МЦⷭ҇А ТОГО́ЖЕ ВЪ Ѕ҃ ДН҃Ь

прпⷣбнагѡ ѻ҆ц҃а на́шегѡ викꙋ́ла . =Ве́черъ , на гдⷭ҇и вᲂзва́хъ , стихѣ́ры , пра́здникꙋ , г҃ . и҆ ст҃о́мꙋ , г҃ . стихѣ́ры , пра́здникꙋ . гла́съ , а҃ . поⷣ . нбⷭ҇нымъ чино́мъ . Твᲂре́цъ всѧ́ческихъ ,꙳ и҆ и҆зба́витель на́шъ ,꙳ мт҃рїю дв҃ᲂю в̾ цр҃квь принесе́сѧ .꙳ тѣ́мже ста́рецъ сего̀ прїе́мъ ,꙳ с̾ ра́дᲂстїю взыва́ше .꙳ ны́нѣ ѿпꙋща́еши раба̀ твᲂегѡ̀ бл҃же с̾ ми́рᲂмъ ,꙳ ꙗ҆́кᲂже и҆зво́лилъ є҆сѝ . Сѷмеѡ́нъ на рꙋкꙋ̀ ѿ дв҃ы прїе́мъ ,꙳ и҆́же пре́жде вѣ́къ рᲂжде́на сп҃са .꙳ ви́дѣ вᲂпїѧ́ше ,꙳ прᲂсщ҃е́нїе твᲂеѧ̀ сла́вы кᲂнце́мъ .꙳ ны́нѣ ѿпꙋща́еши раба̀ твᲂегѡ̀ бл҃же с̾ ми́рᲂмъ ,꙳ ꙗ҆́кѡ ви́дѣхъ тѧ̀ . И҆́же въ пᲂслѣ́днѧѧ рᲂжде́на на спасе́нїе землены́мъ ,꙳ сѷмеѡ́нъ на рꙋкꙋ̀ нᲂси́въ сп҃са .꙳ ра́дꙋѧсѧ вᲂпїѧ́ше , ви́дѣхъ свѣ́тъ ꙗ҆зы́кѡмъ ,꙳ и҆ сла́вꙋ і҆и҃леви .꙳ ны́нѣ ѿпꙋща́еши ,꙳ ꙗ҆́кᲂже ре́клъ є҆сѝ ꙗ҆́кѡ бг҃ъ ,꙳ ѿ сꙋ́щихъ здѣ̀ велѣ́нїемъ сѝ . =стⷯры , прпⷣбнᲂмꙋ . гла́съ , ѕ҃ . поⷣ . в̾ =тре́тїи де́нь . Свѣ́тᲂмъ бг҃ᲂдѣ́льныхъ дᲂбрᲂдѣ́телей ,꙳ блиста́ѧсѧ сщ҃е́нне .꙳ свѣ́тъ пᲂлᲂжи́сѧ на свѣ́щницѣ та́йнѡ , бжⷭ҇твенныѧ цр҃кве , ᲂу҆ѧснѧ́ѧ сїю̀ ѻ҆́ч҃е , сщ҃е́нными ᲂу҆че́нїи твᲂи́ми . Дх҃ъ тѧ̀ ст҃ы́и , викꙋ́ле сщ҃е́нне ѡ҆ст҃и́въ , тᲂбо́ю ст҃ы́ню , вѣ́рᲂю пристꙋпа́ющимъ , пᲂдава́етъ бг҃ᲂно́сне , прᲂсвѣще́нїе и҆ и҆збавле́нїе . Кра́йнюю бл҃гᲂсть прᲂпᲂвѣ́даѧ бг҃а на́шегѡ , ѡ҆ѕло́бленыѧ ᲂу҆блажа́еши лю́ди мꙋ́дре бл҃гᲂда́тнѡ , привᲂдѧ̀ сп҃сꙋ , ꙗ҆́кѡ сщ҃е́нникъ сщ҃е́ненъ . =сла́ва , и҆ ны́нѣ , пра́здникꙋ . гла́съ , є҃ . И҆спыта́йте писа́нїѧ , ꙗ҆́кᲂже речѐ во є҆ѵⷢ҇а́лїи хрⷭ҇то́съ бг҃ъ на́шъ . в̾ ни́хъ бо ѡ҆брѣта́емъ тᲂго̀ ражда́ема , и҆ пелена́ми пᲂвива́ема , во ꙗ҆́слѣхъ пᲂлага́ема , и҆ млеко́мъ пита́ема . ѡ҆брѣ́занїе прїе́млюща , и҆ сѷмеѡ́нᲂмъ нᲂси́ма . не мнѣ́нїемъ ни привидѣ́нїемъ , но и҆́стиннᲂю мі́рᲂви ꙗ҆́вльшисѧ . к̾ немꙋ́ же вᲂзᲂпїе́мъ , превѣ́чныи бж҃е сла́ва тебѣ̀ . А҆́ще є҆́сть по́стъ , сла́ва , и҆ ны́нѣ , боⷢ҇ . а҆́ще ли среда̀ и҆ пѧто́къ , крⷭ҇тᲂбоⷢ҇ . пи́саны сего̀ мцⷭ҇а , въ а҃і дн҃ь .

На стихо́внѣ , стихѣ́ры . гла́съ , в҃ . поⷣ . до́ме є҆в̾фра́фᲂвъ . Нᲂсѧ́щи ст҃а́ѧ ,꙳ и҆ чⷭ҇таѧ дв҃ца ,꙳ сᲂдѣ́телѧ и҆ влⷣкꙋ ,꙳ ꙗ҆́кѡ млⷣнца на рꙋкꙋ̀ ,꙳ в̾ цр҃квь вхо́дитъ .

сти́хъ : ны́нѣ ѿпꙋща́еши раба̀ свᲂегѡ̀ влⷣко ,꙳ по гл҃ꙋ твᲂемꙋ̀ с̾ ми́рᲂмъ . Прїимѝ сѷмеѡ́не ꙳ гдⷭ҇а сла́вы ,꙳ ꙗ҆́кᲂже ѡ҆бѣща́тисѧ ꙳ ѿ́ дх҃а ст҃а ,꙳ се́бо прише́лъ є҆́сть .

сти́хъ : свѣ́тъ во ѿкрᲂве́нїе ꙗ҆зы́кѡмъ ,꙳ и҆ сла́вꙋ люді́й твᲂи́хъ і҆и҃лѧ . Ны́нѣ ви́дѣсте бл҃гі́и бж҃е ,꙳ ѻ҆́чи мᲂѝ ,꙳ твᲂѐ ѡ҆бѣтᲂва́нїе .꙳ разрѣши́ мѧ ско́рѡ ,꙳ раба̀ твᲂегѡ̀ чл҃кᲂлю́бче . сла́ва , и҆ ны́нѣ . гла́съ , є҃ . Ве́тхїи де́ньми млⷣнствᲂвавъ пло́тїю , мт҃рїю дв҃ᲂю в̾ цр҃квь прино́ситсѧ , свᲂегѡ̀ зако́на и҆спᲂлнѧ́ѧ ѡ҆бѣща́нїе . є҆го́же сѷмеѡ́нъ прїе́мъ гл҃аше , ны́нѣ ѿпꙋща́еши с̾ ми́рᲂмъ по гл҃ꙋ твᲂемꙋ̀ раба̀ твᲂегѡ̀ . ви́дѣстѣ бо ѻ҆́чи мᲂѝ спасе́нїе твᲂѐ ст҃ы́и .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ . гла́съ , а҃ . Ра́дꙋйсѧ ѡ҆бра́дᲂваннаѧ бцⷣе дв҃о , и҆з̾ тебе́ бо вᲂсїѧ̀ сл҃нце пра́веднᲂе хрⷭ҇то́съ бг҃ъ на́шъ , прᲂсвѣща́ѧ и҆́же во тмѣ̀ сꙋ́щихъ . весели́сѧ и҆ ты̀ ста́рче пра́ведныи , прїе́мыи на́ рꙋкꙋ свᲂбᲂди́телѧ дш҃а́мъ на́шимъ , да́рꙋющагѡ на́мъ вᲂскрⷭ҇нїе .

На ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , три́жды . =По а҃ , стихᲂло́гїи , сѣда́ленъ . гла́съ , а҃ . Въ цр҃квь принесе́сѧ живо́тъ всѧ́ческихъ , менѐ ра́ди млⷣнствᲂвавъ , пᲂд̾ зако́нᲂмъ бы́сть , и҆́же дре́вле начерта́въ на скрыжа́лехъ , зако́нъ на гᲂрѣ̀ сѷна́йстей , да всѧ̀ и҆змени́ши ѿ зако́н ныѧ дре́вле рабо́ты . сла́ва млрⷭ҇дїю твᲂемꙋ̀ сп҃се . сла́ва црⷭ҇твїю твᲂемꙋ̀ . сла́ва смᲂтре́нїю твᲂемꙋ̀ , є҆ди́не чл҃кᲂлю́бче . =сла́ва , и҆ ны́нѣ , то́йже .

По в҃ , стихᲂло́гїи , сѣда́ленъ . гла́съ , є҃ . Въ цр҃квь принесе́сѧ , ѡ҆бы́чнᲂе и҆спᲂлнѧ́ѧ , твᲂре́цъ и҆ влⷣка и҆ зако́нꙋ да́вецъ . и҆ на рꙋкꙋ̀ сѷмеѡ́ню бл҃гᲂвᲂле́нїемъ свᲂи́мъ нᲂси́тисѧ пло́тїю , и҆́же всѣ́мъ стра́шныи , и҆ всю̀ тва́рь сᲂдержа̀ , вᲂсхᲂтѣ́лъ є҆сѝ є҆ди́не ще́дре , свѣ́тъ тво́й всѣ́мъ ѿкры́ти на́мъ . сла́ва , и҆ ны́нѣ , то́йже .

Кано́нъ , пра́здникꙋ , на и҃ . и҆ ст҃о́мꙋ , на д҃ . кано́нъ , пра́здникꙋ . гла́съ , г҃ . твᲂре́нїе кᲂзмы̀ мᲂна́ха . пѣ́снь , а҃ . і҆рмо́съ . Сꙋ́шꙋ глꙋбᲂрᲂди́ тельнꙋю зе́млю , сл҃нце наше́ствᲂва и҆нᲂгда̀ . ꙗ҆́кѡ стѣна́ бо ѡ҆гꙋстѣ̀ ѻ҆́ба по́лы вᲂда̀ , лю́демъ пѣ́шимъ глꙋбинꙋ̀ прᲂхᲂдѧ́щимъ , и҆ бг҃ᲂꙋго́днѡ пᲂю́щимъ , пᲂе́мъ гдⷭ҇ви , сла́вно бо прᲂсла́висѧ .

запѣ́въ : Сла́ва гдⷭ҇и срѣ́тенїю твᲂемꙋ̀ . Да ка́плютъ во́дꙋ ѻ҆́блацы , сл҃нце бо на ѻ҆́блацѣ ле́гцѣ нᲂси́мо наста́ло є҆́сть , на нетлѣ́ннꙋю рꙋкꙋ̀ , хрⷭ҇то́съ в̾ цр҃кви ꙗ҆́кѡ младе́нецъ . тѣ́мже вѣ́рнїи вᲂзᲂпїе́мъ , пᲂе́мъ гдⷭ҇ви , сла́вно бо прᲂсла́висѧ . Крѣпи́тѣсѧ рꙋ́цѣ сѷмеѡ́ни , ста́ро стїю ѡ҆сла́бленїи . лы́ста же претрꙋжде́на ста́рча пра́вѡ быстро̀ движи́тасѧ , хрⷭ҇тꙋ̀ на срѣ́тенїе , ли́къ с̾ беспло́тными сᲂста́вите , пᲂе́мъ гдⷭ҇ви , сла́вно бо прᲂсла́висѧ . Ра́зꙋмᲂмъ прᲂсте́ртаѧ нб҃са̀ весели́тесѧ , ра́дꙋйжесѧ землѐ . и҆з̾ пребжⷭ҇твенныхъ бо нѣ́дръ хитре́цъ прᲂше́дъ хрⷭ҇то́съ , мт҃рїю дв҃ᲂю бг҃ᲂви ѻ҆ц҃ꙋ прино́ситсѧ младе́нецъ , и҆́же пре́жде всѣ́хъ , сла́вно бо прᲂсла́висѧ .

кано́нъ , ст҃о́мꙋ . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ хᲂди́въ і҆и҃ль , по бе́зднѣ стᲂпа́ми , гᲂни́телѧ фараѡ́на , ви́дѧ пᲂтᲂплѧ́ема , бг҃ꙋ пᲂбѣ́днꙋю пѣ́снь пᲂе́мъ вᲂпїѧ́ше .

запѣ́въ : Прпⷣбне ѻ҆́ч҃е викꙋ́ле , мᲂлѝ бг҃а ѡ҆ на́съ . Сщ҃е́нными лѣ́пᲂтами , и҆ бжⷭ҇твенными и҆ свѣтᲂно́сными сїѧ́ньми прᲂсвѣща́емь ꙗ҆́снѡ , мᲂю̀ ѡ҆зарѝ дш҃ꙋ , свѣ́тлыи тво́й пра́здникъ , ѻ҆́ч҃е чтꙋ́щагѡ . Всесвѣ́тлꙋ тѧ ѕвѣздꙋ̀ , мы́сленᲂе пᲂказа́въ сл҃нцѣ , свѣтлᲂстьмѝ твᲂи́хъ дᲂбрᲂдѣ́телей , ᲂу҆ѧснѝ зе́млю ст҃лю хрⷭ҇то́въ викꙋ́ле премꙋ́дре . Житїѐ прⷭ҇нѡ ѡ҆чи́ствᲂванно , и҆ скве́рны несмѣ́сно пᲂказꙋ́ѧ . хрⷭ҇то́ви сщ҃е́нъ сᲂсꙋ́дъ мꙋ́дре пᲂзна́сѧ на землѝ , викꙋ́ле пресла́вне . боⷢ҇ . И҆́же ѻ҆ц҃ꙋ сы́и є҆динᲂро́денъ , па́че ᲂу҆ма̀ во́ чревѣ твᲂе́мъ вᲂпло́щьсѧ бг҃ᲂлѣ́пнѡ , чл҃ки ѡ҆бᲂжѝ чⷭ҇таѧ , за мно́жество щедро́тъ пребл҃гі́и .

пѣ́снь , г҃ . і҆рмо́съ . Оу҆тверже́нїе на тѧ̀ надѣ́ющимсѧ , ᲂу҆твердѝ гдⷭ҇и цр҃кᲂвь свᲂю̀ , ю҆́же стѧжа̀ чⷭ҇тно́ю сѝ кро́вїю . Первᲂрᲂжде́нъ и҆з̾ ѻ҆ц҃а пре́жде вѣ́къ , первᲂрᲂжде́нъ младе́нецъ и҆з̾ дв҃ы нетлѣ́нны . а҆да́мꙋ рꙋ́кꙋ прᲂстира́ѧ ꙗ҆ви́сѧ . Младᲂꙋ́мна бы́вша пре́лестїю первᲂз̾да́ннагѡ , па́ки и҆справлѧ́ѧ бг҃ъ сло́во , младе́нствᲂвавъ ꙗ҆ви́сѧ . Землѝ и҆сча́дїе , па́ки те́кши к̾ не́й , бжⷭ҇тва̀ сᲂѡ҆бра́знᲂе є҆стество̀ сᲂдѣ́тель ꙗ҆́кѡ непрело́жно , младе́нствᲂвавъ ꙗ҆вѝ .

и҆́нъ , і҆рмо́съ . Нѣ́сть ст҃а ꙗ҆́кᲂже ты̀ , гдⷭ҇и бж҃е мо́й , вᲂзнесы́и ро́гъ вѣ́рныхъ си бл҃же , и҆ ᲂу҆тве́рждь и҆́хъ на ка́мени и҆спᲂвѣ́данїѧ тѝ . Сн҃ъ свѣ́та и҆ днѝ бы́въ ст҃лю , трꙋды̀ бжⷭ҇твенными , всели́лсѧ є҆сѝ ꙗ҆́вѣ , в̾ свѣ́тлᲂтахъ ны́нѣ ст҃ы́хъ , бл҃гᲂда́тїю сїѧ́ѧ . Прᲂпᲂвѣ́даѧ є҆ди́но бл҃гᲂче́стнѡ трⷪ҇цы сꙋ́щество , мнᲂгᲂбо́жнꙋю ле́сть и҆скᲂрени́лъ є҆сѝ ѿ землѝ . ꙗ҆́кѡ ст҃ль че́стенъ , ꙗ҆́кѡ сло́вꙋ и҆́стиненъ слꙋжи́тель . Пꙋ́ть пᲂказа́лъ є҆сѝ жи́зни , всѣ́мъ прельще́ннымъ , ѿ враго́въ навѣ́та . и҆ приве́дъ тѣ́хъ , ꙗ҆́кѡ па́стырь слᲂве́сенъ , спаса́емь сло́вᲂмъ пе́рваго па́стырѧ . боⷢ҇ . Приста́нище бꙋ́ди ми и҆ храни́лище , лю́тыми тревᲂлне́нїи стрⷭ҇тны́ми , непреста́ннѡ ѡ҆бꙋрева́емꙋ прⷭ҇нѡ , в̾ мо́ри чⷭ҇таѧ житїѧ̀ , є҆ди́на прⷭ҇нѡ дв҃о .

сѣда́ленъ , ст҃о́мꙋ . гла́съ , д҃ . Сщ҃е́нїѧ свѣ́тᲂмъ сїѧ́ѧ , прᲂсвѣти́лъ є҆сѝ лю́ди ст҃лю , и҆ и҆́дᲂльскꙋю тмꙋ̀ пᲂтреби́лъ є҆сѝ . заре́ю же и҆сцѣле́нїи , страсте́й мглꙋ̀ разо́рь , преминꙋ́лъ є҆сѝ к̾ незахᲂди́мᲂмꙋ сїѧ́нїю . ѡ҆ на́съ мᲂли́сѧ прелѣ́жнѡ , тѧ̀ чтꙋ́щихъ викꙋ́ле бл҃же́нне . сла́ва , и҆ ны́нѣ , пра́здникꙋ . Млⷣнствꙋеши менѐ ра́ди ве́тхїи деньмѝ , чище́нїю прїѡ҆бща́ешисѧ пречⷭ҇тыи бж҃е , да пло́ть ᲂу҆вѣ́риши мѝ ю҆́же ѿ дв҃ы . и҆ си́мъ сѷмеѡ́нъ пᲂꙋча́ѧсѧ , пᲂзна́ тѧ бг҃а и҆ чл҃ка . и҆ ꙗ҆́кѡ живᲂта̀ лᲂбыза́ше , и҆ ра́дꙋѧсѧ ста́рчески вᲂпїѧ́ше , ѿпꙋсти́ мѧ , ты́ бо є҆сѝ бг҃ъ мо́й , живо́тъ всѧ́ческихъ .= А҆́ще є҆́сть по́стъ , сла́ва , и҆ ны́нѣ , боⷢ҇ . а҆́ще ли среда̀ и҆ пѧто́къ , крⷭ҇тᲂбоⷢ҇ . пи́саны сего̀ мцⷭ҇а , въ з҃і дн҃ь .=

пѣ́снь , д҃ . і҆рмо́съ . Пᲂкры́ла є҆́сть нб҃са̀ дᲂбрᲂдѣ́тель твᲂѧ̀ хрⷭ҇тѐ , и҆з̾ кїѡ́та бо прᲂше́дъ , ст҃ы́ѧ твᲂеѧ̀ нетлѣ́нныѧ мт҃ре , в̾ цр҃кви сла́вы ти ꙗ҆ви́сѧ , ꙗ҆́кѡ младе́нецъ на рꙋкꙋ̀ нᲂси́мъ . и҆ и҆спо́лнишасѧ всѧ̀ твᲂегѡ̀ хвале́нїѧ . Ра́дꙋйсѧ сѷмеѡ́не неи҆зрече́ннымъ таи́нниче , бцⷣа вᲂпїѧ́ше , є҆го́же ѿ ст҃а́гѡ ѡ҆ дре́вле вᲂз̾вѣсти́тисѧ дх҃а , младе́нствᲂвавша сло́ва хрⷭ҇та̀ на рꙋкꙋ̀ прїимѝ . зᲂвы́и є҆мꙋ̀ , и҆спо́лнишасѧ всѧ̀ твᲂегѡ̀ хвале́нїѧ . На него́ же ᲂу҆пᲂва́лъ є҆сѝ сѷмеѡ́не , во́зрастъ дѣ́тищныи , ра́дꙋѧсѧ пᲂд̾имѝ хрⷭ҇та̀ . і҆и҃лю бжⷭ҇твеннᲂе ᲂу҆тѣше́нїе . зако́нꙋ твᲂрца̀ и҆ влⷣкꙋ , и҆спᲂлнѧ́ющагѡ зако́нꙋ чи́нъ , зᲂвы́и є҆мꙋ̀ , и҆спо́лнишасѧ всѧ̀ твᲂегѡ̀ хвале́нїѧ . Ви́дѣ сѷмеѡ́нъ сло́во без̾нача́льнᲂе , с̾ пло́тїю ꙗ҆́кѡ на прⷭ҇то́лѣ херꙋви́мстѣ дв҃цею нᲂси́мо , вино́внаго бы́тїю всѧ́ческихъ . ꙗ҆́кѡ млⷣнцꙋ дивѧ́сѧ вᲂпїѧ́ше є҆мꙋ̀ , и҆спо́лнишасѧ всѧ̀ твᲂегѡ̀ хвале́нїѧ .

и҆́нъ , і҆рмоⷭ҇ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃ᲂлѣ́пно зᲂве́тъ вᲂпїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи . Прᲂвѣ́дыи твᲂеѧ̀ бл҃же́нне дꙋшѝ красᲂтꙋ̀ , и҆ ᲂу҆ма̀ чистᲂтꙋ̀ , сщ҃еннᲂпрᲂпᲂвѣ́дника мꙋ́дра , сщ҃е́ннѡ пред̾пᲂлага́етъ . Ѿ ́дх҃а прᲂсвѣща́емь , сꙋ́щїѧ во тмѣ̀ пре́лести прᲂсвѣща́еши . и҆ кр҃ще́нїемъ сн҃ы днѝ сᲂтвᲂрѧ́еши , ст҃лю пресла́вне . Ѻ҆брѣ́тъ тѧ̀ бл҃гᲂда́тїю сїѧ́юща , сла́вныи бг҃ᲂсло́въ , рꙋ́кꙋ вᲂз̾лага́етъ бжⷭ҇твенными вᲂжде́ньми , и҆ сщ҃е́нника сᲂверша́етъ сщ҃е́нна , викꙋ́ле премꙋ́дре . боⷢ҇ . Разꙋ́мнѡ в̾ кꙋпинѣ̀ тѧ̀ мѡѷсе́й ᲂу҆зрѣ̀ , сщ҃еннᲂѡ҆бразꙋ́емꙋ , ѻ҆гнѧ̀ хᲂтѧ́щаго бы́ти во ᲂу҆тро́бѣ , ꙗ҆влѧ́етъ та́йнѡ бцⷣе прⷭ҇нѡ дв҃о .

пѣ́снь , є҃ . і҆рмо́съ . Ꙗ҆́кѡ ви́дѣ и҆са́їѧ ѻ҆бра́знѡ на прⷭ҇то́лѣ превысо́цѣ бг҃а , ѿ а҆́гг҃лъ сла́вы да́ры прїе́млюща , ѽ ѻ҆каѧ́нныи вᲂпїѧ́ше а҆́зъ , прᲂви́дѣхъ вᲂплᲂща́ема бг҃а , свѣ́та невече́рнѧ , и҆ ми́рᲂмъ ѡ҆блада́юща . Разꙋмѣ́въ бжⷭ҇твенныи ста́рецъ , прᲂѧ́вленꙋю дре́вле прⷪ҇ркꙋ сла́вꙋ , пло́тїю сло́ва зрѧ̀ мт҃рїю держи́ма , ѽ ра́дꙋисѧ вᲂпїѧ́ше чⷭ҇таѧ , ꙗ҆́кѡ прⷭ҇то́лъ бо держи́ши бг҃а , свѣ́та невече́рнѧ , и҆ ми́рᲂмъ ѡ҆блада́юща . Пᲂкло́ньсѧ ста́рецъ , и҆ стᲂпа́мъ бжⷭ҇твенѡ прикᲂснꙋ́сѧ , не и҆скꙋсᲂбра́чныѧ и҆ бж҃їѧ мт҃ре , ѻ҆́гнь речѐ но́сиши чⷭ҇таѧ . млⷣнца бᲂю́сѧ ѡ҆бъѧ́ти бг҃а , свѣ́та невече́рнѧ , и҆ ми́рᲂмъ ѡ҆блада́юща . Ѡ҆чища́етсѧ и҆са́їѧ ѿ серафи́ма ᲂу҆́гль прїе́мъ . ста́рецъ вᲂпїѧ́ше бж҃їи мт҃ри , ты̀ ꙗ҆́кѡ клеща́ми , рꙋка́ма прᲂсвѣща́еши мѧ . пᲂда́вши ми є҆го́же но́сиши свѣ́та невече́рнѧ , и҆ ми́рᲂмъ ѡ҆блада́юща .

и҆́нъ , і҆рмо́съ . Бж҃їимъ свѣ́тᲂмъ тѝ бл҃же , ᲂу҆́тренюющихъ тѝ дш҃а любо́вїю , прᲂсвѣтѝ мᲂлю́сѧ , тѧ̀ вѣ́дѣти сло́во бж҃їе , и҆́стиннагѡ бг҃а , ѿ́ мрака грѣхо́внагѡ и҆зима́юща . Въ сщ҃е́нїѧ сщ҃е́ннꙋю ѻ҆де́ждꙋ ѡ҆бле́ксѧ сщ҃е́ннѡ , нечести́выѧ прᲂсвѣти́лъ є҆сѝ , честѝ ст҃лю , є҆ди́ницꙋ несᲂзда́ннꙋю въ трїе́хъ ли́цѣхъ , викꙋ́ле премꙋ́дре . Ѿ ᲂу҆́стъ во́лка мы́сленагѡ и҆схити́лъ є҆сѝ лю́ди , ᲂу҆че́ньми бг҃ᲂгла́сныхъ тѝ ᲂу҆́стъ . и҆ є҆рети́чествꙋющихъ ѻ҆́ч҃е без̾вра́тнаѧ , твᲂи́ми бг҃ᲂслᲂве́ньми загради́лъ є҆сѝ ᲂу҆ста̀ . Ме́рз̾скїи пᲂбѣжда́етсѧ , твᲂи́ми сщ҃е́нными слᲂвесы̀ маркїѡ́нъ , и҆ спрᲂмѣта́етсѧ . всѧ́кᲂгѡ без̾мѣ́стїѧ , и҆з̾ре́къ ти́нꙋ ѕлᲂсмра́днꙋ , викꙋ́ле пресла́вне . боⷢ҇ . Зако́ны є҆стества̀ і҆с҃ъ , пребᲂга́тыи бг҃ъ , ѡ҆б̾нᲂвлѧ́етъ всенепᲂро́чнаѧ , и҆з̾ твᲂеѧ̀ ᲂу҆тро́бы ражда́ѧсѧ , є҆ди́нъ ѡ҆бᲂгати́выи всѧ̀ во́лею .

пѣ́снь , ѕ҃ . і҆рмо́съ . Вᲂзᲂпѝ к̾ тебѣ̀ ви́дѣвъ ста́рецъ ѻ҆чи́ма спасе́нїе , є҆́же лю́демъ прїи́де ѿ́ бг҃а хрⷭ҇тѐ , ты̀ бг҃ъ мо́й . Сїѡ́нꙋ ты̀ ка́мень вᲂз̾лᲂжи́сѧ , непᲂкᲂри́вымъ претыка́нїе , и҆ сᲂбла́знꙋ ка́мень . нерꙋши́мᲂе вѣ́рнымъ спасе́нїе . И҆звѣ́стно нᲂсѧ̀ начерта́нїе , и҆́же пре́жде вѣ́къ тѧ и҆з̾расти́вшаго . землены́хъ за млрⷭ҇дїе , ны́нѣ не́мᲂщїю ѡ҆блᲂжи́сѧ . Сн҃ꙋ вы́шнѧгѡ , сн҃ꙋ дв҃ыѧ , бг҃ꙋ ѻ҆трᲂча́ти бы́вшемꙋ , пᲂкло́ньшꙋмисѧ , ны́нѣ ѿпꙋстѝ с̾ ми́рᲂмъ .

и҆́нъ , і҆рмо́съ . Жите́йскагѡ мо́рѧ вᲂз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вᲂпїю́ ти , вᲂз̾ведѝ ѿ тлѝ живо́тъ мо́й мнᲂгᲂмлⷭ҇тиве . Вᲂз̾нᲂсѧ́щее смире́нїе , чистᲂтꙋ̀ ᲂу҆ма̀ , любо́вь нелицемѣ́рнꙋ , вѣ́рꙋ и҆ наде́ждꙋ и҆мѣ́ѧ чи́стꙋ , викꙋ́лъ сла́вныи , трⷪ҇цѣ ꙗ҆ви́сѧ жили́ще . Вельмѝ ᲂу҆краси́вша , зми́рнѧнѡмъ сщ҃е́ннᲂе сѣда́лище прехва́льне . та́йнѡ наꙋча́етъ дх҃ъ , и҆́же по тебѣ̀ па́стырѧ пᲂлика́рпа , рꙋко́ю твᲂе́ю викꙋ́ле пᲂставлѧ́ема . Разꙋмѣ́въ зва́нїе свᲂѐ дх҃ᲂмъ премꙋ́дре . и҆́же по тебѣ̀ , бл҃гᲂда́тїю слᲂве́снымъ ѻ҆вца́мъ наста́вника приво́диши во ѻ҆лта́рь , дᲂбрᲂдѣ́телей сїѧ́нїемъ блиста́юща . боⷢ҇ . Две́ри бл҃гᲂда́ти , ѿве́рзшїѧ чл҃кѡмъ две́рь нбⷭ҇нꙋю , пᲂкаѧ́нїѧ две́ри ми и҆здале́ча ѿве́рзи влⷣчце , и҆ двере́й сме́ртныхъ свᲂбᲂдѝ .

кᲂнда́к̾ , пра́здникꙋ . гла́съ , а҃ . И҆́же ᲂу҆тро́бꙋ дв҃чꙋ ѡ҆ст҃и́въ ржⷭ҇тво́мъ сѝ , и҆ рꙋ́цѣ сѷмеѡ́ни бл҃гᲂслᲂви́въ , ꙗ҆́кᲂже пᲂдᲂба́ше пред̾вари́въ . и҆ ны́нѣ спа́слъ є҆сѝ на́съ хрⷭ҇тѐ бж҃е . но ᲂу҆мирѝ во бранѣ́хъ житїѐ на́ше , и҆ ᲂу҆крѣпѝ люде́й , и҆́хже вᲂз̾люби́лъ є҆сѝ , є҆ди́не чл҃кᲂлю́бче . и҆́кᲂсъ . Къ бцⷣѣ притеце́мъ вѣ́рнїи , хᲂтѧ́щїи сн҃а є҆ѧ̀ ви́дѣти , к̾ сѷмеѡ́нꙋ и҆дꙋ́ща . є҆го́же с̾ нб҃сѐ беспло́тнїи ви́дѧще , дивлѧ́хꙋсѧ гл҃юще , чꙋ́днаѧ зри́мъ ны́нѣ и҆ пресла́внаѧ , непᲂстижи́маѧ и҆ несказа́ннаѧ . и҆́же бо а҆да́ма сᲂзда́выи , нᲂси́мь є҆́сть ꙗ҆́кѡ млⷣнцъ . невмѣсти́мыи вмѣща́етсѧ на рꙋкꙋ̀ сѷмеѡ́ню , и҆́же в̾ нѣ́дрѣхъ неѡ҆пи́санныи сы́и ѻ҆ц҃а свᲂегѡ̀ , во́лею ѡ҆писꙋ́етсѧ пло́тїю а҆ не бжⷭ҇тво́мъ , є҆ди́нъ чл҃кᲂлю́бецъ .

пѣ́снь , з҃ . і҆рмо́съ . Тебѐ в̾ пещѝ ѡ҆рᲂси́вшагѡ дѣ́ти бл҃гᲂслᲂви́ша , и҆ въ дв҃ꙋ нетлѣ́ннѡ все́ль шасѧ , бг҃а сло́ва пᲂе́мъ бл҃гᲂче́стнѡ хва́лѧще , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . А҆да́мꙋ пᲂказꙋ́ѧ и҆дꙋ̀ , во а҆́дѣ живꙋ́щꙋ , и҆ є҆́ввѣ принᲂсѧ̀ бл҃гᲂвѣ́стїе , сѷмеѡ́нъ вᲂпїѧ́ше , с̾ прⷪ҇рки ликꙋ́ѧ , бл҃гᲂслᲂве́нъ бг҃ъ ѻ҆ц҃ъ на́шихъ . Ро́да земле́мна и҆збавлѧ́ѧ бг҃ъ , да́же до а҆́да прїи́детъ . плѣ́ннымъ же пᲂда́стъ всѣ́мъ ѡ҆ставле́нїе , и҆ прᲂзрѣ́нїе слѣпы́мъ . ꙗ҆́кѡ и҆ нѣмы́мъ вᲂпи́ти , бл҃гᲂслᲂве́нъ бг҃ъ ѻ҆ц҃ъ на́шихъ . И҆ твᲂѐ срⷣце нетлѣ́ннаѧ ѻ҆рꙋ́жїе про́йдетъ , сѷмеѡ́нъ бцⷣѣ прᲂвᲂз̾гласѝ , на крⷭ҇тѣ̀ взира́ющи свᲂегѡ̀ сн҃а . є҆мꙋ́же вᲂпїе́мъ , блгⷭ҇ве́нъ бг҃ъ ѻ҆ц҃ъ на́шихъ .

и҆́нъ , і҆рмо́съ . Хладᲂда́тельнꙋ ᲂу҆́бѡ пе́щь сᲂтвᲂрѝ а҆́гг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ ᲂу҆вѣща̀ вᲂпи́ти , бл҃гᲂслᲂве́нъ бг҃ъ ѻ҆ц҃ъ на́шихъ . Вразꙋмлѧ́ѧ неразꙋ́мныѧ , и҆справлѧ́ѧ же ле́стїю пᲂпо́лзшїѧсѧ , ѻ҆́ч҃е спа́слъ є҆сѝ , и҆ бг҃ᲂви приве́лъ є҆сѝ чи́сты , тᲂмꙋ̀ пᲂю́щїѧ бл҃гᲂче́стнѡ , бл҃гᲂслᲂве́нъ бг҃ъ ѻ҆ц҃ъ на́шихъ . Оу҆краси́шасѧ пребл҃же́нне лани́тѣ твᲂѝ , вᲂплᲂще́нїе прᲂпᲂвѣ́дающїи , и҆́же за неи҆зрече́ннᲂе млрⷭ҇дїе вᲂсїѧ́вшагѡ на́мъ . к̾ немꙋ́же вᲂпїѧ́ше прилѣ́жнѡ , бл҃гᲂслᲂве́нъ бг҃ъ ѻ҆ц҃ъ на́шихъ . Ѡ҆блада́лъ є҆сѝ вᲂз̾держа́нїемъ тѣлесѐ , страстьмѝ сла́вне . неѡ҆блада́нъ , льсти́вагѡ ꙗ҆ви́лсѧ є҆сѝ прило́гми . и҆ ны́нѣ вᲂспѣва́еши неле́стнѡ , бл҃гᲂслᲂве́нъ бг҃ъ ѻ҆ц҃ъ на́шихъ . боⷢ҇ . И҆зба́вльшесѧ дре́внѧгѡ ѡ҆сꙋжде́нїѧ , ржⷭ҇тво́мъ ти пренепᲂро́чнаѧ . ꙗ҆́кѡ влⷣчцꙋ вᲂспѣва́емъ тѧ , спа́сшїисѧ дв҃о тебѐ ра́ди , вᲂпїю́ще и҆ гл҃юще вѣ́рнѡ , блгⷭ҇ве́на ꙗ҆́же бг҃а пло́тїю ро́ждьшаѧ .

пѣ́снь , и҃ . і҆рмо́съ . Въ непᲂстᲂѧ́ннѣмъ ѻ҆гнѝ сᲂвᲂкꙋ́пльшесѧ , и҆́же бл҃гᲂче́стїѧ пред̾стᲂѧ́ще ю҆́нᲂши , пла́менѣмъ же неврежде́ни , бжⷭ҇твеннꙋю пѣ́снь пᲂѧ́хꙋ , блгⷭ҇ви́те всѧ́каѧ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Лю́дїе і҆и҃леви , ва́шꙋ сла́вꙋ є҆м̾манꙋ́ила зрѧ́ще , ѻ҆трᲂча̀ и҆з̾ дв҃ы , пред̾ лице́мъ бжⷭ҇твеннагѡ кᲂвче́га нн҃ѣ ликꙋ́йте , блгⷭ҇ви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Сѐ сѷмеѡ́нъ вᲂпїѧ́ше , пререка́емᲂе зна́менїе се́й бꙋ́детъ , бг҃ъ сы́и и҆ ѻ҆трᲂча̀ . семꙋ̀ вѣ́рнїи вᲂзᲂпїе́мъ , блгⷭ҇ви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Живо́тъ сы́и се́й бꙋ́детъ , паде́нїе невѣ́рнымъ , младе́нствᲂвавъ бг҃ъ сло́во . ꙗ҆́кѡ вᲂста́нїе всѣ́мъ вѣ́рнѡ зᲂвꙋ́щимъ , блгⷭ҇ви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки .

и҆́нъ , і҆рмо́съ . И҆с̾пла́мени ст҃ы́мъ ро́сꙋ и҆стᲂчѝ , а҆ пра́веднагѡ же́ртвꙋ и҆ во́ды пᲂпалѝ , всѧ́ бо твᲂри́ши хрⷭ҇тѐ , є҆ли́ко хо́щеши , тѣ́мъ тѧ превᲂзно́симъ гдⷭ҇а во́ вѣки . Прᲂцвѣ́лъ є҆сѝ ꙗ҆́кѡ фи́никъ во дво́рѣхъ бж҃їихъ , до́лжнымъ пра́ведныхъ сно́мъ ᲂу҆снꙋ́лъ є҆сѝ . но́сиши же са́дъ бжⷭ҇твенныи , тво́й гро́бъ , чꙋ́до зрѧ́щимъ викꙋ́ле бг҃ᲂпрᲂпᲂвѣ́дниче . Бж҃їе бг҃ъ сло́во сᲂста́внᲂе , сщ҃е́нна ст҃лѧ тѧ пᲂставлѧ́етъ , пᲂма́зающа лю́ди сщ҃е́ннѡ , ст҃лю наста́вниче зми́рнѧнѡмъ , свѣти́льниче вселе́ннѣй . Вᲂпло́щшасѧ сло́ва бг҃ᲂсло́вилъ є҆сѝ , и҆ мно́ги ѿ без̾слᲂве́сїѧ лю́ди спа́слъ є҆сѝ . бжⷭ҇твенъ бы́въ ᲂу҆чени́къ , вᲂсїѧ́вшагѡ в̾ бг҃ᲂслᲂве́сїихъ , викꙋ́ле бг҃ᲂно́сне . боⷢ҇ . Сщ҃е́ннѡ наꙋча́шесѧ твᲂи́мъ та́йнамъ , пррⷪ҇къ бцⷣе бжⷭ҇твеннᲂе сᲂсло́вїе . и҆здале́ча разꙋмѣ́въ и҆ ꙗ҆́снѡ пᲂлага́ѧ бг҃ᲂзва́нїѧ , бжⷭ҇твеннагѡ ржⷭ҇тва̀ твᲂегѡ̀ .

пѣ́снь , ѳ҃ . і҆рмо́съ . Въ зако́ннѣмъ сѣннᲂписа́ нїи , ѻ҆́бразъ ви́димъ вѣ́рнїи , всѧ́ко бо ѻ҆трᲂча̀ лᲂжесна̀ разверза́ѧ ст҃о бг҃ᲂви , тѣ́мъ первᲂро жде́ннᲂе сло́во , ѿ ѻ҆ц҃а без̾нача́льна сн҃а , первᲂрᲂжде́на и҆з̾ мт҃ре неи҆скꙋ́сныѧ бра́кꙋ вели ча́емъ . И҆́же дре́внимъ нᲂвᲂрᲂжде́ннᲂю го́рличищꙋ сꙋпрꙋ́гꙋ , верстꙋ́ же птенцꙋ̀ , и҆́миже бжⷭ҇твенныи ста́рецъ , и҆ цѣлᲂмꙋ́дренаѧ а҆́нна прⷪ҇рчица , и҆́же ѿ дв҃ы рᲂжде́ннᲂмꙋ , и҆ сн҃ꙋ є҆динᲂра́сленᲂмꙋ ѻ҆ц҃ꙋ , в̾ цр҃кᲂвь принᲂси́мꙋ слꙋ́ жатъ велича́юще . Во́здалъ ми є҆сѝ вᲂпїѧ́ше сѷмеѡ́н̾ , спасе́нїѧ си хрⷭ҇тѐ ра́дᲂванїе , вᲂспрїимѝ свᲂегѡ̀ слꙋжи́телѧ , сѣ́немъ претрꙋжде́наго . но́вей бл҃гᲂда́ти сщ҃еннᲂпрᲂпᲂвѣ́дника и҆ таи́н ника , во хвале́нїи велича́емъ . Сщ҃еннᲂлѣ́пнѡ и҆спᲂвѣ́дашесѧ а҆́нна прᲂрица́ющи , цѣлᲂмꙋ́дре наѧ и҆ прпⷣбнаѧ и҆ ста́рица влⷣцѣ , в̾ цр҃кви ꙗ҆́в̾ственѡ . бцⷣꙋ же прᲂпᲂвѣ́дающи , всѣ́мъ сꙋ́щимъ велича́ше .

и҆́нъ , і҆рмо́съ . Бг҃а чл҃кѡмъ неꙋдо́бь ви́дѣти , на́нь же несмѣ́ютъ чи́ни а҆́гг҃льстїи зрѣ́ти . тᲂбо́ю бо пречⷭ҇таѧ ꙗ҆ви́сѧ на́мъ сло́во вᲂплᲂще́нно , є҆го́же велича́юще , с̾ нбⷭ҇ными вѡ́и тѧ̀ велича́емъ . Ꙗ҆́кѡ свѣ́тъ ꙗ҆́кѡ зарѧ̀ , ꙗ҆́кѡ вели́кᲂе сл҃нце . ꙗ҆́кѡ мо́лнїѧ , хрⷭ҇то́вꙋ цр҃кᲂвь ѡ҆блиста́лъ є҆сѝ , и҆ вѣ́рныхъ мы́сли прᲂсвѣти́лъ є҆сѝ . и҆ в̾ невече́рнихъ мѣ́стѣхъ всели́сѧ , пᲂѧ̀ трист҃ы́ми гла́сы трⷪ҇цꙋ несᲂзда́ннꙋю . Пло́ти и҆ ми́ра внѣ̀ бы́въ сщ҃еннᲂдѣ́йствене , ко преми́рнымъ ра́дꙋѧсѧ преше́лъ є҆сѝ чино́мъ , ѡ҆бᲂжа́емь ѻ҆де́ждею пресвѣ́тлᲂю . тѣ́мже па́мѧть твᲂю̀ , вѣ́рᲂю сᲂтвᲂрѧ́емъ на землѝ , викꙋ́ле премꙋ́дре . Землѧ̀ тѣ́ло твᲂѐ бл҃же́нᲂе пᲂкрыва́етъ , ꙗ҆́вѣ и҆сцѣле́нїѧ и҆стᲂча́ѧи дарᲂва́нїѧ . нб҃о же дх҃ъ со и҆збра́нными но́ситъ и҆́же ѿ́ вѣка , бжⷭ҇твенными сїѧ́ньми ᲂу҆краше́нъ вᲂи́стинꙋ викꙋ́ле сла́вне . боⷢ҇ . Гла́сᲂмъ а҆́гг҃лᲂвымъ , вели́кагѡ а҆́гг҃ла сᲂвѣ́та чⷭ҇таѧ хрⷭ҇та̀ є҆мманꙋ́ила пᲂрᲂдила̀ є҆сѝ , ко а҆́гг҃лѡмъ до́льнихъ сᲂвᲂкꙋплѧ́юща , є҆ди́на бл҃гᲂслᲂве́наѧ , є҆ди́на всепѣ́таѧ , є҆ди́на вино́вна , на́шемꙋ дв҃о ѡ҆бᲂже́нїю .

свѣти́ленъ , пра́здникꙋ . Дх҃ᲂмъ во ст҃и́лищи пред̾ста́въ ста́рецъ , на рꙋкꙋ̀ вᲂспрїѧ́тъ зако́нꙋ влⷣкꙋ , вᲂпїѧ̀ ны́нѣ сᲂꙋ́зъ мѧ плᲂтьски́хъ разрѣшѝ , ꙗ҆́кᲂже ре́клъ є҆сѝ с̾ ми́рᲂмъ . ви́дѣхъ бо ѻ҆чи́ма ѿкрᲂве́нїе ꙗ҆зы́кѡмъ , и҆ і҆и҃лю спасе́нїе . сла́ва , и҆ ны́нѣ , то́йже .

На стихо́внѣ , стихѣ́ры . гла́съ , в҃ . поⷣ . до́ме є҆в̾фра́фᲂвъ . Дне́сь сп҃съ ꙳ ꙗ҆́кѡ младе́нецъ ,꙳ принесе́сѧ в̾ цр҃квь гдⷭ҇ню .꙳ и҆ рꙋка́ма ста́рыма ,꙳ ста́рецъ сего̀ прїе́млетъ .

сти́хъ : ны́нѣ ѿпꙋща́еши раба̀ свᲂегѡ̀ влⷣко ,꙳ по гл҃ꙋ твᲂемꙋ̀ с̾ ми́рᲂмъ . Млⷣнцъ пло́тїю ,꙳ ве́тхїи деньмѝ ,꙳ ви́димь є҆́сть пресла́внѡ ,꙳ во дне́шнїи де́нь ,꙳ и҆ в̾ цр҃квь прино́ситсѧ .

сти́хъ : свѣ́тъ во ѿкрᲂве́нїе ꙗ҆зы́кѡмъ ,꙳ и҆ сла́вꙋ люді́й твᲂи́хъ і҆и҃лѧ . Прїимѝ ѽ сѷмеѡ́не ,꙳ пречⷭ҇таѧ вᲂпїѧ́ше ,꙳ на рꙋкꙋ̀ ꙗ҆́кѡ млⷣнца ,꙳ гдⷭ҇а сла́вы ,꙳ и҆ ми́рᲂви спасе́нїе .

сла́ва , и҆ ны́нѣ . гла́съ , и҆ поⷣ , то́йже . Ве́лїе и҆ стра́шно ꙳ та́инство и҆ стра́нно ,꙳ и҆́же всѧ̀ сᲂдержа́и ,꙳ и҆ млⷣнца питѣ́ѧи ,꙳ ꙗ҆́кѡ млⷣнцъ на рꙋкꙋ̀ но́ситсѧ .