20 марта: прпп. отец в обители св. Савы убиенных

МЦⷭ҇А ТОГО́ЖЕ ВЪ К҃ ДН҃Ь

прпⷣбныхъ ѻ҆ц҃ъ на́шихъ , и҆́же во ѡ҆би́тели ст҃а́гѡ са́вы ᲂу҆бїе́нныхъ . Ве́черъ , на гдⷭ҇и вᲂзва́хъ , стихѣ́ры . гла́съ , д҃ . поⷣ . ꙗ҆́кѡ до́блѧ .= Жела́нїю кра́йнемꙋ ,꙳ до кᲂнца̀ прилежа́ще ,꙳ жите́йскїѧ красᲂты̀ прпⷣбнїи ,꙳ ꙗ҆́кѡ ᲂу҆ме́ты всѧ̀ вмѣни́сте .꙳ и҆ є҆ди́на пребыва́ющаѧ ,꙳ бдѣ́нїемъ и҆ мᲂли́твами ,꙳ дᲂжде́мъ же и҆ ва́рᲂмъ стѧжа́сте .꙳ є҆динᲂжи́теле в̾кꙋ́пѣ бы́вше ,꙳ сᲂгра́ждане а҆́нг҃лѡмъ ꙗ҆ви́стесѧ бл҃гᲂда́тїю . Сᲂкрꙋша́еми дреко́лїемъ ,꙳ и҆ ка́менїемъ пᲂбива́еми ,꙳ и҆ ѻ҆рꙋ́жїи раз̾сѣка́еми .꙳ є҆динᲂмышле́нїе неразрꙋши́сте мꙋ́ченицы ,꙳ любо́вїю свѧ́занїи и҆ жела́нїемъ бра́тскимъ .꙳ но в̾кꙋ́пѣ ᲂу҆мерщвлѧ́еми ,꙳ и҆ раз̾сѣка́еми на ᲂу҆́ды страстᲂно́сцы .꙳ на трапе́зѣ пᲂлᲂжи́стесѧ бжⷭ҇твенѣй ,꙳ ꙗ҆́кѡ же́ртвы непᲂро́чныѧ . =И҆ ѻ҆гне́мъ снеда́еми ,꙳ и҆ ᲂу҆давле́нїемъ стѧза́еми ,꙳ дꙋ́ши преда́сте ꙗ҆́кѡ непᲂро́чныѧ же́ртвы ,꙳ мч҃нцы сла́внїи ,꙳ въ рꙋ́цѣ всѣ́хъ цр҃ѧ .꙳ и҆ сᲂвᲂкꙋпи́стесѧ с̾ ли́ки беспло́тныхъ си́лъ ,꙳ вѣ́чнꙋю наслѣ́дᲂвасте сла́вꙋ .꙳ є҆́йже причасти́тисѧ ва́съ вᲂсхвалѧ́ющимъ ,꙳ непреста́ннѡ мᲂли́тесѧ .= сла́ва , и҆ ны́нѣ , боⷢ҇ . Пᲂкаѧ́нїѧ и҆зрѧ́днᲂе ,꙳ и҆ спасе́нᲂе врачевство̀ ,꙳ ꙗ҆́же бг҃а ро́ждьшаѧ сп҃са мᲂегѡ̀ ,꙳ и҆ слеза́мъ то́ки ,꙳ и҆ часа̀ по́мыслъ страшна́гѡ и҆ ᲂу҆жа́снагѡ ,꙳ и҆ сꙋда̀ неꙋмы́тнагѡ ,꙳ ты̀ мнѣ̀ да́рꙋй и҆збѣ́гнꙋти мᲂли́твами твᲂи́ми ,꙳ ѽ дв҃о мꙋче́нагѡ тре́пета ,꙳ и҆ бжⷭ҇твенꙋю пᲂлꙋчи́ти бл҃гᲂда́ть . крⷭ҇тᲂбоⷢ҇ . Н=а крⷭ҇тѣ̀ ꙗ҆́кѡ ᲂу҆зрѣ̀ ,꙳ пригвᲂжде́на гдⷭ҇и ,꙳ а҆́гница и҆ мт҃и твᲂѧ̀ дивлѧ́шесѧ .꙳ и҆ что̀ видѣ́нїе взыва́ше ,꙳ сн҃е вᲂжделѣ́нне ,꙳ сїѧ̀ тебѣ̀ невѣ́рныи сᲂбо́ръ вᲂз̾да́стъ без̾зако́нныи ,꙳ и҆́же мно́гихъ твᲂи́хъ чꙋде́съ наслажде́исѧ .꙳ но сла́ва не и҆з̾рече́ннᲂмꙋ тѝ ,꙳ сᲂше́ствїю влⷣко .

На ᲂу҆́трени . ѻ҆́ба кано́на , во ѻ҆кта́и . и҆ ст҃ы́мъ , на д҃ . кано́нъ , є҆мꙋ́же краегране́сїе си́це : пѣ́сньми сла́влю мч҃нки є҆динᲂѡ҆бра́зны . твᲂре́нїе кѵ́ръ стефа́на саваи́та . гла́съ , и҃ . пѣ́снь , а҃ . і҆рмо́съ . Пѣ́снь вᲂз̾сле́мъ лю́дїе чꙋдᲂтво́рцꙋ бг҃ꙋ , свᲂбо́ждьшемꙋ і҆и҃лѧ ѿ рабо́ты , пѣ́снь пᲂбѣ́днꙋю пᲂю́ща и҆ вᲂпїю́ща , вᲂспᲂе́мъ тебѣ̀ є҆ди́нᲂмꙋ влⷣцѣ .

запѣ́въ : Ст҃і́и прпⷣбнᲂмч҃нцы , мᲂли́те бг҃а ѡ҆ на́съ . Пѣ́сньми бг҃ᲂвѣнча́ннᲂе мно́жество , сщ҃е́нныхъ мꙋ́ченикъ твᲂи́хъ , жела́ющемꙋ пᲂхвали́ти , хрⷭ҇тѐ с̾ нб҃сѐ пᲂда́ждь ми свѣ́тъ ра́зꙋма си́хъ мᲂльба́ми , да вᲂспᲂю̀ бг҃ᲂвѣща́ннꙋю пѣ́снь . За́висть ѿверго́сте , пло́ти и҆ дх҃а пребᲂга́тїи , ми́ра смертᲂно́сныхъ сласте́й и҆з̾бѣ́гше . ра́вно же а҆́нг҃льско житїѐ пᲂжи́вше , в̾ вы́шнее преидо́сте жили́ще . Зако́нᲂмъ дх҃а ꙗ҆́вѣ , ᲂу҆́ды ѡ҆кᲂрми́вше ва́шегѡ чꙋ́вства . хра́мы ѡ҆сщ҃е́нны бг҃ꙋ пᲂказа́стесѧ , мч҃нцы бг҃ᲂно́сцы . в̾ ва́съ бо хрⷭ҇то́съ вᲂдвᲂри́сѧ . Бᲂга́тство тли́мᲂе на землѝ , ѡ҆ста́вльше ст҃і́и . и҆ кра́снаѧ житїѧ̀ , ꙗ҆́кѡ сѣ́нъ презрѣ́вше . и҆ хрⷭ҇то́ви ᲂу҆гᲂди́вше , недви́жимᲂе црⷭ҇тво ны́нѣ вᲂспрїѧ́сте . боⷢ҇ . Лѣ́ствица ꙗ҆ви́сѧ мы́сленаѧ , ю҆́же і҆а́кѡвъ ви́дѣ и҆збра́нныи бж҃їи . и҆з̾ неѧ́же неи҆зрече́ннымъ сло́вᲂмъ , про́йде беспло́тныи . пло́ть непрело́жнѡ бы́въ , па́че сло́ва и҆з̾ тебѐ бцⷣе .

пѣ́снь , г҃ . і҆рмо́съ . Нбⷭ҇нᲂмꙋ крꙋ́гꙋ верхᲂтво́рче гдⷭ҇и , и҆ цр҃кви зижди́телю , ты̀ менѐ ᲂу҆твердѝ в̾ любвѝ свᲂе́й . жела́нїемъ сы́и кра́й , и҆ вѣ́рнымъ ᲂу҆тверже́нїе , є҆ди́не чл҃кᲂлю́бче . Ѡ҆ст҃и́вше всѐ свᲂѐ мꙋ́ченицы житїѐ , нескве́рно вᲂи́стинꙋ всеви́дѧщемꙋ бг҃ꙋ , принесо́сте всесᲂжже́нїѧ бжⷭ҇твена са́ми себѐ . и҆ сᲂверше́ныѧ вѣнцы̀ прїѧ́сте . Са́вы бг҃ᲂно́снагѡ , ꙗ҆́кѡ ᲂу҆ченицы̀ и҆́скреннїи , є҆́же крᲂмѣ̀ пли́щевъ вᲂз̾желѣ́вше ѡ҆ше́ствїе . невᲂз̾вра́тнѡ стезе́ю ско́рбнᲂю ше́ствꙋюще , жи́зни дᲂстиго́сте без̾кᲂне́чныѧ . Вᲂз̾дѣ́лавше сѣ́мѧ , є҆́же в̾ ва́съ прпⷣбнїи в̾сѣ́ѧнᲂе сло́во . и҆ сле́зными то́ки ѡ҆би́льнѡ напᲂи́вше , стᲂри́чествꙋющїи кла́съ , бг҃ᲂви принесо́сте плᲂдᲂнᲂси́вше . Всели́всѧ въ дв҃ꙋ пло́тїю гдⷭ҇и , ꙗ҆ви́сѧ чл҃кѡмъ , ꙗ҆́кᲂже пᲂдᲂба́ше зрѣ́ти тѧ . ю҆́же и҆ пᲂказа́лъ є҆сѝ ꙗ҆́кѡ и҆́стиннꙋю бцⷣꙋ , и҆ вѣ́рнымъ по́мᲂщь , є҆ди́не чл҃кᲂлю́бче .

сѣда́ленъ . гла́съ , и҃ . Вᲂз̾держа́нїемъ страсте́й , ѻ҆гнепа́льныѧ ᲂу҆мертви́вше зра́ки и҆ пᲂдвиже́нїѧ , по́стницы бг҃ᲂпрїѧ́тнїи . пᲂслѣ́дꙋюще стᲂпа́мъ , всѧ̀ сᲂзда́вшемꙋ є҆ди́нᲂмꙋ бг҃ꙋ . ꙗ҆́кᲂже прїѧ́тна же́ртва жива̀ и҆ ѡ҆сщ҃е́нна , принесо́стесѧ закᲂле́нїемъ рꙋ́къ и҆нᲂплеме́нникъ , бїе́ми закала́еми , и҆ нꙋ́жнѡ пресѣка́еми .= сла́ва , и҆ нн҃ѣ , боⷢ҇ . Бг҃ᲂра́дᲂваннаѧ чи́стаѧ и҆ бл҃гᲂслᲂве́наѧ , и҆́же за милᲂсе́рдїе щедро́тъ и҆з̾ тебѐ рᲂжде́ннагѡ , с̾ вы́шними си́лами , и҆ а҆рха́нг҃лы , и҆ со всѣ́ми беспло́тными , ѡ҆ на́съ мᲂлѝ непреста́ннѡ . да́ти на́мъ пре́жде кᲂнца̀ прᲂще́нїе , и҆ грѣхо́мъ ѡ҆чище́нїе , и҆ житїю̀ и҆справле́нїе . ꙗ҆́кѡ да ѡ҆брѧ́щемъ млⷭ҇ть . =крⷭ҇тᲂбоⷢ҇ . Сн҃а твᲂегѡ̀ и҆ бг҃а крⷭ҇то́мъ дв҃о ѡ҆гражда́еми , бѣсо́въ прило́ги и҆ кᲂва́рства при́снѡ пᲂбѣжда́емъ . сꙋ́щꙋю тѧ̀ бцⷣꙋ вᲂи́стинꙋ пᲂю́ще , любо́вїю всѝ ро́ди ᲂу҆блажа́емъ чи́стаѧ , ꙗ҆́кᲂже прᲂрекла̀ є҆сѝ . тѣ́мже сᲂгрѣше́нїемъ на́шимъ , ѡ҆ставле́нїе мᲂли́твами твᲂи́ми да́рꙋй .

пѣ́снь , д҃ . і҆рмо́съ . Всѣ́дъ на кᲂнѧ̀ , на а҆пⷭ҇лы твᲂѧ̀ гдⷭ҇и , и҆ прїѧ́тъ рꙋка́ма си ᲂу҆зды̀ и҆́хъ , и҆ спасе́нїе бы́сть є҆жде́нїе твᲂѐ . вѣ́рᲂю вᲂпїю́щимъ тѝ , сла́ва си́лѣ твᲂе́й гдⷭ҇и . Впꙋсты́ни без̾во́днѣй , терпѧ́щаѧ зрѧ̀ вра́гъ , дᲂбрᲂдѣ́тельми же разли́чными красѧ́щасѧ , непᲂбѣди́мыѧ мꙋ́ченики , ѻ҆гне́мъ распалѧ́шесѧ лю́тѣ , за́вистїю ѡ҆блᲂже́нъ , и҆ на ѡ҆пᲂлче́нїе гᲂтᲂвлѧ́шесѧ . Оу҆кᲂрени́въ пре́лесть во свᲂи́хъ є҆мꙋ̀ ᲂу҆ченицѣ́хъ , на дрꙋ́жнᲂе ᲂу҆бі́йство , пᲂꙋча́ше ва́рварскаѧ кᲂлѣ́на , ѕмі́и лꙋка́выи . и҆́мже и҆ ѿ пꙋсты́ни и҆з̾гна́ти прпⷣбныѧ мнѧ́шесѧ . Свирѣ́пѡ и҆́же ѡ҆кре́стныѧ ѡ҆бъе́мъ , ꙗ҆́кᲂже вᲂз̾желѣ̀ . ѿгна́ти же си́хъ невᲂз̾мо́же , непᲂбѣди́мыѧ , пра́ведныхъ сᲂпрᲂтивᲂбо́рецъ . пᲂбѣжде́нъ же бы́въ неви́димѡ , ꙗ҆́вѣ пᲂсрами́сѧ . Ꙗ҆́да и҆ вражды̀ и҆спо́лнь ᲂу҆стреми́сѧ , со ѻ҆рꙋ́жники ѕлᲂнача́льникъ , ѕвѣрᲂви́днᲂже бл҃же́ннымъ приткнꙋ́всѧ . и҆ ра́нами не стерпи́мыми , кро́вьнїи пᲂто́ки и҆з̾лїѧ́шасѧ . Текꙋ́щагѡ и҆стѧза́хꙋ вещества̀ , златᲂтлѣ́ннаѧ сᲂкро́вища , и҆́же на землѝ ᲂу҆пᲂва́нїѧ ᲂу҆тве́рждьшїи . до́блїи же на нб҃са̀ пᲂло́жше ᲂу҆пᲂва́нїѧ , вᲂпїѧ́хꙋ . сла́ва си́лѣ твᲂе́й гдⷭ҇и . Ꙗ҆́кᲂже ѕвѣ́рїе дреко́льми неми́лᲂстивнѡ , и҆ мечѝ прпⷣбныѧ , и҆ ка́менїемъ ᲂу҆ранѧ́хꙋ . свᲂѧ̀ старѣ́йшины сказа́ти велѧ́ще . но пребыва́хꙋ всѝ , зако́нᲂмъ любвѐ ᲂу҆твержа́еми . боⷢ҇ . Дв҃о и҆ мт҃и , ты̀ а҆пⷭ҇лѡмъ ᲂу҆тверже́нїе , и҆ мч҃нкѡмъ ᲂу҆дᲂбре́нїе . прпⷣбнымъ пᲂхвала̀ , и҆ спасе́нїе вѣ́рᲂю пᲂю́щимъ . сла́ва си́лѣ твᲂе́й .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твᲂегѡ̀ свѣ́те незахᲂдѧ́и , пᲂкры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ запᲂвѣде́й ти пꙋтѝ мᲂѧ̀ напра́ви мᲂлю́тисѧ . Наꙋчи́вшесѧ любвѝ сп҃се , сᲂю́зꙋ сверше́нїѧ прпⷣбнїи . и҆ нака́заны тᲂбо́ю , дꙋ́ши пᲂлᲂжи́ша по свᲂи́хъ дрꙋзѣ́хъ . твᲂе́й вы́ше чл҃къ во́льнѣй стра́сти пᲂдо́бѧщесѧ . Вельмѝ па́че є҆стества̀ , и҆́же пло́тїю во́лею рᲂжде́исѧ хрⷭ҇тѐ . пᲂвелѣ́нїемъ твᲂи́мъ , сме́рти ꙗ҆ви́шасѧ держа́внѣе . и҆́бо твᲂи́мъ сᲂставлѧ́ющесѧ зако́нᲂмъ , ᲂу҆́мрети по дрꙋзѣ́хъ , бл҃гᲂхва́льнѡ мꙋ́дрїи тща́хꙋсѧ . Ѡ҆кро́пльшесѧ ѵ҆ссо́пᲂмъ кр҃ще́нїѧ мы́сленымъ дш҃и , свᲂи́ми же а҆́бїе ѡ҆крᲂпи́стесѧ крᲂвьмѝ прпⷣбнїи . во ᲂу҆стремле́нїи же ѻ҆гнѧ̀ , ꙗ҆́кѡ зла́то и҆скꙋси́вшесѧ . прїѧ́тна бы́сте же́ртва бл҃гᲂꙋха́нна бг҃ᲂви . боⷢ҇ . Мт҃рьне дерзнᲂве́нїе , и҆́же къ сн҃ꙋ свᲂемꙋ̀ стѧжа́вши пречⷭ҇таѧ . сро́днагѡ прᲂмышле́нїѧ на́шегѡ непре́зри мо́лимсѧ . ꙗ҆́кѡ тѧ̀ є҆ди́нꙋ хрⷭ҇тїа́не ко влⷣцѣ , ѡ҆чище́нїе млⷭ҇тивнѡ пред̾лага́емъ .

пѣ́снь , ѕ҃ . і҆рмо́съ . Къ мᲂгꙋ́щемꙋ спасти́ мѧ бг҃ꙋ , и҆з̾ глꙋбины̀ грѣхо́вныѧ вᲂзᲂпи́хъ , ѿ тлѝ вᲂз̾ведѝ живо́тъ мо́й , ꙗ҆́кѡ чл҃кᲂлю́бецъ . Преще́нїи ва́рварскихъ не ᲂу҆бᲂѧ́вшесѧ , слꙋжи́телїе хрⷭ҇то́вы . житїе́ бо непреста́ннымъ пᲂꙋче́нїемъ сме́ртнымъ пред̾ста́виша . Мнѧ́ще бᲂгатѣ́ти нестѧжа́телѧ , нечести́выѧ неща́днѡ мꙋ́чахꙋ . и҆́же тлѣ́ннаѧ ᲂу҆́бѡ пᲂве́ргшихъ , стѧжа́вшихъ же нетлѣ́ннаѧ . Си́лᲂю непᲂбѣди́мᲂю ѡ҆дѣ́ѧвшесѧ , хрⷭ҇то́вы страда́льцы , пᲂбѣди́ша мы́сленыѧ лестьцы̀ , и҆ ва́рварскаѧ шата́нїѧ . боⷢ҇ . Ꙗ҆́кѡ на ѻ҆́блацѣ ле́гцѣ прїи́де на тебѣ̀ , црⷭ҇твꙋѧи гдⷭ҇ь , низ̾лᲂжи́ти всенепᲂро́чнаѧ , є҆гѵ́петскаѧ рꙋкᲂтвᲂре́нїѧ .

пѣ́снь , з҃ . і҆рмо́съ . И҆́же халдѣ́йскїѧ пе́щи , всепа́гꙋбнꙋю си́лꙋ ᲂу҆га́сше , ѻ҆́бразᲂмъ а҆́нг҃ла сᲂше́дша . зижди́телѧ ю҆́нᲂши взыва́хꙋ , блгⷭ҇ве́нъ є҆сѝ хвали́мыи бж҃е ѻ҆ц҃ъ на́шихъ . И҆з̾немо́гше в̾кꙋ́пѣ , ѻ҆рꙋ́жїѧ сᲂпрᲂти́вныхъ по́лкъ , ви́димыхъ и҆ неви́димыхъ , в̾ ра́нахъ зрѧ́ще , мч҃нки пѣснᲂсла́вѧща . бл҃гᲂслᲂве́нъ є҆сѝ и҆ хва́ленъ бж҃е ѻ҆ц҃ъ на́шихъ . Тебѣ̀ хрⷭ҇тꙋ̀ ᲂу҆невѣ́стившесѧ , и҆ жела́нїемъ ти снѣда́еми , є҆ди́наго сꙋ́щаго вᲂз̾люби́ша . ро́дъ и҆ ѻ҆те́чества и҆ бᲂга́тства ѿреко́шасѧ , прибѣга́телїе твᲂѝ , и҆зба́вителю бж҃е ѻ҆ц҃ъ на́шихъ . Оу҆бі́йство ва́рварскᲂе , непретвᲂрѝ рачи́тели твᲂѧ̀ хрⷭ҇тѐ , пꙋсты́ннагѡ бг҃ᲂслꙋже́нїѧ . ᲂу҆бива́ющихъ бо тѣ́ло не ᲂу҆бᲂѧ́шасѧ , твᲂѧ̀ держа́ще за́пᲂвѣди , ꙗ҆́кᲂже кра́йнее ѡ҆снᲂва́нїе . Всѐ къ тебѣ̀ прело́жьше ѿ ми́ра жела́нїе хрⷭ҇тѐ , ꙗ҆́рᲂсть же то́кмѡ на грѣ́хъ вᲂѡ҆рꙋжи́вше . тебѣ̀ ᲂу҆гᲂди́ша , премꙋ́дрымъ ѡ҆б̾е́мшесѧ по́мыслᲂмъ , слꙋже́бницы твᲂѝ гдⷭ҇и . Зако́нъ бг҃ᲂпи́саненъ , в̾нꙋ́трь скрижа́лей срⷣцъ ва́шихъ , ѿ́ бг҃а мч҃нцы прїе́мше . є҆ди́нᲂгѡ въ трⷪ҇цы бг҃а прᲂпᲂвѣ́дасте . тᲂмꙋ̀ вᲂпїю́ще , бл҃гᲂслᲂве́нъ є҆сѝ и҆ хва́ленъ бж҃е ѻ҆ц҃ъ на́шихъ . боⷢ҇ . Во́ свѣтѣ гдⷭ҇ни хᲂдѧ́щїи , прїидѣ́те вᲂспᲂе́мъ бжⷭ҇твенꙋю две́рь , цр҃ѧ црⷭ҇твꙋющимъ , мр҃і́ю чⷭ҇тꙋю бцⷣꙋ вᲂи́стинꙋ . ꙗ҆́кѡ ᲂу҆пᲂва́нїе дш҃а́мъ на́шимъ .

пѣ́снь , и҃ . і҆рмо́съ . Нече́стїѧ ѻ҆рга́ны стра́ннымъ гла́сᲂмъ , бл҃гᲂче́стїѧ же бг҃ᲂвѣща́ннїи вᲂспѣва́хꙋ гꙋ́сльми . бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а , по́йте и҆ превᲂзнᲂси́те єгѡ̀ во́ вѣки . Съ нбⷭ҇ными чи́нми сᲂвᲂкꙋ́пльшесѧ равнᲂа́нг҃льны , всено́щными стᲂѧ́нїи во бдѣ́нїихъ пᲂѧ́хꙋ . бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а , по́йте и҆ превᲂзнᲂси́те єгѡ̀ во́ вѣки . Крⷭ҇тъ взе́мше , тебѣ̀ влⷣцѣ пᲂслѣ́дᲂваша вседꙋ́шнѡ мꙋ́ченицы . пᲂю́ще , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а , по́йте и҆ превᲂзнᲂси́те єгѡ̀ во́ вѣки . Всеѡ҆бра́знѡ , тѣ́ло же и҆ дш҃а и҆ дх҃ъ ѡ҆чи́стивше , всесᲂжже́нїѧ бг҃ꙋ принесо́стесѧ . во ѻ҆гнѝ ѡ҆па́льшесѧ ѻ҆ц҃ы , хрⷭ҇та̀ превᲂзнᲂсѧ́ще во всѧ̀ вѣ́ки . боⷢ҇ . И҆́же во двѣ̀ ѵ҆пᲂста́си , натѧ̀ хꙋ́лѧще нераздѣли́маго , да пᲂсра́мѧтсѧ , ꙗ҆́кᲂже четвери́цꙋ чтꙋ́щїи . мы́ же тебѣ̀ є҆ди́нᲂмꙋ ѿ трⷪ҇цы пᲂкланѧ́емсѧ .

пѣ́снь , ѳ҃ . і҆рмо́съ . Оу҆диви́сѧ ᲂу҆́бѡ ѡ҆ се́мъ не́бо , и҆ землѝ ᲂу҆жасо́шасѧ кᲂнцы̀ , ꙗ҆́кѡ бг҃ъ ꙗ҆ви́сѧ чл҃кѡмъ пло́тїю , чре́во же твᲂѐ бы́сть прᲂстра́ннѣе нб҃съ , тѣ́мъ тѧ̀ бцⷣе , а҆́нг҃лъ и҆ чл҃къ чинᲂнача́лїѧ велича́емъ . Разли́чнѡ ѡ҆бна́жшесѧ по́стницы , и҆ пᲂбѣди́вше мирᲂде́ржца хи́трᲂсти . пᲂсрами́ша мꙋ́жески ꙗ҆́кѡ страда́льцы , ва́рварскᲂе ѡ҆ѕлᲂбле́нїе , си́хъ претерпѣ́вше стремле́нїѧ . тѣ́мже и҆ вѣнцы̀ сꙋгꙋ́бы , прᲂти́вꙋ пра́веднᲂмꙋ пᲂдвигᲂпᲂлᲂже́нїю прїѧ́ша . Въ верте́пахъ и҆ пеще́рахъ , по́стнически жи́знь прᲂхᲂдѧ́ще бл҃же́ннїи . въ пеще́рѣ тѣ́снѣй про́пасти затвᲂре́ни бы́сте несвѣ́тлѣ . ѡ҆багре́ни крᲂвьмѝ жже́нїемъ ѻ҆гнѧ̀ . и҆ и҆́же ѿ ды́ма лю́тᲂю па́рᲂю смѣша́емᲂю , ᲂу҆да́влени бы́вше , пᲂбѣдᲂно́сцы ꙗ҆ви́стесѧ . Пᲂе́мъ по́двиги па́че є҆стества̀ , и҆́же прᲂти́вꙋ грѣхꙋ̀ пᲂстрада́сте . ю҆́нᲂшьски прᲂти́вꙋ ста́вше , ꙗ҆́кѡ хрⷭ҇то́ви во́ини сла́внїи , и҆́бо пᲂбѣди́сте прехва́льнѡ . и҆ ны́нѣ пред̾стᲂѧ́ще , в̾ чинѣ̀ ст҃ы́хъ превысо́кᲂмꙋ , на́съ пᲂмина́йте . Съ са́вᲂю ѻ҆ц҃е́мъ и҆ наста́вникᲂмъ , ꙗ҆́кѡ при́снаѧ ча́да бл҃же́ннїи , на́ нб҃сѣхъ заре́ю ѡ҆дѣѧ́ни трисїѧ́ннᲂю . ѡ҆ на́съ мᲂли́тесѧ , є҆динᲂꙋченицѣ́хъ же и҆ пѣвцѣ́хъ , ми́ръ дарᲂва́ти ѻ҆́бщїи цр҃квамъ , и҆ спасе́нїе дш҃а́мъ на́шимъ . боⷢ҇ . Сринᲂве́ныхъ ѿ нбⷭ҇нагѡ житїѧ̀ , и҆ па́дшихъ ѡ҆каѧ́ннѡ в̾ сме́рть , па́ки на́съ мт҃и бы́вши и҆зба́вителѧ , вᲂз̾вела̀ є҆сѝ пречⷭ҇таѧ . и҆ к̾ пе́рвᲂмꙋ па́ки тече́нїѧ спᲂдо́била є҆сѝ ѻ҆те́чествꙋ . тѣ́мже тѧ̀ бцⷣе , непреста́ннѡ велича́емъ .

<< Previous

Contents

Next >>