29 марта: прп. Марка Арефусимского

МЦⷭ҇А ТОГО́ЖЕ ВЪ К҃Ѳ ДН҃Ь

прпⷣбнагѡ ѻ҆ц҃а на́шегѡ ма́рка , є҆пкⷭ҇па а҆рефꙋси́мскагѡ . =и҆ кѷри́ла дїа́кᲂна , и҆ и҆нѣ́хъ мно́гихъ , при ᲂу҆лїѧ́нѣ мꙋчи́телѣ пᲂстрада́вшихъ . Ве́черъ , на гдⷭ҇и вᲂзва́хъ , стⷯры . гла́съ , и҃ . поⷣ . ѽ =пресла́внᲂе чꙋ́до . Мч҃нче ст҃лю прпⷣбне ,꙳ сщ҃е́нїѧ свѣ́тѡмъ сщ҃е́ннѡ ѡ҆блиста́емь .꙳ мꙋче́нїѧ прᲂсїѧ́лъ є҆сѝ ,꙳ невече́рнею свѣ́тлᲂстїю .꙳ и҆ ны́нѣ къ сїѧ́нїю пре́йде незахᲂди́мᲂмꙋ .꙳ в̾ не́мже мч҃нчестїи ли́цы ра́дꙋютсѧ .꙳ и҆дѣ́же ликꙋ́ютъ а҆́нг҃льстїи чи́нᲂве .꙳ с̾ ни́ми же на́съ всегда̀ пᲂмина́й ,꙳ бл҃же́нне и҆ бг҃ᲂпрїѧ́тне . Мч҃нче страстᲂно́се кѷри́ле ,꙳ бжⷭ҇твеныи слꙋжи́тель ꙗ҆́вльсѧ ,꙳ хрⷭ҇то́ви пᲂслꙋжи́лъ є҆сѝ .꙳ и҆ пᲂжре́сѧ ꙗ҆́кᲂже а҆́гнѧ чи́сто ,꙳ принесе́сѧ бг҃ꙋ на трапе́зꙋ бг҃ᲂбл҃же́нне .꙳ и҆ наслѣ́дїе че́стнѡ пᲂлꙋчи́лъ є҆сѝ ,꙳ в̾ свѣ́тлᲂтахъ ст҃ы́хъ ,꙳ ѡ҆ мно́зѣ ст҃ъ бы́въ ,꙳ зва́нїемъ ст҃е и҆ дѣѧ́нїемъ . Мч҃нцы хрⷭ҇то́вы прехва́льнїи ,꙳ мꙋ́камъ раз̾жже́нїе ,꙳ рᲂсо́ю бжⷭ҇твеныѧ бл҃гᲂда́ти ,꙳ без̾ вреда̀ прᲂи҆до́сте .꙳ и҆ на вᲂдѣ̀ пᲂко́йнѣ жи́ти спᲂдо́бистесѧ ,꙳ вѣнцы̀ пᲂбѣ́ды прїе́мше .꙳ тѣ́мже ра́дꙋющесѧ вѣ́рᲂю пра́зднꙋемъ дне́сь ,꙳ сщ҃е́ннꙋю ва́шꙋ па́мѧть ,꙳ хрⷭ҇та̀ сла́вѧще .

сла́ва , и҆ ны́нѣ , боⷢ҇ . Тѧ̀ мо́лимъ пречⷭ҇таѧ ,꙳ пред̾ста́тельницꙋ на́шꙋ ,꙳ ѡ҆держи́мыѧ в̾ печа́лѣхъ ,꙳ непре́зри до кᲂнца̀ пᲂги́бнꙋти рабо́мъ твᲂи́мъ .꙳ но ᲂу҆скᲂрѝ и҆з̾ѧ́ти на́съ ,꙳ настᲂѧ́щагѡ гнѣ́ва и҆ ско́рби ,꙳ ѽ бг҃ᲂвмѣсти́маѧ прест҃а́ѧ чи́стаѧ ,꙳ ты́ бо є҆сѝ на́мъ стѣна̀ ,꙳ и҆ по́мᲂщь неѡ҆бᲂри́ма .= крⷭ҇тᲂбоⷢ҇ . Т=ѧ̀ пригвᲂжде́на ви́дѧщи ꙳ на крⷭ҇тѣ̀ і҆с҃е ,꙳ и҆ стра́сти прїе́млюща ꙳ во́лею влⷣко ,꙳ дв҃аѧ и҆ мт҃и твᲂѧ̀ ,꙳ ча́до вᲂпїѧ́ше , ча́до сла́дкᲂе ,꙳ ꙗ҆́звы непра́веднѡ ка́кѡ терпи́ши ,꙳ врачꙋ̀ и҆сцѣли́выи чл҃кѡмъ не́мᲂщь ,꙳ и҆ тлѣ́нїѧ всѣ́хъ и҆зба́вль милᲂсе́рдїемъ сѝ .

На ᲂу҆́трени . ѻ҆́ба кано́на , во ѻ҆кта́и . и҆ ст҃ы́мъ , на д҃ . кано́нъ , твᲂре́нїе і҆ѡ́сифᲂво . гла́съ , и҃ . пѣ́снь , а҃ . і҆рмо́съ . Пᲂсѣче́ныи несѣко́мᲂе пресѣчѐ , и҆ ви́дѣ сл҃нце зе́млю , є҆ѧ́же нѣ́сть ви́дѣло , лю́тагѡ врага̀ вᲂда̀ пᲂтᲂпи́ла є҆́сть , и҆ непрᲂхᲂди́мᲂе про́йде і҆зра́иль , пѣ́снь же вᲂспѣва́шесѧ гдⷭ҇ви пᲂе́мъ , сла́внѡ бо прᲂсла́висѧ .

запѣ́въ : Ст҃і́и сщ҃еннᲂмч҃нцы , мᲂли́те бг҃а ѡ҆ на́съ . Со а҆́нг҃лы бг҃ᲂви пред̾стᲂѧ́ще , цр҃е́ви всѣ́хъ мч҃нцы пребᲂга́тїи , прᲂси́те на́мъ прегрѣше́нїемъ и҆збавле́нїѧ , любо́вїю бл҃жа́щимъ ва́съ , и҆ во хвале́нїи пᲂю́щимъ . гдⷭ҇ви пᲂе́мъ , сла́вно бо прᲂсла́висѧ .= Ст҃лѧ дх҃ъ ст҃ы́и , тѧ̀ пред̾ста́ви ма́рко , бᲂга́тныѧ пастѝ лю́ди , во всѧ́кᲂмъ прпⷣбїи , ᲂу҆че́нїѧ па́лицею слᲂве́снᲂю . с̾ ни́ми же бл҃же́нне пᲂе́ши . гдⷭ҇ви пᲂе́мъ , сла́вно бо прᲂсла́висѧ . Стрꙋѧ́ми крᲂве́й , пла́мень мнᲂгᲂбо́жїѧ ᲂу҆га́шше мꙋ́дрїи . ра́дꙋющесѧ пᲂстрада́сте , є҆́ллинскїѧ мꙋдрецы̀ до кᲂнца̀ пᲂсра́мльше , и҆ ны́нѣ съ мꙋ́ченики хрⷭ҇то́ви пред̾стᲂитѐ зᲂвꙋ́ще , гдⷭ҇ви пᲂе́мъ , сла́вно бо прᲂсла́висѧ . боⷢ҇ . Ѿ= дв҃ы нетлѣ́нныѧ , бг҃ъ вᲂплᲂща́етсѧ . є҆го́же беспло́тныхъ ли́цы трепе́щꙋще сла́вѧтъ , ꙗ҆́кѡ всѣ́хъ твᲂрца̀ , и҆ є҆ди́наго непремѣ́ннаго . и҆ челᲂвѣ́цы на землѝ всегда̀ пѣ́сньми вᲂспѣва́ютъ , гдⷭ҇ви пᲂе́мъ , сла́вно бо прᲂсла́висѧ .

пѣ́снь , г҃ . і҆рмо́съ . Стра́хъ тво́й гдⷭ҇и всадѝ в̾ срⷣца̀ ра́бъ твᲂи́хъ , и҆ бꙋ́ди на́мъ ᲂу҆тверже́нїе , вᲂи́стинꙋ тѧ̀ призыва́ющимъ . Неприне́слъ є҆сѝ че́сти , без̾слᲂве́снымъ и҆стꙋка́ннымъ пребᲂга́те . но претерпѣ́лъ є҆сѝ крѣ́пкѡ мꙋ́ки мнᲂгᲂѡ҆бра́зныѧ , ма́рке дᲂблемꙋ́дрене . Оу҆ма̀ до́блестїю претерпѣ́лъ є҆сѝ пресла́вне кѷри́ле , нарꙋга́нїѧ же и҆ мꙋ́ки , мꙋже́й без̾зако́ннꙋю щихъ , мч҃нче страстᲂно́се . Ѡ҆бнажа́еми мч҃нцы мнᲂгᲂстрада́льнїи , и҆ ра́нами сᲂкрꙋша́еми , непрело́жни пребы́сте . хрⷭ҇то́вы па́че любвѐ ничто́же пред̾пᲂчита́юще .= боⷢ҇ . И҆=з̾ тебѐ вᲂсїѧ̀ пренепᲂро́чнаѧ , ѡ҆зарѧ́ѧ пᲂд̾со́лнечнꙋю , пресла́вными сїѧ́нїи , пра́веднᲂе сл҃нце дв҃о .

сѣда́ленъ . гла́съ , д҃ . Прᲂсвѣ́щшесѧ бл҃гᲂда́тїю и҆́стиннᲂю , землены́ѧ кᲂнцы̀ свѣ́тлѡ наставлѧ́ете бл҃гᲂче́стїемъ , сщ҃еннᲂмꙋ́ченицы сла́внїи . тѣ́мже вѣ́рᲂю ва́съ ᲂу҆бл҃жа́емъ . сла́ва , и҆ ны́нѣ , боⷢ҇ . Пречи́стѣи рꙋ́цѣ твᲂѝ дв҃о мт҃и прᲂсте́рши , пᲂкры́и надѣ́ющїѧсѧ на тѧ̀ , и҆ сн҃ꙋ твᲂемꙋ̀ вᲂпїю́щихъ . всѣ́мъ пᲂда́ждь хрⷭ҇тѐ ми́лᲂсти твᲂѧ̀ .= крⷭ҇тᲂбоⷢ҇ . Н=а́ древѣ ви́дѧщи вᲂз̾дви́жена , сн҃а свᲂегѡ̀ пречⷭ҇таѧ , ᲂу҆тро́бᲂю мт҃рьски растерза́ема , рыда́ющи взыва́ше ᲂу҆вы̀ мнѣ̀ , ка́кѡ за́йде свѣ́те мо́й без̾лѣ́тныи .

пѣ́снь , д҃ . і҆рмо́съ . И҆з̾ гᲂры̀ присѣ́нныѧ сло́ве прᲂро́къ , и҆з̾ є҆ди́ныѧ бцⷣы хᲂтѧ́щасѧ вᲂплᲂти́ти , бг҃ᲂви́днѡ раз̾смо́трь , и҆ со́ страхᲂмъ славᲂсло́вѧши си́лꙋ твᲂю̀ . И҆сте́кши на́ землю кро́вь твᲂѧ̀ бг҃ᲂмꙋ́дре , сїю̀ пᲂи́стинѣ ѡ҆ст҃ѝ дᲂсто́йнѡ . и҆ дш҃а напаѧ́ѧ бл҃гᲂчести́вымъ , къ ре́внᲂсти бжⷭ҇твенѣй вᲂз̾двиза́ющи . Заре́ю мы́сленᲂю , ꙗ҆́вѣ прᲂсвѣща́еми , но́щь ѕлꙋ́ю без̾бо́жнагѡ ѕлᲂче́стїѧ , ѿгна́сте мч҃нцы пресла́внѡ , ма́рко и҆ кѷри́ле пребᲂга́таѧ . И҆сцѣлѝ на́ша недꙋ́ги бл҃гᲂда́телю , ма́рка мᲂли́твами , и҆ кѷри́ла бжⷭ҇твенагѡ . и҆ млⷭ҇ти твᲂѧ̀ бл҃гᲂсе́рде , на всѧ̀ вᲂспѣва́ющїѧ тѧ̀ низ̾пᲂслѝ . Си́лᲂю бжⷭ҇твенᲂю , и҆ бл҃гᲂда́тїю сла́внїи мч҃нцы хрⷭ҇то́вы , хра́мы и҆́дᲂльскїѧ низ̾лага́юще . дх҃ꙋ ст҃о́мꙋ цр҃кви вѣ́рᲂю пᲂказа́стесѧ .= боⷢ҇ . Ꙗ҆=ви́сѧ бж҃їе прᲂстра́ннᲂе в̾мѣсти́лище , престо́лъ высо́къ и҆ две́рь бцⷣе . є҆ю́же про́йде неи҆зрече́ннымъ ржⷭ҇тво́мъ , ѿ тлѧ̀ на́съ призыва́ѧ .

пѣ́снь , є҃ . і҆рмо́съ . Ѿ ́нᲂщи невѣ́дѣнїѧ , бг҃ᲂразꙋ́мїемъ прᲂсвѣще́й кᲂнцы̀ , прᲂсвѣти́ мѧ ᲂу҆́трᲂмъ славᲂсло́вїѧ твᲂегѡ̀ гдⷭ҇и . Ми́рꙋ ꙗ҆вле́на свѣти́ла , сщ҃еннᲂмч҃нцы бжⷭ҇твенїи бы́вше , всѧ̀ прᲂсвѣща́ете , бжⷭ҇твеными свѣтлᲂстьмѝ дх҃а . Сматрѧ́ѧ пребл҃же́нне , вᲂз̾да́нїѧ бжⷭ҇твенаѧ . терпѧ́ше ма́рко непᲂстᲂѧ́нныѧ ра́ны , и҆ бᲂлѣ́зни крѣ́пкѡ . Сщ҃еннᲂдѣ́лателенъ сы́и , и҆́же без̾кро́вныѧ же́ртвы принᲂсѧ̀ хрⷭ҇то́ви . же́ртвꙋ бл҃же́нне , блгⷭ҇ве́нꙋю себѐ гдⷭ҇ви прине́слъ є҆сѝ .= боⷢ҇ . Р=жⷭ҇тво́мъ стра́ннымъ , цр҃ѧ всѣ́хъ рᲂдила̀ є҆сѝ прест҃а́ѧ бцⷣе , во бл҃гᲂдѣ́тельство тва́ри .

пѣ́снь , ѕ҃ . і҆рмо́съ . І҆ѡ́нꙋ в̾ ки́тѣ гдⷭ҇и є҆ди́нагѡ всели́лъ є҆сѝ , мене́ же свѧ́заннаго во мре́жахъ вра́жїѧхъ спасѝ , ꙗ҆́кѡ ѿ тлѝ тᲂгѡ̀ спа́слъ є҆сѝ . Претерпѣ́въ мꙋ́ки мнᲂгᲂразли́чныѧ и҆ сме́рть хᲂда́тайственꙋю бг҃ᲂмꙋ́дре , въ сла́вѣ приснᲂсꙋ́щнѣй , ликꙋ́еши на́ нб҃сѣхъ , ѡ҆ на́съ кѷри́ле мᲂлѧ́сѧ . Глаго́лъ бж҃їи жи́въ в̾ срⷣцы свᲂе́мъ , ꙗ҆́кѡ и҆мѣ́ѧ ма́рко сла́вне , к̾ вѣ́рѣ бжⷭ҇твенѣй привлечѐ люде́й наро́ды мꙋ́дре , и҆ сла́внѡ тече́нїе скᲂнча́лъ є҆сѝ . Сщ҃е́нницы же́ртвы сᲂверше́ны гдⷭ҇ви принесо́стесѧ , мꙋ́ками всесᲂжже́гшесѧ и҆ в̾ вы́шнихъ свѣ́тлы , цр҃кви всѣ́хъ пред̾стᲂитѐ .= боⷢ҇ . Р=азрѣше́нїе на́шимъ дᲂлго́мъ и҆спрᲂсѝ и҆ житїю̀ и҆справле́нїе дв҃о . и҆спᲂвѣ́дающимъ вели́чїѧ твᲂѧ̀ , и҆ бл҃гᲂчести́вымъ нра́вᲂмъ тѧ̀ сла́вѧщимъ .

пѣ́снь , з҃ . і҆рмо́съ . И҆́же ѿ і҆ꙋде́и , дᲂше́дше ѻ҆́трᲂцы в̾ вавѷлѡ́нъ дре́вле , вѣ́рᲂю ᲂу҆тверже́нїи , пла́мень пе́щныи пᲂпра́вше гл҃юще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Прᲂсвѣ́щшесѧ заре́ю ст҃ы́ѧ трⷪ҇цы , бг҃ᲂбл҃же́ннїи , тмы̀ пре́лести и҆зба́вльшесѧ . и҆ сла́вꙋ пᲂю́ще ᲂу҆лꙋчи́сте , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . И҆́же ни́жнѧѧ ѡ҆ста́вльша , и҆ вы́шнѧѧ наслѣ́дᲂваста , бг҃ᲂно́сныи ма́рко , и҆ кѷри́лъ бжⷭ҇твеныи , и҆́хже пᲂю́ще пᲂчте́мъ , ѻ҆ц҃ъ на́шихъ бж҃е блгⷭ҇ве́нъ є҆сѝ . Дрема́нїе ᲂу҆ны́нїѧ , во́ времѧ по́двигъ ѿтрѧ́сше , сᲂверши́сте тече́нїе . и҆ сᲂбо́рᲂмъ стрⷭ҇тᲂте́рпецъ пᲂю́ще сᲂвᲂкꙋпи́стесѧ . ѻ҆ц҃ъ на́шихъ бж҃е блгⷭ҇ве́нъ є҆сѝ .= боⷢ҇ . И҆=з̾ тебѐ спасе́нїе , па́че ᲂу҆ма́ же и҆ сло́ва дв҃о вᲂсїѧ̀ , во тмѣ̀ сꙋ́щимъ сме́ртнѣй . и҆ вᲂпїю́щихъ нбⷭ҇ныѧ жи́тели сᲂдѣ́ла , ѻ҆ц҃ъ на́шихъ бж҃е блгⷭ҇ве́нъ є҆сѝ .

пѣ́снь , и҃ . і҆рмо́съ . Пᲂбѣди́тели врагꙋ̀ и҆ пла́мени , бл҃гᲂда́тїю бы́вше , и҆́же по за́пᲂвѣди ѕѣлѡ̀ пᲂбᲂра́юще дѣ́ти пᲂѧ́хꙋ , блгⷭ҇ви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Пᲂбѣди́тели мꙋчи́телю , съ преще́нїемъ сꙋдѧ́щемꙋ пᲂказа́вшесѧ . нетлѣ́нныѧ вѣнцы̀ мч҃нцы прїѧ́сте , вᲂпїю́ще , бл҃гᲂслᲂви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Щито́мъ любвѐ страда́льцы и҆ вѣ́ры вᲂѡ҆рꙋже́ни , вра́жїе ѡ҆пᲂлче́нїе мечѝ пᲂсѣко́сте , бжⷭ҇твеныѧ до́блести . вᲂпїю́ще , бл҃гᲂслᲂви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . На землѝ страда́вше , в̾ вы́шнихъ ст҃ы́хъ пра́ведныхъ , вѣнцы̀ ѿ рꙋкѝ хрⷭ҇то́вы прїѧ́сте . вᲂпїю́ще , бл҃гᲂслᲂви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . трⷪ҇ченъ . Ꙗ҆́кѡ є҆ди́ницꙋ є҆стество́мъ , трⷪ҇цꙋ тѧ̀ чтꙋ̀ ли́цы , ѻ҆́ч҃е вседержи́телю , сн҃е и҆ д́ш҃е ст҃ы́и . взыва́ѧ , бл҃гᲂслᲂви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . боⷢ҇ . Рꙋ́чкꙋ тѧ̀ ма́нны живо́тныѧ , прᲂпᲂвѣ́даемъ бл҃гᲂслᲂве́ннаѧ . трапе́зꙋ и҆ же́злъ , и҆ кади́льницꙋ зла́тꙋ и҆ свѣ́щникъ . го́рꙋ же и҆ две́рь , кꙋпинꙋ̀ не ѡ҆пали́мꙋ . прⷭ҇то́лъ вы́шнѧго , и҆ ми́рꙋ спасе́нїе .

пѣ́снь , ѳ҃ . і҆рмо́съ . Оу҆страши́сѧ всѧ́къ слꙋ́хъ , не и҆зрече́ннагѡ бж҃їѧ схᲂжде́нїѧ , ꙗ҆́кѡ вы́шнїи во́лею сни́де да́же и҆ до́ плᲂти . ѿ дв҃ческагѡ бо чре́ва бы́въ ᲂу҆́бѡ чл҃къ . тѣ́мже тѧ̀ пречⷭ҇тꙋю бцⷣꙋ , вѣ́рнїи велича́емъ . Стᲂпа́мъ мꙋ́ченицы хрⷭ҇то́вѣмъ , пᲂстрада́вшагѡ и҆ стра́сти ᲂу҆мертви́вша пᲂслѣ́дᲂвавше . мно́гихъ ра́нъ и҆скꙋ́съ прїѧ́сте , и҆ ѡ҆бличи́вше вра́гъ без̾бо́жныхъ слꙋже́нїѧ . вᲂз̾вели́чистесѧ , а҆́нг҃лѡмъ ꙗ҆́вѣ ᲂу҆пᲂдо́бльшесѧ . Ꙗ҆ви́стесѧ ᲂу҆́глїе ѻ҆́гнено , прибли́жившесѧ бг҃ᲂви пребᲂга́тїи , и҆ пᲂпали́сте мнᲂгᲂбо́жїѧ ле́сть бл҃гᲂда́тїю . и҆ к̾ свѣ́тꙋ мы́сленᲂмꙋ , ра́дꙋющесѧ преи҆до́сте бг҃ᲂбл҃же́ннїи , ѡ҆зарѧ́юще на́ша пᲂмышле́нїѧ . Пᲂста́вльше на ка́мени разꙋ́мнѣ , дш҃ъ ва́шихъ стᲂпы̀ бл҃же́ннїи , не пᲂкᲂлеба́стесѧ мно́гихъ мꙋ́къ прилᲂже́ньми . тѣ́мже ᲂу҆твержа́йте на́ша при́снѡ ра́зꙋмы , кᲂва́рствы вра́жїими кᲂле́блемыѧ , дᲂбрᲂпᲂбѣ́днїи мч҃нцы . Взѧ́ти бы́сте , къ ꙗ҆вле́нїю мꙋче́нїѧ страда́льцы , кра́йнѣй гᲂрѣ̀ , къ высᲂтѣ̀ вели́цѣй . и҆ црⷭ҇тво бж҃їе непᲂкᲂлеби́мо , спᲂдо́бистесѧ прїѧ́ти , ма́рко сщ҃е́нне , и҆ кѷри́ле сла́вне . є҆́же пᲂлꙋчи́ти всѣ́мъ на́мъ мᲂли́тесѧ .= боⷢ҇ . С=їѧ́нїемъ тѝ ѻ҆трᲂкᲂви́це мы́сленымъ , прᲂсвѣтѝ на́ша ᲂу҆мышле́нїѧ бг҃ᲂра́дᲂваннаѧ , и҆ серде́цъ мꙋдрᲂва́нїѧ . ꙗ҆́кѡ да по стезѧ́мъ жи́зни пра́вѡ стꙋпа́юще , ми́лᲂсти ᲂу҆лꙋчи́мъ , вᲂз̾вѣща́юще при́снѡ хвалы̀ твᲂѧ̀ .

<< Previous

Contents

Next >>