Бг҃ᲂро́дичны вᲂскрⷭ҇ны , на ѻ҆́смь гласо́въ . пᲂе́мыѧ ве́черъ , на гдⷭ҇и вᲂзва́хъ . и҆ на стихо́внахъ , и҆́же ѿ а҆лфави́тъ . боⷢ҇ . гла́съ , а҃ . Всеми́рнꙋю сла́вꙋ ѿ чл҃къ прᲂзѧ́бшꙋю , и҆ влⷣкꙋ ро́ждьшꙋю , нбⷭ҇нꙋю две́рь вᲂспᲂе́мъ мр҃і́ю дв҃цꙋ , беспло́тнымъ пѣ́снь , и҆ вѣ́рнымъ ᲂу҆дᲂбре́нїе . та́бо ꙗ҆ви́сѧ нб҃о и҆ цр҃кви бжⷭ҇твеннаѧ . та̀ прегражде́нїе вражды̀ разрꙋши́вши , смире́нїе в̾ведѐ и҆ црⷭ҇тво ѿве́рзе . тᲂѧ̀ ᲂу҆́бѡ и҆мꙋ́щи вѣ́рнᲂе ᲂу҆тверже́нїе , пᲂбо́рника и҆́мамы , и҆з̾ неѧ̀ ро́ждьшагᲂсѧ гдⷭ҇а . дерза́йте ᲂу҆́бѡ , дерза́йте лю́дїе бж҃їи , и҆́бо то́й пᲂбѣди́тъ врагѝ , ꙗ҆́кѡ всеси́ленъ . на стихо́внѣ , боⷢ҇ . Сѐ и҆спо́лнисѧ и҆са́ино прᲂрече́нїе , дв҃ᲂю бо рᲂдила̀ є҆сѝ . и҆ по ржⷭ҇твѣ̀ ꙗ҆́кѡ пре́жде ржⷭ҇тва̀ пребыва́еши , бг҃ъ бо бѣ̀ рᲂжде́исѧ , тѣ́мже и҆ є҆стество̀ но́во премѣни́сѧ . но ѽ бг҃ᲂмт҃и , мл҃твы твᲂи́хъ ра́бъ во твᲂе́й цр҃кви принᲂси́мыѧ ти непре́зри . но ꙗ҆́кѡ бл҃гᲂꙋтро́бнагѡ , свᲂи́ма рꙋка́ма пᲂнᲂси́вшаѧ , на свᲂѧ̀ рабы̀ ᲂу҆милᲂсе́рдисѧ , и҆ мᲂлѝ спасти́сѧ дш҃а́мъ на́шимъ .

на гдⷭ҇и вᲂзва́хъ . боⷢ҇ . гла́съ , в҃ . Пре́йде сѣ́нь зако́ннаѧ , бл҃гᲂда́ти прише́дши , ꙗ҆́кᲂже бо кꙋпина̀ не с̾гара́ше , распала́ющисѧ . та́кѡ и҆ дв҃аѧ рᲂдила̀ є҆́сть , и҆ дв҃ᲂю пребы́сть . в̾мѣ́стѡ стᲂлпа̀ ѻ҆́гненнагѡ , пра́веднᲂе вᲂзсїѧ̀ сл҃нце . в̾мѣ́стѡ мѡѷсе́ѧ хрⷭ҇то́съ , во спасе́нїе дш҃а́мъ на́шимъ . на стихо́внѣ , боⷢ҇ . Ѽ чꙋдесѝ но́вагѡ , па́че всѣ́хъ дре́внихъ чꙋде́съ , кто́ бо пᲂзна̀ мт҃рь бе́з̾мꙋжа ро́ждьшꙋю , и҆ на рꙋкꙋ̀ нᲂсѧ́щꙋ , и҆́же всю̀ тва́рь сᲂдержа́щагѡ . бж҃їе є҆́сть сло́во ро́ждьшесѧ . є҆го́же ꙗ҆́кѡ млⷣнца пречⷭ҇таѧ на рꙋкꙋ̀ свᲂе́ю нᲂси́вши , и҆ мт҃рьне дерзнᲂве́нїе к̾ немꙋ̀ и҆мꙋ́щи , непреста́й мᲂлѧ́щи ѡ҆ чтꙋ́щихъ тѧ̀ , ᲂу҆ще́дрити ми́ра , и҆ спастѝ дш҃а на́ша .

на гдⷭ҇и вᲂзва́хъ . боⷢ҇ . гла́съ , г҃ . Ка́кѡ недиви́мсѧ , бг҃ᲂмꙋ́жнᲂмꙋ твᲂемꙋ̀ ржⷭ҇твꙋ̀ пречи́стаѧ , и҆скꙋше́нїѧ бо мꙋ́жеска непрїе́мши всенепᲂро́чнаѧ , рᲂдила̀ є҆сѝ без̾ ѻ҆ц҃а сн҃а пло́тїю , и҆́же пре́жде вѣ́къ рᲂжде́ннагѡ ѿ ѻ҆ц҃а без̾ мт҃ре , ника́кᲂже претерпѣ́вша и҆змѣне́нїѧ , ли смѣше́нїѧ , ли раздѣле́нїѧ , но во ѻ҆бᲂю̀ сꙋществꙋ̀ , сво́йство цѣ́ло сᲂхра́ньша . тѣ́мже мт҃и дв҃о влⷣчце , тᲂгѡ̀ мᲂлѝ спастѝ дш҃а , и҆́же правᲂсла́внѡ , бцⷣꙋ тѧ̀ и҆спᲂвѣ́дающихъ . на стихо́внѣ , боⷢ҇ . Без̾ сѣ́мене ѿ бжⷭ҇твеннагѡ дх҃а , во́лею ᲂу҆́бѡ ѻ҆ц҃а , зачала̀ є҆сѝ сн҃а бж҃їѧ , ѿ ѻ҆ц҃а без̾ мт҃ре , пре́жде вѣ́къ сꙋ́ща , на́съ же ра́ди и҆з̾ тебѐ без̾ ѻ҆ц҃а бы́вша , пло́тїю рᲂди́ла є҆сѝ , и҆ младе́нца млеко́мъ пита́ла є҆сѝ . тѣ́мже непреста́й мᲂлѧ́щи , и҆зба́витисѧ ѿ бѣ́дъ дш҃а́мъ на́шимъ .

на гдⷭ҇и вᲂзва́хъ . боⷢ҇ . гла́съ , д҃ . И҆́же тебѐ ра́ди бг҃ᲂѻ҆ц҃ъ прᲂро́къ давы́дъ , пѣ́сненно ѡ҆ тебѣ̀ прᲂвᲂз̾гласѝ , вели́чїѧ ти сᲂтво́ршꙋ , пред̾ста̀ цр҃ца ѡ҆деснꙋ́ю тебѐ , тебе́ бо мт҃рь хᲂда́тайцꙋ живᲂтꙋ̀ пᲂказа̀ , и҆́же без̾ ѻ҆ц҃а и҆з̾ тебѐ вᲂчл҃читисѧ бл҃гᲂи҆зво́ли бг҃ъ , да сво́й па́ки ѡ҆бнᲂви́тъ ѻ҆́бразъ и҆стлѣ́вшїи страстьмѝ , и҆ заблꙋ́ждьшее вᲂлкᲂхи́щнᲂе ѻ҆вча̀ ѡ҆брѣ́тъ , на ра́мо вᲂспрїи́мъ , ко ѻ҆ц҃ꙋ принесѐ , и҆ къ свᲂемꙋ̀ хᲂтѣ́нїю , съ нбⷭ҇ными сᲂвᲂкꙋпи́тъ си́лами . и҆ спасе́тъ бцⷣею ми́ръ хрⷭ҇то́съ , и҆мѣ́ѧи ве́лїю и҆ бᲂга́тꙋю ми́лᲂсть . на стихо́внѣ , боⷢ҇ . Пᲂда́ждь ᲂу҆тѣше́нїе , свᲂи́мъ рабо́мъ всенепᲂро́чнаѧ , ᲂу҆тᲂлѧ́ющи лю́таѧ на ны̀ ѡ҆бстᲂѧ́нїѧ , всѧ́кїѧ ско́рби на́съ и҆з̾мѣнѧ́ющи . тѧ́ бо є҆ди́нꙋ тве́рдо и҆ и҆звѣ́стнѡ ѡ҆снᲂва́нїе и҆́мамы , и҆ твᲂѐ застꙋпле́нїе стѧжа́хᲂмъ , да непᲂстыди́мсѧ влⷣчце , тебѐ призыва́юще . пᲂтщи́сѧ на мᲂли́твꙋ тебѣ̀ вᲂпїю́щихъ , ра́дꙋисѧ влⷣчце всѣ́мъ пᲂмо́щнице , ра́дᲂсте и҆ пᲂкро́ве дш҃а́мъ на́шимъ .

на гдⷭ҇и вᲂзва́хъ . боⷢ҇ . гла́съ , є҃ . Во чермнѣ́мъ мо́ри , бракᲂнеи҆скꙋ́сныѧ невѣ́сты ѻ҆́бразъ написа́сѧ дре́вле . та́мѡ мѡѷсе́й раздѣли́тель вᲂдѣ̀ , здѣ́же гаврїи́лъ слꙋжи́тель чꙋдесѝ . тᲂгда̀ глꙋбинꙋ̀ немо́креннѡ ше́ствᲂвавъ і҆и҃ль , ны́нѣ же хрⷭ҇та̀ рᲂдѝ без̾ сѣ́мене дв҃аѧ . мо́ре по прᲂше́ствїи і҆и҃левѣ , пребы́сть непрᲂхᲂди́мѡ . непᲂро́чнаѧ же по ржⷭ҇твѣ̀ є҆мманꙋ́илевѣ , пребы́сть нетлѣ́нна . сы́и пре́жде сы́и , ꙗ҆вле́исѧ ꙗ҆́кѡ чл҃къ , бж҃е пᲂми́лꙋй на́съ . на стихо́внѣ , боⷢ҇ . Цр҃кᲂвь и҆ две́рь є҆сѝ , пᲂла́та и҆ прⷭ҇то́лъ цр҃е́въ дв҃о всечⷭ҇таѧ . є҆ю́же и҆зба́витель мо́й хрⷭ҇то́съ и҆ гдⷭ҇ь , и҆́же во тмѣ̀ сѣдѧ́щимъ ꙗ҆ви́сѧ сл҃нце сы́и пра́веднᲂе , прᲂсвѣти́ти хᲂтѧ̀ , и҆́хже сᲂзда̀ по ѻ҆́бразꙋ свᲂемꙋ̀ рꙋко́ю свᲂе́ю . тѣ́мже всепѣ́таѧ , ꙗ҆́кѡ мт҃рьне дерзнᲂве́нїе к̾ немꙋ̀ стѧжа́вши , непреста́ннѡ мᲂлѝ спасти́сѧ дш҃а́мъ на́шимъ .

на гдⷭ҇и вᲂзва́хъ . боⷢ҇ . гла́съ , ѕ҃ . Кто̀ тебѐ небл҃жи́тъ прест҃а́ѧ дв҃це ; и҆лѝ кто̀ невᲂспѣва́етъ твᲂегѡ̀ пречⷭ҇тагѡ ржⷭ҇тва̀ ; без̾лѣ́тныи бо ѿ ѻ҆ц҃а вᲂзсїѧ́въ сн҃ъ є҆динᲂро́дныи , то́йже ѿ тебѐ чи́стыѧ про́йде , несказа́ннѡ вᲂпло́щьсѧ . є҆стество́мъ бг҃ъ сы́и , и҆ є҆стество́мъ бы́въ челᲂвѣ́къ на́съ ра́ди . не во двᲂю̀ лицꙋ̀ раздѣлѧ́емъ . но во двᲂю̀ є҆стествꙋ̀ несмѣ́сно пᲂзнава́емъ . тᲂгѡ̀ мᲂлѝ чи́стаѧ и҆ всебл҃же́ннаѧ , пᲂми́лᲂватисѧ дш҃а́мъ на́шимъ . на стихо́внѣ , боⷢ҇ . Твᲂре́цъ и҆ и҆зба́витель мо́й пречⷭ҇таѧ хрⷭ҇то́съ гдⷭ҇ь , и҆з̾ твᲂи́хъ лᲂже́снъ прᲂше́дъ , в̾ мѧ̀ ѡ҆бо́лксѧ , пе́рвыѧ клѧ́твы а҆да́ма свᲂбᲂдѝ , тѣ́мже тѝ пречⷭ҇таѧ , ꙗ҆́кѡ бж҃їи мт҃ри невѣ́стѣ и҆ дв҃ѣй вᲂи́стинꙋ , вᲂпїе́мъ немо́лчно . ра́дꙋйсѧ а҆́нг҃льски . ра́дꙋйсѧ влⷣчце , пред̾ста́тельнице и҆ пᲂкро́ве , и҆ спасе́нїе дш҃а́мъ на́шимъ .

на гдⷭ҇и вᲂзва́хъ . боⷢ҇ . гла́съ , з҃ . Мт҃и ᲂу҆́бѡ пᲂзна́сѧ па́че є҆стества̀ бцⷣе . пребы́сть же дв҃ᲂю па́че сло́ва и҆ ра́зꙋма . и҆ чꙋдесѐ ржⷭ҇тва̀ твᲂегѡ̀ сказа́ти ꙗ҆зы́къ немо́жетъ . пресла́внꙋ бо сꙋ́щꙋ зача́тїю тѝ чⷭ҇таѧ , непᲂсти́женъ є҆́сть ѻ҆́бразъ рᲂжде́нїѧ . и҆дѣ́же бо хо́щетъ бг҃ъ , пᲂбѣжда́етсѧ є҆стества̀ чи́нъ . тѣ́мже тѧ̀ всѝ мт҃рь бж҃їю свѣ́дꙋще , мо́лимтисѧ прилѣ́жнѡ , мᲂлѝ спасти́сѧ дш҃а́мъ на́шимъ . на стихо́внѣ , боⷢ҇ . Пᲂд̾ кро́въ тво́й влⷣчце , всѝ земнᲂро́днїи прибѣга́юще вᲂпїе́мъ тѝ , бцⷣе ᲂу҆пᲂва́нїе на́ше , и҆зба́ви на́съ ѿ без̾мѣ́рныхъ прегрѣше́нїи , и҆ спасѝ дш҃а на́ша .

на гдⷭ҇и вᲂзва́хъ . боⷢ҇ . гла́съ , и҃ . Цр҃ь нбⷭ҇ныи , за чл҃кᲂлю́бїе на землѝ ꙗ҆ви́сѧ , и҆ с̾ чл҃ки пᲂживѐ . ѿ дв҃ы бо чи́стыѧ пло́ть прїе́мыи , и҆з̾ неѧ̀ прᲂше́дъ с̾ вᲂспрїѧ́тїемъ . є҆ди́нъ є҆́сть сн҃ъ сꙋгꙋ́бъ є҆стество́мъ а҆ несᲂста́вᲂмъ . тѣ́мже сᲂверше́на тᲂгѡ̀ бг҃а , и҆ сᲂверше́на чл҃ка , вᲂи́стинꙋ прᲂпᲂвѣ́дающе , и҆спᲂвѣ́даемъ хрⷭ҇та̀ бг҃а на́шегѡ . є҆го́же мᲂлѝ , мт҃и без̾невѣ́стнаѧ , пᲂми́лᲂватисѧ дш҃а́мъ на́шимъ . на стихо́внѣ , боⷢ҇ . Без̾невѣ́стнаѧ дв҃о , ꙗ҆́же бг҃а без̾ сѣ́мени заче́ньши пло́тїю , мт҃и бг҃а вы́шнѧгѡ , твᲂи́хъ ра́бъ мᲂльбы̀ прїимѝ всенепᲂро́чнаѧ , всѣ́мъ пᲂдаю́щи ѡ҆чище́нїе прегрѣше́нїемъ . ны́нѣ на́ша мᲂле́нїѧ прїе́мши , мᲂлѝ спасти́сѧ всѣ́мъ на́мъ .