7 марта: свв. сщмчч. в Херсоне епископствовавших

МЦⷭ҇А ТОГО́ЖЕ ВЪ З҃ ДН҃Ь

ст҃ы́хъ сщ҃еннᲂмч҃нкъ , и҆́же в̾ херсо́нѣ є҆пкⷭ҇пъ ствᲂвавшихъ : васи́лїѧ , є҆фре́ма , є҆ѵ̾ге́нїѧ , и҆ и҆́же с̾ни́ми . Ве́черъ , на гдⷭ҇и вᲂзва́хъ , стихѣ́ры . гла́съ , д҃ . поⷣ . да́лъ є҆сѝ зна́менїе .= Мч҃нцы непᲂбѣди́мїи ,꙳ і҆єра́рси прехва́льнїи ,꙳ и҆ свѣти́льницы всеми́рнїи .꙳ стᲂлпѝ неѡ҆бᲂри́мїи бжⷭ҇твеныѧ цр҃кве ,꙳ и҆ степе́нь ᲂу҆че́нїемъ ,꙳ и҆ наста́вницы бл҃гᲂчести́выхъ .꙳ и҆ пᲂтреби́телїе льстѝ бы́сте , ѻ҆ц҃ы нб҃ᲂмꙋ́дренїи .꙳ свѣ́тлїи наста́вницы дш҃а́мъ на́шимъ ,꙳ а҆́нг҃лѡмъ сᲂбесѣ́дницы .꙳ трⷪ҇цѣ пᲂбо́рницы . Є҆фре́мъ сла́вныи ,꙳ и҆ васи́лїи бг҃ᲂмꙋ́дрыи ,꙳ и҆ капитѡ́нъ вели́кїи ,꙳ и҆ бжⷭ҇твеныи а҆гафᲂдѡ́ръ ,꙳ со є҆лпиді́емъ , и҆ є҆фе́рїемъ ,꙳ и҆ є҆ѵ̾ге́нїемъ честны́мъ ,꙳ слᲂвесы̀ бжⷭ҇твеными да ᲂу҆бл҃жа́тсѧ ,꙳ прпⷣбно пᲂжи́вшїи ,꙳ и҆ сщ҃е́ннѡ пᲂстрада́вшїи ,꙳ црⷭ҇твїю пᲂказа́шасѧ нбⷭ҇нᲂмꙋ жи́тели . Оу҆мертви́въ мꙋдрᲂва́нїе плᲂтьско́е по́двиги ,꙳ васи́лїе сла́вныи ,꙳ мертвеца̀ вᲂскр҃сѝ ,꙳ призыва́нїемъ бжⷭ҇твенымъ .꙳ капитѡ́нъ же па́ки сщ҃е́нныи па́стырь ,꙳ пᲂсредѝ пла́мене ста̀ ра́дꙋѧсѧ .꙳ ви́дѣнъ бы́сть неѡ҆пали́мь .꙳ тᲂю̀ мл҃твами чл҃кᲂлю́бче ,꙳ ᲂу҆чище́нїе на́мъ да́рꙋй ,꙳ и҆ вели́кꙋю твᲂю̀ млⷭ҇ть . =сла́ва , и҆ ны́нѣ , боⷢ҇ . Скве́рнꙋ ѿмы́й стра́стнагѡ срⷣца мᲂегѡ̀ ,꙳ бцⷣе всепѣ́таѧ .꙳ и҆ всѧ̀ ꙗ҆́звы и҆ гнᲂе́нїѧ сегѡ̀ ,꙳ ꙗ҆́же ѿ грѣха̀ ѡ҆чи́сти чⷭ҇таѧ .꙳ и҆ ᲂу҆ма̀ мᲂегѡ̀ ᲂу҆ста́ви непᲂстᲂѧ́нїе .꙳ ꙗ҆́кѡ да си́лꙋ твᲂю̀ ,꙳ и҆ вели́кᲂе застꙋпле́нїе ,꙳ велича́ю ѻ҆каѧ́нныи ,꙳ и҆ непᲂтре́бныи ра́бъ тво́й . крⷭ҇тᲂбоⷢ҇ . Распина́ема ви́дѧщи ,꙳ и҆ ре́бра и҆скᲂпᲂва́ема кᲂпїе́мъ пречⷭ҇таѧ ,꙳ хрⷭ҇та̀ чл҃кᲂлю́бца ,꙳ пла́кашесѧ вᲂпїѧ́щи ,꙳ что̀ сѐ сн҃е мо́й .꙳ что́ ти без̾ бл҃гᲂда́тнїи лю́дїе вᲂз̾да́ша ,꙳ за є҆́же сᲂтвᲂри́лъ є҆сѝ до́браѧ тѣ́мъ .꙳ и҆спѣши́ши мѧ̀ без̾ча́дствᲂвати вселюбе́зне .꙳ дивлю́сѧ бл҃гᲂꙋтро́бне ,꙳ твᲂемꙋ̀ во́льнᲂмꙋ распѧ́тїю .

На ᲂу҆́трени . ѻ҆́ба кано́на , во ѻ҆кта́и . и҆ ст҃ы́мъ , на д҃ . кано́нъ , є҆мꙋ́же краегране́сїе си́це : седмᲂчи́сленыи па́стыремъ ли́къ пᲂчита́ю . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стᲂпа́ми дре́вле ше́ствᲂвавъ і҆и҃ль , крⷭ҇тᲂѡ҆бра́зно мѡѷсе́ѡвыма рꙋка́ма , а҆мали́кᲂвꙋ си́лꙋ в̾ пꙋсты́ни пᲂбѣди́лъ є҆́сть .

запѣ́въ : Ст҃і́и сщ҃еннᲂмч҃нцы , мᲂли́те бг҃а ѡ҆ на́съ .= Бжⷭ҇твеными свѣтᲂли́тїи мꙋ́ченицы ѡ҆блива́еми , свѣтᲂно́сныи се́й , и҆ свѣ́тлыи пра́здникъ ва́шъ всегда̀ , и҆́же бл҃гᲂче́стнѡ хва́лѧщїѧ , страсте́й мглы̀ и҆зба́вите . Сло́во бж҃їе вᲂпло́щьсѧ . ва́съ пᲂказа̀ всекра́сныѧ па́стыри , тᲂгѡ̀ вᲂз̾вѣсти́ти бжⷭ҇тво̀ , блꙋдѧ́щимъ прпⷣбнїи , и҆ неразꙋ́мїемъ пᲂгиба́ющимъ . Во́дъ живᲂтво́рныхъ дх҃а и҆спᲂлнѧ́емїи , и҆ста́ѧвшихъ жа́ждею лю́тагѡ без̾бо́жїѧ , напᲂи́сте . и҆ к̾ вᲂдѣ̀ сла́внїи спасе́нїѧ наста́висте . =боⷢ҇ . Разрѣши́сѧ прарᲂди́телемъ чⷭ҇таѧ запреще́нїе , па́че ᲂу҆ма̀ ржⷭ҇тво́мъ тѝ пречⷭ҇таѧ . и҆ пе́рвыи вᲂспрїѧ́ша раѧ̀ вхо́дъ , велегла́снѡ вᲂсхвалѧ́ющїи тѧ̀ .

пѣ́снь , г҃ . і҆рмо́съ . Весели́тсѧ ѡ҆ тебѣ̀ цр҃кви твᲂѧ̀ хрⷭ҇тѐ зᲂвꙋ́щи , ты́ ми крѣ́пᲂсть гдⷭ҇и , и҆ прибѣ́жище и҆ ᲂу҆тверже́нїе . Ѻ҆гне́мъ бжⷭ҇твенымъ , ᲂу҆́мъ раз̾жже́гъ васи́лїе премꙋ́дре . ꙗ҆́кᲂже па́стырь и҆зрѧ́денъ , ве́щь без̾бо́жїѧ пᲂпали́лъ є҆сѝ . Дх҃а свѣ́тᲂмъ , и҆́же во тмѣ̀ лю́тыхъ сла́вне , к̾ прᲂсвѣще́нїю привле́клъ є҆сѝ , ст҃а́гѡ кр҃ще́нїѧ . Стезѝ твᲂѧ̀ къ бг҃ꙋ и҆спра́вишасѧ васи́лїе . всѧ̀ ѿ заблꙋжде́нїѧ пꙋтѝ , бл҃гᲂда́тїю к̾ бг҃ᲂразꙋ́мїю ѡ҆брати́ша . боⷢ҇ . И҆збавлѧ́ющагѡ чл҃ки ѿ наси́лїѧ вра́жїѧ , рᲂдила̀ є҆сѝ си́льнагѡ бг҃а , пречⷭ҇таѧ дв҃о всепѣ́таѧ .

сѣда́ленъ . гла́съ , г҃ . Мѵ́рѡмъ бл҃гᲂда́тнымъ сщ҃е́нствᲂвавше , па́стырїе ꙗ҆ви́шасѧ лю́демъ бг҃ᲂмꙋ́дрымъ . и҆ ꙗ҆́кѡ а҆́гньцы чи́сти жре́ни , принесо́стесѧ сло́вꙋ нача́льнᲂмꙋ па́стырю , пᲂже́ршемꙋсѧ ꙗ҆́кѡ ѻ҆вча́ти , мꙋ́ченицы прехва́льнїи , и҆ свѣти́ла всеми́рнаѧ . тѣ́мже тᲂржествꙋ́емъ всѝ , любо́вїю бжⷭ҇твенꙋю па́мѧть ва́шꙋ . сла́ва , и҆ ны́нѣ , боⷢ҇ . Ꙗ҆́кѡ недѣ́ланенъ дв҃о винᲂгра́дъ , прекра́сныи гро́здъ и҆зрасти́ла є҆сѝ , и҆стᲂча́ющь на́мъ вино̀ спасе́нᲂе , всѣ́мъ веселѧ́щее дш҃а и҆ тѣлеса̀ . ѿ ню́дꙋ же ꙗ҆́кѡ винꙋ́ тѧ до́брымъ бл҃жа́ще , при́снѡ со а҆́нг҃лѡмъ вᲂпїе́мъ ти , ра́дꙋисѧ ѡ҆бра́дᲂваннаѧ .= крⷭ҇тᲂбоⷢ҇ . Н=еи҆скꙋсᲂбра́чнаѧ чⷭ҇таѧ и҆ мт҃и твᲂѧ̀ хрⷭ҇тѐ , зрѧ́щи тѧ ме́ртва ви́сима на́ древѣ , мт҃рьски рыда́ющи глаго́лаше , что́ ти вᲂз̾дадѐ , є҆вре́йскїи без̾зако́нныи сᲂбо́ръ без̾благᲂда́тныи ; и҆́же мно́гихъ и҆ вели́кихъ твᲂи́хъ сн҃е мо́й даро́въ наслажде́исѧ . пᲂю́ ти бжⷭ҇твенᲂе с̾хᲂжде́нїе .

пѣ́снь , д҃ . і҆рмо́съ . Вᲂз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свᲂе́мъ , дᲂсто́йнѡ взыва́ющи , сла́ва си́лѣ твᲂе́й гдⷭ҇и . Сщ҃е́нныхъ мч҃нкъ ли́къ да пᲂе́тсѧ , сщ҃е́нїѧ бл҃гᲂда́тїю , и҆ мꙋче́нїѧ ѡ҆зарѧ́емь . и҆ пᲂе́тъ веселѧ́сѧ , сла́ва си́лѣ твᲂе́й гдⷭ҇и . Бг҃ᲂно́снїи ѡ҆кᲂрми́тели цр҃ко́внїи , є҆фре́мъ и҆ а҆гаѳᲂдѡ́ръ , васи́лїи и҆ капитѡ́нъ , є҆фе́рїи , и҆ є҆ѵ̾ге́нїи , и҆ бжⷭ҇твеныи є҆лпиді́и , дх҃ᲂмъ ст҃ы́мъ ꙗ҆ви́шасѧ . Наꙋ́чшесѧ бжⷭ҇твенымъ , ѻ҆ц҃ы бжⷭ҇твенїи , лю́ди в̾ прпⷣбїи и҆ пра́вдѣ по и҆́стинѣ ᲂу҆пасо́сте . и҆ кᲂнчи́нꙋ бл҃же́ннꙋю мꙋче́нїемъ прїѧ́сте . Оу҆мерші́и невѣ́рїемъ , ᲂу҆ме́ршагѡ вᲂста́нїемъ ᲂу҆лꙋчи́ша жи́знь вѣ́чнꙋю . тᲂбо́ю вѣ́рᲂвавше хрⷭ҇тꙋ̀ бг҃ꙋ на́шемꙋ , мч҃нче ѡ҆сщ҃е́нне васи́лїе . боⷢ҇ . Оу҆мерщве́ныѧ ѡ҆живи́ла є҆сѝ чл҃ки , жи́знь ѵ҆пᲂста́снꙋю ро́ждьши дв҃о , па́че всѧ́кїѧ мы́сли хрⷭ҇та̀ бг҃а на́шегѡ , чл҃ка за милᲂсе́рдїе бы́вша .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рᲂю вᲂспѣва́ющїѧ тѧ . Ча́шꙋ чⷭ҇тна́гѡ мꙋче́нїѧ и҆спи́сте , и҆́мѧ гдⷭ҇не бг҃ᲂно́снїи ѻ҆ц҃ы вѣ́рнѡ призыва́юще . И҆́же є҆ди́нъ ме́ртвымъ в̾дыха́ѧи вᲂскрⷭ҇нїе , призыва́нїемъ тѝ ᲂу҆ме́ршагѡ васи́лїе вᲂз̾двиза́етъ , ᲂу҆ѧснѧ́ѧ твᲂѐ прᲂпᲂвѣ́данїе . Равнᲂче́стна ѻ҆ц҃ꙋ , сн҃а прᲂпᲂвѣ́дающе , мнᲂгᲂбо́жнᲂе мꙋчи́тельство и҆́дᲂльскагѡ гнѣ́ва , ѻ҆ц҃ы ѿгна́сте . боⷢ҇ . Бл҃же́ни є҆́сть лю́дїе вѣ́дꙋщїи тѧ̀ пренепᲂро́чнаѧ , влⷣки всѣ́хъ мт҃рь , и҆ любо́вїю ᲂу҆бл҃жа́ющїѧ тѧ̀ .

пѣ́снь , ѕ҃ . і҆рмо́съ . Пᲂжрꙋ́ти со́ гласᲂмъ хвале́нїѧ гдⷭ҇и , цр҃кви вᲂпїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Пᲂхвала́ми а҆гаѳᲂдѡ́ра же и҆ є҆ѵ̾ге́нїѧ , и҆ васи́лїѧ вели́кагѡ , и҆ мꙋ́драгѡ є҆лпиді́ѧ вѣнча́емъ сщ҃е́нники и҆ до́блїѧ сꙋ́ща мч҃нки . Зако́нными вᲂскᲂрмле́нїи дх҃а премꙋ́дрїи , без̾зако́ннꙋющимъ зако́ны спасе́ныѧ пред̾лᲂжи́ша . бл҃гᲂче́стїѧ к̾ прᲂсвѣще́нїю тѣ́хъ привлеко́сте . Ꙗ҆ви́стесѧ ѿ разли́чныхъ гра́дъ ѻ҆вча́та , є҆ди́наго же па́стырѧ лю́дїе , и҆ бжⷭ҇твенагѡ гра́да наслѣ́дницы . в̾ не́мже живꙋ́тъ , и҆́же бг҃ꙋ ᲂу҆го́ждьшїи мч҃нцы . боⷢ҇ . Зако́на тѧ̀ сѣ́нь , прᲂро́къ же гада́нїѧ прᲂѡ҆бража́хꙋ дв҃о , неи҆зрече́ннагѡ сло́ва ржⷭ҇тво̀ и҆мѣ́вшꙋю , спаса́юща ми́ра всенепᲂро́чнаѧ .

пѣ́снь , з҃ . і҆рмо́съ . Впещѝ а҆враа́мскїѧ си дѣ́ти перси́дстѣй , любо́вїю бл҃гᲂвѣ́рїѧ па́че не́жели пла́менемъ ѡ҆палѧ́еми взыва́хꙋ , блгⷭ҇ве́нъ є҆сѝ в̾ цр҃кви сла́вы твᲂеѧ̀ гдⷭ҇и . Ра́дꙋѧисѧ вни́де ѻ҆́ч҃е капитѡ́не в̾ пе́щь , пребы́сть же неѡ҆пали́мь , ꙗ҆́кᲂже ѻ҆́трᲂцы трїѐ . невѣ́рныѧ и҆збавлѧ́ѧ ѻ҆гнѧ̀ бꙋ́дꙋщагѡ , ᲂу҆вѣ́ренныѧ бжⷭ҇твеными тѝ чꙋдесы̀ . Не ᲂу҆страши́всѧ ни ᲂу҆бᲂѧ́всѧ пᲂвелѣ́нїѧ , ѻ҆́ч҃е сщ҃е́нныи капитѡ́не , в̾ сщ҃е́ннꙋю ри́зꙋ ѡ҆блачи́шисѧ . в̾ не́йже ᲂу҆́глїе ѻ҆́гнено нᲂша́ше бл҃же́нне . Пꙋ́ть загради́лъ є҆сѝ неразꙋ́мїѧ , бжⷭ҇твеными слᲂвесы̀ твᲂи́ми . ра́зꙋмъ бл҃гᲂче́стїѧ всѣ́мъ всади́въ , во глꙋбинꙋ̀ пᲂпо́лзшимсѧ и҆́дᲂльскагѡ гнѣ́ва , сщ҃еннᲂдѣ́йствене капитѡ́не бг҃ᲂпᲂсти́жне . боⷢ҇ . Сᲂзда́выи рꙋко́ю є҆́ввꙋ сло́во бж҃їе ѻ҆трᲂкᲂви́це , наз̾да́ти всѣ́хъ вᲂсхᲂтѣ́въ , и҆́з̾ чрева твᲂегѡ̀ зи́ждетсѧ . нача́ло прїе́мъ , и҆́же ѻ҆ц҃ꙋ и҆ дх҃ꙋ сᲂпресто́ленъ .

пѣ́снь , и҃ . і҆рмо́съ . Рꙋ́цѣ распрᲂсте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ ᲂу҆гаси́ша дᲂбрᲂдѣ́телїю пᲂѧ́савшесѧ , и҆́же бл҃гᲂче́стїѧ люби́тели ѻ҆́трᲂцы взыва́юще , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Оу҆мертви́вше бᲂлѣ́зньми пло́ть , жи́знь без̾сме́ртнꙋю и҆схᲂда́таисте ѻ҆ц҃ы прпⷣбнїи , всѣ́мъ и҆́же ме́ртвымъ бᲂгѡ́мъ слꙋжа́щимъ . и҆́же и҆ спа́сшесѧ , прⷭ҇нѡ с̾ ва́ми зᲂвꙋ́тъ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Сᲂгла́снѡ є҆ѵ̾ге́нїѧ вѣ́рнїи и҆ а҆гаѳᲂдѡ́ра , є҆фре́ма и҆ є҆лпиді́ѧ , съ є҆фе́рїемъ вᲂспᲂе́мъ , васи́лїѧ же и҆ капитѡ́на , ꙗ҆́кѡ низ̾лᲂжи́тели врагꙋ̀ , и҆ ст҃ли хрⷭ҇то́вы . є҆мꙋ́же вᲂпїе́мъ , всѧ̀ дѣ́ла бл҃гᲂслᲂви́те гдⷭ҇нѧ гдⷭ҇а . Вᲂз̾весели́лъ є҆сѝ лю́ди ѻ҆́ч҃е є҆фре́ме , свᲂи́ми ᲂу҆че́нїи . и҆ ны́нѣ преше́лъ є҆сѝ к̾ невече́рнемꙋ сїѧ́нїю , и҆ к̾ весе́лїю приснᲂсꙋ́щнᲂмꙋ . свᲂи́хъ трꙋдо́въ вᲂз̾даѧ́нїѧ прїе́млѧ , и҆ взыва́ѧ , всѧ̀ дѣ́ла бл҃гᲂслᲂви́те гдⷭ҇нѧ гдⷭ҇а . По́живъ всебл҃же́нне васи́лїе , на землѝ ꙗ҆́кѡ а҆́нг҃лъ . над̾ страстьмѝ пло́тьскими , ты̀ црⷭ҇твᲂва бл҃гᲂда́тїю . и҆ пре́йде к̾ црⷭ҇твѡмъ нбⷭ҇нымъ , хрⷭ҇тꙋ̀ цр҃ю пред̾стᲂи́ши взыва́ѧ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . боⷢ҇ . Ви́дѣнъ бы́сть ꙗ҆́кѡ чл҃къ , и҆з̾ тебѐ ражда́емь пресꙋ́щественыи , сꙋгꙋ́бь є҆стество́мъ пречⷭ҇таѧ , дѣ́йствы и҆ хᲂтѣ́нїи . и҆́мже ᲂу҆пᲂдо́бисѧ и҆зво́ливъ ꙗ҆влѧ́ѧсѧ . є҆мꙋ́же вᲂпїе́мъ , всѧ̀ дѣ́ла бл҃гᲂслᲂви́те гдⷭ҇нѧ гдⷭ҇а .

пѣ́снь , ѳ҃ . і҆рмо́с̾ . Ка́мень нерꙋкᲂсѣ́чныѧ гᲂры̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , сᲂвᲂкꙋпи́въ раз̾стᲂѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Сщ҃еннᲂмч҃нкъ ст҃ы́хъ , сщ҃е́ннꙋю сᲂверша́юще па́мѧть , пѣ́сньми сщ҃е́нными , прїиди́те всѝ велегла́снѡ тѣ́хъ пᲂчте́мъ , ѡ҆ на́съ мᲂлѧ́щихсѧ всеще́дрᲂмꙋ бг҃ꙋ на́шемꙋ . Ꙗ҆ви́стесѧ ꙗ҆́кѡ честно́е ка́менїе , по землѝ ѿ без̾бо́жныхъ мꙋ́ченицы влеко́ми бжⷭ҇твенїи . и҆ пре́лести ᲂу҆тверже́нїѧ , си́лᲂю бж҃їею сᲂкрꙋша́юще . сегѡ̀ ра́ди дᲂсто́йнѡ ᲂу҆бл҃жа́етесѧ . Дне́сь гра́дъ херсѡ́нь ва́шꙋ па́мѧть пра́зднꙋетъ . семꙋ́ бо ꙗ҆ви́стесѧ стᲂлпы̀ , и҆ бжⷭ҇твена забра́ла и҆ ᲂу҆тверже́нїѧ . па́стырїе и҆ ᲂу҆чи́телїе , и҆ мл҃твеницы бг҃ᲂбл҃же́нїи . Оу҆́же лико́мъ а҆́нг҃льскимъ , ли́къ ѻ҆ц҃ъ причте́сѧ со є҆ѵ̾ге́нїемъ є҆фре́мъ , и҆ капитѡ́нъ . и҆ є҆лпиді́и же и҆ є҆фе́рїи . и҆ васи́лїи сла́вныи , бг҃ᲂмꙋ́дрыи а҆гафᲂдѡ́ръ . боⷢ҇ . Нᲂсѧ́щи хрⷭ҇та̀ на рꙋкꙋ̀ , рꙋко́ю нᲂсѧ́щагѡ всѧ̀ , бг҃ᲂбл҃гᲂда́тнаѧ ѻ҆трᲂкᲂви́ца , дивѧ́щисѧ вᲂпїѧ́ше гл҃ющи , ка́кѡ сн҃а пᲂзнава́ю тѧ , и҆ твᲂрца̀ мᲂегѡ̀ непᲂсти́жимагѡ .

<< Previous

Contents

Next >>