10 марта: св. мч. Кондрата

МЦⷭ҇А ТОГО́ЖЕ ВЪ І҃ ДН҃Ь

ст҃а́гѡ мч҃нка кѡ́ндрата , и҆ дрꙋжи́ны є҆гѡ̀ . Ве́черъ , на гдⷭ҇и вᲂзва́хъ , стⷯры . гла́съ , а҃ . поⷣ . нбⷭ҇нымъ чино́мъ .= Съ прехва́льнымъ кѡ́ндратᲂмъ , да вᲂспᲂе́тсѧ свѣ́тлѡ ꙳ кѷпрїа́нъ вели́кїи .꙳ дїѡнѵ́сїи в̾кꙋ́пѣ , и҆ а҆не́ктъ дᲂсто́йнѡ .꙳ кри́скъ в̾кꙋ́пѣ , и҆ сла́вныи па́велъ вѣ́рнѡ ,꙳ ꙗ҆́кѡ страда́льцы гдⷭ҇ни бг҃ᲂвѣнча́нны ,꙳ и҆ мл҃твеницы на́ши те́плїи . Сщ҃еннᲂпᲂбѣ́дныхъ мч҃нкъ , и҆ пᲂбѣдᲂно́сныхъ ꙳ ли́къ дне́сь дрꙋгі́и ꙗ҆ви́сѧ ,꙳ ѡ҆зарѧ́ющь сᲂбо́ръ бжⷭ҇твеныхъ страстᲂно́сецъ .꙳ тве́рдᲂе число̀ , и҆з̾бра́ннᲂе во́инство .꙳ є҆мꙋ́же нача́льникъ кѡ́ндратъ ,꙳ сла́вныи пᲂбѣди́тель прᲂславлѧ́ѧсѧ . Виті́йскїѧ мꙋ́дрᲂсти , мнᲂгᲂпи́саннаѧ плете́нїѧ ,꙳ мꙋ́дрымъ твᲂи́мъ сло́вᲂмъ , разᲂри́лъ є҆сѝ ꙗ҆́кѡ мглꙋ̀ ,꙳ прехва́льныи кѡ́ндрате .꙳ и҆ наꙋча́еши вѣ́рнѡ , и҆ стра́ждеши терпѣли́внѡ по хрⷭ҇тѣ̀ .꙳ во ѻ҆бᲂи́хъ бл҃гᲂꙋкраша́ѧсѧ ,꙳ и҆ в̾кꙋ́пѣ со страстᲂте́рпцы вѣнча́емъ . =сла́ва , и҆ ны́нѣ , боⷢ҇ . Ѡ҆держи́мы прегрѣше́нїи ненаде́жными чи́стаѧ ,꙳ тѧ̀ пред̾ста́тельницꙋ є҆ди́нꙋ стѧжа́вше дв҃це ,꙳ вᲂпїе́мъ бл҃гᲂда́рственѡ .꙳ ѡ҆чи́сти ны прест҃а́ѧ бг҃ᲂневѣ́сто .꙳ ты́ бо є҆сѝ ми́рᲂви прибѣ́жище ,꙳ и҆ застꙋпле́нїе ро́дꙋ на́шемꙋ .= крⷭ҇тᲂбоⷢ҇ . В=ᲂз̾дви́жена ꙗ҆́кѡ ви́дѣ на крⷭ҇тѣ̀ а҆́гньца ,꙳ непᲂро́чнаѧ дв҃ца ,꙳ ско́рбїю ѡ҆держи́ма , рыда́ющи вᲂпїѧ́ше ,꙳ пресла́дкᲂе мѝ ча́до ,꙳ что̀ но́вᲂе и҆ пресла́внᲂе видѣ́нїе ;꙳ ка́кѡ сᲂдержа́и всѧ̀ го́рстїю , на́ древѣ пригвᲂзди́сѧ пло́тїю .

На ᲂу҆́трени . ѻ҆́ба кано́на , во ѻ҆кта́и . и҆ ст҃ы́мъ , на д҃ . кано́нъ , твᲂре́нїе і҆ѡ́сифᲂво . гла́съ , д҃ . пѣ́снь , а҃ . і҆рмо́съ . Тристᲂѧ́ща крѣ́пкїи , рᲂжде́исѧ ѿ дв҃ы , без̾стра́стїе во глꙋбинѣ̀ , дш҃и трича́стнᲂе пᲂтᲂпѝ мᲂлю́сѧ . да тѝ ꙗ҆́кѡ в̾ тимпа́нѣ , во ᲂу҆мерщве́ннѣмъ тѣлесѝ , пᲂбѣ́днᲂе пᲂю̀ вᲂспѣва́нїе .

запѣ́въ : Ст҃і́и мч҃нцы , мᲂли́те бг҃а ѡ҆ на́съ .= Мч҃нкъ сщ҃е́нныхъ , сщ҃е́ннѡ пᲂстрада́вшихъ , сщ҃е́ннᲂе и҆ чꙋ́днᲂе наста̀ пра́зднество , свѣтᲂзаре́нїемъ дх҃а , всѧ̀ прᲂсвѣща́юще , сᲂше́дшесѧ празднᲂлю́бцы , по́ дᲂлгꙋ па́мѧть и҆́хъ ᲂу҆блажа́емъ . Ꙗ҆́кѡ сл҃нце свѣ́тлᲂе , дᲂбрᲂдѣ́телей ᲂу҆че́нїи вᲂсїѧ́лъ є҆сѝ на́мъ , кѡ́ндрате страда́льче . свѣтᲂза́рными тѝ сїѧ́нїи , тмꙋ̀ мнᲂгᲂбо́жїѧ ѿгᲂнѧ̀ бл҃же́нне , и҆ прᲂсвѣща́ѧ вѣ́рныхъ сᲂставле́нїѧ . Ка́мень жи́зни і҆с҃а сп҃са вᲂз̾вѣща́юще бг҃а , пᲂстрада́сте тве́рдѡ . и҆ и҆сто́чникъ сщ҃е́нїѧ , ка́мень прїе́мшїи , кро́ви и҆стече́нїѧ сᲂдѣ́ласте мч҃нцы сла́внїи . =боⷢ҇ . Ѿ тимѣ́нїѧ страсте́й , пᲂмышле́нїи тревᲂлне́нїѧ , ѿ стрѣ́лъ вра́жїихъ , и҆ ѿ всѧ́кᲂгѡ прило́га сᲂпрᲂти́вна спасѝ , чи́стаѧ бг҃ᲂрᲂди́тельнице , дш҃а пᲂю́щихъ твᲂѐ несказа́ннᲂе ржⷭ҇тво̀ всенепᲂро́чнаѧ .

пѣ́снь , г҃ . і҆рмо́съ . Ꙗ҆́кѡ непло́ды рᲂдѝ , ѿ ꙗ҆зы́къ цр҃кви . и҆ мно́гѡ ѡ҆ ча́дѣхъ и҆знемо́же со́нмище . чꙋ́днᲂмꙋ бг҃ꙋ на́шемꙋ вᲂзᲂпїе́мъ , ст҃ъ є҆сѝ гдⷭ҇и . Тве́рдыи а҆дама́нтъ , ᲂу҆бива́емыи мече́мъ , ᲂу҆ѧ́звенымъ ви́дᲂмъ , приближа́ѧсѧ крѣ́пкѡ , чꙋ́днᲂмꙋ бг҃ꙋ на́шемꙋ взыва́ше , ст҃ъ є҆сѝ гдⷭ҇и . Премꙋ́дрᲂстїю кѡ́ндратъ бг҃ᲂда́ннᲂю ᲂу҆празднѝ є҆́ллинскꙋю мꙋ́дрᲂсть любᲂпрѣ́нїемъ страда́нїѧ . и҆ свᲂи́ми крᲂвьмѝ , дх҃ᲂмъ бжⷭ҇твенымъ ᲂу҆дᲂбрѧ́ѧсѧ . Съ кѡ́ндратᲂмъ а҆не́кта , и҆ с̾ па́влᲂмъ криске́нта , кѷпрїа́на бжⷭ҇твенагѡ , и҆ дїѡнѵ́сїѧ вѣ́рнїи бг҃ᲂмꙋ́дренѡ пѣ́сньми вѣнча́емъ , вѣ́рнѡ пᲂстрада́вшихъ . боⷢ҇ . Нбⷭ҇ныи ᲂу҆́мъ , па́че ᲂу҆ма̀ ржⷭ҇тва̀ твᲂегѡ̀ , немо́жетъ сказа́ти ѻ҆трᲂкᲂви́це . ᲂу҆ма́ бо пе́рвагѡ во ᲂу҆тро́бѣ , сло́ва чⷭ҇таѧ зачала̀ є҆сѝ , всѧ́ческаѧ сло́вᲂмъ сᲂста́вльшагѡ .

сѣда́ленъ . гла́съ , д҃ . Терпѣ́пїемъ лю́тыхъ , ᲂу҆мертви́лъ є҆сѝ го́рдаго врага̀ страстᲂно́се , ме́чнꙋю сме́рть претерпѣ́лъ є҆сѝ , в̾кꙋ́пѣ со стра́ждꙋщими с̾ тᲂбо́ю премꙋ́дрыми кѡ́ндрате . тѣ́мже пра́зднꙋемъ , чⷭ҇тнꙋ́ю ва́шꙋ па́мѧть , вᲂпїю́ще , пᲂмѧни́те на́съ ко влⷣцѣ непᲂбѣди́мїи мч҃нцы .= сла́ва , и҆ ны́нѣ , боⷢ҇ . Нечи́стыхъ пᲂмышле́нїи мᲂи́хъ мно́жество , и҆ без̾мѣ́стныхъ мы́слей бꙋ́рю , кто̀ и҆зрещѝ вᲂз̾мо́жетъ пренепᲂро́чнаѧ ; настᲂѧ́нїѧ же беспло́тныхъ вра́гъ мᲂи́хъ , кто̀ и҆спᲂвѣ́сть , и҆ си́хъ ѡ҆ѕлᲂбле́нїѧ ; но твᲂе́ю мᲂльбо́ю бл҃га́ѧ , си́хъ ми всѣ́хъ и҆збавле́нїе да́рꙋй . крⷭ҇тᲂбоⷢ҇ . И҆́=же ѿ без̾нача́льнагѡ ѻ҆ц҃а рᲂжде́ннаго , на пᲂслѣ́дᲂкъ пло́тїю ро́ждьшаѧ , на крⷭ҇тѣ̀ ви́сима зрѧ́щи хрⷭ҇та̀ , ᲂу҆вы̀ мнѣ̀ превᲂз̾желѣ́нныи і҆с҃е вᲂпїѧ́ше . ка́кѡ сла́вимыи ꙗ҆́кѡ бг҃ъ ѿ а҆́нг҃лъ , ѿ без̾зако́нныхъ ны́нѣ чл҃къ сн҃е во́лею распина́ешисѧ ; пᲂю́ тѧ дᲂлгᲂтерпѣли́ве .

пѣ́снь , д҃ . і҆рмо́съ . Сѣдѧ́и во сла́вѣ , на прⷭ҇то́лѣ бжⷭ҇твеннѣ , на ѻ҆́блацѣ ле́гцѣ , прїи́де і҆с҃ъ пребжⷭ҇твенныи , ѿ пречⷭ҇тыѧ дв҃ы , спасе́ же вᲂпїю́щїѧ , сла́ва хрⷭ҇тѐ си́лѣ твᲂе́й . Премꙋ́дрᲂстїю твᲂи́хъ слᲂве́съ , немꙋ́дрыѧ пᲂсрами́лъ є҆сѝ . и҆ наказа́нїемъ бг҃ᲂви́дныхъ ᲂу҆че́нїи свᲂи́хъ , мч҃нче кѡ́ндрате ᲂу҆лᲂви́лъ є҆сѝ , бжⷭ҇твенагѡ а҆не́кта . влⷣцѣ свᲂемꙋ̀ приво́диши , терпѣли́ва мч҃нка . Ѿ пеле́нъ присво́илсѧ є҆сѝ сᲂтво́ршемꙋ , и҆з̾дѣ́тска сᲂверше́на мꙋ́жа смы́слъ и҆збра̀ . и҆ премꙋ́дрᲂсти вᲂз̾желѣ́въ , ве́сь бы́лъ є҆сѝ чи́сто мч҃нче хрⷭ҇то́во жили́ще . Шестᲂсвѣ́тлыи свѣ́щникъ , мч҃нкъ твᲂи́хъ гдⷭ҇и , та́йнымъ ма́слᲂмъ напᲂи́всѧ , ѿгна̀ мнᲂгᲂбо́жїѧ но́щь . и҆ ѡ҆зарѝ зᲂвꙋ́щїѧ , сла́ва хрⷭ҇тѐ си́лѣ твᲂе́й . боⷢ҇ . Ст҃а́ѧ бцⷣа , в̾ не́йже всели́тисѧ бл҃гᲂвᲂлѝ , ꙗ҆́кѡ бл҃гᲂꙋха́ненъ хра́мъ , сло́во ѻ҆́ч҃ее є҆динᲂсꙋ́щнᲂе , не ѡ҆пали́въ лᲂже́снъ , небᲂлѣ́знᲂва . и҆́бо рᲂдѝ є҆мманꙋ́ила , бг҃а и҆ чл҃ка .

пѣ́снь , є҃ . і҆рмо́съ . Прᲂсвѣще́нїе твᲂѐ гдⷭ҇и низ̾пᲂслѝ на́мъ , ѿ мглы̀ прегрѣше́нїѧ разрѣшѝ бл҃же , и҆ твᲂегѡ̀ ми́ра с̾ нб҃сѐ пᲂдава́ѧ . Прᲂсвѣще́нїемъ ра́зꙋма , неразꙋ́мїѧ мглꙋ̀ ѿгᲂнѧ̀ . гдⷭ҇ви приво́диши сᲂбо́ръ страда́лецъ , мꙋ́дре кѡ́ндрате . с̾ ни́ми вѣнча́емъ . По́стнически пе́рвїе , пᲂбѣ́ждь страсте́мъ настᲂѧ́нїе . втᲂро́е пᲂгꙋби́лъ є҆сѝ держа́вꙋ ѕлᲂчести́выхъ , кѡ́ндрате мч҃нче пᲂстрада́въ крѣ́пко . И҆спᲂлнѧ́етсѧ невла́жныи ка́мень , тече́нїемъ честны́хъ ти , крᲂве́й . и҆ тече́нїе свѣ́тлѡ дае́тъ вѣ́рнымъ , ѡ҆сщ҃а́ѧ бжⷭ҇твеными манᲂве́ньми . боⷢ҇ . Сᲂзда́выи пречⷭ҇таѧ є҆́ввꙋ ѿ ребра̀ , и҆з̾ твᲂеѧ̀ чи́стыѧ ᲂу҆тро́бы зи́ждетсѧ . спастѝ а҆да́ма за милᲂсе́рдїе вᲂсхᲂтѣ́въ , ꙗ҆́кѡ чл҃кᲂлю́бецъ .

пѣ́снь , ѕ҃ . і҆рмо́съ . Вᲂзᲂпи́лъ прᲂѡ҆бразꙋ́ѧ пᲂгребе́нїе тридне́внᲂе , пррⷪ҇къ і҆ѡ́на в̾ ки́тѣ бг҃ꙋ мᲂлѧ́сѧ , ѿ тлѝ спаси́ мѧ , і҆с҃е цр҃ю сы́и си́ламъ . Шестᲂчи́сленыи страстᲂно́сецъ ли́къ на́мъ вᲂсїѧ̀ , ꙗ҆́кᲂже ѕвѣ́зды на цр҃ко́внѣмъ чⷭ҇тнѣ́мъ ᲂу҆тверже́нїи . вѣ́рныѧ прᲂсвѣща́ютъ , и҆ пре́лести тмꙋ̀ разго́нѧтъ . Пꙋчи́нꙋ мꙋче́нїѧ преидо́сте мч҃нцы небꙋ́рнѡ , и҆ вы́шнюю тишинꙋ̀ ᲂу҆лꙋчи́сте . вѣ́рнымъ приста́нище бы́вше , и҆ мᲂли́твеницы те́плїи . Да пᲂхва́лимъ со а҆не́ктᲂмъ , кѡ́ндрата сла́внагѡ , и҆ с̾ па́влᲂмъ дїѡнѵ́сїѧ , криске́нта , хрⷭ҇то́ва винᲂгра́да дᲂбрᲂпло́дныѧ ло́зы . боⷢ҇ . Ѻ҆небеси́ла є҆сѝ ѡ҆зе́мльствᲂваннᲂе є҆стество̀ , пренепᲂро́чнаѧ чл҃кѡмъ , и҆стлѣ́вшее то̀ бг҃ᲂсᲂдѣ́лала є҆сѝ . сегѡ̀ ра́ди всѝ немо́лчными гла́сы тѧ̀ сла́вимъ .

пѣ́снь , з҃ . і҆рмо́съ . Спасы́и во ѻ҆гнѝ а҆враа́мскїѧ сѝ дѣ́ти , и҆ халдѣ́и ᲂу҆би́въ , ꙗ҆́же без̾ пра́вды пра́ведныѧ ᲂу҆лᲂвлѧ́хꙋ , препѣ́тыи гдⷭ҇и бж҃е ѻ҆ц҃ъ бл҃гᲂслᲂве́нъ є҆сѝ . Во ѻ҆гнѝ мꙋче́нїи , свы́ше прїе́млюще ро́сꙋ терпѣ́нїѧ со ѻ҆́трᲂки до́блїи взыва́хꙋ мч҃нцы , препѣ́тыи гдⷭ҇и бж҃е ѻ҆ц҃ъ на́шихъ бл҃гᲂслᲂве́нъ є҆сѝ . Ѡ҆дᲂжде́нїемъ честны́ѧ кро́ве ва́шеѧ страстᲂте́рпцы ка́мень невла́жныи пре́жде и҆спо́лньсѧ , во́ды и҆стᲂча́ѧ цѣльба́мъ пᲂю́щимъ , бж҃е ѻ҆ц҃ъ бл҃гᲂслᲂве́нъ є҆сѝ . Ꙗ҆́кѡ мѷрᲂпᲂло́жница мы́слена , мѵ́рѡ и҆сцѣле́нїѧ кѡ́ндрате , мᲂще́й твᲂи́хъ ра́ка и҆стᲂча́етъ . страсте́мъ ѿє́млющи смра́дъ , и҆ ѡ҆палѧ́ющи бѣсо́мъ пᲂлкѝ , си́лᲂю бжⷭ҇твенᲂю . боⷢ҇ . Бл҃гᲂслᲂве́нъ пло́дъ , бл҃гᲂслᲂве́ныѧ ᲂу҆тро́бы твᲂеѧ̀ . є҆го́же бл҃гᲂслᲂвѧ́тъ нбⷭ҇ныѧ си́лы , и҆ чл҃честїи сᲂбо́ри . и҆́же на́съ и҆зба́вльшагѡ ѿ клѧ́твы дре́внїѧ бл҃гᲂслᲂве́наѧ .

пѣ́снь , и҃ . і҆рмо́с̾ . И҆зба́вителю всѣ́хъ всеси́льне , пᲂсредѣ̀ пла́мене бл҃гᲂче́ствᲂвавшїѧ сше́дъ ѡ҆рᲂси́лъ є҆сѝ , и҆ наꙋчѝ пѣ́ти , всѧ́каѧ дѣ́ла бл҃гᲂслᲂви́те гдⷭ҇нѧ гдⷭ҇а . Прᲂсвѣ́щьсѧ страда́ней свѣ́тлᲂстїю , вѣнцено́сецъ бг҃ᲂви пред̾стᲂи́ши . со страда́вшими съ тᲂбо́ю сла́вне , вᲂспѣва́ѧ кѡ́ндрате , всѧ̀ дѣ́ла бл҃гᲂслᲂви́те гдⷭ҇нѧ гдⷭ҇а . Дᲂбрᲂдѣ́тели свѣ́тᲂмъ ᲂу҆дᲂбрѧ́ѧсѧ , при кᲂнчи́нѣ мч҃нческꙋю свѣ́тлᲂсть наслѣ́дᲂва премꙋ́дре . вᲂспѣва́ѧ кѡ́ндрате , всѧ̀ дѣ́ла бл҃гᲂслᲂви́те гдⷭ҇нѧ гдⷭ҇а . Пред̾ѡ҆гражде́нїѧ кᲂри́нѳъ стѧжа̀ , ст҃ы́хъ честны́ѧ мо́щи . и҆ врачева́нїе без̾ме́здно цр҃кᲂвь , и҆дѣ́же вѣ́рᲂю всѧ́къ притека́ѧ , бᲂлѣ́зней и҆ страсте́й и҆змѣнѧ́етсѧ . боⷢ҇ . И҆зба́вльшесѧ клѧ́твы прама́тернїѧ , тᲂбо́ю чи́стᲂю бг҃ᲂмт҃рїю бл҃гᲂслᲂве́наѧ влⷣчце , бл҃гᲂслᲂви́мъ тѧ̀ вѣ́рᲂю , и҆ пѣснᲂсло́вимъ прⷭ҇та́ѧ дв҃о бг҃ᲂневѣ́сто .

пѣ́снь , ѳ҃ . і҆рмо́съ . Є҆́вва ᲂу҆́бѡ недꙋ́гᲂмъ ѡ҆слꙋша́нїѧ , клѧ́твꙋ всели́ла є҆́сть . ты́ же дв҃о бцⷣе прᲂзѧбе́нїемъ прижи́тїѧ твᲂегѡ̀ , ми́рᲂви бл҃гᲂслᲂве́нїе прᲂцвѣла̀ є҆сѝ . тѣ́мъ тѧ̀ всѝ велича́емъ . Гнᲂе́нїѧ ва́ша мꙋ́ченическаѧ , и҆стᲂча́ютъ бл҃гᲂꙋха́нїе и҆спо́лнь бл҃гᲂда́ти . ѡ҆крᲂвавле́нїѧ си́хъ , цѣльба́мъ и҆злива́ютъ ка́пли бжⷭ҇твенымъ дх҃ᲂмъ , стрⷭ҇ти дш҃етлѣ́нны цѣлѧ́тъ . и҆́хже по дᲂстᲂѧ́нїю ᲂу҆блажа́емъ . Красе́нъ ꙗ҆́звеными дᲂбро́тами бы́въ , а҆́нг҃лѡмъ ᲂу҆пᲂдо́бисѧ . кро́вїю же и҆злїѧ́ннᲂю кѡ́ндрате всѣ́дъ ꙗ҆́кѡ на кᲂлесни́цꙋ , вᲂз̾летѣ́лъ є҆сѝ к̾ вы́шнимъ црⷭ҇твᲂмъ , по́чести бᲂлѣ́знемъ прїе́млѧ . И҆стᲂча́ѧ бжⷭ҇твенꙋю сла́дᲂсть и҆з̾ ᲂу҆́стъ , страда́льческїи сᲂбо́ръ ᲂу҆вѣ́рилъ є҆сѝ , мч҃нче кѡ́ндрате страда́ти с̾ тᲂбо́ю , а҆не́кта и҆ па́вла , и҆ криске́нта . кѷпрїа́на же и҆ бжⷭ҇твенагѡ дїѡнѵ́сїѧ . с̾ ни́ми же ликꙋ́еши дᲂстᲂсла́вне . Дне́сь пра́здника ва́шегѡ страда́нїе , страстᲂно́сцы всѝ пᲂчита́емъ . си́мъ бо вѣне́цъ нетлѣ́нїѧ взе́мше , сы́нᲂве є҆стѐ свѣ́тꙋ и҆ днѝ , ликꙋ́юще ѡ҆́крⷭ҇тъ прⷭ҇то́ла всѣ́хъ цр҃ѧ . боⷢ҇ . Ꙗ҆́вльшисѧ всѣ́хъ твᲂрца̀ сѣда́лище , па́че всѧ́кᲂгѡ ᲂу҆ма̀ пренепᲂро́чнаѧ , нб҃съ вы́ш̾ши пᲂказа́сѧ . и҆ всѣ́ми владꙋ́щи , дв҃о бцⷣе нескве́рнаѧ . тѣ́мъ тѧ̀ всѝ непреста́ннѡ велича́емъ .

<< Previous

Contents

Next >>