28 марта: прп. Илариона Нового

МЦⷭ҇А ТОГО́ЖЕ ВЪ К҃И ДН҃Ь

прпⷣбнагѡ ѻ҆ц҃а на́шегѡ и҆ларїѡ́на но́вагѡ . =и҆ ст҃а́гѡ стефа́на чꙋдᲂтво́рца . Ве́черъ , на гдⷭ҇и вᲂзва́хъ , стихѣ́ры . гла́съ , д҃ . поⷣ . да́лъ є҆сѝ зна́менїе . Ж=итїѐ нескве́рнено ,꙳ терпѣ́нїе и҆ кро́тᲂсть , и҆ любо́вь нелицемѣ́рнꙋ ,꙳ вᲂз̾держа́нїе без̾мѣ́рно ,꙳ всено́щнᲂе стᲂѧ́нїе ,꙳ ᲂу҆миле́нїе бжⷭ҇твено ,꙳ вѣ́рꙋ наде́ждꙋ и҆́стиннꙋ ,꙳ и҆ ми́лᲂванїе ѻ҆́ч҃е стѧжа́въ .꙳ ꙗ҆́кѡ а҆́нг҃лъ по́жилъ є҆сѝ на землѝ с̾ пло́тїю ,꙳ и҆ларїѡ́не бл҃же́нне ,꙳ мᲂли́твениче ѡ҆ дш҃а́хъ на́шихъ . Землены́и а҆́нг҃лъ ,꙳ и҆ нбⷭ҇ныи чл҃къ бы́лъ є҆сѝ прпⷣбне .꙳ и҆сто́чникъ ᲂу҆миле́нїѧ ,꙳ ми́лᲂванїѧ стрꙋѧ̀ .꙳ пꙋчи́на чꙋдесе́мъ ,꙳ грѣ́шникѡмъ с̾пᲂрꙋ́чникъ .꙳ ма́слина вᲂи́стинꙋ бж҃їѧ плᲂдᲂви́та .꙳ ма́слᲂмъ трꙋ́дъ твᲂи́хъ ᲂу҆маща́ѧ ли́ца ,꙳ и҆ларїѡ́не чꙋ́дне ,꙳ вѣ́рнѡ вᲂсхвалѧ́ющихъ тѧ̀ . Оу҆́мъ тво́й прᲂсвѣща́емь ,꙳ бжⷭ҇твеными ра́зꙋмы ,꙳ тѣле́сныхъ страсте́й превы́ше бы́въ ,꙳ непримѣ́шенъ землены́мъ .꙳ нᲂсѧ̀ начерта́нїе ,꙳ и҆ и҆зъ ѡ҆бража́ѧ в̾ себѣ̀ бжⷭ҇твенꙋю дᲂбро́тꙋ .꙳ и҆ пᲂзнава́емь ве́сь бг҃ᲂви́денъ ,꙳ дѣ́йствᲂмъ дх҃а .꙳ и҆ларїѡ́не ѻ҆́ч҃е на́шъ ,꙳ и҆́нᲂкѡмъ ᲂу҆краше́нїе .

и҆́ны , стихѣ́ры , ст҃о́мꙋ стефа́нꙋ . гла́съ , то́йже . поⷣ . ꙗ҆́кѡ до́блѧ .= И҆́нѡкъ и҆́стиненъ ,꙳ ѕвѣзда̀ пресвѣ́тлаѧ ,꙳ и҆ и҆сто́чникъ бы́въ ᲂу҆миле́нїѧ .꙳ любвѐ ꙗ҆ви́сѧ и҆спо́лненъ ,꙳ кро́тᲂкъ и҆ ти́хъ .꙳ ми́лᲂстивъ и҆ смире́нъ ,꙳ без̾ѕло́бивъ непᲂро́ченъ ,꙳ ѻ҆́ч҃е стефа́не .꙳ сегѡ̀ ра́ди хрⷭ҇то́съ тѧ̀ прпⷣбнымъ пᲂставлѧ́етъ стадо́мъ па́стырѧ ,꙳ чꙋдᲂдѣ́йствїи пᲂчита́ема . Бдѣ́нїе всено́щнᲂе ,꙳ и҆ вᲂз̾держа́нїе неи҆зрече́нно ,꙳ мᲂли́твꙋ немꙋ́тнꙋ ,꙳ житїѐ бжⷭ҇твено ,꙳ вѣ́рꙋ и҆ наде́ждꙋ чи́стꙋ ,꙳ правᲂсла́внꙋ мꙋ́дрᲂсть ,꙳ чꙋ́днѡ пребыва́нїе ,꙳ и҆ вели́ко ми́лᲂванїе ѻ҆́ч҃е и҆мѣ́лъ є҆сѝ .꙳ и҆ ᲂу҆́меръ и҆ пре́жде кᲂнца̀ ѡ҆блиста́въ , во зна́менїихъ пресла́вныхъ .꙳ тѣ́мже тѧ̀ пᲂчита́емъ , прпⷣбне стефа́не . Ꙗ҆́кѡ ѕвѣздꙋ̀ мнᲂгᲂсвѣ́тлꙋ ,꙳ и҆ ꙗ҆́кѡ сл҃нце незахᲂди́мо ,꙳ и҆ ꙗ҆́кѡ дꙋше́вно нб҃о ,꙳ бжⷭ҇твеными чꙋдесы̀ ,꙳ ꙗ҆́кѡ ѕвѣзда́ми ᲂу҆кра́шено .꙳ и҆ ꙗ҆́кѡ цвѣ́тъ бл҃гᲂꙋха́ненъ , и҆ ра́й пи́щныи .꙳ и҆ ꙗ҆́кѡ и҆сто́чникъ сщ҃е́нїѧ ,꙳ и҆ превели́ка врача̀ недꙋ́жнымъ .꙳ ꙗ҆́кѡ па́стырѧ , и҆ до́брагѡ на́мъ пред̾ста́телѧ ,꙳ вᲂсхвалѧ́ющимъ тѧ̀ стефа́не . =сла́ва , и҆ ны́нѣ , боⷢ҇ . Лꙋча́ми пречи́стаѧ ,꙳ дх҃о́вныѧ бл҃гᲂда́ти ,꙳ мᲂю̀ мы́сль прᲂсвѣтѝ .꙳ ꙗ҆́же ка́плю ро́ждьшаѧ ,꙳ хрⷭ҇та̀ без̾мѣ́рнꙋю ,꙳ без̾зако́нїѧ чл҃кѡмъ щедро́тами ѿмы́вшꙋ .꙳ и҆ и҆сто́чникъ затвᲂрѝ страсте́й мᲂи́хъ .꙳ и҆ пᲂто́кꙋ мѧ спᲂдо́би пи́щи ,꙳ при́снѡ мл҃твами сѝ . крⷭ҇тᲂбоⷢ҇ . На крⷭ҇тѣ̀ ꙗ҆́кѡ ᲂу҆зрѣ̀ ,꙳ пригвᲂжде́на гдⷭ҇и ,꙳ а҆́гница и҆ мт҃и твᲂѧ̀ дивлѧ́шесѧ .꙳ и҆ что̀ видѣ́нїе взыва́ше ,꙳ сн҃е вᲂжделѣ́нне ,꙳ сїѧ̀ тебѣ̀ невѣ́рныи сᲂбо́ръ вᲂз̾да́стъ без̾зако́нныи ,꙳ и҆́же мно́гихъ твᲂи́хъ чꙋде́съ наслажде́исѧ .꙳ но сла́ва не и҆з̾рече́ннᲂмꙋ тѝ ,꙳ сᲂше́ствїю влⷣко .

На ᲂу҆́трени . є҆ди́нъ , кано́нъ , во ѻ҆кта́и . и҆ ст҃ы́мъ два̀ , на и҃ . кано́нъ , твᲂре́нїе і҆ѡ́сифᲂво . гла́съ , в҃ . пѣ́снь , а҃ . і҆рмо́съ . Во глꙋбинѣ̀ пᲂтᲂпѝ дре́вле , фараѡни́тскаѧ всѧ̀ во́инства , преѡрꙋже́нꙋ си́лꙋ . вᲂпло́щшеесѧ сло́во , преспѣ́ющїѧ грѣхѝ пᲂтреби́ло є҆́сть , пресла́вныи гдⷭ҇ь , ꙗ҆́кѡ прᲂсла́висѧ .

запѣ́въ : Прпⷣбне ѻ҆́ч҃е и҆ларїѡ́не , мᲂлѝ бг҃а ѡ҆ на́съ . Ми́лᲂстивъ и҆ кро́тᲂкъ бы́въ ѻ҆́ч҃е , цѣ́лъ и҆ ти́хъ вᲂи́стинꙋ дх҃ᲂмъ , ми́лᲂсти бжⷭ҇твенѣй мѧ̀ хᲂда́тайствᲂмъ сѝ , и҆ларїѡ́не спᲂдо́би , ꙗ҆́кѡ да пᲂю̀ тѧ̀ ны́нѣ , в̾ тишинѣ̀ се́рдца мᲂегѡ̀ . Ѡ҆чи́стивсѧ ѻ҆́ч҃е ѿ дѣ́тства , и҆ взе́мъ крⷭ҇тъ сво́й , гдⷭ҇ви пᲂслѣ́дᲂва . стра́сти тѣле́сныѧ , вᲂз̾держа́нїемъ и҆ ча́стыми мл҃твами ᲂу҆вѧди́лъ є҆сѝ , без̾стра́стїемъ ᲂу҆краша́ѧсѧ . Вᲂспрїе́мъ ты̀ гдⷭ҇не и҆́го ле́гкᲂе , и҆ тᲂгѡ̀ пᲂслꙋ́шаѧ ѡ҆правда́нїѧ , и҆ларїѡ́не прпⷣбне . тѧ́жкᲂе грѣхо́внᲂе ѿве́рглъ є҆сѝ премꙋ́дре бре́мѧ , ст҃ы́ню притѧжа́въ .= боⷢ҇ . М=ᲂи́хъ прегрѣше́нїи плени́цы , влⷣчце растерза́й , твᲂегѡ̀ сн҃а и҆ бг҃а мᲂлѧ́щи . и҆ мꙋ́чащагѡ мѧ̀ при́снѡ дв҃о , грѣха̀ низ̾лᲂжѝ . ꙗ҆́кѡ да вᲂсхвалѧ́ю тѧ при́снѡ всенепᲂро́чнаѧ , тᲂбо́ю спаса́емь .

дрꙋгі́и кано́нъ , ст҃о́мꙋ стефа́нꙋ . твᲂре́нїе і҆ѡ́сифᲂво . гла́съ , а҃ . пѣ́снь , а҃ . і҆рмо́съ . Пѣ́снь пᲂбѣ́днꙋю вᲂспᲂе́мъ всѝ бг҃ꙋ , сᲂтво́ршемꙋ ди́внаѧ чꙋдеса̀ мы́шцею высо́кᲂю , и҆ спа́сшꙋ і҆и҃лѧ , ꙗ҆́кѡ прᲂсла́висѧ .

запѣ́в̾ : Прпⷣбне ѻ҆́ч҃е стефа́не , мᲂлѝ бг҃а ѡ҆ на́съ . Бжⷭ҇твенꙋю па́мѧть твᲂю̀ бг҃ᲂмꙋ́дре ѻ҆́ч҃е , вѣ́рнѡ пра́зднꙋюще , всѧ́ческимъ гдⷭ҇а при́снѡ сла́вимъ . тѧ̀ прᲂсла́вльшаго , мно́гими стефа́не чꙋдесы̀ . Оу҆́мъ тво́й манᲂве́нїи бжⷭ҇твеными , премꙋ́дре ѡ҆бᲂжа́емь . до кᲂнца̀ ѿврати́сѧ , страсте́й плᲂтьски́хъ . и҆ а҆́нг҃ла тѧ̀ на землѝ пᲂказа̀ стефа́не . Пᲂдъѧ́лъ є҆сѝ вᲂз̾держа́нїѧ бᲂлѣ́зни ѻ҆́ч҃е , и҆ стра́сти ᲂу҆мертви́лъ є҆сѝ пло́ти лю́тыѧ . и҆ в̾ без̾стра́стїе ꙗ҆́кѡ во ѻ҆де́ждꙋ свѣ́тлꙋ ꙗ҆́вѣ ѡ҆блече́сѧ . Распе́нъ ᲂу҆́ды свᲂѧ̀ вᲂз̾держа́нїемъ , хрⷭ҇то́ви по́жилъ є҆сѝ , крⷭ҇то́мъ сме́рть пᲂгꙋ́бльшемꙋ . и҆ цѣле́бнᲂю бл҃гᲂда́тїю , ѡ҆бᲂгати́вшемꙋ тѧ̀ .= боⷢ҇ . З=ачала̀ є҆сѝ пречⷭ҇таѧ , неи҆з̾рече́ннымъ сло́вᲂмъ , всѧ̀ сᲂдержа́щаго землены́ѧ кᲂнцы̀ . и҆ сегѡ̀ рᲂдила̀ є҆сѝ . є҆го́же мᲂлѝ прилѣ́жнѡ , пᲂми́лᲂвати ны̀ .

пѣ́снь , г҃ . і҆рмо́съ . Прᲂцвѣла̀ є҆́сть пꙋсты́нѧ ꙗ҆́кѡ кри́нъ гдⷭ҇и , ꙗ҆зы́чнаѧ неплᲂдѧ́щаѧ цр҃кви прише́ствїемъ ти , ѡ҆ не́й же ᲂу҆тверди́сѧ мᲂѐ срⷣце . Житїѐ твᲂѐ ꙗ҆́кѡ сл҃нце вᲂсїѧ̀ прпⷣбне , свѣ́тлыми дѣѧ́нїи . и҆́нᲂкꙋющимъ ли́ки прᲂсвѣти́ло є҆́сть , и҆ бѣсо́вскꙋю тмꙋ̀ ѿгна̀ . Смире́нъ дх҃ᲂмъ , и҆ ти́хъ срⷣцемъ бы́лъ є҆сѝ прпⷣбне , и҆ любвѐ бжⷭ҇твеныѧ и҆спо́лненъ . бл҃гᲂѡ҆бра́зенъ ѻ҆бы́чай и҆мѣ́ѧи всегда̀ . Ка́плѧми твᲂи́хъ сле́зъ , ᲂу҆гаси́лъ є҆сѝ ᲂу҆́гли грѣхо́вныѧ . то́чиши же ꙗ҆́кѡ пре́жде кᲂнца̀ , и҆ по кᲂнчи́нѣ мꙋ́дре , и҆сцѣле́нїемъ бе́зднꙋ притека́ющимъ тѝ .= боⷢ҇ . И҆=сцѣлѝ ꙗ҆́звы дꙋшѝ мᲂеѧ̀ влⷣчце . и҆ ᲂу҆́мныѧ и҆спра́ви движе́нїѧ , къ во́лѧмъ и҆з̾ тебѐ вᲂпло́щшагᲂсѧ сло́ва мᲂлю́сѧ .

и҆́нъ , і҆рмо́съ . Да ᲂу҆тверди́тсѧ срⷣце мᲂѐ в̾ во́ли твᲂе́й хрⷭ҇тѐ бж҃е , и҆́же над̾ вᲂда́ми не́бо ᲂу҆тверже́и втᲂро́е , и҆ ѡ҆снᲂва́выи на вᲂда́хъ зе́млю всемᲂгі́и . Дѣ́лы чⷭ҇тны́ми , и҆ и҆справле́нїи дᲂбрᲂдѣ́тельными , ѻ҆́ч҃е прᲂсїѧ́лъ є҆сѝ ꙗ҆́кᲂже ѕвѣзда̀ пресвѣ́тла , и҆́нᲂкꙋющихъ сᲂбо́рꙋ . прᲂсвѣти́лъ є҆сѝ чꙋде́сными сїѧ́нїи пᲂд̾со́лнечнꙋю . Си́лᲂю и҆ бл҃гᲂда́ти дх҃а , врагѝ беспло́тныѧ низ̾лᲂжи́лъ є҆сѝ . и҆ вᲂзне́слсѧ є҆сѝ пресла́внѡ , смире́ннᲂю мꙋ́дрᲂстїю . и҆ чꙋдесе́мъ самᲂдѣ́латель ѻ҆́ч҃е мꙋ́дре бы́лъ є҆сѝ . Є҆рети́чествꙋющихъ ѻ҆́ч҃е ᲂу҆ста̀ , и҆́стиннымъ сло́вᲂмъ загради́лъ є҆сѝ . и҆ гᲂне́нїѧ претерпѣ́въ , вѣне́цъ бжⷭ҇твеныи прїѧ́лъ є҆сѝ . крᲂмѣ̀ ꙗ҆́звы бы́въ мꙋ́дре , мꙋ́ченикъ и҆зрѧ́денъ .= боⷢ҇ . Д=а бг҃ъ чл҃къ бꙋ́детъ , бг҃ъ бы́сть чл҃къ , и҆з̾ тебѐ є҆ди́ныѧ чи́стыѧ , нача́ло прїе́мъ без̾нача́льныи . сегѡ̀ ра́ди тѧ̀ дв҃о вѣ́рнїи ᲂу҆бл҃жа́емъ .

сѣда́ленъ . гла́съ , д҃ . Бг҃ᲂви ѡ҆ст҃и́лъ є҆сѝ свᲂю̀ пребл҃же́нне жи́знь , бы́въ и҆зрѧ́денъ сщ҃еннᲂдѣ́йственикъ , и҆́стиненъ хрⷭ҇то́въ сщ҃е́нне . тѣ́мже по мно́гихъ бᲂлѣ́знехъ . ра́дꙋѧсѧ к̾ невеще́ственымъ преста́висѧ жили́щемъ . ны́нѣ и҆стᲂча́еши на́мъ пᲂто́ки и҆сцѣле́нїемъ .

дрꙋгі́и , сѣда́ленъ . гла́съ , а҃ . Ꙗ҆́кѡ сл҃нце свѣ́тлѡ вᲂсїѧ́вши ѻ҆́ч҃е па́мѧть твᲂѧ̀ , вѣ́рнымъ срⷣца̀ прᲂсвѣща́етъ , страсте́й тмꙋ̀ ѿє́млющи . ю҆́же вѣ́рᲂю чи́стᲂю твᲂрѧ́щїѧ пᲂкры́й и҆ сᲂхранѝ ѿ и҆скꙋше́нїи жите́йскихъ на́съ ѻ҆́ч҃е стефа́не .= сла́ва , и҆ ны́нѣ , боⷢ҇ . Без̾невѣ́стнаѧ чⷭ҇таѧ бцⷣе дв҃о , є҆ди́на вѣ́рнымъ пред̾ста́тельнице и҆ пᲂкро́ве , бѣ́дъ и҆ скᲂрбе́й , и҆ лю́тыхъ ѡ҆бстᲂѧ́нїи всѣ́хъ и҆зба́ви , и҆́же натѧ̀ наде́ждꙋ ѻ҆трᲂкᲂви́це и҆мꙋ́щаѧ . и҆ дш҃а на́ша спасѝ , бжⷭ҇твеными тѝ мᲂли́твами . крⷭ҇тᲂбоⷢ҇ . З=рѧ́щи тѧ̀ хрⷭ҇тѐ всенепᲂро́чнаѧ мт҃и , ме́ртва на́ древѣ прᲂсте́рта , вᲂпїѧ́ше сн҃е мо́й , сᲂбез̾нача́льныи ѻ҆ц҃ꙋ и҆ дх҃ᲂви , что̀ неи҆зрече́ннᲂе смᲂтре́нїе твᲂѐ сїѐ , и҆́мже спа́слъ є҆сѝ , пречⷭ҇тᲂю рꙋкꙋ̀ твᲂе́ю ще́дре сᲂзда́нїе .

пѣ́снь , д҃ . і҆рмо́съ . Прише́ствᲂвавъ ѿ дв҃ы , ни хᲂда́тай ни а҆́нг҃лъ , но ты̀ са́мъ гдⷭ҇и вᲂпло́щьсѧ , и҆ спасѐ всего́ мѧ чл҃ка , тѣ́мъ вᲂпїю́ ти , сла́ва си́лѣ твᲂе́й . Ѡ҆чи́стивъ свᲂѐ се́рдце , честны́ми вᲂсхᲂжде́нїи , ᲂу҆́мъ в̾пери́лъ є҆сѝ , є҆ди́нагѡ бг҃а зрѣ́ти дᲂбро́ты без̾мѣ́рныѧ . и҆ и҆́же ѿ тꙋ́дꙋ свѣтлᲂстьмѝ ѡ҆зари́тисѧ . Сказа́нїе слᲂвесе́мъ бжⷭ҇твенымъ твᲂрѧ̀ , ра́зꙋмъ бжⷭ҇твеныи ѻ҆́ч҃е ѿ тꙋ́дꙋ пᲂче́рплъ є҆сѝ . всѣ́мъ же пре́далъ є҆сѝ бл҃гᲂче́стнѡ , и҆ларїѡ́не к̾ тебѣ̀ притека́ющимъ . Глаго́лъ твᲂи́хъ сла́дᲂсть , сердца̀ ᲂу҆ти́ши притека́ющимъ к̾ тебѣ̀ . твᲂрѧ́ бо ꙗ҆́же ᲂу҆ча́ше сло́вᲂмъ бл҃гᲂпрїѧ́тнымъ , млⷭ҇тивнѡ любо́вїю , ю҆́же и҆мѣ́ѧше прпⷣбне .= боⷢ҇ . Г=дⷭ҇ь , тѧ̀ гжⷭ҇ꙋ и҆ влⷣчцꙋ всѣ́мъ сᲂдѣ́ла пречⷭ҇таѧ . и҆з̾ твᲂи́хъ лᲂже́снъ вᲂплᲂти́всѧ , ѿ ѻ҆́бласти вра́жїѧ свᲂѐ сᲂзда́нїе и҆зба́ви .

и҆́нъ , і҆рмо́съ . Дх҃ᲂмъ пред̾зрѧ̀ пррⷪ҇къ а҆вва́кꙋмъ , слᲂвесѐ вᲂплᲂще́нїе прᲂпᲂвѣ́даше глаго́лѧ , внегда̀ прибли́жатсѧ лѣ́та пᲂзна́нъ бꙋ́деши . внегда̀ прїи́детъ вре́мѧ ꙗ҆ви́шисѧ , сла́ва си́лѣ твᲂе́й гдⷭ҇и . Ка́плѧми сщ҃е́нныхъ тѝ сле́зъ напᲂи́всѧ , дре́во ꙗ҆ви́сѧ стефа́не плᲂдᲂви́то мꙋ́дре . плᲂды̀ принᲂша́ѧ дᲂбрᲂдѣ́телей бл҃гᲂво́нныѧ , и҆ чꙋдеса̀ без̾чи́сленна и҆стᲂча́еши . тѣ́мже бл҃гᲂче́стнѡ тѧ̀ пᲂчита́емъ . Ꙗ҆́кѡ бжⷭ҇твеныи зри́тсѧ ра́й мꙋ́дре , хра́мъ и҆мѣ́ѧ твᲂи́хъ мᲂще́й ра́кꙋ , цвѣ́ты пестры̀ принᲂсѧ̀ чꙋде́сныѧ . и҆́миже срⷣца̀ наслажда́ютсѧ , с̾ вѣ́рᲂю стефа́не при́снѡ хва́лѧщимъ тѧ̀ . Слѣпы́ѧ рѣши́ши , и҆ ᲂу҆ставлѧ́еши лю́тыѧ чл҃кѡмъ недꙋ́ги , в̾ сла́вꙋ хрⷭ҇тꙋ̀ . ѿ негѡ̀ бл҃гᲂда́ть трꙋдо́мъ прїѧ́лъ є҆сѝ . вᲂз̾вели́чилсѧ є҆сѝ , прᲂсвѣти́сѧ и҆ прᲂсла́висѧ , сла́во и҆́нᲂкꙋющимъ ѻ҆́ч҃е на́шъ .= боⷢ҇ . С=т҃а́ѧ бцⷣе ст҃и на́съ , ꙗ҆́же прест҃а́гѡ ро́ждьши пло́тїю , ᲂу҆пᲂдо́битисѧ вᲂсхᲂтѣ́вша чл҃кѡмъ . и҆ нбⷭ҇нагѡ житїѧ̀ всѧ̀ пᲂкажѝ пречⷭ҇таѧ , прича́стники мᲂли́твами сѝ .

пѣ́снь , є҃ . і҆рмо́съ . Хᲂда́тай бг҃ꙋ и҆ чл҃кѡмъ бы́сть хрⷭ҇тѐ бж҃е , тᲂбо́ю бо влⷣко к̾ свѣтᲂнача́льникꙋ ѻ҆ц҃ꙋ́ ти , ѿ́ нᲂщи невѣ́дѣнїѧ приведе́нїе ѡ҆брѣто́хᲂмъ . И҆стка́лъ є҆сѝ себѣ̀ спасе́нїѧ прпⷣбне ри́зꙋ , свᲂи́ми бᲂлѣ́зньми в̾ сїю̀ ѡ҆дѣ́ѧвсѧ . и҆ кнѧ́зѧ тмѣ̀ въ стꙋ́дъ вѣ́чныи ѡ҆бо́лклъ є҆сѝ . Плᲂтьскі́ѧ стра́сти , вᲂз̾держа́нїемъ прпⷣбне ᲂу҆вѧди́лъ є҆сѝ . и҆ бл҃гᲂда́ть нбⷭ҇нꙋю вᲂспрїѧ́тъ , ѻ҆́ч҃е и҆ларїѡ́не , врачева́ти разли́чныѧ чл҃кѡмъ недꙋ́ги . Твᲂѝ к̾ бг҃ꙋ непреста́ннѡ рꙋ́цѣ вᲂз̾дѣва́емѣ , рꙋкѝ льсти́вагѡ ѻ҆́ч҃е бл҃гᲂчести́выѧ и҆зба́виша . и҆ всѧ́кᲂмꙋ бᲂлѧ́щемꙋ , здра́вїе пᲂдава́ше .= боⷢ҇ . К=рѣ́пᲂсть вѣ́рнымъ , и҆ прпⷣбнымъ держа́ва . тᲂбо́ю бо чⷭ҇таѧ всѣ́мъ и҆стека́ютъ лꙋ́чшаѧ , и҆ на землѝ живꙋ́щїи к̾ нб҃сѝ вᲂсхо́дѧтъ .

и҆́нъ , і҆рмо́съ . Тво́й ми́ръ да́ждь на́мъ сн҃е бж҃їи , и҆но́го бо ра́звѣ тебѐ бг҃а незна́емъ , и҆́мѧ твᲂѐ и҆мѧнꙋ́емъ , ꙗ҆́кѡ бг҃ъ живы́мъ и҆ ме́ртвымъ є҆сѝ . Мѷрᲂдх҃нᲂве́ненъ бы́въ , бжⷭ҇твеными дᲂбрᲂдѣ́тельми . и҆стᲂча́еши мꙋ́дре по ᲂу҆спе́нїи ми́ро бл҃гᲂво́ннᲂе , ᲂу҆дивлѧ́емь вѣ́рными чл҃ки , любо́вїю чтꙋ́щими тѧ̀ . Вели́кими пᲂказа́нїи чꙋде́съ стра́шныхъ , стефа́не прᲂсїѧ́лъ є҆сѝ , и҆ пре́же сме́рти дᲂстᲂчꙋ́дне . и҆ по ѿше́ствїи сщ҃е́ннагѡ ти пᲂгребе́нїѧ . Ст҃о препрᲂвᲂди́въ свᲂѐ житїѐ ѡ҆ хрⷭ҇тѣ̀ стефа́не , бг҃ᲂмꙋ́дре ѻ҆́ч҃е на́шъ . со ст҃ы́ми веселѧ́сѧ , нн҃ѣ ѡ҆сщ҃а́й вѣ́рᲂю чтꙋ́щїѧ тѧ̀ .= боⷢ҇ . Р=о́ждьши пренепᲂро́чнаѧ бг҃а є҆мманꙋ́ила , чл҃ка ꙗ҆́вѣ за милᲂсе́рдїе бы́вша . є҆го́же мᲂлѝ ꙗ҆́кѡ чл҃кᲂлю́бца чⷭ҇таѧ , ᲂу҆ще́дрити лю́ди сᲂгрѣ́шшїѧ .

пѣ́снь , ѕ҃ . і҆рмо́съ . Въ бе́зднѣ грѣхо́внѣй ѡ҆держи́мъ , не и҆з̾слѣ́днꙋю млрⷭ҇дїѧ твᲂегѡ̀ призыва́ю бе́зднꙋ , ѿ тлѝ бж҃е мѧ вᲂз̾ведѝ . Оу҆мертви́всѧ и҆ларїѡ́не ми́рꙋ всемꙋ̀ , ны́нѣ живе́ши , преста́вльсѧ въ нбⷭ҇ныѧ хра́мы . и҆ живᲂно́снᲂе всегда̀ и҆сцѣле́нїемъ и҆стᲂча́еши дѣ́йство . Бл҃гᲂзва́ненъ кро́тᲂкъ , цѣ́лъ непᲂро́ченъ , и҆ препᲂдо́бенъ , и҆ бл҃гᲂꙋми́ленъ , и҆ ти́хъ дх҃ᲂмъ бы́лъ є҆сѝ ѻ҆́ч҃е пребᲂга́те . Ми́лᲂванїемъ без̾мѣ́рнымъ ᲂу҆краша́емь , и҆ нищелю́бїемъ мно́гимъ ᲂу҆дᲂбрѧ́емь . бг҃ᲂви ᲂу҆го́дникъ бли́жнїи , и҆ларїѡ́не пᲂказа́сѧ всеи҆зрѧ́дне . Ꙗ҆́кѡ че́стно твᲂѐ житїѐ и҆ непᲂро́чно , и҆ предо́бръ и҆ красе́нъ нра́въ тво́й . стра́шна же чꙋдеса̀ , ꙗ҆́же сᲂверша́еши всегда̀ пречꙋ́дне .= боⷢ҇ . Ч=ерто́гъ бж҃їи нескве́рныи , прⷭ҇то́лъ ѻ҆гнеѡ҆бра́зныи вседержи́телѧ , бцⷣꙋ всѝ ро́ди рᲂдо́въ ᲂу҆бл҃жа́емъ .

и҆́нъ , і҆рмо́съ . Прᲂро́кꙋ і҆ѡ́нѣ пᲂдо́бѧсѧ вᲂпїю̀ , живо́тъ мо́й бла́же , свᲂбᲂдѝ и҆з̾ тлѝ , и҆ спаси́ мѧ сп҃се ми́ра зᲂвꙋ́ща сла́ва тебѣ̀ . И҆справлѧ́еши ѻ҆́ч҃е слꙋкі́ѧ , ѻ҆́чи прᲂсвѣща́еши слѣпы́мъ . хᲂди́ти же твᲂри́ши раз̾сла́бленыѧ ѡ҆ хрⷭ҇тѣ̀ . и҆ ѿгᲂнѧ́еши лꙋка́выѧ дꙋ́хи , стефа́не прпⷣбне . Стрꙋѧ̀ и҆стека́етъ при́снѡ , ꙗ҆́кѡ ѿ ѻ҆кри́на чи́ста , ѿ честны́ѧ тѝ ра́ки , и҆сцѣле́нїй бᲂга́тнѡ бл҃же́нне . страсте́мъ и҆з̾сꙋша́ѧ всѧ́къ пᲂто́къ . Чꙋ́денъ дѣ́йственикъ , и҆ па́стырь и҆́стиненъ , ѻ҆́ч҃е стефа́не ꙗ҆́вльсѧ . сᲂхранѧ́ѧи прⷭ҇нѡ ста́до твᲂѐ , є҆́же сᲂвᲂкꙋпи́лъ є҆сѝ мно́гими трꙋды̀ твᲂи́ми .= боⷢ҇ . Н=атѧ̀ ꙗ҆́кѡ до́ждь на рꙋно̀ сᲂше́дъ бцⷣе сп҃съ , и҆з̾сꙋшѝ ꙗ҆́вѣ пᲂто́ки без̾бо́жїѧ . дш҃а же напᲂѧ́ѧ , прⷭ҇нѡ чтꙋ́щимъ тѧ̀ .

пѣ́снь , з҃ . і҆рмо́съ . Бг҃ᲂпрᲂти́вно велѣ́нїе без̾зако́ннꙋюща мꙋчи́телѧ , высо́къ пла́мень вᲂз̾несло̀ є҆́сть , хрⷭ҇то́съ же прᲂсте́ръ бг҃ᲂчести́вымъ дѣ́темъ , хла́дъ дх҃о́вныи , сы́и бл҃гᲂслᲂве́нъ и҆ препрᲂсла́вленъ . Ѻ҆рꙋ́жїемъ ᲂу҆ѧзви́лъ є҆сѝ , твᲂи́хъ по́двигъ беспло́тнагѡ ѕмі́ѧ , и҆ до кᲂнца̀ пᲂтреби́лъ є҆сѝ . тѣ́мже чꙋдесе́мъ по́честь вᲂспрїѧ́лъ є҆сѝ . стра́сти лю́тыѧ , дш҃а́мъ же и҆ тѣ́лѡмъ и҆сцѣлѧ́ти прпⷣбне . Слᲂвеса̀ твᲂегѡ̀ прᲂи҆схᲂжде́нїѧ , ꙗ҆́кᲂже рᲂса̀ ѿє҆́млютъ ва́ръ ᲂу҆ны́нїѧ прпⷣбне , прихᲂдѧ́щимъ тѝ вѣ́рᲂю ѻ҆́ч҃е на́шъ . и҆ дᲂбрᲂдѣ́тельными тѝ прⷭ҇нѡ прᲂсвѣща́ѧ ѻ҆́бразы дх҃ᲂмъ . Страсте́мъ самᲂде́ржца ᲂу҆ма̀ сᲂтво́рь , ꙗ҆́вѣ црⷭ҇твᲂвалъ є҆сѝ , ꙗ҆́кѡ пᲂбѣди́тель и҆зрѧ́денъ . и҆ ꙗ҆зы́ки и҆нᲂплеме́нныѧ пᲂбᲂри́лъ є҆сѝ . и҆ пᲂтреби́лъ є҆сѝ мꙋ́дре , бѣсо́въ стра́сти всепа́гꙋбныѧ . Непᲂкᲂлеба́ша прпⷣбне , твᲂегѡ̀ срⷣца сто́лпъ недви́жимыи , и҆скꙋше́ней вѣ́тры . на ка́мени бо ᲂу҆тверди́сѧ гдⷭ҇ни любвѐ . є҆ю́же ᲂу҆крѣплѧ́емь , мно́гимъ бы́сть бжⷭ҇твенѡ ᲂу҆тверже́нїе . трⷪ҇ченъ . Пᲂю́ тѧ тричи́сленꙋю ли́цы , трⷪ҇цꙋ пресꙋ́щнꙋю , нераздѣ́льнꙋ несмѣ́снꙋ , є҆ди́ницꙋ , є҆стество́мъ же недᲂмы́слимꙋ , є҆ди́нагѡ вседержи́телѧ бг҃а , ѻ҆ц҃а сло́ва и҆ дх҃а ст҃а́гѡ .= боⷢ҇ . Ѻ҆=бразы̀ тѧ̀ и҆з̾дале́ча прᲂѡ҆бразᲂва́ше бл҃гᲂда́ть дх҃а . прᲂро́ческими прᲂпᲂвѣ́данїи , го́рꙋ тꙋ́чнꙋ ст҃ꙋ . две́рь спасе́нꙋю . черто́гъ же но́въ чи́стаѧ , и҆ кᲂвче́гъ тѧ̀ и҆менꙋ́ющи .

и҆́нъ , і҆рмо́съ . Ꙗ҆́же в̾ пещѝ ѻ҆́трᲂки твᲂѧ̀ сп҃се , неприкᲂснꙋ́сѧ ни вредѝ и҆́хъ ѻ҆́гнь . тᲂгда̀ трїѐ , ꙗ҆́кѡ є҆ди́неми ᲂу҆сты̀ пᲂѧ́хꙋ , и҆ бл҃гᲂслᲂвлѧ́хꙋ глаго́люще , бл҃гᲂслᲂве́нъ бг҃ъ ѻ҆ц҃ъ на́шихъ . Сщ҃еннᲂдѣ́йствᲂвавъ , ꙗ҆́кᲂже са́мсѧ на ᲂу҆́гли по́стнагѡ пребыва́нїѧ преда́стъ . ве́сь хрⷭ҇то́ви пᲂказа́сѧ ѻ҆́ч҃е бл҃гᲂꙋха́нїе . и҆ вѣ́рныхъ лица̀ бл҃гᲂꙋха́еши прⷭ҇нѡ , чꙋдᲂдѣ́йствꙋѧ па́че ᲂу҆ма̀ . Правᲂсла́вїѧ сїѧ́ѧ блиста́нїи , ѿгна́лъ є҆сѝ тмꙋ̀ є҆ресе́мъ мꙋ́дре . и҆ гᲂне́нїѧ на лѣ́та мно́га претерпѣ́въ , мꙋ́ченикъ бе́з̾ крᲂве бы́лъ є҆сѝ . тѣ́мже вѣ́рнѡ тѧ̀ вᲂсхвалѧ́емъ . Терпѣ́нїе стѧжа́въ мно́го , вᲂз̾держа́нїе вѣ́рꙋ и҆ любо́вь и҆́стиннꙋ . ꙗ҆ви́сѧ ѻ҆ц҃ъ си́рымъ , вдᲂви́цамъ застꙋ́пникъ , ми́лᲂстивъ и҆ смире́нъ стефа́не , мни́хѡмъ сла́во и҆ пᲂхвало̀ . Твᲂемꙋ̀ ᲂу҆диви́сѧ по́лкъ бѣсо́вскїи , всено́щнᲂмꙋ стᲂѧ́нїю , и҆ мᲂли́твенᲂмꙋ пᲂжда́нїю , слеза́мъ и҆ вᲂз̾дыха́нїю , к̾ зижди́телю и҆́стиннѣй любвѝ , и҆́миже низ̾лᲂжи́лъ є҆сѝ тѣ́хъ стефа́не кᲂва́рствїѧ .= боⷢ҇ . К=а́кѡ дᲂи́ши млеко́мъ сн҃а без̾ѻ҆ц҃а , пита́ющагѡ всѧ́кѡ дыха́нїе , мт҃и чи́стаѧ . ка́кѡ на рꙋкꙋ̀ но́сиши , сᲂдержа́щагѡ всѧ̀ . па́че ᲂу҆ма̀ чꙋ́до твᲂѐ . тѣ́мъ пᲂе́мъ при́снѡ вели́чїѧ твᲂѧ̀ .

пѣ́снь , и҃ . і҆рмо́съ . Пе́щь ѻ҆́гненна и҆нᲂгда̀ в̾ вавѷлѡ́нѣ , дѣ́йство раздѣлѧ́ше , бж҃їимъ велѣ́нїемъ халдѣ́и ѡ҆палѧ́ющи , вѣ́рныѧ же прᲂхлажда́ющи пᲂю́ща , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Вре́меннꙋю ѡ҆ста́вль житїѧ̀ сла́вꙋ ѻ҆́ч҃е , и҆ мимᲂтекꙋ́щее наслажде́нїе . сла́вꙋ же не ѿє҆́млемꙋ , и҆ пи́щꙋ немимᲂтекꙋ́щꙋю , на́ нб҃сѣхъ прїѧ́лъ є҆сѝ премꙋ́дре , со всѣ́ми бᲂѧ́щимисѧ гдⷭ҇а . Всѐ свᲂѐ стражда̀ прᲂше́лъ є҆сѝ житїѐ . тѣ́мже и҆ бл҃же́ннᲂмꙋ спᲂдо́бисѧ ᲂу҆тѣше́нїю , є҆мꙋ́же причасти́шасѧ ст҃і́и . в̾ землѝ кро́ткихъ ра́дꙋѧсѧ , ны́нѣ прпⷣбне всели́сѧ , ꙗ҆́кѡ смы́сленъ же и҆ разꙋ́менъ . Честна̀ твᲂѧ̀ пре́д̾ бг҃ᲂмъ ꙗ҆ви́сѧ сме́рть , ѻ҆́ч҃е сщ҃е́нне . тᲂго́бо пᲂче́лъ є҆сѝ и҆ко́нꙋ , и҆ гᲂне́нїѧ пᲂдъѧ́лъ є҆сѝ . ѡ҆скᲂрблѧ́емь прпⷣбне , мꙋчи́телемъ свѣ́телъ всѣ́мъ пᲂказꙋ́ѧсѧ . Оу҆ста́вилъ є҆сѝ ꙗ҆́вѣ лᲂвце́мъ ѻ҆́ч҃е негᲂдᲂва́нїе , и҆ и҆спо́лнилъ є҆сѝ си́хъ лᲂвле́нїѧ , и҆́же пре́жде пᲂгрѣши́ша . бг҃ꙋ пᲂслꙋ́шавшꙋ прпⷣбне мᲂли́твы твᲂѧ̀ , сщ҃еннᲂдѣ́йствене пребл҃же́нне .= боⷢ҇ . С=кве́рны мѧ страсте́й и҆ ка́ла грѣхо́вна , бг҃ᲂра́дᲂваннаѧ ѿмы́й . и҆ две́ри ми ѿве́рзи пᲂкаѧ́нїѧ пᲂпо́лзшемꙋсѧ . и҆ ча́стѡ прегрѣше́ньми чи́стаѧ срѣта́ющꙋсѧ , и҆ бг҃а прᲂгнѣ́вающꙋ .

и҆́нъ , і҆рмо́съ . Є҆го́же ᲂу҆жаса́ютсѧ а҆́нг҃ли , и҆ всѧ̀ во́инства , ꙗ҆́кѡ твᲂрца̀ и҆ гдⷭ҇а . по́йте сщ҃е́ннїи , прᲂсла́вите ѻ҆́трᲂцы . бл҃гᲂслᲂви́те лю́дїе , и҆ превᲂзнᲂси́те во всѧ̀ вѣ́ки . Прпⷣбнѡ прпⷣбнаѧ , пребл҃же́нне сᲂверша́ѧ , прпⷣбнымъ сᲂчта́сѧ , и҆ всеи҆з̾бра́ннымъ . с̾ ни́миже тѧ̀ пᲂчита́емъ , ра́цѣ мᲂще́й твᲂи́хъ пᲂкланѧ́ющесѧ , стефа́не ѻ҆́ч҃е бг҃ᲂно́се . Оу҆ма̀ чистᲂтꙋ̀ стѧжа́въ мꙋ́дре , дх҃а зерца́ло бы́лъ є҆сѝ красно̀ . сегѡ̀ ꙗ҆вле́нїѧ прїе́млѧ , и҆ лю́ди прᲂсвѣща́ѧ твᲂи́ми ᲂу҆че́нїи . Ви́дитсѧ пресла́внѡ пребл҃же́нне , тᲂбо́ю премꙋ́дре сᲂверша́емо , ѿ є҆ди́нагѡ то́кмѡ твᲂегѡ̀ , жена̀ видѣ́нїѧ , належа́щаго є҆́й недꙋ́га ѿрѣ́шшисѧ , пра́во стꙋпа́ше . трⷪ҇ченъ . Вᲂспᲂе́мъ без̾нача́льнагѡ ѻ҆ц҃а и҆ сн҃а и҆ дх҃а ст҃а́гѡ , нераздѣ́льнᲂе нача́ло , прⷭ҇нᲂсꙋ́щнꙋю держа́вꙋ , трисᲂста́внᲂе є҆стество̀ , є҆ди́нꙋ сла́вꙋ , и҆ є҆ди́но црⷭ҇тво .= боⷢ҇ . В=ᲂпло́щьсѧ беспло́тныи , и҆з̾ тебѐ бг҃ᲂпᲂдо́бнѡ . є҆го́же мᲂлѝ пречⷭ҇таѧ , стра́сти пло́ти мᲂеѧ̀ ᲂу҆мертви́ти , и҆ ѡ҆живи́ти мᲂю̀ ᲂу҆мерщвле́нꙋю дш҃ꙋ грѣхмѝ .

пѣ́снь , ѳ҃ . і҆рмо́съ . Без̾нача́льна рᲂди́телѧ сн҃ъ бг҃ъ и҆ гдⷭ҇ь , вᲂпло́щьсѧ ѿ дв҃цы на́мъ ꙗ҆ви́сѧ , ѡ҆мраче́нныѧ прᲂсвѣти́ти , и҆ сᲂбра́ти растᲂче́нныѧ . тѣ́мъ всехва́льнꙋю бцⷣꙋ велича́емъ . И҆сцѣле́нїѧ гро́бъ тво́й , дх҃а бл҃гᲂда́тїю и҆стᲂча́ѧ , и҆з̾сꙋша́етъ стрⷭ҇те́мъ тꙋ́чи , дꙋ́хи ѿгᲂнѧ́ѧ преле́стныѧ . и҆ прᲂсвѣща́етъ срⷣца̀ и҆ларїѡ́не прпⷣбне , вѣ́рнѡ бл҃жа́щимъ тѧ̀ . Ꙗ҆́кѡ шипо́къ прᲂцвѣ́лъ є҆сѝ , в̾ пᲂро́дѣ пᲂще́нїѧ . ꙗ҆́кѡ сладкᲂꙋха́ненъ кри́нъ . ꙗ҆́кѡ ꙗ҆́блᲂко бл҃гᲂво́нно , бл҃гᲂꙋха́лъ є҆сѝ всѣ́мъ бл҃гᲂчести́вымъ дш҃а и҆ срⷣца̀ , и҆ларїѡ́не сла́вне , мᲂли́твениче ѡ҆ хва́лѧщихъ тѧ̀ . Млрⷭ҇дїе и҆мѣ́лъ є҆сѝ , любо́вь и҆ смире́нїе , млⷭ҇тыню и҆ ѡ҆бы́чай про́стъ . вѣ́рꙋ и҆́стиннꙋ и҆ наде́ждꙋ . житїѐ чи́сто , и҆ нра́въ пра́въ , и҆ларїѡ́не прпⷣбне , и҆́нᲂкѡмъ ᲂу҆дᲂбре́нїе . Па́мѧть твᲂѧ̀ дне́сь ꙗ҆́кѡ сл҃нце вᲂсїѧ̀ , бл҃гᲂчести́выхъ срⷣца̀ ѡ҆зарѧ́ющи . бᲂлѣ́зней твᲂи́хъ , и҆ чꙋде́съ сїѧ́нїемъ , ꙗ҆́кѡ вᲂи́стинꙋ прᲂсвѣща́ющи ѻ҆́ч҃е . в̾ ню́же всѧ́ ны пᲂмѧнѝ , вѣ́рнѡ чтꙋ́щїѧ тѧ̀ .= боⷢ҇ . Г=ла́съ тѝ прино́симъ гаврїи́лᲂвъ ра́дꙋющесѧ . ра́дꙋисѧ гл҃юще мѣ́сто сщ҃е́нїѧ . ра́дꙋисѧ прпⷣбнымъ сла́во , и҆ всѣ́мъ вѣ́рнымъ спасе́нїе , є҆ѧ́же ра́ди ѡ҆бᲂжи́хᲂмсѧ , бцⷣе прⷭ҇нѡ дв҃о .

и҆́нъ , і҆рмо́съ . Свѣтᲂно́сныи ѻ҆́блакъ , во́ньже всѣ́хъ влⷣка , ꙗ҆́кѡ до́ждь с̾ нб҃сѐ на рꙋно̀ сни́де , и҆ вᲂплᲂти́сѧ на́съ ра́ди , бы́въ ᲂу҆́бѡ чл҃къ без̾нача́ленъ . велича́емъ всѝ ꙗ҆́кѡ мт҃рь бг҃а на́шегѡ чи́стꙋ . Стᲂпа́мъ пᲂслѣ́дꙋѧ бг҃ᲂно́сне , бл҃гᲂчⷭ҇тнѡ и҆ прпⷣбнѡ пᲂжи́вшимъ на землѝ , кро́тᲂкъ неѕло́бивъ ꙗ҆ви́сѧ , ми́лᲂстивъ и҆ смире́нъ стефа́не , и҆ любвѐ и҆спо́лненъ бжⷭ҇твеныѧ . сегѡ̀ ра́ди тѧ̀ вѣ́рнѡ вᲂсхвалѧ́емъ . Ꙗ҆́кᲂже сладкᲂꙋха́нно ми́рѡ . ꙗ҆́кѡ пречи́стыи кри́нъ . ꙗ҆́кѡ ши́пᲂкъ ѻ҆́ч҃е бл҃гᲂцвѣтꙋ́щь , бл҃гᲂꙋха́нїе и҆спꙋща́еши ѿ честны́ѧ ти ра́ки , бесчи́сленыхъ и҆сцѣле́нїи . ѕлᲂсмра́дныѧ недꙋ́ги ѿгᲂнѧ̀ , вѣ́рᲂю пристꙋпа́ющимъ тебѣ̀ те́плѣ . Тѧ̀ па́стырѧ бжⷭ҇твенаго , и҆ пᲂдо́бника вели́ка , нача́льнаго па́стырѧ хрⷭ҇та̀ , мо́лимъ бг҃ᲂмꙋ́дре . сꙋ́щїѧ твᲂегѡ̀ ста́да ны́нѣ ѻ҆́вцы спаса́й , ѿ лꙋка́выхъ во́лкъ , ст҃ы́ми хᲂда́тайствы твᲂи́ми при́снѡ . Прест҃а́ѧ па́мѧть твᲂѧ̀ , ꙗ҆́кᲂже сл҃нце ве́лїе вᲂсїѧ́вши , свѣ́тлѡ ѡ҆зарѧ́етъ тва́рь . ю҆́же сᲂверша́юще бл҃гᲂче́стно , вᲂпїе́мъ тѝ стефа́не , мл҃твами твᲂи́ми всѣ́хъ мы́сли ѡ҆зари́въ , пᲂкры́й и҆ сᲂхранѝ на́съ .= боⷢ҇ . Г=рѣхᲂлюби́въ сы́и в̾ лѣ́нᲂсти жи́въ , и҆ сꙋди́ща чⷭ҇таѧ неꙋмы́тнагѡ трепе́щꙋ . на не́мже мѧ сᲂблюдѝ , твᲂи́ми ст҃ы́ми мᲂльба́ми , бг҃ᲂневѣ́сто неѡ҆сꙋжде́нна . да ꙗ҆́кѡ пред̾ста́тельницꙋ прⷭ҇нѡ ᲂу҆блажа́ю тѧ̀ .

<< Previous

Contents

Next >>