27 марта: св. Матроны Солунския

МЦⷭ҇А ТОГО́ЖЕ ВЪ К҃З ДН҃Ь

ст҃ы́ѧ матро́ны , и҆́же в̾ сᲂлꙋ́нѣ . Ве́черъ , на гдⷭ҇и вᲂзва́хъ , стихѣ́ры . гла́съ , д҃ . поⷣ . ꙗ҆́кѡ до́блѧ . І҆ꙋде́йскᲂмꙋ шата́нїю ,꙳ и҆ на́глᲂмꙋ сꙋро́вствꙋ ,꙳ по́мыслᲂмъ сᲂпрᲂти́вльшисѧ мꙋжемꙋ́дренаѧ .꙳ бꙋ́дꙋщихъ пред̾ви́дѧщи ,꙳ бг҃ᲂмꙋ́драѧ наслажде́нїе ,꙳ пребыва́ющее при́снѡ во́ вѣки непᲂдви́жимѡ .꙳ є҆́же пᲂлꙋчи́ла є҆сѝ ѿ землѝ преста́вльшисѧ ,꙳ къ черто́гѡмъ нбⷭ҇нымъ ,꙳ и҆ ли́кꙋ неразᲂри́мᲂмꙋ сла́внаѧ . Црⷭ҇твїѧ бл҃гᲂлѣ́пїе ,꙳ и҆ дᲂбро́тꙋ кра́снꙋю ,꙳ ви́дѣти спᲂдо́бисѧ жениха̀ свᲂегѡ̀ .꙳ ᲂу҆крашена̀ ра́нами тве́рдагѡ тѝ страда́нїѧ .꙳ и҆ и҆сто́чникꙋ бл҃ги́хъ ,꙳ дᲂсто́йнѡ прибли́жисѧ .꙳ и҆ ѿ нꙋ́днагѡ бжⷭ҇твенагѡ весе́лїѧ ,꙳ бᲂга́тнѡ пло́дъ прїѧ́ла є҆сѝ бл҃же́ннаѧ ,꙳ и҆ без̾сме́ртнꙋю сла́вꙋ . Ни и҆́го рабо́тнᲂе ,꙳ ни сла́бᲂсть же́нскаѧ ,꙳ ни гла́дъ ни ра́на запѧ́ша тѧ̀ ,꙳ мꙋ́ченичестѣй тве́рдᲂсти ᲂу҆пᲂдо́битисѧ всесла́внаѧ .꙳ ᲂу҆се́рдїемъ бо дш҃и ,꙳ мꙋ́ки претерпѣ́ла є҆сѝ .꙳ ѿ ню́дꙋ же пᲂлꙋчѝ нбⷭ҇ныи черто́гъ ,꙳ и҆ вѣнце́мъ бл҃гᲂда́ти ᲂу҆краси́сѧ ,꙳ пред̾стᲂѧ́щи зижди́телю свᲂемꙋ̀ .= сла́ва , и҆ ны́нѣ , боⷢ҇ . Ѡ҆сꙋжде́нїѧ и҆зба́ви ,꙳ прест҃а́ѧ бг҃ᲂневѣ́сто ,꙳ и҆ лю́тыхъ прегрѣше́нїи смире́ннꙋю мѝ дш҃ꙋ .꙳ и҆ сме́рти и҆змѣнѝ мл҃твами сѝ ,꙳ и҆ да́рꙋй ѡ҆правда́нїе пᲂлꙋчи́ти ,꙳ в̾ де́нь и҆спыта́нїѧ ,꙳ є҆́же пᲂлꙋчи́ша ст҃ы́хъ сᲂбо́ри .꙳ пᲂкаѧ́нїемъ ѡ҆чище́на мѧ пре́жде кᲂнца̀ пᲂкажѝ ,꙳ и҆ сле́зными и҆злїѧ́нїи . =крⷭ҇тᲂбоⷢ҇ . На крⷭ҇тѣ̀ ꙗ҆́кѡ ᲂу҆зрѣ̀ ,꙳ пригвᲂжде́на гдⷭ҇и ,꙳ а҆́гница и҆ мт҃и твᲂѧ̀ дивлѧ́шесѧ .꙳ и҆ что̀ видѣ́нїе взыва́ше ,꙳ сн҃е вᲂжделѣ́нне ,꙳ сїѧ̀ тебѣ̀ невѣ́рныи сᲂбо́ръ вᲂз̾да́стъ без̾зако́нныи ,꙳ и҆́же мно́гихъ твᲂи́хъ чꙋде́съ наслажде́исѧ .꙳ но сла́ва не и҆з̾рече́ннᲂмꙋ тѝ ,꙳ сᲂше́ствїю влⷣко .

На ᲂу҆́трени . ѻ҆́ба кано́на , во ѻ҆кта́и . и҆ ст҃ѣ́й , на д҃ . кано́нъ , твᲂре́нїе ѳеѡ́фанᲂво . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стᲂпа́ми дре́вле ше́ствᲂвавъ і҆и҃ль , крⷭ҇тᲂѡ҆бра́зно мѡѷсе́ѡвыма рꙋка́ма , а҆мали́кᲂвꙋ си́лꙋ в̾ пꙋсты́ни пᲂбѣди́лъ є҆́сть .

запѣ́въ : Ст҃а́ѧ мч҃нце матрѡ́но , мᲂлѝ бг҃а ѡ҆ на́съ . Съ бжⷭ҇твеными беспло́тныхъ чи́ны , ны́нѣ ликꙋ́ющи ᲂу҆ всѣ́хъ вино́внагѡ бг҃а бл҃ги́мъ . и҆ ꙗ҆́снѡ наслажа́ющисѧ , бг҃ᲂнача́льныѧ свѣ́тлᲂсти , пᲂю́щїѧ тѧ̀ прᲂсвѣтѝ . И҆́же ра́бїи спᲂдо́бльсѧ прїѧ́ти зра́къ хрⷭ҇то́съ бг҃ъ , свᲂбᲂди́ти сегѡ̀ вᲂсхᲂтѣ́въ , ѿ тлѧ̀ и҆ сме́ртныхъ ᲂу҆́зъ . ѿ и҆́га рабо́тнагѡ тѧ̀ , мч҃нце невѣ́стꙋ ѡ҆брꙋчи́лъ є҆́сть . Же́нскїи по́лъ сꙋ́щи , в̾мꙋжи́вшисѧ бл҃гᲂда́тїю . вᲂз̾несе́ннꙋю гᲂрды́ню , и҆ хва́лѧщисѧ без̾числа̀ пре́жде , и҆з̾сꙋши́ти мо́ре , не́мᲂщїю тѣ́ла , бжⷭ҇твенᲂю си́лᲂю низ̾лᲂжѝ .= боⷢ҇ . Д=ве́рь ꙗ҆́же к̾ на́мъ твᲂегѡ̀ гдⷭ҇и сᲂше́ствїѧ , вᲂсто́ка и҆ сл҃нца и҆ свѣ́та , та́йнѡ тѧ̀ нарица́ема , па́че є҆стества̀ ѡ҆блиста̀ , сꙋгꙋ́ба є҆стество́мъ бг҃а и҆ чл҃ка .

пѣ́снь , г҃ . і҆рмо́съ . Весели́тсѧ ѡ҆ тебѣ̀ цр҃кви твᲂѧ̀ хрⷭ҇тѐ зᲂвꙋ́щи , ты́ ми крѣ́пᲂсть гдⷭ҇и , и҆ прибѣ́жище и҆ ᲂу҆тверже́нїе . Тве́рдᲂстїю по́мысла , без̾зако́ннꙋю лю́тꙋю претерпѣ́ла є҆сѝ тѧ́жкꙋю мꙋ́кꙋ , сла́внаѧ матрѡ́но и҆ пребᲂга́таѧ . Ра́ны бᲂлѣ́зненыѧ нахᲂдѧ́щаѧ , крѣ́пкѡ терпѧ́ше , ѡ҆сꙋжде́нїемъ же тмы̀ , бжⷭ҇твенꙋю свѣ́тлᲂсть вᲂспрїѧ́ла є҆сѝ . Крᲂве́й твᲂи́хъ и҆сто́чницы , нече́стїѧ ѻ҆́гнь ᲂу҆гаси́ша . вѣ́рныѧ же напᲂи́ша , бл҃гᲂче́стїѧ вᲂда́ми .= боⷢ҇ . С=крижа́ль и҆ кᲂвче́гъ , прїе́мшꙋ во ᲂу҆тро́бѣ пречⷭ҇таѧ , сло́во бж҃їе без̾нача́льнᲂе , бг҃ᲂгла́снѡ вᲂсхвалѧ́емъ тѧ̀ .

сѣда́ленъ . гла́съ , є҃ . Бл҃гᲂче́стнѡ пᲂрабо́щшисѧ вседержи́телю , ѕлᲂче́стїѧ влⷣцѣ непᲂрабо́тисѧ честна́ѧ . но претерпѣ́ла є҆сѝ тве́рдѡ те́мныи затво́ръ , и҆ ра́намъ раз̾жже́нїе . и҆ преста́висѧ ко́ гдⷭ҇ꙋ , бг҃ᲂмꙋ́драѧ мч҃нце матрѡ́но . мᲂли́сѧ ѡ҆ на́съ твᲂрѧ́щихъ па́мѧть твᲂю̀ . сла́ва , и҆ ны́нѣ , боⷢ҇ . Те́плаѧ пред̾ста́тельнице и҆ не ѡ҆бᲂри́маѧ , наде́жде тве́рдаѧ и҆ непᲂсты́днаѧ , стѣно̀ и҆ пᲂкро́ве притека́ющимъ тѝ , при́снѡ дв҃о чⷭ҇таѧ , сн҃а свᲂегѡ̀ и҆ бг҃а мᲂлѝ со а҆́нг҃лы , ми́ръ ми́рᲂви дарᲂва́ти , и҆ дш҃а́мъ на́шимъ спасе́нїе и҆ ве́лїю млⷭ҇ть . крⷭ҇тᲂбоⷢ҇ . На крⷭ҇тѣ̀ зрѧ́щи хрⷭ҇тѐ мт҃и твᲂѧ̀ , во́лею пᲂсредѝ разбо́йникꙋ ви́сима , растерза́ема мт҃рьски ᲂу҆тро́бᲂю , гл҃аше , без̾грѣ́шныи сн҃е , ка́кѡ непра́веднѡ на крⷭ҇тѣ̀ ꙗ҆́кѡ ѕлᲂдѣ́й пригвᲂзди́сѧ . ро́дъ чл҃ческїи ѡ҆живи́ти хᲂтѧ̀ , ꙗ҆́кѡ пребл҃гі́и .

пѣ́снь , д҃ . і҆рмо́съ . Вᲂз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свᲂе́мъ , дᲂсто́йнѡ взыва́ющи , сла́ва си́лѣ твᲂе́й гдⷭ҇и . Си́лᲂю бжⷭ҇твенᲂю матрѡ́но ᲂу҆крѣплѧ́ема , го́рькїѧ влады́чицы и҆з̾бѣ́гла є҆сѝ рабо́ты . нра́въ бо смире́нъ дш҃е́ю стѧжа́ла є҆сѝ , є҆ди́нᲂмꙋ влⷣцѣ рабо́тающи . Рыка́ющи пїѧ́нствᲂмъ напᲂена̀ , и҆ ꙗ҆́рᲂстїю раз̾жего́ма ѕлᲂчести́ваѧ . ра́нами с̾сѣца́ше , є҆вре́йскимъ сꙋрᲂвство́мъ , мч҃нце стрⷭ҇тᲂно́сице тѣ́ло твᲂѐ . Ю҆́нᲂшеско пᲂказа̀ терпѣ́нїе , в̾ несвѣ́тлыхъ мѣ́стѣхъ затвᲂрѧ́ема мч҃нце , и҆ гла́дᲂмъ тᲂми́ма . но ѡ҆брѣ́те вᲂз̾да́нїе , без̾сме́ртїѧ трапе́зꙋ .= боⷢ҇ . З=латᲂкᲂва́нныи свѣ́щникъ прᲂѡ҆бразᲂва́ше , бг҃а нᲂси́вшꙋю вᲂплᲂще́нна . заре́ю бжⷭ҇тва̀ , всѧ̀ прᲂсвѣща́юща , тѧ̀ и҆́стиннꙋю бг҃ᲂмт҃рь .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рᲂю вᲂспѣва́ющїѧ тѧ . Тѧ̀ вѣне́цъ свѣ́телъ , бг҃ᲂмꙋ́драѧ пᲂхвалы̀ стѧжа̀ жизнᲂда́вче . и҆ ѿ тмы̀ к̾ сїѧ́нїю бжⷭ҇твенᲂмꙋ и҆зы́де .= Оу҆твердѝ хрⷭ҇то́съ , на ка́мени вѣ́ры , но́зѣ твᲂѝ бл҃же́ннаѧ . к̾ немꙋ́же и҆спра́ви мꙋ́дрѣ , свᲂѧ̀ стᲂпы̀ . Оу҆́мъ бжⷭ҇твенъ вᲂи́стинꙋ , мꙋ́дръ и҆ бг҃ᲂразꙋ́менъ ты̀ и҆мꙋ́щи . сїѧ́еши в̾ ли́цѣ мꙋ́ченикъ , матрѡ́но всебл҃же́ннаѧ . боⷢ҇ . Б=жⷭ҇тва̀ зра́къ , и҆ зра́къ чл҃чества , рᲂдила̀ є҆сѝ бг҃ᲂмт҃и . сᲂедине́нїе несмѣ́сно , по сᲂедине́нїю неслїѧ́ннᲂмꙋ .

пѣ́снь , ѕ҃ . і҆рмо́съ . Пᲂжрꙋ́ти со́ гласᲂмъ хвале́нїѧ гдⷭ҇и , цр҃кви вᲂпїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Є҆́ввы ны́нѣ страстᲂно́сице , жела́нїе ѡ҆б̾ѧ́ла є҆сѝ смы́сленѡ матрѡ́но . ѡ҆бᲂжа́ема манᲂве́нїемъ непреста́ннымъ . и҆ пра́веднѡ приснᲂсꙋ́щнѣй сла́вѣ спᲂдо́бисѧ . двⷤа . Ни ра́бъ ѡ҆ хрⷭ҇тѣ̀ , ни свᲂбо́дь сꙋ́дитсѧ , но дᲂбрᲂдѣ́тели бл҃гᲂѡ҆бра́зїе , бл҃гᲂче́стїѧ ѻ҆́бразы ᲂу҆крашена̀ . є҆́йже пᲂказа́сѧ твᲂри́тельница , стрⷭ҇тᲂте́рпице непᲂбѣди́маѧ .= боⷢ҇ . Ц=р҃кᲂвь тѧ̀ бж҃їю и҆ черто́гъ зна́емъ , рꙋ́чкꙋ свѣ́щникъ и҆ скрижа́ль . и҆мꙋ́щи внꙋ́трь напи́санна , и҆́же за милᲂсе́рдїе вᲂпло́щшасѧ сло́ва , пренепᲂро́чнаѧ .

пѣ́снь , з҃ . і҆рмо́съ . Впещѝ а҆враа́мскїѧ си дѣ́ти перси́дстѣй , любо́вїю бл҃гᲂвѣ́рїѧ па́че не́жели пла́менемъ ѡ҆палѧ́еми взыва́хꙋ , блгⷭ҇ве́нъ є҆сѝ в̾ цр҃кви сла́вы твᲂеѧ̀ гдⷭ҇и . Съ любо́вїю и҆ дерзнᲂве́нїемъ , ѿлꙋчи́ласѧ є҆сѝ вᲂи́стинꙋ , къ свᲂемꙋ̀ прехва́льнаѧ рачи́телю . бл҃гᲂда́рнѡ взыва́ющи , бл҃гᲂслᲂве́нъ є҆сѝ цр҃кви сла́вы твᲂеѧ̀ гдⷭ҇и . двⷤа . Съ весе́лїемъ и҆ ра́дᲂстїю преста́висѧ , и҆спо́лнь дᲂбрᲂдѣ́телей разли́чныхъ матрѡ́но , ѿ землѝ к̾ нбⷭ҇нымъ лико́мъ сла́внаѧ . наслѣ́дїе ᲂу҆лꙋчѝ без̾сме́ртнᲂе .= боⷢ҇ . О=у҆крашена̀ и҆ и҆спещрена̀ всѣ́ми дᲂбрᲂдѣ́тельми , сло́во ѻ҆́ч҃ее па́че сло́ва рᲂдила̀ є҆сѝ вᲂплᲂще́нно , мт҃и дв҃о . бл҃гᲂслᲂве́на ты̀ в̾ жена́хъ пренепᲂро́чнаѧ влⷣчце .

пѣ́снь , и҃ . і҆рмо́съ . Рꙋ́цѣ распрᲂсте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ ᲂу҆гаси́ша дᲂбрᲂдѣ́телїю пᲂѧ́савшесѧ , и҆́же бл҃гᲂче́стїѧ люби́тели ѻ҆́трᲂцы взыва́юще , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Бᲂга́тнагѡ свѣ́та лꙋчѝ , спᲂдо́бисѧ ви́дѣти , и҆змѣ́ньшисѧ пло́ти . и҆ в̾ нбⷭ҇нѣй ѻ҆би́тели жи́ти , в̾мѣ́стѡ те́мнагѡ и҆ мра́чнагѡ , и҆дѣ́же затвᲂри́сѧ сла́внаѧ . бл҃гᲂслᲂви́те всѧ̀ дѣ́ла вᲂпїю́щи гдⷭ҇нѧ гдⷭ҇а . вⷤ . Красе́нъ вѣне́цъ , и҆́мже вѣнча́сѧ ны́нѣ сла́внаѧ , живᲂнача́льнᲂю десни́цею вседержи́телѧ . невѣ́стꙋ бо ви́дѣ , ѡ҆червленꙋ́ тѧ кро́вными то́ки , ра́дꙋѧсѧ ᲂу҆ѧснѝ . є҆мꙋ́же пᲂе́мъ , всѧ̀ дѣ́ла бл҃гᲂслᲂви́те гдⷭ҇нѧ гдⷭ҇а .= боⷢ҇ . В=ᲂи́стинꙋ ро́ждьши бг҃а . вᲂи́стинꙋ пречⷭ҇таѧ ꙗ҆ви́сѧ мт҃и бг҃ꙋ . и҆́стинствꙋюща , нᲂсѧ́щи по ко́емждо рᲂже́нїи , бг҃ᲂи҆ме́нство вѣ́рнымъ . тѣ́мже сла́вимъ , бцⷣꙋ тѧ̀ бг҃ᲂмꙋ́дренѡ пренепᲂро́чнаѧ влⷣчце .

пѣ́снь , ѳ҃ . і҆рмо́с̾ . Ка́мень нерꙋкᲂсѣ́чныѧ гᲂры̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , сᲂвᲂкꙋпи́въ раз̾стᲂѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Сїѧ́етъ мы́слеными свѣтᲂзаре́нїи , свѣтᲂно́сныи тѝ де́нь . свѣтлѣ́йшими блиста́нїи , трисл҃нчнагѡ мч҃нце сїѧ́нїѧ . во́ньже нн҃ѣ мᲂлѝ , ѡ҆зари́тисѧ пᲂю́щимъ тѧ̀ . Ѡ҆брѣ́те вᲂз̾даѧ́нїѧ страстᲂно́сице , прᲂти́вꙋ бᲂлѣ́зненымъ ра́намъ , нбⷭ҇нᲂе наслѣ́дїе , в̾ цр҃кви первене́цъ сла́внаѧ . в̾ не́йже тᲂржествꙋ́ющи , твᲂи́ми мᲂли́твами на́съ сᲂблюдѝ . Вᲂи́стинꙋ хрⷭ҇то́ви нн҃ѣ сᲂчта́сѧ , без̾сме́ртнᲂмꙋ сѝ женихꙋ̀ . прᲂцвѣ́тши и҆з̾дале́ча , бжⷭ҇твеными сегѡ̀ всемꙋ́драѧ ꙗ҆́звами . и҆ чⷭ҇тно́ю кро́вїю мꙋче́нїѧ сїѧ́ющи .= боⷢ҇ . П=лени́цы мᲂи́хъ нн҃ѣ прегрѣше́нїи , раз̾рѣшѝ бцⷣе дв҃о . ꙗ҆́же милᲂсе́рдїѧ и҆сто́чникъ ро́ждьши , є҆ди́на бг҃ᲂбл҃же́ннаѧ . и҆ бл҃гᲂꙋха́нїѧ и҆спо́лни , ꙗ҆́кѡ да дᲂсто́йнѡ тѧ̀ велича́ю .

<< Previous

Contents

Next >>