21 марта: прп. Иакова исповедника

МЦⷭ҇А ТОГО́ЖЕ ВЪ К҃А ДН҃Ь

прпⷣбнагѡ ѻ҆ц҃а на́шегѡ и҆ и҆спᲂвѣ́дника , і҆а́кѡва є҆пкⷭ҇па . Ве́черъ , на гдⷭ҇и вᲂзва́хъ , стⷯры . гла́съ , д҃ . поⷣ . да́лъ є҆сѝ зна́менїе .= Вѣ́чнꙋющꙋю ,꙳ и҆ ника́кᲂже мимᲂтекꙋ́щꙋю ,꙳ вᲂспᲂмина́ѧ красᲂтꙋ̀ .꙳ сла́вꙋ преѡ҆би́дѣлъ є҆сѝ ,꙳ прехᲂдѧ́щꙋю и҆ пᲂгиба́ющꙋю .꙳ и҆ крⷭ҇тъ вᲂспрїе́мъ ,꙳ распе́ншемꙋсѧ пᲂслѣ́дᲂвалъ є҆сѝ .꙳ и҆ пло́ть пᲂкᲂри́въ вᲂз̾держа́тельными по́двиги .꙳ сегѡ̀ ра́ди па́мѧть твᲂю̀ ,꙳ сᲂверша́емъ і҆а́кѡве . Ми́рᲂви и҆ стрⷭ҇те́мъ распина́емь і҆а́кѡве ,꙳ дш҃ꙋ сᲂблю́лъ є҆сѝ ,꙳ нескве́рнꙋ и҆ небла́зненꙋ ,꙳ несмѣ́шенꙋ до́льними ѻ҆́ч҃е вещьмѝ ,꙳ и҆ видѣ́нїи та́йными ,꙳ вᲂз̾летѣ̀ к̾ нбⷭ҇нымъ .꙳ и҆дѣ́же свᲂѐ житїѐ пред̾вᲂзлᲂжи́лъ є҆сѝ прпⷣбне ,꙳ ꙗ҆́кѡ хрⷭ҇то́ви дрꙋ́гъ и҆́скренїи ,꙳ и҆ ꙗ҆́кѡ ᲂу҆го́дникъ вѣ́ренъ . Неѕло́бивъ и҆ цѣ́лъ ,꙳ ми́лᲂстивъ и҆ братᲂлю́бивъ ,꙳ смиренᲂмꙋ́дръ и҆ кро́тᲂкъ ,꙳ любвѐ и҆спо́лненъ ,꙳ ми́лᲂстынею ᲂу҆кра́шенъ ,꙳ терпѣ́нїемъ пᲂжида́ѧ .꙳ вѣ́рᲂю и҆ наде́ждею ᲂу҆краша́емь ,꙳ пᲂказа́лсѧ є҆сѝ пресла́вне .꙳ мᲂли́твами ᲂу҆дᲂбрѧ́емь ,꙳ и҆ бжⷭ҇твеными свѣ́тлᲂстьми сщ҃е́ннѡ ѡ҆блиста́емъ . сла́ва , и҆ ны́нѣ , боⷢ҇ . Скве́рнꙋ ѿмы́и страстна́гѡ се́рдца мᲂегѡ̀ ,꙳ бцⷣе всепѣ́таѧ .꙳ и҆ всѧ̀ ꙗ҆́звы и҆ гнᲂе́нїѧ сегѡ̀ ,꙳ ꙗ҆́же ѿ грѣха̀ ѡ҆чи́сти чⷭ҇таѧ .꙳ и҆ ᲂу҆ма̀ мᲂегѡ̀ ᲂу҆ста́ви непᲂстᲂѧ́нїе .꙳ ꙗ҆́кѡ да си́лꙋ твᲂю̀ ,꙳ и҆ вели́кᲂе застꙋпле́нїе ,꙳ вᲂз̾велича́ю ѡ҆каѧ́нныи ,꙳ и҆ непᲂтре́бныи ра́бъ тво́й . =крⷭ҇тᲂбоⷢ҇ . Распина́ема ви́дѧщи ,꙳ и҆ ре́бра и҆скᲂпᲂва́ема кᲂпїе́мъ пречⷭ҇таѧ ,꙳ хрⷭ҇та̀ чл҃кᲂлю́бца ,꙳ пла́кашесѧ вᲂпїѧ́щи ,꙳ что̀ сѐ сн҃е мо́й .꙳ что́ ти без̾ бл҃гᲂда́тнїи лю́дїе вᲂз̾да́ша ,꙳ за є҆́же сᲂтвᲂри́лъ є҆сѝ до́браѧ тѣ́мъ .꙳ и҆спѣши́ши мѧ̀ без̾ча́дствᲂвати вселюбе́зне .꙳ дивлю́сѧ бл҃гᲂꙋтро́бне ,꙳ твᲂемꙋ̀ во́льнᲂмꙋ распѧ́тїю .

На ᲂу҆́трени . ѻ҆́ба кано́на , во ѻ҆кта́и . и҆ ст҃о́мꙋ , на д҃ . кано́нъ . твᲂре́нїе и҆гна́тїево . гла́съ , в҃ . пѣ́снь , а҃ . і҆рмо́съ . Грѧди́те лю́дїе , пᲂе́мъ пѣ́снь хрⷭ҇тꙋ̀ бг҃ꙋ , раз̾дѣ́льшемꙋ мо́ре , и҆ прᲂве́дшꙋ лю́ди ꙗ҆́же и҆спꙋстѝ и҆з̾ рабо́ты є҆ги́петскїѧ , ꙗ҆́кѡ прᲂсла́висѧ .

запѣ́въ : Прпⷣбне ѻ҆́ч҃е и҆ и҆спᲂвѣ́дниче і҆а́кѡве , мᲂлѝ бг҃а ѡ҆ на́съ . Прᲂсвѣще́нїе трⷪ҇ческᲂе і҆а́кѡве , в̾ дш҃ꙋ прїе́мъ , ми́ра ѡ҆ста́вилъ є҆сѝ те́мнꙋю пре́лесть . и҆ преми́рнꙋю сла́вꙋ пᲂлꙋчи́лъ є҆сѝ . Ты̀ крⷭ҇тъ на ра́мо взе́мъ , распе́ншемꙋсѧ прпⷣбне пᲂслѣ́дᲂвалъ є҆сѝ . и҆ и҆́нᲂчествᲂвавъ премꙋ́дро , стра́сти вᲂз̾держа́нїемъ ѻ҆́ч҃е и҆з̾сꙋши́лъ є҆сѝ . Вмѣсти́теленъ дарᲂва́нїемъ дх҃а , ѿ мѧ́г̾кихъ нᲂгте́й свᲂи́хъ сᲂсꙋ́дъ бы́лъ є҆сѝ . и҆ вы́шнѧгѡ граждани́нъ сїѡ́на , и҆ наслѣ́дникъ бл҃же́нне і҆а́кѡве . боⷢ҇ . Є҆ди́на бг҃а всѣ́ми сꙋ́ща невмѣсти́ма , тебѣ̀ вмѣ́стна бы́вша за бл҃гᲂсть , рᲂдила̀ є҆сѝ ѻ҆трᲂкᲂви́це . є҆го́же мᲂлѝ спастѝ вᲂспѣва́ющихъ тѧ̀ .

пѣ́снь , г҃ . і҆рмо́съ . Оу҆твердѝ на́съ сᲂбо́ю гдⷭ҇и , дре́вᲂмъ ᲂу҆мерщве́и прегрѣше́нїѧ . и҆ стра́хъ тво́й всадѝ в̾ срⷣца̀ на́ша , ꙗ҆́кѡ чл҃кᲂлю́бецъ . Житїѐ твᲂѐ красно̀ , и҆ сло́во со́лїю любвѐ бг҃ᲂмꙋ́дре раствᲂрено̀ , срⷣце бл҃гᲂꙋмиле́нно . сегѡ̀ ра́ди тѧ̀ вѣ́рᲂю ᲂу҆бл҃жа́емъ . Хрⷭ҇та̀ на́съ ра́ди ꙗ҆́вльшагᲂсѧ пло́тїю , бжⷭ҇твеныи пᲂчита́ѧ ѻ҆́бразъ . гᲂне́нїѧ ѻ҆́ч҃е претерпѣ́лъ є҆сѝ , и҆ бѣды̀ и҆ ско́рби всеблаже́нне . Ꙗ҆́кѡ же́ртвꙋ чⷭ҇тꙋ себѐ прине́слъ є҆сѝ гдⷭ҇ви , ᲂу҆мерщвле́нїемъ грѣха̀ . и҆ же́ртвы без̾кро́вны тᲂмꙋ̀ , ст҃лю зако́ннѡ принесѐ . боⷢ҇ . Зла́тꙋ ꙗ҆́кѡ вᲂи́стинꙋ кади́льницꙋ , и҆ ста́мнꙋ ма́нны , и҆ бжⷭ҇твенꙋю го́рꙋ . и҆ пᲂла́тꙋ прекраснꙋ̀ , бж҃їю тѧ̀ дв҃о и҆менꙋ́емъ .

сѣда́ленъ . гла́съ , д҃ . Хрⷭ҇то́ви пᲂслѣ́дᲂвавъ , ми́ръ ѡ҆ста́вилъ є҆сѝ , и҆ пло́ть пᲂкᲂри́въ вᲂз̾держа́нїемъ ꙗ҆́вѣ , пребл҃же́нне і҆а́кѡве . ѿ ню́дꙋ же сщ҃е́нїѧ пᲂма́занїе и҆мѣ́лъ є҆сѝ . нн҃ѣ же к̾ невеще́ственымъ преста́вилсѧ є҆сѝ ликѡ́мъ , мᲂлѝ ѡ҆ всѣ́хъ на́съ вᲂсхвалѧ́ющихъ тѧ̀ . сла́ва , и҆ ны́нѣ , боⷢ҇ . Є҆ди́на ро́ждьшаѧ твᲂрца̀ всемꙋ̀ . є҆ди́на ᲂу҆краси́вшаѧ чл҃чество , ржⷭ҇тво́мъ твᲂи́мъ бг҃ᲂневѣ́сто , и҆зба́ви мѧ ѿ сѣ́ти льсти́вагѡ стрѣльца̀ . пᲂста́ви мѧ на ка́мени хрⷭ҇то́вѣхъ хᲂтѣ́нїи , тᲂгѡ̀ мᲂлѧ́щи прилѣ́жнѡ , є҆го́же вᲂплᲂти́ла є҆сѝ .= крⷭ҇тᲂбоⷢ҇ . Н=а крⷭ҇тѣ̀ вᲂз̾вы́шена ꙗ҆́кѡ ᲂу҆зрѣ̀ , нескве́рнаѧ мт҃и твᲂѧ̀ сло́ве бж҃їи , мт҃рьски рыда́ющи вѣща́ше . что̀ но́вᲂе и҆ стра́ннᲂе сѐ сн҃е мо́й чꙋ́до . ка́кѡ жи́знь всѣ́хъ , прїе́млеши сме́рть , ѡ҆живи́ти ᲂу҆ме́ршїѧ хᲂтѧ̀ , ꙗ҆́кѡ милᲂсе́рдъ .

пѣ́снь , д҃ . і҆рмо́съ . Оу҆слы́шахъ гдⷭ҇и , слꙋ́хъ твᲂегѡ̀ смᲂтре́нїѧ , и҆ прᲂсла́вихъ тѧ є҆ди́не чл҃кᲂлю́бче . Всено́щными мᲂльба́ми , сла́сти тѣле́сныѧ ᲂу҆спи́въ . без̾стра́стїѧ ꙗ҆ви́сѧ свѣти́льникъ , неꙋсыпа́ющь прпⷣбне . Сле́зными тече́нїи , всегда̀ ѡ҆мыва́ѧсѧ пребл҃же́нне . чи́сто ꙗ҆ви́сѧ прїѧ́телище ст҃а́гѡ дх҃а . Смире́нъ же и҆ кро́тᲂкъ , млⷭ҇тивъ и҆ неѕло́бивъ , цѣлᲂмꙋ́дръ ст҃ль прпⷣбне бы́лъ є҆сѝ . боⷢ҇ . Неи҆скꙋсᲂбра́чнаѧ влⷣчце , ꙗ҆́же бг҃а во́ чревѣ заче́нши , напа́стей и҆ печа́лей всѣ́хъ и҆зба́ви .

пѣ́снь , є҃ . і҆рмо́съ . Свѣ́та пᲂда́телю , и҆ вѣко́мъ тво́рче гдⷭ҇и , во́ свѣтѣ твᲂи́хъ пᲂвелѣ́нїи наста́ви на́съ , ра́звѣ бо тебѐ и҆но́гѡ бг҃а незна́емъ . Сла́вы жела́нїѧ вᲂи́стинꙋ , є҆́же в̾ чл҃цѣхъ высо́кᲂе прпⷣбне , ꙗ҆́вѣ ѻ҆́ч҃е вᲂз̾гнꙋша́сѧ . и҆ бы́сть свѣти́льникъ , смиренᲂмꙋ́дрїѧ сїѧ́ѧ свѣ́тлᲂстїю . Вᲂз̾держа́нїемъ мно́гимъ , и҆ во бдѣ́нїи прилѣ́жнѣ прпⷣбне , в̾ мᲂли́твѣ же и҆ в̾ ѕлᲂстрада́нїи взыска́лъ є҆сѝ бг҃а , и҆́же тѧ̀ к̾ вы́шнимъ ѡ҆би́телемъ прелᲂжи́вшаго . Оу҆пражнѧ́ѧ себѐ , всено́щными мᲂли́твами стᲂѧ́ше . дш҃е́внымъ ѻ҆́кᲂмъ , бжⷭ҇твеныѧ прїе́млѧ зарѝ , ѻ҆́ч҃е ст҃лю бг҃ᲂмꙋ́дре і҆а́кѡве . боⷢ҇ . Оу҆ѧзви́вшеесѧ прило́ги лꙋка́вагѡ пречⷭ҇таѧ , ꙗ҆́кѡ млⷭ҇тива и҆сцѣлѝ срⷣце мᲂѐ , ꙗ҆́же на крⷭ҇тѣ̀ пло́тїю ᲂу҆ѧ́звенаго , неи҆зрече́ннѡ ро́ждьшаѧ .

пѣ́снь , ѕ҃ . і҆рмо́съ . Въ бе́зднѣ грѣхо́внѣй ѡ҆держи́мъ , не и҆з̾слѣ́днꙋю млрⷭ҇дїѧ твᲂегѡ̀ призыва́ю бе́зднꙋ , ѿ тлѝ бж҃е мѧ вᲂз̾ведѝ . Пᲂто́цы сле́зъ твᲂи́хъ прпⷣбне , мо́ре лю́тыхъ страсте́й и҆з̾сꙋши́ша , и҆ та́мᲂшнее ᲂу҆тѣше́нїе , чи́стѣй тѝ дш҃и и҆схᲂда́таиша . Неѕло́бивъ , кро́тᲂкъ цѣ́лъ , прпⷣбенъ и҆ сла́дᲂкъ , смиренᲂмꙋ́дръ и҆ ти́хъ , и҆ прᲂсвѣще́нїѧ и҆спо́лненъ , пресла́вне ѻ҆́ч҃е бы́лъ є҆сѝ . Съ бжⷭ҇твеными па́стыри , па́мѧть твᲂѧ̀ ѻ҆́ч҃е спрᲂсла́висѧ . ꙗ҆́кᲂже па́стырѧ дᲂбра̀ , па́стырю мꙋ́дре і҆а́кѡве , ꙗ҆́кѡ прпⷣбне ста́до ᲂу҆па́слъ є҆сѝ . боⷢ҇ . И҆́же во́лею всѧ̀ сᲂз̾да́выи , во ᲂу҆тро́бꙋ вᲂсхᲂтѣ́въ бракᲂнеи҆скꙋ́сныѧ всели́тисѧ . и҆́же тлѣ́нїемъ недꙋ́гᲂвавшїѧ , нетлѣ́нїемъ пᲂче́тъ ꙗ҆́кѡ милᲂсе́рдъ .

пѣ́снь , з҃ . і҆рмо́съ . Ѡ҆ тѣ́лѣ зла́тѣ на́ пᲂли деи́рѣ слꙋжи́мѣмъ , трїѐ ѻ҆́трᲂцы неради́ша ѡ҆ без̾бо́жнѣмъ велѣ́нїи , но пᲂсредѣ̀ пла́мени в̾ве́ржени , прᲂхлажда́еми пᲂѧ́хꙋ , бл҃гᲂслᲂве́нъ бг҃ъ ѻ҆ц҃ъ на́шихъ . Мно́га гᲂне́нїѧ , и҆ непреста́нна и҆скꙋше́нїѧ претерпѣ́лъ є҆сѝ . и҆кᲂнᲂбо́рца пᲂбѣжда́ѧ , правᲂсла́вїемъ сїѧ́ѧ . всѧ̀ зрѧ́щїѧ прᲂсвѣща́ѧ , и҆ взыва́ѧ і҆а́кѡве , бл҃гᲂслᲂве́нъ бг҃ъ ѻ҆ц҃ъ на́шихъ . Хрⷭ҇то́во стра́шнᲂе прише́ствїе пᲂмышлѧ́ѧ , со ᲂу҆миле́нїемъ всѐ житїѐ скᲂнча́лъ є҆сѝ , до́ндеже ѡ҆брѣ́те бл҃же́нне , ѡ҆чище́нїе прегрѣше́нїемъ сᲂверше́нѡ , и҆ вѣ́чно ᲂу҆тѣше́нїе , прᲂсвѣще́нїе и҆́стиннѡ , и҆ сла́вꙋ неи҆зрече́ннꙋ . Па́стырѧ хрⷭ҇та̀ , в̾ кро́тᲂсти дш҃и ꙗ҆ви́сѧ а҆́гнѧ . и҆ си́мъ пасо́мъ , па́стырь ѻ҆вца́мъ в̾ дс҃ѣ , ѻ҆́ч҃е слᲂве́снымъ пᲂзна́лсѧ є҆сѝ . с̾ ни́ми пᲂѧ̀ всегда̀ , бл҃гᲂслᲂве́нъ є҆сѝ бж҃е ѻ҆ц҃ъ на́шихъ . боⷢ҇ . Дв҃це сла́внаѧ , неи҆скꙋ́снаѧ бра́кꙋ чи́стаѧ бл҃гᲂслᲂве́наѧ . па́дающимъ и҆справле́нїе . сᲂгрѣша́ющимъ и҆збавле́нїе . спаси́ мѧ блꙋ́днаго спасѝ , сн҃ꙋ твᲂемꙋ̀ зᲂвꙋ́ща , бл҃гᲂслᲂве́нъ є҆сѝ бж҃е ѻ҆ц҃ъ на́шихъ .

пѣ́снь , и҃ . і҆рмо́съ . Впе́щь ѻ҆́гненнꙋю , к̾ дѣ́темъ є҆вре́йскимъ сᲂше́дшагѡ , и҆ пла́мень на хла́дъ прело́жшагѡ бг҃а , по́йте всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Чи́стыи тво́й ᲂу҆́мъ , чистᲂто́ю бжⷭ҇твенᲂю прᲂсвѣще́нъ . бѣсо́вскїѧ тмы̀ и҆ мглы̀ и҆ стра́сти , разꙋ́мнѡ ᲂу҆клᲂни́сѧ прпⷣбне . зᲂвы́и , по́йте всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки .= Раз̾жже́ныѧ врага̀ стрѣ́лы ᲂу҆гаси́лъ є҆сѝ прпⷣбне , ѡ҆дᲂжде́ньми непреста́нныхъ сле́зъ . раз̾жже́гсѧ хрⷭ҇то́вᲂю любо́вїю пребл҃же́нне , пᲂпали́лъ є҆сѝ вещепа́льнᲂе сласте́мъ те́рнїе . Сїѐ ста́до премꙋ́дре , є҆́же со́бралъ є҆сѝ свᲂи́ми ᲂу҆че́нїи , и҆ и҆́же вѣ́рᲂю сᲂверша́ющихъ сщ҃е́ннꙋю и҆ чⷭ҇тнꙋ́ю , и҆ и҆спо́лнь свѣ́та бжⷭ҇твенꙋю па́мѧть твᲂю̀ , сᲂхранѝ мᲂли́твами сѝ , ѿ и҆скꙋше́нїи и҆ бѣ́дъ . =боⷢ҇ . Жи́въ сꙋ́щи и҆сто́чникъ , ꙗ҆́же во́дꙋ жи́зни ро́ждьшаѧ , дш҃ꙋ мᲂю̀ и҆ста́ѧвшꙋю грѣхо́внымъ пла́менемъ , дв҃о бцⷣе напо́й . да тѧ̀ сла́влю во всѧ̀ вѣ́ки .

пѣ́снь , ѳ҃ . і҆рмо́съ . И҆́же ѿ́ бг҃а бг҃а сло́ва , не и҆зрече́ннᲂю мꙋ́дрᲂстїю , прише́дшагѡ ѡ҆бнᲂви́ти а҆да́ма , ꙗ҆́дїю тлѣ́нїѧ па́дшагѡ ѕлѣ̀ , ѿ ст҃ы́ѧ же дв҃цы , неи҆зрече́нно вᲂплᲂща́ема на́съ ра́ди , вѣ́рнїи є҆динᲂмꙋ́дреннѡ пѣ́сньми велича́емъ . По мно́гихъ трꙋдѣ́хъ , и҆ бᲂлѣ́знехъ без̾чи́сленыхъ , пᲂто́въ же и҆ ско́рбей вᲂи́стинꙋ , в̾ приста́нищи пᲂчи́лъ є҆сѝ . нбⷭ҇нᲂе нᲂсѧ̀ бᲂга́тство , бжⷭ҇твеныхъ дᲂбрᲂдѣ́телей сщ҃е́нныи ѻ҆́ч҃е , прпⷣбнымъ ᲂу҆дᲂбре́нїе . Раз̾сꙋже́нїѧ свѣти́льникъ , чꙋ́вствїѧ прⷭ҇то́лъ , неѕло́бивъ кро́тᲂкъ и҆ млⷭ҇тивъ , и҆ бл҃гᲂꙋмиле́нъ бы́сть . пла́чемъ же и҆змыва́ѧ ѻ҆́дръ , ꙗ҆́кᲂже речѐ дв҃дъ . с̾ ни́мже всѧ̀ вѣ́рᲂю чтꙋ́щаѧ тѧ̀ пᲂмина́й . Ꙗ҆́кᲂже дневнꙋ́ю ѕвѣздꙋ̀ , и҆ дх҃а хра́мъ . ꙗ҆́кѡ шипо́къ бл҃гᲂво́нїѧ та́йна , ѻ҆́ч҃е сы́и и҆спо́лнь . ꙗ҆́кѡ высᲂкᲂра́слено дре́во . ꙗ҆́кѡ сла́вы вѣ́чныѧ прича́стника , и҆ ꙗ҆́кѡ мꙋ́дра ст҃лѧ чте́мъ тѧ̀ і҆а́кѡве . Сле́зныѧ пᲂто́цы , в̾ зе́млю се́рдца пᲂсыла́еми бᲂга́тнѡ вᲂи́стинꙋ , кла́съ вᲂз̾расти́вше зрѣ́лъ . дш҃а напита́ющь вѣ́рᲂю чтꙋ́щихъ тѧ̀ прⷭ҇нѡ , ст҃лю бг҃ᲂмꙋ́дре , ѻ҆́ч҃е на́шъ і҆а́кѡве . боⷢ҇ . Пᲂщади́ мѧ гдⷭ҇и пᲂщадѝ , є҆гда̀ хо́щеши мѝ сꙋди́ти , не ѡ҆сꙋдѝ менѐ во ѻ҆́гнь , ни ꙗ҆́рᲂстїю сѝ ѡ҆бличѝ менѐ . мо́литъ тѧ̀ дв҃аѧ ро́ждьшаѧ тѧ̀ хрⷭ҇тѐ . и҆ мно́жество а҆́нг҃лъ , съ прпⷣбными мꙋ́ченики .

<< Previous

Contents

Next >>