19 марта: свв. мчч. Хрисанфа и Дарии

МЦⷭ҇А ТОГО́ЖЕ ВЪ Ѳ҃І ДН҃Ь

ст҃ы́хъ мч҃нкъ хриса́нѳа и҆ да́рїи . =Ве́черъ , на гдⷭ҇и вᲂзва́хъ , стихѣ́ры . гла́съ , д҃ . поⷣ . да́лъ є҆сѝ зна́менїе . Бжⷭ҇твенагѡ разꙋмѣ́нїѧ ,꙳ прїе́мъ сїѧ́нїе ,꙳ прᲂсвѣти́лъ є҆сѝ ѻ҆́чи премꙋ́дре серде́чнѣи .꙳ и҆ пре́лести мра́къ ѿгна́лъ є҆сѝ смы́сленѡ ,꙳ и҆спᲂвѣ́далъ є҆сѝ хрⷭ҇та̀ ,꙳ пло́ть прїе́мша всѣ́хъ гдⷭ҇а .꙳ ѿ ню́дꙋ же ᲂу҆крѣплѧ́емь ,꙳ си́лᲂю дх҃а хриса́нѳе ,꙳ мꙋ́къ вы́ш̾ши ꙗ҆ви́сѧ прехва́льне . Вра́жїѧ пре́лести ,꙳ и҆ сласте́й раз̾жже́нїѧ ,꙳ ꙗ҆́кᲂже паꙋчи́нꙋ вмѣни́лъ є҆сѝ .꙳ во мра́чнѣ же затво́рѣ ста́въ ,꙳ бжⷭ҇твенымъ сїѧ́нїемъ ѡ҆зари́лсѧ є҆сѝ .꙳ и҆ бл҃гᲂво́нїѧ разꙋ́мнагѡ и҆спо́лнисѧ , пᲂсредѝ стᲂѧ̀ смра́да .꙳ приве́лъ є҆сѝ ꙗ҆́кѡ невѣ́стꙋ ᲂу҆крашенꙋ̀ и҆зрѧ́днѡ ,꙳ хрⷭ҇то́ви невѣ́стꙋ непᲂро́чнꙋ ,꙳ ѡ҆скверни́ти тѧ пᲂтща́вшꙋюсѧ . Оу҆ѧзви́сѧ жела́нїемъ ,꙳ сла́дкагѡ зижди́телѧ ,꙳ и҆ преле́стнагѡ без̾бо́жїѧ до кᲂнца̀ ᲂу҆клᲂни́сѧ .꙳ и҆ въ черто́гъ бжⷭ҇твеныи вмѣсти́сѧ ,꙳ въ невѣ́стившисѧ хрⷭ҇то́ви , мꙋче́нїи мно́гими тѣлесѐ .꙳ да́рїе великᲂи҆мени́таѧ ,꙳ бжⷭ҇твенѡ прїѧ́телище дх҃а .꙳ страда́льцемъ ᲂу҆дᲂбре́нїе ,꙳ и҆ дв҃амъ ᲂу҆краше́нїе . =сла́ва , и҆ ны́нѣ , боⷢ҇ . Не́мᲂщь и҆ раз̾слабле́нїе ,꙳ дв҃о мт҃и всенепᲂро́чнаѧ ,꙳ дш҃и мᲂе́й прелᲂжѝ в̾ крѣ́пᲂсть и҆ си́лꙋ ,꙳ стра́хᲂмъ и҆ любо́вїю твᲂри́ти ,꙳ и҆ дѣ́ѧти ѡ҆правда́нїѧ хрⷭ҇то́ва .꙳ ꙗ҆́кѡ да и҆збѣ́гнꙋ ѻ҆гнѧ̀ непᲂстᲂѧ́ннагѡ .꙳ и҆ наслѣ́дїе нбⷭ҇нᲂе ,꙳ и҆ жи́знь непрехᲂди́мꙋю ,꙳ тᲂбо́ю вᲂспрїимꙋ̀ веселꙋ́емь всегда̀ . крⷭ҇тᲂбоⷢ҇ . Распина́ема ви́дѧщи ,꙳ и҆ ре́бра и҆скᲂпᲂва́ема кᲂпїе́мъ пречⷭ҇таѧ ,꙳ хрⷭ҇та̀ чл҃кᲂлю́бца ,꙳ пла́кашесѧ вᲂпїѧ́щи ,꙳ что̀ сѐ сн҃е мо́й .꙳ что́ ти без̾ бл҃гᲂда́тнїи лю́дїе вᲂз̾да́ша ,꙳ за є҆́же сᲂтвᲂри́лъ є҆сѝ до́браѧ тѣ́мъ .꙳ и҆спѣши́ши мѧ̀ без̾ча́дствᲂвати вселюбе́зне .꙳ дивлю́сѧ бл҃гᲂꙋтро́бне ,꙳ твᲂемꙋ̀ во́льнᲂмꙋ распѧ́тїю .

На ᲂу҆́трени . ѻ҆́ба кано́на , во ѻ҆кта́и . и҆ ст҃ы́мъ , на д҃ . кано́нъ , є҆мꙋ́же краегране́сїе си́це : тѧ̀ златᲂсїѧ́ненъ , мꙋ́ченикѡмъ цвѣ́тъ пᲂчита́ю . твᲂре́нїе і҆ѡ́сифᲂво . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стᲂпа́ми дре́вле ше́ствᲂвавъ і҆зра́иль , крⷭ҇тᲂѡ҆бра́зно мѡѷсе́ѡвыма рꙋка́ма , а҆мали́кᲂвꙋ си́лꙋ в̾ пꙋсты́ни пᲂбѣди́лъ є҆́сть .

запѣ́в̾ : Ст҃і́и мч҃нцы хриса́нѳе и҆ да́рїе , мᲂли́те бг҃а ѡ҆ на́съ . Вѣнце́мъ па́че зла́та сїѧ́ющимъ , мч҃нче ᲂу҆краша́емъ . и҆ мꙋче́нїѧ сїѧ́ѧ дᲂбро́тами , влⷣцѣ пред̾стᲂи́ши ѡ҆ на́съ мᲂлѧ́сѧ , тебѣ̀ чтꙋ́щихъ дᲂстᲂсла́вне . Оу҆ѧзви́сѧ сла́дкимъ жела́нїемъ , мч҃нче зижди́телѧ свᲂегѡ̀ , и҆ кра́снаѧ ми́ра презрѣ́въ . си́лꙋ всю̀ по́далъ є҆сѝ свᲂегѡ̀ срⷣца хриса́нѳе , къ жела́емᲂмꙋ тѝ ᲂу҆се́рднѡ . Вѣ́рᲂю вᲂѡ҆рꙋ́жьсѧ , низ̾лᲂжи́лъ є҆сѝ мнᲂгᲂко́зненаго , тебѣ̀ прило́жшаго мч҃нче , же́ньскᲂю сла́стїю прельсти́ти . и҆ чистᲂтѣ̀ че́стенъ сᲂсꙋ́дъ хриса́нѳе бы́лъ є҆сѝ . боⷢ҇ . И҆́же є҆стество́мъ бжⷭ҇твенымъ неприкᲂснᲂве́нныи , прикᲂснᲂве́нъ мнѣ̀ ꙗ҆ви́сѧ , ѿ тебѐ дв҃о пло́ть прїе́мъ . є҆го́же да́рїѧ жела́ющи , терпѣли́внѡ пᲂстрада̀ , и҆ невѣ́стьски тᲂмꙋ̀ приведе́сѧ .

пѣ́снь , г҃ . і҆рмо́съ . Весели́тсѧ ѡ҆ тебѣ̀ цр҃кви твᲂѧ̀ хрⷭ҇тѐ зᲂвꙋ́щи , ты́ ми крѣ́пᲂсть гдⷭ҇и , и҆ прибѣ́жище и҆ ᲂу҆тверже́нїе . Зла́то и҆скꙋшено̀ , мꙋче́нїѧ ѻ҆гне́мъ ꙗ҆ви́сѧ . црⷭ҇кᲂе хриса́нѳе , нᲂсѧ̀ страда́нїемъ вᲂѡ҆браже́нїе . Виті́йскᲂе ѡ҆ста́вль глꙋмле́нїе , плени́цами ᲂу҆лᲂви́сѧ ᲂу҆чени́къ хриса́нѳе и҆́же ꙗ҆́вѣ тебѐ ᲂу҆мꙋдри́вшагѡ . Пᲂвинꙋ́сѧ рачи́телю ᲂу҆невѣ́стившемꙋ тѧ̀ хрⷭ҇тꙋ̀ всемꙋ́драѧ . честно́ю вѣ́рᲂю жела́нїе плᲂтьско́е ѡ҆ста́вльши . боⷢ҇ . Пло́тїю ро́ждьсѧ , и҆з̾ ᲂу҆тро́бы твᲂеѧ̀ дв҃о і҆с҃ъ чи́стаѧ , невѣ́стꙋ чи́стꙋ мч҃нцꙋ , себѣ̀ да́рїю ѡ҆брꙋча́етъ .

сѣда́ленъ . гла́съ , г҃ . Кра́снꙋю дᲂбро́тꙋ вᲂз̾желѣ́лъ є҆сѝ , и҆ ви́димыѧ дᲂбро́ты прете́клъ є҆сѝ . и҆ приве́лъ є҆сѝ хрⷭ҇то́ви , златы́ми вᲂи́стинꙋ слᲂвесы̀ твᲂи́ми , хриса́нѳе бл҃же́нне , да́рїю сла́внꙋю . страда́нїѧ претерпѣ́вшꙋю и҆ тᲂми́телѧ пᲂсра́мльшꙋю . с̾ не́ю же всѧ̀ ны̀ пᲂмина́й , вѣ́рᲂю сᲂверша́ющихъ па́мѧть ва́шꙋ .= сла́ва , и҆ ны́нѣ , боⷢ҇ . Недᲂвѣ́дᲂмо и҆ непᲂсти́жимо є҆́сть влⷣчце бг҃ᲂбл҃гᲂда́тнаѧ , сᲂдѣ́ѧннᲂе в̾ тебѣ̀ стра́шнᲂе бж҃їе та́инство . непристꙋ́пнаго бо заче́нши рᲂдила̀ є҆сѝ , пло́тїю ѡ҆блᲂже́на ѿ чи́стыхъ крᲂве́й твᲂи́хъ . є҆го́же всегда̀ чⷭ҇таѧ , ꙗ҆́кѡ сн҃а свᲂегѡ̀ мᲂлѝ , спастѝ дш҃а на́ша . крⷭ҇тᲂбоⷢ҇ . П=ᲂно́снꙋю ще́дре сме́рть . распѧ́тїемъ во́лею претерпѣ́лъ є҆сѝ . ꙗ҆́же ро́ждьшаѧ тѧ̀ хрⷭ҇тѐ зрѧ́щи ᲂу҆ѧзвлѧ́шесѧ . сеѧ̀ ᲂу҆́бѡ мᲂльба́ми , за млрⷭ҇дїе млⷭ҇ти твᲂеѧ̀ . є҆ди́не пребл҃гі́и и҆ чл҃кᲂлю́бче гдⷭ҇и , ᲂу҆ще́дри и҆ спасѝ ми́ръ , взе́млѧи сегѡ̀ грѣхѝ .

пѣ́снь , д҃ . і҆рмо́съ . Вᲂз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свᲂе́мъ , дᲂсто́йнѡ взыва́ющи , сла́ва си́лѣ твᲂе́й гдⷭ҇и . Дх҃а ѡ҆блиста́ющаѧ зарѧ̀ , чи́стᲂе срⷣце твᲂѐ , всего̀ свѣ́тла тѧ мч҃нче сᲂдѣ́лаше , ᲂу҆се́рднѡ зᲂвꙋ́ща . сла́ва си́лѣ твᲂе́й гдⷭ҇и . И҆стка́ннᲂю тѧ̀ бжⷭ҇твеныѧ бл҃гᲂда́ти свы́ше , твᲂре́цъ ѡ҆блечѐ нетлѣ́ннᲂю ри́зᲂю , непᲂро́чнѡ сᲂблю́дша тѣ́ло бл҃же́нне , и҆ ꙗ҆́кѡ пᲂбѣди́телѧ вѣнча́лъ є҆́сть . До́блестїю срⷣца ѿтрѧсѐ сла́сти тѣле́сныѧ , дᲂбро́ты неи҆зрече́нныѧ бжⷭ҇твенѡ наслажда́емь . и҆ ра́дꙋѧсѧ про́йде мꙋче́нїѧ свᲂегѡ̀ по́двигъ . Ѡ҆бᲂжи́сѧ прича́стїемъ страстᲂно́сице , бг҃ᲂтво́рнымъ сᲂедине́нїемъ . и҆ в̾ нбⷭ҇ныи всели́сѧ черто́гъ ра́дꙋющисѧ , ꙗ҆́кѡ непᲂро́чна невѣ́ста влⷣки всеѧ̀ тва́ри . боⷢ҇ . Сᲂблюде́ тѧ дв҃ꙋ ꙗ҆́кѡ пре́жде ржⷭ҇тва̀ , и҆ по ржⷭ҇твѣ̀ чⷭ҇таѧ . и҆з̾ тебѐ вᲂплᲂти́сѧ недᲂвѣ́дᲂмыи , да́рїю мч҃нцꙋ невѣ́стꙋ себѣ̀ приведѐ .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рᲂю вᲂспѣва́ющїѧ тѧ . Прелᲂже́нъ ᲂу҆́мъ ѿ ве́щныхъ твᲂрѧ̀ . вѧ́жемъ , ѕло́бꙋ вра́жїю страстᲂно́се , разᲂри́лъ є҆сѝ бл҃же́нне . Чистᲂтѣ̀ рачи́тель бы́въ сщ҃е́ненъ . претвᲂри́лъ є҆сѝ дв҃ы , ѻ҆гнепа́льнꙋю любо́вь , ко́ гдⷭ҇ꙋ прехва́льне . Пᲂве́ржена зрѧ̀ , и҆ нᲂга́ма пᲂпира́ема мꙋчи́телѧ , ра́дᲂваннᲂю мы́слїю , влⷣкꙋ пребл҃же́нне велича́ше . боⷢ҇ . Кто̀ мо́жетъ твᲂѐ сказа́ти та́инство , ѽ пречⷭ҇таѧ . бг҃а сло́ва , па́че ᲂу҆ма́ бо и҆ сло́ва , сꙋгꙋ́ба є҆стество́мъ рᲂдила̀ є҆сѝ .

пѣ́снь , ѕ҃ . і҆рмо́съ . Пᲂжрꙋ́ти со́ гласᲂмъ хвале́нїѧ гдⷭ҇и , цр҃кви вᲂпїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Пᲂю́ща тѧ влⷣкꙋ всѣ́хъ пресла́вне , свѣ́тъ с̾ нб҃сѐ всю́дꙋ тѧ ѡ҆крꙋжи́въ прᲂсвѣтѝ . затвᲂре́на в̾ те́мнѣ жили́щи хриса́нѳе . Ри́мъ тѧ̀ мꙋче́нїѧ чистᲂто́ю ᲂу҆кра́шена , златᲂви́днꙋ ꙗ҆́кᲂже ѕвѣздꙋ̀ стѧжа́въ мч҃нче . ᲂу҆краша́етсѧ по́двиги , и҆ бжⷭ҇твеными тѝ хриса́нѳе чꙋдесы̀ . Красна̀ дᲂбро́тᲂю же и҆ сла́вᲂю , мч҃нце да́рїѧ дв҃аѧ . ᲂу҆ѧзви́вшисѧ слᲂвесы̀ , кра́снᲂмꙋ ᲂу҆невѣ́стиласѧ є҆сѝ , бᲂлѣ́зньми всѧ́цѣми тѣле́сными . боⷢ҇ . Мла́да тѧ̀ ꙗ҆́кѡ дѣ́тища , дв҃а рᲂдѝ превѣ́чнаго сло́ва . є҆го́же жела́юще дв҃цы , сею̀ в̾ слѣ́дъ тебѣ̀ всѣ́хъ цр҃ю невѣ́стски преведо́шасѧ .

пѣ́снь , з҃ . і҆рмо́съ . Впещѝ а҆враа́мскїѧ си дѣ́ти перси́дстѣй , любо́вїю бл҃гᲂвѣ́рїѧ па́че не́жели пла́менемъ ѡ҆палѧ́еми взыва́хꙋ , бл҃гᲂслᲂве́нъ є҆сѝ въ цр҃кви сла́вы твᲂеѧ̀ гдⷭ҇и . Свѣ́тъ мч҃никѡмъ златᲂви́денъ ты̀ бы́сть . и҆ сᲂбо́ръ мч҃нкъ приве́лъ є҆сѝ хрⷭ҇тꙋ̀ , бжⷭ҇твеными слᲂвесы̀ твᲂи́ми и҆ чꙋдесы̀ , мч҃нче бг҃ᲂпᲂсти́жне . с̾ ни́ми же вѣ́рнѡ тѧ̀ ны́нѣ ᲂу҆бл҃жа́емъ . Въ жили́щи скве́рнѣ затвᲂре́на на́га бл҃же́нне , бжⷭ҇твеными бл҃гᲂꙋха́нїи , сла́вᲂю свѣтᲂви́днᲂю і҆с҃ъ прᲂсвѣща́етъ тѧ̀ . є҆го́же чи́стᲂю мы́слїю премꙋ́дро вᲂз̾люби́лъ є҆сѝ . Звѣ́рѧ сᲂблюда́ющей тѝ дв҃ство хрⷭ҇то́съ пᲂсла̀ . па́гꙋбꙋ нечести́вымъ твᲂрѧ́ща ꙗ҆́вѣ , пᲂю́щей тебѣ̀ всехва́льнаѧ . бл҃гᲂслᲂве́нъ є҆сѝ в̾ цр҃кви сла́вы твᲂеѧ̀ гдⷭ҇и . боⷢ҇ . По сꙋществꙋ̀ бжⷭ҇твенᲂмꙋ сы́и неѡ҆пи́санъ , на лᲂнѣ̀ твᲂе́мъ дв҃цѣ . бы́сть по на́съ пло́тїю ѡ҆писꙋ́емь . бл҃гᲂслᲂве́на ты̀ въ жена́хъ пренепᲂро́чнаѧ влⷣчце .

пѣ́снь , и҃ . і҆рмо́съ . Рꙋ́цѣ распрᲂсте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ ᲂу҆гаси́ша дᲂбрᲂдѣ́телїю пᲂѧ́савшесѧ , и҆́же бл҃гᲂче́стїѧ люби́тели ѻ҆́трᲂцы взыва́юще , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Тве́рдᲂстїю бл҃же́нне по́мысла , прᲂти́вѧсѧ сꙋемꙋ́дренᲂмꙋ стрᲂга́нїѧ претерпѣ́лъ є҆сѝ тѣле́снаѧ . и҆ свѣща́ми ѡ҆палѧ́емь , неѡ҆пали́мь пребы́сть с̾ дѣтьмѝ пᲂѧ̀ хриса́нѳе . бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Премꙋ́дрᲂстїю ᲂу҆кра́шенъ хрⷭ҇то́вᲂю , ѡ҆бꙋи́лъ є҆сѝ немꙋ́дрыхъ шата́нїе . и҆ ᲂу҆ма̀ льсти́ваго пᲂсрами́лъ є҆сѝ , є҆́ввꙋ прельсти́вшаго плѣни́въ бл҃гᲂче́стнѡ сегѡ̀ ѻ҆рꙋ́жїѧ мꙋ́дрѣ , и҆ приве́лъ є҆сѝ невѣ́стꙋ бг҃ᲂви , и҆збра́ннꙋ вѣ́ры ра́ди . Сᲂвᲂкꙋпле́нїемъ дꙋшѝ , плᲂтьска́го и҆збѣжа́сте сᲂвᲂкꙋпле́нїѧ . чи́стаѧ сᲂсꙋ́да вседержи́телю ꙗ҆ви́стасѧ , и҆ въ цр҃кᲂвь принесо́стасѧ нбⷭ҇нꙋю страда́льца , вᲂпїю́ща хрⷭ҇то́ви . бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Во́лею бж҃їею плᲂтьскі́ѧ стра́сти ᲂу҆держа́вше . ѻ҆́гнь пᲂпали́ша мꙋ́камъ , хриса́нѳъ и҆ да́рїѧ рᲂсо́ю дх҃а . и҆ вѣнца̀ жи́зни ᲂу҆лꙋчи́ста пᲂю́ще . бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . боⷢ҇ . Ꙗ҆́кѡ шипо́къ пᲂсредѝ те́рнїѧ жите́йскагѡ пречⷭ҇таѧ , бг҃ъ ѡ҆брѣ́тъ тѧ̀ нескве́рнꙋю , всели́сѧ во ᲂу҆тро́бꙋ твᲂю̀ чⷭ҇тꙋю . и҆ бл҃гᲂꙋха́нїѧ та́йнагѡ , ми́ръ и҆спо́лнилъ є҆́сть , взыва́ющїи є҆мꙋ̀ . бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а .

пѣ́снь , ѳ҃ . і҆рмо́съ . Ка́мень нерꙋкᲂсѣ́чныѧ гᲂры̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , сᲂвᲂкꙋпи́въ раз̾стᲂѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Сщ҃еннᲂсло́вѧщꙋ бжⷭ҇твенаѧ , бжⷭ҇твенᲂе во́инство тебѣ̀ прилᲂжи́сѧ , льстѝ скве́рныѧ и҆зба́вльсѧ . и҆ мече́мъ непᲂро́чны же́ртвы , на́съ ра́ди ꙗ҆́кѡ ѻ҆вча́ти , мч҃нцы пᲂже́ршемꙋ принесо́шасѧ . Ꙗ҆ви́стесѧ пᲂсредѝ ѕвѣре́й , ꙗ҆́кᲂже а҆́гньцы страстᲂте́рпцы . вᲂплᲂще́нїе прᲂпᲂвѣ́дающе бжⷭ҇твенᲂе , и҆злїѧ́вшагᲂсѧ да́же и҆ до́ плᲂти . и҆ бᲂлѣ́зньми небᲂлѣ́зненꙋю кᲂнчи́нꙋ , бжⷭ҇твенѣ наслѣ́дᲂвасте . Дне́сь свѣ́тлѡ пра́зднꙋетъ всѧ́къ гра́дъ и҆ страна̀ . ри́мъ сᲂзыва́ющїи гра́дъ , бжⷭ҇твеныѧ стра́сти и҆ бᲂре́нїѧ , ꙗ҆́кᲂже ѻ҆бѣ́дъ невеще́ственъ , предлага́ѧ ва́ю ст҃а́ѧ . Взѧ́ти бы́сте къ без̾мѣ́рнѣй сла́вѣ , хриса́нѳе мч҃нче и҆ да́рїе . и҆ вседержи́тельнᲂмꙋ сло́вꙋ , вѣнцено́сцы в̾кꙋ́пѣ пред̾стᲂитѐ , ѡ҆ на́съ мᲂлѧ́щесѧ , ᲂу҆бл҃жа́ющихъ ва́съ всегда̀ . боⷢ҇ . Диви́тсѧ по́мыслъ и҆ срⷣце , пᲂмышлѧ́ющихъ твᲂѐ ржⷭ҇тво̀ , непᲂстижи́мᲂе ѻ҆трᲂкᲂви́це . бг҃а бо сло́ва рᲂдила̀ є҆сѝ , и҆збавлѧ́ющагѡ тᲂбо́ю всѧ́кїѧ бѣды̀ чтꙋ́щїѧ тѧ̀ .

<< Previous

Contents

Next >>