15 ноября: свв. мчч. Гурия, Самона и Авива

МЦⷭ҇А ТОГО́ЖЕ ВЪ Є҃І ДН҃Ь

ст҃ы́хъ мч҃нкъ и҆ и҆сповѣ́дникъ : гꙋ́рїѧ , само́на , и҆ а҆ви́ва . Вѣ́домо же бꙋ́ди , ꙗ҆́кѡ а҆́ще бꙋ́детъ нача́ло поста̀ сегѡ̀ в̾ сꙋбо́тꙋ . в̾ пѧто́къ ве́черъ , на гдⷭ҇и возва́хъ стихѣ́ры , ст҃ы́мъ на ѕ҃ . А҆́ще ли в̾ нлⷣю , стихѣ́ры пре́жде во ѡ҆кта́и . и҆ ст҃ы́мъ , г҃ . сла́ва , ст҃ы́мъ . и҆ ны́нѣ , боⷢ҇ . На стихо́внѣ , во ѡ҆кта́и . сла́ва , ст҃ы́мъ . и҆ ны́нѣ , боⷢ҇ . Ве́черъ , и҆ на оу҆́трени , на бг҃ъ гдⷭ҇ь , тропа́рь , ст҃ы́мъ . сла́ва , и҆ ны́нѣ , боⷢ҇ . А҆ в̾ про́чїѧ днѝ , ѿ понедѣ́льника до пѧтка̀ , пое́мъ , а҆ллилꙋ́їѧ , по́чести ра́ди зача́ла ст҃а́гѡ поста̀ . На гдⷭ҇и возва́хъ , пое́мъ стⷯры , пре́жде ст҃ы́мъ , г҃ . и҆ бцⷣы , г҃ . сла́ва , и҆ нн҃ѣ , боⷢ҇ . и҆лѝ , крⷭ҇тобоⷢ҇ . вмѣ́стѡ , проки́мна , пое́мъ а҆ллилꙋ́їѧ , на́ гласъ , ѕ҃ . на стихо́внѣ , во ѻ҆кта́и . сла́ва , и҆ ны́нѣ , боⷢ҇ . и҆лѝ , крⷭ҇тобоⷢ҇ . На оу҆́трени , вмѣ́стѡ бг҃ъ гдⷭ҇ь , пое́мъ , а҆ллилꙋ́їѧ , и҆ трⷪ҇ченъ . а҆ по ѕ҃ пѣ́сни , мч҃нченъ .

Ве́черъ , на гдⷭ҇и возва́хъ , стихѣ́ры . гла́съ , д҃ . поⷣ . да́лъ є҆сѝ зна́менїе .= А҆ви́въ премꙋ́дрыи ,꙳ и҆ самѡ́нъ чꙋ́дныи ,꙳ и҆ гꙋ́рїи сла́вныи ,꙳ ѻ҆́бщїи соста́вльше вѣ́рнымъ ли́къ ,꙳ ра́достнѡ ны́нѣ сликоствꙋ́ютъ страстоте́рпцы ,꙳ и҆ свеселѧ́тсѧ .꙳ дш҃а́мъ бо мч҃нческимъ ,꙳ ѿ́ бг҃а сѐ дано̀ бы́сть ,꙳ здѣ̀ быва́ема зрѣ́ти разꙋ́мнѡ . Болѣ́зни претерпѣ́сте ,꙳ нестерпи́мыхъ мꙋ́къ ,꙳ и҆ до́блественнѡ пострада́вше ,꙳ трⷪ҇цѣ равночи́сленїи ,꙳ самѡ́не и҆ а҆ви́ве и҆ гꙋ́рїе бг҃омꙋ́дре ,꙳ вѣ́чнагѡ и҆ кра́снагѡ питѣ́етесѧ ны́нѣ наслажде́нїѧ .꙳ трꙋдо́мъ воздаѧ́нїѧ возмѣрѧ́ющꙋ ва́мъ хрⷭ҇тꙋ̀ .꙳ є҆го́же те́плѣ моли́те ,꙳ спасти́сѧ дш҃а́мъ на́шимъ . Къ приста́нищꙋ немꙋ́тномꙋ ,꙳ и҆ к̾ животꙋ̀ немѧте́жномꙋ ,꙳ и҆ завѣ́трїю ти́хомꙋ ,꙳ страстоте́рпцы свѣдѣ́тели приста́вше .꙳ навѣ́чнꙋющее без̾стра́стное пребыва́нїе ,꙳ до́льнѧгѡ и҆змѣни́вше .꙳ трꙋдо́въ воздаѧ́нїѧ и҆ болѣ́зней ,꙳ по́чести ѿ́ бг҃а прїѧ́сте ,꙳ досто́йнѡ бл҃же́ннїи . =стⷯры , бцⷣы , гла́съ , и҆ поⷣ , то́йже . Ѡ҆дожди́ ми влⷣчце ,꙳ твоеѧ̀ млⷭ҇ти бе́зднꙋ .꙳ и҆ ѡ҆па́льшеесѧ зно́емъ ,꙳ стрⷭ҇те́й срⷣце моѐ ,꙳ ꙗ҆́кѡ млⷭ҇тива напо́й ѻ҆трокови́це .꙳ и҆ оу҆миле́нїѧ ка́пли приноси́ти ,꙳ непреста́ннѡ сотворѝ молю́сѧ ,꙳ и҆́ми же оу҆тѣше́нїю сподо́блюсѧ чⷭ҇таѧ ,꙳ ꙗ҆́же полꙋчи́ти и҆́дꙋтъ ,꙳ и҆́же и҆́скренѡ пла́кавшїисѧ . Бѣсо́вскими коле́блема прило́ги ,꙳ и҆ в̾ ро́въ поги́бели рѣ́ема ,꙳ оу҆ще́дри влⷣчце ,꙳ и҆ оу҆крѣпи́ мѧ на ка́мени ,꙳ добродѣ́телей ,꙳ и҆ совѣ́ты враго́въ разорѝ .꙳ сподо́би же твори́ти повелѣ́нїѧ ,꙳ твоегѡ̀ сн҃а и҆ бг҃а на́шегѡ .꙳ ꙗ҆́кѡ да полꙋчꙋ̀ ѡ҆ставле́нїе ,꙳ въ дн҃ь сꙋда̀ . Скве́рнꙋ и҆з̾сꙋщѝ ,꙳ ѻ҆каѧ́ннагѡ срⷣца моегѡ̀ ,꙳ бцⷣе всепѣ́таѧ ,꙳ и҆ всѧ̀ оу҆ѧзвле́нїѧ и҆ гное́нїѧ ,꙳ ꙗ҆́же ѿ грѣха̀ ѡ҆чи́сти чⷭ҇таѧ ,꙳ и҆ оу҆ма̀ моегѡ̀ оу҆ста́ви поше́ствїе .꙳ ꙗ҆́кѡ да си́лꙋ твою̀ ,꙳ и҆ вели́кое застꙋпле́нїе ,꙳ велича́ю страстны́и ,꙳ и҆ неключи́мыи ра́бъ тво́й . сла́ва , и҆ ны́нѣ , боⷢ҇ . Лѣ́ность и҆ раз̾слабле́нїе ,꙳ дв҃о мт҃и всенепоро́чнаѧ ,꙳ дш҃и моеѧ̀ преложѝ в̾ здра́вїе и҆ си́лꙋ .꙳ стра́хомъ и҆ любо́вїю ,꙳ твори́ти же и҆ дѣ́ѧти ѡ҆правда́нїѧ хрⷭ҇то́ва ,꙳ ꙗ҆́кѡ да и҆збѣжꙋ̀ ѻ҆гнѧ̀ непостоѧ́ннагѡ .꙳ и҆ жре́бїи нбⷭ҇ныи ,꙳ и҆ живо́тъ непреходѧ́щїи ,꙳ тобо́ю воспрїимꙋ̀ веселѧ́сѧ всегда̀ . крⷭ҇тобоⷢ҇ . поⷣ . ꙗ҆́кѡ до́блѧ .= Р=аспина́ема ви́дѧщи ,꙳ и҆ ре́бра и҆скопава́ема ,꙳ копїе́мъ пречⷭ҇таѧ хрⷭ҇та̀ чл҃колю́бца ,꙳ пла́чꙋщи вопїѧ́ше ,꙳ что́ се сн҃е мо́й ;꙳ что́ ти без̾бл҃года́тнїи лю́дїе воз̾да́ша ,꙳ за є҆́же сотвори́лъ є҆сѝ до́браѧ и҆́мъ ;꙳ и҆ тщи́шисѧ без̾ча́дствовати мѧ ѿ тебѐ вселюбе́зныи .꙳ дивлѧ́юсѧ милосе́рде ,꙳ во́льномꙋ твоемꙋ̀ распѧ́тїю .

а҆́ще ли бг҃ъ гдⷭ҇ь , сла́ва . гла́съ , в҃ . Є҆де́съ весели́тсѧ , ꙗ҆́кѡ в̾ ра́цѣ ст҃ы́хъ ѡ҆богати́сѧ , гꙋ́рїѧ само́на и҆ а҆ви́ва . и҆ хрⷭ҇толю́бное ста́до созыва́ѧ вопїе́тъ , прїиди́те мч҃нколю́бцы просвѣти́тесѧ в̾ па́мѧти свѣ́тлѣй . прїиди́те оу҆́бѡ празднолю́бцы возвесели́тесѧ . прїиди́те и҆ ви́дите свѣти́ла нбⷭ҇наѧ на землѝ жи́тельствꙋющихъ . прїиди́те оу҆слы́шите каковꙋ̀ сме́рть го́рькꙋю , до́блїи и҆ хра́брїи подъѧ́ша , без̾коне́чнагѡ ра́ди живота̀ . тѣ́мже и҆з̾рꙋ́чницы сꙋ́ще и҆́стины , дв҃цꙋ спасо́ша жи́вꙋ во́ гробъ положенꙋ̀ . и҆ тѣ́хъ небре́гша всескве́рнаго па́гꙋбѣ преда́ша , всеꙋбі́ицꙋ неми́лостивна . и҆ прилѣ́жнѡ мо́лѧтъ ст҃ꙋ́ю трⷪ҇цꙋ , и҆зба́витисѧ ѿ тлѧ̀ и҆ и҆скꙋше́нїй , и҆ всѧ́ческихъ бѣ́дъ , и҆́же вѣ́рою творѧ́щимъ па́мѧть и҆́хъ . и҆ ны́нѣ , боⷢ҇ . и҆лѝ , крⷭ҇тобоⷢ҇ .

На стихо́внѣ , во ѻ҆кта́и . сла́ва . гла́съ , в҃ . Прїиди́те мч҃нколю́бцы всѝ , хрⷭ҇то́вы ѻ҆рꙋ́жники пѣ́сньми почте́мъ , гꙋ́рїѧ и҆ а҆ви́ва и҆ самѡ́на , ꙗ҆́кѡ пресла́внѡ дѣ́йствꙋютъ чꙋдеса̀ . клѧ́твы бо не презрѣ́ша пред̾ста́вити ѻ҆трокови́цꙋ , но и҆сполнѧ́юще проше́нїѧ , дв҃цꙋ спасо́ша . и҆ без̾зако́нномꙋ го́тфинꙋ мще́нїе сотвори́ша . тѣ́хъ мл҃твами хрⷭ҇тѐ бж҃е спасѝ на́съ , ꙗ҆́кѡ бл҃гъ и҆ чл҃колю́бецъ . и҆ ны́нѣ , боⷢ҇ . и҆лѝ , крⷭ҇тобоⷢ҇ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , є҃ . Чꙋдеса̀ ст҃ы́хъ мч҃нкъ стѣ́нꙋ неразори́мꙋ на́мъ дарова̀ хрⷭ҇тѐ бж҃е тѣ́хъ мл҃твами совѣ́ты ꙗ҆зы́кѡмъ разорѝ , и҆ црⷭ҇ствїѧ ски́петры оу҆твердѝ , ꙗ҆́кѡ є҆ди́нъ бл҃гъ и҆ чл҃колю́бецъ . сла́ва , и҆ ны́нѣ , боⷢ҇ . и҆лѝ , крⷭ҇тобоⷢ҇ .

На оу҆́трени . ѻ҆́ба кано́на , во ѻ҆кта́и . и҆ ст҃ы́мъ , на д҃ . и҆мы́и нача́ло глави́зны сѐ : трѝ кꙋ́пнѡ гл҃ющи воспѣва́ю . творе́нїе ѳеѡ́фаново . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стопа́ми дре́вле ше́ствовавъ і҆и҃ль , крⷭ҇тоѡбра́зно мѡѷсе́ѡвыма рꙋка́ма , а҆мали́ковꙋ си́лꙋ в̾ пꙋсты́ни побѣди́лъ є҆́сть .

запѣ́въ : Ст҃і́и мч҃нцы и҆ и҆сповѣ́дницы гꙋ́рїе , само́не и҆ а҆ви́ве , моли́те бг҃а ѡ҆ на́съ . Трⷪ҇цы є҆динонача́лїе ст҃і́и , и҆сповѣ́дающе вѣ́рнѡ , многонача́лїѧ непостоѧ́ннꙋю мглꙋ̀ , оу҆до́бь раз̾рꙋши́сте . восто́ка , многосвѣ́тлїи , ꙗ҆́кѡ ѕвѣ́зды восїѧ́вше . Трїѐ и҆сповѣ́дницы , бл҃года́тїю просвѣща́еми нача́льныѧ трⷪ҇цы ꙗ҆́вственѡ . ле́сть многобо́жнꙋю , терпѣли́вно противле́нїе ꙗ҆влѧ́юще , потреби́ша .= Ва́съ сыноположи́въ сла́внїи , любо́вїю є҆сте́ственыи сн҃ъ , ны́нѣ є҆мꙋ̀ наслѣ́дїю дае́мꙋ ꙗ҆́вѣ , ꙗ҆́кѡ млрⷭ҇дъ с̾ наслѣ́дники показа̀ , и҆ црⷭ҇твїю соприча́стники . =боⷢ҇ . Премꙋ́дрости вышемꙋ́дростныѧ , прїѧ́телище бы́сть пренепоро́чнаѧ . сво́й бо хра́мъ ѿ твои́хъ пречⷭ҇тыхъ крове́й чⷭ҇таѧ , созда́ти бл҃гои҆зво́ли , на спасе́нїе дш҃а́мъ на́шимъ .

пѣ́снь , г҃ . і҆рмо́съ . Весели́тсѧ ѡ҆ тебѣ̀ цр҃кви твоѧ̀ хрⷭ҇тѐ зовꙋ́щи , ты́ ми крѣ́пость гдⷭ҇и , и҆ прибѣ́жище и҆ оу҆тверже́нїе . Тѣ́ло ка́знемъ во́лею и҆ лю́тымъ ра́намъ , хрⷭ҇то́вы преда́ша и҆сповѣ́дницы и҆ оу҆го́дницы . И҆зба́витисѧ ѿ лю́тыхъ грѣхо́вныхъ по́мыслъ сла́внїи , ва́шꙋ па́мѧть вѣ́рою соверша́ющимъ оу҆моли́те . На́ древѣ терпѣли́внѡ ѡ҆бѣ́шени чⷭ҇тні́и свидѣ́тели , всече́стно невреди́мо и҆сповѣ́данїе соблюдо́ша . боⷢ҇ . Цѣле́нїи тѧ̀ и҆сто́чникъ въ твою̀ оу҆тро́бꙋ вше́дъ показа̀ , мт҃и бж҃їѧ пречⷭ҇таѧ . мою̀ оу҆́бѡ дш҃ꙋ и҆сцѣлѝ .

сѣда́ленъ . гла́съ , и҃ . Крⷭ҇то́мъ воѡ҆рꙋжи́вшесѧ хрⷭ҇то́вымъ , и҆ ѡ҆ не́мъ мꙋчи́телемъ всю̀ крѣ́пость мꙋ́жески низ̾ложи́сте , ꙗ҆́кѡ вѣ́ры побо́рницы . без̾бо́жїе всѐ и҆́дольское ѡ҆бличи́сте , и҆ трⷪ҇цѣ ст҃ѣ́й оу҆се́рднѡ присво́истесѧ . тѣ́мъ досто́йнѡ ѿ неѧ̀ вѣне́цъ побѣ́ды прїѧ́сте , ꙗ҆́кѡ зако́ннѡ пострада́вше , стрⷭ҇тоте́рпцы всехва́льнїи . моли́те хрⷭ҇та̀ бг҃а , грѣхо́въ ѡ҆ставле́нїе пода́ти , чтꙋ́щимъ любо́вїю ст҃ꙋ́ю па́мѧть ва́шꙋ . и҆́нъ , сѣда́ленъ . Хрⷭ҇то́ви порабо́тавше мч҃нчески , порабо́тисте ле́сть мꙋчи́тельскꙋ , непорабо́щенꙋ и҆мꙋ́ще дш҃ꙋ и҆ мꙋ́дрость . и҆́бо трⷪ҇чною вѣ́рою оу҆ѧзви́вшесѧ прехва́льнїи , многобо́жїѧ сла́вꙋ несла́внꙋю ѡ҆бличи́сте , тѣ́мъ ꙗ҆́кѡ ѕвѣ́зды свѣ́тлѡ в̾ ми́рѣ блиста́нїемъ сїѧ́ете чꙋде́съ бл҃же́ннїи , стрⷭ҇тоте́рпцы всехва́льнїи . моли́те хрⷭ҇та̀ бг҃а , грѣхо́въ ѡ҆ставле́нїе пода́ти , чтꙋ́щимъ любо́вїю ст҃ꙋ́ю па́мѧть ва́шꙋ . сла́ва , и҆ ны́нѣ , боⷢ҇ . Ꙗ҆́кѡ дв҃ꙋ є҆ди́нꙋ в̾ жена́хъ , тѧ̀ без̾ сѣ́мене ро́ждьшꙋю бг҃а пло́тїю , всѝ оу҆бл҃жа́емъ ро́ди чл҃честїи . ѻ҆́гнь бо всели́сѧ в̾ тѧ̀ бжⷭ҇твеныи , и҆ ꙗ҆́кѡ млⷣнца дои́ши зижди́телѧ и҆ гдⷭ҇а . тѣ́мже а҆́нг҃льскїи собо́ръ и҆ чл҃ческїи ро́дъ , без̾преста́ни сла́вимъ прест҃о́е ржⷭ҇тво̀ твоѐ . и҆ согла́снѡ вопїе́мъ ти , молѝ хрⷭ҇та̀ бг҃а , грѣхо́въ ѡ҆ставле́нїе дарова́ти , воспѣва́ющим̾ досто́йнѡ сла́вꙋ твою̀ . крⷭ҇тобоⷢ҇ . А҆́гньца и҆ па́стырѧ и҆ и҆зба́вителѧ , а҆́гница зрѧ́щи , на крⷭ҇тѣ̀ восклица́ше слезѧ́щи . ми́ръ оу҆́бѡ ра́дꙋетсѧ прїе́млѧ тобо́ю и҆збавле́нїе . оу҆тро́ба же моѧ̀ гори́тъ зрѧ́щи твоѐ распѧ́тїе , є҆́же терпи́ши за милосе́рдїе млⷭ҇ти долготерпѣли́ве гдⷭ҇и . млⷭ҇ти бе́здно , и҆ и҆сто́чниче неи҆счерпа́емыи , оу҆милосе́рдисѧ и҆ да́рꙋй грѣхо́въ ѡ҆ставле́нїе , вѣ́рою воспѣва́ющимъ твоѧ̀ бжⷭ҇твенаѧ страда́нїѧ .

пѣ́снь , д҃ . і҆рмо́съ . Воз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свое́мъ , досто́йнѡ взыва́ющи , сла́ва си́лѣ твое́й гдⷭ҇и . Трⷪ҇цѣ равночи́сленїи вѣне́чницы , трисїѧ́нною свѣще́ю , ны́нѣ соверша́ющихъ па́мѧть пресщ҃е́ннꙋю тѣ́хъ ѡ҆зарѧ́ютъ , всѣ́мъ и҆сцѣле́нїѧ подаю́ще . Съ говѣ́нїемъ притеце́мъ , свѣтоно́снѣй и҆ свѣтоза́рнѣй бг҃омꙋ́дрїи ра́цѣ мч҃нкъ . то́читъ бо и҆сцѣле́нїѧ вѣ́рою зовꙋ́щимъ , сла́ва си́лѣ твое́й гдⷭ҇и . И҆сповѣ́дающе бжⷭ҇твеное смотре́нїе , и҆ па́че оу҆ма̀ та́инство , бг҃осло́вными ꙗ҆зы́ки , всю̀ горды́ню мꙋчи́телей , бжⷭ҇твенїи премꙋ́дрїи , и҆сповѣ́дницы попра́ша . боⷢ҇ . Па́че оу҆ма̀ родила̀ є҆сѝ ѽ дв҃о , и҆ по ржⷭ҇твѣ̀ ꙗ҆ви́сѧ дв҃ьствꙋющи па́ки . тѣ́мъ немо́лчными гла́сы , ра́дꙋисѧ тебѣ̀ влⷣчце вѣ́рою несꙋмѣ́нною вопїе́мъ .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рою воспѣва́ющїѧ тѧ . Свѣ́тлостїю ꙗ҆́вѣ по́двигъ сїѧ́юще , посрами́ша мꙋчи́телѧ свирѣ́пыи нра́въ , вѣ́ры побо́рницы . Во всѧ̀ ꙗ҆́вствено вселе́нныѧ концы̀ , чꙋдеса̀ мч҃нкъ проповѣ́дашасѧ , и҆ всѣ́хъ вѣ́рою оу҆тверди́ша . Ꙗ҆́кѡ землѧ̀ бл҃га́ѧ , бл҃года́тнаѧ сѣ́мена прїе́мши , житїе́мъ трꙋдолю́бно бога́тство бл҃же́нїи содѣ́ѧша . боⷢ҇ . Є҆ди́нъ бл҃гі́и пꙋчи́ною бл҃госты́ни , всѧ́ческаѧ бг҃омт҃и содержа́и , твои́ма рꙋка́ма ѡ҆держа́тисѧ сподо́би .

пѣ́снь , ѕ҃ . і҆рмо́съ . Пожрꙋ́ти со́ гласомъ хвале́нїѧ гдⷭ҇и , цр҃кви вопїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Зако́нно ꙗ҆́кѡ до́блїи во́ини , бг҃омꙋ́дрїи оу҆держа́вшесѧ , и҆ до́брꙋю вѣ́рꙋ соблю́дше , бжⷭ҇твеныѧ пра́вды прїе́млете вѣнцы̀ . Пре́жде оу҆́бѡ а҆вва́кꙋмъ высоцѣ̀ воз̾выша́етсѧ , влⷣчнимъ повелѣ́нїемъ . ва́ми же ѻ҆трокови́ца , мꙋ́чима бг҃огла́снїи к̾ воспитѣ́мѣй воз̾врати́сѧ . Сїѧ́етъ ра́ка мч҃нкъ чꙋдесы̀ , и҆ рѣ́ки и҆сточа́етъ и҆сцѣле́ней всѣ́мъ приходѧ́щимъ вѣ́рою . и҆ тѣ́хъ терпѣ́нїю диви́мсѧ . боⷢ҇ . Тѧ̀ є҆ди́нꙋ посредѣ̀ те́рнїѧ ѡ҆брѣ́тъ ꙗ҆́кѡ чи́стыи кри́нъ , и҆ во оу҆до́лїѧхъ цвѣ́тъ ѽ бг҃омт҃и , жени́хъ разꙋ́мныи в̾ тѧ̀ всели́сѧ .

конда́къ . гла́съ , в҃ . Ѿ высоты̀ бжⷭ҇твеныѧ мꙋ́дрїи бл҃года́ть воспрїе́мше , сꙋ́щимъ в̾ напа́стѣхъ ѿра́днѡ пред̾стоитѐ всехва́льнїи . тѣ́мже ѻ҆трокови́цꙋ ст҃і́и ѿ сме́рти го́рькїѧ и҆зба́висте . вы́ бо є҆стѐ вои́стинꙋ є҆де́сꙋ сла́ва , и҆ ми́рꙋ ра́дость . и҆́косъ . Вра́жїѧ мѧ̀ рабо́ты и҆зба́ви і҆с҃е жизнода́вче , твои́хъ страда́лецъ мольба́ми оу҆молѧ́емъ . ꙗ҆́кѡ да непорабощенꙋ̀ стѧжа́въ ѿ стрⷭ҇те́й дш҃ꙋ мою̀ и҆ тѣ́ло , восхвалю̀ тѣ́хъ бы́стрꙋю по́мощь , ꙗ҆́коже во́ гробѣ затворе́наѧ мꙋ́жа лꙋка́вствїемъ . и҆ сїю̀ ско́рѡ пред̾вари́вше ѿ сме́рти и҆зба́виша , зовꙋ́щꙋ , є҆де́сꙋ сла́ва и҆ ми́рꙋ ра́дость .

пѣ́снь , з҃ . і҆рмо́съ . Впещѝ а҆враа́мскїѧ си дѣ́ти перси́дстѣй , любо́вїю бл҃говѣ́рїѧ па́че не́жели пла́менемъ ѡ҆палѧ́еми взыва́хꙋ , блгⷭ҇ве́нъ є҆сѝ в̾ цр҃кви сла́вы твоеѧ̀ гдⷭ҇и . А҆враа́мскїѧ в̾ пещѝ дѣ́ти и҆зба́вивыи , сы́и , и҆ стра́ннꙋю ѻ҆трокови́цꙋ лю́тыѧ напа́сти спасѐ , хода́тайствомъ ст҃ы́хъ оу҆го́дникъ , ꙗ҆́кѡ милосе́рдъ . Сꙋро́вымъ нечл҃чествомъ мꙋ́кꙋ да́выи , всѣ́хъ ѕо́лъ а҆́бїе и҆стѧ́занъ оу҆бі́ица ѕлоимени́тыи , сꙋдо́мъ пра́веднымъ , сло́ва бж҃їѧ премꙋ́дрости и҆ си́лы . Оу҆крѣплѧ́ема є҆́же к̾ ва́мъ наде́жею сла́внїи , ѻ҆трокови́ца затворена̀ во́ гробѣ съ ме́ртвыми , ча́ѧнїѧ непогрѣшѝ . зовꙋ́щи , бл҃гослове́нъ є҆сѝ гдⷭ҇и бж҃е ѻ҆ц҃ъ на́шихъ . боⷢ҇ . Ꙗ҆́кѡ но́во смѣше́ное и҆ свѣтоза́рное пꙋща́ѧ зерца́ло зарю̀ бжⷭ҇твенагѡ дв҃о сїѧ́нїѧ , приложи́вшетисѧ вмѣсти́ла є҆сѝ . блгⷭ҇ве́на ты̀ в̾ жена́хъ пренепоро́чнаѧ влⷣчце .

пѣ́снь , и҃ . і҆рмо́съ . Рꙋ́цѣ распросте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ оу҆гаси́ша добродѣ́телїю поѧ́савшесѧ , и҆́же бл҃гоче́стїѧ люби́тели ѻ҆́троцы взыва́юще , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Всеми́рныи дне́сь на́мъ наста̀ пра́здникъ , мч҃нкъ хрⷭ҇то́въ ѡ҆зарѧ́ющь бл҃года́тїю чꙋде́съ приходѧ́щихъ вѣ́рою . и҆ ра́достїю дх҃о́вною , и҆ любо́вїю зовꙋ́щихъ , бл҃гослови́те всѧ̀ дѣ́ла гдⷭ҇нѧ гдⷭ҇а . Оу҆до́бнѡ и҆сповѣ́дницы твоегѡ̀ бжⷭ҇тва̀ , всѐ оу҆пра́здниша без̾бо́жїе влⷣко , мꙋчи́тель не оу҆боѧ́вшесѧ преще́нїѧ . ꙗ҆́кѡ страда́льцы вѣ́ры , зовꙋ́ще , бл҃гослови́те всѧ̀ дѣ́ла гдⷭ҇нѧ гдⷭ҇а . Премꙋ́дрїи и҆сповѣ́дницы пред̾стоѧ́ще бжⷭ҇твеномꙋ повелѣ́нїю , враго́въ ѡ҆полче́нїѧ побѣжда́ютъ . мече́мъ закала́еми , побѣ́дꙋ пресла́внѡ ꙗ҆́вѣ сїѧ́ющꙋ показа́ша . паде́нїи бо сопроти́вныѧ побѣди́ша . боⷢ҇ . Є҆стество́ма ви́дима двѣма̀ хрⷭ҇та̀ родила̀ є҆сѝ , є҆ди́нꙋ же носѧ́ща ꙗ҆́вѣ и҆поста́сь сложенꙋ̀ бжⷭ҇тва̀ и҆ чл҃чества , сше́дшꙋсѧ є҆сте́ственомꙋ соедине́нїю вои́стинꙋ . тѣ́мъ тѧ̀ бл҃гослови́мъ мр҃і́е бг҃оневѣ́стнаѧ .

пѣ́снь , ѳ҃ . і҆рмо́с̾ . Ка́мень нерꙋкосѣ́чныѧ горы̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , совокꙋпи́въ раз̾стоѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Словесе́мъ послѣ́дꙋюще , бжⷭ҇твеныхъ и҆ бг҃одх҃нове́нныхъ хрⷭ҇то́выхъ за́повѣдей . и҆сповѣ́дницы бг҃освѣ́тлїи , крⷭ҇тъ на ра́мо ра́дꙋющесѧ взѧ́сте , живоно́снымъ стопа́мъ послѣ́дꙋюще достосла́внїи . Всегѡ̀ свѣ́та трⷪ҇цы с̾ весе́лїемъ до́блїи и҆сповѣ́дницы бг҃освѣ́тлїи , а҆́нг҃льскїѧ че́сти воспрїима́ютъ , беспло́тныхъ чино́въ сподо́бльшесѧ соводворе́нїѧ . Ны́нѣ не зерца́ломъ зри́те бл҃же́нныхъ наде́жь , и҆сповѣ́дницы сп҃совы . и҆́стиннѡ же па́че премꙋ́дрїи добро́ты зри́те , вѣнцено́сцы всечⷭ҇тні́и . Ꙗ҆́кѡ пребжⷭ҇твеныѧ трⷪ҇цы равночи́сленїи ꙗ҆́вльшесѧ и҆сповѣ́дницы бг҃огл҃ивїи , тоѧ̀ зарѧ́ми просвѣща́еми . и҆ є҆ѧ̀ ра́ди пострада́вше , живота̀ нетлѣ́ннагѡ ны́нѣ оу҆лꙋчи́ша . боⷢ҇ . Пло́ть прїѧ́ти восхотѣ́въ оу҆краси́выи всѧ̀ сло́вомъ , в̾ тѧ̀ всели́сѧ є҆ди́нꙋ ст҃ѣ́йшꙋ всѣ́хъ ѡ҆брѣ́тъ , и҆ бцⷣꙋ вои́стинꙋ ꙗ҆вѝ мт҃рь дв҃ꙋ .

свѣти́ленъ . И҆́же ѿ́ гроба ѻ҆трокови́цꙋ и҆зба́вльше дре́вле , гꙋ́рїе и҆ само́не и҆ а҆ви́ве мч҃нцы хрⷭ҇то́вы . пред̾вари́те , ꙗ҆́кѡ ѿ́ гроба прегрѣше́ней на́съ и҆збавлѧ́юще . боⷢ҇ . Крѣ́пкимъ тѝ покро́вомъ ѿ навѣ́тъ вра́жїихъ на́съ чⷭ҇таѧ своѧ̀ рабы̀ сохранѝ невреди́мы . тѧ́ бо стѧжа́хомъ є҆ди́нꙋ прибѣ́жище в̾ бѣда́хъ .

На литꙋргі́и , проки́менъ , ѱл҃о́мъ дв҃довъ . ст҃ы́мъ и҆́же сꙋ́ть на землѝ є҆гѡ̀ , оу҆дивѝ гдⷭ҇ь всѧ̀ во́лѧ своѧ̀ в̾ ни́хъ . сти́хъ . пред̾зрѣ́хъ гдⷭ҇а предомно́ю вы́нꙋ , ꙗ҆́кѡ ѡ҆деснꙋ́ю менѐ є҆́сть дасѧ̀ неподви́жꙋ . а҆пⷭ҇лъ , къ є҆фесе́ѡмъ . зача́ло , сл҃г . а҆ллилꙋ́їѧ . возва́ша пра́веднїи , и҆ гдⷭ҇ь оу҆слы́ша и҆́хъ , и҆ ѿ всѣ́хъ печа́лей и҆́хъ и҆зба́ви и҆́хъ . є҆ѵⷢ҇а́лїе , ѿ =лꙋкѝ . заⷱ҇ , ѯ҃д . =прича́стенъ . ра́дꙋйтесѧ пра́веднїи ѡ҆́ гдⷭ҇ѣ .

<< Previous

Contents

Next >>