13 марта: свт. Никифора Константинопольского

МЦⷭ҇А ТОГО́ЖЕ ВЪ Г҃І ДН҃Ь

пренесе́нїе мᲂще́мъ и҆́же во ст҃ы́хъ ѻ҆ц҃а на́шего ники́фᲂра , патрїа́рха кᲂнстанти́на гра́да . Ве́черъ , на гдⷭ҇и вᲂзва́хъ , стихѣ́ры . гла́съ , а҃ . поⷣ . нбⷭ҇нымъ чино́мъ .= Премꙋ́дрᲂсти твᲂеѧ̀ стрꙋѧ̀ ,꙳ пᲂчерпа́емы мы́слеными ѻ҆́блаки ,꙳ и҆стᲂча́ютъ ми́рᲂви и҆сто́чникъ правᲂсла́вїѧ .꙳ ѿ ни́хже сла́дᲂсть вѣ́рнїи пᲂчерпа́юще ,꙳ є҆́ресьскагѡ и҆злїѧ́нїѧ ,꙳ ꙗ҆́кᲂже ѿ ме́рз̾скихъ ѿвраща́емсѧ во́дъ . Твᲂѐ чистѣ́йшее тѣ́ло ,꙳ во́ грᲂбѣ лежа̀ нерастлѣ̀ ѿ ню́дъ .꙳ но цѣ́лѡ ѡ҆брѣ́тесѧ всеблаже́нне ники́фᲂре .꙳ є҆́же со тща́нїемъ прине́сше ,꙳ ра́дᲂвахꙋсѧ правᲂсла́вїѧ вᲂспита́тели ,꙳ бл҃гᲂче́стнѡ тѧ̀ бг҃ᲂмꙋ́дре ᲂу҆бл҃жа́юща . Цр҃кᲂвь бг҃ꙋ бы́вша тѧ̀ ,꙳ бжⷭ҇твеными дѣѧ́ньми ,꙳ цр҃кви а҆пⷭ҇льскаѧ зва́нїемъ пᲂчте́нїѧ ,꙳ прїе́млетъ всебл҃же́нне ,꙳ по пᲂгребе́нїи сщ҃е́ннѡ преставлѧ́ема ,꙳ и҆ спᲂгреба́юща всѣ́мъ є҆ретико́мъ ѕлᲂсмра́днᲂе блѧдᲂсло́вїе . =сла́ва , и҆ ны́нѣ , боⷢ҇ . Прегрѣше́нїи пꙋчи́нᲂю ѡ҆бꙋрева́емъ ,꙳ ти́хᲂмꙋ приста́нищꙋ ,꙳ пречи́стыѧ мᲂльбы̀ твᲂеѧ̀ бг҃ᲂрᲂди́тельнице прибѣ́гъ .꙳ взыва́ю ти спаси́ мѧ ,꙳ держа́внꙋю прᲂсте́рши десни́цꙋ ,꙳ рабꙋ̀ твᲂемꙋ̀ всенепᲂро́чнаѧ . крⷭ҇тᲂбоⷢ҇ . Вᲂз̾дви́жена ꙗ҆́кѡ ви́дѣ на крⷭ҇тѣ̀ а҆́гньца ,꙳ непᲂро́чнаѧ дв҃ца рыда́ющи вᲂпїѧ́ше .꙳ пресла́дкᲂе ми ча́до ,꙳ что̀ но́вᲂе и҆ пресла́внᲂе видѣ́нїе .꙳ ка́кѡ держа́и всѧ̀ го́рстїю ,꙳ на́ древѣ пригвᲂзди́сѧ пло́тїю .

На ᲂу҆́трени . ѻ҆́ба кано́на , во ѻ҆кта́и . и҆ ст҃лю , на д҃ . кано́нъ . гла́съ , в҃ . твᲂре́нїе и҆гна́тїево . пѣ́снь , а҃ . і҆рмо́съ . Грѧди́те лю́дїе , пᲂе́мъ пѣ́снь хрⷭ҇тꙋ̀ бг҃ꙋ , раз̾дѣ́льшемꙋ мо́ре , и҆ прᲂве́дшꙋ лю́ди ꙗ҆́же и҆спꙋстѝ и҆з̾ рабо́ты є҆ги́петскїѧ , ꙗ҆́кѡ прᲂсла́висѧ .

запѣ́въ : Ст҃лю хрⷭ҇то́въ ники́фᲂре , мᲂлѝ бг҃а ѡ҆ на́съ . Во́ грᲂбѣ грѣхо́внѣ ѡ҆держи́ма мѧ , без̾сме́ртнымъ тѝ манᲂве́нїемъ , и҆ млⷭ҇тивнᲂю вᲂскресѝ дла́нїю . и҆ ѡ҆живѝ ще́дре , ꙗ҆́кѡ всеси́ленъ . Ѻ҆бдержи́тельна дᲂбрᲂдѣ́телей сᲂверше́нїѧ , четверᲂча́стнѡ стѧжа́въ , ꙗ҆́кѡ на кᲂлесни́цꙋ всѣ́дъ бг҃ᲂно́се . на степе́нь бг҃ᲂвидѣ́нїѧ , взѧ́тсѧ ѿ дѣ́ланїѧ . Ты̀ жи́зни нетлѣ́нныѧ вкꙋси́въ , ѿ ча́ши прпⷣбне бжⷭ҇твеныѧ пи́лъ є҆сѝ , тре́звенᲂе пи́во . тѣ́мъ и҆ мꙋ́дрᲂсти прїѧ́телище бы́лъ є҆сѝ . Ѿгна́нъ бы́въ прⷭ҇то́ла и҆ сла́вы и҆ ста́да твᲂегѡ̀ рꙋко́ю нꙋ́жнᲂю прпⷣбне , є҆́реси ꙗ҆рᲂтлѣ́нныхъ ѕвѣре́й . ны́нѣ во свᲂю̀ па́ствинꙋ вше́лъ є҆сѝ . боⷢ҇ . Ѻ҆́ч҃ее сло́во сло́вᲂмъ зачала̀ є҆сѝ , и҆ па́че сло́ва ро́ждьши . и҆ по ржⷭ҇твѣ̀ вы́ше є҆стества̀ и҆ сло́ва , дв҃ᲂю ꙗ҆́кᲂже пре́жде ржⷭ҇тва̀ па́ки пребыла̀ є҆сѝ .

пѣ́снь , г҃ . і҆рмо́съ . Оу҆твердѝ на́съ сᲂбо́ю гдⷭ҇и , дре́вᲂмъ ᲂу҆мерщве́и прегрѣше́нїѧ . и҆ стра́хъ тво́й всадѝ в̾ срⷣца̀ на́ша , ꙗ҆́кѡ чл҃кᲂлю́бецъ . Ѻ҆рꙋ́жїемъ крⷭ҇та̀ ѡ҆дѣ́ѧвсѧ , бжⷭ҇твенᲂе вᲂѡ҆браже́нїе влⷣки написꙋ́ѧ пᲂкланѧ́ешисѧ бл҃гᲂче́стнѡ . ѻ҆те́ческимъ пᲂслѣ́дꙋѧ ᲂу҆че́нїемъ . Ста́до па́стырѧ тѧ̀ жела́юще , и҆́же сїѐ по и҆́мени зᲂвꙋ́щагѡ , и҆ во́лки ѿгᲂнѧ́ща жезло́мъ вѣ́ры , к̾ тебѣ̀ притека́етъ мꙋ́дре . Ꙗ҆́кᲂже дре́вле і҆ѡ́сифа цѣлᲂмꙋ́дренагѡ тѣ́ло , і҆и҃ль прино́ситъ , та́кѡ и҆ ны́нѣ цр҃кви хрⷭ҇то́ва , ра́кꙋ мᲂще́й твᲂи́хъ пᲂчита́етъ . боⷢ҇ . Цр҃кᲂвь и҆ сщ҃е́ннᲂе жили́ще сло́ва , сꙋ́щи бцⷣе , прегрѣше́нїемъ ѡ҆чище́нїе , прест҃а́ѧ бꙋ́ди ми при́снѡ дв҃о .

сѣда́ленъ . гла́съ , г҃ . Пᲂбѣ́дами вѣнча́лъ є҆сѝ цр҃кᲂвь , пре́лесть ѿгна́въ ѕлᲂсла́вїѧ , пᲂбѣдᲂно́сецъ сꙋ́щемꙋ бы́въ . ѡ҆сщ҃а́еши ми́рᲂви кᲂнцы̀ , пренесе́нїемъ ст҃ы́хъ мᲂще́й твᲂи́хъ . ѻ҆́ч҃е прпⷣбне хрⷭ҇та̀ бг҃а мᲂлѝ , дарᲂва́ти на́мъ ве́лїю ми́лᲂсть . сла́ва , и҆ ны́нѣ , боⷢ҇ . Бжⷭ҇твена бы́сть сѣ́нь сло́ва є҆ди́на пречⷭ҇таѧ бг҃ᲂмт҃и , ꙗ҆́же чистᲂто́ю а҆́нг҃лы преше́дши . и҆́же па́че всѣ́хъ менѐ сᲂгрѣ́шшаго , и҆ ѡ҆скверне́на плᲂтьски́ми сᲂгрѣше́нїи , ѡ҆чи́сти мᲂльба́ми сѝ бжⷭ҇твеныхъ во́дъ , пᲂдаю́щи чⷭ҇таѧ ве́лїю ми́лᲂсть .= крⷭ҇тᲂбоⷢ҇ . Н=ескве́рнаѧ а҆́гница сло́ва , нетлѣ́ннаѧ дв҃а мт҃и , на крⷭ҇тѣ̀ зрѧ́щи ви́сима , и҆́же и҆з̾ неѧ̀ без̾ бᲂлѣ́зни прᲂзѧ́бшаго , мт҃рьски пᲂдо́бнѡ рыда́ющи взыва́ше , ᲂу҆вы̀ мнѣ̀ ча́до мᲂѐ . ка́кѡ стра́ждеши , хᲂтѧ̀ и҆зба́вити ѿ страсте́й бесче́стїѧ чл҃ка .

пѣ́снь , д҃ . і҆рмо́съ . Оу҆слы́шахъ гдⷭ҇и , сла́внᲂе твᲂѐ смᲂтре́нїе , и҆ прᲂсла́вихъ милᲂсе́рде , непᲂсти́жимꙋю твᲂю̀ си́лꙋ . Кᲂвче́гъ сщ҃е́нїѧ , и҆з̾ него́же и҆сто́чникъ и҆сцѣле́нїѧ пᲂчерпа́емъ , ра́ка твᲂѧ̀ бы́сть чтꙋ́щимъ тѧ̀ . Є҆́реси ѿгна́лъ є҆сѝ , и҆ ста́дꙋ ѡ҆гра́дꙋ ᲂу҆тверди́лъ є҆сѝ , ᲂу҆че́нїи бжⷭ҇твеными ѡ҆гради́въ . По́ дᲂлгꙋ пᲂчита́емъ твᲂи́хъ мᲂще́й бл҃же́нне , мѷрѡто́чнꙋю ра́кꙋ , ꙗ҆́кѡ жи́зни тᲂча́щꙋю , бл҃гᲂво́нїе вѣ́рнымъ . боⷢ҇ . Мы́сленыи тѧ̀ ра́й , ꙗ҆́кѡ жи́зни дре́во прїе́мшꙋю , во́ чревѣ дв҃о хрⷭ҇та̀ . тѣ́мъ тѧ̀ чтꙋ́ще прᲂславлѧ́емъ .

пѣ́снь , є҃ . і҆рмо́съ . Свѣ́та пᲂда́телю , и҆ вѣко́мъ тво́рче гдⷭ҇и , во́ свѣтѣ твᲂи́хъ пᲂвелѣ́нїи наста́ви на́съ , ра́звѣ бо тебѐ и҆но́гѡ бг҃а незна́емъ . Вразѝ пᲂсрамлѧ́ютсѧ , є҆ресе́мъ нача́льницы с̾ ни́ми гнѣ́ваютсѧ , твᲂю̀ ра́кꙋ зрѧ́ще бг҃ᲂмꙋ́дре , пᲂчита́емꙋ цр҃е́мъ , и҆ всѣ́мъ ста́дᲂмъ твᲂи́мъ . Сщ҃е́ннаѧ тѝ ра́ка , бѣсо́въ лꙋка́выѧ дꙋ́хи , ꙗ҆́кᲂже стра́шно тᲂми́тельство ѿгᲂнѧ́етъ . и҆ пᲂбѣ́дꙋ на ни́хъ ники́фᲂре , сла́вы бжⷭ҇твеныѧ прїе́млетъ . Со́вѣстна гᲂрни́ль ѻ҆гне́мъ дх҃а раз̾же́гсѧ . ꙗ҆́кѡ зла́то вѣ́рᲂю , тѧ̀ пᲂказа̀ свѣ́тла , є҆рети́чествꙋющимъ ѡ҆блича́ѧ раз̾враще́нїѧ . боⷢ҇ . Оу҆кра́ш̾шисѧ чⷭ҇таѧ , наи́тїемъ прест҃а́гѡ дх҃а , бг҃а сᲂсце́ма вᲂз̾дᲂи́вши . и҆ сегѡ̀ держи́ши рꙋка́ма , рꙋко́ю всю̀ тва́рь сᲂдержа́щагѡ .

пѣ́снь , ѕ҃ . і҆рмо́съ . Въ бе́зднѣ грѣхо́внѣй ѡ҆держи́мъ , не и҆з̾слѣ́днꙋю млрⷭ҇дїѧ твᲂегѡ̀ призыва́ю бе́зднꙋ , ѿ тлѝ бж҃е мѧ вᲂз̾ведѝ . Вѣ́ры ра́ди , стра́сти претерпѣ́лъ є҆сѝ . по ѻ҆те́ческихъ честны́хъ преда́нїихъ , и҆з̾гна́нїѧ пᲂдъѧ́лъ є҆сѝ . и҆́миже сла́вꙋ стѧжа̀ пречⷭ҇тнꙋ́ю . Тверда̀ вѣ́ра твᲂѧ̀ и҆ прᲂтивле́нїе , мꙋчи́тель безꙋ́мїе стрѧсѐ . сто́лпъ же ѻ҆́гненъ бы́сть , честнѣ́й цр҃кви бл҃же́нне . Ꙗ҆́кѡ свѣ́тлыхъ би́серъ , и҆ ка́менїѧ мꙋ́дре па́че свѣтлѣ́йши , ра́кꙋ и҆ пе́рсть цр҃кви твᲂѧ̀ и҆мꙋ́щи , правᲂсла́вїѧ вѣнце́мъ ᲂу҆дᲂбрѧ́етсѧ . боⷢ҇ . Неи҆зрече́нныи ѻ҆́бразъ ржⷭ҇тва́ ти , ꙗ҆зы́цы земленᲂро́дныхъ и҆ а҆́нг҃лъ хва́лѧтъ . тѧ̀ тва́ремъ влⷣчце , вы́шшꙋю всѣ́хъ сла́вѧще .

пѣ́снь , з҃ . і҆рмо́съ . Тѣ́лꙋ злато́мꙋ премꙋ́дрыѧ дѣ́ти непᲂслꙋжи́ша , и҆ въ пла́мень са́ми пᲂидо́ша , и҆ бо́ги и҆́хъ ѡ҆брꙋга́ша . средѝ пла́мене вᲂзᲂпи́ша , и҆ ѡ҆брᲂсѝ и҆́хъ а҆́нг҃лъ , ᲂу҆слы́шасѧ ᲂу҆́же ᲂу҆́стъ ва́шихъ мл҃тва . Бжⷭ҇твенᲂю си́лᲂю , нетлѣ́нны сᲂблюдо́шасѧ пᲂгреба́тельныѧ ри́зы . и҆ ко́сти твᲂѧ̀ бжⷭ҇твенымъ манᲂве́нїемъ , сᲂпрѧже́нїѧ не ѿрѣши́шасѧ бл҃же́нне , нечи́стыхъ дꙋ́хъ раз̾сыпа́ютъ ѕлᲂмышле́нїе . мы́же вᲂпїе́мъ , блгⷭ҇ве́нъ бг҃ъ ѻ҆ц҃ъ на́шихъ . Стека́ютсѧ лю́дїе , цр҃ь же бл҃гᲂчести́выи , и҆ слꙋжи́тель мно́жество . вᲂз̾ло́жьше сла́внꙋю твᲂю̀ ра́кꙋ , на вы́ѧхъ бг҃ᲂпрїѧ́тне , ꙗ҆́кᲂже кїѡ́тъ прест҃ъ , дарᲂнᲂсѧ́ще пᲂю́тъ . блгⷭ҇ве́нъ бг҃ъ ѻ҆ц҃ъ на́шихъ . Бжⷭ҇твеныи хра́мъ , сло́ва ᲂу҆чени́къ , да прїи́метъ вѣ́рнѡ , а҆пⷭ҇лѡмъ сᲂбесѣ́дника , и҆ мч҃нкѡмъ сᲂжи́телѧ . патрїа́рхѡмъ степе́нь , и҆ ѻ҆ц҃е́мъ сᲂѡ҆бра́зника . бл҃гᲂслᲂве́нъ вᲂпїѧ̀ бг҃ъ ѻ҆ц҃ъ на́шихъ . боⷢ҇ . Зрѧ̀ мѡѷсе́й кꙋпинꙋ̀ неѡ҆пали́мꙋ пре́жде , гᲂрѧ́щꙋ ѻ҆гне́мъ в̾ сина́и мт҃и пречⷭ҇таѧ , прᲂѡ҆бража́ше лᲂжесна̀ твᲂѧ̀ . ѻ҆́гнь бо заче́нши бжⷭ҇твеныи неѡ҆пали́сѧ . но рᲂдѝ свѣ́тꙋ сᲂдѣ́телѧ бг҃а и҆ чл҃ка .

пѣ́снь , и҃ . і҆рмо́съ . Впе́щь ѻ҆́гненнꙋю , к̾ дѣ́темъ є҆вре́йскимъ сᲂше́дшагѡ , и҆ пла́мень на хла́дъ прело́жшагѡ бг҃а , по́йте всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Въ приста́нище жи́зни , ѿ мно́гихъ тревᲂлне́нїи дᲂсти́глъ є҆сѝ , дх҃о́внымъ вѣ́трилᲂмъ . и҆ и҆́го до́брᲂе , немо́кренᲂю сѝ нᲂго́ю спа́слъ є҆сѝ . ны́нѣ наслажда́ешисѧ ѿнꙋ́дныѧ тишины̀ . Гро́ба ви́дѧще вѣ́рнїи , в̾ но́выи же́ртвеникъ прїѧ́та , в̾ не́мже бжⷭ҇твенаѧ сᲂверша́ютсѧ всесᲂж̾же́нїѧ вѣ́рнѡ , и҆ внꙋ́трь ѡ҆сщ҃е́нна чꙋдᲂтво́рца пᲂю́ще , превᲂзно́симъ хрⷭ҇та̀ во́ вѣки . Ра́дꙋетсѧ ста́до свѣ́тлѡ . пра́зднꙋетъ и҆́нᲂческїи свѣ́тлыи ли́къ , и҆ вѣ́рныхъ цр҃ь благᲂчести́выи ба́гръ , и҆ всѧ́ко си́льныхъ тᲂржество̀ , ѡ҆ честно́мъ мᲂще́й твᲂи́хъ пренесе́нїи . боⷢ҇ . Сло́вᲂмъ сло́во во ᲂу҆тро́бѣ , всѧ́ческаѧ сло́вᲂмъ сᲂста́вльшагѡ , заче́нши без̾ сѣ́мене , бг҃ᲂрᲂди́тельнице , чⷭ҇таѧ дв҃о , па́че сло́ва рᲂдила̀ є҆сѝ . є҆го́же превᲂзно́симъ во всѧ̀ вѣ́ки .

пѣ́снь , ѳ҃ . і҆рмо́съ . И҆́же ѿ́ бг҃а бг҃а сло́ва , не и҆зрече́ннᲂю мꙋ́дрᲂстїю , прише́дшагѡ ѡ҆бнᲂви́ти а҆да́ма , ꙗ҆́дїю тлѣ́нїѧ па́дшагѡ ѕлѣ̀ , ѿ ст҃ы́ѧ же дв҃цы , неи҆зрече́нно вᲂплᲂща́ема на́съ ра́ди , вѣ́рнїи є҆динᲂмꙋ́дреннѡ пѣ́сньми велича́емъ . Въ твᲂѐ тᲂржество̀ , и҆ бᲂлѣ́зней твᲂи́хъ ѻ҆́ч҃е а҆́нг҃льскᲂе мно́жество ликꙋ́етъ . прест҃а́го бг҃а бл҃гᲂда́рственѡ сла́вѧще . и҆ ми́ръ свы́ше на́мъ и҆спрᲂша́етъ , вѣ́рнѡ чтꙋ́щимъ твᲂѧ̀ мо́щи . Мᲂще́й твᲂи́хъ бл҃гᲂда́ть , ꙗ҆́кѡ че́стно врачевство̀ да бꙋ́детъ немᲂще́мъ на́шимъ . и҆ мᲂли́тва прехва́льне ѡ҆чи́стилище всѣ́мъ . и҆ к̾ бг҃ꙋ пꙋтѝ наста́вникъ , вѣ́рᲂю и҆ любо́вїю чтꙋ́щимъ тѧ̀ бл҃же́нне . Пᲂбѣди́тельными всеѻ҆рꙋ́жїи , вѣ́рныхъ защитѝ всѣ́хъ цр҃ю рꙋко́ю сѝ . вѣ́рныѧ на ва́рвары ᲂу҆крѣпѝ , и҆ свᲂю̀ цр҃квь , ꙗ҆́кѡ тве́рдᲂе ѡ҆снᲂва́нїе вѣ́рнымъ , прпⷣбнагѡ мᲂли́твами правᲂсла́вѧщихъ сᲂхранѧ́й . боⷢ҇ . Ꙗ҆́кѡ крѣ́пкꙋ пред̾ста́тельницꙋ , наде́ждꙋ и҆ стѣ́нꙋ , и҆ ѡ҆снᲂва́нїе , и҆ пᲂкро́въ тве́рдъ , и҆ не ѡ҆бᲂри́мᲂе ᲂу҆тверже́нїе , и҆ небꙋ́рнᲂе приста́нище . и҆ є҆ди́но прибѣ́жище чⷭ҇таѧ стѧжа́вше тѧ̀ всѝ спаса́емсѧ всепѣ́таѧ .

<< Previous

Contents

Next >>