22 марта: св. сщмч. Василия Ангирского

МЦⷭ҇А ТОГО́ЖЕ ВЪ К҃В ДН҃Ь

ст҃а́гѡ сщ҃еннᲂмꙋ́ченика васи́лїѧ , презви́тера а҆нги́рскїѧ цр҃кве . Ве́черъ , на гдⷭ҇и вᲂзва́хъ , стихѣ́ры . гла́съ , д҃ . поⷣ . и҆́же зва́нныи свы́ше .= Сщ҃е́нїѧ ѻ҆де́ждею ᲂу҆краше́нъ ,꙳ бг҃ᲂви слꙋжи́лъ є҆сѝ ꙗ҆́кѡ а҆́нг҃лъ .꙳ ве́щнᲂю на́съ ра́ди пло́тїю ꙗ҆́вльшемꙋсѧ ,꙳ жрѐ васи́лїе великᲂи҆мени́те .꙳ ѿ ню́дꙋ же ꙗ҆́кѡ ѻ҆вча̀ сᲂверше́но закла́сѧ ,꙳ и҆ чи́ста же́ртва бы́лъ є҆сѝ .꙳ и҆ принесе́сѧ ны́нѣ , в̾ вы́шнїи же́ртвеникъ .꙳ тѣ́мже тѧ̀ ра́дᲂстными гла́сы ,꙳ прⷭ҇нѡ ᲂу҆бл҃жа́емъ вᲂпїю́ще тѝ ,꙳ мᲂлѝ непреста́ннѡ ,꙳ спасти́сѧ дш҃а́мъ на́шимъ . Ѿꙗ҆́тѣ бы́вши ко́жи ,꙳ сꙋдо́мъ непра́веднымъ .꙳ бᲂлѣ́зни претерпѣ́лъ є҆сѝ ,꙳ в̾зира́ѧ к̾ кᲂнчи́нѣ небᲂлѣ́зненѣй сла́вне ,꙳ и҆ къ вѣнце́мъ страда́вшимъ ᲂу҆гᲂто́ваннымъ .꙳ ѻ҆гне́мъ же ѡ҆бᲂстри́мъ ꙗ҆́кѡ желѣ́зо ,꙳ небᲂкᲂва́ненъ бы́лъ є҆сѝ пребл҃же́нне ме́чь ,꙳ всѧ̀ пᲂсѣка́ѧ вра́жїѧ пᲂлкѝ .꙳ тѣ́мже тѧ̀ пᲂчита́емъ дне́сь ,꙳ всѧ́къ бл҃гᲂчести́выхъ ꙗ҆зы́къ ра́дꙋющесѧ ,꙳ страда́льче дᲂблемꙋ́дрене , дᲂстᲂсла́вне васи́лїе . Оу҆краше́нъ ра́нами бжⷭ҇твеными ,꙳ ѿ́ града во́ градъ свѧ́занъ теча́ше .꙳ свѧза́ѧ мꙋчи́телѧ ,꙳ и҆ свᲂи́хъ сто́пъ ше́ствїе и҆справлѧ́ѧ .꙳ и҆ а҆́бїе в̾ кесарі́йскїи гра́дъ в̾ше́дъ ,꙳ в̾ то́мъ кᲂне́цъ бл҃же́нныи прїѧ́лъ є҆сѝ .꙳ и҆ ко́ градꙋ нбⷭ҇нᲂмꙋ ꙳ вѣнцено́сецъ вᲂз̾ше́лъ є҆сѝ ,꙳ и҆ бг҃ꙋ цр҃ю ны́нѣ пред̾стᲂи́ши .꙳ є҆го́же мᲂлѝ ,꙳ спастѝ и҆ прᲂсвѣти́ти дш҃а на́ша . =сла́ва , и҆ ны́нѣ , боⷢ҇ . Ꙗ҆́кѡ во глꙋбинꙋ̀ мно́гихъ паде́нїи ,꙳ ѡ҆каѧ́ннѡ с̾нидо́хъ ,꙳ ᲂу҆ны́нїемъ мᲂи́мъ и҆ лѣ́нᲂстїю ѻ҆каѧ́нныи .꙳ и҆ не дᲂвѣ́дѣнїемъ ,꙳ и҆ ѿчаѧ́нїемъ ны́нѣ ѡ҆держи́мь є҆́смь .꙳ бꙋ́ди мѝ по́мᲂщь и҆ ѡ҆чище́нїе ,꙳ и҆ спасе́нїе пречⷭ҇таѧ ,꙳ ᲂу҆тѣше́нїе бл҃гᲂпребы́тнѡ пᲂдаю́щи ми .꙳ тѧ̀ мᲂлю̀ , и҆ тебѣ́сѧ ми́лъ дѣ́ю .꙳ припа́даю и҆ вѣ́рᲂю зᲂвꙋ́ ти ,꙳ да небꙋ́дꙋ до кᲂнца̀ льсти́вᲂмꙋ ра́дᲂсть .= крⷭ҇тᲂбоⷢ҇ . Н=ерыда́й менѐ мт҃и ,꙳ зрѧ́щи на́ древѣ пᲂвѣ́шена ,꙳ свᲂегѡ̀ сн҃а и҆ бг҃а ,꙳ и҆́же на вᲂда́хъ пᲂвѣ́шьшаго зе́млю неѡ҆держи́мѡ ,꙳ и҆ всю̀ тва́рь сᲂз̾да́вшаго .꙳ и҆́бо вᲂста́нꙋ и҆ прᲂсла́влюсѧ .꙳ и҆ а҆́дᲂво црⷭ҇тво сᲂкрꙋшꙋ̀ крѣ́пᲂстїю ,꙳ и҆ пᲂтреблю̀ сегѡ̀ си́лꙋ .꙳ и҆ свѧ́занныѧ и҆зба́влю ѕлᲂдѣ́йства є҆гѡ̀ , ꙗ҆́кѡ млрⷭ҇дъ .꙳ и҆ ѻ҆ц҃ꙋ свᲂемꙋ̀ принесꙋ̀ ,꙳ ꙗ҆́кѡ чл҃кᲂлю́бецъ .

На ᲂу҆́трени . ѻ҆́ба кано́на , во ѻ҆кта́и . и҆ ст҃о́мꙋ , на д҃ . кано́нъ , є҆мꙋ́же краегране́сїе си́це : твᲂѧ̀ вели́ко мꙋ́чениче вᲂсхвалю̀ бᲂлѣ́зни . твᲂре́нїе і҆ѡ́сифᲂво . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ хᲂди́въ і҆и҃ль , по бе́зднѣ стᲂпа́ми , гᲂни́телѧ фараѡ́на , ви́дѧ пᲂтᲂплѧ́ема , бг҃ꙋ пᲂбѣ́днꙋю пѣ́снь пᲂе́мъ вᲂпїѧ́ше .

запѣ́в̾ : Ст҃ы́и сщ҃еннᲂмч҃нце васи́лїе , мᲂлѝ бг҃а ѡ҆ на́съ . Твᲂегѡ̀ црⷭ҇твїѧ сла́вꙋ всецр҃ю , честны́и васи́лїи вᲂз̾лю́бль , крѣ́пкѡ на землѝ пᲂстрада̀ . и҆́мже црⷭ҇тва нбⷭ҇нагѡ на́съ спᲂдо́би . Дᲂстᲂхва́льнᲂе житїѐ , и҆ чи́стаѧ жи́знь сла́вне , пᲂдвиго́мъ стезѧ̀ , наслѣ́дника пᲂказа́ша бг҃ꙋ , и҆ граждани́на нбⷭ҇на тѧ̀ сᲂдѣ́лаша . Пᲂвинꙋ́всѧ гдⷭ҇ви , бл҃ги́мъ житїе́мъ премꙋ́дре , пᲂвинꙋ́лъ є҆сѝ врага̀ , и҆ нᲂга́ма пᲂпра́лъ є҆сѝ свѣ́тлѡ , вᲂева́въ на́нь , мꙋ́чениче васи́лїе . Кро́вными тече́нїи , мы́сленагѡ фараѡ́на пᲂтᲂпи́лъ є҆сѝ , всѐ во́инство ꙗ҆́кѡ вᲂи́стинꙋ . и҆ к̾ землѝ вᲂсте́клъ є҆сѝ мꙋ́дре , и҆дѣ́же ѻ҆́блакъ страда́лецъ при́снѡ весели́тсѧ . боⷢ҇ . И҆́же ѻ҆ц҃ꙋ сы́и є҆динᲂча́дыи , вᲂсхᲂтѣ́въ всели́сѧ пречⷭ҇таѧ , во твᲂю̀ ᲂу҆тро́бꙋ . и҆ чл҃къ бы́сть чи́стаѧ , за́ бл҃гᲂсть спастѝ хᲂтѧ̀ челᲂвѣ́ки .

пѣ́снь , г҃ . і҆рмо́съ . Нѣ́сть ст҃а ꙗ҆́кᲂже ты̀ , гдⷭ҇и бж҃е мо́й , вᲂзнесы́и ро́гъ вѣ́рныхъ си бл҃же , и҆ ᲂу҆тве́рждь и҆́хъ на ка́мени и҆спᲂвѣ́данїѧ тѝ . Вᲂз̾дви́жесѧ ꙗ҆́кᲂже а҆́гнѧ на́ древо пребл҃же́нне , стрᲂга́нїѧ терпѣ̀ мы́слїю тве́рдᲂю . и҆ низ̾лага́ѧ врагꙋ̀ вᲂз̾нᲂше́нїѧ , си́лᲂю бжⷭ҇твенагѡ дх҃а . Ꙗ҆́звеными мч҃нче дᲂбро́тами , краснѣ́йши ꙗ҆ви́сѧ дш҃е́ю и҆ тѣ́лᲂмъ . мы́слїю чи́стᲂю , бл҃гᲂда́рственыѧ гла́сы вᲂспꙋща́ѧ , пᲂдвигᲂпᲂло́жникꙋ свᲂемꙋ̀ . Вели́ко зва́нїе и҆скі́и , велемꙋ́дренымъ нра́вᲂмъ , вели́кїѧ по́двиги претерпѣ́лъ є҆сѝ мꙋ́дре . и҆ вельмѝ при́снѡ взима́ющагᲂсѧ , мч҃нче смири́лъ є҆сѝ . Бжⷭ҇твенымъ храни́тель бы́въ , пᲂвелѣ́нїемъ бг҃ᲂмꙋ́дре , в̾ темни́цѣ затвᲂрѧ́емь . вѣ́рнымъ ѿверза́ѧ ᲂу҆че́нїѧ пꙋ́ть , въ ширᲂтꙋ̀ ра́зꙋма в̾вᲂдѧ́щїи . боⷢ҇ . Разꙋмѣ́въ и҆з̾дале́ча твᲂѐ зача́тїе и҆са́їа , дх҃ᲂмъ ѻ҆трᲂкᲂви́це , ᲂу҆ѧснѝ то̀ вᲂпїѧ̀ . сѐ во ᲂу҆тро́бѣ дв҃а бг҃а за́чнетъ .

сѣда́ленъ . гла́съ , г҃ . Красᲂта̀ бы́сть цр҃кви , и҆ держа́ва бл҃гᲂче́стїю , и҆ пᲂтреби́тель нече́стїѧ васи́лїе . претерпѣ́въ мꙋ́ки ꙗ҆́кѡ беспло́тенъ , и҆ со беспло́тными сᲂвᲂкꙋпи́сѧ ра́дꙋѧсѧ мꙋ́чениче сла́вне . хрⷭ҇та̀ бг҃а мᲂлѝ , дарᲂва́ти дш҃а́мъ на́шимъ ве́лїю ми́лᲂсть . сла́ва , и҆ ны́нѣ , боⷢ҇ . Бжⷭ҇твенагѡ є҆стества̀ не ѿлꙋ́чьсѧ , пло́ть бы́въ во ᲂу҆тро́бѣ твᲂе́й , но бг҃ъ вᲂчл҃чьсѧ пребы́сть . и҆́же по ржⷭ҇твѣ̀ дв҃ꙋ и҆ мт҃рь тѧ , ꙗ҆́кᲂже пре́жде ржⷭ҇тва̀ сᲂхрани́въ непᲂро́чнꙋ є҆ди́нꙋ гдⷭ҇ь . тᲂгѡ̀ прилѣ́жнѡ мᲂлѝ , дарᲂва́ти на́мъ ве́лїю млⷭ҇ть .= крⷭ҇тᲂбоⷢ҇ . Н=ескве́рнаѧ а҆́гница сло́ва , нетлѣ́ннаѧ дв҃а мт҃и , на крⷭ҇тѣ̀ зрѧ́щи ви́сима , и҆́же и҆з̾ неѧ̀ без̾ бᲂлѣ́зни прᲂзѧ́бшаго , мт҃рьски пᲂдо́бнѡ рыда́ющи взыва́ше , ᲂу҆вы̀ мнѣ̀ ча́до мᲂѐ . ка́кѡ стра́ждеши , хᲂтѧ̀ и҆зба́вити ѿ страсте́й бесче́стїѧ челᲂвѣ́ка .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃ᲂлѣ́пнѡ зᲂве́тъ вᲂпїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи . Ви́дѣвъ ѡ҆блиста́емо твᲂѐ бжⷭ҇твенᲂе лицѐ , заре́ю дх҃о́внᲂю ѕлᲂчести́выи , мч҃нче дивлѧ́шесѧ . и҆ ꙗ҆́кѡ тмѣ̀ слꙋжи́тель , нечꙋ́вственѡ ѡ҆бъюрᲂдѣва́шесѧ . Премꙋ́дрᲂстїю лꙋ́чшею ᲂу҆дᲂбрѧ́емь , мꙋдрецы̀ є҆́ллинскїѧ бг҃ᲂнача́льнᲂю си́лᲂю ѡ҆бꙋи́лъ є҆сѝ . и҆ пᲂстрада̀ терпѣли́внѡ , пᲂбѣ́дѣ вѣне́цъ прїѧ́лъ є҆сѝ . Прᲂсте́рта и҆ всю́дꙋ стрꙋ́жема , ᲂу҆крѣплѧ́ше тѧ сло́во , и҆́же на крⷭ҇тѣ̀ прᲂстре́сѧ васи́лїе . и҆ стра́стїю вѣ́рнымъ дарᲂва́въ без̾стра́стїе . Не пᲂжрꙋ̀ бѣсо́мъ , ни ᲂу҆страша́юсѧ сме́рти , и҆ мꙋ́къ ви́димыхъ , сщ҃е́нныи взыва́ше васи́лїи . є҆ди́наго бг҃а и҆спᲂвѣ́даю , в̾ трⷪ҇цы пᲂзнава́емаго . боⷢ҇ . Пᲂю́ тѧ влⷣчце мнᲂгᲂпѣ́тꙋю . бл҃гᲂслᲂвлю́ тѧ дв҃о , є҆ѧ́же ра́ди чл҃цы всѝ бл҃гᲂслᲂви́хᲂмсѧ . и҆ клѧ́твы дре́внїѧ вᲂи́стинꙋ и҆зба́вихᲂмсѧ .

пѣ́снь , є҃ . і҆рмо́съ . Бж҃їимъ свѣ́тᲂмъ тѝ бл҃же , ᲂу҆́тренюющихъ тѝ дш҃а любо́вїю , прᲂсвѣтѝ мᲂлю́сѧ , тѧ̀ вѣ́дѣти сло́во бж҃їе , и҆́стиннагѡ бг҃а , ѿ́ мрака грѣхо́внагѡ и҆зима́юща . Желѣ́за тѧгᲂто́ю тѧ́гнꙋтъ бы́въ , ꙗ҆́кᲂже ле́гкᲂе и҆́го гдⷭ҇не нᲂси́ти и҆зво́ливъ . и҆́же на твᲂрца̀ вы́ю , ѡ҆тѧ́гшаго врага̀ го́рдаго , мч҃нче смири́лъ є҆сѝ . Съ весе́лїемъ желѣ́зными мч҃нче ѡ҆блᲂже́нъ ᲂу҆́зами , мѣ́ста ѿ мѣ́стъ прете́клъ є҆сѝ . си́ми ꙗ҆́кᲂже гри́внами красꙋ́ѧсѧ васи́лїе , и҆ веселꙋ́ѧ пᲂдвигᲂпᲂло́жника свᲂегѡ̀ . Кро́вными тече́нїи , са́мъ себѐ мꙋ́чениче ѡ҆багри́лъ є҆сѝ вᲂи́стинꙋ , црⷭ҇кꙋю ѻ҆де́ждꙋ сла́вне . пᲂбѣ́ды же вѣнце́мъ ѡ҆блᲂжи́мъ , хрⷭ҇то́ви с̾црⷭ҇твꙋеши ра́дꙋѧсѧ васи́лїе . Оу҆тве́рждьсѧ бл҃гᲂда́тїю крⷭ҇тнᲂю , претерпѣ́лъ є҆сѝ дале́чныи лю́тыи пꙋ́ть , бѣ́днѡ гᲂни́мъ . пᲂѧ̀ на стезѝ мꙋче́нїи твᲂи́хъ , красꙋ́ѧсѧ и҆ ра́дꙋѧсѧ сло́ве пᲂйдꙋ̀ . боⷢ҇ . Превы́шшꙋю херꙋви́мъ , высᲂча́йшꙋ нб҃съ , лꙋ́чшꙋ тва́ри . мꙋ́дрыхъ мч҃нкъ ѡ҆гражде́нїе , є҆ди́нꙋ бцⷣꙋ пѣ́сньми пᲂчте́мъ .

пѣ́снь , ѕ҃ . і҆рмо́съ . Жите́йскагѡ мо́рѧ вᲂз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вᲂпїю́ ти , вᲂз̾ведѝ ѿ тлѝ живо́тъ мо́й мнᲂгᲂмлⷭ҇тиве . Вᲂз̾несе́сѧ страстьмѝ свᲂи́ми , и҆ низ̾ве́рглъ є҆сѝ врага̀ , великᲂмч҃нче сла́вне . и҆ къ бг҃ꙋ преста́висѧ , пᲂбѣ́днымъ вѣнча́сѧ вѣнце́мъ , при кᲂнчи́нѣ страда́нїѧ дᲂстᲂхва́льне . На крⷭ҇тѣ̀ прᲂсте́ршемꙋсѧ тебѐ ра́ди , мꙋ́чениче мꙋ́дре пᲂдо́бѧсѧ . вᲂз̾несе́нъ бы́въ на́ древо , терпѣли́внѡ стрᲂга́нїѧ претерпѣ́лъ є҆сѝ . ᲂу҆ѧзвлѧ́ѧ льсти́ваго , свᲂи́ми ꙗ҆́звами . Свѧза́лъ є҆сѝ беспло́тныѧ врагѝ . вѧ́жемъ по хрⷭ҇тѣ̀ васи́лїе . ѿрѣ́шьжесѧ сла́вне ѿ́ плᲂти , до кᲂнца̀ раз̾рꙋши́лъ є҆сѝ тѣ́хъ ѕлᲂдѣ́йства , бжⷭ҇твенᲂю бл҃гᲂда́тїю . боⷢ҇ . Пᲂю́ тѧ всепѣ́таѧ , ю҆́же пᲂю́тъ во́инства нбⷭ҇ныхъ чино́въ , и҆ мᲂлю́ тѧ , стра́сти дꙋшѝ мᲂеѧ̀ и҆сцѣлѝ чи́стаѧ , и҆ ѻ҆гнѧ̀ вѣ́чнагѡ свᲂбᲂдѝ .

пѣ́снь , з҃ . і҆рмо́съ . Хладᲂда́тельнꙋ ᲂу҆́бѡ пе́щь сᲂтвᲂрѝ а҆́нг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ ᲂу҆вѣща̀ вᲂпи́ти , бл҃гᲂслᲂве́нъ бг҃ъ ѻ҆ц҃ъ на́шихъ . Прᲂсвѣще́нїемъ бжⷭ҇твеныѧ бл҃гᲂда́ти сїѧ́ѧ , тмꙋ̀ мꙋ́камъ прᲂше́лъ є҆сѝ . днѝ прича́стникъ бы́въ мꙋ́дре невече́рнемꙋ . пᲂѧ̀ , бл҃гᲂслᲂве́нъ є҆сѝ бж҃е ѻ҆ц҃ъ на́шихъ . Вᲂдрꙋже́но на ка́мени бжⷭ҇твенагѡ ра́зꙋма мꙋ́дре срⷣце твᲂѐ , непᲂкᲂлѣба́сѧ напа́стными вѣ́тры страда́льче . вᲂпїѧ̀ всѣ́хъ и҆зба́вителю , бл҃гᲂслᲂве́нъ є҆сѝ бж҃е ѻ҆ц҃ъ на́шихъ . Бꙋѧ́ѧ мꙋчи́тель , пᲂвелѣва́етъ на реме́нїе рѣ́зати тѧ̀ сла́вне . и҆ ꙗ҆́кѡ беспло́тна терпѧ́ща тѧ зрѧ̀ , ника́кᲂже разꙋмѣ̀ вᲂпи́ти . бл҃гᲂслᲂве́нъ є҆сѝ бж҃е ѻ҆ц҃ъ на́шихъ . Ꙗ҆́кѡ зла́то в̾ пещѝ мꙋче́нїи , прᲂсїѧ́лъ є҆сѝ раз̾жига́емъ . и҆ и҆з̾ѡ҆браже́нїе страсте́мъ бжⷭ҇твенымъ бы́въ , вᲂпїѧ́ше васи́лїе мꙋ́дре , бл҃гᲂслᲂве́нъ є҆сѝ бж҃е ѻ҆ц҃ъ на́шихъ . боⷢ҇ . Дв҃ство по ржⷭ҇твѣ̀ нетлѣ́нно , дв҃о пребы́вше сматрѧ́ющи , и҆з̾ тебѐ ро́ждьшемꙋсѧ па́че ᲂу҆ма̀ , вᲂпїѧ́ше сп҃сꙋ и҆ бг҃ꙋ , бл҃гᲂслᲂве́нъ є҆сѝ бж҃е ѻ҆ц҃ъ на́шихъ .

пѣ́снь , и҃ . і҆рмо́съ . И҆с̾пла́мени ст҃ы́мъ ро́сꙋ и҆стᲂчѝ , а҆ пра́веднагѡ же́ртвꙋ и҆ во́ды пᲂпалѝ , всѧ́ бо твᲂри́ши хрⷭ҇тѐ , є҆ли́ко хо́щеши , тѣ́мъ тѧ превᲂзно́симъ гдⷭ҇а во́ вѣки . Ве́сь къ бг҃ꙋ прᲂстира́емь , тѣле́сныѧ бᲂлѣ́зни со́нъ в̾мѣни́лъ є҆сѝ . ѿ ню́дꙋ же к̾ жи́зни бл҃же́ннѣй и҆ небᲂлѣ́зненѣй , мч҃нче страстᲂно́сче , ра́дꙋѧсѧ преше́лъ є҆сѝ . Впери́всѧ любо́вїю вседержи́телѧ , растерза́нїѧ пло́ти претерпѣ́лъ є҆сѝ крѣ́пкѡ . и҆ си́льнаго в̾ ѕло́бѣ ᲂу҆дави́лъ є҆сѝ врага̀ , стрꙋѧ́ми крᲂве́й твᲂи́хъ , васи́лїе требл҃же́нне . Црⷭ҇кᲂе ᲂу҆краше́нїе цр҃кви хрⷭ҇то́вѣ , стрⷭ҇те́мъ сп҃сᲂвѣмъ и҆з̾ѡ҆браже́нїе , мч҃нкъ тве́рдыи , вѣ́рнымъ ᲂу҆тверже́нїе , пѣ́сньми да вᲂсхва́литсѧ васи́лїи вели́кїи . Преми́рнꙋю сла́вꙋ , и҆ свѣ́тъ невече́рнїи , нбⷭ҇нᲂе црⷭ҇тво , и҆ вѣне́цъ не ᲂу҆вѧда́емыи , не ѡ҆скꙋ́днꙋю жи́знь , и҆ ра́дᲂсть неи҆з̾гл҃аннꙋю , мч҃нче по кᲂнчи́нѣ ѡ҆брѣстѝ спᲂдо́билсѧ є҆сѝ . боⷢ҇ . Спасе́нїѧ чл҃ческїи ро́дъ спᲂдо́бисѧ , тᲂбо́ю пречⷭ҇таѧ бг҃ᲂра́дᲂваннаѧ . є҆ди́на бо сп҃са на́мъ рᲂдила̀ є҆сѝ , є҆го́же превᲂзно́симъ во всѧ̀ вѣ́ки .

пѣ́снь , ѳ҃ . і҆рмо́съ . Бг҃а чл҃кѡмъ неꙋдо́бь ви́дѣти , на́нь же несмѣ́ютъ чи́ни а҆́нг҃льстїи зрѣ́ти . тᲂбо́ю бо пречⷭ҇таѧ ꙗ҆ви́сѧ на́мъ сло́во вᲂплᲂще́нно , є҆го́же велича́юще , с̾ нбⷭ҇ными вѡ́и тѧ̀ велича́емъ . Ви́дѣти ст҃ы́хъ кра́сныѧ свѣ́тлᲂсти , раз̾рѣ́шьсѧ ѿ́ плᲂти , спᲂдо́билсѧ є҆сѝ пребᲂга́те . и҆ со а҆́нг҃льскими сᲂвᲂкꙋпи́сѧ во́инствы , пᲂѧ̀ при́снѡ с̾ ни́ми . ст҃ъ ст҃ъ ст҃ъ , трⷪ҇цѣ вседѣ́тельнаѧ и҆ всеси́льнаѧ . Ꙗ҆́кѡ свѣ́тъ пребл҃же́нне , ꙗ҆́кѡ вели́кᲂе сл҃нце на́ нб҃си , хрⷭ҇то́вѣ цр҃кви ви́димь . страда́льческими свѣтᲂлꙋ́чными сїѧ́нїи , и҆ чꙋдᲂтвᲂре́нїи бжⷭ҇твеными свѣтлᲂстьмѝ , всѣ́хъ ѡ҆зарѧ́еши дш҃а вᲂсхвалѧ́ющихъ тѧ̀ . Са́мсѧ страда́нїи красᲂто́ю , прекра́снѡ бг҃ᲂмꙋ́дре страстᲂте́рпче ᲂу҆краси́лъ є҆сѝ . и҆ хрⷭ҇то́ви кра́снᲂмꙋ пред̾стᲂи́ши , вѣнце́мъ пра́веднымъ ны́нѣ ѡ҆блᲂжи́мъ . тѣ́мже тѧ̀ чте́мъ вѣ́рнїи ра́дꙋющесѧ . Землѧ̀ бжⷭ҇твенымъ пᲂгребе́нїемъ ѡ҆ст҃и́сѧ , сщ҃е́ннагѡ и҆ бжⷭ҇твенагѡ тѝ васи́лїе тѣлесѝ . пра́ведныхъ взыгра́ша дс҃и , пᲂсредѝ себѐ дх҃ъ тво́й бл҃же́нне и҆мꙋ́ще . с̾ ни́ми же всѧ̀ ны̀ , пᲂмѧнѝ сла́вѧщїѧ тѧ̀ . боⷢ҇ . Стра́шенъ ѻ҆́бразъ ржⷭ҇тва̀ твᲂегѡ̀ , бг҃ъ бо бѣ̀ дв҃о пло́тїю ро́ждьсѧ . є҆го́же мᲂлѝ , стра́шныѧ мꙋ́ки всѧ̀ ны̀ и҆зба́вити , вѣ́рᲂю несꙋмѣ́ннᲂю чтꙋ́щїѧ тѧ̀ , мт҃и чи́стаѧ и҆ не и҆скꙋсᲂбра́чнаѧ .

<< Previous

Contents

Next >>