Богородичны воскресны по тропарех

Бг҃ᲂро́дичны вᲂскрⷭ҇ны , на ѻ҆́смь гласо́въ , и҆́хже глаго́лемъ по трᲂпарѣ́хъ . сла́ва , и҆ ны́нѣ , пра́зднꙋемымъ ст҃ы́мъ . боⷢ҇ . гла́съ , а҃ . Гаврїи́лꙋ прᲂвѣща́вшꙋ тѝ дв҃о , є҆́же ра́дꙋисѧ . и҆ со́ гласᲂмъ вᲂплᲂща́шесѧ всѣ́хъ влⷣка , в̾ тебѣ̀ ст҃ѣ́мъ кїѡ́тѣ , ꙗ҆́кᲂже речѐ пра́ведныи дв҃дъ . ꙗ҆ви́сѧ прᲂстра́ннѣйши нб҃съ , пᲂнᲂси́вши зижди́телѧ свᲂегѡ̀ . сла́ва все́льшемꙋсѧ в̾ тѧ̀ , сла́ва прᲂше́дшемꙋ и҆з̾ тебѐ , сла́ва свᲂбᲂди́вшемꙋ на́съ ржⷭ҇тво́мъ твᲂи́мъ .

боⷢ҇ . гла́съ , в҃ . Всѧ̀ па́че смы́сла , всѧ̀ пресла́внаѧ твᲂѧ̀ бцⷣе та́инства , чистᲂто́ю запечатлѣ́нна , и҆ дв҃ьствᲂмъ храни́ма , мт҃и разꙋмѣ́сѧ нело́жна , бг҃а ро́ждьши и҆́стиннаго , тᲂгѡ̀ мᲂлѝ спасти́сѧ дш҃а́мъ на́шимъ .

боⷢ҇ . гла́съ , г҃ . Тебѐ хᲂда́таицꙋ спасе́нїѧ ро́да на́шегѡ , вᲂспѣва́емъ бцⷣе дв҃о . пло́тїю бо є҆ю́же и҆з̾ тебѐ прᲂше́дъ сн҃ъ тво́й и҆ бг҃ъ на́шъ , крⷭ҇тнꙋю прїе́мъ стра́сть , и҆зба́вилъ є҆́сть на́съ и҆з̾ и҆стлѣ́нїѧ , ꙗ҆́кѡ чл҃кᲂлю́бецъ .

боⷢ҇ . гла́съ , д҃ . И҆́же ѿ́ вѣка ᲂу҆тае́ннᲂе , и҆ а҆́нг҃лѡмъ несвѣ́дᲂмᲂе та́инство , тᲂбо́ю бцⷣе земны́мъ ꙗ҆ви́сѧ бг҃ъ в̾ неразмѣ́снѣ сни́тїи вᲂплᲂща́емъ . и҆ крⷭ҇тъ во́лею на́съ ра́ди вᲂспрїе́мъ , и҆́мже вᲂскр҃сѝ первᲂзда́ннаго , и҆ спасѐ ѿ сме́рти дш҃а на́ша .

боⷢ҇ . гла́съ , є҃ . Ра́дꙋисѧ две́ри гдⷭ҇нѧ непрᲂхᲂди́маѧ . ра́дꙋисѧ стѣно̀ и҆ пᲂкро́ве , прибѣга́ющимъ к̾ тебѣ̀ . ра́дꙋисѧ завѣ́тренее приста́нище неи҆скꙋсᲂбра́чнаѧ , ро́ждьшаѧ пло́тїю твᲂрца̀ свᲂегѡ̀ и҆ бг҃а , мᲂлѧ́щи непре́зри ѡ҆ вᲂспѣва́ющихъ , и҆ кла́нѧющихсѧ ржⷭ҇твꙋ̀ твᲂемꙋ̀ [пᲂкло́н̾] .

боⷢ҇ . гла́съ , ѕ҃ . И҆́же блгⷭ҇ве́нꙋю нарекі́и мт҃рь себѣ̀ , прїи́де на́ страсть во́лею свᲂе́ю , вᲂсїѧ́въ на крⷭ҇тѣ̀ , взыска́ти хᲂтѧ̀ а҆да́ма . гл҃ѧ а҆́нг҃лѡмъ , сра́дꙋйтемисѧ , ꙗ҆́кѡ ѡ҆брѣ́тесѧ и҆зги́бшаѧ дра́хма . и҆́же всѧ̀ мꙋ́дрѣ ᲂу҆стро́ивыи , гдⷭ҇и сла́ва тебѣ̀ .

боⷢ҇ . гла́съ , з҃ . Ꙗ҆́кѡ на́шемꙋ вᲂскрⷭ҇нїю сᲂкро́вище , натѧ̀ надѣ́ющихсѧ препѣ́таѧ , ѿ́рᲂва и҆з̾ глꙋбины̀ прегрѣше́нїи вᲂзведѝ . ты́ бо пᲂви́нныѧ грѣхꙋ̀ спасла̀ є҆сѝ , ро́ждьши спасе́нїе на́ше . ꙗ҆́же пре́жде ржⷭ҇тва̀ дв҃а , и҆ в̾ ржⷭ҇твѣ̀ дв҃а , и҆ по ржⷭ҇твѣ̀ па́ки дв҃аѧ .

боⷢ҇ . гла́съ , и҃ . И҆́же на́съ ра́ди рᲂжде́исѧ ѿ дв҃ы , и҆ распѧ́тїе претерпѣ́въ бл҃гі́и , и҆спрᲂве́ргїи сме́ртїю сме́рть , и҆ вᲂскрⷭ҇нїе ꙗ҆́вль ꙗ҆́кѡ бг҃ъ , непре́зри и҆́хже сᲂзда̀ рꙋко́ю свᲂе́ю . ꙗ҆вѝ чл҃кᲂлю́бїе свᲂѐ млⷭ҇тиве . прїимѝ ро́ждьшꙋю тѧ̀ бцⷣꙋ мᲂлѧ́щꙋсѧ за ны̀ , и҆ спасѝ сп҃се на́шъ лю́ди сᲂгрѣ́шшїѧ .

<< Previous

Contents

Next >>