МЦⷭ҇А ТОГО́ЖЕ ВЪ Г҃І ДН҃Ь

и҆́же во ст҃ы́хъ ѻ҆ц҃а на́шегѡ і҆ѡа́нна златоꙋ́стагѡ , а҆рхїєпⷭ҇кпа константи́на гра́да .

На ма́лѣй вече́рни , на гдⷭ҇и возва́хъ , стихѣ́ры . гла́съ , а҃ . поⷣ . нбⷭ҇нымъ чинѡ́мъ . Крⷭ҇тлѧ подража́ѧ тезоиме́ннаго до́брѣ ,꙳ воздержа́нїемъ ѻ҆́ч҃е .꙳ и҆ и҆лїѝ вели́комꙋ посто́мъ и҆ чистото́ю .꙳ ре́вностїю оу҆ѧ́звенъ ѻ҆бои́хъ златоꙋ́сте ,꙳ на црⷭ҇кое оу҆си́лїе дерза́еши ,꙳ ꙗ҆́кѡ па́стырь цр҃кви хрⷭ҇то́вѣ . двⷤа . Бжⷭ҇твенымъ въ дохнове́нїемъ сло́ва ,꙳ проте́къ по пи́санномꙋ всю̀ зе́млю .꙳ вѣща́нїе повелѣ́нїи твои́хъ ѻ҆́ч҃е просвѣтѝ ми́ръ .꙳ ѿве́рзъ на́мъ покаѧ́нїѧ вхожде́нїе .꙳ ни́щихъ попече́нїемъ ,꙳ воѡ҆бража́ѧ хрⷭ҇то́во є҆ѵⷢ҇а́лїе . Чи́стое дш҃и твоеѧ̀ и҆ нескве́рное свѣ́та ,꙳ сл҃нчныѧ зарѝ сїѧ́етъ ми́рови ,꙳ повелѣ́нїи бл҃гоче́стїѧ ,꙳ ѻ҆́ч҃е мꙋ́дре і҆ѡа́нне златоꙋ́сте ,꙳ и҆ мглꙋ̀ ѿго́нитъ ,꙳ и҆ просвѣща́етъ вселе́ннꙋю къ бл҃гоче́стїю .

сла́ва . гла́съ , в҃ . Тѧ̀ вели́каго ст҃лѧ , и҆ па́стырѧ неѕло́бива и҆ прпⷣбна . покаѧ́нїю проповѣ́дника . златослове́снаѧ оу҆ста̀ бл҃года́ти . хва́лѧщїи , любо́вїю мо́лимсѧ пода́ждь на́мъ мл҃твы твоѧ̀ ѻ҆́ч҃е , во ѿда́нїе дш҃ъ на́шихъ . и҆ ны́нѣ , боⷢ҇ . проки́менъ , дню̀ .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фовъ . До́мъ дх҃о́вныи ,꙳ ѿ дѣѧ́нїи ,꙳ ꙗ҆́кѡ ка́менїи согражде́нъ ,꙳ и҆ ми́ръ покрыва́ѧи ,꙳ премꙋ́дрыи златоꙋ́стъ .

сти́хъ : оу҆ста̀ моѧ̀ воз̾гл҃ютъ премꙋ́дрость ,꙳ и҆ поꙋче́нїе срⷣца моегѡ̀ ра́зꙋмъ . Зако́нъ ꙗ҆́кѡ мѡѷсе́й ,꙳ прїе́мъ ѿ́ гдⷭ҇а златоꙋ́сте ,꙳ ми́ра оу҆мꙋдрѝ ,꙳ и҆ просвѣтѝ ,꙳ бжⷭ҇твеными ти оу҆че́нїи .

сти́хъ : оу҆ста̀ пра́веднагѡ поꙋча́тсѧ премꙋ́дро сти ,꙳ и҆ ꙗ҆зы́къ є҆гѡ̀ воз̾гл҃етъ сꙋ́дъ . До́мъ дх҃о́венъ ,꙳ бл҃года́ти все́й ,꙳ сло́ва премꙋ́дрости ,꙳ ꙗ҆ви́сѧ внꙋ́трь и҆мы́и ,꙳ златоꙋ́сте бл҃же́нне .

сла́ва , и҆ нн҃ѣ , боⷢ҇ . Ра́дꙋисѧ ,꙳ ꙗ҆́же ра́дость ми́рꙋ прїе́мшаѧ ,꙳ хрⷭ҇та̀ жизнода́вца ,꙳ и҆ оу҆толи́вшаѧ печа́ль ,꙳ дв҃о пра́матерню .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , и҃ . Ѿ оу҆́стъ твои́хъ ꙗ҆́коже свѣтолꙋ́чнаѧ зарѧ̀ восїѧ̀ , бг҃омъ да́ннаѧ тѝ бл҃года́ть , вселе́ннꙋю просвѣща́ѧ . несребролю́бно сокро́вище ми́рови положѝ , но высотꙋ̀ на́мъ смиреномꙋ́дрїѧ показа̀ , и҆ свои́ми словесы̀ наказꙋ́ѧ , ѻ҆́ч҃е і҆ѡа́нне ѕлатоꙋ́сте , молѝ сло́ва хрⷭ҇та̀ бг҃а спасти́сѧ дш҃а́мъ на́шимъ . сла́ва , и҆ ны́нѣ , боⷢ҇ . И҆́же на́съ ра́ди рожде́исѧ ѿ дв҃ы , и҆ распѧ́тїе претерпѣ́въ бл҃гі́и , и҆спрове́ргїи сме́ртїю сме́рть , и҆ воскрⷭ҇нїе ꙗ҆́вль ꙗ҆́кѡ бг҃ъ , непре́зри и҆́хже созда̀ рꙋко́ю свое́ю . ꙗ҆вѝ чл҃колю́бїе своѐ млⷭ҇тиве . прїимѝ ро́ждьшꙋю тѧ̀ бцⷣꙋ молѧ́щꙋсѧ за ны̀ , и҆ спасѝ сп҃се на́шъ лю́ди согрѣ́шшїѧ . та́же , є҆ктенїѧ̀ ма́лаѧ . и҆ ѿпꙋ́стъ .

На вели́цѣй вече́рни , блаже́нъ мꙋ́жь , а҃ , а҆нтифо́нъ . =На гдⷭ҇и возва́хъ , стихѣ́ры , на и҃ . гла́съ , д҃ . поⷣ . ꙗ҆́кѡ до́блѧ . Златокова́ннꙋю трꙋбꙋ̀ ,꙳ бг҃одохнове́нныи ѻ҆рга́нъ ,꙳ бг҃осло́вїѧ пꙋчи́нꙋ неи҆счерпа́емꙋю ,꙳ цр҃ко́вное оу҆твержде́нїе ,꙳ оу҆ма̀ нбⷭ҇наго ,꙳ премꙋ́дрости глꙋбинꙋ̀ ,꙳ ча́шꙋ всезлатꙋ́ю ,꙳ и҆злива́ющꙋ рѣ́ки оу҆че́нїи медото́чныхъ ,꙳ и҆ напаѧ́ющꙋ тва́рь ,꙳ пѣ́сненѡ воспѣва́емъ . =три́жды . Звѣздꙋ̀ незаходи́мꙋю ,꙳ зарѧ́ми просвѣща́ющꙋ оу҆че́нїи ,꙳ всю̀ под̾со́лнечнꙋю .꙳ покаѧ́нїю проповѣ́дателѧ .꙳ гꙋ́бꙋ всезлатꙋ́ю ,꙳ мокротꙋ̀ лю́тꙋю невѣ́денїѧ взе́млющꙋ ,꙳ и҆ ѡ҆роша́ющꙋ срⷣца̀ и҆ста́ѧвшаѧ грѣхѝ ,꙳ і҆ѡа́нна по достоѧ́нїю ,꙳ златослове́снаго почте́мъ . три́жды . И҆́же на землѝ а҆́нг҃лъ ,꙳ и҆ нбⷭ҇ныи чл҃къ .꙳ ла́стовица бг҃огл҃ива и҆ многогла́сна ,꙳ добродѣ́телей сокро́вище .꙳ ка́мень неразсѣ́дныи ,꙳ вѣ́рнымъ воѡ҆браже́нїе .꙳ мч҃нкѡмъ подо́бенъ ,꙳ равностоѧ́тель ст҃ы́хъ а҆́нг҃лъ ,꙳ а҆пⷭ҇лѡмъ є҆диноѡ҆бра́зенъ .꙳ в̾ пѣ́снехъ да возвели́читсѧ златоꙋ́стъ . два́жды .

сла́ва . гла́съ , ѕ҃ . Прпⷣбне требл҃же́нне ст҃ѣ́йшїи ѻ҆́ч҃е , па́стырю до́брыи , и҆ началопа́стырѧ хрⷭ҇та̀ оу҆ченичѐ , положи́выи дш҃ꙋ ѡ҆ ѻ҆вца́хъ , ты̀ и҆ ны́нѣ всехва́льне і҆ѡа́нне златоꙋ́сте , просѝ мл҃твами твои́ми , дарова́ти на́мъ ве́лїю млⷭ҇ть .

и҆ нн҃ѣ , боⷢ҇ . Кто̀ тебѐ небл҃жи́тъ прест҃а́ѧ дв҃це ; и҆лѝ кто̀ невоспѣва́етъ твоегѡ̀ пречи́стагѡ ржⷭ҇тва̀ ; без̾лѣ́тныи бо ѿ ѻ҆ц҃а возсїѧ́въ сн҃ъ є҆диноро́дныи , то́й же ѿ тебѐ чи́стыѧ про́йде , несказа́ннѡ вопло́щьсѧ . є҆стество́мъ бг҃ъ сы́и , и҆ є҆стество́мъ бы́въ чл҃къ на́съ ра́ди . не во двою̀ лицꙋ̀ раздѣлѧ́емъ . но во двою̀ є҆стествꙋ̀ несмѣ́сно познава́емъ . тогѡ̀ молѝ чи́стаѧ и҆ всебл҃же́ннаѧ , поми́ловатисѧ дш҃а́мъ на́шимъ . та́же , вы́ходъ . проки́менъ , дню̀ .

Ѿ при́тчей , чте́нїе .

Па́мѧть пра́веднагѡ с̾ похвала́ми , и҆ блгⷭ҇ве́нїе гдⷭ҇не на главѣ̀ є҆гѡ̀ . бл҃же́нъ чл҃къ , и҆́же ѡ҆брѣ́те мꙋ́дрость , и҆ сме́ртенъ и҆́же оу҆вѣ́дѣ ра́зꙋмъ . лꙋ́чше бо сїю̀ кꙋпова́ти , не́жели зла́та и҆ сребра̀ сокро́вища . честнѣ́йши бо є҆́сть ка́менїѧ многоцѣ́нна , все́же чⷭ҇тно́е , недосто́йнѡ є҆́сть є҆́й . долгота́ бо дні́й , и҆ лѣ́та живота̀ , в̾ десни́цѣ є҆ѧ̀ , и҆ в̾ шꙋ́ицѣ є҆ѧ̀ бога́тство и҆ сла́ва . ѿ оу҆́стъ бо є҆ѧ̀ и҆схо́дитъ пра́вда , зако́нъ же и҆ млⷭ҇ть , на ꙗ҆зы́цѣ но́ситъ . послꙋ́шайте оу҆́бѡ менѐ , ѽ ча́да , честна́ѧ бо рекꙋ̀ , и҆ бл҃же́нъ чл҃къ , и҆́же пꙋтѝ моѧ̀ храни́тъ . и҆схо́ди бо моѝ , и҆схо́ди живота̀ , и҆ оу҆гото́ваетсѧ хотѣ́нїе ѿ́ гдⷭ҇а . сегѡ̀ ра́ди молю̀ ва́съ , и҆ пред̾лага́ю мо́й гла́съ сн҃ово́мъ чл҃ческимъ . ꙗ҆́кѡ а҆́зъ премꙋ́дрость всели́хъ , совѣ́тъ и҆ ра́зꙋмъ , и҆ смы́слъ а҆́зъ призва́хъ . мо́й совѣ́тъ и҆ оу҆тверже́нїе , мо́й ра́зꙋмъ , моѧ́ же крѣ́пость . а҆́зъ менѐ лю́бѧщїѧ люблю̀ , и҆ взыска́ющїи менѐ ѡ҆брѧ́щꙋтъ бл҃года́ть . разꙋмѣ́йте оу҆́бѡ неѕло́бивїи кова́рство , ненака́занїи же прилага́йте срⷣца̀ . послꙋ́шайте менѐ и҆ па́ки , честна́ѧ бо рекꙋ̀ , и҆ ѿве́рзꙋ ѿ оу҆сте́нъ мои́хъ пра́вдꙋ . ꙗ҆́кѡ и҆́стинѣ поꙋча́етсѧ горта́нь мо́й , ме́рзски же предо мно́ю оу҆стны̀ лжи́выхъ . с̾ пра́вдою всѝ гл҃ы оу҆́стъ мои́хъ , ни что́же в̾ ни́хъ стро́потно ни развращено̀ . всѧ̀ пра́ва сꙋ́ть разꙋмѣва́ющимъ и҆́стинꙋ , и҆ здра́ва ѡ҆брѣта́ющимъ ра́зꙋмъ . наꙋчꙋ́ бо ва́съ и҆́стинѣ , да бꙋ́детъ ѡ҆́ гдⷭ҇ѣ наде́жа ва́ша , и҆ и҆спо́лнитесѧ дх҃а .

Ѿ= при́тчей , чте́нїе .=

=Ѿ =оу҆́стъ пра́веднагѡ ка́плетъ премꙋ́дрость , ꙗ҆зы́къ же непра́веднагѡ потреби́тсѧ . оу҆сты̀ мꙋже́й пра́ведныхъ свѣ́дѧтъ бл҃года́ть , оу҆ста́ же нечести́выхъ разорѧ́тсѧ . мѣ́рила ле́стна ме́рзость пре́д̾ гдⷭ҇емъ , мѣ́рило же пра́ведно прїѧ́тнѡ є҆мꙋ̀ є҆́сть . и҆дѣ́же а҆́ще вни́детъ досажде́нїе , тꙋ̀ и҆ бесче́стїе . оу҆ста̀ смире́ныхъ поꙋча́тсѧ премꙋ́дрости , кончи́на же пра́ведныхъ наста́витъ и҆́хъ . и҆ поползнове́нїе законопрестꙋ́пникъ плѣни́тъ ѧ҆̀ . непо́льзꙋетъ и҆мѣ́нїе в̾ дн҃ь ꙗ҆́рости , пра́вда же и҆збавлѧ́етъ ѿ сме́рти . оу҆мира́ѧ пра́ведныи , ѡ҆ставлѧ́етъ попече́нїе . ме́рзостна же быва́етъ и҆ на́гла нечести́выхъ поги́бель . пра́вда непоро́чнагѡ и҆справлѧ́етъ пꙋтѝ , нече́стїемъ же свои́мъ па́даетъ без̾зако́нныи . пра́вда мꙋже́й пра́ведныхъ и҆збавлѧ́етъ и҆́хъ , без̾совѣ́тїемъ же оу҆ловлѧ́ютсѧ законопрестꙋ́пнїи . сконча́вшꙋсѧ мꙋ́жꙋ пра́веднꙋ , не ѡ҆скꙋдѣ́етъ наде́жа , хвала́ же нечести́выхъ потреби́тсѧ . пра́ведникъ ѿ лови́твы и҆збѣ́гнетъ , вмѣ́сто же є҆гѡ̀ предае́тсѧ нечести́выи . во оу҆стѣ́хъ законопрестꙋ́пныхъ сѣ́ть гражда́нѡмъ , чꙋ́вство же пра́ведныхъ бл҃госпѣ́шнѡ . во бл҃гости пра́ведныхъ и҆спра́витсѧ гра́дъ , и҆ въ поги́бели нечести́выхъ ра́дованїе . во бл҃гослове́нїи пра́ведныхъ возвы́ситсѧ гра́дъ , оу҆сты́ же нечести́выхъ раскопа́етсѧ . рꙋга́етсѧ гражда́нѡмъ лише́ныи ра́зꙋма . мꙋ́жъ же мꙋ́дръ без̾мо́лвїе во́дитъ .

Ѿ премꙋ́дрости соло́мони , чте́нїе .

Похвалѧ́емꙋ пра́ведникꙋ , воз̾веселѧ́тсѧ лю́дїе . без̾сме́ртїе бо є҆́сть па́мѧть є҆гѡ̀ , ꙗ҆́кѡ ѿ́ гдⷭ҇а познава́етсѧ и҆ ѿ чл҃къ , и҆ оу҆го́дна гдⷭ҇ви дш҃а є҆гѡ̀ .= =возлюби́те оу҆́бѡ мꙋ́дрость , и҆ поживетѐ . восхощи́те є҆ѧ̀ , и҆ нака́зани бꙋ́дете . нача́ло бо є҆ѧ̀ любы̀ , и҆ соблюде́нїе зако́нꙋ . почти́те премꙋ́дрость , да во́ вѣки црⷭ҇твꙋете . возвѣщꙋ̀ ва́мъ , и҆ нескры́ю ѿ ва́съ та́инъ бж҃їихъ . ꙗ҆́кѡ то́й мꙋ́дрости наста́вникъ є҆́сть , и҆ мꙋ́дрыхъ и҆спра́витель , и҆ всѧ́кꙋ смы́слꙋ и҆ дѣ́лꙋ хитре́цъ , и҆ всѣ́мъ смы́сломъ наꙋчи́тъ мꙋ́дрость . є҆́сть бо в̾ не́й дх҃ъ разꙋ́менъ и҆ ст҃ъ , и҆ сїѧ́нїе свѣ́та присносꙋ́щнагѡ , и҆ ѻ҆́бразъ бл҃гости бж҃їѧ . та̀ и҆ дрꙋ́ги бж҃їѧ и҆ пррⷪ҇ки оу҆строѧ́етъ . бл҃голѣ́пнѣйши є҆́сть сл҃нца , и҆ па́че сотворе́нїѧ ѕвѣ́здъ свѣ́томъ сказа́ема ѡ҆брѣта́етсѧ пе́рвѣйши . та̀ оу҆гожда́ющимъ є҆́й ѿ болѣ́зней и҆збавлѧ́етъ , и҆ наста́витъ на стезѝ пра́вы , и҆ да́стъ и҆́мъ ра́зꙋмъ и҆мѣ́ти ст҃ы́хъ , и҆ сохрани́тъ ѧ҆̀ ѿ ловѧ́щихъ , по́двигъ крѣ́покъ пода́стъ и҆́мъ . да разꙋмѣ́ютъ всѝ ꙗ҆́кѡ си́льнѣйши є҆́сть всегѡ̀ бл҃гоче́стїе , и҆ непремо́жетъ ѕло́ба ни коли́же мꙋ́дрости , ни пре́йдетъ ѕлы́ѧ ѡ҆блича́ющи сꙋ́дъ . реко́ша же в̾ себѣ̀ помы́сливше непра́веднѡ , наси́льствꙋемъ пра́ведномꙋ , и҆ непощади́мъ преподо́бства є҆гѡ̀ , ни оу҆срами́мсѧ сѣди́нъ ста́рости многолѣ́тны , бꙋ́детъ бо на́мъ крѣ́пость зако́нꙋ . и҆ оу҆лови́мъ пра́веднаго , ꙗ҆́кѡ не оу҆го́денъ на́мъ є҆́сть , и҆ сопроти́витсѧ дѣло́мъ на́шимъ , и҆ поно́ситъ на́мъ ѿпаде́нїе зако́на , и҆ ѡ҆блича́етъ на́мъ согрѣше́нїѧ наказа́нїѧ на́шегѡ . возвѣща́етъ на́мъ ра́зꙋмъ и҆мѣ́ти бж҃їи , и҆ ѻ҆́трока гдⷭ҇нѧ себѐ и҆менꙋ́етъ , и҆ бы́сть на ѡ҆бличе́нїе помышле́нїемъ на́шимъ , и҆ тѧ́жекъ на́мъ є҆́сть . и҆ ви́димъ ꙗ҆́кѡ неподо́бнѡ и҆нѣ́мъ житїѐ є҆гѡ̀ , и҆ и҆змѣнены̀ стезѝ є҆гѡ̀ . въ порꙋга́нїе вмѣни́хомсѧ є҆мꙋ̀ , и҆ оу҆далѧ́етсѧ ѿ пꙋте́й на́шихъ ꙗ҆́кѡ ѿ нечисто́тъ , и҆ блажи́тъ послѣ́днѧѧ пра́ведныхъ . ви́димъ оу҆́бѡ а҆́ще словеса̀ є҆гѡ̀ и҆́стина сꙋ́ть , и҆ оу҆смо́тримъ сбытїѧ̀ є҆гѡ̀ . рꙋга́нїемъ и҆ мꙋ́кою и҆стѧ́жемъ є҆гѡ̀ . да разꙋмѣ́емъ кро́тость є҆гѡ̀ , и҆ и҆скꙋ́симъ без̾ѕло́бство є҆гѡ̀ , сме́ртїю без̾ѡ҆бра́зною ѡ҆сꙋ́димъ є҆гѡ̀ , бꙋ́детъ бо посѣще́нїе ѿ слове́съ є҆гѡ̀ . сїѧ̀ помы́слиша и҆ прельсти́шасѧ , ѡ҆слѣпи́ бо и҆́хъ ѕло́ба и҆́хъ , и҆ неразꙋмѣ́ша та́инъ бж҃їихъ . и҆ неразсꙋди́ша ꙗ҆́кѡ ты̀ є҆сѝ бг҃ъ є҆ди́нъ животꙋ̀ и҆мѣ́ѧи и҆ сме́рти вла́сть , и҆ спаса́ѧ во́ времѧ ско́рби , и҆ и҆збавлѧ́ѧи ѿ всѧ́кагѡ ѕла̀ , ще́дръ и҆ млⷭ҇тивъ даѧ̀ преподо́бнымъ свои́мъ бл҃года́ть , и҆ свое́ю мы́шцею го́рдымъ противлѧ́ѧсѧ .

На литі́и , стихѣ́ры . гла́съ , а҃ . Свѣти́льниче і҆ѡа́нне , оу҆ста̀ златови́дна , оу҆добре́нїе бг҃осодѣ́ѧнныхъ добродѣ́телей . и҆ ѻ҆би́телище писа́нїи тайнонача́льныхъ . ты̀ пречⷭ҇тое ст҃о́мꙋ дх҃ꙋ нетлѣ́нное сокро́вище бы́лъ є҆сѝ . ѿ ню́дꙋ же возвесели́лъ є҆сѝ всю̀ цр҃ковь , спасе́нымъ ти сло́вомъ бога́тымъ . дерзнове́нїе оу҆́бѡ ѡ҆брѣ́тъ къ бг҃ꙋ , в̾ наслажде́нїи вы́шнѧгѡ наслѣ́дїѧ , моли́сѧ ѡ҆ на́съ ѻ҆́ч҃е ст҃ы́и . гла́съ , в҃ . Златы́ми словесы̀ твои́ми , цр҃ковь ꙗ҆́кѡ оу҆́тварїю злато́ю оу҆краси́вшисѧ і҆ѡа́нне златоꙋ́сте , невѣ́стьски ра́дꙋющисѧ вопїе́тъ ти . насыти́хсѧ ѿ твои́хъ златоточи́выхъ во́дъ , оу҆краси́вшисѧ златотка́нными и҆ медоточи́выми пи́вы . ѿ дѣѧ́нїи бо в̾ видѣ́нїѧ восхождꙋ̀ , кро́ткими ти поꙋче́ньми , и҆ ко хрⷭ҇тꙋ̀ разꙋ́мномꙋ женихꙋ̀ примѣша́ющисѧ съ црⷭ҇твꙋю є҆мꙋ̀ . тѣ́мъ и҆ мы̀ совокꙋ́пльшесѧ въ па́мѧть твою̀ зове́мъ , не ѿстꙋпа́й молѧ́сѧ за ны̀ ко́ гдⷭ҇ꙋ , спастѝ дш҃а на́ша . Прїѧ́лъ є҆сѝ ст҃лю го́рнюю филосо́фїю , и҆ внѣ̀ ми́ра бы́въ поживѐ вы́ше ви́димыхъ , и҆ зерца́ло бж҃їе нескве́рно ꙗ҆ви́сѧ , сы́и бо при́снѡ соєдине́нъ свѣ́томъ , и҆ свѣ́тъ прїе́мъ ꙗ҆снѣ́йшїи , блаже́нныи оу҆лꙋчи́въ коне́цъ . моли́сѧ златоꙋ́сте ѡ҆ дш҃а́хъ на́шихъ . гла́съ , д҃ . Гл҃ы златоза́рными , зе́млю і҆ѡа́нне премꙋ́дре напои́лъ є҆сѝ , златоточи́вꙋ и҆мѣ́ѧ дш҃ꙋ же и҆ тѣ́ло пребога́те . всѧ̀ позлати́въ словесы̀ свои́ми златодѣ́телю . и҆ повелѣ́нїи свои́хъ кни́ги написа́въ златопи́саны , возлетѣ̀ на́ нб҃о . тѣ́мъ вопїе́мъ ти , златосло́ве и҆ златоꙋ́сте , хрⷭ҇та̀ бг҃а молѝ спастѝ дш҃а на́ша . Подоба́ше црⷭ҇твꙋющемꙋ гра́дꙋ , і҆ѡа́нна и҆мѣ́ти а҆рхїєре́ѧ , ꙗ҆́кѡ нѣ́кꙋю оу҆́тварь црⷭ҇кꙋю , и҆ златокова́ннꙋю трꙋбꙋ̀ , всѧ̀ ѡ҆глаша́ющꙋ концы̀ , спасе́ными повелѣ́ньми . и҆ всѧ̀ подвиза́ющꙋ к̾ ре́вности пѣ́нїи бг҃олѣ́пныхъ . к̾ немꙋ́же возопїе́мъ , златосло́ве и҆ златоꙋ́сте , хрⷭ҇та̀ бг҃а молѝ спастѝ дш҃а на́ша . сла́ва . гла́съ , д҃ . Бы́сть златоꙋ́сте бг҃одх҃нове́ныи ѻ҆рга́нъ , и҆́мже на́мъ дх҃ъ ст҃ы́и гл҃а , бг҃озна́менныи гла́съ . и҆ протечѐ концы̀ вѣща́нїе оу҆че́нїи твои́хъ . и҆ подража́тель бы́сть а҆пⷭ҇лѡмъ прпⷣбне , ли́ка пости́же ѻ҆́ногѡ є҆го́же воз̾желѣ́лъ є҆сѝ . моли́сѧ гдⷭ҇ви всебл҃же́нне , оу҆мири́ти ми́ра , и҆ спастѝ дш҃а на́ша . и҆ нн҃ѣ , боⷢ҇ . Пода́ждь оу҆тѣше́нїе , свои́мъ рабо́мъ всенепоро́чнаѧ , оу҆толѧ́ющи лю́таѧ на ны̀ ѡ҆б̾стоѧ́нїѧ , всѧ́кїѧ ско́рби на́съ и҆з̾мѣнѧ́ющи . тѧ́ бо є҆ди́нꙋ тве́рдо и҆ и҆звѣ́стнѡ ѡ҆снова́нїе и҆́мамы , и҆ твоѐ застꙋпле́нїе стѧжа́хомъ , да непостыди́мсѧ влⷣчце , тебѐ призыва́юще . потщи́сѧ на моли́твꙋ тебѣ̀ вопїю́щихъ , ра́дꙋисѧ влⷣчце всѣ́мъ помо́щнице , ра́досте и҆ покро́ве дш҃а́мъ на́шимъ .

На стихо́внѣ , стихѣ́ры , гла́съ , є҃ . поⷣ . ра́дꙋисѧ живоно́сныи крⷭ҇те . Ра́дꙋисѧ златоза́рныи и҆ кра́сныи , цр҃кви бг҃одх҃нове́нныи ѻ҆рга́не . ꙗ҆зы́че чл҃колю́бїѧ , покаѧ́нїѧ на́мъ разли́чныѧ ѻ҆́бразы под̾писꙋ́ющїи . оу҆́ме свѣтоза́рныи . ла́стовице златоꙋ́стаѧ . голꙋ́бице и҆́же ѱало́мски междора́мїѧ златосїѧ́ющи , добродѣ́телей зе́леностїю . стрꙋѧ̀ златови́днаѧ , пролива́ющи и҆сцѣле́нїѧ . оу҆ста̀ бжⷭ҇твенаѧ , и҆ бжⷭ҇твенагѡ чл҃колю́бїѧ порꙋчи́тельнаѧ . хрⷭ҇та̀ молѝ посла́ти дш҃а́мъ на́шимъ , ве́лїю млⷭ҇ть .

сти́хъ : оу҆ста̀ моѧ̀ воз̾гл҃ютъ премꙋ́дрость ,꙳ и҆ поꙋче́нїе срⷣца моегѡ̀ ра́зꙋмъ . Ра́дꙋисѧ си́рымъ ѻ҆́ч҃е , и҆ ѡ҆би́димымъ бы́страѧ по́мощь , ни́щимъ подаѧ́нїе , а҆́лчꙋщимъ пи́ща , согрѣша́ющимъ и҆справле́нїе , дш҃а́мъ бл҃гоꙋго́дныи врачꙋ̀ и҆ честнѣ́йшїи . бг҃осло́вїѧ высо́каго и҆спыта́нїе , сказа́нїе писа́нїи дх҃о́вныхъ , зако́нъ дѣ́йственыи . пра́вило пра́вѣйшее видѣ́нїѧ и҆ дѣѧ́нїѧ премꙋ́дрости кра́йнїѧ , хрⷭ҇та̀ низ̾посла́ти дш҃а́мъ на́шимъ молѝ ве́лїю млⷭ҇ть .

сти́хъ : оу҆ста̀ пра́веднагѡ поꙋча́тсѧ премꙋ́дро сти ,꙳ и҆ ꙗ҆зы́къ є҆гѡ̀ воз̾гл҃етъ сꙋ́дъ . До́мъ сщ҃е́нныхъ добродѣ́телей , сщ҃е́нныи себѐ соверши́лъ є҆сѝ . в̾ тебѣ́ бо жили́ще ꙗ҆́кѡ во ст҃ѣ́мъ хра́мѣ , и҆ честнѣ́йшемъ ѻ҆́ч҃е положѝ премꙋ́дрѡ ѡ҆корми́въ . и҆ чꙋ́вства тѣле́снаѧ , ꙗ҆́кѡ въ не ѡ҆кра́домѣ сокро́вищи соблю́лъ є҆сѝ помышле́нїѧ , страстны́хъ смꙋще́нїи . ѿ ню́дꙋ же бг҃ови́днѣйши пребл҃же́нне бы́въ , цр҃кви пред̾ста́тельствомъ оу҆кра́шенъ , хрⷭ҇та̀ молѝ подаю́щаго ми́рови ве́лїю млⷭ҇ть .

сла́ва . гла́съ , ѕ҃ . Трꙋба̀ златогла́снаѧ показа́сѧ златоглаго́ливе златоꙋ́сте , златодѣ́йствꙋѧ срⷣца̀ вѣ́рныхъ , златоимени́тыми поꙋче́ньми . проро́чески бо и҆зы́де вѣща́нїе , и҆справле́нїи твои́хъ прпⷣбне ѻ҆́ч҃е , и҆ ми́ра всегѡ̀ концы̀ просвѣтѝ . и҆ ны́нѣ , боⷢ҇ . Творе́цъ и҆ и҆зба́витель мо́й пречⷭ҇таѧ хрⷭ҇то́съ гдⷭ҇ь , и҆з̾ твои́хъ ложе́снъ проше́дъ , в̾ мѧ̀ ѡ҆бо́лксѧ , пе́рвыѧ клѧ́твы а҆да́ма свободѝ , тѣ́мже тѝ пречⷭ҇таѧ , ꙗ҆́кѡ бж҃їи мт҃ри невѣ́стѣ и҆ дв҃ѣй вои́стинꙋ , вопїе́мъ немо́лчно . ра́дꙋйсѧ а҆́нг҃льски . ра́дꙋйсѧ влⷣчце , пред̾ста́тельнице и҆ покро́ве , и҆ спасе́нїе дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь , ст҃лю , двⷤа . и҆ бцⷣе дв҃о ра́дꙋисѧ ,= аⷤ .=

На оу҆́трени , на бг҃ъ гдⷭ҇ь , тропа́рь , ст҃лю , двⷤа . сла́ва , и҆ ны́нѣ , боⷢ҇ , воскрⷭ҇нъ . =По а҃ , стихоло́гїи , сѣда́ленъ . гла́съ , а҃ . Златоѡ҆бра́знаѧ ѕвѣзда̀ земны́мъ восїѧ́лъ є҆сѝ златоꙋ́сте свѣ́тлѡ , і҆ѡа́нне всебл҃же́нне , просвѣща́ѧ концы̀ зарѧ́ми слове́съ твои́хъ . тѣ́мъ дне́сь всест҃ꙋ́ю тѝ па́мѧть пра́зднꙋюще , грѣхо́въ всѣ́хъ про́симъ ѡ҆ставле́нїѧ . =два́жды . сла́ва , и҆ ны́нѣ , боⷢ҇ . Без̾невѣ́стнаѧ чи́стаѧ бцⷣе дв҃о , є҆҆ди́на вѣ́рнымъ пред̾ста́тельнице и҆ покро́ве , ѿ бѣ́дъ и҆ скорбе́й и҆ лю́тыхъ ѡ҆бстоѧ́нїи всѣ́хъ и҆зба́ви , и҆́же на тѧ̀ наде́жꙋ ѻ҆трокови́це и҆мꙋ́щихъ . и҆ дш҃а на́ша спасѝ , бжⷭ҇твеными мл҃твами свои́ми .

По в҃ , стихоло́гїи , сѣда́ленъ . гла́съ , є҃ . Свѣти́льника слове́снаго бг҃одх҃нове́нныхъ писа́нїи , наставлѧ́ющаго на́съ к̾ покаѧ́нїю , мно́гаѧ и҆скꙋше́нїѧ претерпѣ́вша , златоꙋ́стагѡ вѣ́рнїи , ꙗ҆́кѡ наꙋ́чшесѧ ѿ негѡ̀ почте́мъ по́ долгꙋ . мо́литбосѧ гдⷭ҇ви спасти́сѧ дш҃а́мъ на́шимъ . двⷤа . сла́ва , и҆ ны́нѣ , боⷢ҇ . Ди́вно чꙋ́до зача́тїѧ , и҆ неи҆зрече́нныи ѻ҆́бразъ ржⷭ҇тва̀ , в̾ тебѣ̀ оу҆ви́дѣсѧ чⷭ҇таѧ прⷭ҇нѡ дв҃о , оу҆дивлѧ́етъ мѝ оу҆́мъ , и҆ оу҆жаса́етъ ми помышле́нїѧ , сла́ва твоѧ̀ бцⷣе , по всѣ́хъ простре́сѧ , к̾ спасе́нїю дш҃а́мъ на́шимъ .

По полїєлеѡ́сѣ , сѣда́лен̾ . гла́съ , и҃ . Сокро́вище ꙗ҆ви́сѧ дх҃о́вное бжⷭ҇твеными словесы̀ , ꙗ҆́кѡ вои́стинꙋ , ми́рови златоꙋ́сте просїѧ́въ конце́мъ . бога́тство спасе́ное всѣ́мъ по́далъ є҆сѝ , наставлѧ́ѧ бл҃же́нне лю́ди к̾ покаѧ́нїю . тѣ́мъ и҆ тече́нїе соверши́въ житїѧ̀ , прⷭ҇то́лꙋ пред̾стои́ши вы́шнѧгѡ прⷭ҇нѡ па́мѧтне і҆ѡа́нне златоꙋ́сте , молѝ хрⷭ҇та̀ бг҃а , грѣхо́въ ѡ҆ставле́нїе дарова́ти , чтꙋ́щимъ любо́вїю ст҃ꙋ́ю па́мѧть твою̀ . двⷤа . сла́ва , и҆ ны́нѣ , боⷢ҇ . Нбⷭ҇нꙋю две́рь и҆ ковче́гъ , всест҃ꙋ́ю го́рꙋ , свѣтоза́рныи ѻ҆́блакъ , воспое́мъ неѡ҆пали́мꙋю кꙋпинꙋ̀ , слове́сныи ра́й , є҆́ввино возва́нїе , вселе́ннѣй все́й нача́льное сокро́вище , ꙗ҆́кѡ спасе́нїе в̾ не́й содѣ́ѧсѧ ми́рови , и҆ ѡ҆ставле́нїе дре́внихъ прегрѣше́нїи . тѣ́мъ и҆ вопїе́мъ к̾ не́й , моли́сѧ хрⷭ҇тꙋ̀ бг҃ꙋ , грѣхо́въ ѡ҆ставле́нїе дарова́ти , бл҃гоче́стнѡ покланѧ́ющимсѧ ржⷭ҇твꙋ̀ твоемꙋ̀ .

степе́нна , д҃ го гла́са . а҆нтиѳо́нъ , а҃ . проки́мен̾ , ѱл҃о́мъ дв҃довъ . оу҆ста̀ моѧ̀ воз̾глаго́лютъ премꙋ́дрость , и҆ поꙋче́нїе срⷣца моегѡ̀ ра́зꙋмъ . сти́хъ . оу҆слы́шите сїѧ̀ всѝ ꙗ҆зы́цы , внꙋши́те всѝ живꙋ́щїи по вселе́ннѣй . всѧ́ко дыха́нїе .

є҆ѵⷢ҇а́лїе , ѿ і҆ѡа́нна . заⷱ҇ , л҃є , ѿ полꙋ̀ . ѱало́мъ , н҃ .

сла́ва . моли́твъ ра́ди ст҃лѧ , млⷭ҇тиве ѡ҆чи́сти мно́жество согрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество согрѣше́нїи на́шихъ .

Поми́лꙋй мѧ бж҃е по вели́цѣй млⷭ҇ти твое́й по мно́гимъ щедро́тамъ твои́мъ , ѡ҆чи́сти без̾зако́нїѧ моѧ̀ , бж҃е сп҃се мо́й .

стихѣ́ра . гла́съ , ѕ҃ . Прпⷣбне требл҃же́нне сщ҃е́нныи ѻ҆́ч҃е , па́стырю до́брыи , нача́льнагѡ па́стырѧ хрⷭ҇та̀ оу҆ченичѐ , положи́выи дш҃ꙋ по ѻ҆вца́хъ , са́мъ ны́нѣ прехва́льне і҆ѡа́нне златоꙋ́сте , и҆спросѝ моли́твами свои́ми , дарова́ти на́мъ ве́лїю ми́лость .

Кано́нъ , бцⷣѣ . со і҆рмосо́мъ , на́ ѕ҃ . и҆ ст҃о́мꙋ на и҃ . =Кано́нъ , прест҃ѣ́й бцⷣѣ . творе́нїе ѳеѡ́фановѡ . гла́съ , и҃ . пѣ́снь , а҃ . і҆рмо́съ . Во́дꙋ проше́дъ , ꙗ҆́кѡ по́ сꙋхꙋ , и҆з̾ є҆ги́петска ѕла̀ и҆збѣжа́въ , і҆и҃льтѧнинъ вопїѧ́ше , и҆зба́вителю бг҃ꙋ на́шемꙋ пое́мъ . =запѣ́в̾ : Прест҃а́ѧ гжⷭ҇е бцⷣе спасѝ на́съ .= М=но́гими содержи́мъ напа́стьми , к̾ тебѣ̀ прибѣга́ю спасе́нїѧ и҆скі́й , ѽ мт҃и сло́вꙋ и҆ дв҃о , ѿ лю́тыхъ и҆ нꙋ́жныхъ мѧ спасѝ . Страсте́й мѧ смꙋща́ютъ прило́зи , и҆ мно́гїѧ печа́ли и҆сполнѧ́ютъ ми дш҃ꙋ , оу҆мирѝ ѻ҆трокови́це , тишино́ю сн҃а и҆ бг҃а твоегѡ̀ всенепоро́чнаѧ . Сп҃са ро́ждьшꙋю тѧ̀ и҆ бг҃а , молю̀ дв҃це и҆зба́вити мѧ̀ ѿ лю́тъ . к̾ тебѣ́ бо ны́нѣ прибѣга́ю , простира́ѧ дш҃ꙋ и҆ помышле́нїе . Въ ско́рби мѧ сꙋ́ща и҆ в̾ тꙋзѣ̀ , посѣще́нїѧ бжⷭ҇твенагѡ промышле́нїѧ є҆́же ѿ тебѐ сподо́би , є҆ди́на бг҃омт҃и ꙗ҆́кѡ бл҃га̀ бл҃го́мꙋ же роди́тельнице .

Кано́нъ ст҃о́мꙋ , и҆мы́и краегране́сїе сѐ : дх҃о́вна пою́ тѧ златоꙋ́ста . творе́нїе ѳеѡ́фаново . гла́съ , и҃ . пѣ́снь , а҃ . і҆рмо́съ . Воѡ҆рꙋже́на фараѡ́на погрꙋзѝ , чꙋдотворѧ́й дре́вле , мѡѷсе́йскїи же́ѕлъ крⷭ҇тоѡ҆бра́знѡ проразѝ , и҆ раздѣлѝ мо́ре . і҆и҃лѧ же бѣжа́ща , пѣ́ша ходѧ́ща спасѐ , пѣ́снь бг҃ови воз̾сыла́юща .

запѣ́въ : Ст҃лю хрⷭ҇то́въ і҆ѡа́нне златоꙋ́сте , молѝ бг҃а ѡ҆ на́съ . Покаѧ́нїѧ бы́въ те́плыи проповѣ́дникъ златоꙋ́сте , пока́ѧтисѧ ѻ҆́ч҃е бг҃ови , за мѧ̀ моли́сѧ , ѿ всегѡ̀ срⷣца моегѡ̀ . и҆ дре́внихъ прегрѣше́нїи и҆сцѣли́ти ѡ҆стрꙋпле́нїѧ , твои́мъ милосе́рдїемъ оу҆молѝ . Всѧ̀ зарѝ ст҃а́гѡ дх҃а ѻ҆́ч҃е прїи́мъ , всесвѣ́телъ ꙗ҆ви́сѧ сто́лпъ , пред̾ходѧ̀ цр҃кви прпⷣбне . свѣ́телъ же ѻ҆́блакъ всебл҃же́нне ѡ҆сѣнѧ́ющь , правосла́вныхъ со́нмища . сла́ва . Хрⷭ҇то́мъ поста́вленъ оу҆чи́тель бжⷭ҇твена повелѣ́нїѧ , златоѡ҆бра́знымъ ꙗ҆зы́кѡмъ во́лею бг҃омꙋ́дрою , бога́тнѡ ты̀ и҆сточа́ѧ бж҃їѧ рѣ́ки во́дъ и҆спо́лнены дх҃о́вныхъ , ꙗ҆ви́сѧ бг҃огла́се златоꙋ́сте .= и҆ ны́нѣ , боⷢ҇ . Прекра́шено разли́чїемъ бл҃года́ти бг҃ора́дованнаѧ , ѻ҆́ч҃ее сло́во воплоще́но бы́вше млрⷭ҇дїемъ мно́гимъ па́че оу҆ма̀ и҆ словесѐ , блгⷭ҇ве́наѧ породила̀ є҆сѝ , пребы́вши дв҃ою нескве́рнаѧ . =катава́сїѧ : Ѿве́рзꙋ оу҆ста̀ моѧ̀ .

пѣ́снь , г҃ . і҆рмо́съ . Нбⷭ҇номꙋ крꙋ́гꙋ верхотво́рче гдⷭ҇и , и҆ цр҃кви зижди́телю , ты̀ менѐ оу҆твердѝ в̾ любвѝ свое́й . жела́нїемъ сы́и кра́й , и҆ вѣ́рнымъ оу҆тверже́нїе , є҆ди́не чл҃колю́бче . Застꙋпле́нїе и҆ покро́въ жи́зни мое́й , положи́хъ тѧ бг҃ороди́тельнице дв҃о , ты̀ менѐ ѡ҆кормѝ к̾ приста́нищꙋ своемꙋ̀ , бл҃ги́мъ вино́вна , и҆ вѣ́рнымъ оу҆тверже́нїе , є҆ди́на всепѣ́таѧ . Молю̀ дв҃це , дш҃е́вное смꙋще́нїе , и҆ печа́ли бꙋ́рю разори́ти ми . ты́ бо бг҃оневѣ́стнаѧ , нача́льника тишинѣ̀ хрⷭ҇та̀ родила̀ є҆сѝ , є҆ди́на пречи́стаѧ . Бл҃года́телѧ ро́ждьши до́брымъ вино́внаго , бл҃годѣѧ́нїѧ бога́тство всѣ́мъ и҆сточѝ . всѧ́ бо мо́жеши , ꙗ҆́кѡ си́льна в̾ крѣ́пости , хрⷭ҇та̀ ро́ждьши бг҃обл҃же́ннаѧ . Лю́тыми недꙋ́ги , и҆ болѣ́знеными стрⷭ҇тьмѝ и҆стѧза́емꙋ , дв҃о ты́ ми помозѝ , и҆сцѣле́нїемъ бо неѡ҆скꙋ́дно тѧ̀ зна́ю сокро́вище , некра́домо и҆ неи҆здае́мо .

и҆́нъ , і҆рмо́съ . Оу҆тверже́и нб҃са̀ в̾ нача́тцѣ ра́зꙋмомъ , и҆ зе́млю на вода́хъ ѡ҆снова́выи . на ка́мени мѧ хрⷭ҇тѐ цр҃ко́внѣмъ оу҆твердѝ , ꙗ҆́кѡ нѣ́сть ст҃а , па́че тебѐ чл҃колю́бче . Оу҆́мъ тво́й хрⷭ҇то́мъ ѡ҆бога́щьсѧ , твои́мъ чи́стымъ житїе́мъ чл҃кѡмъ спасе́нїѧ бы́сть , поспѣ́шенъ повѣсти́тель , содѣ́йственъ златоꙋ́сте , оу҆чи́тельства и҆сточа́ѧ спасе́наѧ бг҃одх҃нове́нне . Ѿ невеще́ственыхъ сокро́вищь дх҃а ты̀ ѡ҆бога́щьсѧ . ѿ и҆сто́чникъ спасе́ныхъ поче́рплъ є҆сѝ , приснотекꙋ́щїи и҆сто́чникъ оу҆че́ней , и҆ напоѝ цр҃ко́вное всепреподо́бне ѻ҆́ч҃е лицѐ . сла́ва . Ѡ҆лѧденѣ́вшаѧ дш҃е́вныѧ ѻ҆́ч҃е бразды̀ , премꙋ́дрымъ дѣ́ланїемъ слове́съ ѡ҆чи́стилъ є҆сѝ мꙋ́дрѡ . и҆ плодоно́сны ꙗ҆ви́лъ є҆сѝ , нбⷭ҇ными тꙋ́чами сїѧ̀ напоѧ́ѧ бг҃опрїѧ́тне .= и҆ ны́нѣ , боⷢ҇ . Поро́ка в̾ тебѣ̀ и҆ скве́рны нѣ́сть ѿ ню́дъ дв҃це , ѻ҆би́тель же па́че ꙗ҆ви́сѧ нбⷭ҇ныхъ бл҃гъ . в̾ тѧ́ бо всели́сѧ добродѣ́тели всѧ̀ ст҃ы́нѧ всенепоро́чнаѧ . =катава́сїѧ : Твоѧ̀ пѣвцы̀ .

сѣда́ленъ . гла́съ , и҃ . Неи҆зрече́нныѧ премꙋ́дрости бг҃ови́днѡ поче́рпъ бога́тство та́йное . всѣ́мъ сниска́лъ є҆сѝ правосла́вныѧ во́ды . вѣ́рныхъ оу҆́бѡ веселѧ́ща срⷣца̀ прпⷣбне , невѣ́рныхъ же повелѣ́нїѧ досто́йнѡ погрꙋжа́юща . тѣ́мъ по достоѧ́нїю возда́нїѧ твои́хъ болѣ́зней прїѧ́тъ приснопа́мѧтне , трⷪ҇це побо́рниче і҆ѡа́нне златоꙋ́сте , молѝ хрⷭ҇та̀ бг҃а , грѣхо́въ ѡ҆ставле́нїе дарова́ти , пра́зднꙋющимъ любо́вїю ст҃ꙋ́ю па́мѧть твою̀ . дрꙋгі́и , сѣда́ленъ . И҆́же свы́ше премꙋ́дрости навы́къ , и҆ бл҃года́ти слове́съ ѿ́ бг҃а , всѣ́мъ восїѧ́лъ є҆сѝ ꙗ҆́кѡ зла́то в̾ горни́лѣ . и҆ ст҃ꙋ́ю трⷪ҇цꙋ є҆ди́ницꙋ проповѣ́далъ є҆сѝ . сребролю́бнꙋю ле́сть оу҆стрѣли́въ словесы̀ свои́ми . тѣ́мже и҆ ре́вностїю цр҃цꙋ ѡ҆бличи́лъ є҆сѝ . а҆́рїево посрами́лъ є҆сѝ и҆ноплеме́нное оу҆че́нїе і҆ѡа́нне златоꙋ́сте . молѝ хрⷭ҇та̀ бг҃а , грѣхо́въ ѡ҆ставле́нїе дарова́ти , чтꙋ́щимъ любо́вїю ст҃ꙋ́ю па́мѧть твою̀ .= сла́ва , и҆ ны́нѣ , боⷢ҇ . Ꙗ҆́=кѡ всенепоро́чнаѧ невѣ́сто творцꙋ̀ , ꙗ҆́кѡ неи҆скꙋсомꙋ́жнаѧ мт҃и и҆зба́вителѧ прїѧ́телище , ꙗ҆́кѡ сꙋ́щи оу҆тѣ́шителѧ всепѣ́таѧ , без̾зако́нїю мѧ сꙋ́ща скве́рно жили́ще , и҆ бѣсо́мъ и҆гра́лище въ ра́зꙋмѣ бы́вша , потщи́сѧ и҆ си́хъ ѕлодѣ́йствїѧ мѧ и҆зба́вити , свѣ́тло жили́ще добродѣ́тельми содѣ́лавши , свѣтода́тельнаѧ и҆ нетлѣ́ннаѧ , разженѝ ѻ҆́блакъ страсте́й , и҆ вы́шнѧгѡ прича́стїѧ сподо́би , и҆ свѣ́тꙋ невече́рнемꙋ мл҃твами сѝ .

пѣ́снь , д҃ . і҆рмо́съ . Оу҆слы́шахъ гдⷭ҇и смотре́нїѧ твоегѡ̀ та́иньство , разꙋмѣ́хъ дѣ́ла твоѧ̀ , и҆ просла́вихъ твоѐ бжⷭ҇тво̀ . Страсте́й мои́хъ смꙋще́нїе , ꙗ҆́же ко́рмчїю ро́ждьши гдⷭ҇а , бꙋ́рю оу҆ти́ши мои́хъ прегрѣше́нїй , бг҃оневѣ́стнаѧ . Милосе́рдїѧ бе́зднꙋ призыва́ющꙋ твою̀ пода́ждь ми , ꙗ҆́же бл҃госе́рдаго ро́ждьши , и҆ сп҃са всѣ́мъ пою́щимъ тѧ̀ . Наде́жꙋ и҆ оу҆тверже́нїе , и҆ спасе́нїѧ стѣ́нꙋ недви́жимꙋ , стѧжа́вше тѧ̀ всенепоро́чнаѧ , ѕлолю́тыхъ всѣ́хъ и҆збавлѧ́емсѧ .= Н=а ѻ҆дрѣ̀ болѣ́зни моеѧ̀ грѣхо́внѣ слежа́ща мѧ̀ , ꙗ҆́кѡ чл҃колюби́ва , помози́ ми бцⷣе мт҃и прⷭ҇нѡ дв҃о .

и҆́нъ , і҆рмо́съ . Ты́ ми хрⷭ҇тѐ гдⷭ҇ь , ты́ же и҆ си́ла ми , ты́ ми бг҃ъ , ты́ ми ра́дованїе . не ѡ҆ста́вль нѣ́дра ѻ҆́ч҃а , но ми́лостїю си на́шꙋ нищетꙋ̀ посѣти́въ . тѣ́мъ съ проро́кѡмъ а҆вва́кꙋмомъ зовꙋ̀ , си́лѣ твое́й сла́ва чл҃колю́бче . Дрꙋга́гѡ на́мъ а҆пⷭ҇лѡмъ є҆диноѡ҆бра́зна , и҆́же промышлѧ́ѧ всѣ́хъ промы́сленикъ , ꙗ҆́кѡ бл҃гъ дадѐ хрⷭ҇то́съ , тѧ̀ нбⷭ҇нагѡ тайнѡоу҆чи́телѧ , и҆ проповѣ́дника , и҆ бжⷭ҇твенагѡ проро́ка вы́шнихъ і҆ѡа́нне всебл҃же́нне златоꙋ́сте . Златоза́рна и҆ златослове́сна златоꙋ́стагѡ і҆ѡа́нна , всепозлати́вшаго златови́дными сїѧ́нїи оу҆че́нїѧ , и҆ ми́ръ ꙗ҆зы́кѡмъ просвѣти́вша . зла́та свѣтлѣ́йшꙋ и҆ свѣ́та по́лнѣйшꙋ , и҆сточа́юща бл҃года́ть бжⷭ҇твенꙋю . Ве́сь бы́сть бж҃їе жили́ще , ве́сь ꙗ҆ви́сѧ а҆рга́нъ дх҃о́вныи , воз̾глаша́ющь всѧ́кꙋ добродѣ́тель , бг҃одх҃нове́нныхъ пѣ́нїи спасе́наѧ сказа́нїѧ . и҆ добро́тꙋ ꙗ҆влѧ́ѧ нбⷭ҇нагѡ црⷭ҇твїѧ , і҆ѡа́нне всебл҃же́нне златоꙋ́сте . сла́ва . Ты̀ бж҃їе млрⷭ҇дїе распрострѐ , покаѧ́нїѧ ѻ҆́бразы и҆злага́ѧ . и҆ ѕлы́хъ ѿбѣжа́нїѧ и҆зѧ́щнѡ поꙋча́ѧ пребл҃же́нне и҆ всеконе́чнѣ . и҆ дѣ́лъ и҆зрѧ́дныхъ поꙋче́нїе и҆сточа́ѧ всече́стне ѻ҆́ч҃е златоꙋ́сте .= и҆ ны́нѣ , боⷢ҇ . С=ъ бг҃омъ застꙋ́пницꙋ тѧ̀ стѧжа́хомъ . ты́ бо бж҃їѧ мт҃и бы́сть творца̀ и҆ содѣ́телѧ , и҆ на́ше воѡ҆браже́нїе прїе́мша всенепоро́чнаѧ . и҆ сїѐ спа́сша ѿ тлѝ и҆ сме́рти , и҆ сла́вою бжⷭ҇твеною просла́вльшаго .

катава́сїѧ : Сѣдѧ́и во сла́вѣ .

пѣ́снь , є҃ . і҆рмо́съ . Просвѣтѝ на́съ повелѣ́нїемъ

сѝ гдⷭ҇и , и҆ мы́шцею высо́кою , твоегѡ̀ ми́ра пода́ждь на́мъ , є҆ди́не чл҃колю́бче . И҆спо́лни чи́стаѧ весе́лїѧ живота̀ на́шегѡ , твою̀ нетлѣ́ннꙋю даю́щи ра́дость , весе́лїѧ ро́ждьши сꙋ́щагѡ винꙋ̀ . И҆зба́ви на́съ ѿ бѣ́дъ бцⷣе чⷭ҇таѧ , вѣ́чное ро́ждьши и҆збавле́нїе , и҆ ми́ра всѧ́къ оу҆́мъ преи҆мꙋ́щаго . Разрѣшѝ мглꙋ̀ прегрѣше́нїй мои́хъ бг҃оневѣ́сто , свѣ́томъ твоеѧ̀ свѣ́тлости , ꙗ҆́же свѣ́тъ ро́ждьшаѧ бжⷭ҇твеный и҆ превѣ́чный . И҆сцѣлѝ чи́стаѧ дш҃и моеѧ̀ неможе́нїе , посѣще́нїемъ сѝ оу҆бѣ́ждьшисѧ , и҆ здра́вїе мольба́ми сѝ пода́ждь мѝ .

и҆́нъ , і҆рмо́съ . Вскꙋ́ю мѧ ѿри́нꙋ , ѿ лица̀ твоегѡ̀ свѣ́те незаходѧ́и , покры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ заповѣде́й ти пꙋтѝ моѧ̀ напра́ви молю́тисѧ . Цр҃ко́внаго свѣти́льника вси́ тѧ свѣ́мы свѣтови́дна , и҆ дш҃а́мъ спасе́нїе . и҆схита́ющаго си́хъ и҆з̾ горта́нѧ смертоно́сна , и҆ къ животꙋ̀ наставлѧ́юща вѣ́чнꙋющꙋ , ѻ҆́ч҃е присносло́выи . Рꙋши́ши ѡ҆полче́нїѧ є҆рети́чествꙋющихъ требл҃же́нне , ѡ҆гради́всѧ бл҃гоче́стїѧ ѻ҆рꙋ́жїемъ , и҆ мꙋ́жествомъ дш҃е́внымъ сщ҃е́нне . собира́еши же ра́дꙋѧсѧ пресвѣ́тлѡ правосла́вныхъ ли́ки сою́зомъ дх҃о́внымъ . сла́ва . И҆спо́лнь ꙗ҆́кѡ ча́шꙋ бжⷭ҇твеныхъ а҆рама́тъ , лани́тѣ твоѝ вселе́ннꙋю , разꙋ́мными бл҃гоꙋха́нїи веселѧ́тъ . оу҆́мнагѡ ми́ра пома́занїемъ , и҆ добро́тою слове́съ твои́хъ премꙋ́дре .= и҆ ны́нѣ , боⷢ҇ . Ꙗ҆́кѡ бг҃а заче́ншꙋ содѣ́телѧ же и҆ творца̀ и҆ гдⷭ҇а , ро́ди всѝ чл҃честїи чи́стаѧ оу҆бл҃жа́ютъ , и҆ беспло́тныхъ разꙋ́мнаѧ чинонача́лїѧ , ꙗ҆́кѡ мт҃рь бж҃їю тѧ сла́вѧще . катава́сїѧ : О=у҆диви́шасѧ всѧ́ческаѧ .

пѣ́снь , ѕ҃ . і҆рмоⷭ҇ . Мл҃твꙋ пролїю̀ ко́ гдⷭ҇ꙋ , и҆ томꙋ̀ воз̾вѣщꙋ̀ печа́ль мою̀ . ꙗ҆́кѡ ѕѡ́лъ дш҃а моѧ̀ напо́лнисѧ , и҆ живо́тъ мо́й а҆́дꙋ прибли́жисѧ . и҆ молю́сѧ ꙗ҆́кѡ і҆ѡ́на , ѿ тлѝ бж҃е мо́й воз̾веди́ мѧ . Сме́рти и҆ тлѝ ꙗ҆́кѡ спа́слъ є҆́сть , са́мъсѧ и҆з̾да́въ на сме́рть , тлѣ́нїемъ и҆ сме́ртїю моѐ є҆стество̀ ꙗ҆́то бы́вшее . дв҃о молѝ гдⷭ҇а и҆ сн҃а своегѡ̀ , врагѡ́въ ѕлодѣ́йствїѧ мѧ̀ и҆зба́вити . Застꙋ́пницꙋ тѧ̀ животꙋ̀ свѣ́мъ , и҆ храни́тельницꙋ тве́рдꙋ дв҃це , напа́стей рѣша́щꙋ молвы̀ , и҆ нало́ги бѣсо́мъ ѿгонѧ́щꙋ . и҆ молю́сѧ всегда̀ , страсте́й мѧ и҆зба́вити всенепоро́чнаѧ .= Ꙗ҆́=кѡ стѣ́нꙋ и҆ прибѣ́жище стѧжа́хомъ , и҆ дш҃а́мъ тѧ̀ соверше́ное спасе́нїе , и҆ простра́нство в̾ ско́рбѣхъ ѻ҆трокови́це . и҆ свѣ́томъ тѝ прⷭ҇нѡ ра́дꙋемсѧ , ѽ влⷣчце , ны́нѣ на́съ ѿ стрⷭ҇те́й и҆ бѣ́дъ спасѝ . На ѻ҆дрѣ̀ нн҃ѣ не́мощїю низ̾лежꙋ̀ , и҆ нѣ́сть и҆сцѣле́нїѧ пло́ти мое́й . но ꙗ҆́же бг҃а и҆ сп҃са ми́рꙋ , и҆ и҆зба́вителѧ недꙋ́гомъ ро́ждьшаѧ , тебѣ̀ молю́сѧ бл҃го́й , ѿ и҆стлѣ́нїѧ болѣ́зней воста́ви мѧ .

и҆́нъ , і҆рмо́съ . Ѡ҆чи́сти мѧ сп҃се , мно́га бо без̾зако́нїѧ моѧ̀ , и҆ и҆з̾ глꙋбины̀ ѕѡ́лъ воз̾веди́ мѧ молю́сѧ , к̾ тебѣ́ бо воз̾ва́хъ и҆ оу҆слы́ша мѧ , бж҃е спасе́нїѧ моегѡ̀ . Премꙋ́дростїю дх҃о́вною ми́ра всегѡ̀ ѡ҆богати́лъ є҆сѝ , слове́сныи пода́тель бы́въ бога́тыи . бога́та бо свы́ше ст҃лю бл҃года́ть и҆злїѧ́сѧ во оу҆стна́хъ твои́хъ . Во всю̀ зе́млю ꙗ҆́кѡ мо́лнїѧ и҆зы́де вѣща́нїе твоѐ . и҆ си́ла же твои́хъ гл҃ъ златоꙋ́сте , ꙗ҆́кѡ трꙋба̀ велегла́снаѧ вселе́нныѧ всѧ̀ ѡ҆гласѝ концы̀ . сла́ва . Свы́ше во и҆стка́ннꙋю ри́зꙋ ѡ҆дѣ́ѧвсѧ пребл҃же́нне добродѣ́телей , и҆ слове́съ красото́ю ѡ҆бложи́всѧ . и҆́стины ꙗ҆ви́сѧ сла́вное оу҆твержде́нїе .= и҆ ны́нѣ , боⷢ҇ . В=седержи́тельною си́лою носѧ́и всѧ́ческаѧ , в̾ немощнꙋ́ю пло́ть и҆з̾ тебѐ ѡ҆дѣ́ѧвсѧ дв҃о пренепоро́чнаѧ , на бл҃годѣѧ́нїе чл҃кѡмъ , чл҃колю́бецъ .

катава́сїѧ : Бжⷭ҇твеное сѐ и҆ всечестно́е .

конда́къ . гла́съ , ѕ҃ . Съ нб҃съ прїе́мъ бжⷭ҇твенꙋю бл҃года́ть , и҆ свои́ми оу҆стна́ми всѣ́хъ наꙋча́ѧ , покланѧ́тисѧ въ трⷪ҇цѣ є҆ди́номꙋ бг҃ꙋ , і҆ѡа́нне златоꙋ́сте всебл҃же́нне прпⷣбне . досто́йнѡ хва́лимъ тѧ , є҆си́ бо наста́вникъ , ꙗ҆́кѡ бжⷭ҇твенаѧ ꙗ҆влѧ́ѧ . и҆́косъ . Всѣ́хъ творцꙋ̀ прекланѧ́ю колѣ́ни , превѣ́чномꙋ сло́вꙋ рꙋ́цѣ воз̾дѣва́ю , сло́ва просѧ̀ бл҃года́ть , да воспою̀ прпⷣбнагѡ , є҆го́же са́мъ просла́ви . рече́ бо про́рокꙋ живы́и во́ вѣки , сла́вѧщїѧ мѧ вѣ́рою , просла́влю . и҆́же оу҆́бѡ въ дре́внихъ самꙋ́ила вознесы́и , просла́ви и҆ ны́нѣ ст҃лѧ . тала́нтъ бо є҆го́же прїѧ́тъ , до́брѣ кꙋ́плю сотво́рь цр҃е́ви принесѐ . тѣ́мже и҆ превознесѐ є҆гѡ̀ пребога́тыи . сегѡ̀ бл҃года́ть прошꙋ̀ недосто́йныи те́плѣ , сло́во прїѧ́ти ми . да возмогꙋ̀ бл҃гоче́стнѡ воспѣ́ти и҆ а҆́зъ . конце́мъ бо то́й є҆́сть наста́вникъ , ꙗ҆́кѡ бжⷭ҇твенаѧ ꙗ҆влѧ́ѧ .

пѣ́снь , з҃ . і҆рмо́съ . И҆́же ѿ і҆ꙋде́и , доше́дше ѻ҆́троцы в̾ вавилѡ́нъ дре́вле , вѣ́рою оу҆тверже́нїи , пла́мень пе́щныи попра́вше гл҃юще , ѻ҆ц҃ъ на́шихъ бж҃е бл҃гослове́нъ є҆сѝ . На́ше спасе́нїе ꙗ҆́коже восхотѣ̀ сп҃се , оу҆стро́ити во́ чрево дв҃ыѧ всели́сѧ . ю҆́же ми́рꙋ застꙋ́пницꙋ показа̀ . ѻ҆ц҃ъ на́шихъ бж҃е бл҃гослове́нъ є҆сѝ .= В=оли́телѧ млⷭ҇ти , є҆го́же родѝ мт҃и ны́нѣ оу҆молѝ , и҆зба́вити мѧ ѿ прегрѣше́нїй и҆ дш҃е́вныѧ скве́рны , сн҃ꙋ твоемꙋ̀ зовꙋ́ща , ѻ҆ц҃ъ на́шихъ бж҃е бл҃гослове́нъ є҆сѝ . Сокро́вище спасе́нїѧ , и҆ и҆сто́чникъ нетлѣ́нїѧ , тебѐ ро́ждьшꙋю , сто́лпъ оу҆тверже́нїѧ , и҆ две́рь покаѧ́нїѧ , вопїю́щимъ показа̀ , ѻ҆ц҃ъ на́шихъ бж҃е бл҃гослове́нъ є҆сѝ . Тѣле́сныѧ недꙋ́ги , и҆ дш҃е́вныѧ грѣхѝ , бг҃ороди́тельнице , любо́вїю пристꙋпа́ющимъ к̾ кро́вꙋ твоемꙋ̀ дв҃це , и҆сцѣли́ти сподо́би , ꙗ҆́же сп҃са хрⷭ҇та̀ на́мъ ро́ждьшаѧ .

и҆́нъ , і҆рмо́съ . Бж҃їѧ схожде́нїѧ ѻ҆́гнь оу҆стыдѣ́сѧ въ вавилѡ́нѣ дре́вле . сегѡ̀ ра́ди ѻ҆́троцы , в̾ пещѝ ра́дованною ного́ю , ꙗ҆́кѡ во́ свѣтѣ ликова́хꙋ пою́ще , блгⷭ҇ве́нъ бг҃ъ ѻ҆ц҃ъ на́шихъ . Бл҃гости бе́зднꙋ и҆ бл҃гоꙋтро́бїѧ навы́къ бж҃їѧ . порꙋчи́тель ꙗ҆ви́сѧ спасе́нїю ка́ющимсѧ те́плѣ , и҆ вседꙋ́шнѡ гдⷭ҇ви зовꙋ́щимъ , бл҃гослове́нъ бг҃ъ ѻ҆ц҃ъ на́шихъ . Вчинѧ́еши златоꙋ́сте оу҆че́нїи твои́ми всѐ помышле́нїе , и҆ дш҃е́вныѧ оу҆врачꙋ́еши не́мощи ꙗ҆́кѡ милосе́рдъ , и҆ бл҃готекꙋ́щимъ спое́ши веселѧ́сѧ , бл҃гослове́нъ бг҃ъ ѻ҆ц҃ъ на́шихъ . сла́ва . Вознесе́сѧ бы́въ и҆збра́нъ преподо́бенъ неѕло́бивъ сщ҃е́нникъ вы́шнѧгѡ , пра́вдою ѡ҆дѣ́ѧнъ свѣ́тлѡ , и҆ весе́лїемъ зовы́и всебога́те , бл҃гослове́нъ бг҃ъ ѻ҆ц҃ъ на́шихъ .= и҆ ны́нѣ , боⷢ҇ . З=ачала̀ є҆сѝ пречⷭ҇таѧ надо всѣ́ми бг҃а и҆ гдⷭ҇а , бл҃говоли́вшаго спастѝ чл҃ческїи ро́дъ , ѿ тлѣ́нїѧ и҆ сме́рти . є҆го́же по достоѧ́нїю пою́ще зове́мъ , бл҃гослове́нъ бг҃ъ ѻ҆ц҃ъ на́шихъ .

катава́сїѧ : Непослꙋжи́ша тва́ри .

пѣ́снь , и҃ . і҆рмо́съ . Цр҃ѧ нбⷭ҇нагѡ , є҆го́же пою́тъ вѡ́и а҆́нг҃льстїи . хвали́те и҆ превозноси́те є҆гѡ̀ во́ вѣки . По́мощи ꙗ҆́же ѿ тебѐ тре́бꙋющїѧ , непре́зри дв҃о пою́щїѧ , и҆ превозносѧ́щїѧ хрⷭ҇та̀ во́ вѣки . Неможе́нїе дш҃и моеѧ̀ и҆сцѣлѧ́еши и҆ тѣле́сныѧ болѣ́зни дв҃о , ꙗ҆́кѡ да тѧ̀ пое́мъ , и҆ превозно́симъ чи́стꙋю во́ вѣки . И҆сцѣле́нїемъ бога́тство и҆злива́еши , вѣ́рнѡ пою́щимъ тѧ̀ дв҃це , и҆ превозносѧ́щимъ хрⷭ҇та̀ во́ вѣки . Напа́стныѧ ты̀ прило́ги ѿгонѧ́еши , и҆ страстны́ѧ нахо́ды дв҃о , ꙗ҆́кѡ да тѧ̀ пое́мъ и҆ превозно́симъ чи́стꙋю во́ вѣки .

и҆́нъ , і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃очести́вымъ лю́тѣ раз̾жжѐ . си́лою же лꙋ́чшею спасе́ныхъ ви́дѣвъ , творцꙋ̀ и҆ и҆зба́вителю вопїѧ́ше , дѣ́ти бл҃гослови́те , сщ҃е́ннїи воспо́йте лю́дїе , и҆ превозноси́те є҆гѡ̀ во́ вѣки . И҆́же разꙋ́мнѡ словесы̀ твои́ми бесѣ́дꙋюще златоꙋ́сте , бг҃осло́вїю честно́мꙋ оу҆чи́мсѧ . и҆ всѐ пло́дствꙋемъ бл҃ги́хъ прїѡ҆брѣ́тенїе . и҆ ѕло́бнагѡ ѿбѣга́емъ вре́да . ѻ҆́бщїи бо промы́сленикъ спасе́нїѧ бы́сть , вопїѧ̀ превозноси́те хрⷭ҇та̀ во́ вѣки . За ны̀ молѝ влⷣкꙋ златоꙋ́сте млрⷭ҇днымъ дерзнове́нїемъ , и҆ млⷭ҇тивною и҆ чл҃колю́бною тѝ ѻ҆́ч҃е любо́вїю . тѧ́ бо къ сп҃сꙋ пред̾лага́емъ вѣ́рнїи хода́таѧ и҆ пред̾ста́телѧ , и҆ теплѣ́йша мл҃твеника бг҃омꙋ́дре і҆єра́рхе пребл҃же́нне і҆ѡа́нне . блгⷭ҇ви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Ю҆́ношско противле́нїе и҆ непрекло́ннѡ мꙋдрова́нїе , и҆ црⷭ҇твꙋющихъ непра́вдꙋ ѡ҆бличи́лъ є҆сѝ . те́плѣ пред̾ста́въ ѡ҆би́димымъ прпⷣбне . и҆ си́рымъ и҆ вдови́цамъ и҆ ни́щимъ ѻ҆ц҃ъ бы́лъ є҆сѝ любо́внымъ пред̾ложе́нїемъ . превозноси́те вопїѧ̀ хрⷭ҇та̀ во́ вѣки .= и҆ ны́нѣ , боⷢ҇ . Тѣле́сными ѡ҆браже́нїи , и҆ разли́чными гада́нїи и҆ ѻ҆бразы̀ , и҆ зако́нными прорица́нїи , твоѐ провозвѣсти́ша бг҃оглаго́ливїи ржⷭ҇тво̀ па́че є҆стества̀ ди́вное дв҃о . тѣ́мъ тѧ̀ веселѧ́щесѧ бл҃гоче́стнѡ воспѣва́емъ , и҆ превозно́симъ хрⷭ҇та̀ во́ вѣки . =катава́сїѧ : Хва́лимъ блгⷭ҇ви́мъ . Ѻ҆́троки бл҃гочести́выѧ .

пѣ́снь , ѳ҃ . і҆рмо́съ . Вои́стинꙋ бцⷣꙋ тѧ̀ и҆сповѣ́дающе , спасе́ннїи тобо́ю дв҃це чⷭ҇таѧ , с̾ нбⷭ҇ными вѡ́и тѧ̀ велича́емъ .= Т=о́ка сле́зъ мои́хъ не ѿврати́сѧ , ꙗ҆́же ѿ всѧ́кагѡ лица̀ всѧ̀ сле́зы ѿе́мшагѡ , дв҃це хрⷭ҇та̀ ро́ждьшаѧ . Ра́дости моѐ се́рдце и҆спо́лни дв҃о , ꙗ҆́же ра́дости прїе́мши и҆сполне́нїе грѣхо́внꙋю печа́ль потреблѧ́ющи . Свѣ́та твоегѡ̀ зарѧ́ми просвѣтѝ дв҃о , мра́къ невѣ́денїѧ ѿгонѧ́щи , бл҃говѣ́рнѡ бцⷣꙋ тѧ̀ и҆сповѣ́дающихъ . Въ мѣ́стѡ ѡ҆ѕлобле́нїѧ , не́мощи низ̾лежа́щагѡ , дв҃о и҆сцѣлѝ , и҆з̾ не здра́вїѧ во здра́вїе претворѧ́ющи .

и҆́нъ , і҆рмо́съ . Оу҆диви́сѧ оу҆́бѡ ѡ҆ се́мъ не́бо , и҆ землѝ оу҆жасо́шасѧ концы̀ , ꙗ҆́кѡ бг҃ъ ꙗ҆ви́сѧ чл҃кѡмъ пло́тїю , чре́во же твоѐ бы́сть простра́ннѣе нб҃съ , тѣ́мъ тѧ̀ бцⷣе , а҆́нг҃лъ и҆ чл҃къ чинонача́лїѧ велича́емъ . Вои́стинꙋ наслажда́ѧсѧ ѻ҆́ч҃е жи́зни , ѡ҆ не́йже подвиза́сѧ є҆ли́кѡ мо́щнѡ на землѝ житїе́мъ подо́бнѡ а҆́нг҃льскимъ , и҆ хрⷭ҇то́въ стѧжа́въ ꙗ҆зы́къ , и҆ оу҆ста̀ ти́хаѧ . спасти́сѧ бг҃оглаго́ливе моли́ тѧ вѣ́рою разли́чнѡ бл҃жа́щимъ . Словеса̀ твоѧ̀ пребл҃же́нне словеса̀ жи́зни , живо́тъ хода́тайствꙋюща непреста́ннѡ . тѧ́ бо и҆сто́чника текꙋ́ща показа̀ хрⷭ҇то́съ , и҆ рѣкꙋ̀ пролива́ющꙋ бжⷭ҇твеныѧ на́мъ то́ки оу҆че́нїѧ . пи́щи вои́стинꙋ пото́къ . ѡ҆ставле́нїѧ же стрꙋю̀ , и҆ покаѧ́нїѧ свѣ́тла проповѣ́дника . сла́ва . Хода́тай ꙗ҆ви́сѧ сщ҃еннонача́льниче , бг҃ꙋ и҆ чл҃кѡмъ пресвѣ́тлыи . ты́ бо свѣти́ло показа́сѧ бл҃гоче́стїѧ бг҃освѣ́тлое , и҆ бжⷭ҇твеныѧ бы́сть млⷭ҇тыни наста́вникъ . тѣ́мъ тѧ златосло́ве серде́чною любо́вїю , нн҃ѣ досто́йно оу҆бл҃жа́емъ .= и҆ ны́нѣ , боⷢ҇ . Ч=и́стаѧ препросла́вленаѧ мт҃и бг҃ꙋ , пою́щїѧ тѧ любо́вїю спасѝ . и҆скꙋше́нїи мно́жество разрѣша́ющи млⷭ҇тивнѡ , ꙗ҆́кѡ бг҃а ро́ждьши . всѧ̀ є҆ли́ка хо́щеши соверша́еши беспретыка́нїѧ , и҆ мо́жеши дв҃о . тѣ́мъ тѧ всѝ велича́емъ .

катава́сїѧ : Всѧ́къ зе́менъ .= Досто́йнѡ є҆́сть . свѣти́ленъ . Златоза́рными словесы̀ твои́ми хрⷭ҇то́ва цр҃кви оу҆краша́етсѧ ѽ златоꙋ́сте ѻ҆́ч҃е . дш҃а́ же веселѧ́тсѧ вѣ́рныхъ почита́юще всест҃ꙋ́ю ти па́мѧть . ты́ бо всѣ́хъ показа́сѧ покаѧ́нїю наста́вникъ и҆ во́ждь спасе́нїю . два́жды . сла́ва , и҆ ны́нѣ , боⷢ҇ . П=од̾ кро́въ тво́й чи́стаѧ прибѣга́ю ѻ҆каѧ́нныи . молѝ бл҃госе́рдаго , ꙗ҆́кѡ да полꙋчꙋ̀ млⷭ҇ть в̾ де́нь сꙋда̀ . є҆гда̀ и҆спыта́етъ ми в̾ та́йнѣ содѣ́ѧннаѧ , да и҆зба́влюсѧ тобо́ю ѡ҆сꙋжде́нїѧ стра́шнагѡ бл҃гослове́наѧ мр҃і́е .

На хвали́тѣхъ , стихѣ́ры , на д҃ . гла́съ , д҃ . поⷣ . да́лъ є҆сѝ зна́менїе . Сосꙋ́дъ честнѣ́йшїи ,꙳ бжⷭ҇твенномꙋ дх҃ꙋ бы́сть ,꙳ и҆ па́стырь сщ҃е́ннѣйшїи .꙳ а҆́нг҃лъ на землѝ ,꙳ сто́лпъ цр҃ко́вныи и҆ повелѣ́нїи степе́нь .꙳ грѣ́шнымъ порꙋчи́тель .꙳ ка́ющимсѧ бжⷭ҇твеное оу҆тѣше́нїе ,꙳ ни́щимъ же промы́сленикъ и҆ си́рымъ оу҆тѣше́нїе ,꙳ і҆ѡа́нне златоꙋ́сте ,꙳ мл҃твениче ѡ҆ дш҃а́хъ на́шихъ . двⷤа . Сл҃нце многосвѣ́тлое ,꙳ вселе́ннꙋю словесы̀ твои́ми ѡ҆зарѧ́ѧ ,꙳ бы́сть ѕвѣзда̀ свѣтлѣ́йша ,꙳ свѣща̀ свѣтѧ́щаѧ зарѧ̀ ,꙳ и҆́же в̾ мо́ри ми́ра всегда̀ ѡ҆бꙋрева́емыхъ ,꙳ привлечѐ ко приста́нищꙋ ти́хомꙋ ,꙳ и҆ спасе́номꙋ бл҃года́тїю .꙳ златосло́ве златоꙋ́сте ,꙳ моли́твениче ѡ҆ дш҃а́хъ на́шихъ . А҆́нг҃лъ земны́и ,꙳ и҆ нбⷭ҇ныи человѣ́къ ,꙳ славі́й доброгла́сныи .꙳ рѣка̀ и҆сполнѧ́ема слове́сныхъ во́дъ .꙳ ѻ҆́блакъ тꙋ́чи разꙋ́мныѧ ,꙳ всѣ́мъ на́мъ бога́тнѡ ка́плющи .꙳ спасе́нїѧ оу҆чи́тель ,꙳ и҆ покаѧ́нїю поспѣ́шникъ ,꙳ і҆ѡа́нне златоꙋ́сте ,꙳ вои́стинꙋ бы́лъ є҆сѝ .

сла́ва . гла́съ , и҃ . Златы́ми словесы̀ , и҆ бг҃овѣща́нными повелѣ́нїи оу҆краси́въ бж҃їю цр҃ковь . бога́тство дх҃о́внѡ скры́лъ є҆сѝ в̾ не́й , твоѧ̀ бг҃опреда́ннаѧ словеса̀ . тѣ́мъ вѣне́цъ ѿ нетлѣ́нныхъ цвѣто́въ и҆ съ пле́тши пѣ́сней , сщ҃е́ннѣй твое́й прино́ситъ па́мѧти , всезлаты́и дш҃е́ю и҆ ꙗ҆зы́кѡмъ і҆ѡа́нне златоꙋ́сте . но ꙗ҆́кѡ и҆мѣ́ѧ дерзнове́нїе преподо́бне , моли́сѧ ѡ҆ дш҃а́хъ на́шихъ .

и҆ нн҃ѣ , боⷢ҇ . Влⷣчце прїимѝ мл҃твꙋ ра́бъ свои́хъ , и҆ и҆зба́ви на́съ ѿ всѧ́кїѧ нꙋ́жды и҆ печа́ли . Славосло́вїе вели́кое , и҆ ѿпꙋ́стъ .

На литꙋргі́и , бл҃же́нна , на и҃ . ѿ кано́на , ст҃лю , пѣ́снь г҃ ѧ , и҆ ѕ҃ ѧ .

По вхо́дѣ , а҆́ще ли хра́мъ хрⷭ҇то́въ , и҆лѝ бцⷣы : тропа́рь хра́мꙋ , и҆ ст҃лю . сла́ва , конда́къ ст҃лю . и҆ ны́нѣ , хра́мꙋ .

По вхо́дѣ , а҆́ще хра́мъ ст҃ы́мъ : тропа́рь хра́мꙋ , и҆ ст҃лю . конда́къ хра́мꙋ . сла́ва , ст҃лю . и҆ ны́нѣ , конда́къ : застꙋ́пнице хрⷭ҇тїа́нѡмъ .

проки́менъ , ѱл҃о́мъ дв҃довъ . оу҆ста̀ моѧ̀ воз̾гл҃ютъ премꙋ́дрость , и҆ поꙋче́нїе срⷣца моегѡ̀ ра́зꙋмъ . сти́хъ . оу҆слы́шите сїѧ̀ всѝ ꙗ҆зы́цы , внꙋши́те всѝ живꙋ́щїи по вселе́ннѣй . а҆пⷭ҇лъ , къ є҆вре́ѡмъ . заⷱ҇ , ти҃і . а҆ллилꙋ́їѧ . оу҆ста̀ пра́веднагѡ поꙋча́тсѧ премꙋ́дрости , и҆ ꙗ҆зы́къ є҆гѡ̀ воз̾гл҃етъ сꙋ́дъ . є҆ѵⷢ҇а́лїе , ѿ і҆ѡа́нна . заⷱ҇ , л҃ѕ . прича́стенъ . въ па́мѧть вѣ́чнꙋю бꙋ́детъ пра́ведникъ .