МЦⷭ҇А ТОГО́ЖЕ ВЪ Д҃І ДН҃Ь

ст҃а́гѡ и҆ всехва́льнагѡ а҆пⷭ҇ла фили́ппа . =И҆ и҆́же во ст҃ы́хъ ѻ҆ц҃а на́шегѡ григо́рїѧ , а҆рхїє҆пкⷭ҇па солꙋ́нскагѡ . слꙋ́жба є҆мꙋ̀ пи́сана , по се́й слꙋ́жбѣ . Ве́черъ , на гдⷭ҇и возва́хъ , стихѣ́ры , а҆пⷭ҇лꙋ , на́ ѕ҃ . гла́съ , ѕ҃ . подо́бенъ . всѐ оу҆пова́нїе . Дѣѧ́нїѧ оу҆́бѡ восхожде́нїе ,꙳ и҆́стиннагѡ видѣ́нїѧ ,꙳ коне́цъ же видѣ́нїѧ ꙳ бг҃олюби́вагѡ дѣѧ́нїе ,꙳ бл҃же́нне положи́въ .꙳ хрⷭ҇та̀ моли́лъ є҆сѝ ,꙳ ѻ҆́ч҃ꙋ сла́вꙋ показа́ти тѝ неи҆зрече́ннꙋю .꙳ и҆́бо жела́етъ всѧ́ко слове́сное є҆стество̀ сла́вне ,꙳ бг҃а соста́вльшаго .꙳ и҆ жела́нномꙋ полꙋчи́ти .꙳ тогѡ̀ а҆́бїе прїе́мъ печа́ть сн҃а .꙳ є҆го́же со дерзнове́нїемъ ,꙳ молѝ ѡ҆ дш҃а́хъ на́шихъ . Бжⷭ҇твеными восхожде́нїи ,꙳ всегда̀ наꙋча́емь ,꙳ ꙗ҆́кѡ мѡѷсе́й пе́рвѣе ,꙳ бг҃а ви́дѣти воз̾желѣ́лъ є҆сѝ .꙳ и҆ разꙋ́мнѡ ви́дѣти тогѡ̀ ѻ҆́браза ,꙳ воспрїе́мъ подо́бїе .꙳ ѻ҆́ч҃ее бо ско́рое оу҆видѣ́нїе ,꙳ сн҃ъ и҆ оу҆каза́нїе .꙳ сн҃а же и҆ роди́телѧ ,꙳ є҆ди́но сꙋщество̀ познава́етсѧ ,꙳ и҆ ѿ всѣ́хъ торжество̀ возно́ситсѧ че́стнѡ ,꙳ и҆ црⷭ҇тво и҆ си́ла , сла́ва и҆ покланѧ́нїе . А҆рга́нъ брѧца́ѧ ,꙳ бжⷭ҇твеными дыха́нїи ,꙳ и҆ сказа́нїи ст҃а́гѡ дх҃а бы́лъ є҆сѝ .꙳ преми́рное поѧ̀ ,꙳ в̾ ми́рѣ сп҃сово є҆ѵⷢ҇а́лїе ,꙳ ѻ҆́гненымъ же ꙗ҆зы́кѡмъ ,꙳ всю̀ ле́сть попали́лъ є҆сѝ ,꙳ ꙗ҆́кѡ ве́щь оу҆до́бь пали́мꙋ ,꙳ и҆ ꙗ҆́кѡ травꙋ̀ землѝ оу҆вѧда́ющꙋ .꙳ надо всѣ́ми же влⷣкꙋ ꙳ и҆ гдⷭ҇а хрⷭ҇та̀ вселе́ннѣй ,꙳ проповѣ́далъ є҆сѝ фили́ппе бг҃ови́дче . =сла́ва . гла́съ , ѕ҃ . Вели́кагѡ фили́ппе свѣ́та , блиста́нїи раз̾же́гсѧ , всеми́рныи восїѧ́лъ є҆сѝ свѣти́льникъ . ѻ҆ц҃а́ же свѣ́томъ въ сн҃ѣ взыска́въ ѡ҆брѣ́те . въ свѣ́тѣ бо свѣ́тъ ѡ҆брѣта́етсѧ . и҆́бо то́й печа́ть равноѡ҆бра́зна , ꙗ҆влѧ́ѧ началоѡ҆бра́зное . є҆го́же а҆пⷭ҇ле молѝ , зна́менанымъ бжⷭ҇твеною спасти́сѧ кро́вїю .= и҆ ны́нѣ , боⷢ҇ . и҆лѝ , крⷭ҇тобоⷢ҇ . поⷣ . в̾ =тре́тїи де́нь . Зрѧ́щи тѧ̀ распина́ема ,꙳ тебѐ хрⷭ҇тѐ ро́ждьшаѧ , вопїѧ́ше ,꙳ что̀ стра́нное є҆́же ви́жꙋ та́инство сн҃е мо́й .꙳ ка́кѡ на́ древѣ оу҆мира́еши пло́тїю повѣ́шенъ ,꙳ всѣ́хъ животѐ .

На стихо́внѣ , во ѻ҆кта́и . сла́ва . гла́съ , в҃ . Ѡ҆ста́вивъ ꙗ҆́же на землѝ , послѣ́довалъ є҆сѝ хрⷭ҇то́ви , и҆ зна́менавсѧ дꙋнове́нїемъ ст҃а́гѡ дх҃а , посла́сѧ ѿ негѡ̀ в̾ ꙗ҆зы́ки поги́бшїѧ , ѡ҆браща́ти чл҃ки на свѣ́тъ бг҃оразꙋ́мїѧ фили́ппе а҆пⷭ҇ле , и҆ соверши́въ по́двигъ бжⷭ҇твенагѡ жела́нїѧ твоегѡ̀ , мꙋ́ками многоплете́нными , дш҃ꙋ свою̀ хрⷭ҇то́ви пре́далъ є҆сѝ . тогѡ̀ молѝ всебл҃же́нне , дарова́ти на́мъ ве́лїю млⷭ҇ть . и҆ ны́нѣ , боⷢ҇ . и҆лѝ , крⷭ҇тобоⷢ҇ . поⷣ . є҆гда̀ ѿ́ древа . Є҆гда̀ нескве́рнаѧ а҆́гница , оу҆зрѣ̀ своегѡ̀ а҆́гньца , на заколе́нїе ꙗ҆́кѡ зе́млена влеко́ма во́лею , пла́чꙋщи глаго́лаше , без̾ча́дствовати мѧ̀ ны́нѣ тщи́шисѧ хрⷭ҇тѐ ро́ждьшꙋю тѧ̀ . что̀ сѐ сотвори́лъ є҆сѝ и҆зба́вителю всѣ́хъ . ѻ҆ба́че пою̀ и҆ сла́влю , твоѐ па́че оу҆ма̀ и҆ сло́ва , коне́чнꙋю бл҃госты́ню чл҃колю́бче .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , г҃ . А҆пⷭ҇ле ст҃ы́и фили́ппе , молѝ млⷭ҇тиваго бг҃а , да грѣхо́въ ѡ҆ставле́нїе пода́стъ дш҃а́мъ на́шимъ . сла́ва , и҆ нн҃ѣ , боⷢ҇ , и҆лѝ крⷭ҇тобоⷢ҇ .

На оу҆́трени . ѻ҆́ба кано́на , во ѻ҆кта́и . и҆ ст҃о́мꙋ , на́ ѕ҃ . кано́нъ . є҆мꙋ́же краегране́сїе сицево̀ : сла́внаго фили́ппа пою̀ бл҃голѣ́пнѡ . ѳеѡ́фан̾ . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ ходи́въ і҆и҃ль , по бе́зднѣ стопа́ми , гони́телѧ фараѡ́на , ви́дѧ потоплѧ́ема , бг҃ꙋ побѣ́днꙋю пѣ́снь пое́мъ вопїѧ́ше .

запѣ́в̾ : Ст҃ы́и а҆пⷭ҇ле= фили́ппе , молѝ бг҃а ѡ҆ на́съ . Пресвѣ́тлыми лꙋча́ми хрⷭ҇то́вы бжⷭ҇твеныѧ свѣ́тлости наслажда́ѧсѧ ꙗ҆́снѡ бг҃опроповѣ́дниче фили́ппе , твои́ми пречестны́ми зарѧ́ми на́съ просвѣтѝ . И҆́же ѻ҆́ч҃ꙋ тебѣ̀ сла́вꙋ собо́ю показа́выи фили́ппе , ли́кꙋ оу҆чени́ческꙋ тѧ̀ хрⷭ҇то́съ причтѐ твою̀ провѣ́дыи добродѣ́тель бг҃обл҃же́нне . Ны́нѣ не в̾ гада́нїи зри́ши ни сѣ́ни ни зерца́лѣ премꙋ́дре , и҆сто́чника бл҃ги́хъ , жела́нїе коне́чное хрⷭ҇та̀ , но лице́мъ зри́ши ꙗ҆́вственѡ к̾ лицꙋ̀ . =боⷢ҇ . Ѡ҆скꙋдѣ́вшемъ кнѧзе́мъ ѿ колѣ́на і҆ꙋ́дова пречⷭ҇таѧ , сн҃ъ тво́й и҆ бг҃ъ прише́дъ воево́да землѝ конце́мъ , вои́стинꙋ ны́нѣ воцр҃и́сѧ .

пѣ́снь , г҃ . і҆рмо́съ . Нѣ́сть ст҃а ꙗ҆́коже ты̀ , гдⷭ҇и бж҃е мо́й , вознесы́и ро́гъ вѣ́рныхъ си бл҃же , и҆ оу҆тве́рждь и҆́хъ на ка́мени и҆сповѣ́данїѧ тѝ . Ты̀ и҆спо́лнь свѣ́та дѣ́йственагѡ видѣ́нїѧ свѣ́тꙋ вели́комꙋ бы́вшꙋ с̾ на́ми . сподо́бисѧ хрⷭ҇то́ви слꙋжи́ти фили́ппе сла́вне . Степе́нь догма́тъ бл҃гочести́выхъ , твоѐ та́йнѡ оу҆че́нїе вѣ́рнымъ ꙗ҆ви́сѧ . того́ бо ра́ди сн҃а оу҆вѣ́дѣхомъ соесте́ствена и҆ совокꙋ́плена сꙋ́ща роди́телю . Свѣ́щникъ бы́сть зла́тъ , сїѧ́ѧ чл҃кѡмъ прⷭ҇носꙋ́щнꙋю зарю̀ , и҆ просвѣща́ющь є҆гѡ̀ вселе́ннꙋю ꙗ҆́вѣ , ра́зꙋмомъ фили́ппе и҆зѧ́щне . боⷢ҇ . Натѧ̀ прест҃а́ѧ чⷭ҇таѧ надѣ́ѧсѧ , да не ѿпадꙋ̀ твоегѡ̀ чаѧ́нїѧ . но ꙗ҆́кѡ мт҃и ми́лостивнаѧ , чл҃колюби́вагѡ бг҃а , сѣ́тей мѧ̀ врага̀ и҆зба́ви .

сѣда́ленъ . гла́съ , и҃ . Тече́нїемъ ѻ҆́блакъ дх҃о́вныи вои́стинꙋ ꙗ҆ви́сѧ землены́мъ , напоѧ́ѧ ꙗ҆́кѡ бразды̀ та́йнѡ срⷣца̀ на́ша . проте́къ сло́вомъ просвѣща́еши концы̀ , и҆ до́ждь лїе́ши мѵ́рѡ ѿ ра́ки . тѣ́мъ дохнꙋ́въ в̾ невѣ́рныхъ срⷣца̀ , воню̀ дх҃о́внꙋю , и҆́хже сниска́лъ є҆сѝ , а҆пⷭ҇ле фили́ппе . молѝ хрⷭ҇та̀ бг҃а грѣхо́въ ѡ҆ставле́нїе дарова́ти , чтꙋ́щимъ любо́вїю ст҃ꙋ́ю па́мѧть твою̀ . дрꙋгі́и , сѣда́ленъ . И҆́дольскꙋю ле́сть низ̾ложи́лъ є҆сѝ . сп҃совы стрⷭ҇ти воз̾желѣ́въ фили́ппе сла́вне . ꙗ҆ви́сѧ ми́рови , нбⷭ҇наѧ всѣ́мъ и҆сточа́ѧ чꙋдеса̀ , и҆ ꙗ҆зы́кѡмъ бы́сть всебл҃же́нне а҆пⷭ҇лъ . тѣ́мъ твою̀ па́мѧть досто́йнѡ чте́мъ , пѣсносла́вѧще гдⷭ҇нь а҆пⷭ҇ле . молѝ хрⷭ҇та̀ бг҃а грѣхо́въ ѡ҆ставле́нїе дарова́ти , чтꙋ́щимъ любо́вїю ст҃ꙋ́ю па́мѧть твою̀ . сла́ва , и҆ ны́нѣ , боⷢ҇ . Въ напа́сти многоплете́нныѧ впа́дъ , ѿ вра́гъ ви́димыхъ и҆ неви́димыхъ , бꙋ́рею ѡ҆держи́мь без̾мѣ́стныхъ согрѣше́нїй мои́хъ , и҆ ꙗ҆́кѡ к̾ те́пломꙋ застꙋпле́нїю , и҆ покро́вꙋ твоемꙋ̀ чи́стаѧ , ко приста́нищꙋ притека́ю твоеѧ̀ бл҃гости . тѣ́мже прест҃а́ѧ , и҆́же и҆з̾ тебѐ воплоще́нномꙋ без̾ сѣ́меннѡ моли́сѧ , ѡ҆ всѣ́хъ рабѣ́хъ твои́хъ непреста́ннѡ пою́щихъ тѧ̀ бцⷣе пречⷭ҇таѧ , молѧ́щи тогѡ̀ прилѣ́жнѡ , согрѣше́нїемъ ѡ҆ставле́нїе дарова́ти , покланѧ́ющимсѧ вѣ́рою ржⷭ҇твꙋ̀ твоемꙋ̀ .= крⷭ҇тобоⷢ҇ . А҆́=гньца и҆ па́стырѧ и҆ и҆зба́вителѧ , а҆́гница зрѧ́щи , на крⷭ҇тѣ̀ восклица́ше слезѧ́щи . ми́ръ оу҆́бѡ ра́дꙋетсѧ прїе́млѧ тобо́ю и҆збавле́нїе . оу҆тро́ба же моѧ̀ гори́тъ зрѧ́щи твоѐ распѧ́тїе , є҆́же терпи́ши за милосе́рдїе млⷭ҇ти долготерпѣли́ве гдⷭ҇и . млⷭ҇ти бе́здно , и҆ и҆сто́чниче неи҆счерпа́емыи , оу҆милосе́рдисѧ и҆ да́рꙋй грѣхо́въ ѡ҆ставле́нїе , вѣ́рою воспѣва́ющимъ твоѧ̀ бжⷭ҇твенаѧ страда́нїѧ .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃олѣ́пнѡ зове́тъ вопїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи . Сл҃нца селе́нїе хрⷭ҇та̀ сꙋ́щагѡ свѣ́та , и҆ цр҃кви ꙗ҆ви́сѧ вмѣсти́тельна тогѡ̀ свѣ́тлости , и҆ нб҃о сла́вꙋ бж҃їю чл҃кѡмъ и҆сповѣ́дꙋѧ . Во и҆стлѣ́вшее страстьмѝ чл҃чество ты̀ вложе́нъ бж҃їѧ со́ль ѿ хрⷭ҇та̀ , тогѡ̀ и҆з̾сꙋшѝ гно́й лю́тыи , бг҃овѣща́телю достосла́вне . Си́лою фили́ппе хрⷭ҇то́вою оу҆крѣплѧ́емь , бѣсо́вскагѡ мно́жества , и҆ ѕловѣ́рныхъ ꙗ҆ви́сѧ си́льнѣйши . земны́мъ вопїѧ̀ живота̀ бжⷭ҇твенагѡ бл҃говѣ́стїе . боⷢ҇ . Приста́нище ти́хое хрⷭ҇то́съ ꙗ҆ви́ тѧ , вѣ́рою и҆ любо́вїю тѧ̀ и҆́стиннꙋю влⷣчцꙋ всенепоро́чнꙋю , ѿ со́вѣсти чи́стыѧ бцⷣꙋ проповѣ́дꙋющимъ .

пѣ́снь , є҃ . і҆рмо́съ . Бж҃їимъ свѣ́томъ тѝ бл҃же , оу҆́тренюющихъ тѝ дш҃а любо́вїю , просвѣтѝ молю́сѧ , тѧ̀ вѣ́дѣти сло́во бж҃їе , и҆́стиннагѡ бг҃а , ѿ́ мрака грѣхо́внагѡ и҆зима́юща . Ꙗ҆́да дꙋшетлѣ́ннагѡ вра́жїѧ , враче́бными тѝ дла́ньми бг҃огл҃иве и҆з̾сꙋши́въ , смертоно́сною глꙋбино́ю держи́мыхъ лю́тыѧ болѣ́зни и҆збавлѧ́ѧ . Ѻ҆гнедх҃нове́ненъ ве́сь ѿ ню́дъ ꙗ҆ви́сѧ , паракли́товымъ прише́ствїемъ , и҆ бл҃года́тїю фили́ппе , и҆з̾со́хшаѧ без̾бо́жїѧ зимо́ю , теплото́ю вѣ́ры ѡ҆живи́лъ є҆сѝ . И҆́скрь бы́лъ є҆сѝ хрⷭ҇та̀ подае́мыѧ тѝ зарѝ , без̾хода́тайственѣ прїе́млѧ , просвѣща́ѧ к̾ тебѣ̀ прири́щꙋщихъ , приводѧ̀ си́хъ содѣ́телю своемꙋ̀ . боⷢ҇ . Сло́вомъ всѧ̀ содѣва́ѧ , и҆ премꙋ́дрымъ промышле́нїемъ ѡ҆кормлѧ́ѧ є҆ди́нъ ꙗ҆́коже хо́щетъ гдⷭ҇ь , па́че бл҃госе́рдїѧ созида́етсѧ и҆з̾ тебѐ , и҆ пло́ть несказа́ннѡ пречⷭ҇таѧ быва́етъ .

пѣ́снь , ѕ҃ . і҆рмо́съ . Ꙗ҆́тъ бы́сть но неꙋде́ржанъ в̾ пе́рсѣхъ ки́товѣхъ і҆ѡ́на , тво́й бо ѻ҆́бразъ носѧ̀ , пострада́вша и҆ погребе́нїю дана̀ , ꙗ҆́кѡ ѿ черто́га ѿ ѕвѣ́рѧ и҆з̾ше́дъ . приглаша́ше же кꙋстоді́и , хранѧ́щїи всꙋ́е лжꙋ̀ , млⷭ҇ти ва́шеѧ ѡ҆ста́вили є҆стѐ . Ѡ҆держа́щꙋ тлѣ́ющꙋю зрѧ̀ пре́лесть вра́жїю чл҃ческїи ро́дъ , твоѧ̀ стрѣ́лы и҆з̾ѡ҆щре́ныѧ , а҆пⷭ҇лы напрѧ́гъ посла́лъ є҆сѝ . и҆ ѿве́рзъ бе́рнаѧ оу҆ста̀ ѕмїе́ва , всѣ́хъ ѿ тогѡ̀ вре́да и҆ тлѝ сп҃се и҆сцѣлѧ́ѧ . Бо́льша зарѝ блиста́ѧ ꙗ҆ви́сѧ . ꙗ҆́кѡ мо́лнїѧ вселе́ннѣй свѣ́те , ꙗ҆́кѡ гора̀ сла́дость и҆ска́паѧ . и҆ ꙗ҆́кѡ роса̀ бжⷭ҇твенаѧ с̾ нб҃сѐ па́дающи . ꙗ҆́кѡ а҆пⷭ҇лъ и҆збра́нъ двоенадесѧ́тное число̀ и҆сполнѧ́ѧ , оу҆чени́къ хрⷭ҇то́выхъ всебл҃же́нне . Навы́къ твоеѧ̀ та́йны глꙋбинꙋ̀ , бжⷭ҇твеныи оу҆чени́къ , ꙗ҆́кѡ рѣкꙋ̀ ми́рнꙋ наводнѧ́ющꙋ пи́щꙋ пото́ка , и҆ содѣва́ющꙋ волны̀ сла́вꙋ ꙗ҆зы́кѡмъ , тѧ̀ проповѣ́да велегла́снѡ . и҆ твоѐ сла́вное и҆стоща́нїе бл҃же є҆́же ѡ҆ на́съ бл҃говѣстѝ . боⷢ҇ . Оу҆мерщьвѧ́емы и҆ пасо́мы всѧ̀ сме́ртїю земны́ѧ , ты̀ хрⷭ҇та̀ ро́ждьши нетлѣ́нное без̾сме́ртїе , призва̀ к̾ животꙋ̀ вѣ́чномꙋ , и҆ просвѣтова̀ ѡ҆мраче́нныѧ . и҆ свободѝ разрѣши́вши оу҆́зы ѿведе́нїѧ на́шегѡ препѣ́таѧ .

конда́къ . гла́съ , и҃ . Оу҆чени́къ и҆ дрꙋ́гъ тво́й хрⷭ҇тѐ и҆ под̾ража́тель стрⷭ҇те́мъ твои́мъ вселе́ннѣй бг҃а тѧ̀ проповѣ́да , бг҃огла́сныи фили́ппъ . тогѡ̀ моли́твами ѿ вра́гъ без̾зако́нныхъ , цр҃квь и҆ лю́ди твоѧ̀ бцⷣы ра́ди соблюдѝ , є҆ди́не многомлⷭ҇тиве . и҆́косъ . Стрꙋю̀ сло́ва пода́ждь мѝ гдⷭ҇и , водно́е є҆стество̀ содѣ́ѧвыи . и҆ срⷣце моѐ оу҆крѣпѝ бл҃гоꙋтро́бне , и҆́же зе́млю оу҆тверди́выи сло́вомъ свои́мъ . и҆ просвѣтѝ моѐ помышле́нїе , свѣ́томъ ꙗ҆́кѡ ри́зою ѡ҆дѣва́ѧисѧ . да глаго́лю и҆ пою̀ подо́бнаѧ досто́йнѡ , почестѝ твоегѡ̀ оу҆го́дника многоми́лостиве .

пѣ́снь , з҃ . і҆рмо́съ . Ѻ҆́троцы в̾ вавило́нѣ , пе́щи пла́менны не оу҆боѧ́шасѧ . но посредѝ ѻ҆гнѧ̀ в̾ве́ржени , прохлажда́еми взыва́хꙋ , блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ . Ꙗ҆́кѡ свѣ́тъ по́сланъ бы́сть стрѣлы̀ подо́бнѡ а҆пⷭ҇ле , свѣтоза́рными блиста́нїи , просвѣща́ѧ вѣ́рою зовꙋ́щихъ . блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ . Бога́тымъ свѣтоли́тїемъ , бжⷭ҇твенагѡ бл҃же́нне проповѣ́данїѧ сїѧ́ѧ свѣ́тлѡ , во тмѣ̀ сꙋ́щихъ пѣ́ти просвѣти́лъ є҆сѝ . блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ . Виті́йскїѧ блѧ́ди , и҆ слове́снꙋю всю̀ лю́тость , крѣ́пкимъ сло́вомъ вѣ́ры побѣди́въ пою́ше , блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ . боⷢ҇ . Є҆стества̀ па́че сꙋ́ществѣ дв҃о двѣ̀ родила̀ є҆сѝ , совокꙋпле́на чⷭ҇таѧ несмꙋще́нно хрⷭ҇та̀ . є҆мꙋ́же зове́мъ , блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ .

пѣ́снь , и҃ . і҆рмо́съ . По зако́нѣ ѻ҆́ч҃и пребл҃же́ннїи в̾ вавило́нѣ ю҆́нїи , бѣдꙋ̀ прїе́млюще царю́ющаго небрего́ша , повелѣ́нїѧ безꙋ́мнагѡ и҆ совокꙋпле́ннїи , в̾ не́мже неи҆звари́шасѧ ѻ҆гнѝ , держа́щемꙋ досто́йнѡ воз̾сыла́хꙋ пѣ́снь , гдⷭ҇а воспѣва́йте дѣ́ла , и҆ превозноси́те є҆гѡ̀ во́ вѣки . Свѣ́та тѧ̀ ми́рови совершѝ ѻ҆ч҃ь свѣ́тъ сло́во с̾сꙋ́щественое , и҆з̾бра́выи тѧ̀ а҆пⷭ҇ле ѿ́ мира требл҃же́нне . и҆ воѡ҆рꙋжи́въ бжⷭ҇твеною си́лою свое́ю , посла̀ ꙗ҆́кѡ ѻ҆рꙋ́жника непобѣди́ма , вопїю́ща , гдⷭ҇а по́йте и҆ превозноси́те є҆гѡ̀ во́ вѣки . Си́лою бжⷭ҇твеною оу҆крѣплѧ́емь а҆пⷭ҇ле , сопроти́вныѧ си́лы побѣди́лъ є҆сѝ , свирѣ́пое ѡ҆полче́нїе тѣ́хъ раз̾рꙋши́въ . ми́ръ оу҆́бѡ неѿє́млемыи жре́бїи взе́мъ , ми́рное оу҆строе́нїе всадѝ ми́рови . гдⷭ҇а воспѣва́йте дѣ́ла , и҆ превозноси́те є҆гѡ̀ во́ вѣки . боⷢ҇ . Ве́сь совокꙋпи́сѧ па́че ра́зꙋма неи҆з̾мѣ́ннѡ всемꙋ̀ чл҃чествꙋ , пребжⷭ҇твеныи во оу҆тро́бѣ твое́й всечⷭ҇таѧ дв҃о . тѣ́мже въ двою̀ є҆стествꙋ̀ познава́етсѧ хрⷭ҇то́съ є҆ди́нъ сы́и ѻ҆боѐ . є҆мꙋ́же пою́ще вопїе́мъ , и҆ превозно́симъ во́ вѣки .

пѣ́снь , ѳ҃ . і҆рмо́съ . Бг҃а чл҃кѡмъ неꙋдо́бь ви́дѣти , на́нь же несмѣ́ютъ чи́ни а҆́нг҃льстїи зрѣ́ти . тобо́ю бо пречⷭ҇таѧ ꙗ҆ви́сѧ на́мъ сло́во воплоще́нно , є҆го́же велича́юще , с̾ нбⷭ҇ными вѡ́и тѧ̀ велича́емъ . Ны́нѣ неи҆з̾рече́нныѧ сла́вы , свѣ́тꙋ невече́рнемꙋ сподо́бленъ . и҆дѣ́же неи҆з̾глаго́ланное є҆́сть весе́лїе , и҆дѣ́же ра́дость непреста́ющаѧ , въ цр҃кви пе́рвенецъ , и҆ и҆дѣ́же пра́ведныхъ селе́нїѧ , за всѧ̀ хрⷭ҇тїа́не моли́сѧ фили́ппе премꙋ́дре .= Оу҆краше́нъ разꙋ́мною добро́тою бл҃гоче́стїѧ , и҆ црⷭ҇кимъ оу҆вѧзе́нїемъ ѡ҆бложе́нъ бг҃омꙋ́дре , и҆ бога́тымъ свѣтоли́тїемъ , фили́ппе просвѣща́емь , преє҆сте́ственагѡ свѣ́та сїѧ́ньми , ра́дꙋисѧ оу҆ влⷣки своегѡ̀ , престо́лꙋ бл҃же́нне пред̾стои́ши . =боⷢ҇ . Воплоще́нно сло́во пре́жде беспло́тно сꙋ́що дв҃о мт҃и породила̀ є҆сѝ . сегѡ̀ ра́ди тѧ̀ вои́стинꙋ бцⷣꙋ , всѝ бл҃гоче́стнѡ сла́вимъ , ст҃о́е тебѣ̀ нарица́нїе приносѧ́ще чⷭ҇таѧ . ты́ бо вѣ́рнымъ спасе́нїю ко́рень бы́сть .

свѣти́ленъ . Тече́нїе кра́снꙋю твоею̀ но́гꙋ фили́ппе воз̾врати́въ к̾ ше́ствїю нбⷭ҇номꙋ взы́де ра́дꙋѧсѧ . и҆ трⷪ҇цѣ пред̾ста́въ , въ ѻ҆ц҃ѣ ви́дѣ сн҃а и҆ дх҃ъ бжⷭ҇твеныи . сегѡ̀ ра́ди вѣ́рою пресщ҃е́ннꙋю тѝ и҆ бжⷭ҇твенꙋю пра́зднꙋемъ па́мѧть . сла́ва , и҆ ны́нѣ , боⷢ҇ . Стра́шнагѡ и҆спыта́нїѧ воспомина́ю ча́съ , мно́жество бо дѣ́лъ мои́хъ оу҆жаса́етъ и҆ оу҆страша́етъ мѧ̀ . но оу҆ще́дри пречⷭ҇таѧ те́плою сѝ мл҃твою , и҆ да́ждь ми спасе́нїе , є҆ли́ка бо хо́щеши , мо́жеши .

На хвали́тѣхъ , стихѣ́ры . гла́съ , и҃ . поⷣ . ѽ =пресла́вное чꙋ́до . ѽ пресла́вное чꙋ́до ,꙳ и҆́же ры́бы дре́вле ловѧ́и а҆пⷭ҇лъ ,꙳ чл҃кѡмъ лове́цъ бы́сть ,꙳ бг҃омъ поста́вленъ ,꙳ слове́сною мре́жею ꙗ҆зы́ки оу҆ловѝ ,꙳ крⷭ҇тною оу҆́дицею ми́ра и҆з̾влечѐ .꙳ ѽ каковꙋ̀ лови́твꙋ бг҃ови принесѐ ,꙳ бжⷭ҇твенымъ поспѣше́нїемъ .꙳ є҆мꙋ́же па́мѧть пра́зднꙋемъ . =ѽ =пресла́вное чꙋ́до ,꙳ бг҃омъ по́сланъ посредѣ̀ во́лкъ ,꙳ ꙗ҆́кѡ ѻ҆вча̀ бе́з̾страха ꙳ прохожда́ше , а҆пⷭ҇лъ фили́ппъ ,꙳ ѕвѣ́рѧ а҆́гньца вѣ́рою ꙗ҆вѝ , ми́ра бжⷭ҇твенѡ претворѝ .꙳ ѽ дѣ́ла вѣ́ры , ѽ си́лы неи҆зрече́нны .꙳ є҆го́же мл҃твами хрⷭ҇тѐ ,꙳ спасѝ дш҃а на́ша ꙗ҆́кѡ милосе́рдъ . =ѽ =пресла́вномꙋ чꙋдесѝ ,꙳ кла́дѧзь и҆сточа́ѧи жи́знь ,꙳ премꙋ́дростнымъ черпа́нїемъ ,꙳ сꙋ́щимъ в̾ ми́рѣ бы́сть ,꙳ а҆пⷭ҇лъ фили́ппъ .꙳ ѿ него́же стрꙋѝ бг҃осло́вїѧ и҆схо́дѧтъ ,꙳ ѿ ни́хже чꙋде́съ бы́стрины пїе́мъ .꙳ ѽ коли́ка содѣ́ѧ бг҃отвори́выи ,꙳ є҆мꙋ́же па́мѧть вѣ́рою сла́вимъ . =гла́съ , в҃ . Нбⷭ҇наѧ ча́ша ꙗ҆ви́сѧ премꙋ́дрости , дх҃а бо показа́сѧ ѻ҆би́тель кра́снаѧ , и҆ и҆з̾речѐ добродѣ́тели и҆́стины . земны́ѧ оу҆ло́вль , оу҆́мною оу҆́дицею , премꙋ́дрости бж҃їѧ . тѣ́мъ мо́лимъ тѧ̀ а҆пⷭ҇ле фили́ппе , моли́сѧ ѡ҆ дш҃а́хъ на́шихъ . сла́ва . гла́съ , г҃ . Ры́бамъ ловле́нїе , въ чл҃чꙋ лови́твꙋ преложѝ . и҆́же во глꙋбинѣ̀ пре́лести , не́водомъ воз̾влечѐ та́йнымъ фили́ппе а҆пⷭ҇ле . ве́сь ми́ръ оу҆лови́лъ є҆сѝ , и҆ оу҆чи́телю своемꙋ̀ хрⷭ҇тꙋ̀ приве́лъ є҆сѝ . тѣ́мъ мо́лимъ тѧ̀ , моли́сѧ є҆мꙋ̀ непреста́ннѡ , спастѝ дш҃а на́ша , и҆́же вѣ́рою притека́ющихъ покро́вꙋ твоемꙋ̀ . и҆ ны́нѣ , боⷢ҇ . и҆лѝ , крⷭ҇тобоⷢ҇ . Ѻ҆рꙋ́жїе срⷣце твоѐ про́йде пречⷭ҇таѧ , є҆гда̀ сн҃а своегѡ̀ на крⷭ҇тѣ̀ ви́дѣ , и҆ вопїѧ́ше , не без̾ча́днꙋ мѧ̀ ꙗ҆вѝ , сн҃е и҆ бж҃е мо́й , сохрани́выи мѧ̀ по ржⷭ҇твѣ̀ дв҃ою .

На стихо́внѣ , во ѻ҆кта́и . сла́ва . гла́съ , в҃ . Ча́ша а҆рама́тъ в̾ ми́рѣ лани́ты твоѧ̀ мꙋ́дре ꙗ҆ви́шасѧ , а҆пⷭ҇ле фили́ппе , че́рпающи вѣ́рнымъ пи́во животво́рное . дѣ́йство видѣ́нїѧ восхожде́нїе и҆мы́и , хрⷭ҇тꙋ̀ поспѣ́шникъ преимени́тъ . непло́днꙋю и҆ без̾ча́днꙋю ꙗ҆зы́кѡмъ цр҃квь оу҆краси́лъ є҆сѝ поꙋче́ньми , бл҃гоча́дствꙋющꙋ ѡ҆ не́мъ . є҆́й же , молѝ и҆зба́витисѧ нꙋ́жды и҆ ѡ҆бстоѧ́нїи . мо́жеши бо ѡ҆́ бз҃ѣ , мно́го приближа́ѧсѧ є҆мꙋ̀ . и҆ ны́нѣ , боⷢ҇ . и҆лѝ , крⷭ҇тобоⷢ҇ . поⷣ . є҆гда̀ ѿ́ древа . На́ древѣ тѧ крⷭ҇тнѣмъ і҆с҃е , ра́спѧта зрѧ́щи неи҆скꙋсобра́чнаѧ пла́чꙋщи глаго́лаше , ча́до сла́дкое , вскꙋ́ю ѡ҆ста́ви менѐ ро́ждьшꙋю тѧ є҆ди́нꙋ , свѣ́те неприкоснове́нныи пребезнача́льнагѡ ѻ҆ц҃а . потщи́сѧ оу҆́бѡ и҆ просла́висѧ , ꙗ҆́кѡ да сла́вꙋ полꙋча́тъ бжⷭ҇твенꙋю , и҆́же твоѧ̀ стрⷭ҇ти бжⷭ҇твеныѧ сла́вѧщїи .

На литꙋргі́и , бл҃же́нна , а҆пⷭ҇лꙋ . пѣ́снь г҃ ѧ , и҆ ѕ҃ ѧ .

проки́менъ , ѱл҃о́мъ дв҃довъ . во всю̀ зе́млю и҆зыдо́ша вѣща́нїе и҆́хъ , и҆ в̾ концы̀ вселе́нныѧ гл҃ы и҆́хъ . сти́хъ . нб҃са̀ повѣ́даютъ сла́вꙋ бж҃їю , творе́нїе же рꙋ́кꙋ є҆гѡ̀ возвѣща́етъ тве́рдь . а҆пⷭ҇лъ , к̾ =кори́нфѡмъ . зача́ло , рл҃а . а҆ллилꙋ́їѧ . и҆сповѣ́дѧтъ нб҃са̀ чꙋдеса̀ твоѧ̀ гдⷭ҇и , и҆́бо и҆́стинꙋ твою̀ в̾ цр҃кви ст҃ы́хъ . =сти́хъ . бг҃ъ прославлѧ́емь в̾ совѣ́техъ ст҃ы́хъ . є҆ѵⷢ҇а́лїе , ѿ =і҆ѡа́нна . заⷱ҇ , є҃ . =прича́стенъ . во всю̀ зе́млю и҆зыдо́ша вѣща́нїе и҆́хъ , и҆ в̾ концы̀ вселе́нныѧ гл҃ы и҆́хъ .

Въ то́й же де́нь , слꙋ́жба и҆́же во ст҃ы́хъ ѻ҆ц҃а на́шегѡ григо́рїѧ а҆рхїєпкⷭ҇па солꙋ́нскагѡ чꙋдотво́рца . =Ве́черъ , пое́мъ , бл҃же́нъ мꙋ́жь , а҃ , а҆нтифо́нъ . На гдⷭ҇и возва́хъ , стихѣ́ры , на и҃ . гла́съ , є҃ . Прпⷣбне ѻ҆́ч҃е сщ҃е́нне григо́рїе , ѿ ко́рене прозѧбѐ бг҃олюби́ва и҆ свѣ́тла вѣ́твь , ꙗ҆́коже дре́во оу҆зрѣ́сѧ при и҆схо́дищихъ бжⷭ҇твеныхъ во́дъ до́брѣ насажде́но . и҆сточа́ѧ пре́жде вре́мене плоды̀ без̾сме́ртїѧ . оу҆дивлѧ́ѧ всѧ́къ слꙋ́хъ є҆стество́мъ и҆ сло́вомъ , и҆ дѣѧ́нїи бжⷭ҇твеными . виті́и в̾ виті́ѧхъ , и҆ премꙋ́дръ в̾ любомꙋ́дрыхъ дѣѧ́нїи . сосꙋ́дъ держа́внагѡ бг҃овидѣ́нїѧ . хрⷭ҇то́ви молѧ́сѧ , хрⷭ҇та̀ жада́ѧ по всегда̀ , и҆ превосходѧ̀ ѿ бжⷭ҇твеныѧ сла́вы в̾ сла́вꙋ , и҆ ѿ си́лы в̾ си́лꙋ , вои́стинꙋ нетлѣ́ннꙋю . =вⷤ . Прпⷣбне ѻ҆́ч҃е , досточꙋ́дне григо́рїе , сла́вꙋ ѡ҆ста́вль вре́меннꙋю и҆ ни́зꙋ влекꙋ́щꙋю , нетлѣ́ннаѧ воз̾люби́въ и҆ го́рнѧѧ . бога́тства мимотекꙋ́щагѡ мꙋ́дре ѿстꙋпѝ , бога́тство пребы́тное нищетꙋ̀ вмѣни́въ . дш҃е́вное твоѐ ѻ҆́ко ѡ҆чи́стивъ воз̾держа́нїемъ и҆ слеза́ми , и҆ мно́гимъ пла́чемъ . ѿ ню́дꙋ же сосꙋ́дъ дх҃а свѣ́телъ ꙗ҆ви́сѧ , ве́сь бл҃года́ти тогѡ̀ и҆спо́лнь . тогѡ̀ сїѧ́нїѧ , и҆ тогѡ̀ сла́вы просѝ , дарова́ти є҆ди́номꙋ бг҃ꙋ покланѧ́ющимсѧ трⷪ҇цѣ всеси́льнѣй . Прпⷣбне ѻ҆́ч҃е , сщ҃е́ннѣйши григо́рїе , ме́чь оу҆́бѡ сло́ва ѡ҆бостри́въ дх҃омъ , ѻ҆́гнь чи́номъ бы́лъ є҆сѝ . богобо́рныхъ , ꙗ҆́коже с̾ высоты̀ мо́лнїѧ сходѧ̀ ѿсѣка́ѧ , и҆ попалѧ́ѧ тѣ́хъ ꙗ҆зыкобо́лїѧ . вѣ́рныхъ же всѣ́хъ наставлѧ́ѧ , к̾ бжⷭ҇твенѣй зарѝ трисл҃нчнѣй . є҆ю́же просвѣща́емъ , свѣ́тъ вторы́и ꙗ҆ви́лсѧ є҆сѝ . сопресто́ленъ , и҆ є҆диночи́сленъ , верхо́внымъ бг҃осло́вцемъ . съ ни́ми хвали́мъ , съ ни́ми пребыва́ѧ . и҆ ны́нѣ молѝ дарова́ти цр҃кви є҆ди́нство , ми́ръ и҆ ве́лїю ми́лость .

и҆́ны , стихѣ́ры . гла́съ , д҃ . поⷣ . ꙗ҆́кѡ до́блѧ .= Свѣти́льникъ не оу҆гаса́емыи ,꙳ сїѧ́нїе не оу҆сыпа́ющее ,꙳ и҆́же в̾ мо́ри пла́вающимъ ,꙳ спаси́тельное и҆ ти́хое приста́нище ,꙳ и҆ без̾мѧте́жное бл҃года́ти ,꙳ сше́дшесѧ въ пѣ́снехъ ,꙳ досто́йнѣ пое́мъ тѧ̀ молѧ́щесѧ .꙳ оу҆́мныѧ бꙋ́ри и҆зба́ви цр҃квь твои́ми мл҃твами ,꙳ ѡ҆ не́й же мꙋ́жески под̾виза́ѧсѧ . =вⷤ . Гла́са тѧ сло́вꙋ ,꙳ дыха́нїе дх҃о́вное ,꙳ ѻ҆́гненыи ꙗ҆зы́къ ꙳ не оу҆гаса́емыи бг҃осло́вїѧ григо́рїе ,꙳ собра́нїе скве́рненое є҆рети́ческое ,꙳ свѣ́тлѡ попали́ша бл҃года́тїю ,꙳ мо́лимъ сопроти́вныхъ ꙳ велѣ́нїи настоѧ́нїѧ ,꙳ и҆зба́витисѧ мл҃твами тѝ ,꙳ правосла́внѡ воспѣва́ющимъ тѧ̀ .= В=ъ трꙋдѣ́хъ пе́рвїе ,꙳ и҆ без̾мо́лвїе просїѧ́вша ,꙳ и҆ писа́нїе не оу҆до́бь вѣ́домое ,꙳ и҆ глꙋбо́кое съ дх҃омъ воз̾гремѣ́вша ,꙳ хрⷭ҇то́съ свѣ́щника тѧ̀ воз̾лага́етъ свѣ́тла цр҃кви григо́рїе .꙳ ми́ръ всѧ́кїи ѡ҆свѣща́юща ,꙳ ѻ҆́ч҃е твои́ми мл҃твами и҆ словесы̀ ,꙳ и҆ чꙋде́съ си́лою .꙳ и҆ не оу҆тверже́ныхъ оу҆твержа́ѧ .

сла́ва . гла́съ , д҃ . Премꙋ́дрости сло́во своѐ оу҆краси́въ , и҆ добродѣ́телїю непоро́чною . преꙋдобре́нъ во ѻ҆бои́хъ бы́лъ є҆сѝ григо́рїе . бг҃овѣща́ннымъ тѝ глаго́ломъ , оу҆краша́ѧ и҆ веселѧ̀ лю́ди разꙋ́мнѡ . трⷪ҇цѣ є҆ди́но бжⷭ҇тво̀ премꙋ́дре просте́ръ . тѣ́мже и҆ препросла́влеными оу҆че́нїи и҆ноплеме́нныѧ є҆́реси попра́въ . держа́вꙋ вѣ́ры в̾ концѣ́хъ воз̾дви́глъ є҆сѝ . хрⷭ҇то́ви пред̾стоѧ̀ с̾ невеще́ствеными слꙋжи́тели , и҆ дш҃а́мъ на́шимъ и҆спросѝ ми́ръ и҆ ве́лїю млⷭ҇ть .

и҆ ны́нѣ , боⷢ҇ . И҆́же тебѐ ра́ди бг҃оѻ҆ц҃ъ проро́къ давы́дъ , пѣ́сненно ѡ҆ тебѣ̀ провоз̾гласѝ , вели́чїѧ ти сотво́ршꙋ , пред̾ста̀ цр҃ца ѡ҆деснꙋ́ю тебѐ , тебе́ бо мт҃рь хода́тайцꙋ животꙋ̀ показа̀ , и҆́же без̾ ѻ҆ц҃а и҆з̾ тебѐ вочл҃читисѧ бл҃гои҆зво́ли бг҃ъ , да сво́й па́ки ѡ҆бнови́тъ ѻ҆́бразъ и҆стлѣ́в шїи страстьмѝ , и҆ заблꙋ́ждьшее волкохи́щное ѻ҆вча̀ ѡ҆брѣ́тъ , на ра́мо воспрїи́мъ , ко ѻ҆ц҃ꙋ принесѐ , и҆ къ своемꙋ̀ хотѣ́нїю , съ нбⷭ҇ными совокꙋпи́тъ си́лами . и҆ спасе́тъ бцⷣею ми́ръ хрⷭ҇то́съ , и҆мѣ́ѧи ве́лїю и҆ бога́тꙋю млⷭ҇ть .

та́же , вы́ходъ . проки́менъ , дню̀ .

Ѿ при́тчей , чте́нїе .

Па́мѧть пра́веднагѡ с̾ похвала́ми , и҆ блгⷭ҇ве́нїе гдⷭ҇не на главѣ̀ є҆гѡ̀ . бл҃же́нъ чл҃къ , и҆́же ѡ҆брѣ́те мꙋ́дрость , и҆ сме́ртенъ и҆́же оу҆вѣ́дѣ ра́зꙋмъ . лꙋ́чше бо сїю̀ кꙋпова́ти , не́жели зла́та и҆ сребра̀ сокро́вища . честнѣ́йши бо є҆́сть ка́менїѧ многоцѣ́нна , все́же чⷭ҇тно́е , недосто́йнѡ є҆́сть є҆́й . долгота́ бо дні́й , и҆ лѣ́та живота̀ , в̾ десни́цѣ є҆ѧ̀ , и҆ в̾ шꙋ́ицѣ є҆ѧ̀ бога́тство и҆ сла́ва . ѿ оу҆́стъ бо є҆ѧ̀ и҆схо́дитъ пра́вда , зако́нъ же и҆ млⷭ҇ть , на ꙗ҆зы́цѣ но́ситъ . послꙋ́шайте оу҆́бѡ менѐ , ѽ ча́да , честна́ѧ бо рекꙋ̀ , и҆ бл҃же́нъ чл҃къ , и҆́же пꙋтѝ моѧ̀ храни́тъ . и҆схо́ди бо моѝ , и҆схо́ди живота̀ , и҆ оу҆гото́ваетсѧ хотѣ́нїе ѿ́ гдⷭ҇а . сегѡ̀ ра́ди молю̀ ва́съ , и҆ пред̾лага́ю мо́й гла́съ сн҃ово́мъ чл҃ческимъ . ꙗ҆́кѡ а҆́зъ премꙋ́дрость всели́хъ , совѣ́тъ и҆ ра́зꙋмъ , и҆ смы́слъ а҆́зъ призва́хъ . мо́й совѣ́тъ и҆ оу҆тверже́нїе , мо́й ра́зꙋмъ , моѧ́ же крѣ́пость . а҆́зъ менѐ лю́бѧщїѧ люблю̀ , и҆ взыска́ющїи менѐ ѡ҆брѧ́щꙋтъ бл҃года́ть . разꙋмѣ́йте оу҆́бѡ неѕло́бивїи кова́рство , ненака́занїи же прилага́йте срⷣца̀ . послꙋ́шайте менѐ и҆ па́ки , честна́ѧ бо рекꙋ̀ , и҆ ѿве́рзꙋ ѿ оу҆сте́нъ мои́хъ пра́вдꙋ . ꙗ҆́кѡ и҆́стинѣ поꙋча́етсѧ горта́нь мо́й , ме́рзски же предо мно́ю оу҆стны̀ лжи́выхъ . с̾ пра́вдою всѝ гл҃ы оу҆́стъ мои́хъ , ни что́же в̾ ни́хъ стро́потно ни развращено̀ . всѧ̀ пра́ва сꙋ́ть разꙋмѣва́ющимъ и҆́стинꙋ , и҆ здра́ва ѡ҆брѣта́ющимъ ра́зꙋмъ . наꙋчꙋ́ бо ва́съ и҆́стинѣ , да бꙋ́детъ ѡ҆́ гдⷭ҇ѣ наде́жа ва́ша , и҆ и҆спо́лнитесѧ дх҃а .

Ѿ премꙋ́дрости соло́мони , чте́нїе .

=Ѿ =оу҆́стъ пра́веднагѡ и҆ска́плетъ премꙋ́дрость , оу҆стны́ же мꙋ́жь мꙋ́дрыхъ вѣ́дѧтъ дарова́нїѧ . оу҆ста̀ мꙋ́дрыхъ поꙋча́тсѧ премꙋ́дрости , пра́вда же и҆збавлѧ́етъ ѿ сме́рти . сконча́вшꙋжесѧ мꙋ́жꙋ пра́веднꙋ , неоу҆ма́литсѧ наде́жда . сн҃ъ бо пра́веденъ ражда́етсѧ в̾ живо́тъ , и҆ во бл҃ги́хъ свои́хъ , пло́дъ пра́ведныи ѡ҆бъе́млетъ . свѣ́тъ пра́веднымъ всегда̀ , и҆ ѿ́ гдⷭ҇а ѡ҆брѧ́щꙋтъ бл҃года́ть и҆ сла́вꙋ . ꙗ҆зы́къ мꙋ́дрыхъ до́браѧ вѣ́сть , и҆ в̾ срⷣцы и҆́хъ почі́етъ премꙋ́дрость . лю́битъ гдⷭ҇ь прпⷣбныѧ срⷣца̀ , прїѧ́тни же є҆мꙋ̀ всѝ непоро́чнїи в̾ пꙋ́ть . мꙋ́дрость гдⷭ҇нѧ , просвѣща́етъ лицѐ разꙋ́мнагѡ . варѧ́етъ бо жела́ющихъ ю҆̀ , пе́рвїе разꙋмѣ́тисѧ , и҆ оу҆до́бь оу҆́зритсѧ ѿ лю́бѧщимъ є҆ѧ̀ . оу҆́треневавыи к̾ не́й , не оу҆трꙋди́тсѧ , и҆ бдѧ̀ є҆ѧ̀ ра́ди , ско́рѡ беспеча́ли бꙋ́детъ . ꙗ҆́кѡ досто́йныѧ себѣ̀ та̀ ѡ҆б̾хо́дитъ и҆́щꙋщи . и҆ во стезѧ́хъ ꙗ҆влѧ́етсѧ и҆́мъ бл҃гопотре́бна . премꙋ́дрости не оу҆долѣ́етъ когда̀ ѕло́ба . си́хъ ра́ди и҆ рачи́тель бы́хъ добро́тѣ є҆ѧ̀ . и҆ возлюби́хъ сїю̀ и҆ в̾зыска́хъ ѿ ю҆́ности моеѧ̀ . и҆ по и҆ска́хъ невѣ́стꙋ в̾вестѝ себѣ̀ , ꙗ҆́кѡ всѣ́хъ влⷣка возлюбѝ ю҆̀ . оу҆чи́тельница бо є҆́сть бж҃їю ра́зꙋмꙋ , и҆ ѡ҆брѣта́тельница дѣ́ломъ є҆гѡ̀ . тоѧ̀ сꙋ́ть добрѝ нра́вы . цѣломꙋ́дрїю бо и҆ ра́зꙋмꙋ сїѧ̀ оу҆чи́тъ , пра́вдѣ же и҆ мꙋ́жествꙋ , и҆́хже потре́бнѣе ни что́же є҆́сть в̾ житїѝ чл҃кѡмъ . а҆́щели же и҆ мно́гомꙋ и҆мѣ́нїю хо́щетъ кто̀ , да вѣ́сть пе́рваѧ и҆ бꙋ́дꙋщаѧ раз̾смотри́ти . свѣ́сть и҆з̾ви́тїе слове́съ , и҆ рѣше́нїѧ гада́нїемъ . зна́менїѧ и҆ чꙋдеса̀ проразꙋмѣ́ти и҆з̾ бытїѧ̀ време́нъ и҆ лѣ́томъ , и҆ всѣ́мъ совѣ́тникъ є҆́сть бл҃гъ . ꙗ҆́кѡ без̾сме́ртїе є҆́сть в̾ не́й , и҆ бл҃гозва́нїе во ѡ҆бще́нїи слове́съ є҆ѧ̀ . сегѡ̀ ра́ди рѣ́хъ гдⷭ҇ви , и҆ помоли́хсѧ є҆мꙋ̀ , и҆ рѣ́хъ всѣ́мъ срⷣцемъ мои́мъ . Бж҃е ѻ҆ц҃ъ и҆ гдⷭ҇и млⷭ҇ти , сотвори́выи всѧ̀ сло́вомъ свои́мъ , и҆ мꙋ́дростїю свое́ю оу҆стро́ивыи чл҃ка , да владѣ́етъ надо всѣ́ми тобо́ю бы́вшими тварьмѝ , и҆ назира́етъ ми́ръ прпⷣбїемъ и҆ пра́вдою . да́ждь ми ѿ твои́хъ престо́лъ намѣ́стницꙋ премꙋ́дрость , и҆ не ѿлꙋчѝ менѐ ѿ ѻ҆́трокъ твои́хъ , ꙗ҆́кѡ а҆́зъ ра́бъ тво́й , и҆ сн҃ъ рабы̀ твоеѧ̀ . послѝ ю҆̀ ѿ ст҃а́гѡ жили́ща твоегѡ̀ , и҆ ѿ прⷭ҇то́ла сла́вы твоеѧ̀ , да прише́дши ко мнѣ̀ наꙋчи́тъ мѧ , что̀ оу҆го́дно є҆́сть пред̾ тобо́ю . и҆ наста́витъ мѧ в̾ ра́зꙋмъ , и҆ сохрани́тъ мѧ сла́вою свое́ю . помышле́нїѧ бо сме́ртныхъ всѝ оу҆жа́сни , и҆ затворе́на оу҆мышле́нїѧ и҆́хъ .

Ѿ премꙋ́дрости соло́мони , чте́нїе .

Похвалѧ́емꙋ пра́ведникꙋ , воз̾веселѧ́тсѧ лю́дїе . без̾сме́ртїе бо є҆́сть па́мѧть є҆гѡ̀ , ꙗ҆́кѡ ѿ́ гдⷭ҇а познава́етсѧ и҆ ѿ чл҃къ , и҆ оу҆го́дна гдⷭ҇ви дш҃а є҆гѡ̀ .= =возлюби́те оу҆́бѡ мꙋ́дрость , и҆ поживетѐ . восхощи́те є҆ѧ̀ , и҆ нака́зани бꙋ́дете . нача́ло бо є҆ѧ̀ любы̀ , и҆ соблюде́нїе зако́нꙋ . почти́те премꙋ́дрость , да во́ вѣки црⷭ҇твꙋете . возвѣщꙋ̀ ва́мъ , и҆ нескры́ю ѿ ва́съ та́инъ бж҃їихъ . ꙗ҆́кѡ то́й мꙋ́дрости наста́вникъ є҆́сть , и҆ мꙋ́дрыхъ и҆спра́витель , и҆ всѧ́кꙋ смы́слꙋ и҆ дѣ́лꙋ хитре́цъ , и҆ всѣ́мъ смы́сломъ наꙋчи́тъ мꙋ́дрость . є҆́сть бо в̾ не́й дх҃ъ разꙋ́менъ и҆ ст҃ъ , и҆ сїѧ́нїе свѣ́та присносꙋ́щнагѡ , и҆ ѻ҆́бразъ бл҃гости бж҃їѧ . та̀ и҆ дрꙋ́ги бж҃їѧ и҆ пррⷪ҇ки оу҆строѧ́етъ . бл҃голѣ́пнѣйши є҆́сть сл҃нца , и҆ па́че сотворе́нїѧ ѕвѣ́здъ свѣ́томъ сказа́ема ѡ҆брѣта́етсѧ пе́рвѣйши . та̀ оу҆гожда́ющимъ є҆́й ѿ болѣ́зней и҆збавлѧ́етъ , и҆ наста́витъ на стезѝ пра́вы , и҆ да́стъ и҆́мъ ра́зꙋмъ и҆мѣ́ти ст҃ы́хъ , и҆ сохрани́тъ ѧ҆̀ ѿ ловѧ́щихъ , по́двигъ крѣ́покъ пода́стъ и҆́мъ . да разꙋмѣ́ютъ всѝ ꙗ҆́кѡ си́льнѣйши є҆́сть всегѡ̀ бл҃гоче́стїе , и҆ непремо́жетъ ѕло́ба ни коли́же мꙋ́дрости , ни пре́йдетъ ѕлы́ѧ ѡ҆блича́ющи сꙋ́дъ . реко́ша же в̾ себѣ̀ помы́сливше непра́веднѡ , наси́льствꙋемъ пра́ведномꙋ , и҆ непощади́мъ преподо́бства є҆гѡ̀ , ни оу҆срами́мсѧ сѣди́нъ ста́рости многолѣ́тны , бꙋ́детъ бо на́мъ крѣ́пость зако́нꙋ . и҆ оу҆лови́мъ пра́веднаго , ꙗ҆́кѡ не оу҆го́денъ на́мъ є҆́сть , и҆ сопроти́витсѧ дѣло́мъ на́шимъ , и҆ поно́ситъ на́мъ ѿпаде́нїе зако́на , и҆ ѡ҆блича́етъ на́мъ согрѣше́нїѧ наказа́нїѧ на́шегѡ . возвѣща́етъ на́мъ ра́зꙋмъ и҆мѣ́ти бж҃їи , и҆ ѻ҆́трока гдⷭ҇нѧ себѐ и҆менꙋ́етъ , и҆ бы́сть на ѡ҆бличе́нїе помышле́нїемъ на́шимъ , и҆ тѧ́жекъ на́мъ є҆́сть . и҆ ви́димъ ꙗ҆́кѡ неподо́бнѡ и҆нѣ́мъ житїѐ є҆гѡ̀ , и҆ и҆змѣнены̀ стезѝ є҆гѡ̀ . въ порꙋга́нїе вмѣни́хомсѧ є҆мꙋ̀ , и҆ оу҆далѧ́етсѧ ѿ пꙋте́й на́шихъ ꙗ҆́кѡ ѿ нечисто́тъ , и҆ блажи́тъ послѣ́днѧѧ пра́ведныхъ . ви́димъ оу҆́бѡ а҆́ще словеса̀ є҆гѡ̀ и҆́стина сꙋ́ть , и҆ оу҆смо́тримъ сбытїѧ̀ є҆гѡ̀ . рꙋга́нїемъ и҆ мꙋ́кою и҆стѧ́жемъ є҆гѡ̀ . да разꙋмѣ́емъ кро́тость є҆гѡ̀ , и҆ и҆скꙋ́симъ без̾ѕло́бство є҆гѡ̀ , сме́ртїю без̾ѡ҆бра́зною ѡ҆сꙋ́димъ є҆гѡ̀ , бꙋ́детъ бо посѣще́нїе ѿ слове́съ є҆гѡ̀ . сїѧ̀ помы́слиша и҆ прельсти́шасѧ , ѡ҆слѣпи́ бо и҆́хъ ѕло́ба и҆́хъ , и҆ неразꙋмѣ́ша та́инъ бж҃їихъ . и҆ неразсꙋди́ша ꙗ҆́кѡ ты̀ є҆сѝ бг҃ъ є҆ди́нъ животꙋ̀ и҆мѣ́ѧи и҆ сме́рти вла́сть , и҆ спаса́ѧ во́ времѧ ско́рби , и҆ и҆збавлѧ́ѧи ѿ всѧ́кагѡ ѕла̀ , ще́дръ и҆ млⷭ҇тивъ даѧ̀ преподо́бнымъ свои́мъ бл҃года́ть , и҆ свое́ю мы́шцею го́рдымъ противлѧ́ѧсѧ .

На стихо́внѣ , стⷯры . гла́съ , є҃ . поⷣ . ра́дꙋйсѧ живоно́сныи .= Р=а́дꙋисѧ правосла́вїѧ свѣти́льниче . цр҃кви свѣ́тлое ѻ҆́ч҃е сл҃нце . похвала̀ и҆́ночествꙋющимъ , цр҃ко́вное пра́вило . и҆́же бл҃годѣѧ́нїѧ оу҆чи́тель и҆зрѧ́дныи ст҃лю григо́рїе . и҆́же премꙋ́дрости и҆ ра́зꙋма жили́ще . бли́жнимъ и҆ да́льнимъ ѻ҆рга́нъ дх҃о́вныи . пѣ́снивецъ ѡ҆дꙋшевле́нъ . оу҆ста̀ гдⷭ҇нѧ , и҆зводѧ̀ ѿ недосто́инства досто́йнаго . хрⷭ҇та̀ молѝ , низ̾посла́ти дш҃а́мъ на́шимъ , ми́ръ и҆ ве́лїю ми́лость .

сти́хъ : честна̀ пре́д̾ гдⷭ҇емъ ,꙳ сме́рть прпⷣбныхъ є҆гѡ̀ . Ра́дꙋисѧ высо́кїи оу҆́ме , зри́телю та́инства . дх҃а сосꙋ́дъ дарова́нїи , свѣтоно́сныи свѣ́щниче . блиста́нїе бжⷭ҇твенагѡ ѡ҆сїѧ́нїѧ , любвѝ держа́вное и҆ честно́е спребыва́нїе . кро́ткїи вои́стинꙋ , и҆ про́стъ оу҆́бѡ и҆ неѕло́бивъ . ѿкрове́нїе и҆ писа́нїи ꙗ҆вле́нїе . мо́ре разꙋмѣ́нїй бжⷭ҇твеныхъ григо́рїе . бе́здна бжⷭ҇твена сло́ва , оу҆че́нїѧ неи҆счерпа́ема . хрⷭ҇та̀ молѝ , низ̾посла́ти дш҃а́мъ на́шимъ , ми́ръ и҆ ве́лїю млⷭ҇ть .

сти́хъ : блаже́нъ мꙋ́жь боѧ́исѧ гдⷭ҇а ,꙳ въ за́поведѣхъ є҆гѡ̀ восхо́щетъ ѕѣлѡ̀ . Ра́дꙋисѧ бг҃осло́вїѧ глꙋбино̀ . правосла́вїѧ пра́вило пра́вое . трⷪ҇цѣ є҆ди́но є҆стество̀ воз̾вѣстѝ высоко̀ , во є҆ди́номъ хотѣ́нїи , и҆ дѣ́йствїи . про́стѡ бжⷭ҇тво̀ , всеси́льно и҆ несо́здано . посрами́выи же бл҃года́тїю дх҃о́вною ѿве́ргшихсѧ ѡ҆боже́нїѧ . оу҆ста̀ бг҃осло́вецъ ст҃лю григо́рїе . сла́во ѻ҆ц҃е́мъ бжⷭ҇твенымъ , и҆ с̾прича́стникъ и҆счи́сленъ . свѣти́льниче цр҃ко́вныи . да́рꙋѧи на́мъ мл҃твами тѝ ве́лїю млⷭ҇ть .

сла́ва . гла́съ , д҃ . Житїѐ бжⷭ҇твенѡ и҆спра́вль . видѣ́нїемъ дѣѧ́нїе оу҆ѧсни́лъ є҆сѝ бг҃оѧвле́нне григо́рїе . премꙋ́дрость бо воз̾люби́въ жела́нїемъ бжⷭ҇твенымъ , и҆зооу҆́стъ дх҃а бл҃года́ти ѡ҆богати́сѧ . ꙗ҆́кѡ со́тъ ме́двеныи , сла́дость твои́хъ слове́съ и҆ска́паѧ , при́снѡ весели́ши ра́зꙋмы бжⷭ҇твеными цр҃квь хрⷭ҇то́вꙋ . тѣ́мже на́ нб҃сѣхъ со ст҃ли водворѧ́ѧсѧ , ѡ҆ на́съ непреста́ннѡ моли́сѧ , ѡ҆ творѧ́щихъ па́мѧть твою̀ . и҆ ны́нѣ , боⷢ҇ . Пода́ждь оу҆тѣше́нїе , свои́мъ рабо́мъ всенепоро́чнаѧ , оу҆толѧ́ющи лю́таѧ на ны̀ ѡ҆б̾стоѧ́нїѧ , всѧ́кїѧ ско́рби на́съ и҆з̾мѣнѧ́ющи . тѧ́ бо є҆ди́нꙋ тве́рдо и҆ и҆звѣ́стно ѡ҆снова́нїе и҆́мамы , и҆ твоѐ застꙋпле́нїе стѧжа́хомъ , да непостыди́мсѧ влⷣчце , тебѐ призыва́юще . потщи́сѧ на моли́твꙋ тебѣ̀ вопїю́щихъ , ра́дꙋисѧ влⷣчце всѣ́мъ помо́щнице , ра́досте и҆ покро́ве дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , и҃ . Правосла́вїю наста́вниче , ст҃лемъ оу҆краше́нїе , бг҃осло́вцемъ побо́рниче непобѣди́мыи , григо́рїе чꙋдотво́рче , солꙋ́ню вели́каѧ похвала̀ , проповѣ́дниче бл҃года́ти , молѝ хрⷭ҇та̀ бг҃а спасти́сѧ дш҃а́мъ на́шимъ . сла́ва , и҆ ны́нѣ , боⷢ҇ . И҆́же на́съ ра́ди рожде́исѧ ѿ дв҃ы , и҆ распѧ́тїе претерпѣ́въ бл҃гі́и , и҆спрове́ргїи сме́ртїю сме́рть , и҆ воскрⷭ҇нїе ꙗ҆́вль ꙗ҆́кѡ бг҃ъ , непре́зри и҆́хже созда̀ рꙋко́ю свое́ю . ꙗ҆вѝ чл҃колю́бїе своѐ млⷭ҇тиве . прїимѝ ро́ждьшꙋю тѧ̀ бцⷣꙋ молѧ́щꙋсѧ за ны̀ , и҆ спасѝ сп҃се на́шъ лю́ди согрѣ́шшїѧ .

На оу҆́трени , на бг҃ъ гдⷭ҇ь , тропа́рь , ст҃лю , двⷤа . сла́ва , и҆ ны́нѣ , боⷢ҇ , воскрⷭ҇нъ . =По а҃ , стихоло́гїи , сѣда́ленъ . гла́съ , а҃ . Бжⷭ҇твенаго хрⷭ҇то́ва ст҃лѧ воспѣва́емъ , столпа̀ ѻ҆́гненаго . свѣ́тꙋ ѻ҆́блака , дх҃омъ пред̾ходѧ́ща , в̾ разꙋ́мнꙋю зе́млю ми́ра . в̾ митропо́лїи же ѡ҆ хрⷭ҇тѣ̀ перворо́дныхъ , вели́кагѡ григо́рїѧ . =двⷤа . сла́ва , и҆ ны́нѣ , боⷢ҇ . Всели́сѧ в̾ тѧ̀ бжⷭ҇тва̀ всѐ и҆сполне́нїе чⷭ҇таѧ , ꙗ҆́коже па́велъ пред̾речѐ . всѐ ѡ҆бг҃отворѝ тлѣ́нныхъ є҆стество̀ влⷣчце , ты́ же была̀ є҆сѝ нача́ло бл҃года́ти таковы́ѧ , и҆ спаси́тельное рꙋково́дство . и҆́же вѣ́рою и҆ любо́вїю чтꙋ́щихъ тѧ̀ .

По в҃ , стихоло́гїи , сѣда́ленъ . гла́съ , а҃ . И҆змы́въ до́брѣ , твои́хъ сле́зъ тече́ньми дх҃ъ , оу҆́мнѣ воспрїѧ́лъ є҆сѝ бжⷭ҇твеныѧ бл҃года́ти досточꙋ́дне . прича́стникъ бы́лъ є҆сѝ ѡ҆боже́нїѧ , є҆́же па́че є҆стества̀ сло́ва . є҆́же проповѣ́далъ є҆сѝ несо́здано всѣ́мъ и҆ є҆ди́но , бг҃омꙋ́дре григо́рїе . двⷤа . сла́ва , и҆ ны́нѣ , боⷢ҇ . Свѣ́та разꙋ́мнагѡ свѣтлѣ́йшїи сосꙋ́дъ , тмꙋ̀ моегѡ̀ разрѣшѝ срⷣца . страсте́й же тѧжча́йшее бре́мѧ молю́сѧ ѡ҆блегчѝ . наставлѧ́ющи мѧ̀ къ покаѧ́нїю стезѧ́мъ . и҆ бꙋ́дꙋщемꙋ сподоблѧ́ющи мѧ̀ свѣ́тꙋ , всебл҃же́ннаѧ влⷣчце .

По полїєлеѡ́сѣ , сѣда́ленъ . гла́съ , и҃ . Ѿстꙋ́пль текꙋ́щихъ ѻ҆́ч҃е премꙋ́дре григо́рїе црⷭ҇кихъ , и҆ дрꙋго́въ , и҆ сро́дникъ , стѧжа́лъ є҆сѝ пребыва́ющаѧ и҆ стоѧ́щаѧ бл҃же́нне . и҆ до́мъ ве́сь и҆ ро́дъ , приве́лъ є҆сѝ влⷣцѣ всѣ́хъ , честно́е всесожже́нїе . и҆́мже наставлѧ́емь , дш҃ꙋ ѡ҆ст҃и́лъ є҆сѝ , и҆ оу҆́мъ съ тѣ́ломъ бг҃ови григо́рїе . видѣ́нїемъ и҆ дѣѧ́нїемъ же молѧ́сѧ є҆мꙋ̀ прилѣ́жнѡ , согрѣше́нїемъ ѡ҆ставле́нїе дарова́ти , пра́зднꙋющимъ любо́вїю ст҃ꙋ́ю па́мѧть твою̀ . вⷤ . сла́ва , и҆ ны́нѣ , боⷢ҇ . Въ пло́ть твою̀ ѡ҆дѣ́ѧвсѧ ꙗ҆́кѡ бл҃гъ , зра́къ влⷣка ра́бїи ѡ҆божѝ влⷣчце , совокꙋпи́всѧ по соста́вꙋ . и҆ є҆стество̀ всѐ и҆спо́лнивъ дх҃омъ . ст҃ы́хъ собо́ры содѣ́лавъ бл҃года́тїю . ѿ ню́дꙋ же прїи́мъ винꙋ̀ неи҆з̾рече́нныхъ дѣ́лъ . и҆ пе́рвꙋю дх҃омъ и҆спо́лньшꙋюсѧ , пою́ще тѧ̀ ѿ дш҃и зове́мъ тѝ , ра́дꙋисѧ спасе́нїѧ нача́льнице . ра́дꙋисѧ согрѣше́нїемъ разрѣше́нїе , покланѧ́ющимсѧ вѣ́рою ржⷭ҇твꙋ̀ твоемꙋ̀ .

степе́нна , д҃ го гла́са . а҆нтиѳо́нъ , а҃ . проки́мен̾ , ѱл҃о́мъ дв҃довъ . честна̀ пре́д̾ гдⷭ҇емъ , сме́рть прпⷣбныхъ є҆гѡ̀ . сти́хъ . что̀ воз̾да́мъ гдⷭ҇ви ѡ҆ всѣ́хъ , и҆́хже воз̾да́стъ ми . всѧ́ко дыха́нїе . =є҆ѵⷢ҇а́лїе , ѿ =і҆ѡа́нна . зача́ло , л҃є . ѱало́мъ , н҃ .

сла́ва . моли́твъ ра́ди ст҃лѧ , млⷭ҇тиве ѡ҆чи́сти мно́жество согрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество согрѣше́нїи на́шихъ .

Поми́лꙋй мѧ бж҃е по вели́цѣй млⷭ҇ти твое́й по мно́гимъ щедро́тамъ твои́мъ , ѡ҆чи́сти без̾зако́нїѧ моѧ̀ , бж҃е сп҃се мо́й .

стихѣ́ра . гла́съ , ѕ҃ . Бл҃гоче́стїѧ и҆́стиннаго проповѣ́дника , и҆ цр҃кви пресвѣ́тлꙋю ѕвѣздꙋ̀ , пѣ́сньми похва́льными почте́мъ . солꙋ́ню свѣ́тлаго свѣти́льника , свѣ́тꙋ оу҆ченика̀ , и҆ дрꙋ́га хрⷭ҇то́ва . сѣ́ѧи сло́во бл҃гоче́стїѧ бжⷭ҇твено в̾ срⷣца̀ всѣ́хъ вѣ́рныхъ , всѣ́мъ ко спасе́нїю да́рꙋетъ , и҆ мо́литсѧ прилѣ́жнѡ гдⷭ҇ви , поми́ловатисѧ дш҃а́мъ на́шимъ .

кано́нъ , творе́нїе патрїа́рха филоѳѣ́ѧ . гла́съ , а҃ .

пѣ́снь , а҃ . і҆рмо́съ . Твоѧ̀ побѣди́тельнаѧ десни́ца , бг҃олѣ́пнѡ в̾ крѣ́пости просла́висѧ . та́ бо без̾сме́ртне всемогꙋ́щаѧ проти́вныѧ сотрѐ , і҆и҃льтѧнѡмъ пꙋ́ть глꙋбины̀ ѡ҆бно́вльши .

запѣ́в̾ : Ст҃лю хрⷭ҇то́въ григо́рїе , молѝ бг҃а ѡ҆ на́съ . Ты̀ даро́ванїй и҆сто́чникꙋ , и҆ премꙋ́дрости дх҃о́внѣй пресла́вне , оу҆ста̀ и҆ мы́сль приложи́въ , бл҃года́ти ꙗ҆ви́лсѧ є҆сѝ пꙋчи́на . ѿ неѧ́же ка́плю ѻ҆́ч҃е и҆ мнѣ̀ пода́ждь пою́щемꙋ тѧ̀ . Оу҆ста́въ и҆ пра́вило па́че є҆стества̀ , и҆́ноческомꙋ жи́тельствꙋ ты̀ бы́лъ є҆сѝ . оу҆ста̀ бг҃осло́вецъ же и҆ ст҃ль и҆ оу҆чи́тель бжⷭ҇твенаѧ . ѿ ню́дꙋ же с̾ше́дшесѧ вкꙋ́пѣ тебѣ̀ пѣ́нїе плетꙋ́тъ . И҆́нъ ꙗ҆ви́лсѧ є҆сѝ ѿ́чрева і҆єремі́ѧ вѣ́домъ , сотво́ршемꙋ ве́сь воз̾ло́женъ . ѡ҆сщ҃е́нъ бг҃оно́се ве́сь же . ѿ ню́дꙋ же твоѧ̀ оу҆ста̀ бж҃їѧ сло́ва воспрїѧ́ша . Престо́лꙋ пред̾стоѧ̀ бжⷭ҇твеномꙋ со а҆́нг҃лы , бг҃ови́дче григо́рїе . лꙋчꙋ̀ воспрїе́млѧ ны́нѣ ꙗ҆вле́ннѣ непристꙋ́пнꙋю . моли́сѧ , тмы̀ грѣхо́вныѧ на́мъ раз̾рѣши́тисѧ мо́лимсѧ . боⷢ҇ . Свѣ́тъ восїѧ́выи бг҃ороди́тельнице ѿ твоеѧ̀ оу҆тро́бы , ви́дѣти жела́ѧ григо́рїи . тебѐ моли́твеницꙋ , и҆ содѣ́телѧ пред̾ставлѧ́етъ . и҆ жела́емыѧ ѿ тебѐ полꙋчѝ бл҃года́ти . катава́сїѧ : Ѿве́рзꙋ оу҆ста̀ моѧ̀ .

пѣ́снь , г҃ . і҆рмо́съ . Є҆ди́не свѣ́дыи земны́хъ сꙋщество̀ немощно́е , и҆ млⷭ҇тивно внѐ ѡ҆болкі́исѧ , препоѧ́ши мѧ с̾вы́ше си́лою , воспѣва́ти ти ст҃ы́и , цр҃кви дш҃е́внаѧ , неи҆зрече́нныѧ сла́вы ти чл҃колю́бче . Оу҆ро́дство премꙋ́дре , мирскꙋ́ю мꙋ́дрость вмѣни́лъ є҆сѝ , крⷭ҇тное оу҆ро́дство воз̾люби́лъ є҆сѝ . и҆ сегѡ̀ на ра́мо прїи́мъ , показа́лъ є҆сѝ , ꙗ҆́коже па́велъ речѐ , є҆́же оу҆ро́дствомъ мирскі́ѧ мꙋ́дрости превше́дъ . Возлюби́лъ є҆сѝ ѻ҆́ч҃е ѿ дш҃и нищетꙋ̀ и҆ смире́нїе , и҆ хꙋ́дость , и҆ нестѧжа́тельство . чл҃къ бѣ́гаѧ ѿ ню́дꙋ же гони́мь є҆сѝ в̾ пꙋсты́ню . всегда̀ , в̾ воню̀ мѵ́ръ твои́хъ , хрⷭ҇то́ви зовѧ́ше , текꙋ̀ в̾ слѣ́дъ тебѐ . Оу҆мертви́лъ є҆сѝ премꙋ́дре ве́тхаго тлѣ́ющаго чл҃ка , воз̾держа́нїемъ всѧ́кимъ и҆ пла́чемъ . и҆сто́чники сле́зными дово́льнѣ ѡ҆мыва́ѧсѧ . житїе́мъ воспрїѧ́лъ є҆сѝ дре́внюю свою̀ добро́тꙋ ѡ҆ хрⷭ҇тѣ̀ , и҆ в̾ но́ваго ѡ҆дѣ́ѧвсѧ . Восхва́лимъ мно́жества и҆́нокъ смѣ́стныхъ же состоѧ́нїѧ , съ сщ҃е́нники всѣ́ми и҆ пита́тельницы , гла́сы кра́сными , и҆ словесы̀ бжⷭ҇твеными дне́сь , ѻ҆́бщаго оу҆чи́телѧ , и҆́же на́съ оу҆краси́вшаго , дѣ́лы же и҆ словесы̀ григо́рїѧ . боⷢ҇ . Ви́дѣвъ ю҆́же жела́ше зарю̀ дх҃о́внꙋю григо́рїе , пред̾ста́тельствомъ бг҃омт҃ре . ꙗ҆снѣ́йшее же ны́нѣ тою̀ ѡ҆свѣща́емь . тоѧ̀ молѝ , тмы̀ страсте́й на́съ премѣни́ти свѣ́томъ бл҃года́тнымъ . катава́сїѧ : Твоѧ̀ пѣвцы̀ .

сѣда́ленъ . гла́съ , и҃ . Воз̾держа́нїемъ и҆ пла́чемъ , и҆ моли́твою и҆ дѣ́йствомъ и҆ нището́ю , и҆ ѻ҆́бщимъ оу҆мове́нїемъ григо́рїе сле́знымъ ѡ҆чи́стилъ є҆сѝ своѐ срⷣце . ве́сь восхище́нъ бы́въ , и҆ хрⷭ҇то́ви совокꙋпи́сѧ дх҃омъ . ѿ ню́дꙋ же ꙗ҆́кѡ па́велъ неи҆з̾рече́нныхъ оу҆слы́шавъ , и҆ сосꙋ́дъ бы́въ и҆з̾бра́ненъ . ты̀ поне́слъ є҆сѝ хрⷭ҇то́во и҆́мѧ . несо́здано проповѣ́далъ є҆сѝ высо́цѣ , и҆ про́сто є҆ди́но бжⷭ҇тво̀ . є҆́же молѧ̀ непреста́й , спасти́сѧ ста́дꙋ твоемꙋ̀ . двⷤа . сла́ва , и҆ ны́нѣ , боⷢ҇ . И҆́же пре́жде ѿ несꙋ́щихъ приве́дъ , сꙋ́щихъ є҆стества̀ сло́ве бж҃їи , поче́тъ ѻ҆́бразомъ же и҆ рꙋко́ю чл҃ка , и҆стлѣ́вша тогѡ̀ пре́лестїю ѕмїи́ною , назда́въ па́ки крⷭ҇то́мъ чⷭ҇тны́мъ ти . всѧ́кое же є҆стество̀ ѡ҆ст҃и́лъ є҆сѝ ще́дре , ст҃ы́мъ твои́мъ дх҃омъ , и҆ тѣле́снымъ воспрїѧ́тїемъ . мт҃ре твоеѧ̀ мольба́ми влⷣко хрⷭ҇тѐ бж҃е , согрѣше́нїемъ ѡ҆ставле́нїе да́рꙋй , покланѧ́ющимсѧ вѣ́рою держа́вѣ твое́й .

пѣ́снь , д҃ . і҆рмо́съ . Го́рꙋ тѧ бл҃года́тїю бж҃їею присѣ́ннꙋ , прозорли́выма а҆вва́кꙋмъ оу҆смотри́въ ѻ҆чи́ма , и҆з̾ тебѐ и҆зы́ти і҆и҃леви , провоз̾глаша́ше ст҃а́гѡ , на спасе́нїе на́ше и҆҆ ѡ҆бновле́нїе . Но́щь без̾лꙋ́ннꙋю , и҆ тмꙋ̀ григо́рїе страсте́й , моли́твеною па́лицею ра́нивъ , ꙗ҆́коже мѡѷсе́й є҆гѵ́пта . восте́клъ є҆сѝ па́че є҆стества̀ к̾ видѣ́нїю бжⷭ҇твеномꙋ , и҆ законода́вецъ на́мъ бы́лъ є҆сѝ . На высотꙋ̀ воз̾ше́дъ бжⷭ҇твенꙋю , ѻ҆́ч҃е григо́рїе добродѣ́телей , ꙗ҆́коже на ѳавѡ́рѣ хрⷭ҇то́вы дрꙋ́зи и҆ оу҆ченицы̀ . ѻ҆́ногѡ оу҆зрѣ́лъ є҆сѝ є҆сте́ственꙋю и҆ бжⷭ҇твенꙋю сла́вꙋ ꙗ҆влѧ́юща , и҆ ѡ҆божи́всѧ , дрꙋго́е показа́сѧ сл҃нце . Таи́нникъ бжⷭ҇тва̀ бг҃ови́дче григо́рїе , и҆ неи҆з̾рече́нныхъ прича́стникъ ты̀ бы́въ , бг҃осло́вити тогѡ̀ та́йнꙋ . є҆ди́но тоѧ̀ воз̾вѣсти́въ , и҆ несо́здано си́лою и҆ є҆стество́мъ тремѝ соста́вы . боⷢ҇ . Сло́во ро́ждьшꙋю бж҃їе неи҆з̾рече́нное , словесы̀ воспѣ́лъ є҆сѝ сщ҃е́нными . и҆ та́йнꙋ свѣ́тлѡ бжⷭ҇твенагѡ воплоще́нїѧ воз̾вѣсти́лъ є҆сѝ . ю҆́же ны́нѣ молѝ , цр҃квь соблюда́ти неѡ҆бꙋрева́емꙋ .

катава́сїѧ : Сѣдѧ́и во сла́вѣ .

пѣ́снь , є҃ . і҆рмо́съ . Просвѣще́й сїѧ́нїемъ прише́ствїѧ твоегѡ̀ хрⷭ҇тѐ , и҆҆ ѡ҆свѣще́и крⷭ҇то́мъ си мирскі́ѧ концы̀ , срⷣца̀ просвѣтѝ свѣ́томъ твоегѡ̀ бг҃оразꙋ́мїѧ , правовѣ́рнѡ хва́лѧщимъ тѧ . Оу҆́мъ вели́кїи , премꙋ́дрости глꙋбина̀ неи҆з̾рече́ннаѧ , ѡ҆брѣ́те тво́й бг҃оно́се оу҆́мъ вселе́нїе , себѣ̀ содрꙋже́нъ . оу҆мꙋ̀ и҆ премꙋ́дрости ѻ҆рга́нъ тѧ̀ цр҃кви дарова́лъ є҆́сть . Ꙗ҆́кѡ лꙋчꙋ̀ свѣ́тлꙋю , пре́жде на а҆ѳѡ́нъ григо́рїе восїѧ̀ , свѣ́тломꙋ тѧ̀ гра́дꙋ да́рꙋетъ . свѣ́томъ дх҃о́внымъ тогѡ̀ бг҃одви́жимь ѡ҆сщ҃а́ѧ , и҆ ѻ҆те́чески пред̾наставлѧ́ѧ . Да́ръ бжⷭ҇твеныи ѿ́ бг҃а тѧ̀ , и҆ бога́тство неи҆стощи́мое ѡ҆брѣ́тъ , фетта́льскаѧ держа́внаѧ митропо́лїѧ , созыва́етъ сосѣ́ды к̾ прича́стїю твои́хъ слове́съ , и҆ чꙋде́съ бл҃же́нне . Жела́ющїи по́двигъ и҆ слове́съ , бл҃года́тей григо́рїевыхъ , пѣ́снь томꙋ̀ ны́нѣ приносѧ́ще . тогѡ̀ помо́лимъ . є҆го́же мл҃твами зижди́телѧ и҆ влⷣкꙋ , млⷭ҇тива всѣ́мъ содѣ́лати . боⷢ҇ . Просвѣти́выи землѝ широтꙋ̀ , сл҃нца свѣ́тлостїю . свѣ́тъ сꙋ́щимъ ꙗ҆ви́сѧ во тмѣ̀ дв҃о невече́рнїи . є҆го́же молѝ , тмы̀ лю́тыѧ и҆ грѣхо́вныѧ на́съ и҆зба́вити влⷣчце .

катава́сїѧ : Оу҆диви́шасѧ всѧ́ческаѧ .

пѣ́снь , ѕ҃ . і҆рмо́съ . Оу҆тро́ба і҆ѡ́нꙋ младе́нца невредѝ , морскі́и ѕвѣ́рь , і҆а́кѡва прїѧ́тъ . въ дв҃цꙋ оу҆́бѡ все́льсѧ сло́во , и҆ пло́ть прїи́мъ , про́йде сохранѝ неи҆стлѣ́ннꙋ . и҆́же бо непострада̀ и҆стлѣ́нїѧ , ро́ждьшꙋю сохранѝ неврежде́ннꙋ . Пра́вило добродѣ́тели , ѡ҆боже́ное житїѐ твоѐ ви́дѣно бы́сть вѣ́рными , вои́стинꙋ григо́рїе , бл҃гоче́стїѧ же прави́тель , сло́во твоѐ и҆ велѣ́нїе . и҆́ми же своѐ ро́дное , и҆ пꙋсторо́дное раз̾сꙋжда́етсѧ , є҆ди́нагѡ бг҃а проповѣ́дающе всеси́льна , є҆ди́нагѡ и҆ несо́здана . Є҆ди́но бл҃гоче́стнѡ проповѣ́давъ бжⷭ҇тво̀ , вели́кїи на́мъ ꙗ҆ви́сѧ григо́рїе , соста́вми тремѝ є҆ди́но є҆стество̀ и҆ си́лꙋ . всѧ́чески тꙋ́ю про́стꙋ и҆ несо́зданꙋ всѣ́хъ посрами́лъ є҆сѝ держа́внѣ , блѧдосло́вѧщихъ со́здано бжⷭ҇тво̀ . Безꙋ́мнагѡ мꙋдрова́нїе ѡ҆блича́еши а҆кинди́на , ꙗ҆́кѡ и҆ пре́жде варлаа́ма го́рдагѡ . є҆́ллинскимъ бо прїѡ҆бщи́вшимсѧ сла́вамъ , сведо́ша бжⷭ҇тво̀ в̾ тва́рь . ѡ҆бесче́стивше ꙗ҆́коже жи́дове пе́рвїе , сн҃а бж҃їѧ досто́инство . Оу҆ста́вы приводѧ̀ велѣ́нїй григо́рїе , и҆ словеса̀ свѣ́тла . и҆́миже ѿве́рзлъ є҆сѝ мы́сль , честны́хъ бг҃осло́вецъ дх҃омъ . мл҃твами тѝ неподви́жимꙋ соблюдѝ , хрⷭ҇то́вꙋ и҆з̾бавлѧ́ющи цр҃квь ѿ всѧ́кїѧ є҆́реси . боⷢ҇ . Престо́лъ херꙋви́мскихъ , и҆ всѣ́хъ нбⷭ҇ныхъ си́лъ влⷣчце , и҆ всѧ́кагѡ вкꙋ́пѣ го́рнѧгѡ чи́на вы́шши ты̀ показа́сѧ . ꙗ҆́кѡ прⷭ҇то́лъ неи҆з̾рече́ненъ бы́вши бж҃їѧ соста́ва . є҆го́же ꙗ҆́кѡ сн҃а сѝ , млⷭ҇тива мѝ вѣ́рнѡ тѧ̀ пою́щꙋ содѣ́лай .

катава́сїѧ : Бжⷭ҇твеное сѐ и҆ всечестно́е .

конда́къ . гла́съ , и҃ . Премꙋ́дрости сщ҃е́нныи и҆ бжⷭ҇твеныи ѻ҆рга́нъ , бг҃осло́вїѧ свѣ́тлꙋю согла́снѡ трꙋбꙋ̀ , воспѣва́емъ тѧ̀ григо́рїе бг҃огл҃иве . но ꙗ҆́кѡ оу҆́мнѣ , пе́рвомꙋ оу҆мꙋ̀ ны́нѣ пред̾стоѧ̀ , к̾ томꙋ̀ оу҆́мъ на́шъ ѻ҆́ч҃е наста́ви . ꙗ҆́кѡ да зове́мъ тѝ , ра́дꙋйсѧ проповѣ́дниче бл҃года́ти . и҆́косъ . А҆́нг҃лъ ꙗ҆ви́лсѧ є҆сѝ на землѝ , неи҆з̾рече́нныхъ бжⷭ҇твенаѧ тлѣ́ннымъ воз̾вѣща́ѧ . и҆́бо беспло́тныхъ гласово́мъ , чл҃ческимъ же оу҆мо́мъ , и҆ тѣ́ломъ живы́и оу҆диви́лъ є҆сѝ , и҆ сотвори́лъ є҆сѝ зва́ти тѝ бг҃огл҃иве сїѧ̀ . ра́дꙋйсѧ є҆го́же ра́ди свѣ́тъ проповѣ́дасѧ , ра́дꙋйсѧ є҆го́же ра́ди тма̀ ѿгна́сѧ . ра́дꙋйсѧ несо́зданнагѡ бжⷭ҇тва̀ воз̾вѣсти́телю , ра́дꙋйсѧ со́зданнагѡ є҆стества̀ и҆ бꙋ́ѧгѡ вои́стинꙋ ѡ҆бличи́телю . ра́дꙋйсѧ высото̀ невосхо́днаѧ бж҃їе є҆стество̀ ре́къ , ра́дꙋйсѧ глꙋбино̀ неꙋдо́бь зри́тельнаѧ , дѣ́йство ре́къ . ра́дꙋйсѧ ꙗ҆́кѡ сла́вꙋ бж҃їю до́бре ре́клъ є҆сѝ . ра́дꙋйсѧ ꙗ҆́кѡ мꙋдрова́нїѧ ѕло́бныхъ ѿре́къ . ра́дꙋйсѧ свѣти́ло показа́выи сл҃нце , ра́дꙋйсѧ сосꙋ́де бжⷭ҇твенагѡ питїѧ̀ прїѧ́телище . ра́дꙋйсѧ и҆́мже и҆́стина сїѧ́етъ , ра́дꙋйсѧ и҆́мже помрачи́сѧ лжа̀ , ра́дꙋйсѧ проповѣ́дниче бл҃года́ти .

пѣ́снь , з҃ . і҆рмо́съ . Тебѐ мы́сленнꙋю бцⷣе пе́щь , раз̾смотрѧ́емъ вѣ́рнїи , ꙗ҆́коже бо ѻ҆́троки спасѐ трѝ превозноша́емыи , ми́ръ ѡ҆бнови́лъ є҆́сть , во́ чревѣ твое́мъ соверше́нъ , восхвалѧ́емыи ѻ҆ц҃е́мъ бг҃ъ и҆҆ препросла́вленъ . Ꙗ҆́коже гро́ма гла́съ твои́хъ велѣ́нїи , и҆ слове́съ бжⷭ҇твеныхъ мо́лнїе оу҆жа́сныхъ , зрѣ́ти ꙗ҆́вственѣ ѻ҆́ч҃е невозмога́ютъ , пре́лестїю плѣне́нїи . и҆ ѡ҆сѧза́ютъ ꙗ҆́коже пи́шетъ , ꙗ҆́кѡ слѣпы́и нн҃ѣ стѣ́ны смѣ́шнѣ безꙋ́мнїи . Но́щь не свѣтла̀ непокори́вымъ бы́сть , и҆ ны́нѣ свѣ́тъ є҆сте́ственыи црⷭ҇тво сла́вы бж҃їѧ . и҆́же ꙗ҆вѝ таи́нникѡмъ чл҃колю́бецъ , на горѣ̀ ѳаво́рстѣй григо́рїе , є҆ю́же причасти́всѧ дово́льнѣ , прїѡбща́ешисѧ оу҆годи́вшимъ . И҆́же нечести́вѣ въ бл҃года́ть пресла́вне похꙋ́лившимъ , бж҃їе безмо́лвїе и҆ моли́твꙋ , ѡ҆боже́нїю же не и҆зрече́нномꙋ , скве́рнѣ насмѣѧ́вшихсѧ , тѣ́хъ посрами́въ ѿгна́лъ є҆сѝ , бжⷭ҇твенагѡ двора̀ . є҆го́же соблюда́еши всегда̀ , твои́ми мольба́ми . боⷢ҇ . Прїидѝ ны́нѣ въ на́шꙋ по́мощь спасе́нїе ѻ҆́бщее , григо́рїевы мл҃твы прїе́млющи влⷣчце . стра́сти оу҆́бѡ оу҆сыпа́ющи дш҃е́вныѧ и҆ тѣле́сныѧ , и҆ ѻ҆́бщїи мѧте́жь , и҆ тлѣ́нїе вско́рѣ разрѣша́ющи . катава́сїѧ : Непослꙋжи́ша тва́ри .

пѣ́снь , и҃ . і҆рмо́съ . Впещѝ дѣ́ти і҆и҃левы , ꙗ҆́коже в̾ горни́лѣ добро́тою бл҃гоче́стїѧ , чистѣ́е зла́та блеща́хꙋсѧ гл҃юще , бл҃гослови́те всѧ̀ дѣ́ла гдⷭ҇нѧ гдⷭ҇а , по́йте и҆҆ превозноси́те є҆гѡ̀ во́ вѣки . Ꙗ҆ви́лсѧ є҆сѝ ѻ҆́ч҃е ве́сь свѣ́телъ , сла́достенъ , пра́въ , кро́токъ , вѣ́рою приходѧ́щимъ тѝ , и҆сточа́ѧ сла́дкое слове́съ григо́рїе бжⷭ҇твеное пи́во . всѣ́хъ веселѧ̀ бл҃гочести́выхъ срⷣца̀ , хаплѧ̀ недꙋ́гꙋющихъ дш҃е́вными чꙋ́вствы . Оу҆́мъ и҆ ꙗ҆зы́къ вои́стинꙋ бл҃горо́денъ , наказа́нїе же и҆ словеса̀ се́рдце ѡ҆чище́нѡ ѡ҆брѣ́тъ . бж҃їѧ в̾ тѧ̀ всели́сѧ премꙋ́дрость . є҆́й же дрꙋ́гъ дрꙋ́гꙋ сосвѧза́вшисѧ ѻ҆́ч҃е , чꙋ́до всѣ́мъ стра́нно показа́ тѧ ми́рови . Въ пещѝ дѣ́ти неврежде́ны є҆вре́йскїѧ , показа̀ держа́ва бл҃гоче́стїѧ . и҆́мже подо́бѧсѧ премꙋ́дре , пла́мень оу҆держа́лъ є҆сѝ ѕлоче́стїѧ , посредѝ пе́щи и҆скꙋше́нїй . и҆ до́блественѣ поѧ̀ влⷣкꙋ . и҆ ѡ҆палѧ́ѧ гонѧ́щихъ . Оу҆́мнагѡ погрꙋзи́лъ є҆сѝ фараѡ́на , тече́ньми твои́хъ сле́зъ . и҆ всѐ є҆ги́петское потопи́лъ є҆сѝ во́инство , воз̾ше́лъ є҆сѝ на́ горꙋ без̾стра́стїѧ . побива́ѧ ѿ тꙋ́дꙋ дх҃а си́лою полкѝ бори́тель , ꙗ҆́коже мѡѷсе́й вели́кїи . боⷢ҇ . Свѣ́тлыи бл҃года́ти чⷭ҇таѧ , проповѣ́дникъ , и҆ бг҃осло́вецъ , дх҃а бцⷣе да́ннагѡ тобо́ю ми́рови , ны́нѣ словесы̀ торжествꙋ́ѧ пѣ́нїе , пѣ́сни же и҆ ли́ки всѧ́ ти собира́етъ ꙗ҆́кѡ вѣ́рныи ра́бъ , па́мѧть твою̀ сла́вѧ . катава́сїѧ : Хва́лимъ бл҃гослови́мъ . Ѻ҆́троки бл҃гочести́выѧ .

пѣ́снь , ѳ҃ . і҆рмо́съ . Ѻ҆́бразъ чи́стагѡ ржⷭ҇тва̀ твоегѡ̀ , распала́емꙋ кꙋпинꙋ̀ , ꙗ҆вѝ неѡ҆пали́мꙋ . и҆҆ ны́нѣ на на́съ напа́стей свирѣ́пѣющꙋю оу҆гаси́ти мо́лимсѧ пе́щь , да тѧ̀ бцⷣе непреста́ннѡ велича́емъ . Прⷭ҇то́лꙋ пред̾стоѧ̀ григо́рїе , трисо́лнечнагѡ и҆ без̾нача́льнагѡ бжⷭ҇тва̀ . и҆ дѣ́йствомъ дово́льнѣ насы́тивсѧ бл҃года́тїю . ю҆́же воспѣ́лъ є҆сѝ , содѣ́йственикъ и҆ дрꙋго́въ , нн҃ѣ воспомѧнꙋ́вшихъ тѧ̀ помина́й . Ѡ҆брѣ́лъ є҆сѝ возда́нїе болѣ́зней твои́хъ , црⷭ҇тво ѻ҆́ч҃е бж҃їе безнача́льное . є҆́же бл҃гоче́стнѣ на землѝ воспроповѣ́далъ є҆сѝ , вѣнцы̀ триплете́ны воспрїѧ́лъ є҆сѝ , и҆сповѣ́данїѧ бжⷭ҇твенагѡ , сщ҃е́нства же и҆ безмо́лвїѧ . Ꙗ҆ви́лсѧ є҆сѝ и҆́ночествꙋющимъ похвала̀ , бг҃осло́вецъ бжⷭ҇твенъ . сщ҃е́нства же пра́вило и҆звѣ́стное . сегѡ̀ ра́ди здѣ̀ да́стътисѧ чꙋдесе́мъ бжⷭ҇твенаѧ бл҃года́ть , словеса̀ твоѧ̀ оу҆твержа́ѧ . Зако́нъ похва́льныхъ пресла́вне , и҆ слове́сныхъ по́двигъ вои́стинꙋ и҆сше́дъ , и҆ на землѝ живы́и и҆ и҆сше́дъ ѿ́ тѣла . но прїимѝ ма́лое пѣ́нїе и҆зрѧ́днѣйши , и҆ проше́нїѧ подава́й , тебѐ жела́ющихъ мл҃твами сѝ . боⷢ҇ . Оу҆ста̀ стра́шнагѡ ржⷭ҇тва̀ твоегѡ̀ , и҆ бг҃ослове́сныи ꙗ҆зы́къ влⷣчце бы́сть , є҆́же па́че є҆стества̀ ѿ тебѐ ꙗ҆́вльшагосѧ ѡ҆боже́нїѧ , честны́и тво́й ра́бъ григо́рїй . є҆го́же ны́нѣ мольбы̀ прїе́млющи , спасѝ всѣ́хъ .

катава́сїѧ : Всѧ́къ зе́менъ .= Досто́йнѡ є҆́сть . свѣти́ленъ . Ра́дꙋисѧ ѻ҆ц҃е́мъ похвала̀ , бг҃осло́вецъ оу҆ста̀ , безмо́лвїѧ жили́ще . до́мъ премꙋ́дрости , оу҆чи́телей держа́ва . бе́здна сло́ва . ра́дꙋисѧ дѣѧ́нїѧ ѻ҆рга́нъ , видѣ́нїѧ ве́рхъ , цѣли́телю страсте́й и҆ болѣ́знемъ чл҃ческимъ . ра́дꙋисѧ дх҃а ст҃а́гѡ селе́нїе , и҆ оу҆́меръ и҆ жи́въ ѻ҆́ч҃е . =два́жды . сла́ва , и҆ ны́нѣ , боⷢ҇ . Ра́дꙋисѧ ра́дости хода́таице . ра́дꙋисѧ клѧ́твѣ раз̾рѣше́нїе . ра́дꙋисѧ а҆да́мово воскрⷭ҇нїе . ра́дꙋисѧ паде́нїе бѣсово́мъ . ра́дꙋисѧ же́нскагѡ стꙋда̀ потребле́нїе . ра́дꙋисѧ а҆́дово и҆спражне́нїе , тлѧ̀ сме́рти . ѡ҆сщ҃е́нїе чл҃ческагѡ є҆стества̀ . ра́дꙋисѧ дв҃о , ра́дꙋисѧ всѣ́хъ влⷣчце . ра́дꙋисѧ бж҃їѧ мт҃и .

На хвали́тѣхъ , стихѣ́ры . гла́съ , и҃ . поⷣ . ѽ =пресла́вное чꙋ́до . Ѻ҆́ч҃е сщ҃е́нне григо́рїе ,꙳ ты̀ бг҃а и҆з̾дѣ́тска воз̾люби́въ .꙳ возненави́дѣлъ є҆сѝ ве́щное пристра́стїе ,꙳ и҆ ми́ра непостоѧ́тельное ,꙳ и҆ крⷭ҇тъ до́блественѣ воспрїи́мъ ,꙳ своемꙋ̀ влⷣцѣ послѣ́довалъ є҆сѝ .꙳ пла́чемъ и҆ слеза́ми ꙳ дш҃ꙋ ѡ҆чи́стивъ сѝ и҆ оу҆́мъ ,꙳ ве́сь бы́лъ є҆сѝ бг҃ови́днѣйшїи . =вⷤ . Ѻ҆́ч҃е сщ҃е́нне григо́рїе ,꙳ ты̀ срⷣце до́брѣ видѣ́нїемъ же ,꙳ и҆ дѣѧ́нїемъ ѡ҆чи́стивъ сѝ ,꙳ дх҃ови бы́лъ є҆сѝ селе́нїе .꙳ и҆ ѡ҆сїѧ́нїе тогѡ̀ прїе́млѧ ,꙳ свѣ́тъ ꙗ҆ви́лсѧ є҆сѝ вои́стинꙋ ꙳ приближа́ющимтисѧ .꙳ сѐ сн҃ъ свѣ́та бы́лъ є҆сѝ по бл҃года́ти сла́вне .꙳ є҆́же са́мъ є҆стество̀ бы́въ бж҃їе нераз̾дѣлѧ́ѧсѧ . Ѻ҆́ч҃е бг҃омꙋ́дре григо́рїе ,꙳ ты̀ ѕлѣ́йшее сѣ́мѧ и҆ ко́рень раскопа́лъ є҆сѝ .꙳ варлаа́ма скве́рнаго ѿсѣ́клъ є҆сѝ мече́мъ дх҃о́внымъ .꙳ преда́телѧ же а҆́бїе вѣ́рѣ ,꙳ и҆ стаи́нника семꙋ̀ сꙋемꙋ́дренаго а҆кинди́на ,꙳ бжⷭ҇твенагѡ и҆сполне́нїѧ є҆рети́чествꙋющихъ ѿгна́въ ,꙳ сочета́лъ є҆сѝ хꙋ́льникѡмъ є҆вре́ѡмъ ,꙳ поревнова́вша си́хъ безꙋ́мїю .

сла́ва . гла́съ , и҃ . Ѻ҆́ч҃е бг҃омꙋ́дре григо́рїе , дш҃ꙋ ѡ҆чи́стилъ є҆сѝ . оу҆мо́мъ свои́мъ и҆з̾бѣжа́въ ѿ нечи́стагѡ дїа́вола . вои́стинꙋ сла́венъ свои́мъ вели́чествомъ . дх҃ъ сво́й преда́лъ є҆сѝ хрⷭ҇тꙋ̀ бг҃ꙋ на́шемꙋ . и҆ ны́нѣ , боⷢ҇ . Влⷣчце прїимѝ моли́твꙋ ра́бъ свои́хъ , и҆ и҆зба́ви на́съ ѿ всѧ́кїѧ нꙋ́жды и҆ печа́ли . Славосло́вїе вели́кое , и҆ ѿпꙋ́стъ .

На литꙋргі́и , бл҃же́нна , на и҃ . ѿ кано́на , ст҃лю , пѣ́снь г҃ ѧ , и҆ ѕ҃ ѧ .

По вхо́дѣ , а҆́ще ли хра́мъ хрⷭ҇то́въ , и҆лѝ бцⷣы : тропа́рь хра́мꙋ , и҆ ст҃лю . сла́ва , конда́къ ст҃лю . и҆ ны́нѣ , хра́мꙋ .

По вхо́дѣ , а҆́ще хра́мъ ст҃ы́мъ : тропа́рь хра́мꙋ , и҆ ст҃лю . конда́къ хра́мꙋ . сла́ва , ст҃лю . и҆ ны́нѣ , конда́къ : застꙋ́пнице хрⷭ҇тїа́нѡмъ .

проки́менъ , ѱл҃о́мъ дв҃довъ . оу҆ста̀ моѧ̀ воз̾гл҃ютъ премꙋ́дрость , и҆ поꙋче́нїе срⷣца моегѡ̀ ра́зꙋмъ . сти́хъ . оу҆слы́шите сїѧ̀ всѝ ꙗ҆зы́цы , внꙋши́те всѝ живꙋ́щїи по вселе́ннѣй . а҆пⷭ҇лъ , къ є҆вре́ѡмъ . заⷱ҇ , ти҃і .= а҆ллилꙋ́їѧ . оу҆ста̀ пра́веднагѡ поꙋча́тсѧ премꙋ́дрости , и҆ ꙗ҆зы́къ є҆гѡ̀ воз̾гл҃етъ сꙋ́дъ . =є҆ѵⷢ҇а́лїе , ѿ =і҆ѡа́нна . заⷱ҇ , л҃ѕ . прича́стенъ . в=ъ па́мѧть вѣ́чнꙋю бꙋ́детъ пра́ведникъ .