1 ноября: свв. бессребреников Козмы и Дамиана

<< Previous

МЦⷭ҇А НОѦБРѦ̀ ВЪ А҃ ДН҃Ь

ст҃ы́хъ чꙋдотво́рецъ и҆ без̾сре́бреникъ козмы̀ и҆ дамїа́на . =Ве́черъ , на гдⷭ҇и возва́хъ , стⷯры , на ѕ҃ . гла́съ , ѕ҃ . поⷣ . всѐ оу҆пова́нїе . Всѐ воз̾ло́жше ,꙳ на́ нб҃сѣхъ оу҆пова́нїе ,꙳ сокро́вище некра́домое ,꙳ себѣ̀ ст҃а́ѧ сокры́ла є҆ста̀ .꙳ тꙋ́не прїѧ́ста ,꙳ тꙋ́не и҆ дади́та ,꙳ недꙋ́гꙋющимъ и҆сцѣле́нїе .꙳ зла́та же и҆ сребра̀ є҆ѵⷢ҇а́льски нестѧжа́ста .꙳ чл҃кѡмъ же и҆ ското́мъ бл҃годѣѧ́нїѧ подае́та .꙳ да во всѣ́мъ послꙋшли́ва бы́вша хрⷭ҇то́ви ,꙳ со дерзнове́нїемъ моли́тесѧ ,꙳ ѡ҆ дш҃а́хъ на́шихъ . Ве́щи гнꙋша́стасѧ ,꙳ на землѝ тлѣ́ющїѧ .꙳ нб҃осожи́телѧ же во́ плоти ,꙳ а҆́нг҃лѡмъ бы́вша є҆диномꙋ́дренаѧ сожи́телѧ .꙳ верста̀ є҆динонра́вна ст҃ы́хъ , и҆ є҆динодꙋ́шна .꙳ тѣ́мже стра́ждꙋщимъ всѣ́мъ и҆сцѣле́нїе подае́та ,꙳ без̾сре́брено да́рꙋюща ,꙳ бл҃годѣѧ́нїе тре́бꙋющимъ .꙳ и҆́хже лѣ́тнымъ си́мъ почте́мъ ꙳ досто́йнѡ пра́здникомъ .꙳ хрⷭ҇то́ви со дерзнове́нїемъ молѧ́щихсѧ ,꙳ ѡ҆ дш҃а́хъ на́шихъ . Всего̀ все́льшаѧ в̾ себѣ̀ сп҃са ,꙳ дво́ица прⷭ҇нословꙋ́щаѧ ,꙳ козма̀ и҆ дамїа́нъ бг҃омꙋ́драѧ ,꙳ ꙗ҆́кѡ пото́ка и҆сточа́ета ,꙳ ѿ и҆сто́чника во́ды живоно́сны , и҆сцѣле́нїѧ .꙳ є҆ю́же и҆ мо́щи стра́сти ,꙳ ѡ҆сѧза́нїемъ и҆сцѣлѧ́ютъ ,꙳ и҆ є҆ди́на и҆мена̀ ,꙳ недꙋ́ги ѿ земны́хъ ѿгонѧ́ютъ ,꙳ всѣ́мъ притека́ющимъ , спаси́телѧ бы́вшаѧ .꙳ хрⷭ҇то́ви со дерзнове́нїемъ моли́тасѧ ,꙳ ѡ҆ дш҃а́хъ на́шихъ . =сла́ва . гла́съ , ѕ҃ . Без̾коне́чна є҆́сть ст҃о́ю бл҃года́ть , ю҆́же ѿ хрⷭ҇та̀ прїѧ́ста . тѣ́мже и҆ мо́щи є҆ю̀ ѿ бжⷭ҇твеныѧ си́лы , непреста́ннѡ дѣ́йствꙋюта чꙋдеса̀ . є҆ю́же и҆ и҆мена̀ то́кмѡ вѣ́рою взыва́ема , не и҆сцѣ́льныѧ болѣ́зни и҆сцѣлѧ́юта . тою̀ ра́ди гдⷭ҇и , и҆ на́съ дш҃е́вныхъ и҆ тѣле́сныхъ стрⷭ҇те́й свободѝ , ꙗ҆́кѡ чл҃колю́бецъ .

и҆ ны́нѣ , боⷢ҇ . Бцⷣе ты̀ є҆сѝ лоза̀ и҆́стиннаѧ , возрасти́вшаѧ на́мъ пло́дъ живо́тныи , тебѣ̀ мо́лимсѧ , моли́сѧ влⷣчце съ чꙋдотво́рцы , поми́ловатисѧ дш҃а́мъ на́шимъ . крⷭ҇тобоⷢ҇ . поⷣ . всѐ оу҆пова́нїе .= А҆́=гньца своегѡ̀ ,꙳ а҆́гница нескве́рнаѧ дре́вле ,꙳ и҆ непоро́чнаѧ влⷣчца ,꙳ на крⷭ҇тѣ̀ воз̾дви́жена ꙗ҆́кѡ оу҆зрѣ̀ ,꙳ мт҃рьски восклица́ше ,꙳ и҆ дивѧ́щисѧ вопїѧ́ше .꙳ что̀ видѣ́нїе сѐ ча́до сла́дкое ,꙳ но́вое и҆ пресла́вное ;꙳ ка́кѡ собо́ръ без̾бл҃года́тныи , сꙋди́щꙋ пила́товꙋ предаде́ тѧ ,꙳ и҆ ѡ҆сꙋжда́етъ на́ смерть жи́знь всѣ́хъ .꙳ но воспѣва́ю твоѐ не и҆зрече́нное ,꙳ сло́ве схожде́нїе .

На стихо́внѣ , во ѻ҆кта́и . сла́ва . гла́съ , ѕ҃ . Всегда̀ и҆мꙋ́ще хрⷭ҇та̀ дѣ́йствꙋюща въ ва́съ ст҃а́ѧ без̾сре́бреника , чꙋдодѣ́йствꙋета въ ми́рѣ , болѧ́щїѧ и҆сцѣлѧ́ета . и҆́бо врачевство̀ ва́ю и҆сто́чникъ є҆́сть неи҆счерпа́емыи . че́рплемь же па́че и҆стека́етъ , и҆ и҆злива́емь ѡ҆би́лꙋетъ . всегда̀ и҆стощева́емь , и҆ оу҆множа́етсѧ , всѣ́мъ подаѧ̀ , и҆ неѡ҆скꙋдѣва́ѧ . и҆ че́рплющїи насыща́ютсѧ и҆сцѣле́нїи , и҆ то́й пребыва́етъ неи҆з̾живꙋ́щь . что̀ оу҆́бѡ ва́ю нарече́мъ ст҃а́ѧ цѣли́телѧ , ли врача̀ дш҃а́мъ же и҆ тѣ́лѡмъ , цѣле́бника страсте́мъ неи҆сцѣ́льнымъ , тꙋ́не и҆сцѣлѧ́юща всѣ́хъ , прїе́мша дарова́нїѧ ѿ сп҃са хрⷭ҇та̀ , подаю́щагѡ на́мъ ве́лїю млⷭ҇ть . и҆ ны́нѣ , боⷢ҇ . и҆лѝ , крⷭ҇тобоⷢ҇ . Ви́дѧщи тѧ распина́ема хрⷭ҇тѐ , тебѐ ро́ждьшїѧ вопїѧ́ше . что̀ сѐ стра́нное , є҆́же ви́жꙋ та́инство сн҃е мо́й . ка́кѡ на́ древѣ оу҆мира́еши , пло́тїю висѧ̀ , живота̀ пода́телю .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , и҃ . Ст҃а́ѧ без̾сре́бреника и҆ чꙋдотво́рца козмо̀ и҆ дамїа́не , посѣти́та на́съ въ болѣ́знехъ на́шихъ . тꙋ́не прїѧ́ста , тꙋ́не и҆ дади́та .= сла́ва , и҆ ны́нѣ , боⷢ҇ . и҆лѝ , крⷭ҇тобоⷢ҇ .=

На оу҆́трени . ѻ҆́ба кано́на , во ѻ҆кта́и . и҆ ст҃ы́мъ , на́ ѕ҃ . кано́нъ , и҆мы́и краегране́сїе сицево̀ : сла́вныѧ врача̀ земны́мъ пѣ́ти подоба́етъ . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́сꙋхꙋ ходи́въ і҆и҃ль , по бе́зднѣ стопа́ми , гони́телѧ фараѡ́на , ви́дѧ потоплѧ́ема , бг҃ꙋ побѣ́днꙋю пѣ́снь пое́мъ вопїѧ́ше .

запѣ́въ : Ст҃а́ѧ чꙋдотво́рца и҆ без̾сре́бреника козмо̀ и҆ дамїа́не , моли́та бг҃а ѡ҆ на́съ . Ѡ҆зарѧ́ема сла́вою бжⷭ҇твеною , бг҃освѣ́тлаѧ без̾сре́бреника . ѡ҆зарѧ́йта на́ша дш҃а , разорѧ́юще страстнꙋ́ю мглꙋ̀ , ꙗ҆́кѡ да ва́ю вѣ́рою почита́емъ . Тлѧ̀ творѧ́щихъ ѡ҆чи́щшасѧ пе́рвѣе страсте́й , болѣ́зней приложе́нїемъ , ѡ҆чища́ета на́мъ лю́тыѧ недꙋ́ги мꙋ́драѧ , и҆ болѣ́зни дш҃е́вныѧ ѡ҆блегча́ета . Ѿ всѣ́хъ влⷣки да́ръ прїѧ́ста ст҃а́ѧ чꙋде́съ дарова́нїѧ , на́мъ и҆сцѣли́та мно́гїѧ и҆ неꙋдо́бь и҆сцѣ́льныѧ пло́ти стра́сти мо́лимсѧ . Моле́нїе без̾сре́бреника и҆ врача̀ бг҃ови принеси́та , ꙗ҆́кѡ да и҆зба́витъ ны и҆скꙋше́нїи и҆ скорбе́й мно́гихъ , и҆ тре́петнагѡ и҆ стра́шнагѡ тогда̀ мꙋче́нїѧ . боⷢ҇ . Зако́нъ є҆сте́ственыхъ кромѣ̀ ро́ждьши чⷭ҇таѧ , зако́нꙋ да́телѧ і҆с҃а и҆зба́вителѧ . є҆го́же молѝ и҆зба́вити на́съ бцⷣе , мно́гихъ без̾зако́нїи на́шихъ .

пѣ́снь , г҃ . і҆рмо́съ . Нѣ́сть ст҃а ꙗ҆́коже ты̀ , гдⷭ҇и бж҃е мо́й , вознесы́и ро́гъ вѣ́рныхъ си бл҃же , и҆ оу҆тве́рждь и҆́хъ на ка́мени и҆сповѣ́данїѧ тѝ . Ми́ръ пое́тъ ва́ша ст҃а́ѧ всегда̀ , мно́гаѧ бл҃годѣѧ́нїѧ и҆ чꙋде́съ мно́жество , чꙋдотво́рца и҆ врача̀ , а҆́нг҃лъ всѣ́хъ равностоѧ́телѧ . Ва́ю ѡ҆бою̀ свѣтода́теле мо́лимъ , ѕвѣ́зды на высотѣ̀ лежа́щаѧ цр҃кви та́йнѡ , козмо̀ и҆ дамїа́не , срⷣца̀ вѣ́рныхъ ѡ҆зари́та . Ка́плѧ и҆сточа́юще прⷭ҇нѡ ст҃а́ѧ и҆сцѣле́нїѧ , ѡ҆мы́йта всѣ́хъ дш҃е́внꙋю скве́рнꙋ , и҆ страстны́ѧ пло́ти то́ки всѧ̀ оу҆ста́вита . Сѐ совокꙋпи́вшесѧ лю́дїе , ст҃а́ѧ , ѿ всю́дꙋ , ва́ю воспѣ́ти вели́кїѧ да́ры , внꙋ́трь цр҃кве ва́ю . но всѣ́хъ моле́нїѧ и҆спо́лнита . боⷢ҇ . Ст҃а́ѧ влⷣчце чи́стаѧ , прест҃о́е сло́во воплоти́вшаѧ сло́вомъ , без̾слове́сныхъ мѧ страсте́й , пою́ща тѧ бл҃гоче́стнѡ бжⷭ҇твеными словесы̀ , и҆зба́ви пренепоро́чнаѧ .

сѣда́ленъ . гла́съ , и҃ . Ѿ и҆сто́чника бе́здны і҆с҃а , чꙋде́съ стрꙋѧ̀ , бл҃голѣ́пнѡ поче́рпша ст҃а́ѧ . та́йными тꙋ́чами , страсте́й мра́чныѧ ѻ҆́блаки ѿгони́ста , и҆ недꙋ́гꙋющимъ чл҃кѡмъ и҆сцѣле́нїѧ пода́ста . тѣ́мъ полꙋчи́вше здра́вагѡ весе́лїѧ ва́ю пресла́внаѧ , оу҆дивлѧ́еми зове́мъ . бг҃оно́снаѧ без̾сре́бреника , моли́та хрⷭ҇та̀ бг҃а , согрѣше́нїемъ ѡ҆ставле́нїе дарова́ти , пра́з̾днꙋющимъ любо́вїю ст҃ꙋ́ю па́мѧть ва́ю . двⷤа . сла́ва , и҆ ны́нѣ , боⷢ҇ . Ꙗ҆́кѡ всенепоро́чнаѧ невѣ́сто творцꙋ̀ , ꙗ҆́кѡ неи҆скꙋсомꙋ́жнаѧ мт҃и и҆зба́вителѧ прїѧ́телище , ꙗ҆́кѡ сꙋ́щи оу҆тѣ́шителѧ всепѣ́таѧ , без̾зако́нїю мѧ сꙋ́ща скве́рно жили́ще , и҆ бѣсо́мъ и҆гра́лище въ ра́зꙋмѣ бы́вша , потщи́сѧ и҆ си́хъ ѕлодѣ́йствїѧ мѧ и҆зба́вити , свѣ́тло жили́ще добродѣ́тельми содѣ́лавши , свѣтода́тельнаѧ и҆ нетлѣ́ннаѧ , разженѝ ѻ҆́блакъ страсте́й , и҆ вы́шнѧгѡ прича́стїѧ сподо́би , и҆ свѣ́тꙋ невече́рнемꙋ мл҃твами сѝ . крⷭ҇тобоⷢ҇ . А҆́гньца и҆ па́стырѧ и҆ и҆зба́вителѧ , а҆́гница зрѧ́щи , на крⷭ҇тѣ̀ восклица́ше слезѧ́щи . ми́ръ оу҆́бѡ ра́дꙋетсѧ прїе́млѧ тобо́ю и҆збавле́нїе . оу҆тро́ба же моѧ̀ гори́тъ зрѧ́щи твоѐ распѧ́тїе , є҆́же терпи́ши за милосе́рдїе млⷭ҇ти долготерпѣли́ве гдⷭ҇и . млⷭ҇ти бе́здно , и҆ и҆сто́чниче неи҆счерпа́емыи , оу҆милосе́рдисѧ и҆ да́рꙋй грѣхо́въ ѡ҆ставле́нїе , вѣ́рою воспѣва́ющимъ бжⷭ҇твенаѧ твоѧ̀ страда́нїѧ .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃олѣ́пнѡ зове́тъ вопїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи . Бжⷭ҇твеное ро́ждїе вои́стинꙋ бл҃гопло́дно , виногра́да бжⷭ҇твенагѡ , та́йное вино̀ и҆ска́пающе , в̾ весе́лїи мꙋ́драѧ без̾сре́бреника оу҆блажи́мъ . Ѡ҆рꙋ́жїе ꙗ҆ви́стасѧ оу҆стрѣлѧ́ющо врагѝ неви́димыѧ . и҆́хже и҆ на́съ стрѣ́лъ и҆зба́вита , застꙋпа́юща на́шъ живо́тъ , мꙋ́драѧ без̾сре́бреника . Нѣ́сть чл҃къ и҆́же кто̀ не стѧжа̀ бл҃га́ѧ ва́ю мл҃твеника къ хрⷭ҇тꙋ̀ , ст҃а́ѧ без̾сре́бреника . є҆го́же моли́те , ѻ҆гнѧ̀ вѣ́чнагѡ на́съ и҆зба́вити . Ва́ю бл҃же́ннаѧ и҆́же призыва́етъ , и҆ на землѝ и҆ в̾ мо́ри , бѣ́дъ всѧ́кихъ ѿпꙋща́етсѧ . тѣ́мъ и҆зба́вита на́съ сопроти́внагѡ ѡ҆бстоѧ́нїѧ . боⷢ҇ . Всели́всѧ гдⷭ҇ь чи́стаѧ посредѣ̀ тебѐ , вмѣсти́лище ст҃о́е , и҆сто́чникъ мно́гихъ ꙗ҆влѧ́етъ и҆сцѣле́нїи , и҆ ѡ҆чище́нїе страсте́й , бцⷣе при́снѡ дв҃о .

пѣ́снь , є҃ . і҆рмо́съ . Бж҃їимъ свѣ́томъ тѝ бл҃же , оу҆́тренюющихъ тѝ дш҃а любо́вїю , просвѣтѝ молю́сѧ , тѧ̀ вѣ́дѣти сло́во бж҃їе , и҆́стиннагѡ бг҃а , ѿ́ мрака грѣхо́внагѡ и҆зима́юща . Бжⷭ҇твеное привлеко́ша просвѣще́нїе , сїѧ́нїе и҆сто́чника всеꙋсе́рднѡ возлюби́ста . и҆ просвѣща́ета на́съ всегда̀ , чꙋде́съ зарѧ́ми великоимени́таѧ . Красно̀ сꙋпрꙋже́нїе сꙋ́ще мꙋ́драѧ , бразды̀ воздѣ́лавша дш҃ъ бг҃озна́менїи при́снѡ , пожина́юща стра́сти ꙗ҆́коже пле́велы , и҆ здра́вїѧ кла́съ стори́чьствꙋюща . Вжилѧ́ема крѣ́постїю хрⷭ҇то́вою , въ ѕло́бѣ си́льнагѡ всю̀ крѣ́пость погꙋби́ста . є҆го́же мꙋчи́тельства на́съ и҆зба́вита , неꙋсы́пнаѧ пред̾ста́телѧ на́ша без̾сре́бреника . Ше́стовати стезѝ на́съ пра́вы , и҆ твори́ти во́лю бж҃їю оу҆крѣпи́та ст҃а́ѧ , оу҆ставлѧ́юща стра́сти серде́цъ на́шихъ , и҆ тѣлесе́мъ недꙋ́ги ѡ҆блегчева́юща . боⷢ҇ . И҆зба́ви мѧ влⷣчце бл҃га́ѧ и҆скꙋше́нїй врага̀ , и҆ гее́ны мꙋче́нїѧ , и҆ ѡ҆бдержа́щагѡ мѧ плѣне́нїѧ . и҆ не посрамѝ менѐ пѣсносло́вѧща тѧ .

пѣ́снь , ѕ҃ . і҆рмо́съ . Жите́йскагѡ мо́рѧ воз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вопїю́ ти , воз̾ведѝ ѿ тлѝ живо́тъ мо́й многомлⷭ҇тиве . Живꙋ́ща мч҃нка ра́достнѡ на́ нб҃сѣхъ , въ честны́и хра́мъ ва́шъ прїитѝ потщи́тасѧ , и҆ на́ша недꙋ́ги тѣле́сныѧ , и҆ серде́чныѧ стра́сти и҆сцѣли́та . Въ бжⷭ҇твеное бл҃голѣ́пїе ѡ҆дѣ́ѧвшасѧ краснѡ̀ , ꙗ҆́кѡ в̾ сꙋгꙋ́бицꙋ ст҃а́ѧ , на́ги на́съ сꙋ́ща добродѣ́телей , бжⷭ҇твенѡ ѡ҆дѣ́йте , и҆ страсте́й без̾че́стїѧ ны́нѣ ѡ҆бнажи́та . Ꙗ҆́кѡ оу҆краше́нїемъ чꙋде́съ ѡ҆дѣ́ѧна всегда̀ , спаси́телѧ ми́рови ꙗ҆ви́стасѧ . мирска́гѡ оу҆́бѡ вре́да всѧ́ ны и҆зба́вита ст҃а́ѧ , и҆ страсте́й нече́стїѧ и҆ мꙋче́нїѧ . Оу҆мертви́вша ст҃а́ѧ стра́сти всѧ̀ пло́ти смертоно́сныѧ бл҃года́тїю , животво́рными чꙋде́съ приложе́ньми , ѡ҆живлѧ́ета стра́ждꙋщаѧ , и҆ вра́тъ сме́рти и҆збавлѧ́ета . боⷢ҇ . Неѡ҆пали́въ оу҆тро́бы твоеѧ̀ ѻ҆́гнь сы́и і҆с҃ъ , и҆з̾ тебѐ пло́тїю произхо́дитъ . сегѡ̀ чи́стаѧ молѝ , ѻ҆гнѧ̀ и҆ всѧ́кихъ мꙋ́къ и҆зба́вити , вѣ́рою воспѣва́ющихъ тѧ .

конда́къ . гла́съ , в҃ . Бл҃года́ть прїе́мша и҆сцѣле́нїемъ , простира́ета здра́вїе бѣдꙋ́ющимъ , врача̀ и҆ чꙋдотво́рца сла́внаѧ . но ва́ю посѣще́нїемъ и҆ сꙋпоста́томъ шата́нїѧ низложи́та , ми́ръ и҆сцѣлѧ́юща чꙋдесы̀ . и҆́косъ . Всѧ́когѡ ра́зꙋма и҆ мꙋ́дрости прехо́дитъ сло́во мꙋ́дрꙋю врачꙋ̀ , и҆ всѣ́мъ ра́зꙋмъ подаю́та , вы́шнѧгѡ бо бл҃года́ть прїе́мша , неви́димѡ здра́вїе да́рꙋюта всѣ́мъ . ѿ ню́дꙋ же и҆ мое́й по́вѣсти бл҃года́ть дарова́сѧ пѣ́ти , ꙗ҆́кѡ бг҃оно́снаѧ оу҆го́дника хрⷭ҇то́ва и҆ слꙋжи́телѧ , и҆сцѣле́нїи мно́жество подаю́щаѧ . болѣ́зни бо всѣ́хъ и҆збавлѧ́юща , ми́ръ и҆сцѣлѧ́юта чꙋдесы̀ .

пѣ́снь , з҃ . і҆рмо́съ . Хладода́тельнꙋ оу҆́бѡ пе́щь сотворѝ а҆́нг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ оу҆вѣща̀ вопи́ти , бл҃гослове́нъ бг҃ъ ѻ҆ц҃ъ на́шихъ . Впери́ста оу҆́мъ на нбⷭ҇наѧ , до́брыхъ приложе́нїи , и҆ бы́ста ѻ҆́бщника бжⷭ҇твеныхъ даро́въ . крила́та сꙋ́ща ѻ҆рла̀ , всю̀ прохо́дита зе́млю , чꙋдодѣ́йствꙋюща при́снѡ . Просвѣти́стасѧ ꙗ҆́коже добросїѧ́нно без̾сре́бреника зла́то , бжⷭ҇твеною бл҃года́тїю и҆сцѣле́нїѧ ѡ҆богати́ста мно́жества . тѣ́мъ оу҆ще́дрита на́съ ѡ҆бꙋрева́емыхъ , лю́тыхъ нахожде́нїи и҆скꙋше́ньми . Преложи́вша гдⷭ҇ви чи́сты ва́ша дх҃а без̾сре́бреника , да́ръ ѿ негѡ̀ прїѧ́ста , нечи́стыѧ дх҃и прогони́ти всегда̀ . и҆́хже ѕло́бы го́рькїѧ и҆зба́вита всѣ́хъ на́съ . Оу҆снꙋ́ста пра́веднымъ до́лжнымъ сно́мъ , мꙋ́драѧ без̾сре́бреника , и҆ неꙋсы́пнаѧ мл҃твеника є҆ста̀ вѣ́рнымъ . тѣ́мъ дш҃ъ на́шихъ при́снѡ и҆ тѣле́съ лю́тыѧ стра́сти оу҆спи́та . боⷢ҇ . Молѧ́щи непреста́й чл҃колю́бца бг҃а на́шегѡ всенепоро́чнаѧ , ꙗ҆́кѡ да прїи́мемъ всеконе́чнѣ ѿпꙋще́нїе ѕлы́хъ , и҆ полꙋчи́мъ на́ нб҃сѣхъ , оу҆гото́ванныхъ бл҃гъ лю́бѧщимъ є҆гѡ̀ .

пѣ́снь , и҃ . і҆рмо́съ . И҆с̾пла́мени ст҃ы́мъ ро́сꙋ и҆сточѝ , а҆ пра́веднагѡ же́ртвꙋ и҆ во́ды попалѝ , всѧ́ бо твори́ши хрⷭ҇тѐ , є҆ли́ко хо́щеши , тѣ́мъ тѧ превозно́симъ гдⷭ҇а во́ вѣки . Недꙋ́гомъ всѧ́ческимъ сꙋ́ща ра́тника , посо́бїемъ бжⷭ҇твенагѡ дх҃а ст҃а́ѧ . оу҆толи́та на́шихъ дш҃ъ недꙋ́гованїѧ , и҆ тѣле́съ ѡ҆блегчи́та болѣ́зни . Ви́дителѧ гдⷭ҇ни ны́нѣ красоты̀ сꙋ́ще вои́стинꙋ , присѣща́йта сегѡ̀ кра́снагѡ бг҃оно́снаѧ хра́ма ва́шегѡ , и҆ и҆сто́чникъ чꙋде́съ мно́гихъ соверша́йта . Ѿ и҆сто́чника ра́йска , и҆сходѧ́ще ꙗ҆́кѡ рѣцѣ̀ двѣ̀ . всѐ напоѧ́ета лицѐ землѝ , и҆сцѣле́нїи стрꙋѧ́ми , недꙋ́гъ и҆зсꙋша́юща тꙋ́чи . Бл҃же́нныхъ наде́ждь прїи́мше , ѿ всѣ́хъ досто́йнѡ бл҃жи́тесѧ , ꙗ҆́кѡ и҆спо́лнителе бл҃же́ннїи , бг҃а на́шегѡ , бжⷭ҇твеныхъ хотѣ́нїи , без̾сре́бреницы ꙗ҆́вльшесѧ . Вра́чеве неи҆сцѣ́льныхъ страсте́й без̾сре́бреницы , неи҆сцѣ́льныѧ стра́сти на́ша и҆сцѣли́та , и҆ и҆скꙋше́нїи бꙋ́рю оу҆толи́та , и҆ оу҆ны́нїѧ разжени́та ѻ҆́блаки . трⷪ҇чнъ . Со а҆́нг҃лы ст҃ы́ми пѣсносло́вимъ ѻ҆ц҃а и҆ сло́во и҆ дх҃а ст҃а́гѡ , є҆ди́но въ тре́хъ начерта́нїихъ бжⷭ҇тво̀ , є҆ди́но црⷭ҇тво , и҆ є҆ди́нꙋ вла́сть .

пѣ́снь , ѳ҃ . і҆рмо́съ . Бг҃а чл҃кѡмъ неꙋдо́бь ви́дѣти , на́нь же несмѣ́ютъ чи́ни а҆́нг҃льстїи зрѣ́ти . тобо́ю бо пречⷭ҇таѧ ꙗ҆ви́сѧ на́мъ сло́во воплоще́нно , є҆го́же велича́юще , с̾ нбⷭ҇ными вѡ́и тѧ̀ велича́емъ . Се́й хра́мъ ва́шъ чꙋдесы̀ всебл҃голѣ́пнѡ ꙗ҆́кѡ ѕвѣзда́ми свѣ́тлыми оу҆краша́етсѧ , и҆ согла́снѡ веселѧ́сѧ всегда̀ бл҃жи́тъ , и҆ честнꙋ́ю ва́шꙋ па́мѧть пра́зднꙋетъ бл҃гоче́стнѡ , честна́ѧ без̾сре́бреника . Ꙗ҆́кѡ свѣ́тъ , ꙗ҆́кѡ два̀ вели́ка сл҃нца , разꙋ́мнꙋю тве́рдь оу҆краша́ета без̾сре́бреника , и҆ зна́менїѧ зарѧ́ми просвѣща́ета всѣ́хъ вѣ́рныхъ срⷣца̀ . тѣ́мъ зове́мъ , разрѣши́та тмꙋ̀ страсте́й на́шихъ мо́лимсѧ . Въ се́ла вы́шнѧѧ вселѧ́ема ст҃а́ѧ , посредѣ̀ на́съ бы́ти неви́димѡ милосе́рдꙋйта , и҆́же посредѣ̀ бжⷭ҇твенагѡ хра́ма ва́шегѡ , пѣ́сни возсыла́ющихъ вседержи́телю , и҆ бл҃жа́щихъ прилѣ́жнѡ ва́ю всехва́льнаѧ . Землѧ̀ с̾ вы́шними весели́тсѧ , въ свѣ́тлыи бжⷭ҇твеныи пра́здникъ ва́шъ ст҃а́ѧ , и҆́же соверша́ющихъ на́съ и҆зба́вите тмы̀ и҆ болѣ́зней и҆ всѧ́коѧ тѣсноты̀ , и҆ є҆́же во а҆́дѣ лю́тагѡ , мꙋ́драѧ , мꙋче́нїѧ . боⷢ҇ . Тре́петное рожде́нїе и҆мꙋ́щи всечи́стаѧ , въ стра́шныи дн҃ь и҆спыта́нїѧ молю́сѧ , стра́шнагѡ ѿвѣ́та и҆зба́ви мѧ , и҆ спаса́емыхъ стоѧ́нїѧ прича́стника сотворѝ вѣ́рнѡ пою́ща тѧ бг҃ора́дованнаѧ .

свѣти́ленъ . Бл҃года́ть и҆сцѣле́нїи ѿ́ бг҃а прїе́мша без̾сре́бреника бл҃же́ннаѧ , врачева́ти недꙋ́жныхъ , и҆ и҆сцѣлѧ́ти всѣ́хъ , вѣ́рнѡ притека́ющихъ к̾ бжⷭ҇твеномꙋ ва́шемꙋ хра́мꙋ . сегѡ̀ ра́ди согла́снѡ оу҆блажа́емъ ва́ю досто́йнѡ честнꙋ́ю па́мѧть . боⷢ҇ . Но́щь долго́въ мои́хъ , страсте́й и҆ мра́ка пости́же , и҆ доспѣ́хъ къ захожде́нїю сме́ртномꙋ . и҆ ѿ ню́дъ трепе́щꙋ , помышлѧ́ѧ стра́шныи сꙋ́дъ сн҃а твоегѡ̀ дв҃о . но тѧ̀ застꙋ́пницꙋ стѧжа́въ , лю́тыхъ и҆зба́влюсѧ бцⷣе .

На хвали́тѣхъ , стⷯры , на́ ѕ҃ . гла́съ , а҃ . Бл҃года́ть и҆сцѣле́нїи ѿ́ бг҃а прїѧ́ста , без̾сре́брено стра́сти дш҃а́мъ и҆ тѣ́ломъ на́шимъ те́плѣ и҆сцѣлѧ́ета , всеми́рнаѧ без̾сре́бреника . тѣ́мже ва́ма хрⷭ҇то́съ вѣ́рнымъ да́ное здра́вїе да́рꙋѧ , свѣти́ла неле́стнаѧ ва́ю показа̀ вселе́ннѣй . тогѡ̀ моли́те , спасти́сѧ дш҃а́мъ на́шимъ . двⷤа . Ѿ вы́шнѧгѡ промышле́нїѧ , и҆сцѣле́нїи бе́зднꙋ поче́рпша , всѣ́мъ и҆сточа́ета вѣ́рнымъ и҆сцѣле́нїѧ без̾сре́бреника . па́че є҆стества́ бо недꙋ́гꙋющимъ стра́сти рꙋкодѣ́йствы та́йными , ѿ сокро́вищь дх҃а врачева́нїѧ пред̾лага́ета спасе́нїѧ , стра́ждꙋщїѧ и҆сцѣлѧ́ета . тѣ́мъ хра́мъ че́стенъ бы́вше живонача́льныѧ трⷪ҇цы , в̾ ва́ю бо ꙗ҆́вѣ жили́ще сотворѝ . є҆́йже моли́тасѧ , спасти́сѧ дш҃а́мъ на́шимъ . гла́съ , в҃ . Любо́вїю бжⷭ҇твеною , и҆ жела́нїемъ бꙋ́дꙋщихъ , добродѣ́тельно пожи́вша , спасе́ныѧ пꙋтѝ прои҆до́ста . тѣ́мъ чистотꙋ̀ дш҃е́внꙋю нескве́рнѡ соблю́дша , ве́щныхъ до конца̀ ѿстꙋпи́ста . дх҃омъ же бжⷭ҇твенымъ позла́щьшасѧ , без̾зла́тно недꙋ́гꙋющимъ и҆сцѣле́нїе подае́та . дво́ица ѡ҆сщ҃е́ннаѧ . свѣтоза́рное собра́нїе , просвѣще́ннѡ бжⷭ҇твеное сопрѧже́нїе без̾сре́бреника . въ ско́рбѣхъ и҆ болѣ́знехъ посѣща́юща на́съ , и҆ дш҃а́мъ на́шимъ стра́сти без̾ме́зднѡ и҆сцѣлѧ́юща . Вели́кимъ сподо́бльшасѧ даро́мъ прехва́льнаѧ , в̾ смире́нѣ житїѝ на землѝ жи́тельствоваста . и҆ проходѧ́ща всю́дꙋ , тꙋ́не болѧ́щимъ стра́сти и҆сцѣлѧ́юща . ꙗ҆ви́стасѧ а҆́нг҃лѡмъ собесѣ́дника , козма̀ съ дамїа́номъ мꙋ́дрымъ , бра́тїѧ прекра́снаѧ . и҆ на́ша стра́сти мл҃твами ва́ю и҆сцѣли́та . Врача̀ недꙋ́гꙋющимъ , сокро́вища и҆сцѣле́нїемъ , спаси́телѧ вѣ́рныхъ , без̾сре́бреника всесла́внаѧ , и҆́же въ нꙋ́ждахъ зовꙋ́щихъ и҆ бѣдꙋ́ющихъ и҆сцѣли́та , съ ѳеѡдо́тїею молѧ́ще бг҃а бл҃га́гѡ , и҆зба́вити на́съ сѣ́тей вра́жїихъ .

сти́хъ : ст҃ы́мъ и҆́же сꙋ́ть на землѝ є҆гѡ̀ ,꙳ оу҆дивѝ гдⷭ҇ь всѧ̀ во́лѧ своѧ̀ въ ни́хъ . И҆сто́чникъ и҆сцѣле́нїи , є҆ди́нагѡ то́кмѡ и҆сцѣлева́ше лѣ́томъ . хра́мъ же без̾сре́бреникъ , всѐ мно́жество цѣли́тъ недꙋ́гꙋющихъ . неѡ҆скꙋ́дно бо є҆́сть и҆ неи҆з̾живꙋ́що бога́тство ст҃ы́хъ . тѣ́хъ моли́твами хрⷭ҇тѐ поми́лꙋй на́съ .

сти́хъ : сѐ нн҃ѣ что̀ добро̀ и҆лѝ что̀ красно̀ ,꙳ но є҆́же жи́ти бра́тїи в̾ кꙋ́пѣ . Ра́дꙋетсѧ ли́къ ст҃ы́хъ во́ вѣки , црⷭ҇тво бо нбⷭ҇ное наслѣ́доваша . землѧ̀ мо́щи и҆́хъ прїе́мши , бл҃гоꙋха́нїе воспꙋстѝ . рабѝ хрⷭ҇то́ви бы́ша , все́льшесѧ в̾ жи́знь вѣ́чнꙋю .

сла́ва . гла́съ , д҃ . И҆сто́чникъ и҆сцѣле́нїемъ , и҆мꙋ́ще ст҃а́ѧ без̾сре́бреника , и҆сцѣле́нїе подае́та всѣ́мъ тре́бꙋющимъ . ꙗ҆́кѡ вели́кимъ даро́мъ сподо́бльшасѧ , ѿ прⷭ҇нотекꙋ́щагѡ и҆сто́чника сп҃са хрⷭ҇та̀ . рече́ бо къ ва́мъ гдⷭ҇ь , ꙗ҆́кѡ є҆диноревни́телемъ а҆пⷭ҇лѡмъ , сѐ даю̀ ва́мъ вла́сть на дꙋсѣ́хъ нечи́стыхъ , ꙗ҆́коже и҆з̾гони́ти , и҆ и҆сцѣли́ти всѧ́къ недꙋ́гъ и҆ всѧ́кꙋ ꙗ҆́зю . тѣ́мже по повелѣ́нїихъ є҆гѡ̀ до́брѣ пожи́вша , тꙋ́не прїѧ́ста , тꙋ́не и҆ подава́ета и҆сцѣлѧ́ющи стрⷭ҇ти дш҃ъ и҆ тѣле́съ на́шихъ . и҆ ны́нѣ , боⷢ҇ . и҆лѝ , крⷭ҇тобоⷢ҇ . поⷣ . ꙗ҆́кѡ до́блѧ . А҆́гньца и҆ па́стырѧ ,꙳ на́ древѣ ꙗ҆́кѡ оу҆зрѣ̀ ,꙳ а҆́гница ро́ждьшаѧ рыда́ше ,꙳ и҆ мт҃рьски тебѣ̀ вѣща́ше ,꙳ сн҃е возжелѣ́нне ,꙳ ка́кѡ на́ древѣ крⷭ҇тнѣмъ ,꙳ воздви́жесѧ долготерпѣли́ве ;꙳ ка́кѡ рꙋ́цѣ своѝ и҆ но́зѣ своѝ сло́ве ,꙳ пригвоздѝ без̾зако́нники ,꙳ и҆ кро́вь свою̀ и҆злїѧ́лъ є҆сѝ влⷣко .

На стихо́внѣ , во ѻ҆кта́и . и҆ ст҃ы́мъ , сти́хъ : гла́съ , ѕ҃ . сѐ ны́нѣ что̀ добро̀ и҆лѝ что̀ красно̀ ,꙳ но є҆́же жи́ти бра́тїи в̾ кꙋ́пѣ . Свѣ́тлаѧ и҆ просвѣще́ннаѧ восїѧ̀ дне́сь па́мѧть без̾сре́бреникꙋ хрⷭ҇то́вꙋ , свѣ́тлѡ ѡ҆блиста́ющи лꙋча́ми чꙋде́съ всеземны́и ми́ръ . прїиди́те оу҆́бѡ праз̾днолю́бцы , вѣ́рнѡ торжествꙋ́емъ . прїиди́те к̾ моще́мъ ст҃ꙋ́ю оу҆се́рднѡ всѝ стеце́мсѧ . ꙗ҆́кѡ да ско́рое и҆сцѣле́нїе ѿ ни́хъ прїи́мемъ неѡ҆скꙋ́дно . без̾ме́здно бо подаю́та всѣ́мъ , дѣ́йствомъ ст҃а́гѡ дх҃а и҆сцѣле́нїи дарова́нїѧ . сла́ва . гла́съ , и҃ . Кто̀ недиви́тсѧ , кто̀ непросла́витъ , кто̀ невоспое́тъ вѣ́рнѡ , мꙋ́дрыхъ и҆ сла́вныхъ без̾сре́бреникъ чꙋдеса̀ . ꙗ҆́кѡ и҆ по ст҃ѣ́мъ и҆́хъ преставле́нїи , всѣ́мъ подава́ютъ притека́ющимъ вѣ́рою , бога́тнѡ и҆сцѣле́нїѧ . и҆ чⷭ҇тны́ѧ и҆ ст҃ы́ѧ мо́щи и҆́хъ , и҆сточа́ютъ бл҃года́ть и҆сцѣле́ней . ѽ дво́ице ст҃а́ѧ . ѽ честны́ѧ главы̀ . ѽ премꙋ́дросте и҆ сла́во , бжⷭ҇твеныѧ да́нныѧ ва́мъ бл҃года́ти . тѣ́мже пѣ́сньми зове́мъ бл҃года́телю бг҃ꙋ , показа́вшемꙋ си́хъ на и҆сцѣле́нїе дш҃ъ и҆ тѣле́съ на́шихъ .= и҆ ны́нѣ , боⷢ҇ . и҆лѝ , крⷭ҇тобоⷢ҇ . Ю҆́=ница нескве́рнаѧ , ю҆ньца̀ ви́дѧщи на́ древѣ воз̾дви́жена во́лею , рыда́ющи го́рцѣ , оу҆вы̀ мнѣ̀ вопїѧ́ше любе́зное ча́до , что́ ти собо́ръ воз̾дадѐ без̾бл҃года́тныи є҆вре́йскїи , хотѧ́ мѧ без̾ча́дствовати , ѿ тебѐ вселюбе́зныи .

На литꙋргі́и . проки́менъ , ѱл҃о́мъ давы́довъ . ст҃ы́мъ и҆́же сꙋ́ть на землѝ є҆гѡ̀ , оу҆дивѝ гдⷭ҇ь всѧ̀ во́лѧ своѧ̀ в̾ ни́хъ . сти́хъ . пред̾зрѣ́хъ гдⷭ҇а предомно́ю вы́нꙋ , ꙗ҆́кѡ ѡ҆деснꙋ́ю менѐ є҆́сть дасѧ̀ неподви́жꙋ . а҆пⷭ҇лъ , къ кори́нѳѡмъ . заⷱ҇ , рн҃г .= а҆ллилꙋ́їѧ . сѐ что̀ добро̀ , и҆лѝ что̀ красно̀ , но є҆́же жи́ти бра́тїи въ кꙋ́пѣ . =є҆ѵⷢ҇а́лїе , ѿ =матѳе́ѧ . зача́ло , л҃д , ѿ полꙋ̀ . прича́стенъ . р=а́дꙋйтесѧ пра́веднїи ѡ҆́ гдⷭ҇ѣ .

<< Previous

Contents

Next >>