МЦⷭ҇А ТОГО́ЖЕ ВЪ І҃ ДН҃Ь

ст҃ы́хъ а҆пⷭ҇лъ ѻ҆лѵ́мба , и҆ родїѡ́на , и҆ и҆́же с̾ ни́ми . =Ве́черъ , на гдⷭ҇и возва́хъ , стихѣ́ры . гла́съ , а҃ . поⷣ . п=рехва́льнїи мч҃нцы . Ми́ра и҆сполне́нїе ,꙳ ꙗ҆́кѡ ѻ҆рлѝ крила́тїи ꙳ пресвѣ́тлѡ преходѧ́ще ,꙳ сщ҃еннопроповѣ́дницы .꙳ оу҆ловле́нныѧ ѕлодѣ́емъ ,꙳ привлеко́сте к̾ вѣ́рѣ непоро́чнѣй .꙳ тѣ́мъ моли́тесѧ ,꙳ дарова́ти дш҃а́мъ на́шимъ ,꙳ ми́ръ и҆ ве́лїю млⷭ҇ть . Те́ртїѧ и҆ сѡсипа́тра ,꙳ гла́сы сщ҃е́нными почте́мъ ,꙳ и҆ ѻ҆лѵ́мба и҆ родїѡ́на ,꙳ и҆ с̾ си́ми є҆ра́ста сщ҃еннотаи́нника ,꙳ и҆ бжⷭ҇твенаго кꙋа́рта ,꙳ сла́вѧщихъ хрⷭ҇та̀ бг҃а на́шегѡ ,꙳ и҆ молѧ́щихъ є҆гѡ̀ ,꙳ дарова́ти дш҃а́мъ на́шимъ ,꙳ ми́ръ и҆ ве́лїю млⷭ҇ть . Ꙗ҆зы́ки приведо́сте хрⷭ҇тꙋ̀ ꙳ бг҃обл҃же́ннїи ,꙳ и҆зба́влени кро́вїю ,꙳ бл҃гои҆зво́лившагѡ на землѝ роди́тисѧ ,꙳ и҆ крⷭ҇тъ и҆ сме́рть претерпѣ́вша ꙳ во́лею премꙋ́дрїи .꙳ є҆го́же моли́те ,꙳ дарова́ти дш҃а́мъ на́шимъ ,꙳ ми́ръ и҆ ве́лїю млⷭ҇ть .

сла́ва , и҆ ны́нѣ , боⷢ҇ . Всепѣ́таѧ влⷣчце , наде́жде вѣ́рнымъ и҆ оу҆твержде́нїе , прибѣ́жище и҆ по́мощь тѧ̀ мо́лимъ , ѿ всѧ́кїѧ бѣды̀ рабы̀ своѧ̀ сохранѝ , вѣ́рою покланѧ́ющїѧсѧ ржⷭ҇твꙋ̀ твоемꙋ̀ . є҆го́же молѝ , дарова́ти дш҃а́мъ на́шимъ , ми́ръ и҆ ве́лїю млⷭ҇ть . крⷭ҇тобоⷢ҇ . Своегѡ̀ а҆́гньца а҆́гница , всенепоро́чнаѧ влⷣчца , на крⷭ҇тѣ̀ ꙗ҆́кѡ оу҆зрѣ̀ , зра́ка не и҆мꙋ́ща ни добро́ты . оу҆вы̀ мнѣ̀ рыда́ющи гл҃аше , гдѣ̀ твоѧ̀ добро́та за́йде сла́дкїи ; гдѣ̀ бл҃голѣ́пїе ; гдѣ̀ бл҃года́ть сїѧ́ющаѧ зра́ка твоегѡ̀ , сн҃е мо́й вселюбе́зныи .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , г҃ . А҆пⷭ҇ли ст҃і́и моли́те млⷭ҇тиваго бг҃а , да грѣхо́въ ѡ҆ставле́нїе пода́стъ дш҃а́мъ на́шимъ .= сла́ва , и҆ ны́нѣ , боⷢ҇ . и҆лѝ , крⷭ҇тобоⷢ҇ .=

На оу҆́трени . ѻ҆́ба кано́на , во ѻ҆кта́и . и҆ ст҃ы́мъ , на д҃ . носѧ̀ краегране́сїе си́цево : бг҃огл҃ивыѧ оу҆ченикѝ пою̀ крѣ́пкѡ . гла́съ , а҃ . пѣ́снь , а҃ . і҆рмо́съ . Твоѧ̀ побѣди́тельнаѧ десни́ца , бг҃олѣ́пнѡ в̾ крѣ́пости просла́висѧ . та́ бо без̾сме́ртне всемогꙋ́щаѧ проти́вныѧ сотрѐ , і҆и҃льтѧнѡмъ пꙋ́ть глꙋбины̀ ѡ҆бно́вльши .

запѣ́въ : Ст҃і́и а҆пⷭ҇ли , моли́те бг҃а ѡ҆ на́съ .= Бжⷭ҇твенїи сꙋ́ще оу҆ченицы̀ , вопло́щшагосѧ за млрⷭ҇дїе бг҃а на́шегѡ . тогѡ̀ моли́те , грѣхо́въ дарова́ти проще́нїе , соверша́ющимъ ва́шꙋ па́мѧть бл҃же́ннїи . Зерца́ла бж҃їѧ свѣтови́днаѧ , вмѣсти́тельна тогѡ̀ пода́нїи ꙗ҆ви́стесѧ бл҃же́ннїи , всѣ́мъ вѣ́рнымъ бл҃года́тельнѡ даю́ще спасе́ныѧ зарѝ , бг҃ови́дцы а҆пⷭ҇ли . Восїѧ́вше всѣ́мъ просвѣще́нїе , ѡ҆заре́нїи и҆сто́чникъ поче́рпше , є҆ра́стъ , и҆ те́ртїи , и҆ ѻ҆лѵ́мбъ , и҆ родїѡ́нъ , и҆ сѡсипа́тръ , кꙋ́пнѡ с̾ кꙋа́ртомъ и҆́хже бл҃гоче́стнѡ оу҆блажи́мъ . =боⷢ҇ . Ро́дъ земны́хъ твои́мъ ржⷭ҇тво́мъ дв҃о ѡ҆бнови́ла є҆сѝ , сло́во бо породѝ ѻ҆́ч҃ее , в̾ пло́ть ме́ртвенꙋю ѡ҆дѣ́ѧвшасѧ , и҆ без̾сме́ртїѧ пꙋтѝ на́мъ показа́вша .

пѣ́снь , г҃ . і҆рмо́съ . Є҆ди́не свѣ́дыи земны́хъ сꙋщество̀ немощно́е , и҆ млⷭ҇тивно внѐ ѡ҆болкі́исѧ , препоѧ́ши мѧ с̾вы́ше си́лою , воспѣва́ти ти ст҃ы́и , цр҃кви дш҃е́внаѧ , неи҆зрече́нныѧ сла́вы ти чл҃колю́бче . Сло́во ꙗ҆́кѡ свѣти́льникъ мы́сленыи проносѧ́ще а҆пⷭ҇ли , бг҃опоко́рнѡ тва́рь проидо́сте . тоѧ̀ мра́къ разгонѧ́юще , и҆ сн҃ы ꙗ҆влѧ́юще свѣ́та бл҃года́тїю , но́щи невѣ́дѣнїѧ рабо́тающихъ . Гл҃ъ ва́шихъ прⷪ҇ро́чески во всю̀ и҆зы́де вселе́ннꙋю вѣща́нїе спасе́ное . и҆ дѣле́съ свѣ́тлое ꙗ҆вле́нїе всю̀ зе́млю ѡ҆бтечѐ , дш҃а просвѣща́юще , бг҃огл҃ивїи гдⷭ҇ни а҆пⷭ҇ли . Все́льсѧ в̾ дш҃а́хъ ва́шихъ премꙋ́дрїи дх҃ъ прест҃ы́и , и҆ бг҃ови́дны ѿ ню́дъ содѣ́ла . всю́дꙋ ми́ръ проходѧ́ще , хра́мы разори́сте и҆́дольскїѧ бл҃года́тїю и҆ бг҃ови цр҃кви воз̾двиго́сте . боⷢ҇ . Сн҃а ѻ҆́ч҃а є҆диноро́днаго без̾мт҃ре пе́рвѣе , и҆ и҆з̾ тебѐ рожде́на оу҆вѣ́дѣвше без̾ ѻ҆ц҃а , бж҃їю мт҃рь и҆сповѣ́даемъ тѧ , без̾стра́стнѡ ро́ждьшꙋю , и҆ дв҃ою пребы́вшꙋ па́че сло́ва мр҃і́е бг҃оневѣ́стнаѧ .

сѣда́ленъ . гла́съ , а҃ . Є҆ра́ста и҆ ѻ҆лѵ́мба , сѡсипа́тра и҆ те́ртїѧ , и҆ родїѡ́на кꙋ́пнѡ и҆ кꙋа́рта па́мѧть согла́снѡ почте́мъ . к̾ ни́мъ воспѣва́юще , бжⷭ҇твенїи проповѣ́датели и҆ слꙋгѝ сло́ва , дш҃а на́ша вѣ́чнꙋющїѧ мꙋ́ки моли́твами ва́шими и҆зба́вите . сла́ва , и҆ ны́нѣ , боⷢ҇ . Без̾невѣ́стнаѧ чи́стаѧ бцⷣе дв҃о , є҆ди́на вѣ́рнымъ пред̾ста́тельнице и҆ покро́ве , бѣ́дъ и҆ скорбе́й и҆ лю́тыхъ ѡ҆бстоѧ́нїи всѣ́хъ и҆зба́ви , и҆́же на тѧ̀ оу҆пова́нїе ѻ҆трокови́це и҆мꙋ́щихъ , и҆ дш҃а на́ша спасѝ бжⷭ҇твеными мл҃твами сѝ . крⷭ҇тобоⷢ҇ . Нескве́рнаѧ а҆́гница , а҆́гньца и҆ па́стырѧ ви́сѧща ме́ртва на́ древѣ зрѧ́щи , рыда́ющи вѣща́ше , мт҃рьски восклица́ющи ; ка́кѡ претерплю̀ твоѐ є҆́же па́че сло́ва сн҃е мо́й сни́тїе , и҆ во́льныѧ стра́сти , бж҃е пребл҃гі́и .

пѣ́снь , д҃ . і҆рмо́съ . Го́рꙋ тѧ бл҃года́тїю бж҃їею присѣ́ннꙋ , прозорли́выма а҆вва́кꙋмъ оу҆смотри́въ ѻ҆чи́ма , и҆з̾ тебѐ и҆зы́ти і҆и҃леви , провоз̾глаша́ше ст҃а́гѡ , на спасе́нїе на́ше и҆҆ ѡ҆бновле́нїе . Оу҆твержде́нїе дре́вле неꙋтвержде́нымъ бы́вше , раскопа́сте ва́шими бг҃ода́нными оу҆че́нїи вра́жїѧ оу҆твержде́нїѧ всѧ́ческаѧ , и҆ запꙋстѣ́нїю преда́сте , бг҃ови́днїи сп҃совы а҆пⷭ҇ли . Вельмѝ хрⷭ҇то́ва вели́чїѧ проповѣ́дающе оу҆мале́нїе всеконе́чнѡ , великопроповѣ́дницы . земны́хъ вельмѝ просвѣти́сте свѣ́тлѡ , вели́чїемъ бл҃года́ти соверши́вше бжⷭ҇твенїи а҆пⷭ҇ли . Да похва́литсѧ бжⷭ҇твеныи ѻ҆лѵ́мбъ пѣ́сньми , и҆ родїѡ́нъ с̾ ни́мъ да возвели́читсѧ бл҃гоче́стнѡ . тече́нїе соверши́вше мꙋче́нїѧ , с̾ петро́мъ бг҃опроповѣ́дникѡмъ в̾ ри́мѣ глава́ми оу҆сѣка́еми . боⷢ҇ . Чꙋдесе́мъ чꙋ́до бо́льше всѣ́хъ пренепоро́чнаѧ , в̾ тебѣ̀ ѡ҆бно́вльшеесѧ чꙋ́до показа̀ ꙗ҆́вственѡ . бг҃а бо родила̀ є҆сѝ , тѣле́снѣ земны́мъ за милосе́рдїе соеди́ньшасѧ , въ несмꙋ́тнѣмъ смѣше́нїи бг҃оневѣ́стнаѧ .

пѣ́снь , є҃ . і҆рмо́съ . Просвѣще́й сїѧ́нїемъ прише́ствїѧ твоегѡ̀ хрⷭ҇тѐ , и҆҆ ѡ҆свѣще́и крⷭ҇то́мъ си мирскі́ѧ концы̀ , срⷣца̀ просвѣтѝ свѣ́томъ твоегѡ̀ бг҃оразꙋ́мїѧ , правовѣ́рнѡ хва́лѧщимъ тѧ . Премꙋ́дрость ѻ҆́ч҃а , и҆́же всѧ̀ ѡ҆сꙋ́ществовавшаѧ , оу҆чи́тели в̾ ми́ръ ва́съ посла̀ , в̾ мꙋ́дрости дх҃а и҆́стины ꙗ҆вле́нїѧ всѧ̀ оу҆мꙋдрѧ́юща сла́внїи . Слове́снꙋю вмета́юще премꙋ́дрїи оу҆́дицꙋ , и҆з̾влеко́сте и҆з̾ глꙋбины̀ невѣ́денїѧ бл҃года́тїю ры́бъ сꙋ́ще без̾гла́снѣйша , и҆ гдⷭ҇ви вѣ́ровавшихъ приведо́сте . Восхва́лимъ ѻ҆лѵ́мба , и҆ вели́кагѡ и҆ родїѡ́на , и҆ те́ртїѧ и҆ сѡсипа́тра , кꙋ́пнѡ и҆ є҆ра́ста , и҆ бжⷭ҇твенагѡ кꙋа́рта , хрⷭ҇то́вы проповѣ́дники , и҆ всѣ́мъ бл҃гочести́вымъ застꙋ́пники . боⷢ҇ . Зачала̀ є҆сѝ сло́вомъ сло́во всенепоро́чнаѧ , и҆ родила̀ є҆сѝ па́че оу҆ма̀ и҆ сло́ва бг҃оневѣ́стнаѧ бцⷣе чл҃ка . тѣ́мъ тѧ̀ словесы̀ бг҃одохнове́нными всегда̀ оу҆блажа́емъ .

пѣ́снь , ѕ҃ . і҆рмо́съ . Ѡ҆бы́де на́съ послѣ́днѧѧ бе́здна , нѣ́сть и҆҆збавлѧ́ѧи , в̾мѣни́хомсѧ ꙗ҆́кѡ ѻ҆вча̀ на заколе́нїе , спасѝ лю́ди своѧ̀ бж҃е на́шъ . ты́ бо крѣ́пость немощны́мъ и҆҆ и҆҆справле́нїе . Пречестні́и мч҃нцы , ꙗ҆́кѡ ка́менїе валѧ́еми на землѝ . привали́сте к̾ бл҃гоче́стїю и҆́же нра́вомъ лꙋка́вымъ ка́менїю нече́стїѧ слꙋжа́щїѧ бг҃ови́днїи сло́вꙋ таи́нницы бл҃же́ннѣйшїи . Є҆ди́ницꙋ въ тре́хъ ли́цѣхъ неразлꙋ́чнꙋ несмꙋ́тнꙋ проповѣ́дающе . многобо́жїѧ ѿ землѝ разори́сте ле́сть , неле́стнїи хрⷭ҇то́ви а҆пⷭ҇ли . и҆ лю́тѣ прельще́ныхъ к̾ свѣ́тꙋ бг҃оразꙋ́мїѧ наста́висте . Ра́зꙋмы кра́сными несмы́сльство немꙋ́дрыхъ премꙋ́дрїи а҆пⷭ҇ли разори́сте . и҆ оу҆тверди́сте бг҃ꙋ всѣ́хъ цр҃ю є҆ди́номꙋ вѣ́ровати , тва́рь всю̀ бжⷭ҇твеными свѣтоли́тїи оу҆краша́ющꙋ . боⷢ҇ . Ꙗ҆́кѡ дрꙋго́е нб҃о , пе́рвагѡ влⷣчце ꙗ҆́вльшисѧ высоча́е , тѧ̀ сла́вимъ , сл҃нце на́мъ пра́ведное восїѧ́вшꙋ , глꙋбо́кꙋю тмꙋ̀ ѿгна́вша .

конда́къ . гла́съ , в҃ . Бжⷭ҇твенымъ свѣ́томъ оу҆ма̀ ѡ҆зарѧ́еми , виті́йскаѧ плете́нїѧ мꙋ́дре разори́сте , и҆ ꙗ҆зы́ки всѧ̀ оу҆ло́вльше а҆пⷭ҇ли сла́внїи влⷣцѣ приведо́сте , трⷪ҇цꙋ бжⷭ҇твенꙋю сла́вити наꙋчи́сте . и҆́косъ . Ꙗ҆́кѡ оу҆ченицы̀ всѣ́хъ влⷣки , мреже́ю бг҃ови́дцы ва́шихъ моли́твъ и҆з̾ глꙋбины̀ прегрѣше́нїи и҆з̾влецы́те смире́нꙋю дш҃ꙋ мою̀ , сѣтьмѝ оу҆ловленꙋ̀ бѣсо́вскихъ козне́й . да до́брѣ преше́дъ про́чее вре́мѧ моѐ , пою̀ ва́съ любо́вїю , и҆ просла́влю житїѐ непоро́чное , є҆́же на землѝ соверши́сте , лю́тѣ ѡ҆мраче́нныѧ просвѣти́вше , трⷪ҇цꙋ бжⷭ҇твенꙋю сла́вити наꙋчи́сте .

пѣ́снь , з҃ . і҆рмо́съ . Тебѐ мы́сленнꙋю бцⷣе пе́щь , раз̾смотрѧ́емъ вѣ́рнїи , ꙗ҆́коже бо ѻ҆́троки спасѐ трѝ превозноша́емыи , ми́ръ ѡ҆бнови́лъ є҆́сть , во́ чревѣ твое́мъ соверше́нъ , восхвалѧ́емыи ѻ҆ц҃е́мъ бг҃ъ и҆҆ препросла́вленъ . Тѧ̀ сщ҃е́нна и҆коно́ма є҆ра́сте цр҃кве хрⷭ҇то́вѣ во і҆єрⷭ҇ли́мѣ пиша̀ проповѣ́даше па́велъ а҆пⷭ҇лъ . с̾ ни́мъ же тѧ̀ почита́емъ , вопїю́ще хрⷭ҇то́ви , восхвалѧ́емыи ѻ҆ц҃ъ на́шихъ бж҃е бл҃гослове́нъ є҆сѝ . Терпѣ́нїемъ и҆скꙋше́нїи и҆ скорбе́й , и҆ гоне́нїемъ напа́ствꙋемь , и҆ ꙗ҆́звами хрⷭ҇то́выми оу҆добрѧ́емь є҆ра́сте пребога́те . велегла́снѡ зовѧ́ше , восхвалѧ́емыи ѻ҆ц҃е́мъ бж҃е бл҃гослове́нъ є҆сѝ . Зако́на но́вагѡ ꙗ҆ви́сѧ кꙋа́рте возвѣсти́тель . ве́тхагѡ без̾зако́нїѧ ѿводѧ̀ чꙋжемꙋ́дреныѧ , к̾ но́вѣйшемꙋ животꙋ̀ приводѧ̀ , зовꙋ́щихъ , восхвалѧ́емыи ѻ҆ц҃е́мъ бж҃е бл҃гослове́нъ є҆сѝ . боⷢ҇ . Ѻ҆́ч҃ее сло́во соприсносꙋ́щное , ꙗ҆́вльшеесѧ земны́мъ воплоти́ла є҆сѝ , и҆ тѣ́ломъ ѻ҆трокови́це породѝ , чл҃ка бы́вша , да спасе́тъ чл҃ка . хвали́маго ѻ҆ц҃е́мъ бг҃а , и҆ препросла́влена .

пѣ́снь , и҃ . і҆рмо́съ . Впещѝ дѣ́ти і҆и҃левы , ꙗ҆́коже в̾ горни́лѣ добро́тою бл҃гоче́стїѧ , чистѣ́е зла́та блеща́хꙋсѧ гл҃юще , бл҃гослови́те всѧ̀ дѣ́ла гдⷭ҇нѧ гдⷭ҇а , по́йте и҆҆ превозноси́те є҆гѡ̀ во́ вѣки . Нерꙋши́мїи столпѝ хрⷭ҇то́вѣ ꙗ҆́вльшесѧ цр҃кви , разори́сте ѕлоче́стїѧ стѣ́ны всѧ̀ , вѣ́рныѧ же ꙗ҆́кѡ ка́менїе назида́юще на ка́мени вѣ́ры . вопїю́щихъ , всѧ̀ дѣ́ла гдⷭ҇а по́йте , и҆҆ превозноси́те є҆гѡ̀ во́ вѣки . Законополо́жницы ꙗ҆ви́стесѧ вы̀ , дх҃о́вныи зако́нъ написꙋ́юще въ срⷣца̀ вѣ́рныхъ пребл҃же́ннїи . и҆́мже просвѣща́еми вопїѧ́хꙋ , всѧ̀ дѣ́ла гдⷭ҇а по́йте , и҆҆ превозноси́те є҆гѡ̀ во́ вѣки . Оу҆краси́сѧ бл҃же́нныи ѻ҆лѵ́мбе , во́нь же де́нь пе́тръ вели́кїи коне́цъ прїѧ́тъ , ꙗ҆́вѣ сконча́всѧ , кꙋ́пнѡ с̾ родїѡ́номъ мече́мъ , повелѣ́нїемъ нерѡ́новымъ без̾зако́ннагѡ царѧ̀ , и҆ совокꙋпи́стесѧ с̾ нбⷭ҇нымъ ли́ки . боⷢ҇ . Рꙋ́чка дре́вле и҆мꙋ́щи ма́ннꙋ чⷭ҇таѧ воѡ҆бража́ше тѧ̀ , хрⷭ҇та́ бо сла́дость на́шꙋ понесла̀ є҆сѝ во́ чревѣ , и҆ пло́тїю породѝ , и҆збавлѧ́ющаго всѧ́кїѧ го́рести без̾мѣ́стныхъ прегрѣше́нїи , превозносѧ́щихъ є҆гѡ̀ во́ вѣки .

пѣ́снь , ѳ҃ . і҆рмо́съ . Ѻ҆́бразъ чи́стагѡ ржⷭ҇тва̀ твоегѡ̀ , распала́емꙋ кꙋпинꙋ̀ , ꙗ҆вѝ неѡ҆пали́мꙋ . и҆҆ ны́нѣ на на́съ напа́стей свирѣ́пѣющꙋю оу҆гаси́ти мо́лимсѧ пе́щь , да тѧ̀ бцⷣе непреста́ннѡ велича́емъ . Равно̀ тече́нїе соверши́вше , равно̀ ѿ влⷣки сло́ва ѡ҆бога́щшесѧ , ра́вныхъ дх҃о́вныхъ даро́въ сподо́бистесѧ , и҆ по́чести равно̀ полꙋчи́сте а҆пⷭ҇ли гдⷭ҇ни , просвѣти́теле срⷣцъ на́шихъ . Ꙗ҆́коже нбⷭ҇ныѧ ѕвѣ́зды , бг҃озна́менїи всю̀ зе́млю просвѣти́сте , тмꙋ̀ глꙋбо́кꙋю невѣ́дѣнїѧ ѿгна́вше . и҆ сн҃ы дне́ви ꙗ҆влѧ́юще , дре́вле порабо́щеныхъ козньмѝ враже́бника . По́лкъ бѣсо́въ погꙋби́сте , во глꙋбинꙋ̀ дре́вле ври́нꙋвша ꙗ҆зы́ки лю́дїи . мно́жество же бг҃ови приведо́сте спаса́емыхъ , чино́мъ совокꙋплѧ́еми невеще́ственыхъ си́лъ , всеи҆збра́ннїи хрⷭ҇то́ви а҆пⷭ҇ли . Взѧ́тсѧ к̾ преми́рнымъ ѻ҆лѵ́мбъ вели́кїи , и҆ сѡсипа́тръ , и҆ те́ртїи , кꙋ́пно же и҆ родїѡ́нъ , и҆ кꙋа́ртъ , и҆ є҆ра́стъ сщ҃е́ннїи , ны́нѣ ѡ҆́ мирѣ и҆зба́вителѧ мо́лѧтъ . боⷢ҇ . Пощадѝ лю́ди своѧ̀ гдⷭ҇и , нахожде́нїѧ ва́рварскагѡ на́съ и҆збавлѧ́ѧ , и҆ грѣхо́въ и҆ напа́стей и҆ мꙋ́ки вѣ́чныѧ , мл҃твами ро́ждьшїѧ тѧ̀ дв҃ы прест҃ы́ѧ , и҆ сла́вныхъ а҆пⷭ҇лъ твои́хъ .

свѣти́ленъ . Свѣ́тлаѧ прїѧ́телища дх҃а ст҃а́гѡ пресвѣ́тлыѧ зарѝ невече́рнѧгѡ днѐ , свѣтода́тельныѧ мо́лнїѧ а҆пⷭ҇лы , въ пѣ́снехъ вѣ́рнѡ просла́вимъ всѝ . боⷢ҇ . Тѧ̀ застꙋ́пницꙋ всѝ и҆́мамы грѣ́шнїи ѽ прест҃а́ѧ дв҃о . ты̀ бл҃гоꙋвѣ́тлива на́мъ содѣ́лай сн҃а своегѡ̀ , мт҃рьними си мольба́ми .

На литꙋргі́и . проки́менъ , ѱало́мъ дв҃довъ . во всю̀ зе́млю и҆зыдо́ша вѣща́нїе и҆́хъ , и҆ в̾ концы̀ вселе́нныѧ гл҃ы и҆́хъ . сти́хъ . нб҃са̀ повѣ́даютъ сла́вꙋ бж҃їю , творе́нїе же рꙋ́кꙋ є҆гѡ̀ возвѣща́етъ тве́рдь . а҆пⷭ҇лъ , к̾ =кори́нфѡмъ . зача́ло , рл҃а . а҆ллилꙋ́їѧ . и҆сповѣ́дѧтъ нб҃са̀ чꙋдеса̀ твоѧ̀ гдⷭ҇и , и҆́бо и҆́стинꙋ твою̀ в̾ цр҃кви ст҃ы́хъ . =є҆ѵⷢ҇а́лїе , ѿ =лꙋкѝ . зача́ло , н҃а . =прича́стенъ . во всю̀ зе́млю и҆зыдо́ша вѣща́нїе и҆́хъ , и҆ в̾ концы̀ вселе́нныѧ глаго́лы и҆́хъ .