы́мъ . ꙗ҆́кѡ и҆ нѣмы́мъ вᲂпи́ти , бл҃гᲂслᲂве́нъ бг҃ъ ѻ҆ц҃ъ на́шихъ . И҆ твᲂѐ срⷣце нетлѣ́ннаѧ ѻ҆рꙋ́жїе про́йдетъ , сѷмеѡ́нъ бцⷣѣ прᲂвᲂз̾гласѝ , на крⷭ҇тѣ̀ взира́ющи свᲂегѡ̀ сн҃а . є҆мꙋ́же вᲂпїе́мъ , блгⷭ҇ве́нъ бг҃ъ ѻ҆ц҃ъ на́шихъ .

и҆́нъ , і҆рмо́съ . Ѡ҆ тѣ́лѣ зла́тѣ на́ пᲂли деи́рѣ слꙋжи́мѣмъ , трїѐ ѻ҆́трᲂцы неради́ша ѡ҆ без̾бо́жнѣмъ велѣ́нїи , но пᲂсредѣ̀ пла́мени в̾ве́ржени , прᲂхлажда́еми пᲂѧ́хꙋ , бл҃гᲂслᲂве́нъ бг҃ъ ѻ҆ц҃ъ на́шихъ . Ꙗ҆́кѡ ѕѣлѡ̀ свѣ́тлѡ вѣща́ющи , и҆ ꙗ҆́вѣ мꙋчи́телѧ ᲂу҆диви́ла є҆сѝ , сло́вᲂмъ премꙋ́дрᲂсти и҆ бл҃гᲂда́ти , терпѣ́нїемъ же мꙋ́къ . ᲂу҆́глїе бо ѻ҆́гненᲂе бл҃гᲂмо́щнѡ претерпѣ́вши , взыва́еши бл҃гᲂслᲂве́нъ бг҃ъ ѻ҆ц҃ъ на́шихъ . Гнѣ́вᲂмъ лю́тымъ сᲂдержи́мь бы́въ ѕлᲂчести́выи , пренемᲂга́шесѧ лю́тѣ , твᲂю̀ ви́дѧ ю҆́нᲂсть , и҆ сᲂсе́цъ твᲂи́хъ прᲂзѧбе́нїе . ра́дꙋющибᲂсѧ мч҃нце вᲂпїѧ́ше , свᲂемꙋ̀ женихꙋ̀ взыва́ющи , бл҃гᲂслᲂве́нъ бг҃ъ ѻ҆ц҃ъ на́шихъ . Пред̾ста̀ свѣ́тлѡ хрⷭ҇то́въ ᲂу҆чени́къ , ны́нѣ стрего́мѣй тѝ , твᲂѧ̀ и҆сцѣлѧ́ѧ лю́тыѧ ра́ны , ꙗ҆́же пᲂдъѧ́тъ непᲂбѣди́маѧ мч҃нце , сп҃сᲂва дв҃це . ра́дꙋющисѧ и҆ гл҃ющи , бл҃гᲂслᲂве́нъ бг҃ъ ѻ҆ц҃ъ на́шихъ . боⷢ҇ . Оу҆мерщвлѧ́етсѧ а҆да́мъ , престꙋ́пль за́пᲂвѣдь вседержи́телѧ . ты́ же ро́ждьши вѣ́чнꙋю жи́знь , дв҃о пренепᲂро́чнаѧ , сего̀ и҆зба́вила є҆сѝ ѿ сме́рти , сн҃ꙋ твᲂемꙋ̀ взыва́юща , бл҃гᲂслᲂве́нъ бг҃ъ ѻ҆ц҃ъ на́шихъ .

пѣ́снь , и҃ . і҆рмо́съ . Въ непᲂстᲂѧ́ннѣмъ ѻ҆гнѝ сᲂвᲂкꙋ́пльшесѧ , и҆́же бл҃гᲂче́стїѧ пред̾стᲂѧ́ще ю҆́нᲂши , пла́менѣмъ же неврежде́ни , бжⷭ҇твеннꙋю пѣ́снь пᲂѧ́хꙋ , блгⷭ҇ви́те всѧ́каѧ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Лю́дїе і҆и҃леви , ва́шꙋ сла́вꙋ є҆м̾манꙋ́ила зрѧ́ще , ѻ҆трᲂча̀ и҆з̾ дв҃ы , пред̾ лице́мъ бжⷭ҇твеннагѡ кᲂвче́га нн҃ѣ ликꙋ́йте , блгⷭ҇ви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Сѐ сѷмеѡ́нъ вᲂпїѧ́ше , пререка́емᲂе зна́менїе се́й бꙋ́детъ , бг҃ъ сы́и и҆ ѻ҆трᲂча̀ . семꙋ̀ вѣ́рнїи вᲂзᲂпїе́мъ , блгⷭ҇ви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Живо́тъ сы́и се́й бꙋ́детъ , паде́нїе невѣ́рнымъ , младе́нствᲂвавъ бг҃ъ сло́во . ꙗ҆́кѡ вᲂста́нїе всѣ́мъ вѣ́рнѡ зᲂвꙋ́щимъ , блгⷭ҇ви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки .

и҆́нъ , і҆рмо́съ . Въ пе́щь ѻ҆́гненнꙋю , к̾ дѣ́темъ є҆вре́йскимъ сᲂше́дшагѡ , и҆ пла́мень на хла́дъ прело́жшагѡ бг҃а , по́йте всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Въ весе́лїи и҆ ра́дᲂсти вѣ́чнѣй жи́ти спᲂдо́бившисѧ , несказа́ннᲂю тѝ сла́вᲂю ѡ҆зари́тисѧ , чтꙋ́щимъ тѧ а҆га́ѳїе гдⷭ҇ви пᲂмᲂли́сѧ , и҆ нетлѣ́ннꙋю жи́знь ᲂу҆лꙋчи́ти . Оу҆мо́мъ и҆ срⷣцемъ и҆ дш҃е́ю , вᲂз̾лю́бльши хрⷭ҇та̀ па́че сло́ва , мнᲂгᲂрачи́тельнаго є҆ди́нагѡ . в̾пери́ласѧ є҆сѝ тᲂмꙋ̀ вᲂпїю́щи , текꙋ̀ в̾слѣ́дъ тебѐ , и҆ вселю́сѧ с̾ тᲂбо́ю во́ вѣки . Преє҆сте́ствеными рѧ́снами , и҆ кра́снᲂю ѻ҆де́ждею ᲂу҆крашена̀ , ꙗ҆́кѡ цр҃ва дщѝ , в̾ че́сти хрⷭ҇то́вѣ пред̾ста̀ а҆га́ѳїе . взыва́ющи , тѧ̀ превᲂзно́симъ гдⷭ҇а во́ вѣки . боⷢ҇ . Мѵ́ро и҆злїѧ́ннᲂе на́мъ бцⷣе хрⷭ҇то́ва во́ чревѣ нᲂсѧ́щи , бл҃гᲂꙋха́ла є҆сѝ мѵ́ра , бг҃ᲂдᲂхнᲂве́нными кажде́ньми . тѣ́мже тѝ ра́дꙋисѧ взыва́емъ .

пѣ́снь , ѳ҃ . і҆рмо́съ . Въ зако́ннѣмъ сѣннᲂписа́ нїи , ѻ҆́бразъ ви́димъ вѣ́рнїи , всѧ́ко бо ѻ҆трᲂча̀ лᲂжесна̀ разверза́ѧ ст҃о бг҃ᲂви , тѣ́мъ первᲂро жде́ннᲂе сло́во , ѿ ѻ҆ц҃а без̾нача́льна сн҃а , первᲂрᲂжде́на и҆з̾ мт҃ре неи҆скꙋ́сныѧ бра́кꙋ вели ча́емъ . И҆́же дре́внимъ нᲂвᲂрᲂжде́ннᲂю го́рличищꙋ сꙋпрꙋ́гꙋ , верстꙋ́ же птенцꙋ̀ , и҆́миже бжⷭ҇твенныи ста́рецъ , и҆ цѣлᲂмꙋ́дренаѧ а҆́нна прⷪ҇рчица , и҆́же ѿ дв҃ы рᲂжде́ннᲂмꙋ , и҆ сн҃ꙋ є҆динᲂра́сленᲂмꙋ ѻ҆ц҃ꙋ , в̾ цр҃кᲂвь принᲂси́мꙋ слꙋ́ жатъ велича́юще . Во́здалъ ми є҆сѝ вᲂпїѧ́ше сѷмеѡ́н̾ , спасе́нїѧ си хрⷭ҇тѐ ра́дᲂванїе , вᲂспрїимѝ свᲂегѡ̀ слꙋжи́телѧ , сѣ́немъ претрꙋжде́наго . но́вей бл҃гᲂда́ти сщ҃еннᲂпрᲂпᲂвѣ́дника и҆ таи́н ника , во хвале́нїи велича́емъ . Сщ҃еннᲂлѣ́пнѡ и҆спᲂвѣ́дашесѧ а҆́нна прᲂрица́ющи , цѣлᲂмꙋ́дре наѧ и҆ прпⷣбнаѧ и҆ ста́рица влⷣцѣ , в̾ цр҃кви ꙗ҆́в̾ственѡ . бцⷣꙋ же прᲂпᲂвѣ́дающи , всѣ́мъ сꙋ́щимъ велича́ше .

и҆́нъ , і҆рмо́съ . И҆́же ѿ́ бг҃а бг҃а сло́ва , неи҆зрече́н нᲂю мꙋ́дрᲂстїю , прише́дшаго ѡ҆бнᲂви́ти а҆да́ма , ꙗ҆́дїю тлѣ́нїѧ па́дшаго ѕлѣ̀ , ѿ ст҃ы́ѧ же дв҃цы , неи҆зрече́нно вᲂплᲂща́ема на́съ ра́ди , вѣ́рнїи є҆динᲂмꙋ́дреннѡ пѣ́сньми велича́емъ . Пᲂбѣди́тельными вѣнцы̀ , ᲂу҆краси́вшисѧ бг҃ᲂмꙋ́драѧ а҆га́ѳїе , десни́цею живᲂнача́льнᲂю , ны́нѣ и҆зба́витисѧ пᲂмᲂли́сѧ , ꙗ҆́кᲂже ѻ҆те́чествꙋ сѝ , ѿ бꙋ́ри пе́рвѣе и҆ ѻ҆гнѧ̀ , ᲂу҆ста́вила є҆сѝ стремле́нїѧ . да вси́ тѧ пѣ́сньми непреста́ннѡ велича́емъ . И҆́же бжⷭ҇твеннымъ прᲂмышле́нїемъ , сᲂдержа́и всѧ́ческаѧ хрⷭ҇то́съ , ны́нѣ вᲂз̾даѧ̀ твᲂе́й мч҃нце до́блести , вселѧ́етъ тѧ̀ в̾се́лѣхъ нбⷭ҇ныхъ , ꙗ҆́кѡ невѣ́стꙋ всенепᲂро́чнꙋю свᲂю̀ . и҆ ра́дᲂватисѧ со а҆́гг҃лы , и҆ с̾ мч҃нки спᲂдо́билъ є҆́сть . Млⷭ҇тивна ѽ стрⷭ҇тᲂте́рпице , сꙋдїю̀ всѧ́ческихъ хрⷭ҇та̀ , сᲂтвᲂрѝ мнѣ̀ чⷭ҇тна́ѧ , мᲂльба́ми сѝ пресла́внаѧ , и҆ прегрѣше́нїи мно́жествѡ прᲂсти́ти , бл҃гᲂсти бᲂга́тствᲂмъ , мᲂлѧ́щи непреста́й , мч҃нкѡмъ ᲂу҆дᲂбре́нїе . боⷢ҇ . Вᲂпло́щьсѧ неи҆зрече́нно , ѿ чⷭ҇тыхъ твᲂи́хъ крᲂве́й ꙗ҆́кѡ сл҃нце ꙗ҆ви́сѧ на́мъ , пречⷭ҇таѧ мт҃и без̾невѣ́стнаѧ . пре́жде вѣ́къ всѣ́хъ , ѻ҆ц҃ꙋ сᲂбезнача́ленъ сн҃ъ . и҆ тмꙋ̀ ѿгна́въ , прᲂсвѣтѝ всѧ́ческаѧ .

свѣти́ленъ , мч҃нцѣ . Сᲂсцꙋ̀ твᲂею̀ ѿѧ́тїѧ претерпѣ̀ до́браѧ дв҃це , и҆ всѧ́ки и҆ны́ѧ мꙋ́ки , хрⷭ҇та̀ ра́ди стрⷭ҇тᲂно́сице . тѣ́мъ и҆ в̾ черто́гъ тѧ кра́сныи вселѝ , тво́й жени́хъ сла́внаѧ . ликꙋ́ющꙋ со а҆́гг҃лы , дв҃о мч҃нце а҆га́ѳїе . сла́ва , и҆ ны́нѣ , пра́здникꙋ . свѣти́ленъ , пра́здникꙋ . Дх҃ᲂмъ во ст҃и́лищи пред̾ста́въ ста́рецъ , на рꙋкꙋ̀ вᲂспрїѧ́тъ зако́нꙋ влⷣкꙋ , вᲂпїѧ̀ ны́нѣ сᲂꙋ́зъ мѧ плᲂтьски́хъ разрѣшѝ , ꙗ҆́кᲂже ре́клъ є҆сѝ с̾ ми́рᲂмъ . ви́дѣхъ бо ѻ҆чи́ма ѿкрᲂве́нїе ꙗ҆зы́кѡмъ , и҆ і҆и҃лю спасе́нїе .

На стихо́внѣ , стихѣ́ры . гла́съ , в҃ . поⷣ . до́ме є҆в̾фра́фᲂвъ . Стра́хᲂмъ же и҆ ра́дᲂстїю ,꙳ на рꙋкꙋ̀ влⷣкꙋ ꙳ сѷмеѡ́нъ держа̀ ,꙳ живᲂтꙋ̀ прᲂша́ше разрѣше́нїѧ ,꙳ пᲂѧ̀ бг҃ᲂрᲂди́тельницꙋ .

сти́хъ : ны́нѣ ѿпꙋща́еши раба̀ свᲂегѡ̀ влⷣко ,꙳ по гл҃ꙋ твᲂемꙋ̀ с̾ ми́рᲂмъ . Ны́нѣ мѧ̀ к̾ жи́зни ꙳ ѿпꙋстѝ и҆́стиннѣй ,꙳ сѷмеѡ́нъ вᲂпїѧ́ше сп҃се мо́й ,꙳ ви́дѣхъ бо тѧ̀ свѣ́та ꙳ ми́рᲂви влⷣко .

сти́хъ : свѣ́тъ во ѿкрᲂве́нїе ꙗ҆зы́кѡмъ ,꙳ и҆ сла́вꙋ люді́й твᲂи́хъ і҆и҃лѧ . А҆́нна пррⷪ҇чески ,꙳ цѣлᲂмꙋ́ дренаѧ и҆ прпⷣбнаѧ ,꙳ ны́нѣ и҆спᲂвѣ́дашесѧ ,꙳ ѿ дв҃ы прᲂзѧ́бшемꙋ ,꙳ землены́м̾ на и҆збавле́нїе .

сла́ва , и҆ ны́нѣ . гла́съ , и҆ поⷣ , то́йже . Ра́дꙋисѧ ꙗ҆́же ра́дᲂсть ,꙳ ми́рᲂви прїе́мшаѧ ,꙳ хрⷭ҇та̀ жизнᲂда́вца .꙳ и҆ ᲂу҆ста́вльши печа́ль ꙳ дв҃о прамт҃рьнюю .