Бг҃ᲂро́дичны , и҆ крⷭ҇тᲂбг҃ᲂро́дичны , на ѻ҆́смь гласо́въ . и҆́хже гл҃емъ по трᲂпарѣ́хъ ст҃ы́хъ . сла́ва , и҆ нн҃ѣ , боⷢ҇ . гла́съ , а҃ . Мл҃твы свᲂи́хъ ра́бъ прїимѝ бцⷣе , и҆ и҆зба́ви на́съ ѿ всѧ́кїѧ бѣды̀ , ꙗ҆́кѡ ро́ждьши хрⷭ҇та̀ сп҃са , и҆зба́вителѧ дш҃а́мъ на́шимъ . крⷭ҇тᲂбоⷢ҇ . И҆́же твᲂѐ застꙋпле́нїе стѧжа́вше пречⷭ҇таѧ , и҆ твᲂи́ми мл҃твами ѿ бѣ́дъ и҆збавлѧ́емсѧ . крⷭ҇то́мъ бо сн҃а твᲂегѡ̀ всегда̀ храни́ми , по́ дᲂлгꙋ тѧ всѝ бл҃гᲂче́стнѡ велича́емъ .

боⷢ҇ . гла́съ , в҃ . Мт҃и ст҃а́ѧ пречⷭ҇тагѡ свѣ́та , а҆́нг҃льскими пѣ́сньми чтꙋ́ще тѧ пᲂе́мъ и҆ велича́емъ . крⷭ҇тᲂбоⷢ҇ . Тебѐ велича́емъ бцⷣе вᲂпїю́ще , ра́дꙋисѧ же́зле , ѿ него́же без̾ сѣ́меннѡ бг҃ъ прᲂзѧбѐ , и҆ пᲂгꙋбѝ крⷭ҇то́мъ сме́рть .

боⷢ҇ . гла́съ , г҃ . Ко́ждо и҆дѣ́же спаса́етсѧ , в̾ пра́вдꙋ та́мѡ прибѣга́етъ . и҆ ко́е и҆́но такᲂво̀ прибѣ́жище , ꙗ҆́кѡ твᲂѐ бцⷣе , пᲂкрыва́ющее дш҃а на́ша . крⷭ҇тᲂбоⷢ҇ . Же́злъ си́лы стѧжа́вше , крⷭ҇тъ сн҃а твᲂегѡ̀ бцⷣе . тѣ́мъ низ̾лага́емъ вра́жїѧ шата́нїѧ , ꙗ҆́кѡ да непреста́ннѡ тѧ̀ велича́емъ .

боⷢ҇ . гла́съ , д҃ . Стѣна̀ непᲂбѣди́маѧ на́мъ хрⷭ҇тїа́нѡмъ є҆сѝ бцⷣе дв҃о . к̾ тебѣ́ бо прибѣга́юще , невреди́ми пребыва́емъ . и҆ па́ки сᲂгрѣша́юще , и҆́мамы тѧ̀ мл҃твеницꙋ . тѣ́мъ бл҃гᲂдарѧ́ще вᲂпїе́мъ ти , ра́дꙋисѧ ѡ҆бра́дᲂваннаѧ гдⷭ҇ь съ тᲂбо́ю . крⷭ҇тᲂбоⷢ҇ . Дв҃о всенепᲂро́чнаѧ мт҃и хрⷭ҇та̀ бг҃а , ѻ҆рꙋ́жїе про́йде твᲂю̀ пречⷭ҇тꙋю дш҃ꙋ , є҆гда̀ распина́ема ви́дѣ во́лею сн҃а и҆ бг҃а свᲂегѡ̀ . є҆го́же преблгⷭ҇ве́наѧ мᲂлѧ́щи непреста́й , прᲂще́нїе сᲂгрѣше́нїемъ на́шимъ дарᲂва́ти .

боⷢ҇ . гла́съ , є҃ . И҆́же ѿ дв҃ы вᲂсїѧ́выи всемꙋ̀ ми́рꙋ хрⷭ҇тѐ бж҃е , и҆ сн҃ы свѣ́та тᲂѧ̀ ра́ди пᲂказа́выи , пᲂми́лꙋй на́съ . крⷭ҇тᲂбоⷢ҇ . Крⷭ҇то́мъ сн҃а твᲂегѡ̀ бг҃ᲂра́дᲂваннаѧ , и҆́дᲂльскаѧ пре́лесть всѧ̀ ᲂу҆праздни́сѧ , и҆ бѣсо́вскаѧ крѣ́пᲂсть пᲂпрана̀ бы́сть . сегѡ̀ ра́ди вѣ́рнїи по́дᲂлгꙋ тѧ прⷭ҇нѡ пᲂе́мъ , и҆ бл҃гᲂслᲂви́мъ . и҆ бцⷣꙋ и҆́стиннꙋю и҆спᲂвѣ́дающе тѧ̀ велича́емъ .

боⷢ҇ . гла́съ , ѕ҃ . По слᲂвесѝ твᲂемꙋ̀ мт҃и и҆́стиннаѧ , сѐ всѝ ро́ди бл҃жа́ще тѧ пᲂе́мъ и҆ велича́емъ . крⷭ҇тᲂбоⷢ҇ . Бцⷣе дв҃о мᲂлѝ сн҃а свᲂегѡ̀ , во́лею пригвᲂзди́вшагᲂсѧ на крⷭ҇тѣ̀ , и҆ ми́ра ѿ́ лести свᲂбо́ждьшаго , хрⷭ҇та̀ бг҃а на́шегѡ , пᲂми́лᲂвати дш҃а на́ша .

боⷢ҇ . гла́съ , з҃ . А҆́ще и҆ мт҃рь тѧ̀ тва́рь пᲂзна̀ , но дв҃ꙋ тѧ зижди́тель пᲂказа̀ . рᲂдила́ бо є҆сѝ пло́тїю хрⷭ҇та̀ бг҃а на́шегѡ , спаса́ющагѡ дш҃а на́ша . крⷭ҇тᲂбоⷢ҇ . Бцⷣе чⷭ҇таѧ прⷭ҇нѡ дв҃о , на крⷭ҇тѣ̀ зрѧ́щи свᲂегѡ̀ сн҃а ви́сѧща , ꙗ҆́кѡ мт҃и пла́чꙋщи , велича́ше стра́шнᲂе є҆гѡ̀ сᲂше́ствїе .

боⷢ҇ . гла́съ , и҃ . Ра́дꙋисѧ ꙗ҆́же ѿ а҆́нг҃ла ми́рꙋ ра́дᲂсть прїе́мши . ра́дꙋисѧ ро́ждьшаѧ твᲂрца̀ тва́ри . ра́дꙋисѧ спᲂдо́бльшаѧсѧ бы́ти мт҃и хрⷭ҇та̀ бг҃а . крⷭ҇тᲂбоⷢ҇ . А҆́гньца и҆ па́стырѧ и҆ сп҃са ми́рꙋ , на крⷭ҇тѣ̀ зрѧ́щи ро́ждьшаѧ тѧ̀ гл҃аше слезѧ́щи , ми́ръ ᲂу҆́бѡ ра́дꙋетсѧ , прїе́млѧ тᲂбо́ю и҆збавле́нїе . ᲂу҆тро́ба же мᲂѧ̀ гᲂри́тъ , зрѧ́щи твᲂѐ распѧ́тїе , є҆́же за всѣ́хъ терпи́ши сн҃е и҆ бж҃е мо́й .