15 марта: св. мч. Агапия

МЦⷭ҇А ТОГО́ЖЕ ВЪ Є҃І ДН҃Ь

ст҃а́гѡ мч҃нка а҆га́пїѧ , и҆ и҆́же с̾ ни́мъ . Ве́черъ , на гдⷭ҇и вᲂзва́хъ , стⷯры . гла́съ , и҃ . поⷣ . ѽ =пресла́внᲂе чꙋ́до . Мꙋ́ченицы хрⷭ҇то́вы седмᲂчи́сленїи ,꙳ гᲂни́телей стремле́нїѧ ,꙳ и҆ нꙋ́жнꙋю сме́рть ꙳ ни вᲂчто́же вмѣни́сте .꙳ но бл҃гᲂде́рзᲂстнѡ ѿлꙋчи́вшесѧ ,꙳ мꙋжемꙋ́дренѡ к̾ бᲂре́нїемъ .꙳ и҆ пᲂбѣдᲂно́снᲂю сла́вᲂю ѡ҆дѣ́ѧвшесѧ ,꙳ и҆ причто́стесѧ пра́веднымъ всѣ́мъ .꙳ с̾ ни́ми же ва́съ всегда̀ сла́вѧще ᲂу҆бл҃жа́емъ . Мꙋ́чениче страда́льче а҆га́пїе ,꙳ бл҃ги́хъ и҆сто́чника вᲂз̾желѣ́ннагѡ ,꙳ и҆ кра́йнѧгѡ вᲂз̾люби́въ .꙳ пᲂтща́лсѧ є҆сѝ и҆спи́ти ча́шꙋ мꙋче́нїѧ ,꙳ призыва́ѧ бг҃а жива́гѡ бжⷭ҇твенᲂе и҆́мѧ .꙳ Ѽ мꙋ́жества твᲂегѡ̀ .꙳ ѽ терпѣ́нїѧ твᲂегѡ̀ .꙳ и҆́мже ны̀ ᲂу҆лꙋчи́ти сла́вꙋ и҆ свѣ́тлᲂсть ,꙳ ꙗ҆́вѣ пᲂмᲂли́сѧ . Мꙋ́ченицы пребл҃же́ннїи ,꙳ на во́льнᲂе закᲂле́нїе ꙳ са́ми себѐ преда́сте .꙳ и҆ зе́млю крᲂвьмѝ ва́шими ѡ҆ст҃и́сте ,꙳ и҆ вᲂздꙋ́хъ прᲂсвѣти́сте преставле́нїемъ .꙳ нн҃ѣ же живетѐ на́ нб҃сѣхъ ꙳ во́ свѣтѣ невече́рнѣмъ ,꙳ ѡ҆ на́съ всегда̀ ꙳ мᲂлѧ́щесѧ бг҃ᲂви́дцы . =сла́ва , и҆ ны́нѣ , боⷢ҇ . Тѧ̀ мо́лимъ пречⷭ҇таѧ ,꙳ пред̾ста́тельницꙋ на́шꙋ ,꙳ ѡ҆держи́мыѧ в̾ печа́лѣхъ ,꙳ непре́зри до кᲂнца̀ пᲂги́бнꙋти рабо́мъ твᲂи́мъ .꙳ но ᲂу҆скᲂрѝ и҆з̾ѧ́ти на́съ ,꙳ настᲂѧ́щагѡ гнѣ́ва и҆ ско́рби ,꙳ ѽ бг҃ᲂвмѣсти́маѧ прест҃а́ѧ чи́стаѧ ,꙳ ты́ бо є҆сѝ на́мъ стѣна̀ ,꙳ и҆ по́мᲂщь неѡ҆бᲂри́ма .= крⷭ҇тᲂбоⷢ҇ . Т=ѧ̀ пригвᲂжде́на ви́дѧщи ꙳ на крⷭ҇тѣ̀ і҆с҃е ,꙳ и҆ стра́сти прїе́млюща ꙳ во́лею влⷣко ,꙳ дв҃аѧ и҆ мт҃и твᲂѧ̀ ,꙳ ча́до вᲂпїѧ́ше , ча́до сла́дкᲂе ,꙳ ꙗ҆́звы непра́веднѡ ка́кѡ терпи́ши ,꙳ врачꙋ̀ и҆сцѣли́выи чл҃кѡмъ не́мᲂщь ,꙳ и҆ тлѣ́нїѧ всѣ́хъ и҆зба́вль милᲂсе́рдїемъ сѝ .

На ᲂу҆́трени . ѻ҆́ба кано́на , во ѻ҆кта́и . и҆ ст҃ы́мъ , на д҃ . кано́нъ , є҆мꙋ́же краегране́сїе си́це : седми́мъ принᲂша́ю мꙋ́ченикѡмъ пѣ́нїе . твᲂре́нїе і҆ѡ́сифᲂво . гла́съ , и҃ . пѣ́снь , а҃ . і҆рмо́съ . Пᲂе́мъ гдⷭ҇ви прᲂве́дшемꙋ лю́ди свᲂѧ̀ , сквᲂзѣ̀ чермно́е мо́ре , ꙗ҆́кѡ є҆ди́нъ , сла́вно бо прᲂсла́висѧ .

запѣ́въ : Ст҃і́и мч҃нцы , мᲂли́те бг҃а ѡ҆ на́съ . Въ нбⷭ҇ныхъ мꙋ́ченицы сꙋ́ще жили́щѣхъ , ва́съ хва́лѧщихъ на землѝ , прᲂсвѣще́нїѧ спᲂдᲂби́те . Стᲂлпы̀ цр҃кве ꙗ҆ви́стесѧ , стѣ́ны разᲂрѧ́юще и҆́дᲂльскагѡ гнѣ́ва , страстᲂно́сцы хрⷭ҇то́вы предо́блїи . Оу҆ѧзви́сѧ любо́вїю мꙋ́чениче дᲂстᲂхва́льне а҆га́пїе , влⷣки всѧ́ческихъ , и҆ ᲂу҆́мрети за́нь и҆зво́лилъ є҆сѝ . боⷢ҇ . Заре́ю пресвѣ́тлᲂю , и҆́же и҆з̾ тебѐ дв҃о вᲂсїѧ́вшею . дш҃и мᲂеѧ̀ зѣ́ницы прᲂсвѣтѝ , ꙗ҆́кѡ да прᲂславлѧ́ю тѧ̀ .

пѣ́снь , г҃ . і҆рмо́съ . Нѣ́сть ст҃а ꙗ҆́кѡ гдⷭ҇ь , и҆ нѣ́сть пра́ведна ꙗ҆́кᲂже бг҃ъ на́шъ . є҆го́же пᲂе́тъ всѧ̀ тва́рь , нѣ́сть бо прест҃а па́че тебѐ гдⷭ҇и . Ѻ҆гне́мъ раз̾жжига́ѧсѧ любвѐ хрⷭ҇то́вы , ѻ҆́гнь пᲂгаси́лъ є҆сѝ мꙋ́чениче а҆га́пїе и҆́дᲂльскагѡ гнѣ́ва , тече́нїемъ крᲂве́й твᲂи́хъ . тѣ́мже вᲂсхвалѧ́емъ тѧ̀ , при́снѡ блажа́ще . Ѻ҆рꙋ́жїѧ ꙗ҆ви́стесѧ , пᲂсѣка́юще тмы̀ бл҃же́ннїи бѣсо́въ , бл҃гᲂда́тїю . и҆ ны́нѣ тма́мъ сᲂвᲂкꙋпи́стесѧ ра́дꙋющесѧ , мы́сленыхъ си́лъ . Пꙋ́ть сᲂверши́вше мꙋче́нїѧ мꙋ́жески , ѿлᲂже́нїемъ тѣ́ла , вы́шнее пᲂстиго́сте црⷭ҇тво . в̾ не́мже стѧжа́сте мꙋ́ченицы бжⷭ҇твенїи житїѐ . боⷢ҇ . Пᲂдо́бїемъ пло́ти ꙗ҆́вльшагᲂсѧ , и҆з̾ твᲂегѡ̀ свѣтᲂно́снагѡ чре́ва , зижди́телѧ пᲂзна́хᲂмъ . за милᲂсе́рдїе млⷭ҇ти , на́мъ пᲂю́щимъ тѧ̀ , мт҃и при́снѡ дв҃о .

сѣда́ленъ . гла́съ , и҃ . Седмᲂчи́сленыи ли́къ ст҃ы́хъ мч҃нкъ , пᲂстрада̀ крѣ́пкѡ за бжⷭ҇твенѣй трⷪ҇цѣ . пᲂгꙋбѝ мно́жества мы́сленыхъ вра́гъ , бл҃гᲂда́тїю . и҆ сᲂвᲂкꙋпи́шасѧ тма́мъ , нбⷭ҇ныхъ ᲂу҆мо́въ дх҃ᲂмъ . тѣ́хъ мл҃твами , ᲂу҆ще́дри на́съ чл҃кᲂлю́бче .= сла́ва , и҆ ны́нѣ , боⷢ҇ . Ѿ= всѧ́кᲂгѡ преще́нїѧ и҆ ѕло́бы чл҃ческїѧ , спасѝ на́съ прест҃а́ѧ дв҃о . тѧ́ бо и҆́мамы пᲂкро́въ и҆ застꙋпле́нїе , прибѣга́ющїѧ к̾ тебѣ̀ бг҃ᲂмт҃и , и҆ рᲂжде́ннᲂмꙋ и҆з̾ тебѐ бг҃ꙋ на́шемꙋ . є҆го́же мᲂлѝ , и҆зба́вити на́съ бѣ́дъ и҆ скᲂрбе́й .= крⷭ҇тᲂбоⷢ҇ . Н=ескве́рнаѧ а҆́гница , а҆́гньца и҆ па́стырѧ ви́сима на крⷭ҇тѣ̀ ви́дѣвши вᲂпїѧ́ше , ча́до мᲂѐ ча́до , стра́ннᲂе и҆ ненаде́жнᲂе сѐ ны́нѣ видѣ́нїе . ка́кѡ живо́тъ , сме́ртїю пᲂдо́бнѡ чл҃кѡмъ ѡ҆сꙋжда́ешисѧ . но вᲂскрⷭ҇нѝ ѿ ме́ртвыхъ , тридне́вно ꙗ҆́кᲂже речѐ , да ра́дꙋющисѧ сла́влю тѧ̀ .

пѣ́снь , д҃ . і҆рмо́съ . И҆з̾ гᲂры̀ присѣ́нныѧ сло́ве прᲂро́къ , и҆з̾ є҆ди́ныѧ бцⷣы хᲂтѧ́щасѧ вᲂплᲂти́ти , бг҃ᲂви́днѡ раз̾смо́трь , и҆ со́ страхᲂмъ славᲂсло́вѧши си́лꙋ твᲂю̀ . Вельмѝ хрⷭ҇та̀ а҆га́пїе вᲂз̾лю́бль стрⷭ҇те́мъ тᲂгѡ̀ мꙋ́жески ᲂу҆пᲂдо́бльсѧ . закᲂле́нъ бы́въ ꙗ҆́кѡ а҆́гнецъ во́лею , великᲂмꙋ́чениче дᲂстᲂчꙋ́дне . Мече́ви са́ми себѐ вда́вше , вседꙋ́шнѡ мч҃нцы мꙋ́дрїи . крᲂпле́нїи кро́вными , ѡ҆багри́сте ри́зꙋ . в̾ ню́же ѡ҆дѣ́ѧвшесѧ на́ нб҃сѣхъ живе́те . И҆́же къ бг҃ꙋ ва́шеѧ те́плыѧ любвѐ , є҆ѧ́же ра́ди себѐ ѿверго́стесѧ до кᲂнца̀ . и҆ нꙋ́жнꙋю сме́рть пᲂд̾є́мше , без̾сме́ртїю спᲂдо́бистесѧ . боⷢ҇ . Мѵ́рѡ во́ чревѣ сло́ва прїе́мши , нескве́рнаѧ чи́стаѧ , ми́ръ ѿ смра́да ѡ҆чи́стившаго , всѧ́кихъ сᲂгрѣше́нїи . тѣ́мъ вѣ́рнѡ тѧ̀ бл҃жи́мъ .

пѣ́снь , є҃ . і҆рмо́съ . Ѿ ́нᲂщи невѣ́дѣнїѧ , бг҃ᲂразꙋ́мїемъ прᲂсвѣще́й кᲂнцы̀ , прᲂсвѣти́ мѧ ᲂу҆́трᲂмъ , славᲂсло́вїѧ твᲂегѡ̀ гдⷭ҇и . Лю́бленикъ дѣѧ́нїемъ , ꙗ҆́кᲂже и҆ зва́нїемъ бы́въ сла́вне . пᲂстрада́лъ є҆сѝ за любо́вь всѣ́хъ цр҃ѧ хрⷭ҇та̀ и҆ бг҃а на́шегѡ . Глаго́лъ лю́тагѡ тᲂми́телѧ пᲂпра́сте , ст҃і́и мч҃нцы . и҆ хрⷭ҇то́ви в̾во́инившесѧ , пᲂлкѝ бѣсо́вскїѧ пᲂгꙋби́сте . Сщ҃е́нными по́двиги , низ̾лага́юще без̾зако́нныхъ шата́нїѧ . вѣнце́мъ без̾сме́ртїѧ , мч҃нцы хрⷭ҇то́вы ѡ҆дѣ́ѧстесѧ . боⷢ҇ . Пѣ́сньми бжⷭ҇твеными , бцⷣꙋ вѣ́рнїи ᲂу҆бл҃жи́мъ . ра́дꙋисѧ гл҃юще две́рь , є҆ю́же є҆ди́нъ про́йде гдⷭ҇ь .

пѣ́снь , ѕ҃ . і҆рмо́съ . Ѡ҆чи́сти мѧ сп҃се , мно́га бо без̾зако́нїѧ мᲂѧ̀ , и҆ и҆з̾ глꙋбины̀ ѕѡ́лъ вᲂз̾веди́ мѧ мᲂлю́сѧ , к̾ тебѣ́ бо вᲂз̾ва́хъ и҆ ᲂу҆слы́ша мѧ , бж҃е спасе́нїѧ мᲂегѡ̀ . Со а҆леѯа́ндрᲂма двѣма̀ , дїѡнѵ́сїѧ два̀ пᲂе́мъ . а҆га́пїѧ сла́внаго , тимᲂла́ѧ и҆ рᲂми́ла , крѣ́пкѡ пᲂстрада́вшихъ , и҆ мно́жества вра́жїѧ низ̾лᲂжи́вшихъ . И҆сцѣле́нїемъ рѣ́ки и҆стᲂча́юще мч҃нцы , стра́сти земнᲂро́дныхъ бжⷭ҇твенѣ ѡ҆чища́ете . сегѡ̀ ра́ди ра́дꙋющесѧ , ва́ша вѣ́рᲂю вᲂсхвалѧ́емъ до́блести . Зако́ннѡ сщ҃е́нныи по́двигъ скᲂнча́вше . зако́ннѡ всѣ́хъ дѣ́тельнᲂю рꙋко́ю вѣнча́стесѧ , седьмᲂчи́сленїи мч҃нцы , нбⷭ҇нїи гра́ждане , а҆́нг҃лѡмъ равнᲂстᲂѧ́телїе . боⷢ҇ . Оу҆вѧди́вши сады̀ без̾бо́жїѧ , пренепᲂро́чнаѧ твᲂи́мъ ст҃ы́мъ прᲂзѧбе́нїемъ . прᲂзѧба́ющꙋю во мнѣ̀ вы́нꙋ вра́жїю ѕло́бꙋ , и҆скᲂренѝ бг҃ᲂневѣ́сто .

пѣ́снь , з҃ . і҆рмо́съ . И҆́же ѿ і҆ꙋде́и , дᲂше́дше ѻ҆́трᲂцы в̾ вавѷлѡ́нъ дре́вле , вѣ́рᲂю ᲂу҆тверже́нїи , пла́мень пе́щныи пᲂпра́вше гл҃юще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Са́ми себѐ во́лею к̾ закᲂле́нїю , ꙗ҆́кѡ а҆́гньцы преда́сте . не ᲂу҆бᲂѧ́вшесѧ мꙋ́къ прехва́льнїи ѻ҆рꙋ́жницы . но бл҃гᲂдꙋ́шнѡ зᲂвꙋ́ще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Прᲂсвѣ́щьсѧ любо́вїю всѣ́хъ влⷣки , мꙋ́чениче а҆га́пїе . пᲂд̾клᲂни́лъ є҆сѝ вы́ю мече́ви . и҆ мч҃нкъ причте́сѧ є҆сѝ во́инствꙋ , взыва́ѧ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Ꙗ҆́кѡ свѣти́льницы зрѧ́стесѧ въ дᲂмꙋ̀ гдⷭ҇ни , мч҃нцы сла́внїи , седмᲂсїѧ́тельнѡ ми́ръ прᲂсвѣща́ете вᲂпїю́ще , сїѧ́нїемъ бл҃гᲂда́ти , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . боⷢ҇ . Свѧ́зана мѧ̀ плени́цами , несказа́нныхъ прегрѣше́нїи , разрѣшѝ пренепᲂро́чнаѧ . пᲂдаю́щи мѝ тꙋ́чꙋ сле́зъ , пᲂю́щꙋ и҆з̾ тебѐ вᲂсїѧ́вшагѡ . ѻ҆ц҃ъ на́шихъ бж҃е бл҃гᲂслᲂве́нъ є҆сѝ .

пѣ́снь , и҃ . і҆рмо́съ . Прᲂѧвле́ннаго на гᲂрѣ̀ ст҃ѣ́й , и҆ въ кꙋпинѣ̀ ѻ҆́гненнѣй , дв҃ческꙋю мѡѷсе́ѡви та́йнꙋ ꙗ҆́вльшагѡ , гдⷭ҇а по́йте и҆ превᲂзнᲂси́те є҆гѡ̀ во́ вѣки . Цѣли́тели раз̾ли́чныхъ недꙋ́гъ , рꙋкᲂдѣ́йствᲂмъ хрⷭ҇та̀ пᲂказа́вшесѧ , всѧ̀ на́ша недꙋ́ги и҆сцѣли́те . ꙗ҆́кѡ да вᲂсхва́лимъ и҆ сла́вимъ , ва́шꙋ бжⷭ҇твенꙋю па́мѧть . Вᲂз̾лю́бль бг҃а , к̾ тᲂмꙋ̀ мч҃нче вᲂз̾лю́бленъ бы́сть . тѣ́мже тѧ̀ по́двигъ бжⷭ҇твеныи скᲂнча́вша , приве́дъ со є҆динᲂревни́тели , въ нбⷭ҇ныи а҆га́пїе черто́гъ . Впери́вшесѧ любо́вїю влⷣки , наси́лᲂванїе низ̾лᲂжи́сте преле́стника . и҆ бл҃гᲂхва́льнѡ пᲂбѣ́дами ᲂу҆краша́еми , в̾ нбⷭ҇ныхъ мч҃нцы гдⷭ҇ни живе́те пᲂко́ищахъ , ве́селѡ ра́дꙋющесѧ . боⷢ҇ . И҆сцѣлѝ стра́сти срⷣца мᲂегѡ̀ , без̾стра́стїѧ и҆сто́чника ро́ждьшаѧ , и҆ к̾ живᲂтꙋ́ мѧ бжⷭ҇твенᲂмꙋ наста́ви , датѧ̀ сла́влю мт҃рь сп҃сᲂвꙋ , во всѧ̀ вѣ́ки .

пѣ́снь , ѳ҃ . і҆рмо́съ . Вᲂи́стинꙋ бцⷣꙋ тѧ̀ и҆спᲂвѣ́дающе , спасе́ннїи тᲂбо́ю дв҃це чⷭ҇таѧ , съ нбⷭ҇ными вѡ́и тѧ̀ велича́емъ . Краснѝ бы́вше , бжⷭ҇твеными лѣ́пᲂтами мꙋче́нїѧ , гдⷭ҇ви пред̾стᲂитѐ . и҆ с̾ ни́мъ стрⷭ҇тᲂно́сцы при́снѡ веселите́сѧ . Во́инство а҆́нг҃льскᲂе ва́съ прїе́млетъ , распрѧ́гшїѧсѧ тѣлесе́мъ мч҃нцы , к̾ нбⷭ҇нᲂмꙋ гра́дꙋ , и҆ свѣ́тꙋ невече́рнемꙋ . Ва́шꙋ сᲂверша́ющихъ дне́сь па́мѧть сщ҃е́ннꙋю , мч҃нцы сла́внїи , къ бг҃ꙋ пᲂмина́юще , непреста́ннѡ мᲂли́тесѧ . боⷢ҇ . Свѣ́тᲂмъ мѧ̀ пᲂкаѧ́нїѧ , пᲂмраче́ннаго лѣ́нᲂстїю , всенепᲂро́чнаѧ прᲂсвѣтѝ , ꙗ҆́кѡ да пᲂю̀ и҆ сла́влю вели́чїѧ тѝ .

<< Previous

Contents

Next >>