МЦⷭ҇А ТОГО́ЖЕ ВЪ В҃І ДН҃Ь

и҆́же во ст҃ы́хъ ѻ҆ц҃а на́шегѡ і҆ѡа́нна млⷭ҇тивагѡ а҆рхїє҆пⷭ҇кпа а҆леѯа́ндрскагѡ . и҆ прпⷣбнагѡ ѻ҆ц҃а на́шегѡ ни́ла . =Ве́черъ , на гдⷭ҇и возва́хъ , стихѣ́ры . гла́съ , д҃ . поⷣ . да́лъ є҆сѝ зна́менїе . Р=асточи́въ раздаѧ̀ ,꙳ тре́бꙋющимъ и҆мѣ́нїе своѐ і҆ѡа́нне чꙋ́дне ,꙳ млⷭ҇тїю подо́бѧсѧ ,꙳ млⷭ҇тивомꙋ прпⷣбне влⷣцѣ .꙳ тѣ́мъ ти пребыва́етъ вои́стинꙋ ,꙳ во́ вѣки па́мѧть сла́вне .꙳ ю҆́же вѣ́рою пра́зднꙋющїѧ ,꙳ твои́ми моли́твами сохранѧ́й ,꙳ и҆скꙋше́нїи же и҆ скорбе́й ст҃лю всебога́те . Твоѐ ѡ҆чище́нїе ,꙳ и҆ оу҆ма̀ и҆справле́нїе , и҆ нра́въ бжⷭ҇твеныи ,꙳ ви́дѧи та́йнаѧ ви́дѣвъ ,꙳ воз̾во́дитъ на вели́кїи престо́лъ ,꙳ пома́завъ мѵ́ромъ тѧ̀ премꙋ́дре и҆ соверши́въ ,꙳ и҆ ста́дꙋ ѡ҆кормле́нїе ꙗ҆́вѣ врꙋчи́въ ,꙳ є҆́же к̾ приста́нищꙋ напра́вль ,꙳ бжⷭ҇твенагѡ хотѣ́нїѧ ,꙳ і҆ѡа́нне бг҃огла́се . Всѧ̀ хотѣ́нїѧ ,꙳ твоегѡ̀ срⷣца гдⷭ҇ь ,꙳ достосла́вне да́стъ ,꙳ всѧ́ бо соблюдѐ законоположе́нїѧ спасе́наѧ .꙳ и҆́бо бг҃а подо́бно ,꙳ и҆ бли́жнѧго бг҃обл҃же́нне ,꙳ ꙗ҆́кѡ себѐ воз̾люби́лъ є҆сѝ ,꙳ и҆ тре́бꙋющихъ оу҆довли́лъ є҆сѝ .꙳ сегѡ̀ ра́ди тѧ̀ дне́сь і҆ѡа́нне почита́емъ .

и҆́ны , стⷯры , прпⷣбномꙋ . гла́съ , и҃ . поⷣ . что́ тѧ и҆менꙋ́емъ а҆пⷭ҇ле .= Ч=то́ тѧ ны́нѣ нарече́мъ ст҃е ;꙳ рѣкꙋ̀ и҆сходѧ́щꙋ ѿ разꙋ́мнагѡ є҆де́ма ,꙳ пото́ка ѿ́ бг҃а дае́ма даро́въ ,꙳ наводне́нїѧ оу҆че́нїѧ бл҃года́тнагѡ ,꙳ ча́шꙋ премꙋ́дрости и҆ ра́зꙋма ,꙳ моле́бника крѣпча́йша ,꙳ оу҆чи́телѧ дѣ́йственаго .꙳ молѝ спасти́сѧ дш҃а́мъ на́шимъ . Что́ тѧ и҆менꙋ́емъ прпⷣбне ;꙳ дѣ́лателѧ без̾сме́ртныхъ бл҃же́нне садо́въ ,꙳ сади́телѧ разꙋ́мнагѡ раѧ̀ вѣ́рныхъ ,꙳ зако́нъ бг҃ода́нныхъ и҆скꙋ́снаго ,꙳ повелѣ́нїи дх҃о́вныхъ хꙋдо́жника ,꙳ сказа́телѧ бл҃гостоѧ́нна ,꙳ и҆ наказа́телѧ дово́льнѣйша .꙳ молѝ спасти́сѧ дш҃а́мъ на́шимъ . Что́ тѧ ны́нѣ нарекꙋ̀ чꙋ́дне ;꙳ оу҆ставополо́жника сопрѧже́нїю и҆ цѣломꙋ́дрїю пода́телѧ ,꙳ наказа́телѧ и҆́ночествꙋющимъ и҆ дѣ́вствꙋ наста́вника ,꙳ пра́веднѡ ѡ҆бои́мъ мѣ́рѧща ,꙳ ꙗ҆́кѡ и҆скꙋ́сомъ проше́дша ѡ҆бою́дꙋ ,꙳ мно́га твоѧ̀ дѣѧ́нїѧ ,꙳ и҆ ѡ҆́ бз҃ѣ ти поще́нїѧ .꙳ молѝ спасти́сѧ дш҃а́мъ на́шимъ .

сла́ва . гла́съ , в҃ . Ми́лости и҆сто́чникъ тре́бꙋющимъ оу҆множа́ѧ , бл҃гоми́лостивныѧ щедро́ты , і҆ѡа́ннъ хрⷭ҇то́въ подо́бникъ вели́кїи па́стырь и҆ а҆леѯандре́ѡмъ свѣти́ло . прїиди́те насыти́мсѧ ни́щїи дх҃о́внѡ подража́ющагѡ ти́хость , любомилосе́рднымъ нра́вомъ хрⷭ҇та̀ стра́нствовавшаго ни́щихъ ра́ди . ꙗ҆́кѡ дре́вле а҆враа́мъ бл҃же́нствꙋ сподо́бисѧ , и҆ со дерзнове́нїемъ мо́литсѧ , поми́ловати дш҃а на́ша . и҆ нн҃ѣ , боⷢ҇ . и҆лѝ , крⷭ҇тобоⷢ҇ . поⷣ . є҆гда̀ ѿ́ древа . На́древѣ тѧ крⷭ҇тнѣмъ і҆с҃е , ра́спѧта зрѧ́щи не и҆скꙋсобра́чнаѧ пла́чꙋщи глаго́лаше , ча́до сла́дкое , вскꙋ́ю ѡ҆ста́ви менѐ ро́ждьшꙋю тѧ є҆ди́нꙋ , свѣ́те неприкоснове́нныи пребезнача́льнагѡ ѻ҆ц҃а . потщи́сѧ оу҆́бѡ и҆ просла́висѧ , ꙗ҆́кѡ да сла́вꙋ полꙋча́тъ бжⷭ҇твенꙋю , и҆́же твоѧ̀ стрⷭ҇ти бжⷭ҇твеныѧ сла́вѧщїи .

На стихо́внѣ , во ѻ҆кта́и . сла́ва , прпⷣбномꙋ . гла́съ , и҃ . И҆́нокъ мно́жество , наста́вника тѧ̀ чте́мъ ѻ҆́ч҃е на́шъ . тобо́ю бо пꙋ́ть сꙋ́щїи пра́выи ходи́ти оу҆вѣ́дѣхомъ . бл҃же́нъ є҆сѝ хрⷭ҇то́ви рабо́тавъ , и҆ вра́жїю ѡ҆бличи́въ си́лꙋ . а҆́нг҃лѡмъ собесѣ́дниче и҆ прпⷣбнымъ соприча́стниче и҆ пра́веднымъ . с̾ ни́ми же моли́сѧ гдⷭ҇ви , поми́ловатисѧ дш҃а́мъ на́шимъ . и҆ ны́нѣ , боⷢ҇ . и҆лѝ , крⷭ҇тобоⷢ҇ . Тѧ̀ пригвожда́ема ви́дѧщи , на крⷭ҇тѣ̀ і҆с҃е , и҆ стра́сть прїе́млюща во́лею влⷣко , дв҃аѧ и҆ мт҃и твоѧ̀ , ча́до гл҃аше , ча́до сла́дкое , ꙗ҆́звы непра́веднѡ ка́кѡ терпи́ши , врачꙋ̀ и҆сцѣли́выи земны́мъ не́мощь , и҆ ѿ тлѧ̀ и҆зба́вивыи всѣ́хъ милосе́рдїемъ сѝ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , и҃ . Въ терпѣ́нїи свое́мъ стѧжа́лъ є҆сѝ мздꙋ̀ свою̀ ѻ҆́ч҃е прпⷣбне і҆ѡа́нне , в̾ мл҃твахъ непреста́ннѡ терпѧ̀ . ни́щихъ возлюби́въ , и҆ си́хъ оу҆дово́лилъ є҆сѝ . но моли́сѧ хрⷭ҇тꙋ̀ бг҃ꙋ і҆ѡа́нне бл҃же́нне спасти́сѧ дш҃а́мъ на́шимъ .

сла́ва , прпⷣбномꙋ . гла́съ , и҃ . Слеза́ми твои́хъ и҆сто́чникъ пꙋсты́ни без̾пло́дное напои́лъ є҆сѝ , и҆ є҆́же и҆з̾ глꙋбины̀ воздыха́ньми во́сто трꙋды̀ расплоди́лъ є҆сѝ . и҆ бы́сть свѣти́льникъ вселе́ннѣй , сїѧ́ѧ чꙋдесы̀ , ни́ле ѻ҆́ч҃е на́шъ , молѝ хрⷭ҇та̀ бг҃а , спасти́сѧ дш҃а́мъ на́шимъ .

и҆ ны́нѣ , боⷢ҇ . и҆лѝ , крⷭ҇тобоⷢ҇ .

На оу҆́трени . є҆ди́нъ кано́нъ , во ѻ҆кта́и , со і҆рмосо́мъ , на́ ѕ҃ . и҆ ст҃ы́мъ два̀ , на и҃ . кано́нъ , і҆єра́рхꙋ . творе́нїе і҆ѡ́сифово . гла́съ , и҃ . пѣ́снь , а҃ . і҆рмо́съ . Посѣче́ныи несѣко́мое пресѣчѐ , и҆ ви́дѣ сл҃нце зе́млю , є҆ѧ́же нѣ́сть ви́дѣло , лю́тагѡ врага̀ вода̀ потопи́ла є҆́сть , и҆ непроходи́мое про́йде і҆зра́иль , пѣ́снь же воспѣва́шесѧ гдⷭ҇ви пое́мъ , сла́внѡ бо просла́висѧ .

запѣ́в̾ : Ст҃лю хрⷭ҇то́въ і҆ѡа́нне , молѝ бг҃а ѡ҆ на́съ . Млрⷭ҇дїемъ оу҆ма̀ просвѣща́емь , и҆ любо́вїю хрⷭ҇то́вою ѻ҆́ч҃е ѡ҆зарѧ́емь , ми́лостынѧми ѡ҆блиста́емь сїѧ́нїи . є҆ди́нагѡ млⷭ҇тивагѡ бг҃а прїѧ́телище чистѣ́йше і҆ѡа́нне бы́сть . тѣ́мъ тѧ̀ оу҆бл҃жа́емъ . Во́ вѣки при́снѡ пребыва́ющаѧ смотри́въ мꙋ́дрымъ смы́сломъ ѻ҆́ч҃е сщ҃е́нне , и҆змѣни́въ тлѣ́ющихъ свѣ́тлѡ нетлѣ́нными . и҆ ны́нѣ на́ нб҃сѣхъ жи́тельствꙋеши . вопїѧ̀ со беспло́тными ли́ки , гдⷭ҇ви пое́мъ , ꙗ҆́кѡ просла́висѧ . Млⷭ҇ти да́тель ѡ҆дари́въ ми́лостивное прпⷣбне твоѐ помышле́нїе , поми́лова мно́гихъ бжⷭ҇твенымъ тѝ хода́тайствомъ . бы́сть бо оу҆тѣше́нїе дш҃а́мъ , ни́щимъ же промышле́нїе і҆ѡа́нне премꙋ́дре бг҃обл҃же́нне сщ҃е́нниче . боⷢ҇ . Блгⷭ҇ве́ннаѧ чⷭ҇таѧ и҆ всепѣ́таѧ є҆ди́на ро́ждьши воплоще́ннаго бг҃а , прⷭ҇нотекꙋ́щїи и҆сто́чникъ на́мъ оу҆пова́ющимъ натѧ̀ , цѣле́нїѧ и҆злива́ѧи вѣ́рнымъ . молѝ є҆го́же родила̀ є҆сѝ , дарова́ти ми́рови ве́лїю ми́лость .

и҆́нъ кано́нъ прпⷣбномꙋ . є҆мꙋ́же краегране́сїе сицево̀ : напаѧ́етъ мѧ̀ ни́лъ ра́внымъ всепло́дствїемъ . творе́нїе ѳеѡ́фаново . гла́съ , и҃ . пѣ́снь , а҃ . і҆рмо́съ . Во́дꙋ проше́дъ , ꙗ҆́кѡ по́ сꙋхꙋ , и҆з̾ є҆ги́петска ѕла̀ и҆збѣжа́въ , і҆и҃льтѧнинъ вопїѧ́ше , и҆зба́вителю бг҃ꙋ на́шемꙋ пое́мъ .

запѣ́въ : Прпⷣбне ѻ҆́ч҃е ни́ле , молѝ бг҃а ѡ҆ на́съ . Напое́нїи тѝ бл҃же́нне та́йными , напоѧ́ѧ бога́тнѡ и҆з̾со́хшееми срⷣце помышле́нїи , кла́съ пѣ́нїѧ тѝ принестѝ твои́ми мл҃твами сподо́би . Гл҃ы тече́нїи твои́хъ ꙗ҆́кѡ и҆з̾ є҆де́ма пребога́те ни́ле прои҆сходѧ́ще ꙗ҆́вственѡ , лицѐ всѐ прⷭ҇нотекꙋ́ще цр҃ко́вное напоѧ́ютъ . Повелѣ́нїи слове́съ рѣка̀ твои́хъ бг҃оглаго́ливе сердца̀ бл҃гочести́выхъ напоѧ́етъ , ѕлочести́выхъ же потоплѧ́етъ составле́нїѧ . боⷢ҇ . И҆зблева́въ въ є҆́ввинъ слꙋ́хъ ꙗ҆́дъ дш҃етлѣ́нныи оу҆бі́ица вра́гъ . хрⷭ҇та́ же ро́ждьши бг҃омт҃и , тогѡ̀ вреда̀ и҆сцѣли́ла є҆сѝ .

пѣ́снь , г҃ . і҆рмо́съ . Нбⷭ҇номꙋ крꙋ́гꙋ верхотво́рче гдⷭ҇и , и҆ цр҃кви зижди́телю , ты̀ менѐ оу҆твердѝ в̾ любвѝ свое́й . жела́нїемъ сы́и кра́й , и҆ вѣ́рнымъ оу҆тверже́нїе , є҆ди́не чл҃колю́бче . Бл҃голѣ́пна ꙗ҆́кѡ ѻ҆трокови́ца ѿ ма́слины вѣне́цъ носѧ́щи , ꙗ҆ви́сѧ тебѣ̀ достосла́вне , млⷭ҇тивагѡ млрⷭ҇дїѧ бл҃года́ть , привлача́щи тѧ , к̾ бжⷭ҇твенѣй млⷭ҇ти . На прⷭ҇то́лѣ сщ҃е́нне сꙋдо́мъ бж҃їимъ сла́вне ѻ҆́ч҃е і҆ѡа́нне сѣ́лъ є҆сѝ . ꙗ҆́коже а҆́нг҃лъ поживѐ , ми́рныѧ приносѧ̀ сщ҃е́нно же́ртвы вседержи́телю . Мно́гое млрⷭ҇дїе млрⷭ҇дагѡ гдⷭ҇а ѻ҆́ч҃е подража́ѧ , за млрⷭ҇дїе ѡ҆бнища́вшагѡ пло́тїю , ни́щїѧ оу҆дово́лилъ є҆сѝ , стра́стныѧ и҆ без̾покро́вныѧ собира́ѧ , и҆спо́лнитель повелѣ́нїи бжⷭ҇твеныхъ бы́въ . боⷢ҇ . Всели́всѧ в̾ дв҃ꙋ тѣле́снѣ гдⷭ҇и , ꙗ҆ви́сѧ чл҃кѡмъ , ꙗ҆́коже подоба́ше ви́дѣти тѧ̀ , ю҆́же и҆ показа̀ , ꙗ҆́кѡ и҆́стиннꙋю бцⷣꙋ , вѣ́рнымъ по́мощь , є҆ди́не чл҃колю́бче .

и҆́нъ , і҆рмо́съ . Ты̀ є҆сѝ оу҆тверже́нїе , притека́ющимъ тѝ гдⷭ҇и , ты́ же свѣ́тъ ѡ҆мраче́ннымъ , и҆ пое́тъ тѧ̀ дх҃ъ мо́й . Дарова́нїѧ ѻ҆́ч҃е дх҃о́внаѧ носѧ̀ в̾ свое́мъ помышле́нїи , и҆ лꙋка́ваѧ помышле́нїѧ ѿгна̀ . Мѵ́ро бл҃гово́нное , твоѧ̀ мл҃твы на́мъ прине́слъ є҆сѝ сщ҃е́нниче , видѣ́нїемъ дѣ́тельнымъ пожи́въ . И҆сточи́лъ є҆сѝ оу҆че́нїѧ нбⷭ҇наѧ премꙋ́дре , ꙗ҆́кѡ ѿ и҆сто́чника , и҆ цр҃ко́вныѧ пи́щники раз̾богати́лъ є҆сѝ . боⷢ҇ . Оу҆мертвѝ мꙋ́дрость пло́ти на́шеѧ пречⷭ҇таѧ , и҆́же и҆сто́чникъ без̾сме́ртїѧ чл҃кѡмъ и҆сточи́вши .

конда́къ , прпⷣбномꙋ . гла́съ , в҃ . Чистото́ю дш҃е́вною бжⷭ҇твенѡ воѡ҆рꙋжи́всѧ , и҆ непреста́ннꙋю мл҃твꙋ ꙗ҆́кѡ копїѐ в̾ рꙋцѣ̀ и҆мѣ́ѧ , крѣ́пкѡ с̾пробо́лъ є҆сѝ бѣсо́вскаѧ ѡ҆полче́нїѧ , ни́ле ѻ҆́ч҃е на́шъ . молѝ хрⷭ҇та̀ бг҃а непреста́нно ѡ҆ всѣ́хъ на́съ . и҆́косъ . Ка́кѡ восхвалю̀ ѡ҆каѧ́нныи твоѧ̀ по́двиги ѻ҆́ч҃е прпⷣбне . и҆ сле́зъ пꙋчи́нꙋ ю҆́же ѿры́гнꙋ , ка́кѡ и҆сповѣ́мъ . ты̀ в̾ житїѝ пребыва́ѧ , а҆́нг҃льское пости́же ликова́нїе . всѧ́ бо спро́ста воз̾держа́нїемъ стра́сти оу҆мертви́въ мꙋ́дре , и҆ пло́ть и҆стни́въ , покорѝ дх҃ови . моли́твꙋ же и҆мы́и ꙗ҆́кѡ ме́чь , тмѣ̀ пред̾ста́телѧ низ̾ложи́въ . молѝ хрⷭ҇та̀ бг҃а непреста́нно ѡ҆ всѣ́хъ на́съ .

сѣда́ленъ . гла́съ , и҃ . Млⷭ҇тивенъ нра́въ прїе́мъ , бл҃госе́рдъ ꙗ҆ви́сѧ , и҆ пода́теленъ ни́щимъ и҆ тре́бꙋющимъ і҆ѡа́нне бг҃одх҃нове́нне . сегѡ̀ ра́ди зва́нїемъ дѣѧ́нїю подо́бнѡ , па́че всѣ́хъ ст҃ы́хъ бл҃же́нне ѡ҆богати́ тѧ ѕѣлѡ̀ пода́тель бл҃ги́хъ хрⷭ҇то́съ . є҆мꙋ́же бг҃омꙋ́дре ст҃лю пребога́те моли́сѧ , грѣхо́въ ѡ҆ставле́нїе пода́ти , чтꙋ́щимъ любо́вїю ст҃ꙋ́ю па́мѧть твою̀ . и҆́нъ , сѣда́ленъ , прпⷣбномꙋ . Оу҆краси́въ сво́й оу҆́мъ видѣ́нїи , бг҃осло́вїѧ рѣ́ки ѿры́гнꙋ . напоѧ́ѧ срⷣца̀ ни́ле бг҃оно́сне , вѣ́рою почерпа́ющихъ твоѧ̀ оу҆че́нїѧ , пи́ва свѣ́тлаго же и҆ чи́стагѡ , и҆ чтꙋ́щихъ па́мѧть твою̀ свѣтоза́рнꙋю же и҆ честнꙋ́ю , прпⷣбнымъ оу҆добре́нїе , и҆ ѻ҆ц҃е́мъ похвало̀ . сла́ва , и҆ ны́нѣ , боⷢ҇ . Неи҆змѣ́ннаго бг҃а ро́ждьши , и҆змѣнѧ́ема мѧ̀ при́снѡ грѣхѝ прило́ги лꙋка́вагѡ , бг҃обл҃года́тнаѧ оу҆крѣпѝ срⷣце моѐ бл҃га́ѧ , мт҃рьними тѝ моли́твами . да и҆ а҆́зъ бл҃года́рственѡ зовꙋ́ ти бг҃ороди́тельнице мр҃і́е , поми́лꙋй ста́до своѐ є҆́же стѧжа̀ всенепоро́чнаѧ . крⷭ҇тобоⷢ҇ . Ѿ крове́й твои́хъ чи́стыхъ воплоще́ннаго , и҆ па́че сло́ва ѿ тебѐ чи́стаѧ ро́ждьшагосѧ , на́ древѣ ви́сѧща посредѣ̀ ѕлодѣ́ю ви́дѧщи , оу҆тро́бою болѧ́ше , и҆ мт҃рьски рыда́ющи вопїѧ́ше , оу҆вы̀ мнѣ̀ ча́до моѐ . ко́е бжⷭ҇твеное и҆ неи҆зглаго́ланное смотре́нїе твоѐ , и҆́мже ѡ҆животворѝ созда́нїе своѐ , пою̀ твоѐ милосе́рдїе .

пѣ́снь , д҃ . і҆рмо́съ . Оу҆слы́шахъ гдⷭ҇и смотре́нїѧ твоегѡ̀ та́инство , разꙋмѣ́хъ дѣ́ла твоѧ̀ , и҆ просла́вихъ твоѐ бжⷭ҇тво̀ . Чи́стаѧ ѻ҆би́тель ꙗ҆ви́сѧ ст҃ѣ́й трⷪ҇цѣ прпⷣбне , и҆ цр҃кви бжⷭ҇твеное сокро́вище и҆ ст҃лемъ нача́токъ . Мно́гое милосе́рдїе твоѐ , гдⷭ҇ь внима́ѧ бл҃госе́рдыи , дш҃ꙋ твою̀ ѡ҆ст҃ѝ і҆ѡа́нне ѻ҆́ч҃е сщ҃е́нне . За́повѣдемъ непосты́денъ бы́сть дѣ́латель всеще́драгѡ , и҆спо́лнисѧ бл҃ги́хъ є҆гѡ̀ въ се́лехъ ст҃ы́хъ водворѧ́емь . боⷢ҇ . Ѡ҆чище́нїе на́мъ да́рꙋй невѣ́дѣнїемъ ꙗ҆́кѡ без̾грѣ́шенъ , и҆ оу҆мирѝ ми́ръ сво́й бж҃е моли́твами ро́ждьшїѧ тѧ̀ .

и҆́нъ , і҆рмо́съ , то́йже . Возведѝ премꙋ́дре страстна́го мѧ плѣне́нїѧ , ꙗ҆́кѡ и҆збавле́нїе и҆ цѣ́нꙋ бг҃ови приносѧ̀ мл҃твы твоѧ̀ . Сщ҃е́ннѡ вчини́ти є҆́же ѡ҆ хрⷭ҇тѣ̀ премꙋ́дрости повелѣ́нїѧ . и҆скꙋси́въ поще́нїемъ себѐ всебл҃же́нне проѡ҆чи́стова . Помышле́нїѧ всѧ́ко возноше́нїе ѻ҆́ч҃е взе́млемо смири́лъ є҆сѝ . мно́жествомъ премꙋ́дрости погꙋби́въ си́хъ па́мѧть . боⷢ҇ . Ѻ҆ц҃ꙋ соприсносꙋ́щныи , ꙗ҆́кѡ бг҃ъ сло́во пре́жде беспло́тное , в̾ послѣ́днѧѧ воплоти́сѧ ѿ чⷭ҇тыхъ крове́й твои́хъ всепѣ́таѧ .

пѣ́снь , є҃ . і҆рмо́съ . Ѿ ́нощи невѣ́денїѧ , по дш҃етлѣ́ннꙋ пꙋтѝ прⷭ҇нѡ блꙋдѧ́щагѡ , свѣ́томъ бг҃оразꙋ́мїѧ твоегѡ̀ гдⷭ҇и , наставлѧ́ѧ мѧ на стезю̀ заповѣде́й твои́хъ напра́ви . Оу҆мертви́вшемꙋсѧ за ми́лость ме́ртвостїю во́льною мꙋ́дре подо́бѧсѧ , распѧ́тсѧ ми́рови и҆ страсте́мъ , и҆ животꙋ̀ преми́рномꙋ сподо́бисѧ достосла́вне . Бл҃же́нствꙋ сподо́билсѧ є҆сѝ , кро́токъ , и҆ бл҃госе́рдъ , и҆ миротво́рецъ бы́въ . и҆ а҆́лчꙋщимъ хлѣ́бъ неи҆стощи́мыи , и҆ ни́щимъ пода́тель , ѡ҆дѣѧ́нїе же наготꙋ́ющимъ . Бжⷭ҇твеными причаще́ньми ѻ҆́ч҃е оу҆добрѧ́емь , ꙗ҆́кѡ а҆́нг҃лъ бг҃ови непоро́чно сщ҃е́нствовалъ є҆сѝ . вѣ́рныѧ просвѣща́ѧ сщ҃е́нными оу҆че́нїи твои́ми . боⷢ҇ . И҆́же всѣ́хъ бг҃а без̾ сѣ́мене в̾ свои́хъ ложеснѣ́хъ поне́сшꙋю . плотоно́сца же на́мъ ро́ждьшꙋю пречⷭ҇тꙋю бцⷣꙋ воспѣва́емъ , ꙗ҆́кѡ спасе́нїе дш҃а́мъ на́шимъ .

и҆́нъ , і҆рмо́съ . Оу҆́треннююще вопїе́мъ тѝ гдⷭ҇и спаси́ ны , ты́ бо є҆сѝ бг҃ъ на́шъ , ра́звѣ бо тебѐ и҆но́гѡ незна́емъ . Цѣломꙋ́дрено жела́ѧ премꙋ́дре бжⷭ҇твеныѧ чистоты̀ , ѡ҆ста́вилъ є҆сѝ всѐ жите́йское пристра́стїе . Разꙋ́мнаѧ ты̀ вы́ше ра́зꙋма бг҃оѧвле́нне пости́глъ є҆сѝ . соедине́нїемъ бжⷭ҇твенымъ наꙋча́емь . Ѻ҆́блакъ тѧ̀ тꙋ́чами бг҃оно́сне , всѐ потоплѧ́ющь неразꙋ́мїѧ свѣ́мы . боⷢ҇ . Ꙗ҆́кѡ кри́нъ сїѧ́ющь посредѣ̀ те́рнїѧ , ѡ҆брѣ́тъ жени́хъ тѧ̀ дв҃о мт҃и возлюбѝ .

пѣ́снь , ѕ҃ . і҆рмо́съ . Мл҃твꙋ пролїю̀ ко́ гдⷭ҇ꙋ , и҆ томꙋ̀ воз̾вѣщꙋ̀ печа́ль мою̀ . ꙗ҆́кѡ ѕѡ́лъ дш҃а моѧ̀ напо́лнисѧ , и҆ живо́тъ мо́й а҆́дꙋ прибли́жисѧ . и҆ молю́сѧ ꙗ҆́кѡ і҆ѡ́на , ѿ тлѝ бж҃е мо́й воз̾веди́ мѧ . Моли́твою и҆ посто́мъ оу҆пражнѧ́ѧсѧ и҆ бдѣ́ньми бг҃а молѧ̀ , ѿкрове́нїѧ и҆ зрѣ́нїи бжⷭ҇твеныхъ сподо́бисѧ бг҃омꙋ́дре всебога́те . наꙋча́емь па́че оу҆ма̀ и҆ по́мысла мꙋ́дре чистото́ю . Ꙗ҆́кѡ а҆́нг҃лъ с̾ пло́тїю на землѝ ѻ҆́ч҃е поживѐ , же́ртвы ми́рныѧ и҆ бес̾кро́вны , вѣ́рою и҆ сокрꙋше́нїемъ срⷣца и҆ дх҃а бл҃же́нне , творцꙋ̀ приносѧ̀ і҆ѡа́нне ра́достнѡ . Житїѐ твоѐ па́че сл҃нца воз̾сїѧ́въ , милосе́рдїѧ и҆спꙋстѝ лꙋчѝ тре́бꙋющимъ , ѿгонѧ́ща те́мныи ѻ҆́блакъ нищеты̀ всебога́те , грѣ́юща же зимо́ю лю́тыхъ ѡ҆держи́мыѧ бг҃одохнове́нне . боⷢ҇ . Непреста́й ѡ҆ на́съ молѧ́щисѧ прест҃а́ѧ бцⷣе дв҃о , ꙗ҆́кѡ вѣ́рнымъ оу҆твержде́нїе ты̀ є҆сѝ . и҆ наде́ждею твое́ю крѣпи́мсѧ , и҆ любо́вїю тѧ̀ и҆ и҆з̾ тебѐ вопло́щшагосѧ непреста́ннѡ сла́вимъ .

и҆́нъ , і҆рмо́съ , то́йже . Премꙋ́дрости даро́мъ оу҆краша́емь , и҆ житїѧ̀ свѣ́тлостїю оу҆добрѧ́емь , сщ҃еннодѣ́йственикъ бжⷭ҇твеныи бы́лъ є҆сѝ . зижди́телю хода́тайствꙋѧ и҆ зда́нїю , и҆ бы́сть свѣ́телъ ѻ҆́ч҃е оу҆чи́тель . Къ горѣ̀ добродѣ́телей прибли́живсѧ , и҆ бжⷭ҇твенымъ покры́всѧ ѻ҆́ч҃е мра́комъ , ѿ́ бг҃а повелѣ́нїи скрижа́ли бг҃опи́санныѧ прїѧ́тъ всебога́те . вторы́и на́мъ мѡѷсе́й законополо́жникъ ꙗ҆ви́сѧ бл҃года́ти . боⷢ҇ . Ви́дѣвше ѡ҆бра́зными ꙗ҆вле́нїи стра́шныхъ тѝ та́инъ глꙋбинꙋ̀ , ꙗ҆́кѡ бг҃ꙋ въ чре́во твоѐ всели́тисѧ , бг҃огл҃ивїи прⷪ҇рцы провозвѣсти́ша всенепоро́чнаѧ . и҆ ны́нѣ мы̀ сбытїѐ ви́дѧще сла́вимъ .

конда́къ . гла́съ , в҃ . Бога́тство своѐ расточи́лъ є҆сѝ ни́щимъ , и҆ нбⷭ҇ное бога́тство нн҃ѣ прїѧ́тъ і҆ѡа́нне премꙋ́дре . сегѡ̀ ра́ди вси́ тѧ почита́емъ соверша́юще па́мѧть твою̀ , ми́лости тезоимени́те . и҆́косъ . На млⷭ҇ть оу҆пова́въ бж҃їю і҆ѡа́нне , щедро́тами ѿ тогѡ̀ и҆ дармѝ ѡ҆богати́всѧ , ѿ ню́дꙋ же ꙗ҆ви́сѧ и҆ млⷭ҇тивъ , ꙗ҆́кѡ ѻ҆́нъ всѣ́хъ оу҆щедрѧ́ѧ . но мою̀ нищетꙋ̀ оу҆ще́дривъ , пода́ждь мѝ бога́тство твоеѧ̀ мл҃твы . и҆ а҆́лчꙋщее срⷣце моѐ и҆спо́лни глаго́лъ бжⷭ҇твеныхъ бг҃омꙋ́дре , ꙗ҆́коже пре́жде а҆́лчꙋщихъ пита́ше , млⷭ҇ти тезоимени́те .

пѣ́снь , з҃ . і҆рмо́съ . Дѣ́ти є҆вре́йскїѧ в̾ пещѝ , попра́вше и҆ пла́мень дерзнꙋ́вше , и҆ на́ росꙋ ѻ҆́гнь прело́жше вопїѧ́хꙋ , бл҃гослове́нъ є҆сѝ гдⷭ҇и бж҃е во́ вѣки . Дѣ́лы словеса̀ сп҃сова и҆звѣсти́лъ є҆сѝ , и҆ оу҆блажа́емыхъ причте́сѧ лико́мъ . млⷭ҇тивъ бы́въ и҆ чи́стъ дх҃омъ і҆ѡа́нне бг҃оно́се . Ме́да вкꙋ́съ сла́дкїи преложи́сѧ во и҆скꙋше́но зла́то тебѣ̀ . бога́тное бо твоѐ внима́ѧ и҆зволе́нїе творе́цъ , бога́та тебѣ̀ дадѐ воз̾даѧ́нїѧ . Свѣ́томъ трⷪ҇цы невече́рнимъ просвѣща́емь оу҆го́дниче трⷪ҇цѣ , чтꙋ́щїѧ тѧ̀ ны́нѣ просвѣща́еши , поѧ̀ , бл҃гослове́нъ є҆сѝ гдⷭ҇и бж҃е во́ вѣки . боⷢ҇ . Тѧ̀ ра́дость а҆пⷭ҇лѡмъ , страстоте́рпцемъ же сла́вꙋ , бцⷣе мо́лимъ вѣ́рнѡ , ра́дости вѣ́чныѧ на́съ сподо́би , пою́щїѧ тѧ̀ непреста́ннѡ .

и҆́нъ , і҆рмо́съ . И҆́же ѿ і҆ꙋде́и , доше́дше ѻ҆́троцы в̾ вавилѡ́нъ дре́вле , вѣ́рою оу҆тверже́нїи , пла́мень пе́щныи попра́вше гл҃юще , ѻ҆ц҃ъ на́шихъ бж҃е бл҃гослове́нъ є҆сѝ . Напоѧ́емь ѻ҆́ч҃е тꙋ́чами нбⷭ҇ными , ꙗ҆ви́сѧ многопло́денъ , плоды̀ краснѣ́йши приносѧ̀ ко влⷣцѣ , вѣ́рою зовꙋ́щихъ ѻ҆ц҃ъ на́шихъ бж҃е бл҃гослове́нъ є҆сѝ . Тво́й бл҃же́нне ꙗ҆зы́къ хлѧ́би повелѣ́нїи разве́рзъ , є҆рети́ческꙋю ле́сть крѣ́пкѡ потоплѧ́етъ , вѣ́рныѧ же наꙋча́етъ пѣ́ти , ѻ҆ц҃ъ на́шихъ бж҃е бл҃гослове́нъ є҆сѝ . боⷢ҇ . Ѿ оу҆тро́бы дв҃ьственыѧ вопло́щьсѧ и҆ ꙗ҆ви́сѧ на́ше спасе́нїе . тѣ́мъ тѝ мт҃рь вѣ́дꙋще бцⷣꙋ бл҃года́рственѡ зове́мъ , ѻ҆ц҃ъ на́шихъ бж҃е бл҃гослове́нъ є҆сѝ .

пѣ́снь , и҃ . і҆рмо́с̾ . Побѣди́тели врагꙋ̀ и҆ пла́мени , бл҃года́тїю бы́вше , и҆́же по за́повѣди ѕѣлѡ̀ побора́юще дѣ́ти поѧ́хꙋ , блгⷭ҇ви́те всѧ̀ дѣ́ла гдⷭ҇а , и҆ превозноси́те є҆гѡ̀ во́ вѣки . Свѣтоза́рнꙋю ѕвѣздꙋ̀ хрⷭ҇то́съ на высотѣ̀ тѧ̀ цр҃ко́внѣй ꙗ҆вѝ ѻ҆́ч҃е , тобо́ю пою́щїѧ вѣ́рою просвѣща́ѧ , бл҃гослови́те всѧ̀ дѣ́ла гдⷭ҇а , и҆ превозноси́те є҆гѡ̀ во́ вѣки . Млⷭ҇тивъ ꙗ҆ви́сѧ , кро́токъ бл҃госе́рдъ неѕло́бивъ ѻ҆́ч҃е , бога́тство ни́щимъ , и҆ ѻ҆дѣѧ́нїе наги́мъ , поѧ̀ вѣ́рнѡ , бл҃гослови́те всѧ̀ дѣ́ла гдⷭ҇а , и҆ превозноси́те є҆гѡ̀ во́ вѣки . Ма́рковъ прⷭ҇то́лъ сщ҃е́нно оу҆краси́лъ є҆сѝ , дѣ́лы бжⷭ҇твеными и҆зрѧ́днѡ ѻ҆́ч҃е . ми́лостынею же и҆ милосе́рдїемъ па́че всѣ́хъ нарече́сѧ млⷭ҇тивъ , и҆́же млрⷭ҇дїемъ восїѧ́вшихъ ст҃ы́хъ . боⷢ҇ . А҆да́мова дв҃о па́дшагѡ оу҆́бѡ ꙗ҆ви́сѧ дщѝ , бж҃їѧ же мт҃и поно́вльшагѡ моѐ сꙋщество̀ . є҆го́же пое́мъ всѧ̀ дѣ́ла гдⷭ҇а , и҆ превозно́симъ є҆гѡ̀ во́ вѣки .

и҆́нъ , і҆рмо́съ . Мꙋсикі́йскимъ ѻ҆рга́нѡмъ согласѧ́щимъ , и҆ лю́демъ без̾ числа̀ кла́нѧющимсѧ , тѣ́лꙋ сꙋ́щꙋ на моле́бнѣмъ , трїѐ ѻ҆́троцы пѣсносло́вѧхꙋ , гдⷭ҇а по́йте , и҆ превозноси́те є҆гѡ̀ во́ вѣки . Добродѣ́тель воспрїи́мъ соверше́нꙋ , бл҃ги́хъ пе́рвое возлюби́въ . и҆ тогѡ̀ ны́нѣ блиста́ньми просвѣща́емь зове́ши , гдⷭ҇а по́йте , и҆ превозноси́те є҆гѡ̀ во́ вѣки . Разꙋ́мное ѡ҆бога́ти всѐ хꙋдо́жество , дѣ́тельное пости́же бл҃госло́вїе . бл҃года́тныѧ зарѝ посыла́ѧ вопїю́щимъ , гдⷭ҇а по́йте , и҆ превозноси́те є҆гѡ̀ во́ вѣки . Мирски́хъ мо́лвъ ѿбѣжа́въ , молча́нїѧ приста́нище дости́же , и҆ страстны́ѧ прило́ги оу҆мертви́лъ є҆сѝ , зовы́и гдⷭ҇а по́йте , и҆ превозноси́те є҆гѡ̀ во́ вѣки . боⷢ҇ . Небла́зненѡ вѣ́дѧще дв҃о , ро́ждьшагосѧ и҆з̾ тебѐ бг҃а сло́ва , пое́мъ тѧ̀ бл҃гоче́стнѡ вѣ́рою зовꙋ́ще , гдⷭ҇а по́йте , и҆ превозноси́те є҆гѡ̀ во́ вѣки .

пѣ́снь , ѳ҃ . і҆рмо́съ . Вои́стинꙋ бцⷣꙋ тѧ̀ и҆сповѣ́дающе , спасе́ннїи тобо́ю дв҃це чⷭ҇таѧ , съ нбⷭ҇ными вѡ́и тѧ̀ велича́емъ . Сѐ тебѐ по сконча́нїи посредѣ̀ прїе́млетъ дво́ица ст҃ы́хъ ѻ҆ц҃ъ , во́ гробѣ сщ҃е́ннѣйшꙋ че́сть тебѣ̀ ѻ҆́ч҃е даю́щи . Ꙗ҆́кѡ оу҆́тро , ꙗ҆́кѡ де́нь ѻ҆́ч҃е і҆ѡа́нне свѣтоза́рное твоѐ восїѧ̀ оу҆спе́нїе , просвѣща́ѧ вѣ́рою тѧ бл҃жа́щихъ . Совокꙋпи́всѧ лико́мъ а҆рхїє҆ре́йскимъ , прⷪ҇ркѡмъ а҆пⷭ҇лѡмъ и҆ мч҃нкѡмъ , с̾ ни́ми же помина́й ѻ҆́ч҃е хва́лѧщихъ тѧ̀ . Ра́ка и҆дѣ́же лежа́тъ ѻ҆́ч҃е і҆ѡа́нне сщ҃е́нныѧ тѝ ст҃ы́ѧ мо́щи , и҆сто́чникъ чꙋде́съ сꙋ́ть к̾ тебѣ̀ приходѧ́щимъ . боⷢ҇ . Бг҃олѣ́пнаѧ дв҃о , ѡ҆ѕло́бленꙋю дш҃ꙋ мою̀ грѣхо́мъ оу҆блажѝ . и҆́же бл҃га́гѡ ро́ждьшаѧ , бг҃а и҆ гдⷭ҇а .

и҆́нъ , і҆рмо́съ . Оу҆диви́сѧ оу҆́бѡ ѡ҆ се́мъ не́бо , и҆ землѝ оу҆жасо́шасѧ концы̀ , ꙗ҆́кѡ бг҃ъ ꙗ҆ви́сѧ чл҃кѡмъ пло́тїю , чре́во же твоѐ бы́сть простра́ннѣе нб҃съ , тѣ́мъ тѧ̀ бцⷣе , а҆́нг҃лъ и҆ чл҃къ чинонача́лїѧ велича́емъ . Расто́ргша пристра́стїѧ мирскі́ѧ оу҆́зы , и҆ бг҃ови приближа́ющасѧ , тѧ̀ зрѧ̀ ѻ҆́ч҃е оу҆бі́ица , ва́рварскаѧ треволне́нїѧ тебѣ̀ воз̾дви́же , раз̾сла́бити твою̀ мнѣ́въ крѣ́пость . бжⷭ҇твенымъ же промышле́нїемъ тогѡ̀ ѿразѝ ѕлодѣ́йства всебл҃же́нне . Бога́тыми сїѧ́ѧ зарѧ́ми оу҆че́нїи многоѡ҆бра́зными ѡ҆свѣти́лъ є҆сѝ бл҃гоче́стїѧ вѣ́рою приходѧ́щихъ тѝ дш҃а . и҆́бо ча́ши премꙋ́дре ни́ле премꙋ́дрости , чи́стѣи оу҆стнѣ̀ прикоснꙋ́въ , почерпѐ нескꙋ́днѡ , и҆ лю́бѧщимъ по́далъ є҆сѝ . Ѡ҆ст҃и́лъ є҆сѝ оу҆се́рднѡ себѐ ѻ҆́ч҃е та́йнѡ ꙗ҆́кѡ непоро́чно заколе́нїе зижди́телю , тогѡ̀ возлюби́въ чистото́ю . є҆мꙋ́же ны́нѣ прⷭ҇то́лꙋ всебл҃же́нне ни́ле пред̾стоѧ̀ , прилѣ́жнѡ моли́сѧ , вѣ́рою соверша́ющимъ тѝ па́мѧть , полꙋчи́ти твоеѧ̀ свѣ́тлости . боⷢ҇ . И҆спра́вила є҆сѝ дв҃о же́нское поползе́нїе сло́ва ро́ждьши , и҆справлѧ́юща низ̾верже́нїе , ꙗ҆́кѡ бл҃га и҆ держа́вна си́лою , за млрⷭ҇дїе превосходѧ́ща и҆з̾ тебѐ вопло́щшасѧ , и҆ спа́сша ми́ра , страстоꙋбі́йствеными є҆гѡ̀ страстьмѝ .

свѣти́ленъ . Млⷭ҇ть подража́ѧ бг҃а любоще́драгѡ , тре́бꙋющимъ бога́тство расточи́лъ є҆сѝ і҆ѡа́нне . тѣ́мъ и҆ бога́тство прїѧ́тъ на́ нб҃сѣхъ неи҆стощи́мое , тогѡ̀ ра́ди ны́нѣ мо́лимсѧ , моли́сѧ непреста́ннѡ ѡ҆ хва́лѧщихъ тѧ̀ . сла́ва , прпⷣбномꙋ . А҆́нг҃льское житїѐ жела́ѧ , оу҆дали́въ себѐ в̾ пꙋсты́ню . и҆ стра́сти покори́въ плотьскі́ѧ , равноа́нг҃ленъ ꙗ҆ви́сѧ ѻ҆́ч҃е на́шъ бг҃оно́се . и҆ ны́нѣ , боⷢ҇ . И҆́же ѿ́ бг҃а ми́рови да́нныхъ бл҃гъ , ты̀ вина̀ є҆сѝ бцⷣе , но и҆ ны́нѣ ми́лостива сотворѝ за ѻ҆́бщее спасе́нїе , бл҃гоꙋвѣ́тливагѡ бг҃а .

На стихо́внѣ , во ѻ҆кта́и . сла́ва . гла́съ , ѕ҃ . Прпⷣбне ѻ҆́ч҃е , во всю̀ зе́млю и҆зы́де вѣща́нїе и҆справле́нїи твои́хъ . тѣ́мъ на́ нб҃сѣхъ ѡ҆брѣ́те мздꙋ̀ трꙋдо́въ свои́хъ , бѣсо́вскїѧ разрꙋши́лъ є҆сѝ полкѝ . и҆ а҆́нг҃льскїѧ дости́глъ є҆сѝ чи́ны , и҆́хже и҆ житїю̀ непоро́чнѡ подража́лъ є҆сѝ . дерзнове́нїе и҆мы́и к̾ бг҃ꙋ , ми́ръ и҆спросѝ дш҃а́мъ на́шимъ . и҆ ны́нѣ , боⷢ҇ . и҆лѝ , крⷭ҇тобоⷢ҇ . Зрѧ́щи тѧ̀ распина́ема хрⷭ҇тѐ , тебѐ ро́ждьшаѧ , вопїѧ́ше что́ се стра́ннѡ є҆́же ви́жꙋ , та́инство сн҃е мо́й , ка́кѡ на́ древѣ оу҆мира́еши пло́тїю повѣ́шенъ , всѣ́хъ живо́тъ .

На литꙋргі́и . проки́менъ , ѱл҃о́мъ давы́довъ . честна̀ пре́д̾ гдⷭ҇емъ сме́рть прпⷣбныхъ є҆гѡ̀ . сти́хъ . что̀ возда́мъ гдⷭ҇ви ѡ҆ всѣ́хъ , и҆́хже возда́стъ ми . а҆пⷭ҇лъ , къ є҆вре́ѡмъ . заⷱ҇ , та҃і .= а҆ллилꙋ́їѧ . оу҆ста̀ пра́веднагѡ поꙋча́тсѧ премꙋ́дрости , и҆ ꙗ҆зы́къ є҆гѡ̀ воз̾гл҃етъ сꙋ́дъ . =є҆ѵⷢ҇а́лїе , ѿ =лꙋкѝ . заⷱ҇ , к҃д . прича́стенъ . в=ъ па́мѧть вѣ́чнꙋю бꙋ́детъ пра́ведникъ .