МЦⷭ҇А ТОГО́ЖЕ ВЪ Ѕ҃ ДН҃Ь

ст҃ы́хъ м҃в мч҃нкъ и҆́же во а҆ммᲂрі́и . Ве́черъ , на гдⷭ҇и вᲂзва́хъ , стихѣ́ры . гла́съ , д҃ . поⷣ . и҆́же зва́нныи свы́ше .= И҆́же в̾ пᲂслѣ́днѧѧ времена̀ ꙗ҆́вльшесѧ ,꙳ дᲂбрᲂпᲂбѣ́днїи мч҃нцы ,꙳ ѕвѣ́зды незахᲂди́мыѧ ,꙳ в̾ чи́стѣй тве́рди цр҃ко́внѣй .꙳ страда́нїѧ свѣ́тлᲂстїю ,꙳ прᲂсвѣти́сте всю̀ пᲂд̾со́лнечнꙋю ,꙳ и҆ разрꙋши́сте пре́лести тмꙋ̀ прехва́льнїи .꙳ и҆ ны́нѣ къ сїѧ́нїю вѣ́чнᲂмꙋ преминꙋ́сте .꙳ тѣ́мже вѣ́рᲂю ,꙳ свѣтᲂно́снᲂе и҆ сщ҃е́ннᲂе ва́ше страда́нїе съверша́емъ ,꙳ пред̾ста́тели бл҃ги ва́ми ѡ҆бᲂгати́вшесѧ . Веде́нїемъ хрⷭ҇то́ви мч҃нцы ,꙳ нꙋ́жнымъ свѧ́зани бы́сте ,꙳ и҆ затвᲂре́ни в̾ темни́цѣ всѝ в̾ до́лго вре́мѧ .꙳ бжⷭ҇твеныѧ вѣ́ры сꙋ́ще храни́тели .꙳ ѿ ню́дꙋ же ꙗ҆рѧ́сѧ ѕвѣ́рь ѕлᲂи҆мени́тыи ,꙳ мече́мъ ва́съ ᲂу҆мертвѝ ,꙳ нехᲂтѧ́щихъ пᲂвинꙋ́тисѧ ,꙳ сегѡ̀ ѕлы́мъ пᲂвелѣ́нїемъ .꙳ и҆ ны́нѣ наслѣ́дᲂвасте вы́шнїѧ ра́дᲂсти ,꙳ четыредесѧ́те ко двѣма̀ прило́жьшесѧ ,꙳ пресла́внїи црⷭ҇твїѧ . Съ кᲂнстанти́нᲂмъ васѡ́ѧ и҆ ка́листа ,꙳ ѳео́дѡра всѝ и҆ ѳео́фила ,꙳ и҆ про́чихъ бжⷭ҇твеныи сᲂбо́ръ страстᲂте́рпецъ ,꙳ велегла́снѡ вᲂсхва́лимъ .꙳ ᲂу҆́мрети бо прᲂи҆зво́лиша за всѧ́ческихъ живᲂта̀ ,꙳ закала́ющесѧ ра́дᲂстнѡ .꙳ и҆ нн҃ѣ во́ градѣ бг҃а жива́гѡ пᲂчива́ютъ ,꙳ и҆ про́сѧтъ ѡ҆брѣстѝ на́мъ ,꙳ сᲂгрѣше́нїемъ ѡ҆ставле́нїе ,꙳ в̾ де́нь и҆спыта́нїѧ ,꙳ и҆ сᲂверше́нᲂе и҆збавле́нїе . =сла́ва , и҆ ны́нѣ , боⷢ҇ . И҆́же бл҃гᲂче́стнѡ пᲂклᲂнѧ́ющихсѧ ,꙳ твᲂемꙋ̀ ржⷭ҇твꙋ̀ ,꙳ ѿ всѧ́кᲂгѡ спасѝ навѣ́та вра́жїѧ ,꙳ бг҃ᲂрᲂди́тельнице всенепᲂро́чнаѧ .꙳ ꙗ҆́кѡ пред̾ста́тельница всемꙋ̀ ро́дꙋ на́шемꙋ сꙋ́щи .꙳ тѧ́бо ны́нѣ по́мᲂщь всѝ стѧжа́хᲂмъ ,꙳ прибѣ́жище же и҆ ᲂу҆тверже́нїе ,꙳ и҆ хᲂда́таицꙋ ко хрⷭ҇тꙋ̀ бг҃ꙋ .꙳ є҆го́же мᲂлѝ , дарᲂва́ти ми́ръ ми́рᲂви мо́лимсѧ ,꙳ и҆ сᲂгрѣше́нїемъ разрѣше́нїе ,꙳ притека́ющимъ пᲂд̾ кро́въ тво́й .= крⷭ҇тᲂбоⷢ҇ . Н=ерыда́й менѐ мт҃и ,꙳ зрѧ́щи на́ древѣ ви́сима твᲂегѡ̀ сн҃а и҆ гдⷭ҇а ,꙳ и҆́же на вᲂда́хъ пᲂвѣ́шшагѡ зе́млю неѡ҆держи́мѡ ,꙳ и҆ всю̀ тва́рь сᲂзда́вшаго .꙳ и҆́бо вᲂста́нꙋ и҆ прᲂсла́влюсѧ ,꙳ и҆ а҆́дᲂво црⷭ҇тво сᲂкрꙋшꙋ̀ крѣ́пᲂстїю ,꙳ и҆ пᲂтреблю̀ сегѡ̀ си́лꙋ .꙳ и҆ свѧ́заныѧ и҆зба́влю тᲂгѡ̀ ѕлᲂдѣ́йства ,꙳ ꙗ҆́кѡ милᲂсе́рдъ .꙳ и҆ ко ѻ҆ц҃ꙋ свᲂемꙋ̀ приведꙋ̀ ,꙳ ꙗ҆́кѡ чл҃кᲂлю́бецъ .

а҆́ще слꙋчи́тсѧ , сꙋбо́та , и҆лѝ нлⷣѧ . пᲂе́мъ : сла́ва . гла́съ , в҃ . Цр҃кви дне́сь тᲂржествꙋ́етъ та́йнѡ , но́вꙋю ѻ҆де́ждꙋ ѡ҆бле́кши , ꙗ҆́кѡ пᲂрфѵ́рꙋ и҆ виссѡ́нъ , крᲂвьмѝ но́выхъ страстᲂно́сецъ . си́хъ бо во бл҃гᲂче́стїи вᲂспитѣ́вши , же́ртвꙋ непᲂро́чнꙋ , прїѧ́тнꙋ и҆ бл҃гᲂꙋго́днꙋ хрⷭ҇тѐ тебѣ̀ принесѐ . тѣ́мъ и҆́же пᲂбѣди́тели си́хъ без̾зако́нникѡмъ пᲂказа́выи , и҆ вѣнча́въ и҆ прᲂсла́вивъ , и҆ на́мъ низ̾пᲂслѝ тѣ́хъ мᲂльба́ми ве́лїю млⷭ҇ть . и҆ ны́нѣ , бг҃ᲂро́диченъ , гла́сꙋ .

На стихо́внѣ , во ѻ҆кта́и . сла́ва . гла́съ , ѕ҃ . По́лкъ бг҃ᲂвѣнча́ненъ ны́нѣ ꙗ҆́вльшихсѧ мч҃нкъ , закᲂле́нїе непᲂро́чнᲂе по хрⷭ҇тѣ̀ пᲂжре́ннᲂе ᲂу҆се́рднѡ , ст҃ᲂи҆збра́ннᲂе во́инство четы́редесѧте и҆ двᲂю̀ , мч҃нкᲂлю́бцы прїидѣ́те , всесщ҃е́ннꙋю па́мѧть дх҃о́внѡ сᲂверши́вше вᲂпїе́мъ к̾ ни́мъ , низ̾лᲂжи́те гᲂрды́ню а҆га́рѧнѡмъ без̾бо́жнымъ , и҆ и҆зба́вите лю́ди бл҃гᲂче́стнѡ мꙋ́дрствꙋющихъ мᲂли́твами ва́шими , всѧ́кᲂгѡ ѡ҆бстᲂѧ́нїѧ .

и҆ ны́нѣ , бг҃ᲂро́диченъ , гла́сꙋ .

На ᲂу҆́трени . ѻ҆́ба кано́на , во ѻ҆кта́и . и҆ ст҃ы́мъ , на д҃ . кано́нъ , твᲂре́нїе и҆гна́тїево . гла́съ , и҃ . пѣ́снь , а҃ . і҆рмо́съ . Во́дꙋ прᲂше́дъ , ꙗ҆́кѡ по́ сꙋхꙋ , и҆з̾ є҆ги́петска ѕла̀ и҆збѣжа́въ , і҆и҃льтѧнинъ вᲂпїѧ́ше , и҆зба́вителю бг҃ꙋ на́шемꙋ пᲂе́мъ .

запѣ́въ : Ст҃і́и мч҃нцы , мᲂли́те бг҃а ѡ҆ на́съ .= Во глꙋбинꙋ́ мѧ в̾па́дша грѣхо́въ , и҆ твᲂе́й пꙋчи́нѣ прибѣга́юща щедро́тъ , мᲂльба́ми хрⷭ҇тѐ страстᲂно́сецъ , во спасе́нᲂе приста́нище наста́ви . Блиста́ѧсѧ дᲂбро́тᲂю дᲂбрᲂдѣ́телей , нᲂсѧ̀ багрѧни́цꙋ ѿ крᲂве́й мч҃нческихъ . ꙗ҆́кѡ ски́петро держа̀ крⷭ҇тъ , црⷭ҇твꙋеши съ гдⷭ҇емъ ѳео́дѡре . Въ пѣ́снехъ ѳео́дѡра вѣ́рнїи , ка́листа и҆ васѡ́ѧ , и҆ ѳео́фила с̾ ни́мъ , в̾кꙋ́пѣ съ кᲂнстанти́нᲂмъ до́блимъ , и҆ про́чаѧ вᲂсхва́лимъ мч҃нки . =боⷢ҇ . И҆злїѧ̀ ꙗ҆́дъ є҆́ввѣ во ᲂу҆́ши , дш҃етлѣ́ненъ льсте́цъ и҆ ѕлᲂдѣ́й . хрⷭ҇та́ же ро́ждьши бг҃ᲂмт҃и , сегѡ̀ вре́да и҆сцѣли́ла є҆сѝ .

пѣ́снь , г҃ . і҆рмо́съ . Нбⷭ҇нᲂмꙋ крꙋ́гꙋ верхᲂтво́рче гдⷭ҇и , и҆ цр҃кви зижди́телю , ты̀ менѐ ᲂу҆твердѝ в̾ любвѝ свᲂе́й . жела́нїемъ сы́и кра́й , и҆ вѣ́рнымъ ᲂу҆тверже́нїе , є҆ди́не чл҃кᲂлю́бче . Прᲂсвѣща́емь заре́ю , ꙗ҆́кѡ вᲂи́стинꙋ сла́вне бл҃гᲂче́стїѧ . и҆ дᲂбро́тᲂю ᲂу҆краша́емь , бжⷭ҇твеными дѣѧ́нїи . ва́рварскагѡ без̾бо́жїѧ , мра́чнᲂе разрꙋши́лъ є҆сѝ бл҃же́нне ѕлᲂче́стїе . Кро́вныѧ то́ки рѣко́ю и҆сте́кши , ѿ прест҃ы́хъ тѣле́съ страстᲂно́сецъ твᲂи́хъ , црⷭ҇твїе твᲂѐ и҆ наслажде́нїе пᲂто́ка , си́мъ и҆схᲂда́таи бл҃гᲂꙋтро́бне гдⷭ҇и . Ꙗ҆́кᲂже ѕвѣ́зды неле́стныѧ , страда́льцы прᲂсїѧ́вше , цр҃кве ст҃ы́ѧ ны́нѣ тве́рди . всю̀ ѡ҆зари́ша вселе́ннꙋю , лꙋча́ми свᲂи́хъ страда́нїи предо́блїи . боⷢ҇ . Вᲂпло́щьсѧ во́ чревѣ твᲂе́мъ и҆ бы́въ чл҃къ , лꙋ́чшагѡ ра́ди , сы́и є҆ди́нъ чл҃кᲂлю́бецъ . спаса́ѧ чл҃ка ѿ вра́тъ сме́ртныхъ , бг҃ᲂмт҃и пречⷭ҇таѧ є҆ди́на всепѣ́таѧ .

сѣда́ленъ . гла́съ , и҃ . Ведо́ми бы́сте свѧ́зани ѿ враго́въ , и҆ в̾ темни́цѣ затвᲂре́ни на времена̀ мно́га , вѣ́рᲂю сᲂблюда́еми , непᲂдви́жими пребы́сте . и҆ ѿрѣ́шшесѧ мечѝ тѣле́съ ст҃і́и , бжⷭ҇твенымъ жела́нїемъ ꙗ҆́вѣ ѡ҆блеко́стесѧ . тѣ́мже ꙗ҆́кѡ свѣти́ла прᲂсїѧ́сте в̾ ми́рѣ , всѧ̀ прᲂсвѣща́юще дх҃а бл҃гᲂда́тїю , страстᲂно́сцы мч҃нцы . мᲂли́те хрⷭ҇та̀ бг҃а , грѣхо́въ ѡ҆ставле́нїе дарᲂва́ти , пра́зднꙋющимъ любо́вїю ст҃ꙋ́ю па́мѧть ва́шꙋ . сла́ва , и҆ ны́нѣ , боⷢ҇ . Ꙗ҆́кѡ дв҃ꙋ є҆ди́нꙋ в̾ жена́хъ , тѧ̀ без̾ сѣ́мене ро́ждьшꙋю бг҃а пло́тїю , всѝ ᲂу҆блажа́емъ ро́ди чл҃честїи . ѻ҆́гнь бо всели́сѧ в̾ тѧ̀ бжⷭ҇твеныи . и҆ ꙗ҆́кѡ младе́нца дᲂи́ши зижди́телѧ и҆ гдⷭ҇а . тѣ́мже а҆́нг҃льскїи и҆ чл҃ческїи ро́дъ , дᲂсто́йнѡ сла́вимъ прест҃о́е ржⷭ҇тво̀ твᲂѐ . и҆ сᲂгла́снѡ вᲂпїе́мъ тѝ , мᲂлѝ хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти , вᲂспѣва́ющимъ дᲂсто́йнѡ сла́вꙋ твᲂю̀ . крⷭ҇тᲂбоⷢ҇ . А҆́гньца и҆ па́стырѧ и҆ и҆зба́вителѧ , а҆́гница зрѧ́щи , на крⷭ҇тѣ̀ вᲂсклица́ше слезѧ́щи , ми́ръ ᲂу҆́бѡ ра́дꙋетсѧ прїе́млѧ тᲂбо́ю и҆збавле́нїе . ᲂу҆тро́ба же мᲂѧ̀ гᲂри́тъ зрѧ́щи твᲂѐ распѧ́тїе , є҆́же терпи́ши за милᲂсе́рдїе млⷭ҇ти дᲂлгᲂтерпѣли́ве гдⷭ҇и . млⷭ҇ти бе́здно , и҆ и҆сто́чниче неи҆счерпа́емыи , ᲂу҆милᲂсе́рдисѧ и҆ да́рꙋй грѣхо́въ ѡ҆ставле́нїе , и҆́же вѣ́рᲂю твᲂѧ̀ вᲂспѣва́ющимъ бжⷭ҇твенаѧ страда́нїѧ .

пѣ́снь , д҃ . і҆рмо́съ . Ты́ ми хрⷭ҇тѐ гдⷭ҇ь , ты́ же и҆ си́ла ми , ты́ ми бг҃ъ , ты́ ми ра́дᲂванїе . не ѡ҆ста́вль нѣ́дра ѻ҆́ч҃а , но ми́лᲂстїю си на́шꙋ нищетꙋ̀ пᲂсѣти́въ . тѣ́мъ съ прᲂро́кѡмъ а҆вва́кꙋмᲂмъ зᲂвꙋ̀ , си́лѣ твᲂе́й сла́ва чл҃кᲂлю́бче . Оу҆кра́шьсѧ дᲂбро́тами по́двигъ свᲂи́хъ , ѡ҆дѣ́ѧсѧ во хлами́дꙋ ѿ крᲂве́й свᲂи́хъ и҆стка́вши мч҃нческихъ , и҆ ᲂу҆краси́сѧ дїади́мᲂю пᲂбѣ́ды . тѣ́мже с̾ мч҃нки пред̾ лице́мъ гдⷭ҇нимъ ликꙋ́еши , всебл҃же́нне ѳео́дѡре . Въ темни́цѣ ѡ҆кᲂва́нѣ но́зѣ твᲂѝ желѣ́зᲂмъ , ка́листе непᲂбѣди́ме , мꙋче́нїѧ неле́стнꙋю стезю̀ ше́ствᲂвати , невᲂзбра́ннѡ мᲂлѝ . раз̾рѣ́шьжесѧ мече́мъ ѿ́ тѣла а҆́бїе , любо́вїю свѧза́сѧ зижди́телѧ . Бжⷭ҇твенᲂе во́инство , бг҃ᲂсо́бранныи по́лкъ , ѿ мно́гихъ мѣ́стъ же и҆ градо́въ дво́ица прᲂста̀ страда́лецъ , с̾ четверᲂчи́слеными десѧти́цами ны́нѣ вᲂсїѧ̀ . зако́ннѡ пᲂстрада́вше , и҆ ᲂу҆сѣка́еми в̾ главы̀ , по главѣ̀ всѧ́ческихъ хрⷭ҇тѣ̀ . боⷢ҇ . Ты̀ вѣ́рнымъ пᲂхвала̀ є҆сѝ без̾невѣ́стнаѧ , ты̀ застꙋпле́нїе . ты̀ прибѣ́жище хрⷭ҇тїа́нѡмъ , стѣна̀ и҆ приста́нище . к̾ сн҃ꙋ бо свᲂемꙋ̀ мᲂльбы̀ но́сиши пренепᲂро́чнаѧ , и҆ ѿ бѣ́дъ спаса́еши , и҆́же вѣ́рᲂю и҆ любо́вїю бцⷣꙋ чи́стꙋ тѧ̀ сла́вѧще .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твᲂегѡ̀ свѣ́те незахᲂдѧ́и , пᲂкры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ запᲂвѣде́й ти пꙋтѝ мᲂѧ̀ напра́ви мᲂлю́тисѧ . Прᲂзрѣ̀ вѣнцы̀ , и҆ пребыва́ющꙋю сла́вꙋ ѳео́дѡре , де́рзымъ нра́вᲂмъ стра́ждꙋщимъ с̾ тᲂбо́ю вᲂпїѧ́ше , сме́рти ника́кᲂже не ᲂу҆жаса́йтесѧ . є҆ю́же пᲂма́лѣ весе́лїе и҆ живо́тъ прїи́мемъ несказа́нныи . Снѣда́емь любо́вїю бл҃же́нне влⷣки свᲂегѡ̀ , и҆ ѻ҆гне́мъ ѡ҆палѧ́емь тᲂгѡ̀ жела́нїемъ , мꙋче́нїѧ ча́шꙋ и҆́спилъ є҆сѝ . скве́рнами втᲂры́ми ꙗ҆́же ника́кᲂже ѡ҆сквернѧ́етсѧ , страда́льче всесла́вне ка́листе . Терпѣли́внᲂю мꙋ́дрᲂстїю нра́ва , пе́рвѣе к̾ страда́нїю ᲂу҆стреми́лсѧ є҆сѝ . нача́ло мꙋ́жества , стра́ждꙋщимъ с̾ тᲂбо́ю вᲂдрꙋзи́лъ є҆сѝ ѳео́дѡре . с̾ ни́ми же наслѣ́дствᲂва вѣ́чнаѧ пᲂко́ища , и҆ наслажде́нїе при́снѡ пребыва́ющее . боⷢ҇ . Разрѣше́нїе сᲂгрѣше́нїемъ , твᲂи́ми мл҃твами пᲂда́ждь рабо́мъ сѝ , и҆збавлѧ́ющи си́хъ напа́стей и҆ бѣ́дъ и҆ ско́рбей , и҆ хꙋ́льныхъ є҆рети́къ ѡ҆держа́нїѧ , бцⷣе дв҃о всенепᲂро́чнаѧ .

пѣ́снь , ѕ҃ . і҆рмо́съ . Ѡ҆чи́сти мѧ сп҃се , мно́га бо без̾зако́нїѧ мᲂѧ̀ , и҆ и҆з̾ глꙋбины̀ ѕѡ́лъ вᲂз̾веди́ мѧ мᲂлю́сѧ , к̾ тебѣ́ бо вᲂз̾ва́хъ и҆ ᲂу҆слы́ша мѧ , бж҃е спасе́нїѧ мᲂегѡ̀ . Крᲂве́й твᲂи́хъ тече́нїѧ , рѣко́ю и҆злива́емаѧ , пре́лести те́мныѧ пᲂто́ки и҆з̾сꙋши́ша . вѣ́рнымъ же всѣ́мъ напᲂи́ша срⷣца̀ , дᲂстᲂчꙋ́дне ѳео́дѡре . Ѿ стра́сти глꙋби́нныѧ , вᲂз̾вᲂдѧ̀ свᲂѧ̀ мч҃нки , на ка́мени терпѣ́нїѧ тѣ́хъ ᲂу҆тверди́лъ є҆сѝ . враго́въ стᲂпы̀ , и҆ стро́пᲂтныхъ пꙋте́й , ᲂу҆клᲂни́шасѧ чл҃кᲂлю́бче . Краснѡ̀ ꙗ҆́кᲂже рѣка̀ и҆з̾ є҆де́ма ᲂу҆стреми́вшесѧ , гра́дъ бж҃їи свᲂи́ми крᲂвьмѝ веселꙋ́ете мч҃нцы . нече́стїѧ скве́рнꙋ бл҃гᲂче́стнѡ ѡ҆чи́стивше . боⷢ҇ . Ꙗ҆́кѡ ѡ҆дш҃евле́ныи кїѡ́тъ , закᲂнᲂпᲂлᲂжи́телѧ вмѣсти́ла є҆сѝ . и҆ ꙗ҆́кѡ ст҃а̀ цр҃кви , прїѧ́тъ ст҃а́гѡ бы́вша чл҃ка , за бл҃гᲂдѣѧ́нїе чл҃кѡмъ бцⷣе чи́стаѧ .

кᲂнда́къ . гла́съ , в҃ . Бг҃ᲂꙗ҆вле́нныѧ ѕвѣ́зды вѣ́ры , по хрⷭ҇тѣ̀ ᲂу҆се́рднѡ пᲂстрада́вшїѧ , пᲂхва́льными вѣнцы̀ всѝ вѣнча́емъ , ѡ҆ на́съ мᲂлѧ́щихсѧ хрⷭ҇то́ви . ꙗ҆́кѡ сꙋ́ще стᲂлпы̀ и҆ забра́ла хрⷭ҇тїа́нстѣй ѻ҆́бласти . и҆́кᲂсъ . А҆га́рѧнскꙋю без̾бо́жнꙋю вѣ́рꙋ , и҆ лю́тагѡ бѣ́са пре́лесть , ѿ дш҃и страда́льцы ненави́дѧще и҆ гнꙋша́ющесѧ . и҆ печа́ть хрⷭ҇то́вꙋ бжⷭ҇твенꙋю ѡ҆бнᲂсѧ́ще цѣ́лꙋ в̾ срⷣца́хъ , плещѝ враго́мъ ненави́дѧщимъ тᲂгѡ̀ неда́сте . ᲂу҆се́рднѡ па́че же всѝ за́нь , ꙗ҆́кᲂже а҆́гньцы закала́емы , прᲂсїѧ́сте по кᲂнчи́нѣ ꙗ҆́кѡ сл҃нце , без̾сме́ртнꙋю сла́вꙋ ѡ҆брѣ́тше , ꙗ҆́кѡ стᲂлпы̀ и҆ забра́ла хрⷭ҇тїа́нстѣй держа́вѣ .

пѣ́снь , з҃ . і҆рмо́съ . И҆́же ѿ і҆ꙋде́и , дᲂше́дше ѻ҆́трᲂцы въ вавѷлѡ́нъ дре́вле , вѣ́рᲂю ᲂу҆тверже́нїи , пла́мень пе́щныи пᲂпра́вше гл҃юще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Ꙗ҆́кѡ зако́ннѡ пᲂстрада́въ , пра́вдѣ вѣнца̀ прїѧ́лъ є҆сѝ ѿ є҆ди́нагѡ влⷣки . и҆ нн҃ѣ бжⷭ҇твенᲂю дᲂбро́тᲂю наслажда́ешисѧ ѳео́дѡре . ѻ҆ц҃е́мъ вᲂпїѧ̀ бж҃е бл҃гᲂслᲂве́нъ є҆сѝ . Къ закᲂле́нїю во́лею ꙗ҆́кѡ а҆́гнецъ , на же́ртвꙋ мч҃нче ведо́мъ . и҆ на вы́шнѣй пᲂлᲂжи́сѧ трапе́зѣ же́ртва , пᲂѧ̀ в̾ закᲂле́нїи , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Любвѐ твᲂеѧ̀ сло́ве ѻ҆гне́мъ въ се́рдцы ѡ҆палѧ́емь , те́рнїе ѕлᲂче́стїѧ пᲂпали́лъ є҆́сть мꙋ́ченикъ . вᲂспѣва́етъ тѝ ка́листъ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . И҆сма́илъ сꙋемꙋ́дреныи , бг҃ᲂмꙋ́дрыѧ пᲂвинꙋ́ти , хрⷭ҇та̀ ѿврещи́сѧ мнѣ́въ , пᲂсра́мленъ бы́сть . ті́и бо внегда̀ ᲂу҆́мрети , бл҃гᲂче́стнѡ взыва́хꙋ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . боⷢ҇ . Ѿ дв҃и́ческа чре́ва вᲂпло́щьсѧ , ꙗ҆ви́сѧ на спасе́нїе на́ше . тѣ́мже тѝ мт҃рь вѣ́дꙋще бцⷣꙋ , бл҃гᲂда́рнѡ взыва́емъ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ .

пѣ́снь , и҃ . і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃ᲂчести́вымъ лю́тѣ раз̾жжѐ . си́лᲂю же лꙋ́чшею спасе́ныхъ ви́дѣвъ , твᲂрцꙋ̀ и҆ и҆зба́вителю вᲂпїѧ́ше , дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . Страда́льческїи ли́къ , ра́дᲂстнѡ тѧ̀ прїѧ́тъ мꙋче́нїѧ дᲂбро́тами сїѧ́юща . вᲂздꙋ́хъ ѡ҆ст҃и́сѧ , в̾ вᲂз̾враще́нїе твᲂѐ мч҃нче , и҆ а҆́нг҃льскаѧ сᲂбра̀ мно́жества . зе́млю ѡ҆ст҃ѝ , и҆дѣ́же лежи́тъ тѣ́ло твᲂѐ , ѽ терпѣливᲂмꙋ́дрене , ѳео́дѡре требл҃же́нне . Наслѣ́дїе же гдⷭ҇не бы́въ , и҆ к̾ закᲂле́нїю са́мъ во́лею влеко́мъ , ю҆́же тебѣ̀ вᲂз̾лᲂжи́ти непрїѧ́тъ ка́листе , ѿсѣче́нѣ главѣ̀ ст҃ѣ́й . тѣ́мже вѣнцено́сецъ вᲂз̾ше́дъ , ликꙋ́еши с̾ вы́шними во́инствы во́ вѣки всѧ̀ . Да ᲂу҆блажи́тсѧ ка́листъ , и҆ пᲂхва́ленъ бꙋ́ди ѳео́дѡръ . в̾кꙋ́пѣ с̾ кᲂнстанти́нᲂмъ , чꙋ́дныи ѳеѡ́филъ . васѡ́и крѣ́пкїи , и҆ про́чїи мꙋ́ченическїи ли́къ , со а҆́нг҃льскими и҆гра́ѧ ли́ки , и҆ пᲂѧ̀ немо́лчнѡ , сщ҃е́ннїи вᲂспо́йте лю́дїе , и҆ превᲂзнᲂси́те гдⷭ҇а во́ вѣки . Въ рѣкꙋ̀ в̾ве́ржени мꙋ́ченицы бы́вше сла́внїи , по ме́чнѣмъ тᲂмле́нїи , вᲂлѧ́хꙋ къ приста́нищꙋ бл҃гᲂѡ҆ти́шнᲂмꙋ , є҆́же ѡ҆ хрⷭ҇тѣ̀ ѡ҆сла́бы . во́ды пре́лестныѧ ка́плѧми крᲂве́й и҆з̾сꙋши́вше , пѣ́ти наꙋчи́ша , сщ҃е́ннїи по́йте лю́дїе , и҆ превᲂзнᲂси́те гдⷭ҇а во́ вѣки . боⷢ҇ . Бг҃ᲂрᲂди́тельнице пречⷭ҇таѧ , дш҃и мᲂеѧ̀ ꙗ҆́звы , и҆ грѣхо́вныѧ па́гꙋбы ѡ҆чи́сти . и҆сто́чникѡмъ смѣша́ющи , и҆́же ѿ ре́бръ ржⷭ҇тва́ ти , и҆ и҆́же ѿ ни́хъ ѡ҆чища́ющи вᲂда́ми . къ тебѣ́ бо взыва́ю , и҆ къ тебѣ̀ прибѣга́ю , и҆ тѧ̀ призыва́ю бг҃ᲂра́дᲂваннꙋю .

пѣ́снь , ѳ҃ . і҆рмо́съ . Оу҆диви́сѧ ᲂу҆́бѡ ѡ҆ се́мъ не́бо , и҆ землѝ ᲂу҆жасо́шасѧ кᲂнцы̀ , ꙗ҆́кѡ бг҃ъ ꙗ҆ви́сѧ чл҃кѡмъ пло́тїю , чре́во же твᲂѐ бы́сть прᲂстра́ннѣе нб҃съ , тѣ́мъ тѧ̀ бцⷣе , а҆́нг҃лъ и҆ чл҃къ чинᲂнача́лїѧ велича́емъ . И҆́же дре́вле мꙋ́жествꙋ пᲂревнᲂва́въ страстᲂно́сцемъ , тѣ́хъ и҆ зва́нїѧ и҆ ра́дᲂсти пᲂлꙋчи́лъ є҆сѝ , ѳео́дѡре вᲂи́стинꙋ . но на́съ пᲂмина́й , твᲂрѧ́щихъ твᲂю̀ бл҃гᲂче́стнѡ па́мѧть ст҃ꙋ́ю . ꙗ҆́кѡ и҆мѣ́ѧ дерзнᲂве́нїе ко влⷣцѣ спасти́сѧ на́мъ . Въ вᲂда́хъ і҆ѡрда́нскихъ крⷭ҇ти́выисѧ , кр҃щьшїѧсѧ свᲂи́ми крᲂвьмѝ , и҆ тᲂгѡ̀ сме́рти пᲂревнᲂва́вшїѧ бл҃гᲂче́стнѡ , в̾ рѣцѣ̀ мч҃нки сᲂбра̀ . в̾ве́рженамъ глава́мъ , к̾ тѣлесе́мъ сᲂвᲂкꙋ́пль , и҆ сїѧ̀ в̾ приста́нище наста́вилъ є҆́сть невла́емᲂе . Четверᲂчи́сленаѧ мч҃нкъ бжⷭ҇твенаѧ десѧти́це , с̾ дво́йцею чⷭ҇тно́ю мᲂли́тесѧ , на́ нб҃сѣхъ ны́нѣ живꙋ́ще в̾ ра́дᲂсти , ѡ҆ на́съ мо́лимсѧ , сᲂверша́ющихъ на землѝ , ва́шꙋ всест҃ꙋ́ю и҆ свѣтᲂно́снꙋю па́мѧть , всѧ́кᲂгѡ и҆зба́витисѧ ѡ҆б̾стᲂѧ́нїѧ . боⷢ҇ . Зачала̀ є҆сѝ дв҃о без̾ сѣ́мене , и҆́же всѧ́ческаѧ сᲂзда́вшагѡ сло́ва бж҃їѧ , без̾ пᲂхᲂтѣ́нїѧ плᲂтьска́гѡ , и҆ без̾ тлѧ̀ рᲂдила̀ є҆сѝ , без̾ бᲂлѣ́зни мт҃рьни . тѣ́мъ тѧ̀ бцⷣꙋ , и҆ ꙗ҆зы́кѡмъ и҆ срⷣцемъ и҆спᲂвѣ́дающе велича́емъ .

свѣти́ленъ . Мч҃нкъ кᲂѐ ᲂу҆́бѡ бꙋ́детъ насыще́нїе мч҃нкᲂлю́бцꙋ , па́мѧти бжⷭ҇твеныѧ , ꙗ҆́кᲂже речѐ васи́лїи пре́жде вели́кїи . на́мъ же ны́нѣ пред̾стᲂи́тъ пѣ́ти бжⷭ҇твеныѧ мч҃нки , два̀ и҆ четы́редесѧть , пᲂжда́ннѡ страда́вшїѧ по хрⷭ҇тѣ̀ сп҃сѣ . боⷢ҇ . Премꙋ́дрᲂсть ѵ҆пᲂста́снꙋю , и҆ сло́во пресꙋ́щнᲂе , и҆ врача̀ тѣ́лѡмъ и҆ дш҃а́мъ ро́ждьшаѧ , тече́нїѧ и҆ ꙗ҆́звы дꙋшѝ мᲂеѧ̀ и҆сцѣлѝ , лю́тыѧ и҆ вре́менныѧ . и҆ срⷣца мᲂегѡ̀ ᲂу҆ста́ви бᲂлѣ́зни дв҃о .