МЦⷭ҇А ТОГО́ЖЕ ВЪ К҃Ѕ ДН҃Ь

сᲂбо́ръ а҆рха́нг҃ла гаврїи́ла . на ᲂу҆́трени , ѻ҆бы́чныѧ стихᲂло́гїи . и҆ сѣда́льны , в̾ трїѡ́ди . та́же , ѱало́мъ , н҃ . и҆ кано́нъ бцⷣѣ , на д҃ . и҆ а҆рха́нг҃лꙋ , на́ ѕ҃ . Кано́нъ бцⷣы . є҆мꙋ́же краегране́сїе по а҆лфави́тꙋ . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ хᲂди́въ і҆и҃ль , по бе́зднѣ стᲂпа́ми , гᲂни́телѧ фараѡ́на , ви́дѧ пᲂтᲂплѧ́ема , бг҃ꙋ пᲂбѣ́днꙋю пѣ́снь пᲂе́мъ вᲂпїѧ́ше .

запѣ́въ : Прест҃а́ѧ гжⷭ҇е бцⷣе , спасѝ на́съ . Нача́льникъ вы́шнихъ чино́въ свѣтᲂви́дѣнъ , к̾ дв҃ѣй по́сланъ бы́сть дне́сь гаврїи́лъ , ра́дꙋисѧ невѣ́сто непᲂро́чнаѧ вᲂпїѧ̀ , с̾ тᲂбо́ю зижди́тель всѣ́хъ и҆ гдⷭ҇ь . Хᲂщꙋ̀ ᲂу҆вѣ́дѣти стра́ннᲂе твᲂѐ лᲂбза́нїе , дв҃аѧ речѐ . чл҃чествꙋ бо є҆́сть неѡ҆бы́чна рече́нїѧ . ра́дᲂсть кꙋ́ю ре́клъ є҆сѝ , рцы̀ ꙗ҆́снѡ наꙋча́ѧ мѧ . Ꙗ҆вле́ннѣе тебѣ̀ рекꙋ̀ , всебл҃гᲂгᲂвѣ́йнѡ пред̾стᲂѧ̀ пречⷭ҇таѧ , ты́ же приклᲂнѝ ᲂу҆́хо твᲂѐ . вы́шнѧгѡ си́ла на тѧ̀ на́йдетъ , и҆ вседѣ́тельнымъ всели́тсѧ дх҃ᲂмъ .

и҆́нъ , кано́нъ , а҆рха́нг҃лꙋ . твᲂре́нїе і҆ѡ́сифᲂво . гла́съ , д҃ . пѣ́снь , а҃ . і҆рмо́съ . Ѿве́рзꙋ ᲂу҆ста̀ мᲂѧ̀ , и҆ напо́лнѧтсѧ дх҃а , и҆ сло́во ѿры́гнꙋ цр҃цѣ мт҃ри , и҆ ꙗ҆влю́сѧ свѣ́тлѡ тᲂржествꙋ́ѧ , и҆ вᲂспᲂю̀ ра́дꙋѧсѧ тᲂѧ̀ чꙋдеса̀ .

запѣ́въ : Ст҃ы́и а҆рха́нг҃ле гаврїи́ле , мᲂлѝ бг҃а ѡ҆ на́съ . Ꙗ҆́кѡ свѣ́та сꙋ́ща , къ свѣ́тꙋ кра́йнемꙋ невеще́ствеными причаще́нїи , бжⷭ҇твенагѡ и҆ невеще́ственагѡ , мᲂлю́ тѧ а҆рха́нг҃ле гдⷭ҇нь , ᲂу҆́мъ мо́й прᲂсвѣтѝ мл҃твами сѝ , ꙗ҆́кѡ да вᲂспѣва́ю тѧ̀ . Сᲂста́вимъ дне́сь ли́къ бжⷭ҇твеныи веселѧ́щесѧ , пе́рвагѡ пᲂчита́юще беспло́тныхъ ᲂу҆мо́въ , и҆́же неи҆зрече́ннꙋю ра́дᲂсть вᲂз̾вѣсти́вшагѡ , в̾ ми́ръ прише́дшꙋю за бл҃гᲂсть . Пред̾ста́телѧ тѧ̀ вели́ка , и҆ къ бг҃ꙋ застꙋ́пника , и҆ стѣ́нꙋ и҆ ᲂу҆тверже́нїе , гаврїи́ле и҆мꙋ́ще . лю́бѧщїи тѧ̀ и҆збавлѧ́емсѧ ѿ бѣ́дъ , и҆ вре́да ѕмїи́на , вᲂсхвалѧ́ющїи тѧ̀ . боⷢ҇ . Чи́стꙋ тѧ̀ и҆ всенепᲂро́чнꙋ гаврїи́лъ ꙗ҆́кѡ ᲂу҆зрѣ̀ , ра́дꙋисѧ тебѣ̀ влⷣчце свѣ́тлѡ вᲂзᲂпѝ , бракᲂнеи҆скꙋ́снаѧ чл҃кѡмъ спасе́нїе , а҆́нг҃лѡмъ пᲂхвало̀ , и҆ честнᲂсло́вїе .

пѣ́снь , г҃ . і҆рмо́съ . Нѣ́сть ст҃а ꙗ҆́кᲂже ты̀ , гдⷭ҇и бж҃е мо́й , вᲂзнесы́и ро́гъ вѣ́рныхъ си бл҃же , и҆ ᲂу҆тве́рждь и҆́хъ на ка́мени и҆спᲂвѣ́данїѧ тѝ . Ле́стнѡ вѣща́ти тѧ̀ ны́нѣ а҆́нг҃ле сматрѧ́ю . ве́щно бо сꙋщество̀ , и҆ тлѣ́нно и҆ зе́млено , невеще́ственаго ка́кѡ вмѣсти́тъ . и҆ нетлѣ́нїѧ свѣ́тᲂмъ ѡ҆дѣва́емаго . Смы́сленѡ ѡ҆бличи́ла є҆сѝ чⷭ҇таѧ . по бл҃гᲂи҆зво́лилъ є҆́сть си́це . и҆ да ᲂу҆вѣ́ритъ тѧ̀ кꙋпина̀ вᲂспа́льшисѧ , ника́кᲂже сᲂжжена̀ ѻ҆гне́мъ , и҆ прᲂѡ҆бража́ющи твᲂѐ ржⷭ҇тво̀ несказа́ннᲂе . Жи́зни ми гл҃ы вᲂпїе́ши , но ᲂу҆вѣрѧ́етъ мѧ гᲂра̀ дымѧ́щаѧсѧ дре́вле , ᲂу҆жаса́ющисѧ бг҃а . немᲂщѝ ве́щнᲂмꙋ є҆стествꙋ̀ , ѿ ню́дъ невеще́ственагѡ прїѧ́ти .

и҆́нъ , і҆рмо́съ . Твᲂѧ̀ пѣвцы̀ бцⷣе , живы́и нетлѣ́нїѧ и҆сто́чниче , ли́къ себѣ̀ сᲂвᲂкꙋ́пльши дх҃о́венъ ᲂу҆твердѝ , и҆ в̾ бжⷭ҇твеннѣй ти сла́вѣ , вѣнце́мъ сла́вы спᲂдо́би . Прича́стїемъ свѣ́та невеще́ственагѡ , ꙗ҆́кѡ невеще́ственъ вᲂи́стинꙋ гаврїи́ле , невеще́ственѡ прᲂсвѣща́емь , свѣ́тъ ви́дѣнъ бы́сть втᲂры́и . веще́ственыѧ всегда̀ чл҃ки прᲂсвѣща́еши пᲂю́щїѧ тѧ̀ . Вели́цѣй сла́вѣ спᲂдо́билсѧ є҆сѝ , вели́кᲂе та́инство на́мъ ѿкры́въ , вели́кїи а҆́нг҃лѡмъ . и҆́мже взѧ́ти бы́хᲂмъ ѿ землѝ , къ вели́цѣй высᲂтѣ̀ , вельмѝ чтꙋ́щїи тѧ̀ . Ꙗ҆ви́сѧ всѣ́мъ съ нб҃сѐ , и҆́же любо́вїю притека́ющимъ тѝ прⷭ҇нѡ . и҆ ᲂу҆ста́ви бꙋ́рю ю҆́же на ны̀ дви́жимꙋю , напа́стей же и҆ скᲂрбе́й , ѽ гаврїи́ле а҆рхистрати́же . боⷢ҇ . Сказꙋ́ѧ є҆́же дре́вле сᲂкрᲂве́ннᲂе та́инство , ѻ҆трᲂкᲂви́це тебѣ̀ и҆нᲂгда̀ , гаврїи́лъ взыва́ше , ра́дꙋисѧ бж҃їѧ пᲂла́то , в̾ ню́же всели́всѧ , всѧ̀ чл҃ки ѡ҆бᲂжи́лъ є҆́сть , ꙗ҆́кѡ млрⷭ҇дъ .

сѣда́ленъ . гла́съ , д҃ . Беспло́тнымъ слꙋжи́телемъ ты̀ пе́рвеньствꙋѧи , первᲂвѣ́чнᲂе пᲂвелѣ́ннᲂе стра́шнᲂе та́инство , тебѣ̀ є҆ди́нᲂмꙋ гаврїи́ле сла́вне в̾вѣрѧ́етсѧ , ржⷭ҇тво̀ неи҆зрече́ннᲂе ст҃ы́ѧ дв҃ы . ра́дꙋисѧ прᲂвᲂзглаша́ѧ є҆́й ѡ҆бра́дᲂваннаѧ . тѣ́мже тѧ̀ до́лжно вѣ́рнїи , с̾ весе́лїемъ прⷭ҇нѡ ᲂу҆бл҃жа́емъ .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃ᲂлѣ́пнѡ зᲂве́тъ вᲂпїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи . Сл҃нцꙋ нᲂси́ло , твᲂѐ бы́сть пречⷭ҇таѧ чре́во . и҆ чл҃кѡмъ рᲂди́ши свѣ́тъ невече́рнїи , гаврїи́лъ ѡ҆бра́дᲂваннѣй дв҃ѣй прᲂвѣщава́ше . Двере́й мᲂи́хъ ѿстꙋпѝ , невѣща́й глаго́лы , и҆́мже и҆зведе́нїе , ника́кᲂже мо́жеши пᲂказа́ти а҆рхистрати́же . что́ ми ᲂу҆́мъ и҆ дш҃ꙋ смꙋща́еши , сїѧ̀ гл҃ѧ ми . Вѣ́дѣти и҆з̾дале́ча спᲂдо́бишасѧ , та́инства глꙋбинꙋ̀ , прᲂро́ческїѧ трꙋбы̀ пренепᲂро́чнаѧ . є҆мꙋ́же слꙋга̀ є҆́смь , пред̾ две́рьми тѝ пред̾стᲂю̀ .

и҆́нъ , і҆рмо́с̾ . Неи҆зслѣ́днᲂмꙋ бж҃їю сᲂвѣ́тꙋ , є҆́же ѿ дв҃ы вᲂплᲂще́нїе тебѐ вы́шнѧгѡ , прᲂро́къ а҆вва́кꙋмъ дивѧ́сѧ вᲂпїѧ́ше , сла́ва си́лѣ твᲂе́й гдⷭ҇и . Стᲂѧ́ше прича́стїемъ бг҃ᲂнача́льнымъ , дре́вле гаврїи́ле дᲂстᲂчꙋ́дне , прᲂсвѣща́ѧ пррⷪ҇ка данїи́ла , и҆ в̾ло́жь ꙗ҆вле́нїе неви́димымъ дх҃ᲂмъ . Оу҆сты̀ бре́нными тѧ̀ ра́дᲂстнѡ , ѻ҆́гненагѡ є҆стества̀ сꙋ́ща вᲂсхвалѧ́емъ , и҆змѝ на́съ ѻ҆гнѧ̀ всегда̀ палѧ́щагѡ , бжⷭ҇твеными гаврїи́ле хᲂда́тайствы твᲂи́ми .= И҆́же па́че сл҃нца в̾ бжⷭ҇твенꙋю ѻ҆де́ждꙋ , сла́вᲂю непристꙋ́пнᲂю блиста́ющꙋсѧ ѡ҆дѣва́емь , вᲂево́да слꙋжи́телемъ , цр҃ю пред̾стᲂи́ши нбⷭ҇нᲂмꙋ веселѧ́сѧ . =боⷢ҇ . Всю́ тѧ дх҃ᲂмъ гаврїи́лъ , преѡ҆чи́щенꙋ всенепᲂро́чнаѧ разꙋмѣ́въ , вᲂпїе́тъ тѝ ꙗ҆́вственѡ , ра́дꙋисѧ клѧ́твы и҆збавле́нїе , и҆ пра́ѻ҆ц҃емъ вᲂз̾ва́нїе .

пѣ́снь , є҃ . і҆рмо́съ . Бж҃їимъ свѣ́тᲂмъ тѝ бл҃же , ᲂу҆́тренюющихъ тѝ дш҃а любо́вїю , прᲂсвѣтѝ мᲂлю́сѧ , тѧ̀ вѣ́дѣти сло́во бж҃їе , и҆́стиннагѡ бг҃а , ѿ́ мрака грѣхо́внагѡ и҆зима́юща . Блиста́ема тѧ̀ зрю̀ а҆́нг҃ле а҆́нг҃льскими свѣтлᲂстьмѝ , пренепᲂро́чнаѧ речѐ . ѻ҆ба́че стыжꙋ́сѧ ско́рѡ вѣ́рᲂвати , не пе́рвѣе ᲂу҆вѣ́дѣвши всѧ́ко ᲂу҆тверже́нїе . И҆стлѣ́вшее зижди́тель є҆стество̀ чл҃ческᲂе зрѧ̀ , в̾ тѧ̀ всели́тисѧ бл҃гᲂи҆зво́лилъ є҆́сть . сᲂкрᲂве́ннᲂе ѿ́ вѣка чи́стаѧ , стра́шнᲂе ны́нѣ ѿкрыва́ѧ та́инство . Ѻ҆брꙋчена̀ і҆ѡ́сифꙋ бы́хъ а҆́зъ , да́же до ны́нѣ несᲂвᲂкꙋплена̀ а҆рха́нг҃ле . и҆скꙋ́са ᲂу҆́бѡ непᲂзна́вши мꙋ́жеска , ка́кѡ рᲂждꙋ̀ , є҆стествꙋ̀ сᲂпрᲂти́вныѧ гл҃еши ми гл҃ы .

и҆́нъ , і҆рмо́съ . Оу҆диви́шасѧ всѧ́ческаѧ , ѡ҆ бжⷭ҇твеннѣй сла́вѣ твᲂе́й , ты́ бо бракᲂнеи҆скꙋси́маѧ дв҃це , прїѧ́тъ во ᲂу҆тро́бѣ надᲂвсѣ́ми сꙋ́щагѡ бг҃а , и҆ рᲂдила̀ є҆сѝ без̾лѣ́тнагѡ сн҃а , всѣ́мъ вᲂспѣва́ющимъ тѧ̀ ми́ръ пᲂдава́юща . Оу҆ма̀ прича́стїемъ пе́рвагѡ прᲂсвѣща́емь , втᲂры́и ви́дѣнъ бы́сть свѣ́тъ . зᲂвы́и со без̾чи́слеными а҆́нг҃лъ чинмѝ . ст҃ъ ѻ҆ц҃ъ вседѣ́тель , сн҃ъ сᲂбез̾нача́ленъ , и҆ дх҃ъ сᲂпрⷭ҇то́ленъ . Видѣ́нїе твᲂѐ ѻ҆́гнено , и҆ дᲂбро́та чꙋде́сна , всѧ́кꙋ мы́сль ᲂу҆дивлѧ́ѧ . ве́лїѧ сла́ва гаврїи́ле вели́кїи бжⷭ҇твенымъ беспло́тнымъ нача́льниче , всѣ́хъ ᲂу҆дᲂбре́нїе , и҆́же вѣ́рнѡ вᲂспѣва́ющихъ тѧ̀ . Бжⷭ҇твеныи ꙗ҆́кѡ ви́дѣвъ тѧ̀ во́ времѧ каже́нїѧ , дре́вле стᲂѧ́ща заха́рїѧ , быва́етъ нѣ́мъ . не ᲂу҆́бѡ вѣ́рᲂва твᲂе́й вѣ́сти стра́шнѣй , ю҆́же вᲂз̾гласи́лъ є҆сѝ , гаврїи́ле а҆рхистрати́же . боⷢ҇ . Хра́мъ сщ҃е́нїѧ сꙋ́щи пренепᲂро́чнаѧ , гла́сᲂмъ гаврїи́ла а҆рха́нг҃ла , и҆́же во ст҃ы́хъ пᲂчива́ющагѡ рᲂдила̀ є҆сѝ прест҃а́гѡ бг҃а , всѣ́хъ ѡ҆сщ҃а́ющагѡ , и҆ лю́тыхъ и҆зима́ющагѡ .

пѣ́снь , ѕ҃ . і҆рмо́съ . Жите́йскагѡ мо́рѧ вᲂз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вᲂпїю́ ти , вᲂз̾ведѝ ѿ тлѝ живо́тъ мо́й мнᲂгᲂмлⷭ҇тиве . Зако́нᲂмъ ѻ҆трᲂкᲂви́це є҆стества̀ нерабо́таетъ і҆с҃ъ , сᲂдѣ́тель є҆стествꙋ̀ . и҆ тѧ̀ да ᲂу҆вѣ́ритъ же́злъ а҆арѡ́нᲂвъ , невла́жнѡ прᲂра́стшїи , тѧ̀ рᲂди́ти не и҆скꙋсᲂмꙋ́жнѡ вᲂѡ҆бра́зшїи . Дивлю́сѧ твᲂѧ̀ сїѧ̀ страшны́ѧ , и҆ честны́ѧ сматрѧ́ющи глаго́лы . и҆ вѣ́рᲂвати хᲂтѧ́щи , пᲂмышлѧ́ю ѡ҆ высᲂтѣ̀ вели́чество . и҆ стыжꙋ́сѧ всѧ̀ а҆рхистрати́же . Невѣ́рꙋешили слᲂвесе́мъ мᲂи́мъ ; тѧ̀ прᲂви́дѣ данїи́лъ го́рꙋ , ѿ неѧ́же ᲂу҆сѣче́сѧ без̾ рꙋкѝ чл҃ческїѧ ка́мень чи́стаѧ хра́мы и҆ тре́бища бѣсо́мъ , и҆стнѧ́ѧ крѣ́пкѡ .

и҆́нъ , і҆рмо́съ . Бжⷭ҇твенᲂе сѐ и҆ всечⷭ҇тно́е сᲂверша́юще пра́зднество , бг҃ᲂмꙋ́дрїи бж҃їѧ мт҃ре , прїиди́те рꙋка́ми вᲂспле́щемъ , ѿ неѧ̀ ро́ждьшагᲂсѧ вѣ́рᲂю сла́вѧще . Землені́и ꙗ҆зы́цы пᲂчести́ тѧ , ᲂу҆ма̀ свѣтᲂза́рнагѡ и҆ нбⷭ҇нагѡ невᲂзмо́гꙋтъ , бᲂга́тнѡ прᲂсвѣща́ема , па́че ᲂу҆ма̀ и҆ сло́ва , бжⷭ҇твеными свѣтлᲂстьмѝ . Зарѧ̀ сл҃нца мнᲂгᲂсвѣ́тлаѧ , ѻ҆́гненыхъ слꙋ́гъ нача́льниче , свѣтᲂно́сными ти ко влⷣцѣ мᲂльба́ми , пᲂю́щїѧ тѧ̀ тмы̀ стрⷭ҇те́й и҆схи́ти . Сᲂвѣ́ты ꙗ҆зы́кѡмъ разᲂрѝ . вѣ́рꙋ правᲂсла́внꙋю ᲂу҆твердѝ . ᲂу҆ста́ви раздира́нїѧ цр҃ко́внаѧ а҆рха́нг҃ле , и҆́же ко всѣ́хъ твᲂрцꙋ̀ твᲂи́ми ᲂу҆мᲂле́нїи . боⷢ҇ . Гл҃ѡмъ бжⷭ҇твенымъ , пᲂслꙋшли́ва чи́стаѧ гаврїи́лᲂвымъ бы́вши и҆ пребез̾нача́льнагѡ сло́ва , пло́тїю рᲂдила̀ є҆сѝ . и҆́же без̾слᲂве́сїѧ ми́ръ и҆зба́вльшагѡ .

кᲂнда́къ . гла́съ , и҃ . Пресвѣ́тлыѧ и҆ честны́ѧ , и҆ вседѣ́тельныѧ пренеи҆сче́тныѧ и҆ стра́шныѧ трⷪ҇цы , ты̀ є҆сѝ а҆рхистрати́же сла́вныи , слꙋжи́телю и҆ мл҃твениче , ны́нѣ непреста́ннѡ мᲂлѝ , и҆зба́витисѧ на́мъ ѿ всѧ́кихъ бѣ́дъ и҆ мꙋ́къ . да зᲂве́мъ тѝ , ра́дꙋисѧ пᲂкро́ве рабо́мъ твᲂи́мъ .

пѣ́снь , з҃ . і҆рмо́съ . Хладᲂда́тельнꙋ ᲂу҆́бѡ пе́щь сᲂтвᲂрѝ а҆́нг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ ᲂу҆вѣща̀ вᲂпи́ти , бл҃гᲂслᲂве́нъ бг҃ъ ѻ҆ц҃ъ на́шихъ . Пресла́внѡ ꙗ҆́кѡ прїи́детъ с̾ тѣ́лᲂмъ в̾ ми́ръ беспло́тныи , сказа́лъ є҆сѝ гаврїи́ле . рцы́ же и҆з̾дале́ча , ка́кѡ сегѡ̀ в̾мѣсти́тъ мᲂѐ чре́во , є҆го́же вели́чествїѧ нб҃са̀ в̾мѣсти́ти немо́гꙋтъ . Пᲂвѣ́даю тебѣ̀ , и҆ разꙋмѣ́й при́снѡ дв҃о , ка́кѡ сѣ́нь и҆нᲂгда̀ а҆враа́мᲂва прїѧ́тъ , и҆ бг҃а в̾мѣстѝ пречⷭ҇таѧ . тѣ́мже не невѣ́рꙋй ны́нѣ , любе́знѡ цѣлᲂва́нїе прїимѝ , чл҃кѡмъ ра́дᲂсть . Смꙋща́етъ мѧ ве́щи вели́чество . но ᲂу҆́бѡ пᲂне́же бл҃гᲂвᲂлѝ всебл҃гі́и , в̾ мѧ̀ всели́тисѧ па́че ᲂу҆ма̀ , сѐ дш҃е́ю и҆ пло́тїю , цр҃кᲂвь є҆́смь чиста̀ сᲂблюдена̀ є҆мꙋ̀ .

и҆́нъ , і҆рмо́съ . Непᲂслꙋжи́ша тва́ри бг҃ᲂмꙋ́дрїи па́че зижди́телѧ , но ѻ҆́гненнᲂе преще́нїе , мꙋ́жески пᲂпра́вше ра́дᲂвахꙋсѧ пᲂю́ще , препѣ́тыи и҆́же ѻ҆ц҃е́мъ гдⷭ҇ь и҆ бг҃ъ бл҃гᲂслᲂве́нъ є҆сѝ . І҆ѡа́ннᲂво ржⷭ҇тво̀ сла́вне вᲂз̾вѣсти́лъ є҆сѝ , заха́рїи и҆нᲂгда̀ внꙋ́трь бжⷭ҇твенагѡ хра́ма , пред̾стᲂѧ́щꙋ и҆ пᲂю́щꙋ и҆зба́вителю всѣ́хъ . препѣ́тыи и҆́же ѻ҆ц҃е́мъ гдⷭ҇ь и҆ бг҃ъ блгⷭ҇ве́нъ є҆сѝ . Пресла́внѡ хра́ма твᲂегѡ̀ бл҃гᲂлѣ́пїе , бᲂга́тнѡ гаврїи́лъ ѡ҆сщ҃а́етъ дш҃а вѣ́рнымъ . и҆ бѣди́тъ велегла́снѡ вᲂпи́ти ти . препѣ́тыи и҆́же ѻ҆ц҃е́мъ гдⷭ҇ь и҆ бг҃ъ бл҃гᲂслᲂве́нъ є҆сѝ .= Прᲂсвѣща́емь прича́стїемъ а҆рхистрати́же , пе́рвагѡ свѣ́та та́йнѡ . втᲂры́и свѣ́тъ вᲂи́стинꙋ ви́дѣнъ бы́сть , пᲂю́щїѧ прᲂсвѣща́еши всегда̀ . препѣ́тыи и҆́же ѻ҆ц҃е́мъ гдⷭ҇ь и҆ бг҃ъ бл҃гᲂслᲂве́нъ є҆сѝ . =боⷢ҇ . По́сланъ бы́сть гаврїи́лъ а҆рхистрати́гъ , ра́дᲂсть вᲂз̾вѣща́ѧ тѝ дв҃о мт҃и чⷭ҇таѧ . є҆ѧ́же ра́ди печа́ль преста̀ , и҆ клѧ́тва вᲂи́стинꙋ непло́дна бы́сть , и҆ блгⷭ҇ве́нїе прᲂцвѣтѐ вѣ́рнымъ во́ вѣки всѧ̀ .

пѣ́снь , и҃ . і҆рмо́съ . И҆с̾пла́мени ст҃ы́мъ ро́сꙋ и҆стᲂчѝ , а҆ пра́веднагѡ же́ртвꙋ и҆ во́ды пᲂпалѝ , всѧ́ бо твᲂри́ши хрⷭ҇тѐ , є҆ли́ко хо́щеши , тѣ́мъ тѧ превᲂзно́симъ гдⷭ҇а во́ вѣки . Гла́сᲂмъ а҆рха́нг҃лᲂвымъ свѣ́тъ зачала̀ є҆сѝ , сегѡ̀ ра́ди ти ра́дꙋисѧ всѝ зᲂве́мъ . две́ри свѣ́та , неꙋдо́бь зри́мᲂе видѣ́нїе , и҆ прⷭ҇то́ле вы́шнѧгѡ дв҃о бцⷣе . Высо́кагѡ та́инства , ра́дꙋисѧ прехᲂжде́нїе . недᲂꙋме́ннымъ веще́мъ , ра́дꙋисѧ ꙗ҆вле́нїе . ра́дꙋисѧ къ бг҃ꙋ чл҃кѡмъ присвᲂе́нїе . ра́дꙋисѧ дв҃о , па́дшихъ вᲂзва́нїе . Свѣтᲂда́телѧ влⷣки , ра́дꙋисѧ рᲂди́тельнице . приста́нище сꙋ́щимъ в̾ бꙋ́ри , ра́дꙋисѧ всенепᲂро́чнаѧ . и҆́стинныи плᲂдᲂви́тыи винᲂгра́де , ра́дꙋисѧ вᲂзрасти́вшаѧ без̾сме́ртїѧ гро́здъ .

и҆́нъ , і҆рмо́съ . Ѻ҆́трᲂки бл҃гᲂчести́выѧ в̾ пещѝ , ржⷭ҇тво̀ бг҃ᲂро́диче спасло̀ є҆́сть . тᲂгда̀ ᲂу҆́бѡ ѡ҆бразꙋ́емо , ны́нѣ же дѣ́йствꙋемо , вселе́ннꙋю всю̀ вᲂз̾дви́же пѣ́ти , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . Сщ҃еннᲂсло́вїи сщ҃е́нными , тѧ̀ лю́дїе сщ҃е́ннїи пᲂю́тъ веселѧ́щесѧ . ты́ бо всемꙋ̀ вино́внᲂе сло́во вᲂплᲂща́емо , є҆́же по на́съ а҆рха́нг҃ле , и҆ є҆́же ѿ на́съ прᲂвᲂз̾глаша́еши дв҃цѣ , па́че ᲂу҆ма́ же и҆ сло́ва . тѣ́мже тѧ̀ пᲂчита́емъ во всѧ̀ вѣ́ки . Оу҆мꙋ̀ велико́мꙋ же и҆ пе́рвᲂмꙋ , невеще́ственѡ а҆рха́нг҃ле примѣша́ѧсѧ . ᲂу҆сты̀ ѻ҆́гнеными твᲂи́ми , пᲂе́ши пѣ́нїе стра́шнᲂе , є҆́же пᲂю́тъ всѝ а҆́нг҃льстїи ли́цы . гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . Бл҃гᲂлѣ́пїемъ ꙗ҆́вѣ и҆спещре́нъ бжⷭ҇твенымъ , прᲂхо́диши нбⷭ҇наѧ , та́же и҆ землена́ѧ . сᲂверша́ѧ сщ҃е́ннаѧ хᲂтѣ́нїѧ , хрⷭ҇та̀ всѣ́хъ бг҃а . а҆́нг҃лѡмъ нача́льниче гаврїи́ле , красᲂта̀ и҆́же вѣ́рᲂю прⷭ҇нѡ тѧ̀ хва́лѧщимъ . = Пло́тїю по сᲂста́вꙋ сло́во , чл҃кѡмъ примѣси́тисѧ хᲂтѧ̀ , и҆мѣ́ѧ тѧ̀ пред̾текꙋ́ща , и҆ прᲂꙋгᲂто́вающа сщ҃е́ннꙋю пᲂла́тꙋ , ѽ сщ҃е́нныи гаврїи́ле . гдⷭ҇а по́йте вᲂпїю́ща , и҆ превᲂзнᲂси́те є҆гѡ̀ во́ вѣки . =боⷢ҇ . Ꙗ҆́кѡ прⷭ҇то́лъ красе́нъ цр҃е́въ . ꙗ҆́кѡ всѣ́хъ тва́рей превы́шшꙋ и҆ преи҆мꙋ́щꙋ . ꙗ҆́кѡ пресꙋ́щнагѡ є҆ди́нꙋ сꙋ́ществᲂвавшꙋ , землены́ѧ ѡ҆бᲂжи́вшагѡ , сᲂедине́нїемъ лꙋ́чшимъ , ржⷭ҇тва̀ не и҆зрече́нна и҆ стра́нна , блгⷭ҇ве́нꙋю вᲂспᲂе́мъ дв҃цꙋ чи́стꙋю .

пѣ́снь , ѳ҃ . і҆рмо́съ . Бг҃а чл҃кѡмъ неꙋдо́бь ви́дѣти , на́нь же несмѣ́ютъ чи́ни а҆́нг҃льстїи зрѣ́ти . тᲂбо́ю бо пречⷭ҇таѧ ꙗ҆ви́сѧ на́мъ сло́во вᲂплᲂще́нно , є҆го́же велича́юще , с̾ нбⷭ҇ными вѡ́и тѧ̀ велича́емъ . Ра́дᲂсти вина̀ всеблгⷭ҇ве́наѧ . ра́дꙋисѧ чⷭ҇таѧ дᲂбрᲂпло́днаѧ , и҆ бл҃гᲂра́сленаѧ браздо̀ , пита́телѧ всемꙋ̀ нᲂсѧ́щи . ра́дꙋисѧ и҆сто́чниче живы́ѧ вᲂды̀ пречⷭ҇таѧ , рꙋ́чко и҆ раю̀ бж҃їи . ра́дꙋисѧ всенепᲂро́чнаѧ . Дш҃а́мъ же и҆ тѣ́лᲂмъ ѡ҆чисти́лище . ра́дꙋисѧ є҆ѧ́же ра́ди и҆стека́ютъ чл҃кѡмъ лꙋ́чшаѧ , вина̀ всѣ́хъ ѡ҆бᲂже́нїю . ра́дꙋисѧ ѻ҆́блаче ле́гкїи , сл҃нца нᲂсѧ́щїи , ми́ръ свѣтᲂлꙋ́чными сїѧ́ньми ѡ҆зарѧ́юща . Пѣ́снь вᲂпїе́мъ ти ра́дᲂстнꙋю . ра́дꙋисѧ чⷭ҇таѧ , мч҃нкѡмъ и҆ а҆пⷭ҇лѡмъ пᲂхвало̀ , прᲂро́кѡмъ пресла́внᲂе рече́нїе . ст҃лемъ и҆ прпⷣбнымъ , ра́дꙋисѧ ᲂу҆дᲂбре́нїе . є҆ѧ́же ра́ди нбⷭ҇наѧ со землены́ми ра́дꙋютсѧ .

и҆́нъ , і҆рмо́съ . Всѧ́къ зе́менъ , да взыгра́етсѧ дх҃ᲂмъ прᲂсвѣща́емъ . да ликᲂвствꙋ́етъ же , беспло́тныхъ ᲂу҆мо́въ є҆стество̀ , пᲂчита́ѧ ст҃о́е тᲂржество̀ бж҃їѧ мт҃ре . и҆ да пᲂе́тъ , ра́дꙋисѧ пребл҃же́ннаѧ , бцⷣе чи́стаѧ прⷭ҇нѡ дв҃о . Пред̾стᲂи́ши стра́шнѡ прⷭ҇то́лꙋ бл҃гᲂда́ти слꙋжа̀ . и҆ ѡ҆блиста́емь свѣтᲂли́тїи є҆́же па́че ᲂу҆ма̀ , и҆ сщ҃е́ннѡ ѡ҆бᲂжа́емь . и҆ свѣ́тъ зри́мь , и҆ прᲂсвѣща́еши вѣ́рᲂю пᲂю́щїѧ тѧ̀ , сщ҃е́нне гаврїи́ле а҆рхистрати́же . Ꙗ҆́кᲂже нб҃о зри́шисѧ ѕвѣзда́ми ᲂу҆кра́шено , бжⷭ҇твеными свѣтлᲂстьмѝ . и҆ ꙗ҆́кᲂже вᲂево́да , рꙋка́ма держи́ши ски́петро пресвѣ́тлѡ . и҆ прехо́диши всю̀ зе́млю , во́лю влады́чню всегда̀ сверша́ѧ , и҆ ѿ лю́тыхъ вѣ́рныѧ всѧ̀ и҆зима́ѧ . Оу҆ти́ши лю́тꙋю ва́рварскꙋю бꙋ́рю , вᲂз̾дви́жемꙋю всегда̀ на рабы̀ твᲂѧ̀ . цр҃ко́вныѧ ᲂу҆ста́ви раздо́ры . пᲂю́щимъ тѧ̀ пᲂда́ждь прегрѣше́нїемъ и҆збавле́нїе . цр҃кви же да́рꙋй пᲂбѣди́тельнаѧ , гаврїи́ле те́плымъ сѝ пред̾ста́тельствᲂмъ . Предо́браѧ дво́ице и҆ пресла́внаѧ , миха́иле и҆ гаврїи́ле , прⷭ҇то́лꙋ пред̾стᲂѧ́ще бжⷭ҇твеныѧ сла́вы . всѣ́мъ прᲂси́те грѣхо́въ раз̾рѣше́нїѧ , и҆ ѕлы́хъ премѣне́нїе , ꙗ҆́кѡ пред̾ста́телїе , и҆ ꙗ҆́кѡ бл҃гᲂсти влады́чнѣй во все́мъ пᲂдо́бѧщесѧ . боⷢ҇ . Свѣ́тъ бл҃гᲂда́ти ржⷭ҇тво́мъ тѝ вᲂсїѧ̀ , и҆ прᲂсвѣтѝ всю̀ пᲂд̾со́лнечнꙋю , и҆ пред̾ста́телѧ тмѣ̀ пᲂгꙋбѝ . бг҃ᲂрᲂди́тельнице пречⷭ҇таѧ , а҆́нг҃лѡмъ пᲂхвало̀ . и҆ чл҃кѡмъ всѣ́мъ спасе́нїе , и҆́же не преста́нными гла́сы вᲂсхвалѧ́ющимъ тѧ̀ .

На хвали́тѣхъ , стихѣ́ры , на д҃ . гла́съ , д҃ . поⷣ . да́лъ є҆сѝ зна́менїе .= Оу҆́мъ превѣ́чныи ,꙳ свѣ́та тѧ̀ пᲂста́ви втᲂра́гѡ гаврїи́ле .꙳ причаще́нїи бжⷭ҇твеными ,꙳ прᲂсвѣща́юща всю̀ вселе́ннꙋю .꙳ и҆ є҆́же ѿ́ вѣка ѿкрыва́юща на́мъ ,꙳ бжⷭ҇твенᲂе и҆ вели́кᲂе вᲂи́стинꙋ та́инство .꙳ во ᲂу҆тро́бѣ вᲂплᲂща́ема дв҃честѣй беспло́тнагѡ ,꙳ и҆ быва́юща чл҃ка ,꙳ ꙗ҆́кѡ да спасе́тъ чл҃ка . =двⷤа . Прⷭ҇то́лꙋ пред̾стᲂѧ̀ трисо́лнечнагѡ бжⷭ҇тва̀ ,꙳ и҆ бᲂга́тнѡ ѡ҆сїѧ́емь бжⷭ҇твеными свѣтлᲂстьмѝ ,꙳ и҆спꙋща́емыми непреста́ннѡ ѿ тꙋ́дꙋ ,꙳ и҆́же на землѝ ра́дᲂстнѡ ,꙳ въ ли́цѣ стᲂѧ́щїѧ и҆ вᲂсхвалѧ́ющїѧ тѧ̀ ,꙳ страсте́й мглы̀ и҆зба́ви .꙳ и҆ свѣ́тᲂмъ прᲂсвѣтѝ ,꙳ гаврїи́ле а҆рхистрати́же ,꙳ мᲂли́твениче ѡ҆ дш҃а́хъ на́шихъ . Сᲂкрꙋшѝ шата́нїе а҆га́рѧнъ ,꙳ на ста́до твᲂѐ ча́стѡ нахᲂдѧ́щее .꙳ ᲂу҆ста́ви раздира́нїѧ цр҃ко́внаѧ .꙳ ᲂу҆крᲂтѝ мᲂлвꙋ̀ без̾мѣ́рныхъ и҆скꙋше́нїи .꙳ и҆ и҆зба́ви бѣ́дъ и҆ ѡ҆б̾стᲂѧ́нїи ,꙳ и҆́же любо́вїю тѧ̀ чтꙋ́щихъ ,꙳ и҆ в̾ тво́й кро́въ притека́ющихъ ,꙳ гаврїи́ле а҆рхистрати́же .꙳ мл҃твениче ѡ҆ дш҃а́хъ на́шихъ . сла́ва , и҆ ны́нѣ . гла́съ , в҃ . Бл҃гᲂвѣствꙋ́етъ гаврїи́лъ ѡ҆бра́дᲂваннѣй дне́сь . ра́дꙋисѧ неневѣ́стнаѧ ѻ҆трᲂкᲂви́це , и҆ не и҆скꙋсᲂбра́чнаѧ . недиви́сѧ стра́ннᲂмꙋ мᲂемꙋ̀ ви́дꙋ , ни ᲂу҆жаса́йсѧ а҆рха́нг҃лъ бо є҆́смь . ѕмі́й прельстѝ є҆́ввꙋ и҆нᲂгда̀ , ны́нѣ же бл҃гᲂвѣствꙋ́ю ти ра́дᲂсть . пребꙋ́деши нетлѣ́нна , и҆ ро́ждьши гдⷭ҇а чи́стаѧ .

На стихо́внѣ стихѣ́ра , самᲂгла́сна в̾ трїѡ́ди , два́жды . и҆ мꙋ́чениченъ , сла́ва , и҆ ны́нѣ , боⷢ҇ .