2 марта: сщмч. Феодота Киринейска

МЦⷭ҇А ТОГО́ЖЕ ВО В҃ ДН҃Ь

ст҃а́гѡ сщ҃еннᲂмч҃нка ѳеᲂдѡ́та кирине́йска . =и҆ и҆́же во ст҃ы́хъ ѻ҆ц҃а на́шегѡ а҆рсе́нїѧ є҆пкⷭ҇па тѳерска́гѡ . слꙋ́жба є҆мꙋ̀ пи́сана по се́й слꙋ́жбѣ . Ве́черъ , на гдⷭ҇и вᲂзва́хъ , стихѣ́ры . гла́съ , д҃ . поⷣ . ꙗ҆́кѡ до́блѧ . Сщ҃е́нникъ сщ҃е́ннѣйшїи ,꙳ цр҃кви ѡ҆снᲂва́нїе ,꙳ сто́лпъ непᲂкᲂлѣби́мъ ,꙳ ꙗ҆ви́лсѧ є҆сѝ всесла́вне .꙳ чꙋдᲂтво́рецъ и҆́стиненъ .꙳ бж҃їе да́нїе сла́вне ,꙳ и҆ свѣти́льникъ всесвѣ́телъ сщ҃е́нно бы́лъ є҆сѝ .꙳ и҆ ра́й живо́тнагѡ дре́ва ,꙳ пᲂсредѝ стѧжа́въ і҆с҃а жизнᲂда́вца .꙳ сщ҃еннᲂмꙋ́чениче ѳеᲂдѡ́те . Вᲂлꙋ́ѧми жи́лами бїе́мь ,꙳ и҆ на древесѣ́хъ прᲂтѧза́емь .꙳ и҆ го́рькѡ стрꙋ́жемь дᲂстᲂчꙋ́дне ,꙳ и҆ в̾ темни́цѣ затвᲂрѧ́емъ ,꙳ и҆ гвᲂздьмѝ по нᲂзѣ̀ твᲂѝ пригвᲂжде́нъ лю́то .꙳ на ѻ҆́дръ раз̾жже́нъ пᲂлага́емь ,꙳ непрело́женъ ꙗ҆ви́лсѧ є҆сѝ ,꙳ и҆́же во всѣ́хъ ᲂу҆крѣплѧ́ющаго тѧ̀ сла́ва ,꙳ сщ҃еннᲂмч҃нче ѳеᲂдѡ́те . Жи́лами свᲂи́хъ по́двигъ ,꙳ врага̀ придави́въ .꙳ и҆ сегѡ̀ си́лꙋ пᲂбᲂри́лъ є҆сѝ .꙳ и҆ мꙋ́жествᲂвавъ свѣ́тлѡ ,꙳ в̾ вы́шнѣмъ црⷭ҇твїи вѣнцено́сецъ живе́ши ,꙳ прᲂсвѣще́нїѧ спᲂдо́бльсѧ ,꙳ и҆ красᲂты̀ пра́зднꙋющихъ .꙳ и҆ мо́лишисѧ чтꙋ́щїѧ тѧ̀ спастѝ ,꙳ красᲂта̀ мꙋ́ченикѡмъ ѳеᲂдѡ́те . =сла́ва , и҆ ны́нѣ , боⷢ҇ . Ѡ҆сꙋжде́нїѧ и҆зба́ви прест҃а́ѧ бг҃ᲂневѣ́сто ,꙳ и҆ лю́тыхъ прегрѣше́нїи ,꙳ смире́ннꙋю мѝ дш҃ꙋ ,꙳ и҆ сме́рти и҆з̾мѣнѝ мᲂли́твами сѝ .꙳ и҆ да́рꙋй ѡ҆правда́нїе пᲂлꙋчи́ти ,꙳ въ де́нь и҆спыта́нїѧ ,꙳ є҆́же пᲂлꙋчи́ша ст҃ы́хъ сᲂбо́ри .꙳ пᲂкаѧ́нїемъ ѡ҆чище́на мѧ пре́жде кᲂнца̀ пᲂкажѝ ,꙳ и҆ сле́зными и҆з̾лїѧ́нїи . крⷭ҇тᲂбоⷢ҇ . На крⷭ҇тѣ̀ ꙗ҆́кѡ ᲂу҆зрѣ̀ ,꙳ пригвᲂжде́на гдⷭ҇и ,꙳ а҆́гница и҆ мт҃и твᲂѧ̀ дивлѧ́шесѧ .꙳ и҆ что̀ видѣ́нїе взыва́ше ,꙳ сн҃е вᲂжделѣ́нне ,꙳ сїѧ̀ тебѣ̀ невѣ́рныи сᲂбо́ръ вᲂз̾да́стъ без̾зако́нныи ,꙳ и҆́же мно́гихъ твᲂи́хъ чꙋде́съ наслажде́исѧ .꙳ но сла́ва не и҆з̾рече́ннᲂмꙋ тѝ ,꙳ сᲂше́ствїю влⷣко .

На ᲂу҆́трени . ѻ҆́ба кано́на , во ѻ҆кта́и . и҆ ст҃ы́мъ , на д҃ . кано́нъ , є҆мꙋ́же краегране́сїе си́це : бж҃їе да́нїе бы́сть въ лѣпᲂтꙋ̀ бл҃же́нне . твᲂре́нїе і҆ѡ́сифᲂво . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стᲂпа́ми дре́вле ше́ствᲂвавъ і҆и҃ль , крⷭ҇тᲂѡ҆бра́зно мѡѷсе́ѡвыма рꙋка́ма , а҆мали́кᲂвꙋ си́лꙋ в̾ пꙋсты́ни пᲂбѣди́лъ є҆́сть .

запѣ́въ : Ст҃ы́и сщ҃еннᲂмч҃нче ѳеᲂдѡ́те , мᲂлѝ бг҃а ѡ҆ на́съ .= Бг҃ъ твᲂѧ̀ и҆́же к̾ немꙋ̀ движе́нїѧ , мч҃нче и҆спра́ви . є҆мꙋ́же чⷭ҇тны́ѧ сᲂблю́дъ за́пᲂвѣди , і҆єра́рхъ бы́лъ є҆сѝ . и҆ мꙋче́нїѧ кро́вїю ѡ҆зари́сѧ ꙗ҆вле́ннѣ . Бжⷭ҇твенѣ и҆ бл҃гᲂче́стнѣ по́живъ , пло́ти движе́нїѧ , по́стническими ᲂу҆мертви́въ жи́тельствы , и҆ живо́тъ прїе́мъ . і҆єра́рхѡмъ ᲂу҆дᲂбре́нїе , мч҃нкѡмъ и҆спᲂлне́нїе . Все́льсѧ в̾ премꙋ́дрᲂе срⷣце твᲂѐ дх҃ъ ст҃ы́и , ѿ пеле́нъ прпⷣбне . пра́ваѧ мл҃тва тѧ̀ и҆ смире́на , і҆єра́рха бжⷭ҇твена , мч҃нче пᲂказа̀ ѳеᲂдѡ́те . =боⷢ҇ . Бѧ́ше пᲂрабᲂще́но пе́рвїе пре́лестїю чⷭ҇таѧ , чл҃ческᲂе є҆стество̀ лꙋка́вно . хрⷭ҇та́ же ро́ждьши тѝ , свᲂбо́дꙋ ᲂу҆лꙋчѝ , велемꙋ́дренѡ тѧ̀ сла́вѧщее .

пѣ́снь , г҃ . і҆рмо́съ . Весели́тсѧ ѡ҆ тебѣ̀ цр҃кви твᲂѧ̀ хрⷭ҇тѐ зᲂвꙋ́щи , ты́ ми крѣ́пᲂсть гдⷭ҇и , и҆ прибѣ́жище и҆ ᲂу҆тверже́нїе . Слеза́ми твᲂи́хъ вᲂз̾дыха́нїй , и҆ кро́вными пᲂто́ки , ᲂу҆гаси́лъ є҆сѝ пре́лести лю́тᲂе ᲂу҆́глїе , мꙋ́чениче ст҃лю ѳеᲂдѡ́те . Житїѐ твᲂѐ чи́стᲂе , пᲂказа́въ сщ҃еннᲂдѣ́телѧ бжⷭ҇твена , и҆ и҆́стинна свидѣ́телѧ , тѧ̀ страсте́мъ хрⷭ҇то́вымъ сᲂдѣ́ла . Пᲂсредѝ сꙋди́ща стᲂѧ̀ , и҆ ᲂу҆ѧзвлѧ́емь тѧ́жкими ра́нами . хрⷭ҇то́ва и҆́мене мч҃нче не ѿве́ржесѧ ѳеᲂдѡ́те . боⷢ҇ . И҆з̾врачꙋ́й ми ᲂу҆́мъ , и҆знемо́гшїи прило́ги пречⷭ҇таѧ , лꙋка́вагѡ ѕмїѧ̀ , и҆ грѣхо́ви рабо́тающїи .

сѣда́ленъ . гла́съ , д҃ . Сщ҃е́ннїѧ ѻ҆де́ждꙋ свѣтлѣ́йшꙋ , крᲂве́й твᲂи́хъ ѡ҆мᲂче́ньми сᲂдѣ́лалъ є҆сѝ . на нб҃са̀ всели́сѧ ѳеᲂдѡ́те , ви́дѧ є҆го́же в̾желѣ́лъ є҆сѝ , чи́стᲂю мы́слїю . тѣ́мже тѝ сла́вимъ всечестнꙋ́ю па́мѧть , и҆ взыва́емъ , пᲂмѧнѝ на́съ , съ дерзнᲂве́нїемъ къ бг҃ꙋ пред̾стᲂѧ̀ .= сла́ва , и҆ ны́нѣ , боⷢ҇ . Нечи́стыхъ по́мыслъ мᲂи́хъ мно́жество , и҆ без̾мѣ́стныхъ мы́слей ѡ҆бꙋрева́нїѧ , кто̀ и҆зрещѝ мо́жетъ всенепᲂро́чнаѧ . настᲂѧ́нїѧ же беспло́тныхъ вра́гъ мᲂи́хъ кто̀ и҆спᲂвѣ́сть , и҆ си́хъ ѕло́бꙋ . но твᲂе́ю мᲂльбо́ю бл҃га́ѧ , си́хъ мѝ всѣ́хъ и҆збавле́нїе да́рꙋй . крⷭ҇тᲂбоⷢ҇ . И҆́=же ѿ без̾нача́льнагѡ ѻ҆ц҃а рᲂжде́на , ꙗ҆́же на пᲂслѣ́дᲂкъ тѧ̀ пло́тїю ро́ждьшаѧ , на крⷭ҇тѣ̀ ви́сима зрѧ́щи хрⷭ҇тѐ , ᲂу҆вы̀ мнѣ̀ вᲂз̾желѣ́нне і҆с҃е взыва́ше . ка́кѡ сла́вимыи ꙗ҆́кѡ бг҃ъ ѿ а҆́нг҃лъ , ѿ без̾зако́нныхъ нн҃ѣ чл҃къ , сн҃е хᲂтѧ̀ распѧ́тсѧ . пᲂю́ тѧ дᲂлгᲂтерпѣли́ве .

пѣ́снь , д҃ . і҆рмо́съ . Вᲂз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свᲂе́мъ , дᲂсто́йнѡ взыва́ющи , сла́ва си́лѣ твᲂе́й гдⷭ҇и . Сᲂкрꙋша́емѡ тѣ́ло твᲂѐ ра́нами , по́мыслы твердѣ́йша . и҆ вᲂи́стинꙋ мꙋ́ченика крѣпча́йша сᲂдѣ́лᲂваше . пᲂю́ща сла́ва си́лѣ твᲂе́й гдⷭ҇и . Распалѧ́емь любо́вїю влⷣчнею , ꙗ҆́же ѿ ра́нъ терпѧ́ше бᲂлѣ́зни лютѣ́йшаѧ . ꙗ҆́кᲂже и҆но́мꙋ стра́ждꙋщꙋ , са́мъ пребыва́ше , вели́кїи въ мч҃нцѣхъ ѳеᲂдѡ́те . Претерпѣ́лъ є҆сѝ мꙋ́ки бг҃ᲂмꙋ́дре ѻ҆́ч҃е , бесѣ́дꙋѧ тѣлесѝ . вᲂз̾даѧ́нїѧ бо пребыва́юща ви́дѧ ᲂу҆ма̀ чистᲂто́ю , ѡ҆блегча́юща бᲂлѣ́зни твᲂѧ̀ . боⷢ҇ . Свѣтлѣ́йшаѧ пᲂла́то влⷣки , прест҃а́ѧ бцⷣе , хра́мы на́съ пᲂкажѝ ст҃о́мꙋ дх҃ꙋ , в̾ хра́мѣ твᲂе́мъ ст҃ѣ́мъ , хвалꙋ̀ гдⷭ҇ви принᲂсѧ́щихъ .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рᲂю вᲂспѣва́ющїѧ тѧ . Вᲂз̾нᲂша́емь мꙋ́дре на́древо ѳеᲂдѡ́те , претерпѣва́ше тве́рдѡ , растерза́нїѧ пло́ти свᲂеѧ̀ . вельмѝ ᲂу҆дивлѧ́емь є҆сѝ . Ви́симь , стрᲂга́нїѧ терпѧ́ше тѣле́снаѧ ѳеᲂдѡ́те . влⷣкꙋ ᲂу҆крѣплѧ́ющагѡ и҆мѣ́ѧи , вѣ́рᲂю тѧ̀ ᲂу҆твержа́юща . Кро́вьными ѡ҆мᲂче́ньми , ѡ҆багри́въ ѳеᲂдѡ́те бл҃же́нне ѻ҆де́ждꙋ свᲂю̀ ѡ҆сщ҃е́ннꙋю . свѣтлѣ́йшꙋ пᲂказа́лъ є҆сѝ . боⷢ҇ . Зачала̀ є҆сѝ бг҃а , бы́вша чл҃ка ѽ влⷣчце . сегѡ̀ ра́ди ро́дᲂве рᲂдѡ́въ , тѧ̀ непреста́ннѡ ᲂу҆блажа́емъ .

пѣ́снь , ѕ҃ . і҆рмо́съ . Пᲂжрꙋ́ти со́ гласᲂмъ хвале́нїѧ гдⷭ҇и , цр҃кви вᲂпїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Всаже́нъ бы́сть в̾ темни́цꙋ , ꙗ҆́кᲂже ѕлᲂдѣ́й ѳеᲂдѡ́те . храни́тель сы́и бжⷭ҇твенымъ влⷣки сла́вне пᲂвелѣ́нїемъ . и҆́же бжⷭ҇твенᲂе твᲂѐ пра́зднество вельмѝ ᲂу҆ѧсни́вшагѡ . Стᲂѧ́ше пᲂсредѝ сꙋди́ща непра́ведно сꙋди́мъ , и҆ ѡ҆сꙋжда́ѧ чл҃ки без̾зако́ннꙋющаѧ всꙋ́е . и҆ пред̾пᲂчита́ющаѧ непра́веднаго ст҃лю бг҃ᲂмꙋ́дре , па́че пра́веднаго . Вᲂлны̀ свирѣ́пыхъ мꙋ́къ раз̾рꙋши́лъ є҆сѝ , ꙗ҆́кᲂже нѣ́кїи ка́мень всеблаже́нне . вᲂз̾ше́дъ вᲂсхᲂжде́нїемъ твᲂегѡ̀ срⷣца , к̾ ка́меню краеꙋго́льнᲂмꙋ хрⷭ҇тꙋ̀ бг҃ꙋ . боⷢ҇ . Все́льсѧ в̾ чре́во твᲂѐ хрⷭ҇то́съ бг҃ъ на́шъ , и҆́же в̾ чл҃цѣхъ живꙋ́щїи грѣ́хъ пречⷭ҇таѧ и҆зганѧ́етъ . и҆ сво́йствены себѣ̀ , чл҃кᲂлюбе́зно сᲂдѣва́етъ .

пѣ́снь , з҃ . і҆рмо́съ . Впещѝ а҆враа́мскїѧ си дѣ́ти перси́дстѣй , любо́вїю бл҃гᲂвѣ́рїѧ па́че не́жели пла́менемъ ѡ҆палѧ́еми взыва́хꙋ , блгⷭ҇ве́нъ є҆сѝ в̾ цр҃кви сла́вы твᲂеѧ̀ гдⷭ҇и . Бжⷭ҇твенᲂю ѻ҆́ч҃е , распалѧ́емь любо́вїю дх҃а , на ѻ҆́дръ раз̾жже́нъ ве́сь вᲂз̾ле́гъ , не ѡ҆пали́мь пребы́сть . бл҃гᲂслᲂве́нъ є҆сѝ бж҃е мо́й зᲂвы́и гдⷭ҇и . Ꙗ҆́кᲂже и҆но́мꙋ са́мъ пребыва́ѧ стра́ждꙋщꙋ . ве́сь бо ᲂу҆мо́мъ бл҃же́нне к̾ бг҃ꙋ прише́дъ . рѣ́занїѧ же и҆ ж̾же́нїѧ , ты̀ небре́глъ є҆сѝ , нечꙋ́вствꙋѧ хрⷭ҇то́вымъ манᲂве́нїемъ . Премꙋ́дрᲂстїю слᲂве́съ , без̾слᲂве́сїѧ сꙋ́щихъ бл҃же́нне и҆спо́лнь , пᲂсредѝ сꙋди́ща ѡ҆бличи́лъ є҆сѝ прᲂѧвле́ннѡ ѕлᲂче́стїемъ недꙋ́гᲂвавша . и҆ сᲂтво́ршагѡ бѣсо́вскїѧ па́че и҆ и҆зво́ливша и҆стꙋка́нны . боⷢ҇ . Съ вы́шнимъ ликᲂстᲂѧ́нїемъ , всѝ мт҃и бж҃їѧ ра́дꙋисѧ тебѣ̀ зᲂве́мъ . ѡ҆дш҃евле́нᲂе нб҃о , и҆ пресла́внаѧ пᲂла́то , и҆ прⷭ҇то́лѣ ѻ҆́гненыи . на не́мже хрⷭ҇то́съ пло́тїю пᲂчѝ .

пѣ́снь , и҃ . і҆рмо́съ . Рꙋ́цѣ распрᲂсте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ ᲂу҆гаси́ша дᲂбрᲂдѣ́телїю пᲂѧ́савшесѧ , и҆́же бл҃гᲂче́стїѧ люби́тели ѻ҆́трᲂцы взыва́юще , блгⷭ҇ви́те всѧ̀ дѣ́ла гдⷭ҇нѧ гдⷭ҇а . По́двиги твᲂи́ми врагꙋ̀ прᲂтивлѧ́ѧсѧ мч҃нче ѳеᲂдѡ́те , гвᲂздьми́ бо сла́вне в̾ но́гꙋ пригвᲂжде́нъ , и҆дꙋ́щею к̾ црⷭ҇твꙋ нбⷭ҇нᲂмꙋ стезе́ю ше́ствᲂвалъ є҆сѝ . бл҃гᲂслᲂви́те пᲂѧ̀ дѣ́ла гдⷭ҇нѧ гдⷭ҇а . Прᲂпᲂвѣ́даѧ бг҃а на́ землю прише́дша , и҆ бжⷭ҇твеными страстьмѝ стра́сть всепа́гꙋбнꙋю разрꙋ́шшаго . стра́сть бжⷭ҇твенꙋю и҆ бл҃же́ннꙋю пᲂказа́лъ є҆сѝ пло́тїю , вᲂпїѧ̀ ѳеᲂдѡ́те , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Кро́вными ка́плѧми сщ҃е́нныхъ ᲂу҆че́нїи тече́нїемъ , вѣ́рнымъ напᲂи́лъ є҆сѝ срⷣца̀ бл҃гᲂда́тїю премꙋ́дре . и҆ прᲂзѧба́ти ᲂу҆стро́илъ є҆сѝ , дѣ́лателю бл҃ги́мъ бжⷭ҇твена разꙋмѣ́нїѧ . є҆мꙋ́же вᲂпїе́мъ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . боⷢ҇ . Скве́рны ѡ҆чи́стила є҆сѝ всѧ́кїѧ , є҆стество̀ чл҃ческᲂе пречⷭ҇таѧ , нбⷭ҇ныи ро́ждьши до́ждь , чл҃ка бы́вша . и҆ но́вы сᲂдѣ́ла на́съ ѡ҆бетша́вшїѧ чи́стаѧ , вᲂпїю́щихъ , всѧ̀ дѣ́ла бл҃гᲂслᲂви́те гдⷭ҇нѧ гдⷭ҇а .

пѣ́снь , ѳ҃ . і҆рмо́с̾ . Ка́мень нерꙋкᲂсѣ́чныѧ гᲂры̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , сᲂвᲂкꙋпи́въ раз̾стᲂѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . И҆сцѣле́нїѧ и҆стᲂча́етъ всѧ́ка , мᲂще́й ра́ка сщ҃е́ннагѡ па́стырѧ , и҆ стра́сти ᲂу҆ставлѧ́етъ , и҆ рѣши́тъ лѣ́тныѧ вᲂи́стинꙋ бᲂлѣ́зни , сп҃са бжⷭ҇твенᲂю бл҃гᲂда́тїю . Ꙗ҆́кѡ сщ҃еннᲂмч҃нкъ , вѧза́ти же и҆ рѣша́ти и҆мѣ́ѧ вла́сть , раз̾рѣшѝ ѕѡ́лъ мᲂи́хъ сᲂꙋ́зъ , и҆ дш҃ꙋ мᲂю̀ жего́мꙋ ѻ҆гне́мъ грѣха̀ , ѡ҆рᲂси́ти мᲂлѝ всеще́драгѡ . Дне́сь вѣ́рнѡ пра́зднꙋетъ цр҃кви бг҃ᲂно́се , всесщ҃е́ннꙋю тѝ па́мѧть , и҆ ѿше́ствїѧ к̾ чл҃кᲂлю́бцꙋ . и҆ ра́дꙋѧсѧ плеты́и тебѣ̀ , пѣ́сней бжⷭ҇твенаѧ вᲂспѣва́нїѧ . Де́нь свѣ́телъ , ꙗ҆́кᲂже ѕвѣздꙋ̀ , тѧ̀ стѧжа́вше бг҃ᲂглаго́ливе , твᲂи́ми свѣтᲂлꙋ́чными зарѧ́ми , бжⷭ҇твеныхъ бᲂлѣ́зней чꙋде́съ твᲂи́хъ , честны́ми свѣтлᲂстьмѝ ѡ҆зарѧ́емсѧ ѳеᲂдѡ́те . боⷢ҇ . Свѣ́тъ на́мъ ро́ждьши дв҃о , є҆́же ѿ ѻ҆ц҃а пре́жде денни́цы вᲂсїѧ́въ неи҆зрече́ннѡ , неразꙋ́мїѧ тмꙋ̀ разрѣ́шь . и҆ и҆́же в̾ сѣ́ни спѧ́щїѧ грѣхо́внѣй прᲂсвѣти́ла є҆сѝ .

Слꙋ́жба преставле́нїю и҆́же во ст҃ы́хъ ѻ҆ц҃а на́шегѡ а҆рсе́нїѧ є҆пкⷭ҇па тѳерска́гѡ . =Ве́черъ , пᲂе́мъ , бл҃же́нъ мꙋ́жь , а҃ , а҆нтифо́нъ . На гдⷭ҇и вᲂзва́хъ , стихѣ́ры , ст҃о́мꙋ , на́ ѕ҃ . гла́съ , ѕ҃ . поⷣ . всѐ ᲂу҆пᲂва́нїе . Ве́сь ѡ҆сщ҃е́нъ ,꙳ бг҃ᲂно́сецъ пᲂказа́сѧ ,꙳ ма́стїю бжⷭ҇твенᲂю ст҃о́ю ,꙳ ст҃ы́мъ дх҃ᲂмъ ѡ҆блᲂже́нъ ,꙳ и҆ свѣ́тлѡ всегда̀ ликꙋ́ѧ ст҃лю ,꙳ во ст҃а́ѧ ст҃ы́хъ вхᲂдѧ̀ .꙳ и҆ лю́ди свᲂѧ̀ , ꙗ҆́кѡ сщ҃еннᲂтаи́нникъ ,꙳ нбⷭ҇нымъ та́йнамъ наꙋчи́лъ є҆сѝ ,꙳ ꙗ҆́кѡ вᲂи́стинꙋ ᲂу҆чи́тель и҆збра́ненъ .꙳ ѻ҆́ч҃е а҆рсе́нїе бг҃ᲂно́се ,꙳ со дерзнᲂве́нїемъ мᲂлѧ́сѧ ,꙳ ѡ҆ дш҃ахъ на́шихъ . Ве́сь ѿ ю҆́нᲂсти ѡ҆блиста̀ ,꙳ житїѧ̀ дᲂбрᲂдѣ́телей лꙋче́ю ,꙳ всебл҃же́нне ст҃лю .꙳ и҆ лю́ди свᲂѧ̀ прᲂсвѣти́лъ є҆сѝ .꙳ и҆ хра́мъ пречⷭ҇тыѧ вᲂз̾дви́глъ є҆сѝ пречꙋ́денъ .꙳ и҆ ны́нѣ всели́сѧ и҆дѣ́же свѣ́тъ невече́рнїи ,꙳ и҆дѣ́же ликᲂстᲂѧ́нїѧ а҆́нг҃лъ .꙳ с̾ ни́ми же пред̾стᲂѧ̀ прпⷣбне ,꙳ пᲂмина́й на́съ ст҃лю а҆рсе́нїе ,꙳ твᲂю̀ па́мѧть сᲂверша́ющихъ .꙳ со дерзнᲂве́нїемъ мᲂлѧ́сѧ ,꙳ ѡ҆ дш҃ахъ на́шихъ . Ст҃ль бг҃ᲂпрїѧ́тенъ ,꙳ и҆ па́стырь и҆́стиненъ .꙳ сто́лпъ непревра́тенъ ,꙳ ѡ҆снᲂва́нїе вѣ́рѣ недви́жимо .꙳ бл҃гᲂче́стїѧ степе́нь непᲂкᲂлѣби́мыи ,꙳ забра́ло цр҃кви нерꙋши́мᲂе .꙳ ст҃лемъ дᲂбро́та ,꙳ и҆ чꙋде́съ и҆сто́чникъ ,꙳ а҆рсе́нїе бы́лъ є҆сѝ .꙳ тѣ́мъ тѧ̀ ᲂу҆блажа́емъ бл҃гᲂчести́внѡ ,꙳ пѣ́ньми и҆ пѣ́сньми дх҃о́вными ,꙳ и҆ всесщ҃е́ннꙋю сᲂверша́емъ па́мѧть твᲂю̀ . Сл҃нца свѣтлѣ́йши ,꙳ прᲂсїѧ̀ на́мъ па́мѧть твᲂѧ̀ ,꙳ ст҃лю а҆рсе́нїе ,꙳ вседо́блїи ѻ҆́ч҃е сщ҃е́нне .꙳ сегѡ̀ ра́ди тѧ̀ ᲂу҆блажа́емъ бг҃ᲂмꙋ́дре ,꙳ и҆ мᲂле́бнѡ вᲂспѣва́емъ .꙳ ꙗ҆́кѡ пᲂказа́сѧ землѝ на́шей чꙋдᲂтво́рецъ ,꙳ и҆ мᲂле́бникъ и҆ пред̾ста́тель те́плѣйшїи .꙳ тѣ́мъ мᲂли́сѧ хрⷭ҇тꙋ̀ бг҃ꙋ ,꙳ и҆зба́витисѧ ста́дꙋ твᲂемꙋ̀ ѿ навѣ́та вра́жїѧ ,꙳ є҆́же стѧжа́лъ є҆сѝ мꙋ́дре ,꙳ мл҃твами свᲂи́ми . =сла́ва . гла́съ , ѕ҃ . Прїиди́те всѝ рꙋ́сскїѧ митрᲂпо́лїи , всѧ́ко ѻ҆те́чество , гра́дᲂве и҆ страны̀ , а҆рхїєре́и , и҆ всѝ лю́дїе , и҆ всѧ́къ ꙗ҆зы́къ стеце́мсѧ , къ честнѣ́й па́мѧти ст҃лѧ пресла́внагѡ , на́шеѧ землѝ . дне́сь в̾ пѣ́снехъ и҆ пѣ́нїихъ вᲂсхва́лимъ , вели́кагѡ па́стырѧ и҆ ᲂу҆чи́телѧ , а҆рсе́нїѧ бг҃ᲂмꙋ́драгѡ . се́й бо и҆́з̾млада жела́нїе бжⷭ҇твено прїи́мъ въ срⷣцы свᲂе́мъ , и҆ вᲂз̾люби́въ хрⷭ҇та̀ , и҆ пречⷭ҇тꙋю є҆гѡ̀ мт҃рь . є҆́йже и҆ ѻ҆би́тель сᲂтвᲂрѝ , и҆ хра́мъ че́стенъ сᲂзда̀ , и҆ вельмѝ ᲂу҆красѝ , и҆ мно́жества и҆́нѡкъ сᲂбра̀ . тѣ́мже тѝ пра́зднꙋемъ ᲂу҆спе́нїе всѝ вѣ́рнїи , ѡ҆́крестъ стᲂѧ́ще твᲂеѧ̀ ра́ки , мᲂле́бнѡ к̾ тебѣ̀ рꙋ́цѣ прᲂстира́емъ , ст҃лю а҆рсе́нїе , мᲂли́сѧ хрⷭ҇тꙋ̀ бг҃ꙋ ѡ҆ ча́дѣхъ свᲂи́хъ , и҆ ѡ҆ всѣ́хъ и҆́же любо́вїю пра́зднꙋющихъ , чⷭ҇тнꙋ́ю па́мѧть твᲂю̀ .

и҆ нн҃ѣ , боⷢ҇ . Кто̀ тебѐ небл҃жи́тъ прест҃а́ѧ дв҃це ; и҆лѝ кто̀ невᲂспѣва́етъ твᲂегѡ̀ пречи́стагѡ ржⷭ҇тва̀ ; без̾лѣ́тныи бо ѿ ѻ҆ц҃а вᲂз̾сїѧ́въ сн҃ъ є҆динᲂро́дныи , то́й же ѿ тебѐ чи́стыѧ про́йде , несказа́ннѡ вᲂпло́щьсѧ . є҆стество́мъ бг҃ъ сы́и , и҆ є҆стество́мъ бы́въ чл҃къ на́съ ра́ди . не во двᲂю̀ лицꙋ̀ раздѣлѧ́емъ . но во двᲂю̀ є҆стествꙋ̀ несмѣ́сно пᲂзнава́емъ . тᲂгѡ̀ мᲂлѝ чи́стаѧ и҆ всебл҃же́ннаѧ , пᲂми́лᲂватисѧ дш҃а́мъ на́шимъ . та́же , вы́хᲂдъ . прᲂки́менъ , и҆ чте́нїѧ , дне́ви . и҆ ст҃о́мꙋ .

Ѿ при́тчей , чте́нїе .

Па́мѧть пра́веднагѡ с̾ пᲂхвала́ми , и҆ блгⷭ҇ве́нїе гдⷭ҇не на главѣ̀ є҆гѡ̀ . бл҃же́нъ чл҃къ , и҆́же ѡ҆брѣ́те мꙋ́дрᲂсть , и҆ сме́ртенъ и҆́же ᲂу҆вѣ́дѣ ра́зꙋмъ . лꙋ́чше бо сїю̀ кꙋпᲂва́ти , не́жели зла́та и҆ сребра̀ сᲂкро́вища . честнѣ́йши бо є҆́сть ка́менїѧ мнᲂгᲂцѣ́нна , все́же чⷭ҇тно́е , недᲂсто́йнѡ є҆́сть є҆́й . дᲂлгᲂта́ бо дні́й , и҆ лѣ́та живᲂта̀ , в̾ десни́цѣ є҆ѧ̀ , и҆ в̾ шꙋ́ицѣ є҆ѧ̀ бᲂга́тство и҆ сла́ва . ѿ ᲂу҆́стъ бо є҆ѧ̀ и҆схо́дитъ пра́вда , зако́нъ же и҆ млⷭ҇ть , на ꙗ҆зы́цѣ но́ситъ . пᲂслꙋ́шайте ᲂу҆́бѡ менѐ , ѽ ча́да , честна́ѧ бо рекꙋ̀ , и҆ бл҃же́нъ чл҃къ , и҆́же пꙋтѝ мᲂѧ̀ храни́тъ . и҆схо́ди бо мᲂѝ , и҆схо́ди живᲂта̀ , и҆ ᲂу҆гᲂто́ваетсѧ хᲂтѣ́нїе ѿ́ гдⷭ҇а . сегѡ̀ ра́ди мᲂлю̀ ва́съ , и҆ пред̾лага́ю мо́й гла́съ сн҃ᲂво́мъ чл҃ческимъ . ꙗ҆́кѡ а҆́зъ премꙋ́дрᲂсть всели́хъ , сᲂвѣ́тъ и҆ ра́зꙋмъ , и҆ смы́слъ а҆́зъ призва́хъ . мо́й сᲂвѣ́тъ и҆ ᲂу҆тверже́нїе , мо́й ра́зꙋмъ , мᲂѧ́ же крѣ́пᲂсть . а҆́зъ менѐ лю́бѧщїѧ люблю̀ , и҆ взыска́ющїи менѐ ѡ҆брѧ́щꙋтъ бл҃гᲂда́ть . разꙋмѣ́йте ᲂу҆́бѡ неѕло́бивїи кᲂва́рство , ненака́занїи же прилага́йте срⷣца̀ . пᲂслꙋ́шайте менѐ и҆ па́ки , честна́ѧ бо рекꙋ̀ , и҆ ѿве́рзꙋ ѿ ᲂу҆сте́нъ мᲂи́хъ пра́вдꙋ . ꙗ҆́кѡ и҆́стинѣ пᲂꙋча́етсѧ гᲂрта́нь мо́й , ме́рзски же предо мно́ю ᲂу҆стны̀ лжи́выхъ . с̾ пра́вдᲂю всѝ глаго́лы ᲂу҆́стъ мᲂи́хъ , ни что́же в̾ ни́хъ стро́пᲂтно ни развращено̀ . всѧ̀ пра́ва сꙋ́ть разꙋмѣва́ющимъ и҆́стинꙋ , и҆ здра́ва ѡ҆брѣта́ющимъ ра́зꙋмъ . наꙋчꙋ́ бо ва́съ и҆́стинѣ , да бꙋ́детъ ѡ҆́ гдⷭ҇ѣ наде́жа ва́ша , и҆ и҆спо́лнитесѧ дх҃а .

Ѿ= при́тчей , чте́нїе .=

=Ѿ =ᲂу҆́стъ пра́веднагѡ ка́плетъ премꙋ́дрᲂсть , ꙗ҆зы́къ же непра́веднагѡ пᲂтреби́тсѧ . ᲂу҆сты̀ мꙋже́й пра́ведныхъ свѣ́дѧтъ бл҃гᲂда́ть , ᲂу҆ста́ же нечести́выхъ разᲂрѧ́тсѧ . мѣ́рила ле́стна ме́рзᲂсть пре́д̾ гдⷭ҇емъ , мѣ́рило же пра́ведно прїѧ́тнѡ є҆мꙋ̀ є҆́сть . и҆дѣ́же а҆́ще вни́детъ дᲂсажде́нїе , тꙋ̀ и҆ бесче́стїе . ᲂу҆ста̀ смире́ныхъ пᲂꙋча́тсѧ премꙋ́дрᲂсти , кᲂнчи́на же пра́ведныхъ наста́витъ и҆́хъ . и҆ пᲂпᲂлзнᲂве́нїе закᲂнᲂпрестꙋ́пникъ плѣни́тъ ѧ҆̀ . непо́льзꙋетъ и҆мѣ́нїе в̾ дн҃ь ꙗ҆́рᲂсти , пра́вда же и҆збавлѧ́етъ ѿ сме́рти . ᲂу҆мира́ѧ пра́ведныи , ѡ҆ставлѧ́етъ пᲂпече́нїе . ме́рзᲂстна же быва́етъ и҆ на́гла нечести́выхъ пᲂги́бель . пра́вда непᲂро́чнагѡ и҆справлѧ́етъ пꙋтѝ , нече́стїемъ же свᲂи́мъ па́даетъ без̾зако́нныи . пра́вда мꙋже́й пра́ведныхъ и҆збавлѧ́етъ и҆́хъ , без̾сᲂвѣ́тїемъ же ᲂу҆лᲂвлѧ́ютсѧ закᲂнᲂпрестꙋ́пнїи . скᲂнча́вшꙋсѧ мꙋ́жꙋ пра́веднꙋ , не ѡ҆скꙋдѣ́етъ наде́жа , хвала́ же нечести́выхъ пᲂтреби́тсѧ . пра́ведникъ ѿ лᲂви́твы и҆збѣ́гнетъ , вмѣ́сто же є҆гѡ̀ предае́тсѧ нечести́выи . во ᲂу҆стѣ́хъ закᲂнᲂпрестꙋ́пныхъ сѣ́ть гражда́нѡмъ , чꙋ́вство же пра́ведныхъ бл҃гᲂспѣ́шнѡ . во бл҃гᲂсти пра́ведныхъ и҆спра́витсѧ гра́дъ , и҆ въ пᲂги́бели нечести́выхъ ра́дᲂванїе . во бл҃гᲂслᲂве́нїи пра́ведныхъ вᲂз̾вы́ситсѧ гра́дъ , ᲂу҆сты́ же нечести́выхъ раскᲂпа́етсѧ . рꙋга́етсѧ гражда́нѡмъ лише́ныи ра́зꙋма . мꙋ́жь же мꙋ́дръ без̾мо́лвїе во́дитъ .

Ѿ= премꙋ́дрᲂсти сᲂло́мѡни , чте́нїе .=

Пра́ведникъ а҆́ще пᲂсти́гнетъ скᲂнча́тисѧ , в̾ пᲂко́й бꙋ́детъ . ста́рᲂсть бо честна̀ , немнᲂгᲂлѣ́тна , ни в̾ числѣ̀ лѣ́тъ и҆зᲂчте́на . сѣди́на же є҆́сть мꙋ́дрᲂсть чл҃кѡмъ , и҆ во́зрастъ ста́рᲂсти житїѐ нескве́рно . бл҃гᲂꙋго́денъ бг҃ᲂви бы́въ , и҆ вᲂз̾лю́бленъ бы́сть , и҆ живы́и пᲂсредѣ̀ грѣ́шникъ преста́висѧ . вᲂсхище́нъ бы́сть , да не ѕло́ба и҆змѣни́тъ ра́зꙋма є҆гѡ̀ , и҆лѝ ле́сть прельсти́тъ дш҃ꙋ є҆гѡ̀ , раче́нїе бо ѕло́е гꙋби́тъ до́браѧ , и҆ жела́нїе по́хᲂти премѣнѧ́етъ ᲂу҆́мъ неѕло́бивъ . скᲂнча́всѧ в̾ ма́лѣ , и҆спо́лни лѣ́та до́лга . ᲂу҆го́дна бо бѣ̀ гдⷭ҇ви дш҃а є҆гѡ̀ . сегѡ̀ ра́ди пᲂтща́сѧ ѿ среды̀ лꙋка́вствїѧ . лю́дїе же ви́дѣвше и҆ неразꙋмѣ́вше , ни пᲂлᲂжи́ша въ пᲂмышле́нїи такᲂва́гѡ , ꙗ҆́кѡ бл҃гᲂда́ть и҆ ми́лᲂсть на прпⷣбныхъ є҆гѡ̀ , и҆ пᲂсѣще́нїе во и҆збра́нныхъ є҆гѡ̀ .

На литі́и , стихѣ́ры . гла́съ , в҃ . Оу҆́мъ прпⷣбенъ , ꙗ҆́кѡ при́снѡ к̾ бг҃ꙋ внима́ющь , свᲂбо́денъ же и҆ самᲂизво́ленъ , ꙗ҆́кѡ стрⷭ҇тьмѝ непᲂрабᲂще́нъ . дш҃ꙋ чи́стꙋ и҆мѣ́ѧ , срⷣце млⷭ҇тивно , и҆ слеза́ми ᲂу҆миле́нѡ . тѣ́ло же мл҃твами к̾ бг҃ꙋ слꙋже́бнѡ , притѧжа́лъ є҆сѝ а҆рсе́нїе ст҃лю , сло́во мꙋ́дрᲂстнѡ и҆ смире́нѡ . ве́сь ѿ ю҆́нᲂсти бл҃гᲂнра́вїемъ хрⷭ҇тꙋ̀ ᲂу҆сво́исѧ . ѿ него́же ст҃льства са́нъ прїѧ́лъ є҆сѝ , и҆ лю́ди свᲂѧ̀ ᲂу҆па́слъ є҆сѝ , и҆ правᲂсла́вїемъ ѡ҆бᲂга́тилъ є҆сѝ . нн҃ѣ ꙗ҆́кѡ пред̾стᲂѧ̀ хрⷭ҇тꙋ̀ бг҃ꙋ , ѿ всѧ́кихъ на́съ бѣ́дъ и҆зба́ви , и҆ спасѝ дш҃а на́ша . гла́съ , д҃ . Є҆ѵⷢ҇а́льскихъ и҆сто́чникъ слᲂвесы̀ твᲂи́ми ст҃лю , люде́й свᲂи́хъ срⷣца̀ напᲂи́лъ є҆сѝ , и҆ сѣ́мѧ бл҃гᲂче́стїѧ в̾ ни́хъ мл҃твами сѝ вᲂз̾расти́лъ є҆сѝ , и҆ си́хъ прине́слъ є҆сѝ хрⷭ҇тꙋ̀ пло́дъ и҆зрѧ́денъ . и҆ нн҃ѣ ꙗ҆́кѡ пред̾стᲂѧ̀ ᲂу҆ негѡ̀ съ ли́ки а҆пⷭ҇лъ и҆ ст҃ль , пᲂмина́й на́съ к̾ немꙋ̀ мл҃твами тѝ . и҆ сᲂхранѝ на́съ ѿ всѧ́кагѡ ѡ҆ѕлᲂбле́нїѧ , сᲂверша́ющихъ вѣ́рᲂю па́мѧть твᲂю̀ . А҆пⷭ҇льскᲂмꙋ прⷭ҇то́лꙋ спᲂдо́бисѧ , ст҃льство прїи́мъ ст҃лю а҆рсе́нїе . ты́ бо ᲂу҆краси́лъ є҆сѝ цр҃квь мт҃ре гдⷭ҇нѧ , и҆ ᲂу҆го́дникъ є҆ѧ̀ а҆нтѡ́нїѧ и҆ ѳеᲂдѡ́сїѧ . в̾ ню́же мы̀ ны́нѣ ча́да твᲂѧ̀ притека́юще , и҆ ли́ки сᲂставлѧ́юще , тебѐ вᲂсхвалѧ́емъ , ꙗ҆́кѡ ѻ҆ц҃а чадᲂлюби́ва . и҆ мᲂле́бнѣ к̾ тебѣ̀ рꙋ́цѣ прᲂстира́емъ . мᲂли́сѧ ѡ҆ на́съ хрⷭ҇тꙋ̀ бг҃ꙋ , и҆ пречⷭ҇тѣй є҆гѡ̀ мт҃ри , и҆́же вѣ́рᲂю и҆ любо́вїю тебѐ пᲂчита́ющихъ . сла́ва . гла́съ , и҃ . Всѧ́къ ꙗ҆зы́къ да пᲂчꙋди́тсѧ ны́нѣ , ѡ҆ пресла́вныхъ вели́чїихъ бг҃а на́шегѡ . и҆ всѧ́ка ᲂу҆ста̀ да пᲂдви́жꙋтсѧ на пᲂхвале́нїе , и҆ да вᲂспᲂю́тъ хрⷭ҇та̀ бг҃а . ꙗ҆́кѡ в̾ пᲂслѣ́днѧѧ времена̀ и҆ ро́ды , такᲂва̀ на́мъ прᲂи҆зведѐ свѣти́льника , вели́кагѡ ст҃лѧ при́снѡ бл҃же́ннагѡ а҆рсе́нїѧ . тѣ́мже вᲂпїе́мъ є҆мꙋ̀ . ра́дꙋисѧ ᲂу҆пасы́и цр҃квь хрⷭ҇то́вꙋ и҆ лю́ди свᲂѧ̀ . сегѡ̀ ра́ди ны́нѣ на́ нб҃сѣхъ в̾ весе́лїи вᲂдвᲂрѧ́ешисѧ . ра́дꙋисѧ и҆ ты̀ бг҃ᲂхрани́мыи гра́де тфе́рь , ꙗ҆́кѡ такᲂва̀ и҆мѣ́ѧ в̾ себѣ̀ пᲂжи́вша ст҃лѧ . весели́тесѧ и҆ вы̀ лю́дїе сегѡ̀ гра́да , ꙗ҆́кѡ такᲂва̀ ст҃лѧ и҆ ᲂу҆чи́телѧ спᲂдо́бистесѧ прїѧ́ти . ра́дꙋисѧ и҆ весели́сѧ бж҃їѧ мт҃ре цр҃кви , ꙗ҆́кѡ люби́мыи тᲂбо́ю в̾ тебѣ̀ пᲂчи́лъ є҆́сть , бг҃ᲂмꙋ́дрыи а҆рсе́нїи . но ѽ бг҃ᲂбл҃же́нныи ѻ҆́ч҃е , непреста́й мᲂлѧ́сѧ , ѡ҆ и҆́же вѣ́рᲂю чтꙋ́щихъ всечⷭ҇тно́е твᲂѐ преставле́нїе . и҆ ны́нѣ , боⷢ҇ . Влⷣчце прїимѝ мл҃твꙋ ра́бъ свᲂи́хъ , и҆ и҆зба́ви на́съ ѿ всѧ́кїѧ нꙋ́жды и҆ печа́ли .

На стихо́внѣ , стихѣ́ры . гла́съ , и҃ . поⷣ . ѽ =пресла́внᲂе чꙋ́до . Ѻ҆́=ч҃е ст҃лю а҆рсе́нїе ,꙳ ѡ҆крили́въ ᲂу҆́мъ к̾ бг҃ꙋ вѣ́рᲂю ,꙳ мирска́гѡ смѣше́нїѧ ꙳ вᲂз̾гнꙋша́сѧ неꙋста́внагѡ .꙳ и҆ крⷭ҇тъ сво́й взе́мъ ,꙳ всеви́дцꙋ пᲂслѣ́дᲂвалъ є҆сѝ .꙳ и҆ люби́тель и҆́нᲂкѡмъ бы́сть и҆зрѧ́денъ .꙳ сегѡ̀ ра́ди ст҃льскагѡ прⷭ҇то́ла прїѧ́ти спᲂдо́бисѧ .꙳ тѣ́мъ непреста́й мᲂлѧ́сѧ ѡ҆ дш҃ахъ на́шихъ .

сти́хъ : честна̀ пре́д̾ гдⷭ҇емъ ,꙳ сме́рть прпⷣбныхъ є҆гѡ̀ . Ѻ҆́ч҃е ст҃лю а҆рсе́нїе ,꙳ ты̀ ѿ ᲂу҆тро́бы къ бг҃ꙋ ,꙳ прибли́жи сѝ ᲂу҆́мъ .꙳ и҆ весьма̀ прилѣжа̀ цр҃ю вседержи́телю ,꙳ плᲂды̀ дᲂсто́йны принᲂсѧ̀ є҆мꙋ̀ ,꙳ ѿ свᲂи́хъ по́двигъ ст҃лю .꙳ сᲂꙋкраша́емь дᲂбрᲂдѣ́тельными вѣнцы̀ .꙳ тѣ́мъ бл҃ги́хъ ѡ҆брѣ́те ,꙳ вᲂспрїѧ́тїе дᲂстᲂчꙋ́дне .

сти́хъ : блаже́нъ мꙋ́жь бᲂѧ́исѧ гдⷭ҇а ,꙳ въ за́пᲂведѣхъ є҆гѡ̀ вᲂсхо́щетъ ѕѣлѡ̀ . Ѻ҆́ч҃е ст҃лю а҆рсе́нїе ,꙳ ты̀ мни́хѡмъ сказа́тель ,꙳ и҆ рꙋ́сстѣй землѝ ѕвѣзда̀ пресвѣ́тлаѧ ,꙳ ѡ҆сїѧва́ѧ чꙋдесы̀ всю̀ сїю̀ странꙋ̀ .꙳ тѧ́ бо и҆збра̀ бг҃ъ ѿ ю҆́нᲂсти ѻ҆́ч҃е ,꙳ па́стырѧ ѻ҆вца́мъ слᲂве́снымъ и҆ ᲂу҆чи́телѧ .꙳ тѣ́мъ мᲂли́сѧ ѡ҆ на́съ ,꙳ с̾ ли́ки ст҃лей ,꙳ и҆ прᲂсѝ ста́дꙋ свᲂемꙋ̀ грѣхо́мъ ѡ҆ставле́нїѧ .

сла́ва . гла́съ , ѕ҃ . Ꙗ҆́кѡ всечестны́и кᲂне́цъ ᲂу҆спе́нїѧ твᲂегѡ̀ , и҆ є҆́же ѿше́ствїе твᲂѐ ко́ гдⷭ҇ꙋ , ᲂу҆вѣ́дѣвше бл҃гᲂчести́вїи кн҃ѕи , и҆ сщ҃еннᲂи́нѡцы , и҆ всѝ лю́дїе , взе́мше чⷭ҇тно́е тѣ́ло твᲂѐ , принесо́ша и҆́же тᲂбо́ю в̾ бг҃ᲂзда́ннꙋю цр҃квь , пречⷭ҇тыѧ бж҃їѧ мт҃ре . сїѧ̀ ви́дѣвше и҆́нѡцы твᲂеѧ̀ ѻ҆би́тели , люби́маѧ тᲂбо́ю ча́да прите́кше , ᲂу҆зрѣ́вше тебѐ ме́ртва на ѻ҆дрѣ̀ , пла́чꙋщесѧ го́рькѡ , ѻ҆́дръ слеза́ми ѡ҆блива́юще , велегла́снѡ к̾ тебѣ̀ вᲂпїѧ́хꙋ , ᲂу҆вы̀ на́мъ па́стырю на́шъ до́брыи . к̾ кᲂмꙋ̀ ᲂу҆́же прибѣ́гнемъ . кто̀ на́съ пᲂсѣти́тъ . кто̀ на́шꙋ нищетꙋ̀ ᲂу҆дᲂвли́тъ . кто́ бо тако́въ бы́сть , ꙗ҆́кᲂже ты̀ любе́зенъ и҆́нᲂкѡмъ . кᲂмꙋ̀ на́съ ѡ҆ставлѧ́еши люби́мыи на́шъ ѻ҆́ч҃е а҆рсе́нїе . а҆́ще и҆ тѣ́лᲂмъ пре́йде ѿ на́съ , но дх҃ᲂмъ пребыва́й с̾ на́ми пᲂсѣща́ѧ на́съ . и҆ мᲂли́сѧ заны̀ ко́ гдⷭ҇ꙋ , и҆ пречⷭ҇тѣй є҆гѡ̀ мт҃ри , и҆́же вѣ́рᲂю и҆ любо́вїю па́мѧть твᲂю̀ пᲂчита́ющихъ .

и҆ ны́нѣ , боⷢ҇ . Бцⷣе ты̀ є҆сѝ лᲂза̀ и҆́стиннаѧ , вᲂз̾расти́вшаѧ на́мъ пло́дъ живо́тныи , тебѣ̀ мо́лимсѧ , мᲂли́сѧ влⷣчце со ст҃лемъ , пᲂми́ло ватисѧ дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , и҃ . Бл҃гᲂче́стнѡ по́живъ во ст҃льствѣ , лю́ди прᲂсвѣти́лъ є҆сѝ ᲂу҆че́нїемъ свᲂи́мъ . и҆ ѡ҆́ храмѣ пречⷭ҇тыѧ вельмѝ пᲂд̾ виза́всѧ , и҆ люби́тель и҆́нᲂкѡмъ бы́сть . сегѡ̀ ра́ди ѿ хрⷭ҇та̀ , па́ствы свᲂеѧ̀ вѣне́цъ прїи́мъ . тѣ́мже ꙗ҆́кѡ а҆пⷭ҇льскагѡ прⷭ҇то́ла намѣ́стника , и҆ ст҃лѧ вели́кагѡ чтꙋ́ще тѧ̀ мо́лимъ ча́да твᲂѧ̀ бл҃же́нне , ѿ всѣ́хъ бѣ́дъ и҆зба́ви на́съ , є҆́же ко хрⷭ҇тꙋ̀ мл҃твами тѝ , ст҃лю хрⷭ҇то́въ а҆рсе́нїе ѻ҆́ч҃е на́шъ . сла́ва , и҆ ны́нѣ , боⷢ҇ . И҆́же на́съ ра́ди рᲂжде́исѧ ѿ дв҃ы , и҆ распѧ́тїе претерпѣ́въ бл҃гі́и , и҆спрᲂве́ргїи сме́ртїю сме́рть , и҆ вᲂскрⷭ҇нїе ꙗ҆́вль ꙗ҆́кѡ бг҃ъ , непре́зри и҆́хже сᲂзда̀ рꙋко́ю свᲂе́ю . ꙗ҆вѝ чл҃кᲂлю́бїе свᲂѐ млⷭ҇тиве . прїимѝ ро́ждьшꙋю тѧ̀ бцⷣꙋ мᲂлѧ́щꙋсѧ за ны̀ , и҆ спасѝ сп҃се на́шъ лю́ди сᲂгрѣ́шшїѧ .

На ᲂу҆́трени , на бг҃ъ гдⷭ҇ь , трᲂпа́рь , ст҃лю , двⷤа . сла́ва , и҆ ны́нѣ , боⷢ҇ , вᲂскрⷭ҇нъ . =По а҃ , стихᲂло́гїи , сѣда́ленъ . гла́съ , и҃ . Ле́сть ми́ра и҆ бᲂга́тства свѣ́тлᲂсть , и҆ высо́кꙋю любо́вь рᲂди́телѧ преѡ҆би́дѣвъ , смире́нїемъ же к̾ нищетѣ̀ ᲂу҆ча́щемꙋ , влⷣцѣ хрⷭ҇тꙋ̀ пᲂслѣ́дᲂвалъ є҆сѝ . ѿ него́же пᲂще́нїемъ и҆ мᲂли́твами , и҆́стиннᲂе бᲂга́тство , и҆ сꙋ́щꙋю свѣ́тлᲂсть , и҆ црⷭ҇тво недви́жимо ст҃лю а҆рсе́нїе наслѣ́дᲂвалъ є҆сѝ . к̾ немꙋ́же ны́нѣ мᲂли́сѧ , грѣхо́въ ѡ҆ставле́нїе пᲂда́ти , чтꙋ́щимъ любо́вїю ст҃ꙋ́ю па́мѧть твᲂю̀ . =двⷤа . сла́ва , и҆ ны́нѣ , боⷢ҇ . Да сво́й па́ки сᲂзи́ждеши ѻ҆́бразъ сп҃се , и҆стлѣ́вшїи страстьмѝ , нбⷭ҇ныхъ ᲂу҆таи́всѧ сꙋще́ствъ , вᲂплᲂти́сѧ ѿ дв҃ы . є҆́йже со́ страхᲂмъ вᲂпїе́мъ , ра́дꙋисѧ ѡ҆бра́дᲂваннаѧ гдⷭ҇ь с̾ тᲂбо́ю .

По в҃ , стихᲂло́гїи , сѣда́ленъ . гла́съ , г҃ . Дᲂбрᲂдѣ́телей дѣ́ланїемъ , цр҃кви вᲂсїѧ́лъ є҆сѝ вели́кᲂе сл҃нце . и҆ ᲂу҆че́нїемъ слᲂве́съ твᲂи́хъ прᲂсвѣтѝ лю́ди свᲂѧ̀ . тѣ́мже и҆ по ᲂу҆спе́нїи нескᲂнча́емꙋ бл҃гᲂда́ть прїѧ́лъ є҆сѝ , ст҃лю а҆рсе́нїе . мᲂлѝ хрⷭ҇та̀ бг҃а , дарᲂва́ти на́мъ ве́лїю млⷭ҇ть . вⷤ . сла́ва , и҆ ны́нѣ , боⷢ҇ . Ꙗ҆́кѡ невᲂздѣ́ланенъ дв҃о винᲂгра́дъ , прекра́сныи гро́здъ хрⷭ҇та̀ вᲂзрасти́ла є҆сѝ , и҆стᲂча́ющь на́мъ вино̀ спасе́нїѧ , всѣ́мъ веселѧ́щее дш҃а и҆ тѣлеса̀ . тѣ́мже ꙗ҆́кѡ вино́внꙋ тѧ̀ до́брымъ ᲂу҆блажа́юще , при́снѡ со а҆́нг҃лѡмъ вᲂпїе́мъ тѝ , ра́дꙋисѧ ѡ҆бра́дᲂваннаѧ .

По пᲂлїєлеѡ́сѣ , сѣда́ленъ . гла́съ , и҃ . Млⷭ҇тивᲂмꙋ хрⷭ҇то́вꙋ ᲂу҆го́дникꙋ , неѕло́бивᲂмꙋ и҆ кро́ткᲂмꙋ , всѝ тебѣ̀ прилѣ́жнѡ мо́лимсѧ , и҆ любо́вїю зᲂве́мъ . ра́дꙋисѧ ст҃лю а҆рсе́нїе , ᲂу҆краси́выи хра́мъ бж҃їѧ мт҃ре , и҆ ᲂу҆го́дникꙋ є҆ѧ̀ а҆нтѡ́нїѧ и҆ ѳеᲂдѡ́сїѧ . с̾ ни́ми же мᲂлѝ хрⷭ҇та̀ бг҃а , грѣхо́въ ѡ҆ставле́нїе дарᲂва́ти , чтꙋ́щимъ любо́вїю ст҃ꙋ́ю па́мѧть твᲂю̀ . двⷤа . сла́ва , и҆ ны́нѣ , боⷢ҇ . Є҆гда̀ прїи́детъ сꙋди́ти все́й землѝ , и҆́же всѣ́хъ влⷣка и҆ твᲂре́цъ , ѻ҆вца́мъ мѧ̀ причтѝ десны́мъ ѡ҆сꙋжде́ннаго . и҆ крᲂмѣ́шныѧ тмы̀ , и҆ всѧ́кагѡ мꙋче́нїѧ , твᲂегѡ̀ непᲂтре́бнагѡ раба̀ и҆схитѝ чи́стаѧ . да бл҃гᲂда́рнѡ велича́ю тѧ̀ бцⷣе всенепᲂро́чнаѧ , и҆ вᲂпїю́ ти . мᲂлѝ хрⷭ҇та̀ бг҃а сᲂгрѣше́нїемъ ѡ҆ставле́нїе дарᲂва́ти . тѧ́ бо и҆́мамъ наде́ждꙋ ра́бъ тво́й .

степе́нна , д҃ го гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . сщ҃е́нницы твᲂѝ ѡ҆блекꙋ́тсѧ в̾ пра́вдꙋ , и҆ прпⷣбнїи твᲂѝ вᲂз̾ра́дꙋютсѧ . сти́хъ . пᲂмѧнѝ гдⷭ҇и дв҃да , и҆ всю̀ кро́тᲂсть є҆гѡ̀ . всѧ́ко дыха́нїе . є҆ѵⷢ҇а́лїе , ѿ і҆ѡа́нна . заⷱ҇ , л҃ѕ .= ѱл҃о́мъ , н҃ . =сла́ва . мᲂли́твъ ра́ди ст҃лѧ , млⷭ҇тиве ѡ҆чи́сти мно́жество сᲂгрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество сᲂгрѣше́нїи на́шихъ .

Пᲂми́лꙋй мѧ бж҃е , по вели́цѣй млⷭ҇ти твᲂе́й , по мно́гимъ щедро́тамъ твᲂи́мъ , ѡ҆чи́сти без̾ зако́нїѧ мᲂѧ̀ , бж҃е сп҃се мо́й .

стихѣ́ра . гла́съ , ѕ҃ . Дх҃а ст҃а́гѡ бл҃гᲂда́ть , въ твᲂи́хъ ᲂу҆стна́хъ и҆злїѧ́сѧ ѻ҆́ч҃е , и҆ бы́сть па́стырь хрⷭ҇то́вѣ цр҃кви , ᲂу҆ча̀ слᲂве́сныѧ ѻ҆́вцы , вѣ́рᲂвати в̾ трⷪ҇цꙋ є҆динᲂсꙋ́щнꙋю , во є҆ди́но бжⷭ҇тво̀ .

Кано́нъ , ст҃лю а҆рсе́нїю . є҆мꙋ́же краегране́сїе си́це : ст҃а́гѡ хрⷭ҇то́ва ст҃лѧ а҆рсе́нїѧ пᲂхвали́ти , ра́зꙋма бж҃е мо́й да́рꙋй мѝ . гла́съ , в҃ . пѣ́снь , а҃ . і҆рмо́съ . Грѧди́те лю́дїе , пᲂе́мъ пѣ́снь хрⷭ҇тꙋ̀ бг҃ꙋ , раз̾дѣ́льшемꙋ мо́ре , и҆ прᲂве́дшꙋ лю́ди ꙗ҆́же и҆спꙋстѝ и҆з̾ рабо́ты є҆ги́петскїѧ , ꙗ҆́кѡ прᲂсла́висѧ .

запѣ́в̾ : Ст҃лю хрⷭ҇то́въ а҆рсе́нїе , мᲂлѝ бг҃а ѡ҆ на́съ . Свѣ́те ѿ́ свѣта хрⷭ҇тѐ бж҃е , ѿ ѻ҆ц҃а пре́жде вѣ́къ рᲂжде́исѧ , и҆ и҆скᲂнѝ сы́и со ѻ҆ц҃е́мъ и҆ с̾ дх҃ᲂмъ , мра́къ дш҃и мᲂеѧ̀ ѿгна́въ , ѡ҆зарѝ ᲂу҆́мъ мо́й мᲂлю́сѧ , ꙗ҆́кѡ да вᲂз̾мᲂгꙋ̀ пѣ́ти твᲂегѡ̀ ᲂу҆го́дника , а҆рсе́нїѧ сщ҃е́ннагѡ . А҆́ще и҆ чл҃къ є҆сѝ є҆стество́мъ ѻ҆́ч҃е , но а҆́нг҃льски на землѝ по́жилъ є҆сѝ . десна́гѡ пꙋтѝ ѿ ю҆́нᲂсти є҆́мсѧ , цѣлᲂмꙋ́дрїѧ рачи́тель бы́въ . дх҃а ст҃а́гѡ чⷭ҇тно́е ѻ҆би́телище а҆рсе́нїе всесщ҃е́нне ꙗ҆ви́сѧ . Въ мꙋ́дрᲂсти глави́знꙋ , стра́хъ бж҃їи вᲂз̾люби́въ , и҆ за́пᲂвѣдемъ є҆гѡ̀ при́снѡ пᲂꙋча́ѧсѧ , дре́во насади́сѧ прїисхо́дищихъ во́дъ дх҃о́вныхъ . ѿ ни́хже ѻ҆́ч҃е напаѧ́емь , пло́дъ хрⷭ҇тꙋ̀ а҆рсе́нїе принесе́сѧ . боⷢ҇ . Оу҆слы́ша є҆́вва первᲂма́ти чⷭ҇таѧ , в̾ печа́лѣхъ рᲂди́ши ча́да . ты́ же дв҃о ᲂу҆слы́ша , гдⷭ҇ь с̾ тᲂбо́ю ра́дꙋисѧ . и҆ ра́дᲂваннымъ гла́сᲂмъ бг҃ᲂневѣ́сто , печа́ль прама́тере пᲂтре́бльши .

пѣ́снь , г҃ . і҆рмо́съ . На ка́мени мѧ вѣ́ры ᲂу҆твердѝ , раз̾ширѝ ᲂу҆ста̀ мᲂѧ̀ на врагѝ мᲂѧ̀ . вᲂз̾весели́бᲂсѧ дх҃ъ мо́й вᲂспѣва́ти , нѣ́сть ст҃а ꙗ҆́кᲂже бг҃ъ на́шъ , и҆ нѣ́сть пра́ведна па́че тебѐ гдⷭ҇и . Презрѣ́въ ни́жнѧѧ , ꙗ҆́кѡ пᲂпира́ема . и҆ любо́вь рᲂди́телю преѡ҆би́дѣвъ , хрⷭ҇та̀ взыска́лъ є҆сѝ . є҆го́же любо́вїю , дш҃ꙋ свᲂю̀ ᲂу҆ѧзви́лъ є҆сѝ . тᲂгѡ̀ любѧ̀ , и҆ тᲂгѡ̀ и҆ща̀ красᲂты̀ . Свѣти́льникъ сы́и , свᲂю̀ дш҃ꙋ ᲂу҆краша́ѧ слеза́ми , ра́нѡ ко хрⷭ҇тꙋ̀ ᲂу҆́тренюѧ . рꙋ́кꙋ же прᲂсте́ртїемъ в̾ мᲂли́твахъ , а҆мали́ка тѣ́ло ᲂу҆мертви́лъ є҆сѝ . и҆ на́гᲂрꙋ без̾стра́стїѧ вᲂз̾ше́лъ є҆сѝ . Бл҃гᲂро́дїемъ высо́къ , и҆ бл҃гᲂдꙋ́шїемъ и҆зѧ́щенъ . ра́зꙋма мꙋ́дрᲂстїю ᲂу҆дивле́нъ бы́сть . цвѣ́тъ ꙗ҆́кѡ прекра́сныи чистᲂто́ю сїѧ́ѧ , и҆ свѣ́тлымъ смире́нїемъ а҆рсе́нїе ѻ҆́ч҃е ᲂу҆краси́сѧ . боⷢ҇ . Мт҃и бж҃їѧ пречⷭ҇таѧ , бл҃гᲂслᲂве́наѧ и҆ пренепᲂро́чнаѧ , дш҃и мᲂе́й стрꙋ́пы и҆сцѣлѝ , и҆ стра́сти плᲂтьскі́ѧ ᲂу҆мертвѝ . ᲂу҆мирѝ ᲂу҆́мъ мо́й , ѿ всѧ́кᲂгѡ вре́да , и҆ вра́жїѧ напа́сти и҆зми́ мѧ влⷣчце .

сѣда́ленъ . гла́съ , д҃ . Вели́кїи хрⷭ҇то́въ ст҃ль да вᲂспᲂе́тсѧ , сто́лпъ свѣ́тлыи , прᲂсвѣща́ѧ на́съ чꙋде́съ свѣтлᲂстьмѝ , бг҃ᲂно́сныи ѻ҆́ч҃е на́шъ а҆рсе́нїе , па́стырю и҆ ᲂу҆чи́телю землѝ на́шей . хрⷭ҇та̀ мᲂлѝ ѡ҆ ста́дѣ свᲂе́мъ , и҆ ѡ҆ всѣ́хъ и҆́же вѣ́рᲂю и҆ любо́вїю чтꙋ́щихъ ст҃ꙋ́ю па́мѧть твᲂю̀ . двⷤа . сла́ва , и҆ ны́нѣ , боⷢ҇ . Пᲂе́мъ тѧ̀ бг҃ᲂневѣ́сто мт҃и хрⷭ҇та̀ бг҃а , сла́вѧще ржⷭ҇тво̀ твᲂѐ непᲂстижи́мᲂе . и҆́мже и҆зба́вихᲂмсѧ льстѝ дїа́вᲂли , и҆ всѧ́ческихъ бѣ́дъ влⷣчце бцⷣе . и҆ вѣ́рнѡ тѝ вᲂпїе́мъ , пᲂми́лꙋй ста́до свᲂѐ є҆ди́на бл҃гᲂслᲂве́наѧ .

пѣ́снь , д҃ . і҆рмо́съ . Пᲂю́ тѧ слꙋ́хᲂмъ бо гдⷭ҇и , ᲂу҆слы́шахъ и҆ ᲂу҆бᲂѧ́хсѧ . до мене́ бо прїи́де , менѐ и҆ща̀ заблꙋ́ждьшаго . тѣ́мже мно́гᲂе твᲂѐ сᲂше́ствїе є҆́же на мѧ̀ прᲂславлѧ́ю ѡ҆бнᲂвле́нїе . Вельмѝ ᲂу҆краси́лъ є҆сѝ престо́лъ сво́й ст҃лю а҆рсе́нїе . вели́кими бо чꙋдесы̀ преспѣ́лъ є҆сѝ , и҆ житїе́мъ свѣ́тлымъ . сегѡ̀ ра́ди превели́кїи бг҃ъ на́шъ , вельми́ тѧ прᲂсла́вилъ є҆́сть . Ми́лᲂсти пᲂда́телѧ гдⷭ҇а , свѣ́дыи бл҃же́нне , те́плѣ є҆гѡ̀ ᲂу҆мᲂли́лъ є҆сѝ , на и҆сцѣле́нїе и҆ спасе́нїе мно́гимъ , с̾ вѣ́рᲂю к̾ тебѣ̀ притека́ющимъ , и҆ пᲂклᲂнѧ́ющимсѧ честнѣ́й ра́цѣ твᲂе́й . Врача̀ и҆зрѧ́дна , разли́чнѡ недꙋ́гꙋющимъ , и҆ наставле́нїе всѣ́мъ прельще́нымъ ѕлы́мъ сᲂвѣ́тᲂмъ , хрⷭ҇то́съ тѧ̀ дарᲂва̀ чꙋдᲂтво́рца землѝ на́шей , ст҃лѧ а҆рсе́нїѧ . тѣ́мже тѧ̀ ᲂу҆блажа́емъ . боⷢ҇ . И҆сцѣли́ла є҆сѝ сᲂкрꙋше́нїе всенепᲂро́чнаѧ , дре́внѧгѡ ѻ҆каѧ́нства землены́хъ , пᲂро́ждьшаѧ гдⷭ҇а и҆ цр҃ѧ хрⷭ҇та̀ , пᲂне́сшаго недꙋ́ги на́ша . за бл҃гᲂсе́рдїе неи҆з̾гл҃аннᲂе дв҃о мт҃и .

пѣ́снь , є҃ . і҆рмо́съ . Прᲂсвѣще́нїе во тмѣ̀ лежа́щимъ , и҆ спасе́нїе ненача́емымъ хрⷭ҇тѐ сп҃се мо́й , к̾ тебѣ̀ ᲂу҆́треннюю цр҃ю ми́рныи , прᲂсвѣти́ мѧ сїѧ́нїемъ си , и҆но́гѡ бо ра́звѣ тебѐ бг҃а незна́емъ . Сла́вныи па́стырь , неи҆стᲂщи́мыи и҆сто́чникъ и҆сцѣле́нїѧ , цр҃ко́вныи сто́лпъ . вѣ́рнымъ ᲂу҆тверже́нїе , вели́кїи свѣти́льникъ мнᲂгᲂсвѣ́тлыи , ст҃лю а҆рсе́нїе . Ꙗ҆́кѡ свѣтᲂза́рно житїѐ . ꙗ҆́кѡ ѕѣлѡ̀ чꙋ́дно . ꙗ҆́кѡ краснѝ трꙋ́дᲂве твᲂѝ . ꙗ҆́кѡ вели́ка бл҃гᲂда́ть свы́ше дана́ ти мꙋ́дре . сегѡ̀ ра́ди вѣ́рᲂю пᲂчита́емъ тѧ̀ , ст҃лю а҆рсе́нїе . Пресвѣ́тлаѧ твᲂѧ̀ па́мѧть прᲂстира́етсѧ в̾ ми́рѣ , и҆ прᲂсвѣща́етъ чл҃ческїѧ дꙋ́ши , свѣ́тᲂмъ бл҃гᲂда́ти . ю҆́же сверша́ющихъ любо́вїю , ѿ бѣ́дъ на́съ и҆зба́ви мо́лимсѧ ст҃лю а҆рсе́нїе . боⷢ҇ . Сѐ ѻ҆́дръ сᲂло́мѡнь , є҆го́же ѡ҆бстᲂѧ́тъ си́льнїи , бг҃ᲂдх҃нᲂве́нныхъ писа́нїи ны́нѣ прᲂрица́нїѧ . на не́мже хрⷭ҇то́съ бг҃ъ вᲂплᲂще́нїемъ пᲂчи́лъ є҆́сть , бл҃гᲂслᲂве́ннаѧ и҆ ѡ҆бра́дᲂваннаѧ .

пѣ́снь , ѕ҃ . і҆рмо́съ . Въ бе́зднѣ грѣхо́внѣй ѡ҆держи́мъ , не и҆з̾слѣ́днꙋю млрⷭ҇дїѧ твᲂегѡ̀ призыва́ю бе́зднꙋ , ѿ тлѝ бж҃е мѧ вᲂз̾ведѝ . Свѣти́льника тѧ̀ и҆́же во тмѣ̀ пре́лести , неле́стнѡ наставлѧ́юща ѡ҆брѣ́тше , к̾ пꙋте́мъ живᲂта̀ , бг҃ᲂбл҃же́нне а҆рсе́нїе , и҆ нн҃ѣ по сме́рти вра́чь ꙗ҆ви́лсѧ є҆сѝ бᲂлѧ́щимъ , дх҃а бжⷭ҇твенᲂю бл҃гᲂда́тїю . Зако́нᲂмъ пᲂвинꙋ́ѧсѧ влⷣчнимъ , заблꙋ́ждьшїѧ взыска́лъ є҆сѝ . и҆ во ѻ҆гра́дꙋ пᲂкаѧ́нїѧ приведѐ , ꙗ҆́кѡ па́стырь и҆́стиненъ пᲂказа́сѧ ста́дꙋ свᲂемꙋ̀ , ѻ҆́ч҃е ст҃лю а҆рсе́нїе . Сщ҃е́нїѧ хра́мъ ѻ҆́ч҃е , бжⷭ҇твенагѡ дх҃а вѣ́рᲂю бы́въ . сᲂзда́лъ є҆сѝ хра́мъ пречⷭ҇тыѧ мт҃ре бж҃їѧ , и҆ є҆ѧ̀ ᲂу҆го́дникъ а҆нтѡ́нїѧ и҆ ѳеᲂдѡ́сїѧ . и҆ ѻ҆би́тель пречꙋ́днꙋ сᲂтвᲂрѝ и҆ ᲂу҆красѝ . в̾ не́йже тѣ́ло твᲂѐ пᲂлᲂже́но бы́сть . боⷢ҇ . Зако́ни ѡ҆ тебѣ̀ пресла́внѡ дв҃о ѡ҆бнᲂвлѧ́ютсѧ . ражда́еши бо без̾сѣ́мене бг҃а сп҃са , и҆ пребыва́еши дв҃ствꙋющи па́ки , стра́ннѡ чꙋ́до . тѣ́мъ тѧ̀ мт҃рь є҆мманꙋ́илевꙋ бл҃гᲂче́стнѡ и҆спᲂвѣ́даемъ .

кᲂнда́къ . гла́съ , и҃ . Вᲂспрїи́мши ра́дᲂстнѡ твᲂѧ̀ мо́щи честны́ѧ , пречи́стаѧ цр҃кви . в̾ ню́же че́стнѡ нᲂси́ми мно́жествᲂмъ сщ҃е́ннѡ и҆́нѡкъ , и҆ кн҃ѕи бл҃гᲂвѣ́рными . и҆ тѧ̀ прїи́мши ꙗ҆́кѡ сᲂкро́вище мнᲂгᲂцѣ́ннᲂе . тѣ́мже и҆ мы̀ ны́нѣ твᲂеѧ̀ ѻ҆гра́ды слᲂве́сныѧ ѻ҆́вцы , ѻ҆́крестъ ра́ки твᲂеѧ̀ пред̾стᲂѧ́ще , любе́знѡ вᲂпїе́мъ тѝ . незабꙋ́ди ча́дъ свᲂи́хъ ѻ҆́ч҃е , и҆́хже мꙋ́дрѣ сᲂбра̀ и҆ вᲂз̾любѝ . ꙗ҆́кѡ да зᲂве́мъ тѝ . ра́дꙋисѧ ст҃лю а҆рсе́нїе , па́стырю и҆ ᲂу҆чи́телю на́шъ . и҆́кᲂсъ . Ѿ скве́рныхъ ᲂу҆сте́нъ , ѿ нечи́ста срⷣца , ка́кѡ ти принесꙋ̀ хвале́нїѧ ѡ҆каѧ́нныи , ᲂу҆жаса́юсѧ и҆ трепе́щꙋ . по надѣ́ѧсѧ на тво́й бл҃гᲂсе́рдыи нра́въ ѻ҆́ч҃е , хвалꙋ̀ тѝ прино́симъ гл҃юще . ра́дꙋисѧ па́стырю на́шъ до́брыи ст҃лю а҆рсе́нїе , ᲂу҆пасы́и ста́до хрⷭ҇то́во . ра́дꙋисѧ ди́вныи чꙋдᲂтво́рче , притека́ющимъ к̾ тебѣ̀ с̾ вѣ́рᲂю , неѡ҆скꙋ́днѡ и҆сцѣле́нїѧ пᲂдава́ѧ . ра́дꙋисѧ цр҃квамъ вᲂз̾дви́женїе , и҆ и҆́нѡкъ люби́телю , си́рымъ и҆ ни́щимъ пᲂда́телю . ра́дꙋисѧ и҆ ты̀ бг҃ᲂхрани́мыи гра́де тфе́рь , ꙗ҆́кѡ такᲂва̀ и҆мѣ̀ в̾ себѣ̀ пᲂжи́вша ст҃лѧ . ра́дꙋисѧ и҆ весели́сѧ бж҃їѧ мт҃ре цр҃кви , ꙗ҆́кѡ люби́мыи тᲂбо́ю в̾ тебѣ̀ пᲂчи́лъ є҆́сть , бг҃ᲂмꙋ́дрыи а҆рсе́нїи . но ѽ бг҃ᲂбл҃же́нныи ѻ҆́ч҃е , а҆́ще и҆ тѣ́лᲂмъ пре́йде ѿ на́съ , но дх҃ᲂмъ пребыва́ѧ с̾ на́ми . и҆ мᲂли́сѧ заны̀ хрⷭ҇тꙋ̀ , и҆ пречⷭ҇тѣй є҆гѡ̀ мт҃ри , съ є҆ѧ̀ ᲂу҆го́дники а҆нтѡ́нїемъ и҆ ѳеᲂдѡ́сїемъ . и҆ спаса́й пᲂю́щихъ тѧ̀ . да зᲂве́мъ тѝ , ра́дꙋисѧ ст҃лю а҆рсе́нїе , па́стырю и҆ ᲂу҆чи́телю на́шъ .

пѣ́снь , з҃ . і҆рмо́съ . Бг҃ᲂпрᲂти́вно велѣ́нїе без̾зако́ннꙋюща мꙋчи́телѧ , высо́къ пла́мень вᲂз̾несло̀ є҆́сть , хрⷭ҇то́съ же прᲂсте́ръ бг҃ᲂчести́вымъ дѣ́темъ , хла́дъ дх҃о́вныи , сы́и бл҃гᲂслᲂве́нъ и҆ препрᲂсла́вленъ . Вы́шнїи всецр҃ю великᲂдержа́вне , мл҃твами твᲂегѡ̀ ᲂу҆го́дника , жи́знь ᲂу҆мирѝ всѣ́мъ сло́ве хрⷭ҇тїа́нѡмъ , пᲂсо́бствꙋѧ на ва́рвары . да тебѣ̀ хрⷭ҇тѐ зᲂве́мъ , бл҃гᲂслᲂве́нъ бг҃ъ ѻ҆ц҃ъ на́шихъ . Прⷭ҇то́лꙋ пред̾стᲂѧ̀ бж҃їю ст҃лю хрⷭ҇то́въ а҆рсе́нїе , мᲂли́ти прилѣ́жнѡ непреста́й ѡ҆ на́съ твᲂи́хъ рабѣ́хъ . да ѻ҆гнѧ̀ вѣ́чнагѡ и҆зба́вимсѧ , и҆ всѧ́кᲂгѡ ѡ҆ѕлᲂбле́нїѧ ѿ вра́гъ нахᲂдѧ́щагѡ , твᲂи́ми мᲂли́твами . И҆сцѣле́нїѧ пᲂдава́еши всю́дꙋ , вѣ́рᲂю к̾ тебѣ̀ притека́ющимъ ст҃лю а҆рсе́нїе . тѣ́мже мо́лимъ тѧ̀ твᲂѝ рабѝ , печа́ль на́шꙋ в̾ ра́дᲂсть прелᲂжѝ , и҆ ѿ всѧ́кїѧ и҆зба́ви ско́рби , твᲂи́ми мᲂли́твами . боⷢ҇ . Стра́сти мᲂегѡ̀ срⷣца и҆сцѣлѝ , ми́лᲂстїю сѝ всепѣ́таѧ . ᲂу҆́мъ мо́й ᲂу҆мирѝ , и҆ дш҃ꙋ мᲂю̀ прᲂсвѣтѝ , и҆ хᲂди́ти мѧ напра́ви на стезю̀ спасе́нꙋю , ꙗ҆́кѡ да пᲂю́ тѧ препѣ́таѧ .

пѣ́снь , и҃ . і҆рмо́съ . Впе́щь ѻ҆́гненнꙋю , к̾ дѣ́темъ є҆вре́йскимъ сᲂше́дшагѡ , и҆ пла́мень на хла́дъ прело́жшагѡ бг҃а , по́йте всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Оу҆стро́ивъ свᲂю̀ жи́знь бг҃ᲂлѣ́пнѡ , ст҃лю а҆рсе́нїе , стрᲂи́тель и҆зрѧ́денъ пᲂказа́сѧ свᲂе́й ѻ҆би́тели , и҆ свѣ́тлѡ прїѧ́телище бж҃їе . Чꙋдесе́мъ глꙋбина̀ , и҆ и҆сцѣле́нїемъ рѣка̀ , и҆сто́чникъ непреста́ненъ . стрꙋѧ̀ ника́кᲂже ѡ҆скꙋдѣва́ема , твᲂѧ̀ ра́ка пᲂказа́сѧ ѻ҆́ч҃е . И҆́же къ бг҃ꙋ мᲂли́твами сѝ , ѡ҆чи́сти на́съ ѿ всѧ́кїѧ скве́рны , те́плᲂю сѝ мᲂли́твᲂю , и҆ скᲂрбе́й и҆ бᲂлѣ́зней , и҆ всѧ́кїѧ нꙋ́жды ст҃лю а҆рсе́нїе и҆зба́ви . боⷢ҇ . Прⷭ҇та́ѧ дв҃о ты́ мѧ спасѝ , и҆ не́мᲂщи мᲂе́й бꙋ́ди по́мᲂщь . скᲂрбе́й мно́гихъ и҆ лю́тыхъ мѧ̀ и҆зба́ви . да тѧ̀ сла́влю є҆ди́нꙋ бцⷣꙋ .

пѣ́снь , ѳ҃ . і҆рмо́съ . Без̾нача́льна рᲂди́телѧ сн҃ъ бг҃ъ и҆ гдⷭ҇ь , вᲂпло́щьсѧ ѿ дв҃цы на́мъ ꙗ҆ви́сѧ , ѡ҆мраче́нныѧ прᲂсвѣти́ти , и҆ сᲂбра́ти растᲂче́нныѧ . тѣ́мъ всехва́льнꙋю бцⷣꙋ велича́емъ . Чꙋдеса́ бо твᲂѧ̀ мно́га , и҆ и҆сцѣле́нїѧ без̾чи́слена , незави́стнѡ пᲂдава́еши , с̾ те́плᲂю вѣ́рᲂю прихᲂдѧ́щимъ , а҆рсе́нїе ст҃лю пᲂхвала̀ землѝ на́шей . Пᲂста́ви тебѐ хрⷭ҇то́съ , мт҃ре свᲂеѧ̀ цр҃кви , стᲂлпа̀ крѣ́пка и҆ непᲂдви́жима . сᲂблюда́юща и҆ назира́юща гра́дъ сво́й непᲂдви́жимъ , и҆ ст҃ꙋ́ю ѻ҆би́тель свᲂю̀ . Ст҃ли ᲂу҆́бѡ , и҆ кн҃ѕи бл҃гᲂчести́вїи , сщ҃е́нницы и҆ и҆́нѡцы , и҆ всѝ лю́дїе , мꙋ́жи и҆ жены̀ , и҆ ста́рцы со младе́нцы , и҆ всѧ́къ во́зрастъ , и҆ всѧ́ко дᲂстᲂѧ́нїе , ст҃лю на́шемꙋ а҆рсе́нїю свѣ́тлѡ пра́зднꙋемъ . боⷢ҇ . Мᲂлѝ свᲂегѡ̀ сн҃а гжⷭ҇е пречⷭ҇таѧ бцⷣе , и҆зба́вити мѧ̀ в̾ де́нь лю́тъ стра́шнагѡ ѡ҆сꙋжде́нїѧ . да ра́дꙋѧсѧ пѣ́сньми велича́ю тѧ̀ .

свѣти́ленъ . Вᲂсхва́лимъ дне́сь пѣ́сньми , вели́кагѡ па́стырѧ и҆ ᲂу҆чи́телѧ а҆рсе́нїѧ бг҃ᲂмꙋ́драгѡ . се́й бо и҆́з̾млада вᲂзлюбѝ хрⷭ҇та̀ , и҆ пречⷭ҇тꙋю є҆гѡ̀ мт҃рь . с̾ не́юже нн҃ѣ мо́литъ хрⷭ҇та̀ бг҃а , пᲂми́лᲂвати дш҃а на́ша . двⷤа . сла́ва , и҆ ны́нѣ , боⷢ҇ . И҆́же ѿ бг҃а ми́рᲂви пᲂда́нымъ бл҃ги́мъ , ты̀ вина̀ бы́сть бцⷣе . но и҆ ны́нѣ ми́лᲂстива сᲂтвᲂрѝ ѡ҆ ѻ҆́бщемъ спасе́нїи , бл҃гᲂпремѣ́ннагѡ бг҃а .

На хвали́тѣхъ , стⷯры , на д҃ . гла́съ , в҃ . Кі́ими пᲂхва́льными вѣнцы̀ ,꙳ ᲂу҆вѧзе́мъ ст҃лѧ ,꙳ бл҃гᲂче́стїѧ ᲂу҆правле́нїе ,꙳ цѣлᲂмꙋ́дрїѧ рачи́телѧ ,꙳ свѣ́тлᲂе цр҃кви ᲂу҆краше́нїе ,꙳ и҆сто́чника бжⷭ҇твеныхъ и҆сцѣле́нїи ,꙳ прᲂли́тїе дарᲂва́нїи дх҃о́вныхъ ,꙳ рѣкꙋ̀ мно́гихъ чꙋде́съ ,꙳ зе́млю на́шꙋ веселѧ́щꙋ ,꙳ ди́внагѡ чꙋдᲂтво́рца а҆рсе́нїѧ ,꙳ пред̾ста́телѧ на́шегѡ и҆ храни́телѧ . двⷤа . Кі́ими дх҃о́вными пѣ́сньми ,꙳ пᲂхва́лимъ а҆рсе́нїѧ сщ҃е́ннагѡ ,꙳ ди́внагѡ в̾ чꙋдесѣ́хъ ,꙳ и҆ беспло́тнымъ сᲂжи́телѧ ,꙳ ѡ҆сщ҃е́ннагѡ ѿ пеле́нъ ,꙳ стᲂлпа̀ цр҃кви непᲂдви́жима ,꙳ весе́лїе землѝ на́шей ,꙳ и҆́нᲂкѡмъ люби́телѧ ,꙳ ꙗ҆́кѡ вᲂи́стинꙋ ѻ҆ц҃а чадᲂлюби́ва ,꙳ и҆ бᲂльны́мъ врача̀ без̾ме́здна . Кі́ими пѣ́снеными дᲂбро́тами ,꙳ ᲂу҆блажи́мъ а҆рсе́нїѧ дᲂстᲂчꙋ́днагѡ ,꙳ печа́льнымъ ᲂу҆тѣше́нїе ,꙳ ѿча́ѧннымъ застꙋ́пника ,꙳ и҆́нᲂкѡмъ ᲂу҆тверже́нїе ,꙳ пᲂхвалꙋ̀ землѝ на́шей ,꙳ ст҃лемъ ᲂу҆краше́нїе ,꙳ рѣкꙋ̀ ми́лᲂсти вᲂи́стинꙋ ,꙳ бжⷭ҇твенагѡ хрⷭ҇то́ва смире́нїѧ ревни́телѧ ,꙳ пᲂдаю́щагѡ ми́рᲂви ве́лїю млⷭ҇ть . сла́ва . гла́съ , и҃ . Прїидѣ́те стеце́мсѧ всѝ , к̾ бжⷭ҇твенѣй па́мѧти ѻ҆ц҃а на́шегѡ , и҆зрѧ́днагѡ чꙋдᲂтво́рца а҆рсе́нїѧ . се́й бо ѿ ю҆́нᲂсти жела́нїе бжⷭ҇твенᲂе в̾ срⷣцы свᲂе́мъ прїи́мъ , и҆ вᲂз̾люби́въ хрⷭ҇та̀ , и҆ пречⷭ҇тꙋю є҆гѡ̀ мт҃рь . є҆́йже и҆ ѻ҆би́тель сᲂтвᲂрѝ , и҆ вельмѝ ᲂу҆красѝ , и҆ мно́жество и҆́нѡкъ сᲂбра̀ . тѣ́мъ бы́въ хрⷭ҇тᲂлюби́вымъ кн҃ѕе́мъ ᲂу҆чи́тель пра́выѧ вѣ́ры . вельмо́жамъ тве́рдᲂе защище́нїе . си́рымъ ꙗ҆́кѡ ѻ҆ц҃ъ милᲂсе́рдъ . вдᲂви́цамъ те́плᲂе застꙋпле́нїе . скᲂрбѧ́щимъ ᲂу҆тѣше́нїе . бᲂлѧ́щимъ и҆сцѣле́нїе . ра́дꙋисѧ и҆ весели́сѧ бж҃їѧ мт҃ре цр҃кви , ꙗ҆́кѡ люби́мыи тᲂбо́ю в̾ тебѣ̀ пᲂчи́лъ є҆́сть , бг҃ᲂмꙋ́дрыи а҆рсе́нїи . но ѽ бг҃ᲂбл҃же́нныи ѻ҆́ч҃е , непреста́й мᲂлѧ́сѧ ѡ҆ ста́дѣ свᲂе́мъ , и҆ ѡ҆ всѣ́хъ и҆́же вѣ́рᲂю чтꙋ́щихъ всечестно́е ᲂу҆спе́нїе твᲂѐ . и҆ ны́нѣ , боⷢ҇ . Влⷣчце прїимѝ мл҃твꙋ ра́бъ свᲂи́хъ , и҆ и҆зба́ви на́съ ѿ всѧ́кїѧ нꙋ́жды и҆ печа́ли .

Славᲂсло́вїе вели́кᲂе , и҆ ѿпꙋ́стъ .

На литꙋргі́и , бл҃же́нна , на и҃ . ѿ кано́на , ст҃лю , пѣ́снь г҃ ѧ , и҆ ѕ҃ ѧ .

прᲂки́мен̾ , ѱл҃о́мъ дв҃дᲂвъ . честна̀ пре́д̾ гдⷭ҇емъ сме́рть прпⷣбныхъ є҆гѡ̀ . сти́хъ . что̀ вᲂзда́мъ гдⷭ҇ви ѡ҆ всѣ́хъ , и҆́хже вᲂзда́стъ ми . а҆пⷭ҇лъ , къ є҆вре́ѡмъ . заⷱ҇ , та҃і , ѿ пᲂлꙋ̀ .= а҆ллилꙋ́їѧ . і҆єре́и твᲂѝ ѡ҆блекꙋ́тсѧ в̾ пра́вдꙋ , и҆ прпⷣбнїи твᲂѝ вᲂз̾ра́дꙋютсѧ . =сти́хъ . бл҃же́нъ мꙋ́жь бᲂѧ́исѧ гдⷭ҇а , в̾ за́пᲂвѣдехъ є҆гѡ̀ вᲂсхо́щетъ ѕѣлѡ̀ . є҆ѵⷢ҇а́лїе , ѿ =матѳе́ѧ . заⷱ҇ , а҃і , ѿ пᲂлꙋ̀ . =прича́стен̾ . въ па́мѧть вѣ́чнꙋю бꙋ́детъ пра́ведникъ .

<< Previous

Contents

Next >>