МЦⷭ҇А ТОГО́ЖЕ ВЪ И҃ ДН҃Ь

прпⷣбнагѡ ѻ҆ц҃а на́шегѡ ѳеᲂфила́кта , а҆рхїєпкⷭ҇па никᲂмиді́йскагѡ . Ве́черъ , на гдⷭ҇и вᲂзва́хъ , стихѣ́ры . гла́с̾ , а҃ . поⷣ . прехва́льнїи мч҃нцы .= Ѻ҆́ч҃е ѳеᲂфила́кте ,꙳ бж҃їими стражба́ми сᲂблюда́емь ,꙳ сᲂхране́нъ бы́сть невреди́мъ .꙳ и҆ сто́лпъ непᲂкᲂлѣби́мъ цр҃кви ꙗ҆ви́сѧ ,꙳ и҆скꙋше́ньми непрекло́ненъ ,꙳ є҆рети́ческихъ кᲂзне́й .꙳ и҆ ны́нѣ мᲂли́сѧ ,꙳ дарᲂва́ти дш҃а́мъ на́шимъ ,꙳ ми́ръ и҆ ве́лїю ми́лᲂсть . Ѻ҆́ч҃е ѳеᲂфила́кте ,꙳ бг҃а ны́нѣ зрѧ̀ бл҃же́нне ,꙳ ꙗ҆́кѡ пᲂсти́жно и҆ ви́димо .꙳ сᲂє҆дине́нїемъ лꙋ́чшимъ наслажда́ѧсѧ сегѡ̀ ,꙳ и҆ прича́стїемъ ѡ҆бᲂжа́емь .꙳ є҆ди́нагѡ жела́ннагѡ и҆ бл҃же́ннагѡ ,꙳ ра́дꙋѧсѧ прїѧ́лъ є҆сѝ і҆єра́рхе всече́стне ,꙳ со а҆́нг҃лы ны́нѣ вᲂд̾вᲂрѧ́ѧсѧ . Ѻ҆́ч҃е ѳеᲂфила́кте ,꙳ ѿ землѝ преста́вльсѧ ,꙳ вᲂсте́клъ є҆сѝ к̾ нб҃сѝ .꙳ и҆ в̾ нбⷭ҇ныхъ жи́ти селе́нїихъ спᲂдо́билсѧ є҆сѝ бл҃же́нне ,꙳ прᲂгна́нїѧ ра́ди ,꙳ є҆́же за хрⷭ҇та̀ претерпѣ́лъ є҆сѝ .꙳ є҆го́же ны́нѣ мᲂлѝ ,꙳ дарᲂва́ти дш҃а́мъ на́шимъ ,꙳ ми́ръ и҆ ве́лїю млⷭ҇ть . =сла́ва , и҆ ны́нѣ , боⷢ҇ . Недꙋ́гᲂвавшꙋю прест҃а́ѧ лю́тѣ ,꙳ дш҃ꙋ мᲂю̀ стрⷭ҇тьмѝ лꙋка́выми и҆сцѣлѝ .꙳ ꙗ҆́же цѣли́телѧ и҆ сп҃са ꙳ всѣ́мъ хрⷭ҇та̀ ро́ждьши .꙳ всѧ́кꙋ ꙗ҆́҆́зю ꙳ и҆сцѣли́вшагѡ ᲂу҆ѧ́звленᲂмꙋ ,꙳ дїа́вᲂльскагѡ ѕлᲂмы́слїѧ ,꙳ и҆ сме́рти на́съ и҆змѣ́ньшагѡ .= крⷭ҇тᲂбоⷢ҇ . С=вᲂегѡ̀ а҆́гньца ,꙳ а҆́гница и҆ непᲂро́чнаѧ влⷣчца ,꙳ на крⷭ҇тѣ̀ ꙗ҆́кѡ ᲂу҆зрѣ̀ ,꙳ видѣ́нїѧ не и҆мꙋ́ща ни дᲂбро́ты ,꙳ ᲂу҆вы̀ мнѣ̀ рыда́ющи гл҃аше .꙳ гдѣ́ ти дᲂбро́та за́йде пресла́дкїи ;꙳ гдѣ̀ бл҃гᲂлѣ́пїе ,꙳ гдѣ̀ бл҃гᲂда́ть ѡ҆блиста́ющаѧ зра́ка твᲂегѡ̀ ,꙳ сн҃е мо́й вселюбе́зныи .

На ᲂу҆́трени . ѻ҆́ба кано́на , во ѻ҆кта́и . и҆ ст҃о́мꙋ , на д҃ . кано́нъ , є҆мꙋ́же краегране́сїе си́це : бжⷭ҇твенагѡ ѳеᲂфила́кта в̾ пѣ́снехъ вᲂсхвалю̀ . твᲂре́нїе ѳеѡ́фанᲂво . гла́съ , и҃ . пѣ́снь , а҃ . і҆рмо́съ . Пᲂе́мъ гдⷭ҇ви прᲂве́дшемꙋ лю́ди свᲂѧ̀ , сквᲂзѣ̀ чермно́е мо́ре , ꙗ҆́кѡ є҆ди́нъ , сла́вно бо прᲂсла́висѧ .

запѣ́въ : Прпⷣбне ѻ҆́ч҃е ѳеᲂфила́кте , мᲂлѝ бг҃а ѡ҆ на́съ .= Прⷭ҇то́лꙋ влⷣчню , ѻ҆́ч҃е бг҃ᲂно́се ѳеᲂфила́кте пред̾стᲂѧ̀ , и҆́же вѣ́рᲂю с̾верша́ющихъ па́мѧть твᲂю̀ сᲂхранѧ́й . Пᲂма́за тѧ дᲂсто́йнѡ бл҃гᲂда́ть дх҃а прест҃а́гѡ , и҆́стины ра́ди пребᲂга́те , и҆ нра́въ твᲂи́хъ дѣ́лѧ бл҃гᲂсти . Да нбⷭ҇ныхъ бл҃же́нне пᲂлꙋчи́ши , землена́ѧ пᲂпра́лъ є҆сѝ всѧ̀ , и҆ хрⷭ҇тꙋ̀ бг҃ꙋ пᲂслѣ́дᲂвалъ є҆сѝ . =боⷢ҇ . Ве́сь жела́нїе , и҆́же и҆́з̾ чрева твᲂегѡ̀ бг҃ᲂневѣ́стнаѧ , бл҃гᲂи҆зво́ливъ рᲂди́тисѧ . сла́дᲂсть є҆́сть , и҆ свѣ́тъ невече́рнїи .

пѣ́снь , г҃ . і҆рмо́съ . Ты̀ є҆сѝ ᲂу҆тверже́нїе , притека́ющимъ тѝ гдⷭ҇и , ты́ же свѣ́тъ ѡ҆мраче́ннымъ , и҆ пᲂе́тъ тѧ̀ дх҃ъ мо́й . Зако́нᲂмъ ты̀ пᲂвинꙋ́ѧсѧ влⷣки свᲂегѡ̀ , сла́вне а҆рхїєре́ю , ѡ҆ зако́нѣ ца́рь без̾зако́нныхъ небре́глъ є҆сѝ . Бжⷭ҇твенᲂе и҆з̾ѡ҆браже́нїе хрⷭ҇то́во , и҆ пречи́стᲂе пᲂчита́ше че́стнѣ . нече́ствꙋющихъ нече́стїѧ ѿмѣта́ѧсѧ . Претерпѣ́лъ є҆сѝ мꙋче́нїе со́вѣсти пе́рвїе по́стнически , и҆ ны́нѣ мч҃нческимъ ᲂу҆вѧзе́сѧ вѣнце́мъ . боⷢ҇ . Да стезю̀ влⷣко к̾ ст҃ы́ни ведꙋ́щꙋю , пᲂка́жеши на́мъ . во ᲂу҆тро́бꙋ пречⷭ҇тꙋю , прест҃о всели́лсѧ є҆сѝ .

сѣда́ленъ . гла́съ , и҃ . Пᲂсти́всѧ прпⷣбне ѻ҆́ч҃е мꙋ́дре , ст҃ль пᲂма́засѧ , сщ҃еннᲂдѣ́йствᲂвати бжⷭ҇твена та́инства , дш҃а́мъ на ᲂу҆стрᲂе́нїе . хрⷭ҇то́вꙋ же и҆ко́нꙋ пᲂче́тъ , претерпѣ́лъ є҆сѝ и҆згна́нїѧ и҆ ско́рби , и҆ мнᲂгᲂвре́менно затвᲂре́нїе . тѣ́мже по кᲂнчи́нѣ и҆стᲂча́ѧ и҆сцѣле́нїѧ , цѣли́ши стра́ждꙋщихъ , и҆ прᲂсвѣща́еши пᲂю́щихъ ст҃лю ѳеᲂфила́кте . мᲂлѝ хрⷭ҇та̀ бг҃а , грѣхо́мъ ѡ҆ставле́нїе пᲂда́ти , чтꙋ́щимъ любо́вїю ст҃ꙋ́ю па́мѧть твᲂю̀ .= сла́ва , и҆ ны́нѣ , боⷢ҇ . Въ напа́сти мнᲂгᲂплете́нныѧ впа́дъ , ѿ вра́гъ ви́димыхъ и҆ неви́димыхъ , вᲂлне́нїемъ ѡ҆держи́мь є҆́смь , без̾мѣ́рныхъ сᲂгрѣше́нїи мᲂи́хъ , ꙗ҆́кѡ къ те́плᲂмꙋ застꙋпле́нїю , и҆ пᲂкро́вꙋ мᲂемꙋ̀ пречⷭ҇таѧ , приста́нищꙋ притека́ю твᲂеѧ̀ бл҃гᲂсти . ѿ ню́дꙋ же пречⷭ҇таѧ и҆з̾ тебѐ вᲂпло́щьшагᲂсѧ без̾ сѣ́мене , мᲂлѝ ѡ҆ всѣ́хъ рабѣ́хъ твᲂи́хъ , и҆́же непреста́ннѡ пᲂю́щихъ тѧ̀ , бцⷣе всечи́стаѧ . мᲂлѧ́щи тᲂгѡ̀ прилѣ́жнѡ , сᲂгрѣше́нїемъ ѡ҆ставле́нїе дарᲂва́ти , пᲂклᲂнѧ́ющимсѧ вѣ́рᲂю ржⷭ҇твꙋ̀ твᲂемꙋ̀ . =крⷭ҇тᲂбоⷢ҇ . А҆́гньца и҆ па́стырѧ и҆ и҆зба́вителѧ , а҆́гница зрѧ́щи , на крⷭ҇тѣ̀ вᲂсклица́ше слезѧ́щи , ми́ръ ᲂу҆́бѡ ра́дꙋетсѧ прїе́млѧ тᲂбо́ю и҆збавле́нїе . ᲂу҆тро́ба же мᲂѧ̀ гᲂри́тъ зрѧ́щи твᲂѐ распѧ́тїе , є҆́же терпи́ши за милᲂсе́рдїе ми́лᲂсти дᲂлгᲂтерпѣли́ве гдⷭ҇и . ми́лᲂсти бе́здно , и҆ и҆сто́чниче неи҆счерпа́емыи , ᲂу҆милᲂсе́рдисѧ и҆ да́рꙋй грѣхо́въ ѡ҆ставле́нїе , и҆́же вѣ́рᲂю твᲂѧ̀ вᲂспѣва́ющимъ бжⷭ҇твенаѧ страда́нїѧ .

пѣ́снь , д҃ . і҆рмо́съ . Оу҆слы́шахъ гдⷭ҇и смᲂтре́нїѧ твᲂегѡ̀ та́инство , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . Не ᲂу҆страши́сѧ ѻ҆гнѧ̀ и҆скꙋше́нїи , всеблаже́нне бг҃ᲂдх҃нᲂве́нне . ни раз̾сла́би си́лꙋ твᲂю̀ пи́щнаѧ сла́дᲂсть , ѳеᲂфила́кте . Храни́ло твᲂи́мъ ᲂу҆сто́мъ пᲂлᲂжѝ бг҃ъ , и҆ ᲂу҆стна́ма прпⷣбне . тѣ́мже пре́былъ є҆сѝ непᲂкᲂлѣби́мъ , нечести́вымъ ста́вшимъ прᲂти́вꙋ тебѐ . Терпѧ̀ претерпѣ́лъ є҆сѝ и҆́же на ка́мени но́зѣ твᲂѝ пᲂста́вльшагѡ , и҆ внѧ́тъ тебѣ̀ вы́шнїи , тᲂгѡ̀ ѻ҆́бразꙋ пᲂкло́ньшꙋсѧ . боⷢ҇ . И҆зба́вльшесѧ ржⷭ҇тво́мъ ти , грѣхо́внагѡ до́лга пренепᲂро́чнаѧ , ра́дᲂстнѡ вᲂспѣва́нїе вᲂз̾сыла́емъ ти , бг҃ᲂневѣ́стнаѧ .

пѣ́снь , є҃ . і҆рмо́съ . Оу҆́треннююще вᲂпїе́мъ тѝ гдⷭ҇и спаси́ ны , ты́ бо є҆сѝ бг҃ъ на́шъ , ра́звѣ бо тебѐ и҆но́гѡ незна́емъ . Рꙋ́цѣ твᲂѝ прпⷣбно бг҃ᲂдх҃нᲂве́нне , к̾ зижди́телю ѻ҆́ч҃е вᲂз̾дѣва́емѣ , нечести́выѧ пᲂбѣди́стѣ . Держа́въ рꙋ́кꙋ твᲂю̀ вы́шнїи , бг҃ᲂно́се ѻ҆́ч҃е , наста́вилъ є҆́сть къ нбⷭ҇нᲂмꙋ наслажде́нїю . Стезю̀ тѣ́снꙋю ѳеᲂфила́кте ше́ствᲂвавъ , к̾ ширᲂтѣ̀ дᲂсти́глъ є҆сѝ раѧ̀ чꙋ́дне . боⷢ҇ . И҆́же тѧ̀ бцⷣꙋ невѣ́дꙋщїи бг҃ᲂмт҃и , свѣ́та не и҆́мꙋтъ ви́дѣти , ро́ждьшагᲂсѧ и҆з̾ тебѐ пречⷭ҇таѧ .

пѣ́снь , ѕ҃ . і҆рмо́съ . Ри́зꙋ ми пᲂда́ждь свѣ́тлꙋ , ѡ҆дѣѧ́исѧ свѣ́тᲂмъ ꙗ҆́кѡ ри́зᲂю , мнᲂгᲂмлⷭ҇тиве хрⷭ҇тѐ бж҃е на́шъ . Оу҆мертви́въ чꙋ́вствїѧ вᲂз̾держа́ннѡ , над̾ стрⷭ҇тьмѝ црⷭ҇твᲂвалъ є҆сѝ . и҆ нн҃ѣ ѳеᲂфила́кте , без̾стрⷭ҇тїѧ наслажда́ешисѧ свѣтлᲂстьмѝ . Ѻ҆́бразꙋ сп҃сᲂвꙋ пᲂклᲂнѧ́тисѧ , всѣ́хъ наꙋчи́лъ є҆сѝ . дѣ́лы и҆ ᲂу҆че́нїи прᲂсїѧ́въ ꙗ҆́вѣ , ѳеᲂфила́кте . Ѻ҆́блакъ тѧ̀ тꙋ́чꙋ жи́зни и҆стᲂча́ющь , хрⷭ҇то́съ пᲂказа̀ ѻ҆́ч҃е , ст҃лю бж҃їи ѳеᲂфила́кте . боⷢ҇ . Красе́нъ па́че всѣ́хъ чл҃къ , сн҃ъ тво́й пречⷭ҇таѧ , дᲂбро́тᲂю бжⷭ҇тва̀ . а҆́ще и҆ пло́ть на́съ ра́ди бы́сть .

пѣ́снь , з҃ . і҆рмо́съ . Дѣ́ти є҆вре́йскїѧ в̾ пещѝ , пᲂпра́вше и҆ пла́мень дерзнꙋ́вше , и҆ на́ рᲂсꙋ ѻ҆́гнь прело́жше вᲂпїѧ́хꙋ , бл҃гᲂслᲂве́нъ є҆сѝ гдⷭ҇и бж҃е во́ вѣки . Тече́нїе бжⷭ҇твенᲂе сᲂверши́въ , и҆ вѣ́рꙋ свᲂю̀ сᲂблю́дъ до кᲂнца̀ . свᲂи́хъ бᲂлѣ́зней мꙋ́дре , прїѧ́лъ є҆сѝ вѣне́цъ , зᲂвы́и , бл҃гᲂслᲂве́нъ є҆сѝ гдⷭ҇и бж҃е во́ вѣки . На кᲂлесни́цꙋ бжⷭ҇твеныхъ дᲂбрᲂдѣ́телей всѣ́дъ , к̾ высᲂтѣ̀ вᲂзнесе́сѧ . бг҃ᲂви же ны́нѣ пред̾стᲂи́ши , зᲂвы́и , бл҃гᲂслᲂве́нъ є҆сѝ гдⷭ҇и бж҃е во́ вѣки . Вѣ́дѣ сᲂзда́выи є҆ди́нъ срⷣца̀ чл҃кѡмъ бг҃ᲂно́сне , срⷣца твᲂегѡ̀ бжⷭ҇твенагѡ , и҆ на прⷭ҇то́лѣхъ ᲂу҆че́нїѧ пᲂсадѝ , ѳеᲂфила́кте требл҃же́нне . боⷢ҇ . Тебѣ̀ ны́нѣ прибѣга́ю бцⷣе , и҆ пᲂкро́вꙋ твᲂемꙋ̀ , и҆ бжⷭ҇твенᲂмꙋ застꙋпле́нїю , и҆зба́витисѧ ѿ бѣ́дъ и҆ прегрѣше́нїй мᲂлю́сѧ , бл҃гᲂслᲂве́наѧ пречⷭ҇таѧ , ꙗ҆́же бг҃а пло́тїю ро́ждьшаѧ .

пѣ́снь , и҃ . і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃ᲂчести́вымъ лю́тѣ раз̾жжѐ . си́лᲂю же лꙋ́чшею спасе́ныхъ ви́дѣвъ , твᲂрцꙋ̀ и҆ и҆зба́вителю вᲂпїѧ́ше , дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . И҆дѣ́же веселѧ́щимсѧ жили́ще , ны́нѣ в̾се́льсѧ и҆спᲂвѣ́дниче , и҆ и҆́стинѣ пᲂбо́рниче . и҆ свѣ́тъ тебѣ̀ вᲂсїѧ̀ , ꙗ҆́кᲂже пра́ведникꙋ премꙋ́дре , и҆ мч҃нческїѧ пᲂстрада́вшꙋ по́двиги . с̾ ни́ми же взыва́еши , сщ҃е́ннїи по́йте лю́дїе , и҆ превᲂзнᲂси́те гдⷭ҇а во́ вѣки . Терпѣ́нїѧ вѣне́цъ прїѧ́тъ бг҃ᲂпᲂсти́жне , во и҆з̾гна́нїѧ бо го́рька все́льсѧ , мзды̀ ѡ҆жида́ѧ вᲂспрїѧ́ти страда́нїемъ сѝ , и҆ бл҃гі́ѧ непᲂгрѣшѝ наде́жды . хрⷭ҇то́ви нн҃ѣ взыва́ѧ , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . Свѣтᲂѧвле́нна па́мѧть твᲂѧ̀ , бг҃ᲂно́се сᲂверша́етсѧ ны́нѣ , и҆спᲂвѣ́данїѧ свѣ́тᲂмъ свѣтѧ́щисѧ . ст҃ы́и бо ѻ҆́бразъ хрⷭ҇то́въ пᲂче́лъ є҆сѝ , и҆ бцⷣы , и҆ ст҃ы́хъ всѣ́хъ . с̾ ни́ми же ны́нѣ пᲂе́ши , сщ҃е́ннїи вᲂспо́йте лю́дїе , и҆ превᲂзнᲂси́те гдⷭ҇а во́ вѣки . боⷢ҇ . Бг҃ᲂмт҃и пречⷭ҇таѧ , дш҃и мᲂеѧ̀ ꙗ҆́звы и҆ грѣхо́внаѧ гнᲂе́нїѧ ѡ҆чи́сти . бг҃а ро́ждьшаѧ , и҆́же над̾ всѣ́ми ѻ҆трᲂкᲂви́це чи́стаѧ , ѿ дв҃ческихъ неи҆скꙋсᲂбра́чнаѧ лᲂже́снъ . є҆го́же дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те во всѧ̀ вѣ́ки .

пѣ́снь , ѳ҃ . і҆рмо́съ . Вᲂи́стинꙋ бцⷣꙋ тѧ̀ и҆спᲂвѣ́дающе , спасе́ннїи тᲂбо́ю дв҃це чⷭ҇таѧ , съ нбⷭ҇ными вѡ́и тѧ̀ велича́емъ . Вели́кимъ дарᲂва́нїемъ ѻ҆́ч҃е спᲂдо́бисѧ . по хрⷭ҇тѣ̀ бѣды̀ прїе́мъ ᲂу҆мо́мъ терпѣли́вымъ , бг҃ᲂно́се и҆ бг҃ᲂбл҃же́нне . На́съ пᲂю́щихъ тѧ̀ бл҃же́нне призира́ѧ , ѿ напа́стей и҆ бѣ́дъ и҆збавлѧ́й . є҆рети́ческаѧ низ̾лага́ѧ кᲂва́рства . Цѣлᲂмꙋ́дренѡ и҆ пра́веднѡ , ꙗ҆́кѡ сщ҃е́нникъ ꙗ҆вле́нъ по́живъ мч҃нче , бы́сть свѣ́телъ . багрѧни́цꙋ себѣ̀ и҆стка́въ , ѿ крᲂве́й свᲂи́хъ . боⷢ҇ . Ꙗ҆́кѡ ᲂу҆́тро сꙋ́щимъ во тмѣ̀ , и҆ заблꙋ́ждьшимъ пра́вдѣ сл҃нце и҆мꙋ́щи , на рꙋкꙋ̀ держа́щи дв҃о хрⷭ҇та̀ вᲂсїѧ́ла є҆сѝ .