МЦⷭ҇А МА́РТА ВЪ А҃ ДН҃Ь

ст҃ы́ѧ прпⷣбнᲂмч҃нцы є҆ѵ̾дᲂкі́и . =Ве́черъ , на гдⷭ҇и вᲂзва́хъ , стихѣ́ры . гла́съ , д҃ . поⷣ . да́лъ є҆сѝ зна́менїе . Пе́рвѣе пᲂсти́вшисѧ ,꙳ и҆ пло́ти в̾зыгра́нїѧ ,꙳ вᲂз̾держа́нїемъ ᲂу҆вѧди́вши .꙳ и҆ страда́нїемъ втᲂро́е врагꙋ̀ низ̾лᲂжи́ла є҆сѝ кᲂва́рствїѧ .꙳ и҆ пᲂбѣ́дꙋ взѧла̀ є҆сѝ на́нь ,꙳ ѽ є҆ѵ̾дᲂкі́е бг҃ᲂбл҃же́ннаѧ .꙳ тѣ́мъ тѧ̀ вѣнча̀ сꙋгꙋ́быми по́двиги ,꙳ і҆с҃ъ чл҃кᲂлю́бецъ ,꙳ и҆ сп҃съ дш҃а́мъ на́шимъ . Серде́чными бразда́ми ,꙳ сѣ́мѧ бжⷭ҇твенᲂе прїѧ́ла є҆сѝ ,꙳ ꙗ҆́кѡ землѧ̀ тꙋчна̀ бг҃ᲂдх҃нᲂве́ннаѧ .꙳ и҆ стᲂри́цею вᲂз̾даю́щаѧ мꙋче́нїѧ кла́съ ,꙳ прᲂзѧбла̀ є҆сѝ вᲂи́стинꙋ .꙳ и҆ в̾ жи́тницы мы́сленыѧ сᲂбрала́сѧ є҆сѝ ,꙳ си́лᲂю дх҃о́внᲂю , тѧ̀ претвᲂри́вшагѡ .꙳ и҆ и҆з̾мѣне́нїемъ лꙋ́чшимъ ,꙳ и҆з̾мѣни́вшагѡ бл҃гᲂда́тїю ,꙳ є҆ѵ̾дᲂкі́е прехва́льнаѧ . Ме́ртвыхъ вᲂскр҃си́ла є҆сѝ ,꙳ живᲂтво́рнымъ тѝ прᲂвѣща́нїемъ ,꙳ є҆ѵ̾дᲂкі́е сла́внаѧ .꙳ ᲂу҆мертви́вши пе́рвїе ,꙳ вᲂз̾держа́нїѧ бᲂлѣ́зньми тѣле́сныѧ стра́сти .꙳ и҆ ны́нѣ живе́ши на́ небесѣ́хъ с̾ мч҃нки ,꙳ до́брѣ скᲂнча́вши тече́нїе страда́нїѧ ,꙳ по́мᲂщїю дх҃о́внᲂю .꙳ ѡ҆ всѣ́хъ и҆́же вѣ́рᲂю тѧ̀ вᲂспѣва́ющихъ мᲂлѧ́щи . =сла́ва , и҆ ны́нѣ , боⷢ҇ . Ра́дꙋисѧ сл҃нцезра́чнаѧ лꙋчѐ .꙳ сл҃нца незахᲂди́магѡ прⷭ҇то́ле ,꙳ ꙗ҆́же сл҃нце вᲂз̾сїѧ́вши недᲂꙋмѣ́ннᲂе .꙳ ра́дꙋисѧ ᲂу҆́ме ѡ҆блиста́ѧи бжⷭ҇твеными сїѧ́ньми ,꙳ зарѐ мо́лнїинаѧ ,꙳ ѡ҆свѣти́вшаѧ землѝ кᲂнца̀ .꙳ и҆́стиннᲂе зла́та блиста́нїе ,꙳ вседо́браѧ и҆ пренепᲂро́чнаѧ .꙳ ꙗ҆́же свѣ́тъ невече́рнїи ,꙳ вѣ́рнымъ ѡ҆блиста́вши . крⷭ҇тᲂбоⷢ҇ . Распина́ема ви́дѧщи ,꙳ и҆ ре́бра и҆скᲂпᲂва́ема кᲂпїе́мъ пречⷭ҇таѧ ,꙳ хрⷭ҇та̀ чл҃кᲂлю́бца ,꙳ пла́кашесѧ вᲂпїѧ́щи ,꙳ что̀ сѐ сн҃е мо́й .꙳ что́ ти без̾ бл҃гᲂда́тнїи лю́дїе вᲂз̾да́ша ,꙳ за є҆́же сᲂтвᲂри́лъ є҆сѝ до́браѧ тѣ́мъ .꙳ и҆спѣши́ши мѧ̀ без̾ча́дствᲂвати вселюбе́зне .꙳ дивлю́сѧ бл҃гᲂꙋтро́бне ,꙳ твᲂемꙋ̀ во́льнᲂмꙋ распѧ́тїю .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , и҃ . И҆́же пра́вᲂстїю ᲂу҆́мнᲂю , дш҃ꙋ свᲂю̀ привѧза́вши в̾ любо́вь хрⷭ҇то́вꙋ . тлѣ́нныхъ и҆ кра́сныхъ , и҆ вре́менныхъ забы́тїемъ претечѐ , ꙗ҆́кѡ сло́вꙋ ᲂу҆чени́ца . пᲂще́нїемъ стра́сти ᲂу҆мертви́вши , страда́льчески втᲂро́е врага̀ пᲂсрами́ла є҆сѝ . тѣ́мъ хрⷭ҇то́съ сꙋгꙋ́быхъ вѣнца̀ спᲂдо́би тѧ̀ сла́внаѧ є҆ѵ̾дᲂкі́е , прпⷣбнаѧ страстᲂте́рпице . мᲂлѝ хрⷭ҇та̀ бг҃а спасти́сѧ дш҃а́мъ на́шимъ .= сла́ва , и҆ ны́нѣ , боⷢ҇ . и҆лѝ , крⷭ҇тᲂбоⷢ҇ .=

На ᲂу҆́трени . ѻ҆́ба кано́на , во ѻ҆кта́и . и҆ ст҃ѣ́й , на д҃ . кано́нъ . гла́съ , в҃ . пѣ́снь , а҃ . і҆рмо́съ . Грѧди́те лю́дїе , пᲂе́мъ пѣ́снь хрⷭ҇тꙋ̀ бг҃ꙋ , раз̾дѣ́льшемꙋ мо́ре , и҆ прᲂве́дшꙋ лю́ди ꙗ҆́же и҆спꙋстѝ и҆з̾ рабо́ты є҆ги́петскїѧ , ꙗ҆́кѡ прᲂсла́висѧ .

запѣ́в̾ : Ст҃а́ѧ прпⷣбнᲂмч҃нца є҆ѵ̾дᲂкі́е , мᲂлѝ бг҃а ѡ҆ на́съ .= Дш҃е́внᲂе ѡ҆ѕлᲂбле́нїе , ᲂу҆слади́ти ми бл҃гі́и бл҃гᲂи҆зво́ли , страстᲂно́сицы твᲂеѧ̀ є҆ѵ̾дᲂкі́и мᲂльба́ми . и҆ сїю̀ вᲂспѣ́ти сло́ве пᲂда́ждь ми . Кто́ ти хрⷭ҇тѐ , бл҃гᲂсе́рдїѧ пꙋчи́нꙋ ꙗ҆́вѣ и҆спᲂвѣ́сть . ꙗ҆́кѡ спасе́нїю сᲂдѣ́ла приста́нище , ю҆́же дре́вле прегрѣше́нїемъ глꙋбинꙋ̀ сꙋ́щꙋю . Ꙗ҆́кᲂже землѧ̀ бл҃га̀ твᲂѧ̀ дш҃а пресла́внаѧ , до́ждь прїѧ́тъ ᲂу҆че́нїѧ ге́рмана прпⷣбнагѡ , и҆ кла́съ бл҃гᲂче́стїѧ пло́дъ принесѐ . Мы́сленыи ᲂу҆́гль в̾ срⷣцы хрⷭ҇та̀ прїе́мши всечⷭ҇таѧ кр҃ще́нїемъ , ꙗ҆́кᲂже хвра́стїе , ле́сть и҆ плᲂтьскі́ѧ стра́сти , вᲂи́стинꙋ пᲂпали́ла є҆сѝ . =боⷢ҇ . Бг҃ᲂпᲂдо́бнѡ селе́нїе вᲂи́стинꙋ ты̀ ꙗ҆ви́сѧ , нб҃съ прᲂстра́ннѣйши , и҆ честнѣ́йши бцⷣе дв҃о . и҆ нн҃ѣ ѡ҆ тебѣ̀ ра́дꙋетсѧ а҆́нг҃льскїи ли́къ .

пѣ́снь , г҃ . і҆рмо́съ . Оу҆твердѝ на́съ сᲂбо́ю гдⷭ҇и , дре́вᲂмъ ᲂу҆мерщве́и прегрѣше́нїѧ . и҆ стра́хъ тво́й всадѝ в̾ срⷣца̀ на́ша , ꙗ҆́кѡ чл҃кᲂлю́бецъ . Оу҆тверже́нїе хрⷭ҇тѐ , и҆ стѣ́нꙋ неѡ҆бᲂри́мꙋ , в̾ пе́рсѣхъ прпⷣбнаѧ твᲂѧ̀ стѧжа́вши . прило́ги непᲂкᲂлѣба́сѧ врага̀ , но сегѡ̀ до кᲂнца̀ пᲂтребѝ . Вᲂз̾желѣ́вши хрⷭ҇то́вы красᲂты̀ , и҆ сегѡ̀ любо́вїю снѣда́ема . страда́нїемъ сᲂпричта́сѧ є҆мꙋ̀ , є҆ѵ̾дᲂкі́е бг҃ᲂмꙋ́драѧ и҆ всесла́внаѧ . Кр҃ще́нїемъ хрⷭ҇то́вымъ , и҆ слеза́ми свᲂи́ми , и҆ пᲂсе́мъ крᲂвьмѝ мꙋче́нїѧ ѡ҆чи́стившисѧ , хра́мъ бы́сть трⷪ҇цѣ , и҆ мѣ́стѡ сщ҃е́нїѧ . боⷢ҇ . Ѿ а҆́нны ра́дᲂсть ро́дꙋ прᲂцвѣла̀ є҆сѝ , и҆ ражда́еши дв҃о цр҃ѧ . и҆ с̾ра́дꙋютсѧ ржⷭ҇твꙋ̀ тѝ жены̀ , разрѣ́шшесѧ тᲂбо́ю ѿ клѧ́твы .

сѣда́ленъ . гла́съ , и҃ . Прᲂсвѣ́щьшисѧ заре́ю бжⷭ҇твенᲂю , преле́стнꙋю ѡ҆ста́вила є҆сѝ тмꙋ̀ . и҆ житїѐ вᲂспрїѧ́тъ , со беспло́тными невеще́ствено . бл҃гᲂда́тьми бжⷭ҇твеными ᲂу҆сꙋгꙋ́бившисѧ дх҃а , ма́лымъ прᲂвѣща́нїемъ ме́ртвыѧ вᲂскр҃си́ла є҆сѝ . тѣ́мъ при кᲂнчи́нѣ мꙋче́нїѧ вѣнце́мъ бжⷭ҇твенѣ ᲂу҆краси́сѧ , и҆ льсти́ваго пᲂсрами́ла є҆сѝ , є҆ѵ̾дᲂкі́е равнᲂа́нг҃льнаѧ . мᲂлѝ хрⷭ҇та̀ бг҃а прегрѣше́нїемъ ѡ҆ставле́нїе дарᲂва́ти , чтꙋ́щимъ любо́вїю ст҃ꙋ́ю па́мѧть твᲂю̀ . сла́ва , и҆ ны́нѣ , боⷢ҇ . Ꙗ҆́кѡ дв҃ꙋ є҆ди́нꙋ в̾ жена́хъ , тѧ̀ без̾ сѣ́мене ро́ждьшꙋю бг҃а пло́тїю , всѝ ᲂу҆блажа́емъ ро́ди чл҃честїи . ѻ҆́гнь бо всели́сѧ в̾ тѧ̀ бжⷭ҇твеныи . и҆ ꙗ҆́кѡ младе́нца дᲂи́ши зижди́телѧ и҆ гдⷭ҇а . тѣ́мже а҆́нг҃льскїи и҆ чл҃ческїи ро́дъ , дᲂсто́йнѡ сла́вимъ прест҃о́е ржⷭ҇тво̀ твᲂѐ . и҆ сᲂгла́снѡ вᲂпїе́мъ тѝ , мᲂлѝ хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти , вᲂспѣва́ющимъ дᲂсто́йнѡ сла́вꙋ твᲂю̀ . крⷭ҇тᲂбоⷢ҇ . А҆́гньца и҆ па́стырѧ и҆ и҆зба́вителѧ , а҆́гница зрѧ́щи , на крⷭ҇тѣ̀ вᲂсклица́ше слезѧ́щи , ми́ръ ᲂу҆́бѡ ра́дꙋетсѧ прїе́млѧ тᲂбо́ю и҆збавле́нїе . ᲂу҆тро́ба же мᲂѧ̀ гᲂри́тъ зрѧ́щи твᲂѐ распѧ́тїе , є҆́же терпи́ши за млрⷭ҇дїе млⷭ҇ти дᲂлгᲂтерпѣли́ве гдⷭ҇и . млⷭ҇ти бе́здно , и҆ и҆сто́чниче неи҆счерпа́емыи , ᲂу҆милᲂсе́рдисѧ и҆ да́рꙋй грѣхо́въ ѡ҆ставле́нїе , и҆́же вѣ́рᲂю твᲂѧ̀ вᲂспѣва́ющимъ бжⷭ҇твенаѧ страда́нїѧ .

пѣ́снь , д҃ . і҆рмо́съ . Оу҆слы́шахъ гдⷭ҇и , слꙋ́хъ твᲂегѡ̀ смᲂтре́нїѧ , и҆ прᲂсла́вихъ тѧ є҆ди́не чл҃кᲂлю́бче . Без̾бо́жїѧ пꙋчи́нꙋ , рѣко́ю бжⷭ҇твеныхъ тѝ крᲂве́й , є҆ѵ̾дᲂкі́е сла́внаѧ и҆з̾сꙋши́ла є҆сѝ . Ꙗ҆́же пе́рвїе ᲂу҆лᲂвлѧ́ющаѧ блꙋдны́ми безꙋ́мныѧ мре́жами , ны́нѣ къ црⷭ҇твꙋ бж҃їю ᲂу҆лᲂвлѧ́етъ вѣ́рныѧ . Є҆́же без̾ пра́вды со́бранᲂе тебѣ̀ бᲂга́тство тлѣ́ннᲂе , растᲂчи́вши пра́веднѡ , нетлѣ́нїѧ бᲂга́тство наслѣ́дᲂвала є҆сѝ . боⷢ҇ . Свѣ́тъ вᲂсїѧ́лъ є҆сѝ гдⷭ҇и , и҆́же в̾ нᲂщѝ и҆ тмѣ̀ прегрѣше́нїѧ , ѿ чⷭ҇тыѧ дв҃ы вᲂплᲂща́емь .

пѣ́снь , є҃ . і҆рмо́съ . Свѣ́та пᲂда́телю , и҆ вѣко́мъ тво́рче гдⷭ҇и , во́ свѣтѣ твᲂи́хъ пᲂвелѣ́нїи наста́ви на́съ , ра́звѣ бо тебѐ и҆но́гѡ бг҃а незна́емъ . Свѣ́тъ невече́рнїи ѡ҆зари́въ вᲂи́стинꙋ сла́внꙋю , ѿ страстны́ѧ и҆з̾ѧ́тъ мглы̀ . и҆ к̾ без̾стра́стїѧ пꙋтѝ наве́дъ всесвѣ́тлꙋ пᲂказа̀ . Цр҃ѧ бг҃а , ꙗ҆́кᲂже в̾невѣ́стившисѧ сн҃ꙋ , вᲂз̾ста́вила є҆сѝ чⷭ҇тны́мъ є҆гѡ̀ призыва́нїемъ , ᲂу҆ме́ршагѡ лю́тѣ цр҃е́ва сн҃а пресла́внаѧ . Мꙋ́жескимъ по́мыслᲂмъ , на сꙋди́щи хрⷭ҇та̀ сла́внаѧ и҆спᲂвѣ́дꙋеши бг҃а вᲂплᲂще́нна . и҆ мече́мъ во главꙋ̀ ᲂу҆сѣче́на , ликꙋ́еши с̾ мч҃нки . боⷢ҇ . Ꙗ҆́кᲂже наде́ждꙋ , твᲂѐ пред̾ста́тельство вѣ́рнїи и҆мꙋ́ще , и҆ бѣда́ми го́рькихъ бᲂлѣ́зней ѡ҆крꙋже́ни , к̾ тебѣ̀ ᲂу҆се́рднѡ дв҃о прибѣга́емъ влⷣчце .

пѣ́снь , ѕ҃ . і҆рмо́съ . Въ бе́зднѣ грѣхо́внѣй ѡ҆держи́мъ , не и҆з̾слѣ́днꙋю млрⷭ҇дїѧ твᲂегѡ̀ призыва́ю бе́зднꙋ , ѿ тлѝ бж҃е мѧ вᲂз̾ведѝ . Ꙗ҆́кѡ тепла̀ ре́внᲂсть вѣ́ры твᲂеѧ̀ , мч҃нце є҆ѵ̾дᲂкі́е . є҆ю́же пᲂпра́ла є҆сѝ невѣ́рныхъ настᲂѧ́нїе , и҆ пᲂбѣ́дꙋ пᲂжа́ла є҆сѝ страда́нїѧ . Сле́зныѧ то́ки сᲂвᲂкꙋ́пльши , мꙋче́нїѧ ка́плѧмъ кро́ве твᲂеѧ̀ . є҆ди́нꙋ ѿ ѻ҆бᲂю̀ ча́шꙋ спасе́нїѧ скᲂнча́ла є҆сѝ . Ꙗ҆́же пре́жде смра́да и҆спо́лнь , мно́жествᲂмъ нечистᲂты̀ сꙋ́щи , нн҃ѣ бл҃гᲂво́нїѧ и҆спо́лнисѧ , и҆ съ дв҃ческими ли́ки весели́тсѧ . боⷢ҇ . Ꙗ҆́же ми́рᲂви ра́дᲂсть бцⷣе чⷭ҇таѧ , ра́дꙋисѧ тебѣ̀ зᲂвꙋ́щихъ со а҆́нг҃лѡмъ вѣ́рнѡ , твᲂеѧ̀ ра́дᲂсти спᲂдо́би . и҆ печа́ль на́шꙋ разᲂрѝ .

кᲂнда́къ . гла́съ , д҃ . Во страда́нїи твᲂе́мъ до́брѣ пᲂд̾виза́вшисѧ , и҆ по сме́рти на́съ ѡ҆сщ҃а́еши , чꙋде́съ и҆злїѧ́нїи всехва́льнаѧ , вѣ́рᲂю прибѣга́ющїѧ , в̾ бжⷭ҇твенꙋю цр҃кᲂвь твᲂю̀ . и҆ тᲂржествꙋ́юще мо́лимъ тѧ̀ , прпⷣбнаѧ мч҃нце є҆ѵ̾дᲂкі́е , да и҆зба́вимсѧ недꙋ́гъ дш҃е́вныхъ , и҆ чꙋде́съ бл҃гᲂда́ть пᲂчерпе́мъ . и҆́кᲂсъ . Стрⷭ҇тᲂте́рпческаѧ цр҃кви пᲂро́да ꙗ҆ви́сѧ , средѣ̀ стѧжа́вши са́дъ без̾сме́ртїѧ , тѣ́ло сеѧ̀ честно́е . и҆́же сегѡ̀ ѡ҆б̾е́млющїи плᲂды̀ , вѣ́твьми крѣ́пкѡ ѡ҆сщ҃а́ютсѧ , зрѧ́ще же ᲂу҆дивлѧ́ютсѧ , ка́кѡ вᲂи́стинꙋ ме́ртво тѣ́ло , и҆стᲂча́етъ и҆сцѣле́нїѧ , в̾разꙋмлѧ́ѧ всѧ̀ . тѣ́мъ со тща́нїемъ прїидѣ́те ны́нѣ всѝ , со мно́ю смире́нымъ , и҆ ѡ҆чи́щьше скве́рнꙋ , чꙋде́съ бл҃гᲂда́ть пᲂчерпе́мъ .

пѣ́снь , з҃ . і҆рмо́съ . Ѡ҆ тѣ́лѣ зла́тѣ на́ пᲂли деи́рѣ слꙋжи́мѣмъ , трїѐ ѻ҆́трᲂцы неради́ша ѡ҆ без̾бо́жнѣмъ велѣ́нїи , но пᲂсредѣ̀ пла́мени в̾ве́ржени , прᲂхлажда́еми пᲂѧ́хꙋ , бл҃гᲂслᲂве́нъ бг҃ъ ѻ҆ц҃ъ на́шихъ . И҆́же дре́вле ᲂу҆лᲂвлѧ́ѧи , ѡ҆дᲂжде́нїи ѕло́бными всю̀ ѡ҆бъе́мъ тѧ̀ , вра́гъ льсте́цъ пᲂпира́емь твᲂи́ми нᲂга́ми , вельмѝ зва́ше . ᲂу҆вы̀ мнѣ̀ пᲂбѣди́хсѧ глаго́лѧ , є҆ѵ̾дᲂкі́е прехва́льнаѧ , твᲂи́мъ непрело́жнымъ къ бг҃ꙋ присвᲂе́нїемъ чⷭ҇таѧ . Вᲂз̾держа́нїемъ мно́гимъ , мꙋдрᲂва́нїѧ свᲂеѧ̀ пло́ти ᲂу҆мертви́вши , ме́ртвымъ пᲂдава́еши вᲂскрⷭ҇нїе , и҆́же къ бг҃ꙋ дерзнᲂве́нїемъ твᲂи́мъ , и҆ и҆́же къ немꙋ̀ несꙋмѣ́ннᲂю є҆ѵ̾дᲂкі́е мᲂльбо́ю сѝ . и҆́бо во́лю твᲂри́тъ бᲂѧ́щихсѧ є҆гѡ̀ . Стра́сти хрⷭ҇то́вы , ꙗ҆́кᲂже ᲂу҆краше́нїе бг҃ᲂлѣ́пнѡ , на вы́и свᲂеѧ̀ дш҃и нᲂсѧ́щи , сегѡ̀ привлекла̀ є҆сѝ нетлѣ́нїѧ жела́нїемъ . ѿ ню́дꙋ же тѧ̀ ѡ҆брꙋчѝ невѣ́стꙋ , непᲂро́чнѡ зᲂвꙋ́щꙋ , бл҃гᲂслᲂве́нъ бг҃ъ ѻ҆ц҃ъ на́шихъ . боⷢ҇ . И҆́же пе́рвїе гедеѡ́нъ , прᲂвᲂзвѣща́ѧ твᲂѐ чⷭ҇таѧ бжⷭ҇твенᲂе ржⷭ҇тво̀ ꙗ҆́вѣ . ѻ҆кри́нъ но́ситъ и҆спо́лнь вᲂды̀ , ю҆́же ѿ рꙋна̀ ѡ҆цѣдѝ . все́ бо в̾ тѧ̀ бжⷭ҇тво̀ всели́сѧ пречⷭ҇таѧ . бл҃гᲂслᲂве́нъ пло́дъ чре́ва твᲂегѡ̀ .

пѣ́снь , и҃ . і҆рмо́съ . Впе́щь ѻ҆́гненнꙋю , к̾ дѣ́темъ є҆вре́йскимъ сᲂше́дшагѡ , и҆ пла́мень на хла́дъ прело́жшагѡ бг҃а , по́йте всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Ꙗ҆́кᲂже прише́дши ᲂу҆мо́мъ ко и҆́стиннᲂмꙋ рачи́телю , ᲂу҆до́бь терпи́ши плᲂтьскі́ѧ ꙗ҆́звы , и҆ ѻ҆гнѧ̀ го́рькꙋю бᲂлѣ́знь . мч҃нце всесла́внаѧ , бл҃гᲂслᲂвѧ́щи хрⷭ҇та̀ во́ вѣки всѧ̀ . Тревᲂлне́нїѧ бѣ́дъ сᲂкрꙋши́ла є҆сѝ крⷭ҇тнымъ ꙗ҆́дрилᲂмъ . и҆ дш҃е́внᲂе кᲂрми́ло , в̾ црⷭ҇твїѧ бж҃їѧ приста́нища спасла̀ є҆сѝ сла́внаѧ . бл҃гᲂслᲂвѧ́щи хрⷭ҇та̀ во́ вѣки . Безъѡ҆бра́зїѧ страсте́й сᲂвлече́сѧ , и҆ дш҃ꙋ ѡ҆блᲂжѝ кра́снᲂю ѻ҆де́ждею без̾стра́стїѧ . тѣ́мже хрⷭ҇то́съ тѧ̀ невѣ́стꙋ ѡ҆брꙋчѝ , в̾ нбⷭ҇ныѧ вселѝ хра́мы . боⷢ҇ . Свᲂбᲂжда́етсѧ тᲂбо́ю пра́баба бцⷣе ѡ҆сꙋжде́нїѧ , и҆ сѐ нн҃ѣ жены̀ стра́ждꙋтъ по хрⷭ҇тѣ̀ . и҆ ра́дꙋетсѧ є҆стество̀ же́нскᲂе , ꙗ҆́кᲂже первᲂмч҃нца вᲂпїе́тъ дв҃аѧ ѳе́кла .

пѣ́снь , ѳ҃ . і҆рмо́съ . И҆́же ѿ́ бг҃а бг҃а сло́ва , не и҆зрече́ннᲂю мꙋ́дрᲂстїю , прише́дшагѡ ѡ҆бнᲂви́ти а҆да́ма , ꙗ҆́дїю тлѣ́нїѧ па́дшагѡ ѕлѣ̀ , ѿ ст҃ы́ѧ же дв҃цы , неи҆зрече́нно вᲂплᲂща́ема на́съ ра́ди , вѣ́рнїи є҆динᲂмꙋ́дреннѡ пѣ́сньми велича́емъ . Лица̀ твᲂегѡ̀ зрѣ́нїе дх҃о́внᲂю заре́ю , ꙗ҆́кᲂже сл҃нце вᲂсїѧ́вши чⷭ҇таѧ , стра́ннѡ пᲂказа́шесѧ видѣ́нїе , зрѧ́щимъ невѣ́рнымъ . и҆́бо ꙗ҆́кᲂже вᲂз̾люби́вши хрⷭ҇та̀ , ѿ негѡ̀ прᲂсла́висѧ дᲂсто́йнѡ всечестна́ѧ . Дш҃и свᲂеѧ̀ свѣщꙋ̀ вже́гши мч҃нце , ма́слᲂмъ крᲂве́й твᲂи́хъ свѣ́тлѡ . ра́дꙋющисѧ ны́нѣ вᲂшла̀ є҆сѝ в̾ бжⷭ҇твеныи невѣ́стникъ хрⷭ҇то́въ , с̾ мꙋ́дрыми дв҃ами . с̾ ни́ми же пᲂмина́й всѣ́хъ , вѣ́рᲂю хва́лѧщихъ тѧ̀ . Ѿ терно́вныѧ пре́лести , ꙗ҆́кѡ шипо́къ бг҃ᲂмꙋ́драѧ сладкᲂꙋха́ненъ , и҆зрасла̀ є҆сѝ краснѡ̀ . и҆ вѣ́рнымъ ѡ҆бл҃гᲂво́нила є҆сѝ дш҃а є҆ѵ̾дᲂкі́е . невѣ́рныхъ же ѿрази́ла є҆сѝ тве́рдѡ , смра́дъ преле́стныи . тѣ́мже тѧ̀ блажи́мъ . Сᲂверша́ющихъ любо́вїю , мᲂле́бнꙋю па́мѧть твᲂю̀ к̾ бг҃ꙋ и҆ и҆зба́вителю , мч҃нце чи́стаѧ мᲂли́твами , ѿ всѧ́кихъ бѣ́дъ спасѝ . и҆ мнѣ̀ дш҃е́внꙋю скве́рнꙋ , и҆́же хꙋ́до тѧ̀ вᲂспѣ́вшагѡ ѿмы́й . боⷢ҇ . Ѡ҆ на́съ мᲂлѧ́щи сн҃а свᲂегѡ̀ непреста́й дв҃о , чл҃кᲂлю́бца бг҃а . тѧ́ бо наде́ждꙋ стѧжа́хᲂмъ . и҆ твᲂи́мъ пред̾ста́тельствᲂмъ , и҆збавлѧ́емсѧ бѣ́дъ и҆ страсте́й , и҆ прегрѣше́нїи и҆ бᲂлѣ́зней , и҆́же вѣ́рᲂю тѧ̀ сла́вѧщїи .