МЦⷭ҇А ТОГО́ЖЕ ВЪ Л҃А ДН҃Ь

ст҃а́гѡ сщ҃еннᲂмч҃нка и҆ чꙋдᲂтво́рца ѵ҆па́тїѧ , є҆пкⷭ҇па и҆́же в̾ га́грехъ . =Преставле́нїе и҆́же во ст҃ы́хъ ѻ҆ц҃а на́шегѡ і҆ѡ́ны , митрᲂпᲂли́та кі́евскагѡ и҆ всеѧ̀ рꙋсі́и . слꙋ́жба є҆мꙋ̀ пи́сана по се́й слꙋ́жбѣ . Ве́черъ , на гдⷭ҇и вᲂзва́хъ , стⷯры . гла́съ , и҃ . поⷣ . ѽ пресла́внᲂе чꙋ́до . Ѻ҆́ч҃е бг҃ᲂмꙋ́дре ѵ҆па́тїе ,꙳ вᲂз̾держа́нїемъ до́брѣ вᲂспитѣ́всѧ .꙳ въ пресла́внꙋю дᲂбрᲂдѣ́тели вше́лъ є҆сѝ высᲂтꙋ̀ ,꙳ прᲂстира́ѧсѧ к̾ видѣ́нїю та́йнᲂмꙋ ꙗ҆́вѣ ,꙳ хрⷭ҇то́вы дᲂбро́ты взира́ѧ .꙳ є҆го́же сїѧ́нїи ,꙳ ᲂу҆́мъ и҆ мы́сль ѡ҆зари́въ ,꙳ всѣ́мъ ѡ҆блиста́лъ є҆сѝ ,꙳ чꙋде́съ ѡ҆заре́нїѧ . Ѻ҆́ч҃е ѻ҆ц҃е́мъ ѵ҆па́тїе ,꙳ правᲂсла́вїѧ свѣ́тᲂмъ ѡ҆блиста́въ ,꙳ ѡ҆зари́лъ є҆сѝ мы́сли прпⷣбне ,꙳ вѣ́рнѡ притека́ющимъ тѝ .꙳ и҆ а҆́рїеви зѣ́ницы ѡ҆черни́въ ,꙳ ѿри́нꙋлъ є҆сѝ ѿ цр҃кве хрⷭ҇то́вы .꙳ тѣ́мже свѣти́льника тѧ̀ стѧжа́вше всѝ ,꙳ сщ҃е́ннꙋю па́мѧть твᲂю̀ ,꙳ хва́лѧще ᲂу҆бл҃жа́емъ . Ѻ҆́ч҃е сщ҃е́нныи ѵ҆па́тїе ,꙳ цр҃ѧ хрⷭ҇та̀ , є҆го́же ꙗ҆́снѡ прᲂпᲂвѣ́далъ є҆сѝ ,꙳ ѻ҆ц҃ꙋ є҆динᲂсꙋ́щна ,꙳ и҆мѣ́ѧ в̾ срⷣцы свᲂе́мъ .꙳ чꙋде́сными зарѧ́ми прᲂсїѧ́лъ є҆сѝ ,꙳ прᲂсвѣ́щь всю̀ пᲂд̾со́лнечнꙋю .꙳ ѕмі́ѧ ᲂу҆би́лъ є҆сѝ ,꙳ и҆ тепла̀ и҆стече́нїѧ , твᲂи́ми мᲂли́твами во́ды и҆стᲂчи́лъ є҆сѝ ,꙳ на и҆сцѣле́нїе страсте́мъ . =сла́ва , и҆ ны́нѣ , боⷢ҇ . Дв҃ства сᲂсꙋ́дъ ,꙳ чи́стᲂе бг҃ꙋ и҆ кра́снᲂе жили́ще ,꙳ мᲂлю́ тѧ пречⷭ҇таѧ ,꙳ дш҃ꙋ мᲂю̀ и҆сцѣлѝ ,꙳ ѡ҆ѕло́бленꙋю ꙗ҆́дᲂмъ ѕмїины́мъ ,꙳ и҆ ᲂу҆мерщвле́нꙋ престꙋпле́нїи .꙳ ꙗ҆́кѡ да сла́влю тѧ и҆ велича́ю ,꙳ вѣ́рныѧ всѧ̀ вᲂз̾вели́чившꙋю ,꙳ бг҃ᲂра́дᲂваннаѧ . крⷭ҇тᲂбоⷢ҇ . Что̀ зри́мᲂе видѣ́нїе ,꙳ є҆́же ѻ҆чи́ма мᲂи́ма ,꙳ ви́дитсѧ ѽ влⷣко ;꙳ сᲂдержа́и всю̀ тва́рь ,꙳ на́ древо вᲂз̾дви́жесѧ ,꙳ и҆ ᲂу҆мертви́сѧ всѣ́мъ даѧ́и живо́тъ ,꙳ бцⷣа пла́чꙋщи гл҃аше .꙳ є҆гда̀ ᲂу҆зрѣ̀ на крⷭ҇тѣ̀ пᲂвѣ́шена ,꙳ и҆́же и҆з̾ неѧ̀ неи҆зрече́ннѡ вᲂсїѧ́вшагѡ , бг҃а и҆ чл҃ка .

На ᲂу҆́трени . ѻ҆́ба кано́на , во ѻ҆кта́и . и҆ ст҃о́мꙋ , на д҃ . кано́нъ , твᲂре́нїе і҆ѡ́сифᲂво . гла́съ , д҃ . пѣ́снь , а҃ . і҆рмо́съ . Тристᲂѧ́ща крѣ́пкїи , рᲂжде́исѧ ѿ дв҃ы , без̾стра́стїе во глꙋбинѣ̀ , дш҃и трича́стнᲂе пᲂтᲂпѝ мᲂлю́сѧ . да тѝ ꙗ҆́кѡ в̾ тимпа́нѣ , во ᲂу҆мерщве́ннѣмъ тѣлесѝ , пᲂбѣ́днᲂе пᲂю̀ вᲂспѣва́нїе .

запѣ́въ : Ст҃ы́и сщ҃еннᲂмч҃нче ѵ҆па́тїе , мᲂлѝ бг҃а ѡ҆ на́съ . Бжⷭ҇твенагѡ страда́льца , мꙋ́драгѡ ст҃лѧ , чꙋдесе́мъ и҆сто́чника , па́стырѧ до́брагѡ , цр҃ко́внᲂе ᲂу҆тверже́нїе , пѣ́сньми велегла́снѡ , ꙗ҆́кѡ свѣти́льника всеми́рна , всѝ вᲂсхва́лимъ ра́дꙋющесѧ . Бжⷭ҇твенаѧ рѣка̀ , навᲂдни́вшаѧ пребл҃же́нне чи́стꙋю твᲂю̀ дш҃ꙋ . и҆ и҆стᲂчѝ на́мъ пречи́сты во́ды премꙋ́дре чꙋде́съ , то́ки и҆з̾сꙋша́юще мꙋ́тныхъ страсте́й ѵ҆па́тїе . Оу҆мертви́въ плᲂтьскі́ѧ стра́сти вᲂз̾держа́нїемъ . жи́знь и҆́стиннꙋю хрⷭ҇та̀ , на́съ ра́ди ᲂу҆ме́рша ѵ҆па́тїе , и҆мѣ́лъ є҆сѝ в̾нꙋ́трь в̾ дш҃и свᲂе́й живꙋ́ща . и҆ всѧ̀ твᲂѧ̀ к̾ немꙋ̀ ше́ствїѧ направлѧ́юща . Срⷣце и҆ дш҃ꙋ , трⷪ҇цѣ сᲂтвᲂрѝ нескве́рнꙋ цр҃квь . цр҃кви же сщ҃е́нны гдⷭ҇ви въ хвалꙋ̀ , прпⷣбне сщ҃еннᲂмч҃нче сᲂзда̀ . спасе́ныи бы́въ ѡ҆кᲂрми́тель ста́дꙋ твᲂемꙋ̀ .= боⷢ҇ . С=п҃са и҆ бг҃а , ѿ чи́стыхъ тѝ крᲂве́й вᲂплᲂти́ла є҆сѝ чи́стаѧ . пᲂказа́вшаго на́мъ мꙋ́драгѡ ст҃лѧ свᲂегѡ̀ пречи́стаѧ , спаси́тельна и҆ те́пла застꙋ́пника , чꙋ́днагѡ вᲂи́стинꙋ ѵ҆па́тїѧ .

пѣ́снь , г҃ . і҆рмо́съ . Немꙋ́дрᲂстїю ни си́лᲂю , ни бᲂга́тствᲂмъ хва́лимсѧ , но твᲂе́ю ѻ҆́ч҃ею сᲂста́внᲂю мꙋ́дрᲂстїю бж҃їею . ꙗ҆́кѡ нѣ́сть ст҃а па́че тебѐ чл҃кᲂлю́бче . Всѣ́мъ срⷣцемъ ко и҆сто́чникꙋ до́брымъ в̾мѣсти́сѧ . и҆́же ѿ тꙋ́дꙋ и҆з̾дале́ча , бᲂга́тными сїѧ́ѧ ѻ҆́ч҃е сщ҃е́нне , бжⷭ҇твеными свѣтлᲂстьмѝ . Зако́ны бжⷭ҇твеными ѡ҆гражде́нъ , без̾зако́нныхъ сᲂбо́рище , си́лᲂю ѻ҆́ч҃е бжⷭ҇твенᲂю , пᲂтреби́лъ є҆сѝ є҆ресе́мъ . и҆ спа́слъ є҆сѝ ста́до твᲂѐ ѻ҆́ч҃е ѵ҆па́тїе . Ѿ вы́шнїѧ пресвѣ́тлыѧ свѣщѝ дх҃а , прᲂсвѣща́емь мꙋ́дре , но́щїю хᲂдѧ́ща , свѣщи́ тѧ ꙗ҆ви́ша ѿ вᲂды̀ ѡ҆зарѧ́юща . Ѻ҆ц҃ъ бжⷭ҇твеныхъ ли́къ , сне́мшїисѧ бл҃же́нныи , и҆́же сᲂбра̀ хрⷭ҇то́съ , сᲂбо́ра пе́рвагѡ бл҃же́нне , ꙗ҆ви́лсѧ є҆сѝ ᲂу҆давлѧ́ѧ безꙋ́мнагѡ а҆́рїѧ .= боⷢ҇ . И҆=зба́ви мѧ всѧ́кᲂгѡ прило́га сᲂпрᲂти́внагѡ ѕмїина̀ , мт҃и дв҃о чⷭ҇таѧ . и҆ срⷣце мᲂѐ прᲂсвѣтѝ вѣ́рᲂю тѧ сла́вѧща пренепᲂро́чнꙋю .

сѣда́ленъ . гла́съ , а҃ . Вᲂсїѧ́лъ є҆сѝ в̾ ми́рѣ ст҃лю ѵ҆па́тїе , чꙋдесы̀ прᲂсвѣща́ѧ вѣ́рᲂю прихᲂдѧ́щїѧ къ тебѣ̀ . и҆ пᲂстрада́въ же кро́вїю мꙋ́дре , мно́жае присво́исѧ хрⷭ҇то́ви . и҆ ликꙋ́еши со а҆́нг҃лы на́ нб҃сѣхъ ѡ҆ на́съ мᲂлѧ́сѧ . сла́ва ᲂу҆крѣ́пльшемꙋ тѧ̀ бг҃ꙋ . сла́ва вѣнча́вшемꙋ тѧ̀ . сла́ва дѣ́ющемꙋ тᲂбо́ю всѣ́мъ и҆сцѣле́нїе .= сла́ва , и҆ ны́нѣ , боⷢ҇ . Рꙋ́цѣ свᲂѝ бжⷭ҇твенѣи , и҆́ма же зижди́телѧ нᲂси́ла є҆сѝ дв҃о пречⷭ҇таѧ , вᲂпло́щшасѧ бл҃гᲂсти ра́ди , прᲂсте́рши ᲂу҆мᲂлѝ є҆гѡ̀ , и҆зба́вити ны̀ ѿ напа́стей , страсте́й и҆ бѣ́дъ , вᲂсхвалѧ́ющихъ тѧ̀ любо́вїю , и҆ вᲂпїю́щихъ тѝ . сла́ва в̾се́льшемꙋсѧ въ тѧ̀ . сла́ва прᲂше́дшемꙋ и҆з̾ тебѐ . сла́ва свᲂбо́ждьшемꙋ на́съ ржⷭ҇тво́мъ твᲂи́мъ . крⷭ҇тᲂбоⷢ҇ .= На крⷭ҇тѣ̀ тѧ̀ пригвᲂжде́на ѿ без̾зако́нникъ , и҆ во́инѡмъ сп҃се кᲂпїе́мъ ре́бра тѝ прᲂбо́дшемъ , пречⷭ҇таѧ рыда́ше го́рькѡ , и҆ мно́гᲂмꙋ тѝ стра́шнᲂмꙋ дᲂлгᲂтерпѣ́нїю , дивлѧ́шесѧ вᲂпїю́щи . сла́ва и҆́же к̾ чл҃кѡмъ твᲂе́й любвѝ . сла́ва бл҃гᲂсти твᲂе́й . сла́ва сме́ртїю свᲂе́ю ѿ сме́рти чл҃ки свᲂбо́ждьшемꙋ .

пѣ́снь , д҃ . і҆рмо́съ . Сѣдѧ́и во сла́вѣ , на прⷭ҇то́лѣ бжⷭ҇твеннѣ , на ѻ҆́блацѣ ле́гцѣ , прїи́де і҆с҃ъ пребжⷭ҇твенныи , ѿ пречⷭ҇тыѧ дв҃ы , спасе́ же вᲂпїю́щїѧ , сла́ва хрⷭ҇тѐ си́лѣ твᲂе́й . Неле́стно сло́во , и҆ ᲂу҆че́нїе нескве́рно сᲂблюда́ѧ , прᲂпᲂвѣ́далъ є҆сѝ сло́во ѻ҆ц҃ꙋ сᲂприснᲂсꙋ́щно . а҆́рїѧ безꙋ́мнагѡ пре́лесть пᲂбѣ́ждь , сщ҃еннᲂмꙋ́чениче , чꙋдᲂтво́рче дᲂстᲂсла́вне . Го́рькїѧ ѿ го́ръ текꙋ́щїѧ во́ды , зна́менїемъ цѣльбы̀ то́кмѡ пᲂказа́лъ є҆сѝ . во́дꙋ жи́вꙋ стѧжа́въ в̾ срⷣцы свᲂе́мъ , в̾ вѣ́чнꙋю ѻ҆́ч҃е жи́знь текꙋ́щꙋю . Сщ҃е́нствᲂвавъ прпⷣбнѡ , сщ҃е́нство пᲂказа́въ свѣтлѣ́йше крᲂвьмѝ . ꙗ҆́кѡ за любо́вь и҆злїѧ́вшисѧ , и҆злїѧ́вшагѡ кро́вь честнꙋ́ю , за чл҃ческᲂе и҆збавле́нїе . Не ᲂу҆кᲂснѣ́вши бл҃гᲂда́ть на тебѣ̀ , чꙋдеса̀ сᲂдѣва́ющи . бѣсо́мъ го́рькимъ преда́вши тѧ̀ , го́рькѡ и҆ без̾бо́жнѡ ᲂу҆мᲂри́вшимъ , пребл҃же́нне мч҃нче хрⷭ҇то́въ сщ҃е́нне .= боⷢ҇ . Д=арᲂва́нїи твᲂи́хъ стрꙋѝ , и҆ и҆сто́чницы и҆сцѣле́нїемъ , бжⷭ҇твенагѡ бᲂга́тства па́жити пᲂдава́ютсѧ . ѿ живᲂнача́льныѧ дла́ни бг҃ᲂневѣ́сто , ро́ждьшагᲂсѧ ѿ твᲂеѧ̀ ᲂу҆тро́бы вседержи́телѧ .

пѣ́снь , є҃ . і҆рмо́съ . Оу҆диви́шасѧ всѧ́ческаѧ , ѡ҆ бжⷭ҇твеннѣй сла́вѣ твᲂе́й , ты́ бо бракᲂнеи҆скꙋси́маѧ дв҃це , прїѧ́тъ во ᲂу҆тро́бѣ надᲂвсѣ́ми сꙋ́щагѡ бг҃а , и҆ рᲂдила̀ є҆сѝ без̾лѣ́тнагѡ сн҃а , всѣ́мъ вᲂспѣва́ющимъ тѧ̀ ми́ръ пᲂдава́юща .= Оу҆ма̀ превᲂсхо́дитъ твᲂеѧ̀ бл҃гᲂда́ти дᲂстиже́нїе . ꙗ҆зы́къ и҆зрещѝ немо́жетъ , твᲂи́хъ чꙋде́съ без̾мѣ́рныѧ пꙋчи́ны . мч҃нче ст҃лю и҆ па́стырю , га́г̾грѧнѡмъ ᲂу҆дᲂбре́нїе , и҆ свѣти́льниче всеѧ̀ тва́ри . Оу҆би́лъ є҆сѝ ѕмі́ѧ , ѻ҆гню̀ пре́давъ . пᲂказа́лъ є҆сѝ в̾ тебѣ̀ бжⷭ҇твенꙋю бл҃гᲂда́ть , бᲂга́тнѡ все́льшꙋюсѧ , и҆ тѧ̀ пред̾ цр҃е́мъ и҆ всѣ́ми прᲂсла́вльшꙋю людьмѝ сщ҃е́нне . Печа́ть и҆ храни́телѧ сᲂкро́вищꙋ , вᲂѡ҆бразѝ ѻ҆́ч҃е твᲂю̀ и҆ко́нꙋ сею̀ пᲂчита́ѧ тѧ̀ , и҆ ꙗ҆́вѣ прᲂвᲂзвѣща́ѧ . ꙗ҆́кѡ принᲂси́ма че́сть , на пе́рвыи ѻ҆́бразъ прехо́дитъ ѵ҆па́тїе . Вельмѝ пᲂд̾виза́всѧ и҆ прᲂсла́висѧ , чꙋдеса̀ сᲂверша́ѧ сщ҃еннᲂѡ҆бра́знѡ . недꙋ́ги ѿгᲂнѧ̀ , прᲂгᲂнѧ́ѧ бѣ́сы , ᲂу҆пражнѧ́ѧ си́хъ навѣ́ты . пᲂбѣжда́ѧ є҆ресе́мъ гꙋби́тельнᲂе ѕлᲂмы́слїе . боⷢ҇ . М=ꙋ́дрᲂсть рᲂдила̀ є҆сѝ бж҃їю сᲂста́внꙋю , пречⷭ҇таѧ дв҃о бцⷣе . и҆́же ст҃ы́ѧ премꙋ́дры пᲂказа́вшꙋю . тѣ́мже ѕло́бы мꙋдреца̀ падѐ шата́нїе , и҆ лю́таѧ ѕлᲂꙋхищре́нїѧ .

пѣ́снь , ѕ҃ . і҆рмо́съ . Пᲂжрꙋ́ти со́ гласᲂмъ хвале́нїѧ гдⷭ҇и , цр҃кви вᲂпїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Вᲂз̾ше́лъ є҆сѝ на высᲂтꙋ̀ дᲂбрᲂдѣ́телей ѵ҆па́тїе . и҆ пристꙋпи́лъ є҆сѝ бл҃же́нне к̾ честно́мꙋ и҆сто́чникꙋ , бжⷭ҇твеныхъ дарᲂва́нїи , и҆ чꙋде́съ пꙋчи́нꙋ и҆стᲂчи́лъ є҆сѝ . Вѣне́цъ тебѣ̀ ка́меней мета́нїѧ бы́ша , и҆ къ нбⷭ҇нѣй высᲂтѣ̀ степе́ни ѻ҆́ч҃е и҆ лѣ́ствица . на ню́ же в̾сѣ́дъ , и҆ бг҃ᲂви присво́исѧ ꙗ҆снѣ́йше . И҆сцѣле́нїѧ твᲂѧ̀ ра́ка и҆стᲂча́етъ прⷭ҇нѡ . бл҃гᲂслᲂве́нїе же ѻ҆́ч҃е чⷭ҇тны́ѧ ти пе́рсти прїе́мъ , и҆звѣ́стнѡ ꙗ҆́кѡ пра́хъ и҆стнѣва́етъ ѡ҆ѕлᲂбле́нїе . Зако́нно пᲂстрада́въ , и҆ ꙗ҆́кѡ мч҃нкъ пᲂчте́сѧ . во глꙋбо́цѣ же ста́рᲂсти , к̾ свᲂи́мъ пре́йде ра́дꙋѧсѧ ѻ҆ц҃е́мъ . и҆ вѣне́цъ твᲂи́мъ трꙋдо́мъ прїѧ́лъ є҆сѝ ѿ хрⷭ҇та̀ дᲂсто́йнѡ .= боⷢ҇ . Ѽ= чꙋ́до , всѣ́хъ чꙋде́съ нᲂвѣ́е . ꙗ҆́кѡ дв҃ца в̾ лᲂжесна́хъ всѧ̀ сᲂдержа́щагѡ , неи҆скꙋсᲂмꙋ́жнѡ заче́нши нестꙋжи́ си .

пѣ́снь , з҃ . і҆рмо́съ . Спасы́и во ѻ҆гнѝ а҆враа́мскїѧ сѝ дѣ́ти , и҆ халдѣ́и ᲂу҆би́въ , ꙗ҆́же без̾ пра́вды пра́ведныѧ ᲂу҆лᲂвлѧ́хꙋ , препѣ́тыи гдⷭ҇и бж҃е ѻ҆ц҃ъ бл҃гᲂслᲂве́нъ є҆сѝ .= Оу҆ста̀ ника́кᲂже натѧ̀ ѿве́рзе по́лзаѧи ѕмі́й . рабᲂлѣ́пно же на ѻ҆́гнь и҆дѧ́ше пᲂвинꙋ́ѧсѧ сла́вне стра́шнᲂмꙋ тѝ пᲂвелѣ́нїю . ѻ҆ц҃ъ на́шихъ вᲂпїю́щꙋ , бж҃е бл҃гᲂслᲂве́нъ є҆сѝ . Кро́внымъ прᲂли́тїемъ , є҆́же ѿ сле́зъ сᲂвᲂкꙋ́пль , є҆ди́но ѿ ѻ҆бᲂю̀ пи́во мꙋ́дре сᲂверши́лъ є҆сѝ . тебѣ̀ пᲂмина́ющꙋ пи́щнᲂмꙋ дᲂстᲂчꙋ́дне пᲂто́кꙋ во́ вѣки , мꙋ́ченикѡмъ пᲂхвало̀ . Въ пᲂро́дꙋ честны́хъ бᲂлѣ́зней твᲂи́хъ вхᲂдѧ́ще бл҃же́нне , бл҃гᲂꙋха́емъ дш҃а , бл҃гᲂво́нїе тѧ̀ хрⷭ҇тꙋ̀ вѣ́дꙋще , и҆ вᲂпїе́мъ ѵ҆па́тїе , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . боⷢ҇ . Н=е и҆скꙋсᲂбра́чнаѧ чⷭ҇таѧ , без̾ сѣ́мене заче́ншаѧ , ѻ҆ц҃ꙋ є҆динᲂсꙋ́щна , и҆ ро́ждьши пло́тїю бг҃ᲂневѣ́сто , ѿ ст҃ы́ѧ кро́ве свᲂеѧ̀ , мᲂлѧ́щи непреста́й , спастѝ всѧ̀ ны̀ .

пѣ́снь , и҃ . і҆рмо́съ . Ѻ҆́трᲂки бл҃гᲂчести́выѧ в̾ пещѝ , ржⷭ҇тво̀ бг҃ᲂро́диче спасло̀ є҆́сть . тᲂгда̀ ᲂу҆́бѡ ѡ҆бразꙋ́емо , ны́нѣ же дѣ́йствꙋемо , вселе́ннꙋю всю̀ вᲂз̾дви́же пѣ́ти , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки .= Гла́съ тво́й со свѣ́тᲂмъ смѣше́нъ , и҆ бжⷭ҇твеными ѡ҆сїѧ́нъ свѣтлᲂстьмѝ . тмꙋ̀ є҆́ресьскꙋю премꙋ́дре разᲂрѝ , и҆ ко́ дни напра́ви правᲂсла́вїѧ лю́ди пᲂю́щїѧ . гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . Краснѣ́йши ꙗ҆́кѡ тро́сть ꙗ҆́вльсѧ , ꙗ҆зы́къ тво́й премꙋ́дре , написа̀ зако́нъ и҆́же бл҃гᲂда́ти , всѧ̀ и҆́же на дска́хъ ве́тхїѧ пᲂгла́ждьши ѻ҆́бразы ѵ҆па́тїе . тѣ́мже тѧ̀ ꙗ҆́кѡ мꙋ́дра кни́жника , пѣснᲂсло́вимъ во всѧ̀ вѣ́ки . Сто́лпъ ѻ҆́гненъ бжⷭ҇твеныи , къ высᲂтѣ̀ нбⷭ҇нѣй взе́млемъ . забра́ло непрекло́ннᲂе , стѣна̀ неѡ҆бᲂри́ма . цр҃ко́внаѧ же́ртва , ст҃лемъ степе́нь . мч҃нкѡмъ кра́снаѧ лѣ́пᲂта , чꙋдᲂно́сныи ѵ҆па́тїи да пᲂчте́нъ бꙋ́детъ . Ви́дѣти спᲂдо́бисѧ є҆го́же жела́ше , разрѣ́шшемсѧ , и҆́стиннᲂю и҆ ᲂу҆мышле́нїемъ . є҆дина́че бо дыха́ющи и҆ кро́ви ка́плющи , къ жела́нїю пᲂслѣ́днемꙋ мч҃нче вᲂсте́клъ є҆сѝ . с̾ мч҃нческими и҆ прпⷣбныхъ ли́ки бжⷭ҇твеными , ликꙋ́ѧ во всѧ̀ вѣ́ки . боⷢ҇ . М=но́гими ѡ҆держи́ма бѣда́ми , и҆ мᲂлво́ю грѣха̀ пᲂтᲂплѧ́ема , къ без̾мо́лвнᲂмꙋ стремле́нїю , тишины́ мѧ дх҃а , бг҃ᲂрᲂди́тельнице чⷭ҇таѧ влⷣчце нн҃ѣ наста́ви . приста́нище бо є҆сѝ хрⷭ҇тїа́нѡмъ . тѣ́мже тѧ̀ пᲂе́мъ во всѧ̀ вѣ́ки .

пѣ́снь , ѳ҃ . і҆рмо́съ . Є҆́вва ᲂу҆́бѡ недꙋ́гᲂмъ ѡ҆слꙋша́нїѧ , клѧ́твꙋ всели́ла є҆́сть . ты́ же дв҃о бцⷣе прᲂзѧбе́нїемъ прижи́тїѧ твᲂегѡ̀ , ми́рᲂви бл҃гᲂслᲂве́нїе прᲂцвѣла̀ є҆сѝ . тѣ́мъ тѧ̀ всѝ велича́емъ . Ꙗ҆́кѡ шипо́къ , и҆ ꙗ҆́кѡ кри́нъ се́льныи сладкᲂꙋха́ненъ ст҃лю . и҆ ꙗ҆́кѡ кипари́съ , ꙗ҆́кѡ мѵ́рѡ бжⷭ҇твено и҆ бл҃гᲂво́нно , ра́ка твᲂѧ̀ бл҃гᲂꙋха́етъ чꙋдеса̀ . смра́дныѧ недꙋ́ги ѿгᲂнѧ́щи , сщ҃еннᲂмч҃нче всече́стне . Сᲂбесѣ́дникъ ꙗ҆ви́сѧ прⷪ҇ро́кѡмъ , мч҃нкѡмъ же и҆ сщ҃е́никѡмъ , и҆́же кро́вїю до́брѣ скᲂнча́вшимсѧ . ст҃ы́хъ и҆ прпⷣбныхъ сᲂбо́рѡмъ , и҆ всѣ́мъ пра́веднымъ и҆́же ѿ́ вѣка , сᲂприча́стникъ дᲂстᲂчꙋ́дне . Па́мѧть твᲂѧ̀ дне́сь на́мъ вᲂсїѧ̀ свѣтлѣ́йши сл҃нца , свѣ́тᲂмъ невеще́ственымъ сердца̀ на́ша прᲂсвѣща́ющи . вѣ́рᲂю тѧ̀ в̾ не́й бл҃жа́щихъ , и҆ мᲂле́бнѡ вᲂсхвалѧ́ющїѧ тѧ̀ . Свѣ́тᲂмъ сѝ ѡ҆зарѝ на́ша ѵ҆па́тїе пᲂмышле́нїѧ , твᲂрѧ́щихъ твᲂю̀ па́мѧть , бжⷭ҇твенꙋю и҆ свѣтᲂно́снꙋю . и҆зба́ви ѻ҆гнѧ̀ и҆ мꙋ́ки , и҆ всѧ́кᲂгѡ и҆скꙋше́нїѧ мᲂльба́ми сѝ , бл҃гᲂче́стнѡ тѧ̀ блажа́щїѧ .= боⷢ҇ . В=ᲂзнесѝ бл҃гᲂда́ть свᲂю̀ чи́стаѧ . вᲂзвели́чи мᲂльбꙋ̀ , и҆ приведѝ чи́ны а҆́нг҃льскїѧ влⷣчце . а҆пⷭ҇лъ же и҆ пррⷪ҇къ ли́ки , и҆ всѧ̀ пра́ведники с̾ мч҃нки . ꙗ҆́кѡ да спасе́мсѧ чтꙋ́щїи тѧ̀ .

Слꙋ́жба преставле́нїю и҆́же во ст҃ы́хъ ѻ҆ц҃а на́шегѡ і҆ѡ́ны , митрᲂпᲂли́та кі́евскагѡ и҆ всеѧ̀ рꙋсі́и . =Ве́черъ , пᲂе́мъ , бл҃же́нъ мꙋ́жь , а҃ , а҆нтифо́нъ . На гдⷭ҇и вᲂзва́хъ , стихѣ́ры , ст҃о́мꙋ , на́ ѕ҃ . гла́съ , д҃ . поⷣ . и҆́же зва́нныи свы́ше . Є҆=гда̀ бжⷭ҇твенᲂе на́йде натѧ̀ зва́нїе ,꙳ і҆ѡ́но бг҃ᲂмꙋ́дре ,꙳ тᲂгда̀ ми́ра и҆ ꙗ҆́же в̾ ми́рѣ ѡ҆ста́вилъ є҆сѝ ,꙳ и҆ хрⷭ҇тꙋ̀ пᲂслѣ́дᲂвалъ є҆сѝ ,꙳ невᲂз̾вра́тнымъ по́мыслᲂмъ .꙳ ѿ ню́дꙋ же всеви́дѧщее ѻ҆́ко ,꙳ ви́дѣвъ твᲂѐ до́брᲂе прᲂи҆звᲂле́нїе ,꙳ ст҃льствᲂмъ тебѐ ᲂу҆краша́етъ .꙳ сегѡ̀ мᲂлѝ ,꙳ и҆ тᲂмꙋ̀ пᲂмᲂли́сѧ ,꙳ спастѝ и҆ прᲂсвѣти́ти дш҃а на́ша . Є҆гда̀ бжⷭ҇твенᲂе ꙳ сїѧ́нїе , в̾ срⷣцы твᲂе́мъ ꙳ і҆ѡ́но ст҃лю всели́сѧ ,꙳ тᲂгда̀ ра́дᲂсть пресвѣ́тлꙋю ,꙳ и҆ пречестнꙋ́ю сла́вꙋ вᲂпрїи́мъ .꙳ ѿ сю́дꙋ же всѧ̀ сꙋ́щаѧ ,꙳ ꙗ҆́кѡ прехᲂдѧ́щаѧ и҆мѣ́лъ є҆сѝ .꙳ є҆ди́нᲂмꙋ же бг҃ꙋ ѿ срⷣца прилѣпи́сѧ .꙳ тᲂгѡ̀ мᲂлѝ ,꙳ и҆ тᲂмꙋ̀ пᲂмᲂли́сѧ вели́кїи во а҆рхїєре́ѡхъ ,꙳ спастѝ и҆ прᲂсвѣти́ти дш҃а на́ша . Є҆гда̀ бжⷭ҇твенᲂе раче́нїе ,꙳ на́йде натѧ̀ ст҃лю ,꙳ тᲂгда̀ ве́сь ѿ ю҆́нᲂсти себѐ ꙳ влⷣцѣ хрⷭ҇тꙋ̀ вᲂз̾лᲂжи́въ ,꙳ сегѡ̀ вᲂз̾желѣ́лъ є҆сѝ .꙳ и҆ всѧ́кихъ страсте́й ,꙳ и҆́же до́лꙋ влекꙋ́щихъ ѡ҆чи́щьсѧ .꙳ ѿ сю́дꙋ же до́мъ и҆ жили́ще прест҃о́мꙋ дх҃ꙋ ꙗ҆ви́сѧ ,꙳ пресла́внаѧ сᲂдѣва́ѧ чꙋдᲂдѣ́йства .꙳ хрⷭ҇та̀ мᲂлѝ ,꙳ спастѝ и҆ прᲂсвѣти́ти дш҃а на́ша .

и҆́ны , стихѣ́ры . гла́съ , д҃ . поⷣ . ꙗ҆́кѡ до́блѧ .= На землѝ ꙗ҆́кѡ а҆́нг҃лъ пᲂживѐ ,꙳ всебл҃же́нне ст҃лю і҆ѡ́но ,꙳ над̾ страстьмѝ вᲂцари́сѧ .꙳ хꙋ́ждьшее пᲂкᲂри́лъ є҆сѝ лꙋ́чшемꙋ .꙳ тѣ́мже прїи́де к̾ непрехᲂдѧ́щемꙋ црⷭ҇твїю .꙳ мᲂли́сѧ при́снѡ ,꙳ низ̾пᲂсла́ти вѣ́рнѡ чтꙋ́щимъ тѧ̀ ,꙳ грѣхо́въ ѡ҆чище́нїе ,꙳ и҆ ве́лїю ми́лᲂсть . Бг҃ᲂдарᲂва́ннꙋю тѝ па́ствꙋ ,꙳ ст҃лю і҆ѡ́но ,꙳ свᲂи́ми ᲂу҆че́нїи до́брѣ ᲂу҆па́слъ є҆сѝ ,꙳ на зла́цѣхъ живо́тныхъ .꙳ ны́нѣ же прише́дъ к̾ незахᲂди́мᲂмꙋ сїѧ́нїю ,꙳ и҆ приснᲂсꙋ́щнᲂмꙋ весе́лїю .꙳ пᲂмина́й пребл҃же́нне лю́ди чтꙋ́щїѧ ,꙳ честно́е ᲂу҆спе́нїе твᲂѐ .꙳ и҆ мᲂлѝ спасти́сѧ дш҃а́мъ на́шимъ . Вели́кагѡ а҆рхїєре́ѧ ,꙳ і҆ѡ́ны бл҃же́ннагѡ ,꙳ сщ҃е́ннꙋю па́мѧть ꙳ дне́сь сверша́юще ,꙳ бжⷭ҇твеными пѣ́сньми .꙳ прїиди́те всѝ пᲂчте́мъ ,꙳ ѡ҆ на́съ всегда̀ мᲂлѧ́щасѧ ,꙳ низ̾пᲂсла́ти мно́жество щедро́тъ ,꙳ и҆ спасе́нїе дш҃а́мъ на́шимъ . =сла́ва . гла́съ ѕ҃ . Бл҃гᲂꙋха́етъ бжⷭ҇твенаѧ ра́ка мᲂще́й твᲂи́хъ , і҆ѡ́но ст҃лю , всѣ́мъ вѣ́рнымъ и҆сцѣле́нїе , дш҃а́мъ и҆ тѣлесе́мъ да́рꙋющи . тѣ́мже тѧ̀ мо́лимъ , бг҃ᲂдарᲂва́ннᲂе твᲂѐ ста́до в̾ми́рѣ сᲂблюстѝ , ѻ҆те́чество же и҆ всѐ правᲂсла́вїе . да всѝ тебѐ ꙗ҆́кѡ и҆́стиннаго па́стырѧ , и҆ мᲂли́твеника к̾ бг҃ꙋ , непреста́ннѡ велича́емъ . и҆ ны́нѣ , боⷢ҇ . Кто̀ тебѐ небл҃жи́тъ прест҃а́ѧ дв҃це ; и҆лѝ кто̀ невᲂспѣва́етъ твᲂегѡ̀ пречи́стагѡ ржⷭ҇тва̀ ; без̾лѣ́тныи бо ѿ ѻ҆ц҃а вᲂз̾сїѧ́въ сн҃ъ є҆динᲂро́дныи , то́й же ѿ тебѐ чи́стыѧ про́йде , несказа́ннѡ вᲂпло́щьсѧ . є҆стество́мъ бг҃ъ сы́и , и҆ є҆стество́мъ бы́въ чл҃къ на́съ ра́ди . не во двᲂю̀ лицꙋ̀ раздѣлѧ́емъ . но во двᲂю̀ є҆стествꙋ̀ несмѣ́сно пᲂзнава́емъ . тᲂгѡ̀ мᲂлѝ чи́стаѧ и҆ всебл҃же́ннаѧ , пᲂми́лᲂватисѧ дш҃а́мъ на́шимъ . та́же , вы́хᲂдъ . прᲂки́менъ , и҆ чте́нїѧ , дне́ви . и҆ ст҃о́мꙋ .

Ѿ при́тчей , чте́нїе .

Па́мѧть пра́веднагѡ с̾ пᲂхвала́ми , и҆ блгⷭ҇ве́нїе гдⷭ҇не на главѣ̀ є҆гѡ̀ . бл҃же́нъ чл҃къ и҆́же ѡ҆брѣ́те мꙋ́дрᲂсть , и҆ сме́ртенъ и҆́же ᲂу҆вѣ́дѣ ра́зꙋмъ . лꙋ́чше бо сїю̀ кꙋпᲂва́ти , не́жели зла́та и҆ сребра̀ сᲂкро́вища . честнѣ́йши бо є҆́сть ка́менїѧ мнᲂгᲂцѣ́нна , все́же чⷭ҇тно́е недᲂсто́йнѡ є҆́сть є҆́й . дᲂлгᲂта́ бо дне́й , и҆ лѣ́та живᲂта̀ в̾ десни́цѣ є҆ѧ̀ , и҆ в̾ шꙋ́ицѣ є҆ѧ̀ бᲂга́тство и҆ сла́ва . ѿ ᲂу҆́стъ бо є҆ѧ̀ и҆схо́дитъ пра́вда , зако́нъ же и҆ млⷭ҇ть на ꙗ҆зы́цѣ но́ситъ . пᲂслꙋ́шайте ᲂу҆́бѡ менѐ ѽ ча́да , честна́ѧ бо рекꙋ̀ . бл҃же́нъ чл҃къ , и҆́же пꙋтѝ мᲂѧ̀ сᲂхрани́тъ . и҆схо́ди бо мᲂѝ , и҆схо́ди живᲂта̀ , и҆ ᲂу҆гᲂто́ваетсѧ хᲂтѣ́нїе ѿ́ гдⷭ҇а . сегѡ̀ ра́ди мᲂлю̀ ва́съ , и҆ пред̾лага́ю мо́й гла́съ сынᲂво́мъ чл҃ческимъ . ꙗ҆́кѡ а҆́зъ премꙋ́дрᲂсть всели́хъ , сᲂвѣ́тъ и҆ ра́зꙋмъ , и҆ смы́слъ а҆́зъ призва́хъ . мо́й сᲂвѣ́тъ и҆ ᲂу҆тверже́нїе , мо́й ра́зꙋмъ , мᲂѧ́ же крѣ́пᲂсть . а҆́зъ менѐ лю́бѧщїѧ люблю̀ , и҆ взыска́ющїи менѐ ѡ҆брѧ́щꙋтъ бл҃гᲂда́ть . разꙋмѣ́йте ᲂу҆́бѡ неѕло́бивїи кᲂва́рство , ненака́занїи же прилага́йте срⷣца̀ . пᲂслꙋ́шайте менѐ и҆ па́ки , честна́ѧ бо рекꙋ̀ , и҆ ѿве́рзꙋ ѿ ᲂу҆сте́нъ мᲂи́хъ пра́вдꙋ . ꙗ҆́кѡ и҆́стинѣ пᲂꙋчи́тсѧ гᲂрта́нь мо́й , ме́рзски же предᲂмно́ю ᲂу҆стны̀ лжи́выхъ . с̾ пра́вдᲂю всѝ гл҃ы ᲂу҆́стъ мᲂи́хъ . ничто́же в̾ ни́хъ стро́пᲂтнѡ , ни раз̾враще́нѡ . всѧ̀ пра́ва сꙋ́ть разꙋмѣва́ющимъ и҆́стинꙋ , и҆ здра́ва ѡ҆брѣта́ющимъ ра́зꙋмъ . наꙋчꙋ́ бо ва́съ и҆́стинѣ да бꙋ́детъ ѡ҆́ гдⷭ҇ѣ наде́жа ва́ша , и҆ и҆спо́лнитесѧ д́х҃а .

Ѿ= премꙋ́дрᲂсти сᲂло́мѡни , чте́нїе .=

Оу҆ста̀ пра́веднагѡ ка́плютъ премꙋ́дрᲂсть , ᲂу҆стны́ же мꙋ́жь мꙋ́дрыхъ вѣ́дѧтъ дарᲂва́нїѧ . ᲂу҆ста̀ мꙋ́дрыхъ пᲂꙋча́тсѧ премꙋ́дрᲂсти , пра́вда же и҆збавлѧ́етъ и҆́хъ ѿ сме́рти . скᲂнча́вшꙋжесѧ мꙋ́жꙋ пра́веднꙋ , не ᲂу҆ма́литсѧ наде́жда . сн҃ъ бо пра́веденъ ражда́етсѧ в̾ живо́тъ , и҆ во бл҃ги́хъ свᲂи́хъ пло́дъ пра́вды ѡ҆бъє́млетъ . свѣ́тъ пра́веднымъ всегда̀ , и҆ ѿ́ гдⷭ҇а ѡ҆брѧ́щꙋтъ бл҃гᲂда́ть и҆ сла́вꙋ . ꙗ҆зы́къ мꙋ́дрыхъ до́браѧ вѣ́сть , и҆ в̾ срⷣцы и҆́хъ пᲂчі́етъ премꙋ́дрᲂсть . лю́битъ гдⷭ҇ь прпⷣбнаѧ срⷣца̀ , прїѧ́тни же є҆мꙋ̀ всѝ непᲂро́чнїи в̾ пꙋ́ть . мꙋ́дрᲂсть гдⷭ҇нѧ , прᲂсвѣща́етъ лицѐ разꙋ́мнагѡ . Варѧ́етъ бо жела́ющихъ ю҆̀ , пе́рвїе разꙋмѣ́тисѧ , и҆ ᲂу҆до́бь ᲂу҆́зритсѧ ѿ любѧ́щимъ є҆ѧ̀ . ᲂу҆тренева́выи к̾ не́й не ᲂу҆трꙋди́тсѧ . и҆ бдѧ̀ є҆ѧ̀ ра́ди , ско́рѡ без̾ печа́ли бꙋ́детъ . ꙗ҆́кѡ дᲂсто́йныѧ себѣ̀ та̀ ѡ҆бхо́дитъ и҆́щꙋщи , и҆ во стезѧ́хъ ꙗ҆влѧ́етсѧ и҆́мъ бл҃гᲂпᲂтре́бна . Премꙋ́дрᲂсти не ᲂу҆дᲂлѣ́етъ ни кᲂгда́же ѕло́ба . си́хъ ра́ди и҆ рачи́тель бы́хъ дᲂбро́тѣ є҆ѧ̀ , и҆ вᲂз̾люби́хъ сїю̀ , и҆ взыска́хъ ѿ ю҆́нᲂсти мᲂеѧ̀ . и҆ пᲂи҆ска́хъ невѣ́стꙋ в̾вестѝ себѣ̀ , ꙗ҆́кѡ всѣ́хъ влⷣка вᲂз̾любѝ ю҆̀ . ᲂу҆чи́тельница бо є҆́сть бж҃їю ра́зꙋмꙋ , и҆ ѡ҆брѣта́тельница дѣло́мъ є҆гѡ̀ . тᲂѧ̀ сꙋ́ть дᲂбры̀ нра́вы . цѣлᲂмꙋ́дрїю бо и҆ ра́зꙋмꙋ сїѧ̀ ᲂу҆чи́тъ , пра́вдѣ же и҆ мꙋ́жествꙋ , и҆́хже пᲂтре́бнѣе ничто́же є҆́сть в̾ житїѝ чл҃кѡмъ . а҆́щели же и҆ мно́гᲂмꙋ и҆мѣ́нїю хо́щетъ кто̀ ; да вѣ́сть пе́рваѧ и҆ бꙋ́дꙋщаѧ раз̾смᲂтри́ти . свѣ́сть и҆з̾ви́тїе слᲂве́съ , и҆ рѣше́нїѧ гада́нїемъ . зна́менїѧ и҆ чꙋдеса̀ прᲂразꙋмѣ́ти , и҆ с̾бытїѧ̀ времено́мъ и҆ лѣ́тᲂмъ . и҆ всѣ́мъ сᲂвѣ́тникъ є҆́сть бл҃гъ . ꙗ҆́кѡ без̾сме́ртїе є҆́сть в̾ не́й , и҆ бл҃гᲂзва́нїе во ѡ҆бще́нїи слᲂве́съ є҆ѧ̀ . сегѡ̀ ра́ди рѣ́хъ гдⷭ҇ви , и҆ пᲂмᲂли́хсѧ є҆мꙋ̀ , и҆ рѣ́хъ всѣ́мъ срⷣцемъ мᲂи́мъ . Бж҃е ѻ҆ц҃ъ и҆ гдⷭ҇и млⷭ҇ти , сᲂтвᲂри́выи всѧ̀ сло́вᲂмъ свᲂи́мъ , и҆ мꙋ́дрᲂстїю свᲂе́ю ᲂу҆стро́ивыи чл҃ка , да владѣ́етъ надᲂвсѣ́ми тᲂбо́ю бы́вшими тварьмѝ , и҆ назира́етъ ми́ръ препᲂдо́бїемъ и҆ пра́вдᲂю . да́ждь ми ѿ твᲂи́хъ прⷭ҇то́лъ намѣ́стницꙋ премꙋ́дрᲂсть , и҆ не ѿлꙋчѝ менѐ ѿ ѻ҆́трᲂкъ твᲂи́хъ . ꙗ҆́кѡ а҆́зъ ра́бъ тво́й , и҆ сн҃ъ рабы̀ твᲂеѧ̀ . пᲂслѝ ю҆̀ ѿ ст҃а́гѡ жили́ща твᲂегѡ̀ , и҆ ѿ прⷭ҇то́ла сла́вы твᲂеѧ̀ . да прише́дши ко мнѣ̀ наꙋчи́тъ мѧ , что̀ ᲂу҆го́дно є҆́сть пред̾ тᲂбо́ю ; и҆ наста́витъ мѧ̀ в̾ ра́зꙋмъ , и҆ сᲂхрани́тъ мѧ̀ сла́вᲂю свᲂе́ю . пᲂмышле́нїѧ бо сме́ртныхъ всѝ ᲂу҆жа́сни , и҆ затвᲂрена̀ ᲂу҆мышле́нїѧ и҆́хъ .

Ѿ= премꙋ́дрᲂсти сᲂло́мѡни , чте́нїе .=

Пᲂхвалѧ́емꙋ пра́ведникꙋ , вᲂз̾веселѧ́тсѧ лю́дїе . без̾сме́ртїе бо є҆́сть па́мѧть є҆гѡ̀ , ꙗ҆́кѡ ѿ́ гдⷭ҇а пᲂзнава́етсѧ и҆ ѿ чл҃къ , и҆ ᲂу҆го́дна гдⷭ҇ви дш҃а є҆гѡ̀ .= =Вᲂзлюби́те ᲂу҆́бѡ мꙋ́дрᲂсть , и҆ пᲂживетѐ . вᲂсхᲂщи́те є҆ѧ̀ , и҆ нака́зани бꙋ́дете . нача́ло бо є҆ѧ̀ любы̀ , и҆ сᲂблюде́нїе зако́нꙋ . пᲂчти́те премꙋ́дрᲂсть , да во́ вѣки црⷭ҇твꙋете . вᲂзвѣщꙋ̀ ва́мъ , и҆ нескры́ю ѿ ва́съ та́инъ бж҃їихъ . Ꙗ҆́кѡ то́й мꙋ́дрᲂсти наста́вникъ є҆́сть , и҆ мꙋ́дрыхъ и҆спра́витель , и҆ всѧ́кꙋ смы́слꙋ и҆ дѣ́лꙋ хитре́цъ , и҆ всѣ́мъ смы́слᲂмъ наꙋчи́тъ мꙋ́дрᲂсть . є҆́сть бо в̾ не́й дх҃ъ разꙋ́менъ и҆ ст҃ъ , и҆ сїѧ́нїе свѣ́та приснᲂсꙋ́щнагѡ , и҆ ѻ҆́бразъ бл҃гᲂсти бж҃їѧ . та̀ и҆ дрꙋ́ги бж҃їѧ и҆ пррⷪ҇ки ᲂу҆стрᲂѧ́етъ . бл҃гᲂлѣ́пнѣйши є҆́сть сл҃нца , и҆ па́че сᲂтвᲂре́нїѧ ѕвѣ́здъ свѣ́тᲂмъ сказа́ема ѡ҆брѣта́етсѧ пе́рвѣйши . та̀ ᲂу҆гᲂжда́ющимъ є҆́й ѿ бᲂлѣ́зней и҆збавлѧ́етъ , и҆ наста́витъ на стезѝ пра́вы , и҆ да́стъ и҆́мъ ра́зꙋмъ и҆мѣ́ти ст҃ы́хъ , и҆ сᲂхрани́тъ ѧ҆̀ ѿ лᲂвѧ́щихъ , по́двигъ крѣ́пᲂкъ пᲂда́стъ и҆́мъ . да разꙋмѣ́ютъ всѝ ꙗ҆́кѡ си́льнѣйши є҆́сть всегѡ̀ бл҃гᲂче́стїе , и҆ непремо́жетъ ѕло́ба ни кᲂли́же мꙋ́дрᲂсти , ни пре́йдетъ ѕлы́ѧ ѡ҆блича́ющи сꙋ́дъ . Реко́ша же в̾ себѣ̀ пᲂмы́сливше непра́веднѡ , наси́льствꙋемъ пра́веднᲂмꙋ , и҆ непᲂщади́мъ препᲂдо́бства є҆гѡ̀ , ни ᲂу҆срами́мсѧ сѣди́нъ ста́рᲂсти мнᲂгᲂлѣ́тны , бꙋ́детъ бо на́мъ крѣ́пᲂсть зако́нꙋ . и҆ ᲂу҆лᲂви́мъ пра́веднаго , ꙗ҆́кѡ не ᲂу҆го́денъ на́мъ є҆́сть , и҆ сᲂпрᲂти́витсѧ дѣло́мъ на́шимъ , и҆ пᲂно́ситъ на́мъ ѿпаде́нїе зако́на , и҆ ѡ҆блича́етъ на́мъ сᲂгрѣше́нїѧ наказа́нїѧ на́шегѡ . вᲂзвѣща́етъ на́мъ ра́зꙋмъ и҆мѣ́ти бж҃їи , и҆ ѻ҆́трᲂка гдⷭ҇нѧ себѐ и҆менꙋ́етъ , и҆ бы́сть на ѡ҆бличе́нїе пᲂмышле́нїемъ на́шимъ , и҆ тѧ́жекъ на́мъ є҆́сть . и҆ ви́димъ ꙗ҆́кѡ непᲂдо́бнѡ и҆нѣ́мъ житїѐ є҆гѡ̀ , и҆ и҆змѣнены̀ стезѝ є҆гѡ̀ . въ пᲂрꙋга́нїе вмѣни́хᲂмсѧ є҆мꙋ̀ , и҆ ᲂу҆далѧ́етсѧ ѿ пꙋте́й на́шихъ ꙗ҆́кѡ ѿ нечисто́тъ , и҆ блажи́тъ пᲂслѣ́днѧѧ пра́ведныхъ . ви́димъ ᲂу҆́бѡ а҆́ще слᲂвеса̀ є҆гѡ̀ и҆́стина сꙋ́ть , и҆ ᲂу҆смо́тримъ сбытїѧ̀ є҆гѡ̀ . рꙋга́нїемъ и҆ мꙋ́кᲂю и҆стѧ́жемъ є҆гѡ̀ . да разꙋмѣ́емъ кро́тᲂсть є҆гѡ̀ , и҆ и҆скꙋ́симъ без̾ѕло́бство є҆гѡ̀ , сме́ртїю без̾ѡ҆бра́знᲂю ѡ҆сꙋ́димъ є҆гѡ̀ , бꙋ́детъ бо пᲂсѣще́нїе ѿ слᲂве́съ є҆гѡ̀ . сїѧ̀ пᲂмы́слиша и҆ прельсти́шасѧ , ѡ҆слѣпи́ бо и҆́хъ ѕло́ба и҆́хъ , и҆ неразꙋмѣ́ша та́инъ бж҃їихъ . и҆ неразсꙋди́ша ꙗ҆́кѡ ты̀ є҆сѝ бг҃ъ є҆ди́нъ живᲂтꙋ̀ и҆мѣ́ѧи и҆ сме́рти вла́сть , и҆ спаса́ѧ во́ времѧ ско́рби , и҆ и҆збавлѧ́ѧи ѿ всѧ́кагѡ ѕла̀ , ще́дръ и҆ млⷭ҇тивъ даѧ̀ препᲂдо́бнымъ свᲂи́мъ бл҃гᲂда́ть , и҆ свᲂе́ю мы́шцею го́рдымъ прᲂтивлѧ́ѧсѧ .

На стихо́внѣ , стихѣ́ры . гла́съ , а҃ . поⷣ . нбⷭ҇нымъ чино́мъ .= Б=г҃ᲂмꙋ́дре і҆ѡ́но ст҃лю ,꙳ ты̀ свᲂи́ми мᲂли́твами и҆ пᲂсто́мъ ,꙳ бдѣ́нїемъ же и҆ ми́лᲂстынею бг҃ᲂви сᲂєдини́сѧ .꙳ тѣ́мже дх҃ꙋ прест҃о́мꙋ до́мъ и҆ жили́ще пᲂказа́сѧ .꙳ ѿ ню́дꙋ же и҆ а҆рхїєре́й цр҃кви хрⷭ҇то́вѣ бы́лъ є҆сѝ ,꙳ мᲂлѝ спасти́сѧ дш҃а́мъ на́шимъ .

сти́хъ : ᲂу҆ста̀ мᲂѧ̀ вᲂз̾гл҃ютъ премꙋ́дрᲂсть ,꙳ и҆ пᲂꙋче́нїе срⷣца мᲂегѡ̀ ра́зꙋмъ . Пᲂвинꙋ́ѧсѧ за́пᲂвѣди бг҃а вседержи́телѧ .꙳ тѣ́мже ѿ ю҆́нᲂсти свᲂеѧ̀ ,꙳ тᲂгѡ̀ стᲂпа́мъ ст҃лю пᲂслѣ́дᲂвалъ є҆сѝ .꙳ сегѡ̀ ра́ди ѿ негѡ̀ бл҃гᲂда́ть прїѧ́лъ є҆сѝ , дѣ́йствᲂвати пресла́внаѧ чꙋдеса̀ .꙳ и҆ дꙋ́хи прᲂгᲂни́ти лꙋка́выѧ ѿ всѣ́хъ ,꙳ и҆́же любо́вїю чтꙋ́щихъ тѧ̀ .

сти́хъ : ᲂу҆слы́шите сїѧ̀ всѝ ꙗ҆зы́цы ,꙳ внꙋши́те всѝ живꙋ́щїи по вселе́ннѣй . Кро́тᲂкъ и҆ не ѕло́бивъ ,꙳ во все́й жи́зни свᲂе́й пре́былъ є҆сѝ ст҃лю і҆ѡ́но .꙳ сегѡ̀ ра́ди ѡ҆брѣ́те ꙗ҆́кᲂже в̾желѣ́лъ є҆сѝ ,꙳ на́ нб҃сѣхъ со ст҃ы́ми пᲂко́й .꙳ тѣ́мже пᲂчита́емъ бжⷭ҇твенꙋю па́мѧть твᲂю̀ ,꙳ вѣ́рᲂю пра́зднꙋюще , бг҃ᲂбл҃же́нне и҆ всече́стне .

сла́ва . гла́съ , д҃ . Є҆гда̀ ᲂу҆́бѡ бг҃ꙋ пᲂспѣшествꙋ́ющꙋ тѝ ст҃лю , црⷭ҇твꙋющагѡ гра́да дᲂсти́глъ є҆сѝ . тᲂгда̀ ѿ патрїа́рха чⷭ҇тнѡ прїѧ́тъ бы́сть . и҆ ѿ тꙋ́дꙋ па́ки к̾ рꙋ́с̾скимъ страна́мъ пᲂсыла́емь быва́еши , ми́ръ и҆ бл҃гᲂслᲂве́нїе с̾ сᲂбо́ю нᲂсѧ̀ . тѣ́мже и҆ рꙋ́с̾скаѧ страна̀ , тебѐ с̾ любо́вїю ꙗ҆́кѡ ѻ҆ц҃а вᲂспрїе́млетъ . и҆ сꙋдо́мъ бж҃їимъ , и҆ самᲂде́ржца хᲂтѣ́нїемъ , пресла́внѡ на а҆рхїєре́йскїи прⷭ҇то́лъ вᲂз̾вᲂди́мь быва́еши . на не́мже мно́га лѣ́та жи́въ , ко́ гдⷭ҇ꙋ ѿхо́диши . тᲂгѡ̀ мᲂлѝ , спастѝ и҆́же любо́вїю пᲂю́щихъ тѧ̀ .

и҆ ны́нѣ , боⷢ҇ . Пᲂда́ждь ᲂу҆тѣше́нїе , свᲂи́мъ рабо́мъ всенепᲂро́чнаѧ , ᲂу҆тᲂлѧ́ющи лю́таѧ наны̀ ѡ҆бстᲂѧ́нїѧ , всѧ́кїѧ ско́рби на́съ и҆з̾мѣнѧ́ющи . тѧ́ бо є҆ди́нꙋ тве́рдо и҆ и҆звѣ́стнѡ ѡ҆снᲂва́нїе и҆́мамы , и҆ твᲂѐ застꙋпле́нїе стѧжа́хᲂмъ , да непᲂстыди́мсѧ влⷣчце , тебѐ призыва́юще . пᲂтщи́сѧ на мл҃твꙋ тебѣ̀ вᲂпїю́щихъ , ра́дꙋисѧ влⷣчце всѣ́мъ пᲂмо́щнице , ра́дᲂсте и҆ пᲂкро́ве дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , д҃ . Ѿ ю҆́нᲂсти свᲂеѧ̀ ве́сь са́мъ себѐ гдⷭ҇ви вᲂз̾лᲂжи́въ . въ мл҃твахъ и҆ трꙋдѣ́хъ и҆ пᲂстѣ́хъ , ѻ҆́бразъ бы́въ дᲂбрᲂдѣ́тели . ѿ ню́дꙋ же бг҃ъ ви́дѣвъ твᲂѐ бл҃го́е и҆звᲂле́нїе , а҆рхїєре́ѧ тѧ̀ и҆ па́стырѧ цр҃кви свᲂе́й ᲂу҆страѧ́етъ . тѣ́мже и҆ по преставле́нїи , честно́е тѣ́ло твᲂѐ цѣ́лѡ и҆ нетлѣ́ннѡ сᲂблюде́сѧ , і҆ѡ́но ст҃лю , хрⷭ҇та̀ бг҃а мᲂлѝ , спасти́сѧ дш҃а́мъ на́шимъ .= сла́ва , и҆ ны́нѣ , боⷢ҇ . И҆́=же ѿ́ вѣка ᲂу҆тае́ннᲂе , и҆ а҆́нг҃лѡмъ несвѣ́дᲂмᲂе та́инство , тᲂбо́ю бцⷣе земны́мъ ꙗ҆ви́сѧ бг҃ъ в̾ неразмѣ́снѣ сни́тїи вᲂплᲂща́емъ . и҆ крⷭ҇тъ во́лею на́съ ра́ди вᲂспрїе́мъ , и҆́мже вᲂскр҃сѝ первᲂзда́ннаго , и҆ спасѐ ѿ сме́рти дш҃а на́ша .

На ᲂу҆́трени , на бг҃ъ гдⷭ҇ь , трᲂпа́рь , ст҃лю , двⷤа . сла́ва , и҆ ны́нѣ , боⷢ҇ , вᲂскрⷭ҇нъ . =По а҃ , стихᲂло́гїи , сѣда́ленъ . гла́съ , а҃ . Оу҆че́ньми свᲂи́ми и҆ дѣ́лы , цр҃квь хрⷭ҇то́вꙋ ᲂу҆кра́силъ є҆сѝ і҆ѡ́но ст҃лю . ѿ сю́дꙋ же в̾ ми́рѣ прᲂсїѧ̀ , твᲂѐ дᲂбрᲂдѣ́тельнᲂе житїѐ . в̾ мл҃твахъ и҆ пᲂще́нїихъ и҆ бдѣ́нїихъ ѻ҆́бразъ цр҃кви бы́лъ є҆сѝ . тѣ́мже вᲂпїе́мъ тѝ . сла́ва да́вшемꙋ тѝ крѣ́пᲂсть . сла́ва вѣнча́вшемꙋ тѧ̀ . сла́ва даю́щемꙋ тᲂбо́ю всѣ́мъ и҆сцѣле́нїе . =двⷤа . сла́ва , и҆ ны́нѣ , боⷢ҇ . Оу҆пᲂва́нїе хрⷭ҇тїа́нѡмъ прест҃а́ѧ дв҃о , є҆го́же рᲂдила̀ є҆сѝ бг҃а , па́че ᲂу҆ма́ же и҆ сло́ва , непреста́ннѡ мᲂлѝ с̾ вы́шними си́лами . да́ти ѡ҆ставле́нїе грѣхо́мъ на́шимъ всѣ́мъ , и҆ и҆справле́нїе житїю̀ . и҆́же вѣ́рᲂю и҆ любо́вїю , прⷭ҇нѡ тѧ̀ сла́вѧщимъ .

По в҃ , стихᲂло́гїи , сѣда́ленъ . гла́съ , д҃ . Смиренᲂмꙋ́дрїе пред̾пᲂчита́ѧ бы́лъ є҆сѝ , і҆ѡ́но ст҃лю . и҆ ѿ сю́дꙋ прᲂсла́висѧ , ꙗ҆́кѡ бжⷭ҇твеныи а҆рхїєре́й , принᲂсѧ̀ же́ртвы пᲂже́ршемꙋсѧ во́лею хрⷭ҇тꙋ̀ бг҃ꙋ на́шемꙋ . є҆го́же мᲂлѝ , спасти́сѧ дш҃а́мъ на́шимъ . двⷤа . сла́ва , и҆ ны́нѣ , боⷢ҇ . Ѡ҆бнᲂви́ла є҆сѝ чⷭ҇таѧ бжⷭ҇твенымъ ржⷭ҇тво́мъ сѝ , и҆стлѣ́вшее страстьмѝ земнᲂро́дныхъ ᲂу҆мерщве́нᲂе сꙋщество̀ . и҆ вᲂз̾ста́вила є҆сѝ всѣ́хъ ѿ сме́рти к̾ жи́зни нетлѣ́нїѧ . тѣ́мже тѧ̀ по́ дᲂлгꙋ ᲂу҆бл҃жа́емъ всѝ , дв҃о препрᲂсла́вленаѧ , ꙗ҆́кᲂже прᲂрекла̀ є҆сѝ .

По пᲂлїєлеѡ́сѣ , сѣда́ленъ . гла́съ , и҃ . Ꙗ҆́кѡ дᲂбрᲂдѣ́теленъ и҆ кро́тᲂкъ , цр҃квь хрⷭ҇то́вꙋ ᲂу҆ѧсни́лъ є҆сѝ . дѣ́лы сᲂблю́дъ є҆́же по ѻ҆́бразꙋ бж҃їю , а҆рхїєре́ю вели́кїи і҆ѡ́но . прᲂсїѧ́ бо дᲂбрᲂдѣ́тельнᲂе житїѐ твᲂѐ в̾ ми́рѣ , и҆ ѿ всѣ́хъ сла́витсѧ . тѣ́мже всѝ бл҃гᲂдарѧ́ще вᲂпїе́мъ ти , бг҃ᲂбл҃же́нне ст҃лю , мᲂлѝ хрⷭ҇та̀ бг҃а , грѣхо́въ ѡ҆ставле́нїе дарᲂва́ти , чтꙋ́щимъ любо́вїю бжⷭ҇твенꙋю па́мѧть твᲂю̀ . вⷤ . сла́ва , и҆ ны́нѣ , боⷢ҇ . Ꙗ҆́кѡ дв҃ꙋ є҆ди́нꙋ в̾ жена́хъ , тѧ̀ без̾ сѣ́мене ро́ждьшꙋю бг҃а пло́тїю , всѝ ᲂу҆блажа́емъ ро́ди чл҃честїи . ѻ҆́гнь бо всели́сѧ в̾ тѧ̀ бжⷭ҇твеныи . и҆ ꙗ҆́кѡ младе́нца дᲂи́ши зижди́телѧ и҆ гдⷭ҇а . тѣ́мже а҆́нг҃льскїи и҆ чл҃ческїи ро́дъ , дᲂсто́йнѡ сла́вимъ прест҃о́е ржⷭ҇тво̀ твᲂѐ . и҆ сᲂгла́снѡ вᲂпїе́мъ тѝ , мᲂлѝ хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти , вᲂспѣва́ющимъ дᲂсто́йнѡ сла́вꙋ твᲂю̀ .

степе́нна , д҃ го гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . ᲂу҆ста̀ мᲂѧ̀ вᲂз̾глаго́лютъ премꙋ́дрᲂсть , и҆ пᲂꙋче́нїе срⷣца мᲂегѡ̀ ра́зꙋмъ . сти́хъ . ᲂу҆слы́шите сїѧ̀ всѝ ꙗ҆зы́цы , внꙋши́те всѝ живꙋ́щїи по вселе́ннѣй . всѧ́ко дыха́нїе .

є҆ѵⷢ҇а́лїе , ѿ і҆ѡа́нна . заⷱ҇ , л҃є , ѿ пᲂлꙋ̀ . ѱало́мъ , н҃ .

сла́ва . мᲂли́твъ ра́ди ст҃лѧ , млⷭ҇тиве ѡ҆чи́сти мно́жество сᲂгрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество сᲂгрѣше́нїи на́шихъ .

Пᲂми́лꙋй мѧ бж҃е , по вели́цѣй млⷭ҇ти твᲂе́й , по мно́гимъ щедро́тамъ твᲂи́мъ , ѡ҆чи́сти без̾ зако́нїѧ мᲂѧ̀ , бж҃е сп҃се мо́й .

стихѣ́ра . гла́съ , ѕ҃ . Бл҃гᲂꙋха́етъ бжⷭ҇твенаѧ ра́ка мᲂще́й твᲂи́хъ , і҆ѡ́но ст҃лю , всѣ́мъ вѣ́рнымъ и҆сцѣле́нїе , дш҃а́мъ и҆ тѣлесе́мъ да́рꙋющи . тѣ́мже тѧ̀ мо́лимъ , бг҃ᲂдарᲂва́ннᲂе твᲂѐ ста́до в̾ми́рѣ сᲂблюстѝ , ѻ҆те́чество же и҆ всѐ правᲂсла́вїе . да всѝ тебѐ ꙗ҆́кѡ и҆́стиннаго па́стырѧ , и҆ мᲂли́твеника к̾ бг҃ꙋ , непреста́ннѡ велича́емъ .

Кано́нъ , бцⷣѣ . со і҆рмᲂсо́мъ , на́ ѕ҃ . и҆ ст҃о́мꙋ , на и҃ . =Кано́нъ , прⷭ҇тѣ́й бцⷣѣ . є҆мꙋ́же краегране́сїе си́це : мт҃и бж҃їѧ , незави́стнꙋю мѝ да́ждь ра́дᲂсть . гла́съ , ѕ҃ .= пѣ́снь , а҃ . і҆рмо́съ . Ꙗ҆́кѡ по́ сꙋхꙋ хᲂди́въ і҆и҃ль , по бе́зднѣ стᲂпа́ми , гᲂни́телѧ фараѡ́на , ви́дѧ пᲂтᲂплѧ́ема , бг҃ꙋ пᲂбѣ́днꙋю пѣ́снь пᲂе́мъ вᲂпїѧ́ше .

запѣ́въ : Прест҃а́ѧ гжⷭ҇е бцⷣе спасѝ на́съ . Причасти́вшисѧ є҆́вва садꙋ̀ преслꙋша́нїѧ пи́щи , клѧ́твꙋ в̾ведѐ , но сїю̀ раз̾рꙋши́ла є҆сѝ чи́стаѧ , бл҃гᲂслᲂве́нїю нача́льника хрⷭ҇та̀ ро́ждьши . Би́сера ѿ бжⷭ҇твеныѧ мо́лнїи , хрⷭ҇та̀ ро́ждьши , стрⷭ҇те́й мᲂи́хъ мглꙋ̀ , и҆ сᲂгрѣше́нїи смꙋще́нїе разᲂрѝ чи́стаѧ , свѣ́тᲂмъ твᲂеѧ̀ свѣ́тлᲂсти . Ꙗ҆зы́кᲂмъ ча́ѧнїе , ѿ тебѐ вᲂплᲂща́емаго бг҃а , і҆а́кѡвъ прᲂви́дѧше та́йно , мы́сленыма ѻ҆чи́ма , и҆збавлѧ́ющаго на́съ хᲂда́тайствᲂмъ ти . Ѡ҆скꙋдѣ́вшимъ кнѧзе́мъ ѿ кᲂлѣ́на і҆ꙋ́дѡва всечⷭ҇таѧ , сн҃ъ тво́й и҆ бг҃ъ прᲂше́дъ во́ждь , земны́мъ кᲂнце́мъ , и҆́стинно ны́нѣ вᲂцр҃и́сѧ .

и҆́нъ , кано́нъ , ст҃о́мꙋ і҆ѡ́нѣ . гла́съ , и҃ . пѣ́снь , а҃ . і҆рмо́съ . Во́дꙋ прᲂше́дъ , ꙗ҆́кѡ по́ сꙋхꙋ , и҆з̾ є҆ги́петска ѕла̀ и҆збѣжа́въ , і҆и҃льтѧнинъ вᲂпїѧ́ше , и҆зба́вителю бг҃ꙋ на́шемꙋ пᲂе́мъ .

запѣ́въ : Ст҃лю хрⷭ҇то́въ і҆ѡ́но , мᲂлѝ бг҃а ѡ҆ на́съ . И҆́же ѿ бг҃а дарᲂва́нїѧ бжⷭ҇твенагѡ наслажда́ѧсѧ , ко́еждо прᲂше́нїе пᲂсѣща́ѧ чꙋдесы̀ . ѿ ню́дꙋ же ѻ҆́ч҃е и҆ мнѣ̀ пᲂда́ждь си́лꙋ , во є҆́же пѣ́ти ти сщ҃е́ннᲂе тᲂржество̀ . Бл҃гᲂда́ть бжⷭ҇твенаѧ и҆злїѧ́сѧ во ᲂу҆стна́хъ твᲂи́хъ , ст҃лю і҆ѡ́но . и҆ бы́лъ є҆сѝ па́стырь хрⷭ҇то́вѣ цр҃кви . ᲂу҆краси́ бо тебѐ бг҃ъ , є҆го́же житїе́мъ свᲂи́мъ прᲂсла́вилъ є҆сѝ . Бл҃гᲂꙋха́етъ честна́ѧ ра́ка мᲂще́й твᲂи́хъ , и҆ и҆стача́етъ здра́вїѧ . недꙋ́зи же при́снѡ ѿ вѣ́рныхъ ѿгᲂнѧ́ютсѧ , тѧ̀ бл҃гᲂче́стнѡ чтꙋ́щихъ ст҃лю . Стѣ́нꙋ тве́рдꙋ , хрⷭ҇то́ва цр҃кви стѧжа́вши тѧ̀ ст҃лю , при́снѡ пребыва́етъ хва́лѧщи свᲂегѡ̀ влⷣкꙋ , и҆́же тебѐ прᲂсла́вльшагѡ . боⷢ҇ . Цр҃кви бж҃їѧ бы́сть , нескве́рнаѧ ѻ҆трᲂкᲂви́це все́льшемꙋсѧ па́че ᲂу҆ма̀ в̾ тѧ̀ бцⷣе , и҆ ле́сть ѿ дꙋ́шъ чл҃ческихъ ѿгна́вшагѡ .

катава́сїѧ : Ѿве́рзꙋ ᲂу҆ста̀ мᲂѧ̀ .

пѣ́снь , г҃ . і҆рмо́съ . Нѣ́сть ст҃а ꙗ҆́кᲂже ты̀ , гдⷭ҇и бж҃е мо́й , вᲂзнесы́и ро́гъ вѣ́рныхъ си бл҃же , и҆ ᲂу҆тве́рждь и҆́хъ на ка́мени и҆спᲂвѣ́данїѧ тѝ . Тлѣ́ннꙋю и҆ сме́ртнꙋю мᲂю̀ пло́ть всечⷭ҇таѧ бг҃ᲂмт҃и , ѿ ᲂу҆тро́бы твᲂеѧ̀ несказа́ннѡ прїе́мъ бл҃гі́и , и҆ ѡ҆нетлѣ́нивъ тꙋ̀ , вѣ́чно себѣ̀ свѧза́лъ є҆́сть . Бг҃а вᲂплᲂща́ема и҆з̾ тебѐ зрѧ́ще дв҃о , ᲂу҆дивлѧ́хꙋсѧ стра́хᲂмъ а҆́нг҃льстїи ли́цы , и҆ ꙗ҆́кѡ мт҃рь бж҃їю , немо́лчными пѣ́сньми тѧ̀ сла́вѧхꙋ . Оу҆жасе́сѧ прᲂро́къ данїи́лъ , го́рꙋ тѧ мы́сленꙋю зрѧ̀ бг҃ᲂмт҃и , ѿ неѧ́же ка́мень ѿсѣче́сѧ крᲂмѣ̀ рꙋ́къ , и҆ бѣсо́вскаѧ жили́ща держа́вно сᲂкрꙋшѝ . Немо́жетъ тѧ̀ сло́во чл҃ческᲂе , ни ꙗ҆зы́къ дв҃о пᲂхвали́ти дᲂсто́йнѡ . ѿ тебе́ бо всечи́стаѧ , без̾ сѣ́мене жизнᲂда́вецъ бг҃ъ , вᲂплᲂти́тисѧ бл҃гᲂи҆зво́ли .

и҆́нъ , і҆рмо́съ . Нбⷭ҇нᲂмꙋ крꙋ́гꙋ верхᲂтво́рче гдⷭ҇и , и҆ цр҃кви зижди́телю , ты̀ менѐ ᲂу҆твердѝ в̾ любвѝ свᲂе́й . жела́нїемъ сы́и кра́й , и҆ вѣ́рнымъ ᲂу҆тверже́нїе , є҆ди́не чл҃кᲂлю́бче . На высᲂтꙋ̀ дᲂбрᲂдѣ́телей вᲂз̾ше́лъ є҆сѝ ст҃лю , и҆ прїи́мъ сщ҃еннᲂпᲂма́занїе высо́кагѡ свᲂегѡ̀ житїѧ̀ . и҆ на сѣда́лищи высо́цѣ пᲂслꙋжи́лъ є҆сѝ бг҃ᲂви , ꙗ҆́кѡ а҆рхїєре́й вели́кїи . Цр҃кви хрⷭ҇то́ва , свѣти́льника тѧ̀ стѧжа́вши ст҃лю , дᲂбрᲂдѣ́тельными твᲂи́ми ᲂу҆че́нїи , премꙋ́дрѣ прᲂсвѣща́етсѧ гл҃ющи , ты́ ми гдⷭ҇и крѣ́пᲂсть и҆ ᲂу҆тверже́нїе . Бжⷭ҇твенымъ жела́нїемъ , всѐ пло́тьскᲂе жела́нїе ѿри́нꙋвъ , сᲂверше́нымъ житїе́мъ прᲂсїѧ́лъ є҆сѝ . тѣ́мже ѿ сю́дꙋ преста́висѧ , к̾ невече́рнемꙋ сїѧ́нїю . Ꙗ҆́кѡ а҆рхїєре́ѡмъ прїе́мникъ бы́лъ є҆сѝ ст҃лю , пᲂтща́лсѧ є҆сѝ слᲂвесы̀ и҆ дѣ́лы , и҆ пᲂꙋче́нїемъ пра́вымъ пᲂдо́бникъ ѻ҆́нѣмъ бы́ти . тѣ́мже пᲂчита́емъ тѧ̀ ꙗ҆́кѡ хрⷭ҇то́ва ст҃лѧ . боⷢ҇ . Оу҆́глѧ бжⷭ҇твенагѡ свѣтᲂза́рнаѧ клещѐ , кꙋпина̀ не ѡ҆пали́вшисѧ бжⷭ҇тва̀ , сѣно́вныѧ мѝ пᲂпалѝ стра́сти , и҆ ѻ҆гнѧ̀ и҆схи́ти вѣ́чнꙋющагѡ .

катава́сїѧ : Твᲂѧ̀ пѣвцы̀ .

сѣда́ленъ . гла́съ , д҃ . Свѣ́тлѡ житїѐ твᲂѐ всѣ́мъ ꙗ҆ви́сѧ , и҆ всепра́здньственаѧ па́мѧть твᲂѧ̀ , чꙋдесы̀ ѡ҆блиста́ющи ᲂу҆дивлѧ́етъ вѣ́рныѧ . тебѐ ᲂу҆́бѡ ны́нѣ ра́дᲂстїю пᲂчита́емъ , а҆рхїєре́ѡмъ пᲂхвало̀ . мᲂлѝ спасти́сѧ дш҃а́мъ на́шимъ . двⷤа . сла́ва , и҆ ны́нѣ , боⷢ҇ . Пᲂе́мъ тѧ̀ бг҃ᲂневѣ́сто мт҃и хрⷭ҇та̀ бг҃а , сла́вѧще ржⷭ҇тво̀ твᲂѐ непᲂсти́жимᲂе . и҆́мже и҆зба́вихᲂмсѧ ѿ ле́сти дїа́вᲂли , и҆ всѧ́кїѧ бѣды̀ , влⷣчце бцⷣе . и҆ вѣ́рнѡ вᲂпїе́мъ , пᲂми́лꙋй ста́до свᲂѐ , є҆ди́на всепѣ́таѧ .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃ᲂлѣ́пнѡ зᲂве́тъ вᲂпїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи . Пᲂе́мъ пречи́стаѧ тебѐ всенепᲂро́чнꙋю , тебѐ ра́ди спа́сшїисѧ , и҆ бл҃гᲂче́стнѡ пᲂю́ще вᲂпїе́мъ бл҃гᲂслᲂве́на , ꙗ҆́же бг҃а пло́тїю ро́ждьшаѧ . Свѣ́тъ незахᲂди́мыи дв҃о ро́ждьши , во тмѣ̀ сꙋ́щимъ житїѧ̀ , пло́тїю свѣтѧ́щь всебл҃же́ннаѧ . и҆ пᲂю́щимъ тѧ при́снѡ дв҃о , ра́дᲂсть и҆стᲂчи́ла є҆сѝ . Бл҃гᲂда́ть прᲂцвѣтѐ , зако́нъ преста̀ , тебѐ ра́ди пречⷭ҇та́ѧ . ты́ бо чⷭ҇таѧ рᲂдила̀ є҆сѝ гдⷭ҇а , даю́щаго на́мъ прⷭ҇нѡ дв҃о ѡ҆ставле́нїе . Ме́ртва мѧ пᲂказа̀ сада̀ в̾кꙋше́нїе , жи́зни же дре́во ѿ тебѐ ꙗ҆́вльшеесѧ , всечⷭ҇таѧ ѡ҆живѝ , и҆ раѧ̀ пи́щи наслѣ́дника мѧ ᲂу҆стро́й .

и҆́нъ , і҆рмо́съ . Оу҆слы́шахъ гдⷭ҇и смᲂтре́нїѧ твᲂегѡ̀ та́инство , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . Вели́кᲂе свѣти́ло сїѧ́нїи твᲂи́хъ дᲂбрᲂдѣ́телей , и҆ свѣтлᲂстьмѝ чꙋде́съ прᲂсвѣща́ѧ вѣ́рныхъ , и҆́же и҆́скренѡ тебѐ пᲂю́щихъ ст҃лю . Ꙗ҆́кѡ прекра́снаѧ ма́слина ѻ҆́ч҃е , насажде́нъ бы́въ ст҃лю в̾ дᲂмꙋ̀ гдⷭ҇ни , и҆ во дво́рѣхъ до́мꙋ бг҃а на́шегѡ прᲂцвѣтѐ , пᲂдава́ѧ здра́вїе дш҃а́мъ и҆ тѣлесе́мъ . Всечестно́е тѣ́ло твᲂѐ ст҃лю і҆ѡ́но , до́мъ прест҃а́гѡ дх҃а бы́сть . во́грᲂбѣ бо лежа̀ , дꙋ́хи лꙋка́выѧ ѿ челᲂвѣ́къ прᲂгᲂнѧ́ѧ , си́лᲂю и҆́же в̾ тебѣ̀ живꙋ́щагѡ . Сло́вᲂмъ и҆ дѣ́лы и҆ прᲂстᲂто́ю срⷣца , прᲂсїѧ́лъ є҆сѝ і҆ѡ́но ст҃лю . пᲂмина́й на́съ , чтꙋ́щихъ па́мѧть твᲂю̀ прпⷣбне . боⷢ҇ . И҆́же всѣ́ми невмѣсти́мыи пречⷭ҇таѧ , в̾мѣща́етсѧ во ᲂу҆тро́бꙋ твᲂю̀ , спаса́ѧ мѧ̀ бл҃гᲂстїю , пᲂгрꙋже́наго грѣхѝ . катава́сїѧ : Сѣдѧ́и во сла́вѣ .

пѣ́снь , є҃ . і҆рмо́съ . Бж҃їимъ свѣ́тᲂмъ тѝ бл҃же , ᲂу҆́тренюющихъ тѝ дш҃а любо́вїю , прᲂсвѣтѝ мᲂлю́сѧ , тѧ̀ вѣ́дѣти сло́во бж҃їе , и҆́стиннагѡ бг҃а , ѿ́ мрака грѣхо́внагѡ и҆зима́юща .= Ч=истᲂто́ю вᲂсїѧ́вши свѣ́тлᲂстно , бжⷭ҇твенᲂе ᲂу҆гᲂто́вано бы́сть жили́ще влⷣцѣ всепѣ́таѧ . ты́ бо є҆ди́на мт҃и ꙗ҆ви́сѧ вᲂи́стинꙋ бж҃їѧ , рꙋка́ма ꙗ҆́кᲂже младе́нца сегѡ̀ нᲂси́вши . Нᲂсѧ́щи дᲂбро́тꙋ мы́сленꙋю , и҆зрѧ́дныѧ ти дш҃и , невѣ́ста бж҃їѧ была̀ є҆сѝ . запечатлѣ́нна дв҃ьствᲂмъ чи́стаѧ . и҆ свѣ́тᲂмъ чистᲂты̀ , ми́ра прᲂсвѣща́ющи . Да рыда́етъ со́нмъ ѕлᲂчести́выхъ , не и҆спᲂвѣ́дающихъ тѧ , ꙗ҆́вѣ чи́стꙋю бж҃їю мт҃рь . ты́ бо врата̀ бжⷭ҇твенагѡ свѣ́та пᲂказа́сѧ на́мъ , мра́къ сᲂгрѣше́нїи разᲂрѧ́ющи .

и҆́нъ , і҆рмо́съ . Вскꙋ́ю мѧ ѿри́нꙋ , ѿ лица̀ твᲂегѡ̀ свѣ́те незахᲂдѧ́и , пᲂкры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ запᲂвѣде́й ти пꙋтѝ мᲂѧ̀ напра́ви мᲂлю́тисѧ . Чи́стъ ᲂу҆́мъ сво́й къ бг҃ꙋ и҆мѣ́ѧ ст҃лю всегда̀ , и҆ до́брѣ ᲂу҆пра́вилъ є҆сѝ хрⷭ҇то́во ста́до . тѣ́мже ᲂу҆́бѡ и҆ непрехᲂдѧ́щее селе́нїе и҆́же со а҆́нг҃лы , и҆ а҆рхїєре́и наслѣ́дꙋѧ прпⷣбне . ѿ ню́дꙋ же сїѧ́еши чꙋдесы̀ . Оу҆мо́мъ чистѣ́йшимъ раз̾смᲂтрѧ́ѧ , ᲂу҆ма̀ всѣ́хъ вино́внагѡ . сегѡ̀ ра́ди прїе́мъ дарᲂва́нїѧ чꙋде́съ ст҃лю , и҆ вѣ́рныѧ ᲂу҆дивлѧ́еши . и҆́же любо́вїю тебѐ пᲂчита́ющихъ премꙋ́дре . Ѿ ю҆́нагѡ во́зраста житїѐ твᲂѐ прᲂсїѧ̀ , дᲂбрᲂдѣ́тельми ᲂу҆кра́шено , і҆ѡ́но ст҃лю . и҆ чꙋдесы̀ высо́кими ᲂу҆дᲂбре́нѡ бл҃же́нне . и҆́же и҆ по преставле́нїи прᲂсла́ви тѧ̀ ꙗ҆вле́на . Сла́ва ст҃лемъ , и҆ вѣ́рнымъ лю́демъ застꙋ́пникъ вᲂи́стинꙋ ѻ҆́ч҃е бы́лъ є҆сѝ . красᲂта̀ цр҃кви , и҆ ѡ҆снᲂва́нїе дᲂбрᲂдѣ́телемъ . и҆ бл҃гᲂче́стїѧ ᲂу҆тверже́нїе дᲂстᲂхва́льне . боⷢ҇ . Ви́дѣвше бжⷭ҇твенагѡ та́инства бг҃ᲂра́дᲂваннаѧ , непᲂсти́жимꙋю глꙋбинꙋ̀ честні́и прⷪ҇рцы , чⷭ҇тагѡ ржⷭ҇тва̀ твᲂегѡ̀ пречⷭ҇таѧ . разли́чными ѻ҆́бразы , ꙗ҆́кᲂже вмѣсти́ша .

катава́сїѧ : Оу҆диви́шасѧ всѧ́ческаѧ .

пѣ́снь , ѕ҃ . і҆рмо́съ . Жите́йскагѡ мо́рѧ вᲂз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вᲂпїю́ ти , вᲂз̾ведѝ ѿ тлѝ живо́тъ мо́й мнᲂгᲂмлⷭ҇тиве .= В=ели́кїи пред̾написа̀ во прᲂро́цѣхъ мѡѷсе́й тѧ , кᲂвче́гъ и҆ трапе́зꙋ , и҆ свѣ́щникъ , и҆ рꙋ́чкꙋ , ѻ҆бра́знѡ ꙗ҆влѧ́ѧ вᲂплᲂще́нїе , є҆́же ѿ тебѐ вы́шнѧгѡ мт҃и дв҃о . Оу҆мерщвѧ́етсѧ сме́рть , ᲂу҆пражнѧ́етсѧ и҆ тлѣ́нїе а҆да́мᲂва ѡ҆сꙋжде́нїѧ плᲂдо́мъ твᲂи́мъ , прелᲂжи́всѧ , ѽ влⷣчце живо́тъ бо рᲂдила̀ є҆сѝ , ѿ и҆стлѣ́нїѧ и҆збавлѧ́ющь пᲂю́щихъ тѧ̀ . Зако́нъ и҆знемо́же , и҆ пре́йде сѣ́нь , вы́ше ᲂу҆ма̀ и҆ по́мысла , ꙗ҆ви́вшисѧ бл҃гᲂда́ти , ꙗ҆́же ѿ тебѐ дв҃о , ржⷭ҇твᲂмъ бг҃а и҆ сп҃са , мнᲂгᲂпѣ́таѧ .

и҆́нъ , і҆рмо́съ . Мл҃твꙋ прᲂлїю̀ ко́ гдⷭ҇ꙋ , и҆ тᲂмꙋ̀ вᲂз̾вѣщꙋ̀ печа́ль мᲂю̀ . ꙗ҆́кѡ ѕѡ́лъ дш҃а мᲂѧ̀ напо́лнисѧ , и҆ живо́тъ мо́й а҆́дꙋ прибли́жисѧ . и҆ мᲂлю́сѧ ꙗ҆́кѡ і҆ѡ́на , ѿ тлѝ бж҃е мо́й вᲂз̾веди́ мѧ . Бл҃гᲂлѣ́пїѧ вѣнце́мъ ᲂу҆кра́шенъ , сїѧ́еши ны́нѣ ст҃лю . ꙗ҆́кѡ и҆́стинныи а҆рхїєре́й , пра́вдᲂю вᲂи́стинꙋ ѡ҆дѣ́ѧвсѧ , преда́нїе сп҃сᲂво сᲂблю́лъ є҆сѝ . тѣ́мже и҆ зва́нїю бжⷭ҇твенᲂмꙋ вᲂпїю́щꙋ тѝ , вни́ди в̾ ра́дᲂсть гдⷭ҇а свᲂегѡ̀ . Кро́тᲂкъ и҆ незло́бивъ , влады́чнимъ стᲂпа́мъ вᲂслѣ́дꙋѧ прпⷣбне . и҆ прехᲂдѧ̀ ѿ тлѣ́нныхъ на вѣ́чнаѧ . ѿ ню́дꙋ же и҆ зе́млю кро́ткихъ , и҆́же со ст҃ы́ми дᲂсти́глъ є҆сѝ . сегѡ̀ ра́ди тѧ̀ сᲂбо́ри бл҃гᲂчести́выхъ вᲂспѣва́ютъ . Твᲂегѡ̀ ра́ди житїѧ̀ вели́кагѡ и҆ чистᲂты̀ , сн҃а тѧ свѣ́та и҆ днѝ хрⷭ҇то́съ пᲂказа̀ . и҆ а҆рхїєре́ѧ и҆ па́стырѧ , цр҃кви свᲂе́й сᲂдѣ́ла . и҆дѣ́же пᲂслꙋжи́въ , ꙗ҆́кѡ па́стырь и҆зрѧ́денъ . и҆ къ ѻ҆би́телемъ нбⷭ҇нымъ вᲂсхо́диши . Раз̾сꙋжде́нїемъ ᲂу҆ма̀ , и҆ жела́нїемъ дх҃о́внымъ распала́емь , жи́знь свᲂю̀ ст҃лю прᲂхᲂдѧ̀ . и҆ несꙋ́щаѧ ꙗ҆́кѡ прехᲂдѧ́щаѧ ми́мѡ текі́и . и҆ к̾ бжⷭ҇твенымъ селе́нїемъ ѻ҆́ч҃е і҆ѡ́но прилага́ѧсѧ . боⷢ҇ . Ѡ҆ст҃ѝ дш҃ꙋ мᲂю̀ дв҃о , ꙗ҆́же ст҃о́е ро́ждьши сло́во . вᲂи́стинꙋ во ст҃ы́хъ , ꙗ҆́кѡ пречи́сто пᲂчива́ющагѡ є҆ди́нагѡ бг҃а на́шегѡ . и҆ да́рꙋй мѝ ꙗ҆́кѡ ми́лᲂстива , ᲂу҆миле́нїѧ тꙋ́чꙋ пренепᲂро́чнаѧ .

катава́сїѧ : Бжⷭ҇твенᲂе сѐ и҆ всечестно́е .

кᲂнда́къ . гла́съ , и҃ . Ꙗ҆́кѡ ѿ младе́нства гдⷭ҇ви пᲂрабо́тивъ себѐ мꙋ́дре , пᲂсто́мъ и҆ бдѣ́нїемъ тѣ́ло свᲂѐ ᲂу҆дрꙋча́ѧ . тѣ́мже сᲂсꙋ́дъ чи́стъ и҆ до́мъ дх҃ꙋ прест҃о́мꙋ ꙗ҆ви́сѧ . сегѡ̀ ра́ди и҆ цр҃кви свᲂе́й тебѐ а҆рхїєре́ѧ и҆ па́стырѧ ᲂу҆стрᲂѧ́етъ , ю҆́же до́брѣ ᲂу҆па́съ ко́ гдⷭ҇ꙋ ѿхо́диши , є҆го́же вᲂз̾любѝ . тѣ́мъ мо́лимъ тѧ̀ , пᲂмина́й на́съ вѣ́рᲂю чтꙋ́щихъ ст҃ꙋ́ю па́мѧть твᲂю̀ , да всѝ зᲂве́мъ ти . ра́дꙋисѧ ѻ҆́ч҃е і҆ѡ́но , ст҃лю всечестны́и . и҆́кᲂсъ . Чл҃къ ᲂу҆́бѡ сы́и є҆стество́мъ ѻ҆́ч҃е , но па́че чл҃ка пᲂдвиза́сѧ , в̾ пᲂстѣ́хъ и҆ бдѣ́нїихъ , и҆ мᲂли́твахъ и҆ трꙋдѣ́хъ . ꙗ҆́кѡ ѻ҆́бразъ бы́въ дᲂбрᲂдѣ́тели мно́гимъ . сегѡ̀ ра́ди тѧ̀ бг҃ъ , а҆рхїєре́ѧ и҆ па́стырѧ цр҃кви свᲂе́й ᲂу҆страѧ́етъ . ѿ ню́дꙋ же тѧ̀ мо́лимъ , мᲂли́сѧ бл҃гᲂда́телю всѣ́хъ бг҃ꙋ , во є҆́же странѣ̀ на́шей чтꙋ́щей тѧ̀ , дарᲂва́ти пᲂбѣ́дꙋ на врагѝ . и҆ на́мъ ѡ҆брѣстѝ бл҃гᲂда́ть и҆ млⷭ҇ть в̾ де́нь сꙋ́дныи . да всѝ зᲂве́мъ тѝ , ра́дꙋисѧ ѻ҆́ч҃е і҆ѡ́но ст҃лю всечестны́и .

пѣ́снь , з҃ . і҆рмо́съ . Хладᲂда́тельнꙋ ᲂу҆́бѡ пе́щь сᲂтвᲂрѝ а҆́нг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ ᲂу҆вѣща̀ вᲂпи́ти , бл҃гᲂслᲂве́нъ бг҃ъ ѻ҆ц҃ъ на́шихъ .= Ю҆́=нᲂшъ трїе́хъ пе́щь не ѡ҆палѝ , ржⷭ҇тво̀ пред̾ вᲂѡ҆бража́ющихъ , бжⷭ҇твеныи бо ѻ҆́гнь тебѐ не ѡ҆палѝ , всели́сѧ в̾ тѧ̀ , и҆ всѧ̀ наꙋчѝ вᲂпи́ти , блгⷭ҇ве́нъ бг҃ъ ѻ҆ц҃ъ на́шихъ . Бл҃жа́тъ кᲂнцы̀ тебѐ всечⷭ҇таѧ мт҃и , ꙗ҆́кᲂже прᲂрекла̀ є҆сѝ , прᲂсвѣща́еми свѣтᲂѡ҆бра́зїемъ сїѧ́нїи твᲂи́хъ , и҆ бл҃гᲂда́тїю свѣтѧ́щесѧ , вᲂпїю́тъ , блгⷭ҇ве́наѧ ꙗ҆́же бг҃а пло́тїю ро́ждьшаѧ . Па́гꙋбныѧ ᲂу҆́бѡ зꙋ́бы в̾ мѧ̀ вᲂнзѣ̀ ѕмі́й вселꙋка́выи , но сїѧ̀ тво́й бг҃ᲂмт҃и сᲂкрꙋшѝ сн҃ъ , крѣ́пᲂсть пᲂдава́ѧ ми вᲂпи́ти , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . Ѡ҆чи́стилище є҆стества̀ ты́ є҆си , є҆ди́на бг҃ᲂбл҃же́ннаѧ . на ра́мѣхъ бо херꙋви́мскихъ сѣдѧ́щагѡ бг҃а , дла́ньма нᲂси́вши , вᲂпїе́ши , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ .

и҆́нъ , і҆рмо́съ . И҆́же ѿ і҆ꙋде́и , дᲂше́дше ѻ҆́трᲂцы въ вавѷлѡ́нъ дре́вле , вѣ́рᲂю ᲂу҆тверже́нїи , пла́мень пе́щныи пᲂпра́вше гл҃юще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Ви́дѣвъ твᲂѐ бл҃го́е прᲂи҆звᲂле́нїе хрⷭ҇то́съ бг҃ъ , ꙗ҆́кѡ не себѣ̀ живе́ши , по дѣ́йствꙋющемꙋ в̾ тебѣ̀ гдⷭ҇ꙋ . тѣ́мъ ᲂу҆краша́етъ тебѐ , чꙋде́съ и҆сцѣле́нїемъ . Чи́стыми дѣ́лы , и҆ и҆справле́ньми свᲂи́ми , прᲂсїѧ́въ ꙗ҆́кѡ свѣти́ло . и҆ бг҃ᲂда́ннꙋю тѝ цр҃квь до́брѣ ᲂу҆па́съ , пᲂѧ̀ хрⷭ҇то́ви . ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Ꙗ҆́кѡ в̾ зако́нѣ гдⷭ҇ни пᲂꙋча́ѧсѧ де́нь и҆ но́щь ст҃лю . за́днѧѧ забыва́ѧ , и҆ на пре́днѧѧ прᲂстира́ѧсѧ , твᲂрцꙋ̀ и҆ влⷣцѣ вᲂпїѧ̀ , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . И҆зрѧ́дно житїѐ твᲂѐ ст҃лю , всѣ́мъ пᲂзна́но бы́сть . и҆ по преставле́нїи прᲂславлѧ́етъ тебѐ , є҆мꙋ́же ᲂу҆се́рднѡ пᲂслꙋжи́въ , і҆ѡ́но ѻ҆́ч҃е на́шъ . хрⷭ҇то́ви пᲂѧ̀ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . боⷢ҇ . Ѻ҆́гнь ника́кᲂже тѧ̀ бжⷭ҇тва̀ не ѡ҆палѝ дв҃о . тѧ́ бо и҆нᲂгда̀ кꙋпина̀ прᲂѡ҆бразᲂва́ше в̾ гᲂрѣ̀ , ѡ҆палѧ́ема пречⷭ҇таѧ , и҆ ника́кᲂже сгᲂра́ема .

катава́сїѧ : Непᲂслꙋжи́ша тва́ри .

пѣ́снь , и҃ . і҆рмо́съ . И҆с̾пла́мени ст҃ы́мъ ро́сꙋ и҆стᲂчѝ , а҆ пра́веднагѡ же́ртвꙋ и҆ во́ды пᲂпалѝ , всѧ́ бо твᲂри́ши хрⷭ҇тѐ , є҆ли́ко хо́щеши , тѣ́мъ тѧ превᲂзно́симъ гдⷭ҇а во́ вѣки .= З=лато́ю ри́зᲂю ꙗ҆́кᲂже цр҃цꙋ , сн҃ъ тво́й прᲂсвѣтли́въ заре́ю дх҃а , тебѐ ѡ҆деснꙋ́ю себѐ пᲂста́ви пречⷭ҇таѧ . є҆го́же превᲂзно́симъ во́ вѣки . И҆́же во́лею є҆ди́нᲂю ми́ръ ᲂу҆тверди́въ , ѿ пречⷭ҇тыѧ ᲂу҆тро́бы твᲂеѧ̀ пло́ть зае́млетъ , с̾вы́ше тꙋ̀ назда́ти хᲂтѧ̀ . є҆го́же превᲂзно́симъ во́ вѣки . Сᲂчета́нїемъ ко мнѣ̀ чл҃кꙋ сло́ва , бжⷭ҇твено жили́ще была̀ є҆сѝ пречⷭ҇таѧ , вᲂсїѧ́вши ꙗ҆́вѣ дв҃ьства свѣ́тлᲂстїю , тѣ́мже тѧ̀ пᲂе́мъ вѣ́рнїи во всѧ̀ вѣ́ки . Златᲂза́рныи тѧ̀ свѣ́щникъ предвᲂѡ҆бразѝ , прїе́мшꙋю несказа́нно свѣ́тъ неприкᲂснᲂве́нныи , сїѧ́нїемъ свᲂи́мъ ѡ҆зарѧ́ющи кᲂнцы̀ . тѣ́мже тѧ̀ пᲂе́мъ чⷭ҇таѧ во́ вѣки .

и҆́нъ , і҆рмо́съ . Цр҃ѧ нбⷭ҇нагѡ , є҆го́же пᲂю́тъ вѡ́и а҆́нг҃льстїи . хвали́те и҆ превᲂзнᲂси́те є҆гѡ̀ во́ вѣки . А҆́нг҃льскᲂе житїѐ по́жилъ є҆сѝ на землѝ ст҃лю , смире́нъ и҆ кро́тᲂкъ бы́въ . ѿ ню́дꙋ же и҆ в̾ землѝ кро́ткихъ со ст҃ы́ми вᲂдвᲂрѧ́ѧсѧ . хрⷭ҇то́ви же пᲂѧ̀ , хвали́те и҆ превᲂзнᲂси́те є҆гѡ̀ во́ вѣки . Хра́мъ ѡ҆сщ҃е́нїѧ , всечестна́ѧ ра́ка мᲂще́й твᲂи́хъ ст҃лю . и҆з̾ него́же и҆сцѣле́нїе бл҃гᲂда́ти пᲂчерпа́юще , влⷣкꙋ всѣ́хъ гдⷭ҇а пᲂе́мъ . и҆́же тебѐ цѣле́бника дарᲂва́вшаго , и҆ превᲂзно́симъ є҆гѡ̀ во́ вѣки . Оу҆́мъ тво́й ст҃лю манᲂве́нїемъ бжⷭ҇твенымъ ѡ҆бᲂжа́емь , до кᲂнца̀ плᲂтьски́хъ страсте́й ᲂу҆дали́сѧ , хрⷭ҇то́ви пᲂѧ̀ , хвали́те и҆ превᲂзнᲂси́те є҆гѡ̀ во́ вѣки . По дᲂсто́инствꙋ пᲂчита́емъ вѣ́рнїи , мᲂще́й твᲂи́хъ честнꙋ́ю ра́кꙋ , і҆ѡ́но ст҃лю , ꙗ҆́кѡ мѵ́рѡ пᲂчерпа́юще , вѣ́рнымъ бл҃гᲂꙋха́нїе , влⷣцѣ хрⷭ҇тꙋ̀ вᲂпїю́ще . всѧ̀ дѣ́ла хвали́те и҆ превᲂзнᲂси́те є҆гѡ̀ во́ вѣки . боⷢ҇ . И҆сцѣлѝ стра́сти срⷣца мᲂегѡ̀ , без̾стра́стїѧ и҆сто́чникъ ро́ждьшаѧ . и҆ к̾ живᲂтꙋ̀ мѧ̀ бжⷭ҇твенᲂмꙋ наста́ви , да тѧ̀ сла́влю во всѧ̀ вѣ́ки . катава́сїѧ : Хва́лимъ бл҃гᲂслᲂви́мъ . Ѻ҆́трᲂки бл҃гᲂчести́выѧ .

пѣ́снь , ѳ҃ . і҆рмо́съ . Бг҃а чл҃кѡмъ неꙋдо́бь ви́дѣти , на́нь же несмѣ́ютъ чи́ни а҆́нг҃льстїи зрѣ́ти . тᲂбо́ю бо пречⷭ҇таѧ ꙗ҆ви́сѧ на́мъ сло́во вᲂплᲂще́нно , є҆го́же велича́юще , с̾ нбⷭ҇ными вѡ́и тѧ̀ велича́емъ .= Ѕ=вѣзда̀ сїѧ́ющи зарѧ́ми бжⷭ҇тва̀ ѿ і҆а́кѡва , мра́кᲂмъ держи́мымъ вᲂсїѧ̀ , тебѐ ра́ди пречⷭ҇таѧ , хрⷭ҇то́съ бг҃ъ сло́во вᲂплᲂще́нно . и҆́мже прᲂсвѣща́еми , с̾ нбⷭ҇ными вѡ́и тебѐ велича́емъ . Оу҆крѣплѧ́емъ си́лᲂю твᲂе́ю и҆ бл҃гᲂда́тїю , тебѣ̀ пѣ́снь ᲂу҆се́рднѡ ѿ́ срⷣца вᲂзлᲂжи́хъ . но сїю̀ прїимѝ дв҃о чи́стаѧ , бл҃гᲂда́ть вᲂздаю́щи твᲂю̀ мнᲂгᲂсвѣ́тлꙋю , ѿ нетлѣ́нныхъ сᲂкро́вищь бг҃ᲂблаже́ннаѧ . Пᲂста́въ пᲂказа́сѧ бг҃ᲂтка́ненъ ꙗ҆́вѣ дв҃о , в̾ не́мже ѻ҆де́ждꙋ тѣлесѐ сло́во и҆стка̀ , бг҃ᲂсᲂдѣ́лавъ мо́й зра́къ . въ него́ же ѡ҆бо́лксѧ , всѣ́хъ спасѐ , и҆́же ѿ мы́сли чи́сты тебѐ велича́ющихъ . Ме́ртвымъ вᲂскрⷭ҇нїе ны́нѣ дарᲂва́сѧ , твᲂи́мъ несказа́ннымъ , и҆ не и҆зрече́ннымъ ржⷭ҇тво́мъ бцⷣе всечⷭ҇таѧ . жи́знь бо ѿ тебѐ в̾ пло́ть ѡ҆бло́жшисѧ всѣ́мъ вᲂсїѧ̀ , и҆ сме́ртнᲂе свѣше́нїе ꙗ҆́вѣ разрꙋшѝ .

и҆́нъ , і҆рмо́съ . Вᲂи́стинꙋ бцⷣꙋ тѧ̀ и҆спᲂвѣ́дающе , спасе́ннїи тᲂбо́ю дв҃це чⷭ҇таѧ , съ нбⷭ҇ными вѡ́и тѧ̀ велича́емъ . Чи́стымъ срⷣцемъ , и҆ бжⷭ҇твеными вᲂсхᲂжде́нїи , ᲂу҆́мъ впери́въ . є҆ди́нагѡ бг҃а зрѣ́ти , дᲂбро́тꙋ жела́ѧ . и҆ ѿ тꙋ́дꙋ свѣтᲂли́тїемъ прᲂсвѣща́ѧсѧ , бг҃ᲂмꙋ́дре ст҃лю . Бг҃ᲂпре́даннᲂе ста́до твᲂѐ , па́стырѧ тѧ̀ и҆мꙋ́ще , тѧ́жкїѧ во́лки ѿгᲂнѧ́юща ѿ всѣ́хъ вѣ́рныхъ . и҆ ста́до бл҃гᲂда́тїю хрⷭ҇то́вᲂю сᲂблюда́емо сᲂхрани́въ , і҆ѡ́но ст҃лю . Ꙗ҆́кᲂже пе́рвѣе цѣлᲂмꙋ́дренагѡ і҆ѡ́сифа тѣ́ло і҆и҃ль прино́ситъ . та́кѡ и҆ ны́нѣ ра́кꙋ мᲂще́й твᲂи́хъ і҆ѡ́но ст҃лю прїе́млюще , пᲂчита́ютъ любе́знѣ , хрⷭ҇та̀ велича́юще . Дне́сь свѣ́тлаѧ па́мѧть твᲂѧ̀ ст҃лю вᲂсїѧ́вши , вѣ́рныхъ срⷣца̀ прᲂсвѣща́ѧ . тѣ́мже и҆ пѣ́нїе прᲂи҆зве́дшемꙋ , мᲂлѝ хрⷭ҇та̀ бг҃а сᲂхрани́тисѧ ѿ лꙋка́вагѡ лᲂвле́нїѧ , и҆ пᲂлꙋчи́ти млⷭ҇ть в̾ де́нь сꙋ́дныи . боⷢ҇ . Свѣ́тᲂмъ пᲂкаѧ́нїѧ , пᲂмраче́ннаго мѧ̀ лѣ́нᲂстїю , всенепᲂро́чнаѧ прᲂсвѣтѝ . да пᲂю̀ и҆ велича́ю , и҆ сла́влю тѧ̀ пренепᲂро́чнꙋю влⷣчцꙋ .

катава́сїѧ : Всѧ́къ зе́менъ .= Дᲂсто́йнѡ є҆́сть . свѣти́ленъ . Тезᲂи҆мени́те цѣлᲂмꙋ́дрїѧ , ѿ ю҆́нагѡ вᲂспита́нїѧ ст҃лю бы́въ . пᲂтща́лсѧ є҆сѝ тлѣ́нными , нетлѣ́ннаѧ стѧжа́ти . ѿ ню́дꙋ же и҆ а҆рхїєре́йствᲂмъ пᲂчте́нъ бы́въ . при́снѡ ѡ҆ на́съ влⷣкꙋ мᲂлѝ , и҆́же любо́вїю пᲂю́щихъ тѧ̀ . =двⷤа . сла́ва , и҆ ны́нѣ , боⷢ҇ . Щедро́ты твᲂѧ̀ бж҃е на́ люди и҆ ста́до твᲂѐ низ̾пᲂслѝ , мᲂли́твами пречⷭ҇тыѧ тѝ мт҃ре , и҆ всѣ́хъ ст҃ы́хъ твᲂи́хъ . и҆ на́мъ да́рꙋй вели́кꙋю твᲂю̀ ми́лᲂсть .

На хвали́тѣхъ , стⷯры , на д҃ . гла́съ , и҃ . поⷣ . ѽ =пресла́внᲂе чꙋ́до . Ѻ҆́ч҃е бг҃ᲂмꙋ́дре і҆ѡ́но ст҃лю ,꙳ ты̀ ѿ ю҆́нᲂсти вᲂз̾держа́нїю пᲂꙋча́ѧсѧ .꙳ и҆ во бдѣ́нїихъ и҆ в̾ мᲂли́твахъ и҆ пᲂстѣ́хъ ,꙳ гдⷭ҇ви приближа́ѧсѧ .꙳ и҆ мᲂли́твеницꙋ всегда̀ призыва́ѧ дв҃ꙋ бцⷣꙋ ,꙳ є҆ѧ́же ра́ди наде́жди непᲂгрѣшѝ .꙳ тѣ́мже а҆рхїєре́ѧ тѧ̀ и҆ па́стырѧ ,꙳ цр҃кви свᲂе́й хрⷭ҇то́съ ᲂу҆стро́и .꙳ тᲂгѡ̀ мᲂлѝ при́снѡ ѡ҆ дш҃а́хъ на́шихъ . =двⷤа . Ѻ҆́ч҃е ст҃лю і҆ѡ́но бг҃ᲂмꙋ́дре ,꙳ ты̀ ѿ младе́нства мирскі́и мѧте́жъ ѡ҆ста́вилъ є҆сѝ ,꙳ и҆ мо́лвы ѿтрѧ́съ ,꙳ ᲂу҆ма̀ чистᲂто́ю бг҃ᲂви приближа́ѧсѧ .꙳ сегѡ̀ ра́ди тѧ̀ бг҃ъ а҆рхїєре́ѧ цр҃кви ,꙳ и҆ лю́демъ по дᲂстᲂѧ́нїю бжⷭ҇твенагѡ бл҃гᲂда́телѧ пᲂставлѧ́етъ .꙳ всегда̀ мᲂлѝ ѡ҆ на́съ ,꙳ низ̾пᲂсла́ти дш҃а́мъ на́шимъ ,꙳ ми́ръ и҆ ве́лїю млⷭ҇ть . Ѻ҆́ч҃е бг҃ᲂмꙋ́дре ст҃лю і҆ѡ́но ,꙳ ты̀ и҆́з̾млада хрⷭ҇та̀ вᲂз̾люби́въ .꙳ и҆ тᲂгѡ̀ любвѝ прилѣпи́лсѧ є҆сѝ .꙳ и҆ пресвѣ́тлагѡ дх҃а бжⷭ҇твеными зарѧ́ми ,꙳ срⷣце свᲂѐ прᲂсвѣти́въ .꙳ и҆ свѣтᲂви́денъ ве́сь вᲂи́стинꙋ бы́лъ є҆сѝ .꙳ тѣ́мже и҆́же хра́мꙋ твᲂемꙋ̀ вѣ́рᲂю притека́ющїѧ ,꙳ прᲂше́нїѧ ꙗ҆́же ко спасе́нїю спᲂдо́би ,꙳ и҆ мᲂлѝ хрⷭ҇та̀ бг҃а , спасти́сѧ дш҃а́мъ на́шимъ . сла́ва . гла́съ , ѕ҃ . Нбⷭ҇нᲂмꙋ цр҃ю и҆ влⷣцѣ , преи҆зрѧ́дныи слꙋжи́тель ст҃лю і҆ѡ́но бы́лъ є҆сѝ . чистᲂтꙋ́ бо сᲂблю́дъ , без̾ неѧ́же никто́же ᲂу҆́зритъ бг҃а . тѣ́мже и҆ вᲂз̾ме́здїе по дᲂстᲂѧ́нїю прїѧ́тъ . во́ грᲂбѣ бо лежа̀ честно́е тѣ́ло твᲂѐ , цѣ́ло и҆ нетлѣ́нно сᲂблюде́сѧ . дш҃а́ же къ нбⷭ҇нымъ ликᲂстᲂѧ́нїемъ прише́дъ . к̾ нбⷭ҇нᲂмꙋ цр҃ю мᲂли́сѧ прⷭ҇нѡ ѡ҆ всѣ́хъ , и҆́же чтꙋ́щихъ тѧ̀ любо́вїю , низ̾пᲂсла́ти ми́ръ и҆ ве́лїю млⷭ҇ть . и҆ ны́нѣ , боⷢ҇ . =Славᲂсло́вїе вели́кᲂе , и҆ ѿпꙋ́стъ .=

На литꙋргі́и , бл҃же́нна , на и҃ . ѿ кано́на , ст҃лю , пѣ́снь г҃ ѧ , и҆ ѕ҃ ѧ .

По вхо́дѣ , а҆́ще ли хра́мъ хрⷭ҇то́въ , и҆лѝ бцⷣы : трᲂпа́рь хра́мꙋ , и҆ ст҃лю . сла́ва , кᲂнда́къ ст҃лю . и҆ ны́нѣ , хра́мꙋ .

По вхо́дѣ , а҆́ще хра́мъ ст҃ы́мъ : трᲂпа́рь хра́мꙋ , и҆ ст҃лю . кᲂнда́къ хра́мꙋ . сла́ва , ст҃лю . и҆ ны́нѣ , кᲂнда́къ : застꙋ́пнице хрⷭ҇тїа́нѡмъ .

прᲂки́менъ , ѱл҃о́мъ дв҃дᲂвъ . ᲂу҆ста̀ мᲂѧ̀ вᲂз̾ гл҃ютъ премꙋ́дрᲂсть , и҆ пᲂꙋче́нїе срⷣца мᲂегѡ̀ ра́зꙋмъ . сти́хъ . ᲂу҆слы́шите сїѧ̀ всѝ ꙗ҆зы́цы , внꙋши́те всѝ живꙋ́щїи по вселе́ннѣй . а҆пⷭ҇лъ , къ є҆вре́ѡмъ . заⷱ҇ , ти҃і . а҆ллилꙋ́їѧ . ᲂу҆ста̀ пра́веднагѡ пᲂꙋча́тсѧ премꙋ́дрᲂсти , и҆ ꙗ҆зы́къ є҆гѡ̀ вᲂз̾ глаго́летъ сꙋ́дъ . є҆ѵⷢ҇а́лїе , ѿ і҆ѡа́нна . заⷱ҇ , л҃ѕ . прича́стенъ . въ па́мѧть вѣ́чнꙋю бꙋ́детъ пра́ведникъ .