7 февраля: свт. Парфения Лампсакийска

МЦⷭ҇А ТОГО́ЖЕ ВЪ З҃ ДН҃Ь

И҆́же во ст҃ы́хъ ѻ҆ц҃а на́шегѡ парѳе́нїѧ , є҆пкⷭ҇па ламѱакі́йска . =Прпⷣбнагѡ ѻ҆ц҃а на́шегѡ лꙋкѝ , и҆́же в̾ ти́рѣ . Ве́черъ , на гдⷭ҇и вᲂзва́х̾ , стихѣ́ры , ст҃лю , г҃ . и҆ прпⷣбнᲂмꙋ , г҃ . стихѣ́ры , ст҃лю . гла́съ , а҃ . поⷣ . нбⷭ҇нымъ чино́мъ . Дв҃ствꙋ тезᲂи҆мени́тыи ,꙳ ламѱакі́йскїи свѣти́льникъ .꙳ чꙋдᲂдѣ́йствᲂмъ свѣ́тлаѧ денни́ца ,꙳ парѳе́нїи вели́кїи , всѣ́хъ на́съ призыва́етъ па́мѧтїю свᲂе́ю ,꙳ тᲂржество̀ сᲂверша́ти дх҃о́вно ,꙳ вᲂспѣва́ющихъ сп҃са хрⷭ҇та̀ . И҆́з̾млада во́зраста бг҃а в̾себѣ̀ нᲂсѧ̀ ,꙳ бѣсо́в̾скїѧ пᲂлкѝ ,꙳ ѻ҆гне́мъ мᲂли́твъ твᲂи́хъ пᲂпали́лъ є҆сѝ пребл҃же́нне ,꙳ напра́вилъ є҆сѝ мꙋ́дре ламѱакі́йскᲂе ста́до .꙳ и҆́бо тре́бища и҆́дᲂльскаѧ низ̾ло́жь ,꙳ ѡ҆б̾нᲂви́лъ є҆сѝ всѧ̀ бг҃ꙋ . Прᲂпᲂвѣ́даетъ твᲂѐ чꙋ́до , и҆зве́ргшаѧсѧ ры́ба ,꙳ ѡ҆жи́вшаѧ недыха́ющаѧ .꙳ пло́дъ непло́дныѧ бразды̀ и҆ винᲂгра́дъ ,꙳ до́ждь дᲂво́льныи , ѡ҆мака́ющихъ ѻ҆бѣща́нїе .꙳ чꙋде́сна твᲂѧ̀ дѣ́ла сщ҃еннᲂдѣ́йствене .꙳ тѣ́мже мᲂлѝ спасти́сѧ на́мъ . =стихѣ́ры , прпⷣбнᲂмꙋ . гла́съ , ѕ҃ . поⷣ . всѐ ᲂу҆пᲂва́нїе .= Ве́сь ѿ ю҆́нᲂсти пᲂслѣ́дᲂвавъ гдⷭ҇ви ,꙳ рᲂди́телей ѡ҆ста́вилъ є҆сѝ сла́вне пристра́стїе ,꙳ и҆ любо́вь мирскꙋ́ю .꙳ и҆ в̾ пꙋсты́нѧхъ по́жилъ є҆сѝ ,꙳ по́стныхъ житїѐ держа̀ во смире́нїи ,꙳ є҆́же и҆ скᲂнча́лъ є҆сѝ ,꙳ гᲂрѧ̀ дх҃ᲂмъ прпⷣбне ,꙳ до́брѣ кꙋ́плю сᲂдѣ́лавъ ,꙳ растᲂчи́въ свᲂѧ̀ и҆мѣ́нїѧ ни́щимъ ,꙳ и҆ би́серъ чⷭ҇тны́и кꙋпи́въ хрⷭ҇та̀ .꙳ є҆го́же и҆ пᲂлꙋ́чь жела́нїѧ ,꙳ пᲂчи́лъ є҆сѝ дᲂстᲂсла́вне . Терпѧ́ше бїе́мь ,꙳ ᲂу҆ничижа́емь ѻ҆́ч҃е .꙳ ᲂу҆ранѧ́емь ѿ рᲂди́телѧ за́ гдⷭ҇а ,꙳ є҆го́же жела́ше сла́вне .꙳ є҆го́же ра́ди ᲂу҆ѧзви́сѧ жела́нїемъ ,꙳ кра́снаѧ ни вᲂчто́же в̾мѣни́въ ,꙳ ни мт҃ре же лише́нїе .꙳ и҆ стра́нничество вᲂз̾люби́лъ є҆сѝ ,꙳ во ѻ҆́бразъ ѡ҆блече́сѧ и҆́нᲂческїи сщ҃е́нне .꙳ но ꙗ҆влѧ́етъ тѧ̀ бг҃ъ и҆ нехᲂтѧ́ща ,꙳ мл҃твами мт҃рьними лꙋко̀ прпⷣбне ,꙳ прекло́ньсѧ ꙗ҆́кѡ чл҃кᲂлю́бецъ . Житїѐ скᲂнча́въ свᲂѐ сщ҃е́ннᲂе вᲂсщ҃е́нїи ,꙳ чꙋдеса̀ скᲂнча́лъ є҆сѝ сщ҃е́нне ,꙳ чꙋ́дна и҆ пресла́вна .꙳ и҆ бг҃ᲂви тебѣ̀ пᲂда́вшꙋ ѡ҆брꙋче́нїе ѿ сю́дꙋ .꙳ и҆ пре́жде вᲂз̾даѧ́нїѧ бжⷭ҇твеннымъ трꙋдо́мъ тѝ ,꙳ пᲂдае́тъ же и҆ вѣне́цъ нетлѣ́ненъ тебѣ̀ ,꙳ и҆ сла́вꙋ вѣ́чнꙋющꙋю .꙳ є҆гда̀ ꙗ҆́кѡ сꙋдїѧ̀ прїи́детъ ,꙳ тᲂго̀ ᲂу҆́бѡ мᲂлѝ ,꙳ и҆зба́вити пᲂю́щїѧ тѧ̀ на́съ ,꙳ ѿ всѧ́кᲂгѡ ѡ҆ѕлᲂбле́нїѧ ,꙳ лꙋко̀ пречꙋ́дне . =сла́ва , и҆ ны́нѣ , пра́здникꙋ . гла́съ , то́йже . И҆́же на рꙋкꙋ̀ ста́рческꙋ во дне́шнїи де́нь , ꙗ҆́кѡ на кᲂлесни́цѣ херꙋви́мстѣ , вᲂсклᲂни́тисѧ бл҃гᲂи҆зво́ливыи хрⷭ҇тѐ бж҃е . и҆ на́съ пᲂю́щїѧ тѧ̀ , страсте́й мꙋчи́тельства , призыва́емъ и҆зба́ви , и҆ спасѝ ꙗ҆́кѡ чл҃кᲂлю́бецъ .= А҆́ще є҆́сть по́стъ , сла́ва , и҆ ны́нѣ , боⷢ҇ . а҆́ще ли среда̀ и҆ пѧто́къ , крⷭ҇тᲂбоⷢ҇ . пи́саны сего̀ мцⷭ҇а , въ і҃ дн҃ь .=

На стихо́внѣ , стихѣ́ры . гла́съ , ѕ҃ . поⷣ . в̾ =тре́тїи де́нь . В=ᲂспрїимѝ речѐ сѷмеѡ́не ,꙳ зижди́телѧ всѧ́ческимъ рꙋка́ма .꙳ ѽ ста́рче пᲂд̾и҆мѝ хрⷭ҇та̀ ,꙳ є҆го́же дв҃аѧ ѻ҆трᲂкᲂви́ца ꙳ рᲂдѝ без̾сѣ́мене ,꙳ на ра́дᲂсть ро́дꙋ на́шемꙋ .

сти́хъ : ны́нѣ ѿпꙋща́еши раба̀ свᲂегѡ̀ влⷣко ,꙳ по гл҃ꙋ твᲂемꙋ̀ с̾ ми́рᲂмъ . Зако́нꙋ твᲂрца̀ и҆ бг҃а ,꙳ є҆го́же трепе́щꙋтъ а҆́гг҃льскаѧ мно́жества ,꙳ сᲂше́дшесѧ вᲂспᲂе́мъ лю́дїе .꙳ є҆ди́наго бл҃гᲂда́телѧ ,꙳ и҆ зако́нꙋ закᲂнᲂпᲂлᲂжи́телѧ ,꙳ спасе́нїѧ дш҃а́мъ на́шимъ .

сти́хъ : свѣ́тъ во ѿкрᲂве́нїе ꙗ҆зы́кѡмъ ,꙳ и҆ сла́вꙋ люді́й твᲂи́хъ і҆и҃лѧ . Ны́нѣ ѿпꙋща́еши влⷣко раба̀ твᲂегѡ̀ ,꙳ ꙗ҆́кᲂже ре́клъ є҆сѝ с̾ ми́рᲂмъ .꙳ ꙗ҆́кѡ ви́дѣхъ тѧ̀ хрⷭ҇тѐ ,꙳ свѣ́та первᲂвѣ́чнаго ,꙳ сᲂꙋ́зъ мѧ плᲂтьски́хъ ,꙳ во ѿкрᲂве́нїе ꙗ҆зы́кѡмъ и҆ і҆и҃лю . сла́ва , и҆ ны́нѣ . гла́съ , ѕ҃ . Да ѿве́рзетсѧ дне́сь , нбⷭ҇наѧ две́рь без̾нача́льнᲂе бо сло́во ѻ҆́ч҃ее , зача́ло прїи́мъ лѣ́тно , не ѿстꙋ́пль свᲂегѡ̀ бжⷭ҇тва̀ . ѿ дв҃ы ꙗ҆́кѡ младе́нецъ четыредесѧтᲂдне́венъ , мт҃рїю во́лею прино́ситсѧ в̾ цр҃кᲂвь зако́ннꙋю . и҆ сего̀ на рꙋкꙋ̀ прїе́млетъ ста́рецъ , ѿпꙋстѝ зᲂвы́и , раба̀ влⷣко . и҆́бо ѻ҆́чи мᲂѝ ви́дѣстѣ спасе́нїе твᲂѐ , прише́дыи в̾ ми́ръ спастѝ ро́дъ чл҃чь , гдⷭ҇и сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , ст҃ы́мъ . гла́съ , д҃ . Бж҃е ѻ҆ц҃ъ на́шихъ , твᲂрѧ́и прⷭ҇нѡ с̾ на́ми по твᲂемꙋ̀ смᲂтре́нїю , не ѿста́ви ми́лᲂсти твᲂеѧ̀ ѿ на́съ , но тѣ́хъ мᲂли́твами , в̾ ми́рѣ ᲂу҆стро́й живо́тъ на́шъ . сла́ва , и҆ ны́нѣ . трᲂпа́рь , пра́здникꙋ . гла́съ , а҃ . Ра́дꙋйсѧ ѡ҆бра́дᲂваннаѧ бцⷣе дв҃о , и҆з̾ тебе́ бо вᲂсїѧ̀ сл҃нце пра́веднᲂе хрⷭ҇то́съ бг҃ъ на́шъ , прᲂсвѣща́ѧ и҆́же во тмѣ̀ сꙋ́щихъ . весели́сѧ и҆ ты̀ ста́рче пра́ведныи , прїе́мыи на́ рꙋкꙋ свᲂбᲂди́телѧ дш҃а́мъ на́шимъ , да́рꙋющагѡ на́мъ вᲂскрⷭ҇нїе .

На ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , двⷤа . сла́ва , ст҃о́мꙋ . и҆ ны́нѣ , пра́здникꙋ . =По а҃ , стихᲂло́гїи , сѣда́ленъ . гла́съ , д҃ . Млⷣнствꙋеши менѐ ра́ди ве́тхїй де́ньми , чище́нїю прїѡ҆бща́ешисѧ пречⷭ҇тыи бж҃е , да пло́ть ᲂу҆вѣ́риши мѝ ю҆́же ѿ дв҃ы . и҆ си́мъ сѷмеѡ́нъ пᲂꙋча́ѧсѧ , пᲂзна́ тѧ бг҃а и҆ чл҃ка . и҆ ꙗ҆́кѡ жи́знь цѣлᲂва́ше ра́дꙋѧсѧ ста́рчески , и҆ взыва́ше ѿпꙋсти́ мѧ , ты́ бо є҆сѝ бг҃ъ мо́й , живо́тъ всѧ́ческимъ . =сла́ва , и҆ ны́нѣ , то́йже .

По в҃ , стихᲂло́гїи , сѣда́ленъ . гла́съ , а҃ . И҆́же сы́и со ѻ҆ц҃е́мъ на прⷭ҇то́лѣ ст҃ѣ́мъ , прише́дъ на́ землю ѿ дв҃ы рᲂди́сѧ , и҆ млⷣнцъ бы́сть лѣ́ты сы́и неѡ҆пи́санъ . є҆го́же прїи́мъ сѷмеѡ́нъ на рꙋкꙋ̀ ра́дꙋѧсѧ гл҃аше , ны́нѣ ѿпꙋща́еши ще́дре , вᲂз̾ весели́въ раба̀ твᲂегѡ̀ . сла́ва , и҆ ны́нѣ , то́йже .

Кано́нъ , пра́здникꙋ , на́ ѕ҃ . и҆ ст҃ы́мъ , на и҃ . кано́нъ , пра́здникꙋ . гла́съ , г҃ . твᲂре́нїе кᲂзмы̀ мᲂна́ха . пѣ́снь , а҃ . і҆рмо́съ . Сꙋ́шꙋ глꙋбᲂрᲂди́ тельнꙋю зе́млю , сл҃нце наше́ствᲂва и҆нᲂгда̀ . ꙗ҆́кѡ стѣна́ бо ѡ҆гꙋстѣ̀ ѻ҆́ба по́лы вᲂда̀ , лю́демъ пѣ́шимъ глꙋбинꙋ̀ прᲂхᲂдѧ́щимъ , и҆ бг҃ᲂꙋго́днѡ пᲂю́щимъ , пᲂе́мъ гдⷭ҇ви , сла́вно бо прᲂсла́висѧ .

запѣ́въ : Сла́ва гдⷭ҇и срѣ́тенїю твᲂемꙋ̀ . Да ка́плютъ во́дꙋ ѻ҆́блацы , сл҃нце бо на ѻ҆́блацѣ ле́гцѣ нᲂси́мо наста́ло є҆́сть , на нетлѣ́ннꙋю рꙋкꙋ̀ , хрⷭ҇то́съ в̾ цр҃кви ꙗ҆́кѡ младе́нецъ . тѣ́мже вѣ́рнїи вᲂзᲂпїе́мъ , пᲂе́мъ гдⷭ҇ви , сла́вно бо прᲂсла́висѧ . Крѣпи́тѣсѧ рꙋ́цѣ сѷмеѡ́ни , ста́ро стїю ѡ҆сла́бленїи . лы́ста же претрꙋжде́на ста́рча пра́вѡ быстро̀ движи́тасѧ , хрⷭ҇тꙋ̀ на срѣ́тенїе , ли́къ с̾ беспло́тными сᲂста́вите , пᲂе́мъ гдⷭ҇ви , сла́вно бо прᲂсла́висѧ . Ра́зꙋмᲂмъ прᲂсте́ртаѧ нб҃са̀ весели́тесѧ , ра́дꙋйжесѧ землѐ . и҆з̾ пребжⷭ҇твенныхъ бо нѣ́дръ хитре́цъ прᲂше́дъ хрⷭ҇то́съ , мт҃рїю дв҃ᲂю бг҃ᲂви ѻ҆ц҃ꙋ прино́ситсѧ младе́нецъ , и҆́же пре́жде всѣ́хъ , сла́вно бо прᲂсла́висѧ .

кано́нъ , ст҃лю . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стᲂпа́ми дре́вле ше́ствᲂвавъ і҆и҃ль , крⷭ҇тᲂѡ҆бра́зно мѡѷсе́ѡвыма рꙋка́ма , а҆мали́кᲂвꙋ си́лꙋ в̾ пꙋсты́ни пᲂбѣди́лъ є҆́сть .

запѣ́въ : Ст҃лю хрⷭ҇то́въ парѳе́нїе , мᲂлѝ бг҃а ѡ҆ на́съ . Оу҆ѧснѧ́ютъ дᲂбрᲂдѣ́телей бл҃гᲂда́тїю дне́сь всѣ́хъ на́съ , въ свѣ́тлᲂе тᲂржество̀ мꙋ́драгѡ ст҃лѧ . ꙗ҆́кᲂже зарю̀ и҆спꙋща́ѧ , свѣтᲂно́снаѧ чꙋде́съ сїѧ́нїѧ . На́ гᲂрꙋ без̾стра́стїѧ прпⷣбне прине́слъ є҆сѝ ᲂу҆́мъ , и҆ во́ мракъ писа́нїи в̾ше́дъ . невеще́ственагѡ парѳе́нїе свѣ́та прпⷣбне , и҆спо́лненъ ꙗ҆ви́сѧ сла́вне . Ѻ҆рꙋ́жїе ꙗ҆́кѡ вᲂи́стинꙋ и҆з̾вле́къ , є҆́же є҆́сть гл҃ъ бж҃їи , вра́жїю ᲂу҆ѧзви́лъ є҆сѝ крѣ́пᲂсть , ст҃лю парѳе́нїе . тѣ́мже пᲂбѣди́тельнаѧ на бѣсы̀ ты̀ прїѧ́лъ є҆сѝ . боⷢ҇ . Рᲂди́тель в̾раѝ бы́сть , за́висть сме́рти чл҃кѡмъ . є҆го́же , ро́ждьсѧ дв҃о и҆з̾ тебѐ сн҃ъ бж҃їи ѻ҆ч҃ь , с̾ шꙋ́мᲂмъ пᲂтребѝ , без̾сме́ртїе по́давъ ро́дꙋ на́шемꙋ .

кано́нъ , прпⷣбнᲂмꙋ . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ хᲂди́въ і҆и҃ль , по бе́зднѣ стᲂпа́ми , гᲂни́телѧ фараѡ́на , ви́дѧ пᲂтᲂплѧ́ема , бг҃ꙋ пᲂбѣ́днꙋю пѣ́снь пᲂе́мъ вᲂпїѧ́ше .

запѣ́въ : Прпⷣбне ѻ҆́ч҃е лꙋко̀ , мᲂлѝ бг҃а ѡ҆ на́съ . Сло́во ми да́ждь бг҃ᲂви́дче , пред̾стᲂѧ̀ прⷭ҇то́лꙋ влⷣки свᲂегѡ̀ , вᲂспѣ́ти свѣ́тлᲂе и҆ свѣтᲂно́снᲂе житїѐ твᲂѐ лꙋко̀ , разо́рь мглꙋ̀ ᲂу҆ма̀ мᲂегѡ̀ . Всекрѣ́пкѡ тѧ̀ вᲂз̾лю́бль сщ҃е́нныи сп҃са , к̾ вᲂз̾держа́нїю сᲂвлече́сѧ тве́рдѡ , ско́рби и҆ трꙋды̀ и҆ бᲂлѣ́зни терпѧ̀ , и҆́миже ѡ҆брѣ́те пи́щꙋ некᲂнча́емꙋ . Оу҆трꙋжа́ѧ тѣ́ло ѻ҆́ч҃е лꙋко̀ , вᲂз̾держа́нїемъ всегда̀ , бдѣ́нїемъ ча́стымъ , и҆ ѡ҆ѕлᲂбле́нїемъ всѧ́цѣмъ , мꙋ́дрѣ стремле́нїѧ страсте́мъ лю́тымъ ᲂу҆ста́вилъ є҆сѝ . боⷢ҇ . Гдⷭ҇ᲂрᲂди́тельницѣ дв҃о , ꙗ҆́же бг҃а пло́тїю ро́ждьши не ѿлꙋчи́магѡ ѻ҆ц҃ꙋ , вᲂплᲂще́нна за млрⷭ҇дїе землены́хъ , тᲂмле́нїѧ мѧ̀ страсте́й пᲂкажѝ вы́ш̾ша .

пѣ́снь , г҃ . і҆рмо́съ . Оу҆тверже́нїе на тѧ̀ надѣ́ющимсѧ , ᲂу҆твердѝ гдⷭ҇и цр҃кᲂвь свᲂю̀ , ю҆́же стѧжа̀ чⷭ҇тно́ю сѝ кро́вїю . Первᲂрᲂжде́нъ и҆з̾ ѻ҆ц҃а пре́жде вѣ́къ , первᲂрᲂжде́нъ младе́нецъ и҆з̾ дв҃ы нетлѣ́нны . а҆да́мꙋ рꙋ́кꙋ прᲂстира́ѧ ꙗ҆ви́сѧ . Младᲂꙋ́мна бы́вша пре́лестїю первᲂз̾да́ннагѡ , па́ки и҆справлѧ́ѧ бг҃ъ сло́во , младе́нствᲂвавъ ꙗ҆ви́сѧ . Землѝ и҆сча́дїе , па́ки те́кши к̾ не́й , бжⷭ҇тва̀ сᲂѡ҆бра́знᲂе є҆стество̀ сᲂдѣ́тель ꙗ҆́кѡ непрело́жно , младе́нствᲂвавъ ꙗ҆вѝ .

и҆́нъ , і҆рмо́съ . Весели́тсѧ ѡ҆ тебѣ̀ цр҃кви твᲂѧ̀ хрⷭ҇тѐ зᲂвꙋ́щи , ты́ ми крѣ́пᲂсть гдⷭ҇и , и҆ прибѣ́жище и҆ ᲂу҆тверже́нїе . Ꙗ҆́кᲂже фи́никъ цвѣтᲂно́сенъ , дᲂбрᲂдѣ́тели на землѝ прпⷣбне , без̾сме́ртїѧ плᲂды̀ , на́ нб҃сѣхъ съкры́лъ є҆сѝ . Хра́мъ тѧ всѣ́хъ бг҃ꙋ , живꙋ́щаѧ в̾ тебѣ̀ пᲂказа̀ бл҃гᲂда́ть себѣ̀ прпⷣбне , є҆ѧ́же ра́ди прᲂсла́висѧ парѳе́нїе . Пречестны́мъ ѿ́ бг҃а ст҃льства ᲂу҆кра́шьсѧ сла́вне ѻ҆дѣѧ́нїемъ , сщ҃еннᲂдѣ́йственикъ дᲂсто́инъ тᲂгѡ̀ ꙗ҆ви́лсѧ є҆сѝ бл҃гᲂсты́ни . боⷢ҇ . Раз̾сѣ́десѧ клѧ́твѣ на́шей средᲂгра́дїе , чⷭ҇таѧ влⷣчце , па́че ᲂу҆ма̀ ржⷭ҇тво́мъ ти , и҆ бжⷭ҇твеннᲂмꙋ є҆стествꙋ̀ сᲂвᲂкꙋпи́хᲂмсѧ .

и҆́нъ , і҆рмо́съ . Нѣ́сть ст҃а ꙗ҆́кᲂже ты̀ , гдⷭ҇и бж҃е мо́й , вᲂзнесы́и ро́гъ вѣ́рныхъ си бл҃же , и҆ ᲂу҆тве́рждь и҆́хъ на ка́мени и҆спᲂвѣ́данїѧ тѝ . Вᲂскрили́сѧ те́плымъ жела́нїемъ сп҃са , и҆ рᲂди́телей любы̀ вᲂз̾гнꙋша́сѧ . є҆го́же ра́ди и҆ бы́лъ є҆сѝ ѽ лꙋко̀ стра́нничества пита́тель чꙋ́дне . Хра́мъ гдⷭ҇нь себѐ сᲂдѣ́лати хᲂтѧ̀ , в̾ пꙋсты́нѧхъ всели́лсѧ є҆сѝ , ꙗ҆́кᲂже дре́вле и҆лїѧ̀ , с̾ бѣсы̀ бᲂрѧ́сѧ . тѣ́мже ѡ҆брѣ́те кᲂнчи́нꙋ бл҃же́ннꙋю . Всѧ́кᲂй бжⷭ҇твеннѣй за́пᲂвѣди , ꙗ҆́кᲂже бл҃гᲂпᲂкᲂри́въ ра́бъ ꙗ҆ви́лсѧ є҆сѝ пребл҃же́нне , до́брѣ сїѧ̀ съверша́ѧ , и҆ смирѧ́ѧ себѐ . тѣ́мже высᲂтꙋ̀ прїѧ́лъ є҆сѝ нбⷭ҇нꙋю . боⷢ҇ . Дв҃о мт҃и бж҃їѧ , ро́ждьшаѧ сло́во па́че сло́ва , ꙗ҆́вльшагᲂсѧ на́съ ра́ди , мᲂлѝ прилѣ́жнѡ , без̾слᲂве́сїѧ всѧ́кᲂгѡ мѧ̀ и҆зба́вити .

кᲂнда́къ , ст҃лю . гла́съ , а҃ . И҆́з̾млада во́зраста бг҃а в̾ себѣ̀ нᲂсѧ̀ , бѣсо́вскїѧ пᲂлкѝ ѻ҆гне́мъ мл҃твъ твᲂи́хъ пᲂпали́лъ є҆сѝ пребл҃же́нне . напра́вилъ є҆сѝ мꙋ́дре ламѱакі́йскᲂе ста́до , и҆ тре́бища и҆́дᲂльскаѧ низ̾лᲂжи́въ , чꙋдᲂно́сне сщ҃еннᲂдѣ́йствене , ст҃лю парѳе́нїе . сѣда́ленъ , ст҃лю . гла́съ , г҃ . И҆спо́лнь дх҃а бжⷭ҇твеннагѡ сы́и , дѣ́лы прᲂсїѧ̀ бл҃гᲂче́стїѧ , сщ҃е́нне чꙋдᲂтво́рче парѳе́нїе . ѿ льстѝ челᲂвѣ́ки ѡ҆брати́лъ є҆сѝ , бᲂлѧ́щимъ стра́сти и҆сцѣлѧ́ѧ . ѻ҆́ч҃е прпⷣбне хрⷭ҇та̀ бг҃а мᲂлѝ , спасти́сѧ дш҃а́мъ на́шимъ . сѣда́лен̾ , прпⷣбнᲂмꙋ . гла́съ , и҃ . Ѿ младе́нства вᲂз̾лю́бль дᲂбрᲂдѣ́тель , сла́дкихъ всѣ́хъ ѿстꙋпѝ мꙋ́дре , пᲂще́нїе и҆ вᲂз̾держа́нїе и҆звѣ́стнѡ пᲂказꙋ́ѧ . и҆ мт҃рьне жела́нїе ни вᲂчто́же в̾мѣни́въ , стра́нничествꙋ себѐ та́й в̾да́лъ є҆сѝ . па́ки же вᲂз̾вѣща́етъ тѧ бг҃ъ мт҃ри твᲂе́й , рыда́ющи лише́нїѧ твᲂегѡ̀ пра́веднѡ всеи҆зрѧ́дне . с̾не́ю же ны́нѣ живы́и , мᲂлѝ хрⷭ҇та̀ бг҃а , грѣхо́въ ѡ҆ставле́нїе пᲂда́ти , чтꙋ́щимъ любо́вїю ст҃ꙋ́ю па́мѧть твᲂю̀ . сла́ва , и҆ ны́нѣ , пра́здникꙋ . Рᲂди́сѧ на землѝ , сᲂбез̾нача́льныи ѻ҆ц҃ꙋ , принесе́сѧ в̾ цр҃квь непᲂсти́жимыи . ра́дꙋѧжесѧ ста́рецъ на рꙋкꙋ́ тѧ прїѧ́тъ зᲂвы́и , ны́нѣ ѿпꙋща́еши , є҆го́же пᲂсѣти́лъ є҆сѝ по глаго́лꙋ твᲂемꙋ̀ , бл҃гᲂи҆зво́ливыи спастѝ ꙗ҆́кѡ бг҃ъ ро́дъ чл҃ческїи .= А҆́ще є҆́сть по́стъ , сла́ва , и҆ ны́нѣ , боⷢ҇ . а҆́ще ли среда̀ и҆ пѧто́къ , крⷭ҇тᲂбоⷢ҇ . пи́саны сего̀ мцⷭ҇а , въ а҃і дн҃ь .=

пѣ́снь , д҃ . і҆рмо́съ . Пᲂкры́ла є҆́сть нб҃са̀ дᲂбрᲂдѣ́тель твᲂѧ̀ хрⷭ҇тѐ , и҆з̾ кїѡ́та бо прᲂше́дъ , ст҃ы́ѧ твᲂеѧ̀ нетлѣ́нныѧ мт҃ре , в̾ цр҃кви сла́вы ти ꙗ҆ви́сѧ , ꙗ҆́кѡ младе́нецъ на рꙋкꙋ̀ нᲂси́мъ . и҆ и҆спо́лнишасѧ всѧ̀ твᲂегѡ̀ хвале́нїѧ . Ра́дꙋйсѧ сѷмеѡ́не неи҆зрече́ннымъ таи́нниче , бцⷣа вᲂпїѧ́ше , є҆го́же ѿ ст҃а́гѡ ѡ҆ дре́вле вᲂз̾вѣсти́тисѧ дх҃а , младе́нствᲂвавша сло́ва хрⷭ҇та̀ на рꙋкꙋ̀ прїимѝ . зᲂвы́и є҆мꙋ̀ , и҆спо́лнишасѧ всѧ̀ твᲂегѡ̀ хвале́нїѧ . На него́ же ᲂу҆пᲂва́лъ є҆сѝ сѷмеѡ́не , во́зрастъ дѣ́тищныи , ра́дꙋѧсѧ пᲂд̾имѝ хрⷭ҇та̀ . і҆и҃лю бжⷭ҇твеннᲂе ᲂу҆тѣше́нїе . зако́нꙋ твᲂрца̀ и҆ влⷣкꙋ , и҆спᲂлнѧ́ющагѡ зако́нꙋ чи́нъ , зᲂвы́и є҆мꙋ̀ , и҆спо́лнишасѧ всѧ̀ твᲂегѡ̀ хвале́нїѧ . Ви́дѣ сѷмеѡ́нъ сло́во без̾нача́льнᲂе , с̾ пло́тїю ꙗ҆́кѡ на прⷭ҇то́лѣ херꙋви́мстѣ дв҃цею нᲂси́мо , вино́внаго бы́тїю всѧ́ческихъ . ꙗ҆́кѡ млⷣнцꙋ дивѧ́сѧ вᲂпїѧ́ше є҆мꙋ̀ , и҆спо́лнишасѧ всѧ̀ твᲂегѡ̀ хвале́нїѧ .

и҆́нъ , і҆рмо́съ . Вᲂз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свᲂе́мъ , дᲂсто́йнѡ взыва́ющи , сла́ва си́лѣ твᲂе́й гдⷭ҇и . Та́инъ неи҆з̾гл҃анныхъ насла́ждьсѧ бж҃їихъ требл҃же́нне , наꙋча́ѧсѧ бжⷭ҇твенѡ тᲂгѡ̀ сᲂкрᲂве́ннымъ . тѣ́мже и҆ ра́зꙋма рѣ́ки , парѳе́нїе и҆стᲂчи́лъ є҆сѝ . Ве́сь в̾зѧ́тсѧ бг҃ᲂно́сне мы́слїю , к̾ нб҃сѝ бжⷭ҇твенѣ . и҆ сла́вꙋ ви́дѣлъ є҆сѝ , мы́сленѡ неи҆зрече́ннꙋю . тѣ́мже и҆ равнᲂа́гг҃ленъ на землѝ ꙗ҆ви́сѧ парѳе́нїе . Весели́тсѧ со а҆́гг҃лы всѧ̀ тва́рь , ꙗ҆́же па́че ᲂу҆ма̀ зрѧ́щи сᲂверша́ема ѻ҆́ч҃е тᲂбо́ю зна́менїѧ . тѣ́мже и҆ вино́внаго си́мъ , вᲂспѣва́етъ ꙗ҆́кѡ бг҃а си́льна . боⷢ҇ . Ꙗ҆́кѡ пресла́вна и҆ неи҆з̾гл҃анна бцⷣе , но́вагѡ твᲂегѡ̀ ржⷭ҇тва̀ , вᲂи́стинꙋ сꙋ́ть чⷭ҇таѧ , та́инства стра́шна и҆ ᲂу҆жа́сна , в̾ни́хъ же мы́сль и҆ ᲂу҆́мъ пᲂбѣжда́етсѧ пречⷭ҇таѧ .

и҆́нъ , і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , честна́ѧ цр҃кви бг҃ᲂлѣ́пнѡ зᲂве́тъ вᲂпїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи . Неѕло́бивъ прпⷣбенъ , пра́веденъ и҆ кро́тᲂкъ и҆ цѣ́лъ ꙗ҆ви́лсѧ є҆сѝ ѻ҆́ч҃е лꙋко̀ . тѣ́мже ᲂу҆блажи́сѧ , ѿ всѣ́хъ твᲂрца̀ и҆ влⷣки пребл҃же́нне . Ви́дѣвъ зави́дѧи , тѧ̀ до́брѣ прᲂхᲂдѧ́ща житїѐ , прᲂгнѣ́васѧ , и҆ напа́стей мно́жество тебѣ̀ вᲂз̾дви́же . но и҆з̾ѡ҆бличи́сѧ то́щъ во́лкъ , в̾сꙋ́е сло́вᲂмъ зи́нꙋвъ . Оу҆ма̀ пра́вᲂстїю житїѐ ᲂу҆пра́вилъ є҆сѝ , к̾лꙋ́чшимъ пребл҃же́нне . жела́нїи всѣ́хъ кра́йнихъ жела́ѧ ѻ҆́ч҃е ви́дѣти , є҆́же бл҃гᲂпᲂлꙋ́чнѡ пᲂлꙋчи́лъ є҆сѝ . боⷢ҇ . Краснꙋ́ тѧ дᲂбро́тᲂю па́че всѣ́хъ ѡ҆брѣ́тъ же́нъ , кра́сныи дв҃о чⷭ҇таѧ , въ твᲂю̀ ᲂу҆тро́бꙋ в̾сели́сѧ , и҆ ѕлᲂѡ҆бра́зїѧ мѧ̀ страсте́й и҆ тмы̀ и҆зба́вилъ є҆́сть .

пѣ́снь , є҃ . і҆рмо́съ . Ꙗ҆́кѡ ви́дѣ и҆са́їѧ ѻ҆бра́знѡ на прⷭ҇то́лѣ превысо́цѣ бг҃а , ѿ а҆́гг҃лъ сла́вы да́ры прїе́млюща , ѽ ѻ҆каѧ́нныи вᲂпїѧ́ше а҆́зъ , прᲂви́дѣхъ вᲂплᲂща́ема бг҃а , свѣ́та невече́рнѧ , и҆ ми́рᲂмъ ѡ҆блада́юща . Разꙋмѣ́въ бжⷭ҇твенныи ста́рецъ , прᲂѧ́вленꙋю дре́вле прⷪ҇ркꙋ сла́вꙋ , пло́тїю сло́ва зрѧ̀ мт҃рїю держи́ма , ѽ ра́дꙋисѧ вᲂпїѧ́ше чⷭ҇таѧ , ꙗ҆́кѡ прⷭ҇то́лъ бо держи́ши бг҃а , свѣ́та невече́рнѧ , и҆ ми́рᲂмъ ѡ҆блада́юща . Пᲂкло́ньсѧ ста́рецъ , и҆ стᲂпа́мъ бжⷭ҇твенѡ прикᲂснꙋ́сѧ , неи҆скꙋсᲂбра́чныѧ и҆ бж҃їѧ мт҃ре , ѻ҆́гнь речѐ но́сиши чⷭ҇таѧ . млⷣнца бᲂю́сѧ ѡ҆бъѧ́ти бг҃а , свѣ́та невече́рнѧ , и҆ ми́рᲂмъ ѡ҆блада́юща . Ѡ҆чища́етсѧ и҆са́їѧ ѿ серафи́ма ᲂу҆́гль прїе́мъ . ста́рецъ вᲂпїѧ́ше бж҃їи мт҃ри , ты̀ ꙗ҆́кѡ клеща́ми , рꙋка́ма прᲂсвѣща́еши мѧ . пᲂда́вши ми є҆го́же но́сиши свѣ́та невече́рнѧ , и҆ ми́рᲂмъ ѡ҆блада́юща .

и҆́нъ , і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рᲂю вᲂспѣва́ющїѧ тѧ . Пᲂма́засѧ вᲂи́стинꙋ ма́слᲂмъ дх҃а парѳе́нїе , по дᲂстᲂѧ́нїю слꙋжи́ти гдⷭ҇ви , и҆́же сла́вᲂю тѧ̀ ᲂу҆краси́вшемꙋ . Глꙋбинꙋ̀ и҆спыта́ѧ писа́нїѧ пресла́вне , мнᲂгᲂцѣ́нныи би́серъ хрⷭ҇та̀ и҆збра́лъ є҆сѝ , є҆го́же ста́дꙋ разда́лъ є҆сѝ . Ꙗ҆́кѡ и҆мы́и ѿ́ бг҃а не и҆стᲂщи́мꙋ бл҃гᲂда́ть мꙋ́дре , пресла́вна и҆стᲂча́еши чꙋдеса̀ всѣ́мъ , чꙋдᲂтво́рче парѳе́нїе . боⷢ҇ . Да крᲂпи́тъ нб҃о весе́лїе , и҆ бл҃гᲂда́ть на землѝ , вᲂз̾да́стъ бо є҆́й нн҃ѣ весе́лїе в̾ высᲂтꙋ̀ , є҆ди́нꙋ бг҃ᲂрᲂди́тельницꙋ .

и҆́нъ , і҆рмо́съ . Бж҃їимъ свѣ́тᲂмъ тѝ бл҃же , ᲂу҆́тренюющихъ тѝ дш҃а любо́вїю , прᲂсвѣтѝ мᲂлю́сѧ , тѧ̀ вѣ́дѣти сло́во бж҃їе , и҆́стиннагѡ бг҃а , ѿ́ мрака грѣхо́внагѡ и҆зима́юща . Трꙋдо́мъ свᲂи́мъ вᲂз̾да́нїе , ѿ бᲂгатᲂда́вца вᲂспрїе́мъ ѻ҆́ч҃е прпⷣбне , пꙋчи́на чꙋде́съ всѣ́мъ ꙗ҆ви́сѧ , недꙋ́ги ѿгᲂнѧ̀ пристꙋпа́ющимъ к̾ тебѣ̀ . Не пᲂкᲂлѣба́сѧ ѻ҆́ч҃е врага̀ премно́гими прило́гми , не ᲂу҆жасе́сѧ вᲂз̾выше́нїѧ є҆гѡ̀ . ста́лъ же є҆сѝ ꙗ҆́кѡ сто́лпъ тве́рдъ непрекло́ненъ , во смире́нїе ꙗ҆́кѡ во брᲂнѧ̀ ѡ҆бо́лксѧ . До́брѣ с̾кᲂнча́въ чи́стᲂе житїѐ свᲂѐ пребл҃же́нне , и҆ прїе́мъ ѿ́ бг҃а вседержи́телѧ бл҃гᲂда́ть и҆сцѣле́нїемъ , слѣпы́ѧ прᲂсвѣти́лъ є҆сѝ , хрᲂмы́ѧ и҆ ѡ҆сла́бленныѧ здра́вы сᲂдѣва́ѧ . боⷢ҇ . Лю́дїе по́йте , ю҆́же вᲂи́стинꙋ ро́ждьшꙋю сло́во бж҃їе несказа́ннѡ . и҆ пребы́вшꙋю па́ки по ржⷭ҇твѣ̀ дв҃ꙋ нетлѣ́ннꙋ , ꙗ҆́кѡ всѣ́мъ пред̾ста́тельницꙋ , и҆ спасе́нїе на́ше .

пѣ́снь , ѕ҃ . і҆рмо́съ . Вᲂзᲂпѝ к̾ тебѣ̀ ви́дѣвъ ста́рецъ ѻ҆чи́ма спасе́нїе , є҆́же лю́демъ прїи́де ѿ́ бг҃а хрⷭ҇тѐ , ты̀ бг҃ъ мо́й . Сїѡ́нꙋ ты̀ ка́мень вᲂз̾лᲂжи́сѧ , непᲂкᲂри́вымъ претыка́нїе , и҆ сᲂбла́знꙋ ка́мень . нерꙋши́мᲂе вѣ́рнымъ спасе́нїе . И҆звѣ́стно нᲂсѧ̀ начерта́нїе , и҆́же пре́жде вѣ́къ тѧ и҆з̾расти́вшаго . землены́хъ за млрⷭ҇дїе , ны́нѣ не́мᲂщїю ѡ҆блᲂжи́сѧ . Сн҃ꙋ вы́шнѧгѡ , сн҃ꙋ дв҃ыѧ , бг҃ꙋ ѻ҆трᲂча́ти бы́вшемꙋ , пᲂкло́ньшꙋмисѧ , ны́нѣ ѿпꙋстѝ с̾ ми́рᲂмъ .

и҆́нъ , і҆рмо́съ . Пᲂжрꙋ́ти со́ гласᲂмъ хвале́нїѧ гдⷭ҇и , цр҃кви вᲂпїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Трꙋ́битъ вселе́ннѣй все́й парѳе́нїе , бг҃ᲂно́снᲂе твᲂѐ житїѐ , кра́сныхъ чꙋде́съ дарᲂва́нїи пресла́вне , вѣща́нїемъ дх҃а . Крᲂпи́лъ є҆сѝ сн҃ᲂпᲂлᲂже́нїѧ во́дꙋ ста́дꙋ твᲂемꙋ̀ , нече́стїѧ скве́рнꙋ ѡ҆мыва́ѧ , ᲂу҆че́нїи свᲂи́ми парѳе́нїе , и҆ прᲂсвѣща́ѧ свѣ́тᲂмъ бл҃гᲂда́ти . боⷢ҇ . Ра́зꙋма нетлѣ́ннагѡ пло́дъ прᲂзѧбла̀ є҆сѝ , бг҃ᲂрᲂди́тельнице ми́рꙋ , прⷭ҇нѡ живы́и хᲂда́тай нетлѣ́нїѧ ꙗ҆влѧ́емь , и҆́же вѣ́рᲂю и҆ любо́вїю чтꙋ́щимъ тѧ̀ .

и҆́нъ , і҆рмо́съ . Жите́йскагѡ мо́рѧ вᲂз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вᲂпїю́ ти , вᲂз̾ведѝ ѿ тлѝ живо́тъ мо́й мнᲂгᲂмлⷭ҇тиве . Разᲂри́сѧ дре́внѧѧ твᲂѧ̀ льстивᲂмꙋ́дре , ꙗ҆́же на ны̀ крѣ́пᲂсть . и҆ бе́звѣсти бы́ша , мно́гаѧ твᲂѧ̀ мꙋдрᲂва́нїѧ лꙋка́вне . се́бо про́стъ и҆ неѕло́бивъ ю҆́нᲂша , тѧ̀ низ̾лᲂжи́лъ є҆́сть . Не́далъ є҆сѝ прпⷣбне твᲂи́ма ѻ҆чи́ма дрема́нїѧ , не вѣ́ждама пᲂко́ища , до́ндеже всю̀ дᲂсти́же хи́трᲂсть льсти́вагѡ , разли́чныѧ тебѣ̀ напа́сти по всѧ̀ днѝ вᲂз̾двиза́ющагѡ . Цѣлᲂмꙋ́дрено препрᲂвᲂди́лъ є҆сѝ твᲂѐ житїѐ , и҆ до́брѣ стра́нныѧ прїе́млѧ всегда̀ , ми́лꙋѧ же бᲂга́тнѡ и҆ дᲂво́льнѡ . тѣ́мже и҆ ᲂу҆лꙋчи́лъ є҆сѝ нетлѣ́ннꙋю сла́вꙋ и҆ наслажде́нїе . боⷢ҇ . Ѿ трⷪ҇цы рᲂдила̀ є҆сѝ ты̀ є҆ди́нᲂго пло́тьски , бг҃ᲂрᲂди́тельнице пречⷭ҇таѧ , па́че ᲂу҆ма́ же и҆ сло́ва . тѣ́мже вᲂпїю̀ , трⷪ҇цѣ бжⷭ҇твеннѣй мѧ̀ , мᲂли́твами сѝ пᲂкажѝ жили́ще .

кᲂнда́к̾ , пра́здникꙋ . гла́съ , а҃ . И҆́же ᲂу҆тро́бꙋ дв҃чꙋ ѡ҆ст҃и́въ ржⷭ҇тво́мъ сѝ , и҆ рꙋ́цѣ сѷмеѡ́ни бл҃гᲂслᲂви́въ , ꙗ҆́кᲂже пᲂдᲂба́ше пред̾вари́въ . и҆ ны́нѣ спа́слъ є҆сѝ на́съ хрⷭ҇тѐ бж҃е . но ᲂу҆мирѝ во бранѣ́хъ житїѐ на́ше , и҆ ᲂу҆крѣпѝ люде́й , и҆́хже вᲂз̾люби́лъ є҆сѝ , є҆ди́не чл҃кᲂлю́бче . и҆́кᲂсъ . Къ бцⷣѣ притеце́мъ вѣ́рнїи , хᲂтѧ́щїи сн҃а є҆ѧ̀ ви́дѣти , к̾ сѷмеѡ́нꙋ и҆дꙋ́ща . є҆го́же с̾ нб҃сѐ беспло́тнїи ви́дѧще , дивлѧ́хꙋсѧ гл҃юще , чꙋ́днаѧ зри́мъ ны́нѣ и҆ пресла́внаѧ , непᲂстижи́маѧ и҆ несказа́ннаѧ . и҆́же бо а҆да́ма сᲂзда́выи , нᲂси́мь є҆́сть ꙗ҆́кѡ млⷣнцъ . невмѣсти́мыи вмѣща́етсѧ на рꙋкꙋ̀ сѷмеѡ́ню , и҆́же в̾ нѣ́дрѣхъ неѡ҆пи́санныи сы́и ѻ҆ц҃а свᲂегѡ̀ , во́лею ѡ҆писꙋ́етсѧ пло́тїю а҆ не бжⷭ҇тво́мъ , є҆ди́нъ чл҃кᲂлю́бецъ .

пѣ́снь , з҃ . і҆рмо́съ . Тебѐ в̾ пещѝ ѡ҆рᲂси́вшагѡ дѣ́ти бл҃гᲂслᲂви́ша , и҆ въ дв҃ꙋ нетлѣ́ннѡ все́ль шасѧ , бг҃а сло́ва пᲂе́мъ бл҃гᲂче́стнѡ хва́лѧще , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . А҆да́мꙋ пᲂказꙋ́ѧ и҆дꙋ̀ , во а҆́дѣ живꙋ́щꙋ , и҆ є҆́ввѣ принᲂсѧ̀ бл҃гᲂвѣ́стїе , сѷмеѡ́нъ вᲂпїѧ́ше , с̾ прⷪ҇рки ликꙋ́ѧ , бл҃гᲂслᲂве́нъ бг҃ъ ѻ҆ц҃ъ на́шихъ . Ро́да земле́мна и҆збавлѧ́ѧ бг҃ъ , да́же до а҆́да прїи́детъ . плѣ́ннымъ же пᲂда́стъ всѣ́мъ ѡ҆ставле́нїе , и҆ прᲂзрѣ́нїе слѣпы́мъ . ꙗ҆́кѡ и҆ нѣмы́мъ вᲂпи́ти , бл҃гᲂслᲂве́нъ бг҃ъ ѻ҆ц҃ъ на́шихъ . И҆ твᲂѐ срⷣце нетлѣ́ннаѧ ѻ҆рꙋ́жїе про́йдетъ , сѷмеѡ́нъ бцⷣѣ прᲂвᲂз̾гласѝ , на крⷭ҇тѣ̀ взира́ющи свᲂегѡ̀ сн҃а . є҆мꙋ́же вᲂпїе́мъ , блгⷭ҇ве́нъ бг҃ъ ѻ҆ц҃ъ на́шихъ .

и҆́нъ , і҆рмо́съ . Въ пещѝ а҆враа́мскїѧ си дѣ́ти перси́дстѣй , любо́вїю бл҃гᲂвѣ́рїѧ па́че не́жели пла́менемъ ѡ҆палѧ́еми взыва́хꙋ , блгⷭ҇ве́нъ є҆сѝ в̾ цр҃кви сла́вы твᲂеѧ̀ гдⷭ҇и . Дх҃а в̾ тебѣ̀ все́льшисѧ бжⷭ҇твеннаѧ бл҃гᲂда́ть мꙋ́дре , хра́мъ и҆ цр҃квь тѧ̀ сла́вы , ꙗ҆́кѡ вᲂи́стинꙋ ᲂу҆стро́и парѳе́нїе . в̾ню́же ѻ҆ц҃ъ и҆ сн҃ъ и҆ са́мъ ᲂу҆тѣ́шитель всели́сѧ . Ѻ҆гне́мъ бжⷭ҇твеннымъ , нече́стїѧ пᲂпали́лъ є҆сѝ прпⷣбне , всю̀ терно́внꙋю ле́сть на землѝ . и҆ в̾сѣ́ѧлъ є҆сѝ ста́дꙋ твᲂемꙋ̀ , бжⷭ҇твена ᲂу҆че́нїѧ , прⷭ҇нѡ живо́тны плᲂды̀ принᲂсѧ́ща . Оу҆́дицею ꙗ҆зы́ка , и҆з̾ глꙋбины̀ пре́лести парѳе́нїе , дре́вле свᲂѐ ста́до и҆з̾вле́клъ є҆сѝ к̾ живᲂтꙋ̀ . ны́нѣ же ѻ҆́ч҃е мᲂли́твами сѝ , ᲂу҆лᲂвлѧ́еши ѿ всѧ́кᲂгѡ ро́да ры́бна бл҃гᲂда́тїю . боⷢ҇ . Ви́дѣша а҆́гг҃ли бг҃ᲂрᲂди́тельнице , стра́нна ржⷭ҇тво́мъ тѝ . є҆стество̀ тлѣ́ннᲂе ро́да пе́рстнагѡ , к̾ нетлѣ́ннᲂмꙋ па́ки прите́кше житїю̀ , сла́вы нбⷭ҇ныѧ .

и҆́нъ , і҆рмо́съ . Ѻ҆́трᲂцы въ вавѷлѡ́нѣ , пе́щи пла́менны не ᲂу҆бᲂѧ́шасѧ . но пᲂсредѝ ѻ҆гнѧ̀ в̾ве́ржени , прᲂхлажда́еми взыва́хꙋ , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . Ра́ка твᲂи́хъ мᲂще́й лꙋко̀ , и҆сто́чникъ пᲂказа́сѧ и҆сцѣле́нїемъ . к̾не́й же всѧ́къ притека́ѧ , и҆збавлѧ́етсѧ всѧ́ческихъ страсте́й , тѧ̀ ᲂу҆бл҃жа́ѧ прпⷣбне , и҆ пᲂѧ̀ влⷣкꙋ твᲂегѡ̀ . Зна́менїи вели́кими ѻ҆́ч҃е прᲂсла́ви тѧ̀ гдⷭ҇ь . є҆го́же прᲂсла́вилъ є҆сѝ ты̀ , бᲂлѣ́зньми вᲂз̾держа́нїѧ пе́рвѣе . бл҃гᲂслᲂве́нъ взыва́ше бг҃ъ ѻ҆ц҃ъ на́шихъ . Въ житїѝ свѣ́тлѣ , и҆ в̾ чꙋдесѣ́хъ вели́къ , и҆ во всѣ́хъ до́брыхъ ꙗ҆ви́сѧ , непрело́женъ прпⷣбне . тѣ́мже трꙋдо́мъ ѡ҆брѣ́те вᲂз̾да́нїе , црⷭ҇твїе бж҃їе . боⷢ҇ . Лю́ди и҆ гра́дъ сво́й спаса́й , бг҃ᲂрᲂди́тельнице всенепᲂро́чнаѧ , пред̾ста́тельнице на́ша , и҆́же вѣ́рᲂю несꙋмѣ́ннᲂю вᲂпїю́щихъ тѝ , бл҃гᲂслᲂве́нъ пречⷭ҇таѧ пло́дъ чре́ва твᲂегѡ̀ .

пѣ́снь , и҃ . і҆рмо́съ . Въ непᲂстᲂѧ́ннѣмъ ѻ҆гнѝ сᲂвᲂкꙋ́пльшесѧ , и҆́же бл҃гᲂче́стїѧ пред̾стᲂѧ́ще ю҆́нᲂши , пла́менѣмъ же неврежде́ни , бжⷭ҇твеннꙋю пѣ́снь пᲂѧ́хꙋ , блгⷭ҇ви́те всѧ́каѧ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Лю́дїе і҆и҃леви , ва́шꙋ сла́вꙋ є҆м̾манꙋ́ила зрѧ́ще , ѻ҆трᲂча̀ и҆з̾ дв҃ы , пред̾ лице́мъ бжⷭ҇твеннагѡ кᲂвче́га нн҃ѣ ликꙋ́йте , блгⷭ҇ви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Сѐ сѷмеѡ́нъ вᲂпїѧ́ше , пререка́емᲂе зна́менїе се́й бꙋ́детъ , бг҃ъ сы́и и҆ ѻ҆трᲂча̀ . семꙋ̀ вѣ́рнїи вᲂзᲂпїе́мъ , блгⷭ҇ви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Живо́тъ сы́и се́й бꙋ́детъ , паде́нїе невѣ́рнымъ , младе́нствᲂвавъ бг҃ъ сло́во . ꙗ҆́кѡ вᲂста́нїе всѣ́мъ вѣ́рнѡ зᲂвꙋ́щимъ , блгⷭ҇ви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки .

и҆́нъ , і҆рмо́съ . Рꙋ́цѣ распрᲂсте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ ᲂу҆гаси́ша дᲂбрᲂдѣ́телїю пᲂѧ́савшесѧ , и҆́же бл҃гᲂче́стїѧ люби́тели ѻ҆́трᲂцы взыва́юще , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Жезло́мъ вѣ́ры мꙋ́дре , є҆́ллинскїѧ хра́мы разᲂри́лъ є҆сѝ . и҆ хра́мы вᲂз̾дви́глъ є҆сѝ прпⷣбне , сп҃сꙋ и҆ бг҃ꙋ на́шемꙋ . в̾ни́хъ же же́ртвы чи́сты принесѐ , пᲂѧ̀ є҆мꙋ̀ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Закᲂле́нїе бл҃гᲂво́нно , са́мъ сѧ принесѐ мꙋ́дре . вᲂз̾держа́нїѧ ѻ҆гне́мъ , ᲂу҆ха́нїе вᲂспᲂсла́лъ є҆сѝ непᲂро́чно , в̾ бжⷭ҇твенныи и҆ непристꙋ́пныи же́ртвеникъ бж҃їи . пᲂѧ̀ парѳе́нїе , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . И҆мѣ́ѧ бжⷭ҇твеннꙋю бл҃гᲂда́ть ѿ́ бг҃а ѻ҆́ч҃е парѳе́нїе , и҆стᲂча́еши и҆сцѣле́нїѧ , пристꙋпа́ющимъ к̾ тебѣ̀ прпⷣбне . ѡ҆чища́ѧ недꙋ́ги , и҆ ѿгᲂнѧ̀ крѣ́пкѡ бѣсо́мъ пᲂлкѝ . вино́внагѡ си́мъ пѣ́ти , ꙗ҆́кѡ бг҃а наꙋча́ѧ при́снѡ . боⷢ҇ . И҆́же є҆стество́мъ непристꙋ́пныи вездѣ̀ , сн҃ъ и҆ сло́во бж҃їе в̾ тѧ̀ все́льсѧ чⷭ҇таѧ . и҆ ѡ҆бо́лксѧ прест҃а́ѧ в̾ на́шъ ѻ҆́бразъ ꙗ҆́кѡ млрⷭ҇дъ , ꙗ҆ви́сѧ бл҃гᲂпристꙋ́пенъ пло́тїю , и҆ пᲂживѐ с̾ на́ми . сегѡ̀ ра́ди любо́вїю мно́гᲂю тѧ̀ чтꙋ̀ , и҆ пᲂю̀ и҆ хвалю̀ .

и҆́нъ , і҆рмо́съ . По зако́нѣ ѻ҆́ч҃и пребл҃же́ннїи в̾ вавѷлѡ́нѣ ю҆́нїи , бѣдꙋ̀ прїе́млюще царю́ющаго небрего́ша , пᲂвелѣ́нїѧ безꙋ́мнагѡ и҆ сᲂвᲂкꙋпле́ннїи , в̾ не́мже неи҆звари́шасѧ ѻ҆гнѝ , держа́щемꙋ дᲂсто́йнѡ вᲂз̾сыла́хꙋ пѣ́снь , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . Вре́дъ всѧ́кїѧ стра́сти прпⷣбне , ѿгᲂнѧ́еши ѻ҆́ч҃е лꙋко̀ бл҃же́нне . прᲂкаже́ныѧ ѡ҆чища́ѧ , ᲂу҆крѣплѧ́ѧ немᲂщны́ѧ , и҆ слѧче́ныѧ разрѣша́ѧ , съдержи́мыѧ ᲂу҆́зы , и҆ хрᲂмы́ѧ в̾кꙋ́пѣ , и҆ слѣпы́ѧ и҆сцѣлѧ́ѧ . гдⷭ҇а по́йте зᲂвы́и , и҆ превᲂзнᲂси́те є҆гѡ̀ во́ вѣки . Небᲂлѣ́зненꙋ ѡ҆брѣ́те сла́вꙋ прпⷣбне , бᲂлѣ́зни мно́ги пᲂдъе́мъ и҆ по́двиги , бдѣ́нїе и҆ и҆змᲂжда́нїе тѣлесѐ , пᲂще́нїе и҆ ѡ҆ѕлᲂбле́нїе и҆ ни́зꙋ лега́нїе , и҆ всѧ́ко и҆́но страда́нїе пло́ти , любвѐ ра́ди сᲂдѣ́телѧ свᲂегѡ̀ , с̾ни́мже нн҃ѣ живы́и весели́шисѧ . тᲂгѡ̀ нн҃ѣ мᲂлѝ спасти́сѧ всѣ́мъ , и҆́же вѣ́рᲂю и҆ любо́вїю тѧ̀ чтꙋ́щимъ . Разли́чныхъ ра́ди бᲂлѣ́зней прпⷣбне и҆ дᲂбрᲂдѣ́телей , вни́де в̾ нбⷭ҇нᲂе црⷭ҇тво , веселѧ́сѧ ны́нѣ вѣ́чнѡ . и҆ влⷣки всегда̀ наслажда́ѧсѧ дᲂбро́тами , со а҆́гг҃лы пѣ́нїе трист҃о́е пᲂе́ши . гдⷭ҇а по́йте дѣ́ла , и҆ превᲂзнᲂси́те є҆гѡ̀ во́ вѣки . боⷢ҇ . Не ѿстꙋ́пльша неразлꙋ́чнагѡ ѿ ѻ҆те́ческагѡ нѣ́дра чⷭ҇таѧ , рᲂдила̀ є҆сѝ мꙋженеи҆скꙋ́снѡ , несказа́нно же чл҃ка сᲂверше́на сꙋ́ща . є҆го́же мᲂлѝ пᲂда́ти ми крѣ́пᲂсть , лꙋка́выхъ пᲂмышле́нїи , всѧ́кѡ ѡ҆правда́нїе низ̾лᲂжи́ти до кᲂнца̀ . и҆ во́лю бжⷭ҇твеннꙋю тᲂгѡ̀ дѣ́лати всегда̀ , да тѧ̀ велича́ю .

пѣ́снь , ѳ҃ . і҆рмо́съ . Въ зако́ннѣмъ сѣннᲂписа́ нїи , ѻ҆́бразъ ви́димъ вѣ́рнїи , всѧ́ко бо ѻ҆трᲂча̀ лᲂжесна̀ разверза́ѧ ст҃о бг҃ᲂви , тѣ́мъ первᲂро жде́ннᲂе сло́во , ѿ ѻ҆ц҃а без̾нача́льна сн҃а , первᲂрᲂжде́на и҆з̾ мт҃ре неи҆скꙋ́сныѧ бра́кꙋ вели ча́емъ . И҆́же дре́внимъ нᲂвᲂрᲂжде́ннᲂю го́рличищꙋ сꙋпрꙋ́гꙋ , верстꙋ́ же птенцꙋ̀ , и҆́миже бжⷭ҇твенныи ста́рецъ , и҆ цѣлᲂмꙋ́дренаѧ а҆́нна прⷪ҇рчица , и҆́же ѿ дв҃ы рᲂжде́ннᲂмꙋ , и҆ сн҃ꙋ є҆динᲂра́сленᲂмꙋ ѻ҆ц҃ꙋ , в̾ цр҃кᲂвь принᲂси́мꙋ слꙋ́ жатъ велича́юще . Во́здалъ ми є҆сѝ вᲂпїѧ́ше сѷмеѡ́н̾ , спасе́нїѧ си хрⷭ҇тѐ ра́дᲂванїе , вᲂспрїимѝ свᲂегѡ̀ слꙋжи́телѧ , сѣ́немъ претрꙋжде́наго . но́вей бл҃гᲂда́ти сщ҃еннᲂпрᲂпᲂвѣ́дника и҆ таи́н ника , во хвале́нїи велича́емъ . Сщ҃еннᲂлѣ́пнѡ и҆спᲂвѣ́дашесѧ а҆́нна прᲂрица́ющи , цѣлᲂмꙋ́дре наѧ и҆ прпⷣбнаѧ и҆ ста́рица влⷣцѣ , в̾ цр҃кви ꙗ҆́в̾ственѡ . бцⷣꙋ же прᲂпᲂвѣ́дающи , всѣ́мъ сꙋ́щимъ велича́ше .

и҆́нъ , і҆рмо́съ . Ка́мень нерꙋкᲂсѣ́чныѧ гᲂры̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , сᲂвᲂкꙋпи́въ раз̾стᲂѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Тимѣ́нїе ѿтрѧ́съ вᲂи́стинꙋ , плᲂтьски́хъ страсте́й требл҃же́нне . всего̀ себѐ к̾ бжⷭ҇твеннѣй преселѝ жи́зни , и҆ наслажде́нїю невеще́ственᲂмꙋ , и҆дѣ́же ликꙋ́ѧ назира́еши на́съ . Цвѣ́ты мы́сленыѧ бг҃ᲂно́сне , ꙗ҆́кѡ в̾ наслажде́нїи нетлѣ́ннѣ , во ст҃ѣ́й твᲂе́й па́мѧти , чꙋде́съ дᲂбро́тꙋ пᲂжина́юще , разли́чнѡ и҆сплете́нъ вѣне́цъ , дѣ́йствїѧ ѡ҆б̾но́симъ . Ты̀ прете́къ ꙗ҆́же в̾ ми́рѣ , и҆ с̾ нбⷭ҇ными ѽ бг҃ᲂно́сне беспло́тными ли́ки ликꙋ́ѧ ѻ҆́ч҃е парѳе́нїе , ѡ҆ на́съ мᲂли́сѧ , твᲂрѧ́щихъ твᲂю̀ па́мѧть вѣ́рнѡ . боⷢ҇ . Пᲂю́ ти бл҃гᲂда́ть дв҃о , и҆ велича́ю ти сла́вꙋ . ты́ бо прᲂсвѣще́нїе дꙋшѝ мᲂе́й є҆сѝ вᲂи́стинꙋ и҆ ᲂу҆тѣше́нїе , ско́раѧ по́мᲂщь , и҆ спасе́нїе и҆ застꙋпле́нїе .

и҆́нъ , і҆рмо́съ . Бг҃а чл҃кѡмъ неꙋдо́бь ви́дѣти , на́нь же несмѣ́ютъ чи́ни а҆́гг҃льстїи зрѣ́ти . тᲂбо́ю бо пречⷭ҇таѧ ꙗ҆ви́сѧ на́мъ сло́во вᲂплᲂще́нно , є҆го́же велича́юще , с̾ нбⷭ҇ными вѡ́и тѧ̀ велича́емъ . Твᲂѧ̀ бᲂлѣ́зни ѻ҆́ч҃е и҆ по́двиги , кто̀ и҆зрещѝ мо́жетъ зе́мленъ ; и҆́хже ра́ди дᲂсто́йнꙋ м̾здꙋ̀ наслѣ́дᲂва ѿ́ бг҃а . бы́лъ бо є҆сѝ прїѧ́телище бжⷭ҇твеннᲂмꙋ дх҃ꙋ . прпⷣбенъ а҆́бїе и҆ и҆́стиненъ , пра́веденъ и҆ непᲂро́ченъ . Во ѻ҆би́телѣхъ ѻ҆́нѣхъ ꙗ҆́кѡ вᲂдвᲂрѧ́ѧсѧ , жела́нныхъ дᲂбро́тъ бжⷭ҇твенныхъ насыща́ѧсѧ . раѧ́ же бжⷭ҇твеннагѡ цвѣ́ты ны́нѣ наслажда́ѧсѧ в̾ сы́тᲂсть , и҆ ра́дꙋѧсѧ , па́мѧть к̾ бг҃ꙋ ѡ҆ на́съ сᲂтвᲂрѝ пребᲂга́те . трⷪ҇ченъ . Є҆ди́но є҆стество̀ трисᲂста́внᲂе , трисїѧ́ннᲂе сꙋщество̀ , и҆ неразлꙋ́чнаѧ си́ло , ѻ҆́ч҃е и҆ сн҃е и҆ ст҃ы́и дш҃е , є҆ди́но бжⷭ҇тво̀ , и҆́же вѣ́рᲂю тѧ̀ є҆ди́наго велича́ющїѧ бг҃а , в̾ трїе́хъ ли́цѣхъ . боⷢ҇ . Разꙋмѣ́ти немо́жетъ твᲂѐ та́инство , зе́мленъ ᲂу҆́мъ , дв҃о бцⷣе всепѣ́таѧ . пре́жде бо ржⷭ҇тва̀ , без̾мꙋ́жнѡ зачала̀ є҆сѝ , пребы́сть дв҃ᲂю и҆ по ржⷭ҇твѣ̀ . рᲂдила̀ є҆сѝ сло́во , ѻ҆ц҃ꙋ сᲂпрⷭ҇нᲂсꙋ́щнᲂе .

свѣти́ленъ , пра́здникꙋ . Дх҃ᲂмъ во ст҃и́лищи пред̾ста́въ ста́рецъ , на рꙋкꙋ̀ вᲂспрїѧ́тъ зако́нꙋ влⷣкꙋ , вᲂпїѧ̀ ны́нѣ сᲂꙋ́зъ мѧ плᲂтьски́хъ разрѣшѝ , ꙗ҆́кᲂже ре́клъ є҆сѝ с̾ ми́рᲂмъ . ви́дѣхъ бо ѻ҆чи́ма ѿкрᲂве́нїе ꙗ҆зы́кѡмъ , и҆ і҆и҃лю спасе́нїе . сла́ва , и҆ ны́нѣ , то́йже .

На стихо́внѣ , стихѣ́ры . гла́съ , в҃ . поⷣ . до́ме є҆в̾фра́фᲂвъ . Нᲂсѧ́щи чи́стаѧ ꙳ и҆ непᲂро́чнаѧ дв҃ца ,꙳ сᲂдѣ́телѧ и҆ влⷣкꙋ ,꙳ ꙗ҆́кѡ млⷣнца на рꙋкꙋ̀ ,꙳ в̾ цр҃квь в̾хо́дитъ .

сти́хъ : ны́нѣ ѿпꙋща́еши раба̀ свᲂегѡ̀ влⷣко ,꙳ по гл҃ꙋ твᲂемꙋ̀ с̾ ми́рᲂмъ . Прїимѝ сѷмеѡ́не ꙳ гдⷭ҇а сла́вы ,꙳ ꙗ҆́кᲂже ѡ҆бѣща́тисѧ ꙳ ѿ́ дх҃а ст҃а ,꙳ се́бо прише́лъ є҆́сть .

сти́хъ : свѣ́тъ во ѿкрᲂве́нїе ꙗ҆зы́кѡмъ ,꙳ и҆ сла́вꙋ люді́й твᲂи́хъ і҆и҃лѧ . Нн҃ѣ ви́дѣстѣ бл҃гі́и бж҃е ,꙳ ѻ҆́чи мᲂѝ ꙳ ѡ҆бѣтᲂва́нїе твᲂѐ ,꙳ ѿпꙋсти́ мѧ ско́рѡ ,꙳ раба̀ твᲂегѡ̀ чл҃кᲂлю́бче . сла́ва , и҆ ны́нѣ . гла́съ , и҆ поⷣ , то́йже . Ра́дꙋисѧ ,꙳ ꙗ҆́же ра́дᲂсть ꙳ ми́рꙋ прїе́мши ,꙳ хрⷭ҇та̀ живᲂда́вца .꙳ и҆ ᲂу҆ста́вльши печа́ль дв҃о , прама́терьню .

<< Previous

Contents

Next >>