МЦⷭ҇А ТОГО́ЖЕ ВЪ В҃І ДН҃Ь

прпⷣбнагѡ ѻ҆ц҃а на́шегѡ ѳеѡ́фана и҆спᲂвѣ́дника сигрїа́нскагѡ . Ве́черъ , на гдⷭ҇и вᲂзва́хъ , стⷯры . гла́с̾ , и҃ . поⷣ . ѽ =пресла́внᲂе чꙋ́до . Ѻ҆́ч҃е бг҃ᲂмꙋ́дре ѳеѡ́фане ,꙳ бг҃ᲂѧвле́нїѧ хрⷭ҇то́ва ,꙳ нарече́нъ тезᲂи҆мени́тъ .꙳ живᲂно́снымъ стᲂпа́мъ тᲂгѡ̀ пᲂслѣ́дᲂвалъ є҆сѝ .꙳ и҆ кра́снаѧ житїѧ̀ ѡ҆ста́вивъ ,꙳ взира́ѧ къ жела́емᲂмꙋ тебѣ̀ ,꙳ дᲂбро́тѣ преи҆зрѧ́днѣй .꙳ и҆ бжⷭ҇твеными манᲂве́нїи и҆́же къ немꙋ̀ ,꙳ и҆зрѧ́дными ѡ҆бᲂжа́емь , и҆ кᲂне́чными . Ѻ҆́ч҃е бг҃ᲂмꙋ́дре ѳеѡ́фане ,꙳ преѡ҆би́дѣнъ на го́рькаѧ ,꙳ бᲂлѣ́знїю ѡ҆блᲂжи́мъ ,꙳ пᲂжда́ннѡ претерпѣ́лъ є҆сѝ .꙳ непᲂщадѣ́въ тѣ́ла по честны́хъ и҆ко́нахъ прехва́льне ,꙳ ꙗ҆́рᲂстїю львѡ́въ затᲂче́нъ .꙳ и҆́мже рꙋга́ѧсѧ сᲂвѣ́ты ѡ҆бꙋи́лъ є҆сѝ ,꙳ и҆ пᲂмышле́нїѧ сꙋ́щаѧ сꙋемꙋ́дрена ,꙳ и҆ ᲂу҆́мъ прельще́нъ . Пᲂи́стинѣ вᲂз̾да́нїѧ бᲂлѣ́знемъ тѝ ,꙳ бл҃ги́мъ да́тель бᲂга́тнѡ тебѣ̀ дарᲂва̀ ,꙳ ѿгᲂнѧ́ти бѣ́сы ,꙳ и҆ цѣли́ти недꙋ́ги ꙳ по́давъ преблаже́нне си́лꙋ .꙳ спᲂдо́бль тѧ̀ несказа́нныѧ ра́дᲂсти ,꙳ и҆дѣ́же ликꙋ́ютъ а҆́нг҃льстїи чи́ни ,꙳ вы́нꙋ лицѐ зрѧ́ще вседержи́телѧ . сла́ва , и҆ ны́нѣ , боⷢ҇ . Ра́дꙋисѧ свѣ́та бжⷭ҇твенагѡ престо́лѣ .꙳ пресвѣ́тлаѧ свѣщѐ ,꙳ и҆ сѣ́ни сщ҃е́нїѧ ,꙳ свѣ́тъ на́мъ вᲂсїѧ́вши и҆з̾ пречⷭ҇тагѡ чре́ва твᲂегѡ̀ .꙳ прᲂсвѣща́ѧи ми́рꙋ кᲂнцы̀ ,꙳ и҆ ѡ҆сщ҃а́ѧи свᲂе́ю бл҃гᲂда́тїю .꙳ ра́дꙋисѧ нача́ло спасе́нїѧ пречⷭ҇таѧ .꙳ ра́дꙋисѧ стра́шнᲂе слы́шанїе и҆ глаго́ланїе ,꙳ надѣ́ющимсѧ натѧ̀ . крⷭ҇тᲂбоⷢ҇ . Ч=то̀ зри́мᲂе видѣ́нїе ,꙳ є҆́же мᲂи́ма ѻ҆чи́ма ꙳ зри́тсѧ ѽ влⷣко ,꙳ сᲂдержа́и всю̀ тва́рь ,꙳ на́ древо вᲂзнесе́сѧ .꙳ и҆ ᲂу҆мерщвѧ́етсѧ всѣ́мъ даѧ́и жи́знь .꙳ бцⷣа пла́чꙋщи гл҃аше ,꙳ є҆гда̀ ᲂу҆зрѣ̀ на крⷭ҇тѣ̀ ви́сима ,꙳ и҆́же ѿ неѧ̀ неи҆зрече́ннѡ вᲂсїѧ́вшаго , бг҃а и҆ чл҃ка .

На ᲂу҆́трени . ѻ҆́ба кано́на , во ѻ҆кта́и . и҆ ст҃о́мꙋ , на д҃ . кано́нъ , є҆мꙋ́же краегране́сїе си́це : ѳеѡ́фанъ пᲂе́тъ тѧ̀ ѳеѡ́фана . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стᲂпа́ми дре́вле ше́ствᲂвавъ і҆и҃ль , крⷭ҇тᲂѡ҆бра́зно мѡѷсе́ѡвыма рꙋка́ма , а҆мали́кᲂвꙋ си́лꙋ в̾ пꙋсты́ни пᲂбѣди́лъ є҆́сть .

запѣ́въ : Прпⷣбне ѻ҆́ч҃е и҆ и҆спᲂвѣ́дниче ѳеѡ́фане , мᲂлѝ бг҃а ѡ҆ на́съ . Бг҃а пло́тїю ꙗ҆́вльшагᲂсѧ стᲂпа́мъ пᲂслѣ́дᲂвалъ є҆сѝ , бл҃гᲂче́стїемъ ѻ҆́ч҃е раз̾жже́гсѧ . ꙗ҆́кѡ ѿ сю́дꙋ зва́нїе прїе́мъ , є҆́же по и҆́стинѣ тезᲂи҆ме́нно . ꙗ҆́кѡ прᲂмышле́нїемъ прᲂзна́менаннѡ . Насла́ждьсѧ жела́ннᲂю любо́вїю влⷣки свᲂегѡ̀ , небре́глъ є҆сѝ любвѐ мирскі́ѧ . смѣси́вжесѧ бжⷭ҇твенᲂю любо́вїю , жите́йскꙋю красᲂтꙋ̀ , ни вᲂчто́же вмѣнѝ преблаже́нне . Оу҆стреми́всѧ ѕвѣрᲂѡ҆бра́знѡ , ѿгна̀ ле́въ тᲂми́тель и҆збра́нныѧ . нетерпѧ̀ зрѣ́ти пᲂчита́емꙋ ѻ҆́бразꙋ хрⷭ҇то́вꙋ . с̾ ни́ми же и҆ тебѐ ѳеѡ́фане и҆згна́нїемъ ѡ҆сꙋдѝ . боⷢ҇ . Две́рь ꙗ҆́же к̾ на́мъ твᲂегѡ̀ гдⷭ҇и сни́тїѧ , вᲂсто́ка и҆ сл҃нца и҆ свѣ́та , та́йнѡ тѧ̀ нарица́ема , па́че є҆стества̀ ѡ҆блиста̀ , сꙋгꙋ́ба є҆стество́мъ бг҃а и҆ чл҃ка .

пѣ́снь , г҃ . і҆рмо́съ . Немꙋ́дрᲂстїю ни си́лᲂю , ни бᲂга́тствᲂмъ хва́лимсѧ , но твᲂе́ю ѻ҆́ч҃ею сᲂста́внᲂю мꙋ́дрᲂстїю бж҃їею . ꙗ҆́кѡ нѣ́сть ст҃а па́че тебѐ чл҃кᲂлю́бче . Свѣ́та бжⷭ҇твенагѡ и҆спо́лнь ви́дѣнъ бы́сть ѳеѡ́фане , любо́вїю смѣ́шьсѧ жела́емагѡ бл҃же́нне . тѣ́мже твᲂю̀ сла́внꙋю па́мѧть пᲂчита́емъ . Ѿве́ргъ ѕлᲂчести́вагѡ льва̀ пᲂвелѣ́нїѧ , преда́нїѧ бл҃гᲂче́стнѡ цр҃ко́внаѧ ᲂу҆держа́лъ є҆сѝ . тѣ́мже тѧ̀ хрⷭ҇то́съ чꙋдесы̀ прᲂсла́ви . Вжилѧ́емѡ наде́жею и҆ вѣ́рᲂю прпⷣбне , твᲂеѧ̀ пло́ти немᲂже́нїе , дш҃е́внᲂю крѣ́пᲂстїю , бг҃ᲂви присво́илъ є҆сѝ тѣ́ло є҆динᲂра́бнᲂе . боⷢ҇ . Сᲂзда́выи и҆з̾ нача́ла ѿ пе́рсти мѧ чл҃ка , зи́ждетсѧ менѐ ра́ди во́ чревѣ твᲂе́мъ пренепᲂро́чнаѧ , дре́внее паде́нїе и҆справлѧ́ѧ .

сѣда́ленъ . гла́съ , и҃ . Рачи́тель любвѐ і҆с҃ᲂвы бы́въ , ѿрази́лъ є҆сѝ сла́сти , и҆ жите́йскїи мѧте́жь . и҆ и҆́нᲂчествᲂвавъ , по́жилъ є҆сѝ на землѝ ꙗ҆́кѡ нбⷭ҇ныи а҆́нг҃лъ , и҆ чꙋдесе́мъ то́чиши дарᲂва́нїѧ прпⷣбне . тѣ́мже во свѣтᲂно́снѣй и҆ ст҃ѣ́й твᲂе́й па́мѧти , вѣ́рнѡ вᲂсхвалѧ́емъ тѧ̀ . и҆ сᲂгла́снѡ вᲂпїе́мъ тѝ , бг҃ᲂно́сне ѳеѡ́фане , мᲂлѝ хрⷭ҇та̀ бг҃а , прегрѣше́нїемъ ѡ҆ставле́нїе дарᲂва́ти , чтꙋ́щимъ любо́вїю ст҃ꙋ́ю па́мѧть твᲂю̀ . сла́ва , и҆ нн҃ѣ , боⷢ҇ . Ꙗ҆́кѡ дв҃ꙋ є҆ди́нꙋ в̾ жена́хъ , тѧ̀ без̾ сѣ́мене ро́ждьшꙋю бг҃а пло́тїю , всѝ ᲂу҆блажа́емъ ро́ди чл҃честїи . ѻ҆́гнь бо всели́сѧ в̾ тѧ̀ бжⷭ҇твеныи . и҆ ꙗ҆́кѡ младе́нца дᲂи́ши зижди́телѧ и҆ гдⷭ҇а . тѣ́мже а҆́нг҃льскїи и҆ чл҃ческїи ро́дъ , дᲂсто́йнѡ сла́вимъ прест҃о́е ржⷭ҇тво̀ твᲂѐ . и҆ сᲂгла́снѡ вᲂпїе́мъ тѝ , мᲂлѝ хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти , вᲂспѣва́ющимъ дᲂсто́йнѡ сла́вꙋ твᲂю̀ . крⷭ҇тᲂбоⷢ҇ . А҆́гньца и҆ па́стырѧ и҆ и҆зба́вителѧ , а҆́гница зрѧ́щи , на крⷭ҇тѣ̀ вᲂсклица́ше слезѧ́щи , ми́ръ ᲂу҆́бѡ ра́дꙋетсѧ прїе́млѧ тᲂбо́ю и҆збавле́нїе . ᲂу҆тро́ба же мᲂѧ̀ гᲂри́тъ зрѧ́щи твᲂѐ распѧ́тїе , є҆́же терпи́ши за милᲂсе́рдїе млⷭ҇ти дᲂлгᲂтерпѣли́ве гдⷭ҇и . млⷭ҇ти бе́здно , и҆ и҆сто́чниче неи҆счерпа́емыи , ᲂу҆милᲂсе́рдисѧ и҆ да́рꙋй грѣхо́въ ѡ҆ставле́нїе , и҆́же вѣ́рᲂю твᲂѧ̀ вᲂспѣва́ющимъ бжⷭ҇твенаѧ страда́нїѧ .

пѣ́снь , д҃ . і҆рмо́съ . Вᲂз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свᲂе́мъ , дᲂсто́йнѡ взыва́ющи , сла́ва си́лѣ твᲂе́й гдⷭ҇и . Нбⷭ҇нᲂе ᲂу҆гᲂто́васѧ жили́ще , ꙗ҆́кѡ страда́льцꙋ тебѣ̀ сла́вне . ѿ земны́ѧ бо ра́дꙋѧсѧ преста́висѧ хра́мины , вᲂпїѧ̀ влⷣцѣ свᲂемꙋ̀ , сла́ва си́лѣ твᲂе́й гдⷭ҇и . Вѣнцено́сецъ ѳеѡ́фане пᲂказа́сѧ . честны́ѧ и҆ко́ны хрⷭ҇то́вы , бг҃ᲂно́се и҆ бг҃ᲂбл҃же́нне , не ѿве́рглсѧ є҆сѝ честѝ . тѣ́мъ и҆ взыва́ѧ , сла́ва си́лѣ твᲂе́й гдⷭ҇и . Прᲂти́вѧсѧ пᲂвелѣ́нїю тᲂми́телѧ ѕлᲂчести́ва прпⷣбныи , плᲂтьско́е немᲂже́нїе ѿ ню́дъ небрежѐ . взыва́ѧ зижди́телю , сла́ва си́лѣ твᲂе́й гдⷭ҇и . Вᲂз̾вели́чилсѧ є҆сѝ чꙋдесы̀ бг҃ᲂно́се . и҆́бо хрⷭ҇то́съ премѣни́ тѧ терпѣ́нїемъ . тѣ́мже и҆сцѣле́нїѧ то́чиши тре́бꙋющимъ , ꙗ҆́кᲂже ѿ и҆сто́чника сщ҃е́нне . боⷢ҇ . Превы́шши а҆́нг҃лъ пᲂказа́сѧ є҆ди́на . сᲂвѣ́та бо вели́кагѡ а҆́нг҃ла , рᲂдила̀ є҆сѝ сло́во всѣ́хъ прᲂсвѣ́щшее , вѣ́рᲂю зᲂвꙋ́щихъ , сла́ва си́лѣ твᲂе́й гдⷭ҇и .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рᲂю вᲂспѣва́ющїѧ тѧ . Сло́вᲂмъ бл҃гᲂчести́вымъ , правᲂсла́внѡ прᲂпᲂвѣ́да , прпⷣбныи ѳеѡ́фанъ , вѣ́ры пᲂвелѣ́нїѧ , дх҃ᲂмъ сїѧ́ѧ . Бᲂга́тство различнᲂмꙋ́дрено разда́лъ є҆сѝ , по пᲂвелѣ́нїю влⷣки . в̾ нищетѣ̀ живꙋ́щимъ пᲂслѣ́дꙋѧ прехва́льне . И҆мѣ́ѧ свᲂю̀ дш҃ꙋ по ѻ҆́бразꙋ сᲂзда́вшагѡ , пречи́стᲂмꙋ влады́чню пᲂкланѧ́шесѧ ѻ҆́бразꙋ , любо́вїю ѡ҆блᲂбыза́ѧ . боⷢ҇ . Свѣ́тъ без̾лѣ́тенъ на́мъ , пᲂд̾ лѣ́тᲂмъ бы́вшаго рᲂдила̀ є҆сѝ бг҃ᲂмт҃и , сꙋ́щимъ во тмѣ̀ житїѧ̀ . и҆ ми́ръ прᲂсвѣти́ла є҆сѝ .

пѣ́снь , ѕ҃ . і҆рмо́съ . Пᲂжрꙋ́ти со́ гласᲂмъ хвале́нїѧ гдⷭ҇и , цр҃кви вᲂпїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . И҆спра́ви къ дᲂбрᲂдѣ́тели житїѐ мᲂѐ прпⷣбне , пᲂще́нїѧ стезю̀ мл҃твами сѝ бл҃же́нне ᲂу҆глажда́ѧ . по не́й же крѣ́пкѡ , пра́во ше́ствᲂвати мѧ̀ ѻ҆́ч҃е спᲂдо́би . Цѣлᲂмꙋ́дренѡ свᲂю̀ жи́знь , препрᲂвᲂди́лъ є҆сѝ прпⷣбне съ мꙋ́дрᲂстїю , ю҆́же и҆мѣ́лъ є҆сѝ , с̾ мꙋ́жествᲂмъ же пра́вдꙋ . и҆ крꙋ́гᲂмъ дᲂбрᲂдѣ́телей ꙗ҆ви́лсѧ є҆сѝ ᲂу҆краша́емь . На благᲂзва́нїе мꙋ́ченически вше́лъ є҆сѝ ѳеѡ́фане . бг҃ᲂмт҃ре ѻ҆трᲂкᲂви́цы , и҆ мꙋ́ченикъ ѻ҆́ч҃е и҆ко́ны ꙗ҆́кѡ пᲂче́лъ є҆сѝ , гᲂни́телемъ сᲂпрᲂтивлѧ́ѧсѧ . боⷢ҇ . Всю́ тѧ ѡ҆ст҃ѝ сло́во ст҃о́е , во твᲂю̀ всели́сѧ ᲂу҆тро́бꙋ сщ҃е́ннꙋю , неи҆зрече́ннымъ сло́вᲂмъ бцⷣе . є҆го́же мᲂлѝ спасти́сѧ рабо́мъ тѝ .

кᲂнда́къ . гла́съ , в҃ . Свы́ше прїе́мъ бжⷭ҇твенᲂе ѿкрᲂве́нїе , и҆зы́де то́щнѡ ѿ среды̀ мѧте́жь мꙋ́дре . и҆́нᲂчествᲂвавъ прпⷣбне , чꙋде́съ прїѧ́лъ є҆сѝ дѣ́тель , и҆ прⷪ҇ро́чества дᲂстᲂѧ́нїе . сꙋжи́тїѧ и҆ бᲂга́тства лиша́емь . и҆́кᲂсъ . На землѝ ничто́же пред̾пᲂче́тъ , пᲂслѣ́дᲂвалъ є҆сѝ ра́дꙋѧсѧ зᲂвꙋ́щемꙋ хрⷭ҇тꙋ̀ . и҆ и҆́го є҆гѡ̀ прїѧ́тъ на ра́мо свᲂѐ ᲂу҆се́рднѡ , и҆ пᲂко́й ѡ҆брѣ́те в̾ дш҃и твᲂе́й . є҆го́же и҆ мнѣ̀ ни́щемꙋ и҆ ᲂу҆ны́лᲂмꙋ низ̾пᲂслѝ , глаго́лющемꙋ и҆ ника́кᲂже сᲂверша́ющемꙋ , но є҆щѐ ᲂу҆пражнѧ́ющемꙋсѧ в̾ жите́йскїѧ ве́щи . чꙋдѧ́щемꙋсѧ ка́кѡ всѣ́хъ и҆збѣжа̀ , сᲂжи́тїѧ и҆ бᲂга́тства лиша́емь .

пѣ́снь , з҃ . і҆рмо́съ . Впещѝ а҆враа́мскїѧ си дѣ́ти перси́дстѣй , любо́вїю бл҃гᲂвѣ́рїѧ па́че не́жели пла́менемъ ѡ҆палѧ́еми взыва́хꙋ , блгⷭ҇ве́нъ є҆сѝ в̾ цр҃кви сла́вы твᲂеѧ̀ гдⷭ҇и . И҆́же по ѻ҆́бразꙋ стѧжа́въ и҆ по пᲂдо́бїю , житїе́мъ пресвѣ́тлымъ ѡ҆блᲂжи́сѧ , ѡ҆бᲂю́дꙋ ᲂу҆краси́лсѧ є҆сѝ . бл҃гᲂслᲂве́нъ є҆сѝ в̾ цр҃кви вᲂпїѧ̀ сла́вы твᲂеѧ̀ гдⷭ҇и . И҆спᲂвѣ́данїѧ вѣнце́мъ ѻ҆́ч҃е ᲂу҆краси́сѧ , дѣ́лᲂмъ ѡ҆бличи́лъ є҆сѝ слᲂвеса̀ ѕлᲂчести́выхъ . вѣ́рныхъ же ᲂу҆тверди́лъ є҆сѝ . бл҃гᲂслᲂве́нъ є҆сѝ в̾ цр҃кви вᲂпїѧ̀ сла́вы твᲂеѧ̀ гдⷭ҇и . Оу҆ма̀ тве́рдымъ ᲂу҆се́рдїемъ , тѣле́сныѧ ѻ҆́ч҃е бᲂлѣ́зни претерпѣ́лъ є҆сѝ пᲂжда́ннѡ . бл҃гᲂда́рнѡ влⷣцѣ свᲂемꙋ̀ вᲂпїѧ̀ , бл҃гᲂслᲂве́нъ є҆сѝ в̾ цр҃кви сла́вы твᲂеѧ̀ гдⷭ҇и . боⷢ҇ . Ꙗ҆́кѡ бцⷣꙋ и҆ цр҃цꙋ всеѧ̀ тва́ри , всѝ вѣ́рнїи пᲂе́мъ тѧ̀ чⷭ҇тꙋю . и҆ ра́дꙋисѧ тебѣ̀ зᲂве́мъ , бл҃гᲂслᲂве́на ты̀ в̾ жена́хъ пренепᲂро́чнаѧ влⷣчце .

пѣ́снь , и҃ . і҆рмо́съ . Рꙋ́цѣ распрᲂсте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ ᲂу҆гаси́ша дᲂбрᲂдѣ́телїю пᲂѧ́савшесѧ , и҆́же бл҃гᲂче́стїѧ люби́тели ѻ҆́трᲂцы взыва́юще , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Ви́дѣ бл҃же́нне тве́рдᲂсть твᲂегѡ̀ прᲂтивле́нїѧ , ле́въ мꙋчи́тель , во и҆згна́нїе тѧ̀ ѡ҆сꙋдѝ го́рькᲂе прелꙋка́выи . с̾ весе́лїемъ вᲂпїѧ̀ , сїѐ претерпѣ́лъ є҆сѝ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . На первᲂѡ҆бра́знꙋю вᲂз̾зрѣ́въ и҆ко́ннꙋю че́сть прехᲂдѧ́щꙋ , на сꙋди́ще пᲂте́клъ є҆сѝ , ꙗ҆́кѡ страда́лецъ зако́ненъ . и҆ пᲂбѣди́тель пᲂказа́всѧ , вѣне́цъ прїѧ́лъ є҆сѝ взыва́ѧ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Нбⷭ҇нᲂе вмѣ́стѡ земле́нагѡ , селе́нїе тебѣ̀ дадѐ всѧ́ческихъ гдⷭ҇ь . вмѣ́стѡ бо тѣснᲂты̀ , ѡ҆брѣ́лъ є҆сѝ ширᲂтꙋ̀ ра́дᲂванїѧ , въ пи́щи ра́йстѣй . съ мꙋ́ченики вᲂпїѧ̀ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Свѣ́тᲂмъ ѡ҆блиста́сѧ мы́сленымъ бжⷭ҇твенагѡ дх҃а , бл҃же́нне ѳеѡ́фане . тѣ́мже и҆сцѣле́нїѧ то́чиши ны́нѣ , вѣ́рᲂю к̾ тебѣ̀ притека́ющимъ , и҆ ст҃ꙋ́ю ти ра́кꙋ любо́вїю пᲂчита́ющимъ . и҆ вᲂпїю́щимъ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . боⷢ҇ . И҆́же бжⷭ҇твенᲂю си́лᲂю держа́и тва́рь всю̀ , и҆ ᲂу҆правлѧ́ѧ ꙗ҆́вѣ , рꙋка́ма держи́тсѧ твᲂи́ма пречⷭ҇таѧ , ꙗ҆́кѡ младе́нецъ , приснᲂсꙋ́щныи и҆ сᲂпрⷭ҇то́льныи ѻ҆ц҃ꙋ , и҆ бжⷭ҇твенᲂмꙋ дх҃ꙋ . є҆мꙋ́же вᲂпїе́мъ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а .

пѣ́снь , ѳ҃ . і҆рмо́с̾ . Ка́мень нерꙋкᲂсѣ́чныѧ гᲂры̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , сᲂвᲂкꙋпи́въ раз̾стᲂѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Всѐ бᲂга́тство растᲂчѝ ни́щимъ прпⷣбне , пра́вдꙋ твᲂю̀ ꙗ҆́вѣ вᲂспрїе́млеши , тебѣ̀ вᲂсїѧ́вшꙋю . вмѣ́стѡ тлѣ́нныхъ пᲂжина́ѧ , вѣ́чнѡ пребыва́ющаѧ . Недꙋ́ги и҆сцѣлѧ́еши всебл҃же́нне , ᲂу҆тѣ́шителевᲂю си́лᲂю . бѣ́сы ꙗ҆́вѣ ѿго́ниши , дѣ́йствᲂмъ сегѡ̀ пребᲂга́те . тѣ́мъ вѣ́рнїи зрѧ́ще , тѧ̀ бг҃ᲂно́се ᲂу҆блажа́емъ . Тво́й свѣтᲂно́сныи бг҃ᲂмꙋ́дре преставле́нїѧ де́нь , всѧ̀ призыва́етъ вѣ́рныѧ , къ прича́стїю сщ҃е́нїѧ . є҆го́же ны́нѣ ра́дꙋющесѧ сᲂверша́емъ сщ҃е́нне . Дае́ши ми незави́стенъ да́ръ , хвала́мъ тебѣ̀ слᲂвеса̀ спле́тшемꙋ , ᲂу҆се́рднѡ бг҃ᲂмꙋ́дре . є҆динᲂѡ҆бра́зна тебѣ̀ , ꙗ҆́кᲂже тезᲂи҆ме́нна сегѡ̀ пᲂказа́въ , мᲂльба́ми сѝ бг҃ᲂпрїѧ́тными всебл҃же́нне . боⷢ҇ . Зако́нъ пᲂхвала́мъ пᲂбѣжда́етсѧ , бжⷭ҇твенᲂю сла́вᲂю твᲂе́ю дв҃о . но ꙗ҆́кѡ бл҃га и҆ бл҃гᲂпремѣ́нна , тѧ̀ пᲂю́щихъ прїимѝ пᲂхвалꙋ̀ . грѣхѡ́въ ѡ҆чище́нїе вᲂз̾даю́щи , бг҃ᲂневѣ́стнаѧ .