16 марта: св. мч. Савина

МЦⷭ҇А ТОГО́ЖЕ ВЪ Ѕ҃І ДН҃Ь

ст҃а́гѡ мч҃нка сави́на . Ве́черъ , на гдⷭ҇и вᲂзва́хъ , стⷯры . гла́съ , и҃ . поⷣ . что́ тѧ и҆менꙋ́емъ .= Что́ тѧ и҆менꙋ́емъ сла́вне ;꙳ во́ина си́льна цр҃ѧ и҆ бг҃а .꙳ беспло́тныхъ ѕлᲂче́стїе низ̾ло́жьша мꙋ́жески .꙳ и҆ свѣти́льника мы́слена свѣ́тъ ѡ҆блиста́юща .꙳ и҆́дᲂлѡмъ гꙋби́телѧ преси́льна ,꙳ и҆ пᲂдви́жника прете́плаго ,꙳ и҆ страда́льца зако́ннаго .꙳ мᲂлѝ спасти́сѧ дш҃а́мъ на́шимъ . Что́ тѧ нн҃ѣ сави́не прᲂнарече́мъ ;꙳ рѣкꙋ̀ вᲂды̀ живо́тныѧ , лїю́щꙋ на́мъ ширᲂтꙋ̀ дх҃о́внꙋю ,꙳ ᲂу҆тѣсне́нымъ въ лю́тыхъ .꙳ навᲂдне́нїе и҆сцѣле́нїемъ не и҆з̾живꙋ́щее .꙳ ча́шꙋ пи́во ст҃о́е прᲂлива́ющꙋ .꙳ чꙋдᲂтво́рца и҆́стинна .꙳ беспло́тнымъ равнᲂчⷭ҇тна .꙳ мᲂлѝ спасти́сѧ дш҃а́мъ на́шимъ . Что́ тѧ прᲂвѣща́емъ ст҃ы́и ;꙳ заблꙋ́ждьшимъ наста́вника , и҆ мᲂли́твеника грѣ́шникѡмъ .꙳ врача̀ сꙋ́щимъ въ лю́тыхъ ѡ҆бꙋрева́емымъ и҆́стинна ,꙳ бл҃гᲂꙋха́ненъ раѧ̀ кри́нъ че́стенъ ,꙳ нача́ло мч҃нкѡмъ и҆ ᲂу҆тверже́нїе ,꙳ и҆сто́чника чꙋде́съ прⷭ҇нѡ текꙋ́ща ,꙳ пᲂдви́жника до́блѧ .꙳ мᲂлѝ спасти́сѧ дш҃а́мъ на́шимъ . =сла́ва , и҆ нн҃ѣ , боⷢ҇ . Кᲂмꙋ̀ ᲂу҆пᲂдо́бисѧ стра́стнаѧ ,꙳ к̾ пᲂкаѧ́нїю ника́кᲂже вᲂз̾ница́ющи дш҃е .꙳ и҆ ѻ҆гнѧ̀ не ᲂу҆жаса́ющисѧ , ѕлы́хъ ѡ҆жида́ющаго .꙳ вᲂз̾ста́ни , и҆ є҆ди́нꙋ к̾ застꙋпле́нїю ꙳ ско́рꙋю призᲂвѝ . и҆ вᲂзᲂпі́й ,꙳ дв҃о мт҃и мᲂлѝ ꙳ свᲂегѡ̀ сн҃а и҆ бг҃а на́шегѡ ,꙳ и҆зба́вити мѧ̀ ѿ сѣ́тей лꙋка́вагѡ . крⷭ҇тᲂбоⷢ҇ . А҆́гньца а҆́гница ꙗ҆́кѡ ᲂу҆зрѣ̀ ,꙳ на́ древѣ прᲂсте́рта во́лею распина́тельнѣ .꙳ вᲂпїѧ́ше мт҃рьски , и҆ бᲂлѧ́щи с̾ пла́чемъ .꙳ сн҃е мо́й , что̀ стра́ннᲂе сѐ видѣ́нїе .꙳ и҆́же всѣ́мъ живо́тъ даѧ́и ꙗ҆́кѡ бг҃ъ .꙳ ка́кѡ ᲂу҆мира́еши дᲂлгᲂтерпѣли́ве ,꙳ чл҃кѡмъ пᲂдаѧ́и вᲂскрⷭ҇нїе .꙳ сла́влю твᲂѐ мно́гᲂе бж҃е мо́й смᲂтре́нїе .

На ᲂу҆́трени . ѻ҆́ба кано́на , во ѻ҆кта́и . и҆ ст҃о́мꙋ , на д҃ . кано́нъ , є҆мꙋ́же краегране́сїе си́це : страда́льчески сави́на хвалю̀ любо́вїю . твᲂре́нїе ѳеѡ́фанᲂво . гла́съ , и҃ . пѣ́снь , а҃ . і҆рмо́съ . Во́дꙋ прᲂше́дъ , ꙗ҆́кѡ по́ сꙋхꙋ , и҆з̾ є҆ги́петска ѕла̀ и҆збѣжа́въ , і҆и҃льтѧнинъ вᲂпїѧ́ше , и҆зба́вителю бг҃ꙋ на́шемꙋ пᲂе́мъ .

запѣ́въ : Ст҃ы́и мч҃нче сави́не , мᲂлѝ бг҃а ѡ҆ на́съ . Нетлѣ́нна и҆ бжⷭ҇твена пребыва́нїѧ , и҆ непᲂсти́жныхъ наслажда́ѧсѧ ны́нѣ бл҃гъ , сави́не с̾ мꙋ́ченики бг҃ᲂмꙋ́дре , вᲂсхвалѧ́ющихъ тѧ̀ спаса́й . Же́ртвꙋ хвале́нїѧ хрⷭ҇то́ви себѐ ѡ҆сщ҃а́ѧ , къ страда́нїемъ терпѣли́внѡ , въ пꙋсты́нѧхъ ᲂу҆дали́лсѧ є҆сѝ сави́не . вᲂз̾держа́тельными ѡ҆бꙋча́ѧсѧ по́двиги . Цвѣтцы̀ наслади́всѧ дх҃о́вными , ра́й ꙗ҆ви́лсѧ є҆сѝ ᲂу҆краше́нъ дᲂбрᲂдѣ́тельми . ѡ҆б̾е́млемъ мече́мъ мꙋче́нїѧ , и҆ снѣ́дь бг҃ᲂви пᲂзнава́емъ . боⷢ҇ . Ѿбѣжѐ сме́ртнᲂе сѣ́тᲂванїе . живо́тъ бо и҆з̾ ᲂу҆тро́бы твᲂеѧ̀ , во ѵ҆пᲂста́си бг҃ъ про́йде несказа́ннѡ бцⷣе , ѡ҆бнᲂвлѧ́ѧи дв҃о є҆стество̀ на́ше .

пѣ́снь , г҃ . і҆рмо́съ . Ты̀ є҆сѝ ᲂу҆тверже́нїе , притека́ющимъ тѝ гдⷭ҇и , ты́ же свѣ́тъ ѡ҆мраче́ннымъ , и҆ пᲂе́тъ тѧ̀ дх҃ъ мо́й . Цр҃кᲂвь сᲂдѣ́лавъ чи́стꙋю свᲂю̀ дш҃ꙋ , прїѧ́тъ в̾ ню̀ бг҃а . и҆ хра́мы бѣсо́вскїѧ , сави́не низ̾лᲂжи́лъ є҆сѝ . Ми́лᲂстива ми́лᲂстїю бг҃а ѡ҆брѣ́тъ . страсте́мъ є҆гѡ̀ пᲂдо́бникъ бы́лъ є҆сѝ . преда́телю ᲂу҆ченикꙋ̀ бы́вшꙋ . боⷢ҇ . Бг҃а ро́ждьши , всѧ́кᲂй тва́ри влⷣчце , ꙗ҆́кѡ вᲂи́стинꙋ є҆ди́на бцⷣа , превы́ш̾ши ꙗ҆ви́сѧ .

сѣда́ленъ . гла́съ , и҃ . Свѧза́всѧ любо́вїю и҆зба́вителѧ , ꙗ҆́звы мнᲂгᲂѡ҆бра́зны и҆ растерза́нїѧ претерпѣ́лъ є҆сѝ ст҃ы́и , мꙋ́жественымъ ра́зꙋмᲂмъ . и҆ в̾ рѣкꙋ̀ в̾ве́рженъ бы́въ , кᲂнчи́нꙋ свᲂю̀ в̾ не́й прїѧ́тъ . и҆ бᲂга́тство мнᲂгᲂцѣ́нно всѣ́мъ пᲂда́стсѧ , и҆стᲂча́ѧ и҆сцѣле́нїѧ , и҆ рѣша́ѧ недꙋ́ги , вѣ́рнѡ притека́ющимъ к̾ тебѣ̀ сави́не бл҃же́нне . мᲂлѝ хрⷭ҇та̀ бг҃а , прегрѣше́нїемъ ѡ҆ставле́нїе пᲂда́ти , чтꙋ́щимъ любо́вїю ст҃ꙋ́ю па́мѧть твᲂю̀ . сла́ва , и҆ ны́нѣ , боⷢ҇ . Ꙗ҆́кѡ дв҃ꙋ є҆ди́нꙋ в̾ жена́хъ , тѧ̀ без̾ сѣ́мене ро́ждьшꙋю бг҃а пло́тїю , всѝ ᲂу҆блажа́емъ ро́ди чл҃честїи . ѻ҆́гнь бо всели́сѧ в̾ тѧ̀ бжⷭ҇твеныи . и҆ ꙗ҆́кѡ младе́нца дᲂи́ши зижди́телѧ и҆ гдⷭ҇а . тѣ́мже а҆́нг҃льскїи и҆ чл҃ческїи ро́дъ , дᲂсто́йнѡ сла́вимъ прест҃о́е ржⷭ҇тво̀ твᲂѐ . и҆ сᲂгла́снѡ вᲂпїе́мъ тѝ , мᲂлѝ хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти , вᲂспѣва́ющимъ дᲂсто́йнѡ сла́вꙋ твᲂю̀ . крⷭ҇тᲂбоⷢ҇ . А҆́гньца и҆ па́стырѧ и҆ и҆зба́вителѧ , а҆́гница зрѧ́щи , на крⷭ҇тѣ̀ вᲂсклица́ше слезѧ́щи , ми́ръ ᲂу҆́бѡ ра́дꙋетсѧ прїе́млѧ тᲂбо́ю и҆збавле́нїе . ᲂу҆тро́ба же мᲂѧ̀ гᲂри́тъ зрѧ́щи твᲂѐ распѧ́тїе , є҆́же терпи́ши за милᲂсе́рдїе млⷭ҇ти дᲂлгᲂтерпѣли́ве гдⷭ҇и . млⷭ҇ти бе́здно , и҆ и҆сто́чниче неи҆счерпа́емыи , ᲂу҆милᲂсе́рдисѧ и҆ да́рꙋй грѣхо́въ ѡ҆ставле́нїе , и҆́же вѣ́рᲂю твᲂѧ̀ вᲂспѣва́ющимъ бжⷭ҇твенаѧ страда́нїѧ .

пѣ́снь , д҃ . і҆рмо́съ . Оу҆слы́шахъ гдⷭ҇и смᲂтре́нїѧ твᲂегѡ̀ та́инство , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . Ꙗ҆́кѡ а҆́гнѧ вᲂди́мо мч҃нче на же́ртвꙋ , ника́кᲂже прᲂвѣща̀ . влⷣцѣ свᲂемꙋ̀ пᲂдо́бѧсѧ є҆го́же ра́ди и҆ сме́рть преѡ҆би́дѣлъ є҆сѝ . Цѣлᲂмꙋ́дрїемъ ᲂу҆краша́емь , и҆ с̾ си́мъ живы́и , стрᲂга́нїѧ и҆ ра́ны тве́рдымъ ᲂу҆мо́мъ терпѣ̀ , врагѝ сави́не низ̾лᲂжи́лъ є҆сѝ . Плᲂтьски́ми твᲂи́ми ᲂу҆́ды , мч҃нче хрⷭ҇та̀ прᲂсла́вль . прїѧ́лъ є҆сѝ съ пра́ведными дх҃и , весе́лїе бжⷭ҇твенᲂе и҆ непᲂгиба́ющее . боⷢ҇ . Наслажда́ющїисѧ пречⷭ҇таѧ твᲂи́хъ дарᲂва́нїи , тебѣ̀ благᲂда́рственᲂе вᲂспѣва́емъ пѣ́нїе , вѣ́дꙋще тѧ̀ бж҃їю мт҃рь .

пѣ́снь , є҃ . і҆рмо́съ . Прᲂсвѣтѝ на́съ пᲂвелѣ́нїемъ сѝ гдⷭ҇и , и҆ мы́шцею высо́кᲂю , твᲂегѡ̀ ми́ра пᲂда́ждь на́мъ , є҆ди́не чл҃кᲂлю́бче . Тѧгᲂтꙋ̀ стрᲂга́ньми пло́ти твᲂеѧ̀ ѿло́жь , дш҃ꙋ ᲂу҆ѧсни́въ , в̾пери́лъ є҆сѝ бж҃їи сави́не , къ бжⷭ҇твенᲂмꙋ и҆ и҆́стиннᲂмꙋ наслажде́нїю . Да пи́щꙋ пᲂто́ка , и҆ нетлѣ́нїѧ дᲂбро́тꙋ ѡ҆брѧ́щеши пресла́вне , текꙋ́щꙋю ми́ра , ꙗ҆́вѣ ѡ҆плева́лъ є҆сѝ . боⷢ҇ . Оу҆мертвѝ чⷭ҇таѧ стрⷭ҇те́й мᲂи́хъ взыгра́нїѧ , тлѣ́нїѧ и҆збавлѧ́ющи мѧ̀ . и҆ без̾стра́стїе спасе́нїѧ мѝ пᲂдаю́щи .

пѣ́снь , ѕ҃ . і҆рмо́съ . Мᲂли́твꙋ прᲂлїю̀ ко́ гдⷭ҇ꙋ , и҆ тᲂмꙋ̀ вᲂз̾вѣщꙋ̀ печа́ль мᲂю̀ . ꙗ҆́кѡ ѕѡ́лъ дш҃а мᲂѧ̀ напо́лнисѧ , и҆ живо́тъ мо́й а҆́дꙋ прибли́жисѧ . и҆ мᲂлю́сѧ ꙗ҆́кѡ і҆ѡ́на , ѿ тлѝ бж҃е мо́й вᲂз̾веди́ мѧ . Ника́кᲂже ѡ҆ вре́менныхъ небре́гъ . ꙗ҆́кᲂже в̾ чꙋже́й пло́ти претерпѣ́лъ є҆сѝ ꙗ҆́звы , свѧза́нїѧ и҆ терза́нїѧ и҆ ж̾же́нїѧ , и҆ кᲂнчи́нꙋ бл҃же́ннꙋ прїе́мъ . ѿ хрⷭ҇та̀ вѣне́цъ сла́вы , сави́не ᲂу҆лꙋчи́лъ є҆сѝ . Во́дъ ꙗ҆́кѡ вᲂи́стинꙋ и҆спо́лнисѧ живо́тныхъ , хрⷭ҇то́ва цр҃кви . и҆з̾ глꙋбины̀ ꙗ҆́кᲂже рѣко́ю , тѧ̀ и҆сто́чника чꙋдесе́мъ ѡ҆бᲂгати́вшисѧ , ѡ҆брѣ́тши себѣ̀ би́сера сави́не мнᲂгᲂцѣ́нна . боⷢ҇ . И҆спра́вила є҆сѝ па́дшее сꙋщество̀ , твᲂи́мъ ржⷭ҇тво́мъ бцⷣе дв҃о . зижди́телѧ и҆ влⷣкꙋ ро́ждьши , на́ша не́мᲂщи пᲂне́сшаго . и҆ спа́сшаго ны̀ , ѿ тлѝ сме́ртныѧ стра́стїю сѝ .

пѣ́снь , з҃ . і҆рмо́съ . Дѣ́ти є҆вре́йскїѧ въ пещѝ , пᲂпра́вше и҆ пла́мень дерзнꙋ́вше , и҆ на́ рᲂсꙋ ѻ҆́гнь прело́жше вᲂпїѧ́хꙋ , бл҃гᲂслᲂве́нъ є҆сѝ гдⷭ҇и бж҃е во́ вѣки . Да сла́вꙋ нетлѣ́ннꙋю прїи́меши , сла́вꙋ ѡ҆плева́лъ є҆сѝ житїѧ̀ . сла́вы ра́ди бж҃їѧ питѣ́ѧсѧ въ мꙋ́кахъ , сави́не зᲂвы́и непреста́ннѡ , бж҃е бл҃гᲂслᲂве́нъ є҆сѝ . Ма́нїемъ бжⷭ҇твенымъ влⷣки , ѿве́ржесѧ без̾бо́жныхъ мерзᲂсте́й , бжⷭ҇твенꙋю ꙗ҆́вѣ и҆збра́въ мꙋ́дрᲂсть , сави́не пᲂѧ̀ непреста́ннѡ , бж҃е бл҃гᲂслᲂве́нъ є҆сѝ . боⷢ҇ . Спа́слъ є҆́сть ми́ра бцⷣе , ѿ ᲂу҆тро́бы твᲂеѧ̀ вᲂпло́щьсѧ сло́во бжⷭ҇твенᲂе . є҆́же пᲂчита́юще , пᲂе́мъ тѧ̀ вᲂпїю́ще , бл҃гᲂслᲂве́нъ пречⷭ҇таѧ пло́дъ твᲂегѡ̀ чре́ва .

пѣ́снь , и҃ . і҆рмо́съ . Мꙋсикі́йскимъ ѻ҆рга́нѡмъ сᲂгласѧ́щимъ , и҆ лю́демъ без̾числа̀ кла́нѧющимсѧ , тѣ́лꙋ сꙋ́щꙋ на мᲂле́бнѣмъ , трїѐ ѻ҆́трᲂцы пѣснᲂсло́вѧхꙋ , гдⷭ҇а по́йте , и҆ превᲂзнᲂси́те є҆гѡ̀ во́ вѣки . Прекриве́нъ бы́въ мꙋчи́тельскимъ сꙋро́вствᲂмъ , хрⷭ҇то́вᲂю же любо́вїю и҆спра́вленъ неѿе́млемѡ ѡ҆брѣ́те та́мѡ без̾стра́стїе , сави́не пᲂѧ̀ пѣ́снь гдⷭ҇ви , тѧ̀ превᲂзно́симъ во всѧ̀ вѣ́ки . Оу҆краси́сѧ мч҃нче вᲂз̾держа́нїемъ , ᲂу҆ѧсни́сѧ страда́ней лѣ́пᲂтᲂю . и҆ прᲂсїѧ́лъ є҆сѝ ꙗ҆́кᲂже ѕвѣзда̀ зᲂвꙋ́щимъ . по́йте гдⷭ҇а всѧ̀ дѣ́ла , и҆ превᲂзнᲂси́те є҆гѡ̀ во́ вѣки . боⷢ҇ . Дв҃ства прᲂсїѧ́ла є҆сѝ заре́ю . мы́сленагѡ бо сл҃нца ѻ҆́блакъ бы́сть мт҃и бж҃їѧ , ᲂу҆гаси́вшагѡ и҆́дᲂлѡмъ пе́щь гнѣ́ва . є҆го́же превᲂзно́симъ во всѧ̀ вѣ́ки .

пѣ́снь , ѳ҃ . і҆рмо́съ . Вᲂи́стинꙋ бцⷣꙋ тѧ̀ и҆спᲂвѣ́дающе , спасе́ннїи тᲂбо́ю дв҃це чⷭ҇таѧ , съ нбⷭ҇ными вѡ́и тѧ̀ велича́емъ . Оу҆стреми́всѧ любо́вїю всѣ́хъ бг҃а , рѣчны́ѧ вᲂлны̀ пᲂпра́лъ є҆сѝ . в̾ нетлѣ́нїѧ приста́нище дᲂсти́гъ , мꙋ́чениче сла́вне . Ѡ҆снᲂва́нїе вѣ́рꙋ и҆мѣ́ѧ сп҃са , прило́гъ без̾зако́нныхъ не ᲂу҆страши́сѧ . но и҆з̾ глꙋбины̀ к̾ тишинѣ̀ жи́зни ᲂу҆стреми́лсѧ є҆сѝ . боⷢ҇ . Ꙗ҆́кѡ стѣ́нꙋ тѧ̀ и҆ пᲂкро́въ , и҆ ꙗ҆́кѡ пред̾ста́тельницꙋ є҆ди́нꙋ чи́стаѧ и҆ спасе́нїе и҆мꙋ́ще , ѿ бѣ́дъ и҆ прегрѣше́ней прⷭ҇нѡ и҆збавлѧ́емсѧ .

<< Previous

Contents

Next >>