МЦⷭ҇А ТОГО́ЖЕ ВЪ А҃І ДН҃Ь

ст҃ы́хъ мч҃нкъ ми́ны викто́ра и҆ вике́нтїѧ . =и҆ ст҃ы́ѧ мч҃нцы стефани́ды . и҆ прпⷣбнагѡ ѻ҆ц҃а на́шегѡ ѳео́дѡра стꙋди́та . И҆ ст҃а́гѡ и҆ бл҃же́ннагѡ маѯи́ма оу҆ро́дивагѡ , моско́вскагѡ чꙋдотво́рца . слꙋ́жба є҆мꙋ̀ пи́сана по се́й слꙋ́жбѣ .=

Ве́черъ , на гдⷭ҇и возва́хъ , стихѣ́ры мч҃нкѡмъ . гла́съ , д҃ . поⷣ . ꙗ҆́кѡ до́блѧ . Трезꙋ́бцы стрѣка́емь ,꙳ волꙋ́ѧми жи́лами бїе́мь ,꙳ и҆ ѻ҆гне́мъ тѣ́ло твоѐ и҆знꙋрѧ́емо ,꙳ не ѿве́ржесѧ и҆́мене хрⷭ҇то́ва спасе́нагѡ .꙳ не побежде́нъ мы́слїю ,꙳ ни кꙋми́рѡмъ поже́рлъ є҆сѝ .꙳ но бы́сть самово́льное заколе́нїе ,꙳ и҆ же́ртва чиста́ же ,꙳ и҆ совершена̀ мч҃нче ми́но ,꙳ влⷣцѣ своемꙋ̀ . Ѻ҆чи́ма и҆збода́емь ,꙳ и҆ на́ древѣ повѣ́шаемь ,꙳ и҆ свѣща́ми всю́дꙋ под̾жига́емь ,꙳ и҆ сверѣ́пствомъ сꙋдѧ́щагѡ жи́лы прерѣ́заемъ ,꙳ и҆ мече́мъ в̾ главꙋ̀ оу҆сѣка́емь ,꙳ ра́довашесѧ викто́ре сла́вне ,꙳ сострада́льче сп҃совъ ,꙳ побѣди́лъ є҆сѝ вра́жїѧ кова́рства ,꙳ содѣ́тельствомъ дх҃а ст҃а́гѡ . Вѣнча́ тѧ гдⷭ҇ь бл҃года́тнымъ вѣнце́мъ ,꙳ стефани́до многострада́льнаѧ .꙳ во́лею бо себѐ мꙋ́камъ предала̀ є҆сѝ ,꙳ дш҃е́вною до́блестїю .꙳ привѧ́зана же двѣма̀ ,꙳ раздѣли́сѧ фи́никома .꙳ и҆ возлетѣ̀ к̾ бг҃ꙋ ꙗ҆́кѡ птене́цъ ,꙳ пло́ть в̾ рꙋцѣ̀ ѡ҆ста́вльши лове́цъ ,꙳ мч҃нце достосла́внаѧ .

=и҆́ны , стихѣ́ры , прпⷣбномꙋ . гла́съ , и҃ . поⷣ . ѽ =пресла́вное чꙋ́до . Ѻ҆́ч҃е ѳео́дѡре ,꙳ вои́стинꙋ тезоимени́та ,꙳ па́че оу҆ма̀ дарова́нїѧ прїе́мъ ,꙳ бл҃гоче́стнѡ по́далъ є҆сѝ лю́бѧщимъ тѧ .꙳ и҆ оу҆мно́живъ бл҃же́нне тала́нтъ .꙳ бжⷭ҇твенагѡ гла́са оу҆слы́шалъ є҆сѝ ,꙳ внꙋ́трь зовꙋ́ща тѧ̀ черто́га ,꙳ и҆дѣ́же ны́нѣ живе́ши ,꙳ оу҆ прⷭ҇то́ла всѣ́хъ цр҃ѧ досточꙋ́дне . Ѻ҆́ч҃е ѻ҆ц҃е́мъ ѳео́дѡре ,꙳ ты̀ є҆ди́нствꙋющихъ мно́жества ,꙳ хрⷭ҇то́ви приве́лъ є҆сѝ .꙳ спасе́нїѧ вина̀ бы́въ бг҃оподо́бна ,꙳ оу҆че́нїемъ ѡ҆зарѧ́емь ,꙳ и҆ застꙋпле́нїемъ дш҃ъ оу҆краша́емь ,꙳ оу҆ставлѧ́ѧ гдⷭ҇нѧ премꙋ́дре проро́чески .꙳ є҆мꙋ́же ны́нѣ пред̾стоѧ̀ ,꙳ на́съ помина́й . Бл҃года́ть ѡ҆би́льнаѧ дх҃а ,꙳ сщ҃еннотаи́нниче мꙋ́дре ,꙳ и҆з̾лїѧ́сѧ во оу҆стна́хъ твои́хъ ,꙳ и҆ и҆сто́чникъ и҆ скипѣ̀ оу҆че́нїи ѳео́дѡре ,꙳ бл҃гоче́стїю ꙗ҆́вльши побо́рника ,꙳ и҆ и҆́стинѣ ѕѣ́льна собесѣ́дника ,꙳ столпа̀ оу҆твержде́нїѧ правосла́вныѧ вѣ́ры .꙳ и҆́ноческомꙋ житїю̀ ,꙳ и҆звѣ́стнѣйшее пра́вило премꙋ́дре .

сла́ва , мч҃нкѡмъ . гла́съ , ѕ҃ . Па́ки на́мъ лѣ́тнаѧ па́мѧть мирски́хъ свѣти́лъ восїѧ̀ , ми́ны же и҆ викто́ра и҆ вике́нтїѧ , вѣ́рныхъ сердца̀ просвѣща́ющи , и҆́же по хрⷭ҇тѣ̀ и҆ за крⷭ҇тъ є҆гѡ̀ подвиза́нїи . тѣ́мже сла́вою и҆ че́стїю вѣнча́вшагѡ и҆́хъ хрⷭ҇та̀ бг҃а на́шегѡ в̾ пѣ́снехъ почита́емъ . и҆ ны́нѣ , боⷢ҇ . и҆лѝ , крⷭ҇тобоⷢ҇ . поⷣ . в̾ =тре́тїи де́нь . Л=юде́й без̾зако́нныхъ ,꙳ непра́веднѡ пригво́жд̾шихъ тѧ̀ на́ древѣ ,꙳ дв҃а чⷭ҇таѧ и҆ мт҃и твоѧ̀ зрѧ́щи ,꙳ ꙗ҆́коже сѷмеѡ́нъ проречѐ ,꙳ оу҆тро́бою сп҃се пробода́шесѧ .

На стихо́внѣ , во ѻ҆кта́и . и҆ мч҃нкѡмъ , сти́хъ : гла́съ , в҃ . мно́ги ско́рби пра́веднымъ ,꙳ и҆ ѿ всѣ́хъ и҆́хъ и҆з̾ба́витъ ѧ҆̀ гдⷭ҇ь . Прїиди́те любострада́льцы , трисїѧ́нныи мч҃нкъ почте́мъ ли́къ , ми́ны и҆ викто́ра и҆ вике́нтїѧ . ꙗ҆́кѡ кро́ви да́ша , и҆ кꙋпи́ша вѣ́чныи живо́тъ . тѣ́мъ и҆ терпѣли́во ѿвѣщава́хꙋ ѕлы́хъ ѡ҆брета́телю , не и҆збере́мъ тлѣ́ннаѧ па́че нетлѣ́нныхъ , нево́инствꙋемъ царю̀ ме́ртвенꙋ земно́мꙋ , но живо́мꙋ цр҃ю во́инствꙋемъ . при́снѡ вопїю́щꙋ вѣ́рнымъ , вѣ́рꙋѧи в̾ мѧ̀ а҆́ще и҆ оу҆́мретъ жи́въ бꙋ́детъ . сла́ва . гла́съ , ѕ҃ . Прпⷣбне ѻ҆́ч҃е , во всю̀ зе́млю и҆зы́де вѣща́нїе и҆справле́нїи твои́хъ , тѣ́мъ на́ нб҃сѣхъ , ѡ҆брѣ́те мздꙋ̀ трꙋдо́въ твои́хъ , бѣсо́вскїѧ погꙋби́лъ є҆сѝ полчи́ща , и҆ а҆́нг҃льскїѧ дости́глъ є҆сѝ чи́ны , и҆́хже житїю̀ без̾ поро́ка поревнова́лъ є҆сѝ . дерзнове́нїе и҆мѣ́ѧ ко́ гдⷭ҇ꙋ , ми́ръ и҆спросѝ дш҃а́мъ на́шимъ . и҆ нн҃ѣ , боⷢ҇ . и҆лѝ , крⷭ҇тобоⷢ҇ . поⷣ . в̾ =тре́тїи де́нь . В=и́дѧщи тѧ̀ распина́ема хрⷭ҇тѐ тебѐ ро́ждьшаѧ , вопїѧ́ше , что̀ стра́нно є҆́же ви́жꙋ та́инство сн҃е мо́й . ка́кѡ на́ древѣ оу҆мира́еши пло́тїю повѣ́шенъ , всѣ́хъ животѐ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , д҃ . Мч҃нцы твоѝ гдⷭ҇и во страда́нїихъ свои́хъ вѣнцы̀ прїѧ́ша нетлѣ́нныѧ ѿ тебѐ бг҃а на́шегѡ . и҆мꙋ́ще бо крѣ́пость твою̀ непобѣдимꙋю , мꙋ́чащихъ оу҆праздни́ша , и҆ разрꙋши́ша бѣсо́мъ немощна́ѧ шата́нїѧ . тѣ́хъ моли́твами хрⷭ҇тѐ бж҃е спасѝ дш҃а на́ша .

сла́ва , прпⷣбномꙋ . гла́съ , и҃ . Правосла́вїю наста́вниче , и҆ бл҃гоче́стїѧ оу҆чи́телю и҆ чистотѣ̀ , вселе́ннѣй свѣти́льниче , и҆́ночествꙋющимъ бг҃одохнове́нное оу҆добре́нїе , ѳео́дѡре премꙋ́дре . оу҆че́нїемъ бо свои́ми всѧ̀ просвѣти́лъ є҆сѝ , цѣвни́це дх҃о́внаѧ , молѝ хрⷭ҇та̀ бг҃а спасти́сѧ дш҃а́мъ на́шимъ . и҆ ны́нѣ , боⷢ҇ . и҆лѝ , крⷭ҇тобоⷢ҇ .

На оу҆́трени . є҆ди́нъ кано́нъ , во ѻ҆кта́и , со і҆рмосо́мъ , на́ ѕ҃ . и҆ ст҃ы́мъ два̀ , на́ и҃ . кано́нъ , мч҃нкѡмъ , і҆ѡа́нна мни́ха . гла́съ , д҃ . пѣ́снь , а҃ . і҆рмо́съ . Ли́цы і҆зра́ильтестїи невла́жными стопа́ми , по́нта чермна́гѡ морскꙋ́ю глꙋбинꙋ̀ прогна́вше . вса́дники тристоѧ́ща врагѝ ви́дѧщи в̾ не́й погрꙋже́ны , с̾ весе́лїемъ поѧ́хꙋ , пое́мъ бг҃ꙋ на́шемꙋ , ꙗ҆́кѡ просла́висѧ .

запѣ́въ : Ст҃і́и мч҃нцы , моли́те бг҃а ѡ҆ на́съ . Лю́дїе сщ҃е́ннїи съ мѡѷсе́ѡмъ сла́внымъ , и҆ с̾ марїа́мъ жено́ю мꙋ́дрою и҆ прⷪ҇рчицею , не глꙋбинꙋ̀ чермнꙋ́ю , но ны́нѣ ми́ны страда́льца проходѧ́ще мо́ре по́двигъ сла́внѡ , пое́мъ бг҃ꙋ на́шемꙋ , ꙗ҆́кѡ просла́висѧ . Ꙗ҆́ростїю преще́нїѧ и҆ ре́вностїю гнѣ́ва ды́ша , свирѣпогꙋби́тель и҆ без̾зако́нныи мꙋчи́тель , ꙗ҆́кѡ хрⷭ҇то́въ во́инъ пред̾ста́ти и҆зво́лилъ є҆сѝ ми́но бл҃гоче́стїю побо́рниче . є҆мꙋ́же и҆ свѣти́льникъ ꙗ҆ви́сѧ , взыва́ѧ , пое́мъ бг҃ꙋ на́шемꙋ , ꙗ҆́кѡ просла́висѧ . Є҆гда̀ вознесꙋ́сѧ привлекꙋ̀ земны́ѧ ты̀ хрⷭ҇тѐ проречѐ , дѣ́ломъ же соверши́лъ є҆сѝ , мч҃нческїѧ чи́ны и҆ лю́ди ѿ коне́цъ призва̀ , в̾ ра́дости пою́ща , пое́мъ бг҃ꙋ на́шемꙋ , ꙗ҆́кѡ просла́висѧ . боⷢ҇ . Же́злъ а҆арѡ́новъ прозѧ́бшїи , и҆́же ѿ і҆єссе́ѧ проѡ҆бразова́ше возра́стшїи ко́рень тѧ̀ дв҃о , нетлѣ́нныи цвѣ́тъ ми́рови восїѧ́вшꙋ бг҃а воплоще́нна . є҆го́же ѡ҆ на́съ бцⷣе молѝ прⷭ҇нѡ , прибѣга́ющихъ к̾ тебѣ̀ .

дрꙋгі́и , кано́нъ , прпⷣбномꙋ . є҆мꙋ́же краегране́сїе сицево̀ : сла́внаго ѳео́дѡра в̾ пѣ́снехъ почита́ю . творе́нїе і҆ѡ́сифово . гла́съ , и҃ . пѣ́снь , а҃ . і҆рмо́съ . Воѡ҆рꙋже́на фараѡ́на погрꙋзѝ , чꙋдотворѧ́й дре́вле , мѡѷсе́йскїи же́ѕлъ крⷭ҇тоѡ҆бра́знѡ проразѝ , и҆ раздѣлѝ мо́ре . і҆и҃лѧ же бѣжа́ща , пѣ́ша ходѧ́ща спасѐ , пѣ́снь бг҃ови воз̾сыла́юща .

запѣ́в̾ : Прпⷣбне ѻ҆́ч҃е ѳео́дѡре , молѝ бг҃а ѡ҆ на́съ . Свѣтода́тельными блиста́нїи дх҃а ст҃а́гѡ просвѣща́емь . всесвѣ́тлыи сто́лпъ бы́лъ є҆сѝ , наставлѧ́ѧ бг҃огла́се къ землѝ ѡ҆бѣща́нїѧ бг҃омꙋ́дренѡ тща́щихсѧ , таи́нниче неи҆зрече́нныхъ ѳео́дѡре . Всера́достнѡ неѡ҆сла́бными манове́нїи к̾ бг҃ꙋ пристꙋпа́ѧ . пре́жде конца̀ ꙗ҆ви́сѧ ме́ртвостїю живоно́сною ѡ҆дѣ́ѧнъ прпⷣбне , и҆ живо́тъ нестарѣ́ющїи нн҃ѣ прїѧ́тъ досто́йнѡ , ѻ҆́ч҃е бг҃оно́се ѳео́дѡре . Побѣди́въ страстна́ѧ и҆гра́нїѧ , и҆ мꙋчи́тельскаѧ оу҆стремле́нїѧ , ю҆́ношески бл҃же́нне , всѧ̀ оу҆кори́лъ є҆сѝ , дерзнове́нною дш҃е́ю . хрⷭ҇то́въ ѻ҆́бразъ честѝ наꙋча́ѧ бг҃опрїѧ́тне , и҆ ст҃ы́хъ воѡ҆браже́нїѧ . Ѡ҆чище́ною мы́слїю премꙋ́дре , бг҃одх҃нове́ннымъ писа́нїемъ поꙋча́емь , бога́тство добродѣ́телей собра̀ . и҆ бл҃гоче́стїѧ оу҆че́нїи , видѣ́нїемъ ѡ҆богати́сѧ , и҆ житїѧ̀ свѣ́тлостїю , восїѧ́въ ѡ҆бою́дꙋ прпⷣбне . боⷢ҇ . Сло́во бж҃їе воплоще́нное родила̀ є҆сѝ , и҆́же пре́жде беспло́тное , бг҃омꙋ́жнѡ ми́рови совокꙋ́пльшасѧ па́че є҆стества̀ всенепоро́чнаѧ бцⷣе дв҃о . тѣ́мъ тѧ̀ всѝ почита́емъ , по́ бз҃ѣ застꙋ́пницꙋ на́шꙋ .

пѣ́снь , г҃ . і҆рмо́съ . Немꙋ́дростїю ни си́лою , ни бога́тствомъ хва́лимсѧ , но твое́ю ѻ҆́ч҃ею соста́вною мꙋ́дростїю бж҃їею . ꙗ҆́кѡ нѣ́сть ст҃а па́че тебѐ чл҃колю́бче . Гони́мь премꙋ́дрыми тѝ словесы̀ мꙋчи́тель , тѧ̀ оу҆ранѧ́етъ немлⷭ҇тивнѡ сꙋровы́ми жи́лами говѧ́жїими , мнѣ́въ си́ми преклони́ти тѧ̀ мч҃нче непобѣди́ме . Взира́ѧ ѻ҆чи́ма разꙋ́мныма къ гдⷭ҇ꙋ , плотьскі́ѧ тѧготы̀ и҆ мꙋче́нїѧ ѻ҆́блаки претерпѣ́лъ є҆сѝ , нра́вомъ до́блимъ достосла́вне . Не оу҆боѧ́всѧ мꙋче́ней ѕѣлѡ̀ болѣ́зненыхъ , дыша̀ ре́вностїю бжⷭ҇твеною к̾ подвиго́мъ ѿлꙋчи́сѧ , зовы́и , неи҆ско́мъ прїидо́хъ самозва́нъ . боⷢ҇ . Ѿ а҆́довыхъ мѧ̀ вра́тъ и҆з̾ тебѐ воплоще́исѧ и҆зведѐ , дре́ва вкꙋ́сомъ лꙋка́вымъ оу҆мерщве́наго всенепоро́чнаѧ , сме́рть во́льнꙋю прїе́мыи .

и҆́нъ , і҆рмо́съ . Оу҆тверже́и нб҃са̀ в̾ нача́тцѣ ра́зꙋмомъ , и҆ зе́млю на вода́хъ ѡ҆снова́выи . на ка́мени мѧ хрⷭ҇тѐ цр҃ко́внѣмъ оу҆твердѝ , ꙗ҆́кѡ нѣ́сть ст҃а , па́че тебѐ чл҃колю́бче . Вжилѧ́емъ хрⷭ҇то́вымъ всебл҃же́нне ѡ҆гражде́нїемъ , ꙗ҆́звы болѣ́зненыѧ претерпѣ̀ оу҆ранѧ́емъ лю́тѣ , и҆ в̾ темни́цѣ затворѧ́емь , ꙗ҆́кѡ ѻ҆́бщникъ стрⷭ҇ти и҆ црⷭ҇твїю бы́сть . Бг҃омъ покрыва́емь ꙗ҆́вѣ , и҆ тогѡ̀ ре́вностїю разжига́емь , скве́рнаѧ оу҆че́нїѧ без̾зако́нныхъ разрꙋши́лъ є҆сѝ твои́ми оу҆че́нїи премꙋ́дре , бл҃года́тїю бо ѿ́ бг҃а ѻ҆́ч҃е ѡ҆бога́тисѧ досто́йнѡ . Въ видѣ́нїи дѣ́теленъ , въ дѣѧ́нїи бг҃осло́вецъ бы́лъ є҆сѝ на́мъ бг҃огл҃иве . по́стныи оу҆чи́тель , сщ҃енномч҃нкъ сла́венъ , правосла́вїѧ сто́лпъ , цр҃ко́вное оу҆тверже́нїе . боⷢ҇ . Сопрⷭ҇носꙋ́щное ѻ҆ц҃ꙋ и҆ сопрⷭ҇то́льное бг҃ъ сло́во , ѡ҆бнови́ти восхотѣ́въ родонача́льника . по соста́вꙋ тогѡ̀ и҆з̾ тебѐ чⷭ҇таѧ прїѧ́тъ , ст҃ѣ́йшꙋ всѣ́хъ тѧ̀ бг҃омт҃и ѡ҆брѣ́тъ .

конда́къ . гла́съ , д҃ . И҆́же сла́вѣ гдⷭ҇и , и҆ всѣ́хъ содѣ́телю , ты̀ в̾ ми́рѣ ꙗ҆ви́лъ є҆сѝ оу҆краше́ныхъ добродѣ́тельми страстоте́рпцы и҆ мч҃нки , да и҆́мꙋтъ непобѣди́мꙋю побѣ́дꙋ . и҆́косъ . Вели́кїи хода́тай на́мъ бы́сть весе́лїѧ па́мѧть мч҃нкъ , на́ страсти мꙋ́жество и҆ побѣ́дꙋ на врагѝ ꙗ҆влѧ́ющихъ . въ свѣ́тлѣмъ и҆ ра́достнѣмъ и҆сповѣ́данїи бл҃года́ти . прїиди́те оу҆́бѡ празднолю́бцы всѝ , и҆ возвесели́мсѧ , вре́мѧ на́шегѡ весе́лїѧ бо́льшее и҆ пребыва́ющее , ми́ны страда́льца па́мѧть соверша́юще , и҆ прїе́млюще страсте́мъ разрѣше́нїѧ да́ръ . сего́же да́тель хрⷭ҇то́съ бг҃ъ є҆́сть , и҆́же и҆́мать непобѣди́мꙋю побѣ́дꙋ .

сѣда́ленъ . гла́съ , и҃ . И҆́же пре́жде невѣ́дѣнїѧ мра́комъ лю́тымъ бг҃омꙋ́дре мч҃нче ми́но ѡ҆держи́мь є҆гѵ́петъ , восїѧ̀ тѧ̀ свѣти́льника всеми́рна , без̾бо́жїѧ но́щь крѣ́пкѡ ѿгонѧ́ща , зарѧ́ми бл҃же́нне бжⷭ҇твеныхъ по́двигъ твои́хъ . тѣ́мъ свѣтоно́сныи и҆ честны́и тво́й де́нь свѣ́тлѡ пра́зднꙋюще прилѣ́жнѡ зове́мъ тѝ , страда́льцемъ оу҆добре́нїе , молѝ хрⷭ҇та̀ бг҃а , грѣхо́въ ѡ҆ставле́нїе пода́ти , чтꙋ́щимъ любо́вїю ст҃ꙋ́ю па́мѧть твою̀ . и҆́нъ , сѣда́ленъ , прпⷣбномꙋ . гла́съ , г҃ . Бжⷭ҇твенаѧ повелѣ́нїѧ оу҆мно́живъ , вѣ́рꙋ соблю́лъ є҆сѝ правосла́вїѧ , бѣды̀ прїе́мъ ѡ҆ не́й ѳео́дѡре , в̾ заточе́нїи пострада́въ ра́нами , въ темни́цахъ претерпѣ́въ ѡ҆ѕлобле́нїѧ ѻ҆́ч҃е прпⷣбне . хрⷭ҇та̀ бг҃а молѝ , дарова́ти на́мъ ве́лїю млⷭ҇ть . сла́ва , и҆ ны́нѣ , боⷢ҇ . Бжⷭ҇твенаѧ бы́сть сѣ́нь сло́ва є҆ди́на пречⷭ҇таѧ дв҃о мт҃и , чистото́ю а҆́нг҃лъ превоз̾ше́дши . менѐ па́че всѣ́хъ пе́рсть бы́вша , ѡ҆скверне́на плотьски́ми прегрѣше́нїи , ѡ҆чи́сти мл҃твъ свои́хъ бжⷭ҇твеными вода́ми подаю́щи чи́стаѧ ве́лїю ми́лость . крⷭ҇тобоⷢ҇ . Нескве́рнаѧ а҆́гница , сло́вꙋ нетлѣ́ннаѧ дв҃а мт҃и на крⷭ҇тѣ̀ ви́дѣвши ви́сима , и҆́же и҆з̾ неѧ̀ без̾ болѣ́зни прозѧ́бшагѡ . мт҃рьски подо́бнѡ рыда́ющи взыва́ше , оу҆вы̀ мнѣ̀ ча́до моѐ , ка́кѡ стра́ждеши , хотѧ̀ и҆зба́вити ѿ страсте́й без̾че́стїѧ чл҃ка .

пѣ́снь , д҃ . і҆рмо́съ . Сѣдѧ́и во сла́вѣ , на прⷭ҇то́лѣ бжⷭ҇твеннѣ , на ѻ҆́блацѣ ле́гцѣ , прїи́де і҆с҃ъ пребжⷭ҇твенныи , ѿ пречⷭ҇тыѧ дв҃ы , спасе́ же вопїю́щїѧ , сла́ва хрⷭ҇тѐ си́лѣ твое́й . Кропле́нїемъ твои́хъ крове́й , погасо́ша оу҆́глїе многобо́жїѧ , по́лкъ же бѣсо́вскїи погрꙋзи́сѧ . хрⷭ҇то́ва же напои́сѧ цр҃кви , страстоте́рпче всебл҃же́нне ми́но хва́лѧщи тѧ . И҆́же на́ древѣ распѧ́таго воѡ҆бража́еши стра́сть кре́стнꙋю , и҆ ѕмі́ѧ оу҆мертви́вша , терза́нїѧ терпи́ши , хода́тайствꙋющаѧ тебѣ̀ наслажде́нїе и҆́же на́ нб҃сѣхъ до́блествене . Па́че є҆стества̀ болѣ́зней страда́льче и҆скꙋше́нїе прїѧ́тъ . и҆ бжⷭ҇твеное раче́нїе твоѐ ѡ҆бъе́мъ , є҆стество̀ забве́нїе прїѧ́ти творѧ́ше поꙋща́ѧ тѧ , простира́ѧ же к̾ ра́намъ ве́села . боⷢ҇ . Воплоще́нна неи҆зрече́ннѡ бг҃а породила̀ є҆сѝ , ѿ твои́хъ крове́й до́мъ себѣ̀ созда́вшаго , и҆́же в̾ двѣ̀ сꙋществѣ̀ и҆ хотѣ́нїи познава́ема бг҃олѣ́пнѡ неи҆скꙋсобра́чнаѧ .

и҆́нъ , і҆рмо́съ . Ты́ ми хрⷭ҇тѐ гдⷭ҇ь , ты́ же и҆ си́ла ми , ты́ ми бг҃ъ , ты́ ми ра́дованїе . не ѡ҆ста́вль нѣ́дра ѻ҆́ч҃а , но ми́лостїю си на́шꙋ нищетꙋ̀ посѣти́въ . тѣ́мъ съ проро́кѡмъ а҆вва́кꙋмомъ зовꙋ̀ , си́лѣ твое́й сла́ва чл҃колю́бче . Да́ръ бг҃омъ да́стсѧ ми́рови тезои҆мени́тнѡ , бога́тыми дармѝ сїѧ́ющь . ꙗ҆́кѡ и҆сто́чникъ и҆мы́и и҆́стиннѡ ѡ҆заре́ныи ѿ тꙋ́дꙋ бл҃же́нне ѳео́дѡре . тѣ́мъ оу҆чи́телемъ и҆ по́стникѡмъ и҆ мч҃нкѡмъ с̾ликоствова́ти мно́жествꙋ сподо́бисѧ . Ѽ тве́рдагѡ и҆ крѣ́пкагѡ тѝ противле́нїѧ и҆́мже мꙋчи́телемъ шата́нїе попра̀ . є҆го́же ра́ди ꙗ҆́вственѡ ты̀ па́че оу҆ма̀ бг҃онача́льства коне́чное бл҃же́нство пости́же бг҃омꙋ́дре . со беспло́тными поѧ̀ , си́лѣ твое́й сла́ва чл҃колю́бче . Гл҃ъ бж҃їи в̾ тебѣ̀ ꙗ҆́вствено все́льсѧ , повелѣ́нїи премꙋ́дре ѳео́дѡре рѣ́ки и҆сточѝ ѡ҆би́льнѡ . тѣ́мже ны́нѣ наслажда́ющесѧ оу҆че́нїи твои́хъ бг҃одх҃нове́нне , веселꙋ́еми вопїе́мъ гласы̀ немо́лчными , си́лѣ твое́й сла́ва чл҃колю́бче . боⷢ҇ . Всего̀ в̾ тебѣ̀ ѡ҆бновлѧ́ѧ чл҃ка , ве́сь всего̀ пречⷭ҇таѧ ѡ҆дѣ́ѧсѧ . и҆́же ѻ҆те́ческихъ нѣ́дръ не ѿстꙋ́пль , въ твою̀ оу҆тро́бꙋ всели́тисѧ и҆зво́ли . бога́тствомъ бл҃госе́рдїѧ во́лею ѡ҆бнища́въ , и҆ ѡ҆бога́ти ми́ра бжⷭ҇тво́мъ .

пѣ́снь , є҃ . і҆рмо́съ . Нечести́вїи не оу҆́зрѧтъ сла́вы твоеѧ̀ хрⷭ҇тѐ , но мы́ тѧ є҆диноро́дне ѻ҆́ч҃ее заре́нїе сла́вы бж҃їѧ . ѿ́ нощи оу҆́треннююще , воспѣва́емъ тѧ млрⷭ҇де . Свидѣ́тельства просїѧ̀ свѣ́тлыми лꙋча́ми . ѡ҆мрачи́въ те́мное без̾бо́жїе премꙋ́дре , просвѣти́лъ є҆сѝ вѣ́рныхъ и҆сполне́нїѧ , воспѣва́ющихъ тѧ̀ всехва́льне . Попра́но бы́сть всѐ оу҆хищре́нїе враго́въ , крѣ́пкимъ тѝ терпѣ́нїемъ . ни гла́дъ бо сла́вне , ни ѡ҆пале́нїе , ни трезꙋ́бецъ ѡ҆ѕлобле́нїе , твоегѡ̀ оу҆се́рдїѧ помрачи́ша . боⷢ҇ . Но́ва твори́тъ растлѣ́вша мѧ̀ ражда́емь и҆з̾ тебѐ па́че є҆стества̀ и҆зба́витель , дре́внїѧ мѧ̀ клѧ́твы свобожда́ѧ бг҃омт҃и чⷭ҇таѧ . є҆го́же молѝ спасти́ мѧ .

и҆́нъ , і҆рмо́съ . Вскꙋ́ю мѧ ѿри́нꙋ , ѿ лица̀ твоегѡ̀ свѣ́те незаходѧ́и , покры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ заповѣде́й ти пꙋтѝ моѧ̀ напра́ви молю́тисѧ . Оу҆́мъ и҆ дш҃ꙋ и҆ тѣ́ло сло́вомъ ѡ҆чи́стивъ , хра́мъ всече́стенъ бг҃ꙋ всѣ́хъ бы́лъ є҆сѝ , жи́въ же и҆ ѡ҆дꙋшевле́нъ . бл҃гово́ннꙋ же́ртвꙋ себѐ хрⷭ҇то́ви принесѐ ѻ҆́ч҃е , жре́цъ и҆ же́ртва быва́емь . Просвѣща́емь бл҃же́нне заре́ю дх҃о́вною , всѣ́мъ восїѧ́лъ є҆сѝ бг҃осло́внымъ ꙗ҆зы́кѡмъ сѝ трⷪ҇чныи свѣ́тъ пречⷭ҇тыи . и҆ є҆ди́наго ѿ трⷪ҇цы бж҃їѧ сло́ва па́че оу҆ма̀ воплоще́нїѧ неи҆зрече́нное ѻ҆́ч҃е та́инство . Разꙋ́мнѡ со а҆́нг҃лы ны́нѣ водворѧ́ѧсѧ . хрⷭ҇та̀ молѝ , страсте́й и҆ бѣ́дъ бл҃жа́щихъ , и҆ чтꙋ́щихъ всечⷭ҇тнꙋ́ю и҆ бжⷭ҇твенꙋю па́мѧть страда́нїи твои́хъ , бг҃оно́се ѳео́дѡре . боⷢ҇ . Неи҆згл҃аннымъ дв҃о ѻ҆́бразомъ сн҃ъ бж҃їи в̾ тѧ̀ всели́всѧ чл҃къ быва́етъ , и҆́же пре́жде вѣ́къ ѿ ѻ҆ц҃а восїѧ́въ , чл҃ка ѿ тлѝ и҆збавлѧ́ѧ , и҆ к̾ жи́зни нетлѣ́ннѣй воз̾ведѐ ꙗ҆́кѡ є҆ди́нъ милосе́рдъ .

пѣ́снь , ѕ҃ . і҆рмо́съ . Прїидо́хъ во глꙋбины̀ морскі́ѧ , и҆ потопи́ла мѧ є҆́сть бꙋ́рѧ мно́гихъ ми прегрѣше́нїи . но ꙗ҆́кѡ бг҃ъ , и҆з̾ тлѝ воз̾ведѝ живо́тъ мо́й многомлⷭ҇тиве . Пото́въ твои́хъ тече́нїи с̾примѣси́въ по́двигомъ пе́рсть , цр҃квь себѣ̀ мч҃нче нестарѣ́ющꙋюсѧ на́ нб҃сѣхъ ми́но со́здалъ є҆сѝ , хрⷭ҇тꙋ̀ своемꙋ̀ бы́въ ѻ҆би́тель . Весели́сѧ ми́но торжествꙋ́етъ бо тѝ цр҃кви правосла́внѡ ны́нѣ чтꙋ́щимъ любо́вїю . є҆рети́ческаѧ нечести́ваѧ оу҆че́нїѧ ѿ твоегѡ̀ гра́да ѿгонѧ́щи . Поты̀ своегѡ̀ страда́нїѧ ми́на и҆ викто́ръ и҆ вике́нтїи мч҃нцы бжⷭ҇твенїи , на сꙋди́щи врага̀ попра́вше побѣ́ды вѣнцы̀ прїѧ́ша .= боⷢ҇ . Н=епостоѧ́ннагѡ бжⷭ҇тва вмѣсти́лище чⷭ҇таѧ оу҆тро́ба твоѧ̀ позна́сѧ ѽ бг҃омт҃и , є҆го́же бе́з̾страха нбⷭ҇нїи чи́нове зрѣ́ти немо́гꙋтъ .

и҆́нъ , і҆рмо́съ . Ѡ҆чи́сти мѧ сп҃се , мно́га бо без̾зако́нїѧ моѧ̀ , и҆ и҆з̾ глꙋбины̀ ѕѡ́лъ воз̾веди́ мѧ молю́сѧ , к̾ тебѣ́ бо воз̾ва́хъ и҆ оу҆слы́ша мѧ , бж҃е спасе́нїѧ моегѡ̀ . Цѣломꙋ́дрено сво́й живо́тъ сщ҃енноглаго́льниче соверши́лъ є҆сѝ , пра́ведно же оу҆краси́сѧ мꙋ́жественою мꙋ́дростїю кра́снꙋю колесни́цꙋ добродѣ́телей сочета̀ себѣ̀ всебл҃же́нне прпⷣбне . Бл҃гоꙋха́ютъ бг҃олѣ́пнѡ повелѣ́нїи бжⷭ҇твенаѧ , словеса̀ твоѧ̀ и҆ ѿ глꙋбины̀ ѕѡ́лъ є҆ресе́й всѣ́хъ возво́дѧтъ мꙋ́дре правосла́вїѧ к̾ вы́шнѣй свѣ́тлости . Восїѧ̀ тебѣ̀ свѣ́тъ , и҆ сегѡ̀ ѻ҆́ч҃е сꙋпрꙋ́гъ весе́лїе ны́нѣ свѣ́тлое . ꙗ҆́кѡ фи́никъ бо процвѣ́лъ є҆сѝ всебл҃же́нне ѳео́дѡре , и҆ ꙗ҆́кѡ ке́дръ оу҆мно́жисѧ достосла́вне . боⷢ҇ . Да и҆зба́вимсѧ ѿ лю́тыхъ прегрѣше́нїи мольба́ми тѝ бг҃ороди́тельнице чⷭ҇таѧ , и҆ да оу҆лꙋчи́мъ прест҃а́ѧ бжⷭ҇твенагѡ сїѧ́нїѧ , и҆з̾ тебѐ неи҆зрече́ннѡ воплоще́ннагѡ сн҃а бж҃їѧ .

конда́къ . гла́съ , в҃ . По́стническое и҆ равноа́нг҃льное житїѐ своѐ страда́льческими оу҆краси́лъ є҆сѝ боре́ньми . и҆ а҆́нг҃лѡмъ совсе́льникъ бг҃обл҃же́нне ꙗ҆ви́сѧ ѳео́дѡре . с̾ ни́ми же хрⷭ҇та̀ бг҃а молѝ непреста́ннѡ ѡ҆ всѣ́хъ на́съ . и҆́косъ . По́стникѡмъ свѣ́тлꙋю добро́тꙋ , цр҃кви хрⷭ҇то́вѣ оу҆твержде́нїе , ны́нѣ ѳео́дѡра восхва́лимъ . но́выи бо сто́лпъ ѻ҆́гненъ ꙗ҆ви́сѧ , попалѧ́ѧ главы̀ є҆рети́чествꙋющихъ вѣ́рныхъ же просвѣща́ѧ дш҃а к̾ вѣ́рѣ пра́вѣй . в̾ бжⷭ҇твеныи гра́дъ вы́шнїи і҆єрⷭ҇ли́мъ ꙗ҆́коже дрꙋга́го і҆и҃лѧ вводѧ̀ . к̾ немꙋ́ же согла́снѡ возопїе́мъ , всебл҃же́нне ѻ҆́ч҃е незабꙋ́ди хрⷭ҇то́ви молѧ́сѧ непреста́ннѡ ѡ҆ всѣ́хъ на́съ .

пѣ́снь , з҃ . і҆рмо́съ . Спасы́и во ѻ҆гнѝ а҆враа́мскїѧ сѝ дѣ́ти , и҆ халдѣ́и оу҆би́въ , ꙗ҆́же без̾ пра́вды пра́ведныѧ оу҆ловлѧ́хꙋ , препѣ́тыи гдⷭ҇и бж҃е ѻ҆ц҃ъ бл҃гослове́нъ є҆сѝ . Совлече́сѧ ра́нами своеѧ̀ ко́жныѧ ри́зы грѣхо́вныѧ , и҆ во ѻ҆дѣѧ́нїе ѡ҆блече́сѧ не к̾ томꙋ̀ ѡ҆бетща́ющее бл҃же́нне , є҆́же и҆стка̀ бл҃года́ть ꙗ҆́вльшисѧ . Пож̾же́нїемъ честны́хъ мч҃нче и҆ крѣ́пкихъ тѝ по́двигъ , терно́вное и҆ лꙋка́вое без̾бо́жїе попалѧ́етсѧ . кро́внымъ же тече́нїемъ погаша́етсѧ неразꙋ́мїѧ превзѧ́тыи пла́мень всебл҃же́нне . боⷢ҇ . Бл҃гослове́нъ пло́дъ бжⷭ҇твенагѡ тѝ чре́ва , є҆го́же бл҃госло́вѧтъ нбⷭ҇ныѧ си́лы , и҆ земны́хъ составле́нїѧ , и҆́же на́съ и҆зба́вивыи клѧ́твы дре́внїѧ , бл҃гослове́наѧ .

и҆́нъ , і҆рмо́съ . Бж҃їѧ схожде́нїѧ ѻ҆́гнь оу҆стыдѣ́сѧ в̾ вавило́нѣ дре́вле . сегѡ̀ ра́ди ѻ҆́троцы , в̾ пещѝ ра́дованною ного́ю , ꙗ҆́кѡ во́ свѣтѣ ликова́хꙋ пою́ще , блгⷭ҇ве́нъ бг҃ъ ѻ҆ц҃ъ на́шихъ . Ви́дѣвъ прови́децъ твоегѡ̀ ра́зꙋма чистотꙋ̀ , слове́сныхъ тѧ̀ ѻ҆ве́цъ наста́вника ѻ҆́ч҃е поставлѧ́етъ . є҆мꙋ́же ны́нѣ всебл҃же́нне зове́ши веселѧ́сѧ , бл҃гослове́нъ бг҃ъ ѻ҆ц҃ъ на́шихъ . Бжⷭ҇твеномꙋ напи́саномꙋ пречⷭ҇томꙋ ѻ҆́бразꙋ пребл҃же́нне вочл҃ченїѧ хрⷭ҇то́ва покланѧ́ѧсѧ пребыва́ше , бг҃обо́рникѡмъ противлѧ́ѧсѧ да́же до́крове . и҆ поѧ̀ ѳео́дѡре , бл҃гослове́нъ бг҃ъ ѻ҆ц҃ъ на́шихъ . Сло́во твоѐ со́лїю растворено̀ всебога́те , и҆ житїѐ твоѐ ѻ҆́ч҃е просвѣщено̀ заре́ю дх҃о́вною , и҆́мже блиста́ѧсѧ вопїе́ши ве́село , бл҃гослове́нъ бг҃ъ ѻ҆ц҃ъ на́шихъ . боⷢ҇ . Сѐ ны́нѣ и҆спо́лнисѧ дв҃да бг҃оѻ҆ц҃а бжⷭ҇твеное прорече́нїе , мо́лѧтсѧ вои́стинꙋ твоемꙋ̀ лицꙋ̀ бг҃ороди́тельнице чⷭ҇таѧ , и҆мꙋ́щїи бога́тство бл҃года́ти ны́нѣ , бл҃гословѧ́ще бг҃а ѻ҆ц҃ъ на́шихъ .

пѣ́снь , и҃ . і҆рмо́с̾ . И҆зба́вителю всѣ́хъ всеси́льне , посредѣ̀ пла́мене бл҃гоче́ствовавшїѧ сше́дъ ѡ҆роси́лъ є҆сѝ , и҆ наꙋчѝ пѣ́ти , всѧ́каѧ дѣ́ла бл҃гослови́те гдⷭ҇нѧ гдⷭ҇а . Вѣне́чникъ ми́но ꙗ҆ви́сѧ , врагѝ крⷭ҇та̀ гдⷭ҇а твоегѡ̀ низ̾ложи́въ оу҆́бѡ посрамѝ . и҆ вопїѧ́ше всебл҃же́нне , всѧ̀ дѣ́ла гдⷭ҇а по́йте , и҆ превозноси́те є҆гѡ̀ во́ вѣки . Ди́вна творѧ̀ бг҃ъ в̾ па́мѧти твое́й , и҆сточа́ѧ на́мъ мощмѝ твои́ми дш҃е́внаѧ и҆сцѣле́нїѧ и҆ тѣле́снаѧ , вопїю́щимъ , всѧ̀ дѣ́ла гдⷭ҇а по́йте , и҆ превозноси́те є҆гѡ̀ во́ вѣки . Принесѐ бг҃ови слꙋже́нїе твоѐ , и҆ на землѝ преклони́въ главꙋ̀ свою̀ , мече́мъ прїе́мъ оу҆сѣче́нїе мч҃нче . зовы́и , всѧ̀ дѣ́ла гдⷭ҇а по́йте , и҆ превозноси́те є҆гѡ̀ во́ вѣки . Ꙗ҆́кѡ багрѧни́цею и҆ ви́ссомъ кро́вїю ва́шею цр҃ковь оу҆краша́етсѧ дне́сь ми́но и҆ викто́ре и҆ вике́нтїе . вопїю́щи , всѧ̀ дѣ́ла гдⷭ҇а по́йте , и҆ превозноси́те є҆гѡ̀ во́ вѣки . боⷢ҇ . Дв҃ьствꙋетъ чре́во и҆ ро́ждьши сн҃а , є҆го́же без̾ сѣ́мене ѿ ст҃а́гѡ дх҃а зача́тъ , бг҃а неѡ҆пи́сана в̾ пло́ть ѡ҆бо́лкшасѧ , ѻ҆ц҃ꙋ собезнача́льна сло́ва . є҆го́же всѧ̀ дѣ́ла ꙗ҆́кѡ гдⷭ҇а пое́мъ , и҆ превозно́симъ во́ вѣки .

и҆́нъ , і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃очести́вымъ лю́тѣ раз̾жжѐ . си́лою же лꙋ́чшею спасе́ныхъ ви́дѣвъ , творцꙋ̀ и҆ и҆зба́вителю вопїѧ́ше , дѣ́ти бл҃гослови́те , сщ҃е́ннїи воспо́йте лю́дїе , и҆ превозноси́те є҆гѡ̀ во́ вѣки . Прого́нникъ показа́лсѧ є҆сѝ бг҃оно́се ѳео́дѡре ѡ҆брѣта́телей ѕлы́хъ є҆ресе́й . оу҆ча̀ пречⷭ҇тыи честѝ ѻ҆́бразъ хрⷭ҇то́въ , покланѧ́тижесѧ и҆ почита́ти бг҃омꙋ́дрено , и҆ пѣ́ти влⷣкꙋ , сщ҃е́ннїи бл҃гослови́те лю́дїе , и҆ превозноси́те є҆гѡ̀ во́ вѣки . Во все́мъ житїѝ твое́мъ бг҃огл҃иве ѳео́дѡре прельще́нымъ наста́вникъ бы́сть , свѣти́льникъ свѣтлѣ́йшїи , бг҃ови́дныи оу҆чи́тель во́ мрацѣ невѣ́дѣнїѧ лежа́щимъ . наꙋча́ѧ воспѣва́ти , сщ҃е́ннїи бл҃гослови́те влⷣкꙋ хрⷭ҇та̀ , и҆ превозноси́те є҆гѡ̀ во́ вѣки . На землѝ под̾виза́сѧ , бл҃гоче́стїѧ сказа́тель , и҆ и҆́стинныи нело́жныи оу҆чи́тель всебл҃же́нне бы́въ , ꙗ҆́кѡ да́ръ бж҃їи . и҆ на́ нб҃сѣхъ пра́ведными оу҆вѧзе́сѧ вѣнцы̀ . тече́нїе совершѝ , и҆ вѣ́рꙋ соблю́дъ , превозносѧ̀ хрⷭ҇та̀ во́ вѣки . Смы́сломъ оу҆́мъ оу҆краси́лъ є҆сѝ цѣломꙋ́дрїемъ жела́нїе , ꙗ҆́ростное же мꙋ́жествомъ препоѧ́салъ є҆сѝ ѳео́дѡре премꙋ́дре , пра́вдою и҆спра́вивъ сщ҃еннолѣ́пнѡ дш҃е́вныѧ ти си́лы . согла́снѡ воспѣва́ѧ , дѣ́ти бл҃гослови́те сщ҃е́ннїи , воспо́йте лю́дїе и҆ превозноси́те є҆гѡ̀ во́ вѣки . боⷢ҇ . Бл҃гослове́наѧ пречⷭ҇таѧ , дш҃и моеѧ̀ стрꙋ́пы и҆ грѣхо́вныѧ ꙗ҆́звы ѡ҆чи́сти . бг҃а бо ро́ждьши , и҆́же надо всѣ́ми ѻ҆трокови́це чи́стаѧ , ѿ дв҃ьственыѧ сѝ не и҆скꙋсобра́чныѧ оу҆тро́бы . є҆го́же бл҃гослови́тъ всѧ̀ тва́рь , и҆ превозно́ситъ во́ вѣки .

пѣ́снь , ѳ҃ . і҆рмо́с̾ . Ка́мень нерꙋкосѣ́чныѧ горы̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , совокꙋпи́въ раз̾стоѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Возлюби́лъ є҆сѝ па́че не ме́ньше , не́жели возлю́бленъ бы́сть стрⷭ҇тоте́рпче , возлю́бленꙋю свою̀ дш҃ꙋ пред̾ложи́въ рачи́телю своемꙋ̀ хрⷭ҇тꙋ̀ , и҆́же с̾ собо́ю просла́вльшꙋ свидѣ́тельство твоѐ приснопа́мѧтне . Свѣ́щникъ свѣ́томъ трисл҃нчнымъ вжига́емь , мч҃нкъ ꙗ҆ви́сѧ тричи́слена є҆ди́ница , ми́на , и҆ викто́ръ же , и҆ вике́нтїи , вѣ́рныхъ просвѣща́юще , и҆ мра́къ бѣсо́вскїи ѿгонѧ́юще . Прїимѝ хвалꙋ̀ ꙗ҆́кѡ до́лгъ ѿ оу҆се́рдїѧ и҆сходѧ́щꙋ , превосходѧ́ща тѧ ми́но на́шихъ слове́съ оу҆́бѡ свѣ́мъ . и҆ воз̾да́ждь без̾чи́слено ѿ сокро́вищь твои́хъ дарова́нїѧ . боⷢ҇ . Досто́йнѡ тѧ всѝ мт҃рь цр҃ѧ и҆ влⷣки дре́вле оу҆́бѡ прⷪ҇рцы хва́лѧхꙋ . ны́нѣ же а҆пⷭ҇ли и҆ мч҃нцы с̾ на́ми сла́вѧще тѧ бцⷣꙋ велича́емъ .

и҆́нъ , і҆рмо́съ . Оу҆диви́сѧ оу҆́бѡ ѡ҆ се́мъ не́бо , и҆ землѝ оу҆жасо́шасѧ концы̀ , ꙗ҆́кѡ бг҃ъ ꙗ҆ви́сѧ чл҃кѡмъ пло́тїю , чре́во же твоѐ бы́сть простра́ннѣе нб҃съ , тѣ́мъ тѧ̀ бцⷣе , а҆́нг҃лъ и҆ чл҃къ чинонача́лїѧ велича́емъ . Тече́нїемъ тѝ сле́зъ ꙗ҆́кѡ по́стникъ , и҆ и҆сто́чники кровны́ми ꙗ҆́кѡ мч҃нкъ хрⷭ҇то́въ просвѣти́сѧ , сїѧ́еши ѡ҆бою́дꙋ свѣ́тлѡ , пра́вдою прпⷣбне ѡ҆дѣ́ѧнъ ꙗ҆́кѡ сщ҃е́нникъ . в̾ бжⷭ҇твеныхъ жи́тельствꙋеши лико́хъ , нн҃ѣ просвѣща́емь в̾ незаходи́мыхъ требл҃же́нне . Чи́стое своѐ житїѐ преше́дъ , во ст҃ы́хъ ст҃а́ѧ селе́нїихъ нн҃ѣ живе́ши , вѣне́цъ бл҃голѣ́пїѧ прїе́мъ , и҆ ца́рства ѻ҆дѣѧ́нїе великолѣ́пно же и҆ сщ҃е́нное . в̾ ни́хже ны́нѣ ѡ҆зарѧ́емь пред̾стои́ши невѣ́стникꙋ , наслажда́ѧсѧ ѡ҆боже́нїѧ . Ви́дѣти сподо́бисѧ бл҃ги́хъ и҆сто́чника бг҃оно́се ѳео́дѡре , ꙗ҆́кѡ проше́дъ житїѐ бжⷭ҇твеное крѣ́пкѡ , ѿ мирска́гѡ сво́йства житїе́мъ чи́стымъ оу҆́мъ свободи́въ . ꙗ҆́кѡ мч҃нкъ и҆ страстоно́сецъ бы́сть сщ҃е́нне . Глаго́лъ твои́хъ вѣща́нїе дарова́нїе бж҃їе на́мъ всеслы́шанъ бы́сть всехва́льне , ꙗ҆́кѡ гро́мъ вселе́нныѧ концѣ́хъ . и҆ ꙗ҆́коже рѣ́ки и҆стека́ютъ твои́хъ оу҆че́нїи списа́нїѧ . тѣ́мъ тѧ бг҃осло́ва и҆ бг҃оглаго́льника досто́йнѡ и҆менꙋ́емъ . боⷢ҇ . Ꙗ҆ви́сѧ ѽ дв҃о мт҃и бж҃їѧ , па́че є҆стества̀ ро́ждьши в̾ тѣлесѝ бл҃го́е сло́во , є҆́же ѻ҆ц҃ъ ѿ́ срⷣца своегѡ̀ ѿры́гнꙋ , пре́жде всѣ́хъ вѣ́къ ꙗ҆́кѡ бл҃гъ . є҆го́же ны́нѣ и҆ тѣле́съ превы́ш̾ша разꙋмѣва́емъ , а҆́ще и҆ в̾ тѣ́ло ѡ҆блече́сѧ .

свѣти́ленъ , во ѻ҆кта́и . и҆ мч҃нкѡмъ . Нб҃са̀ ѕвѣ́зды оу҆краша́ютъ і҆с҃е . цр҃квь же ми́на и҆ викто́ръ и҆ вике́нтїи оу҆краша́ютъ , и҆ стеѳани́да . и҆́хже ра́ди побѣ́ды на сопроти́вныѧ на́мъ да́рꙋй . сла́ва , свѣти́ленъ , прпⷣбномꙋ . Ꙗ҆́кѡ сто́лпъ ѡ҆дш҃евле́нъ ꙗ҆ви́сѧ повелѣ́нїи правосла́вїѧ бл҃гоче́стнѡ , ѡ҆бличи́въ и҆конобо́рцѡвъ пре́лесть . тѣ́мъ и҆ страда́нїемъ соверши́въ и҆сповѣ́данїе ѳео́дѡре просла́висѧ . и҆ ны́нѣ , боⷢ҇ . Всѝ вѣ́рнїи хода́таицꙋ тѧ̀ к̾ ро́ждьшемꙋсѧ и҆з̾ тебѐ , ны́нѣ пред̾лага́ютъ всечⷭ҇таѧ . мы́же мно́жае и҆́же сраспина́емїи томꙋ̀ . тѣ́мъ непреста́й дв҃о за ны̀ моли́тисѧ .

На стихо́внѣ , во ѻ҆кта́и . и҆ мч҃нкѡмъ , сти́хъ : гла́съ , в҃ . воз̾ва́ша пра́веднїи ,꙳ и҆ гдⷭ҇ь оу҆слы́ша и҆́хъ . Прїиди́те вѣ́рнїи , почте́мъ стрⷭ҇тоте́рпца хрⷭ҇то́ва ми́нꙋ сла́внаго , до́блѧго въ во́инѣхъ , до́брѣ под̾виза́вшасѧ по бл҃гоче́стїи , царе́й же и҆ мꙋчи́телей держа́вꙋ низ̾ло́жша . тѣ́мъ дерзнове́нїе и҆мѣ́ѧ ко хрⷭ҇тꙋ̀ бг҃ꙋ , непреста́ннѡ мо́лимъ спастѝ дш҃а на́ша . сла́ва , прпⷣбномꙋ . гла́съ , и҃ . И҆́нокъ мно́жества , наста́вника тѧ̀ чте́мъ ѻ҆́ч҃е на́шъ ѳео́дѡре , тобо́ю бо вои́стинꙋ стезе́ю пра́вою ходи́ти позна́хомъ . блаже́нъ є҆сѝ ꙗ҆́кѡ хрⷭ҇то́ви рабо́тавъ , и҆ вра́жїю ѡ҆бличи́лъ є҆сѝ си́лꙋ . а҆́нг҃лѡмъ собесѣ́дниче , и҆ прпⷣбнымъ сожи́телю , и҆ пра́веднымъ . с̾ ни́ми же моли́сѧ гдⷭ҇ви , поми́ловатисѧ дш҃а́мъ на́шимъ . и҆ нн҃ѣ , боⷢ҇ . и҆лѝ крⷭ҇тобоⷢ҇ . Гдⷭ҇и є҆гда́ тѧ ви́дѣ сл҃нце , на́ древѣ повѣ́шена , сл҃нца пра́веднаго , лꙋчѝ сокры̀ , и҆ лꙋна̀ свѣ́тъ во тмꙋ̀ преложѝ . непоро́чнаѧ же мт҃и твоѧ̀ , оу҆тро́бою оу҆ѧзвлѧ́шесѧ .

На литꙋргі́и . проки́менъ , ѱало́мъ дв҃довъ . ст҃ы́мъ и҆́же сꙋ́ть на землѝ є҆гѡ̀ , оу҆дивѝ гдⷭ҇ь всѧ̀ во́лѧ своѧ̀ в̾ ни́хъ . сти́хъ . пред̾зрѣ́хъ гдⷭ҇а предомно́ю вы́нꙋ , ꙗ҆́кѡ ѡ҆деснꙋ́ю менѐ є҆́сть дасѧ̀ неподви́жꙋ . а҆пⷭ҇лъ , къ є҆фесе́ѡмъ . зача́ло , сл҃г . и҆ прпⷣбномꙋ , а҆пⷭ҇лъ къ є҆вре́ѡмъ . зача́ло , тл҃є .= а҆ллилꙋ́їѧ . возва́ша пра́веднїи , и҆ гдⷭ҇ь оу҆слы́ша и҆́хъ , и҆ ѿ всѣ́хъ печа́лей и҆́хъ и҆зба́ви и҆́хъ . =сти́хъ . бл҃же́нъ мꙋ́жь боѧ́исѧ гдⷭ҇а , в̾ за́повѣдехъ є҆гѡ̀ восхо́щетъ ѕѣлѡ̀ . є҆ѵⷢ҇а́лїе , ѿ =матѳе́ѧ . заⷱ҇ , л҃и . и҆ прпⷣбномꙋ , є҆ѵⷢ҇а́лїе , ѿ матѳе́ѧ . зача́ло , і҃ . прича́стенъ . р=а́дꙋйтесѧ пра́веднїи ѡ҆́ гдⷭ҇ѣ .

Слꙋ́жба ст҃а́гѡ и҆ бл҃же́ннагѡ маѯи́ма , и҆́же хрⷭ҇та̀ ра́ди оу҆ро́дивагѡ , моско́вскагѡ чꙋдотво́рца . =Ве́черъ , пое́мъ , бл҃же́нъ мꙋ́жь , а҃ , а҆нтифо́нъ . На гдⷭ҇и возва́хъ , стихѣ́ры , ст҃о́мꙋ , на́ ѕ҃ . гла́съ , д҃ . О=у҆ро́дивыми притворе́нїи мꙋдреца̀ ѕло́бы ѡ҆безꙋ́милъ є҆сѝ бл҃же́нне . соверша́ѧ сла́внаѧ , дѣ́йствꙋѧ зна́менїѧ . бѣ́сы ѿгонѧ́ѧ . просвѣща́ѧ сꙋ́щїѧ в̾ нощѝ грѣхо́внѣй ѻ҆́ч҃е . и҆ оу҆́мъ несмꙋще́нъ , посредѝ мо́лвъ соблю́лъ є҆сѝ маѯи́ме , без̾стра́стїе ѿ́ бг҃а прїи́мъ . Свѣ́та незаходи́магѡ зри́тель бы́въ ѻ҆́ч҃е , мирски́ми красота́ми невосхотѣ̀ наслажда́тисѧ . и҆ пло́ть презрѣ́въ , прилѣжа́ше ѡ҆ дш҃и . и҆ тоѧ̀ добродѣ́телей свѣ́тлостїю свѣщꙋ̀ оу҆краси́въ , незаходи́мымъ сїѧ́нїемъ ѡ҆блиста́емь . гдⷭ҇ви пред̾стоѧ̀ ѡ҆ на́съ моли́сѧ , сщ҃е́нное твоѐ преставле́нїе пра́зднꙋющихъ . Сосꙋ́дъ ст҃о́мꙋ дх҃ꙋ ѡ҆сщ҃е́нъ сотворѝ себѐ ѻ҆́ч҃е . сегѡ̀ ра́ди и҆ к̾ подвиго́мъ прилѣ́жнѡ впери́въ оу҆́мъ маѯи́ме . и҆ на́ дꙋсѣхъ нечи́стыхъ вла́сть прїи́мъ бг҃оно́се . и҆ си́хъ моли́твою оу҆ѧзвлѧ́еши , и҆ ѿ чл҃къ ѿго́ниши . и҆ ны́нѣ престо́лꙋ всѣ́хъ цр҃ѧ пред̾стои́ши , ѡ҆ на́съ молѧ́сѧ , вѣ́рнѡ тѧ сла́вѧщихъ .

сла́ва . гла́съ , и҃ . Чл҃че бж҃їи маѯи́ме чꙋ́дныи , ты̀ оу҆́бѡ вше́дъ на лѣ́ствицꙋ добродѣ́телей , по не́йже взы́де к̾ го́рнемꙋ і҆єрⷭ҇ли́мꙋ , и҆ та́мѡ оу҆зрѣ̀ жела́емаго хрⷭ҇та̀ . є҆го́же ра́ди пло́ть свою̀ и҆знꙋри́лъ є҆сѝ , и҆ тѣ́ло сме́ртное на без̾сме́ртнꙋю жи́знь и҆змѣни́лъ є҆сѝ . и҆ ѡ҆ на́съ непреста́ннѡ моли́сѧ , дарова́ти дш҃а́мъ на́шимъ ми́ръ и҆ ве́лїю млⷭ҇ть .

и҆ ны́нѣ , боⷢ҇ . Цр҃ь нбⷭ҇ныи , за чл҃колю́бїе на землѝ ꙗ҆ви́сѧ , и҆ с̾ человѣ́ки поживѐ . ѿ дв҃ы бо чⷭ҇тыѧ пло́ть прїе́мыи , и҆з̾ неѧ̀ проше́дъ с̾ воспрїѧ́тїемъ . є҆ди́нъ є҆́сть сн҃ъ сꙋгꙋ́бъ є҆стество́мъ а҆ несоста́вомъ . тѣ́мже соверше́на тогѡ̀ бг҃а , и҆ соверше́на чл҃ка , вои́стинꙋ проповѣ́дающе , и҆сповѣ́даемъ хрⷭ҇та̀ бг҃а на́шегѡ . є҆го́же молѝ , ма́ти без̾невѣ́стнаѧ , поми́ловатисѧ дш҃а́мъ на́шимъ . та́же , вы́ходъ . проки́менъ , дню̀ .

Ѿ= премꙋ́дрости соло́мѡни , чте́нїе .=

Пра́ведницы во́ вѣки живꙋ́тъ , и҆ ѿ́ гдⷭ҇а мзда̀ и҆́мъ , и҆ помышле́нїе и҆́хъ пред̾ вы́шнимъ . сегѡ̀ ра́ди прїи́мꙋтъ црⷭ҇твїе бл҃голѣ́пїѧ , и҆ вѣне́цъ добро́ты ѿ рꙋкѝ гдⷭ҇ни . ꙗ҆́кѡ десни́цею покры́етъ и҆́хъ , и҆ мы́шцею защи́титъ и҆́хъ . прїи́метъ всеѡрꙋ́жїе ре́вности є҆гѡ̀ , и҆ воѡрꙋже́но сотвори́тъ созда́нїе , в̾ ме́сть врагѡ́мъ . и҆ ѡ҆блече́тъ ѧ҆̀ во бронѧ̀ пра́вды , и҆ возложи́тъ шле́мъ сꙋ́дъ нелицемѣ́ренъ . и҆ прїи́метъ щи́тъ непобѣди́мь преподо́бїе . по ѡ҆стри́тъ же напра́сенъ гнѣ́въ во ѻ҆рꙋ́жїи . и҆ побо́ретъ с̾ ни́мъ ми́ръ на безꙋ́мныѧ . и҆ по́йдꙋтъ праволꙋ́чнѣ стрѣ́лы мо́лнїины , ꙗ҆́кѡ ѿ бл҃гокрꙋ́гла лꙋ́ка ѻ҆блакѡ́въ , на намѣ́ренїе летѧ́тъ . и҆ ѿ пра́щъ ка́менныхъ ꙗ҆́рости и҆спо́лнь , падꙋ́тъ гра́ды . вознегодꙋ́етъ на ни́хъ вода̀ морска́ѧ , рѣ́ки же потекꙋ́тъ жесточа́е . сопроти́въ ста́нетъ и҆́мъ дх҃ъ си́лы . и҆ ꙗ҆́кѡ ви́хоръ развѣ́етъ ѧ҆̀ . и҆ ѡ҆пꙋсти́тъ всю̀ зе́млю беззако́нїе , и҆ ѕлодѣѧ́нїе преврати́тъ престо́лы си́льныхъ . слы́шите оу҆́бѡ цр҃їе и҆ разꙋмѣ́йте , и҆ накажи́тесѧ сꙋдїѝ конце́мъ землѝ . внꙋши́те содержа́щїи мно́жества , и҆ гордѧ́щїисѧ ѡ҆ наро́дѣхъ ꙗ҆зы́къ , ꙗ҆́кѡ дана̀ бы́сть ѿ́ гдⷭ҇а держа́ва ва́мъ , и҆ си́ла ѿ вы́шнѧгѡ .

Ѿ= премꙋ́дрости соло́мѡни , чте́нїе .=

Пра́ведныхъ дш҃а въ рꙋцѣ̀ бж҃їи , и҆ неприко́снетсѧ и҆́хъ мꙋ́ка . непщева́ни бы́ша во ѻ҆́чїю безꙋ́мныхъ оу҆́мрети , и҆ вмѣни́сѧ ѡ҆ѕлобле́нїе и҆схо́дъ и҆́хъ , и҆ є҆́же ѿ на́съ ше́ствїе сокрꙋше́нїе , ѻ҆ни́ же сꙋ́ть в̾ ми́рѣ . и҆́бо пред̾ лице́мъ чл҃ческимъ а҆́ще и҆ мꙋ́кꙋ прїи́мꙋтъ , оу҆пова́нїе и҆́хъ без̾сме́ртїѧ и҆спо́лнь . и҆ ма́лымъ пока́зани бы́ша , вели́каѧ воспрїи́мꙋтъ , ꙗ҆́кѡ бг҃ъ и҆скꙋсѝ и҆́хъ , и҆ ѡ҆брѣ́те и҆́хъ досто́йны себѣ̀ . ꙗ҆́кѡ зла́то в̾ горни́лѣ и҆скꙋсѝ и҆́хъ , и҆ ꙗ҆́кѡ всепло́днꙋ же́ртвꙋ прїѧ́тъ и҆́хъ . и҆ во́ времѧ посѣще́нїѧ и҆́хъ воз̾сїѧ́ютъ , и҆ ꙗ҆́кѡ и҆́скры по сте́блїю потекꙋ́тъ . сꙋ́дѧтъ ꙗ҆зы́кѡмъ , и҆ ѡ҆блада́ютъ людьмѝ , и҆ воцр҃и́тсѧ гдⷭ҇ь в̾ ни́хъ во́ вѣки . надѣ́ющїисѧ на́нь разꙋмѣ́ютъ и҆́стинꙋ , и҆ вѣ́рнїи любо́вїю пребꙋ́дꙋтъ в̾ не́мъ . ꙗ҆́кѡ бл҃года́ть и҆ ми́лость на преподо́бныхъ є҆гѡ̀ , и҆ посѣще́нїе во и҆збра́нныхъ є҆гѡ̀ .

Ѿ= премꙋ́дрости соло́мѡни , чте́нїе .=

Пра́ведникъ а҆́ще пости́гнетъ сконча́тисѧ , в̾ поко́й бꙋ́детъ . ста́рость бо честна̀ , немноголѣ́тна , ни в̾ числѣ̀ лѣ́тъ и҆зочте́на . сѣди́на же є҆́сть мꙋ́дрость чл҃кѡмъ , и҆ во́зрастъ ста́рости житїѐ нескве́рно . бл҃гоꙋго́денъ бг҃ови бы́въ , и҆ возлю́бленъ бы́сть , и҆ живы́и посредѣ̀ грѣ́шникъ преста́висѧ . восхище́нъ бы́сть , да не ѕло́ба и҆змѣни́тъ ра́зꙋма є҆гѡ̀ , и҆лѝ ле́сть прельсти́тъ дш҃ꙋ є҆гѡ̀ , раче́нїе бо ѕло́е гꙋби́тъ до́браѧ , и҆ жела́нїе по́хоти премѣнѧ́етъ оу҆́мъ неѕло́бивъ . сконча́всѧ в̾ ма́лѣ , и҆спо́лни лѣ́та до́лга . оу҆го́дна бо бѣ̀ гдⷭ҇ви дш҃а є҆гѡ̀ . сегѡ̀ ра́ди потща́сѧ ѿ среды̀ лꙋка́вствїѧ . лю́дїе же ви́дѣвше и҆ неразꙋмѣ́вше , ни положи́ша въ помышле́нїи такова́гѡ , ꙗ҆́кѡ бл҃года́ть и҆ ми́лость на преподо́бныхъ є҆гѡ̀ , и҆ посѣще́нїе во и҆збра́нныхъ є҆гѡ̀ .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фовъ .= Д=о́мъ и҆ жили́ще ,꙳ дх҃ꙋ прест҃о́мꙋ ,꙳ премꙋ́дре маѯи́ме бы́лъ є҆сѝ .꙳ тѣ́мже и҆ на́съ до́мъ томꙋ̀ содѣ́лай ,꙳ и҆́же ст҃ꙋ́ю ти па́мѧть почита́ющихъ .

сти́хъ : воз̾весели́тсѧ пра́ведникъ ѡ҆́ гдⷭ҇ѣ ,꙳ и҆ оу҆пова́етъ на́нь . Житїѐ твоѐ ꙗ҆́кѡ сл҃нце ,꙳ въ срⷣца̀ вѣ́рныхъ восїѧ̀ ,꙳ чꙋдеса̀ и҆спꙋща́ѧ .꙳ тѣ́мже и҆ на́съ свѣ́томъ невече́рнимъ ѡ҆зарѝ ,꙳ всечестнꙋ́ю ти па́мѧть почита́ющихъ .

сти́х̾ : пра́ведникъ ꙗ҆́кѡ фи́никъ процвѣте́тъ ,꙳ и҆ ꙗ҆́кѡ ке́дръ и҆́же в̾ лива́нѣ оу҆мно́житсѧ . Непреста́й молѧ́сѧ маѯи́ме ,꙳ ѡ҆ при́сныхъ тѝ рабѣ́хъ ,꙳ и҆́хже дх҃о́внымъ свои́мъ житїе́мъ просвѣти́лъ є҆сѝ .꙳ да всѝ честно́е твоѐ пра́зднество ,꙳ веселѧ́щесѧ почита́емъ .

сла́ва . гла́съ , ѕ҃ . Рачи́тель бы́въ ѻ҆́ч҃е нбⷭ҇нагѡ житїѧ̀ , и҆ равностоѧ́тель беспло́тныхъ си́лъ , маѯи́ме пребл҃же́нне . рꙋ́сское оу҆твержде́нїе , моско́вскїи свѣти́льниче , и҆ вселе́нныѧ оу҆добре́нїе . прїидѝ нн҃ѣ к̾ на́мъ пра́зднꙋющимъ пресвѣ́тлꙋю па́мѧть твою̀ , и҆ прїимѝ ма́лое на́ше моле́нїе . и҆спросѝ на́мъ оу҆ хрⷭ҇та̀ ми́ра и҆ ве́лїю млⷭ҇ть .= и҆ ны́нѣ , боⷢ҇ . Б=цⷣе ты̀ є҆сѝ лоза̀ и҆́стиннаѧ , возрасти́вшаѧ на́мъ пло́дъ живо́тныи , тебѣ̀ мо́лимсѧ , моли́сѧ влⷣчце съ пра́веднымъ , поми́ловатисѧ дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , є҃ . Нагото́ю тѣле́сною и҆ терпѣ́нїемъ , ѡ҆бнажи́лъ є҆сѝ вра́жїе кова́рство . ѡ҆блича́ѧ неподо́бное дѣѧ́нїе , ѕѣ́льнѣ стра́ждꙋщи со́лнечныи ва́ръ , и҆ нꙋ́жныѧ вели́кїѧ стꙋ́дени . и҆ мра́за и҆ ѻ҆гнѧ̀ нечꙋ́ѧше , бж҃їею по́мощїю покрыва́емь маѯи́ме премꙋ́дре . ѡ҆ вѣ́рнѡ творѧ́щихъ па́мѧть твою̀ че́стнѡ , и҆ оу҆се́рднѡ притека́ющихъ к̾ ра́цѣ моще́й твои́хъ , молѝ и҆зба́витисѧ ѿ бѣ́дъ , и҆ паде́нїѧ и҆збѣжа́ти .= сла́ва , и҆ ны́нѣ , боⷢ҇ . Р=а́дꙋисѧ две́ри гдⷭ҇нѧ непроходи́маѧ . ра́дꙋисѧ стѣно̀ и҆ покро́ве , прибѣга́ющимъ к̾ тебѣ̀ . ра́дꙋисѧ завѣ́тренее приста́нище неи҆скꙋсобра́чнаѧ , ро́ждьшаѧ пло́тїю творца̀ своегѡ̀ и҆ бг҃а , молѧ́щи непре́зри ѡ҆ воспѣва́ющихъ , и҆ кла́нѧющихсѧ ржⷭ҇твꙋ̀ твоемꙋ̀ .

На оу҆́трени , на бг҃ъ гдⷭ҇ь , тропа́рь , ст҃о́мꙋ , двⷤа . сла́ва , и҆ ны́нѣ , боⷢ҇ , воскрⷭ҇нъ . =По а҃ , стихоло́гїи , сѣда́ленъ . гла́съ , є҃ . Тве́рдаго а҆дама́нта , и҆ столпа̀ непоколѣби́ма вра́жїими прило́ги , бг҃оно́снаго маѯи́ма , пѣ́сньми почте́мъ . терпѣ́нїемъ бо вои́стинꙋ посрами́вша сопроти́внаго врага̀ , и҆ бе́з̾вѣсти є҆гѡ̀ сотвори́вша . и҆ ны́нѣ молѧ́щасѧ ѿ спасе́нїи дш҃ъ на́шихъ . =два́жды . сла́ва , и҆ ны́нѣ , боⷢ҇ . Оу҆жа́сно чꙋ́до зача́тїѧ , и҆ несказа́ненъ ѻ҆́бразъ ржⷭ҇тва̀ , в̾ тебѣ̀ позна́сѧ при́снѡ дв҃о чⷭ҇таѧ . оу҆жаса́етъ ми оу҆́мъ , и҆ оу҆дивлѧ́етъ помышле́нїе . сла́ва твоѧ̀ бцⷣе по всѣ́хъ простре́сѧ , во спасе́нїе дш҃а́мъ на́шимъ .

По в҃ , стихоло́гїи , сѣда́ленъ . гла́съ , д҃ . Посто́мъ и҆ воздержа́нїемъ , и҆ на землѝ лега́нїемъ , оу҆вѧди́лъ є҆сѝ плотьскі́ѧ стра́сти , дш҃ꙋ же просвѣти́лъ є҆сѝ . и҆ на́ нб҃сѣхъ ѿ хрⷭ҇та̀ вели́ко возмѣ́здїе воспрїѧ́лъ є҆сѝ . тѣ́мъ бл҃гоꙋгоди́лъ є҆сѝ бг҃ꙋ . досто́инъ сосꙋ́дъ чꙋдесе́мъ и҆ по кончи́нѣ ꙗ҆ви́сѧ , притека́ющимъ к̾ ра́цѣ моще́й твои́хъ , маѯи́ме пребл҃же́нне . молѝ хрⷭ҇та̀ бг҃а , грѣхо́въ ѡ҆ставле́нїе дарова́ти , чтꙋ́щимъ любо́вїю ст҃ꙋ́ю па́мѧть твою̀ . два́жды . сла́ва , и҆ ны́нѣ , боⷢ҇ . Ѡ҆бнови́ла є҆сѝ пречⷭ҇таѧ бжⷭ҇твенымъ ржⷭ҇тво́мъ свои́мъ , и҆стлѣ́вшее страстьмѝ , земноро́дныхъ ме́ртвеное сꙋщество̀ . и҆ воз̾ста́вила є҆сѝ всѧ̀ ѿ сме́рти к̾ жи́зни нетлѣ́ннѣй . тѣ́мъ тѧ̀ по́ долгꙋ оу҆бл҃жа́емъ всѝ дв҃о препросла́вленаѧ , ꙗ҆́коже прорекла̀ є҆сѝ .

по хвали́те и҆́мѧ гдⷭ҇не , припѣ́въ : Оу҆бл҃жа́емъ тѧ ст҃ы́и пра́ведныи маѯи́ме . и҆ чте́мъ ст҃ꙋ́ю па́мѧть твою̀ . ты́ бо мо́лиши за на́съ хрⷭ҇та̀ бг҃а на́шегѡ . ѱл҃о́мъ и҆збра́нныи : бл҃же́нъ мꙋ́жь .

По полїєлеѡ́сѣ , сѣда́ленъ . гла́съ , д҃ . Ꙗ҆ви́сѧ чꙋ́денъ въ терпѣ́нїи свое́мъ , всѧ́чески хрⷭ҇то́ви оу҆годи́лъ є҆сѝ . пребл҃же́нне маѯи́ме . мꙋ́дрою мы́слїю оу҆тверди́лъ є҆сѝ дш҃ꙋ свою̀ . порабо́тивъ плотьска́ѧ мꙋдрова́нїѧ дх҃ови . и҆збра̀ до́браѧ є҆́же бг҃а ра́ди трꙋжа́тисѧ . мꙋ́жески гл҃аше , а҆́ще и҆ ꙗ҆́ра зима̀ , но сла́докъ ра́й . болѣ́зненѡ трꙋжа́тисѧ , но бл҃же́нно воспрїѧ́тїе . тѣ́мже пребл҃же́нне молѝ хрⷭ҇та̀ бг҃а , спастѝ дш҃а на́ша . двⷤа . сла́ва , и҆ ны́нѣ , боⷢ҇ . Тебѐ велича́емъ бцⷣе вопїю́ще , ты̀ є҆ди́на бл҃гослове́наѧ . и҆з̾ тебе́ же неи҆зрече́ннѡ роди́сѧ хрⷭ҇то́съ бг҃ъ на́шъ .

степе́нна , д҃ го гла́са . а҆нтиѳо́нъ , а҃ . проки́мен̾ , ѱл҃о́мъ дв҃довъ . воз̾весели́тсѧ пра́ведникъ ѡ҆́ гдⷭ҇ѣ , и҆ оу҆пова́етъ на́нь . сти́хъ . оу҆слы́ши бж҃е мл҃твꙋ мою̀ , внегда̀ моли́тимисѧ к̾ тебѣ̀ . всѧ́ко дыха́нїе . =є҆ѵⷢ҇а́лїе , ѿ =матѳе́ѧ . заⷱ҇ , м҃г . ѱало́мъ , н҃ .

сла́ва . моли́твъ ра́ди пра́веднагѡ , млⷭ҇тиве ѡ҆чи́сти мно́жество согрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество согрѣше́нїи на́шихъ .

Поми́лꙋй мѧ бж҃е по вели́цѣй млⷭ҇ти твое́й по мно́гимъ щедро́тамъ твои́мъ , ѡ҆чи́сти без̾зако́нїѧ моѧ̀ , бж҃е сп҃се мо́й .

стихѣ́ра . гла́съ , и҃ . Чл҃че бж҃їи маѯи́ме чꙋ́дныи , ты̀ оу҆́бѡ вше́дъ на лѣ́ствицꙋ добродѣ́телей , по не́йже взы́де к̾ го́рнемꙋ і҆єрⷭ҇ли́мꙋ , и҆ та́мѡ оу҆зрѣ̀ жела́емаго хрⷭ҇та̀ . є҆го́же ра́ди пло́ть свою̀ и҆знꙋри́лъ є҆сѝ , и҆ тѣ́ло сме́ртное на без̾сме́ртнꙋю жи́знь и҆змѣни́лъ є҆сѝ . и҆ ѡ҆ на́съ непреста́ннѡ моли́сѧ , дарова́ти дш҃а́мъ на́шимъ ми́ръ и҆ ве́лїю млⷭ҇ть .

Кано́нъ , бцⷣѣ . со і҆рмосо́мъ , на́ ѕ҃ . и҆ ст҃о́мꙋ , два̀ кано́на , на и҃ . кано́нъ , ст҃о́мꙋ маѯи́мꙋ чꙋдотво́рцꙋ . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стопа́ми дре́вле ше́ствовавъ і҆и҃ль , крⷭ҇тоѡбра́зно мѡѷсе́ѡвыма рꙋка́ма , а҆мали́ковꙋ си́лꙋ в̾ пꙋсты́ни побѣди́лъ є҆́сть .

запѣ́в̾ : Ст҃ы́и пра́ведныи маѯи́ме , молѝ бг҃а ѡ҆ на́съ .= Прича́стїемъ є҆́же къ бг҃ꙋ прпⷣбне свѣ́тъ бы́лъ є҆сѝ . и҆ к̾ немꙋ̀ ѿлꙋчи́сѧ маѯи́ме бл҃же́нне , жела́нїемъ кра́йнимъ бл҃ги́мъ наде́ждамъ свои́мъ ѻ҆́ч҃е и҆сполне́нїе прїѧ́лъ є҆сѝ . Жела́нїемъ є҆́же къ бг҃ꙋ распала́емь , ми́ръ ѡ҆ста́вилъ є҆сѝ , спꙋ́тника ѻ҆́ч҃е ѡ҆брѣ́тъ хрⷭ҇та̀ маѯи́ме сла́вне . с̾ ни́мже стезю̀ проше́лъ є҆сѝ спасе́нꙋю ра́дꙋѧсѧ . Ѡ҆богати́тисѧ и҆́же ника́коже и҆стоща́емымъ воз̾желѣ́въ . бога́тство и҆ сла́вꙋ вре́менꙋю мꙋ́дре , и҆ пи́щꙋ мимотекꙋ́щꙋю , и҆ мирско́е достоѧ́нїе , доблемꙋ́дренѡ ѿри́нꙋлъ є҆сѝ . =боⷢ҇ . Кра́снꙋю и҆ и҆збра́ннꙋю и҆ всечестнꙋ́ю , разꙋмѣ́въ тѧ̀ сн҃ъ бж҃їи пренепоро́чнаѧ , сн҃ъ тво́й бы́сть . сы́ны сотворѝ бл҃года́тїю бцⷣе чтꙋ́щїѧ тѧ̀ .

дрꙋгі́и кано́нъ . є҆мꙋ́же краегране́сїе сицево̀ : оу҆ро́дство ѡ҆ста́вль к̾ нбⷭ҇нымъ прехо́дитъ , и҆ со а҆́нг҃лы совокꙋплѧ́етсѧ маѯи́мъ предо́блїи . гла́съ , д҃ . пѣ́снь , а҃ . і҆рмо́съ . Тристоѧ́ща крѣ́пкїи , рожде́исѧ ѿ дв҃ы , без̾стра́стїе во глꙋбинѣ̀ , дш҃и трича́стное потопѝ молю́сѧ . да тѝ ꙗ҆́кѡ в̾ тимпа́нѣ , во оу҆мерщве́ннѣмъ тѣлесѝ , побѣ́дное пою̀ воспѣва́нїе .

запѣ́в̾ : Ст҃ы́и пра́ведныи маѯи́ме , молѝ бг҃а ѡ҆ на́съ .= Пода́ждь мѝ хрⷭ҇тѐ дх҃а твоегѡ̀ бл҃года́ть , да по достоѧ́нїю воспою̀ пѣ́снь но́вꙋ , ѿ оу҆сте́нъ мои́хъ , в̾ па́мѧть твоегѡ̀ оу҆го́дника маѯи́ма пребл҃же́ннагѡ . И҆́же кре́стъ на ра́мо взе́мъ бл҃же́нне , и҆ жела́емагѡ тѝ ѻ҆те́чества дости́гъ , го́рнѧгѡ і҆єрⷭ҇ли́ма , и҆ в̾ не́мъ со а҆́нг҃лы ликꙋ́еши . оу҆ро́де премꙋ́дрыи , моли́сѧ ѡ҆ на́съ чтꙋ́щихъ па́мѧть твою̀ всечестнꙋ́ю . Бꙋ́йствомъ и҆ оу҆ро́дствомъ премѣни́въ мирско́е мꙋдрова́нїе ѻ҆́ч҃е , непокрове́но тѣ́ло и҆мы́и бл҃же́нне . покры́и на́ша стра́сти бг҃омꙋ́дре , да твои́ми мл҃твами ѿ бѣ́дъ и҆збавлѧ́емсѧ . =боⷢ҇ . Оу҆спѝ дш҃и моеѧ̀ свирѣ́пꙋю во́лнꙋ . ꙗ҆́кѡ мно́жество прегрѣше́нїи , и҆скꙋше́нїи и҆ печа́ли , влⷣчце воста́ша на мѧ̀ . но сама́ мѧ спасѝ . катава́сїѧ : Ѿве́рзꙋ оу҆ста̀ .

пѣ́снь , г҃ . і҆рмо́съ . Весели́тсѧ ѡ҆ тебѣ̀ цр҃кви твоѧ̀ хрⷭ҇тѐ зовꙋ́щи , ты́ ми крѣ́пость гдⷭ҇и , и҆ прибѣ́жище и҆ оу҆тверже́нїе . Оу҆се́рднѡ къ мы́сленымъ совлече́сѧ дѣѧ́нїемъ . побѣжда́ѧ вра́жїѧ полкѝ бжⷭ҇твенымъ посо́бїемъ дх҃а . Ра́нами и҆ моли́твенымъ воздержа́нїемъ , и҆ бїе́нїи прпⷣбне страсте́й мирски́хъ ѻ҆́ч҃е маѯи́ме оу҆ѧзви́лъ є҆сѝ . Оу҆мори́ша врага̀ по́стницы твоѝ і҆с҃е , оу҆мерщве́нїе ра́достнѡ влⷣко , твоѐ живоно́сное возжелѣ́вше . боⷢ҇ . И҆збавлѧ́ющаго чл҃ки преслꙋша́нїѧ , лю́тагѡ паде́нїѧ . и҆́же всемꙋ̀ вино́внаго чⷭ҇таѧ , и҆ всенепоро́чнаѧ родила̀ є҆сѝ .

и҆́нъ , і҆рмо́съ . Лꙋ́къ си́льныхъ и҆знемо́же , а҆ не́мощнїи препоѧ́сашасѧ си́лою . сегѡ̀ ра́ди воз̾весели́сѧ , ѡ҆́ гдⷭ҇ѣ срⷣце моѐ . Оу҆мо́мъ ве́сь к̾ преми́рнымъ взе́мсѧ бл҃же́нне , оу҆ро́дъ прозва́сѧ ѻ҆́ч҃е . и҆ на́съ оу҆мовре́дныхъ сохранѝ , да неврежде́ни пребꙋ́демъ ко́зньми чꙋжа́гѡ . и҆ тебѐ оу҆бл҃жа́емъ маѯи́ме пребл҃же́нне . Ва́ромъ со́лнечнымъ ѡ҆палѧ́емь ѻ҆́ч҃е . и҆ на́съ пали́мыхъ грѣхо́вными страстьмѝ , ѡ҆росѝ твои́ми моли́твами . да непреста́ннѡ воспѣва́емъ па́мѧть твою̀ , маѯи́ме прехва́льне . Зимо́ю томи́мь ст҃е , небре́глъ є҆сѝ ѡ҆ тѣ́лѣ пе́рстнѣмъ . и҆ ны́нѣ наслажда́ешисѧ ра́йскїѧ добро́ты . и҆ на́мъ просѝ ѡ҆ставле́нїѧ ѡ҆ѕло́бленымъ прило́ги чꙋжа́гѡ , да тебѐ оу҆бл҃жа́емъ ѻ҆́ч҃е бг҃омꙋ́дре . боⷢ҇ . И҆́же є҆ди́на въ напа́стѣхъ и҆ ско́рбехъ защища́ющи , под̾ кро́въ тво́й пречи́стаѧ прибѣ́гша те́плѣ , прїимѝ ꙗ҆́кѡ пребл҃га́ѧ , є҆́же ѿ срⷣца моегѡ̀ моле́нїе . катава́сїѧ : Твоѧ̀ пѣвцы̀ .

сѣда́ленъ . гла́съ , и҃ . Согла́сїемъ бжⷭ҇твенымъ ѡ҆зарѧ́емь , в̾ пꙋ́ть ведꙋ́щїи к̾ бжⷭ҇твенымъ сїѧ́нїемъ ходи́лъ є҆сѝ вѣ́рнѡ , ѻ҆́ч҃е прпⷣбне . и҆ вра́жїихъ ѿбѣ́глъ є҆сѝ прило́гъ . и҆ сн҃ъ свѣ́тꙋ и҆ днѝ ꙗ҆ви́лсѧ є҆сѝ маѯи́ме бг҃обл҃же́нне . дрꙋгі́и , сѣда́ленъ . гла́съ , то́йже . Ѻ҆́ч҃е бг҃омꙋ́дре и҆ пребл҃же́нне маѯи́ме , кра́снаѧ ми́ра сегѡ̀ ꙗ҆́кѡ оу҆ме́ты вмѣни́въ , ве́сь оу҆мо́мъ и҆змѣни́сѧ . и҆змѣ́ньшемꙋсѧ на́съ ра́ди хрⷭ҇тꙋ̀ послѣ́довалъ є҆сѝ , и҆ оу҆ро́дъ є҆гѡ̀ ра́ди нарече́сѧ . и҆ ѿ неразꙋ́мныхъ ско́рби претерпѣ́въ . и҆ нн҃ѣ ѡ҆ на́съ моли́сѧ , па́мѧть твою̀ вѣ́рнѡ сла́вѧщихъ маѯи́ме прехва́льне . сла́ва , и҆ ны́нѣ , боⷢ҇ . Пред̾ста́тельнице вѣ́рнымъ бг҃ороди́тельнице , скорбѧ́щимъ ра́дость , и҆ пла́чꙋщимъ вели́кое оу҆тѣше́нїе , и҆́же ѿ́ чрева твоегѡ̀ дв҃о всест҃а́гѡ па́че є҆стества̀ ро́ждьшагосѧ , непреста́ннѡ молѝ с̾ маѯи́момъ пребл҃же́ннымъ , и҆зба́вити на́съ в̾ ча́съ и҆спыта́нїѧ , и҆ лю́тагѡ ѡ҆сꙋжде́нїѧ .

пѣ́снь , д҃ . і҆рмо́съ . Воз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свое́мъ , досто́йнѡ взыва́ющи , сла́ва си́лѣ твое́й гдⷭ҇и . Соеди́нившисѧ к̾ стезѣ̀ пра́вды , въ бг҃оспаса́емыи бжⷭ҇твеныи гра́дъ вни́де прпⷣбне , спасе́нымъ сїѧ́нїемъ ѡ҆богати́всѧ . Є҆диноѡ҆бра́зныи прпⷣбне смы́слъ бг҃оно́сныи ви́дѣвъ , бжⷭ҇твеными повѣстьмѝ , и҆ бжⷭ҇твеною ѻ҆де́ждею ѡ҆дѣ́ѧвсѧ . Срⷣце твоѐ скрижа́ль ѡ҆чище́нꙋ ст҃а́гѡ дх҃а бл҃года́ть ѡ҆брѣ́тши ѻ҆́ч҃е , и҆ написа́въ соверше́ное без̾стра́стїе , и҆ любо́вь нелицемѣ́рнꙋ . боⷢ҇ . Сѣдѧ́и на престо́лѣ превознесе́нѣ херꙋви́мстѣмъ , ꙗ҆́кѡ прⷭ҇то́лъ тѧ̀ и҆мѣ́ѧ на рꙋкꙋ̀ твое́ю почи́въ , мр҃і́е бг҃оневѣ́сто препросла́вленыи бг҃ъ .

и҆́нъ , і҆рмо́съ . Любвѐ ра́ди ще́дре своегѡ̀ си ѻ҆́браза , на крⷭ҇тѣ̀ свое́мъ стоѧ̀ и҆ раз̾стоѧ́щасѧ ꙗ҆зы́цы . ты́ бо є҆сѝ бг҃ъ на́шъ , крѣ́пость моѧ̀ и҆ похвала̀ . Любвѐ сро́дникъ ѿре́ксѧ бл҃же́нне , любо́вїю хрⷭ҇то́вою оу҆ѧзвлѧ́емь . и҆ пло́ть ꙗ҆́коже рабы́ню дх҃ови покори́въ , и҆ над̾ страстьмѝ цр҃ь показа́сѧ ѻ҆́ч҃е . и҆ на́съ плѣне́ныхъ грѣхо́вными страстьмѝ , свободѝ бг҃омꙋ́дре . Стезе́ю приско́рбнагѡ пꙋтѝ ше́ствовавъ бл҃же́нне , и҆ простра́ннагѡ жили́ща доше́дъ , съ беспло́тными ликоствова́ти сподо́бисѧ ѻ҆́ч҃е бг҃оно́се . Вла́сть прїи́мъ на дꙋсѣ́хъ нечи́стыхъ ѻ҆́ч҃е маѯи́ме , си́хъ ѿ чл҃къ прогонѧ́еши , всѧ́кими недꙋ́ги болѧ́щихъ и҆сцѣлева́еши , с̾ вѣ́рою приходѧ́щихъ к̾ ра́цѣ моще́й твои́хъ . боⷢ҇ . Ми́лости твое́й сподо́би мѧ , бг҃омлⷭ҇тивное сло́во ро́ждьши . и҆ ны́нѣ влⷣчце прибѣга́юща мѧ̀ к̾ тебѣ̀ спасѝ . катава́сїѧ : Сѣдѧ́и во сла́вѣ .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рою воспѣва́ющїѧ тѧ . Пресвѣ́тлꙋю зарю̀ маѯи́ме прїи́мъ , ꙗ҆́кѡ сл҃нце ꙗ҆ви́лсѧ є҆сѝ . и҆ бѣсо́вскꙋю тмꙋ̀ ѿгна́въ достосла́вне . Твои́мъ жела́нїемъ хрⷭ҇тѐ ѿве́ргъ всепрпⷣбныи жела́нїе тѣле́сное . ꙗ҆́коже сгре́бїе мирско́е ѿтрѧсѐ . Си́лою бжⷭ҇твеною дш҃ꙋ оу҆крѣпи́въ , въ ми́ръ всели́лсѧ є҆сѝ . ѡ҆пꙋстѣва́ѧ страсте́й ѻ҆́ч҃е бг҃омꙋ́дре маѯи́ме . боⷢ҇ . Раче́нїе преста̀ тлѣ́нное . дв҃аѧ бо нетлѣ́ннаѧ родѝ бг҃а сло́ва . вы́ше є҆стества̀ и҆ сло́ва дв҃ою пребыла̀ є҆́сть .

и҆́нъ , і҆рмо́съ . Воз̾сїѧ́й ми гдⷭ҇и свѣ́тъ повелѣ́нїи твои́хъ , ꙗ҆́кѡ к̾ тебѣ̀ хрⷭ҇тѐ дх҃ъ мо́й оу҆́треннюѧ пое́тъ . ты́ бо є҆сѝ бг҃ъ мо́й , и҆ к̾ тебѣ̀ прибѣго́хъ цр҃ю ми́рныи . Оу҆ро́дъ ꙗ҆ви́сѧ и҆зволе́нїемъ ѻ҆́ч҃е . и҆ ѻ҆́номꙋ ди́вномꙋ а҆ндре́ю послѣ́довалъ є҆сѝ . и҆ ꙗ҆́коже то́й ви́дѣ дх҃о́вныма ѻ҆чи́ма бцⷣꙋ на воздꙋ́сѣ , за́ миръ молѧ́щꙋсѧ . ты́ же ны́нѣ зри́ши ст҃ꙋ́ю трⷪ҇цꙋ , молѧ́сѧ непреста́ннѡ ѡ҆ дш҃а́хъ на́шихъ . Ревни́тель бы́въ ди́вномꙋ сѷмеѡ́нꙋ , пꙋсты́ню и҆ све́рстника ѡ҆ста́вльшемꙋ . и҆ оу҆ро́дство на сѧ̀ возло́жьшемꙋ , и҆ го́рнїѧ митропо́лїи дости́гшꙋ . с̾ ни́мже ны́нѣ и҆ ты̀ наслажда́ешисѧ , и҆ на́съ помина́й пра́зднꙋющихъ па́мѧть твою̀ всечестнꙋ́ю . Вторы́и твердисло́въ в̾ рꙋсѝ показа́сѧ ѻ҆́ч҃е маѯи́ме , непокрове́но тѣ́ло и҆мы́и , покры́й на́съ покро́вомъ моли́твъ твои́хъ . да не оу҆ѧ́звитъ на́съ оу҆ѧзви́выи пра́ѻ҆ц҃а престꙋпле́нїемъ . боⷢ҇ . Ѿ ко́рене и҆сто́чникъ , и҆ винꙋ̀ нетлѣ́нїѧ тѧ̀ дв҃о всѝ вѣ́рнїи хвала́ми почита́емъ . ты́ бо соста́вное на́мъ без̾сме́ртїе родила̀ є҆сѝ . катава́сїѧ : Оу҆диви́шасѧ всѧ́ческаѧ .

пѣ́снь , ѕ҃ . і҆рмо́съ . Пожрꙋ́ти со́ гласомъ хвале́нїѧ гдⷭ҇и , цр҃кви вопїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Оу҆́мъ сво́й ве́сь к̾ бг҃ꙋ простира́ѧ непреста́нными поꙋче́нїи . плотьскꙋ́ю любо́вь непощадѣ̀ бл҃ги́хъ тебѣ̀ хода́тайствꙋ маѯи́ме присвое́нїе . Ни скве́рны ни вра́ски прїѧ́тъ бл҃же́нне , посредѣ̀ тебѣ̀ ми́ра живꙋ́щꙋ . честны́ми же па́че мольба́ми сѝ ѡ҆чища́еши ѿ дш҃е́вныѧ скве́рны притека́ющїѧ . Ты̀ плотьски́хъ мꙋдрова́нїи вы́шша по́мысла , не оу҆ѧзви́сѧ посредѝ же́нъ ѡ҆бнажа́емь . без̾стра́стїѧ бо ѻ҆де́ждею маѯи́ме ѡ҆дѣ́ѧсѧ . боⷢ҇ . Оу҆сты̀ и҆ по́мысломъ и҆ срⷣцемъ прест҃а́ѧ бцⷣе , тѧ̀ проповѣ́дꙋемъ . тобо́ю бг҃ови примири́хомсѧ ѿринове́нїи , престꙋпле́нїемъ пе́рвїе пра́ѻ҆ц҃а .

и҆́нъ , і҆рмо́съ . Ѡ҆чище́нїе на́мъ хрⷭ҇тѐ и҆ спасе́нїе , влⷣко воз̾сїѧ̀ ѿ дв҃ы . да ꙗ҆́кѡ пррⷪ҇ка ѿ ѕвѣ́рѧ морска́гѡ , ѿ пе́рсей і҆ѡ́нꙋ , ѿ тлѝ и҆схи́ти , всегѡ̀ а҆да́ма всеро́дна па́дшагѡ . На без̾сме́ртнꙋю го́рꙋ вше́дъ добродѣ́тельми , и҆ на врагѝ храбо́рникъ чꙋ́денъ показа́сѧ . и҆ ны́нѣ моли́сѧ , хрⷭ҇тꙋ̀ бг҃ꙋ , ѡ҆б̾ ѻ҆те́чествѣ на́шемъ . ꙗ҆́кѡ да твои́ми мл҃твами проти́внїи побѣжда́ютсѧ . Чꙋдесе́мъ и҆сто́чникъ , ра́ка твоѧ̀ ꙗ҆ви́сѧ маѯи́ме бл҃же́нне . ѿ неѧ́же ѡ҆би́льнѡ всѝ притека́ющїи прїе́млютъ тѣлесе́мъ здра́вїе , и҆ дш҃а́мъ спасе́нїе твои́ми мл҃твами . Премꙋ́дростїю ра́зꙋма ѡ҆бъѧ́тъ ѻ҆́ч҃е , сꙋ́етнꙋю мꙋ́дрость ѡ҆ста́вль , бꙋ́йствомъ преминꙋ́лъ є҆сѝ . и҆ оу҆тае́наѧ ѿ премꙋ́дрыхъ и҆ разꙋ́мныхъ , трⷪ҇ческимъ бл҃говоле́нїемъ прїѧ́лъ є҆сѝ . боⷢ҇ . Мѡѷсе́й в̾ кꙋпинѣ̀ тѧ̀ ви́дѣвъ , в̾ горѣ̀ прїе́млющꙋ непостоѧ́нныи бжⷭ҇тва̀ ѻ҆́гнь неѡ҆па́льнѡ . тѣ́мъ тѧ̀ всѝ пѣ́сньми велича́емъ .

катава́сїѧ : Бжⷭ҇твеное сѐ и҆ всечестно́е .

конда́къ . гла́съ , в҃ . Вы́шнїѧ красоты̀ жела́ѧ , ни́жнїѧ сла́дости , тѣле́снаѧ ни во что́же вмѣни́лъ є҆сѝ , нестѧжа́нїемъ сꙋ́етнагѡ ми́ра . а҆́нг҃льское житїѐ проходѧ̀ сконча́сѧ , маѯи́ме бл҃же́нне . с̾ ни́ми же хрⷭ҇та̀ бг҃а молѝ , непреста́ннѡ ѡ҆ всѣ́хъ на́съ . и҆́косъ . А҆́нг҃лъ на землѝ житїе́мъ показа́сѧ . а҆́нг҃льскїѧ полкѝ оу҆диви́лъ є҆сѝ , и҆ бѣ́сы оу҆страши́лъ є҆сѝ , и҆ чл҃ки просвѣти́лъ є҆сѝ , чꙋде́съ твои́хъ зарѧ́ми , бг҃оно́се и҆ пребл҃же́нне ѻ҆́ч҃е на́шъ маѯи́ме . и҆ нн҃ѣ на́съ вразꙋмѝ воспѣва́ти пѣ́снь к̾ твоемꙋ̀ хвале́нїю , ра́достнымъ гла́сомъ си́це гл҃юще , ра́дꙋисѧ ѡ҆ста́вивыи тлѣ́нно мꙋдрова́нїе , и҆ прїе́мыи нетлѣ́нныи вѣне́цъ . ра́дꙋисѧ терпѣли́выи дш҃е́ю . ра́дꙋисѧ цѣломꙋ́дреныи ра́зꙋмомъ и҆ бг҃ꙋ зрѣ́нїемъ . ра́дꙋисѧ предо́блїи оу҆ро́де , и҆́же ѕлоко́зненаго врага̀ под̾ нога́ми сотры̀ . ра́дꙋисѧ ꙗ҆́кѡ ни́жнее мꙋдрова́нїе ѡ҆ста́вль , и҆ вы́шнѧгѡ црⷭ҇твїѧ дости́гъ . ра́дꙋисѧ цѣли́телю болѣ́знемъ , и҆ ѿгони́телю страсте́мъ . ра́дꙋисѧ маѯи́ме бл҃же́нне , молѝ непреста́ннѡ ѡ҆ всѣ́хъ на́съ .

пѣ́снь , з҃ . і҆рмо́съ . Впещѝ а҆враа́мскїѧ си дѣ́ти перси́дстѣй , любо́вїю бл҃говѣ́рїѧ па́че не́жели пла́менемъ ѡ҆палѧ́еми взыва́хꙋ , блгⷭ҇ве́нъ є҆сѝ в̾ цр҃кви сла́вы твоеѧ̀ гдⷭ҇и . Содержи́мъ хрⷭ҇тꙋ̀ подо́бнѡ ѻ҆́ч҃е бжⷭ҇твеною любо́вїю дрꙋги́хъ спастѝ , ра́достнѡ ве́сь са́мъ сѧ спастѝ вопїѧ̀ и҆́здалъ . бл҃гослове́нъ бг҃ъ ѻ҆ц҃ъ на́шихъ . Съ нб҃сѐ тебѣ̀ пода́ннꙋю ѻ҆́ч҃е прїи́мъ пи́щꙋ . сею̀ препита́лсѧ є҆сѝ . в̾ се́й же бл҃гопоко́рнѡ прїе́млюще твоѐ повелѣ́нїе , и҆ до́лꙋ влекꙋ́щїи грѣ́хъ ѡ҆ставлѧ́юще бл҃же́нне . Послѣ́довавъ ѻ҆те́ческимъ преда́нїемъ ѻ҆́ч҃е мꙋ́дре , па́гꙋбꙋ ѿринове́нїѧ заповѣ́да зовꙋ́щимъ , бл҃гослове́нъ бг҃ъ ѻ҆ц҃ъ на́шихъ . боⷢ҇ . Вы́шнѧгѡ ѡ҆сщ҃е́нно бжⷭ҇твеное селе́нїе ра́дꙋисѧ . тобо́ю бо да́стсѧ ра́дость бцⷣе вопїю́щимъ тѝ , бл҃гослове́на ты̀ в̾ жена́хъ всенепоро́чнаѧ влⷣчце .

и҆́нъ , і҆рмо́съ . Спасы́и во ѻ҆гнѝ а҆враа́мскїѧ сѝ дѣ́ти , и҆ халдѣ́и оу҆би́въ , ꙗ҆́же без̾ пра́вды пра́ведныѧ оу҆ловлѧ́хꙋ , препѣ́тыи гдⷭ҇и бж҃е ѻ҆ц҃ъ бл҃гослове́нъ є҆сѝ . Прича́стїемъ ст҃а́гѡ дх҃а просвѣще́нъ бл҃же́нне , и҆змѣни́всѧ добро́ты тѣле́сныѧ . и҆ позо́ръ бы́сть чл҃кѡмъ , непокрове́но тѣ́ло тлѣ́нными ѻ҆де́ждами и҆мы́и , хрⷭ҇тꙋ̀ вопїѧ́ше , бл҃гослове́нъ бг҃ъ ѻ҆ц҃ъ на́шихъ . Нищетꙋ̀ и҆ оу҆ро́дство и҆зво́ливъ прпⷣбне , и҆́же на́съ ра́ди ѡ҆бнища́вшагѡ . и҆ сегѡ̀ ле́гкїи ꙗ҆ре́мъ на ра́мо взе́мъ , томꙋ̀ послѣ́довалъ є҆сѝ , вопїѧ̀ , бл҃гослове́нъ бг҃ъ ѻ҆ц҃ъ на́шихъ . Ѕломꙋ́драгѡ врага̀ ко́зни оу҆премꙋ́дривъ оу҆ро́де прехва́льне , и҆ сегѡ̀ ꙗ҆́кѡ ры́бꙋ без̾гла́снꙋ сотворѝ бг҃омꙋ́дре . хрⷭ҇тꙋ̀ вопїѧ̀ , бл҃гослове́нъ бг҃ъ ѻ҆ц҃ъ на́шихъ . боⷢ҇ . Ꙗ҆́коже ло́жницꙋ бж҃їю , и҆ кади́льницꙋ разꙋ́мнагѡ и҆ свѣтоно́снаго оу҆́глѧ , приснора́дованнꙋю воспое́мъ зовꙋ́ще , ра́дꙋисѧ вино̀ спасе́нагѡ зва́нїѧ , блгⷭ҇ве́наѧ во́ вѣки . катава́сїѧ : Непослꙋжи́ша тва́ри .

пѣ́снь , и҃ . і҆рмо́съ . Рꙋ́цѣ распросте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ оу҆гаси́ша добродѣ́телїю поѧ́савшесѧ , и҆́же бл҃гоче́стїѧ люби́тели ѻ҆́троцы взыва́юще , бл҃гослови́те всѧ̀ дѣ́ла гдⷭ҇нѧ гдⷭ҇а . Всесвѣ́тлаѧ ѕвѣзда̀ сꙋ́щи в̾ ти́нѣ и҆ стра́сти , приводѧ̀ к̾ животꙋ̀ . твори́ши бо жены̀ нечи́стыѧ цѣломꙋ́дренѡ жи́ти . и҆ ѿго́ниши лю́тыѧ недꙋ́ги , вопїѧ̀ , бл҃гослови́те всѧ̀ дѣ́ла гдⷭ҇нѧ гдⷭ҇а . Ты̀ и҆сцѣлѝ оу҆́мъ мо́й въ кро́вѣ чꙋ́дныхъ и҆ мꙋ́дрыхъ прпⷣбне повелѣ́нїихъ бж҃їихъ . мно́ги оу҆лови́лъ є҆сѝ оу҆ро́дствовати гдⷭ҇а ра́ди , вѣ́дыи нарꙋга́емь бы́ти . вопїѧ̀ чистѣ́йшею дш҃е́ю , бл҃гослови́те всѧ̀ дѣ́ла гдⷭ҇нѧ гдⷭ҇а . Соверше́нъ є҆ди́нъ и҆́же вѣ́сть свои́хъ сѝ просла́вити гдⷭ҇ь прпⷣбныхъ . сі́и же гро́бꙋ посыла́емъ , и҆ а҆́нг҃льскими свѣтлослове́сїи почита́емъ вопїю́ще , бл҃гослови́те всѧ̀ дѣ́ла гдⷭ҇нѧ гдⷭ҇а . боⷢ҇ . И҆збавлѧ́ѧ на́съ воз̾сїѧ̀ и҆з̾ тебѐ гдⷭ҇ь дв҃о чⷭ҇таѧ . є҆го́же молѝ влⷣчце просвѣти́ти пою́щїѧ тѧ̀ , и҆ ѡ҆бстоѧ́нїѧ на́съ и҆зба́вити вопїю́щихъ , бл҃гослови́те всѧ̀ дѣ́ла гдⷭ҇нѧ гдⷭ҇а .

и҆́нъ , і҆рмо́съ . И҆зба́вителю всѣ́хъ всеси́льне , посредѣ̀ пла́мене бл҃гоче́ствовавшїѧ сше́дъ ѡ҆роси́лъ є҆сѝ , и҆ наꙋчѝ пѣ́ти , всѧ́каѧ дѣ́ла бл҃гослови́те гдⷭ҇нѧ гдⷭ҇а . Присво́ивсѧ содѣ́телю всѣ́хъ ѻ҆́ч҃е , и҆ грѣхо́вныѧ ꙗ҆́зи оу҆дали́всѧ , прїѧ́лъ є҆сѝ нбⷭ҇ное наслѣ́дїе , и҆ со а҆́нг҃лы ликꙋ́ѧ вопїе́ши , бл҃гослови́те всѧ̀ дѣ́ла гдⷭ҇нѧ гдⷭ҇а . Ю҆́ношескихъ и҆ плотьски́хъ страсте́й оу҆держа́лъ є҆сѝ взыгра́нїѧ , и҆ ѡ҆чи́щь всѧ́кїѧ скве́рны , дш҃ꙋ же и҆ тѣ́ло маѯи́ме пребл҃же́нне , цр҃квь показа́сѧ не ѡ҆скверне́на бг҃ови . є҆мꙋ́же непреста́ннѡ вопїе́ши , бл҃гослови́те всѧ̀ дѣ́ла гдⷭ҇нѧ гдⷭ҇а . Незаходи́мыи восїѧ̀ тебѣ̀ свѣ́тъ ѻ҆́ч҃е бг҃омꙋ́дре , присносꙋ́щнагѡ весе́лїѧ . в̾ не́мже ны́нѣ наслажда́ешисѧ пред̾стоѧ̀ ст҃ѣ́й трⷪ҇цы , и҆ воспѣва́ѧ хрⷭ҇та̀ во всѧ̀ вѣ́ки . боⷢ҇ . Тѧ̀ ѻ҆рꙋ́жїе непобѣди́мое на врагѝ пред̾лага́емъ . тѧ̀ ѡ҆снова́нїе и҆ наде́ждꙋ на́шемꙋ спасе́нїю бг҃оневѣ́сто и҆́мамы , и҆ тебѐ воспѣва́емъ во́ вѣки . катава́сїѧ : Хва́лимъ бл҃гослови́мъ . Ѻ҆́троки бл҃гочести́выѧ .

пѣ́снь , ѳ҃ . і҆рмо́с̾ . Ка́мень нерꙋкосѣ́чныѧ горы̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , совокꙋпи́въ раз̾стоѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Всѣ́мъ срⷣцемъ маѯи́ме , трⷪ҇цѣ оу҆се́рднѡ пред̾ложи́всѧ . и҆ ѿ неѧ̀ лꙋчѝ бг҃одѣ́тельнѡ прїе́мъ , свѣтови́денъ бы́сть , и҆ со а҆́нг҃лы ликꙋ́еши . Жела́нїемъ бжⷭ҇твенымъ прїедини́всѧ , и҆ воз̾держа́нїемъ просвѣща́емь , бꙋ́дꙋщихъ бл҃гъ в̾ прича́стїи оу҆́же бы́въ , маѯи́ме бг҃обл҃же́нне и҆ в̾ наслажде́нїи . Твоѧ̀ болѣ́зни и҆ по́ты прїѧ́тъ , весе́лїе ни ка́коже конца̀ и҆мꙋ́щее . в̾ не́мже пита́ѧсѧ маѯи́ме прпⷣбне , и҆ на́съ непреста́нно помина́й . боⷢ҇ . Разорѝ дш҃и моеѧ̀ ѻ҆́блаки , свѣ́тꙋ ѻ҆́блаче ст҃а́ѧ влⷣчце . и҆ си́льна содѣ́лай мѧ̀ , на́ страсти борю́щїѧ мѧ̀ .

и҆́нъ , і҆рмо́съ , то́йже . Ꙗ҆́коже тве́рдыи а҆дама́нтъ дш҃е́ю показа́сѧ , непоколѣби́мь вра́жїими прило́ги ѻ҆́ч҃е и҆ на́мъ тве́рдаѧ забра́ла бꙋ́ди бл҃же́нне , моли́твами свои́ми ѿ нахожде́нїи проти́вныхъ . Ѡ҆ст҃и́сѧ воздꙋ́хъ маѯи́ме бл҃же́нне па́мѧтїю твое́ю . и҆ на́съ торжествова́ти подвиза́етъ ра́достнѡ , ѡ҆сщ҃е́нное твоѐ пра́зднество . Жезло́мъ добродѣ́телей страстно́е мо́ре пресѣ́клъ , и҆ го́рдаго врага̀ ꙗ҆́коже дрꙋга́го фараѡ́на мл҃твами сѝ погрꙋзи́въ . и҆ и҆збра́нное ста́до но́вагѡ і҆и҃лѧ , невре́днѡ соблюдѝ , маѯи́ме бл҃же́нне моли́твами свои́ми . боⷢ҇ . Ковче́гъ свидѣ́нїѧ тѧ̀ чⷭ҇таѧ пи́шетъ , и҆ хлѣ́бъ и҆́стинныи жи́зни , прїе́мши чи́стаѧ сло́во ѻ҆ц҃ꙋ соприсносꙋ́щное .

катава́сїѧ : Всѧ́къ зе́менъ . Досто́йнѡ є҆́сть . свѣти́ленъ . А҆́нг҃льское житїѐ жела́ѧ прпⷣбне . тѣ́мже покори́лъ є҆сѝ стра́сти плотьскі́ѧ мꙋ́жески . и҆ равноа́нг҃ленъ бы́въ бг҃оно́се ѻ҆́ч҃е маѯи́ме . два́жды . сла́ва , и҆ ны́нѣ , боⷢ҇ . Тѧ̀ пред̾ста́тельницꙋ и҆́мамы всѝ грѣ́шнїи , ѽ прест҃а́ѧ дв҃о , ты̀ бл҃гопремѣ́нна сотворѝ своегѡ̀ сн҃а , мт҃рьними твои́ми мл҃твами .

На хвали́тѣхъ , стихѣ́ры . гла́съ , д҃ . поⷣ . да́лъ є҆сѝ зна́менїе .= Да́лъ є҆сѝ при́тчꙋ ,꙳ терпѣ́нїѧ и҆ мꙋ́жества ,꙳ пребл҃гі́и гдⷭ҇и ,꙳ пра́веднаго маѯи́ма , и҆ многочꙋде́снаго .꙳ добродѣ́тельми и҆ словесы̀ ,꙳ и҆ дѣ́лы сїѧ́юща .꙳ цѣломꙋ́дрїемъ оу҆краша́ема и҆ кро́тостїю .꙳ тѣ́мъ твоѐ не и҆зрече́нное смотре́нїе сла́вимъ ,꙳ і҆с҃е всеси́льне ,꙳ и҆ сп҃се дш҃а́мъ на́шимъ . =два́жды . Пра́веденъ и҆ неѕло́бивъ ,꙳ и҆́стиненъ же и҆ непоро́ченъ и҆ вѣ́ренъ ,꙳ оу҆клонѧ́ѧсѧ ѿ всѧ́кїѧ ѕло́бныѧ ве́щи ,꙳ показа́сѧ маѯи́ме бл҃же́нне .꙳ просвѣще́нъ добродѣ́тельми ,꙳ и҆ бл҃гоче́стїемъ сїѧ́ѧ .꙳ тѣ́мъ тѧ оу҆бл҃жа́емъ ,꙳ и҆ ст҃о́е твоѐ и҆ честно́е дне́сь пра́зднꙋемъ оу҆спе́нїе ,꙳ ра́дꙋющесѧ , бг҃омꙋ́дре . Цѣломꙋ́дрїемъ и҆ бл҃говѣ́рїемъ ,꙳ ꙗ҆́кѡ багрѧни́цею многоцѣ́нною ,꙳ ѡ҆дѣ́ѧвсѧ маѯи́ме .꙳ пра́вдою же и҆ кро́тостїю ,꙳ ꙗ҆́кѡ бжⷭ҇твенымъ вѣнце́мъ оу҆вѧзе́сѧ .꙳ со стра́ждꙋщими хрⷭ҇та̀ ра́ди ,꙳ ца́рствовати воз̾желѣ́лъ є҆сѝ .꙳ и҆ ны́нѣ цр҃е́ви си́ламъ пред̾стои́ши ,꙳ і҆с҃ꙋ всеми́лостивомꙋ ,꙳ и҆ сп҃сꙋ дш҃а́мъ на́шимъ . сла́ва . гла́съ , и҃ . Добродѣ́телей твои́хъ бг҃омꙋ́дре маѯи́ме , и҆справле́нїѧ оу҆ѧсни́ша вѣ́рныхъ срⷣца̀ . кто́ бо слы́ша без̾мѣ́рное твоѐ смире́нїе , и҆ терпѣ́нїе не оу҆диви́тсѧ . є҆́же ко всѣ́мъ кро́тость и҆ без̾ѕло́бїе . къ скорбѧ́щимъ ми́лованїе , и҆ сꙋ́щимъ въ бѣда́хъ ско́рое поможе́нїе . къ пла́вающимъ немѧте́жное приста́нище . и҆ в̾ пꙋ́ть ше́ствꙋющимъ благо́е поспѣше́нїе . всѧ̀ бг҃олѣ́пнѡ предварѝ досточꙋ́дне . и҆ ны́нѣ неꙋвѧда́емымъ вѣнце́мъ ѻ҆дѣ́ѧсѧ , ѿ рꙋкѝ вседержи́телѧ бг҃а . є҆го́же молѝ спасти́сѧ дш҃а́мъ на́шимъ . и҆ ны́нѣ , боⷢ҇ . Влⷣчце прїимѝ моли́твꙋ ра́бъ свои́хъ , и҆ и҆зба́ви на́съ ѿ всѧ́кїѧ нꙋ́жды и҆ печа́ли . Славосло́вїе вели́кое , и҆ ѿпꙋ́стъ .

На литꙋргі́и , бл҃же́нна , на и҃ . ѿ а҃ гѡ кано́на , пѣ́снь , г҃ ѧ . и҆ в҃ гѡ кано́на , пѣ́снь , ѕ҃ ѧ .

По вхо́дѣ , а҆́ще ли хра́мъ хрⷭ҇то́въ , и҆лѝ бцⷣы : тропа́рь хра́мꙋ , и҆ ст҃о́мꙋ . сла́ва , конда́къ ст҃о́мꙋ . и҆ ны́нѣ , хра́мꙋ .

По вхо́дѣ , а҆́ще хра́мъ ст҃ы́мъ : тропа́рь хра́мꙋ , и҆ ст҃о́мꙋ . конда́къ хра́мꙋ . сла́ва , ст҃о́мꙋ . и҆ ны́нѣ , конда́къ : застꙋ́пнице хрⷭ҇тїа́нѡмъ .

проки́менъ , ѱл҃о́мъ дв҃довъ . честна̀ пре́д̾ гдⷭ҇емъ сме́рть прпⷣбныхъ є҆гѡ̀ . сти́хъ . что̀ возда́мъ гдⷭ҇ви ѡ҆ всѣ́хъ , и҆́хже возда́стъ ми . а҆пⷭ҇лъ , къ= гала́тѡмъ . заⷱ҇ , сг҃і . а҆ллилꙋ́їѧ . бл҃же́нъ мꙋ́жь боѧ́исѧ гдⷭ҇а , в̾ за́повѣдехъ є҆гѡ̀ восхо́щетъ ѕѣлѡ̀ . =є҆ѵⷢ҇а́лїе , ѿ =матѳе́ѧ . заⷱ҇ , і҃ . =прича́стенъ . въ па́мѧть вѣ́чнꙋю бꙋ́детъ пра́ведникъ .